Mu kiganiro nyunguranabitekerezo RBS yagiranye n’abahagariye ibigo bitandukanye bishinzwe igenzura nka RURA, MINICOM, REMA, RDB na Polisi y’igihugu, kuri uyu wa kabiri tariki 22/05/2012, umuyobozi wa RBS, Dr. Mark Cyubahiro Bagabe, yasobanuye ko ari byiza kugira ikibwirizwa ngenderwaho mu buryo bwo kubahiriza ubuziranenge bw’ibicuruzwa ndetse n’ibikorwa by’abaturage.

Hari uburyo butatu mpuzamahanga RBS yifuza ko u Rwanda rwakoresha akaba ari muri urwo rwego RBS yahamagaye inama kugira ngo higwe uko hatoranywamo uburyo bumwe bwajya bukoreshwa n’ibi bigo bishinzwe igenzura; nk’uko Dr. Mark Cyubahiro yabisobanuye.

Ku bijyanye n’uburyo bwa mbere, buri gicuruzwa kigomba kuba cyujuje amabwiriza asabwa kugira ngo gicuruzwe cyaba kiva hanze cyangwa mu gihugu.

Uburyo bwa kabiri aribwo bwifuzwa kuba bwakoreshwa hano mu Rwanda; ni ugushyiraho itegeko rimwe kandi rihamye rigenga buri bicuruzwa; iryo tegeko rikazatorwa n’abashinzwe gutora amategeko.

Mu buryo bwa gatatu aribwo butishimiwe na benshi; hifuzwa ko hajya hashyirwaho itegeko hashingiwe kuri buri bwirizwa rigenga buri gicuruzwa.

Ubu buryo bwose uko ari butatu bwifujwe kuba bwavugururwa bitewe n’imihindagurikire y’ubukungu cyangwa se y’ibicuruzwa.

Imyanzuro ndetse n’ibisobanuro birambuye kuri iyi nama bizafatwa kuwa gatatu w’icyumweru gitaha tariki 30/05/2012.

Caissy Christine Nakure