Abakozi ba Ngali Energy Ltd bapataniye imirimo y’urugomero Rukarara I, berekanye ibyakozwe kugirango bakumire ibintu byose birimo gukumira icyateza umusaruro mucye w’amazi, harimo gutera ibiti impande ya baraje mu rwego rwo kwirinda ibyaterwa n’imvura nyinshi ndetse bakora neza urugi rwari rwarifunze rukabuza amazi kwivangura n’ibitaka cyangwa se umucanga.

Rukarara II ya kabiri iri mu murenge wa Kibilizi, basanze umushinga warashyizwe mu bikorwa neza ukurikije inyubako n’umusaruro rutanga ugera kuri megawati 2.4 bitewe nuko amazi yagiye aboneka cyane cyane aturutse ku mvura.

Senateri Perrine Mukankusi wari uyoboye itsinda ry’abo basenateri yasobanuye ko bari baje kureba ishyirwa mu bikorwa rya gahunda yo kongera ingufu mu gihugu kugirango inshingano bihaye zo kugera kuri megawati 560 mu mwaka wa 2017 zagerwaho.

Abayobozi basuye izi ngomero bishimiye ibyamaze gukorwa kuri izi nganda zombi. Madam Perrine yakomeje agira ati: “Twasanze zifashwe neza, ndetse harakozwe n’ibikorwa bikomeye byo kurinda ibidukikije, twanasanze ko ungufu zateganyirijwe gutanga zigerwaho, nko kuri Rukarara ya II twasanze megawate 2.2 twateganya zirenzwa zikageza kuri 2.4.”

Izi ngomero Rukarara I itanga ingufu z’amashanyarazi zigera kuri megawate 9 na Rukara II igatanga megawate zigera kuri 2.4, imishinga y’izindi ngomero zigenda zishyirwa mu bikorwa izatuma ingufu z’amashanyarazi zirushaho kwiyongera.

Caissy Christine Nakure