Uyu mugore atangaza ko aya mazi amufasha gutunga umuryango we kuko iyo amazi asanzwe yabuze abantu baza kuvoma iwe bakamwishyura.

Umudugudu wa Burumba ukunze kubura amazi. Abaturage bahamya ko ikibazo cy’amazi ari ingutu dore ko hari n’ubwo bamara icyumweru batayabona.

Iri bura rya buri gihe ry’amazi ryatumye bamwe bihangira imishinga yo kuyafata bakayakuramo ibibatunga.

Iyo amazi asanzwe yabuze baza kuvoma ayo uyu mugore yafashe ava ku nzu ye.

Amazi ava ku nzu ye ajya muri iki kigega cya metero 2 z’ubutambike na metero 2 z’ubujyakuzimu yikoreye ku mafaranga y’u Rwanda ibihumbi 100.

Avuga ko iki giterekerezo yakigize nyuma yo kubona ko amazi akunze kubura mu mudugudu wabo, abakoresha amagare bayazana bakabahenda cyane. Ijerekani ayigurisha amafaranga 50.

Ngo igihe cy’izuba abasha kubona amafaranga ibihumbi 50 ku kwezi. Yakuyemo akaduka gato kandi atunze abana be 2.

Musabyimana Charlotte, umuyobozi w’Akarere ka Nyagatare wungirije ushinzwe imibereho myiza avuga ko ikibazo cy’amazi ari ingume mu Karere ka Nyagatare.

Uyu mugore ngo abasha kwinjiza ibihumbi 50 ku kwezi abikesha amazi y’imvura.

Asanga abaturage bakwiye kugira uruhare mu kwikemurira ibibazo kandi gufata amazi yo ku mazu ni kimwe mu bizakemura ikibazo cy’amazi ndetse bikarinda n’isuri.

Ubu ngo akarere kabonye umufatanyabikorwa ufite ibigega bibika amazi akaba azajya abigurisha abaturage ku mafaranga make.

Ikindi ni uko akarere gafite mu mihigo kubaka ikigega kinini kizakwirakwiza amazi meza cyane mu mirenge itayafite nka Karangazi, Matimba, Rwimiyaga na Musheli.

Mu kwegereza abaturage amazi kandi ubu hari umushinga wo gukwirakwiza amazi meza mu nzuri urimo gukorwa, abaturage bo mu mirenge aya mazi azageramo nabo bakazajya bayakoresha.

SEBASAZA Gasana Emmanuel