Ibi birori byizihirijwe mu nzu mberabyombi y’aka karere iherereye i Gihinga mu murenge wa Gacurabwenge, bihuriramo abakozi bose b’akarere kuva ku bakorera utugari kugeza ku bo ku biro by’akarere.

Umuyobozi w’akarere yibukije abakozi ko imyitwarire myiza mu kazi, no gutunganya neza ibyo umukozi asabwa, bihesha ishema igihugu. Yabasabye kwirinda amakosa mu kazi bashinzwe kuko uwo bigaragaye ko atuzuza inshingano ze yirukanwa, byaba ngombwa agakurikiranwa n’amategeko.

Umuyobozi w’Akarere yagarutse ku ndangagaciro zikwiye kuranga umuyobozi arizo gukunda umulimo,kuvugisha ukuri, kwitangira abandi no kugira umuco wo gukorera mu mucyo ndetse no kurangwa n’ubufatanye.

Mu bitekerezo aba bakozi batanze, bagarutse ku miyoborere myiza y’igihugu, biyemeza kuzakomeza muri uwo murongo mwiza w’ubwitange no gukorana umurava bityo bagakomeza kugira uruhare mu miyoborere y’iki gihugu.

Abahagarariye inzego z’umutekano bitabiriye ibi birori, nab o bongeye kwibutsa abakozi n’abayobozi ubufatanye mu kubungabunga umutekano w’igihugu kuko iterambere ritagerwaho mu gihe igihugu kidafite umutekano.

Marie Josee Uwiringira