Iki kigega cyari kimaze igihe kigerageza imikorere yacyo mu Rwanda, kikaba gifunguwe ku mugaragaro, kuri uyu wa 24 Werurwe 2016 mu rwego rwo kubera ingwate imishinga inyuranye y’iterambere, nk’uko bitangazwa n’Umuyobozi mukuru wacyo, Henri-Marie Dondra.

Mu gihe cyari kimaze kigerageza gukorera mu Rwanda, ngo cyunganiye imishinga ifite agaciro ka miliyari zirenga 192.5 Frw, ndetse gifatanya na Banki ishinzwe Amajyambere(BRD) , gushakisha mu Banyarwanda igishoro kirenga miliyari eshatu z’amafaranga y’u Rwanda.

FAGACE kibera ingwate abashoramari bato n’abacirirtse, kigatanga inguzanyo yishyurwa ku nyungu nto, kigafasha abayisabye gusubika igihe bazishyurira iyo batarabona ubushobozi, ndetse kigatanga ubujyanama ku micungire inoze y’inguzanyo.

Henri-Marie Dondra, Umuyobozi wacyo, ati "Iki kigo kiziye igihe, Leta n’abikorera bafite imishinga ikeneye gutezwa imbere, haba mu buhinzi, mu nganda ndetse na serivisi."

Iki kigega cyishimira kuba cyaragize uruhare mu iterambere ry’inganda zitunganya imboga n’imbuto, kandi ngo kiri muri gahunda yo gufasha abikorera gushinga inganda zikora amapine y’ibinyabiziga no gukomeza guteza imbere inganda zikora inkweto.

FAGACE kandi ngo cyageneye abahinzi bato n’abaciriritse bakizagana ingwate ku bahinizi, nk’igishoro bagomba guheraho kugira ngo bashobore kongera umusaruro.