Abaturage bavuga ko kuba umuhanda ubahuza n’Umujyi wa Kigali warangiritse bibasaba kuzenguruka bakanyura mu murenge wa Rushashi, ku buryo bakoresha amasaha atari munsi y’atatu kugera i Kigali kandi nabwo bakahagera bavunaguritse kubera imikuku.

Bavuga ko n’abarwayi bavanwe ku bitaro bya Ruli bajyanwe i Kigali batoroherwa no kugerayo kubera umuhanda bikaba bibadindiza mw’iterambere, bitewe n’uko i Ruli hafatwa nk’umujyi wa kabiri mu Karere ka Gakenke.

Mugirande Faustin wo mu murenge wa Ruli avuga ko basaba ko bakorerwa umuhanda kuko ubafitiye akamaro cyane.

Agira ati “Iyo imodoka ijyanye nk’umurwayi i Kigali avuye mu bitaro bya Ruli igenda yisimbiza ugasanga ibintu bitagenda neza, kandi urabona inganda hano ziragenda ziyongera ugasanga ikawa ziba zijya i Kigali zibuze uko zigenda kuko imodoka ziba zirimo kugenda nabi.”

Abaturage basaba ko ababifite mu nshingano batangira kubakorera umuhanda kuko n’ubundi umukuru w’igihugu yawubemereye.

Ubuyobozi bw’Intara y’Amajyaruguru busaba abaturage kujya bihangana kuko amikoro y’igihugu akiri macye, ku buryo ibintu byose bitahita bikorerwa rimwe kuko habanje gukorwa indi mihanda nayo umukuru w’igihugu yari yemereye intara y’Amajyaruguru.

Guverineri Bosenibamwe Aimee, avuga ko batirengagije abatuye i Ruli ahubwo hari ibindi byabanje gutunganywa birimo imihanda yo mu mugi wa Musanze.

Ati “Uyu munsi hari ibindi birimo bikorwa, nk’umuhanda yemereye abanyaburera kuva Ruhengeri ujya za Butaro tayari ubungubu imashini zamaze kugera kuri shantiye, wawundi ujya mu burasizuba uvuye kuri Base nawo ugiye gutangira mu kwezi kwa 11, umuhanda Kigali gatuna nawo twawutangiye ejo bundi.”

Bosenibamwe akomeza avuga inyigo y’imihanda Perezida Kagame yabemereye yamaze kurangira, ahubwo hakaba hagiye gukurikiraho gushaka amafaranga, kugira ngo nawo utangire gukorwa gukorwa.

Abdul Tarib