Bavuga ko bacana akabonesha nk’uko bari babyiteze ariko ikibazo kikaba iyo hagize umuntu ucana ikintu gitwara amashanyarazi arenze ay’itara rimwe, kuko aho batuye hose hahita hazima cyangwa amatara agacana ku buryo budashobora kubonesha.

Abaturage baturiye agasanteri ka Karengera gaherereye muri uyu murenge, bavuga ko nubwo bari bishimiye iri terambere ariko ibyishimo byabo bitamaze kabiri, kuko basa nk’aho akaguru kamwe kakiri mu icuraburindi mu gihe batarabyaza umusaruro ayo mashanyarazi.

Umwe yagize ati “Iyo ducanye hakagira ucomekaho n’ipasi cyangwa akatsa imashini zisanzwe yaba izisya cyangwa izindi umuriro uhita ugenda ahantu hose, bigatera ikibazo abandi baturage.”

Umunyamabanga Nshingwabikorwa w’Akarere ka Nyamasheke unakayobora mu nzibacyuho, Habiyaremye Pierre Celestin, avuga ko iki ari ikibazo kiri mu turere twinshi kandi kizwi n’abashinzwe ibijyanye n’amashanyarazi kuko ngo babikoze babizi kugira ngo basaranganye.

Ati “Ni ikibazo kiri mu utundi turere mu guha amashanyarazi abaturage benshi bateganyaga ko ari umuriro wo gucana mu rugo. Kubera iterambere n’icyerecyezo igihugu kiri kuganamo, abantu batangiye gukenera umuriro urenze uwo mu rugo.

Abashinzwe umuriro, ababishinzwe barabizi twatangiye no kugikorera ubuvugizi, ku buryo mu mishinga itaha bazakora inzira nyinshi aho gukora inzira imwe.”

Akarere ka Nyamasheke gafite ingo zirenga ibihumbi 80, ingo zigera kuri 25% zamaze kubona amashanyarazi kandi mu mirenge yose uko ari 15 amashanyarazi amaze kuhagera.