Uyu mushinga yawukoze muri gahunda ya YOUTH ACCESS TO FINANCE FORUM PROGRAM, aho urubyiruko rusabwa kwihangira imirimo mu rwego rwo kubona akazi no kwizamura mu bukungu.

Umushinga w’inkoko yakoze umugejeje kure mu bukungu.

Habumuremyi avuga ko kugira ngo umushinga we utere imbere yabanje kwiga isoko agasanga mu murenge avukamo hari ikibazo cyo kutagira amagi ahagije kandi abawutuye bayakunda.

Uyu musore yahise akora umushinga w’ubworozi bw’inkoko aho abona byibura amagi 2000 ku munsi kuko yoroye inko 2000 kandi zose zitera. Avuga ko kubera amafaranga mesnhi abona, byamworoheye kwishyura amafaranga yagurijwe adategereje ko igihe yahanye na banki kirangira.

Uyu musore akaba yaratsinze abandi ahanini kubera kwiga neza isoko ry’umushinga we, ubu bivugwa ko nanubu atarahaza isoko afite kandi akaba anasabwa amagi n’abantu batandukanye bo hanze y’umurenge akoreramo.

Umunyamabanga nshingwabikorwa w’umurenge wa Kabaya Mupenzi Esdras, avuga ko muri uyu murenge hari amahirwe menshi yo kuhashora imari, ahanini kubera ko ufite isoko rinini mu karere ka Ngororero, Musanze na Nyabihu ndetse hakaba n’abaturuka mu karere ka Rubavu baje kuhahahira.

Urubyiruko rwo mu karere ka Ngororero rukaba rukomeje gushishikarizwa kwitabira kwihangira imirimo kuko usanga ngo abenshi bakitinya nkuko umukozi w’akarere ushinzwe urubyiruko Twayigize Osee, abivuga, YOUTH ACCESS TO FINANCE FORUM PROGRAM, ikaba ari kimwe mu bisubizo bizafasha uru rubyiruko kwihutisha iterambere ryaryo.

Ernest Kalinganire