Mu muhango wabereye i Rwamagana ku Gicamunsi tariki 30/06/2013, MSAADA yahawe icyemezo cy’ishimwe kuko imaze gutanga inka 31 za kijyambere zo mu bwoko bwa Frisian cyangwa se Frisonne ku barokotse Jenoside mu turere twa Rwamagana na Kayonza, ikaba kandi izatanga izindi 40 mu mpera z’uyu mwaka.

Ibi kandi byiyongeraho intanga za kijyambere ibihumbi bitanu MSAADA yatanze zo gutera inka ngo zizabyare izi z’ikomokaho nazo za kijyambere kandi ngo hari icyizere ko MSAADA yazakomeza kujya itanga izindi ntanga ibihumbi bitanu buri mwaka.

Muteteri Esperance ushinzwe gahunda ya Girinka mu Ntara y’Uburasirazuba avuga ko inkunga MSAADA yatanze ku bworozi bwo mu Rwanda ikomeye cyane kuko uretse inka za kijyambare zisaga 70 biyemeje gutanga, ngo intanga ibihumbi bitanu zifite agaciro gakabakaba miliyoni 120 z’amafaranga y’u Rwanda zizateza imbere ubworozi.

Abayobozi ba MSAADA, Billy Kelly na David Zackheim bavuze ko bashaka gusaba abo bafatanya mu Bwongereza bakongera kwikora mu mufuka bakajya batanga inka 60 buri mwaka ku borozi bo mu Rwanda, cyane cyane ku barokotse Jenoside yakorewe Abatutsi bagikeneye inkunga yo kubafasha kwibeshaho neza.

Izi ntanga batanze ariko ngo zizagera ku borozi bose mu Burasirazuba, zikazasakazwa mu mirenge inyuranye muri iyo Ntara. Madamu Muteteri yijeje ko izi ntanga ngo zizahabwa aborozi ku buntu nta kiguzi, aborozi bose bakazajya bishyura amafaranga 500 yo guhemba uwabatereye intanga.

Izi ntanga ngo zifite agaciro k’amafaranga y’u Rwanda asaga ibihumbi 20 ku mworozi wazigura ku isoko mu bikorera basanzwe. Ikigo cy’u Rwanda gishinzwe guteza imbere ubworozi ngo cyizongera izo ntanga, zibashe kugera ku borozi benshi Iburasirazuba.

Abagize MSAADA bamaze imyaka umunani batera inkunga abarokotse Jenoside mu Ntara y’Iburasirazuba, bakaba bavuga ko bamaze gukoresha amafaranga y’u Rwanda asaga miliyoni 560 mu gufasha abarokotse Jenoside.

Ahishakiye Jean d’Amour