Uru ruganda ruzorohereza aborozi bagura ibiryo mu Mujyi wa Kigali babibone hafi kandi byujuje ubuzinarantenge. Ikindi ngo abahinzi bazabona aho bagurishiriza umusaruro wabo uva ku buhinzi kuko rukenera soya n’ibigori byinshi, ndetse by’umwihariko isoko ry’ibigori ryari ikibazo kubera ko byeraga ku bwinshi mu Majyaruguru.

Uruganda rwa Zamura Feeds rufite ubushobozi bwo gukora toni ibihumbi 40 ku munsi.

Umunyamabanga wa Leta muri Minisiteri y’Ubuhinzi n’Ubworozi, Tony Nsanganira witabiriye uyu muhango, yashimye ubushobozi uru ruganda rufite, avuga ko ari igisubizo ku biryo by’amatungo mu gihugu kuko hari amafaranga atari make yakoreshwaga mu kutumiza ibiryo hanze.

Agira ati “Ariko uko twarubonye bigaragara ko rufite ubushobozi bwo kuba rwahaza igice kinini cy’igihugu cyacu... Ikigaragara kindi biratugabanyiriza ibyo twakuraga hanze kandi biduhenze aho dukoresha amavize menshi twagombye kuba dushyira mu bikorwa by’iterambere. Kugira uruganda nk’urunguru biratuma n’ayo madevize agabanuka tukayashyira mu bindi bituma igihugu kirushaho gutera imbere”.

Uru ruganda ruzatanga akazi ku bantu benshi.

Uruganda “Zamura Feeds” rukora ibiryo by’inka, ingurube n’inkoko, mu minsi iri imbere rukazakora iby’amafi. Uru ruganda rufite ubushobozi bwo gukora toni ibihumbi 40 ku munsi z’ibyo biryo kandi bikungahaye ku bikenewe byose kugira ngo amatungo yabiriye atange umusaruro mwiza.

Umworozi w’inkoko witwa Abiyingoma Aimable umaze amezi abiri akoresha ibi biryo, avuga ko mbere y’uko abikoresha inkoko ze zateraga ku kigereranyo cya 85%, none mu mezi abiri ashize abikoresha zitanga umusaruro w’amagi ku gipimo cy’100%.

Icyakora, Abiyingoma avuga ko mu byumweru bibiri bishize, umusaruro zatangaga wasubiye inyuma zitera ku 70%, agakeka ko byatewe n’ibiryo bitameze neza.

Tonny Nsanganira (wambaye ikoti) hamwe n’umushoramari Donnie Smith n’abakozi b’uruganda.

Karugarama uyobora uru ruganda yemeza ko ibiryo byabo byujuje ubuzinantenge kuko mbere yo gushyirwa ku isoko babanza kubinyuza muri labotarwari bagapima niba byujuje ibisabwa byose kugira ngo amatungo yabiriye atange umusaruro.

Uruganda “Zamura Feeds” ni urw’umushomari w’Umunyamerika, Donnie Smith rwuzuye rutwaye miliyoni imwe n’ibihumbi 100 by’amadolari y’Amerika hamwe n’ibikoresho.

NSHIMIYIMANA Leonard