RAB yamuritse imbuto 12 nshya z’ibishyimbo zavuye mu bushakashatsi yakoze

Ikigo cy’Igihugu gishinzwe Ubuhinzi n’Ubworozi (Rwanda Agriculture Board) cyashyize ahagaragara imbuto 12 nshyashya z’ibishyimbo zavuye mu bushakashatsi bwakorewe mu Rwanda mu gihe kigera ku myaka 10.

Muri uwo muhango wabereye mu murenge wa Cyanika mu karere ka Burera tariki 20/06/2012, hagaragajwe ko izo mbuto z’ibishyimbo zifite intungamubiri nyinshi ku buryo abazabihinga n’abazabirya bizabagirira akamaro.

Ubwo bushakashatsi bakozwe kugira ngo mu Rwanda haboneke ibishyimbo byiza bifite intungamubiri kandi byera cyane mu rwego rwo kwihaza mu biribwa; nk’uko byatangajwe na Dr. Daphrose Gahakwa ushinzwe ubushakashatsi muri RAB.

Yagize ati “icyari kigambiriwe (muri ubwo bushakashatsi) cyari kugira ngo tubone ibishyimbo byiza, bitanga umusaruro, bifite intungamubiri kandi byihanganira indwara kugira ngo abahinzi babone umusaruro utubutse n’ababirya babone intungamubiri”.

Muri ayo moko y’ibishyimbo mashya harimo intungamubiri y’ubutare (fer) ituma amaraso y’umuntu aba meza ndetse umubiri we ukihanganira n’indwara, bikongera imibereho myiza ye nk’uko; Dr. Dafrose Gahakwa yabitangaje.

Abagize itsinda ryakoze ubushakashatsi kugira ngo izo mbuto z'ibishyimbo ziboneke.
Abagize itsinda ryakoze ubushakashatsi kugira ngo izo mbuto z’ibishyimbo ziboneke.

Izo mbuto uko ari 12 zamurikiwe abahinzi bo mu Ntara y’Amajyaruguru kuko muri ako gace hera ibishyimbo cyane. Ibishyimbo bikaba binari mu bihingwa byatoranyijwe guhingwa muri iyo ntara.

Innocent Musabyimana, umuyobozi mukuru wungirije wa RAB yavuze ko kuba izo mbuto nshya zarakorewe mu Rwanda, abashakashatsi bagakora amanywa n’ijoro kugira ngo ziboneke ari ukwihesha agaciro.

Yagize ati “…nk’igihugu uyu munsi twihesheje agaciro. Twihesheje agaciro kuko dushobora kujya mu ruhando rw’amahanga tukavuga ngo ibi bishyimbo ni “Made in Rwanda” (byakorewe mu Rwanda)”. Akomeza avuga ko abanyarwanda bagomba kwishimira icyo gikorwa cyiza.

Bamwe mu bahinzi bahawe izo mbuto z’ibishyimbo kugira ngo bazihinge batangaza ko iyo imvura iguye ari nyinshi ibyo bishyimbo bitayihanganira. Dr. Daphrose Gahakwa avuga ko abo bahinzi bashobora kuba barahawe imbuto zitihanganira imvura.

Hari imbuto nyinshi ku buryo ushobora kumenya izihanganira imvura, izitanga umusaruro mwinshi, izibifite byombi; nk’uko Dr. Dafrose Gahakwa yabitangaje.

Abana bagaburiwe ku bishyimbo bishya bavuze ko biryoshye.
Abana bagaburiwe ku bishyimbo bishya bavuze ko biryoshye.

Mu muhango wo kumurika imbuto nshya 12 z’ibishyimbo, hagaragajwe ko mu myaka 10 yashize hakorwa ubushakashatsi bw’izo mbuto, abashakashatsi iyo bamaraga kubona imbuto bahitaga bajya kuyiha abahinzi kugira ngo barebe niba koko yujuje ibyo bifuza.

Izo mbuto zose zamuritswe zujuje ibisabwa kandi zuzuyemo intungamubiri ku buryo zikunzwe no ku isoko; ariko kugira ngo zibashe kwera neza, zisaba ko bazifumbiza ifumbire y’imborera nk’uko byagaragajwe.

Bamwe mu bari bitabiriye ibyo birori cyane cyane abana biga mu mashuri abanza bagaburiwe ibishyimbo bitetse byeze kuri izo mbuto nshya. Ababiriye bavuze ko biryoshye.

Kugira ngo ubwo bushakashatsi bwose bugerweho RAB yatewe inkunga n’ibigo bitandukanye byita ku buhinzi bikorera hirya no hino ku isi, birimo Harvest Plus, AGRA n’ibindi.

Nobert Niyizurugero

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka