Ibi aba bahinzi babivuze tariki 22/05/2013, ubwo bahugurwaga mu bijyanye no gukoresha imashini zihinga, zo mu bwoko bwa power tiller na tracteur, bagejejweho n’ishuri rikuru ry’uuhinzi n’ubworozi ISAE Busogo ku bufatanye n’akarere ka Musanze.

Munyemanzi Frodouard, umuhinzi wo mu murenge wa Gataraga, avuga ko yasanze gukoresha imashini bigabanya amafaranga bakoreshaga mu buhinzi bwabo ku kigero cya ½, kuko umurima washoboraga guhingwa ku mafaranga ibihumbi 60, ushobora guhingwa hakoreshejwe amafaranga ibihumbi 30.

Avuga kandi ko guhingisha imashini byongera umusaruro, kuko umurima uba uhinze neza. Ati: “Imashini ihinga igera hasi cyane mu butaka. Hari umuhinzi uhinga ahina amaboko maze isuka ntigere kure bigatuma imyaka itera neza”.

Kamili Hodal, agoronome w’akarere ka Musanze, avuga ko ubu imashini zo guhingisha zibasha kuboneka ku bufatanye na RAB, aho abahinzi bishyize hamwe muri gahunda yo guhuza ubutaka bukagera kuri hegitari byibura ebyiri bashobora kuyitira bakayemererwa.

Ati: “umuhinzi ufite ubutaka bunini cyangwa se abahinzi bishyize hamwe batira imashini maze bakayihabwa hamwe n’umutekinisiye wayo, bityo bo bakishakira amavuta yayo gusa. Ibi bituma igiciro bari gukoresha kigabanuka ku rugero rugaragara”.

Avuga kandi ko izi mashini zishoboye, ku buryo ubutaka bwa Musanze bushobora guhingwa n’izi mashini, gusa ngo iyo ari ahantu hatameze neza nk’ahari amabuye yakwangiza imashini, abahinzi basabwa kubanza kuhategura n’amaboko ngo bitangiza imashini.

Izi mashini ngo si uguhinga gusa zikora, kuko zishyirwaho ibikoresho bitandukanye zikaba zabasha no gutera no kubagara kuko batera ku mirongo iyo bakoresha imashini, gusarura, gutwara amafumbire no gutwara umusaruro.

Jean Noel Mugabo