Mu myaka itanu abaturage bose ba Nyagatare bazaba bagerwaho n’amazi meza

Yabitangaje ku wa Kabiri tariki ya 01 Nyakanga 2025, ubwo hatahwaga umuyoboro w’amazi, Mirama-Busana-Kamagiri-Bugaragara, ureshya n’ibilometero 24.7.

Ni umuyoboro wuzuye utwaye Amafaranga y’u Rwanda Miliyoni 600, ukaba uriho amavomo 20, ukaba uha ingo zirenga 2,000 amazi meza.

By’umwihariko mu Murenge wa Rwimiyaga ukaba uha amazi meza abaturage b’Akagari ka Gacundezi na Nyarupfubire.

Hakurikijwe ibarura ry’ingo n’imiturire ry’umwaka wa 2022, Abaturage 78% ni bo bagerwaho n’amazi meza mu Karere ka Nyagatare.

Visi Meya Matsiko avuga ko ubu amazi aboneka ku munsi ari metero kibe (m3) 9500, mu gihe hakenewe nibura arenga metero kibe 20,000 ku munsi.

Avuga ko kugira ngo amazi akenewe aboneke cyangwa anarenge ku buryo haboneka ayuhirwa amatungo ndetse no kuhira imyaka, hari imishinga ibiri irimo gukorwa ku buryo izatanga amazi arenga metero kibe 50,000 ku munsi.

Yagize ati “Hari umushinga urimo gukorwa wo kubaka urugomero rwa Muvumba ‘Multi-Purpose dam’ uzatanga metero kibe 50,000 ku munsi. Hari n’uruganda rugiye kuvugururwa ku mugezi wa Ngoma ruzatanga metero kibe 12,000. Mu gihe kitageze ku myaka itanu ikibazo cy’amazi kizaba cyararangiye.”

Umuturage wo muri santere ya Bugaragara, Furaha Emmanuel, avuga ko ikibazo cy’amazi cyari ingume kuko yabonekaga ku mugezi w’umuvumba cyangwa ku gishanga cya Karangazi.

Abaturage batabashije kujya kuyizanira ngo bayaguraga amafaranga 300 ku ijerekani, naho mu gihe cy’imvura bakayagura amafaranga 100 ku bafashe ay’imvura mu bigega.

Ati “Amazi yari ingume ku buryo n’abana kwiga byari ikibazo bikaba byaratezaga n’umwanda mu baturage.”

Kobusinge Josephine, avuga ko mbere bakoreshaga amazi y’ibiziba ku buryo abana bahoraga barwaye, ariko ubu ngo ikibazo cyarakemutse kuva aho baboneye amazi meza.

Yagize ati “Kumesa byari ikibazo kubera kutabona amazi hafi yacu. Kubera amazi mabi, abana bahoraga barwaye infegisiyo (infection), inzoka zo mu nda n’izindi ndwara ziterwa no gukoresha amazi mabi.”

Hashize amezi atandatu, abaturage b’Utugari twa Gacundezi na Nyarupfubire babonye amazi meza, aho ijerekani imwe igura amafaranga y’u Rwanda 20.

Yagize ati “Hari ukuntu wasangaga ku bigo by’amashuri ubutaka bukoreshwa mu guhinga indabo ariko byabaye byiza nanone kubona ahari indabo hari imboga bikaba na byiza ku rubyiruko rwacu gufata amafunguro arimo intungamubiri zikenewe.”

Akomeza agira ati “Bamwe mu bayobozi b’amashuri hari abagiraga umutima mwiza amafaranga babona bakagura ibyunganira ariyo mafunguro ariko hari n’abatarabikozwaga ugasanga ifunguro ririho ibishyimbo gusa. Ayo mafaranga yasohokaga mu kugura imboga ubu akoreshwa indi mirimo ku ishuri murabizi haba abakozi benshi.”

Umuyobozi wa GS Rutenderi, Rwigisha Joseph, avuga ko bahoranye akarima gato k’imboga za dodo ku buryo kugaburira abanyeshuri byabasabaga amafaranga agera ku 200,000 ku cyumweru kuko ku buso bwa kimwe cya kabiri cya hegitari bukoreshwa mu buhinzi ahanini hahingwaga ibigori cyangwa ibishyimbo.

Agira ati “Twaguraga imboga ku isoko ariko bakaduhenda ariko aho ubutaka bwose twahisemo kubuhinga imboga gusa ubu ntitukizihaha ahubwo ayo mafara

Kuri GS Bihinga bafite ubutaka bukorerwaho ubuhinzi bungana na hegitari ebyiri bwakoreshwaga mu guhinga ibigori cyangwa ibishyimbo ku bantu babukodeshejwe.

Amafaranga y’ubukode bw’ubu butaka ngo byabaga ngombwa ko bongeraho andi mu guhaha imboga gusa kuko batazihingaga kandi zikenewe ku ifunguro ry’abanyeshuri.

Mu cyumweru ngo bakoreshaga amafaranga 60,000 mu guhaha imboga gusa kandi nabwo zidahagije ku ndyo yuzuye y’abanyeshuri.

Kamugisha Nathan, umwe mu banyeshuri, avuga ko ubuhinzi bw’imboga bwabaye igisubizo.
Yagize ati “Mbere twaryaga ibishyimbo bitarimo akantu ariko ubu biba birimo dodo, ibihumyo n’izindi mboga ku buryo indyo yuzuye tuyibonera hano ku ishuri.”

Abana bibasaba kunyura mu muhanda biruka kandi bakambukira aho babonye

Umuhanda Nyagatare-Ryabega, uwa GS Nyagatare ugana mu mujyi rwagati, uva mu mujyi ugana kuri sitade ya Nyagatare ndetse n’ugana ku mudugudu w’ikitegererezo wa Nyagatare (Kinihira), ni yo ikoreshwa cyane n’abanyeshuri kuko hari ibigo by’amashuri byinshi.

Bamwe mu batwara abagenzi kuri moto ndetse n’abakorera hafi n’umuhanda ugana kuri sitade ya Nyagatare, cyane haruguru y’Akagari ka Barija, bavuga ko bahorana impungenge z’abanyeshuri bakoresha uyu muhanda kuko ubamo ibinyabiziga byinshi.

Ubusanzwe ukoreshwa n’abanyeshuri baturuka mu Kagari ka Barija, baza kwiga mu bigo by’amashuri biri mu mujyi wa Nyagatare cyane ibiri muri muri aka Kagari.

Umubyeyi wari uherekeje umwana we utashatse ko amazina ye ajya mu itangazamakuru, yavuze ko impamvu aherekeza umwana we ari uko aba afite impungenge z’uko yahura n’impanuka bitewe n’umuhanda anyuramo ibinyabiziga byinshi.

Ati “Mu by’ukuri hariya hantu hateye impungenge, moto ziva mu mujyi, izizamuka ruguru n’izijya hariya bigishiriza ibinyabiziga ziba ari nyinshi hakiyongeramo n’imodoka. Abana usanga bahanyura biruka bacungana n’ibinyabiziga. Mu by’ukuri iyo umwana atashye ushima Imana.”

Umumotari, Nkurunziza Hassan, avuga ko umutekano w’aba bana uteye inkeke kuko bahanyura ari benshi cyane amasaha ya saa sita n’ay’umugoroba bataha, bagenda banyuranamo n’ibinyabiziga.

Bamwe mu batwara ibinyabiziga ntibaha uburenganzira abanyamaguru kabone n’ubwo baba bari mu murongo ubemerera gutambuka mbere

Avuga ko hakwiye gushyirwaho umuntu ukumira ibinyabiziga mu gihe abanyeshuri batambuka, ariko n’abatwara ibinyabiziga bakubaha abanyamaguru.

Yagize ati “Abatwara ibinyabiziga bamwe ntibubahiriza uburenganzira bw’abanyamaguru, byongeye abanyeshuri ni abana binyurira aho bashatse ntibazi iby’umurongo bambukiraho (zebra crossing). Bibaye byiza hashyirwaho umuntu bakamwambika umwambaro agakumira ibinyabiziga mu gihe abanyeshuri barimo kwambuka umuhanda, nibidakorwa hano hazagwa abana benshi.”

Avuga ko bibabaje kubona hari abarimu bategera abanyeshuri ku marembo y’amashuri, aho bagiye ku muhanda bakabambutsa.

Mu bayobozi b’amashuri Kigali Today yagerageje kuvugisha, bose banze kugira icyo babivugaho uretse umwe wavuze ko koko icyo kibazo yakibonye, kandi bazakiganiraho n’ababyeyi hagashyirwaho umuntu wambutsa abana yenda akagenerwa igihembo.

Visi Meya Murekatete avuga ko ku bufatanye na Polisi y’Igihugu ishami rishinzwe umutekano wo mu muhanda, bagiye kongera kwigisha abanyeshuri uko bakoresha umuhanda, kuko na we yemera ko hari imihanda abana bambuka ishobora kubateza impanuka.

Ikindi ariko ngo bagiye kuvugana n’abayobozi b’amashuri, cyane irya Good Foundation ku buryo hashyirwaho umuntu w’umukorerabushake wafasha abana kwambuka neza umuhanda.

Yagize ati “Murakoze rwose kutugaragariza iki kibazo bigaragara ko cyateza impanuka abana. Twamaze no kuvugana n’ubuyobozi bwa Good Foundation kuko abana benshi banyura hariya niho biga kandi ishuri riri muri metero 50 uvuye aho hantu abana bambukira, na bo bakore nk’ibyo GS Nyagatare yakoze kuko ifite umuntu wambutsa abana.”

Ni ugutanguranwa n’ibinyabiziga

Akomeza agira ati “Icya mbere ni ukwigisha abana kwambuka neza, icya kabiri ni ukureba abakuru ndetse n’abarezi kuko barahegereye, ni ahantu harimo nka metero 50 uvuye ku ishuri ku buryo n’abarezi bahahagarara abana bakambuka neza ntihazagire uhagirira impanuka.”

Basaba ko abana bose bagaruka mu ishuri

Yabitangaje ku wa Gatatu tariki ya 11 Kamena 2025, ubwo mu Murenge wa Gatunda, hakorwaga ubukangurambaga bugamije kugaragariza ababyeyi uruhare rwabo mu burezi bw’umwana hagamijwe ko ntawe uta ishuri.

Avuga ko ingamba bafite zigamije kubagarura, harimo ubukangurambaga mu babyeyi hagamijwe kubereka uruhare rwabo mu burere bw’abana babo, ndetse no mu burezi kuko kenshi babohereza ariko ntibakurikirane ngo bamenye ko abana bageze ku ishuri.

Yagize ati "Igikomeye ku mubyeyi ni ukumenya ko umwana yiga amusura ku ishuri kandi akanamuha ibyangombwa nkenerwa bituma yiga neza, ariko yabanje kumuha ibijyanye n’uburenganzira bwe mu rugo harimo kugaburirwa, kugirirwa isuku no kumurinda ihohoterwa iryo ariryo ryose."

Avuga ko bihaye ngamba ku buryo buri nama ibahuza n’abaturage cyane mu Nteko z’abaturage, bibutswa uruhare rwabo mu burere n’uburezi bw’abana babo kandi ngo byatangiye gutanga umusaruro kuko mu bana barenga 5,000 bari barataye ishuri, 4,000 birenga barigarutsemo.

Uyu musaruro ariko ahanini ngo ushingira ku gukurikirana imyigire y’abana ya buri munsi ku buryo hamenyekana iminsi umwana yasibye buri cyumweru ababyeyi be bakabazwa impamvu mu Nteko z’abaturage.

Yagize ati "Umwana uko asiba dutekereza ko azata ishuri, abarimu bakora urutonde rw’abatiga neza rugashyikirizwa abayobozi mu nzego z’ibanze noneho rwa rutonde rugasomwa mu Nteko z’abaturage bakanamenyeshwa ko bidakwiye kandi benshi bafata ingamba zo kwisubiraho ku buryo bufatika."

Ikindi ariko ngo hari ingamba zo kurwanya amakimbirane yo mu ngo kuko ariyo afite uruhare mu kwiga nabi kw’abana kuko abebyeyi batamenya imyigire y’abana babo ndetse bamwe ntibabone ibikoresho by’ishuri.

Umukozi w’Ikigo cy’Igihugu gishinzwe Uburezi bw’Ibanze, Ngoga Eugene, avuga ko mu ngamba zafashwe zigamije kurandura ikibazo cyo guta amashuri kw’abana harimo kongera ibyumba by’amashuri no kuba Minisiteri y’Uburezi yarahawe uburenganzira bwo kugira impinduka mu miyoborere y’amashuri n’ibindi bijyanye nabyo.

Yagize ati "Kugaburira abana ku mashuri ni ingenzi, turimo kugerageza kubona abarimu bahagije turafatanya n’abayobozi mu Turere ariko igikomeye ni ireme ry’uburezi, abana bige babikunze, babishaka kandi bafite n’icyerekezo cy’aho bashaka kugera."

Avuga ko guta ishuri kw’abana biterwa n’impamvu nyinshi ariko birimo bigabanuka cyane ugereranyije n’imyaka ishize.

Mukakayange Monica, umwe mu babyeyi, avuga ko ubundi umubyeyi afite uruhare rukomeye mu myigire myiza y’umwana cyane amushakira ibyangombwa by’ishuri no kumwitaho ku buryo aba mu buzima butuma akunda ishuri.

Avuga ko ubundi bishoboka umubyeyi yakabaye asura umwana ku ishuri nibura rimwe mu byumweru bibiri akamenya imyigire ye ndetse akanaganira n’umwarimu umwigisha akamenya intege nke z’umwana we.

Gusa ariko ngo mu gace batuyemo haracyari ikibazo cy’amakimbirane mu miryango ahanini ashingiye ku businzi.

Agira ati "Ikintu gikabije cyane muri iki gihe ni amakimbirane y’ababyeyi, ahanini ashingiye ku businzi ku buryo n’ingo nshya usanga zisinda, umugabo uburezi bw’abana akabuterera umugore, umugore nawe akirebaho kubera akazi kenshi ntajye gusura umwana ku ishuri, ayo makimbirane rero yica uburezi bw’umwana."

Ubu bukangurambaga bwateguwe n’umuryango utari uwa Leta, FH Rwanda, umukozi wawo ushinzwe Uburezi, Sonia Mpinganzima, avuga ko ubu bukangurambaga bugamije gushishikariza ababyeyi kugira uruhare mu burezi n’uburere bw’abana babo bukaba bumaze ukwezi bukorerwa mu Turere tune harimo na Nyagatare.

Avuga ko hakozwemo ibikorwa byo gusura imiryango igaragaza ibibazo bituma abana bava mu mashuri n’abiga ntibige neza.

Ngo hanabaye kandi ibikorwa byo kwitabira inama z’abaturage babashikariza ibyiza byo kwigisha abana no gukurikirana imyigire yabo.

Yagize ati "Turifuza ko ababyeyi bagira uruhare mu burezi bw’abana babo. Akenshi hari ibyo bitiranya bakumva ko niba bamuhaye ibikoresho by’ishuri ibindi ari ibya mwarimu nyamara twagombaga kubibutsa ko uburezi buhera mu rugo kandi iyo bagize uruhare mu kumukurikirana umwana atsinda neza kandi atari akazi ka mwarimu, ubuyobozi bw’ishuri cyangwa Leta."

Avuga ko iyo umubyeyi agize uruhare mu burere n’uburezi bw’umwana we, ireme ry’uburezi rigerwaho.

Avuga ko mu bikorwa bakoze mu Murenge wa Gatunda mu guteza imbere uburezi harimo kubaka ibyumba by’amashuri, gutanga ibigega bifata amazi kugira ngo abana babone amazi meza, guhugura abarimu mu kubazamurira ubushobozi n’ibindi.

Hejuru y’ibi ngo harimo n’ibikorwa byo kuzamura imibereho myiza y’umuturage mu buhinzi n’ubworozi kugira ngo hatabaho urwitwazo rw’uko nta bushobozi bwo kwigisha abana.

Minisitiri Uwimana avuga ko iyo umuryango umwe uzimye, Igihugu kiba kibuze amaboko

Yabitangaje ku wa Gatandatu tariki ya 31 Gicurasi 2025, ubwo mu Karere ka Ngoma, hibukwaga ku nshuro ya 17, imiryango yazimwe muri Jenoside yakorewe Abatutsi 1994.

Avuga ko iyo hibukwa imiryango yishwe ikazima hazirikanwa abari bayigize n’ababujijwe uburenganzira bwo kuvuka, abo bose bakaba barishwe mu mugambi mubisha wo kurimbura Abatutsi ku buryo hatagombaga kugira urokoka ngo agire umuryango.

Avuga ko abari bagize iyi miryango bazahora bibukwa, kandi Abanyarwanda muri rusange bahari.

Avuga ko ari inshingano y’Abanyarwanda kubasubiza agaciro bambuwe no guharanira ko Jenoside itazaba ukundi.

Kwibuka iyi miryango ngo bifasha mu guhangana n’abahakana Jenoside yakorewe Abatutsi, abahembera urwango n’ingengabitekerezo ya Jenoside haba mu Gihugu no hanze yacyo.

Minisitiri Uwimana avuga ko Igihugu cyemera ko umuryango ari inkingi ihetse Abanyarwanda.

Ati “Iyo umuryango umwe uzimye Igihugu kiba kibuze amaboko. Kuzima kw’imiryango ni ko kuzima kw’Igihugu. Nka Minisiteri y’Umuryango intego ni ukugira umuryango ushoboye kandi utekanye, kugira ngo bishoboke ababyeyi turasabwa gukomera ku nshingano zacu zo kurerera u Rwanda, dutoza abana bacu indangagciro zikwiye.”

Minisitiri Bizimana Jean Damascène acana urumuri rw’icyizere

Yabasabye kandi gutoza abana kubaha no kwiyubaha, gukunda umurimo no gukunda Igihugu ku buryo babasha kukitangira.

Umuyobozi wa IBUKA, Dr Philbert Gakwenzire, avuga ko kwibuka imiryango yazimye no kuyiha agaciro ari ngombwa, kuko bifasha kunyomoza abakigoreka amateka ya Jenoside yakorewe Abatutsi, abayipfobya bahakana bakanapfobya Jenoside yakorewe Abatutsi.

Avuga ko kwegeranya amazina, amafoto n’ubuhamya by’ahiciwe Abatutsi ari intwaro ikomeye yo kurwanya ihakana n’ipfobya rya Jenoside.

Yasabye ababyeyi, abayobozi n’abakuru gusangiza ababyiruka ukuri kw’amateka ya Jenoside. Yasabye kandi ko imiryango yazimye yazirikanwa, hakamenyekana amazina y’abayigize n’abari bayigize hanabikwe amateka n’ibirango byerekana aho biciwe.

Yagize ati “Tubike ibimenyetso by’amateka dushyireho n’ibindi birango byerekana aho biciwe, twandike ubuhamya, tubibuke mu nzu z’ibitabo no ku mbuga nkoranyambaga. Dukoreshe inzira zose maze amateka yabo azahoreho.”

Mu buhamya bwe, Mukantaganzwa Liliose, wari utuye mu cyahoze ari Komini Rukira, yavuze ko Jenoside yatangiye yaragiye gusura kwa nyirarume i Gatore mu Karere ka Kirehe.

Iyo avuga uko yarokotse urupfu kenshi bisa n’ibitangaza, kuko byageze n’aho uwagombaga kumwica bwa nyuma ari we wamubwiye ngo yiruke ahunge kuko interahamwe zari zamenye amakuru ko Inkotanyi ziri hafi.

Yagize ati “Baraduhamagaje twese tuva aho twihishe batubwira ngo hatanzwe ihumure turaza naho bashakaga kumenya abasigaye ngo babice. Ubwo buri bantu batandatu babahaga interahamwe iribubice, jye n’abandi uwo baduhaye twageze aho atwicira aratubwira ngo “mwiruke mwa bigoryi mwe.” Impamvu ariko ni uko interahamwe nyinshi zari zatangiye guhunga kuko ngo Inkotanyi zari hafi.”

Umuyobozi w’Akarere ka Ngoma, Niyonagira Nathalie, yavuze ko kuba hari imiryango yishwe ikazima muri Jenoside yakorewe Abatutsi 1994, ari ikimenyetso ntakuka cy’uko Jenoside wari umugambi wo kurimbura burundu Abatutsi, wateguwe ukanashyirwa mu bikorwa n’ubuyobozi bubi bwariho icyo gihe.

Yavuze kandi ko kwibuka imiryango yishwe ikazima bikwiye kuba isomo ku rubyiruko ryo gukurana umuco w’ubumuntu, kumenya agaciro k’undi, kwanga ikibi ahubwo bakarushaho gukunda Igihugu.

By’umwihariko mu Karere ka Ngoma, hibutswe imiryango isaga 700 y’Abatutsi yishwe ikazima kubera ubukana Jenoside yateguranywe, bigizwemo uruhare n’ubuyobozi bwariho ndetse n’abari abasirikare bakuru bavukaga mu Makomini yahujwe bikaba AKarere ka Ngoma.

Shyaka Pacifique, umunyeshuri muri RP Ngoma avuga ko kwibuka imiryango yishwe ikazima ari ukubasubiza agaciro no guhagarara mu mwanya w’ababo, bakabaye babibuka ariko bidashoboka.

Avuga ko urubyiruko rukwiye gukuramo isomo ryo kwimakqza ubumwe n’ubudaheranwa.

Ati “Ku rubyiruko ni ngombwa ko twimakaza ubumwe n’ubudaheranwa kugira ngo ibyabaye bitazongera ukundi.”

Bakoze urugendo rwo kwibuka

Mukandayambaje Marie Louise, ukomoka mu Karere ka Kirehe, avuga ko kuba muri Jenoside hari imiryango yazimye bikwiye kuba ikimwaro ku bayiteguye, ariko bikaba n’isomo ku bandi bantu kurwanya amacakubiri.

Mu Gihugu cyose habarurwa imiryango 15,593 yishwe irazima muri Jenoside 1994, yari irimo abantu 68,871, ni mu gihe mu Ntara y’Iburasirazuba habarurwa imiryango 2,246 igizwe n’abantu 9,979.

Abamotari bitwaye neza mu muhanda ngo ubushingizi bishyura bwagabanuka

Yabitangaje ku wa Gatatu tariki ya 28 Gicurasi 2025, ubwo mu Karere ka Nyagatare haberaga ubukangurambaga bwa Gerayo Amahoro, by’umwihariko kuri kasike ikwiye.

Avuga ko 90% by’impanuka zo mu muhanda ahanini ziterwa n’abayobozi b’ibinyabiziga, kandi inyinshi muri izo zikaba iz’abatwara moto.

Yongeraho ko hagiye habaho amavugururwa menshi hagamijwe gufasha ukora umwuga w’ubumotari, ngo arusheho kwiteza imbere ndetse anateze imbere Igihugu.

Avuga ko ikiguzi cy’ubwishingizi ku binyabiziga cyane cyane moto kuba kiri hejuru bishingira ku myitwarire y’abasaba ubwishingizi.

Yagize ati “Igiciro cy’ubwishingizi cyane cyane gishingira ku bantu baba basaba ubwishingizi. Ibigo bitanga ubwishingizi bireba ingaruka cyangwa imbogamizi ziri muri wowe urimo kubusaba igiciro kijyana nabyo.”

Abamotari basabwe kwitwararika mu muhanda kugira ngo bagabanye impanuka

Icyakora avuga ko inzego bireba zirimo kuganira kuri iki kibazo, ariko uruhare runini rukaba urw’abamotari kuko ngo igihe bazaba bitwaye neza impanuka zikagabanuka igiciro cy’ubwishingizi kizagabanuka.

Umumotari witwa Gad Niyomukunzi, ukorera mu Mujyi wa Nyagatare, avuga ko ashima Leta ku mahugurwa ihora ibaha ajyanye no kwirinda amakosa akorerwa mu muhanda.

Avuga ko amakosa menshi bakunze gukora ari ugutendeka, gutwara ikinyabiziga nta byangombwa ndetse no gutwara ikinyabiziga nta bwishingizi, ahanini kubera ko igiciro cyabwo kiri hejuru cyane.

Ati “Umuntu ufite moto irengeje imyaka 10 acibwa amafaranga arenga 260,000, nta handi hantu azayakura bigatuma yica akazi k’abamotari agakora kugira ngo abone ayo mafaranga kuko ntazayitunga itagira ubwishingizi, akayahiga mu buryo butemewe, bigashyira mu kaga umugenzi atwaye ndetse nawe ubwe kuko adafite uburenganzira bwo gutwara umugenzi.”

Akomeza agira ati “Jye mbona ikibazo ari uko ubwishingizi bugoye kuko buri hejuru, mudukoreye ubuvugizi batugabanyiriza ubwishingizi bwa moto noneho n’ufite moto adakoresha Taxi akabasha kwishyura bitamugoye, kuko ubu ufite moto yo kwigenderaho asigaye asora nk’ay’uwa Taxi.”

Gad Niyomukunzi arifuza ko ikiguzi cy’ubwishingizi cyagabanywa kuko gitera ibibazo mu mwuga wabo

Avuga ko ibi bibazo ari byo bituma n’abadafite ibyangombwa byo gutwara abagenzi, babijyamo bashakisha amafaranga yo kwishyura ubwishingizi bwa moto batunze.

Niyontwari Fils de Dieu na we utwara moto, yagaragaje ikindi kibazo cy’abamotari batwara moto zicyanditse ku makoperative bakoreragamo mbere y’uko akurwaho, ubu bakaba barabuze abo bahererekanya nabo ububasha nyamara barasoje kwishyura inguzanyo bari bahawe n’ayo makoperative.

Yagize ati “Mu rugo bamfatiye inguzanyo binyuze muri Koperative y’abamotari nabarizwagamo, nsoje kwishyura nagiye gusaba ko bampindurira ikajya mu mazina yanjye aho kuba aya Koperative.”

Ati “Ibyo nasabwaga byose maze kubisoza ngo mpindurirwe, Ikigo cy’Igihugu cy’Imosoro n’Amahoro barambwiye ngo iyi Koperative irabanza yishyure ideni ibabereyemo kandi ntigihari uyu munsi.”

Yifuza ko Ikigo cy’Igihugu cy’Imisoro n’Amahoro cyabahindurira ibyangombwa, moto zikajya mu mazina yabo kugira ngo batunge ibibanditseho.

Byiringiro Alfred, avuga ko iki kibazo koko gihari ariko bitazarenza ukwezi kwa Kamena uyu mwaka kitarakemuka ku bantu bigaragara ko basoje kwishyura inguzanyo za moto bari bahawe.

Kasike zikwiye ntiziraba nyinshi ku isoko ariko mu gihe cya vuba zizaba ari nyinshi

Naho ku kibazo cy’umwambaro w’abamotari, yavuze ko nabyo biri mu nzira zo gukemuka bahereye mu Mujyi wa Kigali, ku buryo nazo zitazarenza ukwezi kwa Kamena zitaraboneka no mu Ntara, kuko bizakemura ikibazo cy’akajagari mu mwuga wo gutwara moto.

Kuri kasike zikwiye ngo na zo ziri hafi kuboneka ari nyinshi ku isoko, kuko abasanzwe bazicuruza babanje gupimisha izo bari bafite banarekwa izemewe zuzuje ubuziranenge ku buryo batumije nyinshi.

Ariko nanone ngo ntawe uzafatwa kuko adafite iyujuje ubuziranenge, kuko ubu bemerewe kuba bakoresha izari zaratumijwe mbere zikiri mu maguriro.

Polisi y’Iguhugu yasabye abamotari kwirinda ibisindisha no guhorana isuku

Abamotari biyemeje gutanga amakuru ku bivanga mu mwuga wabo bikabateza isura mbi

Aya ni amwe mu macumbi yubakirwa abatishoboye

Abitangaje mu gihe abajyanama bagize Inama Njyanama y’aka Karere, bamaze iminsi ibiri batangiye ukwezi k’umujyanama ku bikorwa bazagiramo uruhare, ku nsanganyamatsiko igira iti “Imparirwakurusha nkore neza bandebereho.”

Ni igikorwa bazakorera mu Mirenge yose igize Akarere, aho bahura n’abaturage bakaganira ku bibazo bibangamiye, ibyifuzo ariko bakanakemura bimwe mu bibazo bahasanze.

Kabagamba avuga ko bimwe mu bibazo bikibangamiye imibereho myiza y’abaturage ari amacumbi ku miryango itishoboye, inzu zishaje ku buryo zikeneye gusanwa ndetse no gutuza abakiri mu manegeka.

Ati “Ikibangamiye abaturage ngira ngo twese tuzi ni ukubonera abantu aho batura kandi habereye Umunyarwanda. Ikiciro cya mbere ni abantu badafite aho baba kandi badafite n’ubushobozi, harimo abageze mu zabukuru cyangwa abafite ubumuga badafite abandi babibakorera.”

Akomeza agira ati “Ikiciro cya kabiri, ni abatishoboye barimo mu nzu zishaje cyane zikeneye gusanwa. Icya gatatu ni abatuye mu manegeka, abatuye ahatemewe, hafi n’igishanga, ahantu hahanamye, turifuza ko ahava akajya gutura ahantu heza hamwe n’abandi.”

Nitegeka Esperance warokotse Jenoside utishoboye wamaze guhabwa icumbi mu Mudugudu w’ikitegererezo wa Nyagatare (Kinihira)

Avuga ko iki kibazo ari cyo babona kigoye cyane kuko gisaba ingengo y’imari nyinshi, ariko akavuga ko n’ubwo bimeze gutyo muri Kanama uyu mwaka wa 2025, bamwe bazaba bamaze kubona amacumbi abandi bakazayabona mu mwaka w’ingengo y’Imari 2025-2026.

Kabagamba avuga ko muri uku kwezi k’umujyanama, bazibanda cyane ku bibazo bibangamiye imibereho myiza y’abaturage, harimo amazu yubakiwe abatishoboye, isuku n’isukura ndetse n’imirire y’abana.

Icya kabiri ngo ni ibibazo bifitanye isano n’ubutaka ku buryo bazafatanya n’ikigo cy’ubutaka mu gukosora imbibe, n’ibindi bibazo bigaragaramo.

Icya gatatu ngo ni ibikorwa by’abafatanyabikorwa mu iterambere ry’Akarere, aho bifuza ko bagira uruhare rufatika mu bikorwa by’Akarere, ku buryo ibikorwa bigabanya ingengo y’Imari yako.

Icya nyuma ngo ni ibibazo by’abaturage, aho bifuza ko itsinda rishinzwe gukemura ibibazo by’abaturage mu Mirenge rihabwa imbaraga n’inama, ku buryo ibibazo bigabanuka cyangwa bikarangira.

Kabagamba Wilson, umuyobozi w’Inama Njyanama y’Akarere ka Nyagatare

Avuga ko uruhare rw’abajyanama muri ibi bikorwa byose ari ubujyanama no gukurikirana mu buryo bikorwa, ariko mu buryo bw’ubufatanye bw’inzego zose.

Yagize ati “Turahura n’inzego tubagira inama uburyo ibibazo bihari byamenyekana, noneho mu kubikemura hakarebwa uko inzego zose zaza tugafatanya kubakira utishoboye, cyangwa tukubakira akarima k’igikoni urugo rutagafite, ubwo tube dukemuye ikibazo cy’imirire mibi.”

Akomeza agira ati “Inzego zikwiye gufashwa, zigahabwa ubushobozi kugira ngo zikurikirane zihozeho, ntidukemure ikibazo uyu munsi ngo twongere tubone abana bafite imirire mibi ahubwo bibe ikintu gihoraho.”

Avuga ko nta bundi buryo byagerwaho hatabayeho kwigisha inzego z’ibanze, zikorana n’abaturage umunsi ku wundi.

Abayobozi bahangayikishijwe no kubonera amacumbi abatishoboye

Abajyanama banasuye inzu y’ababyeyi ku Kigo nderabuzima cya Bugaragara

Banirebeye uko ikusanyirizo ry’amata rya Musheri rikora banatanga inama

Baganiriye n’abavugarikumvikana mu rwego rwo kubibutsa inshingano bafite mu gukemura ibibazo by’abaturage

Bahereye ku mupaka wa Kagitumba basoreza I Gikoba ku ndake y’uwari umuyobozi w’urugamba rwo kubohora Igihugu ari nabwo butaka bwa mbere RPA-Inkotanyi yafashe mu Rwanda bitwaga agasantimetero.

Utamuriza Olive Betty, wakuriye mu buhingiro kubera amateka yaranze Repubulika ya mbere n’iya kabiri, avuga ko uretse amateka yasobanuriwe ariko amwe ayazi neza cyane ko yayakuriyemo mu nkambi z’impunzi.

Avuga ko abarwanye urugamba rwo kubohora Igihugu ari abana barezwe n’ababyeyi beza bari bagifite Igihugu ku mutima n’ubwo benshi bari barakivukijwe baba mu nkambi z’impunzi mu bihugu bitandukanye.

Kugira ngo ibyagezweho bikomeze kurindwa, asaba ababyeyi gutanga uburere bwiza ku bana babo kuko aribwo bazakurana indangagaciro zo gukunda Igihugu no kurwanya icyakongera gutanya abanyarwanda.

Yagize ati “Umubyeyi muzima ni ugendera mu kirari cya bakuru be bakoze akarinda, akubaka, ni ukugira indangagaciro yo gukunda Igihugu kugira ngo ukirinde ibyakongera gutanya abanyarwanda kandi ibi akabitoza uwo abyaye.”

Pasiteri Nizeyimana Marcel, wo mu itorero rya ADEPR ururembo rwa Kabarore, avuga ko amateka y’urugamba rwo kubohora Igihugu yamuhaye umukoro wo kwanga ubuhinzi ndetse ubwe yiyumvisemo indangagaciro yo gukunda Igihugu.

Ikindi ariko ngo akurikikije uko urugamba rwatangiye n’ibibazo byagiye bibamo byamugaragarije ko icyo umuntu yashyizeho umutima cyose gishoboka.

Yifuza ko aya mateka atakabaye amenywa n’abantu bacye ahubwo yakabaye ashyirwa mu bitabo mu ndimi zose kugira ngo ari abanyarwanda n’abanyamahanga bayasomekuko arimo inyigisho nyinshi.

Yagize ati “Jye ndifuza ko aya mateka yashyirwa mu nzu ndangamurage n’ubuvivi bukazayumva kuko ateye ishema cyangwa hakaboneka ibitabo byinshi biyavugaho bigakwira Isi yose ku buryo abantu bose babibona kuko by’umwihariko abanyarwanda yabasubizamo imbaraga.”

Avuga ko umusanzu we ari ukujya ugusangiza abakirisitu be aya mateka kuko yafasha benshi cyane urubyiruko.

Bizimana Didier, uhagarariye abakuru b’Imidugudu mu Murenge wa Gitoki, avuga ko amateka y’urugamba rwo kubohora Igihugu yamwubatsemo indangagaciro yo kwigirira ikizere, guhatana no kugera ku ntego kuko aribyo byaranze ingabo za RPA-Inkotanyi.

By’umwihariko ngo izi ndangagaciro akaba arizo agiye gushishikariza abaturage ayobora ariko by’umwihariko gushira imbaraga mu kubaka Igihugu no gukora cyane kugira ngo bagere ku ntumbero y’ibyifuzo byabo.

Umunyamabanga nshingwabikorwa w’Umurenge wa Gitoki, Rugengamanzi Steven, avuga ko kenshi mu kazi bashinzwe ari ubukangurambaga buganisha umuturage ku iterambere ariko nanone kubazana bakamenya amateka y’Igihugu ngo ni ukugira ngo batazasinda amahoro.

Ati “Umunyagihugu mwiza si uwagiye akorora, agahinga cyangwa agacuruza bikarangirira aho ahubwo agomba no kumenya aho Igihugu cyavuyen’aho kigeze kugira ngo ejo abantu batazasinda amahoro nk’uko tujya tubyumva ahandi.”

Avuga ko abaturage kumenya amateka y’urugamba rwo kubohora Igihugu bibaha umukoro wo kugira icyo bakora kugira ngo barinde ibimaze kugerwaho cyane ibikorwa remezo bifasha umuturage mu iterambere.

Bacitse kuri burusheti kubera gutinya kurya imbwa

Hashize amezi agera kuri atatu, abantu bikekwa ko baturuka ahitwa mu Gikorosi na Kanguka mu Kagari ka Mbare Umurenge wa Karangazi, bagenda mu nzuri bagamije kwiba imbwa cyangwa se bakazigura n’abashumba.

Umuturage w’Umudugudu wa Gihorobwa wababonye, avuga ko bagenda ari bane bafite imbwa bigaragara ko barimo guhiga inyamanswa ariko mu by’ukuri bagamije kugira izo biba.

Yagize ati “Hashize icyumweru mpuye nabo mu ifamu bagenda babiri babiri kandi bose bafite imbwa, bigaragara ko barimo guhiga ariko mu by’ukuri ahubwo bashaka imbwa biba.”

Akomeza agira ati “Nkigera mu rugo numvise ngo imbwa ya Kiiza barayitwaye, hashize akanya tubona imbwa inyuzeho yiruka ibacitse na bo bayiri inyuma bayirukansa, ariko bageze ahari abaturage basubira inyuma.”

Sabiti Bosco, avuga ko hashize ibyumweru bibiri imbwa ye ibuze ariko ibura ryayo akarigereka ku wo yari yasigiye inka.

Ati “Inka nazisizemo umwana hari aho nari ngiye, ngarutse imbwa ndayibura mubajije ambwira ko atazi aho iri ariko nyuma naje kumenya ko ahubwo yayigurishije.”

Imbwa ni itungo rigurwa nk’ayandi yose

Umuturage wo mu Mudugudu wa Gihorobwa Akagari ka Rutaraka utashatse ko amazina ye atangazwa, avuga ko yahuye n’abantu mu rwuri rwe bakamubwira ko baturutse Kanguka kandi bashaka imbwa zo kugura, ndetse aranabagurisha n’ubwo ngo bamuhaye macye.

Agira ati “Bambwiye ko bagura imbwa mbereka iyanjye bampa 5,000Frs, ndayibaha. Gusa icyantunguye bansabye aho bayibagira ndahabereka, barayibaga batwara inyama.”

Si uyu wenyine kuko no mu Mudugudu wa Mugari Akagari ka Rutaraka, umushumba yagurishije imbwa ya shebuja, bamuha ibihumbi 8,000Frs, barayijyana.

Uyu yakomeje kubeshya shebuja ko imbwa ihari, ahubwo ko igiye mu baturanyi n’ubwo hashize icyumweru bikamenyekana ko yayigurishije.

Imbwa baguze cyangwa bibye bazibagira mu nzuri zirimo ibihuru, cyangwa se mu mirima y’ibigori inyama bakazitwara mu mifuka.

Uwitwa Nzabonimpa Jean Baptiste, avuga ko yagiye mu murima we w’ibigori asanga harimo uruhu rw’imbwa ndetse n’umutwe wayo, ku buryo byamuteye ubwoba bwo kongera kuwusubiramo ari wenyine.

Bamwe bacitse ku kurya inyama burusheti mu tubari kubera gutinya guhabwa imbwa

Uwaganiriye na Kigalitoday ariko akifuza ko amazina ye atashyirwa mu itangazamakuru, yavuze ko icyamuteye impungenge ari uko kenshi usanga aho bamanika ihene babaze udashobora kubona umutwe wayo cyangwa ibinono.

Avuga ko ashingiye ku kuba yaramenye ko hari abantu biba imbwa, byongeye akaba atakibona umuwe w’ihene cyangwa ibinono byayo, byatumye acika kuri burusheti (brochette).

Yagize ati “Ubundi aha mu Kimaramu, nakundaga kuharya burusheti kuko ni ho nywera agacupa ariko ntiwabaza mucoma ngo akwereke umutwe w’ihene cyangwa ibinono byayo. Inshuro namubajije yambwiye ko umutwe yawugurishije abagiye kuwurya, nkibaza nti mbere ibi bitaraduka ko umutwe nawubonaga?”

Akomeza agira ati “Bijyanye n’uko nzi abantu bibwe imbwa n’uwayigurishije, nahise ncika ku nyama kugira ngo ntazarya imbwa yo gatsindwa.”

Uyu yifuza ko abayobozi b’Imidugudu irimo utubari botsa inyama, bajya bagenzura aho hantu ku buryo ba nyiri utubari bajya bagaragaza icyemezo cy’uko itungo ryapimwe, kuko abenshi bazana itungo bakabaga nta veterineri waripimye.

Ahantu hakekwa izi nyama z’imbwa zotswa zigahabwa abakiriya ziswe ihene, ni mu Gikorosi muri Ryabega ndetse na Kanguka mu Kagari ka Mbare Umurenge wa Karangazi, ariko hakaba n’abakeka ko ahitwa mu Kimaramu, mu Mudugudu wa Kamagiri, Akagari ka Kamagiri Umurenge wa Nyagatare na ho zishobora kuba zihokerezwa.

Aborozi barifuza kwemererwa kwitumiriza intanga kuko hari ubwo batazibonera igihe

Umworozi mu Murenge wa Rwimiyaga, Akagari ka Karushuga, Maridadi Peter, avuga ko yatangiye ubworozi mu mwaka wa 2015, yorora bisanzwe inka 200 zatangaga umukamo wa litiro hagati ya 80 na 150 ku munsi.

Nyuma yaje guhindura ubworozi yinjira mu bwa kijyambere, aho kuri hegitari hafi 80 yororeyeho ubu afitemo inka 80 zikamwa litiro hagati ya 500 na 650 ku munsi.

Ibi nabyo asanga bidahagije kuko ubundi yakabaye abona umukamo urenze uwo, ikibazo ngo kikaba kikiri igishoro kuko ubworozi ari ishoramari nk’irindi.

Ati “Ubworozi ni umushinga nk’indi yose wawukora nabi ntiwunguke nk’uko n’ibindi bishoboka. Urabona nk’ubu mpinga ubwatsi kuri hegitari 20 ariko nk’ubu nshoboye gufunga n’ahandi, nkahinga byasaba kugira inka zindi zingana nk’izi, urumva amata yakwikuba kabiri cyangwa gatatu.”

Akomeza agira ati “Ubutaha ugafunga n’ahandi hagana haruguru, nibura ugasiga nka hegitari eshanu (5) inka zigendamo gusa ahandi hose ukahahinga ubwatsi, umukamo wakwikuba kenshi.”

Maridadi yifuza ko bakoroherezwa kwitumiriza intanga hanze

Guhindura ubworozi bwe yakoresheje uburyo bwo gushaka impfizi, agenda ahindura buhoro buhoro ariko ubu ngo aho ageze ni heza, kuko ubu amaze kugira inka imwe ikamwa hagati ya litiro 15 na 25.

Avuga ko hakiri ikibazo bifuza kuzaganira na RAB bakoroherezwa kwitumiriza intanga, bakazibikira ku buryo igihe inka yarinze bahita bayitera intanga bidasabye kujya kuzishaka kuri RAB, kuko rimwe na rimwe zitabonekera igihe.

Yagize ati “Ubundi intanga ziva muri RAB, icyifuzo yenda twazaganira na yo ni uko n’aborozi bashobora koroherezwa, n’ibyo uvuga ko zibura koko zirabura ariko bimaze koroshywa ku buryo abantu bazitumiriza, yenda na RAB igakomeza igatumiza byakoroha”.

Akomeza agira ati “Umuti urambye ni uko abantu bakwitumiriza izo ntanga ukazibika ukajya uzikoreshereza, utagombye kujya gusaba uko inka yarinze ngo usabe intanga ebyiri cyangwa eshatu kandi ngira ngo na Leta irabyumva.”

Ikindi avuga ko impfizi bakeneye zidahari, kuko ngo uko umuntu ageze ku mukamo runaka aba ashaka impfizi y’ubwoko bwiza butanga umukamo urushijeho.

Avuga ko mu bworozi bwe, ubu yahisemo gukoresha abavuzi bigenga kubera ko abasanzwe ba Leta batabonekera igihe, n’ubwo n’abigenga na bo bakiri bake ugereranyije n’ababakeneye.

Maridadi avuga ko igishoro nikimara kuboneka neza inka zitazongera kuva mu biraro

Umuyobozi w’Akarere ka Nyagatare, Gasana Stephen, avuga ko ikibazo cy’abavuzi b’amatungo cyatangiye gukemuka, kuko uko aborozi babakenera baba benshi na bo biyongera cyane ku ruhande rw’abikorera.

Agira ati “Kubera ko Leta yabifunguye n’abikorera bashobora kujyamo bagatanga serivisi z’ubuvuzi bw’amatungo, bwabaye uburyo bwo guhanga umurimo. Ibyo rero biroroha kuko uko isoko rihari ni nako na bo umubare wabo ushobora kwiyongera.”

Maridadi agira inama abandi borozi gushyira inka mu biraro zikagaburirwa, kuko kurisha zitabona ubwatsi buzihagije. Ikindi ni uko ziri mu biraro bidasaba umworozi guhinga ubwatsi ku buso bunini, ahubwo ashobora kwahira ubusanzwe zarishaga bikagabanya igishoro.

Umworozi mu Murenge wa Nyagatare, utashatse ko amazina ye ajya mu itangazamakuru, avuga ko kenshi bakunze guhura n’ikibazo cy’ibura ry’intanga bikadindiza ubworozi bwabo.

Yagize ati "Uhamagara veterineri akakubwira ngo intanga runaka ntiziraboneka kandi inka yarinze. Nyuma y’iminsi ibiri yarindutse akakubwira ko noneho zabonetse."

Avuga ko bishoboka hakabaho abandi bantu bazitumiza bakazicuruza, byakorohereza aborozi cyane mu kuvugurura ubworozi bwabo.

Umuyobozi wa RAB wungirije ushinzwe Ubworozi, Dr Solange Uwituze, avuga ko bishoboka ko umworozi yakwitumiriza intanga hanze y’Igihugu.

Yagize ati "Birashoboka, intanga bazitumiriza ariko babanje gusaba na RAB icyangombwa cyo kuzizana, tukanareba ko bujuje ibisabwa mu kuzifata neza".

Dr Solange Uwituze

Icyakora avuga ko barimo kwagura ubushobozi ku buryo mu mezi macye, ikibazo cy’intanga zitabonekaga uko bikwiye kizaba amateka.

Mu Karere ka Nyagatare habarirwa aborozi 19,275 harimo 191 bamaze kubaka ibikorwa remezo nkenerwa, kugira ngo umworozi abashe korora kijyambere.

Ubu habarirwa inka zirenga ibihumbi 230 zitanga umukamo wa litiro zirenga 100,000 ku munsi.

Bashyira indabo ku rwibutso

Yabitangaje ku wa Gatanu tariki ya 09 Gicurasi 2025, ubwo ishuri ryisumbuye rya Maryhill Girls Secondary School, bibukaga ku nshuro ya 31 Jenoside yakorewe Abatutsi 1994.

Ni igikorwa cyabanjirijwe no gusura urwibutso rwa Jenoside rwa Nyagatare, bashyira indabo ku mva zishyinguyemo imibiri y’Abatutsi bishwe muri Jenoside mu rwego rwo kubunamira no kubasubiza icyubahiro bambuwe n’abicanyi.

Matsiko avuga ko mu rwego rwo gutegura urubyiruko rwo bayobozi b’ejo hazaza, ngo mu Karere hateguwe gahunda yo kwandika amateka ya Jenoside by’umwihariko ayihariye kuri Nyagatare.

Avuga ko ibyo bitabo nibimara kuboneka urubyiruko ruzabisoma ngo ruzamenya ukuri, bityo rubashe guhangana n’ingengabitekerezo ya Jenoside.

Naho ku babyeyi bagihembera ingengabiterekerezo ya Jenoside, ngo bakwiye kumenya ko Igihugu ari icy’Abanyarwanda bose bityo bakareka gusenya Igihugu bakwirakwiza ingengabiterezo ya Jenoside.

Ati "Nibareke gusenya Igihugu bakwirakwiza ingengabitekerezo mu rubyiruko. Ingengabitekerezo ya Jenoside ntacyo yamariye Igihugu kandi ikitaragize icyo bikumarira, nta mpamvu yo kugihorana ugisiga inyuma ugaharanira kubaka Igihugu."

Abanyeshuri bibukijwe kwita ku cyubaka Igihugu

Umuyobozi w’ishuri rya Maryhill Secondary school, Sr Annonciate Mukaminega, avuga ko mu kurera abana babatoza urukundo, kuko barukomezanyije nta wabazanamo amacakubiri.

Ikindi ariko ngo banatozwa kwigana ibyiza basanga hanze, ariko bagaca ukubiri n’ibitabubaka.

By’umwihariko ngo abana bafite ababyeyi bakomerekejwe na Jenoside yakorewe Abatutsi, batozwa kubakomeza.

Yagize ati "Mu cyumweru cy’icyunamo tubatoza kuba hafi y’ababyeyi babo, tuti ibuka kubwira Mama uti komera Imana yarakunshumbushije mu bavandimwe bawe, nanjye nzakubera umuvandimwe nkubere umwana."

Akomeza agira ati "Bwira Papa uti nta muntu w’iwanyu wasigaye, ariko waratubyaye tuzakubera icyo bagombaga kuba cyo."

Naho kuba bishyuriye ubwisungane mu kwivuza imirya yarokotse Jenoside itishoboye, ngo ni ugukunda ababuze ababakunda mu gihe cya Jenoside.

Mukamanzi Ennata, warokokeye Jenoside i Mugombwa mu Karere Gisagara, avuga ko yaje mu Karere ka Nyagatare mu buryo bw’umutekano we kuko kubona imiryango y’abamuhekuye byamuteraga ihahamuka kandi akumva nta mutekano azagira.

Umwe mu barokotse Jenoside utishoboye ashyikirizwa icyemeza ko yishyuriwe mitiweri

Uyu mubyeyi w’abana batatu n’undi arera, watujwe mu Mudugudu w’ikitegererezo wa Nyagatare, avuga ko kwishyurirwa ubwisungane mu kwivuza byamushimishije kuko we ubundi atakabashije kubwiyishyurira.

Yagize ati "Ndashima Leta n’iri shuri, ubu twishyuriwe Mituweli y’umwaka utaha. Jye mfite ubumuga nkomora kuri Jenoside kuko bankubise uduhiri mu mutwe ndetse n’igituza nagituye ku ibuye niruka mpunga interahamwe, ntacyo nabasha gukora ntunzwe na Leta yacu nziza."

Abishyuriwe ubwisungane mu kwivuza ni imiryango 27 y’abatishoboye yiganjemo abarokotse Jenoside yakorewe Abatutsi, igizwe n’abantu 100.

Bunamiye ababo bazize Jenoside

Umudugudu wa Gakoma nturangwamo icyaha mu gihe cy’imyaka umunani

Umudugudu wa Gakoma, ni umwe mu yigize santere ya Karangazi, ukaba uherereye muri Kilometero kimwe n’igice uvuye ku muhanda munini wa kaburimbo, ukaba utuwe n’ingo 274 zirimo abaturage 1,426, amasibo 11 n’abayobozi b’ingo 62.

Muri uyu mudugudu, ingo enye (4) cyangwa eshanu (5), zigira umuyobozi wazo, ahanini ushinzwe kumenya ibibazo bizirimo no kubikemura ndetse agatanga raporo ku muyobozi w’Isibo, na we akayigeza kuri komite y’Umudugudu.

Komite y’Umudugudu ifite urundi rwego rusa n’aho ruri hejuru yayo rwiswe inararibonye, rugizwe n’abantu barindwi bakaba bashinzwe gutekerereza Umudugudu no kugira inama komite yawo.

Umukuru w’Umudugudu wa Gakoma, Sabiti John Bosco, avuga ko mbere y’umwaka wa 2012, kimwe nk’ahandi uyu Mudugudu wari wugarijwe n’ibibazo cyane ibishingiye ku icuruzwa n’ikoreshwa ry’ibiyobyabwenge nka kanyanga n’urumogi, abangavu baterwa inda z’imburagihe, abana bataga amashuri, urugomo rushingiye ku businzi, ubujura n’ibindi.

Avuga ko mu kurandura ibi bibazo bahereye ku businzi n’icuruzwa ry’ibiyobyabwenge, kuko aribyo byari intandaro y’ibindi byaha muri rusange.

Yagize ati “Twahereye ku kibazo ibindi byaha byuririraho aricyo cy’ubusinzi no gucuruza ibiyobyabwenge, duca ibiyobyabwenge mu gihe cy’amezi atatu birarangira, abajya kubivumba ahandi baza bwije irondo rikabafata rikabararana ku buryo mu mezi abiri bari babicitseho.”

Avuga ko guca ubusinzi n’ikoreshwa ry’ibiyobyabwenge byagabanyije ubuharike, ihohoterwa ku bashakanye n’amakimbirane mu miryango.

Ababyeyi ngo baboneye abana babo umwanya wo kubaganiriza, ariko by’umwihariko nabo barakora bateza imbere imiryango yabo.

Avuga ko mu gihe cy’umwaka umwe gusa bari bamaze gukemura ibibazo by’abana bata amashuri, icy’igwingira ndetse n’icy’umwanda mu ngo no ku mubiri ku baturage babo.

Avuga ko hashize imyaka umunani nta mwangavu utewe inda mu Mudugudu wabo, ndetse ngo n’ubujura mu ngo byabaye amateka.

Umukecuru witwa Bwirenga, avuga ko amaze imyaka myinshi nta mujura umwiba cyangwa ngo yumve hari ahandi bibye uretse kumva ngo bibye imyumbati, ibitoki, ibigori n’ibishyimbo mu mirima.

Ati “Yewe hashize igihe kinini rwose ntumva umujura iwanjye cyangwa mu baturanyi, kuko haba irondo rikaze ntibabona aho baca. Ariko wa mwana we hari igihe twabayeho batobora bakadusanga mu nzu, bagatwara byose usenga Imana ahubwo ngo bagusige amahoro.”

Sabiti avuga ko ubujura busigaye buri mu mirima kandi nabwo ngo ahanini biterwa no guhinga tugabane, kuko abiba ari abahinganye na banyiri ubutaka.

Ati “Abantu biba mu mirima abenshi ni abayihingamo tugabane, urumva azindukira mu murima agiye guhinga yarangiza akiba uwo bawufatanyije (nyiri ubutaka). N’ubu ejo hari uwo twafashe yaciye igitoki mu murima w’uwo bahingana akigurisha undi muntu. Igisubizo kirambye ni ukugabanya tugabane ntakindi abantu bakihingira ubutaka bwabo.”

Abacuruza ibinyobwa bisindisha bafunga saa moya n’igice z’ijoro

Umudugudu wa Gakoma, ubamo ahacururizwa ibinyobwa bisindisha habiri gusa nabwo atari akabari ahubwo ari butike.

Umwe muri aba bacuruzi utarifuje ko amazina ye atangazwa, yavuze ko amaze imyaka itatu acuruza ariko atari yafunga hejuru ya saa moya n’igice, kuko ngo iyo saha igeze abakiriya abatiza amacupa bakayatirura bukeye.

Yagize ati “Jyewe iyo saha yangiye mu mutwe, saa moya n’igice ziragera abakiriya bahari nk’abaha amacupa bakajya kunywera iwabo mu ngo, ariko bagasiga amafaranga y’amacupa bayagarura nkabasubiza amafaranga yabo.”

Avuga ko kuva yatangira ubucuruzi bwe, nta bakiriya bari basindira iwe ngo barwane cyangwa ngo bashyamirane.

Umukuru w’Umudugudu wa Gakoma, Sabiti John Bosco, avuga ko izo saha atarizo bategeka kuko Inteko y’Umudugudu yemeje ko abacuruza inzoga bagomba gufunga saa tatu z’ijoro, kuko ari nabwo irondo ritangira.

Avuga ko kuba abaturage ayobora bataha kare kandi bakanywa gake byafashije byinshi.

Ati “Ubundi nta wemerewe gutanga inzoga mbere ya saa sita z’amanywa kandi nta n’uwemerewe kurenza saa tatu z’ijoro azicuruza. Byaradufashije kuko abantu babonye umwanya wo gukora biteza imbere, babonye umwanya wo kuganira n’abana n’abagore babo, urugomo no kurwana byararangiye, mu ngo amahoro arahinda.”

Gakoma, ifite urugo mbonezamikurire ndetse n’irerero, ibi ngo bikaba byarafashije mu kurandura imirire mibi mu bana ndetse n’ingwingira, kuko nta mwana bafite mu mirire mibi.

Abiyemeje gushyingirwa byemewe n’amategeko bakorerwa ubukwe

Umwaka ushize imiryango 182 yabanaga mu buryo butemewe n’amategeko yarasezeranye, ndetse ikorerwa ubukwe n’abaturage bagize Umudugudu.

Ibi ngo babikora mu rwego rwo kurwanya ubuharike, ihohoterwa ryo mu ngo ndetse n’amakimbirane.

Buri rugo rufite intebe ya pulasitike, ku buryo iyo hari ugize ibirori cyangwa akagira ibyago adakodesha intebe zo kwicaraho, bakaba basigaranye umuhigo wo kugura ihema rinini ryakwakira abantu 1000, uretse kubafasha ubwabo ngo bakazajya barikodesha amafaranga avuyemo agafasha abatishoboye bafite.

Bafite icyumba cy’uruganiriro gikemuriramo ibibazo bikunda kuboneka mu ngo, nk’abagabo cyangwa abagore bagaragarwaho ingeso zitari nziza, abahagawe baganirizwa n’ababyeyi b’inararibonye kandi ngo abahageze benshi barahinduka.

Abatuye uyu mudugudu buri mwaka ngo bubakira utishoboye cyangwa bakamusanira inzu, kandi inzu zo muri uyu mudugudu yose arakurungiye mu rwego rwo kunoza isuku.

Buri rugo rufite akarima k’igikoni ndetse n’ibiti by’imbuto zitandukanye, kandi rugomba kuba rufite ikimina cy’ubwisungane mu kwivuza na EjoHeza rubarizwamo kandi rukagira n’ikayi y’imihigo.

Nta wemerewe kugenda mu muhanda yambaye isengeri, yasinze cyangwa yanyoye inzoga, kuko ubifatiwemo agayirwa mu ruhame mu nteko y’abaturage.

Ingaruka za COVID-19 zatumye biyemeza kwishyiriraho ikigega kibahunikira imyaka

Umukuru w’Umudugudu wa Kabuga ya mbere, Kimenyi Benjamin, avuga ko ikigega ‘Ishema ryacu’ cyatangijwe mu mwaka wa 2020, ahanini kubera ingaruka basigiwe na COVID-19, kuko benshi bagize inzara biba ngombwa ko ubuyobozi bubashakira ubufasha.

Ati “Twagishyizeho kugira ngo kijye kiturinda ibiza n’ibyorezo bishobora kudutera, kuko muri COVID-19 twahuye n’ikibazo gikomeye, habayeho Guma mu Rugo, abaturage bamwe na bamwe barasonza biba ngomba ko dutangira gushakisha mu baturage inkunga zibafasha.”

Avuga ko iyo habonetse imvura neza bakeza, buri wese ahabwa umusaruro we yahunitse kuko abahinzi kenshi bakunze kugira amezi abagora nk’ukwa gatatu kugera mu kwezi kwa gatanu, ndetse n’ukwezi kwa cumi kugera mu kwa cumi na kabiri.

Bamara kweza imyaka ngo barongera bakazana umusaruro ugahunikwa, utawubonye ariko atari ikibazo cy’izuba ryinshi we akazana amafaranga angana n’uwo yifuza guhunika.

Uretse guhunika ngo iyo umusaruro ubaye mwinshi mu buhunikiro kandi imyaka mu murima yeze, baranagurisha bagashyira amafaranga kuri konti y’Umudugudu aho ubu bafiteho 454,000Frw na toni umunani ziri mu buhunikiro.

Kubera ko babonye guhunika umusaruro w’ibigori bikunda, ubu ngo ubutaha bazatangira no guhunika ibishyimbo hagamijwe ko bitaguma mu ngo bigasesagurwa.

Umudugudu wa Kabuga ya mbere ugizwe n’ingo 170, mu gutangira buri muryango wazanaga ibiro 100 by’ibigori n’amafaranga 2,100 yo kugura imiti n’ibindi bifasha mu guhunika neza umusaruro.

Colette Mukamusoni, avuga ko ikigega Ishema ryacu gitangiye cyamufashije cyane, kuko cyatumye abasha kwigurira ikigega cy’amazi binyuze mu kugurisha umusaruro we yahunitse, mu gihe mbere yagurishaga umusaruro wose akawusesagura.

Yagize ati “Mbere narahingaga nasarura nkagurisha simbashe kwizigamira, ariko ubu umusaruro umwe ndawuzana hano noneho nawugurisha amafaranga akajya kuri konti yanjye muri Banki, igihe kigeze ikigega kinyongereraho mbasha kubona agura igifata amazi.”

Abatuye Umudugudu wa Kabuga ya mbere, ubu bose bamaze kwishyura umusanzu wo kwivuza 2025/2026, ndetse bakaba baratangiye gukusanya umusanzu w’undi mwaka babifashijwemo n’ikigega cyabo.

Abaturage bavuga ko ikigega cyo guhunika imyaka cyabarinze gusesagura no kwotsa imyaka ikiri mu murima

Uyu Mudugudu wa Kabuga ya mbere uje wiyongera ku wa Kagera, na wo wo mu Murenge wa Matimba, aho buri rugo rufite ibiti bine (4) by’imbuto ziribwa ukaba unamaze imyaka itatu utageramo ibiyobyabwenge, nyamara mbere wari indiri yabyo kuko uhana imbibe n’ibihugu bya Tanzaniya na Uganda.

Ni mu gihe Umudugudu wa Gakoma mu Murenge Karangazi, wo umaze imyaka umunani utarangwamo icyaha, by’umwihariko icyo gusambanya abana.

Ubuyobozi bw’Akarere ka Nyagatare, buvuga ko abandi bakuru b’Imidugudu bakwiye kurebera kuri bagenzi babo na bo bagahanga udushya, ariko by’umwihariko utwimakaza iterambere n’imibereho myiza y’umuturage.

Abafaransa bagize uruhare runini mu iyicwa ry’Abatutsi muri Jenoside

Yabitangaje ku Cyumweru tariki ya 27 Mata 2025, ubwo i Rukumberi mu Karere ka Ngoma, hibukwaga ku nshuro ya 31 Jenoside yakorewe Abatutsi 1994, ahanashyinguwe mu cyubahiro imibiri 14 yabonetse.

Mu buhamya bwe, yavuze ko Jenoside igitangira urupfu rwa mbere yabonye ari urwa se.

We ngo yakomeje kwihishahisha ariko yatandukanye n’umuryango we, aza guhura n’interahamwe imutwara iwayo ndetse iramurinda kugera bageze muri Congo.

Avuga ko yagiye arokoka urupfu kenshi kuko n’uwo mugabo yamukundaga, ngo umugore we yamwangaga urunuka ku buryo hari n’igihe umugabo yagiye kwica, umugore amushyira interahamwe ngo zimwice arokorwa n’umukobwa wamwise murumuna we.

Abarokotse Jenoside b’i Rukumberi barasaba ababiciye kubereka aho bajugunye imibiri y’ababo

Avuga ko mu rugendo bahungiri i Congo bageze mu Karere ka Karongi ahitwa mu Birambo hafi nkambi y’abasirikare b’Abafaransa, ngo yiboneye abo basirikare bahiga Abatutsi bakabazanira Interahamwe.

Yagize ati “Tugeze mu Birambo hari hakambitse Abafaransa n’Ababiligi, bahigaga Abatutsi bakabazanira Interahamwe ariko bo bari abagome cyane kurusha n’interahamwe yari yanjyanye.”

Akomeza agira ati “Umufaransa umwe yafashe Umututsi abereka uko bamwica. Yari umuhungu w’umusore inzara yaramwishe. Afata ukoboko ashyira ku ivi arakuvuna yereka interahamwe urugero. Yababwiraga kuzajya babanza bakabavuna ingingo kugira ngo baze kubica bataribubarwanye cyangwa ngo hagire ubacika.”

Uretse guhiga Abatutsi bakabashyira interahamwe, izi ngabo zari muri Operation Turqouise zaciraga amacandwe ku Batutsi b’abakecuru n’abasaza, kugira ngo babereke ko babanga cyane.

Uwavuze mu izina ry’imiryango yashyinguye ababo, yasabye abaturage ba Rukumberi kuba maso kuko ngo hari abantu bakoze Jenoside baza kuhihisha, bamwe bakanabeshya ko barangije ibihano bakatiwe n’inkiko.

Yasabye kandi abazi ahajugunywe imibiri y’ababo gutanga amakuru, kugira ngo bashyingurwe mu cyubahiro.

Mu bagize uruhare runini cyane mu kwica Abatutsi ba Rukumberi, harimo uwari Depite Mutabaruka ndetse n’impunzi z’Abarundi zari i Sake.

Muri iki gikorwa cyo kwibuka ku nshuro ya 31 Jenoside yakorewe Abatutsi muri Rukumberi, hanibutswe icyiciro cyihariye cy’abakobwa bishwe babanje gufatwa ku ngufu n’abicanyi.

Abayobozi batandukanye bitabiriye iki gikorwa

Yabibasabye ku wa gatanu tariki ya 25 Mata 2025, ubwo ku biro by’Intara y’Iburasirazuba n’Akarere ka Rwamagana, hibukwaga abahoze ari abakozi ba Perefegitura na Superefegitura zahujwe zikaba Intara y’Iburasirazuba, n’ab’amakomine yahujwe akaba Akarere ka Rwamagana bazize Jenoside yakorewe 1994.

Avuga ko kwibuka Jenoside yakorewe Abatutsi ari inshingano za buri muntu, kuko Jenoside ari icyaha gikorerwa inyoko muntu aho iva ikagera hose, bivuze ko kwibuka Jenoside yakorewe Abatutsi n’ubwo ari umwihariko w’Abanyarwanda ariko kuyibuka ari inshingano z’ikiremwa muntu ku Isi hose.

Yasabye urubyiruko nk’aboroherwa no gukoresha imbuga nkoranyambaga kwihatira kumenya amateka y’Igihugu, kugira ngo ruyifashishe mu kunyomoza abayagoreka kuko bakwirakwiza ibihuha.

Avuga ko abagoreka amateka n’abapfobya Jenoside yakorewe Abatutsi, babikora kubera ipfunwe ry’uko umugambi wabo mubisha utagezweho neza uko babishakaga.

Yavuze ko ababyeyi, abarezi n’abayobozi mu nzego zose bafite umukoro wo kurera neza abakiri bato, kugira ngo bazashobore kubaho neza mu gihe cyabo.

Yagize ati “Dufite umukoro wo guha abana uburere bwiza mu miryango no ku mashuri no kubatoza kugira indagagaciro z’abantu, kugira ubumuntu, tubakabwiza ukuri ku mateka yacu kuko iyo tuyagoretse bituma batazigera basobanukirwa ububi bwa Jenoside yakorewe Abatutsi.”

Abayobozi basabwe gushyira umuturage imbere agahabwa serivisi nta vangura

Yasabye abayobozi mu nzego bwite za Leta, abikorera, abo mu miryango ishingiye ku myemerere kuba ab’impinduramatwara, bagakorera abaturage bose nta vangura kandi ntawusigaye inyuma, bakimakaza ubumwe bw’abanyarwanda.

Uwavuze mu izina ry’umuryango Ibuka, Muhongayire Christine, yavuze ko abantu bakwiye gushima uruhare aba bishwe bagize mu kubaka Igihugu, n’ubwo batabishimiwe kugeza aho bica uwari Perefe, Ruzindana Godfroid, mu gihe yageragezaga guhunga.

Yavuze ko Jenoside mu Ntara y’Iburasirazuba, yakozwe mu gihe gito kandi ihitana Abatutsi benshi ahanini kubera ubugome bw’abari ba Burugumesitiri b’Amakomini, ndetse n’abari abasirikare bari bashinze imitwe y’urubyiruko yo kwica kandi vuba.

Mu buhamya bwe, Karemera Leonald, wari umukozi ushinzwe ubuvuzi bw’amatungo, mu cyahoze ari Komini Gikoro, avuga ko mu nama isanzwe ihuza abakozi bose, hari izo bahezwagamo cyane izabaga nyuma y’uko indi isojwe.

Uretse n’ibyo ngo abari abakonseye b’Abatutsi ngo bahishwaga inama zabereye kuri Komini, bakabahimbira ko basuzuguye Burugumesitiri ndetse benshi bakurwa mu nshingano basimbuza ab’Abahutu.

Avuga ko uburyo Jenoside yari yateguwe iyo hataba Inkotanyi, nta Mututsi n’umwe wari burokoke, abashimira ubwitange bagaragaje mu kurokora abicwaga batitaye ko bahasiga ubuzima.

Abari abakozi ba Perefegitura na Superefegitura byahujwe bikaba Intara y’Iburasirazuba bishwe muri Jenoside yakorewe Abatutsi mu 1994 bamaze kumenyekana ni 19, mu gihe ab’Amakomini yahujwe akaba Akarere ka Rwamagana hamaze kumenyekana 26.

Imvura igwa irimo guteza ibibazo mu mihanda itandukanye, bakaba biyemeje kuyisana

Mu Mirenge igize Akarere ka Bugesera, kuri uyu wa gatandatu, abaturage bazindukiye mu muganda rusange usoza ukwezi, wibanze ku bikorwa byo gusana ibikorwa remezo, imihanda y’imigenderano no gusanira inzu abaturage basenyewe n’ibiza. Ku rwego rw’Akarere uyu muganda ukaba wabereye mu Murenge wa Gashora.

Mu Karere ka Gatsibo, abayobozi n’abatuye b’Akagari ka Kanyangese Umurenge wa Rugarama bifatanyije n’Umunyamabanga Nshingwabikorwa w’Intara y’Iburasirazuba, Dr Jeanne Nyirahabimana, mu muganda rusange usoza ukwezi kwa Mata, wibanze ku gusiba imyobo yacukuwemo amabuye y’agaciro mu buryo butemewe n’amategeko.

Hari mu rwego rwo kwirinda ikibazo cy’isuri n’impanuka muri iki gihe cy’imvura.

Nyuma y’Umuganda, abaturage bahawe ubutumwa butandukanye burimo, kwigira, umutekano, kwirinda amakimbirane yo mu muryango, gutanga ubwisungane mu kwivuza na Ejo Heza ku gihe, kutangiza ibidukikije no kwishakamo ibisubizo by’ibibazo bafite.

Basibuye inzira z’amazi kugira ngo adatera isuri mu mirima no mu ngo z’abaturage

Akarere ka Kayonza, mu Mirenge yose y’Akarere abayobozi mu nzego zitandukanye bifatanyije n’abaturage mu muganda rusange usoza ukwezi kwa Mata 2025.

Ku rwego rw’Akarere, umuganda wakorewe mu Murenge wa Mwiri, Akagari ka Nyawera, hasanwa umuhanda wangijwe n’ibiza byatewe n’imvura.

Uyu muganda kandi wanibanze ku gusibura imirwanyasuri mu rwego rwo gukumira ibiza bituruka ku mvura, gusibura inzira z’amazi, gutema ibihuru n’ibigunda bifasha imibu ikwirakwiza Malariya kororoka, no gusubiranya ibisimu by’ahacukurwa amabuye y’agaciro.

Umuyobozi w’Akarere ka Ngoma, Niyonagira Nathalie, ari kumwe n’abagize inzego z’umutekano bifatanyije n’abaturage b’Umurenge wa Mutenderi, mu muganda rusange usoza ukwezi kwa Mata 2025 ahatunganyijwe umuhanda, basibura inzira z’amazi ndetse banasiba ibinogo mu muhanda ureshya na Kilometero eshanu (KM 5).

Inzu zasenywe n’ibiza zasanwe

Ku rwego rw’Akarere ka Nyagatare, umuganda wakorewe mu Murenge wa Kiyombe Akagari ka Tovu, ahasibuwe imirwanyasuri n’inzira z’amazi mu rwego rwo gukumira ibiza bituruka ku mvura.

Guverineri w’Intara y’Iburasirazuba, Pudence Rubingisa n’abandi bayobozi, bifatanyije n’abaturage b’Akarere ka Rwamagana mu Murenge wa Kigabiro mu bikorwa byo gutunganya umuhanda mu Kagari ka Nyagasenyi.

Nyuma y’umuganda, abaturage bakanguriwe gukora cyane bakiteza imbere ubwabo n’Igihugu muri rusange, kwirinda ibiyobyabwenge, kunoza isuku hose no gukumira ingaruka ziterwa n’ibiza, cyane muri iki gihe cy’imvura nyinshi kandi ivanze n’umuyaga, bazirika ibisenge by’inzu, gutera ibiti no kubibungabunga.

Isuri yateje ibinogo mu mihanda, abaturage bakaba biyemeje kubisiba

Ibisimu byacukuwemo amabuye y’agaciro byasibwe mu rwego rwo gukuraho aho imibu itera Malariya yororokera

Imihanda y’imigenderano yari yarasibye na yo yasibuwe

Mukangarambe avuga ko bahanganye n’interahamwe ku buryo iyo hataza abasirikare bataribubaneshe

Ibi ni ibikubiye mu buhamya yatanze ku wa 18 Mata 2025, ubwo ku rwibutso rwa Jenoside rwa Mwulire, Akarere ka Rwamagana, hibukwaga ku nshuro ya 31 Jenoside yakorewe Abatutsi, ahanashyinguwe mu cyubahiro imibiri mishya 96 isanga 27,088 yari isanzwe iruhukiye muri uru rwibutso.

Mukangarambe, yagaragaje uburyo imiryango ya se na nyina yatotejwe guhera 1959, ndetse bamwe bagahitamo guhunga Igihugu.

Aho bari batuye ngo uwari Burugumesitiri, Semanza Laurent, yabakikije abitwaga abakiga bakuwe mu Majyaruguru w’Igihugu.

Mu mashuri yiga ngo yahuye n’itotezwa rikomeye cyane ku barimu bamwigishaga, ku buryo hari n’uwashatse kumujugunya mu kigega cy’amazi abanyeshuri bagenzi be bagatabara.

Byageze aho akora ikizamini cya Leta aratsinda ariko umwanya we wacishijwemo umurongo, asimbuzwa undi w’Umuhutu.

Tariki ya 07 Mata 1994, ngo nibwo abantu ba mbere batangiye kwicwa abandi baratwikirwa, abenshi batangira guhunga uretse ko hari bamwe mu bagabo b’Abatutsi biyemeje guhangana n’ibitero byiganjemo iby’abakiga.

Avuga ko bamwe bari batangiye guhungira i Mwulire, bayobowe n’uwitwa Guido babashije guhangana n’ibitero by’interahamwe kuva tariki ya 07 kugera tariki ya 18 Mata 1994, aho baje kurushwa imbaraga n’amasasu y’abasirikare.

Imibiri 96 yashyinguwe mu cyubahiro

Nyuma y’aho batwitse imodoka yari yazanye abasirikare ngo basabye ubufasha haza abandi benshi cyane, ndetse n’interahamwe zibona imbaraga zizinjiza aho abantu bari bateraniye.

We ngo yanze gutemwa ahitamo kwiruka bamukurikiza isasu ariko ku bw’amahirwe ntiryamufata akomereza mu gihuru cyari hafi aho.

Ati “Naramanutse sinzi uko nanyuze mu nterahamwe, umusirikare agiye kundasa isasu rifata inyana y’inka ndakomeza ndamanuka ngera mu gashyamba kari hepfo aha.”

Abasirikare bakimara kugenda ngo abari bakiri bazima barikusanyije bafata gahunda yo kujya Kayonza, kuko bari bamaze kumenya ko Ingabo za RPA zamaze kuhafata.

Mu nzira ibaganisha i Kayonza ngo bagiye bicwa umugenda. Bageze ku mugezi bita Cyabitana ngo abandi barambutse we awugwamo amazi.

Yagize ati “Abandi barambutse jye amazi arantembana, nakoze yenda nka kilometero muri ayo mazi hagati mpasanga igiti cyaguyemo nkihagamamo ndara muri uwo mugezi. Kuva mu mugezi ngo byamubereye ikibazo kuko wari ukikijwe n’urufunzo rurimo isayo kuko yarigisemo amaboko aba ariyo asigara hejuru.”

Ababashije kwambuka bamwe ngo bagiye i Nkamba, i Ruramira na Bugambira na we aza kugera aho i Bugambira, ahagejejwe n’umugabo wamusanze akiva mu mugezi.

Aho bari bari ngo ntibari bazi ko ari inkambi irimo interahamwe ziturutse muri Murambi n’abasirikare batsinzwe urugamba, nabo bakajya babacuza imyenda, baricwa ndetse abakobwa n’abagore bafatwa ku ngufu.

Bunamiye ababo baruhukiye mu rwibutso rwa Mwurire

Tariki ya 21 Mata ngo bafashe icyemezo cyo kujya kubaroha mu cyobo cy’Inkamba, abagabo babohewe amaboko inyuma.

Yagize ati “Baratujyanye tuhageze bakajya batema umwe bakamucamo kabiri bakajugunya mu rwobo kugeza aho bamwe babonaga nta yandi makiriro bakijugunyamo. Umugabo witwa Ntwari ni we waje ankura kuri urwo rwobo, yaraje arababwira ngo uyu ni Umuhutu ni uwa mukuru wanjye.”

Aho ngo yaje kuhava bakajya kuba mu rugo rw’umuntu wiyemeje kubahisha ariko na we akabakoresha imirimo ivunanye cyane, n’ubwo bari bafite ibikomere ku mubiri.

Mu gihe babaga muri urwo rugo ngo hari uwashatse kumubohoza arabyanga yiyemeza gupfa, ndetse amaze kubyanga ngo bategura igitero kizamuhitana n’abo bari kumwe ariko barakirokoka.

Ati “Haje kuza umugabo ashaka kumbohoza ngo anshake ndamubwira nti ntibishoboka. Bapanga igitero cyarimo n’abasirikare baza kutwica kubera ko nanze gushaka uwo muhungu wo muri uwo muryango. Umunsi bapanze wo kutwica igitero cyabo cyakomwe mu nkokora n’Inkotanyi zari zihageze.”

Visi Perezida wa Sena, Senateri Solina Nyirahabimana, yavuze ko Jenoside yakorewe Abatutsi yateguwe n’abayobozi babi kuva igihe cy’ubukoloni, kugera kuri Repubulika ya mbere n’iya kabiri.

Yavuze ko by’umwihariko i Mwulire, uwari Burugumesitiri wa Komini Bicumbi, Laurent Semanza, umugambi wa Jenoside yawutangiye kera.

Ati “Uwari Burugumesitiri Semanza yatangiye umugambi wa Jenoside mbere ya 1994, yajyaga yita Abatutsi, Abahima, yabona umugabo ati Umuhima, yabona umugore ati Umuhimakazi. Wari umugambi ukomeye cyane wo kubagira abanyamahanga, kubatandukanya n’Abanyarwanda.”

Akomeza agira ati “Byari ukugira ngo bizamworohere no mu gihe cyo gushyira mu bikorwa umugambi wa Leta ye yakoreraga yarimo gutegura. Ni nako hirya no hino mu Gihugu ahegereye inzuzi bishe Abatutsi, bakazibatamo ngo basubire iwabo hahandi mu mahanga.”

Hon. Nyirahabimana yasabye urubyiruko gukurana indangagaciro zizatuma bubaka Igihugu kizira amacakubiri

Yavuze ko ibi ari bimwe mu bigaragaza ko umugambi wo kurimbura Abatutsi wari wateguwe igihe kirekire.

Yanashimye ubutwari bw’Abatutsi bari bahungiye ku musozi wa Mwulire, kuko babashije kwirwanaho bijyanye n’ubushobozi bari bafite n’ubwo barushijwe imbaraga n’amasasu y’abasirikare n’abajandarume.

Avuga ko Abanyarwanda bose bashima ubutwari bw’Ingabo za RPA, zarokoye Abatutsi mu gihe abicanyi bari baragambiriye kubarimbura burundu.

Yasabye urubyiruko nk’abagize umubare munini w’Abanyarwanda kwiyumvamo ko aribo mbaraga zubaka Igihugu, bagaharanira icyateza imbere u Rwanda banga icyarusubiza inyuma.

Yavuze ko n’ubwo hashize imyaka 31 Jenoside yakorewe Abatutsi ihagaritswe, ariko hakiriho imvugo zirimo ingengabitekerezo ya Jenoside haba mu Banyarwanda ndetse no mu banyamahanga, bityo buri muntu akwiriye kwamagana abo bantu kandi bakagaragazwa bagashyikirizwa ubutabera.

Yasabye abantu gutanga amakuru ku hari imibiri y’Abatutsi bishwe muri Jenoside, kuhagaragaza kugira ngo ishyingurwe mu cyubahiro.

Mu mibiri 96 yashyinguwe mu cyubahiro harimo 79 mishya yabonetse i Mwulire munsi y’urwibutso, igaragajwe n’umuntu waje kuhahinga ‘tugabane’, nyamara mbere aho hantu hari hasanzwe hahingwa.

Abarokokeye i Nyakarambi bababazwa n’uko abo babana babiciye batarabasaba imbabazi

Yabitangaje ku wa 16 Mata 2025, ubwo hibukwaga ku nshuro ya 31 Jenoside yakorewe Abatutsi, by’umwihariko abiciwe i Nyakarambi n’uduce tuhegereye bashyinguye mu rwibutso rwa Jenoside rwa Nyakarambi.

Avuga ko guhera mu 1959 umuryango we wahohotewe cyane, bituma bamwe bahunga Igihugu ariko se ntiyahunga.

Mu mwaka wa 1962, nabwo ngo se yarakubiswe bikomeye bituma ahunga by’igihe gito, ariko asiga inda asigiye umugore ayiragije Imana, ari naho havuye izina ryahawe umwana wavutse ‘Ndagijimana’, n’ubwo akivuka nyina yari yamwise Nsabimana.

Uyu n’umuryango we, ngo bakomeje kunyura mu bibazo by’ihohoterwa rya hato na hato, ariko barihangana birinda bigera mu mwaka wa 1994.

Indege yari itwaye Habyarimana ikimara kugwa, ngo Abahutu bari baturanye batangiye kubareba nabi ariko gutangira kubica bitangira tariki ya 14 uko kwezi.

Avuga ko mbere abicanyi bazaga bakabaha inka zo kurya n’amafaranga, ariko bigeze aho batangira kubica n’ubwo kenshi kurokoka kwe yabikesheje inka kuko abicanyi bazihugiragaho bagabana inyama, akabona inzira n’aho kwihisha.

Icyakora ngo byageze igihe abona kwihisha mu bihuru bitazamuhira kuko bahigishwaga imbwa, we n’uwo bari kumwe bahitamo kujya kwihisha mu rugo rw’umwe mu batarahigwaga ndetse Imana iranabafasha arabyemera, abashyira muri plafo y’inzu ye ndetse akanabagaburira.

Uyu mugabo wabahishe ngo yaje gushaka kubambutsa ngo bahungire muri Tanzaniya, ariko inshuro ya mbere bageze ku mugezi w’Akagera bahasanga interahamwe baragaruka, icyakora ngo nyuma y’iminsi micye biza gukunda barambuka.

Ati “Tugeze ku Kagera tuhasanze interahamwe nyinshi twaragarutse, Ariel abona nadusubiza iwe bashobora kuzatubona bakatwica aduhisha mu gihuru cyari haruguru y’iwe, yari yejeje ikawa nyinshi akajya afata indobo agashyiramo ibiryo akatugemurira nk’ugiye gusoroma ikawa.”

Bagezeyo ngo yaje kurwara Malariya aho bagiye kumuvuza ahitwa mu Rwanza, hari impunzi zo muri Komini Murambi ya Gatete, arogeshwa ibinini n’umukobwa w’interahamwe wari umuganga icyakora ku bw’amahirwe abamuvuzaga bamujyana mu rindi vuriro aravurwa arakira.

Amaze kumenya ko kugera ku Rusumo, Inkotanyi zahafashe yahisemo guhita agaruka mu Rwanda atangira ubuzima bwo kwiyubaka n’ubwo bitari bimworoheye, kuko yari yapfushije abagize umuryango we hafi ya bose harimo umugore n’umwana.

Avuga ko mu nshuti afite uyu munsi harimo n’abamwaciye umuryango, ariko akababazwa n’uko ntawe uratera intambwe ngo amusabe imbabazi.

Yagize ati “Nk’ubu Data yishwe n’uwitwa Nkuba, amuteye icumu mu rubavu, mama bamwotsa umunwa baravuga ngo mwicare iruhande Abami ntibapfa nahembuka umuhe ibiryo. Ashizemo umwuka uwitwa Munyentwari akajya aza akamujomba ibiti mu kanwa, avuga ngo Abami ntibapfa ubwo yasinziriye, babikoze iminsi itatu yose.”

Akomeza agira ati “Ubu abana ba Nkuba nibo tubana ni inshuti zanjye, urumva twebwe twarenze inzika n’urwango no guhora, tugera ku ntambwe yo gukunda abatwishe n’ababakomokaho kugira ngo twerekane ubudasa, kandi twubake Igihugu kizira amacakubiri, ariko ikitubabaza ntibadusaba n’imbabazi.”

Dr Nyirahabimana avuga ko Igihugu cyahisemo kubakira ku bumwe bw’abagituye

Yashimye ingabo za RPA zabarokoye zikabaha ubuzima, ndetse anashima by’umwihariko abateye intambwe bakerekana aho bagiye bajugunya imibiri y’ababo bishwe, ariko anasaba n’abandi kubikora kugira ngo yose iboneke ishyingurwe mu cyubahiro.

Umunyamabanga Nshingwabikorwa w’Intara y’Iburasirazuba, Dr Jeanne Nyirahabimana, yavuze ko n’ubwo abarokotse bagifite ibikomere by’ababo babuze, ariko kubera ubuyobozi bwiza bw’Igihugu buhuriza abantu hamwe mu kwibuka, bigatuma intimba igabanuka.

Ikindi ni uko Leta yashyizeho gahunda yo kunga Abanyarwanda, himakazwa Ndi Umunyarwanda.

Yasabye urubyiruko kumva, rukumvira no ku mateka bakubaka u Rwanda ruzira amacakubiri yo yabaye intandaro ya Jenoside yakorewe Abatutsi.

Urwibutso rwa Jenoside rwa Nyakarambi ruruhukiyemo imibiri y’Abatutsi bishwe muri Jenoside mu 1994 basaga 12,000.

Kabayiza avuga ko agitotezwa n’uwagize uruhare mu rupfu rwa mushiki we

Yabitangaje ku wa 15 Mata 2025, mu kwibuka ku nshuro ya 31 Jenoside yakorewe Abatutsi by’umwihariko abiciwe i Gishari ahari ibiro bya Komini Muhazi, hakaba hanashyinguwe mu cyubahiro imibiri ine harimo iyabonetse vuba ibiri.

Kabayiza wakomokaga muri Komini Gikoro ariko agakorera i Rwamagana, avuga ko tariki 07 Mata 1994, yaje ku kazi bisanzwe abajandarume babasubiza mu ngo zabo, ariko ngo mu gutaha babona hakurya muri Komini Murambi inzu zirimo gushya.

Iryo joro ngo iwabo i Kimbazi bose baraye irondo baba Abahutu n’Abatutsi, bakumiriye ibitero byaturukaga i Musha.

Bukeye ngo bagiye mu nama ihuza Abanya-Kimbazi na Musha ngo bamenye icyabaye, ariko bisanga Abahutu bari bafatanyije bose bamaze kubavamo urusorongo basanga interahamwe.

Tariki ya 12 Mata, ngo nibwo bageze ku biro bya Komini Muhazi ndetse nyuma y’iminsi itatu barimo gushakisha uko babona icyo kurya, ngo nibwo igitero cy’abasirikare baje mu madoka cyabateye n’ubwo ngo bahoraga baha umupolisi amafaranga ngo abarindire umutekano.

Yagize ati “Tugera hano hari umupolisi twahaga amafaranga buri munsi ngo aturinde. Uwo munsi baturasa ntituzi iyo yari yarengeye ahubwo habanje kuza imodoka ntoya ya gisirikare, nyuma haza amakamyo abiri maze bazenguruka ikigo batangira kuturasa.”

Avuga ko abarokokeye i Gishari bafashe inzira berekeza i Kavumu, kugira ngo babone uko bambuka bagasanga Inkotanyi muri Komini Murambi, bicwa umugenda abenshi bakaba ari abiciwe ku nkombe bategereje amato yari yambukanye inkomere.

Avuga ko uretse ababashije koga abandi interahamwe zabaguyemo zirabatemagura, abandi bakiroha mu kiyaga ari bazima bahunga imihoro n’ibisongo.

Yagize ati “Umudamu wari ukujije witwa Assoumpta ni we waduhaye urugero tujya mu mazi turi benshi, interahamwe ziba zitangiye gutema abasigaye ku mwaro abandi bakijugunya mu mazi ngo badatemwa.”

Abiciwe kuri Komini Muhazi abenshi ni abarashwe n’abasirikare ba FAR

Abajyanywe n’ubwato ndetse n’ababashije koga bakambuka ngo bururukiye I Gakoni bafata umuhanda ujya i Kiramuruzi, ari naho bahuriye n’Inkotanyi bucya babajyana i Kiziguro ahari inkambi ndetse inkomere zitangira kuvurwa.

Bamwe mu bagize uruhare muri Jenoside i Rwamagana baracyafite ingengabitekerezo yayo

Kabayiza avuga ko ababakoreye Jenoside batabishimiye n’ubwo babana, kuko bakibagaragariza urwango haba mu mvugo no mu bikorwa byangiza imitungo yabo.

Yagize ati “Umugabo duturanye ni umusaza w’imyaka irenga 90 cyangwa 100. Bapfakurera, rimwe navuye mu misa nsanga umwana we w’imyaka 13 arimbura inturusu zanjye mbyereka abayobozi, umwana avuga ko se ari we wamubwiye kuzirimbura. Namuhaye n’imbabazi gusa musaba kongera gutera aho baranduye.”

Avuga ko ikindi gihe uwo musaza yibwiriye Kabayiza amagambo arimo ingengabitekerezo ya Jenoside, amubwira ko mu muryango wabo iyo aba ari we wapfuye abandi bose bakarokoka.

Umwaka nturashira mu gihe ngo bashakaga umubiri wa mushiki we, Bapfakurera yagizemo uruhare mu kumwica, ngo yanyuze kwa Kabayiza yasinze, aravuga ngo ahari hagaramye intumbi ubu hagaramye ibipangu.

Nyamara ngo ibi byose Bapfakurera abikora yirengagije ko hari igihe umwana we yafashwe n’amashanyarazi, Kabayiza akaba ari we umutwara mu modoka ye ndetse akamuguriza n’amafaranga.

Pasiteri Pierre Céléstin Kamasa wavuze mu izina ry’abafite ababo bashyinguwe mu rwibutso rwa Muhazi, yavuze ko imibiri ishyingurwa uko ari ine (4), ibiri yabonetse bitewe n’umukozi wakoraga mu rugo rw’umuntu, waje gutanga amakuru mu gihe yahabaga akaba yarahoraga abaza ikiri ahantu yajugunyaga imyanda bakamusaba guceceka ngo bitazabakoraho. Abandi babiri ngo ni abimuwe ahandi bari basanzwe bashyinguwe.

Iyo ceceka ngo ni yo ituma hari imibiri itaraboneka ngo ishyingurwe mu cyubahiro, agasaba abagize uruhare muri Jenoside kubafasha bakabereka imibiri y’ababo bagashyingurwa mu cyubahiro.

Ikindi yavuze niuko hari ihungabana mu bakecuru barokotse Jenoside, ahanini ritewe n’uko abana babo basoza amashuri bakajya gutura mu mijyi ababyeyi bagasigara bashinyagurirwa n’abaturanyi babo.

Nk’uko bitangazwa n’umuyobozi w’Akarere ka Rwamagana, Mbonyumuvunyi Radjab, abari abayobozi b’Amakomini ane yahujwe akabyara aka Karere, hariho abayobozi bashyigikiye Jenoside bikabije bituma hicwa Abatutsi benshi.

Urugero ni Komini Bicumbi yayoborwaga na Rugambarara Juvenal, wari usimbuye Laurent Semanza bafatanyije mu kurimbura Abatutsi, Komini Gikoro ya Bisengimana Paul, wari umwambari wa Semanza, Komini Rutonde yayoborwaga na Bizimana Jean Baptiste na Komini Muhazi yayoborwaga na Burugumesitiri w’umusigire, Ntabandama Claver, wagize uruhare mu kurimbura Abatutsi bari bahungiye kuri Komini.

By’umwihariko ariko ngo Komini Muhazi, yari ifite umwihariko w’uko izengurutswe n’ikiyaga cya Muhazi ku buryo batabonye uko bambuka kuko bari bagoswe n’interahamwe za Komini Murambi, ku buryo abiciwe ku nkombe i Kavumu barenga 5,000.

Umunyamabanga Mukuru wa IBUKA, Mujyambere Louis de Montfort, avuga ko bagiye gushyira imbaraga mu buvugizi ku manza zijyanye n’imitungo yangijwe mu gihe cya Jenoside zitararangizwa.

Ati “Mu butabera kandi Umuryango IBUKA ugiye gushyira imbaraga mu buvugizi, mu bijyanye n’irangiza ry’imanza nkeya z’imitungo yangijwe muri Jenoside zitararangizwa, cyane izifite imbogamizi kuko inyinshi tubona harimo ubushake bucye kugira ngo izo mbogamizi zibe zavaho.”

Avuga ko ingengabitekerezo ya Jenoside igenda yongera ubukana ikanahindura isura bitewe n’uburyo ikorwa, ikibabaje ikaba igaragara cyane mu rubyiruko.

Yagize ati “Imibare itangwa na RIB, ingengabitekerezo igenda yiyongera aho amadosiye amaze kwakirwa uyu mwaka yazamutse birenga 50% ugereranyije n’umwaka washize, ikibabaje hakaba hagaragaramo urubyiruko.”

Yasabye Abanyarwanda baba mu Gihugu no hanze yacyo gutanga amakuru ku bagize uruhare bose muri Jenoside, kugira ngo bamenyekane bashyikirizwe ubutabera.

Senateri Kanziza Epiphanie, yavuze ko uretse ingengabitekerezo ikigaragara mu Rwanda ngo no mu bihugu by’amahanga irahari, kuko hari ibyerura bigashyigikira umutwe w’iterabwoba wa FDLR ugizwe n’abasize bakoze Jenoside.

Hashyinguwe imibiri ine mu cyubahiro

Aha akaba yatanze urugero ku Gihugu cy’u Bubiligi cyirirwa cyangisha u Rwanda amahanga, ndetse kinarusabira ibihano mu bindi bihugu, asaba Abanyarwanda kunga ubumwe.

Yasabye abanyarwanda muri rusange kwitabira ibikorwa byo kwibuka mu minsi 100, kwegera no gufasha abarokotse bahereye ku bo bahorana, guca ukubiri n’amacakubiri ayo ari yo yose no kwamagana ingengabitekerezo ya Jenoside.

Mu cyahoze ari Komini Muhazi harimo inzibutso ebyiri, urwa Gishari ruruhukiyemo imibiri y’Abatutsi bishwe muri Jenoside 1,200 n’urwa Ruhunda ruruhukiyemo imibiri 5,081.

Mukabasoni (ufite mikoro) agaruka ku nzira y’umusaraba yanyuzemo by’amahirwe arokoka Jenoside

Yabitangaje kuri uyu wa 14 Mata 2025, ubwo hibukwaga ku nshuro ya 31 Jenoside yakorewe Abatutsi 1994, by’umwihariko abarenga 58,000 baruhukiye mu rwibutso rwa Jenoside rwa Nyarubuye mu Karere ka Kirehe.

Avuga ko igihe bari mu isoko ngo babonye i Nyarubuye na Rutunga batangiye kuhatwika, nabo bihutira gutaha ndetse ubwo batangira kujya birirwa mu bihuru.

Kubera ko agace bari batuyemo karimo imiryango micye y’Abatutsi, ngo interahamwe zakomeje kubabura bituma bababeshya ko ubwicanyi bwahagaze, bakwiye kuguma mu ngo zabo.

Avuga ko umunsi umwe ari iwe ngo yabonye igitero cy’interahamwe zambaye amashara zishoreye amatungo, yirukankira mu nzu y’ibyatsi yihishamo zihita ziyitwika ngo ahiremo ariko abasha kuyisohokamo itarakongoka.

Ati “Abahungu babiri bo kwa Karamage wari Resiponsabule babwiye umugabo wanjye ngo nazane irangamuntu, mu gihe atarayibaha bamukubita hasi jye nahisemo nirukankira mu nzu y’ibyatsi nihisha munsi y’igitanda, nkumva basambura inzu yindi y’ibati n’ihene zihebeba.”

Akomeza agira ati “Ubwo bahise batwika ya nzu bahereye ku muryango, mbonye igiye gukongoka ndavuga ngo reka nsohoke n’ubundi banyice. Nageze ku muryango igikuta kinkubita mu gahanga n’ubu nta musatsi mpagira.”

Imibiri ine yabonetse yashyinguwe mu cyubahiro

N’ubwo yabashije kuyivamo ariko ngo abari bayitwitse bamutegeye aho yari agiye kwihisha, bamukubita inkoni ebyiri bamusiga hasi bazi ko yapfuye.

Aho yarahagumye kugeza haje indi nterahamwe imutema mu mutwe kuko yabonaga asa n’ushaka kubyuka.

Avuga ko aho yaje kuhava asubira iwe asanga inzu y’ibati bayisambuye, amabati barayatwara ndetse umugabo we n’umwana umwe baryamye aho ariko batarashiramo umwuka.

Yaje gutabarwa n’umwe mu baturanyi be w’umukecuru wamujyanye kumuhisha ahantu mu murima, akajya anamugemurira kugera n’aho aboneye imiti akajya amuvura.

Yagize ati “Haje nyina wa Rukizangabo, umukecuru afite ikibando arakimpa na we aheka umwana umwe undi amufata mu maboko, aranjyana mu rutoki harimo urubingo ndetse asiga ambwiye ngo hatagira umwana urira cyangwa ngo akorore, kuko muhungu we Mutabaruka yaza akabica.”

Yungamo ati “Ku mugoroba yazanye amazi ashyushye aranyoza amaraso anshiraho ndetse azanira n’abana igikoma. Hashize iminsi Rukizangabo azanira nyina ibinini bya Pene (Pennycline) akanyoza ibisebe agasukamo umuti.”

Minisitiri Kayisire yasabye abakuru kubwiza ukuri abakiri bato amateka ya Jenoside

Avuga ko uyu mukecuru n’umuhungu we utarishoye mu bwicanyi, aribo batumye abasha kurokoka we n’abana be babiri bari kumwe, n’ubwo mu bana icyenda bose yari yarabyaye yasigaranye bane gusa.

Mu gihe abantu bamwe ngo barimo bahunga na we acyihishahisha, ngo yaje guhura n’Inkotanyi zimujyana mu nkambi i Nyakarambi arokoka atyo.

Ashimira ingabo za RPA Inkotanyi zabarokoye ndetse bakubaka Igihugu kizira irondabwoko, bakaba babayeho mu mudendezo.

Umuyobozi wa IBUKA mu Karere ka Kirehe, Nduwimana Bonaventure, avuga ko umubare munini w’abarokotse Jenoside bafite inzu zishaje, akifuza ko ubuyobozi bwabafasha zigasanwa.

Umunyamabanga wa Leta muri Minisiteri y’Ubutegetsi bw’Igihugu, Kayisire Marie Solange, yihanganishije abarokotse Jenoside anabashimira imbabazi batanze ku babahekuye, kwihangana no kudaheranwa n’agahinda.

Yanashimye kandi abatanga ubuhamya bavuga n’amazina y’abagize uruhare muri Jenoside, kuko bifasha mu gukurikirana imanza no kuzirangiza.

Yavuze ko mu kwibuka kuri iyi nshuro ya 31 Jenoside yakorewe Abatutsi mu 1994, bibaabje kuba hakigaragara ingengabitekerezo ya Jenoside by’umwihariko ikaba yiganje mu rubyiruko, bigaragara ko bayitozwa n’abakuru.

Ati “Abaturage b’iki Gihugu abenshi ni urubyiruko kandi abenshi bakaba batarabaye mu mateka ya Jenoside, bayakuriyemo kuko bakuze nyuma ya Jenoside yakorewe Abatutsi. Ni ikibazo rero gikomeye iyo tubona ingengabitekerezo ya Jenoside mu rubyiruko.”

Akomeza agira ati “Biradusaba ko ibiganiro nk’ibi tubimanura tukabyegereza abana bato mu miryango, mu mashuri n’aho duteranira, abayobozi, ababyeyi, abakuru muri twe, abanyamadini n’amatorero aho twese dushobora kugera ku baturage. Ni ugukomeza tuganira kuri aya mateka kugira ngo turandurane imizi ingengabitekerezo ya Jenoside.”

Avuga ko kurwanya ingengabitekerezo ya Jenoside bisaba kuvugisha ukuri ku byabaye, imiryango ikaganiriza abana batoya, bakanababwira n’ibyababayeho hagatangwa umucyo, abana nabo bagatinyuka bakabaza ibyo badasobanukiwe.

Murisa James atanga ubuhamya

Yabitangaje kuri uyu wa 13 Mata 2025, ubwo hibukwaga ku nshuro ya 31 Jenoside yakorewe Abatutsi mu 1994, by’umwihariko abarenga 8,000 biciwe kuri Kiliziya gatolika ya Musha mu Karere ka Rwamagana.

Murisa avuga ko Habyarimana agifata ubutegetsi ngo inka z’Abatutsi zaratemwe, ndetse mu mashuri hacibwamo ibice, icy’impirimbanyi anakibera umuyobozi ndetse n’igice cy’Inkotanyi cyane.

Bageze mu mwaka wa kane ngo bigishijwe n’umwarimu w’Umurundi, aho yafataga bamwe mu banyeshuri bahawe amazina arimo ‘Shingo ra Upanga’ bivuze ijosi ry’ikiryohera-muhoro, yahaye umwe mu bakobwa.

Uwo mwarimu ngo ajya gusubira iwabo yasize hari umuturage abwiye ko mu Rwanda hazaba Jenoside, kandi Umututsi uzahungira i Burundi azamwica.

Yagize ati “Twageze mu ishuri ryigishagamo Umurundi waje ahunze intambara iwabo, akatubwira ko yitwa Ntukamazina Aron Eric Hardy, akatwereka ko adukunda ariko aturyarya. Hari umukobwa twiganaga wari mwiza witwa Bazihizina, akajya amuhamagara ngo Shingo ra upanga tukumva ni akazina keza natwe yadushakira amazina nk’ayo, nyamara avuga ko ijosi rye ari ikiryohera-muhoro.”

Guverineri Rubingisa ashyira indabo ku rwibutso rwa Musha

Avuga ko FRODEBU ifata ubutegetsi, uyu mwarimu ngo yagurishije umuntu ubutaka bwatanzweho ingwate muri Banki y’Abaturage, arishyurwa ariko mu gihe yiteguraga gutaha haza undi muntu amenyesha uwahaguze ko yaguze ingwate ya Banki, bajya kumwaka amafaranga yari yahawe.

Icyo gihe ngo yababwiye ko mu Rwanda hagiye kuba Jenoside, kandi Umututsi uzahungira i Burundi azamwica.

Ati “Yabwiye Ruzindaza François ngo umbujije amahirwe hagiye kuba ihonyabwoko (Jenoside), kandi nta handi mufite muzahungira hatari i Burundi, ngiye iwacu kandi muzansangayo nzakwica.”

Murisa n’ubwo yabaga uwa mbere mu ishuri, yatsinzwe ikizamini cya Leta ndetse anangirwa gusibira ahitamo kujya mu bushabitsi, aho yahisemo umwuga w’ubudozi.

Avuga ko mu mwaka umwe gusa yari amaze kubaka inzu, ndetse ahita anashaka umugore ku buryo Jenoside yatangiye afite abana babiri.

Ati “Banyangiye gusibira ndataha niha gahunda ko ngomba gukora cyane n’uwasigaye mu ishuri atazanduta. Narebye imyuga yose mbona igoranye ariko rimwe mushiki wanjye asabwe njya kudodesha ipantalo banca amafaranga 400, ndebye uko ari menshi kandi idozwe mu gihe gito, mpitamo uwo mwuga mu mwaka umwe nari nujuje inzu.”

Hashyinguwe mu cyubahiro imibiri y’Abatutsi bishwe muri Jenoside

Avuga ko indege ya Habyarimana ikigwa ngo hatanzwe itangazo ko nta muntu wemerewe kuva aho ari, nabo baratuza ariko yigira inama yo kuva iwe adakinze ajya iwabo mu rugo n’umugore n’abana.

Ahageze ngo umugabo warariraga amatafari y’urusengero rwabo ngo yaje kumwishyuza, anamubwira ko agomba kurara amwishyuye.

Yagize ati “Umugabo warariraga amatafari y’urusengero yaje kunyishyuza mubwira ko nzayamuha ejo na we ansubiza ko nkwiye kumwishyura, kuko ejo mubwira nzaba ntakiriho.”

Nyuma ngo baje kwigira inama yo kujya ku rusengero i Musha ariko bari hafi kuhagera, ngo abakozi bose ba Komini Gikoro barabatangiriye, interahamwe zibinjiramo zitangira kubaka amafaranga.

Ngo bajyanywe mu busitani bwa Komini bagotwa n’abakozi bayo, bukeye hahamagajwe abajandarume b’i Rwamagana ngo babe ariho babajyana kuko bari benshi.

Avuga ko mu gihe umupolisi wa Komini yarimo arasa abaturage, we ngo yari arimo kubwiriza kuko yari asanzwe ari umuvugabutumwa ku buryo yanabwiye Burugumesitiri Bisengimana Paul, wayoboraga Komini Gikoro, ko akwiye kubarindira umutekano.

Yagize ati “Naramubwiye nti nkawe Burugumesitiri Bisengimana, Imana yaguhaye kuyobora Komini Gikoro, nk’umuyobozi yabonye ko wayobora abaturage kandi ukabageza kuri byinshi, none urimo kwica abanyantege nke aho kubakiza. Imana izabikubaza byose nta na kimwe kizayisoba umunsi w’urubanza.”

Bisengimana ngo yaje kubabwira ngo nibatahe iwabo, ariko interahamwe zahawe amabwiriza yo kubategera mu nzira zikabica.

Ngo baragiye bageze kuri bariyeri baricazwa batangira kubatemagura, ariko batabarwa n’uko interahamwe zirwaniye ikiraro cy’inyana buri wese avuga ko ari icye.

Bakomeje inzira bagana ku kiyaga cya Muhazi, by’amahirwe aza guhura n’Inkotanyi zimugeza mu nkambi y’i Muhura muri Gatsibo.

Yashimye Imana yakoresheje Inkotanyi zigahagarika Jenoside, ndetse hakubakwa Igihugu kizira ivangura ahubwo abantu batozwa kuba umwe.

Guverineri w’Intara y’Iburasirazuba, Pudence Rubingisa, yagaye abari abayobozi b’Amakomini ya Gikoro, Bisengimana Paul, Juvenal Rugambarara na Laurent Semanza basimburanye ku buyobozi bwa Komini Bicumbi, kuko bagize uruhare runini mu kwica Abatutsi mu duce bayoboraga aho kubarinda.

Perezida wa Ibuka mu Karere ka Rwamagana, Musabyeyezu Dative, avuga ko Abatutsi biciwe i Musha benshi bapakiwe imodoka bajya kujugunywa mu bisimu byacukurwagamo amabuye y’agaciro, ku buryo bishoboka ko hari imibiri ikirimo itaraboneka.

Yasabye ko kuri ibyo bisimu bashyirwa ikimenyetso cy’urwibutso, mu rwego rwo kwibuka Abatutsi bajugunywemo.

Akarere ka Rwamagana gafite inzibutso za Jenoside 11, ziruhukiyemo imibiri y’Abatutsi bishwe muri Jenoside 84,124. Izi nzibutso zikazahuzwa hagasigara esheshatu (6).

Guverineri Rubingisa yanenze abayobozi bishe abaturage aho kubarinda

Pasiteri Gallican wimye Seritifika ya CERAI ubu akaba atunze Degree (A0)

Avuga ko yavutse mu muryango w’abana batanu akaba ari we warokotse wenyine, abandi bakaba baruhukiye mu rwibutso rwa Jenoside yakorewe Abatutsi rwa Kayonza.

Umuryango we wimukiye mu Karere ka Kayonza mu 1991 bavuye muri Komini Gatonde, bahunze urugomo ba se wabo bakorerwaga ndetse no kuburirwa ko bazicwa.

Icyo gihe ngo byabateye ubwoba cyane kubera ko hafi yabo Kibirira na Gaseke, hari hamaze kubera ubwicanyi.

Avuga ko we na mukuru we kwiga byabagoye cyane, kuko batabashije gutsinda ibizamini bya Leta batabuze ubwenge we akomereza muri serayi (CERAI), bari barahimbye kaminuza y’Abatutsi.

Ayisoje ngo yaje kumva imyanya y’akazi mu ruganda rukora imyenda rwa UTEXRWA agiye kwaka seritifika (Academic Certificate), umuyobozi w’ishuri arayimwima bityo abura amahirwe yo kujya guhatanira uwo mwanya.

Ati “Hari mukuru wanjye wo kwa mama wacu bari batuye i Kabuye yakoraga muri UTEXRWA, aza kumbwira ati nibura urangije CERAI, hari ikiciro cy’abakozi benda gutangira guha akazi uzazane seritifika ngushakire akazi. Naragiye Deregiteri (Directeur) bita Karera Jean Nepomscène arayinyima burundu.”

Bashyinguye imibiri ibiri y’abazize Jenoside mu rwibutso rwa Mukarange

Avuga ko Leta y’ubumwe yamukijije igikomere cy’amashuri yahoranaga, kuko yabashije kwiga asoza ikiciro cya kabiri cya kaminuza.

Yagize ati “Nyakubahwa mushyitsi mukuru umbwirire Umukuru w’Igihugu uti Kagorora Gallican w’i Kayonza igikomere cy’amashuri yari agiye kuzapfana atabuze ubwenge warakimukijije, kuko bamwimye seritifika ya CERAI ubu akaba afite degree ya A0 yemewe na HEC.”

Kagorora, avuga ko nyuma ya Jenoside yahitanye umuryango yaje kwiyubaka, kuko ubu afite ishuri rye ku giti cye ndetse afite n’abarimu 10 ahemba buri kwezi.

Mu gihe cya Jenoside Kagorora n’umukobwa bari baramaze kwemeranya gushakana, ngo bahishwe n’umuryango w’Abahutu ubajyana mu gihuru ndetse ukajya ubazanira amafunguro.

Avuga ko babaye muri icyo gihuru iminsi itandatu yose kuva tariki ya 10 kugera tariki ya 15 Mata 1994.

Kubera ko nta makuru bakomeje kumenya ngo bavuye mu gihuru bageze mu rugo rw’uwabahishe, basanga nyiri urugo yarishwe ariko umuryango we wahunze.

Yagize ati “Umuryango wa Kinyebuye wari impfura cyane n’ubwo interahamwe zamwishe, ku buryo ku mugoroba yajyaga aza akareba aho banyura batugemurira akongera agahuza utwatsi two hepfo no haruguru, kugira ngo batazabona ikirari.”

Abayobozi batandukanye bitabiriye icyo gikorwa

Akomeza agira ati “Ku wa gatanu nijoro rero twategereje bya biryo turabibura naho Malayika wacu yahunze. Twagiye muri rwa rugo dusanga barahunze kubera amasasu”.

Tariki ya 17 ngo biyemeje nabo gukurikira abantu bahungaga, ariko batazi ko mu nzira harimo za bariyeri.

Bageze i Nyamirama ngo baje gufatwa n’interahamwe zari ku magare zibashyira abasirikare, ariko mu gihe barimo gukubitwa arokorwa n’ifishi ya Batisimu.

Ati “Mu gihe abasirikare banteraga imigeri ya butini (inkweto), interahamwe nazo zinkubita impiri mu mutwe, agafishi nari mfite muri Bibiliya k’aho nabatirijwe nkiba mu Majyaruguru karaguye, noneho umusirikare umwe atangira kugasoma ahita abwira abankubitaga ngo icyo cyana mukireke ubanza ari icyacu (Umuhutu).”

Icyo gihe ngo inshuti bari kumwe bamwiciye aho we baramureka akomeza inzira, agana kwa Pasiteri wo mu itorero ryabo ahamara iminsi itatu.

Nyuma ngo yahunganye n’uwo muryango bageze mu Karere ka Kirehe, uwo mu Pasiteri ngo yahisemo kudakomeza igana Tanzaniya, ahubwo bahitamo kunyura iya Rukira bagaruka iya Kabarondo.

Icyakora ngo bageze ahitwa Nyankora ngo bashatse kumwica ariko uwo mu Pasiteri aramuhungisha kugeza ahuye n’Inkotanyi, ahitwa kuri Video mu Murenge wa Gahini.

Ubu buhamya Pasiteri Kagorora yabutanze ku ya 12 Mata 2025, ubwo bari mu gikorwa cyo Kwibuka ku nshuro ya 31 Jenoside yakorewe Abatutsi, ndetse banashyingura imibiri ibiri ku rwibutso rwa Mukarange.

Umuyobozi wa Ibuka mu Karere ka Kayonza, Ndindabahizi Didace, avuga ko Abatutsi barenga 40,000 aribo bishwe muri Jenoside ariko imibiri yabashije kuboneka irimo mu nzibutso itarenga 30,000 bivuze ko hari abandi bataraboneka.

Abo imibiri yabo itaraboneka ngo ni abajugunywe mu bisimu byacukurwagamo amabuye y’agaciro i Rwinkwavu, abaroshywe mu nzuzi n’imigezi, mu cyuzi cya Ruramira ndetse n’abiciwe muri Paruwasi ya EAR Nyagatovu.

Ariko nanone ngo hari n’abandi bashobora kuba bakiri mu ngo cyangwa ahandi hose interahamwe zabatsinze, agasaba buri wese wamenya ahari imibiri gutanga amakuru igashyingurwa mu cyubahiro.

Rutagarama wari umuyobozi w’ishuri yafunzwe azira moto

Yabitangaje kuri uyu wa 11 Mata 2025, ubwo mu Karere ka Nyagatare hibukwaga abari abakozi b’icyahoze ari Komini Muvumba, ibice bya Komini Ngarama, Murambi na Kiyombe byahujwe bikaba Akarere ka Nyagatare, bishwe muri Jenoside yakorewe Abatutsi Mata 1994.

Avuga ko mbere ya Jenoside ubutaka buriho Akarere ka Nyagatare k’ubu bwari bugabanyijemo kabiri, hari igice kigenewe ubworozi uhereye Cyabayaga na Tabagwe kugera Kagitumba ku mupaka, ahandi uhereye Rukomo na Mimuri ugana mu Majyaruguru y’Igihugu hakaba hari hagenewe ubuhinzi.

Icyakora ngo mbere y’uko urugamba rwo kubohora Igihugu rutangira hari gahunda yo kugabanya igice cyari kigenewe ubworozi, kikazengurukwa n’abakora ubuhinzi uhereye ahitwa Runyinya ukagera Nyabweshongwezi bakuwe mu Majyaruguru y’Igihugu, hagamijwe kubuza Abatutsi kuba bahungira muri Uganda.

Ati “Hari umugambi abantu batamenye kuko utagezweho ariko hariho gahunda yo gutuza abantu baturutse mu Majyaruguru (aba HB), guhera Runyinya kugera Nyabweshongwezi kugira ngo bakumire abashoboraga guhungira muri Uganda.”

Tariki ya 08 Ukwakira 1990, ngo ba Burugumesitiri Kamanzi Joseph wayoboraga Komini Ngarama na Rwabukombe Onesphore wayoboraga Muvumba, ku bufatanye n’ingabo za FAR, bashatse imodoka zitwara abantu babakura Cyabayaga na Rukomo baza gufatanya n’abasirikare kwica Abatutsi Gakirage.

Yagize ati “Ku mupango wabo, bazanye bisi Rukomo bapakiramo impunzi z’Abarundi, abandi babakura Cyabayaga noneho uko abasirikare barasa mu nzuri (Ranches) interahamwe, Abarundi na HB bagatema ushaka guhunga.”

Habanje igikorwa cyo gushyira indabo ku mva iruhukiyemo imibiri y’Abatutsi bishwe muri Jenoside

Nyuma yo kwica Abatutsi ba Gakirage ngo hakurikiyeho gusahura Rwempasha kuko ngo Burugumesitiri Rwabukombe, yapakiye abaturage ba Rukomo bavanze n’impunzi z’Abarundi zahabaga baje mu cyiswe gutoragura ubunyenzi bwapfuye n’intwaro zabwo.

Rutagarama avuga ko aribwo Burugumesitiri Rwabukombe, yamutwariye moto TF 125 yari iy’akazi, bavuga ko ariyo yifashishwa n’Inkotanyi mu gutwara abakomeretse ndetse ikagarukana imiti n’ibiryo.

Yagize ati “Amaze kuyitwara nazindukiyeyo mubwira ko moto ari iyanjye arambwira ngo aravugana n’uwari uyoboye igisirikare, naho ari umutego banteze kuko bavugaga ngo iriya moto ijya kuzana inyenzi zakomeretse ikazigeza hakurya (Uganda) ikagarukana imiti n’ibiryo by’abasigaye ku rugamba.”

Akimenya ayo makuru ayahawe n’umupolisi, ngo yahise ataha ntiyongera kubaza ibya moto ariko nabwo ngo ataramenya ko barimo kumuhiga.

Ngo yaje gushimutwa anarwaye bikozwe n’umukozi wari uwa ORTPN wamusanze iwe hafi y’aho yakoreraga, bakaganira ariko yamugeza mu modoka agahita abwira abandi ko uwo bashakaga amubonye.

Agira ati “Arantwara angeza i Ngarama banshyira muri kasho bukeye bantwara i Muhura muri kasho ya Komini mpamara icyumweru. Nyuma badushyira mu modoka badutwara i Byumba kandi byari amarorerwa kuko abagiye mbere yanjye bose nta n’umwe ukiriho, bose batwikiwe mu cyobo cyari mu kigo cya gisirikare.”

Akomeza agira ati “Nahamaze amezi ane (4), kubera abaharanira uburenganzira bwa muntu bakomeje kuvuga ntibongeye kutwicira aho, ahubwo byavugwaga ko bakwimuriye ahandi i Kigali, tukanabyishimira ko batwimuye nyamara ari ukwicirwa mu mayira. Ku bw’amahirwe twe twarekuwe nyuma y’amasezerano ya N’Sele.”

Kuwa 29 Werurwe 1991, Guverinoma y’u Rwanda na FPR Inkotanyi yari mu buhungiro, basinye amasezerano ya N’Sele yo guhagarika imirwano. Icyo gihe ayo masezerano yafunguje bamwe mu Banyarwanda bari muri gereza zitandukanye bashinjwa kwitwa ibyitso by’Inkotanyi.

Ayo masezerano yasinyiwe muri Repubulika Iharanira Demokarasi ya Congo ahitwa N’Sele, yafatwaga nk’agiye guhagarika intambara yari imaze amezi atandatu hagati y’ingabo za Leta n’iza FPR Inkotanyi, agafungura abafunzwe bashinjwa kuba ibyitso kandi agafungura n’inzira y’ibiganiro byo gucyura impunzi z’Abanyarwanda.

Abakozi b’Akarere ka Nyagatare biyemeje ko buri mwaka bazajya baremera uwarokotse Jenoside utishoboye

Muri Mata 1994, Rutagarama na bagenzi be bashyizwe mu kigo cya MINUAR, kandi nta musirikare wayo uhari, FAR yumvise amasasu y’Inkotanyi babahekesha ibikoresho byabo bajya kubicira i Busana, ariko ntibyashoboka kuko Inkotanyi zari zabegereye, bariruka barokoka gutyo.

Ubu hamaze kumenyekana Abatutsi batanu (5) bari abakozi ba Komini zahujwe bikaba Akarere ka Nyagatare, bishwe muri Jenoside ariko urutonde rukaba rugishakishwa.

Umuyobozi w’Akarere ka Nyagatare, Gasana Stephen, yavuze ko bagiye kurushaho kwegera bamwe muri aba bakozi barokotse kugira ngo hamenyekane abishwe.

Rutagarama yorojwe inka

Bimenyimana arifuza ubufatanye kugira ngo imiryango itarabona amacumbi iyabone

Avuga ko n’ubwo buri mwaka hubakirwa abarokotse Jenoside yakorewe Abatutsi amacumbi, ariko nanone iki kibazo kitarangira kuko hagenda haboneka abandi batayafite.

Uyu mwaka by’umwihariko ukwezi gushize kwa Werurwe, ngo ku bufatanye bw’Akarere n’abafatanyabikorwa bako, imiryango itandatu (6) yabonye amacumbi ndetse iranatuzwa, gusa ngo hari indi miryango myinshi itarubakirwa.

Ati “Hakenewe kubakwa amacumbi 153 ndetse n’agomba gusanwa 474, bigaragara ko hakenewe ko twese dufatanya haba mu buvugizi no kwishakamo ubushobozi kugira ngo ayo macumbi aboneke.”

Akomeza agira ati “Icyakora turashima Akarere n’abafatanyabikorwa bose kuko mu kwezi gushize hari imiryango itandatu, yatujwe muri Kinihira kandi harimo kubakwa andi mazu twizera ko mu minsi micye hari abandi bagiye gutuzwa.”

Ikindi bakeneyeho ubuvugizi ngo ni inkunga ihabwa abarokotse Jenoside yakorewe Abatutsi 1994 ikiri nkeya, ugereranyije n’ibiciro biri ku isoko.

Yagize ati “Twagira ngo mudufashe kudukorera ubuvugizi ku nkunga ihabwa abarokotse batishoboye ingana na 12,500 ko yakongerwa, kuko abayihabwa harimo abageze mu zabukuru bajya gufata imiti i Kigali, kandi baba bakeneye no kubaho muri uko kwezi.”

Abari batuye mu nzuri batangiye kwicwa urugamba rwo kubohora Igihugu rugitangira

By’umwihariko muri iyi minsi 100 yo kwibuka ku nshuro 31 Jenoside yakorewe Abatutsi, Ibuka irasaba Abanyarwanda muri rusange kurushaho kwegera no gusura abarokotse, kugira ngo bahumurizwe kandi bumve ko bari kumwe n’Abanyarwanda bose muri rusange.

Bimenyimana, arasaba ko inzego bireba zakora ibishoboka imanza Gacaca enye (4) zitararangizwa, zikarangizwa cyangwa abarokotse Jenoside barebwa n’izo manza bagasobanurirwa impamvu bidakorwa.

Yasabye kandi ko abazi aho imibiri y’Abatutsi bishwe muri Jenoside yajugunywe bahagaragaza, kugira ngo na yo ishyingurwe mu cyubahiro.

Kugeza kuri iyi nshuro ya 31 hibukwa Abatutsi bishwe muri Jenoside, abarokokeye i Gakirage mu nzuri (Ranches), baracyafite agahinda ko kuba batarabona imibiri y’ababo bahiciwe.

Urwibutso rwa Jenoside rwa Nyagatare ruruhukiyemo imibiri 99 y’Abatutsi bishwe muri Jenoside 1994, yimuwe mu nzibutso zari zisanzwe arizo urwa Kiyombe, urwa Gatunda n’urwa Rwentanga mu Murenge wa Matimba.

Mukarugwiza Francine warokokeye mu maranshi avuga ko bagifite agahinda ko kutabona ababo ngo babashyingure mu cyubahiro

Gatera yafashwe gatatu n’ingabo za FAR arokorwa n’Inkotanyi

Yabitangaje kuri uyu wa 07 Mata 2025, mu gikorwa cyo kwibuka ku nshuro ya 31 Jenoside yakorewe Abatutsi, mu Karere ka Nyagatare kikaba cyabereye ku rwibutso rwa Jenoside rwa Nyagatare ruruhukiyemo imibiri 99 y’Abatutsi, bishwe muri Jenoside yakorewe Abatutsi mu 1994.

Umwaka wa 1990, urugamba rwo kubohora Igihugu rutangira, Gatera yari umukozi wa Banki y’Abaturage ishami rya Rukomo, akazi yabonye bigoranye kuko ngo yatsinze ikizamini ayoborwa n’uwo yari yarushije amanota.

Ati “Ibimenyetso bya Jenoside byigaragaje guhera kera kuko mu mashuri twarahagurutswaga tubazwa ubwoko, ndetse no gutangira ishuri wabanzaga kuzana ifishi igaragaza ubwoko yatangwaga na Komini.”

Akomeza agira ati “Jye hari ikigo nagiye gusabaho ishuri banyima umwanya kubera ndi Umututsi. Nsoje natsinze ikizamini cyo gukora muri Banki y’Abaturage ariko uwo narushije amanota byarangiye ari we unyoboye kuko yari Umuhutu. Nyuma nabwo naje kwirukanwa mu buryo ntazi nzira ubwoko gusa.”

Avuga ko mu gihe yaburanaga uburenganzira bwe, yaje kubwirwa n’uwari Burugumesitiri wa Komini Muvumba, Onesphore Rwabukombe, ko niyongera kumubona kuri Banki azamurasa agapfa.

Avuga ko akimenya ko hari Abatutsi bafashwe bakajya gufungirwa kuri Komini biswe ibyitso by’Inkotanyi ndetse bajyanwa i Byumba, ngo yahisemo gufata inzira yerekeza iwabo ahitwa Shonga, ariko ageze i Bushara afatwa n’abaturage bamushyira abasirikare.

Senateri Kanziza, avuga ko ingengabitekerezo ya Jenoside yageze no mu bihugu byo mu Karere bishyigikira FDLR

Bakimubona ngo baramukubise bamubaza Rwigema, atangira ahakana ariko inkoni zimurembeje yemera ibyo bamubajije byose, agira ngo nibura bamurase aveho areke kwicwa n’inkoni.

Nyuma ngo bamutwaye gufungirwa kuri Komini, muri gereza ahasanga abandi, baje kurokorwa n’uko abasirikare bikanze Ingabo za RPA, basaba Burugumesitiri guhungisha abakozi n’ibikoresho na gereza irafungurwa abashoboye bariruka, ariko we biramunanira Inkotanyi zirahamusanga.

Yagize ati “Hashize nk’iminsi itatu mfunze, twarebeye mu idirishya tubona umusirikare mukuru wa FAR araje abwira Burugumesitiri, Rwabukombe, ngo abwire abayobozi ba Komini bahunge kuko bagiye kuharwanira n’inyenzi.”

Yakomeje agira ati “Bafunguye gereza noneho Burugumesitiri ashaka kutujyana i Ngarama, mu gihe abapolisi na Burugumesitiri badukupitiraga kwinjira mu modoka, umusirikare yaraje amukubita urushyi, amwibutsa ko yamusabye guhungisha abakozi n’umutungo wa Komini. Abandi barirutse jye n’undi Inkotanyi zirahadusanga ziratubohora.”

Avuga ko bamaze kumuha imiti bamusabye gutaha ariko mu gihe yari ageze hafi n’isantere ya Rukomo, yahuye n’abandi basirikare ba FAR batambaye impuzankano, bamusubiza kuri Komini babura aho bamufungira bahitamo kumuha umuturage wari Resiponsabule.

Ati “Bangejeje kuri Komini babura aho bamfungira bashaka umuyobozi bampa ngo ubuyobozi bwa Komini nibugaruka bazansubize muri gereza, banjyana ku mugabo wari Resiponsabule hafi aho witwa Innocent Rutigerera, bamutegeka kumfungira iwe mu rugo kugeza ubuyobozi bwa Komini buje.”

Urwibutso rwa Jenoside rwa Nyagatare ruruhukiyemo imibiri 99 y’Abatutsi bishwe muri Jenoside

Icyakora ngo uwo mugabo yabonye abasirikare bagiye amusaba gutaha iwabo, kuko byari bumufashe kubona uko yahungira mu Gihugu cya Uganda.

Ageze muri santere ya Rukomo, ngo bamubwiye ko abandi Batutsi bahungiye ku Kiliziya, ahageze Padiri wari uhari w’Umutaliyani ngo yaramwanze.

Yagize ati “Nagezeyo banshyira Padiri w’Umutaliyani bitaga Oto, aranyanga, anyita inyenzi, inyanga-Rwanda, anyita inzoka kandi atayicumbikira. Abari bahari bambwiye amasaha azira nkajya nihisha mpamara iminsi ine, nanivuza ku Kigo nderabuzima cya Rukomo.”

Umunsi wa gatanu ngo yafashe icyemezo cyo gutaha kuko yari yamenye ko ubuyobozi bwa Komini bugiye kugaruka.

Avuga ko ageze Bushara, nabwo yahuye n’abasirikare ba FAR, baramufata baramukubita bamwita inyenzi, abamururwaho n’ingabo za RPA zari ziturutse ahitwa Mutojo.

Ingabo za RPA ngo zasabye abaturage kumureka agataha, ageze iwabo asanga barahunze na we akomeza urugendo rwamugejeje mu nkambi ya Nyakivara mu Gihugu cya Uganda.

Ashima Ingabo za RPA-Inkotanyi zamurokoye, zikabagarura mu Gihugu, ubuyobozi bwiza bubaha agaciro baba Abanyarwanda bakuwe ku mazina abatesha agaciro.

Urubyiruko rwasabwe kurwanya ingengabitekerezo ya Jenoside mu buryo ubwo ari bwo bwose

Senateri Kanziza Epiphanie, yasabye abaturage kwirinda ingengabitekerezo ya Jenoside, kuko ikigaragara hirya no hino mu Gihugu aho hari abarokotse Jenoside bicwa.

Yanavuze ko ingengabitekerezo ya Jenoside igaragara mu bihugu byo mu Karere bishyigikira umutwe w’Iterabwoba wa FDLR, ariko by’umwihariko ngo ikaba iri no mu bihugu by’i Burayi, cyane Ububiligi bwirirwa busabira u Rwanda ibihano.

Yasabye Abanyarwanda kurangwa n’indangagaciro zo kuba umwe no kwimakaza Ubunyarwanda, gufashanya no gufatana mu mugongo n’abarokotse Jenoside no kwanga amacakubiri n’amakimbirane.

Gicurasi 2022 - Uwamahoro ubwo yongeraga kubona ababyeyi n’abavandimwe be bwa mbere nyuma ya Jenoside yakorewe abatutsi

Uyu mubyeyi wo mu kigero cy’imyaka isaga mirongo itatu n’itanu, igice kinini cy’ubuzima bwe yakimaze atazi inkomoko ye, afatwa nk’uwazize Jenoside yakorewe abatutsi, ku buryo yibukwaga nk’abaguye ahantu hatazwi bose.

Icyakora ubu ariho, ararera abana be batatu, ndetse arubatse, akaba yarongeye kugarurira ababyeyi n’abavandimwe be ibyishimo byo kugira imfura yabo mu muryango.

Uwamahoro avuga ko mu buzima bwe nta muntu n’umwe yigeze abwira ikibazo cye bigatuma igihe cyo kwibuka cyarageraga bikamusubiza inyuma ku buryo atifuzaga no kubyumva kuri Radio uretse no kujya kwifatanya n’abandi.

Ni inshuro ya gatatu ibikorwa byo Kwibuka Jenoside yakorewe Abatutsi mu 1994, bigiye kuba ari kumwe n’umuryango we.

Avuga ko atari azi ko igihe kizagera agashira agahinda ko kutagira umuryango ariko ubu ngo Imana yarabikoze.

Agira ati “Uretse abantu babaga banzi bavugaga bati uriya hariya arahaba ariko si iwabo, ariko amateka yanjye sinigeze nyabwira n’abana bagenzi banjye kuko numvaga kubivuga ntacyo byamfasha mu bitekerezo uretse kunsubiza inyuma. Kwibuka nzajyayo kuko igikomere kuri jye cyararangiye, ntabwo nari nzi ko nakira agahinda nari mfite.”

Avuga ko ibikorwa byo kwibuka ku nshuro ya 31 Jenoside yakorewe Abatutsi, azibigiramo uruhare ndetse aniteguye gusangiza abantu amateka yaciyemo.

Agahinda ahanini yari afite ngo kwari ukubaho atagira umuryango kandi atarawushyinguye.

Uwamahoro, ubundi Jenoside yamusanze mu Karere ka Rulindo y’ubu kwa nyirakuru aho yarerwaga mu gihe ababyeyi bari batuye mu Karere ka Gicumbi.

Mu gihe cya Jenoside ngo umuryango wa nyirakuru wose waratsembwe hasigara we na nyirasenge ariko nawe batandukana mu gihe cyo guhunga kuko we yajyanwe muri Congo n’umubyeyi wamutoraguye.

Uwamureraga nawe ngo yaje kugwa muri Congo afatwa n’undi muryango ari nawo wamuzanye mu Rwanda mu Karere ka Rubavu, umurihira ishuri, asoza amashuri yisumbuye ndetse baranamushyingira n’ubwo umugabo baje gutandukana.

Mu mwaka wa 2022 nibwo ngo yagize igitekerezo cyo kujya mu bitangazamakuru kugira ngo ashakishe umuryango we bwite n’ubwo yumvaga ko bose bishwe muri Jenoside.

Ati “Nakuze mfite intego ko ninsoza amashuri mfite akazi aribwo nzatangira gushakisha umuryango wanjye n’ubwo ntiyumvishaga ko hari uwarokotse. Ntibyampiriye kuko nahise nshaka urugo n’ubwo rutampiriye nkasigara ndera abana jyenyine.”

Akomeza agira ati “N’ubwo natandukanye n’umugabo ndera abana jyenyine namaze kwiyubaka njya gushakisha umuryango. Umunsi umwe nawubony binyuze kuri masenge. Natunguwe cyane no kumva ko Mama na Papa bahari ndetse na barumuna banjye.”

Avuga ko ngo ababyeyi be bashatse gushyingura ariko ngo umuturanyi wo kwa nyirakuru arababuza ababwira ko nshobora kuba nkiriho n’ubwo ngo atari azi aho ndi.

Numvaga meze nk’uri mu nzozi

Avuga ko akimara kumva ko yabonye umuryango we avugana nabo kuri telefone ariko bataramugeraho ngo kurya byaramunaniye kuko atiyumvishaga ibyamubayeho.

Aho baziye, ngo ntiyabamenye uretse amazina yumvaga kuko yajyanywe kwa nyirakuru akiri muto cyane.

N’ubwo ngo ntawe yigeze abwira ibye ariko nanone ngo ntibyaburaga kuba bimuri ku mutima. Kuwa 15 Mata 2022, Uwamahoro yahuye n’umuryango we bwa mbere, bamusanze mu Karere ka Rubavu aho yabaga.

Tariki ya 29 Gicurasi 2022, Ubuyobozi bw’Akarere ka Rubavu, inshuti n’abaturanyi, baherekeje Uwamahoro Angelique, bamuhuza n’umuryango we, mu Karere ka Nyagatare, Umurenge wa Nyagatare, Akagari ka Bushoga, Umudugudu wa Cyabahanga.

Avuga ko mbere agihura n’ababyeyi be atemeraga neza ko aribo, ahubwo yari agifite gushidikanya ariko amaze kubona barumuna be cyane, ndetse akanabona abana be basa na ba nyirarume, yahise yemera neza ko yabonye umuryango.

Akihagera ngo we n’ababyeyi kenshi barataramaga bakageza saa tanu z’ijoro bakabyina kubera umunezero.
Ati “Kenshi Papa na Mama baricaraga bagatera imbyino tukabyina. Papa yambwiraga inkuru nyinshi z’abana nkanezerwa. N’iyo yabaga ari mu kabari yasohokanaga icupa akaza tukaganira. Nasanze Papa na Mama ari ababyeyi beza baba bumva ntakindi kintu ku Isi cyambabaza bahora banyibutsa ko ndi imfura yabo.”

Mu bintu bishimisha, Uwamahoro, ni ukuba akimara kubona umuryango we haciyeho amezi umunani gusa ukamushyingira ubu akaba abana n’umugabo ababyeyi bishimira, ndetse bakaba barabyaranye umwana w’umuhungu.

Aho atuye mu Mudugudu wa Cyonyo ngo ahora asurana n’ababyeyi be dore ko batuye mu Midugudu yegeranye.

Uwamahoro ashimira umuryango wamureze, hamwe n’abaturanyi n’inshuti mu Karere ka Rubavu kuko afashe icyemezo cyo gutaha iwabo, bamuhaye inka ebyiri, akaba azitunze.

#Kwibuka31 : Uwamahoro Angelique amaze imyaka itatu yongeye kubonana n’ababyeyi be baburanye mu gihe cya Jenoside yakorewe Abatutsi. Igice kinini cy’ubuzima bwe yakimaze atazi inkomoko ye, afatwa nk’uwazize Jenoside yakorewe Abatutsi, ku buryo yibukwaga nk’abandi bose baguye… pic.twitter.com/Vhw8DNxqhd

— Kigali Today (@kigalitoday) April 6, 2025

Uyu musaruro ujya mu nganda zikora ibiryo by’abana hagamijwe kubabonera indyo yuzuye, undi ukajya mu mahoteli ndetse no ku isoko ryo hanze y’Igihugu.

Rubingisa agira ati “Ntabwo amata y’ifu akorwa yoherezwa hanze gusa. Murabizi inganda zacu zikora ibiryo by’abana mu kugabura indyo yuzuye ruri i Masoro i Kigali rurayakenera. Aya Mahoteri yo mu Gihugu mu byo bakora mu gutegura amafunguro atandukanye nabo barayakenera ariko dufite n’isoko ryo hanze yoherezwaho.”

Kugeza ubu icyakora, amata y’ifu akorwa n’uruganda rw’Inyange ntabwo aboneka mu maduka rusange abaguzi ku giti cyabo bahahiramo ku buryo umuntu yagura ikiro n’ibindi. Icyakora, umusaruro warwo uracyari mucye.

Guverineri Rubingisa yagize ati “ Uruganda ruracyatanga mirongo itatu ku ijana y’ubushobozi rufite ariko tuzagenda twongera. Kugeza ubu, amata rushobora kubona ni litiro ibihumbi magana abiri ku munsi.”

Ubundi uru ruganda rufite ubushobozi bwo gutunganya litiro 650,000 z’amata ku munsi hagakorwamo ay’ifu ndetse n’asanzwe kimwe n’amavuta yo kurya.

Guverineri Rubingisa yavuze ko hari gutegurwa uburyo amata yava no mu tundi turere twose tw’Igihugu, ariko aborozi b’aho uruganda rwubatse na bo bagashyiraho akabo.

Ku bufatanye na Minisiteri y’Ubuhinzi n’Ubworozi, aborozi ngo barimo gufashwa kubona amazi mu nzuri kugira ngo inka zireke gukora ingendo ndende zijya gushaka amazi kuko na byo bitubya umukamo.

Hon. Kalinda yavuze ko u Rwanda rutazihanganira abashaka kwica ubumwe bw’Abanyarwanda

Yabitangaje kuri uyu wa gatandatu tariki ya 29 Werurwe 2025, mu muganda usoza ukwezi kwa Werurwe, mu Ntara y’Iburasirazuba ukaba wibanze ku bikorwa byo gusukura inzibutso za Jenoside yakorewe Abatutsi 1994.

Hon Kalinda, yifatanyije n’abaturage b’Akarere ka Rwamagana, ahakozwe uwo gusukura urwibutso rwa Jenoside yakorewe Abatutsi 1994 rwa Mwulire, ndetse hanakorwa umuhanda ujyayo ureshya n’ibilometero umunani (8km).

Perezida wa Sena, yibukije abitabiriye umuganda ko hatangiye icyumweru cyahariwe ibikorwa bigamije kwimakaza ubumwe n’ubudaheranwa, basabwa kurwanya ingengabitekerezo ya Jenoside, kwimakaza ubumwe bw’Abanyarwanda no guhangana n’abapfobya Jenoside yakorewe Abatutsi.

Yagize ati "Turashaka guca intege abantu bakwirakwiza ibihuha n’ingengabitekerezo ya Jenoside, kuko iki ni icyaha gikomeye. Igihugu cyacu ntikizihanganira abantu bica ubumwe bwacu. Imiyoboro y’ikoranabuhanga tuyikoreshe ducengeza ubumwe bw’Abanyarwanda."

Abiganjemo urubyiruko bakoreye umuganda ku rwibutso rwa Jenoside yakorewe Abatutsi rwa Kiziguro batunganya ubusitani

Yakomeje agira ati “Muri ibi bihe tugiye kwinjiramo byo kwibuka ku nshuro ya 31 Jenoside yakorewe Abatutsi, turasabwa kuba hafi abarokotse Jenoside yakorewe Abatutsi, dufata mu mugongo abatishoboye.”

Urwibutso rwa Jenoside rwa Mwulire, ahakorewe Umuganda rusange, ruruhukiyemo imibiri irenga ibihumbi 27 y’Abatutsi bishwe muri Jenoside yabakorewe, bisobanura ubukana yakoranywe kuri uyu musozi uri kubakwaho Urwibutso rwa Jenoside rw’Akarere.

Mu Karere ka Bugesera bo bifatanyije na Senateri Mukabarisa Donatille, mu muganda usoza ukwezi kwa Werurwe, wibanze mu gusukura ikimenyetso cy’Urwibutso rw’abazize Jenoside yakorewe Abatutsi, biciwe mu rufunzo rwa Cyugaro (bitaga CND) mu 1994 mu Murenge wa Ntarama.

Mu Karere ka Gatsibo, Ubuyobozi bw’Akarere, Abasenateri n’inzego z’Umutekano bifatanyije n’abaturage b’Umurenge wa Kiziguro, mu muganda rusange usoza ukwezi kwa Werurwe, wakorewe ku rwibutso rwa Jenoside yakorewe Abatutsi 1994 rwa Kiziguro.

Nyuma y’Umuganda hatanzwe ubutumwa bwibanze ku gukomeza gusigasira Ubumwe n’Ubudaheranwa by’Abanyarwanda, no kwirinda ingengabitekerezo ya Jenoside mu gihe cyo kwibuka ku nshuro ya 31 Jenoside yakorewe Abatutsi mu Rwanda.

Basukuye ku rwibutso rwa Mukarange mu rwego rwo kwitegura Kwibuka ku nshuro ya 31

Akarere ka Kayonza, umuganda wibanze ku gusukura inzibutso za Jenoside uko ari zirindwi, hanasiburwa imiyoboro y’amazi ku mihanda, kubakira abatishoboye n’ibindi.

Nyuma y’umuganda hatanzwe ubutumwa ku kwita ku isuku n’isukura, umutekano, kubungabunga ibikorwa remezo, kurwanya ibiyobyabwenge, kwirinda ingengabitekerezo ya Jenoside, kwitegura kwibuka ku nshuro ya 31 Jenoside yakorewe Abatutsi mu 1994, kwirinda amakimbirane no kwikura mu bukene.

Akarere ka Kirehe bo bifatanyije na Senateri Bideri John Bonds, ahakozwe isuku ku rwibutso rwa Jenoside rwa Nyarubuye no ku nkengero yarwo.

Nyuma y’umuganda, abaturage basabwe kuzitabira ibikorwa byo kwibuka Jenoside yakorewe Abatutsi 1994, birinda ingengabitekerezo yayo. Banakanguriwe ariko kugira isuku no gukora hagamijwe kwikura mu bukene.

Mu Karere ka Ngoma, bifatanyije n’umunyamabanga wa Leta muri Ministeri y’Uburezi ushinzwe ikoranabuhanga, Irere Claudette, mu gusukura urwibutso rwa Jenoside rwa Kibungo.

Irere Claudette yifatanyije n’abaturage ba Ngoma gusukura urwibutso rwa Kibungo

Irere usanzwe ari n’imboni y’Akarere ka Ngoma, yahaye ubutumwa abitabiriye umuganda bwo kuzitabira ibikorwa byose byo Kwibuka, bakarushaho no kwita by’umwihariko ku barokotse Jenoside babaha ubufasha bukenewe.

Umuganda wibanze ku bikorwa byo gusukura inzibutso za Jenoside

Dr Migambi avuga ko abarwayi b’igituntu bakurikiranwa n’abajyanama b’ubuzima bafata imiti neza

Yabitangaje ku Mbere tariki ya 24 Werurwe 2025, ubwo hizihizwaga umunsi mpuzamahanga wahariwe kurwanya igituntu, wabereye mu Karere ka Kayonza.

Dr Migambi agarukaku mibare y’abahitanwa n’iyo ndwara mu Rwanda ndetse no ku rwego rw’Isi.

Ati “Indwara y’igituntu yica abantu benshi kuko buri mwaka yica abarenga 1,100,000 ku Isi, ni ukuvuga abantu bapfa buri munota. Hano mu Rwnda, buri munsi igituntu gihitana umuntu.”

Avuga ko mu Rwanda, imibare yagiye igabanuka kuko abicwa n’igituntu bagabanutse ku kigero cya 69%.

Mu Rwanda ngo abagaragaweho indwara y’igituntu mu mwaka wa 2023-2024, 90% bafashe imiti neza kandi barakira.

Habarurema Johnson wakize igituntu, avuga ko agifatwa yaguze utunini muri Farumasi akeka ko ari inkorora isanzwe, nyuma ngo we n’umuryango we bakeka ko yarozwe.

Yagize ati “Nabanje kugura utunini ariko inkorora iranga ndetse nkanababara cyane nkakorora ncira amaraso. Twabanje gukeka ko bandoze ariko nyuma njya kwa muganga, ibizamini bigaragaza ko ndwaye igitutu.”

Habarurema ngo yamaze amezi atandatu anywa imiti y’igituntu akurikiranwa n’abajyanama b’ubuzima, bigenda neza arakira.

Gahongangayire Jeannine na we wakize igituntu, avuga ko yamaranye inkorora ibyumweru bibiri aho kujya kwa muganga yigira mu bavuzi gakondo, akeka ko yarozwe.

Banduye igituntu bakeka ko barozwe ariko bagiye kwa muganga baravurwa barakira

Nyuma yo kubona ko akomeza kurwara, yahisemo kujya kwa muganga bamusangamo igituntu.

Ati “Nahindaga umuriro nkanakorora cyane nkanabira icyuya. Nabanje kugerageza kwivuza mu bavuzi gakondo nkeka ari amarozi, ariko bikomeje kwanga njya kwa muganga basanga ari igituntu ndetse ntangira imiti.”

Yasabye abaturage kwihutira kujya kwa muganga mu gihe bamaranye inkorora ibyumweru bibiri, kuko ishobora kuba igituntu.

Kayonza ni ko Karere kagaragayemo abarwayi benshi b’igituntu mu mwaka wa 2023 mu Ntara y’Iburasirazuba, basaga 70.

Mu barwayi baboneka, RBC ivuga ko 85% aribo bafata imiti neza mu gihe intego y’Igihugu ari 90%.

Umuyobozi w’Akarere ka Kayonza, Nyemazi John Bosco, yashimye uruhare rw’abajyanama b’ubuzima mu kubungabunga ubuzima bw’abaturage.

Nk’ubuyobozi biyemeje gufatanya n’inzego z’ubuzima cyane cyane abajyanama b’ubuzima, kugira ngo igituntu kitagira abo gihitana. Mu Karere ka Kayonza habarirwa abarwayi b’igituntu basaga 70.

RBC ivuga ko mu gihe cya vuba, abajyanama b’ubuzima bazahabwa ubushobozi bwo gupima indwara y’igituntu, binyuze mu biganiro bazajya bagirana n’abagize umuryango, ibisubizo bikaba aribyo biherwaho mu gukeka ko umuntu yaba afite igituntu akoherezwa kwa muganga.

Abantu barakangurirwa kwipimisha igituntu bakibona ibimenyetso bisa n’ibyacyo

Abajyanama b’ubuzima bakoze neza bahawe amagare

Ubwanikiro bwatumye bagabanya umusaruro wangirikaga

Umwe muri abo bahinzi, Musabyemariya Leah avuga ko mbere igishanga kigitunganywa, batangiye gukoreramo ubuhinzi bw’ibigori n’umuceri ahari amazi menshi, ariko kenshi bigakorwa mu kajagari.

Avuga ko mu mwaka wa 2021, babonye umufatanyabikorwa SAPMP, umushinga ukorera muri Minisiteri y’Ubuhinzi n’Ubworozi, na we abahuza na PAM ndetse na KOICA, bahabwa amahugurwa n’ingendoshuri muri Korea y’Epfo.

Ibi ngo byatumye babasha kuzamura umusaruro uva kuri toni 1.7 ugera kuri toni 4.6 kuri hegitari ku bigori.

Mu bumenyi bungutse ngo harimo gutera imbuto ku murongo, gukoresha ifumbire mborera ivanze n’imvaruganda ndetse no gusarurira igihe ibigori, no gufata neza umusaruro.

Bungutse uburyo bwiza bwo guhinga bakuye mu rugendoshuri

Ntirivamunda Felicien wo mu Mudugudu w’Icyerekezo Akagari ka Butiruka Umurenge wa Remera, avuga ko nyuma y’urugendoshuri yakoreye muri Korea y’Epfo, akibonera uburyo bakora ubuhinzi bwuhirwa, yahisemo gutunganya ubutaka bwe bw’imusozi ndetse azanamo n’amazi ku buryo buri gihe ahorana imyaka mu murima.

Agira ati “Ubu butaka bwari umusozi hateyeho inturusu, mvuye muri Korea nahisemo kurimbura za nturusu umusozi ndawuhinga ubutaka bwigira hasi, njya gufata amazi nyazana mu murima ku buryo buri gihe mpora ntera, mbagara, nejeje, nsarura ku buryo nta nzara nahura na yo.”

Amazi yuhira umurima we yayakuye munsi y’umusozi aho yatembaga agana mu gishanga, ayaha umuyoboro uyazana mu murima we.

Umurima yatunganyije akoreshaho uburyo bwo kuhira ungana na hegitari ebyiri, ibikorwa byo kuwutunganya no kuhageza amazi yakuye muri metero 900 na byo ngo byamutwaye agera kuri Miliyoni eshanu (5,000,000Frw).

Yabashije gukurura amazi yo kuhira no umusaruro wariyongereye

Mu gufasha aba bahinzi, PAM yabahuje n’abaguzi b’umusaruro wabo ungana na toni 379,096 z’ibigori na toni 4,636 z’umuceri.

Yanabegereje ibikorwa remezo bituma babasha gufata neza umusaruro wabo, harimo ubwanikiro n’ibigega bihunikwamo imyaka ku buryo umusaruro wangirikaga wavuye kuri 17% ugera munsi ya 6%.

Ubwo hasozwaga ibikorwa by’uyu mushinga, PAM yateraga inkunga, ku wa 26 Gashyantare, Umuyobozi wayo wungirije mu Rwanda, Dr Mutinta Hambayi Nseluke, yasabye abahinzi gukomereza mu mujyo bagezeho mu kuzamura umusaruro.

Yagize ati “Muharanire ko ibyagezweho mu kuzamura umusaruro no kuwufata neza bikomeza, ariko bikazagerwaho ari uko murushaho gufatanya n’inzego za Leta harimo RAB n’ubuyobozi bwite, kandi natwe nka PAM na KOICA ntitugiye turacyahari n’ubwo SAPMP tuvuga ko isoje.”

Ntirivamunda ubumenyi yakuye muri Korea bwatumye atangira guhinga yuhira imusozi

Umuyobozi w’Akarere ka Gatsibo wungirije ushinzwe Ubukungu, Sekanyange Jean Leonard, yavuze ko n’ubwo umushinga wa SAPMP, usoje ibikorwa byawo ariko bazakomeza kuba hafi y’abahinzi, kugira ngo ubumenyi babonye bwatumye bazamura umusaruro babukomezanye, ariko banabugeza no ku bandi bahinzi.

Koperative CAPRORE, ikorera ubuhinzi bw’ibigori kuri hegitari 186 na hegitari 58 z’umuceri, ikaba ifite ubwanikiro bw’ibigori 17 n’imbuga ebyiri zanikwaho umuceri.

Basanga Imidugudu yose ishobora kubaho itarangwamo icyaha

Atangiza iki gikorwa mu Karere ka Kayonza, Umunyamabanga Nshingwabikorwa w’Intara y’Iburasirazuba, Dr Jeanne Nyirahabimana, yavuze ko ikigamijwe ari ukugera ku muturage, cyane ko ku Mudugudu hari abayobozi benshi ndetse n’abakorerabushake ku buryo umwe ashobora gukurikirana ingo eshatu, umuturage akamenya gahunda za Leta bikamufasha kwiteza imbere.

Avuga ko Umudugudu utagira icyaha ushoboka, mu gihe buri wese abigezemo uruhare ndetse habayeho n’ikumira.

Yagize ati “Hari Imidugudu imaze amezi menshi ubona nta bintu by’ibyaha byagiye bigaragaramo icyo ni cyo cyerekezo, aho umuntu asiga ikintu hanze akagisanga, atikanga uza kumwiba cyangwa kugira nabi kose.”

Akomeza agira ati “Ni icyerekezo dushaka kujyamo tugire Imidugudu itekanye kandi ifite uko irinzwe. Icyo dushaka ni uko irondo rikorwa neza kurenza uko bikorwa uyu munsi, ariko no gukumira aho umuntu aza mu Mudugudu ntihagire umenya ibye ejo agakora ikintu kibi, abantu bagatangira kwibaza impamvu nta wakurikiranye ibye.”

Ku wa Kabiri tariki ya 25 Gashyantare 2025, hari hatahiwe Abakuru b’Imidugudu 108 yo mu Karere ka Nyagatare, aho bahawe ubumenyi buzabafasha kugira Imidugudu itagira icyaha, iyobowe neza, aho abaturage bumva kandi bagashyira mu bikorwa gahunda za Leta zigamije imibereho myiza n’iterambere ryabo.

Dr. Nyirahabimana avuga ko iyi gahunda yatekerejwe nyuma yo kubona ko hari Imidugudu y’Intangarugero, igaragara hirya no hino mu Turere tugize iyi Ntara nk’uwa Gakoma mu Murenge wa Karangazi Akarere ka Nyagatare, Umudugudu wa Nkondo II mu Murenge wa Rwinkwavu Akarere ka Kayonza, Umudugudu wa Nyagasozi mu Murenge wa Sake Akarere ka Ngoma n’ahandi.

Ibi ngo byatumye hatekerezwa uburyo iyi mikorere myiza yagera n’ahandi, kugira ngo habeho Imidugudu myinshi y’icyitegererezo, mu rwego rwo kwihutisha iterambere n’imibereho myiza y’abaturage.

Abakuru b’Imidugudu bahawe ibiganiro bitandukanye birimo ikiganiro ku mudugudu w’icyitegererezo mu miyoborere mpinduramatwara kandi utarangwamo icyaha, ikiganiro ku micungire y’umutekano, kurwanya no gukumira ibyaha mu Mudugudu, Uruhare rw’Umudugudu mu gushyira mu bikorwa Gahunda y’Igihugu yo Kwihutisha Iterambere (NST2) 2024-2029 n’ibindi.

Umukuru w’Umudugudu wa Akayange, Mugume George, avuga ko kugira Umudugudu utekanye kandi uteye imbere byashoboka, bahereye ku ngero z’imwe mu Midugudu yamaze kubigeraho.

Ati “Umurenge wa Karangazi ntuyemo ni wo na Sabiti (Umukuru w’Umudugudu w’icyitegererezo wa Gakoma) abamo, iyo nkurikiranye nta gishya kindi uretse gukurikirana ibintu akabishyira mu bikorwa. Twese uko turi hano nta kintu kiremereye cyatunanira uretse kudakurikirana ibyo dukora.”

Dr Nyirahabimana avuga ko Imidugudu yose niba ikitegererezo ibyaha byinshi bizacika

Mu Ntara y’Iburasirazuba yose, hatoranyijwe Imudugudu 503 y’icyitegererezo (Umudugudu 1 muri buri kagari), ikazakurikiranwa by’umwihariko buri mezi atandatu (6), kugira ngo ibe intangarugero mu guhindura imibereho y’umuturage abigizemo uruhare.

Nyuma yo gusesengura umusaruro uzaba wavuye muri iyi Midugudu, hazakurikiraho ikiciro cya kabiri ku buryo ubu bumenyi bahawa buzagezwa no mu yindi Midugudu isigaye.

Abo bayobozi b’Imidugudu barahabwa ubwo bumenyi guhera ku wa mbere tariki ya 24 bakazageza tariki ya 27 Gashyantare 2025.

Ingabo na Polisi y’Igihugu ntibatanzwe mu muganda

Umuganda usoza ukwezi kwa Gashyantare, mu Karere ka Bugesera, Abajyanama b’Akarere bifatanyije n’abaturage b’Umurenge wa Mayange, Akagari ka Gakamba, ahakorwa umuhanda ureshya na kilometero enye (Km 4).

Ni umuganda wahujwe no gutangiza icyumweru cy’umujyanama gifite insanganyamatsiko igira iti "Umuturage, Ishingiro ry’Imiyoborere Myiza n’Iterambere Ryihuse."

Mu Karere ka Gatsibo, abagize Inama Njyanama y’Akarere bari kumwe n’inzego zitandukanye mu Karere, bifatanyije n’abaturage b’Akagari ka Gihuta Umurenge wa Rugarama mu muganda rusange wibanze ku bikorwa byo gusibura za rigole no guca imirwanyasuri.

Nyuma y’umuganda, abaturage bahawe ubutumwa burimo Kwandikisha impinduka zose ziba ku butaka no kubukoresha neza, hubahirizwa igishushanyombonera cy’imikoreshereze y’ubutaka, kwitegura neza igihembwe cy’ihinga 2025 B, no gukoresha neza ibishanga.

Hanakozwe amatora yo kuzuza inzego hasimburwa abayobozi batandukanye batowe ku rwego rw’Umudugudu batakiri mu nshingano.

Kirehe bibanze ku gutunganya imihanda yangijwe n’ibiza

Akarere ka Kirehe, abayobozi bifatanyije n’abaturage mu Mirenge itandukanye, aho Umuyobozi w’Akarere, Rangira Bruno, yari mu mudugudu wa Nyawera, Akagari ka Nasho mu Murenge wa Mpanga, ahasibwe ibinogo byari mu muhanda kubera imivu y’amazi yakomotse ku mvura.

Umuyobozi w’Akarere wungirije ushinzwe iterambere ry’ubukungu, Nzirabatinya Modeste, we yifatanyije n’abaturage ba Gatore, ahasanwe umuhanda Samuko-Bitoma-Rwantonde, mu gihe mugenzi we ushinzwe Imibereho myiza, Janvière Mukandayisenga, we yifatanyije n’abaturage ba Kigarama, mu gusana umuhanda Kigarama-Kagane.

Abaturage bahawe ubutumwa bubibutsa gukoresha neza ubutaka no kwirinda amakimbirane mu muryango, kwicungira umutekano aho batuye, banasabwa gukora cyane no kwigira bakivana mu bukene mu buryo burambye ndetse no kwita ku isuku n’isukura aho batuye.

Umunyamabanga Nshingwabikorwa w’Intara y’Iburasirazuba, Dr Jeanne Nyirahabimana, yifatanyije n’abaturage b’Umurenge wa Kibungo, Akarere ka Ngoma, mu muganda wo gutunganya umuhanda wari warasibye ureshya na kilometero esheshatu (Km 6).

Hasibuwe rigore zitwara amazi

Nyuma y’umuganda abaturage basabwe kugira isuku ku mubiri, aho bakorera ndetse n’aho batuye, gukora cyane bagamije kwikura mu bukene, gushyigikira gahunda yo kugaburira abana ku ishuri, no kwita ku mikoreshereze myiza y’ubutaka.

Hanakozwe amatora yo kuzuza inzego hasimbuzwa abayobozi batandukanye batowe ku rwego rw’Umudugudu batagihari.

Nyagatare, ku rwego rw’Akarere umuganda usoza ukwezi wakorewe mu Murenge wa Karangazi mu Kagari ka Karama, ahakozwe umuhanda w’ibilometero bibiri n’igice uhuza Utugari twa Karama na Musenyi.

Habaye amatora yo kuzuza inzego z’Umudugudu, abaturage batora abayobozi basimbura abari baratowe ariko bakaba batakiri mu nshingano.

Hakozwe umuhanda ureshya na kilometero enye

Nyuma y’umuganda hatanzwe ubutumwa burimo kwicungira umutekano, kugira imboni y’ingo eshanu zifasha mu kwikemurira ibibazo, kwirinda gusesagura umusaruro, kwirinda ibiyobyabwenge, kwandikisha ubutaka no kugira isuku ku mubiri, mu ngo n’ahandi.

Guverineri w’Intara y’Iburasirazuba, Pudence Rubingisa n’abandi bayobozi ku rwego rw’Intara bifatanyije n’Ubuyobozi bw’Akarere ka Rwamagana n’abaturage b’Umurenge wa Munyiginya, mu muganda wo gutunganya umuhanda ureshya na kilometero enye (km 4) mu Tugari twa Cyarukamba na Bwana.

Guverineri Rubingisa, yashimiye abaturage uburyo bitabira gutanga umusanzu wabo w’ubwisungane mu kwivuza na EjoHeza, bikabahesha kuba ku mwanya mwiza ku rwego rw’Igihugu, abasaba gukomeza ibyiza no kwanga ikibi, kurera neza no kurwanya impamvu zatuma umwana aba inzererezi.

Abaturage bakanguriwe kubungabunga umutekano no gukumira ibyaha, kwimakaza isuku hose, kurwanya amakimbirane no kugira umuryango ushoboye kandi utekanye, kurwanya ubwandu bwa virusi itera SIDA ndetse banahabwa ubutumwa bujyanye no kunoza imicungire n’imikoreshereze y’ubutaka.

Hahanzwe umuhanda uhuza utugari twa Karama na Musenyi

Batunganyije umuhanda wari warasibye kubera ibiza by’imvura

Hanifashishijwe imodoka yagenewe gukora imihanda

Abacungagereza ku igororero rya Ngoma nabo bitabiriye umuganda

Abaturage by’umwihariko urubyiruko barakangurirwa kwirinda SIDA

Umukozi w’umuryango AHF ushinzwe gukurikirana abafite Virusi itera SIDA, by’umwihariko mu Mujyi wa Kigali Dr Mbaraga Gilbert, avuga ko mu Turere 11 n’ibigo nderabuzima 38 mu Gihugu cyose, bahatanga udukingirizo tugera ku 100,000 ku mwaka, bityo ko tuba duhari ku bigo nderabuzima n’ahandi hantu nko kuri ‘Condom dispensers’.

Avuga ko gushyiraho ahantu hihariye umuntu yabona agakingirizo atagiye kukagura muri butike, byafashije cyane kuko abantu benshi iyo babonye ugura agakingirizo bahita batekereza ko agiye gusambana.

Ati “Ufashe agakingirizo bahita bavuga ko agiye gusambana, ni yo mpamvu hatekerejwe ubundi buryo bwo gushyira agasunduku karimo udukingirizo ahantu nko muri za kaminuza, kugira ngo ugashaka akabone atagiye kugashakira muri butike cyangwa ku mujyanama w’ubuzima umuzi.”

Avuga ko ahantu hashyirwa udusanduku, ari aho baba babona hari ibyago byinshi byo kwandura Virusi itera SIDA.

Dr Mugisha ashishikariza urubyiruko kugana ibigo byarugenewe, kugira ngo bigishwe uko bakwirinda Virusi itera SIDA.

Yagize ati “Mu Karere ka Nyagatare byagaragaye ko imibare ikiri hejuru, kuko ubu dufite 1.2% by’ubwandu bushya bikaba ari ikibazo gihangayikishije, ari yo mpamvu dushishikariza urubyiruko kugana ibigo bibashinzwe (Youth Centers), kugira ngo bigishwe kwirinda SIDA ndetse n’abamaze kwandura bigishwe uko bagomba kwitwara.”

Umunyeshuri muri Kaminuza ya East Africa, Uwayarakizwa Epiphanie, avuga ko by’umwihariko nk’umukobwa uretse kuba agakingirizo kamurinda indwara zandurira mu mibonano mpuzabitsina, ngo kanabarinda gutwara inda zitateganyijwe.

Avuga ko benshi mu rubyiruko bagira ipfunwe ryo kugura udukingirizo, bigatuma bishora mu mibonano mpuzabitsina idakingiye.

Yagize ati “Hari igihe ugira ipfunwe ryo kugura agakingirizo kubera kwanga gusekwa. Iri pfunwe rero ni ryo rituma abantu bakorera aho bakaba bakwandura indwara cyangwa bagatwara n’izo nda. Icyakora asanga bitari bikwiye kugira ipfunwe ryo kugura agakingirizo.”

Undi munyeshuri utashatse ko amazina ye atangazwa, avuga ko ubundi yari asanzwe agira ipfunwe ariko kubera ubukangurambaga amaze iminsi ahabwa, yiyemeje kutongera kugira isoni zo kugura agakingirizo.

Ati “Ubundi nagiraga isoni ariko ubu zashize, kuko gukorera aho habamo ibyago byinshi byo kwandura indwara zandurira mu mibonano mpuzabitsina no gutera abana b’abandi inda.”

Ku rundi ruhande ariko hari n’abavuga ko udukingirizo duhenze, ku buryo bitorohera buri wese kukabona.

Yagize ati “Agakingirizo karahenze usanga muri butike kamwe kagura amafaranga 500, urumva ntiyoroheye buri wese. Ku mujyanama w’ubuzima sinagafatayo kuko yasigara avuga ngo umwana wo kwa runaka ni indaya. Ubundi biriya ni ibanga no muri butike ntuvuga ngo mpa agakingirizo, ahubwo tutwita ikaramu.”

Yifuza ko bashyirirwaho ahantu hiherereye bajya babona udukingirizo mu buryo bw’ibanga.

Min. Murangwa avuga ko itabi ryari risanzwe risora mu buryo bubiri, aho ipaki imwe y’itabi hatitawe ku gaciro karyo yasoraga amafaranga 130% ubu hakaba hiyongereyeho amafaranga 100% biba amafaranga 230%.

Avuga ko nanone kuri uyu musoro hiyongeraho undi musoro ujyanye n’agaciro k’itabi utahindutse ungana na 36%.

Avuga ko imisoro y’inzoga ureba inzoga za byeri (beer) zari ku musoro wa 60% ubu uziyongeraho 5% ukagera kuri 65%.

Uyu musoro ukaba utareba inzoga za rikeri (Spirit) kuko zo ziri ku musoro wa 70%.
Impamvu inzoga za rikeri zitongerewe umusoro ngo ni uko wongerewe mu myaka ibiri ishize.

Murangwa, avuga ko iri zamuka ry’imisoro ku bintu bimwe na bimwe rigamije kugira ngo Igihugu kigire ibyo kigezaho hadategerejwe inkunga z’amahanga.

Minisitiri Bizimana yasabye urubyiruko kwima amatwi ababacengezamo ingengabitekerezo ya Jenoside

Minisitiri Bizimana, yaganirije urubyiruko ku Bumwe bw’Abanyarwanda mu mateka y’Igihugu, isenyuka ryabwo, icengezamatwara ry’urwango mu Banyarwanda, itegurwa n’ishyirwa mu bikorwa bya Jenoside yakorewe Abatutsi, imiterere y’ipfobya n’ihakana byayo, muri gahunda yiswe ‘Rubyiruko Menya Amateka Yawe’.

Iyi gahunda igamije kurufasha gusobanukirwa amateka y’Igihugu, by’umwihariko aya Jenoside yakorewe Abatutsi, kurutoza Indangagaciro na kirazira z’umuco Nyarwanda, kwimakaza ubumwe n’ubudaheranwa, hagamijwe kurukangurira kugira uruhare mu iterambere ry’Igihugu.

Yavuze ko mbere y’ubukoloni Abanyarwanda bari babanye neza nta wishisha undi, ariko abakoloni bahagera bakabacamo ibice bagamije kubateranya.

Yavuze ko ingengabitekerezo yakoreshejwe mu kwanga Abatutsi mu Rwanda mu myaka ya 1950, n’ubu mu karere igihari.

Yagize ati "Ingengabitekerezo yakoreshejwe mu kwanga Abatutsi mu Rwanda mu myaka ya za 1950, ni na yo ngengabitekerezo igikoreshwa ubu ngubu muri Repubulika Iharanira Demokarasi ya Kongo no mu karere."

Urubyiruko rwishimiye ikiganiro rwahawe ndetse rwiyemeza kuba umwe

Guverineri w’Intara y’Iburasirazuba, Pudence Rubingisa, yasabye urubyiruko rwitabiriye iyi gahunda gukomeza kwigisha abo basize mu Turere baturutsemo, kugira ngo urubyiruko rukomeze kuba umusemburo w’impinduka nziza, ziganisha ku iterambere ry’Igihugu.

Rumwe mu rubyiruko ruvuga ko rwungutse byinshi kandi rugiye kwegera rugenzi rwarwo, kugira ngo hatazagira ushukwa akabibwamo ingengabitekerezo ya Jenoside.

Muragijimana Diane wo mu Karere ka Kayonza, avuga ko bagiye guhangana n’abagifite ingengabitekerezo ya Jenoside aho batuye, batanga amakuru ku gihe kugira ngo badakomeza kuyikwirakwiza muri rubanda.

Ati “Tumenye ahantu bafite ingengabitekerezo ya Jenoside tugatangira amakuru ku gihe, kuko tutabikoze twaba dufatanyije nabo gusubiza Igihugu cyacu aho cyavuye, cyane ko twabonye hari habi kandi tutifuza gusubirayo.”

Avuga ko agiye gufatanya na bagenzi kwigisha abaturage binyuze mu nteko, babasangize amateka y’Igihugu kuko hari bamwe baba batayazi neza.

Iby’aya mateka byagarutsweho ku ya 07 Gashyantare 2025, ubwo mu Karere ka Nyagatare hateraniraga urubyiruko rusaga 1,000 ruturutse mu Turere twa Nyagatare, Gatsibo, Kayonza, Ngoma, Rwamagana na Kirehe.

Abayobozi b’Uturere bari baherekeje urubyiruko rwabo

Ubwo yafungurwaga ku mugaragaro

Iyi nzu y’ubucuruzi igeretse rimwe yamukiriwe abaturage ku wa Kabiri tari 4 Gashyantare 2025, yuzuye itwaye Amafaranga y’u Rwanda Miliyoni hafi 360.

Ikorerwamo ubucuruzi butandukanye burimo ubw’ibiribwa, imboga n’imbuto, ubucuruzi bw’imyenda, Resitora n’ibindi.

Ihurirwamo n’abacuruzi basanzwe bakorera mu nkambi, ndetse n’Abanyarwanda bacururizaga mu nkengero z’inkambi.

Nyiransabimana Celine, avuga ko mbere ahantu bakoreraga hari habi, kenshi hasi cyangwa ku mahema bityo ibicuruzwa byabo bikangirika.

Yagize ati “Ubundi mbere ahantu twakoreraga ni hasi cyangwa ku mahema, ukabona abantu benshi ariko bakorera ahadasobanutse. Iyi nzu batwubakiye izadufasha kunoza ubucuruzi bwacu, bityo bitwongerere abakiriya, n’iterambere ari ko rizagenda riza kurushaho.”

Uwitwa Said, we avuga ko yakoreraga mu nkambi, ashima ubuyobozi bwabitayeho bukabakura ahantu bakoreraga ku dutanda dushaje bacururizagaho, bakabaha inyubako igezweho.

Iyi nyubako yatangiye gukorerwamo

Avuga ko ubu bakorera ahantu heza bityo n’ibyo baha abakiriya babo bikazajya biba bifite ubuziranenge.

Ati “Ubundi twacururizaga ku dutanda dushaje ahantu hadasakaye, ndetse bwakwira ibicuruzwa ukabitahana mu rugo rimwe na rimwe bikangirika, ariko hano uracuruza wajya gutaha ugafunga ukongera gufungura mu gitondo. Turashimira ubuyobozi bwadutekerejeho kandi natwe turizeza gukora neza.”

Umuyobozi w’Akarere ka Kirehe, Rangira Bruno, yashimiye ubufatanye na Minisiteri ishinzwe ibikorwa by’Ubutabazi, bakomeje gufasha mu kwita ku mpunzi za Mahama n’abaturage.

Yibukije abakorera muri iyi nyubako ko ari iyabo, bityo ikwiye kubafasha mu bikorwa bibateza imbere ariko nanone bakarushaho kuyifata neza.

Ni inzu igezweho izatuma abayicururizamo bakora bunguka

Umuyobozi w’Akarere ka Kirehe, Rangira Bruno

Abacuruza imboga bahamya ko zitacyangirika

Impunzi z’Abarundi zabyinaga zikoreye ingoma

Bamwe mu barwanye urugamba rwo kubohora Igihugu bahawe inka y’ishimwe

Mu Karere uyu munsi wizihirijwe kuri sitade y’Akarere, aho ibirori byabanjirijwe n’umukino w’umupira w’amaguru mu bagore ku makipe y’Imirenge ya Kamabuye na Ngeruka, yageze ku mukino wa nyuma mu irushanwa Umurenge Kagame Cup.

Ni ibirori byitabiriwe n’Ingabo z’u Rwanda zikorera muri Bugesera ndetse n’abaturage.

Tariki ya 1 Gashyantare 2025, ubwo hizihizwaga umunsi w’Intwari mu Karere ka Gatsibo, ku nsanganyamatsiko igira iti "Ubutwari n’Ubumwe bw’Abanyarwanda, inkingi z’iterambere”, ku rwego rw’Akarere wizihirijwe mu Murenge wa Kabarore.

Umwe mu bari ku rugamba rwo kubohora Igihugu no guhagarika Jenoside yakorewe Abatutsi uri mu kiruhuko cy’izabukuru, yashyikirijwe inzu yo kubamo.

Depite Ntezimana Jean Claude wari umushyitsi mukuru, yasabye abaturage gukomeza ubumwe kuko aribwo pfundo ry’iterambere ry’Igihugu.

Umwe mu bari ku rugamba rwo kubohora Igihugu yashyikirijwe inzu yubakiwe

Mu Karere ka Kayonza ho umunsi ubanziriza umunsi nyirizina uw’Intwari z’Igihugu, ubuyobozi bw’Akarere n’ubwa Pariki y’Akagera bashyikirije Koperative GIKADINI y’abahinzi b’urusenda mu Murenge wa Kabare, Akagari ka Cyarubare, batashye inzu yumishirizwamo urusenda.

Umuyobozi w’Akarere ka Kayonza, Nyemazi John Bosco, yibukije abanyamuryango bayo kubyaza umusaruro amahirwe bagerejweho na Leta, bagakora ibikorwa byinshi by’iterambere.

Yagize ati “Twifuza ko umuntu ugiye muri Koperative atera imbere mu buryo bufatika, abana bakiga neza, akishyura Mituweli ku gihe kandi akizigamira no muri EjoHeza.”

Iyi nzu yuzuye itwaye Miliyoni 45 z’Amafaranga y’u Rwanda irimo n’imashini yumisha urusenda, bikaba byarafashije abahinzi kutagira umusaruro wangirika no kubona inyungu nyinshi bakiteza imbere.

Umunsi ubanziriza uw’Intwari kandi mu Karere ka Kirehe, Umuyobozi wako Rangira Bruno, n’abandi bayobozi yifatanije n’urubyiruko rwo mu ishuri rya Rusumo High School n’abarezi, mu gitaramo gisingiza Intwari z’Igihugu.

Amakipe y’abagore y’Imirenge ya Ngeruka na Kamabuye yakinnye umukino wa nyuma mu irushanwa Umurenge Kagame Cup

Meya Rangira, yabibukije ko aribo Rwanda rw’ejo, ko aribo bayobozi b’ejo, abibutsa ko hari byinshi byakozwe harimo iterambere ryagezweho, ubuyobozi bwiza n’ibindi abasaba kwiga kandi neza, bakagira ikinyabupfura ku ishuri bakirinda amacakubiri n’ibiyobyabwenge.

Umunsi w’Intwari z’Igihugu mu Karere ka Ngoma, wizihirijwe kuri sitade y’Akarere aho itsinda ry’Abadepite riyobowe na Uwineza Beline, Visi Perezida ushinzwe amategeko no kugenzura ibikorwa bya Guverinoma, bifatanyije n’abaturage b’Umurenge wa Kibungo.

Umuyobozi w’Akarere, Niyonagira Nathalie, yagarutse ku bikorwa byaranze Intwari z’u Rwanda ashimira ingabo zari iza RPA, zitanze zikabohora Igihugu asaba urubyiruko gukomeza kugira indangagaciro z’umuco Nyarwanda, bakanga ikibi, birinda amacakubiri n’ibindi byose bitanya Abanyarwanda.

Mu Karere ka Nyagatare wizihirijwe mu Murenge wa Karama, Akagari ka Nyakiga aho babiri mu barwanye urugamba rwo kubohora Igihugu, Uwigira Telesphore na Nsanzabandi Chadrack bari mu kiruhuko cy’izabukuru, bahawe inka y’ishimwe ku bwo kwitanga batizigama bagaragaje mu kubohora u Rwanda.

Abadepite bifatanyije n’abaturage ba Ngoma mu kwizihiza umunsi w’Intwari

Depite Bitunguramye Diogène, yasabye abaturage gukora ibikorwa bigamije kubaka Igihugu.

Yagize ati "U Rwanda rwarahanzwe, rurubakwa kandi rugomba gukomeza kubakwa n’Abanyaranda".

Umugoroba ubanziriza umunsi w’Intwari z’Igihugu, Umuyobozi w’Akarere ka Rwamagana, Mbonyumuvunyi Radjab, yifatanyije n’abaturage n’urubyiruko bo mu Mujyi wa Rwamagana, mu gitaramo gisingiza Intwari z’Igihugu.

Kayonza ku bufatanye na Pariki y’Akagera Koperative GIKADINI yashyikirijwe inzu yumishirizwamo urusenda

Morale yari yose ku Ngabo z’Igihugu zishimiraga umunsi w’Intwari

Mu Karere ka Bugesera, ubuyobozi bwifatanyije n’urubyiruko mu bikorwa rurimo byo kubakira abatishoboye I Ntarama.

Muri iyi gahunda ngaruka-mwaka y’urubyiruko yiswe Urubyiruko Turashima, hazubakwa amacumbi y’abatishoboye, ibikoni n’ubwiherero.

Umuhuzabikorwa w’Urubyiruko mu Karere ka Bugesera, Pascal Mboni, yasobanuye ko iki gikorwa cyo kubakira abaturage batishoboye kigamije gufatanya n’Ubuyobozi gukemura ibibazo bibangamiye imibereho myiza y’abaturage, avuga kandi ko kiri no muri gahunda yo gushima Imiyoborere myiza y’Igihugu.

I Gatsibo, umuganda ku rwego rw’Akarere wakorewe mu Mudugudu wa Rutoma mu Kagari ka Bibare mu Murenge wa Muhura.

Hakozwe gikorwa cyo gusubiranya ubutaka bwo ku musozi uhanamye bwacukuweho amabuye mu rwego rwo kurwanya isuri.

Nyuma y’ibikorwa by’Umuganda rusange, Umuyobozi w’Akarere wungirije ushinzwe Ubukungu, Sekanyange Jean Leonard, yasabye abaturage kwirinda kwangiza ibidukikije, guhunika umusaruro mu rwego rwo kwirinda inzara no kwitegura kwizihiza umunsi w’intwari z’Igihugu uzaba taliki ya 1 Gashyantare 2025.

Mu Karere ka Kirehe, Umuganda rusange usoza ukwezi kwa Mutarama 2025, wakozwe mu Midugudu yose ariko by’umwihariko ku rwego rw’Akarere ukaba wabereye mu Mudugudu wa Kabeza, Akagari ka Bukora, Umurenge wa Nyamugari.

Hakaba hakozwe umuhanda uhuza Nyamugari-Bukora wangijwe n’ibiza by’imvura bifatanije.
Umuyobozi w’Akarere wungirije ushinzwe iterambere ry’ubukungu, Nzirabatinya Modeste, yakanguriye abaturage gukora cyane bakigira bakava mu bukene mu buryo burambye, kugira isuku n’isukura kandi bakomeza kwitegura kwizihiza umunsi w’Intwari z’Igihugu.

Akarere ka Nyagatare, abayobozi bifatanyije n’abaturage ba Katabagemu mu muganda usoza ukwezi kwa Mutarama 2025, ahahanzwe umuhanda w’ibirometero bibiri.

Ni umuhanda uhuza Imidugudu ya Nyagahandagaza na Kibuye mu Kagari ka Bayigaburire.
Mu Karere ka Rwamagana, abayobozi, abajyanama mu nama njyanama y’Akarere, abanyeshuri n’abakozi b’ishuri rya College Gishari ndetse n’inzego z’umutekano bifatanyije n’abaturage ba Gishari mu muganda wo gutunganya umuhanda w’ibirometero bitandatu (6) mu Kagari ka Ruhimbi.

Nyuma y’umuganda abawitabiriye bagejejweho ubutumwa bujyanye n’icyumweru cyahariwe ibikorwa by’ubutwari bakangurirwa kwimakaza indangagaciro z’ubutwari mu byo bakora no kuzizihiza umunsi ngarukamwaka w’Intwari z’u Rwanda.

Bifuza ko igiciro cy’amata cyazamuka kuko kwita ku nka bibahenda cyane

Umworozi mu Kagari ka Ndama, Umudugudu wa Akayange, Kashugera Faustin, avuga ko n’ubwo igiciro cy’amata cyazamuwe kikava ku mafaranga 320 kikagera ku mafaranga 400 kuri litiro, nabwo ayo mafaranga akiri macye ugereranyije n’ibyo bashora mu kugura ibiribwa by’inka ndetse no kuzitaho.

Yagize ati “Ntabwo igiciro twacyishimira jyewe nkora mpomba. Nabyeretse na bamwe mu bayobozi, uretse gukunda Igihugu ntabwo Umukuru w’Igihugu yaduha uruganda rukora amata y’ifu ngo turebere, nta wundi muntu uzaza kubikora (korora)”.

Akomeza agira ati “Gusa ntabwo nacika intege ariko nabwiye ba Minisitiri bose, bakavuga ngo hari abantu batabona amafaranga yo kugura amata, nkababwira nti ese amazi agura angahe!”

Avuga ko hatabayeho kurengera, nibura litiro imwe yashyirwa ku mafaranga 500 kandi ngo igiciro kizamuwe buri mworozi yashora mu kugura ibiryo by’inka, na we akabona umukamo mwinshi.

Agira ati “Gukabya ni ikosa nibura twahera kuri 500 ibindi tukagenda tubibona, bitari ibyo uruganda ntiruzabona amata. Nk’ubu mu minsi ishize nagemuraga litiro 600 ku munsi none uyu munsi nagemuye litiro 390 kubera ibiryo byarahenze, ntabwo nzigaburira uko bikwiye.”

Ibi abihuriyeho n’undi mworozi wo mu Murenge wa Rwempasha, uvuga ko ugereranyije uko ibiryo by’amatungo byazamutse mu giciro, amafaranga y’amata yakwiyongereye.

Na we avuga ko mu rwego rwo kudakorera mu gihombo, yahisemo kugabura ubwatsi gusa ariko nanone ngo byatubije umukamo.

Nu Karere ka Nyagatare, ubu ku munsi haboneka litiro 90,000 z’amata agemurwa ku ruganda Inyange hatabariwemo anyura ku ruhande.

Umuyobozi w’ihuriro ry’amakoperative y’aborozi mu Karere ka Nyagatare, Kayitare Godffrey, avuga ko kuba umukamo ugenda wiyongera ari na ko uruganda Inyange rwatangiye kwakira amata y’umugoroba, mu gihe mbere rwakiraga ayo mu gitondo gusa.

Ku makoperative y’aborozi 15 abarizwa mu Karere, ubu ngo ane yonyine ni yo aborozi batagemura amata y’umugoroba, ahanini kubera ko aba ari macye ku buryo atakonjeshwa.

Ku bufatanye n’umuguzi wabo, Uruganda Inyange, ubu ngo bemeye kujya bayatwara adakonjeshejwe.

Ati “Ane atagemura na yo twayasabye kugemura kuko imbogamizi zari zihari ni uko amata yari macye ku buryo umutozo wo mu cyuma gikonjesha utayageragaho ngo akonje neza, ariko ubu Inyange yatwemereye ko bazajya bayatwara bakayikonjeshereza.”

Guhera ku wa Mbere tariki ya 13 Mutarama 2025, ngo nta koperative n’imwe izaba itagemura amata y’ikigoroba.

Kayitare, avuga ko n’ubwo hari amakoperative atagemuraga amata y’ikigoroba kubera ko ari macye, ariko nanone hari ikibazo cy’ibyuma bikonjesha amata kuko ibihari byakira litiro 95,000 gusa, kandi nyamara hari igihe uwo mubare urenga.

Icyakora ngo muri uku kwezi kwa Mutarama, Minisiteri y’Ubuhinzi n’Ubworozi (MINAGRI), iratanga ibyuma bikonjesha 22 bizasaranganywa mu makoperative 15, nabyo biza bisanga ibindi bitatu baheruka guhabwa nabwo MINAGRI.

Yagize ati “Muri uku kwezi kwa mbere ibyuma bikonjesha 22 bizaba byatugezeho ariko nabwo ni ikiciro cya mbere, kuko muri Werurwe nabwo tuzabona ibindi ku buryo ikibazo cyo gukonjesha amata kizakemuka.”

Avuga ko iyi gahunda yo kugemura amata y’ikigoroba yafashije aborozi, kuko mbere yabaga ayo kwinywera gusa ariko ubu babona ayo bagurisha n’ayo banywa mu ngo.

Uruganda Inyange kandi mu bufatanye n’aborozi, ubu rwabazaniye Banki yitwa NCBA, izafasha mu kuzamura ubworozi ibaha inguzanyo zo kugura inka zitanga umukamo n’ayo kubaka ibikorwa remezo by’ubworozi, nk’ibiraro n’ibindi ku nyungu ya 9%.

Iyi banki izafasha no kongera ibyuma bikonjesha amata, bije mu rwego rwo kongera umukamo nyuma y’uko huzuye uruganda rutunganya amata y’ifu rwubatswe mu Karere ka Nyagatare, rukenera Litiro 650,000 ku munsi.

Twashatse kumenya niba amata y’ifu rukora yaratangiye kugera ku isoko ry’u Rwanda, ariko Umuyobozi Mukuru w’uruganda Inyange, James Biseruka, ntiyaboneka ku murongo wa telefone ndetse akaba atarasubiza ubutumwa bugufi yandikiwe.

Hari haciye umwaka igiciro kuri Litiro y’amata kizamutse kiva kuri 320Frw gishyirwa kuri 400Frw, gusa ngo n’ubu kiracyari hasi.

Umuyobozi Mukuru w’Ikigo cy’Ubutaka, Marie Grace Nishimwe

Umuyobozi Mukuru w’Ikigo cy’Igihugu Gishinzwe Ubutaka, Marie Grace Nishimwe, avuga ko mu rwego rwo gufasha Akarere ka Nyagatare gukemura bimwe mu bibazo by’ubutaka bikunze kuharangwa, guhera tariki 07 Mutarama 2025, bazatanga amahugurwa ku mikoreshereze y’ubutaka.

Aha, ngo bazerekana uburyo amakimbirane ashingiye ku butaka yagabanuka ndetse banakosore imbibi, ari nako handikwa ubutaka bushya ku babutunze butabanditseho.

Abafite ibibazo by’ubutaka barimo Nyirasafari Amina waguze ubutaka mu Mudugudu wa Marongero, Akagari ka Ryabega, Umurenge wa Nyagatare bungana na hegitari eshatu mu mwaka wa 2022.

Uwo baguze, yaje kwimuka ahasiga abo mu murynago we, bamubuza kugira icyo ahakorera, bavuga ko aho hantu atari ho yaguze.

Iki kibazo cyaje kugezwa ku rwego rw’Intara, maze hashyirwaho komisiyo ishinzwe gukemura ibibazo bijyanye n’ubutaka, kuwa kuwa 26 Nzeri 2023, hafatwa umwanzuro ko Nyirasafari ahabwa ubutaka bwe yaguze nta yandi mananiza.

N’ubwo hashize umwaka uyu mwanzuro ufashwe, abagomba kuwushyira mu bikorwa ntabyo bakoze. Nyirasafari aracyasiragira asaba ko yakwerekwa ubutaka bwe agatangira kubukoresha.

Yagize ati “Nagiye ku Karere ubishinzwe arambwira ngo ninjye ku Murenge nibo bazabikemura. Naho ngezeyo barambwira ngo uwo mwanzuro ntawo bazi bityo Akarere niko gakwiye kumfasha. Ubu naheze mu gihirahiro.”

Umuyobozi w’Akarere ka Nyagatare, Gasana Stephen, avuga ko mu rwego rwo gukemura ibibazo by’abaturage ahanini higanjemo iby’ubutaka, mu mwaka wa 2023, hashyizweho itsinda ry’abakozi batandatu.

Uyu mwaka w’imihigo 2024/2025, hakiriwe ibibazo 130, hakaba hamaze gukemurwa 89 hakaba hasigaye 41.

Avuga ko mu rwego rwo gukomeza gukemura ibibazo by’Abaturage hateganyijwe amahugurwa azahabwa komite z’ubutaka, abunzi n’abakuru b’imidugudu.

Umuyobozi w’Ikigo cy’Ubutaka, Marie Grace Nishimwe, ubwo yari yitabiriye inama mpuzabikorwa y’Akarere ka Nyagatare yo kuwa 18 Ukuboza 2024, yavuze ko bimwe mu bibazo biri mu Karere ka Nyagatare, bishingiye ku mikoreshereze y’ubutaka kuko abaturage badakurikiza igishushanyo mbonera cy’ubutaka ahanini kubera kutakimenya.

Yavuze ko mu rwego rwo gukemura bimwe mu bibazo bikigaragara mu butaka, guhera tariki ya 07 Mutarama 2025, Ikigo cy’Ubutaka kizafatanya n’Akarere mu kwandika ubutaka ku bantu babutunze butabanditseho, gukosora imbibe ndetse baganire n’abaturage ku itegeko ry’ubutaka n’uburyo amakimbirane abushingiyeho yagabanuka.

Ati “Tuzahugura abantu ku itegeko ry’ubutaka n’uburyo amakimbirane abushingiyeho yagabanuka. Si amahugurwa gusa ahubwo hari n’Imirenge tuzahitamo tugakosora n’imbibe ndetse tukanareba abatarandikisha ubutaka bwa mbere kugira ngo nabo babwandikweho.”

Yavuze ko mu isuzuma bakoze basanze mu Karere ka Nyagatare hari abantu benshi bacyubaka mu butaka bwagenewe ubuhinzi bikagabanya umusaruro w’ubuhinzi wakabonetse.
EMMANUEL GASANA SEBASAZA

Umuhinzi w’ibigori mu Karere ka Kayonza, Musanganya Protais, avuga ko kuri hegitari 200 yahinze, 150 abasha gukurikirana mu buryo bwo kuhira zo zizera neza ariko izisigaye 50 ziri imusozi imvura iramutse ihagaze bitakwera ku kigero cyiza.

Agira ati “Ubu imvura iramutse ihagaze nonaha ntabwo twakweza kuko ubu nibwo ibitiritiri bitangiye kuzanaho intete, urumva ko hakenewe nibura imvura ebyiri zinyuranye nibwo umuntu yavuga ko yakweza.”

Avuga ko ahantu hari ikibazo cyane ari mu Murenge wa Ndego kuko uwahinze atazuhira we izuba ryamaze kubyica abateguye umusaruro akaba ari abakoresha uburyo bwo kuhira.

Umuyobozi w’ihuriro ry’amakoperative y’abahinzi b’ibigori mu Karere ka Nyagatare, Nshimiyumukiza Samuel, avuga ko muri rusange ibigori bizera kuko hari n’abatangiye gusarura ahari ikibazo ari mu Mirenge iri mu gice kerekeza mu Karere ka Gatsibo kuko ho imvura yatinze kugwa.

Ati “Imvura ihagaze ibigori byakwera gusa imbogamizi zabayemo ni uko imvura yaguye nabi igihe cy’itera ry’imbuto kuko bimwe byangaga kumera tukongera tugatera. Ntabwo rero biri ku kigero byakabaye biriho ariko ibyinshi byakwera.”

Akomeza agira ati “Nka Mukama batangiye gusarura ahandi harabura nk’ibyumweru bitatu nabo ngo basarure. Ahari ikibazo ni mu Murenge wa Nyagatare na Karangazi n’ahandi herekeza mu rugabano rwa Gatsibo, biracyari hasi ariko naho habonetse imvura imwe cyangwa ebyiri byakwera n’ubwo bitaba ku kigero cyiza.”

Umuyobozi wa RAB sitasiyo ya Nyagatare, Kayumba John, avuga ko ibigori byose byamaze kugira intete ku buryo byakotswa mu ziko imvura ihagaze byakwera n’ubwo bitaba ku kigero gisanzwe.

Avuga ko muri Nyagatare hari ibigori bitagikeneye imvura ku buryo ihagaze byakwera ku kigero cya 60% naho ibisigaye bikaba bishobora kurumbaho hagati ya 20% na 30%.

Ati “Uyu munsi imvura ihagaze ubuso bwose bwahinzwe byarumbaho nka 20%. Hari ibigori bitarumba na gacye ahubwo byaba bigize amahirwe bingana nibura nka 60%. Ibingana na 40% byarumbaho nka 20% cyangwa nka 30%. Ni ukuvuga ngo ibigori byose byamaze guheka by’imibeya ntakibazo cyo kurumba gihari uretse yenda ibigitangira kuzana intete.”

Avuga ko ariko mu cyumweru gitaha bazatangira kugenzura kureba uko ibigori bimeze ku buryo ari nabwo hazamenyekana uduce dushobora kugira ikibazo cyo kurumbya imvura iramutse idakomeje kugwa.

Umuyobozi wa Tri-Seed Company, icuruza inyongeramusaruro, Sendege Norbert, avuga ko muri rusange mu Turere tugize Intara y’Iburasirazuba, ibigori byahinzwe mbere bizera ariko imvura iramutse ihagaze nonaha bitakwera ku kigero cyiza kuko bimwe bikeneye imvura ituma bigira intete nziza zibyibushye.

Yagize ati “ Byinshi byamaze kuzana imisatsi (Pollinisation), ikintu kibura ni icyafasha amazi n’intungagihingwa byafasha ikigori kugira intete zifite imbaraga zibyibushye. Naho ubu ihagaze (imvura) intete zaza ariko zikaza zitabyibushye aho twari kubona nka toni eshanu (5) tukabona nk’enye cyangwa eshatu.

Avuga ko abahinzi bakoresheje imbuto zera vuba bazeza n’ubwo yenda bitazaba ku rugero rwiza kuko imvura yatinze kuboneka.

Mu gihembwe cy’ihinga 2023A, mu Ntara y’Iburasirazuba hahinzwe ibigori ku buso bwa hegitari 130,005 haboneka umusaruro wa Toni 526,426,60 muri rusange kuri hegitari imwe hakaba harabonetseho toni 3.9.

Akarere ka Gatsibo na Nyagatare akaba aritwo tweza byinshi kuri hegitari ahabonetse toni hejuru ya 4.5 naho Uturere twa Kayonza na Ngoma tubona munsi ya toni 4 kuri hegitari.

Ukurikije umusaruro w’ibigori wabonetse icyo gihe, Intara y’Iburasirazuba yari yihariye 70% by’umusaruro wose w’ibigori wabonetse mu Gihugu cyose ndetse Akarere ka Nyagatare kakaba ariko kari gafite umusaruro mwinshi wa toni 119,075.

Ifoto yerekana Kanyanga yafahswe mu minsi ishize

Umuvugizi wa Polisi mu Ntara y’Iburasirazuba, SP Hamdun Twizeyimana, avuga ko muri rusange umutekano wari wifashe neza umunsi ubanziriza ubunani ndetse n’umunsi w’ubunani nyirizina wa tariki ya 01 Mutarama 2025, uretse ibyaha byoroheje byakomotse ku businzi.

Avuga ko habayeho gukubita no gukomeretsa biturutse ku businzi byakozwe inshuro zirindwi (7), Kirehe rimwe, Nyagatare inshuro ebyiri, Bugesera ebyiri, Gatsibo rimwe na Rwamagana rimwe.

Ku bunani kandi Polisi yabashije gufata abantu bane batwaye ibiyobyabwenge by’inzoga itemewe ya kanyanga mu Turere twa Nyagatare na Kayonza bafatanywa litiro 1,250.

Ati “Hafashwe litiro za kanyanga 1,250 mu Turere tubiri, Nyagatare na Kayonza buri hose hafashwe abantu babiri babiri, ubu uko ari bane bafungiye kuri sitasiyo za Polisi muri utwo Turere.”

Umunsi w’ubunani kandi hafashwe abamotari bane n’abashoferi b’imodoka babiri bari batwaye ibinyabiziga banyoye ibisindisha.

Mu Karere ka Bugesera habereye impanuka yoroheje aho imodoka ebyiri zagonganye banyirazo barumvikana birarangira.

SP Hamdun Twizeyimana, yasabye abanyarwanda muri rusange kugabanya kunywa ibisindisha kuko bidatanga umunezero ahubwo bishobora guteza ibindi bibazo.

Yabasabye kandi kwirinda ikoreshwa ry’ibiyobyabwenge haba kubitunda cyangwa kubicuruza kuko ubifatiwemo ahanwa n’amategeko.

Ikindi yasabye abaturage kwirinda kwihanira mu gihe habayeho kutumvikana, bakegera ubuyobozi bukabafasha ariko by’umwihariko bagatanga amakuru ku gihe ku hantu hagaragaye amakimbirane cyangwa kutumvikana ku kintu.

Abana b’abakobwa na bo bitabiriye irushanwa rya Korowani ku bwinshi

Mu Karere ka Rwamagana, habarizwa amashuri ya Korowani 25 ari mu misigiti 25, amarushanwa y’uyu mwaka akaba yaritabiriwe n’abana 110 barimo abakobwa 53 mu barushanwa bose 80 bakaba bari munsi y’imyaka 15 y’amavuko.

Uwamahoro Afissa, avuga ko kwiga Korowani bizabafasha cyane mu buzima busanzwe, kuko bazaba batandukanye n’abandi kuko ibaremamo kumvira ababyeyi, kwirinda ibishuko ndetse n’izindi ngeso mbi zashyira ubuzima bwabo mu kaga.

Yagize ati “Abana bose muri rusange idufasha kuva mu ngeso mbi, wayize ntiwasuzugura ababyeyi kuko yigisha umuco, ikatwigisha kubana neza n’abaturanyi, ikaturinda kwishora mu biyobyabwenge n’ibindi bishuko nk’ubusambanyi ndetse n’ubundi burara.”

Umuyobozi w’inyigisho za Korowani mu Karere ka Rwamagana, Sheikh Nkurunziza Hassan, avuga ko umwana wiga Korohani agira indangagaciro z’idini n’iz’umuco nyarwanda, bityo bikamurinda kujya mu ngeso mbi.

Ati “Umwana wiga Korowani aba afite indangagaciro zaba iz’idini n’iza Kinyarwanda, kuko ntiyirirwa muri filime n’ibindi bigare bitari byiza, ntiwamubona mu biyobyabwenge ahubwo ahora atekereza ibyiza.”

Imam w’Akarere ka Rwamagana, Sheikh Ncuti Saddik, avuga ko bategura kwigisha abana Korowani ndetse n’amarushanwa yayo, bari bagamije kubungabunga ubuziranenge bwayo kugira ngo birinde abahimba amagambo y’icyarabu bakayitirira Korowani.

Yagize ati “Twabigishije Korowani kugira ngo tubungabunge ubuziranenge bwayo, kuko hari abantu bagiye bahimba amagambo y’icyarabu bakayitirira Korowani. Ikindi ni uko twabigishirije mu misigiti dukuraho ibyo kwigira mu ngo zabo, hagamijwe kwirinda ko havukamo imyumvire y’ubuhezanguni.”

Ni ku nshuro ya kabiri aya marushanwa ategurwa mu Karere ka Rwamagana, ndetse bamwe mu bana bayakoze umwaka ushize umwe akaba yaregukanye igihembo ku rwego rw’Isi, mu marushanwa yabereye muri Leta zunze Ubumwe z’Abarabu.

Abayisilamu mu Karere ka Rwamagana bakaba bishimira Leta ko yabafashe nk’abandi Banyarwanda, aho kwitwa Abaswayire nk’uko byahoze dore ko byatumaga batabasha kwiga no kwisanzura mu Gihugu.

Abitabiriye abenshi bari munsi y’imyaka 15 y’amavuko

Impanuka ya moto

Umuvugizi wa Polisi mu Ntara y’Iburasirazuba, SP Hamdun Twizeyimana, avuga ko ku munsi mukuru wa Noheri umutekano wagenze neza muri rusange uretse umuntu umwe wishwe, abana babiri bagasambanywa ndetse n’impanuka zoroheje.

Muri rusange mu Ntara yose hagaragaye ibyaha byo gukubita no gukomeretsa bitandatu (6), mu Karere ka Nyagatare bitatu (3), Gatsibo kimwe (1), Ngoma kimwe (1) ndetse na Kirehe icyaha kimwe (1) cyateje urupfu mu gihe abandi byari byoroheje kuko ntawagiye kwa muganga.

Ati “Saa kumi n’ebyiri z’umugoroba, hari umusore w’imyaka 18 wari mu kabari mu Murenge wa Nyarubuye muri Kirehe, aranywa arwana na mugenzi we basangiraga, aramukubita amukomeretsa ku jisho, barabakiza baranamusohora ngo atahe (uwateje urugomo ari na we wakomeretse).”

Akomeza agira ati “Yavuye mu Mudugudu yanyweragamo ataha iwabo mu wundi Mudugudu, ageze iwabo abona umuturanyi wabo, umugabo w’imyaka 35 wari wicaye hanze, hamwe n’ubusinzi n’umujinya wo gukubitirwa mu kabari, yabonye umwase wari hafi y’aho uwo muturanyi yari yicaye arawumukubita mu mutwe ahita apfa.”

Uwo musore yahise afatwa akaba afungiye kuri RIB Sitasiyo ya Nyarubuye, naho uwitabye Imana umurambo we ukaba wahise ujyanwa ku bitaro bya Kirehe kugira ngo ukorerwe isuzumwa.

Mu Karere ka Kirehe, hasambanyijwe abana batatu

Muri rusange habaye impanuka zoroheje eshatu (3) harimo ebyiri za moto n’imodoka imwe, ariko hakaba hakomeretse byoroheje umumotari umwe na we akaba yagiye kwa muganga bamupfuka igikomere arataha.

Mu Karere ka Nyagatare kandi hafashwe umumotari umwe wari utwaye ikinyabiziga yasinze.

Hanafashwe kandi abantu bane (4) bari batwaye moto badafite ibyangombwa bibemerera gutwara, babiri muri Kayonza, umwe muri Bugesera n’undi umwe i Gatsibo.

SP Hamdun Twizeyimana, arakangurira abaturage kwinezeza ariko bazirikana ko umutekano ugomba kuza ku isonga, bakirinda ibikorwa biwuhungabanya.

Urubyiruko, cyane abanyeshuri bari mu biruhuko rwasabwe kwirinda ibisindisha n’ibiyobyabwenge, kuko bishobora kubashora mu byaha birimo gukubita no gukomeretsa ,kuko bihanwa n’amategeko ariko nanone bikaba byabakururira guhohoterwa.

Abacuruza ibinyobwa bisembuye nabo basabwe kwirinda gukomeza guha inzoga abantu bigaragara ko basinze, ndetse n’abatwara ibinyabiziga basabwa kwirinda gutwara banyoye ibisindisha.

Muri rusange Polisi y’Igihugu ikaba yifuriza abaturage b’Intara y’Iburasirazuba n’Abanyarwanda bose, kwizihiza neza iminsi mikuru isoza umwaka mu mutekano bagizemo uruhare, ndetse bakirinda no gusesagura.

Saa kumi n’ebyiri z’umugoroba, mu isoko rya Nyagatare, abantu bahahaga ku bwinshi cyane ibiribwa birimo, ibirayi ndetse n’umuceri, ibirungo ndetse n’inyama.

Impamvu bibanze ku birayi kurusha ibitoki nyamara aribyo benshi muri aka gace bakunda kubera umunyige n’uko ari byo bihendutse kuko ufite amafaranga 400 yabonaga ikilo mu gihe ikilo cy’ibitoki cyo kiri ku mafaranga 500.

Ubundi iri soko rifunga saa kumi n’ebyiri z’umugoroba ariko umunsi ubanziriza Noheri, ryakoze kugera hafi saa yine z’ijoro kuko abaguzi bari bakiza gushaka ibya Noheri.

Bamwe mu bacuruza ibicuruzwa bitandukanye birimo amavuta yo guteka, umuceri na kawunga babyiniye ku rukoma kuko ngo batunguwe no kubona abakiriya batazi aho baturutse kuko ngo ari ubwa mbere babonye umubare nk’uyu.

Umwe ati “Ni ukuri ntabwo wamenya ko aba bantu ari aba Nyagatare ukurikije muri iyi minsi uko byari bimeze. Umuntu aribaza baturutse hehe ko ubundi bari barabuze?”

Nyamara ariko umwe mu bacuruza ibiribwa n’ibirungo mu isoko rya Nyagatare, we avuga ko abakiriya batabaye benshi ugereranyije n’imyaka ishize, agakeka ko mu baturage nta mafaranga ahari kubera izuba ryinshi ryatse igihe kinini.

Yagize ati “Abakiriya ni bacye bacye ariko baraza, urebye abantu bafite ubukene kubera izuba ryinshi ryabayeho cyakora ugereranyije n’indi minsi ubu nibwo babonetse gusa nanone ugereranyije n’imyaka ishize ubu ni bacye cyane.”

Umuturage w’Umudugudu wa Kamagiri, Akagari ka Kamagiri, Umurenge wa Nyagatare, Nsanzimfura Emmanuel, wagaragaraga ko yashize inyota, avuga ko Noheri ibaye ibiryo bimaze kuboneka bityo bagomba kuyizihiza bishimye.

Cyakora kuri we ngo icyambere ni umutekano ku buryo we ku giti cye agomba kwirinda kuvuga nabi no gusitara kuri mugenzi we akanasaba bagenzi be kwita ku mutekano.

Yagize ati “Ibiryo byaba bicye byaba byinshi ntakibazo icyangombwa ni uko tugomba kwizihiza Noheri neza. Ku giti cyanjye ngomba kwirinda kugira uwo nsitaraho mubwira nabi ikindi ni uko twarushaho gucunga umutekano kuko niwo wa mbere.”

Aha Kamagiri, mu isoko ry’ahitwa Kimaramu, hanagaragaye abacuruzi bashya biganjemo urubyiruko rwo mu mashuri yisumbuye rwacuruzaga ibiribwa ngo rugamije gufasha ababyeyi kuzabona amafaranga y’ishuri bitabagoye cyane.

N’ubwo mu isoko rya Nyagatare ikilo cy’ibirayi gihera ku mafaranga 400 kuzamura, muri santere nyinshi ho ikilo ni uguhera ku mafaranga 350 ku birayi byera ahitwa Bwera mu Murenge wa Rwimiyaga.

Ibirayi bya kimeza muri Nyagatare ni amafaranga 200 ku kiro

Mu Karere ka Nyagatare, henshi n’ubwo ibishyimbo biteze neza kubera imvura itabonekeye igihe cyangwa ngo ihozeho ariko henshi bari mu isarura.

Ibi byatumye n’igiciro cyabyo kigabanuka kiva ku mafaranga 1,200 ku kilo kimwe kigera kuri 800.

Uretse ibishyimbo byeze, n’ibirayi bihingwa muri aka Karere byarabonetse ku buryo witwaje amafaranga 200 gusa ubona ikilo cy’ibirayi byo kurya.

Abahinzi b’ibigori nabo abahinze mbere batangiye kuganura kuko ikigori cyokeje cyangwa gitetse kiraboneka n’ubwo atari kuri benshi.

Umwe mu baturage agira ati “Ibintu birimo kugenda biza, ibishyimbo turya ibitonore kandi n’ibindi birumye, urumva ko uburisho bwamaze kuboneka. Mu isoko twa turayi twimeza mu mirima ikilo ni 200, ibituruka Karushuga nabyo biri kuri 350, ibigori twatangiye kotsa. Uwagusura ntiwananirwa kumuzimanira.”

N’ubwo ibigori bitarera ariko hari ikizere kuko imvura y’ukwezi kumwe gusa yabasha kubyeza. Ntibikuraho ariko ko uwasura umuntu muri Nyagatare atabura kurya kawunga kuko kenshi ariyo ndyo ya buri munsi mu miryango myinshi.

Nyagatare kandi ntiwahicirwa n’inyota kuko amata amaze kuboneka ugereranyije n’igihe cy’impeshyi gishize dore ko ubu amakusanyirizo y’amata 15 ku munsi hakirwa litiro 87,000 zivuye kuri 60,000.

Inyanya, intoryi n’izindi mboga rwatsi nabyo byarabonetse ku bwinshi ku buryo n’ibiciro byagabanutse uretse imbuto zitajya ziboneka muri aka Karere.

Gatsibo na Kayonza nabo n’ubwo imvura itabonetse neza cyane mu Mirenge ikora ku Kigo cya gisirikare cya Gabiro no kuri Pariki y’Akagera ariko abatuye mu yindi Mirenge, bamaze gutangira kurya ibishyimbo by’ibitonore ndetse n’ibirayi byimeza mu mirima n’ibitoki.

Umuhinzi mu Murenge wa Rwimbogo Akarere ka Gatsibo agira ati “Yego imvura yabaye nkeya ariko ibitonore bitangiye kuboneka ku bahinze mbere ndetse na twa turayi duto twarabonetse, ikibazo gishobora kuba ibigori gusa naho ubundi ibiryo byatangiye kuboneka nta kibazo.”

Kirehe, Ngoma na Rwamagana, imvura yarabonetse intoki zimeze neza ku buryo ubu ngo ku isoko byatangiye kugabanuka mu giciro n’ubwo atari cyane bijyanye n’ibihe by’iminsi mikuru isoza umwaka.

Ikindi ni uko ibishyimbo byahinzwe mu ntoki n’uduce twabonye imvura mbere batangiye kurya ibitonore.

Ikindi ngo imboga rwatsi nazo zatangiye kuboneka ku bwinshi ku buryo igitoki kirimo ibishyimbo by’ibitonore na dodo ariryo funguro benshi barimo gufungura muri iyi minsi wongeyeho ibirayi byimeza mu mirima.

Umuyobozi w’umudugudu wa Gakoma(i Bumoso) yakira igihembo cya moto

Uretse kuba umaze imyaka irindwi ari uwa mbere utarangwamo icyaha mu Karere ka Nyagatare, uyu mwaka bwo watowe nk’Umudugudu utarangwamo icyaha mu Ntara y’Iburasirazuba kandi ngo intego ni ukuba uwa mbere mu Gihugu.

Umukuru w’uyu Mudugudu, Sabiti John Bosco, avuga ko kugira ngo abigereho ku bwumvikane n’abaturage ayobora, hagati y’ingo enye n’eshanu, hashyizweho umuyobozi ku buryo ibibazo bikemukira mu muryango.

Ati “Umuyobozi w’izi ngo icyo ashinzwe ni uguhuza abafitanye ikibazo kigakemukira mu muryango kitagiye mu isibo. Ibibazo bigera ku muyobozi w’isibo ni bicye yewe jyewe nta bibazo ncyakira ku Mudugudu.”

Ikindi ni uko ngo babanje kurandura ibiyobyabwenge mu Mudugudu wabo ku buryo n’ubinywereye ahandi akaza iwabo akererewe afatwa agahanwa.

Ibi ngo byagabanyije ibyaha byinshi cyane ko babonaga ko ibikorwa byose bishingiye ku businzi n’ikoreshwa ry’ibiyobyabwenge.

Agira ati “Mu mudugudu wacu, nta biyobyabwenge bihaba kuko bariya bayobozi b’ingo barabigenzura. Ubinywereye mu wundi mudugudu agataha iwacu amasaha twihaye kuba turi mu ngo zacu yarenze irondo riramufata tukamuhana, igihano cyo kumugaya gusa kirahagije akikosora.”

Avuga ko ibi byose atabikoze agambiriye kubona igihembo runaka ahubwo yabikoze ku bw’ineza y’abaturage ayobora no kumva ko icyaba ku muturanyi nawe ubwe cyamubaho.

Yagize ati ‘Abakuru b’Imidugudu bakwiye kumenya ko aho batorerwa ari iwabo n’ibyo bakora babikorera iwabo kandi ku bwiza bw’abaturage babo. Birababaje kumva ngo umukobwa wa runaka yatwaye inda, ubwo niba yayitwaye n’uwanjye nawe yayitwaye.”

Abagabo bagize Umudugudu wa Gakoma, hashize umwaka bashinze ihuriro ryo kurwanya amakimbirane yo mu ngo.

Umuyobozi w’iri huriro Hakizimana Hamdun, avuga ko batarishinze kuko hari ibyo bibazo ahubwo bari bagamije gukumira ko byazahagaragara.

Agira ati “Twe nta bibazo by’amakimbirane bihari ariko nanone tugomba kwitegura ko byabaho kuko turi abantu. Twicara buri kwezi ndetse iyo tumenye umugabo watonganyeho gacye n’umugore kuko amakuru tuyahabwa n’umuyobozi w’ingo, turamwicaza tukamukebura kandi rwose nta bibazo tugira.”

Ubundi uyu Mudugudu n’ubwo wegereye umujyi nta kabari kawubamo uretse abacururiza inzoga muri butike zicuruza ibiribwa ariko nabwo ushaka kuyinywa arayigura akayitahana akajya kuyinywera iwe hirindwa ko yagira uwo bavugana nabi.

Umuugudu wa Gakoma, utuwe n’abaturage barenga 1,000 wabashije kwiyubakira ibiro by’Umudugudu ku mafaranga yakusanyijwe n’abaturage ubwabo nta yindi nkunga ivuye ahandi.

Akarere ka Nyagatare, gaherutse gushimira umuyobozi w’uyu mudugud, kamuha moto izajya imufasha mu kazi ke ka buri munsi ko kwita ku baturage be bitamugoye, igihembo avuga ko cyamunejeje cyane n’ubwo atakoze ari cyo agamije.

Nyamara, muri aka Karere haherutse gutahwa uruganda rutunganya amata y’ifu ruzajya rukenera litiro 650,000 ku munsi.

Aba borozi bakomeje gusaba kwegerezwa uruganda rutunganya ibiryo by’amatungo kugira ngo inka zabo zibone umukamo uhagije, bashobore guhaza isoko, ryaba iry’uruganda rw’amata, y’ifu, n’iry’amata risanzwe.

Umuyobozi w’Ihuriro ry’aborozi, Kayitare Godffrey, avuga ko ibiryo by’amatungo bibonetse umukamo wakwiyongera n’aborozi bakabona amafaranga.

Ati“Tubonye uruganda rukora ibiryo by’amatungo byatworohera tukabasha kongera umukamo bityo n’uruganda tukaruhaza.”

Akarere ka Nyagatare niko gafite inka nyinshi, kuko hari inka 220,875. Guhera muri uku kwezi kuboza hakaba hatangiye kuboneka litiro 87,000 ku munsi zivuye kuri 60,000 zabonekaga mu gihe cy’impeshyi.

Akarere ka Kayonza gakurikira aka Nyagatare mu kugira inka nyinshi dore ko gafite izisaga 75,000 zitanga umukamo wa litiro 51,000 ku munsi ariko mu gihe cy’impeshyi ntizirenga 25,000.

Akarere ka Gatsibo nako kari mu dufite inka nyinshi mu Ntara y’Iburasirazuba, gafite 71,484 zitanga umukamo wa litiro 57,800 ku munsi mu gihe cy’imvura ariko mu gihe cy’impeshyi kubona litiro 30,000 biba ari ingume.

Rwamagana ahubatse uruganda rukora ibiryo by’amatungo, ifite inka 39,234 zitanga umukamo wa litiro 45,654 ku munsi, bigaragara ko inka zabo zigaburirwa ugereranyije n’utundi Turere turi kure y’uruganda.

Umukozi w’Intara y’Iburasirazuba ushinzwe Iterambere ry’Uturere, avuga ko kuba uruganda rukora ibiryo by’amatungo ruri I Rwamagana atari ikibazo kuko rudakora ibiryo bigaburirwa inka gusa ahubwo rukora ibigaburirwa n’andi matungo arimo inkoko, ingurube n’amafi.

Gusa avuga ko ahubwo habonetse ururwunganira rufite umwihariko w’ibiryo by’inka gusa byaba akarusho.

Umuyobozi Mukuru muri Minisiteri y’Ubuhinzi n’Ubworozi ushinzwe iterambere ry’Ubworozi, Dr Ndorimana Jean Claude, aherutse gutangariza RBA, ko mu buryo bwa vuba bagiye gusaba abafite inganda zikora ibiryo by’amatungo kubigeza i Nyagatare, mu gihe hagishakishwa uruganda rutunganya ibiryo by’amatungo narwo rwakubakwa muri aka Karere.

Muri gahunda ya Guverinoma y’imyaka itanu (NST2) igamije kwihutisha iterambere ry’Igihugu harimo ingingo nyinshi ariko ku ngingo ijyanye n’Ubuhinzi n’Ubworozi hateganywa ko umusararo wabyo uziyongera ku kigero cya 50%.

Ibi byabaye ku wa mbere tariki ya 16 Ukuboza 2024, ahagana saa kumi n’imwe z’igitondo, bibera mu Mudugudu wa Rukundo, Akagari ka Kirebe, Umurenge wa Rwimiyaga.

Umuvugizi wa Polisi mu Ntara y’Iburasirazuba, SP Hamdun Twizeyimana, avuga ko Hakizimana Emmanuel w’imyaka 48 y’amavuko, yari asanzwe agura amata n’abashumba ba Gatare bayamwibye.

Bamwe mu bashumba ngo baje guha amakuru nyiri inka, na we abasaba ko mu gihe Hakizimana azaba ahageze bazamuhamagara akaza akirebera.

Ku wa mbere Hakizimana akigera mu rwuri rwa Gatare, ngo bahise bamuhamagara araza, afatanyije n’ushinzwe inka ze, bakubita bakoresheje inkoni Hakizimana kugeza ashizemo umwuka.

SP Twizeyimana yasabye abantu kureka umuco wo kwihanira ndetse n’urugomo rujyanye no gukubita no gukomeretsa, kuko ari icyaha gihanwa n’amategeko.

Avuga ko mu gihe umuntu afite ikibazo akwiye kugana inzego zibishinzwe zikamufasha kugikemura.

Ariko nanone ngo abaturage bakwiye gufasha inzego z’umutekano batanga amakuru kare, kugira ngo hakumirwe ibyaha bitaraba.

Ingingo ya 121 y’Itegeko nº 68/2018 ryo ku wa 30/08/2018 riteganya ibyaha n’ibihano muri rusange, iteganya ko iyo gukubita cyangwa gukomeretsa byateye urupfu, igihano kiba igifungo kitari munsi y’imyaka 10 ariko kitarenze imyaka 20 n’ihazabu itari munsi ya 3,000,000 FRW ariko itarenze 5,000,000 Frw.

Iyo yakoze urwo rugomo yabigambiriye cyangwa yabanje gutega igico, ahanishwa igifungo cya burundu.

Umurambo we, wahise ujyanwa ku bitaro bya Nyagatare kugira ngo ukorerwe isuzuma, mu gihe Gatare yahise atoroka ariko abashumba be babiri n’undi wa murumuna wa Gatare wari uhari Hakizimana akubitwa, bakaba bahise bafatwa barafungwa.

Hakizimana Emmanuel, asize umugore n’abana bane (4).

Umwe mu bakozi ukora akazi ko gucunga umutekano w’ishuri, tutashatse kuvuga amazina ye kubera impamvu zo kurengera akazi ke, avuga ko we na bagenzi bahuje akazi uko ari batatu bamaze igihe badahembwa harimo n’uwenda gusoza igihe cy’amasezerano ye atarabona umushahara n’umwe.

Yagize ati “Jye na mugenzi wanjye twenda kunganya kuko turishyuza amezi 11 kandi dufite amasezerano y’akazi y’umwaka umwe.”

Avuga ko kudahembwa byamugizeho ingaruka zirimo urwikekwe ku wo bashakanye kuko yumva ko hari ibindi ayakoresha ndetse no kugorwa no gutunga umuryango we.

Ati “Mu rugo byangizeho ingaruka kuko simbasha kubona ibikoresho by’ishuri by’abana, ubuzima bwo mu rugo ntibunyoroheye kuko umuntu babona ajya mu kazi buri munsi hari igihe batekereza ko bayampa nkayamarira iyo nkorera, ugasanga bambwira nabi ngo hari icyo mbakinga n’ubwo mba
mbabwiza ukuri.”

Avuga ko impamvu bagikora akazi ari uko bafite impungenge ko baramutse basezeye batakwizera ko bazabona amafaranga yabo amaze kuba menshi.

Uretse abakora akazi k’izamu ngo n’abakora akazi ko gutekera abanyeshuri nabo kuva iki gihembwe cy’amashuri cyatangira ntibarabona umushahara n’umwe.

Abarimu babiri bigishije muri gahunda nzamurabushobozi nabo bavuga ko bari bizejwe kwishyurwa amafaranga 20,000 nk’igihembo cy’iminsi 21 bakoze abandi bari mu biruhuko.

Umwe muri bo avuga ko bahembye bamwe abandi babiri babwirwa ko amafaranga yabo bazayahabwa nyuma. Kugeza uyu munsi ngo ntibarayabona, nyamara ngo ntibanabwirwa impamvu.

Umuyobozi w’iri shuri ntitwabashije kumubona kuko inshuro nyinshi twamuhamagaye kuri telefone ye igendanwa atatwitabye.

Umuyobozi w’Akarere ka Nyagatare wungirije ushinzwe Imibereho myiza, Murekatete Juliet, avuga ko itinda ry’amafaranga Leta iha amashuri ridakwiye kuba ikibazo cyo kudahemba abakozi by’umwihariko abakora akazi k’izamu kuko bishobora kubatera ingeso y’ubujura.

Agira ati “Umuyobozi w’ishuri ntiyitaye ku bantu akoresha kuko abazamu bakwiye kubona ibyo bagenerwa kugira ngo bitabatera ibishuko byo kwiba. Aya mezi ni menshi bikabije.”

Cyakora ngo mu kiganiro umuyobozi w’ishuri yagiranye n’umukozi ushinzwe Uburezi ku Murenge wa Karangazi ngo yemeye ko atangira guhemba abakozi bafitiwe ideni guhera kuri uyu wa mbere tariki ya 16 Ukuboza 2024.’

Icyakora uyu muyobozi, we ngo yemera ko umukozi ufitiwe umwenda munini ari amezi atandatu.

Ku kibazo cy’abarimu bigishije muri gahunda nzamurabushobozi, umuyobozi w’ishuri we ngo avuga ko abafitiye umwenda w’iminsi itanu gusa.

Iyi mvura yaguye hagati ya saa saba na saa cyenda z’igicamunsi tariki 12 Ukuboza 2024, yibasira cyane amazu ashaje ku buryo inkuta zimwe zasomye amazi menshi zikagwa ndetse n’ayasambuwe n’umuyaga wakurikiye imvura.

Abayobozi b’Akarere bavuga ko nta muntu wakomerekeyemo ahubwo abagize imiryango yahuye n’iki kibazo yacumbikishirijwe mu baturanyi.

Kuri ubu ngo ku bufatanye bw’Akarere n’abafatanyabikorwa bako ndetse na Minisiteri ishinzwe ibiza bagiye gushakisha uko bafasha abaturage.

Yagize ati “Jarama ni Umurenge uteye neza cyane nta manegeka ugira hari amazu ya kera ashaje kubera imvura nyinshi inkuta zigasoma amazi menshi zikagwa andi ibisenge bikurwaho n’umuyaga.”

Umuyobozi w’akarere wungirije ushinzwe ubukungu Mapambano Nyiridandi, yagize ati “Tugiye gukorana n’abafatanyabikorwa na Minisiteri ishinzwe ibiza dushake amabati, imiganda y’abaturage ndetse n’ubushobozi bundi turimo gukusanya kugira ngo tubonere abaturage ubufasha bwihuse.”

Mapambano kandi asaba abaturage kuzirika ibisenge by’amazu yabo kugira ngo birinde ko umuyaga wabasenyera.

Iteganyagihe ry’Ukuboza 2024, rigaragaza ko uturere twa Ngoma, Rwamagana, igice cy’Akarere ka Gatsibo, Kirehe n’uduce duto tw’Akarere ka Nyagatare na Kayonza, hazagwa imvura iri hagati ya MM150 na 200.

Uturere tugize Intara y’Iburasirazuba tuzagira umuyaga uri hagati ya metero hagati ya 6 na 8 ku isegonda, uretse aka Nyagatare kazagira umuyaga wa metero 4 kugera kuri 6 ku isegonda na Kayonza izagira umuyaga mwinshi wa metero hagati ya 8 na 10 ku isegonda.

Vice Mayor, Uwimana avuga ko imiryango yagaragayemo amakimbirane yatangiye kwigishwa kuyavamo

Kugira ngo iyi miryango igaragare ngo bagiye urugo ku rundi hagamijwe kumenya imibanire y’abarubamo maze abafitanye amakimbirane bafashwe kuyavamo kuko adindiza iterambere.

Avuga ko aya makimbirane yose adaturuka ku bagabo gusa kuko hari n’abagore baba banyiribayazana yayo.

Iby’ingenzi byagaragaye bikomokaho ayo makimbirane yo mu miryango ngo ni imicungire y’umutungo w’abashakanye ndetse n’ubusinzi.

Ati “Kuba abashakanye badahuza amakuru ku micungire y’umutungo, rimwe na rimwe ugasanga umwe mu bashakanye afite igitekerezo cyiza ariko kuko atakiganiriye n’uwo bashakanye bikazana amakimbirane.”

Akomeza agira ati “Ikindi ni ubusinzi aho abantu banywa bakarenza urugero bigatera amakimbirane n’intonganya.”

Uwimana, avuga ko aya makimbirane yo mu miryango ariyo nkomoko y’ihohoterwa ry’abana kuko batabasha kwiga neza, abari mu mirire mibi n’ibindi.

Avuga ko iyi miryango yabaruwe iri mu makimbirane, batangiye kuyiganiriza bifashishije abafatanyabikorwa mu iterambere ry’Akarere ndetse n’inzego z’ibanze ku buryo hari icyizere ko bamwe bashobora kuyavamo.

Umubyeyi wo mu Karere ka Gatsibo utifuje ko amazina ye atangazwa, yavuze ko yigeze kubaho urugo rwe ruba mu makimbirane ku buryo yageze aho yumva yakwisubirira iwabo iby’urushako akabivamo burundu.

Icyo gihe ngo urugo rwabo nta terambere rwagiraga ahanini kuko buri wese yakoraga atabishyizeho umutima ndetse n’imyaka yeze buri wese akagurishaho rwihishwa bigatuma urugo ruhorana inzara.

Yagize ati “Jye n’umugabo twahoraga turwana, byageze igihe ndabimenyera ataza atongana nkaba arijye ushoza intambara, nari narabaye ikihebe bigera n’aho nifuza kwisubirira mu rugo nkamutana abana kubera intonganya twahoragamo. Twarezaga akagurisha rwihishwa yagenda nanjye nkabigenza uko bugacya tugatangira guhaha, mbese tugahorana inzara.”

Nyuma ngo bakomeje kugirwa inama n’inzego zitandukanye harimo urusengero basengeragamo, abayobozi ndetse n’abaturanyi barahinduka ku buryo ubu bakorera hamwe kandi babanye neza.

Avuga ko ahanini yahoraga akeka ko umugabo amuca inyuma mu gihe umugabo nawe yamushinjaga kutiyitaho (kutigirira isuku) bigatuma bahora barwana.

Kuva bavuye mu makimbirane, hashize imyaka irindwi ngo urugo rwabo rwateye imbere ku buryo babashije kwiyubakira inzu nziza n’abana bakaba basigaye biga mu mashuri meza ndetse ngo banafite imishinga myinshi yo kwagura ubutaka bityo bagakorera ahantu hagari.

Asaba abashakanye kubahana, kujya inama kuri buri kintu cyose ndetse no kwimikaza ibiganiro hagati yabo kuko bikemura ibibazo byose.

Abafatanyabikorwa mu gukumira ihohoterwa rishingiye ku gitsina bavuga ko bagiye kwereka abantu amategeko abahana mu gihe bahohoteye abana

Avuga ko muri aba bana 210 bamaze gusubizwa ku mashuri asanzwe bahabwa n’ibikoresho bazifashisha mu gihe abandi 165 bigishwa imyuga by’igihe gito kugira ngo bazigirire akamaro ndetse banabashe kurera abo babyaye.

Muri iyi minsi 16 yo kurwanya ihohoterwa ngo babashije gukebura ababyeyi kumenya ishingano zabo bakita ku bana babo hagamijwe kubarinda ihohoterwa.

Yagize ati “Ababyeyi twabasabye kugira igitsure ku mwana atari ukumukubita cyangwa kumuhohotera bakikuramo imvugo ko Leta yababujije guhana abana kuko atari ukuri dore Leta itababuza gukurikirana ababo no kumenya igihe batahira n’ibindi bintu abana babamo bishobora kubatera ihohoterwa bakabikumira hakiri kare.”

Ikindi ababyeyi n’abarezi basabwe gukurikirana inzira zose abana banyuramo bataha kuko nazo zishobora kubaviramo ihohoterwa.

Avuga ko kuba imibare y’abana bahohoterwa yiyongera, ngo si uko aribwo noneho hahoterwa benshi ahubwo ngo ni uko abana n’ababyeyi benshi batagihishira ihohoterwa ryabaye.

Uwimana Marceline avuga ko kuba imibare y’abahohoterwa yiyongera biterwa n’uko abahishira ihohotera bagabanutse

Ubu bukangurambaga bw’iminsi 16 bwo kurwanya ihohoterwa rishingiye ku gitsina, Akarere ka Gatsibo kabufatanyijemo n’umuryango utari uwa Leta wita ku burenganzira bw’umukobwa n’umugore, Empower Rwanda.

Umuyobozi w’uyu muryango, Kabatesi Oliver, avuga ko iyi minsi iberetse ko hakiri abagihishira ihohotera kubera ubwumvikane bagirana n’ababahohoteye bushingiye kukubashukisha imfashanyo zidashinga.

Avuga ko bagiye gushyira imbaraga mu kwigisha imiryango ko guhishira ihohotera ari ubufatanyacyaha kandi bihanwa n’amategeko.

Ati “Tugiye gushyira imbaraga mu kwigisha imiryango cyane itegeko rirengera umwana kuko iyo utamufashije kuva mu kaga uba wirengagije inshingano zawe ndetse wanamutererana akajya hanze kwirwanaho uba umuvukije uburenganzira bwo gukurira mu muryango no kurerwa n’ababyeyi.”

Nanone ariko asaba imiryango kutabona isambanywa ry’umwana nk’ibisanzwe no kubagaragariza ko aribo ba nyirabayazana mu ihohoterwa ryabo bigatuma abana bahohotewe baceceka n’ababasambanyije ntibafatwe.

Bamwe mu bana basambanyijwe bagaterwa inda, bavuga ko zimwe mu mpamvu zituma batavuga ababahohoteye ari uko rimwe na rimwe baba ari abantu bakomeye bakabatera ubwoba ndetse n’ababemerera ubufasha.

Bamwe mu bana basambanywa batunga agatoki abantu bakomeye babashyira iterabwoba ryo kutabavuga

Bamwe mu babahohotera babashyiraho iterabwoba harimo abayobozi mu nzego bwite za Leta, abayobozi b’amadini n’amatorero, abarimu ndetse n’abandi bantu bafite amikoro.

Ariko nanone bifuza ko ababyeyi bahabwa amakuru ku buzima bw’imyororokere bityo nabo bakayasangiza abana babo aho kubiharira mwarimu.

Umwe ati “Hari ababyeyi bamwe badafite amakuru ku buzima bw’imyororokere kuko bamwe mu bana bahohoterwa kubera kutamenya ayo makuru n’abayazi bakayamenya mu buryo butari bwo kandi ku ishuri siho umuntu yayakura honyine.”

Bifuza ko abana bose bakangurirwa kujya mu ishuri kuko babona ibyo bahugiramo ntibahure n’ibishuko.

Ukwezi kugiye gushira umwana watoraguwe atarabona ababyeyi be

Saa kumi n’igice z’igitondo kuwa 15 Ugushyingo 2024, nibwo Nyirahakizimana Annualite, wajyaga gushakisha akazi, mu Kagari ka Ndama, Umudugudu wa Rwabiharamba, yabonye umwana mu muferege uri haruguru y’umurima w’amasaka amukuramo atangira gushakisha ababyeyi be.

Avuga ko ari abatuye mu Mudugudu watujwemo abimuwe mu cyanya cy’ubuhinzi bugezweho cya Gabiro Agri Business Hub ndetse n’abakoraga mu murima w’amasaka hafi aho bose bahakanye ko batamuzi ahitamo kumujyana iwe.

Uyu mubyeyi usanzwe ufite umwana umwe avuga ko n’ubwo atunzwe no gushakisha ariko umwana amwishimiye kandi azamurera nk’uwe.

Yagize ati “Ubundi mbyaye kabiri ariko umwe yaratashye izindi gahunda ni iz’Imana, ubwo ni ukuvuga ngo babaye babiri. N’ubwo nta bushobozi mfite ariko Imana izabimfashemo nzamurera nk’uko narera uwo nakuye mu nda yanjye.”

Umukuru w’Umudugudu wa Akayange ka mbere, Ntagwabira Aloys, avuga ko uyu mwana agitoragurwa babimenyeshejwe ndetse bagerageza kwifashisha ubuyobozi bubisumbuyeho ngo abone ababyeyi be bwite ariko bikaba bitarakunda.

Avuga ko nk’abaturage bagerageje gufasha uwamutoraguye kugira ngo abashe kumubonera iby’ibanze bituma ubuzima bwe burushaho kuba bwiza ndetse ko hari uwamaze no kumutangira ubwisungane mu kwivuza (Mutuelle de santé).

Ati “Akimara kumutoragura yarabitumenyesheje duhamagara abaturage ndetse bamuha ubufasha bw’ibiribwa, hari uwemeye kumuha 3,000frs bya Mituweli ndetse n’uwemeye litiro y’amata ya buri munsi. Ni uko abaturage twamufashije uko natwe twishoboye.”

Avuga ko ikindi bazakomeza gukora ari ukugaragaza ikibazo cye mu buyobozi kugira ngo haramutse hari ahaboneka inkunga ayihabwe, umwana arusheho kugira ubuzima bwiza.

Umuyobozi w’Akarere ka Nyagatare wungirije ushinzwe Imibereho y’abaturage, Murekatete Juliet, mu butumwa bugufi yahaye umunyamakuru wa Kigali Today, yanenze umubyeyi gito wijishuye umwana akamuta ariko agashima umutima wa kibyeyi ukomeje kuranga umubyeyi wamutoraguye.

Visi Meya yagize ati, "Ubuyobozi bugiye kwita ku buzima bw umwana ndetse no kumushakira umuryango."

Avuga ko nk’ubuyobozi bagiye gufasha uyu mubyeyi kubona uko yashyira uwo mwana ku cyiciro cye kugira ngo ajye abasha kumuvuza mu gihe ababyeyi be bwite bataraboneka.

Ikimoteri cya Nyagatare cyubatse mu Mudugudu wa Mirama ya mbere

Ikimoteri cy’Akarere ka Nyagatare cyubatswe mu mwaka wa 2015 gitangira kwakira imyanda mu mwaka wa 2017.

Ni ikimoteri cyagombaga kwakira ibishingwe bibora n’ibitabora bigatandukanywa. Ibibora byagombaga kubyazwa ifumbire mborera naho ibitabora bigashakirwa isoko ku bashobora kubibyazamo ibindi.

Igice cya kabiri cyari kigizwe n’uruganda rwakira umwanda uturuka mu misarane ugatunganywa hakavamo ifumbire mborera.

Uyu munsi kirakoreshwa na Kompanyi yitwa AGRUNI, imaze imyaka ibiri. Bamwe mu bakozi bayikorera akazi ko kuvangura imyanda bavuga ko bamaze imezi batabona umushahara.

Umwe ati “Twarahagaze kuva kuwa mbere w’iki cyumweru kubera kudahembwa, amezi atatu arashize. Uko tubajije batubwira ko ejo tuyabona ariko n’ubu ntayo kandi mpamaze imyaka myinshi kuva uruganda rwatangira gukora.”

Mugenzi we nawe utifuza kuvuga amazina ye, avuga ko impamvu bahagaritse akazi ari ukubera ko bafitiwe ikirarane cy’ukwezi kwa mbere k’umwaka ushize n’ukwezi kwa cumi n’ukwa kumi na kumwe uyu mwaka ku buryo guhagarika akazi babitewe no kubura icyizere cyo kubona umushahara.

Yagize ati “Ushinzwe ibidukikije ku Karere twarabimubwiye arabizi. Ukwezi kwa mbere umwaka ushize ntayo baduhaye, igihe cyakurikiyeho twarayabonye ariko tubonye bataduha ay’umwaka ushize duhitamo guhagarika akazi kugeza baduhembye.”

Abakozi bavangura imyanda nibo bafite ikibazo cyo kudahembwa

Aba bakozi bavuga ko kudakomeza akazi atari ukwigaragambya ahubwo babitewe no kujya gushaka ibitunga imiryango yabo.

Umwe ati “Si ukwigaragambya ahubwo nawe bino bihe urabireba, twagiye gushaka ibitunga abana. Wowe se wakora icyo gihe cyose udahembwa ukabaho, ugatunga n’umuryango?”

Umuyobozi wa Kompanyi, AGRUNI, ikoresha ikomoteri cy’Akarere ka Nyagatare, Jean Paul Ngezishiraniro, avuga ko abakozi bishyuza atari aba Kompanyi ayobora cyakora niba bahari bazaza kwishyuza bagahembwa.

Yagize ati “Ikibazo ntabwo nkizi ubwo bashobora kuba atari abacu ariko, Kompanyi ikoresha ikimoteri ni iyacu ariko abakozi barahembwe, abatarahembwe ubabwire baze ku biro tubarebe, tubabaze. Abavuga ko bamaze amezi atatu badahembwa jye simbazi babwire baze ku biro nushaka ubaherekeze.”

Nyamara, umwe mu bakozi be ushinzwe umurimo, mu mvugo ivuguruzanya yabwiye umunyamakuru wa Kigali Today, ko abantu bamaranye imyaka bakorana nta gahunda yo kubambura ihari n’ubwo yabanje guhakana ko nta deni bafitiye uwo ariwe wese.

Yagize ati “Bakubwiye ko batahembwe? Urumva igihe tumaze dukorana dufite gahunda yo kubambura? Turemera no kubishyura. Iyo umuntu yemera ko yishyura, akemera ko yakoze, ibigoye ni ibiki?”

Ikibazo gikomeye aba baturage bishyuza, nta masezerano y’akazi bagira nyamara bamaze imyaka bakora, byongeye bahemberwa mu ntoki.

Abajijwe iki kibazo cyo kutagira amasezerano y’akazi kuri bamwe mu bakozi bakorera ibigo bitandukanye mu Karere, umukozi ushinzwe umurimo mu Karere ka Nyagatare, Gerald Nsabimana, yahise akuraho telefone ye igendanwa.

Ahatunganyizwa umwanda ukavamo ifumbire mborera

Umukozi w’Akarere ka Nyagatare ushinzwe ibidukiikije n’umutungo kamere, Murenzi Samuel, avuga ko iki kibazo cyo kwambura abakozi atari akizi ariko baza kuvugana na rwiyemezamirimo kigakemuka.

Ikindi ariko ngo rwiyemezamirimo uhawe isoko asabwa guha abakozi akoresha amasezerano y’akazi ndetse n’ibikoresho by’ubwirinzi gusa umushahara wo ngo uburyo utangwamo ni ubwumvikane bw’umukozi n’umukoresha.

Ati “Ubundi amabwiriza dusaba abakoresha n’abakozi kuba hari amasezerano y’akazi, atahaba abakozi bakabyanga. Ikindi rwiyemezamirimo agomba kubaha ibikoresho by’ubwirinzi bitewe n’akazi abakoresha naho uburyo bwo guhemba nibo babyumvikanaho mu masezerano bagiranye.”

Uretse kuba aba bakozi bavuga ko bambuwe amezi atatu na nyiri Kompanyi AGRUNI, ngo hari n’undi rwiyemezamirimo wabambuye amezi ane hashize imyaka ine witwa Hakizimana Gilbert wayoboraga Kompanyi itunganya imyanda no kubungabunga ibidukikije RPE, wakoreshaga ikimoteri cya Nyagatare ahawe isoko na WASAC.

Inka zizajya zibagwa n’imashini gusa

Avuga ko mu Karere hari hasanzwe andi mabagiro mu Mirenge yose ariko inyama zayatunganyirizwagamo zabaga zitujuje ubuziranenge kubera imiterere yayo.

Avuga ko iri bagiro rije ari igisubizo ku buziranenge bw’inyama ariko nanone rikazaba igisubizo ku nka zagenda zipakiwe mu madoka zijya mu mabagiro atandukanye mu Gihugu.

Ati “Twagiraga andi mabagiro ariko atujuje ibisabwa ku buryo wavuga ko inyama zahatunganyirijwe zujuje ubuziranenge 100%, ari nayo mpamvu hubatswe uru ruganda inyama zikazajya zihava zijyanwa hirya no hino mu Mirenge igize Akarere ariko no hanze y’Akarere.”

Akomeza agira ati “Tugira ibikomera birindwi kandi biba kabiri mu kwezi kandi hagurishwamo inka zitari munsi ya 700 ugasanga inka zipakirwa imodoka zijya hirya no hino mu Gihugu, turashaka rero kuvanaho icyo ahubwo bakajya bapakira inyama inka zose zabagiwe hano.”

Avuga ko ubu imirimo yo kubaka iryo bagiro yarangiye barimo kuganira na ba rwiyemezamirimo bifuza kurikoresha ku buryo mu kwezi kwa mbere umwaka wa 2025 rizatangira gukora.

Umuyobozi wungirije w’ibagiro rya Nyagatare, Kayitare Costa, avuga ko iryo bari basanganywe ritari rimeze neza ku buryo kwizera ubuziranenge bw’inyama zahatunganyirizwaga byari bigoye.

Ibagiro rishya rya Nyagatare rishobora gukuraho ipakirwa ry’inka mu mamodoka

Agira ati “Nta masuku rikoreye kandi rirashaje aho dushyira inyama ni uburyo bwo kwirwanaho ku buryo ubuziranenge bwazo bwari ntabwo rwose. Ikindi ni rito nta bwinyegamburiro ku buryo hari abahitamo kubagira aho babonye.”

Ibagiro rya Nyagatare, ari naryo ryari rihari rinini mu Karere, ku munsi ribagirwamo inka eshanu ariko mu minsi ya weekend zikaba zagera ku 15. Ibagiro rishya rya Nyagatare rifite ubushobozi bwo kubaga inka 200 n’ihene 200 ku munsi ndetse n’ibyuma bikonjesha inyama by’amatungo yose yabazwe rikaba ryaruzuye ritwaye arenga miliyari y’amafaranga y’u Rwanda.

Uretse ibagiro ryuzuye ngo haranatekerezwa kuzubaka uruganda rutunganya impu ku buryo bizorohereza abakora ibijyanye n’impu kuzibonera hafi.

Nubwo bimeze bityo ariko ngo hari intambwe yatewe kuko bavuye kuri 50% mu myaka 10 ishize.

Avuga ko impamvu ari bo bagaragaraho ubwandu cyane bijyanye n’uko batitabira gahunda z’ubwirinzi harimo ikoreshwa ry’agakingirizo ndetse aba ngo bakaba banagaragaraho cyane indwara zandurira mu mibonano mpuzabitsina ndetse bakanagerwaho n’indwara z’ibyorezo nka MPOX.

Yagize ati “Dufite icyiciro kigomba kwitabwaho, imibare nabonye muri iki gitondo ni uko abakora uburaya ari bo bibasiwe cyane na Virusi itera SIDA ku kigero cya 35% ugereranyije na 50% mu myaka 10 ishize.”

Akomeza agira ati “Ibi bijyanye no kudakoresha inzira z’ubwirinzi nko gukoresha agakingirizo ndetse ku buryo ari na bo bagaragaraho indwara zandurira mu mibonano mpuzabitsina ndetse bakagerwaho n’indwara z’ibyorezo nka MPOX.”

Minisitiri Nsanzimana avuga ko ugendeye ku mibare y’abanduye indwara ya MPOX mu Rwanda, umubare munini ari abakomoka mu Karere ka Rubavu ndetse ibimenyetso bikaba bigaragaza ko bihurirana n’urujya n’uruza rw’abantu ku mipaka yinjira mu Gihugu inyuze ku bakora uburaya.

Umwe mu bakora uburaya mu Murenge wa Rwempasha avuga ko kenshi abakiriya yakira cyane cyane urubyiruko baba bifuza ko bakorana imibonano mpuzabitsina idakingiye.

Avuga kandi ko n’abakiriya b’abanyamahanga bashukisha urubyiruko rukora uburaya amafaranga menshi kugira ngo bakore imibonano mpuzabitsina idakingiye.

Yagize ati “Kuba duturiye umupaka na byo byongera ubwandu bitewe n’abanyamahanga duturanye, ntuba uzi uko ahagaze akaza ashukisha amafaranga menshi cyane urubyiruko kugira ngo mukore imibonano mpuzabitsina idakingiye.

Mugenzi we wo mu Murenge wa Rukomo avuga ko iyo abwije ukuri umukiriya ntabyemere amureka ariko nanone akamugira inama yo guhita ajya kwa muganga gufata imiti imurinda kwandura.

Ati “Abakiriya baratandukanye, hari uwo ubwiza ukuri ku buzima bwawe ariko agahatiriza. Iyo bibaye rero nanone umugira inama yo guhita ajya kwa muganga gufata imiti imurinda kwandura kuko natwe dufite uruhare mu kurinda ubwandu bushya.”

Minisiteri y’Ubuzima ivuga ko nubwo umubare w’abandura Virusi itera SIDA ku munsi wavuye ku bantu 25 ukagera ku bantu hafi 10 ariko hakenewe kugira igikorwa kuko abenshi bandura ari urubyiruko ruri hagati y’imyaka 18 na 20.

Ivuga kandi ko ku bantu 100 bapfa ku munsi, bahaba harimo barindwi bazize SIDA.

Mu rwego rwo kugabanya ubwandu bushya, Minisiteri y’Ubuzima yihaye gahunda ko mu mwaka wa 2030 nibura abantu 95% bazaba bazi uko ubuzima bwabo buhagaze kuri Virusi itera SIDA, muri bo 95% bagaragayeho ubwandu bagafata imiti neza ku buryo 95% baramutse bafata imiti, Virusi yaba itakibagaragara mu maraso.

Umukozi w’Umuryango nyarwanda ufasha abafite Virusi itera SIDA (ANSP+), Nizeyimana Jean Marie Vianney, avuga ko iyi ntego izagerwaho kuko n’iy’ubushize y’abantu 90% kuba bazi uko bahagaze ku bijyanye na Virusi itera SIDA yagezweho kandi abantu benshi bakaba batangiye kubyumva.

Avuga ko ariko hakwiye gushyirwa imbaraga mu bakora uburaya kugira ngo batanduza benshi.

Yagize ati “Niba abandi duhagaze kuri 3% abakora uburaya bakaba bari kuri 35% birasaba imbaraga nyinshi cyane cyane ubukangurambaga kuko bakwanduza benshi. Ikindi ariko n’abantu barusheho gufata ingamba zo kwirinda ariko no mu gihe bacitswe bihutire ku bigo Nderabuzima bafate imiti ituma batandura.”

Abashoramari bizezwa ko Nyagatare ari ahantu bashora bakunguka

Minisitiri w’Ubucuruzi n’Inganda, Prudence Sebahizi, avuga ko icyerekezo 2050, buri wese yifuza kugira ibyo ageraho ku buryo hifuzwa ko mu mwaka wa 2035, u Rwanda rwaba rwinjiye mu Bihugu bifite umusaruro mbumbe ugereranyije (Upper Middle Income Countries), ku buryo nibura umuturage yaba ashobora kubona Amadolari y’Amerika arenze 5,000 buri mwaka avuye ku 1,000.

Ati “Turifuza ko mu mwaka 2035, u Rwanda rwaba rwinjiye mu Bihugu bifite umusaruro mbumbe ugereranyije ku buryo umuturage abasha kubona mu mufuka we Amadolari y’Amerika arenze 5,000 (arenga miliyoni 6FRW) ku mwaka. Uyu munsi mfashe umutungo w’Igihugu wose tukawugabana buri muntu yaba afite 1,000 cy’Amadolari naho 2050 buri wese akaba abona 12,000 y’Amadolari buri mwaka.”

Avuga ko kugira ngo bigerweho hari ingamba zigomba kugenda zifatwa buri myaka itanu (5). Mu myaka itanu ikurikira ngo biyemeje ko ishoramari ry’abikorera ryikuba kabiri rikava kuri miliyari 2,2 z’Amadolari y’Amerika akagera kuri miliyari 4,6 mu gihe cy’imyaka itanu iri imbere.

Minisitiri Sebahizi avuga ko hakenewe inganda zongerera agaciro umusaruro w’ubuhinzi

Ntabwo ari ibyo gusa kuko biyemeje ko ibyoherezwa mu mahanga nabyo byikuba kabiri bikava kuri miliyari 3,5 z’Amadolari y’Amerika bikagera kuri miliyari 7,3 mu myaka itanu iri imbere.

Buri mwaka kandi ngo hazajya hahangwa imirimo 2,500 ku buryo izagera kuri 1,250,000 by’imirimo mu myaka itanu iri imbere.

Avuga ko n’ubwo hakorwa byinshi mu kuzamura umusaruro haba mu nganda no mu buhinzi ngo ahakiri inyuma ari ukongerera agaciro ibikomoka ku buhinzi no guteza imbere inganda.

Ati “Usanga aho dusigaye inyuma nk’Igihugu, ni ukongerera agaciro ku bikomoka ku buhinzi no guteza imbere inganda kuko ari nazo zongerera agaciro ibikomoka ku buhinzi n’ubworozi.”

Meya w’Akarere ka Nyagatare, avuga ko uwashora imari mu biryo by’amatungo muri aka Karere atahomba

Avuga ko ariyo mpamvu mu Gihugu cyose hashyizweho ibyanya by’inganda 10 hagamijwe kuziteza imbere no korohereza abashoramari kubona aho bakorera.

Umuyobozi w’Akarere ka Nyagatare, Gasana Stephen, avuga ko icyanya cy’inganda cya Nyagatare gifite ubuso bwa hegitari 200 kitaratunganywa ariko hamaze kugeramo inganda eshatu kandi n’abandi babyifuza imiryango ifunguye.

Avuga ko by’umwihariko Nyagatare ari Akarere kashorwamo imari kandi ikunguka cyane mu kubaka inganda zikora ibiryo by’amatungo, kubaka ububiko n’ubuhunikiro bw’imyaka, ibagiro rya kijyambere, inyubako z’ubucuruzi no mu bikorwa by’ubukerarugendo.

Umurambo w’umukecuru wo mu Karere ka Gatsibo, wabonetse mu cyuzi cyuhira umuceri

Umunyamabanga nshingwabikorwa w’Umurenge wa Remera, Urujeni Consolee, avuga ko uyu murambo wabonetse saa moya z’igitondo kuri uyu wa Gatandatu tariki ya 30 Ugushyingo 2024, ubonywe n’abaturage.

Avuga ko ubusanzwe uyu Nyirandagije, yari amaze iminsi yaragiye gusura abavandimwe be mu Murenge wa Gitoki uhana imbibe n’uwa Remera.

Abaturage bacyumva ko hari umurambo wabonetse mu cyuzi cya Kibira mu Murenge wa Rugarama na wo uhana imbibe n’uwa Remera, bihutiye kujya kureba basanga n’uw’uyu mukecuru wari waragiye gusura abavandimwe be.

Yagize ati “Amakuru y’uko yarahomye bayamenye uyu munsi nyuma y’uko mu Murenge duturanye abaturage bagaragaje ko babonye umurambo mu cyuzi bakurikiranye basanga n’uwo mukecuru wabo wari waragiye gusura abavandimwe be Gitoki.”

Umurenge wa Rugarama ngo wahise ujyana umurambo ku bitaro bya Kiziguro kugira ngo ukorerwe isuzumwa ariko n’abo mu muryango we bakaba bakurikiranye ku buryo bamaze kuwugeza mu rugo rwe ndetse bakaba barimo kwitegura gushyingura.

Urujeni avuga ko n’ubwo bitakwemeza neza ariko ngo amakuru abaturage batanga y’uko yaba yaratwawe n’umuvu w’amazi y’imvura nayo yahabwa ishingiro kuko ngo kariya gace hamaze iminsi hagwamo imvura nyinshi kandi kakaba gaturukamo imivu myinshi kubera imisozi.

Ati “Hagati ya Remera na Gitoki ni agace k’imisozi miremire, birashoboka ko imvura ishobora kuba yaraguye ari mu nzira ataha ntiyugame, muri iyi minsi haragwa imvura nyinshi ifite imbaraga birashoboka ko ari umuvu wamutembanye.”

Yihanganishije umuryango wagize ibyago byo kubura uwabo ariko anagira inama abaturage kwirinda kugenda mu mvura no kunyura mu mivu y’amazi kuko bishobora kubatera impanuka.

Abahinzi barifuza imashini yumisha umusaruro w’ibigori

Ngabirano Wilberforce, umuyobozi w’iyi Koperative avuga ko bafite ikibazo cyo gufata neza umusaruro wabo w’ibigori urenga toni 5,000 ku gihembwe cy’ihinga kuko iyo basaruye mu gihe cy’imvura bifashisha amahema kuko ubwanikiro bafite ari buto.

By’umwihariko igihembwe cy’ihinga gishize ngo bahombye nibura 35% by’umusaruro wari wabonetse kubera gusarura mu mvura ndetse n’isoko ry’umusaruro w’ibigori rigatinda kuboneka.

Mu rwego rwo kugabanya igihombo ngo ubu bahinze mu buryo butandukanye ku buryo bamwe bateye mbere abandi bagatera nyuma kugira imyaka imwe izere indi yavuye mu bwanikiro.

Avuga ko ku bwanikiro 58 bafite bukoreshwa gusa n’abahinzi bari munsi ya 15%.

Yifuza ko inzego zireberera ubuhinzi zabafasha bakabona nibura imashini yumisha toni 50 ku isaha kuko byabafasha kugabanya igihombo.

Yagize ati “Dufite hangari 58 kandi abantu babiri barazuza bivuze ko ubuhari bukoreshwa nibura n’abahinzi bangana na 15%. Twifuzaga ko batubonera imashini yumisha umusaruro nibura toni 50 mu isaha byafasha mu kubungabunga umusaruro.”

Umuyobozi w’Akarere ka Nyagatare, Gasana Stephen, avuga ko ikibazo cy’ubwanikiro muri Koperative KABOKU, gihari ariko ku bufatanye n’Akarere hazashakwa igisubizo, ubuhasanzwe bukagurwa kuko umusaruro wabaye mwinshi.

Ikindi ariko ngo hari na gahunda ngari yo kubaka ubwanikiro ahantu hazajya hahurizwa umusaruro w’abahinzi banini ndetse na za Koperative.

Ati “KABOKU, abahinzi bamwe bageze kuri Toni icyenda kuri hegitari bavuye kuri ebyiri ku bufatanye n’ubuyobozi bwa Koperative ni ukwagura ariko dufite gahunda ngari yo kubaka ubwanikiro ahantu hahurizwa umusaruro w’abahinzi banini na za Koperative.”

Yasabye ariko abahinzi banini n’Amakoperative na bo kwishakamo ibisubizo bakiyubakira ubwanikiro mu gihe Akarere katarabona ubushobozi bwo kubububakira.

Koperative KABOKU, igizwe n’abahinzi 1,087 bahinga ku buso bwa hegitari 900 harimo 842 zuhirwa.

Mu gihembwe cy’ihinga gishize, Akarere ka Nyagatare kabonye umusaruro w’ibigori ungana na Toni 132,305, kugeza ubu umurumbuko kuri hegitari ukaba ugeze kuri toni eshanu kandi hakaba hifuzwa ko wakwiyongera.

BK igiye gutangira guha aborozi inguzanyo zitagira ingwate

Yabitangaje kuri uyu wa Gatatu tariki ya 27 Ugushyingo 2024, mu bukangurambaga bwa Kungahara na BK, uyu munsi bakaba bahuye n’amakoperative y’abahinzi n’aborozi mu Ntara y’Iburasirazuba.

Hakwiyimana, avuga ko muri iyi gahunda, amakusanyirizo y’amata ahabwa amafaranga yo guhemba aborozi mu gihe uruganda Inyange rugura umukamo wabo rutari rwahemba kandi izi nguzanyo zigatangwa nta ngwate bigafasha aborozi kubona imiti n’imyunyu y’inka zabo.

Umworozi ku giti cye kandi ubu asinyirwa na Koperative agahabwa amafaranga miliyoni eshanu na BK nta ngwate asabwe ndetse akishyura ku nyungu ya 1.5% ku kwezi, akaba yayishyura mu gihe cy’imyaka itatu cyangwa itanu.

Agira ati “Ubu umworozi ku giti cye tugiye kujya tumuha miliyoni eshanu nta ngwate uretse kuba yishingiwe n’ikusanyirizo ry’amata.”

Aborozi bishimiye inguzanyo bagiye guhabwa bifuza ko zakwihutishwa

Umworozi ushaka amafaranga arenze miliyoni eshanu, we asabwa ingwate ariko yaba ari ntoya ugereranyije n’ayo yifuza hakifashishwa ibigo byishingira ingwate kugera kuri 80%.

Kugeza ubu kandi ngo Nyagatare yonyine aborozi bamaze guhabwa miliyari eshatu yo kugura inka zitanga umukamo no kubaka ibiraro.

Aborozi kandi bahabwa n’inguzanyo zo kugeza amazi mu nzuri, kugura ibicuba by’amata, imodoka zitwara umukamo, gutera ubwatsi bw’amatungo n’ibindi byafasha kuzamura ubworozi ku nyungu ya 8%.

Yagize ati “Dufite inguzanyo yaba izo kugura inka z’umukamo, izo kubaka ibiraro bigezweho, kuzana amazi mu nzuri, ayo guhinga ubwatsi bw’amata, ayo kugura ibicuba by’amata n’ibyuma bikonjesha n’ibindi bikoresho bifasha mu bworozi.”

Amakoperative y’abahinzi b’umuceri nabo ngo ubu yemerewe guhabwa miliyoni 50 z’amafaranga y’u Rwanda nta ngwate atanze cyane mu kugura imbuto n’inyongeramusaruro.

Aborozi kandi bahabwa n’inguzanyo zo kugeza amazi mu nzuri

Amakoperative yifuza imodoka zo gutunda umusaruro n’izihinga, kubaka ubwanikiro n’ibindi bikenera amafaranga arenga miliyoni 50, ngo hifashishwa ibigega byishingira ingwate mu gihe izatanzwe ari ntoya ugereranyije n’inguzanyo yifuzwa.

Umukozi wa BK insurance ushinzwe Intara y’Iburasirazuba, Kwizera Emmanuel, avuga ko amakoperative y’abahinzi n’aborozi basanzwe bashinganisha ibikorwa byabo muri BK ibafasha kwishingira ibinyabiziga byabo byifashishwa mu kugemura umusaruro n’umukamo ku giciro gito ugereranyije n’ubundi bwishingizi hagendewe ku gihe kimaze gikoreshwa.

Ati “Umunyamuryango wa Koperative cyangwa w’ikusanyirizo araza tukamuha ubwishingizi, ufite ikinyabiziga kiri munsi y’umwaka umwe kugera kuri itanu yishyura 46,142, kuva ku myaka itandatu kugera ku 10, akishyura 54, naho irengeje icyo gihe ikishyura 62,782 ku mwaka.”

Umworozi ushaka amafaranga arenze miliyoni eshanu, we asabwa ingwate

Umworozi wo mu Murenge wa Karangazi, Munyura John Bosco, avuga ko yishingiye inka ze zose muri BK Insurance, umwaka urangira ntayipfuye, yongeye kuzishingira ngo yahawe ubwishingizi bw’ubuntu ku modoka ye.

Ati “Jye nashinganishije inka zanjye zose umwaka urangira nta nka ipfuye bampemba kumpa ubwishingizi bw’imodoka ya Koperative bw’ubuntu bw’umwaka wose. Ikindi ni uko ubu aborozi bose bamaze gusobanurirwa ubwishingizi bwa moto zabo ku buryo nabo biteguye kubufata vuba aha.”

Muri rusange aborozi bakaba biyemeje kugana BK kugira ngo babone inka z’umukamo ndetse banabone ibikorwa remezo by’ubworozi mu buryo bubahendukiye.

Inkuru bijyanye:

Iburasirazuba: BK yijeje ubufatanye n’abahinzi mu kuzamura umusaruro

Ni ibyatangajwe ku wa Kabiri tariki ya 26 Ugushyingo 2024, mu bukangurambaga bwa ‘Kungahara na Banki ya Kigali’ aho Banki ya Kigali yahuye n’amakoperative y’abahinzi b’ibigori mu Turere tugize Intara y’Iburasirazuba.

Hakwiyimana Theophile avuga ko bafitiye abahinzi inguzanyo z’amezi atandatu n’iz’amezi 12

Umukozi wa Banki ya Kigali mu ishami ry’Ubuhinzi n’Ubworozi ushinzwe Intara y’Iburasirazuba, Hakwiyimana Theophile, avuga ko iri shami rimaze imyaka ibiri rishyizweho ryafashije abahinzi kubona inguzanyo mu gihe gito kandi ku nyungu nkeya.

By’umwihariko muri gahunda ya Kungahara na BK, bazafatanya n’amakoperative y’abahinzi b’ibigori, umuceri, ikawa, ibirayi, icyayi n’ibikomoka ku mata babaha inguzanyo zihuse.

Avuga ko bazafasha amakoperative y’abahinzi n’aborozi, kubona inguzanyo zo guhinga n’igihe cy’ibagara, gukusanya umusaruro no kuwufata neza, ibikoresho byo kuhira n’ibindi, kandi ku nyungu ya 8%.

Yagize ati “Tubafitiye inguzanyo bagiye guhinga cyangwa kubagara, izo gukusanya umusaruro. Hari n’amakoperative akeneye imodoka zo kujyana umusaruro ku isoko, kubona ubuhunikiro bw’imyaka yabo, kubona imodoka zo guhinga, izo ni inguzanyo tubaha zihuse kandi ku nyungu ntoya.”

Umuyobozi wa Koperative KOHIKA y’abahinzi b’ibigori mu Karere ka Nyagatare, Twiringiyimana Jean Chrysostome, avuga ko ubusanzwe bahingaga bakoresha inguzanyo za Banki zisanzwe bakishyura ku nyungu ziri hejuru.

Abahinzi bavuga ko batazongera kurara ihinga kubera kubura ubushobozi

Avuga ko ubwo babonye ababaha inguzanyo ziri ku nyungu ntoya bizabafasha kuzamura ubuhinzi bwabo.

Ati “Serivisi z’imari zari zidutsikamiye kuko kenshi na kenshi dosiye isaba amafaranga yamaraga amezi atatu ariko hano batwijeje ibyumweru bitatu. Ikindi ku bikorwa remezo batwijeje ko twabona ubwanikiro n’ubwumishirizo, urumva ko tubaye inyangamugayo za Banki, twarushaho guteza imbere ubuhinzi bwacu.”

Umuyobozi wa Koperative KOPETIBAJU ihinga ibigori mu Murenge wa Juru Akarere ka Bugesera, Ntaganda Eugene, avuga ko umuhinzi yiryaga akimara cyane cyane mu gihe cyo guhinga no kubona inyongeramusaruro.

Kuba ngo BK yabagiriye icyizere ikemera gukorana na bo ngo bazabona umusaruro ushimishije ndetse banawugurishe bitonze babonye isoko rifatika.

Agira ati “Ugereranyije n’andi mabanki twakoranaga na yo hano harimo agashya kuko bazajya baduha inguzanyo irambye twishyura kabiri mu mwaka. Ibyo bizatuma tubika umusaruro wacu tuwugurishe hamaze kuboneka isoko ryiza.”

BK ivuga kandi ko uretse amakoperative azajya ahabwa inguzanyo abanje kugaragaza ingwate, ngo abakora mu butubuzi b’imbuto bo nta ngwate bazajya basabwa.

Abahinzi bishimiye inguzanyo za BK muri gahunda ya Kungahara na BK ndetse bizeza gutangira kuzaka

Inkuru bijyanye:

Iburasirazuba: BK yatangiye gutanga inguzanyo zitagira ingwate ku borozi

Isoko nyambukiranyamipaka rya Kagitumba

Avuga ko aya masoko nyambukiranyamipaka yubatswe hagamijwe gufasha abaturiye imipaka gukora ubucuruzi bwabo, abandi babone aho bagurisha umusaruro wabo ndetse n’aho bazahahira batambutse umupaka cyane cyane ku badafite ibyangombwa bibemerera kuwambuka.

Avuga ko nubwo isoko rititabiriwe cyane bitavuze ko ritari rikenewe ahubwo hagiye gushakwa rwiyemezamirimo uzafasha kuzana abarikoreramo.

Yagize ati “Isoko ryari rikenewe igisigaye ni ugushaka rwiyemezamirimo uzafasha kuzana abaguzi bazaza muri iryo soko. Isoko iyo rigiye hafi y’umupaka riba rikemuye ibibazo bibiri, icy’Abanyarwanda babona aho bashyira ibicuruzwa byabo n’abahagurira ariko rikemuye n’ikibazo cy’uvuye hakurya y’umupaka ushaka kugira icyo agura mu Rwanda.”

Avuga ko kuba hatari urujya n’uruza rw’abantu benshi bawukoresha ari ikibazo cy’igihe gito kuko niritangira gukora n’abantu bazaza.

Umwe mu bacuruzi, Umwari Chartine, avuga ko iri soko baribonye baribabaye kuko mbere byabasabaga kujya Rwimiyaga cyangwa Matimba guhahirayo.

Ikindi ni uko n’abaturanyi babo bo muri Uganda babasha kugura ibicuruzwa byo mu Rwanda kuko ari hafi yabo.

Bifuza ko bagabanyirizwa imisoro yakwa muri gasutamo kuko byatuma benshi bitabira kuza mu isoko.

Yagize ati “Badufashije bakaba bafungura umupaka mu buryo bworoshye kuko abo mu kindi Gihugu ni bo duturanye abo rero ni na bo twakabaye dukorana cyane, niba ari ikibazo cy’imisoro bakaba bagabanyirizwa birashoboka ko twarushaho gukora cyane.”

Akomeza agira ati “Baratubwira ngo bakabaye baza ariko nko kuba baterura amajerekani 100 akaba yayacisha hariya ku mupaka, imisoro irahenze.”

Bamwe batangiye kurikoreramo

Nikuze Angelique amaze amezi arindwi acururiza mu isoko rya Kagitumba. Avuga ko impamvu isoko rititabiriwe cyane ari uko abakoresha uyu mupaka ari bacye ugereranyije n’ahandi.

Yagize ati “Ntabwo turi benshi ahanini kubera urujya n’uruza rw’abantu bakoresha uyu mupaka. Dufite urujya n’uruza rw’abantu benshi twakora bikagenda.”

Umuyobozi w’isoko nyambukiranyamipaka rya Kagitumba, Rukundo Denis, avuga ko uyu mupaka ufite umwihariko w’uko hari ibicuruzwa bitaremererwa kuhanyura, cyane cyane ibiribwa.

Isoko nyambukiranyamipaka rya Kagitumba, ryuzuye ritwaye Miliyari enye na Miliyoni ijana na mirongo itatu na zirindwi (4,137,000,000 Frw) rikaba rifite ibyumba by’ubucuruzi 56, amacumbi, isoko rito rigizwe n’ibisima 96 n’ahacururizwa imyambaro hakwakira abantu 100, ahafatirwa amafunguro n’ibinyobwa, ibyumba by’ububiko n’ibirimo ibyuma bikonjesha, ahakorera ibigo by’imari ndetse n’ibagiro.

Kuri ubu ibyumba bikorerwamo ubucuruzi ni 26 n’abandi batanu bakorera mu bisima mu buryo bwa buri munsi ariko iki gice kikaba kitabirwa ku wa gatatu umunsi ari wo munsi wagenewe isoko, amacumbi yo akaba harimo gushakwa ibikoresho abakiriya bazifashisha.

Ku wa Gatatu tariki ya 20 Ugushyingo 2024 nibwo Tumusifu John yahuriye na Kazayire Joselyne w’imyaka 48 y’amavuko mu isoko ry’imbuto rya Kayonza, riherereye mu Mudugudu wa Irebero Akagari ka Nyagatovu Umurenge wa Mukarange.

Kazayire wari urimo ataha, yishyuje Tumusifu amafaranga 40,000 yari yaramugurije undi aho kumwishyura atangira kumutuka ibitutsi byinshi, ahita amusagarira amukubita amakofe n’inshyi mu mutwe no mu gatuza harabyimba.

Amashusho yasakaye ku mbuga nkoranyambaga agaragaza umugabo uzwi nka Pasiteri (wambaye ijire) akubita umugore mu buryo bukomeye

Ku wa Gatanu tariki ya 22 Ugushyingo 2024, nibwo Polisi Sitatiyo ya Mukarange, yashyikirije RIB, Kazayire Joselyne, kugira ngo arege uwamukoreye icyaha cyo kumukubita akanamukomeretsa.

Umuvugizi wa Polisi mu Ntara y’Iburasirazuba, SP Hamdun Twizeyimana, avuga ko ihohoterwa rya Kazayire ryamenyekanye nyuma yo kubona amashusho (Video) yafashwe n’umuturage wari uhari.

Avuga ko uwakorewe icyaha yababwiye ko uwamuhohoteye basanzwe baziranye kuko ngo basenganaga mu byumba by’amasengesho dore ko Tumusifu yahoze ari na Pasiteri, gusa muri iyi minsi akaba yakoraga muri kompanyi ya Trinity ku modoka zitwara abagenzi zijya muri Uganda.

Nyuma yo kumukubita, uregwa ari we Tumusifu John uzwi ku izina rya Pasiteri yahise atoroka, gusa ku mugoroba wo ku wa Gatanu tariki ya 22 Ugushyingo 2024, afatirwa muri gare y’Akarere ka Ngoma.

RIB yakiriye ikirego ndetse urega (Kazayire Joselyne) arabazwa anoherezwa ku bitaro bya Gahini kugira ngo avurwe.

Uregwa (Tumusifu John) na we yagejejwe kuri Polisi Sitasiyo ya Mukarange kugira ngo yisobanure ku cyaha ashinjwa.

Polisi y’u Rwanda yibutsa abaturarwanda muri rusange ko igihe cyose abantu hari icyo batumvikanaho bakwiye kugana inzego zibifitiye ububasha zikabafasha ariko ikanibutsa abantu kutarebera urugomo, nk’uko SP Hamdun Twizeyimana, yabigarutseho.

Yagize ati “Igihe hari icyo abantu batumvikanaho ntabwo gukubita no gukomeretsa ari cyo gisubizo ahubwo bakwiye kugana inzego zibifite mu nshingano zikabakiranura. Tuributsa buri muturarwanda kutarebera urugomo rukorwa ahubwo bakwiye kubagira inama cyangwa bakabakiranura aho gushungera kandi bagatanga amakuru yihuse.”

SP Hamdun Twizeyimana yibutsa ko gukubita no gukomeretsa ari icyaha gihanwa n’amategeko, bityo abantu ko bakwiye kubyirinda. Yibutsa nanone ko Polisi n’abafatanyabikorwa bayo batazihanganira na rimwe uhungabanya ituze n’ umudendezo bya rubanda.

Mukayiranga avuga ko amaze imyaka itanu yiruka ku cyangombwa cy’ubutaka yaguze atabanje kumenya inzitizi bufite

Abivuze mu gihe bamwe mu baturage b’Umudugudu wa Mirama bavuga ko bamaze igihe basiragira ku byangombwa by’ubutaka baguze.

Avuga ko umuntu wese ushaka kugura ubutaka akurikiza inzira ziteganywa na Leta kandi nta kiguzi bisaba aho kwihererana ubwabo bakagura batazi niba n’ibyo bagura bishobora kuba bifite izindi nzitizi.

Ati “Hari inzira ziteganywa na Leta mwe kwihererana hariya ngo mugure uko mubonye. Mwegere ubuyobozi bubarebere ko nta makimbirane, barebe ko bwandukuwe ku muntu, barebe ko nta makimbirane arimo, barebe ko nta kibazo kirimo, babasinyire amasezerano kandi nta kiguzi gitangwa.”

Mukayiranga Jeannette, yaguze ubutaka ndetse abwubakamo n’inzu ariko uwo babuguze akaba yaramuhaye akapapuro kemeza ko ari ubwe gusa aho atangiriye gushaka icyangombwa cyabwo bimubera ingorabahizi.

Yagize ati “Naguze ubutaka na Munyambabazi ampa akajeto, mu gushaka icyangombwa cyabwo cyasohotse mu mazina ya Munyambabazi n’umugore we witabye Imana. Maze imyaka itanu mbyirukaho, ubu sinahagurisha, ntacyo nahakorera no kuharyama samba ntuje kuko hatanyanditseho.”

Umukozi w’Umurenge wa Nyagatare ushinzwe serivisi z’Ubutaka, Emerthe Murekatete, avuga ko icyangombwa cya burundu cy’Ubutaka kuba cyarasohotse mu mazina y’uwo babuguze n’umugore we kandi yarahagurishije nta kosa ririmo kuko hari hasanzwe hatagifite.

Avuga ko kugira ngo gihindurwe mu mazina y’uwahaguze ariwe Mukayiranga, bisaba ko hagaragwazwa urupapuro rw’ubushyingirwe rw’uwamugurishije n’umugore we akabona uko akorera uwo yagurishije ihererekanya ry’ubutaka.

Agira ati “Kugira ngo ubutaka buve kuri Munyambabazi n’umugore we bujye kuri Mukayiranga hari ibisabwa. Byagombaga guca mu izungura, Munyambabazi yaba yarasezeranye n’umugore we ivangamutungo risesuye, akabanza akajya ku cyangombwa 100% akabona gukorera Mukayiranga ihererekanya ry’ubutaka.”

Akomeza agira ati “Ariko icyabuze ni urupapuro rw’ishyingirwa (Acte de marriage) rugaragaza ko basezeranye ivangamutungo risesuye.”

Cyakora ariko ngo hari itegeko rishya ryasohotse muri Kanama 2024 rishobora gufasha Mukayiranga kubona icyangombwa cy’ubutaka, binyuze mu batangabuhamya bo ku ruhande rw’uwagurishije bemeza ko umutungo yagurishije utarengeje kimwe cya kabiri yari afatanyije na nyakwigendera.

Ati “Niba umupfakazi agiye kugurisha uyu mutungo aazana abantu bane bemeza ko umutungo agiye kugurisha utarengeje kimwe cya kabiri cy’umutungo yari afatanyije na nyakwigendera bikemezwa n’umunyamabanga nshingwabikorwa, dushingire kuri ibyo ubutaka tubukure kuri Munyambabazi tubwandike kuri Mukayiranga.”

Abaturage ba Mirama kandi bavuga ko bafite ikibazo cy’ibibanza byabo byanditswe kuri Leta, ubuyobozi bukavuga ko n’ubwo ari uburangare bwabo, bakwiye kwihutira kugana serivisi z’ubutaka icyo kibazo kigakemurwa.

Umunyamabanga nshingwabikorwa w’Akarere ka Nyagatare, Hategikimana Fred, yijeje abaturage ba Mirama ko umwaka utaha w’ingengo y’imari bazabona kaburimbo iriho n’amatara

Ibi bikorwaremezo ni bimwe byari byifujwe n’abaturage muri gahunda y’igenamigambi, imihigo n’ingengo y’imari 2024-2025.

Umunyamabanga nshingwabikorwa w’Akarere ka Nyagatare, Hategikimana Fred, avuga ko uyu mwaka w’ingengo y’imari muri rusange mu Karere kose hakiriwe ibyifuzo by’abaturage 507 by’ibikorwa bifuza ko bakorererwa kugeza ubu 291 bikaba bimaze gushyirwa mu bikorwa, ibisigaye bikaba ari byo bigikorwa.

By’umwihariko mu Murenge wa Nyagatare ku byifuzo 38 byatanzwe, 19 bimaze gukorwa.
Mu byifujwe n’abaturage b’Imidugudu ya Mirama ya mbere n’iya kabiri, harimo ikorwa ry’umuhanda wa kaburimbo ureshya na kilometero 3.7, ivuriro ry’ibanze, amasoko mato ndetse n’irerero, mu bitarabonewe ingengo y’imari ni irerero ndetse n’isoko rito rya Mirama ya kabiri, igice cy’umuhanda wa kaburimbo uva Mirama ya mbere ujya mu ya kabiri n’ikibuga cy’umupira w’amaguru bizakorwa umwaka utaha w’ingengo y’imari.

Hategikimana, avuga ko ibyabonewe ingengo y’imari byose batangiye gusinyana amasezerano na ba rwiyemezamirimo ku buryo uyu mwaka w’ingengo y’imari uzarangira bimwe byarangiye uretse umuhanda wa kaburimbo w’ibirometero 2.5 ushamikiye kuwa Nyagatare-Gicumbi uzarangira muri Kanama 2025.

Yagize ati “ Isoko rito n’ivuriro ry’ibanze bifuje umwaka w’ingengo y’imari ushize, bizagera muri Kamena byamaze kubakwa ndetse n’umuhanda wa kaburimbo w’ibirometero 2.5 turagana ku musozo wo gusinya amasezerano yo kuwubaka ku buryo muri Kanama 2025 uzaba wamaze kubakwa 100%.”

Umuyobozi w’Umudugudu wa Mirama ya kabiri, Nsengiyumva Theodor, yashimiye ubuyobozi bw’Akarere kuba ibyifuzo byabo bigiye gushyirwa mu bikorwa by’umwihariko umuhanda wa kaburimbo bari bamaze igihe basaba.

Yagize ati “Turashima kuba ingengo y’imari yabonetse itagiye mu yindi Midugudu hakagira iyerekera iwacu. Ngira ngo uyu wari umwaka wa gatatu twifuza uyu muhanda wa kaburimbo none uyu mwaka wa 2024 ubaye amateka. Ubu ingabo zakomerekeye ku rugamba rwo kubohora Igihugu zitakigira amaguru zigiye kujya zigenda zitekanye zitagwa mu binogo zicaniwe amatara ku muhanda.”

Mu bindi abaturage b’Imidugudu ya Mirama ya mbere n’iya kabiri bifuje ko bakorerwa mu mwaka w’ingengo y’imari 2025-2026, harimo guhabwa ishuri ryisumbuye kuko abana babo bashoje abanza bagorwa no kujya kwiga ahandi biga bataha, umuhanda wa kaburimbo ujya ku ibagiro rya kijyambere ry’Akarere, rigore itwara amazi mu Mudugudu wa Mirama ya kabiri by’umwihariko mu gace katujwemo abamugariye ku rugamba rwo kubohora Igihugu n’ibindi.

Avuga ko mu mezi atatu ashize hari ingero z’ubwicanyi bwibasira abarokotse Jenoside yakorewe Abatutsi kandi bamwe mu babikora bakaba ari abagize uruhare muri Jenoside barangije ibihano cyangwa abo mu miryango yabo.

Yagize ati “N’ejobundi hari umukecuru biciye Rukumberi bamukata umutwe bamuhamba mu ngarani iwe. Mu kwa munani twagize izindi ngero eshatu, aho abacitse ku icumu babiri (2) biciwe mu Karere ka Nyaruguru, undi mu Karere ka Karongi ndetse na Ruhango.”

Mu nteko rusange ya Unity Club, Minisitiri Bizimana, yavuze ko ibi bigaragaza ko hakiri ibisigisigi by’irondabwoko n’ingengabitekerezo ya Jenoside bikwiye kurandurwa burundu.
Avuga ko imyumvire idahwitse igira uruhare mu kudindiza Ubumwe, Ubudaheranwa, Iterambere n’Imibanire y’abanyarwanda.

Mu nzego nzego zose ngo hari abantu bagifite imyumvire idashaka guhinduka itsimbaraye ku mateka y’imitegekere y’Igihugu ku butegetsi bwa Repubulika ya mbere n’iya kabiri.
Hari ngo abakibona kandi bashyigikiye irondabwoko n’ironda-Karere byaranze ubutegetsi bwa Repubulika ya mbere n’iya kabiri.

Ibi ngo byatumye bamwe batinda kwakira impinduka zazanywe na RPF Inkotanyi bakarangwa no kutagira umwete n’umurava wo gukora ibisanzwe ndetse n’abayobozi bataragira imyumvire mpinduramatwara kandi aribo bari ku isonga mu guhindura abaturage no kubaganisha ku iterambere.

Mu bindi bibangamiye Ubumwe n’Ubudaheranwa by’abanyarwanda harimo kuba abanyamadini n’amatorero bigisha irondabwoko n’ubwambuzi bushukana babizeza ibitangaza n’ijuru.

Hari kandi gupfobya no guhakana Jenoside yakorewe Abatutsi no gusebya ubuyobozi bagamije kubwangisha abaturage.

Bamwe mu bahamwe n’icyaha cya Jenoside yakorewe Abatutsi barangije ibihano batarakosoka ngo bumve uruhare rwabo mu kubaka umuryango nyarwanda.

Cyakora, Minisitiri Bizimana, yavuze ko n’ubwo hari abarokotse Jenoside bakicwa bidakwiye kugira uwo bitera ubwaboba kuko mu myaka ine ishize kuva 2020 kugera 2024, ibyaha byakurikiranywe na RIB bijyanye n’ingengabitekerezo ya Jenoside byagabanutseho 14%.

Avuga ko iri gabanuka rishimishije kandi ritanga ikizere cy’ejo hazaza cyerekana cyane cyane ko urubyiruko rushyize imbere indangagaciro y’Ubumwe, kubana no kubahana.
Yasabye ko gushyira hamwe abantu bagahindura imyumvire mu mikorere bihereye ku bayobozi n’abakozi ba Leta, imiryango itari iya Leta, amadini n’imiryango ishingiye ku myemerere.

Yasabye kandi gukomeza gahunda z’igenamigambi n’impinduramatwara zo kurema mu munyarwanda imyumvire iganisha ku kwigirira ikizere.

Hari kandi ikifuzo cyo gushyiraho gahunda ihamye yo gusubiza mu buzima busanzwe abafungwa barangije ibihano ku byaha bya Jenoside yakorewe Abatutsi no gutegura umuryango nyarwanda kubakira.

Gukangurira ababyeyi n’umuryango nyarwanda kurushaho kwimakaza indangagaciro z’umuco nyarwanda ndetse no kubwiza ukuri urubyiruko amateka y’u Rwanda.

Iyo ingurube zigiriwe isuku ikiraro cyazo nta munuko uvamo

Rubayiza Sebastien, urugo rwe n’aho akorera ubucuruzi bw’ibinyobwa, hazengurutswe n’ubworozi bw’ingurube ku buryo amasaha yo gufata amafunguro bimugora kubera umunuko uturuka mu biraro byazo ndetse n’urusaku rwazo.

Ati “Natuye hano hanyuma abaturanyi uko bagiye baza batangiye gukora ubworozi bw’ingurube, mbangamiwe cyane n’umunuko w’izi ngurube ndetse n’urusaku rwazo iyo ziri kurya. Iyo mvura yaguye ntushobora kurya kuki baciye amatungo kubana n’abantu ariko tukabana n’ingurube zidakorerwa isuku.”

Bizimungu Abdallahtif, haruguru y’urugo rwe hari ikiraro cy’ingurube, avuga ko ingurube zidakwiye kubana n’abantu bityo zikwiye kubakirwa ahitaruye ingo z’abaturage kuko umunuko uturuka mu biraro byazo usigaye ubasanga no mu buriri.

Iyi nzu y’ubucuruzi yegeranye n’ibiraro by’ingurube

Yagize ati “Ingurube ntizikwiriye kuba hafi y’abantu kuko zigira umwanda cyane, umunuko iyo waje ntawurya ndetse bigeze n’aho usigaye udusanga no mu buriri. Bishoboka bakazubakiye ahitaruye ingo abantu bakagira amahoro.”

Cyuzuzo Aria, avuga ko we yahisemo kwishyira mu mutuzo kuko atahora aburana n’abaturanyi boroye ingurube ariko ubundi bimubangamiye cyane.

Agira ati “Turiho ntakundi none se wahora uburana n’umuturanyi? Yakeka ko umwanga. Nahisemo kwituriza nkiha amahoro ariko ubundi turabangamiwe cyane.”

Twashatse kuvugana na bamwe mu bakora ubworozi bw’ingurube muri aka gace, ariko abo twagerageje bavuze ko batagira icyo babivugaho kandi ari uburenganzira bwabo gukora ubworozi nubwo badahakana ko bushobora kuba bubangamiye abaturanyi.

Umuyobozi wa RAB Sitasiyo ya Nyagatare, Kayumba John, avuga ko amatungo yose abana n’abantu gusa ingurube zikagira ikibazo cy’uko aho umwanda wazo unuka.

Ingurube zororerwa hagati y’ingo z’abaturage

N’ubwo bimeze gutyo ariko avuga ko ingurube atari itungo rigira umwanda ahubwo uzitunze ariwe uba ugira umwanda kuko ngo iyo zitojwe isuku nazo ziyigira.

Ati “Ingurube ni nk’andi matungo yabana n’abantu ariko ikibazo cyazo ni uko umwanda wazo uza unuka gusa buriya sizo zigira umwanda ahubwo uba ufitwe n’uzoroye kuko iyo uzitoje isuku nazo zirayigira zikaba ahantu ku buryo abaturanye nazo batamenya ko zihaba.”

Abaturage babangamiwe n’umunuko wazo bifuza ubutaka bwakoreshwa icyo bwagenewe, abahafite ubworozi bw’ingurube bakabwimurira ahagenewe ubworozi aho kororera mu butaka bwagenewe guturwa.

Urupfu rwa Nyakwigendera rwamenyekanye mu gitondo cyo ku wa Gatanu tariki ya 15 Ugushyingo nyuma y’uko bamwe mu baturanyi bamushakishije bakamubura.

Umuyobozi wa IBUKA mu Karere ka Ngoma, Biseruka Omar, avuga ko ubusanzwe uyu mubyeyi yari atuye mu Mudugudu wa Akabungo, Akagari ka Rubago, Umurenge wa Rukumberi, yari asanzwe abana n’umwana muto wigaga.

Abamwishe ngo babikoze mu masaha y’amanywa hanyuma bamujugunya mu kimoteri barenzaho igitaka umutwe barawutwara, kugeza kuri uyu wa Gatandatu ukaba wari utaraboneka.

Nyuma yo kutamubona, abaturanyi bakomeje kumushakisha, babona ikimoteri kirasibye, baba ari ho bamushakira, basangamo umubiri we.

Biseruka ati “Abamwishe babikoze hagati ya saa saba na saa munani z’amanywa bamujugunya mu kimoteri mu rugo rwe bamukuraho umutwe. Aho bukereye abantu batangiye gushakisha aho yaba ari kuko bari baraye batamubonye niko kumubona bamusanga mu kimoteri yakuweho umutwe.”

Avuga ko abamwishe bari babigambiriye kuko yari atuye ahantu ku muhanda munini wa kaburimbo kandi hagati y’abandi bantu ibipangu byahanaga imbibi.

Biseruka ati “Nta muntu uzwi bari bafitanye amakimbirane, ababikoze rero ni ya ngengabitekerezo yo kugirira nabi uwarokotse Jenoside.”

Mu gihe iperereza rikomeje, abantu babiri bakekwaho uruhare mu rupfu rw’uwo mubyeyi bari mu maboko ya RIB.

Ikiyaga nta mazi arimo kubera ko umuyoboro uyazana amazi atawinjiramo

Amakoperative afite ikibazo ni CODERVAM, COPRORIKA na COPRIM ahinga ku buso bwa hegitari 682, izizwi zitagihingwa umuceri akaba ari 23 zo muri Koperative COPRIM.

Uhagarariye ihuriro ry’imiryango y’abakoresha amazi mu cyanya aya makoperative akoreramo, Habanabakize Anastase, avuga ko impamvu y’ibura ry’amazi mu mirima y’umuceri ari ibiza bikomoka ku mvura nyinshi igwa mu majyaruguru y’Igihugu, bituma uburyo bari bishyiriyeho bwo gukura amazi mu mugezi w’umuvumba butwarwa n’amazi ntiyongera gusubira mu muyoboro uyatwara mu kiyaga gihangano cya Cyabayaga kifashishwa mu kuhira umuceri.

Agira ati “Ni ikibazo gihora kigaruka kuva urugomero rwasenyuka, iyo imvura iguye ari nyinshi muri Gicumbi, imyuzure iraza igatwara ya mifuka twifashishaga mu kuyobora amazi mu muyoboro uyatwara mu kiyaga kitwuhirira, akikomereza mu mugezi, bivuze ko mu muceri nta mazi arimo kuko nta n’imvura dufite.”

Umuceri ntukura neza kubera kutabona amazi

Umuhinzi w’umuceri, Mukankaka Domitile, avuga ko kuva batera umuceri batarabona amazi uretse ay’imvura nkeya babonye, ibi ngo bikazagira ingaruka ku musaruro kuko umuceri ukura nabi.

Ati “Kuva twatera uno muceri nta mazi turabona uretse imvura yaguyemo ariko urabona ko ukura nabi kuko nta mazi. Twashyizemo ibishoro ariko ntibizagaruka igihombo cyamaze kutugeraho.”

Uwitwa Habanabakize Anastase, yifuza ko ubuyobozi bwabafasha bukabakorera urugomero rwa Karungeri kugira ngo babashe kubona amazi mu mirima yabo bityo bareke kurumbya.

Umuyoboro w’amazi wagiyemo itaka ryinshi kubera isuri

Agira ati “Tubonye abadukorera uru rugomero byaba byiza amazi yakongera akaboneka, naho ubu twagize ibiza by’imvura y’i Gicumbi hiyongeraho kubura imvura hano urumva ko umusaruro wari witezwe utazaboneka.”

Umuyobozi wa RAB, Sitasiyo ya Nyagatare, Kayumba John, avuga ko iki kibazo kizwi kandi kirimo gushakirwa igisubizo cya vuba ariko nanone akamara impungenge abahinzi ko batazarumbya kuko imvura ihari.

Ati “Urumva birwanaho bagashyira itaka mu mifuka bakayobora amazi mu muyoboro uyatwara mu mirima yabo, ariko nyine iyo amazi azanye imbaraga ya mifuka iragenda ntibabone amazi, ariko tumaze iminsi tugusha imvura urebye no mu mirima yabo amazi arimo.”

Imiyoboro y’amazi yarumye

Uretse abahinga umuceri, n’abahinga ahawegereye bifashishaga amazi yo mu miyoboro mu kuhira imyaka yabo nabo batangiye guhura n’igihombo.

Nsengiyumva Theodore, avuga ko mu gihe buhiriraga muri metero 100 ubu basigaye buhirira muri metero 350 bakura amazi mu mugezi w’Umuvumba.

Yagize ati “Urumva mu gihe cy’izuba twuhiriraga muri metero 100 dukuye amazi mu muyoboro wuhira umuceri none urabona ko wumye bidusaba gukura amazi muri metero 350 tukifashisha imashini ebyiri ubwo urumva ko ibishoro byabaye byinshi.”

Amazi yasenye urukuta rwayoboraga amazi mu muyoboro uyatwara mu kiyaga kifashishwa mu kuhira

Uretse kuba ibiza byarasenye urugomero rwashyiraga amazi mu muyoboro, nawo ubwawo wuzuyemo igitaka kinshi ku buryo umuryango w’abakoresha amazi umaze gutanga 2,500,000 mu gukuramo iryo taka.

Mu gukemura ikibazo cy’ibura ry’amazi mu mirima y’umuceri hari hatangiye gukorwa urugomero rushya ruri mu Kagari ka Bibare Umurenge wa Mimuli ku buryo ari naho hazava umuyoboro utwara amazi mu kiyaga gihangano cya Cyabayaga gusa imirimo ikaba imaze iminsi ihagaze kubera impamvu zitazwi.

Minisitiri Paula Ingabire na Ambasaderi w’Ubumwe bw’Uburayi mu Rwanda, Belen Calvo Uyarra, bafungura Hanga Hub Nyagatare

Umunyeshuri muri Kaminuza y’u Rwanda ishami rya Nyagatare wiga ibijyanye n’ubworozi, Ernestine Niyomukiza, we na bagenzi be bakoze umushinga witwa Green Solution Rwanda, uhinga ubwatsi bw’amatungo hifashishijwe imbuto zirimo ingano, ibigori na Arfa arfa, bukera mu minsi irindwi kandi bukaba budaterwa mu butaka uretse amazi.

Avuga ko ubu bwatsi bukunguhaye ku ntungamubiri kandi bworoshye mu buryo bwo kuribwa haba ku nka, ihene, intama, inkwavu, ingurube n’amafi.

Ati “Ubu bwatsi bwera vuba kandi bufite intungamubiri nyinshi kandi bukaba bunoroshye ku kuribwa ugereranyije n’ubwatsi busanzwe.”

Niyomukiza Ernestine yerekana ubwatsoi bw’amatungo yakoze mu ngano

Uwanyirigira Sandrine nawe wiga muri Kaminuza y’u Rwanda ishami rya Nyagatare, akora ifu y’amagi yifashishwa mu kongera intungamubiri ku bantu ivanzwe mu biribwa ndetse akanakora ifu mu bishishwa by’amagi ikavangwa mu biribwa by’inkoko bikongera umusaruro w’amagi.

Ati “Ifu ikozwe mu bishishwa by’amagi ivangwa mu biryo by’inkoko ikongera umusaruro w’amagi naho indi nkora mu magi yo ivangwa mu biribwa byose umuntu yashaka kurya ikongera intungamubiri.”

Umuyobozi w’Akarere ka Nyagatare, Gasana Stephen, avuga ko kuba imishinga y’urubyiruko yibanda ku bikorwa by’ubuhinzi n’ubworozi, ari igisubizo kuko bizazamura umusaruro w’uru rwego kandi binasubize ibibazo byari bisanzwe bihari.

Imishinga y’urubyiruko iratanga icyizer mu gutanga ibisubizo ku bibazo biri mu buhinzi n’ubworozi

Yagize ati “Ibi bikorwa byabo turabikeneye cyane kuko birasubiza ibyo dukora biraduha kuzamura umusaruro w’ibyo dukora ariko bikadufasha gusubiza ibibazo dufite, ni ibintu tugomba kwitaho nk’ubuyobozi kugira ngo izo nyungu ziboneke.”

Ubwo hamurikwaga ku mugaragaro aho ibikorwa by’umushinga Hanga, bizajya bikorera mu Karere ka Nyagatare, Minisitiri w’Ikoranabuhanga na Innovation, Paula Ingabire, yavuze ko bishimishije kubona urubyiruko rugira uruhare mu gukemura ibibazo bihari cyane mu bikorwa by’ubuhinzi n’ubworozi.

Minisitiri w’Ikoranabuhanga na Innovation, Paula Ingabire

Yagize ati “Kuba bakora ibireba ubuhinzi n’ubworozi, ibyo byose n’ubundi ni ibibazo biba bitwugarije, tubirimo, tubibamo, tubibona ariko iyo abana bacu babishyizemo imbaraga bagashyiramo n’ubwenge bafite kugira ngo bashake ibisubizo nabyo ni ibintu byo kwishimira.”

Avuga ko Umushinga Hanga, ugamije gufasha urubyiruko rwifitemo impano guhura bakanoza imishinga yabo ariko banafashwa kubona isoko ry’ibyo bakora.

Abaturage bagiye kwahira nta kindi gikorwa bemerewe gukoreramo

Igikorwa cyo kubemerera ku mugaragaro cyatangirijwe mu Karere ka Gatsibo, aho Umuyobozi wako, Gasana Richard, yavuze ko byaturutse ku busabe bw’abaturage kubera izuba ryinshi ryavuye by’umwihariko mu Murenge wa Rwimbogo, Akagari ka Munini.

Avuga ko nyuma y’uko Igisirikare cy’u Rwanda kibyemeye, hashyizweho inzira imwe abajya kwahira banyuramo binjiramo n’aho basohokera ndetse hanashyirwa imiti yica udukoko ku buryo batatwara indwara zifata amatungo.

Indi mpamvu hashyizweho inzira ngo ni no kugira ngo bamenye abinjiye ndetse hanamenyekane niba abinjiye bose basohotsemo.

Abava kwahira bashyirweho aho banyura mu muti wica udukoko kugira ngo amatungo yabo adahura n’indwara

Yasabye abajyamo kwirinda gukorerayo ibindi bikorwa binyuranye no kwahira nko gusenya cyangwa ibindi.

Ati “Ikibajyanyemo ni ukwahira nta kindi gikorwa kibajyanyemo, nta gutema ibiti cyangwa ibindi bikorwa biri hanze yo kwahira, abazafatirwa mu bindi bikorwa bazabiryozwa kuko bazaba babuza abandi amahirwe bahawe.”

Kayitesi Flora wo mu Mudugudu wa Nyamwiza wegeranye neza n’Ikigo cya gisirikare cya Gabiro, avuga ko yashimishijwe n’uko bahawe uburenganzira bwo kubonera amatungo yabo ubwatsi.

Yagize ati “Inka zari zimeze nabi ntabwo twari tukibona amata kuko zashonje kuko ahandi twabubonaga, ni mu mirima nabwo ari ntabwo. Ubu rero inka zigiye kongera zibeho neza.”

Hashyizweho uburyo bwo gusukura ibirenge kugira ngo abaje kwahira badatwara indwara

Undi mworozi wo mu Karere ka Kayonza, we avuga ko inka ze zari zatangiye gupfa kubera kubura icyo zirya ndetse n’izindi zikaba zari zitakibasha guhaguruka.

Avuga ko ahanini byatewe no kubura imvura hafi imyaka ibiri yose bityo kubona icyo bazigaburira bikaba byari ibibazo by’ingutu.

Yashimiye ubuyobozi bw’Igihugu bwabatekerejeho n’ubw’Ingabo bwabonye akababaro kabo.

Yagize ati “Twari twarabuze ahantu inka twazirokorera kuko umwaka ushize imvura yaguye nabi, uyu mwaka nibwo igitangira kugwa, turashimira ubuyobozi bw’Ingabo, ubwa Intara n’ubw’Uturere ariko by’umwihariko Perezida wa Repubulika, baradutekerereza mu by’ukuri ni ababyeyi.”

Abinjira n’abasohoka bagomba kubimenyekanisha

Akomeza agira ati “Urebye turasa n’aho twatabawe n’ijuru kubera ko nta byiringiro ko hari inka n’imwe yarokoka ariko ubwo twabonye aya mahirwe inka zizabaho.”

Ubusanzwe nta muntu wari wemerewe kwinjira mu Kigo cya gisirikare cya Gabiro, haba kwahira ubwatsi cyangwa gusenya inkwi ndetse n’ababifatirwagamo babihanirwaga.

Ntabwo Minisiteri y’Ingabo yigeze itangaza igihe abaturage bazamara bajya kwahiramo ubwatsi, ariko ibinyujije ku rukuta rwayo rwa X, yatangaje ko yatangije gahunda yo gufasha aborozi bo mu turere twa Kayonza, Gatsibo na Nyagatare ibemerera kwinjira mu Kigo cya gisirikare cya Gabiro kugira ngo bahire ubwatsi bw’amatungo yabo mu rwego rwo kongera umusaruro w’amata.

Aborozi b’inka barifuza Laboratwari yabafasha mu buvuzi bwayo

Umworozi wa kijyambere, Ngabonziza Augustin, avuga ko yagiye apfusha inka mu bihe bitandukanye kubera ko ariwe n’uwazivuraga babaga batazi indwara zirwaye.

Avuga ko babonye iyi Laboratwari byafasha n’abavuzi b’amatungo kumenya indwara bavura bityo inka zikagira ubuzima bwiza.

Ati “Bishoboka muri RDDP 2, bakatuzanira Laboratwari y’amatungo, abavuzi b’amatungo bakavura bazi icyo bavura kuko nkanjye, nagiye mpfusha inka mu gihe cyashize mu by’ukuri ntazi ikizica, nyuma nabashije kujya Ngoma kwishakira umukozi wo muri Laboratwari aza gupima inka zanjye, tuyibonye rero byadufasha kandi bikanafasha abavuzi b’amatungo.”

Umuyobozi w’Akarere ka Kirehe, Rangira Bruno, avuga ko bamaze kuvugana n’Ikigo cy’Igihugu gishinzwe guteza imbere Ubuhinzi n’Ubworozi, RAB, kandi babemereye ko barimo gushaka ubushobozi kugira ngo begereze aborozi serivisi z’ubworozi cyane Laboratwari.

Agira ati “Turacyafite iyo mbogamizi ariko turashimira RAB kuko yatwemereye ko igiye kwegereza abaturage serivisi yo gupima indwara z’amatungo kandi batwijeje ko ubushobozi burimo gushakwa kugira ngo barusheho kwegera aborozi ariko binazamure imivurire y’amatungo.”

Abavuzi b’amatungo bigenga bafashije mu gutera intanga no kurwanya indwara z’amatungo

Akarere ka Kirehe karimo inka zisaga 42,000 zitanga umukamo ungana na litiro 10,000 ku munsi ku mata yagemuwe ku makusanyirizo yayo ane (4) abarizwa mu Karere hatabariwemo agurishwa ku ruhande muri Resitora no mu baturage bisanzwe.

Uretse abaveterineri bakorera Leta, ubu Kirehe ifite abaveterineri bigenga 150 bihurije mu ihuriro rimwe rigamije kwegereza abaturage serivisi z’ubuvuzi bw’amatungo.

Ngabonziza Augustin, avuga ko abavuzi b’amatungo bigenga bafashije byinshi cyane mu gutera intanga no mu buvuzi bw’amatungo ahubwo akifuza ko barushaho kugira ubunyangamugayo mu kazi kabo.

Yagize ati “Veterineri w’Umurenge hari igihe umuhamagara akakubwira ko ari mu nama bityo agatinda kukugeraho mugihe abigenga bo umuhamagara akaguha isaha kandi akayubahiriza. Turabifuzaho kuvugisha ukuri bakabikora kinyamwuga kuko muri iki gihe igihe kirahenze.”

Ubuyobozi bw’Akarere ka Kirehe buvuga ko abaveterineri bigenga bafashije byinshi cyane muri gahunda yo gutera intanga, ubuvuzi bw’amatungo no gukumira indwara zayo.

Amarerero y’abana ni kimwe mu bigabanya imirire mibi y’abana

Guhera muri Nyakanga 2024, abana 205 bagaragaweho imirire mibi ni bo batangiye gukurikiranwa nyuma y’amezi atatu hasigara abana 152 ubu hakaba hasigaye abana 135 bakurikiranirwa mu Bigo Nderabuzima, mu marerero yo mu Midugudu, ayo mu Bigo by’amashuri n’ayo mu Midugudu y’Ikitegererezo ndetse n’akorerera mu Midugudu ashamikiye kuri VUP.

Umurenge wa Nyagatare ni wo uza ku isonga mu kugira abana benshi bari mu mirire mibi kuko ufite abana 21 hagakurikiraho Matimba na 16 ndetse na Gatunda 12 ni mu gihe Umurenge wa Rwempasha wo ufite umwana umwe gusa.

Mu bikorwa bigamije kurandura igwingira n’imirire mibi mu bana harimo kwigisha ababyeyi gutegura indyo yuzuye kandi iteguranywe isuku binyuze mu gikoni cy’Umudugudu cyaje kiyongera ku cyo ku Kigo Nderabuzima byose byiyongera ku karima k’igikoni.

Ati “Ababyeyi bagisha uko bategura indyo yuzuye ku Kigo Nderabuzima ku buryo areba n’uburyo indyo yuzuye iteguranwa isuku kuko indyo yuzuye iyo iteguranywe umwanda byose biba bipfuye ubusa.”

Mu mafunguro ategurirwa abana mu marerero ngo hiyongeraho igi ritogosheje ndetse n’ababyeyi batwite nabo bakaba bayahabwa kugira ngo bazabashe kubyara abana bafite ubuzima bwiza, ubu iyi gahunda ikaba irimo gukorerwa ku babyeyi 1000 bo mu Mirenge ya Karangazi na Rwimiyaga.

Ababyeyi kandi ngo bahabwa ifu ya ongera hanyuma abana bagaragaweho imirire mibi bagahabwa shishakibondo n’amata.

Avuga ko muri rusange abana 5,000 bagwingiye aribo barimo gukurikiranwa mu marerero ariko akavuga ko hari intambwe yatewe kuko igwingira ryavuye kuri 29.9% rigera kuri 20.8% mu gihe cy’umwaka umwe.

Yagize ati “Kugwingira tugeze kuri 20.8% ariko turifuza kugera ku 15% nk’uko biri mu ntego za NST2 kandi turatekereza ko tuzabigeraho ndetse tukajya no munsi kuko mu mwaka umwe tuvuye kuri 29.9%.”

Avuga ko abana benshi bagaragarwaho imirire mibi ari abakomoka mu miryango itishoboye nayo ahanini ihora yimuka ishakisha imibereho.

Kuba imibare y’igwingira igenda igabanuka ngo ni uko abaturage bahinduye imyumvire ndetse n’inkunga y’inyunganiramirire bahabwa bayikoresha neza.

Gusa avuga ko bidakwiye ko hari n’umwana ugaragarwaho imirire mibi cyangwa ngo agwingire mu gihe Akarere kazwiho ubworozi bw’inka ndetse kakaba kanakungahaye mu buhinzi.

Ivuriro ry’ibanze rya Gakagati ririmo kuvugururwa rishyirwamo inzu y’ababyeyi

Umujyanama w’Ubuzima, Mahirwe Marcel, wo mu Kagari ka Karushuga Umurenge wa Rwimiyaga, avuga ko mu Midugudu ine igize Akagari kabo, uwa Kagera ari wo abaturage baho bafite ibibazo byinshi kuko kugera kuri serivisi bibagora cyane.

Avuga ko ubusanzwe kuva mu Mudugudu wa Kagera kugera ku biro by’Umurenge ukoresheje amaguru ahagenda amasaha hafi umunani, akaba atatu kuri moto kandi nabwo bikamusaba kwishyura 6,000 kugenda gusa.

By’umwihariko ngo ababyeyi batwite ni bo bahura n’ibibazo bikomeye kuko mu gihe bafashwe n’inda mu buryo bubatunguye mu masaha y’ijoro udafite amafaranga 20,000 ngo abyarira mu rugo.

Ati “Iyo afashwe igihe cya nijoro abamotari bahita baca 20,000 bigatuma bamwe mu babyeyi babyarira mu ngo cyangwa mu nzira. Hari n’igihe tubabwira kujya kwa muganga hakiri kare ariko ntibabyitabire kubera amikoro kuko bisaba bajya kubayo.”

Ikindi uyu Mudugudu wihariyeho ni uko nta mashuri ahaba ku buryo ngo abana baho bato batiga neza kubera gukoresha amasaha abiri bajya ku ishuri ribegereye rya Gatebe.

Nanone ngo abaturage b’Umudugudu wa Kagera hari serivisi zimwe na zimwe batabona cyane cyanne izitangirwa ku Murenge kuko ngo kujyayo babitegura nk’ubukwe.

Agira ati “Kujya ku Murenge gushakayo serivisi ni ukubitegura nk’ubukwe kuko ni kure cyane urumva kuhagenda na moto ukoresha amasaha atatu kugenda gusa, naho ugenda n’amaguru abyuka saa kumi n’ebyiri z’igitondo akagera ku Murenge saa munani z’amanywa.”

Uretse Akagari ka Karushuga kari mu birometero hafi 40 kugera ku Kigo Nderabuzima cya Bugaragara n’Umurenge wa Rwimiyaga n’Akagari ka Cyamunyana ni uko, kuko nako kari nko mu birometero hafi 30 bitewe n’Umudugudu ugiyemo.

Umukuru w’Umudugudu wa Gakagati, Twagirayezu Emmanuel, avuga ko kuva iwabo ujya ku Murenge batanga amafaranga 3,000 kuri moto naho yaba umubyeyi ugiye kubyara we agatanga hagati y’amafaranga 8,000 na 10,000.

Avuga ko serivisi zitangirwa ku Murenge abenshi batazibona kubera ubushobozi bucye bwo kwishyura amafaranga y’urugendo.

Yagize ati “Serivisi zo ku Murenge kuzibona biragorana kubera ubushobozi bucye ku buryo abajyayo ari ababa bababaye cyane.”

Ikibazo cyo kuba kure y’ahatangirwa serivisi ntikiri muri Rwimiyaga gusa kuko n’abatuye Umudugudu wa Akayange Umurenge wa Karangazi nabo ari uko.

Uwitwa Muhungu avuga ko amaze imyaka 10 ataragera ku Murenge ahanini kubera amafaranga y’urugendo kuko ugereranyije kuva aho atuye ujya ku biro by’Umurenge hatari munsi y’ibirometero 50.

Avuga ko inzira ya bugufi bakoresha ari ukunyura Bugaragara aho bishyura 2500 kuri moto hanyuma bagatega imodoka ya 1500 naho izindi nzira bakoresheje moto, bakwishyura arenga 10,000 kugenda gusa.

Agira ati “Unyuze inzira yo hasi ku muyoboro w’amazi yuhira imyaka ni kure cyane ni kimwe no kunyura mu Kirebe ugakomeza Kamate, amafaranga ni menshi ntiwayabona ahubwo dukoresha moto kugera Bugaragara hanyuma tugatega imodoka igera Karangazi tukishyura 1500 ubwo urumva kugenda gusa nibura ukoresha 5,000.”

Uretse Umudugudu wa Kagera uri kure y’ishuri, ahandi amashuri arabegereye ndetse bafite n’amavuriro y’ibanze akora, ariko akaba afasha ku ndwara zoroheje naho ufite indwara ikomeye cyangwa umubyeyi uri ku nda we bimusaba gukora urugendo rurerure.

Umuyobozi w’Akarere ka Nyagatare wungirije ushinzwe Imibereho myiza, Murekatete Julliet, avuga ko mu gukemura iki kibazo harimo kubakwa no kwagurwa amavuriro y’ibanze ane azashyirwa ku rwego rwa kabiri ku buryo atanga serivisi nk’izitangirwa ku bigo Nderabuzima harimo iya Gakagati mu Murenge wa Rwimiyaga kandi n’ahandi zizagenda zihashyirwa bijyanye n’ubushobozi.

Umudugudu wa Gakagati abaturage bawo bagorwa no kubona serivisi zitangirwa ku Murenge

Ati “Turimo kugenda tureba ahakiri ikibazo aho abaturage bakora urugendo rurerure cyangwa n’ahandi baba bakeneye ko tuzongerera ubushobozi (Health Post) no kongeramo serivisi nk’izitangirwa mu bigo Nderabuzima.”

Ubu ivuriro ry’ibanze rya Gakagati ririmo kubakirwa inzu y’ababyeyi naho amavuriro y’ibanze ya Nyabitekeri, Nyamikamba na Nyamiyonga akaba arimo gushyirwa ku rwego rwa kabiri ndetse mu gihe gito hakazubakwa irya Kizirakome.

N’abafite inka nkeya ziracyarisha mu nzuri bisanzwe

Tariki ya 02 Nzeri 2024, nibwo abatarubahirije aya mabwiriza bagombaga gutangira guhanwa kuko byavugwaga ko inka batazasanga mu kiraro izafatwa nk’iyazerereye.

Akarere ka Nyagatare niko kabarizwamo inzuri nyinshi n’inka nyinshi kandi aborozi bari biyemeje kubahiriza aya mabwiriza uko yakabaye ariko ugeze mu nzuri imvugo ntiyabaye ingiro gusa ngo hari impamvu.

Kazungu William na Gatera William, aborozi mu Murenge wa Rwimiyaga, bavuga ko impamvu aya mabwiriza atubahirijwe byatewe n’izuba ryinshi ryavuye igihe kirekire ku buryo batari kubona uko bahinga.

Umwe ati “Imbogamizi yabayemo ni iri izuba ryatse igihe kinini naho ubundi gahunda turayizi. Imvura itangiye kugwa ejo bundi, ubwo yabonetse turabikora.”

Undi mworozi mu Kagari ka Kirebe Umurenge wa Rwimiyaga, wifuje ko amazina ye atatangazwa avuga ko gahunda batayanze ariko nanone inka zitarya amasinde, ahubwo bagomba kubanza bakabona ubwatsi bwinshi mu buhunikiro noneho bakabona guhinga.

Yagize ati “Twaratangiye tugenda twongera ubuhinge, tuzagenda tubikora buhoro buhoro ariko ntiwahinga urwuri rwose icyarimwe udafite ubwatsi bwinshi mu buhunikiro kuko ubikoze gutyo inka zashira.”

Izuba ryatumye amazi akama mu mahema ari mu nzuri ku buryo amashyo ateranira ku iriba rimwe

Uretse Umurenge wa Rwimiyaga, Kigali Today, yaganiriye n’aborozi bo mu yindi Mirenge cyane uwa Karangazi, bigaragarira amaso ko inka zirisha mu nzuri ndetse n’uwagerageje guhinga ni ku buso buto.

Umuyobozi w’ihuriro ry’aborozi mu Karere ka Nyagatare, Kayitare Godffrey, avuga ko aborozi batangiye gushyira mu bikorwa ibijyanye no guhinga inzuri ariko nanone bikorwa bijyanye n’ubushobozi bwa buri wese, ariko bakaba bizeye ko mu gihe batangiye kubona nkunganire mu kubaka ibikorwaremezo by’ubworozi iyi gahunda izihuta.

Ati “Umuntu arakora bijyanye n’ubushobozi bwe ariko tunategereje nkunganire tugiye kubona mu mpera z’uyu mwaka. Urumva tuzabona imashini zisya ubwatsi, amahema afata amazi, hangari zo kubikamo ubwatsi, ibiraro, moto za rifani n’ibindi bitandukanye. Sinavuga rero ko ntakirakorwa kuko abantu babyumva kandi babishaka.”

Umukozi w’Akarere ka Nyagatare ushinzwe Ubworozi, Ngirinshuti Fabien, avuga ko mu rwego rwo kubahiriza aya mabwiriza ajyanye no kororera mu biraro, hamaze kubakwa ibigera kuri 300.

Mugenzi we ushinzwe Ubuhinzi, Mutabaruka Fulgence, avuga ko gahunda ihari ariko kuyishyira mu bikorwa atari ako kanya gusa akavuga ko guhinga inzuri ku kigero cya 70% bimaze gukorwa ku kigero cya 58%.

Ati “Igihari ni uko gahunda ihari ariko kuyishyira mu bikorwa ari buhoro buhoro (Process) atari ako kanya. Gusa guhinga inzuri bigeze kuri 58% hafi 60%.”

Hari ariko n’abatangiye kubaka hangari z’ubwatsi n’ibiraro n’ubwo ziraramo ntizirirwemo

Mu nama yo kuwa 10 Nzeri 2023, yahuje Minisiteri y’Ubuhinzi n’Ubworozi, Ikigo cy’Igihugu gishinzwe guteza imbere Ubuhinzi n’Ubworozi (RAB), Minisiteri y’Ubutegetsi bw’Igihugu n’aborozi bo mu Turere twa Nyagatare, Gatsibo, Kayonza na Kirehe muri Nzeri 2023, hemejwe ko mu gihe cy’umwaka umwe gusa abafite inzuri bagomba kororera inka mu biraro, inzuri zigahingwa kuri 70% naho ubutaka busigaye bugashyirwaho ibikorwaremezo by’ubworozi.

Minisiteri y’Ubuhinzi n’Ubworozi yavugaga ko kororera mu biraro, bizatuma haboneka ubutaka bunini bwo guhinga, umusaruro w’ubuhinzi ube mwinshi ndetse n’ibisigazwa by’imyaka bibe ibiryo by’inka, umukamo wiyongere.

Uwari Minisitiri w’Ubuhinzi n’ubworozi icyo gihe, Dr Musafiri Ildephonse, yagize ati “Ni igihe cyo kugira ngo turebe ko twabona ibindi bitunga Abanyarwanda, ibiryo ndetse n’amata akiyongera kuko ziba zafashwe neza mu kiraro. Ya 30% yubakweho ibiraro n’ibindi bikorwa remezo bituma inka zoga, zikora siporo hanyuma 70% hasigaye hahingwe ibihingwa noneho ibisigazwa byabyo bitunge amatungo.”

Mu bihingwa byagombaga kwibandwaho ni ibigori, ibishyimbo na soya bisimburanwa mu murima.

Umuyobozi Mukuru wungirije w’Ikigo cy’Igihugu gishinzwe guteza imbere Ubuhinzi n’Ubworozi (RAB) ushinzwe Ubworozi, Dr Solange Uwituze, yavuze ko gushyira inka mu kiraro bigomba kuba byakozwe mu gihe cy’umwaka umwe, hanyuma inka izasangwa hanze ifatwe nk’iyazerereye nyirayo afatirwe ibihano.

Inka zimwe ziracyazererezwa nk’izi zirisha ku gikomera cya Kirebe

Yagize ati “Ingamba twumva nk’abatekinisiye ni uko amatungo yose ajya mu kiraro (zero grazing), iyo basanga itari mu kiraro, igafatirwa ibyemezo.”

Muri aya mabwiriza kandi yateganyaga ko umuntu ufite ubutaka bwagenewe ubworozi adashoboye kububyaza umusaruro ukwiye, ashobora kubwatisha undi muntu ufite ubushobozi bwo kububyaza umusaruro.

Minisitiri w’Ubutegetsi bw’Igihugu yavugaga ko impamvu bashyira amategeko ku butaka bwagenewe ubuhinzi n’ubworozi, ari ukugira ngo baburinde bukoreshwe neza hagamijwe gutunga Abanyarwanda bagenda biyongera uko imyaka iza.

Abavoma babashyiriyeho aho bahagarara ariko hari abanyerera bakagwamo

Masengesho Queen, umwe mu baturage ufite akazi kuri uyu muyoboro w’amazi, avuga ko kenshi abantu bagwamo ari abana baba bogeramo ndetse n’abaje kuvoma uretse ko ngo hari n’uwaguyemo yasinze.

Agira ati “Hano mu muyoboro abantu bagwamo cyane cyane abana bogeramo rimwe na rimwe bakananirwa kuzamukamo ariko hari n’ababa bavoma bakanyerera bakagwamo. Hari n’igihe haguyemo umuntu wari wanyoye inzoga ndetse na RIB yanabajije abaturage bari kumwe na we bavuga ko yari yafashe ku icupa.”

Umukuru w’Umudugudu wa Akayange, Mugume George, avuga ko abantu bamaze kumenyekana bapfuye baguye muri uyu muyoboro w’amazi ari 17 harimo abana 10 n’abakuru barindwi harimo ba rushimusi b’inyamanswa zo muri Pariki y’Akagera banyura mu muyoboro amasaha y’ijoro.

Abajya guhiga muri Pariki y’Akagera iri hakurya y’uyu muyoboro bawunyuramo kuko izindi nzira ziri kure

Agira ati “Tumaze kubarura abantu 17 baguyemo abenshi ni abana kuko abakuru ndakeka batarenga abantu barindwi (7) harimo abajya guhiga inyamanswa muri Pariki bakayanyuramo mu ijoro bamwe bakahasiga ubuzima.”

Avuga ko kugira ngo iki kibazo gikemuke ari uko uyu muyoboro wazitirwa ndetse n’abaturage bagahabwa amazi inyuma yawo kuko hari n’abagwamo ari bagiye kuhavoma.

Umuyobozi w’Akarere ka Nyagatare wungirije ushinzwe Ubukungu, Matsiko Gonzague, avuga ko mu rwego rwo kubonera abaturage amazi meza hari imishinga ibiri irimo gukorwa, uwa Muvumba Multi-Purpose Dam uzatanga Metero Cube (M3) ibihumbi 50 ku munsi, ndetse n’uwo kuvugurura urugomero rw’amazi rwa Ngoma rukazajya rutanga M3 12,000.

Yongeraho ko mu gihe ibi bitari byakorwa ngo harimo gushakishwa abafatanyabikorwa babaha nayikondo ku buryo yashyirwa mu Mudugudu wa Akayange, bikarinda abaturage kujya gushaka amazi ahashyira ubuzima bwabo mu kaga.

Nanone ariko ngo barimo kuvugana n’umushinga wa Gabiro Agri Business Hub uburyo abaturage bahabwa amazi ahantu hitaruye umuyoboro ku buryo byabarinda impanuka.
Ati “Turimo turavugana na Gabiro Agri Business Hub, uburyo abantu bashobora gufatira kuri ariya mazi kugira ngo bariya baturage baturiye uriya muyoboro babe bahabwa amazi ahawitaruye ku buryo bitabateza impanuka.”

Abaguye mu mazi aha niho babakuriramo

Mu mikorere y’uyu mushinga wa Gabiro Agri Business Hub hasanzwemo kwegereza abaturage amazi yifashishwa mu kuhira mu gice cyagenewe abaturage ndetse n’azifashishwa mu kuhira amatungo yororerwa mu butaka butari mu mushinga.

Gatebe ni Umudugudu utuwe n’abarenga 3000

Bamwe mu baturage b’Umudugudu wa Gatebe ya mbere, Akagari ka Kirebe, Umurenge wa Rwimiyaga, bavuga ko baramutse bahawe umuriro w’amashanyarazi ndetse bagakorerwa n’umuhanda, Umudugudu wabo wahinduka Paradizo kuko ntakindi gikorwa remezo kitawurimo.

Umudugudu wa Gatebe ya mbere watuwe mu mwaka wa 2008 ukaba ugizwe na zone enye zirimo ingo 3,570.

Umukuru w’uyu Mudugudu, Dusabimana Jackson, avuga ko mbere bahatura hari ishyamba ndetse hari ibikorwa remezo bike ariko uko imyaka yagiye itambuka bagiye babyegerezwa.

Uretse amazi ya WASAC, banafite nayikondo ku buryo batagikoresha amazi mabi

Kuri ubu ngo bahawe amazi ya nayikondo ndetse n’ay’umuyoboro wa WASAC, ishuri ribanza n’iry’incuke, isoko rya kijyambere n’ivuriro ry’ibanze ariko nanone bakaba bifuza ko bahabwa umuriro w’amashanyarazi ndetse n’umuhanda kuko undi watangiye kwangirika.

Ati “Icyo tubura muri uyu Mudugudu kugira ngo twibere Paradizo ni amashanyarazi n’umuhanda kuko undi warangiritse urumva wakozwe 2005 urashaje.”

Umuyobozi w’Akarere ka Nyagatare wungirije ushinzwe Ubukungu, Matsiko Gonzague, avuga ko ku bufatanye na RTDA uyu muhanda wamaze gusurwa ku buryo ushobora gukorwa vuba kuko uretse abaturage, abashoramari bo mu cyanya cya Gabiro Agri Business Hub nabo bawusaba.

Bafite n’amashuri yigamo abana babo kuva mu y’incuke n’abanza

Naho ku bijyanye n’amashanyarazi ngo hari umushinga wo kuyakwirakwiza mu Midugudu myinshi igize Akarere harimo n’uwa Gatebe ya mbere, ku buryo mu cyiciro cya mbere cy’imyaka ibiri imiryango 18,000, izahabwa amashanyarazi ndetse rwiyemezamirimo akaba azatangira ibikorwa byo kuyakwirakwiza mu mpera z’uyu mwaka.

Agira ati “Turimo turakorana na REG ku mushinga bafite wo gukwirakwiza amashanyarazi cyane mu Midugudu atarageramo harimo n’uwa Gatebe ya mbere, rwiyemezamirimo yamaze kuboneka batubwira ko hatagize igihinduka azatangira imirimo mu mpera z’uyu mwaka ku buryo mu myaka ibiri imiryango 18,000 izaba yabonye umuriro w’amashanyarazi.”

Ibicuruzwa byabo ntibikinyagirwa kubera isoko ryubakiye

Isoko rya kijyambere ryahubatswe rifite n’ibindi bice birimo amazu y’ubucuruzi ndetse n’ay’ubwiza rihabwa n’umuriro ukomoka ku mirasire y’izuba.

Nishimwe Xaverine ni umwe mu bungukiye kuri uyu mushinga w’isoko kuko yahise akora umushinga w’ubwogoshi no gutunganya imisatsi y’abagore.

Avuga ko mbere umuntu washakaga kwiyogoshesha, yategaga moto akajya Bugaragara ahari umuriro w’amashanyarazi ariko kuba barahawe umuriro ukomoka ku mirasire y’izuba byabafashije dore ko ngo iyo ibihe bigenze neza abasha kwinjiza amafaranga 100,000 ku kwezi.

Yagize ati “Ubundi hano kwiyogoshesha cyangwa gukora umusatsi ku bagore byasabaga kujya Bugaragara ubwo ufite ubushobozi buke akituriza kuko ntakundi yakabigenje. Iyi Salo yaramfashije kuko ibihe byiza ninjiza 100,000 ku kwezi byandize gusaba umugabo umunyu cyangwa isabune.”

Isoko ryazanye n’izindi nzu ku ruhande zitunganyirizwamo imisatsi ndetse n’abagabo babona aho biyogosheshereza

Bamwe mu bakorera mu isoko rya Gatebe bavuga ko mbere bacururizaga ahantu mu gitaka ndetse imvura yagwa ibicuruzwa byabo bikangirika ariko kubakirwa isoko byabarinze igihombo.

Umwe ati “Mbere iyo imvura yagwaga nyine twaranuraga yahita tukongera tugatandika. Ingorane ni uko rimwe na rimwe ibicuruzwa byaranyagirwaga, urumva ko kenshi twahuraga n’igihombo ariko ubu ducururiza ahatanyagirwa.”

Muhire Xavier, avuga ko guhabwa nayikondo ndetse n’amazi y’umuyoboro wa WASAC, byagabanyije indwara nk’uko byari bimeze bagikoresha ay’idamu.

Ikigega gitwara amazi ya WASAC mu Mudugudu wa Gatebe ya mbere

Ati “Ntabwo tugikoresha amazi y’idamu, tuyakoresha gusa mu kubumba amatafari. Aya mazi ubona ya Nayikondo araryoha kandi yaturinze indwara zijyanye no gukoresha amazi mabi.”

Ikindi abaturage ba Gatebe ya mbere bifuza ni uko ivuriro ritoya bubakiwe, ryashakirwa rwiyemezamirimo urikoresha kuko rimaze hafi amezi ane ridakora kandi ryari ryarabarinze ingendo ndende bajya kwivuza.

Abana ntibagikora ingendo ndende bajya ku mashuri

Isoko bubakiwe ryatumye benshi bagana ubucuruzi cyane ubw’ibiribwa

Uyu yafatiwe mu Mujyi wa Kabarore agurisha moto bikekwa ko yayibye ahawe umunyenga

Avuga ko uheruka gufatwa yibye moto mu Karere ka Nyagatare, ubwo nyirayo yari ayimuhaye ngo arye umunyenga undi agenderako, yafatiwe mu Murenge wa Kabarore mu Mujyi wa Kabarore arimo kuyigurisha.

Avuga ko umuguzi wa mbere atigeze ayigura ariko uwa kabiri wari wiyemeje kwishyura yagize amakenga y’igiciro gito igurishwa ahita amenyesha Polisi ukekwaho kuyiba arafatwa.

Ati “Uwambere ntiyayiguze n’ubwo yagurishwaga amafaranga 200,000 kandi ari nshya ahubwo yarayiretse ntiyatanga n’amakuru. Uwa kabiri rero we yagize amakenga y’igiciro cyayo cyari hasi cyane ajya ku ruhande ahamagara Polisi ukekwaho kuyiba arafatwa.”

Avuga ko mu mpera za Nzeri n’Ukwakira 2024, muri rusange hibwe moto icyenda (9), enye (4)zikaba zarabonetse ndetse hafatwa abantu icyenda (9) bakekwaho ubujura bw’izi moto n’ubwo eshanu (5) zikiburiwe irengero.

SP Hmadun Twizeyimana, avuga ko amwe mu mayeri abakekwaho kwiba moto bakoresha, ngo ni ugucunga aho abantu baparitse bagahita batwara moto zabo, ariko umwihariko ukaba ari uko hafi ya bose bafashwe baba baziranye n’abo baziba ndetse ari n’inshuti.

Agira inama abakora ubujura bwa moto kubireka kuko ari icyaha gihanwa n’amategeko kandi ku bufatanye bw’abaturage bazakomeza gufatwa.

Ariko nanone asaba ba nyiri moto, kugira amakenga y’aho baparika no kudatanga icyuho ku bakora ubujura bwa moto.

Ati “Ubujura ni icyaha gihanwa n’amategeko kandi ari abaturage ari Polisi, tuzafatanya kubarwanya ariko n’abazitwara birinde uburangare, guhereza umuntu wese ubonye ngo najye kurya umunyenga, guparika ahantu hashobora guteza icyuho cyo kuyiba cyangwa guparika ahantu hatari abantu.”

Ashimira abaturage bakomeje kugaragaza uruhare rwabo mu gukumira ibyaha cyane ubujura, batanga amakuru kandi ku gihe.

Akarere ka Nyagatare niko gakunze kurangwamo ubujura bwa moto, aho muri Nyakanga na Kanama, nabwo hafashwe abantu umunani (8) bakekwaho kwiba moto, ahanini bakaba barabikoreraga hafi na Sitade y’Akarere ka Nyagatare hadatuwe.

Harrison Mutabazi avuga ko uburyo bw’ubuhuza mu nkiko bwakemuye ibibazo byinshi

Avuga muri rusange hakiri ikibazo cy’ubucucike bw’imanza zaregewe inkiko zitegereje kuburanishwa muri zo 70% zikaba ari imanza nshinjabyaha.

Avuga ko mu rwego rwo gutanga ubutabera bwihuse hatangijwe gahunda y’ubuhuza mu nkiko ndetse ngo bukaba butanga umusaruro ushimishije kuko mu mwaka w’ubucamanza ushize imanza 2,199 zarangiriye mu buhuza.

Ati “Umwaka w’ubucamanza twasoje wonyine imanza 2,199 zarangiye mu buhuza kandi zari zifite agaciro katari gato kuko eshanu twabaruye zari zifite agaciro ka miliyoni 45 bivuze ko izindi zisigaye zifite agaciro kanini cyane iyo zikomeza mu nkiko kuburanishwa bisanzwe ntizari kujya munsi y’imyaka itanu.”

Ubusanzwe ubuhuza bukoreshwa mu nkiko bureba imanza mbonezamubano, iz’ubucuruzi, iz’umurimo n’iz’ubutegetsi gusa hakaba hashize amezi 26, hatangiye indi gahunda y’ubwumvikane bwo kwemera icyaha hagati y’uwagikoze n’ubushinjacyaha, amasezerano akozwe akazanwa mu rukiko akemerwa cyangwa ntiyemerwe ku buryo imanza zirenga 15,000 zarangiriye muri ubu buryo.

Mutabazi avuga ko ubu buryo uretse kugabanya ubucucike bw’imanza, bunagabanya ubucucike mu magorero kuko uku kwemera icyaha bamwe bagabanyirizwa ibihano abandi bakabisubikirwa.

Agira ati “Muri izo manza 15,000, ababuranaga muri izo manza babarizwaga mu magororero kandi bamwe bahawe ibihano bitoya bamwe barasubikirwa ndetse hari n’abasoje ibihano, bivuze ko ubu buryo burafasha cyane kuko uretse ibirarane mu nkiko ahubwo bunafasha kugabanya ubucucike mu magororero.”

Uwimana Beatha, umuturage w’Umudugudu wa Mirama ya Kabiri, Umurenge wa Nyagatare, avuga ko kwiyunga n’uwamukoreye icyaha ntacyo bitwaye kuko kumufungisha nta nyungu irimo uretse kubiba urwango hagati yabo.

Ati “Kwiyunga n’uwagukoreye icyaha ni byiza kuko uretse kuba mukomeza kubana neza n’abana banyu bakura bakundana ariko wamufungishije uba ubibye urwango hagati yanyu bikazakomeza no kubabakomokaho.”

Minisiteri y’Ubutabera, ivuga ko ubwumvikane bwo kwemera icyaha mu nkiko bumaze gutanga umusaruro ukomeye kuko hari imanza mpanabyaha zirenga 13,000 zakagombye kuba ziri mu nkiko ariko zakemuwe ku bwumvikane bw’uregwa n’urega bafashijwe n’umucamanza ndetse n’izindi 3000 z’imbonezamubano zakemuwe muri ubu buryo.

Umuyobozi w’Akarere ka Kayonza, Nyemazi John Bosco, ashyikiriza abayobozi b’amakoperative ibyangombwa by’imodoka

Babitangaje nyuma yo guhabwa imodoka zizajya zifashishwa mu kugemura amata ku ruganda Inyange ruherereye mu Karere ka Nyagatare.

Izi modoka uko ari ebyiri, imwe ifite ubushobozi butwara litiro 5,000 z’amata zikaba zaratanzwe ku bufatanye bw’Akarere ka Kayonza n’Ubuyobozi bwa Pariki y’Akagera.

Umuyobozi wa Koperative ya Gahini, Jimmy Kamugisha Nzaramba, avuga ko imodoka bahawe yaje ari igisubizo kuko ubundi iyo bakodeshaga yabatwaraga amafaranga 140,000 ku munsi, umworozi agakatwa amafaranga 20 kuri litiro y’amata.

Avuga ko uretse kuba amafaranga batangaga mu kugeza umukamo wabo ku ruganda ruwubagurira ngo bagiye no kujya bagemura kabiri ku munsi bitandukanye na mbere ikusanyirizo ryakiraga aya mugitondo gusa.

Ati “Urumva tugiye kujya twakira aya nimugoroba, imodoka izinduke iyatwara ku ruganda hanyuma aya mugitondo iyatware ku mugoroba bityo umworozi agemure kabiri ku munsi.”

Umuyobozi wa Koperative y’aborozi ba Mwili bafite ikusanyirizo i Kageyo, Murindabigwi Martin, avuga ko kugeza umukamo wabo ku ruganda Inyange mu Karere ka Nyagatare, batangaga amafaranga 125,000 ku munsi yakatwaga ku mafaranga asigara ku ikusanyirizo.

Imodoka imwe ifite ubushobozi butwara litiro 5,000 z’amata

Avuga ko ayo mafaranga bagiye kuyazigama ku buryo imirimo y’ikusanyirizo izagenda neza kandi n’ibyangiritse bigasanwa hakiri kare kuko bazaba bafite amafaranga.

Agira ati “Bizadufasha kwizigamira ku yo twatangaga ku gukodesha imodoka, tuzareba ayo tuzakoresha ku mavuta y’imodoka n’umushoferi wayo, hanyuma asigaye tuyishyire kuri konti yihariye ajye afasha mu gusana ibyangiritse.”

Bakimara kubona izi modoka, biyemeje kongera umukamo ahanini bishingiye ku kuba barabashije kubona isoko rihoraho, bitandukanye na mbere bahoraga bamburwa na ba rwiyemezamirimo bakoranaga.

Guhera mu mwaka wa 2022, nibwo ikusanyirizo ry’amata rya Gahini mu Murenge wa Gahini n’irya Kageyo mu Murenge wa Mwili, yatangiye kugemura ku ruganda Inyange ndetse batangira no kuzamura umukamo kuko Gahini, bagemura hagati ya Litiro 4,200 na 5,000 bavuye kuri litiro 2,000 mu gihe Kageyo bageze kuri litiro 2,500 bavuye kuri litiro 600.

Mu rwego rwo kongera ubuso ihinzeho, muri iki gihembwe cy’ihinga hazaterwa kawa ku buso bwa hegitari 700 mu gihe yari isanzwe ihingwa ku buso bwa hegitari 1,728. Ni mu gihe kandi mu myaka itanu ishize kawa yahingwaga ku buso bwa hegitari 87 gusa.

Mu Murenge wa Kiyombe hamaze gutangwa ibiti by’ingemwe za kawa 250,000, muri Matimba hatangwa 300,000, Rwempasha 170,000 naho muri Tabagwe hatangwa ingemwe 150,000.

Nyirangaruye Claudine usanzwe uhinga kawa ariko nanone wiyemeje kongera ubuso ayihingaho, avuga ko kawa yamugiriye akamaro kuko nibura asarura toni 10 z’ibitumbwe.

Abahinze kawa mbere bishimira ko batangiye kubona inyungu

Avuga ko yamukijije inzara kuko mu gihe abandi baba bamaze umusaruro mu nzu bategereje ko undi wera abahinzi ba kawa bo aribwo baba barimo kugurisha umusaruro wabo ku buryo nta kibazo cy’inzara bashobora guhura na cyo.

Ati “Nsanganywe ibiti birenga 7,000 ariko ubu nafashe ibindi kugira ngo nongere umubare bityo n’umusaruro nabonaga wiyongere. Ubundi ino aha inzara iza mu kwezi kwa kane ariko twebwe nta nzara itugeraho kuko tuba dusarura, dufata amafaranga y’umusaruro wa kawa.”

Habakurama Diogène wo mu Murenge wa Kiyombe avuga ko mbere yo guhinga kawa bari bafite imibereho mibi kuko indi myaka bahingaga hari igihe yarumbaga cyangwa yakwera igahita ishyirwa ku isoko bashaka amafaranga, bigatera inzara mu rugo.

Kuri ubu ariko ngo bahinga ibindi bihingwa byo kurya mu rugo, amafaranga yo gukemura ibindi bibazo akava ku musaruro wa kawa.

Ku giti cye ngo kuva yatangira guhinga kawa, imibereho y’urugo rwe yarahindutse kuko abasha kwishyurira abana ishuri ndetse akaba anafite uwo agiye kwishyurira kaminuza.

Agira ati “Aho ntangiriye guhinga kawa ibintu byagiye bihinduka mu buryo bugaragara ndetse n’abana bariga hari abiga imyuga, uwiga amashuri yisumbuye n’uwiga abanza ndetse mukuru wabo akaba asoje ayisumbuye akaba yitegura kujya muri kaminuza kandi na we azishyurirwa na kawa.”

Umwe mu baturage bo mu Murenge wa Nyagatare wateye ibiti bya kawa mu gihembwe cy’ihinga gishize avuga ko yabishishikarijwe akabikora, akaba yizeye ko bizamuzanira inyungu mu bihe biri imbere.

Ingemwe za kawa zarateguwe ku buryo abahinzi batangiye kuzihabwa

Umukozi w’Akarere ka Nyagatare ushinzwe ibihingwa ngengabukungu, Nezerwa Issa, avuga ko kuba bitaye ku kongera ubuso buhingwaho kawa ari uko babonye ihera cyane kandi yihanganira izuba rikunze kurangwa muri aka Karere.

Yagize ati “Kawa muri Nyagatare irahera cyane, ni yo mpamvu tuyishyiramo imbaraga, gusa hari n’ibindi bihingwa ngengabukungu turimo gushishikariza abahinzi kubihinga ku bwinshi nk’imiteja, urusenda na avoka.”

Mu Karere ka Nyagatare, ubu hari inganda eshatu zitunganya umusaruro wa kawa ziherereye mu Mirenge ya Kiyombe, Mukama na Gatunda, zakira umusaruro wa toni 1,200 ku mwaka.

Nyagatare: Ku myaka 18 ntarabona indangamuntu kubera kutandikwa mu irangamimerere

Nyinawumuntu Dinah, amazina twamuhaye kubera ko atifuza kugaragara mu itangazamakuru, avuga ko mu byumweru bibiri bishize yagiye ku biro by’Umurenge wa Nyagatare, ashaka kwiyandikisha kugira ngo yifotoze abone indangamuntu ariko agasanga atari mu gitabo cy’irangamimerere.

Avuga ko yasabwe kuzana icyemezo cyo kwa muganga kigaragaza igihe yavukiye cyangwa se ifishi yakingiriweho, ariko byose akaba nta na kimwe afite ndetse akaba atanabibona kuko ababyeyi be batabana kandi umwe wakabaye abifite akaba yarigiriye mu mahanga.

Ati “Papa yampaye indangamuntu ye ndetse n’iya Mama kuko yarayisigaranye ariko ngeze ku Murenge barebye mu gitabo cy’irangamimerere barambura ndetse na barumuna banjye twese ntawanditse. Ibyemezo bantumye nabyo Papa yambwiye ko atazi aho biherereye, ubu nabuze inzira nzanyuramo nkabona indangamuntu.”

Kutagira ikimuranga ngo byatumye atabasha kwishyura ubwisungane mu kwivuza, kuko nta kiciro na kimwe abaho we na barumuna be babiri ku buryo n’amafaranga nyirarume yabahaye ngo bayishyure, umubyeyi wabo yayakoresheje ibindi kuko batanditse ku cyiciro cye kuko afite undi mugore.

Umubyeyi we, Nzabarinda Sylvestre, avuga ko ibijyanye no kuba uwo babyaranye abo bana yarababyariye kwa muganga cyangwa yaragiye abakingiza, atabimenya kuko batabanaga kubera impamvu z’akazi katatumaga bahorana.

Agira ati “Iby’amafishi bakingiriweho sinabimenya kuko ntitwari kumwe, ariko yababyariye mu Karere ka Gatsibo yenda niho yaboneka niba yarabakingije, kandi ntawe nabonaho amakuru kuko we twaratandukanye ashaka undi mugabo, ntibakiba mu Rwanda nta telefone ye ngo namubaza.”

Cyakora avuga ko kuba umwana we mukuru yujuje imyaka 18 ari ukuri kuko yavutse mu mwaka wa 2006.

Umwe mu bakozi bashinzwe irangamimerere muri imwe mu Mirenge y’Akarere ka Nyagatare, avuga ko iki kibazo cyoroshye gukemura, umuntu atakabaye aho atagira icyangombwa ngo ni uko ababyeyi bakoze amakosa yo kutamwandikisha mu irangamimerere.

Avuga ko ufite icyo kibazo ashaka abantu babiri bazi neza imyaka ye bakajyana ku Kagari, bigakorerwa inyandiko ikaba ariyo izanwa ku Murenge n’abatangabuhamya hanyuma akandikwa mu bitabo by’irangamimerere, bityo n’izindi serivisi zijyanye nabyo akazihabwa mu buryo bworoshye.

Yagize ati “Mu gihe abuze ifishi yo kwa muganga akabura ikarita ya Mituweli, ashaka abantu babiri bemeza imyaka ye, Gitifu w’Akagari akabyandika bakabisinyira, bakanakomeza bakajya kubyemeza ku Murenge kuko ntiyabura kwandikwa kuko hashyizweho inzira zose zafasha abafite ibibazo bijyanye n’irangamimerere.”

Bamwe mu mboni z’umupaka bavuga ko abafutuzi bahinduye amayeri ku buryo batagikangwa n’inkoni

Twizerimana Amos ukorera mu Murenge wa Rwempasha, avuga ko abafutuzi bahinduye amayeri ku buryo basigaye baza ari benshi cyane kandi bitwaje intwaro gakondo ku buryo batatinyuka kubisukira uretse kwiyambaza abafite imbunda baba bari hafi yabo.

Agira ati “Bafite ukuntu bihuza bagakorana bakaza biyongereyemo imbaraga nyinshi, baza ku manywa basanga imboni ebyiri ziriwemo bakazishushubikana, gusa inzego z’umutekano zituba hafi zikaza kudufasha tukabarwanya natwe.”

Imboni y’umupaka kuri kimwe mu byambu biri mu Murenge wa Rwempasha, Rurangwa Aman, avuga ko muri iyi minsi abafutuzi bahinduye uburyo bagendagamo kuko baza ari benshi kandi barwana ku buryo kubahagarika bisaba inzego z’umutekano zifite imbunda, bitandukanye na mbere wasangaga imboni zibasha kubambura ibyo bikoreye ndetse bamwe bakanafatwa.

Yifuza ko hakongerwa umubare w’abasirikare n’abapolisi, kugira ngo babashe kubahashya kuko kubakangisha inkoni byo bidashoboka.

Agira ati “Ubundi mwabaga muri ku byambu muri nk’abantu bane mugatesha abafutuzi 10 ndetse bamwe mukanabafata, ariko ubu basigaye baza ari nka 20 barwana, mwiriwe ku manywa muri babiri, keretse iyo babonye Polisi cyangwa umusirikare nibwo bahunga.”

Imboni z’umupaka zirifuza ko abasirikare n’abapolisi bakorana bakongerwa kuko abafutuzi batinya imbunda

Akomeza agira ati “Abasirikare n’abapolisi turakorana pe ntacyo nabashinja. Bishobotse abiriwe ku manywa bagakorana n’umusirikare cyangwa umupolisi, kuko baba bafite imbunda ku buryo baza tukabarwanya, naho wowe ufite inkoni ntacyo wabakoraho.”

Polisi y’Igihugu ivuga ko kuva imboni z’umupaka zajyaho, ibyaha bijyanye no kwambukiranya umupaka mu buryo bunyuranyije n’amategeko, ibya magendu ndetse no kwinjiza ibiyobyabwenge mu Gihugu byagabanutse cyane.

Umuyobozi wa Polisi wungirije ushinzwe ibikorwa, CP Vincent Sano, ubwo yasuraga imboni z’umupaka ku cyumweru tariki ya 20 Ukwakira 2024, mu Karere ka Nyagatare, yabasabye kudateshuka ku nshingano bahawe zo kurinda ibyambu kuko ngo hari bamwe bagaragaweho kunyuranya n’izo nshingano.

Yagize ati “Guteshuka ni ikuhe, ni uko aho gukora ibyo mukwiriye gukora, aho gukora inshingano zanyu nk’uko mubisabwa, mushobora guteshuka mugasanga namwe mujya muha amakuru ahubwo abafutuzi.”

CP Vincent Sano yasabye imboni z’umupaka kujya batanga amakuru hakiri kare kugira ngo inzego z’umutekano zibatabare ku gihe

Akomeza agira ati “Dufite amakuru ko bamwe muri mwe batangiye kudohoka ariko ntimuzatume bigera aho tuza gutangira kubafunga kandi twari dufitanye amasezerano namwe, ubwo ntimwaba mutatiriye igihango se? ntimuzatatire igihango twari dufitanye.”

Imboni z’umupaka zatangiye kurinda ibyambu binyuzwaho magendu ndetse n’ibiyobyabwenge, mu ntangiriro za Nzeri 2021.

Batangiye ari 402 barinda ibyambu 67 ariko ubu barongerewe bagera kuri 652 barinda ibyambu 100, biri mu Mirenge umunani (8) ihana imbibe n’Ibihugu bya Uganda na Tanzaniya.

Ubuyobozi bw’Intara bukaba bwizeza ko bugiye kubagenera ibindi bikoresho birimo amatoroshi kubakora mu ijoro ndetse n’amahugurwa abongerera ubumenyi mu gucunga no kurinda ibyambu.

Icyaha cy’ubujura, gukubita no gukomeretsa ni byo byiganje mu bahawe imbabazi

Aba bagororwa bari bafungiye mu magororero 15 ari hirya no hino mu Gihugu.

32 bahawe imbabazi na Perezida wa Repubulika ku bihano bari basigaje, bakaba bari barafungiwe ibyaha bitandatu (6) ariko ikiganje kikaba icyo gusambanya umwana, abenshi bakaba bari bafungiye mu igororero ry’abana rya Nyagatare.

Hari kandi gukuramo inda abenshi bakaba bari bafungiye mu igororero rya Ngoma ndetse n’icyaha cyo gusaba no kwakira indonke no gukoresha nabi umutungo ufitiye rubanda akamaro, abahamijwe iki cyaha abenshi bakaba bari mu igororero rya Nyarugenge.

Abagororwa 2,017 bafunguwe by’agateganyo na Minisitiri w’Ubutabera akaba n’intumwa nkuru ya Leta, Dr Ugirashebuja Emmanuel, 751, bari barahamijwe ibyaha by’ubujura 198 bakaba bari mu igororero rya Rwamagana, 98 Huye na Muhanga 72.

Icyaha gikurikiraho ni icyo gukubita no gukomeretsa, aho mu igororero rya Huye abari barahamijwe iki cyaha bafunguwe by’agateganyo ari 178, Rwamagana 131, na Nyarugenge 84.

Gukubita no gukomeretsa byakozwe hagati y’abantu ubwabo ariko binakorerwa abashakanye aho mu igororero ry’abagore rya Ngoma n’irya Musanze hari abagore bafunguwe by’agateganyo barahamijwe icyaha cyo gukubita no gukomeretsa abo bashakanye.

Igororero rifite umwihariko ku cyaha cyo gukora ibikorwa byerekeranye n’ibiyobyabwenge cyangwa urusobe rw’imiti ikora nkayo, ni irya Rwamagana n’abahamijwe iki cyaha bafunguwe by’agateganyo 33 ndetse n’irya Nyanza ryari rifite 30.

Igororero rya Rusizi naryo rifite umwihariko ko ariho hari hafungiye bamwe mu bahamijwe icyaha cyo gukomeretsa, guhiga, kwica inyamanswa yo bwoko bw’inyamanswa zikomye ndetse mu bafunguwe by’agateganyo, umwe gusa akaba yari yahamijwe icyaha cyo gutunda no gucuruza ibiyobyabwenge.

Mu bindi byaha byagaragaye kuri aba bagororwa bafunguwe by’agateganyo, harimo ubuhemu, ubushoreke, kwihesha ikintu cy’undi hakoreshejwe uburiganya, gutanga sheki itazigamiye, gukwirakwiza amafaranga y’amahimbano, kurandurandura cyangwa gutema ikimera gikomye, gukoresha ibikangisho cyangwa kugirira nabi umuntu, gusenya inyubako, gukoresha undi imibonano mpuzabitsina ku gahato n’ibindi.

Bamwe mu bafashwe bakekwaho kwiba inka

Hari hashize iminsi humvikana ubujura butandukanye mu Ntara y’Iburasirazuba, aho abantu batobora amazu bagatwara ibicuruzwa ndetse n’ab’amatungo cyane inka, ihene n’ingurube.

Polisi y’Igihugu ivuga ko by’umwihariko mu Karere ka Nyagatare, kuva muri Nyakanga kugera muri Nzeri 2024, hagaragaye ubujura bw’inka 16 hibwamo izigera kuri 25.

Muri izi nka ngo 17 zarafashwe zisubizwa banyirazo, ebyiri ziburirwa irengero naho esheshatu basanga zabagiwe mu nzuri.

Mu bafashwe harimo 23 bari bazishoreye, abandi 17 bakaba ari abatanzwe n’abaturage babakekaho ubwo bujura, bo bakaba bagomba kwigishwa bakagirwa inama kugira ngo barebe ko bakwisubiraho bakava mu bikorwa by’ubujura.

Polisi kandi ivuga ko iyo inka zimaze kwibwa zishyirwa abazibaga bakagurisha inyama ku bantu batandukanye bafite ibyuma bikonjesha zikazahava zijyanwa ku mabagiro atandukanye ari hirya no hino ndetse no mu Mujyi wa Kigali.

Mu byagaragaye ko bituma ubu bujura bwiyongera harimo kuba abantu bafite inka badakunze kujya mu nzuri zabo bakazamenya ko bibwe ari uko bahageze ndetse izindi zikibwa n’abavandimwe ba banyiri inka.

Umuvugizi wa Polisi n’umuyobozi wa Polisi mu Ntara y’Iburasirazuba wungirije

Umuvugizi wa Polisi y’Igihugu, ACP Boniface Rutikanga, avuga ko kuba hari inka zimwe zibwa ntizifatwe kandi buri Mudugudu ufite irondo biterwa n’imiterere y’Uturere cyane nka Nyagatare ifite inzuri nyinshi zidatuwe ku buryo byorohera abajura kubona amayira.

Agira ati “Ntabwo uzabona ko imihanda, buri gace, buri nzu n’inzuri zose byabaho umupolisi n’umuntu w’irondo, birashoboka ko nabo bicara bakiga amayeri yo gukwepa aho batari. Nyagatare ni Akarere gafite inzuri nyinshi zidatuwe uburyo bwo gukwepa abantu burashoboka.”

Akomeza agira ati “Nk’uko mwabyumvise bafata inka bakayibaga, bagafata umumotari nk’uriya akaza akayipakira, ubonye umumotari yigendera wamenya ko avuye gutunda inyama z’inka zibwe?, bifata umwanya ariko iyo tubonye amakuru turabafata.”

Akarere ka Nyagatare konyine mu mezi atatu ashize hamaze gufatwa abakekwaho ubujura bw’inka 40, Gatsibo, batanu, Kayonza icumi (10) naho Rwamagana hafatwa batatu (3). Abakekwaho kuzibagira mu nzuri, Nyagatare, hafashwe abantu 22 naho i Gatsibo, hafatwa icumi (10).

Ubujura bw’amatungo ngo bukorerwa cyane mu Mirenge irangwamo ubworozi bwinshi kurusha irimo buke.

Yabitangaje mu gihe hirya no hino mu Karere havugwa ikibazo cy’ubujura bw’amatungo cyane cyane inka, ihene n’ingurube ndetse n’ibicuruzwa, aho abajura bapfumura amazu bagatwara amatungo cyangwa ibicuruzwa.

Hari abinubira ko bibwa nyamara bishyura amafaranga ahabwa abacunga umutekano

Urugero ni aho mu rukerera rwo ku wa Mbere tariki ya 07 Ukwakira 2024, mu Mudugudu wa Kamagiri, Umurenge wa Nyagatare, abajura bapfumuye urupangu rwa Ndikubwimana Muhire, bamutwara ihene eshatu zifite agaciro k’amafaranga y’u Rwanda hafi ibihumbi 200.

Ati “Nasohotse ngiye kwihagarika mbona aho ihene zararaga ntazihari, ndebye mbona inyuma y’aho dukarabira hari umwenge menya ko ari ho bazicishije bazitwara.”

Mu Mudugudu wa Gihorobwa, Akagari ka Rutaraka na ho umuturage yibwe ihene kuko abajura baje bagatobora igikoni bagatwara ihene yahakaga na yo iburirwa irengero.

Ku Cyumweru tariki ya 13 Ukwakira 2024, mu Mudugudu wa Mirama ya kabiri, Akagari ka Nyagatare, Umurenge wa Nyagatare, irondo ry’umwuga ryafashe umuntu ufite ingurube agiye kuyigurisha yari ayikuye mu Mudugudu wa Gihorobwa, Akagari ka Rutaraka, Umurenge wa Nyagatare.

Mu rukerera rwo ku wa Mbere tariki ya 14 Ukwakira 2024, mu Mudugudu wa Gihorobwa nanone hibwe inka ndetse no mu Mudugudu wa Nyagatare ya gatatu, Akagari ka Nyagatare, Umurenge wa Nyagatare abajura batoboye iduka ry’umuturage batwara ibicuruzwa bitandukanye bifite agaciro k’amafaranga y’u Rwanda arenga 300,000.

Agira ati “Twarabyutse dusanga inzu bayitoboye batwara ibicuruzwa birimo amavuta yo guteka, inzoga, kawunga n’ibindi bifite agaciro k’amafaranga y’u Rwanda arenga ibihumbi 300.”

Uretse mu Mudugudu wa Gihorobwa, mu wa Kamagiri no mu wa Nyagatare haba irondo ry’umwuga. Aba bibwe bavuga ko bagorwa no kwishyura amafaranga ya buri kwezi agenewe irondo ry’umwuga bakifuza ko bishoboka ayo mafaranga yavaho bakishyiriraho abarinzi b’imitungo yabo.

Umwe ati “Irondo n’ubwo rihari ntirikora neza kuko turibwa kenshi kandi itariki ipfa kugera bakaza kwishyuza amafaranga y’irondo. Bibaye byiza ayo mafaranga bayahagarika cyangwa tukamenya ko tuyatanga hari icyo bakora byanze se nibareke twishyirireho abarinda imitungo yacu iby’irondo babireke.”

Muhire Philippe, ushinzwe umutekano mu Kagari ka Nyagatare, avuga ko n’ubwo humvikana ubujura hirya no hino ariko bishimira ko bwagabanutse kubera ubufatanye bw’irondo ry’umwuga, ay’abaturage asanzwe ndetse n’urubyiruko rw’abakorerabushake.

Avuga ko iyo habayeho ubufatanye bw’abaturage ku buryo uwibwe atangira amakuru ku gihe, ibyibwe bitarenga umutaru kandi n’uwabyibye agafatwa.

Agira ati “Tubasaba ubufatanye kuko ntitwabona abanyerondo bahagarara kuri buri nzu ariko baduhaye amakuru kare, abajura twabatangatanga bagafatwa ibyibwe bigasubizwa nyirabyo.”

Umuyobozi w’Akarere ka Nyagatare, Gasana Stephen, avuga ko n’ubwo humvikana ikibazo cy’ubujura ariko kidakabije cyane ndetse ko iyo ubujura buvuzwe hakiri kare byinshi bigaruzwa n’ababigizemo uruhare bagafatwa.

Ati “Ejo twarebaga imibare dusanga mu mezi atatu ashize hibwe inka 13, dufatanyije n’irondo inka zirindwi zarafashwe n’abazibye ziragarurwa. Enye twasanze bamaze kuzibaga, tubura ebyiri kandi n’izo twasanze zabazwe abakekwa twarabafashe.”

Avuga ko kuba byinshi mu byibwa bifatwa biterwa n’ubufatanye bw’inzego z’umutekano, irondo ry’umwuga n’irisanzwe byunganirwa n’urubyiruko rw’abakorerabushake bafatanya na bo mu gucunga umutekano no kugenzura ko ukorwa neza ndetse ubu muri santere 50 mu Karere zikaba zifite irondo ry’umwuga.

Umuvugizi wa Polisi n’umuyobozi wa Polisi mu Ntara y’Iburasirazuba wungirije basabye bahumurije abaturage

Yabitangaje kuri uyu wa gatatu tariki ya 16 Ukwakira 2024, ubwo yagiranaga ikiganiro n’abanyamakuru bakorera mu Ntara y’Iburasirazuba, hagamijwe kubasobanurira ibijyanye n’urugomo rumaze iminsi rukorwa hirya no hino mu Karere ka Nyagatare aho abaturage bakubitwa bagakomeretswa.

ACP Boniface Rutikanga, avuga ko hashize ibyumweru bibiri hari abantu bagizwe n’abinjiza ibiyobyabwenge mu Gihugu (Abafutuzi), bakubita abantu bakabakomeretsa hagamijwe kubatera ubwoba kugira ngo babone inzira bacishamo ibicuruzwa byabo bitemewe.

Avuga ko impamvu y’uru rugomo ahanini ishingiye ku gihombo aba bafutuzi bagiye bahura nacyo kubera kwamburwa ibyo binjiranye mu Gihugu mu bihe bitandukanye bituma uwabibahaga bakamwishyura nyuma yanga kongera kubibaha batamwishyuye.

Bamwe mu banyamakuru bitabiriye ikiganiro

Ibi ngo byatumye bahitamo gutera ubwoba ababangamira n’ababatangaho amakuru kugira ngo babone inzira mu buryo buboroheye cyane.

Agira ati “Nta mucengezi uhari ku butaka bw’u Rwanda ahubwo abamaze iminsi bakora urugomo ni abafutuzi baba bagamije gucecekesha ababangamira mu bucuruzi bwabo butemewe.”

Arasaba Abanyarwanda kutagirira ubwoba abantu bagenda mu bihuru n’ijoro ahubwo akabasaba gutanga amakuru ku nzego zishinzwe umutekano kugira ngo bafatwe.

Abagera kuri 22 bagura inka zibwe bakazibaga bakagurisha inyama nibo bamaze gufatwa mu mezi atatu gusa

Ati “Ntabwo waterwa ubwoba n’umuntu witwikira ijoro, yitwikira ijoro kubera ko ari umunyabwoba kuko aziko ibyo akora bitemewe. Ntabwo umuntu urenga ku mategeko ubundabunda mu gihuguru nijoro wamurusha ubwoba. Ndahumuriza Abanyarwanda ntibagire ubwoba, bo baduhe amakuru ibindi tuzabyikorera.”

Umwe mu bafatiwe mu bikorwa by’urugomo usanzwe ari umufutuzi, avuga ko ibikorwa by’urugomo yemera yagiyemo ngo ni urwabereye ahitwa Nshuri mu Kagari ka Gitengure Umurenge wa Tabagwe, bagamije gucecekesha abayobozi babatangagaho amakuru bakamburwa ibyo bikoreye.

Yagize ati “Nshuri twarwaniyeyo tugamije gufata mutekano waho kuko ni umugambanyi watugambaniraga muri forode.”

Umwe mu bafatiwe mu bikorwa by’urugomo bigamije gutera ubwoba ababangamira ubucuruzi bwabo butemewe

Avuga ko iyo bava mu Gihugu cya Uganda baza bitwaje intwaro gakondo zirimo imihoro, kupakupa zityajwe impande zombi n’inkota.

Ngo ibiyobyabwenge binjiza mu Gihugu bigizwe n’urumogi, kanyanga ndetse n’ibicuruzwa nk’amashashi, ibinini, imyambaro ya caguwa n’inkweto.

Abantu batandatu bakekwaho uru rugomo, umwe niwe umaze gufatwa abandi bakaba bagishakishwa. Polisi kandi yanerekanye abafatiwe mu bikorwa by’ubujura cyane abafatanywe inka, bagera kuri 40 mu Karere ka Nyagatare ndetse n’abandi 22 bazigura bakazibaga bagacuruza inyama, bose bafashwe mu mezi atatu gusa ashize.

Umuvugizi wa Polisi y’Igihugu, ACP Boniface Rutikanga, arasura Akarere ka Nyagatare

Ni ikiganiro gishobora kwibanda ku bibazo by’umutekano birimo urugomo rumaze iminsi ruvugwa muri aka Karere, ahari abantu kenshi bikekwa ko baba banyoye ibiyobyabwenge birimo inzoga ya kanyanga n’urumogi batema abantu bakabakomeretsa.

Ariko nanone bikekwa ko abakora uru rugomo harimo n’ababa bagamije kwiba bakabanza kunywa ibiyobyabwenge bagatega abantu bagamije kubambura utwabo.

Urugero rwa vuba, ni aho mu ijoro ryo ku cyumweru tariki ya 13 Ukwakira 2024, mu Mudugudu wa Gihorobwa, Akagari ka Rutaraka, abantu babiri bakomerekejwe hakoreshejwe ibyuma n’abantu bikekwa ko bari abaforoderi (abinjiza kanyanga mu Gihugu), bahuriye mu nzira bakabahagarika abandi aho guhagarara bakabarwanya.

Mu Kagari ka Gitengure naho mu cyumweru gishize, abantu bikekwa ko bari banyoye ibiyobyabwenge bateze abantu ahitwa Kuwabahemba, bagamije kubambura ndetse bakomeretsa bamwe.

Polisi ifatanyije n’irondo bamwe mu bakekwaho ibi byaha batawe muri yombi mu bihe bitandukanye bakurikiranyweho ibyaha bijyanye n’urugomo.

Kanda HANO umenye bimwe mu byavugiwe mu kiganiro Umuvugizi wa Polisi yagiranye n’itangazamakuru i Nyagatare

Mu Karere ka Nyagatare, igipimo cy’Ubumwe n’Ubudaheranwa kiri kuri 95.8%

Ibi byatangajwe kuri uyu wa gatatu tariki ya 09 Ukwakira 2024, mu nama ngarukamwaka y’ihuriro ry’Ubumwe n’Ubudaheranwa, yahuje abahoze ari abayobozi mu nzego z’ibanze kuva Igihugu kibohowe 1994.

Mu Karere ka Nyagatare, igipimo cy’Ubumwe n’Ubudaheranwa kiri kuri 95.8% mu gihe ku rwego rw’Igihugu kiri kuri 92%.

Bimwe mu byagaragajwe bituma Ubumwe n’Ubudaheranwa butagerwaho 100% harimo ahari imibiri y’abazize Jenoside yakorewe Abatutsi itaraboneka ngo ishyingurwe mu cyubahiro, imibereho y’abarokotse Jenoside itaraba myiza cyane ku buryo babasha gutsinda ibikomere n’ibindi.

By’umwihariko mu Karere ka Nyagatare hagaragajwe ko hari abakoze ibyaha ahandi bakaza kuhihisha ariko n’undi mwihariko w’uko abahatuye bamwe bakirebera mu ndorerwamo y’aho baturutse bitewe n’uko ari Akarere gatuwe n’ingeri nyinshi z’abantu baturutse ahantu hatandukanye ndetse kakanagira benshi bakimukiramo nk’uko byavuzwe n’umukozi wa International Alert.

Imvugo zishingiye aho abantu bakomotse ni kimwe mu bibangamiye ubumwe n’ubudaheranwa

Yagize ati “Iyo uganiriye n’abari mu matsinda bavuga ko ikintu cyo kwirebera mu ndorerwamo aho baturutse nk’abavuye I Bugande bagira imvugo zijimije ukumva umuntu aravuze abazungu, Abatanzaniya n’ibindi. Ibyo bintu birahari muri Nyagatare.”

Umwe mu baturage utifuje ko amazina ye ajya mu itangazamakuru avuga ko kenshi kuvuga umuntu bitewe n’aho yaturutse cyangwa we kubyitwa ntacyo bimutwaye ariko nanone atamenya niba uwo abibwira bimurakaza.

Gusa ngo we abikora yumva nta kibi agambiriye ahubwo buba ari uburyo bwo gutebya gusa. Ati “Jyewe kubwira umuntu ko ari umukonyine (umworozi), umurera (uwavuye i Burera) numva ntakibazo kirimo kuko mba numva ntacyo bimuhinduraho kandi nanjye iyo banyise umukiga (uwavuye mu Majyaruguru) ntacyo bintwara rwose kandi mbona abo tubyitana ntacyo bibahungabanyaho.”

Iyi nama ngarukamwaka yahuje abahoze mu nzego z’ibanze kuva Igihugu cyabohorwa mu 1994

Avuga ko we yumva icyaba ikibi ari uko barema itsinda ry’abantu baturutse ahantu runaka ariko kuba bafatanya n’abandi mu bindi bikorwa byose ntakibazo abibonamo.

Rwamurenzi Steven, avuga ko akantu bita gato kadahagurukiwe hakiri kare gashobora guteza ibibazo bityo ahubwo abantu bakwiye kwigishwa bakirinda izo mvugo kandi n’ababyeyi bakigishwa kurera neza abana no kubabera urugero kuko aribwo bazakurana indangagaciro.

Umuyobozi w’Akarere ka Nyagatare, Gasana Stephen, avuga ko izi mvugo n’ubwo hari bake bazikoresha yenda rimwe na rimwe batagamije ikibi ariko nanone zidakwiye na gato.

Yasabye abantu kwifashisha amahirwe yo kuba Akarere gatuwe n’abantu baturutse ahantu hatandukanye bagakora bakiteza imbere bakirinda imvugo zitabubaka.

Bagaragaje ko akantu bita gato kadahagurukiwe hakiri kare gashobora guteza ibibazo

Agira ati “Kuba hari abantu bakomotse ahantu hatandukanye nk’uko mwabibonye mu ibarura riheruka ryagaragaje uko abantu bagiye bimuka Intara ku yindi ariko si ikibazo ahubwo ni amahirwe ariko uwabikoresha nabi ubwo nawe ni ukumwigisha akabyirinda.”

Umwe mu bagize Unity Club, Kantengwa Julienne, avuga ko kubera ibisigisigi by’amateka yaranze Igihugu, ibintu byose bidashobora kuba byiza ako kanya ariko hasabwa uruhare rwa buri wese mu guhangana n’ibyabangamira Ubumwe n’Ubudaheranwa.

Mu Karere ka Gatsibo babiri bafunzwe bakekwaho kwiba ibiryo by’abanyeshuri

Umuyobozi w’Akarere ka Gatsibo wungirije ushinzwe Imibereho myiza, Uwimana Marceline, avuga ko ibi byabaye kuwa mbere tariki ya 23 Nzeri 2024, ubwo ubuyobozi bw’ishuri bwasangaga urugi rw’ububiko rw’ibiribwa rwaciwe.

Avuga ko abaketswe bwakeye bashyikirizwa Urwego rw’Ubugenzacyaha kugira ngo hakorwe iperereza.

Asaba abayobozi b’amashuri kujya bakoresha abazamu barenze umwe kandi nabo bizewe. Ati “Ubundi twari twarasabye abayobozi b’ibigo by’amashuri kandi nibyo tubasaba kujya bakoresha abazamu barenze umwe nka babiri cyangwa batatu kandi nabo bizewe b’inyangamugayo kuko byakuraho ubujura."

Uwimana, avuga ko hari hashize umwaka n’igice ikibazo cy’ubujura bw’ibiribwa by’abanyeshuri bitagaragara dore ko icyo gihe aho byari byagaragaye, hari mu bigo bibiri by’amashuri.

Avuga ko n’ubwo ibiryo byibwe, bitahagaritse gahunda yo kugaburira abanyeshuri ku ishuri kuko hari ibindi byasigaye mu bubiko.

Ubwo bari bageze ku ngoro y’amateka yo guhagarika Jenoside

Babitangaje ku wa kabiri tariki ya 24 Nzeri 2024, ubwo abagabo n’abagore 87 bakomerekeye ku rugamba rwo kubohora Igihugu no guhagarika Jenoside bo mu Murenge wa Nyagatare, basuraga urwibutso rwa Jenoside yakorewe Abatutsi 1994 rwa Kigali, ingoro y’amateka yo guhagarika Jenoside ndetse n’ibindi bikorwa remezo byagiye byubakwa mu Mujyi wa Kigali.

Second Lieutenant (Rtd), Faustin Mugabo, avuga ko bategura uru rugendo bashingiye ku busabe bwa bamwe muri bo baherukaga mu Mujyi wa Kigali, Igihugu kibohorwa ku buryo batazi aho iterambere ryacyo rigeze.

Basobanuriwe amateka y’uko Jenoside yahagaritswe

Abagize ubumuga bukomeye ngo bari bazi ibyo babayemo mu myaka 1994, gusa by’umwihariko ariko ngo buri wese yari azi ibyabereye mu gace yari aherereyemo gusa mu gihe cyo guhagarika Jenoside n’urugamba rwo kubohora Igihugu.

Yavuze ko uyu munsi wabaye umwanya mwiza wo kubona ikigero cy’ubwicanyi bw’indengakamere bwakozwe n’Interahamwe ndetse banibonera amateka y’urugamba rwo kubohora Igihugu no guhagarika Jenoside bibuka bimwe babayemo.

Bagaragarijwe ko kugira ngo Jenoside igerweho habanje gucamo ibice umuryango Nyarwanda

By’umwihariko ariko ashingiye ku mateka babonye n’iterambere ry’Igihugu kimaze kugeraho, bibaha imbaraga ko ingingo zabo z’imibiri zatakaye zitagendeye ubusa kandi bitanga ikizere ko Igihugu kizagera kuri byinshi.

Ati “Twabonye uburyo Jenoside yakoranywe ubugome bw’indengakamere, ibyo byasaga nk’aho ari bishya ku muntu n’ubwo twabibayemo ariko ukurikije ibyo twabonye mu mujyi wa Kigali, n’ibyo twabonye muri ayo mateka ukongera ukareba aho Igihugu kigeze ubona ko ibice byacu by’imibiri byatakaye, amaboko, amaguru, abapfuye, natwe turiho ntitwari tuzi ko tuzasoza kuko n’abapfuye bari abagabo.”

Bashimangira ko iterambere Igihugu kigezeho ribibagiza zimwe mu ngingo z’imibiri batakaje

Akomeza agira ati “Byaduhaye imbaraga n’icyizere cy’iki Gihugu ko kizagera ahandi haruta ahangaha ho tubona.”

Yasabye urubyiruko gukunda Igihugu, byaba na ngombwa bakagipfira kugira ngo gikomeze kubaho kandi neza.

Yashimiye buri wese wagize uruhare mu rugamba rwo guhagarika Jenoside yakorewe Abatutsi, abagira uruhare kugira ngo Igihugu gihore gifite umutekano by’umwihariko Umugaba w’Ingabo w’Ikirenga, uburyo yayoboye urugamba ndetse n’uko ayobora Abanyarwanda kuko biba icyizere ko imbere ari heza cyane.

Basobanuriwe byinshi bari bafitiye amatsiko

Yagize ati “Ndashimira buri wese wagize uruhare mu guharika Jenoside, igisirikare twabayemo kugeza uyu munsi, kandi bakaba bakomeje kubungabunga umutekano w’Igihugu by’umwihariko Umugaba w’Ikirenga, uburyo yayoboye urugamba n’uburyo ayoboye Igihugu, ibyo bitwereka ko Igihugu cyacu imbere hacyo ari heza cyane.”

By’umwihariko yishimiye ko ibyo baharaniye ko bihinduka byakozwe harimo uburezi kuri bose nta vangura iryo ariryo ryose, umutekano, ubuyobozi bwegereye kandi bubakorera ndetse no kubegereza ibikorwa remezo bibafasha kubaho neza no gutera imbere.

Bunamiye banashyira indabo ku mva zibitse imibiri y’Abatutsi bishwe muri Jenoside bashyinguwe ku rwibutso rwa Kigali ku Gisozi

Abahagarariye ingabo nabo baje kwifatanya na bagenzi babo basoje ikivi bamwe kubera ubumuga bagize

Uyu mubyeyi yashimishijwe no kwibona ku ifoto yafashwe urugamba rukirangira

Amarebe bakuramo bayashyira hafi n’amazi ku buryo imvura iguye yasubira mu mazi

Valley dam ya Gihorobwa, Akagari ka Rutaraka, ikaba no ku nkengero z’Umujyi wa Nyagatare ni imwe mu zamaze kurengerwa n’amarebe.

Nyamara amazi yayo yifashishwa mu kuhira amatungo yo mu Midugudu iyikikije ndetse akanifashishwa mu kuhira imyaka mu mirima ihegereye.

Kuri ubu hari abantu batangiye kugenda bakuramo amarebe n’ubwo uburyo bikorwamo bigaragara nko kuyabagara, nk’uuko umwe mu baturage utifuje kujya mu itangazamakuru yabisobanuye.

Abakuramo amarebe ngo basa n’abayabagarira

Yagize ati “Ubundi abakuramo amarebe si uku babigenza, ibi rwose ni nko kuyabagara. Ubundi kuyakuramo neza, ni ukureba ko nta muzi wayo usigara ku nkombe y’amazi kandi ibyo bakuyemo nabyo bikajugunywa kure.”

Umukozi w’Akarere ka Nyagatare uyobora ishami ry’Ubuhinzi, Ubworozi, Amashyamba n’Umutungo kamere, Shyaka Kenneth, avuga ko hari umushinga utaratangira uzakura amarebe muri valley dams ebyiri ariko ubundi mu busanzwe abakoresha amazi yazo aribo baba bafite inshingano zo kuzibungabunga no gukuramo ayo marebe.

Ati “Hari uburyo bwo kuyasana uretse ko abayakoresha baba bagomba kubyikorera ubwabo ariko hari umushinga uhari n’ubwo utaratangira neza, wo kudusiburira valley dams ebyiri harimo n’iya Bwera kugira ngo ariya marebe avemo.”

Baratera ibishyimbo nko muri metero ebyiri gusa uvuye ku mazi

Uretse amarebe, zimwe muri Valley dams zikikijwe n’imirima, hari n’aho usanga umurima uri muri metero ebyiri cyangwa zitanagera uvuye ku mazi.

Shyaka Kenneth, avuga ko ubundi nta murima wakabaye uri metero ziri munsi ya 10, uvuye ku mazi mu rwego rwo kwirinda ko itaka riwuvamo ryasiba valley dam.

Nanone ariko ngo iyo bigaragaye ko ahantu uwo murima uri haturuka amazi ajya muri valley dam, izo metero zirongerwa.

Uyu murima uri muri metero zitarenga ebyiri uvuye ku mazi urimo guterwamo ibishyimbo

Nyamara abahinga hafi n’idamu ya Gihorobwa bavuga ko bahahawe na Agronome batazi amazina ngo bahahinge bakorera ibiti by’imikinga byahatewe.

Abahinga hafi n’idamu bavuga ko bahahawe ngo bakorere ibiti by’imikinga byahatewe

Abafite amikoro bo mu Karere ka Gatsibo bagiye kujya bashyingura mu irimbi ryabo ryihariye

Inama njyanama y’Akarere ka Gatsibo yateranye kuwa 29 Kamena 2024, yashyizeho amahoro ku marimbi rusange aho igiciro cyari hagati y’amafaranga 80,000 na 30,000 mu Mirenge y’icyaro uretse uwa Kabarore na Ngarama aho igiciro cyari hagati y’amafaranga 550,000, 200,000 na 40,000.

Nyuma ariko aya mahoro yaje kugabanywa aho Imirenge yose yashyizwe hagati ya 80,000 na 20,000 uretse umwihariko w’Umujyi wa Kabarore aho abawutuye bifuje ko irimbi rya kijyambere rikoreshwa na rwiyemezamirimo bakishyura hagati y’amafaranga 500,000FRW na 300,000FRW ndetse n’ubutaka bukaba bwaramaze kuboneka.

Agira ati “Hariya n’ibyifuzo by’abaturage bifuje ko babona irimbi ry’abifite (VVIP), umuntu akazajya agenda agatanga amafaranga ye nka kuriya kw’i Kigali bakamukorera imva akaza aje gushyingura gusa. Aho bazajya bishyura hagati y’amafaranga 300,000 na 500,000.”

Uzajya wishyura amafaranga 300,000 azajya akorerwa imva iriho beto gusa naho uwishyuye 500,000 ishyirweho amakaro.

Gasana, avuga ko n’ubwo amarimbi yose yishyuzwa ariko nanone ngo bitaye no ku badafite amikoro kuko uzajya abura uwe nta bushobozi bwo gutanga amahoro y’irimbi azajya abisaba Umukuru w’Umudugudu n’Akagari agashyingura ku buntu.

Avuga ko n’ubwo gushyingura mu ngo bitemewe ariko ushaka kubikora abisabira uruhushya umuyobozi w’Akarere ariko nabwo akagaragaza impamvu ndetse n’aho atuye n’ubuso bw’ubutaka atuyemo niba bitabangamira imikoreshereze yabwo.

Ati “Barabisaba hari ubwo ababo ariko baba barabyifuje hanyuma tukabisuzuma tukareba niba atari ku Mudugudu kuko ntiwabikorera umwe undi ngo ejo ubyange.”

Akomeza agira ati “Aho ubwo busabe bushobora kwemerwa, ni aho umuntu aba atuye wenyine mu butaka bunini hegitari guhera ku 10 kuzamura atuyemo wenyine, yashaka kuhava cyangwa ubutaka buhinduriwe icyo bwagenewe akimura abantu be.”

Avuga ko ubu barimo gushakisha amafaranga yo kugura ubutaka bwazashyirwaho amarimbi rusange mu Mirenge ibiri itayafite kuko bo ubu bifashisha ay’insengero.

Yagize ati “Dusigaje Imirenge ya Nyagihanga na Kageyo tutarabonera amarimbi rusange ariko nanone hariyo amarimbi y’insengero twavuganye n’abaziyobora ko bareka abaturage bakaba ariho baba bakoresha ariko uyu mwaka turateganya gushaka ubutaka tukabugura kugira ngo abaturage babone aho bashyingura.”

Meya Gasana, asaba abaturage kwirinda gushyingura aho babonye hose ahubwo bakitabira amarimbi rusange kugira ngo ubutaka bukoreshwe neza kandi butange umusaruro.

Mu Karere ka Kayonza, abagizi ba nabi batwitse umurima wa kawa w’umuturage

Ibi byabaye mu ijoro ryo ku wa gatatu rishyira kuwa kane tariki ya 19 Nzeri 2024, bibera mu Kagari ka Nyakanazi, Umurenge wa Murama, Akarere ka Kayonza.

Umuvugizi wa Polisi mu Ntara y’Iburasirazuba, SP Hamdun Twizeyimana, avuga ko aho bamenyeye iki kibazo inzego bireba zahise zitangira gushakisha abakoze ubu bugizi bwa nabi kugira ngo babiryozwe.

Yagize ati “Ari RIB ndetse na Polisi turimo turashakisha abakoze ubwo bugizi bwa nabi kandi baraboneka.”

Agira inama abaturage kujya bagana inzego z’ubuyobozi zibegereye bakazigaragariza ibibazo byose bahuye nabyo bagafashwa aho kwangiza ibintu by’umuntu, kumukubita cyangwa ubundi buryo bwose bumeze nko kwihorera kuko amategeko abateganyiriza ibihano bikomeye.

Mvunintwari Shaban watwikiwe umurima wa kawa avuga ko iyi nkuru yayimenye saa munani z’ijoro ahamagawe n’abaturiye uyu murima we ubusanzwe ungana na hegitari zirenga eshatu zose zihinzeho kawa.

Avuga ko bagerageje kuzimya ariko igice kimwe cyari gisasiye cyane kirashya bikomeye ku buryo zitakwera uretse gutema ibiti byazo akareba ko yenda byazashibuka ibyanze akabisimbuza.

Yifuza ko yahabwa ubutabera abagiriye nabi bagahanwa bikabera abandi bafite imitekerereze ya kinyamanswa bakaboneraho isomo.

Ati “Harimo isaso ryinshi ku buryo zahiye zigakongoka uretse kuzitema umuntu akareba ko zazashibuka. Urumva ibikorwa nka biriya biba byangiritse, icyo nkeneye ni ubutabera gusa.”

Nyuma yo gutwikirwa umurima wa kawa, hari abo akeka ngo bari barigambye ko bazamugirira nabi.

Umurenge wa Murama ukunze kugaragaramo abantu bakora urugomo barangiza bagahungira mu yindi Mirenge cyane Rwinkwavu na Kabarondo ikibazo cyarangira bakagaruka.

Itegeko Nº68/2018 ryo kuwa 30/08/2018 riteganya ibyaha n’ibihano muri rusange, ingingo ya 181, iteganya ko umuntu wese utwikira undi ku bushake ibindi bintu bitavuzwe mu ngingo ya 180 y’iri tegeko, aba akoze icyaha.

Iyo abihamijwe n’urukiko, ahanishwa igifungo kitari munsi y’umwaka umwe (1) ariko kitarenze imyaka ibiri (2) n’ihazabu y’amafaranga y’u Rwanda atari munsi ya miliyoni ebyiri (2.000.000 FRW) ariko atarenze miliyoni eshatu (3.000.000 FRW) cyangwa kimwe gusa muri ibyo bihano.

Hashize imyaka ibiri muri uyu Mudugudu bahawe amazi meza dore ko nabo bahoraga bayifuza ndetse banizeza ko bayabonye batakongera gukoresha ay’umugezi w’Umuvumba baturiye.

Muri uyu Mudugudu hari ivomo rusange ndetse n’abafite ubushobozi babashije kuyakurura bayageza mu ngo zabo.

Usengumuremyi Cassim ukoresha iri vomo avuga ko iyo yabonye abantu benshi ku munsi havomwa amajerekani hagati ya 50 na 60 uyu mubare ngo ushobora kurenga cyane igihe cy’imvura kuko amazi y’umugezi aba asa nabi cyane.

Avuga ko ahanini amazi avomwa ku ivomo rusange ari ayo kunywa naho akoreshwa indi mirimo yose ngo ni avomwa mu mugezi w’Umuvumba.

Ati “Abenshi bavoma icyambu kuko ngo nicyo cyabareze. Ni ukuvuga ngo amazi yo kunywa niyo baza kugura hano naho akora indi mirimo yose ava ku cyambu keretse iyo cyuzuye nibwo bashobora kuza hano kugura n’ayo gukoresha ibindi.”

Hari ariko n’abitwaza ko impamvu bagikoresha amazi y’umugezi w’Umuvumba ari uko hari ivomo rusange rimwe ku buryo hahora umurongo muremure.

Umwe ati “Ivomo rusange bajyayo ariko baba ari benshi umurongo urava nk’aha ukagera iyo ngiyo nawe ugende urebe. Ariko ayo kunywa bayakura ku ivomo rusange ariko ayo gukora indi mirimo bajya ku cyambu.”

Nyiranizeyimana Marie Solange twasanze ku ivomo avuga ko bibabaje kubona Leta ibaha amazi meza ariko bagenzi babo bakayarengaho bakajya kuvoma ashobora kubatera indwara.

Yagize ati “Ushobora kunywa icyambu ukarwara ariko unyoye aya meza ntiwarwara. Kuvoma ibiziba ni ubushake bwabo si ubukene none se twe abenshi bayavoma tubarusha amafaranga?”

Umuyobozi w’Akarere ka Nyagatare wungirije ushinzwe Ubukungu, Matsiko Gonzague, avuga ko bagiye kurushaho kwegera abaturage babereka ibyiza byo gukoresha amazi meza.
Avuga ko bagiye kwifashisha abafashamyumvire kugira ngo bafashe abaturage kumenya akamaro ko gukoresha amazi meza n’ibibi byo gukoresha amabi.

Ati “Kwigisha ni uguhozaho ariko tugiye kwifashisha abafashamyumvire bari mu Mudugudu bareke abaturage ibibi byo gukoresha amazi mabi ndetse n’ibyiza byo gukoresha ameza buhoro buhoro bazagenda bahinduka.”

Ibikoresho birahari nubwo aba babyeyi bavuga ko ntabihagije bihari

Guverinoma y’u Rwanda ivuga ko mu mpera z’uyu mwaka 2024, byibura 60% by’abanyeshuri basoje icyiciro rusange cy’amashuri yisumbuye bazaba biga mu mashuri y’imyuga, tekiniki n’ubumenyingiro.

Ni muri urwo rwego mu Gihugu hubatswe amashuri menshi atandukanye kugira ngo iyi ntego igerweho.

Nyamara amwe muri aya mashuri ntiyitabirwa, urugero ni urwa GS Kabare TSS, aho mu banyeshuri 15 bahoherejwe uyu mwaka kwiga amasomo ajyanye n’ubwubatsi ndetse no gukora amashanyarazi muri Level 3, hamaze kuboneka umunani gusa. Naho muri level 4 hakaba higamo 11 abandi ngo ababyeyi babo bakaba baragiye babajyana mu yandi mashuri buhoro buhoro.

Umwe mu babyeyi utifuje ko amazina ye atangazwa, wajyanye umwana we kwigira imyuga ahandi yavuze ko yabitewe n’uko kuri GS Kabare TSS, nta bikoresho byari bihari ku buryo umwana we yagira ubumenyi buhagije mu byo yiga n’ubwo iyo muganiriye neza wumva impamvu ari uko yanze ko bamuseka, kuko aya mashuri benshi nkawe bayafata nk’aho yagenewe abana bo mu miryango itishoboye bityo n’uwiga imyuga agomba kuyigira aho abaturanyi batamubona.

Yagize ati “Hariya nta bikoresho bihari, barangije umwaka bakiga kubaka umusingi w’inzu (Fondation), nsanga nta musanzu uhari n’abana bacu bari batsinze ariko twabavanyeyo, abarimu barahari pe ariko ibikoresho ntabyo.”

Nyamara ariko hari abandi babyeyi basanga hakwiye ubukangurambaga cyane mu babyeyi kuko aribo babuza abana babo kwitabira kwiga imyuga hanini kubera imyumvire itajyanye n’igihe.

Sumwiza Mebrah, avuga ko kuba barahawe amashuri y’imyuga n’ubumenyingiro, ari iby’agaciro kanini ariko nanone kubera ko bamwe mu babyeyi badakunda imyuga ngo byatumye bayangisha n’abana babo.

Ibyumba byigishirizwamo imyuga

Ati “Ababyeyi bo muri aka gace ntibarabyumva neza, birasaba ubukangurambaga bwimbitse kugira ngo hano haboneke abanyeshuri benshi kuko amashuri ahari ariko ikibazo nitwe ababyeyi kuko ibyo ababyeyi banze abana ntibabikunda.”

Aba babyeyi ariko nanone bifuza ko ubutaha ubuyobozi nibwifuza gushyiraho amasomo y’imyuga n’ubumenyingiro ku mashuri abegereye bajya bagishwa inama kuko rimwe na rimwe bashobora guhabwa imyuga itagira icyo ibamarira mu gace batuyemo.

Umwe ati “Buriya byaba byiza bagiye batugisha inama kuko ubwubatsi ntibukunzwe cyane ahubwo hagezweho ubukanishi bw’ibinyabiziga. Ikindi abana b’abakobwa bashyiriweho amasomo yo guteka, gukora imisatsi, ubudozi no guteka byabafasha cyane kuko ariyo bisangamo cyane.”

N’ubwo hari ababyeyi bitwaza ikibazo cy’ibikoresho, ariko ugeze mu mashuri aho abana bigira uhasanga ibikoresho byinshi kandi bigezweho ndetse n’abarimu bakavuga ko ibikoresho atari ikibazo.

Uretse GS Kabare TSS na GS Nyamiyonga TSS iherereye mu Murenge wa Musheri, nayo ifite ikibazo cy’abanyeshuri nyamara ho benshi batekereza ko ubwo hari hashyizwe amasomo y’ubuvuzi bw’amatungo, abanyeshuri bagombaga kwitabira ku bwinshi kubera ko hakorerwa ubworozi cyane.

Umuyobozi w’Akarere ka Nyagatare, Gasana Stephen, avuga ko impamvu aya mashuri ataritabirwa ari uko ari mashya, ababyeyi bose bakaba bataramenya ko ahari cyangwa imyuga yigisha ikaba itari imenyerewe bityo bikaba ari inshingano z’ubuyobozi kubibamenyesha ndetse banabereka ibyiza byo kwiga imyuga.

Ubumenyingiro, u Rwanda rwitezeho kubwubakiraho ubukungu

Agira ati “Aya mashuri kubera ko ari mashya hari ababyeyi bataramenya ko ahari cyangwa se niyo myuga, bakaba batari bayimenyereye atari ukuvuga ko bayanze, biri mu nshingano zacu kubasobanurira kugira ngo babimenye babyumve banamenye icyo atanga n’inyungu ku wayize.”

Avuga ko kandi imyuga yigishwa muri aya mashuri, ikemura ibibazo biri mu Karere cyane iy’ubwabatsi n’indi ishamikiyeho nk’Akarere kubukwa cyane ndetse n’ubukanishi kuko hari ibinyabiziga byinshi cyane birimo moto.

N’ubwo aya mashuri y’imyuga n’ubumenyingiro, atitabirwa hamwe na hamwe ariko RTB ivuga ko abasoza muri aya mashuri 86% bahita babona akazi nyuma y’amezi atandatu basoje, byatumye Leta yongera ingengo y’imari igenera aya mashuri igera kuri miliyari 7.2 Frw avuye kuri miliyari 5Frw mu myaka itatu ishize.

Uruganda Mount Meru Soyco, ruherereye mu Karere ka Kayonza, rukora amavuta yo guteka muri soya, rwatangiye rufite intego yo gukora amavuta agera kuri toni 100 ku munsi, ariko ntirurabasha gukora kuri icyo kigero.

Kuba urwo ruganda rutarabasha gutanga umusaruro w’amavuta nk’uko byari bitegerejwe ngo byatewe n’uko rutabona soya ihagije kuko kugira ngo rukore izo toni 100 z’amavuta ruba rukeneye nibura toni 200 za soya ku munsi.

Imwe mu mpamvu zatumye urwo ruganda rutabasha kubona umusaruro wa soya uhagije ngo ni uko abaturage bo mu Burasirazuba aho rwubatse batari basanzwe bamenyereye kuyihinga.

Gusa Umuyobozi w’Akarere ka Kayonza, Nyemazi John Bosco, avuga ko hari n’ikibazo cy’igiciro gito cyahabwaga abahinzi.

Agira ati “Mbere ikilo kimwe cya soya cyaguraga amafaranga 500 nyuma rwaje kutwegera (uruganda), ariko natwe twari twarusabye gukorana n’abahinzi. Rwaje kwemera gufata umusaruro w’abahinzi ku mafaranga 800 ku kilo atagibwa munsi.”

Avuga ko mu rwego rwo gufasha abahinzi kwizera isoko ry’umusaruro wabo ngo bemeranyijwe n’uruganda ko rugomba kubaha amasezerano y’ubugure bw’uwo musaruro.
Ati “Ubu umuhinzi ukeneye guhinga soya mu Karere kacu kimwe no mu tundi Turere araza akagirana amasezerano n’uruganda ko ruzamugurira umusaruro.”

Avuga ko soya ikenewe cyane kuko uru ruganda amavuta rukora afasha muri gahunda yo kugaburira abana ku ishuri ariko akaba anakenewe ku isoko ryo mu Gihugu no hanze yacyo.
Asaba abahinzi kwitabira guhinga soya kuko isoko rihari kandi n’igiciro ari cyiza byongeye ibisigazwa byayo bikaba ari n’ibiryo by’amatungo cyane inka.

Santere yose yafungiwe ubucuruzi kubera EBM

Muteteri Annet ucuruza imigati na Yoghurt avuga ko aribwo yari agitangira ubu bucuruzi ari nayo mpamvu atigeze atunga iyi mashini.

Avuga ko akimara gufungirwa ubucuruzi yagiye kuyisaba ndetse aranayihabwa ariko kubera ko ataramenya kuyikoresha banga kumufungurira ubucuruzi bwe ku buryo bimwe mu bicuruzwa byamaze kwangirika.

Ati “Bamfungiye kuwa kabiri sinari mpari nari kwa muganga ariko kuwa gatatu niriwe Nyagatare barayimpa ibintu byatumye ngura telefone ya 115,000 ariko n’ubwo nayibonye banze kunkingurira kuko ngo ntazi kuyikoresha.”

Abacuruzi bavuga ko bihutiye kuzishaka ariko ntibahita bafungurirwa ubucuruzi

Daniel Ntamukunzi avuga ko batanga gutanga inyemezabwishyu z’ikoranabuhanga za EBM ariko nanone batunguwe no kubafungira ubucuruzi bwabo kandi hatarabanje kubaho ubukangurambaga.

Ikindi avuga ko kuba baramaze kuzigura bakabaye bafungurirwa ubucuruzi ndetse bakanahabwa amahugurwa ku ikoreshwa ry’iyi mashini kuko benshi batize n’abize bakaba batabyiyigisha kuko bashobora kubikoreramo amakosa.

Agira ati “Badufungurire kuko twatangiye kujya mu bihombo, EBM turazifite ariko nanone bakwiye no kuduha umwanya wo kuziga, bafite abakozi bakwiye kuza bakatwigisha kuko ibintu by’ikoranabuhanga wanakoreramo amakosa.”

Abacuruzi bavuga ko hatabayeho umwanya wo gukora ubukangurambaga cyane ko batazi no gukoresha izi EBM

Aba bacuruzi bavuga ko gufungirwa ubucuruzi bigiye kubagiraho ingaruka kuko ariho bakura amafaranga abatungira imiryango, kwigisha abana n’ibindi bikenerwa mu buzima busanzwe.

Umuyobozi w’Ikigo cy’Igihugu gishinzwe Imisoro n’Amahoro mu Karere ka Nyagatare, Rutayisire Alexandre, avuga ko abacuruzi bose bari bafungiwe bafunguriwe ubucuruzi bwabo kuri uyu wa kane tariki ya 12 Nzeri 2024.

Yagize ati “Baraye bafunguriwe bose imodoka yacu yariyo nimugoroba bafungurira abantu, baraje rwose wasanga batari bahari barababuze ariko barahageze baza gufungura umugoroba wose.”

Santere y’ubucuruzi ya Bugaragara mu Murenge wa Rwimiyaga, imiryango yari ikinze

Rutayisire ntiyifuje ko dukomeza kuvugana ahubwo yaduhaye umukozi mugenzi we wagiye mu gikorwa cyo gufunga aya mazu y’ubucuruzi wahise abwira umunyamakuru ko abatafunguriwe ubucuruzi bwabo byatewe n’uko bashatse ikoranabuhanga rya EBM mu buryo bw’uburiganya ndetse n’abari batarabona iri koranabuhanga.

Umwe mu bahagarariye abikorera mu Murenge wa Rwimiyaga, Gashugi Cassim, avuga ko n’ubwo habayeho uburangare abacuruzi ntibitabire gukoresha EBM ariko nanone Ikigo cy’Igihugu gishinzwe Imisoro n’Amahoro nacyo kitigeze gikangurira abacuruzi kuyikoresha.

Avuga ko kuba buri mwaka hari abantu bubakirwa cyangwa basanirwa amazu ariko imibare ntigabanuke ku kigero gishimishije biterwa n’urujya n’uruza rw’abantu baza gutura muri aka Karere kubera impamvu zitandukanye.

Ati “Benshi baza bashaka imibereho, hari n’abaza bahunga guturana n’imiryango yabahekuye rimwe na rimwe baragurishije n’imitungo ku bari bakiyifite ariko yahagera ubuzima bukamunanira, iyo bwanze rero bigaragara ko atishoboye ashyirwa ku rutonde rw’abafashwa mu buryo butandukanye.”

Avuga ko cyakora mbere yo kubakira abo bantu babanza kureba ko atari yarubakiwe aho yari atuye kuko azana ibyangombwa by’aho aturutse byemeza ko yarokotse Jenoside n’ibindi.

Avuga ko kandi ubu byoroshye kuko hasigaye hifashishwa ikoranabuhanga mu kumenya uwubakiwe cyangwa uwahawe ubundi bufasha busanzwe hagendewe ku ndangamuntu ye ku buryo ntawaza ngo abeshye ko atafashijwe na rimwe.

Agira ati “Ubu byaroroshye iyo umuntu yubakiwe hari database ahita ashyirwamo, niyo yajya mu kandi Karere iyo wujujemo nimero ye y’irangamuntu ibyo yafashijwe byose bihita bigaragara.”

Bimenyimana, avuga ko ubusanzwe abarokokeye Jenoside yakorewe Abatutsi mu Karere ka Nyagatare abenshi bari bafite uko bameze neza ariko nanone ngo uko bagenda bagana mu zabukuru bamwe bikagaragara ko bagenda bakena kandi bakeneye ubufasha bwa Leta.
Avuga ko bakoze ubugenzuzi mu barokotse Jenoside yakorewe Abatutsi batishoboye biza kugaragara ko imiryango 177 ariyo ikeneye kubakirwa bushya amacumbi naho 540 ikeneye gusanirwa.

Cyakora ubu 28 yo ngo yamaze gusanirwa ku nkunga z’abafatanyabikorwa mu iterambere ndetse n’Akarere ndetse no mu minsi ya vuba indi umunani (8) nayo irashyikirizwa amazu yayo arimo gusanwa.

Mu gukemura ikibazo cy’amacumbi y’abarokotse Jenoside yakorewe Abatutsi batishoboye, ubu ngo benshi baragenda batuzwa mu Midugudu y’Ikitegererezo cyane uwa Kinihira mu Murenge wa Nyagatare.

Amatungo akirwaye ubu ni inka zirindwi, intama 4 n’ihene eshanu mu Mirenge ya Kazo, Mutenderi na Rurenge mu karere ka Ngoma.

Umukozi w’Ikigo cy’Igihugu gishinzwe guteza imbere Ubuhinzi n’Ubworozi, RAB, ushinzwe kurwanya indwara, Dr, Fabrice Ndayisenga, avuga ko indwara ikigaragara bihutiye gukingira amatungo bahereye mu Mirenge yagaragayemo.

Gukingira amatungo byatangiye tariki ya 30 Kanama 2024, ku buryo hamaze gukingirwa nka 2,165 ku 10,999 ziteganyijwe bingana na 32%, Ihene 6,144 ku 20,972 bingana na 32.5% ndetse n’intama 101 ku 1,028 bingana na 56.8%.

Avuga ko ibikorwa byo gukingira byamaze kurangira mu Mirenge ya Kazo na Mutenderi bikaba bikomereje mu yindi Mirenge isigaye 12 kuri 14 igize Akarere ka Ngoma.
Dr Fabrice, avuga ko iyi ndwara iterwa n’umubu kandi no mu Rwanda iyo mibu iyitera ihari agasaba aborozi b’amatungo kujya bayoza nibura kabiri mu cyumweru kandi bakanayakingiza buri mwaka.

Ati “Kugira ngo umworozi w’inka, ihene n’intama afuhera nibura kabiri mu cyumweru (koza) kandi akanayakingiza (amatungo) buri mwaka uba wirinze indwara y’ubuganga.”

Nanone ariko asaba umuturage wese ufite itungo rirwaye kwiyambaza veterineri akarisuzuma akareba ko nta bimenyetso by’iyi ndwara kuko kenshi iziyirwaye ziramburura iyo zihaka, kugira umuriro mwinshi no kuzana amaraso mu mazuru.

Indwara y’ubuganga ishobora gufata umuntu mu gihe yafashe ku maraso cyangwa amatembabuzi y’itungo rirwaye cyane ababazi ndetse n’abariye inyama zaryo.

RAB, irasaba abaturage kwihutira kumenyekanisha itungo ryose rikekwaho cyangwa ryagaragaje ibimenyetso byihariye by’indwara y’ubuganga (kuramburura, kuva amaraso mu mazuru) ku buyobozi bu mwegereye.

Yasabye kandi ko amatungo yuza (inka, ihene n’intama) yose ari mu gace kanduye (Umurenge wa Kazo) aguma aho yororewe kandi muri icyo gihe cyose nta tungo ryemerewe kuva mu gace kamwe rijya mu kandi, ridafite uruhushya rutangwa na muganga w’amatungo ubishinzwe, rwemeza ko iryo tungo ari rizima kandi rugaragaza aho rigiye.

Aborozi b’inka, ihene n’intama barakangurirwa gukoresha imiti yica imibu ikwirakwiza iyi virusi gufuherera amatungo, gusiba ibinogo by’amazi, gutema ibihuru biri hafi y’ibiraro, kwambara imyenda n’ibikoresho by’ubwirinzi ku bita ku matungo akekwaho uburwayi, kuko iyi ndwara yanduza n’abantu.

RAB, ivuga ko igikorwa cyo kubaga inka, ihene n’intama byororewe mu Karere ka Ngoma hose kizakomeza mu buryo ariko umuntu wese wifuza kubaga akabimenyekanisha ku Kagari, iryo tungo rigasuzumwa hafatwa amaraso ko ritanduye indwara y’ubuganga ibisubizo bikaboneka mu gihe kitarengeje amasaha 24 akaba aribwo yemererwa kubagwa.

Iki gikorwa kirareba ahari amabagiro, santere zibaga aya matugo ndetse n’abantu ku giti cyabo bashaka kwibagira aya matungo kubera impamvu runaka mu ngo zabo.

Inka 27 zari zimaze icyumweru zifatiriwe n’Umurenge wa Nyagatare zasubijwe ba nyirazo

Abitangaje nyuma y’aho ku mugoroba wo kuwa gatandatu tariki ya 07 Nzeri 2024, abaturage babiri bo mu Murenge wa Rwempasha, Mwendo Alexis na Kwizera, inka zabo zari zafashwe mu ijoro ryo kuwa mbere tariki ya 02 Nzeri 2024 zikuwe mu Turere twa Kirehe na Kayonza bazisubijwe.

Matsiko, avuga ko impamvu zafashwe ari uko zagendaga mu ijoro kandi bitemewe byongeye abari bazifite mu modoka bakaba batari bafite urupapuro rwazo rw’inzira.

Ikindi avuga ko kuba arizo zafunzwe aho kuba ba nyirazo kandi aribo ba nyiri amakosa ari uko bari baburiwe irengero.

Ati “Polisi yafashe inka 27 ziri mu modoka ebyiri kandi amabwiriza avuga ko inka zitangira kugenda guhera saa kumi n’ebyiri z’igitondo kugera saa kumi n’ebyiri z’umugoroba, iyo amasaha arenze zirafatwa nyirazo agahanwa.”

Akomeza agira ati “Uretse kurenza amasaha nta n’urupapuro rw’inzira zari zifite. Haketswe rero ko zaba zibwe ari nayo mpamvu zatwawe ku Murenge wa Nyagatare. kuwa gatatu nibwo baruzanye nabwo 20 arizo zirufite. Twashatse ba nyirazo turababura kugera ubwo tubizeza ko nta kibazo bari bugire babonetse kuwa gatanu.”

Avuga ko aho ba nyir’inka babonekeye uwitwa Kwizera, yateye ubwoba ndetse anatuka inzego z’ubuyobozi n’iz’umutekano bituma afungwa ariko nanone kubera guha agaciro ubuzima bw’inka barazihabwa zijya mu nzuri ariko nanone bakoreshwa amasezerano ko zizava mu nzuri ari uko babisabiye uburenganzira hagamijwe kwirinda ikwirakwira ry’indwara ndetse no gukora ubucuruzi butemewe.

Uyu muyobozi asaba aborozi n’abacuruzi kubahiriza amabwiriza agenga ingendo z’inka zaba izaguzwe mu isoko cyangwa izaguzwe mu nzuri hagamijwe kwirinda ubujura ndetse n’ikwirakwira ry’indwara.

Yagize ati “Umuntu ukura inka mu Mudugudu umwe ayijyana mu wundi mu Karere kamwe asaba ibyangombwa ubuyobozi bw’Akagari, yayikura mu Kagari kamwe ajya mu kandi agasaba icyangombwa akagihabwa n’Umurenge naho inka yimurirwa mu kandi Karere yaba iyaguzwe mu isoko cyangwa ivanwa mu rwuri rumwe ijyanwa mu rundi icyangombwa gitangwa n’Akarere.”

Akomeza agira ati “Inka zitaguriwe mu gikomera ahubwo ari hirya no hino mu nzuri ushaka kujya kuyorora asaba agisha inama RAB ikaba ariyo itanga icyangombwa cyangwa igasaba urwego runaka kugitanga. Tubasaba rero kubikurikiza kugira ngo hirindwe indwara n’ubujura kuko nta nyungu mu guhana abaturage bacu.”

Matsiko Gonzague, asaba abakora ubucuruzi bw’inka cyangwa abimurira inka mu zindi nzuri buri gihe kujya bagendana urupapuro rwazo rw’inzira aho kwibuka kurusaba igihe bamaze gufatwa n’inzego.

Twagerageje kuvugisha, Mwendo Alex, wari ufite ikibazo cy’inka ze zari zafashwe atwemerera ko yamaze kuzigeza mu rwuri rwe uko ari 24 ndetse anemera ko enye yari yaguze mu isoko rya Kayonza nta rupapuro rw’inzira zari zifite.

Yanatwemereye kandi ko izari zifite urupapuro rw’inzira nazo zafashwe atarufite ahubwo yari yarwibagiwe.

Icyimpaye avuga ko abonye umuryango we bwite yaruhuka ku mutima

Avuga ko amakuru yahawe amaze gukura ari uko yatoraguwe n’umukecuru mu rufunzo hafi n’amakawa ku mashuri ari uruhinja ngo yambaye agakanzu k’umweru karimo utubara tw’umukara kariho udupesu inyuma ari mu ngobyi y’umweru. Uwo mukecuru ngo yahise amutwara i Gicumbi mu Murenge wa Manyagiro.

Abamuhaye amakuru y’aho yatoraguwe harimo muramukazi w’umukecuru wamureze ndetse n’abo bari kumwe bamutoragura ndetse n’abo we ubwe yahuye nabo igihe yari atangiye gushakisha umuryango we.

Ati “Aho bantoraguye ngo bahankuye barimo kuva i Kigali, ngo niho babanje gucumbika. Uwandeze we yapfuye kera ahubwo abayampaye ni abo bari kumwe harimo muramukazi we ndetse n’abo twahuye, ndimo gushaka amakuru bo bambwiye ko bibuka ko aho hantu hari inkambi yabagamo abahungukaga bava i Kigali.”

Cyakora ngo ari nko mu myaka itanu y’ubukure hari abantu bigeze kuza aho yarererwaga baturutse i Kigali babwira uwamureraga ko ari umwana wabo nawe abasaba inka y’indezo basubirayo batamutwaye.

Ku myaka 12 arerwa na muramukazi w’umukecuru wamureze bwa mbere ngo yaje gushukwa n’undi muntu amuzana mu Karere ka Nyagatare ahura n’undi muryango wamureze ndetse uranamushyingira.

Agira ati “Umukecuru amaze gupfa narezwe na muramukazi we ariko nkabona batamfata neza haza umuntu aranshuka nza mu Mutara mpura n’undi muryango, twabaga i Rukomo ariko twimukira i Bugaragara ni nawo wanshyingiye niyo mbyaye nibo bampemba ariko n’ab’i Gicumbi baransura ntakibazo bose ni imiryango yanjye.”

Ababazwa no kubaho mu buzima butagira umuryango we bwite kuko kutawumenya yahuriyemo n’ibibazo byinshi.

Yagize ati ‘Nagiye mbabara kenshi, nkarira kenshi nkibaza, ndiho ndi jyenyine ku Isi? Gukura utazi umuryango wawe ntabwo ari ibintu byoroshye cyane biragoye kuko uhura n’incyuro mu miryango ikurera ari nayo mpamvu navuye mu muryango wandeze i Gicumbi. Mbonye umuryango wanjye uko baba bameze kose naruhuka umutima kabone n’ubwo ataba Data cyangwa Mama.”

Umwe mu bagize ihuriro ‘Cri du Cœur d’une Mère qui Espère’ (CCMES) cyangwa se ‘Ijwi ry’Umubyeyi utiheba’ ugenekereje mu kinyarwanda, ry’ababuze abana muri Jenoside yakorewe Abatutsi 1994, Philomene Mukamunana, avuga ko kuva iri huriro ryashingwa mu mwaka wa 2013 rikabona ubuzima gatozi 2015, abana batazi inkomoko y’imiryango barenga 20 bamaze kubonana n’imiryango yabo binyuze mu biganiro byagiye bitangwa kuri Radio zitandukanye no ku mbuga nkoranyambaga.

Avuga ko abana n’ababyeyi bakorera ubuvugizi ari ababuranye n’imiryango mu gihe cya Jenoside yakorewe Abatutsi 1994 bahunguka kugeza mu mwaka wa 2002 gusa ariko ngo babanza kuganira nabo kuko hari abisanisha n’ayo mateka.

Ati “Dufata ababyeyi baburiye irengero abana babo n’abana batazi inkomoko yabo kuva twatangira abarenga 20 abana bagiye bahura n’imiryango yabo.”

Umuryango Cri du Cœur d’une Mère qui Espère (CCMES) wihaye inshingano zo gushakisha abazimiye ari abana muri Jenoside yakorewe Abatutsi mu Rwanda mu 1994 no kubafasha gushaka inkomoko yabo; gushishikariza ababyeyi batamenye irengero ry’abana babo kubashakisha kuko ari uburenganzira n’inshingano z’umubyeyi .

Icyumweru kirashize izi nka aho zifungiye zitarisha cyangwa ngo zibone amazi

Avuga ko kuwa mbere tariki ya 02 Nzeri 2024, yazanye inka 20 yaguze mu Karere ka Kirehe ku mafaranga y’u Rwanda Miliyoni hafi 19 ndetse zihabwa n’urupapuro rw’inzira n’ubuyobozi bw’Akarere ka Kirehe ariko ageze ku muhanda ukata ugana ku kiraro gihuza Umurenge wa Nyagatare n’uwa Rwempasha afatwa na Polisi.

Avuga ko yabanje kubura urupapuro rwazo rw’inzira kuko yari yarwibagiriwe aho yazipakiriye imodoka, maze bazijyana aho zimaze icyumweru zifatiriwe ku Murenge wa Nyagatare.

Bukeye ngo urwo rupapuro yararuzanye ariko inka zikomeza gufungwa ndetse asabwa gutanga amande angana n’amafaranga y’u Rwanda ibihumbi 50 kuri buri nka kandi akazisubiza aho yazikuye.

Ati “Bwarakeye icyangombwa turakizana ariko bati, ni ugutanga amande ya 50,000 Frw kuri buri nka kandi zigasubira Kirehe. Nashakishije ubuyobozi bw’Akarere, Visi meya ndamubura aho muboneye kuri telefone anyohereza ku Murenge bamuhamagaye ababwira ko ntanga amande kuri Polisi bambwiye kandi inka zigasubira Kirehe.”

Mwendo yibaza impamvu bamubwira gusubiza inka Kirehe kandi atahagira urugo cyangwa urwuri byongeye akaba yarazizanye zifite urupapuro rw’inzira ruzemerera kuza mu Karere ka Nyagatare, Umurenge wa Rwempasha.

Agira ati “Kirehe si urugo rwanjye ahubwo ni aho naziguze abo naziguze nabo bari bakeneye amafaranga barayakoresheje sinzijyana ngo bayansubize kandi nta n’isoko nsangayo. Ubu guhera ku wa Mbere bazifata kugeza ubu ntizirisha ntizinywa amazi, ndumva ngiye kuzihara nkamenya ko atari izanjye ahubwo ari iz’Akarere nta kindi nakora.”

Uyu muturage agaragaza n’urupapuro rw’inzira ruzikura mu Karere ka Kirehe ruzizana Nyagatare

Avuga ko yagerageje kuvugana n’Umuyobozi wa Polisi mu Karere ka Nyagatare ari nawe wamufashe amubwira ko icyo yamufasha ari uko yakwishyura amande ahandi akamuherekeza akamurenza imbibe z’Akarere azijyana Kirehe.

Cyakora, Mwendo, yemera ko aba ku rutonde rw’abambutsaga inka mu Gihugu cya Uganda mu buryo butemewe gusa akavuga ko n’ubwo yarubaho bwose nanone batamusanze ahegereye umupaka ku buryo bamukekaho icyo cyaha yaretse kuko yafatiwe mu Karere hagati.

Gusa hari n’amakuru avuga ko inka ze zifunzwe kubera ko ashobora kuba ari ku rutonde rw’abantu babujijwe kongera gukora ubucuruzi bw’inka mu Karere ka Nyagatare kuko babikoraga mu buryo bunyuranyije n’amategeko.

Umwe mu borozi utifuje kujya mu itangazamakuru yavuze ko inka zidakwiye gufungwa kugeza aho zicwa n’inzara kuko nta cyaha zakoze ahubwo hakabaye hafungwa nyirazo kuko ariwe ukekwaho icyaha.

Twagerageje kuvugisha ubuyobozi bw’Akarere ka Nyagatare ariko inshuro zose twahamagaye umuyobozi w’Akarere wungirije ushinzwe Ubukungu, Matsiko Gonzague, ntiyitabye telefone cyangwa ngo asubize ubutumwa bugufi twamwandikiye.

Ibyumba by’amashuri 11 bisambuwe n’umuyaga nibyo byasakambuwe n’uyu muyaga

Umuyobozi w’Akarere ka Kirehe wungirije ushinzwe Ubukungu, Nzirabatinya Modeste, yahamirije aya makuru Kigali Today, ndetse ko ubuyobozi buri gusahaka igikorwa nyuma yiri nsanganya.

Modetse avuga ko ubu batangiye ibikorwa byo kureba uko basana ibyumba byavuyeho ibisenge kugira ngo bitazakoma mu nkokora imyigire y’abana ndetse akanizeza ko kuwa mbere abana bazatangira ishuri nk’ibisanzwe.

Ubuyobozi buri gushyira imbaraga mu gushaka uko iri nsanganya ritazakoma mu nkokora itangira ry’amashuri ku wa mbere

Ati “Ubu niho turi turimo gushaka uko ibisenge byavuyeho byasubizwaho gusa n’ubwo byagera ku wa Mbere tutarasoza abana baziga nk’ibisanzwe bamwe bazajya biga igitondo abandi ikigoroba.”

Avuga ko bagiye gushyiramo imbaraga nyinshi kugira ngo imirimo yo gusana izasozwe vuba.

Uretse ibisenge by’amashuri byavuyeho nta myaka cyangwa y’umuturage yagizweho ingaruka n’uyu muyaga.

Ibyumba bitasambutse nibyo bizaba byifashishwa ubwo amashuri azaba atangiye

Ambasaderi wa Amerika yashimye intabwe u Rwanda rwateye mu guhashya Malariya

Bigirimana avuga ko kubera iyo mpamvu, Akarere kagiye gushyirirwaho umwihariko wo gukomeza gutera imiti yica imibu mu mazu, gutanga inzitiramibu ku byiciro byibasirwa n’iyi ndwara ndetse n’ubukangurambaga bwo kuyirinda no kuyivura uhereye ku Mudugudu n’amavuriro y’ibanze yegereye abaturage.

Yabitangaje ku wa Kabiri tariki ya 03 Nzeri 2024, ubwo hatangizwaga ku mugaragaro ku rwego rw’Igihugu gahunda yo gutera imiti yica imibu mu mazu, igikorwa cyabereye mu Murenge wa Karangazi ugaragaramo abarwayi benshi ba Malariya.

Bigirimana, avuga ko umwaka wa 2023, Akarere ka Nyagatare kagize abarwayi ba Malariya 49,000 ku barwayi 600,015 babonetse mu Gihugu cyose bingana na 8%.

Ni mu gihe mu mwaka wa 2016, Nyagatare yari yagize abarwayi 250,000 bigaragaza ko Malariya yagabanutseho 80% kubera gahunda yo gutera umuti wica imibu mu mazu.

Umwaka ushize wa 2023, Akarere ka Nyagatare ku baturage 1000, abarwaye Malariya ni 72 gusa mu gihe mu myaka umunani ishize bari 489 ku 1000.

Avuga ko mu mwaka ushize wa 2023 mu Karere ka Nyagatare abantu 99 aribo barwaye Malariya y’igikatu, babiri bahitanwa nayo.

Bigirimana avuga ko umwaka ushize ku rwego rw’Igihugu, Akarere ka Nyagatare kaje ku mwanya wa gatandatu mu kurwaza Malariya.

Akarere ka Nyagatare kagiye gushyirirwaho umwihariko mu kurwanya Malariya

Avuga ko ariko hakwiye igenzura ryihariye kugira ngo harebwe impamvu zitera izamuka ry’abarwara Malariya mu Mirenge itandukanye kuko umwaka ushize wa 2023, Malariya yikubye inshuro ebyiri ugereranyije n’umwaka wa 2022.

By’umwihariko ariko ngo umwaka ushize, Umurenge wa Karangazi niwo wagaragayemo abarwayi benshi ba Malariya mu Karere ka Nyagatare bangana na 41% by’abarwayi bose bigaragaza ko Malariya igihari ariko ngo hakaba hari n’ingamba zirambye zo kuyihashya.

Ati “Umurenge wa Karangazi umwaka ushize wagize abarwayi 20,000 ubwo ni 41% by’abarwayi bose mu Karere biwugira uwa mbere mu kurwaza Malariya. Hari ingamba z’ingenzi mu kurandura Malariya mu Karere ka Nyagatare harimo gukomeza gutera imiti, kwita ku byiciro bizahazwa nayo, abana n’abagore batwite, tubaha inzitiramibu no kuyivura ku Mudugudu no mu mavuriro.”

Umuyobozi w’Akarere ka Nyagatare, Gasana Stephen, avuga ko kuva uyu mwaka watangira kugera muri Kamena umuntu umwe ariwe umaze kwicwa na Malariya.

Muri rusange kugera muri Kamena 2024 abantu 590 nibo bahawe ibitaro kubera indwara ya Malariya harimo 231 bo mu Murenge wa Karangazi.

Avuga ko kuba Imirenge ya Karangazi, Musheri, Matimba, Rwimiyaga na Rwempasha ariyo iza ku isonga mu kurwaza Malariya n’ubwo abenshi ari abivuje bataha ngo bagiye kwibanda ahantu babonye ikibazo cyane ahegereye ibishanga bihingwamo umuceri n’ahakiri ibihuru.

Nyirangazari Esther avuga ko amaze imyaka irenga 10 atarwara cyangwa ngo arwaze Malariya kubera kurara mu nzitiramibu no gutererwa umuti wica imibu mu mazu

Yagize ati “Nka Rwempasha ikibazo kiri ku bantu bazindukira mu gishanga baje guhinga umuceri n’abahegereye, na Karangazi ni ahantu hakiri ibihuru n’imigezi aho rero niho tugiye kwibanda haba mu gutera imiti yica imibu ariko n’izindi ngamba zigamije kurwanya Malariya.”

Nyamara n’ubwo Umurenge wa Karangazi uza ku isonga mu kurwaza Malariya, hari bamwe mu baturage bo mu Mudugudu wa Gakoma, Akagari ka Rwisirabo bavuga ko bayiheruka mu miryango yabo mu myaka 10 ishize ahanini ngo babikesha gutererwa imiti yica imibu mu mazu, kurara mu nzitiramibu n’izindi ngamba zijyanye no gutema ibihuru bikikije ingo no gusiba ibizenga by’amazi.

Umwe yagize ati “Hano mpabana n’umukobwa wanjye n’abuzukuru babiri ariko ndumva aha haheruka Malariya nko mu myaka 10 sinibuka neza. Yewe no mu baturanyi sindumva uyirwaye cyangwa ngo ayirwaze.”

Umukozi wa RBC uyobora ishami ryo kurwanya Malariya, Dr Aimable Mbituyumuremyi, avuga ko kuba umwaka ushize mu Karere ka Nyagatare harabaye ubwiyongere bwa Malariya byatewe n’ibyiciro by’abantu batagerwaho serivisi uko bikwiye bitewe n’imiterere y’akazi kabo harimo abambukiranya imipaka n’abarara izamu harimo n’abatuye mu Mirenge yegereye imipaka ariko nabo ngo bakaba bazashakirwa amavuta yisigwa arinda umuntu kurumwa n’imibu.

Ambasaderi w’Amerika mu Rwanda, Eric William Kneedler, yashimye intambwe u Rwanda rumaze gutera mu guhashya indwara ya Malariya aho mu mwaka wa 2019 kugera mu mwaka wa 2022, yagabanutse ku kigero cya 85% n’impfu zayo zigabanuka ku kigero cya 82%.

Ikiyaga gihangano cya Rugeramigozi amazi yabaye make bituma abahinzi batagihinga umuceri

Avuga ko ikiyaga gihangano cya Cyabayaga, icya Base na Kiriba bizakorwa n’umushinga wa CDAT naho icya Rugeramigozi kitagihingwamo umuceri kubera amazi yabaye make ku bufatanye bw’Akarere ka Muhanga, RAB na WASAC kikazakurwamo isayo.

Avuga ko kuba ibi biyaga bitagifata amazi menshi bitubya umusaruro kuko amazi agera hake kandi nayo ari make.

Ati “Umusaruro uragabanuka kuko aho amazi yakabaye agera ntahagera. Rugeramigozi ubundi bahingaga umuceri ariko ubu ugezeyo usanga bahinga ibishyimbo. Izo ni ingaruka z’isayo ryuzuyemo n’ibindi biyaga rero urumva aho amazi yakageze ntahagera cyangwa akahagera ari makeya.”

Hitayezu avuga ko gusana ibi biyaga bihenze bityo imiryango y’abakoresha amazi mu makoperative itabibonera ubushobozi gusa akavuga nibimara gusanwa bizubakirwa ubushobozi kugira ngo bitazongera gusiba abahinzi barebera.

Yagize ati “Umwaka utaha ibi biyaga byose bigomba gutangira gusanwa ariko nanone ubundi ririya sayo riba ryaragiyemo buhoro buhoro, iyo baza (imiryango y’abakoresha amazi) kuba bariyubatse baranahuguwe bakumva ko ibikorwa ari ibyabo baba barafatiranye hakiri kare.”

Akomeza agira ati “Ubu nta bushobozi bafite bigomba gukorwa na Leta ariko noneho bakerekwa uruhare rwabo kugira ngo bajye babikurikirana kugira ngo bitazongera guteza ibibazo nk’ibi ngibi byasibye.”

Nyamara n’ubwo uyu muyobozi atanga icyizere ariko bamwe mu bahinzi bavuga ko kuba batagihinga umuceri byabateye igihombo kinini.

Umuyobozi w’itsinda ry’abahinzi b’umuceri muri Koperative ya COPRIMU, Ntakirende Ismael, avuga ko akarima yahingaga yajyaga akuramo nibura ibiro hagati ya 900 na 800 akabonamo amafaranga y’u Rwanda hafi 400,000Frw.

Guhera 2020 babura amazi bagatangira guhinga ibigori, ngo akuramo umusaruro utarenga ibiro 500 agakuramo amafaranga hagati ya 120,000Frw na 150,000Frw.

Agira ati “Urumva nkihinga umuceri nabonaga amafaranga nibura nka 800,000Frw ku mwaka none ku bigori ndabona munsi ya 300,000Frw. Ubwo se si ugusubira inyuma hari ubwo iryo ari iterambere? Bakwiye kudufasha tugasubira ku muceri rwose.”

Ubuso Koperative COPRIMU yahingaga, hegitari 12 zose ntizigihingwa umuceri ku buryo n’abahinzi bari barafashe ifumbire amazi atarabura byabaye ngombwa ko bayishyura kandi batarayikoresheje.

Umucungamutungo wa Koperative CODERVAM, Umurerwa Aisha, avuga ko ikibazo cy’amazi cyababereye imbogamizi mu buhinzi kuko hafi hegitari 300 kuri 400 basanzwe bahinga ba nyirazo bakererewe ihinga bityo bikazagira n’ingaruka mbi ku musaruro wari witezwe.

Agira ati “Twandikiye n’Akarere mu minsi yashize kubera ko hari hegitari 300 twabonaga ko dushobora kuraza. Bizagira ingaruka ku musaruro kuko niba twakabaye tubagara bwa kabiri dutera n’ifumbire ubu akaba aribwo turimo kurwana no guhinga no gutera urumva ni ikibazo.”

Akomeza agira ati “Ikindi ubu uwahumbitse umuceri azawutera wararengeje igihe warashokonkoye niko navuga. Urumva ko umusaruro uzaba mucye.”

Umuyobozi w’umuryango w’abakoresha amazi muri Koperative CODERVAM, Anatole Maniraguha, avuga ko ikibazo cyo kubura amazi yo kuhira cyatangiye mu mwaka wa 2015 ubwo urugomero rwa Ngoma rwasenyukaga ntirwongere kohereza amazi mu miyoboro yuhira.

Avuga ko nk’umuryango w’abakoresha amazi icyo bakora ari uburyo bwo kwirwanaho bakoresheje imifuka kubera ko batabasha kubona amafaranga yubaka uru rugomero mu buryo bushya.

Ati “Rwarasenyutse burundu, twe dukoresha uburyo bworoheje butaramba kuko dukoresha imifuka irimo itaka. Urumva n’iyo amazi ashoboye kuboneka turayasaranganya bigatuma abantu badaterera cyangwa ngo babagarire igihe byose ingaruka ikaba kurumbya kuko umuntu yeza nka 60% by’umusaruro yari yiteze.”

Avuga ko ubu muri P2 na P3 bataratera imbuto kandi byakabaye byararangiranye n’ukwezi kwa Nyakanga.

Yifuza ko urugomero rwa Ngoma rwakorwa vuba ndetse n’urwa Karungeri rwo rwamaze kubakwa bushya rugatangira gukora kuko ahagombaga guca umuyoboro uzanamo amazi abaturage batarahabwa ingurane.

Ikindi nanone bifuza ko ikiyaga gihangano cya Cyabayaga nacyo cyasiburwa ku buryo gifata amazi menshi.

Ikiyaga gihangano cya Cyabayaga cyarasibye ntikikibasha kubika amazi menshi

Umurima wa Koperative COPRIMU, ihinga umuceri mu kibaya cy’umugezi w’umuvumba hegitari 12 ntizigihingwa kubera ibiza ndetse n’igabanuka ry’amazi mu kiyaga gihangano cya Cyabayaga.

Umucungamutungo wayo, Fortune Murangwayire, avuga ko iki kibazo cyatangiye guhera mu mwaka wa 2020 nyuma y’aho ikiyaga gihangano kigiriyemo itaka ryinshi amazi aragabanuka ndetse n’urugomero rwa Karungeri rwuzuramo umucanga mwinshi.

Ati “Hano Mirama hegitari 12 nizo zitakigeramo amazi ku buryo nta muceri ukihahingwa byose ariko byatewe n’ibiza byatumye ikiyaga cya Cyabayaga cyuzuramo itaka ryinshi amazi gifata aragabanuka ndetse n’urugomero rwa Karungeri rwuzuramo umucanga ku buryo rutakiyobora amazi.”

Umwe mu bahinzi avuga ko kuba atagihinga umuceri byamugizeho ingaruka kuko amafaranga yabonaga mu buhinzi bwawo yari menshi ugereranyije n’ayo abona mu bigori cyangwa ibishyimbo asigaye ahahinga.

Yagize ati “Jye sinabona uko mvuga igihombo kuko niba hegitari narakuragamo toni eshanu z’umuceri nkabonamo miliyoni ebyiri zirenga ku gihembwe cy’ihinga urumva ntaho bihuriye n’ibihumbi 800 mbona uyu munsi ku bigori.”

Umucungamutungo wa Koperative CODERVAM, Umurerwa Aisha, avuga ko ikibazo cy’amazi cyababereye imbogamizi mu buhinzi kuko hafi hegitari 300 kuri 400 basanzwe bahinga ba nyirazo bakererewe ihinga bityo bikazagira n’ingaruka mbi ku musaruro wari witezwe.

Agira ati “Twandikiye n’Akarere mu minsi yashize kubera ko hari hegitari 300 twabonaga ko dushobora kuraza. Bizagira ingaruka ku musaruro kuko twakabaye tubagara icya kabiri dutera ifumbire ubu akaba aribwo turimo kurwana no guhinga no gutera”

Akomeza agira ati “Ikindi ubu uwahumbitse umuceri azawutera wararengeje igihe warashokonkoye niko navuga. Urumva ko umusaruro uzaba muke.”

Umuyobozi w’umuryango w’abakoresha amazi muri Koperative CODERVAM, Anatole Maniraguha, avuga ko iki kibazo cyatangiye mu mwaka wa 2015 ubwo urugomero rwa Ngoma rwacikaga ntirwongere kohereza amazi mu miyoboro yuhira.

Avuga ko nk’umuryango w’abakoresha amazi icyo bakora ari uburyo bwo kwirwanaho bakoresheje imifuka kubera ko batabasha kubona amafaranga yubaka uru rugomero bushya.

Ati “Rwarasenyutse burundu twe dukoresha uburyo bworoheje butaramba kuko dukoresha imifuka irimo itaka. Urumva n’iyo amazi ashoboye kuboneka turayasaranganya bigatuma abantu badaterera cyangwa ngo babagarire igihe byose ingaruka ikaba kurumbya kuko umuntu yeza nka 60%.”

Avuga ko ubu muri P2 na P3 bataratera imbuto kandi byakabaye byararangiranye n’ukwezi kwa Nyakanga.

Yifuza ko urugomero rwa Ngoma rwakorwa vuba ndetse n’urwa Karungeri rwo rwamaze kubakwa bushya rugatangira gukora kuko ahagombaga guca umuyoboro uzanamo amazi abaturage batarahabwa ingurane.

Ikindi nanone bifuza ko ikiyaga gihangano cya Cyabayaga nacyo cyasiburwa ku buryo gifata amazi menshi.

Uretse ikiyaga gihangano cya Cyabayaga mu Karere ka Nyagatare cyasibye, n’icya Rwangingo na Kiriba mu Karere ka Gatsibo ni uko gusa cyo hakaba haraciwe imirwanyasuri ibuza ko itaka rituruka mu misozi igihanamiye ryakongera kumanuka ndetse n’inkengero zacyo haterwa ibisheke.

Mu bindi biyaga bihangano bikora ariko ku buryo bitagifata amazi menshi harimo icya Rugeramigozi mu Karere ka Muhanga ndetse n’icya Base.

RAB itangaza ko igihembwe cy’ihinga 2025 A ubuso buhingwa bwiyongereyeho 10%

Avuga ko igihembwe cy’ihinga 2025 A hazahingwa ku butaka buhujeku bihingwa byatoranyijwe bungana na hegitari 802,637.

Avuga ko ibi byagezweho hashingiwe ku guhinga ubutaka bwose bushobora guhingwa no guhinga 70% by’ubutaka bwagenewe ubworozi hagahingwaho ibihingwa bigira uruhare mu kwihaza mu biribwa kandi bigafasha no mu bworozi nk’ibigori, soya n’ibishyimbo.

Agira ati “Byagezweho hagendewe ku bintu bibiri, hari uguhinga ubutaka bwose bushobora guhingwa no guhinga 70% by’ubutaka bwagenewe ubworozi hagahingwaho ibihingwa bigira uruhare mu kwihaza mu biribwa kandi bikanafasha mu bworozi nk’ibigori, ibishyimbo na soya.”

RAB irasaba abahinzi gutegura imirima hakiri kare kugira ngo imvura izagwe bahita batera imbuto

Ku bigori hazahingwa hegitari 274,379, hegitari 361,901 z’ibishyimbo, hegitari 59,453 z’ibirayi, hegitari 16,605 z’umuceri, hegitari 66,426 z’imyumbati, hegitari 7,305 za soya, hegitari 8,078 z’ingano na hegitari 8,491 z’imboga.

By’umwihariko Intara y’Iburasirazuba ikazagira uruhare rungana na 48.7% by’ubuso buzahingwaho ibigori, 24.5% ku bishyimbo, 56.1% ku muceri, 11.6% ku myumbati, 22.7% kuri soya, 37.7% ku mboga na 0.2% ku birayi.

Izamuhaye, asaba abahinzi gutegura imirima hakiri kare kugira ngo imvura izagwe bahita batera imbuto by’umwihariko abafite inzuri bagahinga 70% by’inzuri kugira ngo babashe kubona umusaruro w’ubuhinzi kandi banabone ubwatsi bw’amatungo yabo.

Abagide n’abasikuti bifatanyije n’abaturage mu gutunganya ikibuga cy’umupira

Mu Karere ka Gatsibo, abayobozi bifatanyije n’abaturage bo mu Kagari ka Taba, Umurenge wa Muhura, ahakozwe umuhanda w’umugenderano ndetse hanabumbwa amatafari yo kubakira utishoboye.

Nyuma y’umuganda, abaturage bahawe ubutumwa bwo kwirinda indwara y’ubushita bw’inkende (Mpox) hanozwa isuku no kwirinda ubusambanyi, kwirinda impanuka zo mu muhanda no kwirinda amakimbirane yo mu muryango.

Muri Kayonza, umuganda rusange usoza ukwezi kwa Kanama 2024, wakorewe mu Murenge wa Ruramira, Akagari k’Umubuga, Umudugudu wa Kajembe, aho abawitabiriye bacukuye imirwanyasuri kuri hegitari enye (4 Ha).

Hacukuwe imirwanyasuri ku buso bwa hegitari 4

Nyuma y’umuganda abawitabiriye baganirijwe ku ngingo zitandukanye zirimo gahunda ya Gira Wigire, gahunda y’isuku n’isukura, kwitegura igihembwe cy’ihinga 2025 A no kwirinda indwara y’ubushita bw’inkende (Mpox).

Umuyobozi w’Akarere ka Kirehe, wungirije ushinzwe iterambere ry’ubukungu, Nzirabatinya Modeste, we yifatanyije n’abaturage b’Umurenge wa Kigina, Akagari ka Rwanteru, Umudugudu wa Rusororo, mu muganda wibanze ku gusana umuhanda.

Nyuma y’umuganda yasabye abaturage gukumira ibiza mu gihe hitegurwa imvura y’umuhindo, guhinga ubuso bwose bwagenewe ubuhinzi no kwirinda icyorezo cy’ubushita bw’inkende (MPox).

Hanahanzwe imihanda y’imigenderano

Ni mu gihe, Umunyamabanga nshingwabikorwa w’Intara y’Iburasirabuza, Dr Jeanne Nyirahabimana, we yifatanyije n’abaturage b’Akarere ka Rwamagana, Umurenge wa Fumbwe mu gutunganya ikibuga cy’umupira w’amaguru mu Kagari ka Nyakagunga.

Aha bakaba banafashijwe n’urubyiruko rw’Abagide n’Abasikuti.

Abagore bari mu bitabiriye umuganda ku bwinshi

Mugisha Salomon wo mu Murenge wa Karangazi avuga ko imyaka myinshi amaranye n’umugore yamuvunishije imirimo ndetse ntatume agira uruhare ku mutungo wabo.

Avuga ko iyo yagurishaga imyaka cyangwa itungo atashoboraga kumubwira amafaranga yakuyemo ahubwo yabimuhishaga ndetse akanamugenera mu gihe hari icyo akeneye.
Ati “Nta murimo nakoraga mu rugo kandi n’imitungo nkaba ari jyewe ugiraho ububasha buyitegeka. Amafaranga yayivagamo sinashoboraga kuyamubwira ahubwo naramugeneraga kuko nahoraga numva ko ari jye uwufiteho ubushobozi bityo nkamukoreramo.”

Ibi ngo byatumaga urugo rwabo ruhoramo intonganya. Nyuma yo kwigishwa kureka amakimbirane mu gihe cy’amezi 18, avuga ko yahindutse kandi byatumye abasha kumvikana n’uwo bashakanye.

Yagize ati “Uyu munsi umutungo tubonye tujya inama uko twakoresha umutungo wacu niba ari uguhinga cyangwa kugura amatungo byose tukajya inama kandi byaradufashije cyane dutangiye kubika ifaranga mu rugo.”

Undi mu bagabo bahuguwe wo mu Murenge wa Katabagemu avuga ko imibanire ye n’umugore yari iteye agahinda kuko inshuro nyinshi ari izo umugore yabaga ari iwabo barwanye ahanini bapfa ubusinzi no kumuheza ku mutungo.
Avuga ko agitangira guhugurwa kureka amakimbirane ari bwo yamenye ko umugore afite agaciro kandi afite uburenganzira ku mitungo.

Agira ati “Jyewe uko natahaga nanyoye naramukubitaga bugacya ataha, iby’imitungo numvaga bitamureba kuko yayinsanganye. Ikindi ni uko nta murimo nashoboraga kumufasha no guhinga yabikoraga wenyine kandi byakwera nkabitegeka.”

Akomeza agira ati “Izi nyigisho mu by’ukuri zaramfashije cyane kuko ubu icyo tugiye gukora tukiganiraho, dufatanya imirimo yose yewe no ashobora kuba yoza ibyombo nanjye ncaniriye inkono. Mbega ubu turi abageni.”

Umuyobozi w’Akarere ka Nyagatare wungirije ushinzwe Imibereho Myiza y’Abaturage, Murekatete Juliet, yashimiye aba bafatanyabikorwa babafashije gukura imiryango mu makimbirane abizeza ko ibyo bakoze bazabikomerezaho.

Avuga ko bagiye kwifashisha iyi miryango yavuye mu makimbirane kwigisha abandi kuko amakimbirane mu rugo ariyo ntandaro y’ubukene no guta ishuri kw’abana.

Ati “Dusigaranye impamba ikomeye ku buryo tugiye kwifashisha iyi miryango mu gufasha abakiri mu makimbirane kuyavamo.”

Umuyobozi Nshingwabikorwa wa RWAMREC ari na bo bahuguye aba baturage, Rutayisire Fidèle, yavuze ko bishimira ibyo bagezeho harimo gukura mu makimbirane imiryango 500 ndetse ihohoterwa rikaba ryaragabanutse ku kigero gisaga 90%.

Yavuze ko kandi abafashamyumvire bahuguwe bazakomeza kugira uruhare mu kwigisha abandi nabo bakazahinduka.

Mu Karere ka Nyagatare by’umwihariko mu Mirenge ya Karangazi na Katabagemu hahuguwe imiryango 270 ku rugendo rw’impinduka ku buryo 32 yasezeranye kubana byemewe n’amategeko by’umwihariko 86 yiyemeza kongera kubana nyuma yo gutandukana.

Muri rusange umushinga BAHO wahuguye imiryango 700 mu Mirenge ya Karangazi na Katabagemu mu Karere ka Nyagatare n’Imirenge ya Remera na Kabarore mu Karere ka Gatsibo.

Muri iyi miryango 540 ikaba ariyo yiyemeje kuva mu makimbirane indi nayo ikaba igifasha n’ubwo yigishijwe igihe cy’amezi 18 yose.

Uretse ikibazo cya Internet mu Tugari, hari n’udushaje dukeneye gusanwa no kutwubaka aho tutari

Umunyamabanga nshingwabikorwa w’Akagari ka Kirebe, Umurenge wa Rwimiyaga, Ngabonziza Celestin, avuga ko hashize amezi arenga atandatu, Akagari gahawe internet ariko nyuma yagize ikibazo ku buryo itagikora ku mpamvu nawe atazi ku buryo gutanga serivisi bisaba ko yigurira iyo kuri telefone ye igendanwa.

Ati “Ntikora naranababuze ngo badusuzumire barebe. Ubu nkoresha Mega zanjye mu buryo bwo gufasha abaturage kuko internet idakora cyakora ntabwo bimaze iminsi, ntegereje ko baza kundebera niba yaratirimutse icyerekezo giteganye n’umunara wa Nyarupfubire simbizi.”

Umunyamabanga nshingwabikorwa w’Umurenge wa Nyamugari, Akarere ka Kirehe uhana imbibe n’Igihugu cya Tanzaniya, Karahamuheto Claudius, avuga ko mu Tugari batanga serivisi kuko internet ihari uretse ngo habaye ikibazo kidasanzwe.

Yagize ati “Kugeza ubu ntakibazo Utugari twose dufite internet keretse igihe wenda habaye ikibazo kidasanzwe ikabura.”

Minisitiri Musabyimana yavuze ko kubona Akagari kadafite internet muri iki gihe ari icyaha kitababarirwa

Minisitiri w’Ubutegetsi bw’Igihugu, Musabyimana Jean Claude, ubwo yasozaga umwiherero w’abayobozi mu nzego zitandukanye mu Ntara y’Iburasirazuba, yavuze ko Akagari kagomba kugira internet kugira ngo bifashe abayobozi guha abaturage serivisi.

Yagize ati “Kugira Akagari katagira internet icyo kintu ni icyaha kitababarirwa. Turasaba Akagari ko gatanga serivisi zo kwandika abaturage. Ntubaha internet, wabaza ngo ninjye kubaza gitifu, ndamubaza iki kandi uri Meya, ushinzwe iki?”.

Yanasabye abayobozi b’Uturere gukora ibishoboka bakubaka Utugari aho tutari ndetse bakanavugurura ututameze neza.

Uretse interinete, hari bimwe bice mu Ntara y’Iburasirazuba kubona uko uhamagara bigorana cyane ibyegereye ibihugu bituranyi nka Tanzaniya na Uganda.

Urugero nko mu Karere ka Nyagatare, kubona kuri telefone umuntu uherereye mu Kagari ka Karushuga ubwo aba yuriye umusozi. Mu Kagari ka Kirebe naho ahitwa Kanombe ni uko. Mu Murenge wa Rwempasha mu Mudugudu w’Inkiko, uwa Mashaka muri santere ya Agasima, ndetse n’Imididugudu ya Kinungu na Gicwamba ni uko nk’uko byemezwa n’abanyamabanga nshingwabikorwa b’Utugari iyi Midugudu iherereyemo banifuza ko hakongerwa iminara.

Abayobozi b’Uturere tugize Intara y’Iburasirazuba bose bari bitabiriye uyu mwiherero

Yabibasabye ku cyumweru tariki 25 Kanama 2024, ubwo yasozaga umwiherero w’iminsi ibiri wahuje abayobozi b’Intara y’Iburasirazuba n’Uturere tuyigize n’abandi bafatanyabikorwa batandukanye waberaga mu Karere ka Bugesera.

Mu myanzuro yafatiwe muri iyi nama harimo gukemura ibibazo by’abaturage no kunoza imitangire ya serivisi, gukemura ibibazo bibangamiye imibereho myiza y’abaturage no kwita ku isuku n’isukura.

By’umwihariko ariko abayobozi mu Ntara y’Iburasirazuba basabwe gukangurira abaturage kwirinda indwara y’ubushita bw’inkende (Mpox).

Minisitiri Musabyimana yasabye abayobozi kurushaho kwegera abaturage

Minisitiri Musabyimana yasabye abayobozi kudakura imitima abaturage kubera ko u Rwanda rudafite abantu benshi banduye iyi ndwara ariko kandi bakwiye kubakangurira kwirinda mu gihe hari n’uwo bayikekaho bakihutira ku bimenyesha inzego zibegereye kugira ngo avurwe hakiri kare.

Yagize ati: "N’ubwo waba wambaye agakingirizo abenshi batinya kubivuga ariko muzabibwire abaturage ubwo hiyongeraho n’ibindi iyo wisiritanye n’umuntu uyifite afite agasebe ahantu ushobora kuyifata n’ibindi. Muzababwire ko nta gikuba cyacitse, ntabwo dufite abantu benshi ariko indwara nka ziriya zirihuta abaturage bakwiye kubimenya niba hari uwo babonye, hari aho yagaragaye bahavuge hamenyekane basuzume ko ariyo umuntu bamuvure hakiri kare".

Abayobozi mu nzego zitandukanye nabo bari bitabiriye

Abayobozi kandi biyemeje gushyira imbaraga mu kunoza imikorere y’irondo no gushyiraho ingamba zo gushyira mu bikorwa gahunda y’Igihugu yo kwihutisha iterambere (NST2).

Biyemeje kandi guteza imbere urubyiruko no kuruhuza n’amahirwe ahari, gukurikirana ko abana bose bajya mu ishuri no kubaka ubushobozi bw’inzego.

Aborozi bahitamo kugurisha amata mu dusantere no muri Resitora kubera kutagira ikusanyirizo

Avuga ko ikibazo cy’ikusanyirizo kizwi kandi barimo guteganya gushaka igisubizo ku buryo ngo bitarenze umwaka utaha aborozi bazaba babonye ikusanyirizo.

Ati “Gushyira hamwe umukamo w’aborozi bo muri Rukara turabiteganya bitarenze umwaka utaha kuba habonetse ikusanyirizo.”

Ubundi aborozi bo mu Murenge wa Rukara bagemura amata y’inka zabo ku makusanyirizo ya Buhabwa mu Murenge wa Murundi na Nyamiyaga mu Murenge wa Gahini.

Bamwe mu borozi bavuga ko bibagora kugera kuri aya makusanyirizo kuko ari kure yabo bityo bibaye byiza babona iryabo.

Umwe ati “Kuva hano ukagemura Buhabwa mu by’ukuri ni kure cyane bisaba gukama mu gicuku kugira ugereyo hakiri kare. Abayajyana Nyamiyaga ho bakunze kwamburwa nab a rwiyemezamirimo bayatwara.”

Aba borozi bavuga ko bamwe muri bo bahitamo kugurisha amata y’inka zabo mu dusantere tubegereye cyangwa bakayaha abacunda bakagabana iminsi umworozi afata iminsi itanu mu cyumweru umucunda agafata ibiri isigaye.

Akarere ka Kayonza kabarirwamo inka zisaga 75,000 zitangwa umukamo ungana na litiro 25,000 ku munsi yakirirwa ku makusanyirizo manini atandatu (6) n’amatoya arindwi (7).

Akarere ka Kayonza kandi kakunze kurangwamo aborozi benshi bahitamo gucuruza amata yabo atanyuze ku makusanyirizo kubera ko nta soko rihamye bari bafite cyakorwa ubu amata yose akazajya agemurwa ku ruganda Inyange ruherutse kuzuza uruganda rukora amata y’ifu ruzakenera amata angana na litiro 650,000 ku munsi.

Uyu ni we wiyitiriye kuba umushinjacyaha yaka Mukandayisenga amafaranga ngo amufashe mu kibazo cya mubyara we

Kuwa kabiri w’iki cyumweru, Mukandayisenga Beatrice, yaje ku rukiko rwisumbuye rwa Nyagatare, ashaka umushinjacyaha wamufasha mu rubanza ruregwamo mubyara we icyaha cyo gukubita no gukomeretsa.

Avuga ko bahasanze umugabo ababaza ikibagenza bamubwira ntacyo basize inyuma ndetse banamusaba kubereka umushinjacyaha wabafasha mu kibazo cyabo kuko bashakaga ko yabafasha mu buryo bwo kwiyunga.

Uyu mugabo yaramuberetse ndetse umushinjacyaha abasobanurira inzira banyuramo kugira ngo icyifuzo cyabo kigerweho.

Kugira ngo azabone uko abiba kandi yiyise umushinjacyaha, uwo mugabo ngo yabatiye telefone ngo ahamagare umuntu akuramo nimero nyuma abahamagara abasaba amafaranga kugira ngo icyifuzo cyabo kigerweho.

Ati “Umushinjacyaha yambwiye ko kwiyunga bibera ku Mudugudu byarangira Akagari kagateraho kashe ku rupapuro rw’ubwiyunge nkarumuzanira umuntu akazaza kuburana urwo rupapuro ruri muri dosiye ye.”

Avuga ko we na bagenzi be bafashe inzira bagataha ariko bakigera mu Mudugudu wa Mirama ya kabiri, uwo mugabo yabahamagaye ababwira ko bihutisha inyandiko y’ubwimvikane ku Mudugudu bikazagera kuwa kane yasinyweho n’Akagari hanyuma bakayimuzanira akabafasha ibisigaye.

Bucyeye kuwa gatatu nabwo ngo yarongeye aramuhamagara amubaza aho bigeze undi amubwira ko batarabona ubuyobozi bw’Akagari ariko ibindi byo ku Mudugudu babisoje undi nawe amusaba kumwoherereza amafaranga 50,000 kuri telefone akabona uko akurikirana ikibazo neza.

Agira ati “Kuwa gatatu yarampamagaye ambwira ko ikibazo cyamaze koroha kuva abakorewe icyaha bemera ubwumvikane ndetse ko yamaze no kuganira n’ufunze. Yambajije amafaranga banciye kugira ngo habeho ubwumvikane mubwira ko ari 120,000 ni uko ansaba kumwoherereza 50,000 kuri telefone hanyuma ngo tuzagaruke kuwa kane atwunge, bwa bunyacyaro ndayohereza.”

Kuwa kane tariki ya 22 Kanama 2024, Mukandayisenga na bagenzi be bazindutse baza ku rukiko rwisumbuye rwa Nyagatare kugira ngo bahure n’umushinjacyaha bamaze iminsi bavugana bamuhamagaye ababwira ko bashyira andi mafaranga 70,000 kuri telefone kuko atayafa mu ntoki ku rukiko kuko byakwitwa ruswa.

Ibi ngo byatumye akeka ko umuntu bavugana atari umushinjacyaha w’ukuri kuko yangaga ko bahura imbonankubone ku rukiko ariko k’ubw’amahirwe mu gihe yari agiye gutega moto ngo atahe ahura na wa mugabo babwiye ibyabo akabereka umushinjacyaha ari nawe yari yaketseho kubyiyitirira aramufata amusubiza amafaranga ye yari yaramuhaye.

Agira ati “Bwacyeye dutega imodoka turaza tugeze hano Nyagatare ndamuhamagara ambwira ko tutahurira ku rukiko kandi n’amafaranga 70,000 yansabaga ambwira ko atayahakirira kuko byakwitwa ruswa ahubwo ngomba kuyashyira nayo kuri telefone.”

Akomeza agira ati “Nagize amakenga ndetse menya ko uwo muntu atari umushinjacyaha w’ukuri ahubwo natekewe umutwe. Twahise tuza hano kwa Ngoga gutega moto ngo dutahe ariko ngize amahirwe mubona hariya mu biti, duhamagaye telefone tubona aritabye niko kwifashisha abamotari baramumfatira aranayansubiza.”

Nzabanterura Justin wari waherekeje Mukandayisenga, akaba ari nawe wakorewe icyaha, avuga ko ibyo yabonye bimuhaye isomo rikomeye kandi ntawe azongera guha amafaranga kuri telefone atamuzi neza.

Yagize ati “Mbonye isomo rikomeye ntawuzongera kumpamagara ngo muhe amafaranga kuri telefone ngo mbyemere, ndabibonye rwose abatekamutwe ni benshi kandi bari henshi.”

Umuvugizi w’Inkiko, Mutabazi Harrison, avuga ko iki kibazo cy’abantu birirwa mu nkiko bagamije kwiyitirira abakozi bazo gihari ariko agasaba abaturage kuba maso bakirinda kugira uwo baha amafaranga abizeza kubafasha mu manza kuko ubutabera butagurwa ahubwo butangwa mu mucyo.

Ati “Umuntu uzajya ubabwira ngo bamuhe amafaranga kuri telefone cyangwa mu ntoki bajye babyanga ahubwo bamenye ko ari umutubuzi cyangwa umutekamutwe aba ashaka kubagusha mu cyaha no kubarya utwabo agamije gusebya inzego n’ubutabera kuko ubundi ubutabera butagurwa ahubwo butangwa mu mucyo.”

Avuga ko ubundi amafaranga yakwa mu butabera ateganywa n’amategeko harimo ay’igarama y’urubanza, kopi y’urubanza cyangwa igihembo cy’avoka uzwi.

Mukandayisenga avuga ko yagize amakenga y’umuntu udashaka ko bahura ahitamo kumusshakisha kandi aramubona

Mutabazi avuga ko uretse n’aba biyitirira abakozi b’inkiko bagamije kwiba abaturage ngo n’abakozi b’inkiko bazwi nta wemerewe kubaha amafaranga ngo babafashe mu rubanza kuko baba bakoze icyaha cya ruswa bityo agasaba abaturage kujya batanga amakuru.

Avuga ko abakozi b’inkiko bahamijwe icyaha cya ruswa bahabwa igihano cy’igifungo kirenze imyaka itanu (5) n’ibindi birimo ihazabu kandi ibi bihano bikaba bireba n’umuturage wayitanze ntatange amakuru naho ku biyitirira kuba abakozi b’inkiko bo ngo baba bakoze icyaha cyo kwihesha ikintu cy’undi mu buryo bw’uburiganya n’ubwambuzi bushukana kandi bikaba ari ibyaha bihanishwa ibihano biremereye.

Ubwiherero rusange bumaze amezi atatu bufunze

Bizimungu Anastase ukora akazi ko guterura imizigo ahitwa kwa Ngoga avuga ko ubwiherero rusange bumaze amezi atatu bufunze ku buryo nabo batazi impamvu budakoreshwa.

Avuga ko bo ntakibazo cyo kwiherera bagira ahubwo kigirwa n’abantu bahanyura baje gushaka ibicuruzwa cyangwa abajya n’abava ku Kigo nderabuzima n’ibitaro bya Nyagatare.
Ati “Hashize nk’amezi atatu bufunze, Akarere karaje gakoresha amashanyarazi n’amazi ndetse hari n’umuhungu uharara ariko ntihakoreshwa.

Ikibazo gifitwe n’abantu baba bajya cyangwa bava kwa muganga naho twe dukoresha ubwo hepfo bacuruza ibikoresho by’ubwubatsi.”

Abagenzi bihagarika nta kibazo bafite ko hari ubareba

Umubyeyi ukora isuku ku muhanda werekeza ku Kigo nderabuzima n’ibitaro bya Nyagatare utifuje ko amazina ye atangazwa yavuze ko abenshi bahitamo kwiherera mu biti bigize ubusitani bw’umujyi cyangwa mu mikinga kubera ko ubwiherero rusange bufunze.

Yagize ati “Jyewe wirirwa aha mva mu rugo nabisoje byakwanga nkajya hepfo mu mikinga ariko abagabo bajya muri ibi biti unarebye neza wabona aho banyara.”

Umwe mu bakora akazi ko gutwara abantu n’ibintu ku igare mu Mujyi wa Nyagatare, Niyodusenga Pierre, avuga ko n’ubwo ubwiherero bufunze bitari bikwiye ko hari abantu bihagarika mu biti kuko bateza umwanda mu mujyi.

Agira ati “Niba umuntu azi ubwenge akajya kwihagarika hariya mu biti, agatera amasazi n’undi mwanda urumva byemewe ahubwo ko ari amakosa akomeye.”

Umwe mu bacuruzi nawe utifuje ko amazina ye atangazwa avuga ko bafite ikibazo gikomeye cy’umwanda n’umunuko uturuka mu biti aho abantu bihagarika ku buryo ubuyobozi bwakabaye bukemura icyo kibazo bugashaka rwiyemezamirimo ukoresha ubwiherero rusange.

Aha ni hamwe mu ho abagenzi bahinduye ubwiherero

Twagerageje kuvugisha ubuyobozi bw’Akarere ka Nyagatare ariko Umuyobozi wako, Gasana Stephen, asaba ko yabanza kubaza abakurikira ibijyanye n’isuku akaza gutanga amakuru yuzuye ariko birangira atongeye kwitaba telefone.

Yagize ati “Reka mbanze mbaze ababikurikirana aho bigeze kuko nziko bugiye gukora bitandukanye hari abantu bagiye kubukoresha nze kugusubiza.”

Burikete imwe ikozwe mu bisigazwa by’imyaka igura amafaranga 200

Avuga ko uyu mushinga yawutekereje mu mwaka wa 2019 agendeye ku kibazo cy’ibicanwa gikunze kugaragara mu Karere akomokamo.

Ariko by’umwihariko ngo yayakoze agamije kurengera ibidukikije no gufasha abaturage guhendukirwa n’ibyo bashora kugira ngo babashe kubona ibyo gutekesha ibyo kurya.

Ati “Dufite ikibazo cy’ibicanwa mu Ntara y’Iburasirazuba aho usanga amashyamba yangizwa kubera gushaka inkwi n’amakara yo gutekesha. Nahisemo gushakira igisubizo ku bisigazwa by’imyaka rimwe na rimwe usanga byandagaye ahantu hose cyangwa bamwe bakabitwika.”

Butoyi avuga ko amakara akozwe muri burikete agabanya ibicanwa inshuro ebyiri kandi akaba ahendutse ugereranyije n’asanzwe akoreshwa yatwitswe mu biti.

Agira ati “Burikete ya 200frw iteka ibiryo byoroheje nk’igitoki cyangwa umuceri, ugateka n’imboga ndetse n’icyayi ariko amakara ya 200frw iwacu i Bugesera ntahaba keretse aya 500frw kandi agateka ibiryo nk’ibyo.”

Umufungo umwe w’amakara ugura amafaranga 200 mu bice by’icyaro mu Karere ka Nyagatare

Mukeshimana Gloria umuturage w’Akarere ka Nyagatare avuga ko amakara y’amafaranga 200 ntakindi yateka uretse ibiryo byoroheje nabwo inkono imwe gusa kandi nabwo mu gihe cy’impeshyi aba adahenze.

Yagize ati “Nk’ubu amakara ya 200frw yateka igitoki n’imboga ariko ubitekanye akarangirira ku nkono imwe gusa ntakindi waterekaho. Mu gihe cy’imvura bwo keretse nk’aya 500frw niyo yateka ibiryo nk’ibyo.”

Butoyi n’ubwo yavumbuye ubu buryo bwo gukora burikete mu bisigazwa by’imyaka nta cyemezo runaka afite kimwemerera kubikora cyane ko ubusanzwe nabyo ari ifumbire iba igomba kuguma mu murima.

Babitangaje kuri uyu wa kabiri tariki ya 20 Kanama 2024, ubwo mu Karere ka Rwamagana hafungurwaga kumugaragaro imurikabikorwa ry’abikorera mu Ntara y’Iburasirazuba aho abamurika benshi bari mu bikorwa byo kongerera agaciro umusaruro ukomoka ku buhinzi ndetse n’ubukorikori.

Nsabimana Theoneste wo muri Koperative Ingenzi yo mu Karere ka Gatsibo igizwe n’urubyiruko yongerera agaciro umusaruro ukomoka ku mbuto cyane inanasi, amatunda n’imyembe ndetse n’urutoki avuga ko mu myaka umunani bamaze bakora batangiye kwiteza imbere.

Avuga ko n’ubwo ibyo bakora bikunzwe ku isoko ryo mu Karere ariko nanone badashobora gukora byinshi bijya ku isoko ry’Igihugu kuko nta byangombwa by’ubuzirange barabona n’ubwo batangiye kubisaba guhera mu mwaka wa 2018 akifuza ko bakoroherezwa nk’abafite inganda ntoya bijyanye n’ubushobozi bwazo.

Ati “Umushinga umaze imyaka umunani ariko nta cyangombwa cy’ubuziranenge cyakora icya RFDA batwizeje ko dushobora kukibona ukwezi gutaha ariko S mark yo ni urugendo rugikomeje.”

Akomeza agira ati “Ibintu rero bidafite ibyangombwa ntiwashyira ku isoko ngo bishoboke kandi kuzuza ibyangombwa basaba birahenze ugereranyije n’ubushobozi tuba dufite, bakwiye kutworohereza nk’abantu bakizamuka naho ubundi kumara imyaka umunani ukora udacuruza bitera igihombo.”

Koperative ingenzi igizwe n’urubyiruko 20 rukorana n’abahinzi 45 bakorera ku buso bungana na hegitari 42 bakaba baratanze akazi ku bakozi 44 harimo 26 bahoraho. Imashini bafite zifite ubushobozi bukora umutobe w’imbuto wa litiro 2,400 ku munsi ndetse na litiro 6,000 z’inzoga zikozwe mu bitoki ku kwezi.

Nyiransabimana Agnes w’imyaka 48 y’amavuko ukomoka mu Karere ka Ngoma, akora amavuta y’amamesa yifashishwa mu guteka, isabune ndetse n’ibiryo by’amatungo mu gihingwa cyitwa ikigazi.

Uyu wahereye ku mwuga w’ubudozi nabwo yongerewe ubumenyi n’umushinga wa PPMER mu mwaka wa 2004 ari nabwo yize gukora isabune avuga ko afite imbogamizi ebyiri zirimo kutagira imashini zimufasha mu byo akora ndetse no kubona ibyangombwa by’ubuziranenge.

Agira ati “Uyu mushinga natangiye nta bushobozi mfite bwo gushaka imashini. Indi mbogamizi mbona abashoramari n’abakiriya b’aya mavuta yo kwisiga yitwa Sandrine ariko nta S Mark mfite, bishoboka ubuyobozi bwamfasha.”

N’ubwo hari izo mbogamizi ariko Nyiransabimana ubu akoresha abakozi batandatu nabo bashobora kuziyongera mu gihe yaba abonye ubushobozi bwihingira igihingwa cy’ikigazi akanabona icyangombwa cy’ubuziranenge.

Umuyobozi w’urugaga rw’abikorera mu Ntara y’Iburasirazuba, Nkurunziza Jean de Dieu, yizeje abikorera bifuza ibyangombwa by’ubuziranenge ko bazabakorera ubuvugizi bikaboneka.

Guverineri w’Intara y’Iburasirazuba, Pudence Rubingisa, yavuze ko ku rwego rwa buri Karere hari abakozi bashinzwe gufasha abantu kubona ibyangombwa by’ubuzirange bityo bakwiye kubagana bakabagira inama.

Yasabye ariko abaturage b’Intara y’Iburasirazuba kongera umusaruro w’ubuhinzi n’ubworozi no kuwungerera agaciro kugira ngo babe isoko ryagutse ry’abaguzi.
Ati “Biradusaba kongera umusaruro w’ubuhinzi n’ubworozi no kuwungerera agaciro kugira ngo tube isoko ryagutse ry’abaguzi binaturinde guha icyuho za magendu ziza kwangiza ibyo tuba twagezeho.”

Yabasabye kandi kwibumbira mu makoperative kuko aribwo abantu babasha gufatanya kandi bakanungurana ubumenyi.

Iri murikagurisha ryatangiye kuwa 17 Kanama rizasozwa kuwa 03 Nzeri 2024, rikaba ryaragombaga kwitabirwa n’abamurika 260 ubu hakaba hamaze kuboneka 80% byabo.

Avuga ko CDAT, ubusanzwe itunganya ibishanga n’ibibaya byuhirwa, gukora amaterasi no gucukura imirwanyasuri ku misozi ikikije ibyanya byuhirwa, gufasha abaturage kugera ku bigo by’imari binyuze muri BDF na BRD ndetse ukanafatanya na Minisiteri y’ubuhinzi n’ubworozi muri gahunda y’ubwishingizi bw’amatungo n’ibihingwa.

By’umwihariko ngo amasezerano bagiranye n’Akarere ka Nyagatare ni ayo gutunganya imisozi n’ibibaya hifashishijwe amaterasi y’indinganire n’ayikora ku buryo hamaze gukorwa hegitari 718 z’amaterasi y’indinganire n’ayikora hegitari 274.

Agira ati “Mu gukora ibi bikorwa by’amaterasi harwanywa isuru abantu barenga 7,000 babashije kubona akazi harimo abagore barenga 3,500 n’urubyiruko rurenga 1,700.”
Avuga ko batangira ibi bikorwa hari uduce tutari mu mushinga ariko natwo inyigo yo kudutunganya yatangiye nka Warufu na Gabiro ariko ku busabe bw’Intara n’Akarere twongerwamo.

Inyigo yo gutunganya igishanga cya Rwangingo-Karangazi gihuriweho n’Uturere twa Gatsibo na Nyagatare ngo yaratangiye ku buryo imirimo ishobora gutangira mu mpera z’uyu mwaka cya muri Mutarama 2025.

Inyigo yo gutunganya igishanga cya Muvumba naho ngo yaratangiye ku buryo imirimo yo kugitunganya yarangirana na Werurwe 2025.

Naho igishanga cya Cyabayaga, Matimba na Kagitumba ngo inyigo yo kuhatunganya izatangirana n’Ukwakira uyu mwaka ndetse ngo bakaba bazafasha umushinga wa Gabiro Agri Business Hub gutunganya aho izakorera.

Igishanga cya Warufu gihuriwe n’Akarere ka Gatsibo n’aka Nyagatare ngo inyigo yari isanzwe izahuzwa n’igihe ku buryo umwaka utaha w’ingengo y’imari imirimo ishobora gutangira.

Ati “Igishanga cya Warufu guhuriweho na Gatsibo na Nyagatare, hari inyigo yari isanzwe tugomba kuyihuza n’igihe ni ahantu hanini hagera kuri hegitari 3,000 inyigo idatinze umwaka utaha w’ingengo y’imari imirimo yatangira.”

Mu Karere ka Kayonza ho ngo hazatunganywa igishanga cya Karambi mu Murenge wa Murundi kugera Ntende muri Rugarama naho mu Karere ka Kirehe hasanzwe igishanga cya Nasho.

Umushinga CDAT uvuga ko ibikorwa umaze gukora byatwaye miliyari 15 Frw ku nkunga ya Banki y’Isi , ubu bakaba bari gukora indi nyigo kugira ngo bahawe andi miliyari 40 Frw bakaba bizeye ko mu mezi abiri ayo mafaranga azaba yabonetse, ibikorwa bigakomeza nta nkomyi.

Abitabiriye umwiherero biyemeje kwimakaza imiyoborere ishingiye ku muturage

Ni nyuma y’umwiherero w’iminsi ibiri wahuje abayobozi basaga 80 aharebwe ku bintu bitandukanye cyane ku gutangira umwaka w’imihigo no kuyesa ndetse no gushyira mu bikorwa gahunda y’imyaka itanu ya Perezida wa Repubulika.

Umuyobozi w’Akarere ka Gatsibo, Gasana Richard, avuga ko uyu mwiherero wari ugamije kwisuzuma n’uburyo basigasira ibimaze kugerwaho.

Ikindi ariko kwari no gutekereza uko bakora ibisigaye cyane bishingiye ku mihigo y’uyu mwaka w’ingengo y’imari n’uburyo yakweswa ku kigero kiri hejuru ugereranyije n’imyaka itambutse.

Meya Gasana Richard, avuga ko uyu mwiherero wari ugamije kwisuzuma n’uburyo basigasira ibimaze kugerwaho

Yagize ati “Twarebye ibisigaye bigomba gukorwa uko byakorwa ariko twibanda ku mihigo y’uyu mwaka uko twakomeza kwitwara neza igakomeza ikeswa kandi kurushaho.”

Avuga ko uretse ibyo hatanzwe n’ibiganiro bijyanye n’imiyoborere myiza ishingiye ku muturage n’icyo ivuze n’uburyo batanga serivisi nziza ku baturage n’abandi bagana Akarere bose.

Ati “Hatanzwe ibiganiro ku miyoborere myiza cyane cyane ishingiye ku muturage twibukiranya icyo ivuze kandi buri wese ariyemeza, ariko nanone twiha n’intego yo gutanga serivisi nziza ku baturage bacu n’abandi batugana bose.”

Muri uyu mwiherero kandi hanarebewe hamwe kandi hafatwa n’ingamba ku mutekano mu Karere kugira ngo urusheho kuba mwiza mu baturage ndetse babone n’umudendezo mu byo bakora byose.

Umuyobozi w’inama Njyanama y’Akarere ka Gatsibo, Sibomana Said, yasabye abayobozi kwikubita agashyi umuturage agahora ku isonga

Amazu yavuyeho ibisenge

Abitangaje mu gihe ku mugoroba wo kuwa Kane tariki ya 15 Kanama 2024, imiryango 29 yo mu Murenge wa Nyagihanga Akagari ka Nyagatabire, amazu yayo yavuyeho ibisenge kubera imvura ivanze n’umuyaga.

Uretse ibisenge by’amazu n’imisarane 13 yarasambutse ndetse na hegitari imwe y’urutoki irangirika kubera umuyaga n’urubura.

Meya Gasana, avuga ko bikimara kuba ubuyobozi bwihutiye gusaba abaturanyi gucumbikira abahuye n’ibibazo ariko abafite imiryango y’abantu benshi bakodesherezwa andi mazu n’ubuyobozi.

Cyakora yizeza ko uku kwezi kwa Kanama kutazarangira iyi miryango igisembera ahubwo izaba yamaze gusubizwa mu buzima busanzwe yari ibayemo.

Imirima y’intoki yarangiritse

Ati “Twihutiye kubanza kubashakira aho baba ndetse n’ibyo bakenera cyane ibikoresho by’isuku no gushaka amabati ku buryo amazu yakongera agasakarwa, turabona uku kwezi kuza kurangira imiryango yahuye n’ibiza yongeye gusubira mu buzima yari isanzwe irimo.”

Avuga ko Akarere ka Gatsibo kari mu Turere turangwamo umuyaga mwinshi bityo agasaba abaturage kuzirika ibisenge by’amazu yabo kugira ngo hirindwe ko ibiza byabasiga iheruheru.

Amazu menshi yavuyeho ibisenge

Ibi byabaye ku mugoroba wo kuwa Kane tariki ya 15 Kanama 2024, ubwo imvura ivanze n’umuyaga yagwaga mu Kagari ka Nyagatabire amazu menshi akaba yavuyeho ibisenge ndetse n’intoki ziragwa.

Kugeza ubu ibarura rimaze gukorwa ryagaragaje ko amabati 547 yamaze kwangirika. Inkuru ya RBA ivuga ko ubuso bw’imyaka yangiritse bwo bukibarurwa.

Intoki zaguye kubera umuyaga mwinshi

Kigali Today ntirabasha kubona ubuyobozi kugira ngo bugire icyo butangaza kuri aya makuru ndetse n’icyo abaturage amazu yabo yavuyeho ibisenge bafashwa.

Iyi nkuru turacyayibakurikiranira...

Inteko z’abaturage zigiye kwifashishwa mu gukangurira aborozi gushyira inka mu biraro

Tariki ya 12 Nzeri 2024, nibwo biteganyijwe ko aborozi bose bazaba bahinze inzuri zabo kuri 70% n’aho ubuso busigaye bugashyirwamo ibikorwa remezo bifasha mu bworozi harimo ibiraro, hangari z’ubwatsi, amahema afata amazi n’ibindi.

Uretse ubwatsi bw’amatungo ibindi bihingwa biteganyijwe ni ibigori, ibishyimbo na soya hakaboneka umusaruro wabyo ku bwinshi ariko ibisigazwa byabyo bikagaburirwa inka.

Umuyobozi w’ihuriro ry’aborozi mu Karere ka Nyagatare, Kayitare Geoffey, avuga ko aborozi bamaze kwitabira iyi gahunda ari bake atari ukubera imyumvire mike ahubwo ari ubushobozi bwo kudahita babishyira mu bikorwa.

Ati “Ikibazo si ukutumva ibyiza byabyo ahubwo ni ubushobozi abantu bagahitamo kugenda babikora buhoro buhoro ariko intego ari uko buri wese agomba kubigeraho.”

Kimwe mu bibazo bikigaragara ni imashini zihinga zikiri nkeya

Cyakora ngo mu rwego rwo kwihutisha iyi gahunda bahisemo kujya mu nteko z’abaturage babakangurira guhinga inzuri kugira ngo haboneke ibiribwa byinshi ariko n’amatungo abone ibiyatunga.

Yagize ati “Hari aho bigenda buhoro twahisemo kujya mu nteko z’abaturage kugira ngo dukore ubwo bukanguramba kuko buriya uretse no kubonera inka ubwatsi, guhinga ubuso bizatuma babona n’umusaruro mwinshi basagurire n’isoko.”

N’ubwo imashini zihinga ubu zifitwe n’amakoperative atatu kuri 15 ahari ngo hari na gahunda y’uko umwaka utaha andi atatu nayo azaba yabonye izayo ku buryo zizajya zinifashishwa n’andi makoperative atarazibona.

Mu Karere ka Nyagatare abanyeshuri barebwa n’iyi gahunda ni 23,029 ariko kugera tariki ya 09 Kanama 2024, abamaze kwitabira amasomo ni 18,676 bangana na 81.1%.
Abanyeshuri barebwa n’iyi gahunda ni abiga mu mwaka wa mbere kugera mu mwaka wa gatatu w’amashuri abanza bikaba biteganyijwe ko bazasoza amasomo tariki ya 30 Kanama 2024.

Umuyobozi w’Akarere ka Nyagatare wungirije ushinzwe imibereho myiza, Murekatete Juliet, avuga ko abagomba kwiga muri iyi gahunda ari abatsinzwe amasomo babonye amanota ari munsi ya 40%.

Avuga ko iyi gahunda izabafasha cyane kuko abarimu bazabasha kubakurikirana neza bitandukanye na mbere bari benshi mu ishuri.

Abazatsinda ibizamini neza ngo bazagira amahirwe yo kwimuka nka bagenzi babo batsinze mbere.

Ati “Bazahabwa ibizamini nanone turebe ni bande ababishoboye bimukire mu yindi myaka. Ni gahunda yo gufasha kandi abana mu kiruhuko kugira ngo bakomeze kwitabwaho nabo bakarushaho gukunda ishuri.”

Gahunda nzamurabushobozi uretse ngo gukundisha abana ishuri ngo inafasha ababyeyi kugira indi mirimo bakora kuko abana baba bari ku ishuri kandi bitaweho kuko bahabwa n’igikoma.

Avuga ko ababyeyi batarohereza abana babo ku ishuri kandi baratsinzwe bagiye kuzakurikiranwa kuko barimo kuvutsa abana amahirwe yo kwimuka ndetse no kubangisha ishuri kuko bishobora kubavirimo no kurita.

Yagize ati “Ubu turimo gukora urutonde kugira ngo ababyeyi batarohereza abana babo tuzabakurikirane kuko ntibikwiye ko Leta ishyiraho gahunda yo gufasha umwana ngo umubyeyi amwicire ayo mahirwe, ibyo bishobora kuzatuviramo ko abana bata ishuri kandi ataribyo.”

Yibutsa ababyeyi kandi ko ari uburenganzira bw’umwana kwiga no kwitabwaho bityo badakwiye kubavutsa aya mahirwe yo kongera kwiga bakareba ko batsinda ibyari byabananiye mbere bakimuka.

Umuyobozi Mukuru w’Umwalimu SACCO arizeza ko mu gihe cya vuba bazatangira gutanga inguzanyo z’ubuhinzi n’ubworozi

Avuga ko hamaze gushyirwaho ubwoko bw’inguzanyo bubiri aribwo ‘Aguka Mwalimu’ na ‘Sarura Mwalimu’ ku buryo ubu ngo izi nguzanyo zamaze gushyirwa muri sisiteme ibikenewe byose nibimara kurangira izi nguzanyo zizatangira gutangwa ku bazifuza.

Ati “Hari inguzanyo ya Aguka Mwalimu na Sarura Mwalimu zamaze gushyirwa muri sisiteme ku buryo hari ibikirimo kongerwamo nibirangira akaba aribwo tuzatangira kuzitanga ariko amabwiriza ni uko amafaranga yawe y’ubuhinzi agomba kuba aca kuri konti yawe ya Mwalimu SACCO.”

Avuga ko uretse n’ubuhinzi ngo n’ubucuruzi abarimu bakora, amafaranga babukuramo agomba kunyuzwa kuri konti ya Mwalimu SACCO kugira ngo bizajye byarohera usaba inguzanyo hatarebwe ku mushahara gusa.

Umuyobozi w’Urwunge rw’amashuri rwa Rwinsheke mu Murenge wa Gatunda, Claudette Mukamusoni, avuga ko uretse kuba batunzwe n’akazi ko kwigisha bagira n’ibindi bikorwa bibateza imbere by’umwihariko ubuhinzi n’ubworozi.

Avuga ko mu bindi bigo by’imari ariho bajyaga babona inguzanyo z’ubuhinzi n’ubworozi ariko mu Mwalimu SACCO bakaba batazibonaga ari nayo mpamvu bakomeje gusaba ko bashyirirwaho ubu bwoko bw’inguzanyo.

Abayobozi b’ibigo by’amashuri mu Karere ka Nyagatare basobanuriwe serivisi za Mwalimu SACCO

Yagize ati “Izi nguzanyo zirakenewe cyane kuko n’ubuzima bwacu bwa buri munsi dutungwa n’umushahara ugomba kugira ikiwunganira, ubwo buhinzi turabukora n’ubwo turi abarezi kandi no korora turorora, tubonye iyo nguzanyo yadufasha kwagura ubushobozi bwacu.”

Umuyobozi w’Urwunge rw’amashuri rwa Kagitumba, Rusine Innocent, avuga ko Akarere ka Nyagatare gakorerwamo ubworozi n’ubuhinzi kandi ubikora akabona umusaruro mwinshi ndetse n’umukamo w’amata.

Avuga ko kuba Leta isigaye ishyiraho ibiciro by’umusaruro byabahaye icyizere ko umuhinzi atabura isoko ndetse hakaba haranabonetse uruganda rutunganya amata y’ifu ku buryo bafite icyizere cy’isoko ry’umukamo nawo uherutse kongererwa igiciro.

Avuga ko izi nguzanyo nizitangira gutangwa bizatuma Mwalimu adatungwa n’umushahara gusa kuko bazanakora ubuhinzi n’ubworozi.

Ubuvuzi bw’inka buracyari ikibazo nyamara aborozi basabwa korora inka zitanga umukamo

Mu kiganiro yagiranye na RBA, yavuze ko mu mikorere mishya y’umushinga RDDP wafashaga aborozi kubona ibikorwa remezo bituma umukamo wiyongera harimo no kubaka amavuriro y’ubuvuzi bw’amatungo.

By’umwihariko n’ubwo wari warahagaze mu Karere ka Nyagatare, ubu ngo ugiye kugaruka mu gihe cy’imyaka itandatu uzamara ukazubaka amavuriro 20 y’ubuvuzi bw’amatungo mu Gihugu cyose ariko habeho umwihariko mu Turere twa Nyagatare na Gatsibo.

Yagize ati “Umushinga wa RAB, RDDP ya kabiri hari amavuriro y’inka agera kuri 20 azubakwa hirya no hino mu Gihugu, Nyagatare na Gatsibo naho azahubakwa.”

Akomeza agira ati “Ni amavuriro azaba arimo uburyo bwo kuvura ariko na Laboratwari irimo ku buryo bazajya bavura indwara babonye muri Laboratwari atari ugushakisha.”

Inzobere mu buvuzi bw’amatungo uri mu kiruhuko cy’izabukuru, Dr Zimurinda Justin, asanga ubuvuzi bw’amatungo bukwiye kujyamo uruhare rw’abikorera kuko aribwo byafasha aborozi kubona ubuvuzi bw’amatungo yabo.

Agira ati “Ubuvuzi bw’amatungo bwakorwa neza hari abavuzi b’amatungo bigenga bakagira uruhare runini mu buvuzi bw’amatungo naho abandi bakora nk’uko bisanzwe nyine ariko iyo umuntu yikorera akora neza kurusha.”

Akarere ka Nyagatare kabamo Laboratwari y’amatungo imwe gusa kandi nayo ikaba idasuzuma indwara ziterwa na virusi ahubwo abavuzi b’amatungo bavura bifashishije ibimenyetso babonye ku itungo.

Abagore bahoze ari abafutuzi bavuga ko isoko ry’ibyo bakora rihari ahubwo bafite igishoro gicye ku buryo batabasha kurihaza

Mushimiyimana Olive wo mu Murenge wa Tabagwe, avuga ko yabayeho akora ubucuruzi butemewe n’ibyo acuruza akabyinjiza anyuze mu binani ku buryo ngo yari nk’ikihebe kuko atatinyaga ijoro.

Avuga ko byamuviriyemo igifungo cy’imyaka irindwi agarutse asanga abana be baratatanye ku buryo kubagarura mu rugo byamugoye.

Hashize imyaka ibiri we na bagenzi 22 bihurije hamwe bakora koperative ikora isabune ndetse Leta ikaba yarabafashije kubona imashini ibafasha muri ako kazi ubu ngo babaye abagore bashoboye batunze ingo zabo.

Ati “Ntakindi nakuyemo uretse igifungo cy’imyaka irindwi, abana banjye nasize bari baratatanye kugira ngo mbegeranye byarangoye ariko ubu ntawukinkeka, mbere naragendaga nkanyura mu binani amashokoro yarandenze narabaye nk’ikihebe, ubu ndi umugore ushimishije icyo nshaka ndakibaza.”

Uwirinawe Jeanne wo mu Kagari ka Gishuro, Umurenge wa Tabagwe, avuga ko aho barekeye gufutura bahisemo umushinga w’ubworozi bw’inzuki kandi ngo byahaye inyungu kuko uretse ubworozi banakora ubuhinzi ku buryo batunze ingo zabo ndetse bakanasagurira isoko.

Bavuye mu bufutuzi basigaye bakora isabune ku buryo batangiye gufasha ingo zabo gutera imbere

Yagize ati “Twari abagore barenga imipaka tukajya kuzana ibicuruzwa bitemewe na kanyanga ariko ubu turahinga tukeza tugahunika tugasagurira n’isoko, gufutura twabivuyemo kuko nta nyungu yabyo.”

Mushonganono Alphonsine, avuga ko akazi bakoraga mbere k’ubufutuzi kari kabi cyane kuko uretse igifungo cyabaga kibategereje mu gihe bafashwe ngo mu nzira yo mu binani hari igihe banahuriragamo n’abagizi ba nabi bakabambura ibyo bari bazanye mu Gihugu.

Agira ati “Mu bufutuzi kenshi hari ubwo wahuraga n’abantu babi bakakugirira nabi ariko none kuko tutagifutura ibibi byose byatuma ugirirwa nabi byavuyeho.”

Imirenge irindwi kuri 14 igize Akarere ka Nyagatare niyo ikora ku mupaka w’u Rwanda na Uganda ndetse n’uwa Tanzaniya. Bamwe mu baturage begereye imipaka bakundaga kwishora mu bucuruzi bw’ibicuruzwa bitemewe cyane inzoga nka kanyanga, urumogi n’imyenda ya caguwa.

N’ubwo nta mibare itangazwa ariko ubuyobozi bw’Akarere ka Nyagatare buvuga ko kuva hagiyeho ubukangurambaga bwo kugaragariza abaturage ingaruka zo gukora ubucuruzi butemewe ndetse no gushyiraho abarinzi b’ibyambu, magendu n’ibiyobyabwenge byinjiraga mu Rwanda byagabanutse ndetse benshi mu bakoraga ubu bucuruzi bakaba barabumbiwe mu makoperative abandi bahabwa imirimo y’amaboko muri gahunda ya VUP.

General Muhoozi Kayinerugaba, abinyujije ku rubuga rwe rwa X, yavuze ko yishimiye gutangaza ko mu gihe cya vuba aza gusura u Rwanda Igihugu cye cya kabiri.

Yagize ati “Nzitabira ibirori by’irahira rya Afande Kagame, sinshidikanya ko byo birori bizaba bikomeye muri Africa uyu mwaka. Urukundo nirwogere, (Rukundo Egumeho)”.

General Kayinerugaba, yakunze kuvuga ko Perezida Kagame ari se wabo (Auncle) ndetse ubwo aheruka mu Rwanda Perezida Kagame akaba yaramugabiye inka z’inyambo.

Yibukirwa cyane ku izahurwa ry’umubano hagati y’Ibihugu byombi dore ko wari warajemo agatotsi ndetse bamwe mu banyarwanda bari bafite imirimo bakorera muri Uganda bakajya bafatwa bagafungwa ndetse bakanakorerwa iyicarubozo.

General Kayinerugaba akaba ariwe mushyitsi wa mbere utangaje ko azitabira irahira rya Perezida Kagame, uherutse gutorerwa mandate y’imyaka itanu ayobora u Rwanda ku majwi 99.18%.

Uyu kandi akaba yarashyigikiwe n’imitwe ya Politiki ikorera mu Rwanda uretse uwa Democratic Green Party ya Dr Frank Habineza watsinzwe muri aya matora yo kuwa 14 na 15 Nyakanga 2024.

Minisitiri Bizimana yasabye Abanyarwanda kugira intego yo kwigira

Yabibasabye kuri uyu wa 02 Kanama 2024, ubwo hizizwaga umunsi w’umuganura ku rwego rw’Igihugu ukaba wizihirijwe mu Karere ka Kayonza ku nsanganyamatsiko igira iti “Umuganura isoko y’ubumwe n’ishingiro ryo kwigira.”

Kwizihiza umuganura ni umwanya wo kurebera hamwe akamaro k’umuco Nyarwanda mu bikorwa byose no mu buzima bw’Abanyarwanda bwa buri munsi.

Yavuze ko umuganura wari wariciwe n’abakoloni mu mwaka 1925 bavuga ko ubangamiye iyobokamana ryabo ariko uyu muco wongera kugarurwa mu mwaka wa 2011, hashingiwe ku ruhare umuco ufite mu iterambere ry’Igihugu no kubaka, gusigasira no gushimangira ubumwe bw’Abanyarwanda.

Ni umunsi wizihijwe n’ingeri zitandukanye

Avuga ko umunsi w’umuganura wahuzaga abaturage bose n’ubuyobozi, bagahurira mu rugo rw’Umwami bagasangira ibyavuye mu musaruro, abejeje byinshi n’abejeje bike bagafatanya bakiyibutsa ko bose ari bene Kanyarwanda basangiye Igihugu n’ubuvandimwe.

Avuga ko uyu munsi ari ndangamuco ukomeye mu buzima bw’Abanyarwanda bibukaho imihango ndangamuco yabaye ifatizo rikomeye ryo kubaka u Rwanda no guhuriza hamwe abana barwo.

Yagize ati “Uyu ni umunsi ndangamuco ukomeye mu buzima bw’Abanyarwanda twibukaho imihango ndangamuco yabaye ifatizo rikomeye ryo kubaka u Rwanda no guhuriza hamwe abana barwo ukanaba ifatizo ry’umurimo no kuzigama mu guteganyiriza ibihe bizaza.”

Minisitiri Dr Bizimana yibukije ko uyu ari umunsi ndangagaciro mu buzima bw’Abanyarwanda

Yavuze ko umuganura wari isoko y’ubumwe aho Abanyarwanda bose bahuraga abakene n’abakire bagasangira nta vangura ari nayo mpamvu Leta yifuje ko wakomeza mu rwego kugira ngo ubumwe bushinge imizi kandi bube ishingiro ry’ubuzima bwa buri munsi.

Ikindi ariko ngo umuganura ni inshingano yo kwigira bivuze kwihaza abantu bagatungwa n’ibivuye mu musaruro wabo bityo gukora cyane no kwihaza bikwiye kuba intego ya buri wese.

Yagize ati “Gukora kugira ngo tubone umusaruro ni ukugira ngo dushobore kwihaza, twigire kandi tunasangire n’abafite bikeya. Icyerekezo cyo kwigira tugishimangire kibe intego ya buri Munyarwanda uba mu Rwanda n’uri hanze.”

Abana bato bahawe amata

Umwe mu baturage batanze ubuhamya, Mukakamari Marie Therese, yavuze ko yapfushije umugabo mu mwaka wa 2016 atangira kwiheba yibaza uko azabaho ariko mu mwaka wa 2019, yoherezwa muri Koreya Y’epfo kwiga ubuhinzi bw’umuceri agarukana intumbero yo kwiteza imbere.

Avuga ko igishanga cya Rwinkwavu icyo gihe batabashaga kubona umusaruro urenga toni ebyiri kuri hegitari ariko ubu bageze kuri toni esheshatu.

Yagize ati “Naragarutse nigisha abahinzi bagera ku 4,000, duhinga umuceri mu gishanga cya Rwinkwavu aho twezaga toni zitagera kuri ebyiri kuri hegitari ubu tuhakura nibura toni hagati ya eshanu n’igice cyangwa esheshatu.”

Ku munsi w’umuganura, abaturage bishimira umusaruro babonye

Uyu musaruro ngo wamuteje imbere ku buryo yabashije kwigisha abana ndetse nawe akaba abayeho neza.

Umuyobozi w’Akarere ka Kayonza, Nyemazi John Bosco, yavuze ko aka Karere keramo ibihingwa byoherezwa mu mahanga nka Kawa, urusenda, imiteja ndetse n’imibavu.

Aka Karere kandi kabonekamo ibihingwa ngandurarugo nk’ibigori, ibishyimbo, umuceri, imyumbati, soya, ibirayi, imboga n’imbuto ndetse hakaba hari n’inganda zitunganya umusaruro wa bimwe muri ibi bihingwa.

Iri soko rizafasha abacuruzi kutangirika kw’ibicuruzwa byabo birimo imboga n’imbuto

Babitangaje kuri uyu wa 01 Kanama 2024, ubwo umushinga ugamije guteza imbere ubuhinzi bwihanganira imihindagurikire y’ikirere kandi bubungabunga ibidukikije, urimo gushyirwa mu bikorwa n’ikigo mpuzamahanga giteza imbere ibiti bivangwa n’imyaka ku isi (ICRAF), ikigo cy’Igihugu gishinzwe guteza imbere ubuhinzi (RAB), n’ikigo cya Kaminuza y’u Rwanda gishinzwe kubungabunga urusobe rw’ibinyabuzima n’umutungo kamera (UR CoEB) wabashyikiriza isoko rito wabubakiye ndetse n’icyumba gikonjesha imbuto n’imboga

Umwe mu bacuruzi, Vestine Mizero, avuga ko mbere bacururizaga ku karubanda ahantu hasi ku buryo n’ibicuruzwa byabo byangirikaga kubera izuba.

Ati “Turashima Perezida wacu wadukuye ku karubanda, igitoki cyamaraga kabiri ku zuba kikaba kirumye, waranguraga imboga z’amafaranga 10,000 ugacuruza iza 1,000 ugahomba 9,000 ariko ubu dufite firigo ntibicyangirika.”

Imboga ni kimwe mu byo abacuruzi bishimira ko bitazongera kwangirika

Mugenzi we Murekatete Apollinarie, avuga ko iri soko ryabafashije byinshi kuko bavuye ku zuba kandi n’ibicuruzwa byabo bikaba bitacyangirika.

Avuga ko hari igihe batinyaga kurangura kubera gutinya ko ibicuruzwa byabo byangirika. Yagize ati “Mbere twatinyaga kurangura imboga n’imbuto kubera kotswa n’izuba bikangirika bikadutera igihombo. Ariko ubu imbuto n’imboga zishobora kumara icyumweru muri filigo zitarangirika.”

Umuyobozi wa ICRAF mu Rwanda, Dr. Athanase Mukurarinda, avuga ko batangiye bakangurira abaturage gutera ibiti ariko cyane cyane iby’imbuto ziribwa.

Iri soko rito rya Rutonde ryashyizwemo icyumba gikonjesha

Zimaze kuboneka rero ngo bahisemo no kubakira abaturage isoko kugira ngo babone aho bazicururiza kandi mu buryo bwiza bubarinda igihombo.

Agira ati “Twasanze rero kubaka isoko gusa bidahagije dushyiramo n’icyuma gikonjesha kuko imbuto zibora vuba kuko iyo zisaruwe uyu munsi ntizigurwe ako kanya bucya zaboze ubwo umuguzi akaza agatanga amafaranga y’intica ntikize.”

Umuyobozi w’Akarere ka Kirehe, Rangira Bruno, avuga ko uretse kuba abaturage babonye aho bacururiza kandi n’ibicuruzwa byabo bikaba bitazangirika ngo iri soko rizanafasha abakoresha umuhanda Kayonza-Rusumo kubona aho bahahira.

Imbuto bacuruza ntizizongera kwangirika

Yagize ati “Abahinzi babonye aho bacuruza umusaruro wabo ariko n’abandi bakoresha uyu muhanda munini wa Kayonza-Rusumo babonye aho bagurira mu gihe bakoresha uyu muhanda.”

Iri soko rito rya Rutonde ryuzuye ritwaye amafaranga y’u Rwanda Miliyoni 47 harimo n’icyuma gikonjesha, rikaba rifite ubushobozi bwo kwakira abacuruzi 65.

Aborozi barifuza ko uruganda Inyange rwabafasha kubona inka z’umukamo

Uruganda Inyange ruherutse gutaha uruganda rutunganya amata y’ifu ariko runatunganya n’andi asanzwe rwubatswe mu Karere ka Nyagatare narwo ruje rusanga uruhasanzwe rwa Savannah.

Uru ruganda ruzajya rwakira litiro 650,000 z’amata ku munsi mu gihe mu Karere ka Nyagatare mu bihe by’imvura haboneka litiro zirenga 120,000 ku munsi na Litiro 60,000 igihe cy’impeshyi.

Gashumba Gahiga, umworozi mu Murenge wa Matimba avuga ko nk’abakiriya b’Inyange yakabaye ibafasha kubona inka zifite umukamo kugira ngo barusheho guhaza uruganda ndetse banabone ayo banywa mu ngo zabo.

Ati “Nabibonye muri Kenya, aborozi bafashwa n’inganda kubona inka. Natwe kuba uruganda rufite isoko ryizewe ntabwo rukwiye kwakira amata gusa ahubwo rukwiye no gufasha aborozi kubona amata rwifuza.”

Umuyobozi w’uruganda rw’Inyange rukora amata y’ifu rwa Nyagatare, Kagaba James, avuga ko Inyange hari byinshi ifasha aborozi harimo abakozi bakorera ku makusanyirizo y’amata batanga inama zigamije kuzamura umukamo n’ubundi bujyanama.

Ikindi ariko ngo bahuza aborozi n’ibigo by’imari kugira ngo bibafashe kubona inka z’umukamo n’ibindi bijyanye no kubonera amatungo amazi, ubwatsi n’ibindi.

Yagize ati “Inyange mu bihe bitandukanye itanga inkunga ku makusanyirizo y’amata ariko hari n’ibigo by’imari dufitanye amasezerano tukabifasha kugera ku borozi no kubamenyera abo baguriza kuko bagemura hano tukabahemba. Inyange ikora byinshi kugira ngo ubworozi bwacu bushobore gutera imbere.”

Bimwe mu bigo by’imari bifitanye amasezerano n’uruganda Inyange bivuga ko inguzanyo zabyo ku bworozi ziri ku nyungu iri hasi kugira ngo buri mworozi yoroherwe no kwishyura kandi yanabashije kubona inka zitanga umukamo cyangwa ibindi bikoresho byamufasha korora neza.

Iki kibuga nicyo cyatangirwagaho imyitozo ku basirikare bashya baje ku rugamba

Yabitangaje kuri uyu wa Kane tariki ya 25 Nyakanga 2024, ubwo urubyiruko rw’Abanyarwanda rusaga 50 ruturutse mu bihugu birindwi ku migabane y’Isi itandukanye rwasuraga umuhora w’amateka yo kubohora Igihugu igice cya mbere n’icya kabiri.

Ni urugendo rwahereye ku mupaka wa Kagitumba ahatangirijwe urugamba rwo kubohora Igihugu na Gikoba ahari ibirindiro bya mbere bya RPA/Inkotanyi ahari indake ya mbere yabagamo uwari umuyobozi w’urugamba rwo kubohora Igihugu.

General (Rtd) Kabarebe, yavuze ko ingabo za RPA zimaze kongera kwisunganya ndetse zinagaba ibitero shuma mu Majyaruguru no mu Burasirazuba bw’Igihugu bashatse ubutaka bagumaho akaba ari naho bazajya batera baturuka.

Babwiwe uburyo RPA yateguraga ibitero mu mayeri menshi kandi byose ikabitsinda

Ubu butaka ngo bwabonetse i Gikoba mu Murenge wa Tabagwe ndetse kubera ibitero bikomeye bya FAR, umuyobozi w’urugamba abasaba kubaka indake kugira ngo babashe kwihisha umwanzi no kwirinda amasasu y’imbunda ziremereye barashishwaga.

Yavuze ko ari we wubatse iya Perezida wa Repubulika, Paul Kagame, wari umuyobozi w’urugamba imaze kuzura n’abandi bayobozi b’imitwe basabwa kuzubaka ndetse bakanasaba abasirikare babo kureberaho kugira ngo birinde umwanzi.

Yagize ati "Jyewe icyo gihe nayoboraga umutwe w’abarinda Umugaba w’Ingabo (Perezida wa Repubulika), ni nanjye wacukuye iyi ndake yabagamo."

General Rtd James Kabarebe yabasangije amateka y’agasantimetero ubutaka Inkotanyi zafashe bwa mbere mu Rwanda

Yababwiye ko ubutaka bahagazeho bwaviriyeho amaraso menshi y’inkomere ndetse n’imibiri y’urubyiruko bari mu kigero kimwe baguye ku rugamba rwo kubohora Igihugu.

Yagize ati “U Rwanda rugomba gukomeza gutera imbere, muri aka gasanimetero, ntushobora kumenya umubare w’urubyiruko rwari mu kigero cyanyu ruryamye hano, amagufa yabo, amaraso yabo mugenda hejuru. Muragenda ku maraso y’urubyiruko rwari mu myaka yanyu baguye hano. Bapfuye kugira ngo mwebwe mukomeze icyatumye bapfa. Bapfuye baharanira iterambere ry’iki Gihugu namwe niho mwasabwa imbaraga.”

Turagara Arnord, avuga ko gusura Ingoro y’amateka yo guhagarika Jenoside ndetse n’umuhora w’urugamba rwo kubohora Igihugu byatumye bamenya byinshi ku mateka abanyarwanda banyuzemo.

Basobanuriwe uko Inkotanyi zateye ziturutse ku mupaka wa Kagitumba kubera ko izindi nzira zose zari zanze

Yavuze ko ubumenyi barimo kuvoma hanze buzabafasha guteza imbere Igihugu cyabo. Ati “Ubumenyi turimo kwiga hanze tugomba kubuzana mu Rwanda kugira tuzamure Igihugu cyacu mu bikorwa by’amajyambere.”

Sandra Kabandana uba mu Bubiligi, avuga ko kuba muri iki Gihugu hagaragara urubyiruko rupfobya Jenoside yakorewe Abatutsi ari uko rwahishwe amateka y’ukuri kuri Jenoside bityo narwo rukwiye kuza kwiga kugira ngo ruve mu buyobe.

Agira ati “Kujya ku mbuga nkoranyambaga ukavuga ibintu mu magambo gusa bidafite ukuri yewe nta n’ibimenyetso, nitwe tugomba kubabwira ukuri kuko twageze mu Rwanda amateka twarayabonye ikindi tukabasaba nabo kuza bakiga bakava mu buyobe.”

Urubyiruko rwiganjemo ababa ku mugabane w’Uburayi

N’ubwo abenshi ari abaje mu Rwanda bwa mbere bavuga ko bishimiye kugera mu Gihugu cyababyaye kandi bagomba kugira umusanzu batanga mu iterambere ryacyo kuko aho bari barimo kuhavoma ubumenyi.

Amata ruzakora ari mu bwoko bubiri: Hari amata y’ifu akorwamo mu mata hatabanje gukurwamo amavuta n’amata y’ifu akorwa habanje kugabanyamo amavuta, ndetse rukanakora amavuta yo gutekesha avuye mu mata ndetse n’amavuta y’inka asanzwe.

Ni uruganda rwuzuye rutwaye Amadolari ya Amerika Miliyoni 45, rukaba rwaratangiye kubakwa mu mwaka wa 2021.

Aborozi bavuga ko kuba babonye isoko rigari ry’amata ndetse n’igiciro cy’amata kikaba cyariyongereye biteguye kongera umukamo binyuze mu gushaka inka zitanga umukamo mwinshi ndetse no kuzishakira ubwatsi.

Ubu muri iki gihe cy’impeshyi mu Karere ka Nyagatare haraboneka litiro 60,000 z’amata ku munsi naho mu gihe cy’imvura hakaboneka litiro zisaga 120,000 ku munsi.

Uru ruganda ruzakira amata yo mu Turere twose tugize Intara y’Iburasirazuba n’utundi tugaragaramo ubworozi mu Gihugu cyose.

Byitezwe ko ku mwaka uru ruganda ruzajya rutanga toni 15,000 z’amata y’ifu.

Minisitiri w’Intebe Dr Ngirente yasabye aborozi kongera umukamo

Minisitiri w’Intebe, Dr. Edouard Ngirente, yasabye aborozi muri rusange korora neza bakorora inka zitanga umukamo mwinshi kugira ngo babashe kwihaza mu ngo zabo ariko banahaze uru ruganda rukora amata y’ifu.

Ataha uru ruganda, Minisitiri w’Intebe, Dr. Eduard Ngirente, yavuze ko uru ruganda rugiye kuba igisubizo cy’isoko ry’umukamo w’amata, bityo asaba aborozi kwita ku nka zabo bazorora neza kandi bakorora inka zitanga umukamo utubutse kugira ngo bihaze ubwabo ariko bahaze n’uruganda muri rusange.

Ati “Inka ikamwa litiro eshanu kandi yagombye gukamwa 40 nk’uko twabyumvise, ubwo hari ikigomba gukorwa kugira ngo izo litiro zigerweho. Kwita ku nka tukorora neza tukongera umukamo, tukihaza mu ngo zacu, tugahaza n’uru ruganda kugira ngo tubone amata tugurisha mu Rwanda no hanze.”

Minisitiri w’Intebe, Dr. Edouard Ngirente

Yavuze ko kugira ngo haboneke umukamo utubutse bisaba korora inka zitanga umukamo dore ko ngo Leta yifuza ko ubworozi buba umwuga utunga uwukora.

Yasabye aborozi kandi kororera mu biraro ku bifite inyungu nyinshi zirimo kubona umukamo mwinshi ndetse ubutaka busigaye bugakorerwaho ubuhinzi bw’ubwatsi n’indi myaka yatunga umworozi n’inka ze.

Yijeje ko Leta izakomeza korohereza aborozi binyuze muri nkunganire mu kubona amazi, imashini zisya ubwatsi ndetse inabegereze ibikorwa remezo bituma umukamo ugera ku ikusanyirizo byoroshye.

Aborozi bavuga ko kuba babonye isoko rigari ry’amata ndetse n’igiciro cy’amata kikaba cyariyongereye biteguye kongera umukamo binyuze mu gushaka inka zitanga umukamo mwinshi ndetse no kuzishakira ubwatsi.

Gashumba Gahiga, umworozi wo mu Murenge wa Matimba avuga ko icyizere cyo kongera umukamo agishingira ku ngano y’amata babonaga mbere n’ayo babona uyu munsi bamaze kubona isoko.

Yagize ati “Icyizere cyo guhaza uruganda ngishingira ku mata twabonaga mbere tutarabona isoko ry’Inyange n’ayo tubona ubu. Icy’ingenzi ni ugushakira inka ubwatsi no kubuhunika zikabuhorana kandi na zo zikaba ari izitanga umukamo mwinshi.”

Mukase Françoise, umworozi mu Karere ka Gicumbi, avuga ko yahawe inka ya Girinka mu mwaka wa 2011, yakuyeho icyororo cy’inka 48 ariko ubu akaba yoroye inka 18 ziri mu kiraro.

Avuga ko izi nka zamuteje imbere kuko yabashije kugura ubutaka, kwishyurira abana be kandi mu mashuri meza ndetse ngo ubu akaba yarabashije kwiyubakira inzu nziza ifite igipangu gitahamo imodoka ebyiri, iyikorera ubwatsi n’ifumbire ndetse n’iyo gutemberamo n’umugabo we.

Agira ati “Inka ni uruganda rukora amafaranga, ubu ndi mu gipangu cyiza gitahamo imodoka ebyiri, iyikorera ubwatsi n’ifumbire ndetse n’iyo ntemberamo n’umutware wanjye.”

Uruganda rukora amata y’ifu rwa Nyagatare, rwatangiye kwakira amata muri Mata 2024 ariko mu cyumweru gitaha akaba ari bwo amata y’ifu azagera ku isoko aho biteganyijwe ko ikilo kimwe cy’amata y’ifu kizaba kigura amadolari ya Amerika 3.5 (ni ukuvuga amafaranga y’u Rwanda abarirwa muri 4,600 Frw).

Reba ibindi muri iyi Video:

Imibare itangwa n’ubuyobozi bw’Akarere ka Nyagatare igaragaza ko kuva muri Mutarama kugera muri Kamena 2024, abana b’angavu 74 aribo basambanyijwe baterwa inda harimo umwe uri munsi y’imyaka 14 naho abandi bakaba bari hagati ya 14 kugera ku 17.

Bamwe muri aba bana mu Turere twa Nyagatare na Gatsibo, bavuga ko ahanini bashukishwa ibintu hakiyongeraho no kutamenya ubuzima bw’imyororokere yabo kuko bamwe batisanzura ku babyeyi babo n’ababikoze ababyeyi ntibabahe amakuru yose kubera ubumenyi bucye.

Ariko nanone ngo aho bahurira nko mu nsengero ngo uyu mwanya ntubaho bakifuza ko nibura hashyirwaho amahuriro y’abantu bari mu kigero kimwe bakajya bungurana ubumenyi.

Umwe ati “Mu nsengero sindumva bavuga ku buzima bw’imyororokere uretse kuvuga ngo mwirinde ubusambanyi. Ariko hariho ihuriro ry’abantu bari mu kigero kimwe ryafasha kuko twasangira ubumenyi buri wese afite ku buzima bw’imyororokere naho ababyeyi hari abatisanzurwaho cyangwa ugasanga nabo nta bumenyi bafite.”

Umuyobozi w’Umuryango utari uwa Leta wita ku burenganzira bw’umukobwa n’umugore, Empower Rwanda, Kabatesi Olivia, avuga ko mu gihe abayobozi b’amadini n’amatorero batagize uruhare rufatika mu ikumirwa ry’isambanywa ry’abana iki kibazo kitacika.

Avuga ko nk’abantu bizerwa kubera inyigisho zabo bakwiye no kujya bigisha abayoboke babo ingaruka ziba kuri aba bana ariko nabo bakigishwa ubuzima bw’imyororokere.
Agira ati “Itorero ni ahantu buri wese agera akaruhukira, ni ahantu twizereramo. Abayobozi b’amadini nibatumva iki kibazo ntabwo kizakemuka. Murabizi iyo bavuze mu rusengero bati iki kintu Imana iracyanga cyangwa nticyemewe buri wese arayoboka.”

Akomeza agira ati “Baravuga ngo mubyare mwororoke ariko bakwiye kubyarira igihe kandi bafite bwo kurera kandi kutabyara utaracuze bisaba kuboneza urubyaro. Nibigishe kuboneza urubyaro kuko ni ukuzamura iterambere ry’umuryango. Kuboneza urubyaro si ukwica abana ahubwo ni ukwirinda kubyara abo kuruha.”

Umuyobozi w’Akarere ka Nyagatare wungirije ushinzwe imibereho myiza, Murekatete Juliet, avuga ko mu nama bakorana n’abafatanyabikorwa mu iterambere ry’Akarere basaba abahagarariye amadini n’amatorero kujya baha umwanya urubyiruko rwahuguwe ku buzima bw’imyororokere rugatanga ubutumwa mu gihe bo bumva ko iyo nyigisho batayitambutsa.
Ati “N’ubwo atabasha kubivuga ariko hari amatsinda y’urubyiruko rwahuguwe ku nsengero no ku kiliziya akabaha umwanya wo kubivuga ntibibe urwitwazo ko umukirisitu yatwaye inda kubera itorero ritemera kuboneza urubyaro.”

Umupasitoro utifuje ko amazina ye atangazwa, yavuze ko mu itorero batigisha abantu kwirinda ingaruka z’ibyaha ahubwo babigisha kubireka no kubyirinda.

Bridge to Prosperity niyo yafashije mu kubaka ibi biraro byo mu kirere

Babitangaje kuwa gatanu tariki ya 19 Nyakanga 2024, ubwo hatahwaga ku mugaragaro ikiraro cyo mu kirere cya Nyamenge mu Murenge wa Musheri kibahuza n’Umurenge wa Rwempasha cyuzuye gitwaye amafaranga y’u Rwanda asaga Miliyoni 107.

Ubusanzwe umuturage wa Nyamenge mu Murenge wa Musheri wifuzaga kujya Kazaza cyangwa mu Gakindo mu Murenge wa Rwempasha, byamusabaga kunyura ku biti batambikaga hejuru y’umugezi w’Umuvumba cyangwa igihe amazi yagabanutse akanyuramo ayatambagiramo.

Uwabaga atabishoboye byamusabaga gufata urugendo akaza kunyura ku kiraro gisanzwe gihuza Gasinga na Kazaza.

Tuyizere Claudette, avuga ko kubakirwa ikiraro bibafitiye inyungu nyinshi kuko bigiye koroshya ububahahirane ndetse binabarinde impfu ibintu ashimira umukuru w’Igihugu.

Ati “Kagame adukoreye umuti nta muntu uzongera kugwa mu cyambu mumudushimirire cyane. Ubundi twanyuraga mu mazi cyangwa ku biti ugasanga habonetse impfu nyinshi kubera kugwa mu cyambu, ubu tubonye ikiraro ntawuzongera kugwamo.”

Abaturage bishimiye kubona iki kiraro kizabafasha mu migenderanire

Uwimana Deborah, umunyeshuri ukomoka mu Murenge wa Rwempasha ariko wiga mu Murenge wa Musheri, avuga ko kuba babonye ikiraro bigiye kumufasha kwiga neza kuko mbere urugendo rurerure yakoraga azenguruka kugira ngo abone ahari ikiraro yambukiraho byatumaga akerererwa amasomo bikagira n’ingaruka ku musaruro w’amanota mu ishuri.

Umuyobozi w’Akarere ka Nyagatare, Gasana Stephen, avuga ko kubaka iki kiraro byaturutse ku busabe bw’abaturage bityo n’ahandi abaturage bazagaragaza ko hari ikibazo cy’imihahiranire naho hazashyirwa ikiraro.

Yagize ati “Ni ikiraro cya gatatu cyubatswe hejuru y’umugezi w’umuvumba, ikibazo cy’imigenderanire cyoroshye ntikikimeze nka mbere cyagabanutse ariko icyo twifuza n’uko umuturage adakora urugendo rurerure ajya mu murima we cyangwa gusura inshuti n’ahandi bazatugaragariza tuzahashyira ikiraro.”

Ikiraro cyo mu kirere cya Nyamenge kije gikurikira icya Kabare mu Murenge wa Rwempasha ndetse n’icya Bushoga gihuza Umurenge wa Nyagatare n’uwa Rukomo byose bikaba byarubatswe ku bufatanye na Bridge to Prosperity.

Kubona imishinga bahugiraho bahamya ko bizabafasha kwirinda ingeso mbi

Babitangaje kuri uyu wa gatanu tariki ya 19 Nyakanga 2024, ubwo umuryango utari uwa Leta uharanira uburenganzira bw’umukobwa n’umugore, Empower Rwanda, n’indi mishinga bafatanyije, batangizaga umushinga wa YEEFA uzafasha urubyiruko cyane abangavu babyaye imburagihe gukora imishinga y’ubuhinzi n’ubworozi.

Rumwe mu rubyiruko ruzakorana n’uyu mushinga ruhamya ko n’ubwo hari imbogamizi zo kubona ubutaka ruzakoreraho ubuhinzi ngo uyu mushinga uzabafasha cyane kubona ibikorwa byabo bahugiramo kandi bibyara inyungu bityo bikazabarinda ingeso mbi ariko nanone bakabona n’uko barera abana babo.

Umwe ati “Nkanjye ndashaka kuzasubira mu ishuri ariko umushinga wanjye w’ubuhinzi uzamfasha kubona amafaranga anyishyurira ndetse anishyurire umwana wanjye. Kuba abantu binjiza nta muntu uzongera kubashuka kandi n’ingeso mbi bajyagamo bazazireka kuko bafite ibyo bakora bibinjiriza.”

Umuyobozi w’Umuryango utari uwa Leta uharanira uburenganzira bw’umukobwa n’umugore, Empower Rwanda, Olivia Kabatesi, avuga ko uyu mushinga uzafasha abakobwa babyaye imburagihe ndetse n’abandi bagore bari munsi y’imyaka 35 y’amavuko.

Avuga ko ari igisubizo ku rubyiruko by’umwihariko kuko uretse kuba bazabona ibyo bagaburira abana babo ndetse bakanasagurira isoko ngo bizanabarinda ihohoterwa bakorerwaga.

Yagize ati “Icyo twashatse gukemura ni ukurwanya igwingira ry’abana babyawe n’aba bangavu. Ba nyina bazahinga imboga bazigaburire abana babo ariko banazicuruze babone amafaranga abafasha mu buzima bwa buri munsi ndetse binabarinde ihohoterwa bakorerwa kubera ubushobozi buke bari bafite.”

Umuyobozi w’Akarere ka Nyagatare wungirije ushinzwe imibereho myiza, Murekatete Juliet, avuga ko uyu mushinga uzafasha kubonera urubyiruko akazi bityo bibarinde kwishora mu biyobyabwenge n’izindi ngeso mbi.

Ati “Umushinga uzafasha abana kubona icyo bakora bibarinde kujya mu biyobyabwenge n’izindi ngeso mbi.”

YEEFA, ni umushinga uzashyirwa mu bikorwa n’imishinga itandatu yihurije hamwe mu cyitwa consortium ariyo Akazi Kanoze Access, RYAF, YEAN, ADC, ABUSOL ndetse na Empower Rwanda ku nkunga ya Mastercard Foundation binyuze muri AGRA, mu Karere ka Nyagatare ukazafasha urubyiruko ibuhumbi 30 naho ku rwego rw’Intara hafashwe ibihumbi 300 aho 70% byabo ari urubyiruko rw’abakobwa.

Urubyiruko ruzafashwa guhabwa ubumenyi ku gutegura imishinga y’ubuhinzi n’ubworozi cyane imboga n’inkoko, kuyiga no kuyicunga ndetse banahuzwe n’ibigo by’imari.

Yabitangaje kuri uyu wa mbere tariki ya 15 Nyakanga 2024, umunsi Abanyarwanda b’imbere mu Gihugu bitabiraga amatora ya Perezida wa Repubulika ndetse n’Abadepite.

Hafi site zose z’itora mu Karere ka Nyagatare, saa kumi n’imwe z’igitondo abaturage bari bamaze kuhagera n’ubwo itora ryagombaga gutangira saa moya z’igitondo. Kuri site ya GS Nyagatare, abaseseri babanje kurahira mugihe abaturage bari benshi bategereje kwitorera umuyobozi w’Igihugu n’abagize Inteko Ishinga Amategeko umutwe w’Abadepite.

Abaseseri babanje kurahira mugihe abaturage bari benshi bategereje kwitorera umuyobozi w’Igihugu n’Abadepite

Sagisengo Emmanuel na Kabayiza Faustin wakomerekeye ku rugamba rwo kubohora Igihugu, bavuga ko impamvu babaye aba mbere kuri site y’itora ari uko batojwe gukorera imbere, yewe ngo bumvaga umunsi utari bugere ngo bihitiremo Umukuru w’Igihugu bifuza.

Bagize bati “Numvaga ijoro ritari bucye kuko uyu munsi nari nywutegereje. Naroye ibintu byinshi nzi aho Igihugu cyanjye cyavuye n’aho kigeze, nzi nanjye aho navuye n’aho ngeze. Ubumuga si urwitwazo rwo kutaba uwa mbere twatojwe kuba aba mbere muri byose.”

Nzabamwita Jeannne d’Arc w’imyaka 93 y’amavuko avuga ko umukandida Perezida yatoye ari ukunda Igihugu n’urubyiruko ndetse anarwifuriza ejo heza.

Ati “Ndamusabira ku Mana, imujye imbere imukomereze kwizera urukundo rwe ku Gihugu ntirugasubire inyuma ndamukunda cyane kandi musengera amanywa n’ijoro, reba iki Gihugu cyose uko yakigize, arakarama arakabaho n’umuryango we.”

Mukeshimana Solange, avuga ko umukandida ku mwanya wa Perezida wa Repubulika yatoye ari uwamuhaye byinshi birenze ibyo yakabaye yarahawe n’ababyeyi be harimo amashuri ku bana b’abakobwa.

Avuga ko yakuze azi umucunguzi umwe w’Isi ari we Yesu Kristo ariko nyuma abona undi mucunguzi w’u Rwanda ari nawe yahaye ijwi rye.

Abageze mu zabukuru bafashijwe kugera kuri site z’itora

Yagize ati “Nari nzi umucunguzi umwe wacunguye Isi ariwe Yesu Kristo nyuma naje kubona undi mucunguzi wacunguye u Rwanda, ndamukunda nifuza ko yatuyobora ibihe byose (Mirere na mirere)".

Akarere ka Nyagatare gafite ibyumba by’itora 723 na site 123 zigomba gutoreraho abaturage 427,657 ni mugihe ku rwego rw’Intara y’Iburasirazuba hari ibyumba by’itora 4,148 na site 621 zitoreraho abaturage 2,246,371 harimo urubyiruko 833,633 bangana na 37%.

Uyu mubyeyi yazanye umwuzukuru we kugira ngo amufashe gutora

Sezibera ngo abifitiye ubushobozi yasaba ko Kagame yiyuburura agasubira mu buto

Sezibera w’imyaka 78 y’amavuko avuga ko yihaye intego ko buri mwaka azajya ashimira Kagame kubera ibyiza byinshi akorera Abanyarwanda.

Uyu ugendana ifoto ya Kagame ku ishati ye iruhande rw’umutima avuga ko yabikoze kubera urukundo amukunda kandi amuhoza ku mutima nk’uko nawe ahoza ku mutima Abanyarwanda.

Amushimira by’umwihariko ko yayoboye urugamba rwo kubohora Igihugu agacyura impunzi ndetse akabanisha Abanyarwanda by’umwihariko abakoze Jenoside n’abayirokotse ubu bakaba babanye mu mahoro.

Agira ati “Kera umuntu yashimaga undi akamuha inka cyangwa isambu, jye sinabona icyo namuha urutse kumushima ku munwa kugira ngo n’abavuka bamenye aho yakuye iki Gihugu.”

Akomeza agira ati “Iki Gihugu yagikuye mu kaga, abari hanze twari mu kaga, abari mu Gihugu nabo nta mahoro bari bafite. Jyewe ntangazwa n’uko yaduhuje n’abatemye abacu tukaba tubanye neza, abatemye inka ku musozi akarenga akabagabira.”

Ashimira Nyakubahwa, Paul Kagame kuba yarubatse inzego z’umutekano zitanga umutekano imbere mu Gihugu ariko n’aho abaturage babuze amahoro ku Isi zikajya kubafasha kuyagarura bigaragaza umutima wa kimuntu.

Umusaza Sezibera agendana ifoto ya Kagame ku ishati iruhande rw’umutima kubera urukundo amukunda

Amushimira kandi kuba Igihugu kibana neza n’ibindi bihugu ndetse abanyamahanga bakaba bifuza guhora basura u Rwanda kubera umutekano bahabona.

Avuga ko Kagame ari Umuyobozi udasanzwe bityo kuri we abifitiye ubushobozi yamusubiza mu buto agakomeza kuyobora Abanyarwanda.

Ati “Kagame ni umuyobozi udasanzwe utapfa kubona ahandi ku Isi, arihariye wenyine. Jye ku bwanjye mfite ubushobozi nategeka ngo ni yiyuburure yongere abe mu muto bityo agakomeza kutuyobora.”

Uyu ufite kwizera cyane ko Kagame azatsinda amatora asaba urubyiruko kumufatiraho urugero rw’ibikorwa byiza akorera Igihugu.

Mu bindi amushimira harimo ibikorwa remezo by’ubuvuzi n’uburezi yubaka buri mwaka, gahunda yo kugaburira abana ku ishuri, amazi n’amashanyarazi n’ibindi.

Aborozi biyemeje kuva ku nka zidatanga umukamo bakagura iza kijyambere zizashyirwa mu biraro

Kuwa kabiri tariki ya 09 Nyakanga 2024, nibwo Minisiteri y’Ubucuruzi n’Inganda, MINICOM, yatangaje ibiciro bishya by’amata aho umworozi ugejeje amata ku ikusanyirizo azajya ahabwa amafaranga 400 kuri litiro imwe naho igiciro cy’amata ku ikusanyirizo kikaba amafaranga 432.

Umworozi wo mu Murenge wa Musheri, Gatoto Robert, avuga ko bashimishijwe n’iki giciro kuko ubundi icyari gihari kitari kijyanye n’ibyo bashoraga mu bworozi.

Avuga ko ubwo igiciro kizamutse bagiye guhindura byinshi bahereye ku mabwiriza ya Minisiteri y’Ubuhinzi n’Ubworozi ateganya guhinga inzuri kuri 70% ahasigaye hakaba aho ibiraro by’inka, gushyira inka mu bwishingizi n’ibindi.

Igikomeye ariko ngo bagiye gushyira imbaraga mu gushaka inka zitanga umukamo kugira ngo haboneke umukamo mwinshi.

Ati “Ntabwo wagura inka ya miliyoni n’igice cyangwa ebyiri ngo ugurishe amata kuri 300Frws ntabwo iyo nka yabaho niyo mpamvu zadupfanaga kubera amafaranga macye yazivagamo ariko ubu tugiye gushora dushake inka zitanga umukamo mwishi kuko amata yabonye igiciro cyiza.”

Miganda William, nawe avuga ko ubundi igiciro cyari kiriho cyacaga intege aborozi bityo ntibite ku bworozi no gushaka inka zitanga umukamo.

Avuga ko ubu bagiye kurushanwa mu gukama amata menshi kuko bagiye kuzishyira mu biraro bakazihingira ubwatsi.

Yagize ati “Tugiye kororera mu biraro tunahinge ubwatsi ndetse tugure n’imashini ibusya kugira ngo inka zirusheho gutubura umukamo.”

Aborozi kandi bashimira ubuyobozi kuba bwarabonye ko igiciro cy’amata kiri hasi bukakizamura. Mu mwaka wa mwaka wa 2017, mu Karere ka Nyagatare habonekaga amata litiro miliyoni 10, umwaka wa 2023 hakaba harabonetse litiro miliyoni 40. Igiciro cy’amata kiyongereye mu gihe hashize igihe gito uruganda rutunganya amata y’ifu rwubatswe mu Karere ka Nyagatare, rutangiye gukora aho biteganywa ko ruzajya rwakira litiro 650,000 ku munsi.

Abagore bashimira Kagame wabakuye mu bikari akabagira ba rwiyemezamirimo

Yabitangaje kuri uyu wa gatatu tariki ya 10 Nyakanga 2024, ubwo abanyamuryango ba FPR-Inkotanyi bamamazaga umukandida ku mwanya wa Perezida wa Repubulika, Paul Kagame, ndetse n’abakandida Depite b’Umuryango FPR-Inkotanyi.

Ubundi Umurenge wa Musheri, igice kinini cyawo cyatujwemo abaturage guhera mu mwaka wa 1994 kuko mbere yari Pariki y’Akagera.

Gatoto Robert, avuga ko icyo ashimira kandida Perezida, Paul Kagame, ari uko yirengagije amadovize inyamanswa zinjirizaga Igihugu akagabanya ingano ya Pariki y’Akagera ubutaka bumwe bugahabwa abaturage.

Abasaza bari bishimye bigaragara ku maso

Ikindi ngo amaze kubaha ubutaka bwo guhinga no kororeraho, yanaciye kuzerereza inka abakangurira gukora ubuhinzi n’ubworozi bya kijyambere.

Agira ati “Yadukanguriye guhinga no korora kijyambere, yatwubakiye ibidendezi by’amazi ndetse aduha n’amahema afata amazi y’imvura, ubu ntitukizerereza inka kuko zinywera mu rwuri.”

Uwamwezi Marcianna, avuga ko Umuryango FPR-Inkotanyi wamukuye mu buhungiro ndetse umwubakira n’ubuzima ahanini biciye mu guhora ubuyobozi bukangurira abagore guhaguruka bagakora bakiteza imbere.

Urubyiruko rwafashaga abanyamuryango kwamamaza umukandida wabo

Avuga ko ubu ari rwiyemezamirimo ufite uruganda rukora imitobe n’inzoga mu mbuto cyane inanasi rufite agaciro k’amafaranga y’u Rwanda arenga miliyoni 100 ndetse akaba yumisha inanasi n’imineke akabyohereza mu mahanga akishyurwa mu madolari.

Ati “Kagame yaratubwiye ngo banyarwandakazi muve mu mbere mutinyuke murashoboye. Nahagurutse mbere ntangira urugamba rwo kwiteza imbere, mpabwa amahugurwa yo kwihangira imirimo ubu mfite uruganda rufite agaciro karenze miliyoni 100.”

Kuri ubu kompanyi ye, ifitanye amasezerano na Rwanda TVT Board yo kwigisha abanyeshuri bigira ku murimo ku buryo abanyeshuri bahita bahabwa impamyabushobozi.

Abaturage bari bitabiriye ku bwinshi

Abagore bishimira ko bahawe ijambo ku buryo basigaye bajya mu myanya y’ubuyobozi, kuba batagikorerwa ihohoterwa mungo zabo no kuba nabo basigaye bafite amahirwe yo kwiga nka basaza babo n’ibindi.

By’umwihariko abaturage ba Musheri bashima ibikorwa remezo bamaze kwegerezwa birimo amazi, amashanyarazi, imihanda n’ibindi.

Alphonsine Mukarwego

Yabitangaje kuri uyu wa kabiri tariki ya 09 Nyakanga 2024, ubwo abanyamuryango ba FPR-Inkotanyi bo mu Karere ka Gicumbi na Rulindo, bamamazaga umukandida Perezida wayo Paul Kagame.

Mukarwego yashimye Ingabo zahoze ari iza RPA/Inkotanyi zabanye nabo mu gihe cy’urugamba rwo kubohora Igihugu zibarindira umutekano.

Avuga ko urukundo bagaragarijwe n’ingabo za RPA/Inkotanyi rwabasizemo umwenda ariko we mu rwego rwo kwitura ineza yagiriwe n’Inkotanyi yahisemo kuba malayikamurinzi ubu akaba arera abana bane babuze ababyeyi babo b’umubiri.

Ati “Najyaga ntekereza n’umuryango wanjye icyo nakwitura Inkotanyi ariko sinkibone. Haje malayikamurinzi, jye n’umutware wanjye twafashe iya mbere mu kurerera Igihugu. nateruye mbabwira ko mfite abana 10, harimo batandatu nabyaranye n’umugabo wanjye n’abandi ndera nka malayikamurinzi, umukuru ari mu kiciro cya mbere cya kaminuza.”

Ikindi ni uko muri abo bana arera yamufungurije konti muri banki kugira ngo azitunge mu gihe we azaba atagishoboye kumwitaho.

Yashimye umushinga wa Green Gicumbi, wabafashije gukora amaterasi y’indinganire ku buryo basigaye bahinga bakeza, ibafasha kuvugurura amashyamba ndetse inabaterera icyayi cyo ku musozi.

Mukarwego wabaga mu nzu y’ibiti isakaje shitingi ubu ngo yabashije kwiyubakira inzu isakajwe amabati 65 ifite umuriro n’amazi ndetse akaba akoresha bio-gaz mu guteka.

Nyuma yo guhabwa amahugurwa yo korora kijyambere kuri ubu ahinga ubwatsi bw’inka ku buryo ubu abuhinga akanabugurisha ku bandi borozi baturutse hirya no hino mu Gihugu.

Yagize ati “Ndashimira umugabo wanjye wimye amatwi abavandimwe be bamubwiraga ko nimara kwiga ntazasubirana nawe ariko akabyima amatwi. Sinari nziko inka irya indyo yuzuye ku buryo inka ya girinka nahawe ubu ikamwa amata menshi.”

Uyu amaze gushinga amatsinda atanu arimo aborozi 165 bazi korora neza ku buryo we n’abo borozi bamaze gushinga kompanyi icuruza ubwatsi bwongera umukamo ndetse bakaba banafite intumbero yo kubaka ubuhunikiro n’imashini ibusya ku buryo bagira ubwatsi bwinshi.

Mukarwego avuga ko Kagame ari impano bahawe n’Imana bityo akwiye kuyobora. Ati “Nyakubahwa chairman tukamuhabwa na Ruhanga nibamureke ayobore.”

Abanyagicumbi kandi bashimye umudugudu w’icyitegererezo bubakiwe, amazi n’amashanyarazi bahawe, amashuri n’amavuriro ndetse n’ibindi.

Kureba andi mafoto, kanda HANO

Reba ibindi muri izi Videwo:

Videwo: Richard Kwizera & Salomo George

Kagame yongeye gusaba Abanyarwanda kuryama bagasinzira

Yabitangaje kuri uyu wa kabiri tariki ya 09 Nyakanga 2024, ubwo yagiranaga ikiganiro n’abakoresha imbuga nkoranyambaga nyuma yo gusura indacye yabagamo umuyobozi w’Ingabo za RPA mugihe cyo kubohora u Rwanda iri ku Mulindi.

Umwe mu bakoresha imbuga nkoranyambaga yamubajije igisobanuro cy’ijambo yasubije abanyamakuru ko bakwiye kuryama bagasinzira nyamara hari Ibihugu byigamba gutera u Rwanda.

Perezida wa Repubulika, Paul Kagame, yasubije ko icyo yashakaga kuvuga kwari uguhumuriza Abanyarwanda ko umutekano wabo urinzwe ndetse no kubasaba kudaha agaciro ibyo abavuga ko bazatera u Rwanda.

Kagame yasabye Abanyarwanda kudaha agaciro abavuga ko bazatera u Rwanda

Yagize ati “Ubutumwa muryame musinzire kwari uguhumuriza abantu ariko nanone Intare mwari mwayibona, muzayirebe uhora usanga isa n’isinziriye ariko burya ntisinziriye niyo ukandagiye irabyuka ariko ikindi gihe iba isinziriye.”

Yavuze ko abantu bakwiye kuryama bagasinzira ariko hagira igikoma bagakanguka.

Yavuze ko abirirwa basakuza bavuga ko batera u Rwanda badashobora kubikora kuko bazi ko bahura n’akaga ahubwo baba bashaka kurangaza abantu gusa.

Abaturage ba Kayonza bishimira ko batakivoma amazi y’ibirohwa

Yabitangaje ku cyumweru tariki ya 07 Nyakanga 2024, ubwo abanyamuryango b’Umuryango FPR Inkotanyi mu Turere twa Kayonza, Gatsibo, Rwamagana na Ngoma bamamazaga umukandida watanzwe n’uyu muryango ku mwanya w’Umukuru w’Igihugu.

Mutagoma, avuga ko henshi mu Karere ka Kayonza kubona amazi byari ikibazo gikomeye kuko ayabonekaga yabaga ari ayo mu biyaga no mu manga munsi y’imisozi byatumaga abana badakura.

Kuri we ngo ntazibagirwa ubwo yigaga mu mashuri yisumbuye mu Murenge wa Nyamirama, we n’abanyeshuri bagenzi be bahitagamo gukaraba kabiri mu cyumweru kubera kwiganyira kujya kuvoma amazi mu manga y’umusozi wa Kimpunu.

Ati “Twavomaga ahantu munsi y’umusozi mu manga ahantu hitwa Kimpunu mbere yo kujya mu ishuri kandi ubwo ni mu ishuri ryisumbuye, bamwe muri twe twajyaga duhitamo kujyayo kabiri gusa mu cyumweru kubera uburyo hareshyaga, murabyumva ko twanakarabaga kabiri mu cyumweru.”

Avuga kandi ko iyo yatahaga mu biruhuko nabwo kubera iwabo ari mu Murenge wa Gahini ngo bajyaga kuvoma amazi y’intaruka z’ikiyaga cya Muhazi ku buryo iyo bataribwaga n’imisundwe aribo bagarukaga bakayirya.

Yagize ati “Igishanga bita Ntaruka cyabagamo imisundwe, wakandagiragamo ukakurya, munyemerere mbivuge, abato twaravugaga ngo umusundwe n’utandya ndawurya. Bisobanuye ko niba ukuyemo ikirenge utakuriye ubwo iyo utwaye mu kidomoro twarayiryaga kuko niyo mazi twakoreshaga.”

Mutesi Anita, nawe avuga ko ikibazo cy’amazi cyari ingume cyane mu Turere twa Gatsibo na Kayonza ariko ubu cyarakemutse ku buryo abaturage batakivoma ibirohwa cyangwa munsi y’imisozi.

Iki kibazo kandi cyari ingutu no ku borozi aho kubona amazi y’inka zabo byari ikibazo ariko hakaba haracukuwe ibidendezi bifata amazi mu nzuri ndetse n’amahema afata amazi kuri nkunganire ya Leta ndetse na nayikondo zikoresha imirasire y’izuba.

Yagize ati “Mwarakoze mwaduhaye amazi, inka zajyaga zipfa igihe cy’izuba kubera kubura amazi kuko baburaga aho bazitwara. Ubu hari ikoranabuhanga risunika amazi akajya mu bibumbiro inka zikanywa umworozi yihagarariye azibyinira.”

Ikindi Kayonza bashimira kandida Perezida, Paul Kagame, ni imihanda ihuza Imirenge yakozwe ndetse n’uwa Kaburimbo ubahuza n’imipaka wazamuye ishoramari muri santere ya Kayonza ndetse n’undi wa Kabarondo kugera muri Pariki y’Akagera.

Kayonza kandi ngo yabaye igicumbi cy’ubukererugendo kubera izanywa rya zimwe mu nyamanswa zari zitakiboneka muri Pariki y’Akagera ndetse n’inyungu ikomoka ku bukerarugendo igera ku baturage.

Bishimiye kandi imiturire irimo kuba batagituye muri nyakatsi ndetse bubakirwa imidugudu y’icyitekegererezo hirya no hino mu Karere ndetse hanubakwa ingo mbonezamikurire y’abana, ababyeyi bigishwa kubategurira indyo yuzuye.

By’umwihariko aba Rwamagana bo bashimye ko umushinga w’ubuhinzi bw’indabo n’icyanya cy’inganda byahaye urubyiruko rwinshi akazi.

Bashimye Kagame kandi kuba Intara y’Iburasirazuba yarayiteje imbere mugihe yari yarasigajwe inyuma, hakaba hari kaminuza enye, ibitaro bigezweho bibiri muri buri karere n’ibindi.

Kureba amafoto menshi, kanda HANO

Reba ibindi muri iyi Video:

Kellen yashimye Kagame waciye umuco wo kubaterura ahubwo akabaha amashuri

Yabitangaje kuri iki cyumweru tariki ya 07 Nyakanga 2024, ubwo abanyamuryango b’Umuryango FPR-Inkotanyi bo mu Turere twa Gatsibo na Nyagatare, bahuriraga kuri site ya Nsheke mu Murenge wa Nyagatare, bamamaza umukandida-Perezida watanzwe n’uyu Muryango, Paul Kagame.

Mbabazi Kellen, yashimye Chairman wa FPR, Paul Kagame, wakuye abakobwa ku ruhimbi no mu byansi ahubwo nabo bajya mu mashuri bariga nka basaza babo.

Ku giti cye ngo yagiye mu ishuri akuze ariko abasha kwiga ndetse asoza na kaminuza n’amanota meza.

Yagize ati “Kera abakobwa hano ntibigaga nanjye undeba nagiye kwiga nkuze cyane ariko kubera imiyoborere myiza abayobozi bagiye mu babyeyi bacu bati abakobwa kuki batiga? Reka umukobwa ni uwo kwitira ibyansi, akicara ku ruhimbi akitwikira ntihagire umureba mu maso.”

Chairman wa FPR yakiriwe n’abaturage barenga ibihumbi 300

Akomeza agira ati “Nyakubahwa chairman ndagira ngo nkubwire ngo wibare kudukiza kuba mu rugo, iyo ataba mwebwe ntabwo mba naragiye ku ishuri kandi nagezeyo nsanga ndi umuhanga, ubu nasoje kaminuza mfite n’amanota meza.”

Mbabazi avuga ko uretse kuba abakobwa baragiye mu mashuri by’umwihariko ngo abagore bamushimira kuba yaraciye umuco guterura abakobwa wahozeho cyane mu Karere ka Nyagatare.

Ati “Mu Karere ka Nyagatare hari n’umuco mubi wo kureba umukobwa mwiza nkanjye umuntu akamuterura akamwirukankana akagenda ngo aramushatse batabivuganye. Ndashima imiyoborere yanyu kuko mwakuyeho ibintu byo guterura abakobwa ubu turikundanira.”

Mbabazi, avuga ko Akarere ka Nyagatare gafitanye igihango na Kagame ndetse n’Inkotanyi kuko ariryo rembo ryo kubohora Igihugu ndetse akaba ari naho hari ubutaka bwa mbere RPA/Inkotanyi bafashe mu Rwanda ari nayo mpamvu buri mwaka bihaye intego yo kujya bakora urugendo n’amaguru bakajya gusura ubwo butaka burimo n’indake y’uwari umuyobozi w’urugambo rwo kubohora Igihugu, Paul Kagame.

Nsengimana Felicien, umuturage wo mu Murenge wa Gatunda nawe mu buhamya bwe yavuze ko yavukiye mu muryango ukennye ku buryo ku myaka 14 yafashaga ababyeyi kujya guca incuro kugira ngo babone icyo bafungura.

Ibi ariko ntibyamubujije kwiga nk’abandi kubera ubufasha bwa Leta ndetse uyu munsi ngo akaba yarasoje kaminuza ndetse akaba asigaye ari mu bantu bafasha abantu gutegura imishinga.

Reba ibindi muri iyi Video:

Video: Richard Kwizera

Baraye mu mihanda baje kwamamaza Kagame

Umuturage wa mbere waraye kuri site ya Nsheke, Akagari ka Nsheke, Umurenge wa Nyagatare, ni Ugirimbabazi Rachel, waturutse mu Murenge wa Mimuli.

Impamvu yaraye ahagomba kwamamarizwa umukandida wa FPR-Inkotanyi ngo ni uko ku buyobozi bwa kandida Perezida, Paul Kagame, abana be bane bishyuriwe amashuri bose basoza kaminuza nyamara we, umuryango avukamo n’uwo yashatsemo ntawakandagiye mu ishuri kubera ubukene.

Saa kumi n’imwe n’iminota ibiri z’igitondo kuri iki cyumweru tariki ya 07 Nyakanga 2024, Sumbaburanga Pascal, wo mu Murenge wa Nyagatare, Akagari ka Bushoga, yari ageze kuri site ya Nsheke.

Avuga ko atigeze aryama ahubwo yaraye agenda agamije kuza kwamamaza uwo yita inshuti ye magara kuko yamufashije mu bumuga yatewe n’inkoni z’abasirikare ba FAR.

Sibomana Ahmed yagenze ibirometero 20 n’amaguru nyamara afite ubumuga

Ati “Maze igihe ntamubona ubu nje kumusuhuza. Mfite ubumuga niyo mpamvu nacumbagiye ngo nze musuhuze. Abasirikare ba Habyarimana barankubise baramugaza ariko kuba nkihumeka mbikesha inshuti nkunda Kagame.”

Umusaza Rwabugiri w’imyaka 84 y’amavuko, yahuye n’umunyamakuru wa Kigali Today, saa kumi n’imwe n’iminota 10 abura metero 200 gusa ngo agere kuri site yamamarizwaho umukandida Perezida watanzwe n’Umuryango FPR-Inkotanyi.

Avuga ko yavuye iwe saa munani z’ijoro kugira ngo nawe yifatanye n’abandi banyamuryango kwamamaza uwo yita umutware wabo wakuye Igihugu mu icuraburindi.

Yagize ati “Sinari buryamye kuko igihe kirahari, naje igicuku ngamije kureba Kagame wacu. Umutware wacu yatuvanye habi adushyira heza, u Rwanda rwacu abari abategetsi babi bari barwubitse none yarwubuye ni ijisho ry’Imana yaduhaye.”

Sibomana Ahmed, yavuye mu Kagari ka Tabagwe, Umurenge wa Tabagwe agendera ku mbago kubera ubumuga afite bw’ukuguru.

Abayisilamu nabo bari babukereye mu kwamamaza umukandida wa RPF

Avuga ko yazinduwe no kwamamaza umukandida wa FPR no kumushimira ibyo yabagejejeho cyane umutekano usesuye n’ibindi bikorwa bigamije iterambere ryabo.

Yagize ati “Kuba ngenda gutya niwe kuko iyi nyunganira-ngingo mfite niwe wayimpaye. Ntitwabura rero kurara amajoro tugenda kubera umutekano usesuye dufite mu Gihugu.”

Mubyo bashimira umukandida Perezida, Paul Kagame, harimo kwegerezwa amashuri, amavuriro, ibikorwa remezo nk’imihanda, amazi, amashanyarazi n’ibindi.

Mu kwitegura neza uyu munsi, amadini n’amatorero asanzwe asenga ku cyumweru, bahisemo ko amasengesho aba kuwa Gatandatu tariki ya 06 Nyakanga 2024.

Reba ibindi muri iyi Video:

Video: Richard Kwizera

Abanyabugesera bashimiye Kagame wabakijije inkomati

Yabitangaje kuri uyu wa Gatandatu tariki 06 Nyakanga 2024, ubwo abaturage b’Akarere ka Bugesera bahuriraga mu gikorwa cyo kwamamaza umukandida ku mwanya wa Perezida wa Repubulika, Paul Kagame, watanzwe n’Umuryango wa FPR Inkotanyi.

Mu buhamya bwatanzwe na Divin Uwayo wavukiye akanakurira mu Karere ka Bugesera, yagarutse ku mateka yaho, yari ashingiye kuri Politiki mbi y’ivangura kugeza kuri Jenoside yakorewe Abatutsi.

Ibi ngo byatumye abana bahavuka bigaga igare ku myaka irindwi kugira ngo babashe kuzenguruka ahantu hatandukanye bashaka amazi na yo babonaga babanje gukomata.

Yagize ati “Nubwo wabaga ungana utyo byagusabaga ko ku igare utwaraho amajerekani atatu ukazenguruka amavomo ashoboka, abazi Rwakibirizi, Kavovo, ahitwa ku Gasenga n’ahandi hose tutirengagije ko hari abavomaga Cyohoha n’ibindi biyaga.”

Akomeza agira ati “N’ubwo twazindukaga gutyo ku ivomo kubera ikibazo cy’amazi twabaga tugisangiye turi benshi havomaga umunyembaraga ngira ngo abo tungana n’abanduta bazi ikintu bita “Inkomati” ariko Nyakubahwa Chairman mwarakoze kudukiza inkomati, ubu Bugesera dufite amazi ni ukuri.”

Yashimye ibikorwa remezo byinshi bamaze kwegerezwa birimo ikibuga cy’indege, imihanda ya kaburimbo, amashuri, amavuriro n’ibindi.

Umuhanzi, Ingabire Butera Jeanne D’Arc uzwi nka Knowless, avuga ko yarokotse Jenoside akiri umwana muto ndetse bamwe mu bagize umuryango we bakamureze bamwe bahita bitaba Imana asigarana n’undi umwe.

Avuga ko babaga mu nzu ntoya cyane bitaga ikibahima nawe akazinduka mu gitondo cyane ajya mu kazi kugira ngo abone ibibatunga akamusiga wenyine mu nzu.

Knowless yashimiye Kagame ku byo yagejeje ku Banyarwanda

Kubera ubwoba ngo yahisemo kujya arara asakuza akanabyuka asakuza kugira ngo atera ubwoba icyakamugiriye nabi.

Yagize ati “Yagendaga nka saa cyenda z’ijoro kuko akazi yari yarakabonye kure noneho kubera ubwoba bw’uwampohohotera cyangwa igisimba cyandya nigiriye inama yo kujya ndara nsakuza nkazinduka nsakuza kugira ngo urwo rusaku rutere ubwoba icyakangiriye nabi.”

Cyakora ngo ntibyamubujije kwiga n’ubwo atari afite ubushobozi ku buryo asoje ikiciro cya gatatu cya kaminuza ndetse n’umuziki akora umuzanira iterambere.

Ati “Nababwiye akantu karabonetse (amafaranga) nari mfite inzozi nyinshi, izaciyemo n’izitaracamo harimo no kubaka inzu, mu kazu gato nakuriyemo nagombaga kubaka inini ku buryo icyumba narayemo atari cyo nzindukiramo mu rwego rwo kwisanzura.”

Akomeza agira ati “Ibibanza nabonaga byabaga ari bito, ibinini twabibonye mu Bugesera, tuhubaka inzu ijyanye n’inzozi zanjye.”

Knowless, avuga ko Abanyarwanda bafitiye Inkotanyi umwenda kandi batabasha kwishyura gusa akizeza ko ibyagezweho bazabirinda.

Umuyobozi w’Ishyaka PL

Umuyobozi w’ishyaka PL, Donatille Mukabarisa, nawe yagarutse ku bikorwa byagezweho kubera imiyoborere myiza yimakajwe na Paul Kagame, asaba ko bazamuhundagazaho amajwi ku bwinshi.

Kureba amafoto menshi, kanda HANO

Reba ibindi muri izi Videwo:

Amafoto: Rwigema Freddy

Videwo: Richard Kwizera

Tariki ya 04 Nyakanga 1994 ubwo Ingabo za APR zari zigeze mu Mujyi wa Kigali rwagati

Iburasirazuba

Umuturage wo mu Karere ka Bugesera wari umaze igihe akuwe mu rufunzo avuga ko tariki ya 04 Nyakanga 1994 yabonye abantu bari kumwe mu nkambi basubira mu masambu yabo.

Umuturage wo mu Karere ka Nyagatare, avuga ko uwo munsi yabyutse nk’ibisanzwe ariko saa tanu ari Ryabega aragiye inka, abona imodoka enye zirimo impunzi zitahuka ziva mu Gihugu cya Uganda.

Avuga kandi ko inka nyinshi zavaga muri Uganda zambukaga umupaka wa Kagitumba.

Agira ati “Nari ndagiye inka mbona ibimodoka byo mu bwoko bwa Tata byikoreye abantu bahungukaga bava muri Uganda icyo gihe berekezaga za Rwagitima. Ndibuka ko ari nabwo Kagitumba hanyuraga inka nyinshi ziza mu Rwanda.”

Sibomana Jean Nepomuscene wo mu Karere ka Gatsibo, avuga ko uwo munsi atazi ibyawo kuko yari mu bwihisho ahitwa i Mafu mu Murenge wa Muhura kuko bari bakigoswe n’Interahamwe zari i Bugarura.

Ndungutse Jean Bosco ukomoka mu Karere ka Gatsibo avuga ko uwo munsi yari i Kibungo abona abantu babyina mu muhanda bavuga ko Inkotanyi zafashe Igihugu, hari nyuma ya saa sita.

Umuturage wo mu Karere ka Kirehe avuga ko tariki ya 04 Nyakanga 1994, yazindutse abona impunzi zitari nyinshi zambukaga Akagera zigana muri Tanzaniya.

Amajyepfo

Bamwe mu baturage bazi neza amakuru yo kubohora u Rwanda, bavuga ko itariki ya 04 Nyakanga izuba ryari rikambye nk’ibisanzwe mu mpeshyi.

Imirwano mu bice bya Gitarama yari ikomeje, ariko ari nko gushorera ingabo za FAR ngo zihunge, hakumvikana amasasu zarasaga zisa n’izibwira Inkotanyi ko zitarambuka Nyabarongo, mbese intambara yaberaga mu bice bya Ndiza.

Umuturage wari ku muhanda wa Kaburimbo mu bice bya Gisenyi, ubu ni mu Murenge wa Gatumba mu Karere ka Ngororero avuga kyaku itariki ya 04 Nyakanga 1994 mu gitondo humvikanye amasasu menshi muri Muhanga.

Avuga ko bageze mu masaha ya saa tanrwz’amanywa, urusaku rwayo rwahagaze, maze mu masaha abiri yakurikiyeho, abona imodoka nyinshi zuzuye ingabo za FAR zerekeza mu Burengerazuba, ntiyashidikanya ko hari ibitagenda.

Agira ati "Twibajije ukuntu ingabo nyinshi ziri kwerekeza mu Burengerazuba, ubundi herekezaga impunzi, wabonaga nta morari zifite kuko ntizaririmbaga kandi mbere zaducagaho zibyina, ntitwamenye icyabaye".

"Nyuma bukeye bwaho haje impunzi nyinshi bivuze ko zari zaje n’amaguru naho ingabo zazamutse n’imodoka zabo, nta mirwano yari icyumvikana, ni zo zaduhaye amakuru ko nta musirikare usigaye inyuma natwe turahunga kuko twumvaga ko Inkotanyi zenda kutugeraho".

Abatuye mu bice bya Rambura ahari harahungishirijwe Radio Rwanda, bo bavuga ko ku itariki ya 04 Nyakanga 1994, bwakeye nta n’inyoni itamba ku Kibihekane ahakoreraga iyo Radio.

Bavuga ko usibye ingabo nkeya za FAR zari zigicaracara, mu tumodoka duto, ndetse ngo bwakeye n’imiryango y’abasirikare ba FAR batayibona kuko yari yahungishijwe.

Umwe muri bo agira ati "Hepfo hano ni kwa Habyarimana no kwa Nsekalije, abantu bari barahungiyeyo bwakeye tubona bagenda ariko ntibavuge icyabaye, tunagira ngo bimukiye ku Gisenyi, ntabwo Radio yakoze uwo munsi nta makuru twamenye twe twagumye mu rugo".

Umuturage wo mu Murenge wa Ndora mu Karere ka Gisagara avuga ko nubwo atibuka amatariki bitewe n’ubuzima yari arimo bwo kuba yarabohojwe, avuga ko yabonye abantu benshi bahunga ariko bose bagenda buhoro ku buryo yabashije kubakurikira ari kumwe n’umuryango wari waramubohoje ndetse yikorejwe inkono y’amashaza bakuye ku ziko ku buryo yagendaga imutogotera ku mutwe, bageze aho baruhuka bayirya batamuhayeho kandi ari we wari uyikoreye.

Amajyaruguru

Umuturage uvuka mu Karere ka Burera wari ufite imyaka 13 muri Jenoside yakorewe Abatutsi mu 1994, yabwiye Kigali Today ko ku itariki 04 Nyakanga 1994 yavuye iwabo muri Cyeru mu Karere ka Burera mu masaha ya mugitondo, ahunga ajya muri Zaïre, ageze ku gasantere kitwa Rusenge hafi ya Kivuruga, abona abasirikare mu modoka bahamagara bavuga ko impunzi zisubira iwabo, ko Inkotanyi zahafashe.

Ngo nibwo Inkotanyi zabashyize mu modoka zibazana ahitwa Kirambo mu nkambi bamwe baba mu mashitingi abandi babashyira mu mashuri.

Uwo mu Karere ka Musanze wari ufite hafi imyaka 30, ku itariki 04 Nyakanga 1994 yari i Remera mu Mujyi wa Kigali. Avuga ko mu gitondo yumvise urusaku rw’amasasu ariko bigera saa tanu atakiyumva.

Umuturage uvuka mu Murenge wa Kivuruga, Akarere ka Gakenke, avuga ko nubwo Jenoside yakorewe Abatutsi yabaye afite imyaka umunani, tariki ya 04 Nyakanga 1994, nka saa tatu z’igitondo yumvise urusaku rw’amasasu menshi aho yari yihishe muri Nyabihu bahunga bagaruka iwabo bahura n’Inkotanyi bagira ubwoba bakeka ko ari EX-FAR.

Iburengerazuba

Umujyi wa Gisenyi wabohojwe n’ingabo zahoze ari iza RPA tariki 17 kugera tariki 19 Nyakanga 1994.

Abari mu mujyi wa Gisenyi bavuga ko tariki 4 Nyakanga 1994, umujyi wari wuzuye impunzi zavaga i Kigali na Ruhengeri zarimo zihunga.

Habimana ni umuturage wari mu Mujyi wa Gisenyi. Avuga ko mu masaha ya mugitondo kuva kuri Mahoko kugera ku mupaka munini hari imirongo y’impunzi nyinshi, zerekezaga muri Zaïre harimo n’abananiwe kubera imizigo.

Avuga kandi ko uretse imirongo y’abaturage bahungaga harimo imodoka za gisivile zipakiye abantu n’ibintu ndetse n’imodoka za gisirikare zarimo abahungaga.

Mireshywanshuro ni umuturage wari utuye mu yahoze ari Mutura muri Perefegitura ya Gisenyi. Avuga ko tariki ya 4 Nyakanga 1994 inzira igana Kibumba yakiriye abantu benshi barimo bava mu nzira ya Kigali na Ruhengeri.

Umujyi wa Kigali

Umuturage wari wihishe mu nzu y’iwabo ari kumwe na nyirakuru, mu Karere ka Kicukiro (Gikondo ya kera) avuga ko tariki ya 04 Nyakanga 1994 bwakeye nta kintu bumva gikoma hanze, ahantu hose hatuje, bigeze saa yine ajya ku ivomo ryari muri metero hagati ya 20 na 30, ahabona umusirikare wari ufite imbunda aniziritse akenda mu nda amusaba ko bajyana akamwereka nyirakuru.

Ikindi ngo ni uko aribwo yongeye kubona abantu benshi aho bari bajyanywe i Gikondo ahitwa kwa Padiri.

Abandi banyamakuru bagize uruhare muri iyi nkuru:

Ephrem Murindabigwi
Servilien Mutuyimana
Sylidio Sebuharara
Marie Claire Joyeuse
Abdul Tarib

Hasigaye hakorwa ubuhinzi bwuhira imusozi

Akarere ka Nyagatare ni kamwe mu Turere twiganjemo ubuhinzi n’ubworozi kubera ubunini bwako ndetse n’ubutaka bushya ahanini bwahoze ari pariki y’Akagera.

Umuyobozi wako, Gasana Stephen, avuga ko ari Akarere kavuye kure kubera ko igice kinini cyako cyatuwe nyuma y’umwaka wa 1994 urugamba rwo kubohora Igihugu no guhagarika Jenoside yakorewe Abatutsi birangiye.

Cyakora ngo kubera ubuyobozi bwiza, abaturage bahawe amahugurwa atandukanye hagamijwe kubyaza umusaruro ubutaka ndetse nabo babyumva vuba umusaruro utangira kugenda wiyongera umwaka ku wundi.

Avuga ko nko ku gihingwa cy’ibigori ndetse n’umuceri, Leta yatunganyije ubuso bwuhirwa burenga hegitari hafi 7,000 zihingwaho ibigori bisimbuzwa ibishyimbo, soya ndetse n’imbuto ndetse n’ibishanga ku buso burenga hegitari 2,000 bihingwaho umuceri.

Umusaruro w’ibigori wariyongereye

Ikindi ngo Leta yashyizeho nkunganire ku buryo byafashije abahinzi kuzamura umusaruro uva munsi ya toni kuri hegitari ku bigori n’umuceri ugera kuri toni eshanu muri rusange n’ubwo hari abahinzi bageze ku musaruro urenze uwo.

Yagize ati “Twagize igihe cyo gutunganya ubutaka bwuhirwa kugira ngo dukore ubuhinzi budashingiye ku kirere ahubwo ku igenamigambi. Umusaruro wavuyemo ni uko ku bigori n’umuceri twavuye ku gusaruro ku biro tukaba tugeze kuri toni eshanu (5) kuri hegitari n’ubwo hari abahinzi basarura izirenze umunani.”

Iri zamuka ry’umusaruro w’ubuhinzi n’ubworozi ahanini ngo ryatewe no kwibumbira mu makoperative ku buryo abanyamuryango bafatanyije mu kwigishanya bituma buri wese akora ubuhinzi n’ubworozi bwa kijyambere.

Aborozi bavuye mu bworozi bwa gakondo bajya muri kijyambere

By’umwihariko mu bworozi ngo aborozi bahawe amahugurwa atandukanye bituma bava ku nka za gakondo bajya mu bworozi bwa kijyambere butanga umukamo mwinshi.

Avuga ko mu gihe cy’imvura, Akarere mbere katarenzaga litiro 20, 000 ariko uyu munsi bakaba bageze kuri litiro zirenze 100,000 ku munsi.

Agira ati “Ubundi twari kuri litiro hagati ya 20,000 na 30,000 ubundi ntizigere ariko ubu mu bihe byiza dukama litiro zirenga 100,000 byajya hasi tukabona litiro 70,000.”

Avuga ko ibi byagezweho ahanini kubera ishoramari Leta yashyizemo harimo amahema afata amazi mu nzuri, guhinga ubwatsi, imashini zibutunganya, kubaka hangari bubikwamo n’ibindi kandi kuri nkunganire ya 60%.

N’ubwo aborozi batarishimira igiciro cy’amata bitewe n’ibyo bashoramo ariko ngo cyagiye kizamuka ndetse n’ubwiza bw’inyama bugerwaho kubera ko inka zitagikora ingendo ndende mu gushaka ubwatsi n’amazi.

Mirenge Desire, umworozi mu Murenge wa Karangazi, avuga ko yahungutse atunze inka nyinshi ariko zitabafitiye akamaro ugereranyije n’iza kijyambere bafite uyu munsi ndetse bakanaragira nabi bakanarwaza indwara zitandukanye.

Amata yariyongereye

Imyaka 30 ishize ahungutse, ashima ubuyobozi bwiza by’umwihariko Perezida wa Repubulika wabihanganiye kubera imyumvire ku bworozi bari bafite ku buryo mu isaranganya ry’ubutaka yakuwe kuri hegitari 75 ahabwa 15 ariko azikoreramo neza zimusubiza izo yahoranye abikesha amata y’inka ze za kijyambere yitabiriye korora mu ba mbere.

Yagize ati “Icyo nshimira RPF na Perezida wa Repubulika ni uko Igihugu cyatwihanganiye kiduha byose ndetse igihe cya Komisiyo y’ubutaka nambuwe hegitari 75 mu isaranganya bansigira 15 numva ni nko kumanuka mu giti nkagwa hasi.”

Akomeza agira ati “N’ubwo twahuye n’ibibazo byo kutamenya uko borora inka za kijyambere zikaturwarana zigapfa, twabonye urugendo-shuri muri Kenya, ndi mu bantu bagemuye amata menshi mu gace dutuyemo kuko nagemuraga litiro 300 ku munsi mu nka 24 za kijyambere nasigaranye.”

Uyu ufite abana batandatu basoje kaminuza abikesha amata y’inka ze ashishikariza abaturanyi korora neza kuko bifite inyungu nyinshi.

Abagore bavuye ku ruhimbi bajya mu yindi mirimo ibateza imbere

Babitangaje kuwa Gatatu tariki ya 03 Nyakanga 2024, ubwo bari mu gikorwa cyo kwamamaza umukandida Perezida w’uyu muryango, Paul Kagame, ndetse n’abakandida Depite bawo.

Mbabazi Jane Sendakize watanaze ubuhamya yavuze ko yakuze akunda kwiga ariko ababyeyi bamushyingira asoje amashuri abanza inzozi ze atazigezeho kubera ababyeyi batari bazi akamaro ko kwiga.

Avuga ko FPR-Inkotanyi yashyize imbere umugore ndetse inamushishikariza kwiteza imbere nawe atangira guharanira kwiteza imbere.

Abakandida Depite ba FPR-Inkotanyi bakirijwe amata

Mu mwaka wa 2019, yahisemo gushinga ishuri guhera ikiciro cy’incuke n’abanza. Yagize ati "Ubwo mundeba aha nitwa Diregiteri w’ishuri ntarize. Nahagurutse ku ruhimbi no mu byansi dushinga ishuri ubu rifite abana barenga 250 mu ncuke n’abanza ndetse ntanga n’akazi ku bakozi 17, natwe turi muri bamwe barwanya ubushomeri mu Gihugu.”

Yasabye abagore gukoresha amahirwe Paul Kagame yabahaye maze bagakora bakiteza imbere.

Abasaza bari bakenyeye Kinyarwanda

Mihigo Xaver, wo mu Kagari ka Mishenyi Umurenge wa Rwempasha, avuga ko icyo ashimira FPR-Inkotanyi ari uko yabohoye Igihugu n’Abanyarwanda bari mu Gihugu ndetse inacyura abari impunzi bari bamaze imyaka irenga 30 barahunze Igihugu cyabo.

Umuryango FPR Inkotanyi kandi ngo yazanye umutekano mu Gihugu ndetse inunga abanyarwanda bari barahemukiranye. Ati “FPR yunze Abanyarwanda bari barahemukiranye kubera ingaruka z’ubukoroni, yazanye umutekano mu Gihugu inateza imbere Abanyarwanda bose muri rusange idatoranyije ndetse inazamurira Abanyarwanda imibereho myiza.”

Abaturage bari babukereye ari benshi mu kwamamaza umukandida Perezida w’Umuryango FPR-Inkotanyi

Ku giti cye ngo yabashije kugira ubuzima nyuma yo kugaruka mu Gihugu cye cy’amavuko yari yaravukijwe ndetse akaba yarabashije no kwiteza imbere binyuze mu bikorwa by’ubuhinzi n’ubworozi.

Rwempasha by’umwihariko bishimira ko bahawe amazi ya robine mu nzuri ku buryo batakigishisha inka mu gihe cy’impeshyi nk’iki, kuba barahawe ibikorwa remezo by’amashuri, amavuriro, amazi n’amashanyarazi ndetse bakaba bagiye kubona umuhanda wa kaburimbo Nyagatare-Rwempasha-Kizinga.

Uwagiraga ikibazo cy’uburwayi yahitaga agana mu ihema ririmo umuganga

Bamwe mu bakandida-Depite batanzwe n’Umuryango FPR-Inkotanyi

Babitangaje kuri uyu wa kabiri tariki ya 02 Nyakanga 2024, ubwo abanyamuryango ba FPR-Inkotanyi bamamazaga Paul Kagame nk’umukandida w’uyu Muryango ndetse n’abakandida Depite bawo.

Kayizarirwa Gaudence wo mu Murenge wa Tabagwe avuga ko aho yakuriye mu mahanga yari aziko umwuga wo guhinga utatunga umuntu keretse korora. Gusa ngo kubera ubuyobozi bwiza yabonye amahugurwa atandukanye yigishwa guhinga agamije isoko aho guhingira inda ndetse anahabwa amahugurwa yo korora kijyambere.

Kuri ubu yishimira ko ibyo akura mu buhinzi ndetse no mu bworozi byamufashije kwigisha abana be umunani hakaba harimo batatu basoje kaminuza n’undi ukiri kuyiga.

Abagore bishimira ko ubuyobozi burangajwe imbere na Paul Kagame bwabahaye ijambo

Ati “Nigishijwe guhinga ubu hegitari imwe y’ibigori nkuraho toni eshanu (5) inka tworoye nkeya kandi zitanga umukamo. Byamfashije kwigisha abana abiga mu mashuri yisumbuye nsigaje bacye kandi bishyurirwa neza abandi basoje kaminuza.”

Hakorimari Phocas, avuga ko mbere yagorwaga no gutunga umuryango kandi afite ubutaka kubera imyumvire mike ariko kubera inama z’abajyanama b’ubuhinzi ubutaka buto afite yabashije kububyaza umusaruro.

Avuga ko hegitari y’ubutaka afite yahisemo kujya ayihingaho igihingwa kimwe kandi ngo byamuhaye umusaruro ukomeye kuko yabashije kwigurira ikibanza ndetse anubakamo inzu nziza ndetse yigisha n’abana be.

Yagize ati “Iyo nahinze ibigori nkuramo toni esheshatu, nahinga ibishyimbo nkabonamo toni n’igice. Ni ukuvuga ngo buri gihembwe cy’ihinga sinjya munsi y’amafaranga miliyoni imwe (1,000,000). Nubatsemo inzu nziza, umugore n’abana barambara, abana bariga neza, mbese ubuzima bwanjye bwarahindutse.”

Abatuye Tabagwe bishimira ko basigaye bakora ubuhinzi buteye imbere ku buryo basagurira isoko

Ikindi abaturage b’Umurenge wa Tabagwe bashimira FPR-Inkotanyi ni uburyo buri Munyarwanda yemerewe gutura aho ashaka hose mu Gihugu abona hamuzamurira imibereho, kwegerezwa ibikorwa remezo harimo umuhanda wa kaburimbo Nyagatare-Tabagwe-Karama, amashuri, amavuriro n’ibindi.

Hari kandi abana bose biga kandi Leta ikaba yaratekereje ko bakomoka mu miryango itishoboye bose bagafatira ifunguro ku ishuri.

Yabitangaje kuri iki cyumweru tariki ya 30 Kanama 2024, ubwo abaturage b’Uturere twa Karongi, Rutsiro na Ngorero bahuriraga i Karongi mu rwego rwo kamamaza umukandida ku mwanya wa Perezida wa Repubulika, Paul Kagame, watanzwe n’Umuryango FPR-Inkotanyi.

Nshimiyimana avuga ko yize amashuri asanzwe nyuma akomereza mu y’imyuga n’ubumenyi ngiro mbere bitaga ay’abananiwe amasomo asanzwe yiga ishami ry’ububaji n’ikoranabuhanga mu giti ndetse abona amanota meza amwemerera gukomeza kaminuza.

Avuga ko yaje guhabwa akazi ku ishuri yizeho amashuri yisumbuye amafaranga yahembwaga akajya ayaguramo imbaho yakoragamo ibintu bitandukanye ubu akaba ageze ku kugura imodoka nini yuzuye imbaho.

Agira ati “Mu nama mutugira buri munsi kwihangira imirimo no kwigira byaranyubatse cyane. Amafaranga nahembwaga nayaguraga imbaho ku mutwe nkomeza kwizigamira biva ku rwego rwo kugura imbaho ku mutwe ubu ngera ku modoka, umunsi wa none mbasha kugura imodoka nini ya rukururana.”

Avuga ko mu kazi ke yafashije urundi rubyiruko ku buryo bamaze gukora ibintu byinshi kandi byiza bimwe bakura ku ikoranabuhanga ku buryo basigaye bakora ububaji bujyanye n’igihe.

Avuga ko ikoranabuhanga ribafasha kubona ibishushanyo by’ibyo bifuza gukora ndetse bakanabyereka abakiriya bagahitamo ibyo bifuza ko babakorera.

Bifashishije ikoranabuhanga kandi ngo babasha gutumiza imashini mu bihugu byo hanze batiriwe bajyayo.

Ngo kubera gukora neza amahoteri yo mu Karere ka Karongi yose abaha isoko yo kubakorera inzugi ndetse n’amakaro akoze mu mbaho.

Yasabye umukandida w’Umuryango FPR- Inkotanyi ko yamwemerera mu gihe azaba amaze gutsinda amatora y’Umukuru w’Igihugu, akazataka ibiro bye akoresheje amakaro akoze mu mbaho.

Yagize ati “Mfite intumbero nyinshi ariko ikifuzo mfite umunsi wa none, munyemerere muri iyi manda tugiyemo mbisabiye akazi muri Village Urugwiro nze mpatake amakaro yo mu mbaho ku rwego rushimishije.”

Nshimiyimana usigaye ari rwiyemezamirimo avuga ko akazi k’ububaji akora amaze kwiguriramo imodoka nziza bigaragaza iterambere amaze kugeraho.

Kureba amafoto menshi, kanda HANO

Reba ibindi muri izi Videwo:

Videwo: Richard Kwizera & Salomo George

Ibi ni ibikubiye mu buhamya bwatanzwe ubwo abanyamuryango ba FPR Inkotanyi mu Murenge wa Katabagemu bamamazaga umukandida ku mwanya wa Perezida wa Repubulika Paul Kagame ndetse n’abakandida-depite b’Umuryango FPR Inkotanyi.

Rutaganira Anastase w’imyaka 67 y’amavuko avuga ko yavukiye ndetse akurira mu kitwaga Umutara, Akagari ka Kizirakome y’ubu mu Murenge wa Karangazi.

Ashima amajyambere Igihugu kimaze kugeraho by’umwihariko kuba bafite amazi meza, umuriro w’amashanyarazi, imihanda, amashuri, amavuriro n’ibindi.

Avuga ko atabashije kwiga ngo asoze amashuri ahanini kubera amashuri yari kure cyane nyamara ubu ngo buri Kagari karimo ishuri.

Agira ati “Twigaga I Kigasha mu Karere ka Gatsibo niho hari amashuri icyo gihe haba ku ngoma ya Kayibanda n’iya Habyarimana. Ngeze mu wa gatatu urugendo rwarananiye ishuri ndarireka ariko ubu buri Kagari karimo ishuri abana bose bariga.”

Rutaganira, avuga ko mbere y’umwaka wa 1994, nta mugore wabyariraga kwa muganga ndetse ngo n’undi muntu wararaga yagorwaga no kwivuza kubera ko amavuriro yari kure cyane nyamara ubu ngo buri Kagari karimo ivuriro ufashwe n’ijoro yijyana kwa muganga.

Ati “Kuvana hano umurwayi kumugeza Nyagahita cyangwa I Nyagahanga byafataga amasaha arenze atanu. Umuntu yararwaga tukamushyira mu ngobyi segiteri yose ikagenda imwakuranwa. Umubyeyi ntawabyariraga kwa muganga kuko atakagezeyo yagumaga aho agategereza icyo Imana izakora.”

Avuga ko mbere umuturage yabonaga umuyobozi cyangwa umusirikare agakizwa n’amaguru kuko babakubitaga nyamara ubu ngo baricara bakajya inama z’iterambere bifuza ndetse bakanasangira.

Mutezimana Jackline wo mu Kagari ka Nyakigando avuga ko FPR Inkotanyi yamukuye habi kuko yashakiye umugabo mu nzu ya burende ayibyariramo abana batunzwe no guca inshuro.

Kubera ubuyobozi bwiza ngo babashije kwigurira ikibanza ndetse banubakamo inzu yo kubamo iciriritse.

Uyu yaje guhabwa amahugurwa ku buhinzi bwa kijyambere ndetse agirwa umujyanama mu buhinzi utarezaga ibiro 10 by’ibigori agera kuri toni esheshatu kuri hegitari kubera inyongeramusaruro babonye iriho nkunganire.

Kubera umusaruro w’ubuhinzi babonye byatumye biteza imbere ku buryo we n’umugabo we buri wese afite konti muri SACCO buri wese abereye undi umwishingizi.

Agira ati “Navuye ku biro 50 ubu ngeze kuri 92 ndatoshye kubera FPR, ndi umugore wizigamira mfite Konti yanjye n’umugabo akagira iye. Dufite urugo rumeze neza abana bariga neza, nkanda ku rukuta inzu yose ikabona.”

Avuga ko FPR yamufashije gukangura ubwonko bwe ku buryo ubu uwabaga muri burende ubu asigaye afasha abadafite ubushobozi nk’ubwe.

Kandida-depite watanzwe n’Umuryango FPR Inkotanyi, Wibabara Jennifer, yavuze ko impamvu ititwa ishyaka ahubwo ikitwa Umuryango ari uko idaheza yakira buri munyarwanda wese.

Ati “Baricaye basanga batashinga ishyaka ahubwo bashyira umuryango kuko abantu batatanye ntawukigira aho abarizwa. Inyuguti ya “F” ivuze Front ni ukuvuga ngo umuntu wese azaba ari imbere ntawuzaba inyuma.”

Akomeza agira ati “Abagore bari imbere, urubyiruko ruzaba imbere, abakecuru baza imbere, abato baza imbere, Inkotanyi bivuze ngo nta munebwe uzabaho n’uw’intege nke azasindagizwa.”

Yasabye abanyamuryango bamaze kugira icyo bigezaho mu buzima kwegera bagenzi babo bakabafasha kuzamuka kuko FPR itifuza ko hari umunyarwanda usigara inyuma mu iterambere.

Yabasabye kuzatora Paul Kagame nka Perezida w’u Rwanda kugira ngo amajyambere akomeze ndetse bakanatora abadepite batanzwe n’Umuryango FPR Inkotanyi kugira ngo bamufashe kwihutisha iterambere.

Abarezi baracyafite imbogamizi mu kwigisha abana bafite ubumuga kubera ibikoresho bicye

Urwunge rw’amashuri rwa Ntoma, rwakira abanyeshuri bafite ubumuga bworoheje nk’ubw’uruhu, ingingo, kutabona neza n’ubundi.

Ishimwe avuga ko n’ubwo afasha abarimu bagenzi be uburyo bwo kwigisha no kwita kuri abo bana ndetse n’abanyeshuri bakaba badaha akato bagenzi babo bafite ubumuga ariko hakenewe amahugurwa ku barimu bose ku rurimi rw’amarenga.

Ati “Twifuza ko twakongererwa ubumenyi n’igihe cyo kubutanga cyane cyane ku rurimi rw’amarenga kuko ni ururimi rugari nk’izindi zose, habayeho amahugurwa ku barimu bose kuko byafasha abanyeshuri bafite ubwo bumuga.”

Avuga ko ku Kigo yigishaho ariwe wenyine ufite ubwo bumenyi ku buryo bimugora kugera ku banyeshuri bamukeneye kandi afite n’andi masomo yigisha.

Ariko nanone ngo bakeneye ibindi bikoresho cyane ibifasha abanyeshuri bafite ubumuga bwo kutabona neza (indorerwamo z’amaso) n’imashini bandikisha (Braille) ndetse n’ibikoresho bifasha mu kwigisha abana bafite ubumuga bwo mu mutwe.

Agira ati “Abana batabona neza bakeneye ibikoresho bibafasha gutubura inyandiko (Magnifiers), abafite ubumuga bwo mu mutwe bagakenera ibituma babasha gutandukanya amabara ndetse n’imashini zandika zikanasohora impapuro (Braille) ku bafite ubumuga bwo kutabona neza.”

Ababikira b’abadominikani nibo bafasha mu burezi bw’abana bafite ubumuga

Umwarimu, Nyirantezimana Elizabeth, avuga ko kwigisha abana bafite ubumuga bwo kutabona n’abatumva neza bibagora kubera ibikoresho bidahari ariko bashaka uburyo bundi birwanaha.

Yagize ati “Isomo ntiryagenda neza 100% haba harimo imbogamizi gusa icyo dukora ni ugufata aba bana tukabicaza imbere kugira ngo babashe kumva neza no kubona ibyanditse ku kibaho.”

Ku rundi ruhande abanyeshuri bafite ubumuga bishimira ko badahabwa akato na bagenzi babo ahubwo babafasha mu byo batabashije kwikorera ubwabo.

Umwe ati “Jye mfite ubumuga bw’ingingo ariko nigana na bagenzi banjye neza ntibampeza ahubwo dufatanya muri byose.”

Asaba n’abandi bana bafite ubumuga kugana amashuri kuko bafashwa na bagenzi babo kandi bakiga neza. Ariko nawe yifuza ko haboneka ibikoresho bihagije byabafasha kwiga neza.

Ubuyobozi ariko buvuga ko ikibazo cy’ibikoresho kizwi kandi kiri hafi gukemuka kuko ubu batangiye gushyikiriza REB urutonde rw’ibikoresho bikenewe kugira ngo bishakishwe ndetse n’ibyumba byagenewe abanyeshuri bafite ubumuga (Resource room) byamaze kubakwa.

Constance avuga ko ubu ari nyina w’abafande na dogiteri kubera FPR

Yabitangaje kuri uyu wa mbere tariki ya 24 Kamena 2024, ubwo mu Karere ka Nyagatare hatangizwaga ibikorwa byo kwamamaza abakandida Depite b’Umuryango FPR-Inkotanyi.

Abakandida-Depite bari bahagarariye abandi ni Wibabara Jennifer na Musolini Eugene. Aba bavuze ko FPR yashinzwe hagamijwe gukura abanyarwanda mu bibazo birimo ubuyobozi bubi, ubukene, ivangura n’ibindi byari inzitizi ku iterambere ry’umuturage n’Igihugu muri rusange.

FPR ngo yaharaniye guca amoko yimakaza Ubunyarwanda ari nayo mpamvu abaturage bakwiye kuyitora kugira ngo iterambere ryihute.

Abakandida-depite Jennifer na Musolini

Muziranenge Constance, yavuze ko mbere yahoze mu bukene ku buryo atabashaga no kubona icyo arya ariko aza kwigishwa guhinga ubu akaba ari n’umufashamyumvire mu buhinzi.

Umusaruro abona ngo wamufashije kwigisha abana be ubu babiri basoje amashuri makuru ndetse undi akaba yiga muri kaminuza ishami ry’ubuvuzi.

Ashima intambwe amaze kugeraho byose akesha ubuyobozi bwiza burangajwe imbere na FPR-Inkotanyi.

Ati "Nasabirizaga ibiryo nagira ngo ndariye mu minsi mikuru nkarya inkashi bwakwira nkarara ku mashara. Ubuyobozi bwatumye nigisha abana ubu ndi nyina w’abafande babiri ndetse na nyina wa dogiteri. Ubu ngura inyama, umuceri n’ibindi nkarya, nsigaye ndara kuri matelas.”

Medard Kayijuka ukomoka mu Karere ka Rusizi ariko ubu utuye mu Murenge wa Gatunda, avuga ko icyo ashimira FPR Inkotanyi ari uko yatanze umutekano, Umunyarwanda atura aho ashaka hamufasha kwiteza imbere ikindi ikaba iha amahirwe abantu bose hatarebwe ubwoko.

Abaturage bo mu Mirenge itandatu bari babukereye

N’ubwo atize kubera kubuzwa amahirwe yishimira ko yabashije kwigisha abana be ubu akaba afite ushoje kaminuza kandi nawe ubwe akaba ameze neza.

Yagize ati “Ubuyobozi bubi bwambujije kwiga ntabuze ubwenge ariko FPR yanyigishije guhinga ubu ndi umufashamyumvire mu buhinzi ndetse ndi n’umworozi w’inkoko kandi mbanye neza n’abo nasanze inaha.”

Mu Karere ka Nyagatare bishimira ko umukamo w’amata wazamutse aho mu mwaka wa 2017 wari kuri Litiro miliyoni 12 ubu ukaba ugeze kuri litiro miliyoni 40 ku mwaka.

Ubuhinzi umusaruro wavuye kuri toni eshatu ugera kuri toni esheshatu ndetse hakaba hamaze guhuzwa ubutaka kuri hegitari 82,000 hagamijwe guhinga igihingwa kimwe gitanga umusaruro.

Hishimirwa kandi ibikorwa remezo harimo imihanda ya kaburimbo ndetse hakaba hari n’icanirwa n’ijoro ku buryo abaturage bagenda igihe cyose by’umwihariko umwaka utaha w’ingengo y’imari hakazubakwa umuhanda mushya wa kaburimbo Nyagatare-Rwempasha-Kizinga.

Reba ibindi muri iyi Video:

Video+Amafoto: Eric Ruzindana & Umukazana Germaine

Valley dam ya Gihorobwa abaturage batinya ko amazi yayo azagenda

Iyi Valley dam ikoreshwa n’abaturage cyane aborozi bo mu Midugudu ya Gihorobwa na Mugari mu Kagari ka Rutaraka ndetse n’Umudugudu wa Mirama ya mbere mu Kagari ka Nyagatare.

Yacukuwe mu mwaka wa 2003 hagamijwe gufasha aborozi bambutsaga inka umuhanda wa kaburimbo bajya kuzuhira ku mugezi w’Umuvumba.

Guhera mu mwaka wa 2020, iyi Valley dam yaruzuye ku buryo na nayikondo ebyiri zifashishwaga mu kubonera abaturage amazi meza ndetse n’amatungo mu gihe yakamye zose zirengerwa ndetse amazi agera no mu butaka bw’abaturage buyikikije.

Aba baturage bandikiye ubuyobozi bw’Akarere ka Nyagatare busaba kwimurwa kugira ngo bashake ahandi ubutaka ndetse ubuyobozi bukaba bwaremeye gushaka igisubizo kizabanyura n’ubwo kitaraboneka.

Inzira yanyuraga hejuru y’umucungiro ntikiri nyabagendwa

Ku rundi ruhande ariko uko imvura yakomezaga kugwa ninako amazi yiyongeraga ndetse bigera n’igihe arenga umucungiro amanuka mu mirima y’abaturage bahegereye.

Umuturage witwa Radjab, wimutse aho yari atuye kubera gutinya kujyanwa n’amazi avuga ko n’inzira yari ihari nayo itakiri nyabagendwa.

Ati “Ubundi abaturage ba hano haruguru (Gihorobwa), bajya Nyagatare ndetse n’abava Rutaraka baza inaha bakoreshaga iyi nzira yo ku mucungiro hejuru no munsi yawo ariko urabona ko hari amazi atemba ntawatinyuka kuhanyura ubu barazenguruka.”

Kurenga umucungiro kw’amazi byateye impungenge abasanzwe bakoresha aya mazi cyane cyane aborozi kuko bakeka ko igihe gishobora kugera ugacika amazi yose akagenda.

Ngwije Wilson, avuga ko ubundi iyi Valley yari yarababereye igisubizo kuko no mu gihe cy’impeshyi batari bakibura amazi y’inka zabo ariko hari impungenge ko amazi yose ashobora kuzagenda burundu.

Yagize ati “Mbere y’uko aya mazi anyura hejuru y’umucungiro yabanje kunyura hasi yawo. Numara kunywa amazi menshi uzatenguka wose amazi awujyane bucye mu gitondo amazi yose yagiye.”

Amazi yarenze umucungiro atemba inyuma

Umukozi w’Akarere ka Nyagatare uyobora ishami ry’Ubuhinzi, Ubworozi, Amashyamba n’Umutungo kamere, Shyaka Kenneth, avuga ko ku bufatanye bw’Akarere ka Nyagatare, Rwanda Water Board na RAB barimo gukora inyigo y’uburyo haboneka igisubizo kirambye harimo kuzamura umucungiro wa Valley dam.

Avuga ko iyi mpeshyi izarangira imirimo yo kwita ku mazi y’iyi Valley dam yarangiye ku buryo imvura izagwa ikibazo cyarakemutse.

Agira ati “Nta mpungenge z’uko umucungiro wacika amazi yose akagenda kuko yahawe inzira y’agateganyo kandi ari mu gihe cy’impeshyi ntakibazo ahubwo ni ukuba twabitunganyije igihe amazi azaba yongeye kuba menshi imvura iguye.”

Kuri ubu amazi y’iyi Valley dam anyura hejuru y’umucungiro anyura mu masambu y’abantu batanu mbere y’uko yinjira mu kiraro kinini kiyerekeza inzira igana ku mugezi w’Umuvumba nabyo bigatera impungenge ko mu gihe amazi yaca umucungiro n’umuhanda ujya Mirama ya mbere wacika kuko ufite akararo gato.

Abarwanashyaka ba PS Imberakuri

Yabitangaje kuri uyu wa Gatandatu tariki 22 Kamena 2024, ubwo yatangizaga ibikorwa byo kwiyamariza kujya mu Nteko Ishinga Amategeko y’u Rwanda mu gihe cy’imyaka itanu (5) iri imbere.

Ibikorwa bye byo kwiyamamaza yabitangiriye mu Karere ka Kayonza mu Murenge wa Rwinkwavu akomereza mu Karere ka Kirehe mu Murenge wa Nasho.

Mukabunani yijeje abashyigikiye ishyaka rye n’abaturage muri rusange ko niriramuka ritowe rikagira ubwiganze mu Nteko Ishinga Amategeko azaharanira ko ubuhinzi buvugururwa bugakorwa mu buryo bwa kinyamwuga hifashishwa imashini zihinga aho kuba amaboko y’abaturage.

Yavuze kandi ko azavugurura ubwisungane mu kwivuza ku buryo umurwayi ufite Mituweli azajya abasha no kwivuriza mu bitaro byigenga ubundi byakira abafite ubundi bwishingizi.

Nanone ngo azateza imbere amashuri y’ubuvuzi ku buryo haboneka abaganga benshi bikazorohereza abarwayi kubona muganga mu buryo bworoshye.

Mpayimana Filippe ngo azateza imbere indanda nto ko kuvugurura ubuhinzi

Yabitangaje kuri uyu wa gatandatu tariki ya 22 Kamena 2024, ubwo yatangizaga ibikorwa byo kwiyamamariza kuyobora u Rwanda mu matora y’Umukuru w’Igihugu n’ay’Abadepite ateganyijwe hagati ya tariki ya 14 na 16 Nyakanga 2024.

Ibikorwa bye yabitangirije mu Ntara y’Iburasirazuba mu Karere ka Kirehe, Umurenge wa Mahama, aho yakiriwe n’abantu bacye nabo byagaragaraga ko baje gushungera batari baje kumushyigikira.

Kandida wigenga ku mwanya wa Perezida wa Repubulika, Mpayimana Filippe, yabwiye abaturage bagiye kumva imigabo n’imigambi ye ko natorwa afite ingingo 50 z’ibyo ateganya kuzashyira mu bikorwa.

Bimwe mu bikorwa bikubiye muri izi ngingo 50 harimo kunoza imikoreshereze y’ubutaka, kongera ibiribwa ku isahane, guteza imbere inganda nto, guteza imbere uburezi, gushyiraho amategeko agenga ubukomisiyoneri, kubahiriza amasaha abakozi bagomba gukora n’ibindi.

Kandida Mpayimana yakiriwe n’Umuyobozi w’Akarere ka Kirehe wungirije ushinzwe ubukungu

Yateguriwe aho ahagarara mu gihe avuga imigabo n’imigambi ye

Mbere y’uko ahagera intebe zari zambaye ubusa

Abatekinisiye bateguraga indangururamajwi kugira ngo zidatenguha umukandida Perezida Mpayimana

Guverineri Rubingisa yasabye ko abazana kanyanga mu nda babicikaho

Yabibasabye kuwa 20 Kamena 2024, ubwo yahuraga n’imboni z’umupaka zikorera mu byambu biri mu Karere ka Nyagatare hagamijwe kuganira ku kunoza inshingano zabo zo gukumira magendu, iyinjizwa ry’ibiyobyabwenge n’ibindi byaha byambukiranya imipaka n’imbogamizi bafite.

Akarere ka Nyagatare gafite ibyambu 102 ndetse n’abarinzi babyo 652 basimburanwa amanywa n’ijoro bakorana bya hafi n’inzego z’umutekano hagamijwe gukumira magendu n’ibindi byaha byambukiranya imipaka.

Zimwe mu mboni z’imipaka zagaragaje zimwe mu mbogamizi bafite zirimo ikibazo cy’itumanaho kuko telefone bahawe zimwe zagize ikibazo zikaba zitarakorwa ndetse rimwe na rimwe bakabura amayinite.

Inzego z’umutekano zaganirije Imboni z’umupaka

Ngayabarura Eddy Jean de Dieu, yanagaragaje ikindi kibazo cyo guhohoterwa n’ababa bagerageza kwambutsa magendu n’ibiyobyabwenge ku buryo bibagora kwivuza kuri mituweli.

Yagize ati “Mu kazi kacu duhura n’abagome bakadukubita bakadukomeretsa bigasaba ko twivuza ku giti cyacu. Tukaba twifuza ko bishoboka mwadushyiriraho ubufasha ntibigore imiryango yacu.”

Imboni z’umutekano zifuje gufashwa kwivuza mu gihe zahohotewe

Guverineri w’Intara y’Iburasirazuba, Pudence Rubingisa, yasabye ubuyobozi bw’Akarere ka Nyagatare gushyira izi mboni z’umutekano mu buryo bw’itumanaho rusange ku buryo boroherwa no gutanga amakuru ndetse anasaba mu gihe hari uwakomerekeye mu kazi nawe yafashwa kwivuza.

Guverineri Rubingisa, yashimye akazi imboni z’umutekano zikora kuko ibyaha byambukiranya imipaka byagabanutse kimwe n’ikoreshwa ry’ibiyobyabwenge rigenda ricika.

Umuyobozi w’Akarere ka Nyagatare Bwana Gasana Stephen

Ariko nanone yabasabye kuba maso cyane ku bantu bambuka umupaka bakajya kunywera kanyanga hakurya bagaruka bagateza amakimbirane mu ngo zabo ndetse n’urugomo aho banyuze hose.

Yagize ati “Nuriya wayitwaye munda wambutse birangira agize amakimbirane mu rugo, agira urugomo mu nzira aho aca, bigatuma imwe mu Mirenge igize bya byaha bizamuka. Abantu rero bagiye mu byaha ntibaba bagitekereza iterambere.”

Inzego z’umutekano zasabye ko magendu yambuwe abantu ishyikirizwa inzego zibishinzwe aho kugurishwa

Yabasabye kurushaho kugira ubunyangamugayo no kugira amakenga ku kintu cyose kinjizwa mu Gihugu kuko gishobora kuba atari inzoga gusa cyangwa magendu ahubwo gishobora no kuba ikigamije guhungabanya umudendezo w’Igihugu.

Ikiraro gihuza Cyonyo na Rurenge

Iki kiraro cyubatse hejuru y’umugezi w’Umuvumba mu mirima y’umuceri hagati y’utugari twa Bushoga mu Murenge wa Nyagatare n’aka Rurenge mu Murenge wa Rukomo.

Ni ikiraro cyuzuye gitwaye amafaranga y’u Rwanda Miliyoni 112 kikaba cyarubatswe ku bufatanye bw’Akarere ka Nyagatare na Bridge to Prosperity.

Abacyubatse bavuga ko gifite uburebure bwa metero 61 n’uburambe bw’imyaka guhera kuri 30 kugera kuri 60.

Tugizwenayo Emmanuel utuye mu Kagari ka Bushoga avuga ko ubundi kugira ngo babashe guhahirana bari barishyiriye ibiti hejuru y’umugezi ariko nabwo amazi yaba menshi akabitwara ubwo ingendo zikaba zirahagaze.

Iki kiraro kinyuraho na moto

Ikindi n’uko mu gihe habaga hariho ibiti ngo hanyuragaho abanyamaguru gusa nabwo batikoreye ibintu byinshi kandi igare rikaba ritarahanyuraga.

Nk’abakora ubucuruzi cyane ubw’ibiribwa ngo bagorwaga no kugera ku isoko rya Rukomo nyamara ariho bashoboraga kubona ibiribwa bihendutse.

Yagize ati ”Twishimiye iki kiraro kuko kiri kutworohereza gukorera ibikorwa hakurya Rukomo, hari amasoko dukurayo ibicuruzwa tuzana iwacu. Mbere ikiraro cyari gihari cyari icy’ibiti, iyo imvura yagwaga hari ubwo cyagendaga abantu bakagwa no mu mugezi.”

Uretse kuba bagiye kurushaho guhahirana ngo bgiye no kugabanya amafaranga y’urugendo kuri moto kuko ubundi kuva Bushoga ujya Rukomo byasabaga kubanza kunyura Cyabayaga abaturutse Rurenge nabo bakabanza kunyura Mirama ya kabiri.

Yagize ati “Iyo imvura yabaga yaguye twazengurukaga tugaca Cyabayaga bikadutwara amafaranga menshi ubu byoroshye tuzajya tunyura aha ni vuba ni iminota.”

Umuyobozi w’Akarere ka Nyagatare, Gasana Stephen, yasabye abaturage kubyaza umusaruro iki kiraro

Umuyobozi w’Akarere ka Nyagatare, Gasana Stephen, avuga ko mbere babanje kujya bubaka ibiraro byo hasi ariko amazi akabijyana bitamaze kabiri ari nabwo babonye Bridge to Prosperity ibafasha kubaka icyo mu kirere.

Yasabye abaturage kugifata neza kugira ngo kirambe ariko no kukibyaza umusaruro cyane ko aribo bakisabiye.

Yagize ati “Turabasaba gufata neza ibikorwa remezo begerezwa kuko hari abantu bagira ingeso mbi ugasanga bibye ibyuma kandi ari inyungu rusange rero barasabwa kubibungabunga no kubibyaza umusaruro.”

Abantu 10 bahuguriwe kugicunga bahawe ibyemezo by’ishimwe

Ubwo ikiraro gihuza Umurenge wa Nyagatare n’uwa Rukomo cyatahwaga ku mugaragaro kuwa kabiri tariki ya 18 Kamena 2024, Bridge to Prosperity, yatangaje ko mu biraro 350 bagomba kubaka mu Gihugu cyose mu gihe cy’imyaka itanu, bamaze kubaka 215.

By’umwihariko mu Karere ka Nyagatare ikaba imaze kuhubaka ibiraro bitatu byo mu kirere harimo bibiri byasojwe n’ikindi kimwe cyo mu Murenge wa Musheri kizatahwa muri Nyakanga 2024.

Iyi misambi bikekwa ko yayicaga akayigurisha abayirya

Ibi byabaye ku wa Gatandatu tariki ya 15 Kamena 2024 ku gicamunsi ubwo yafatwaga ayifite mu mufuka mu gishanga cy’umuceri cya Muvumba, icyanya cya munani (Muvumba P8).

Umwe mu bahinzi muri iki gishanga, Muyango Peter, avuga ko ubwo yari amaze guhemba abakozi bamuhuriraga umuceri, yabonye umuntu wikoreye umufuka, agira impungenge z’ibirimo, asaba umwe mu bakozi be kumuhagarika bakareba ibyo yikoreye, bamuhagaritse ahita yiruka.

Twahirwa ngo yashakishije abandi bantu abemerera amafaranga baramufata ndetse basanga mu mufuka yari afite harimo imisambi yamaze gupfa.

Avuga ko bibabaje kuba hari ababonaga ibyo arimo ariko ntibabyamagane kandi kurinda urusobe rw’ibinyabuzima bireba buri wese kuko byinjiriza Igihugu amadovize.

Ati "Kubona umuntu yica imisambi abandi bamurebera si byo. Jye nasabaga ko abazi imisambi nk’ikinyabuzima badakwiye kurebera uyihohotera ngo bamwihorere ahubwo bamugeze mu buyobozi ahanwe n’abandi barebereho kuko imisambi ntacyo itwaye uretse kuba umutako w’Igihugu no kucyinjiriza amadovize."

Umwe mu bagize irondo ry’umwuga ryafashe ukekwaho kwica imisambi, Shumbusho Venuste, avuga ko uyu wafashwe nta murima agira mu gishanga ndetse akaba nta n’akazi ko kurinda umurima w’umuceri yari ahafite.

Avuga ko akazi ke ari ukwica imisambi n’izindi nyoni nini akajya kuzigurisha abazirya.

Agira ati "Uriya n’abandi bica imisambi, ibiyongoyongo n’ibindi biguruka, hano mu gishanga byashizemo. Hari abantu baje ino aha babirya. Urebye yaje gukora mu gishanga ariko anagamije kwica imisambi ngo yibonere amafaranga. Bakoresha umuti bakura muri Uganda."

Mu gutega izi nyoni bashinga uduti ahamaze gusarurwa, bagashyiraho ihundo ry’umuceri cyangwa bakanyanyagiza impeke z’ibigori ahantu hagaragara basizeho umuti, inyoni iriyeho igahita ipfa.

Imisambi yamaze gupfa yajyanywe gukorerwa isuzuma kugira ngo hamenyekane uburozi bwakoreshejwe mu kuyica

Umuyobozi wungirije w’Umuryango utari uwa Leta wita ku kubungabunga urusobe rw’ibinyabuzima (Rwanda Wildlife Conservation Association), Dr Deo Ruhagazi, avuga ko uretse imisambi kimwe n’izindi nyoni ngo inyamanswa zo mu gasozi zipfushije cyangwa zishwe hakoreshejwe uburozi bibujijwe kuzirya kuko zishobora gutera indwara z’ibyorezo cyangwa impfu zitunguranye bityo abaturage bakaba bakwiye kurya inyama bazi aho zavuye.

Yagize ati “Nakangurira abaturage kutarya inyama batazi aho zaturutse ariko nanakangurira abafite ingeso yo kurya inyamanswa zo mu gasozi ko harimo ingaruka zishobora kuvamo indwara z’ibyorezo n’urupfu ruturutse ku burozi buvuye muri izo nyama.”

Umukozi wa RDB mu ishami rishinzwe kubungabunga urusobe rw’ibinyabuzima muri Pariki z’Igihugu no hanze yazo, Richard Muvunyi, asaba abaturage kugira ubufatanye mu kubungabunga ibinyabuzima, buri wese akaba ijisho rya mugenzi we, bagatanga amakuru ku bahohotera ibinyabuzima kuko hari ibihano bihabwa ababyica nkana.

Ati “Ni inshingano ya buri munyarwanda kubungabunga ibidukikije n’ibinyabuzima, ikindi kandi iyo habaye ibyago nk’ibyo ababikoze nkana bakurikiranwa n’inzego ndetse hakabaho n’ibihano.”

Itegeko N° 064/2021 ryo ku wa 14/10/2021 rigenga urusobe rw’ibinyabuzima, ingingo ya 59, ivuga ko umuntu ku giti cye ukura inyamaswa iri ku rutonde ruri ku mugereka wa III w’iri tegeko mu ndiri kamere yayo, uyigirira nabi cyangwa uyizerereza aba akoze icyaha.

Iyo abihamijwe n’urukiko, ahanishwa igifungo kitari munsi y’amezi atandatu (6) ariko kitarenze imyaka ibiri (2) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe y’amafaranga y’u Rwanda (1.000.000 FRW).

Iyo icyaha kivugwa mu gika cya mbere cy’iyi ngingo gikorewe inyamaswa iri ku mugereka wa I cyangwa uwa II w’iri tegeko, igihano kiba igifungo kitari munsi y’imyaka itatu (3) ariko kitarenze imyaka itanu (5) n’ihazabu y’amafaranga y’u Rwanda atari munsi ya miliyoni ebyiri (2.000.000 FRW) ariko atarenze miliyoni eshanu z’amafaranga y’u Rwanda (5.000.000 FRW).

Mu mwaka wa 2023, mu Gihugu hose habaruwe imisambi 1,216 ndetse Akarere ka Nyagatare kakaba ari ko karimo imisambi myinshi.

Yabitangaje ku wa Gatandatu tariki ya 15 Kanama 2024, ubwo yahuraga n’abajyanama b’ubuzima n’abakora mu buvuzi basaga 7,000 baganira ku bimaze kugerwaho mu rwego rw’ubuzima mu myaka 30 ishize.

Yagize ati “Nyuma y’umukoro mwaduhaye twafatanyije na Polisi n’Ingabo z’Igihugu hagurwa imbangukiragutabara 246 ku buryo iza mbere 80 zageze mu Rwanda ndetse muri iki gitondo zikaba zatangiye kugezwa mu bitaro no mu Ntara zose, turateganya ko mu mezi atatu cyangwa ane buri Karere kazagira imbangukiragutabara nshya nibura umunani ziza zisanga umunani zari zihasanzwe.”

Imbangukiragutabara nshya 246 zije ziyongera ku zindi 247 zisanzwe ziri hirya no hino mu Gihugu.

Minisitiri Nsanzimana yavuze ko nubwo abaganga bahari badahagije, hari gahunda yatangijwe yo kubongera ku buryo abateganywaga kwinjizwa mu mashuri y’ubuvuzi uyu mwaka intego yarenze igera ku kigero cya 146%. By’umwihariko ku babyaza uyu mubare ngo barashaka kuwukuba inshuro zirenze enye ndetse uyu mwaka hakaba haratangiye abagera ku 1,000 basanga abari bahari 2,000 hagamijwe kugabanya impfu z’abana n’ababyeyi.

Minisitiri w’Ubuzima, Dr Sabin Nsanzimana

Yavuze kandi ko mu rwego rwo gufasha abarwayi bavaga mu Ntara bifuzaga guhura n’abavuzi b’inzobere, ubu muri buri Ntara hashyizweho ibitaro byo ku rwego rwa kabiri byigisha bya kaminuza bibiri muri buri Ntara ku buryo bimaze gushyirwamo inzobere 100 zirimo n’abanyamahanga.

Yagize ati “Mu mezi atatu ashize turimo kubishyiramo abavuzi b’inzobere ku buryo hamaze kugera 100. Benshi ni abaturutse hanze y’Igihugu ku buryo batangiye kwigishiriza mu Ntara zose, ngira ngo hari porogaramu yo kubaga ubwonko n’ibindi bitakorerwaga hanze ya Kigali biratuma abarwayi bataza i Kigali gushaka inzobere ahubwo baguma mu Ntara zabo.”

Mu ijambo rye, Perezida wa Repubulika, Paul Kagame, yashimiye abajyanama b’ubuzima ku kazi bakora badategereje igihembo, ndetse n’abaganga basabwa byinshi bidahwanye n’umushahara bahembwa, ariko yizeza ko biziyongera nihaboneka amikoro.

Yasabye Minisiteri y’Ubuzima gufatanya n’izindi nzego, abajyanama b’ubuzima bakongererwa ubumenyi kugira ngo barusheho gutanga serivisi nziza zijyanye n’ubuzima.

Yagize ati “Hari abajyanama b’ubuzima bakoresha umutima wabo, ubushake, bakoresha imyumvire bafite uko yaba ingana kose. Inshingano ya mbere dufite yindi, ni abo ngabo kubaha ubumenyi, Minisiteri ibishinzwe ikoranye n’izindi nzego, ni ugushaka uburyo bwose buri wese ku rwego ari ho ahugurwa, akongera ubumenyi kugira ngo ashobore kurushaho gukora akazi neza.”

Mu byo abajyanama b’ubuzima bafashije harimo kugabanya indwara ya Malariya ku kigero cya 90% ndetse n’impfu z’ababyeyi aho babafasha kubona imbangukiragutabara mu buryo bwihuse.

Abana bayobotse ingo mbonezamikurire bitabwaho neza bakanahabwa indyo yuzuye

Umwe muri abo babyeyi witwa Dukuzimana Yunis wo mu Mudugudu wa Kiyovu, avuga ko uru rugo mbonezamikurire rwabafashije byinshi kuko uretse kuba abana babo bagira ubumenyi bw’ibanze ku buryo batangira amashuri abanza hari byinshi bazi, ngo na bo nk’ababyeyi babonye umwanya wo gukora imirimo ibateza imbere.

Avuga ko azinduka azana umwana mu rugo mbonezamikurire hanyuma akajya gushaka akazi, yakavamo akaza kwakira umwana we bagataha.

Yagize ati “Ubundi sinabonaga uwo nsigira umwana kandi nkatinya no kumusiga wenyine bityo akambera imbogamizi ku kubona akazi. Ariko ubu ndamuzana nkajya mu kazi kandi kenshi ntaha mbonye 1000 Frw.”

Uretse ayo yizigamira mu itsinda buri cyumweru, ngo ayandi yamufashije kwikenura mu rugo rwe ndetse agura n’ihene ndetse aniyishyurira ubwisungane mu kwivuza nyamara mbere yarabifashwagamo n’abantu.

Avuga ko kwihuza na bagenzi uretse kuba bigenda bizamura imibereho ye ngo yavuye no mu bwigunge kuko iyo bicaye bagirana inama zigamije kuzamura imibereho y’imiryango yabo.

Mu mafaranga bakorera mu kazi kenshi ko guhinga ngo buri wese mu bagize itsinda afite inkoko mu rugo rwe ku buryo abona amagi y’abana ndetse akanagurisha akaguramo ibindi nkenerwa mu rugo byoroheje.

Niyinzi Rebecca, avuga ko afite umwana w’imyaka ibiri ariko na we akaba yaragiraga ingorane yo kubona akazi kubera umwana, kandi agatinya kumusiga kubera impamvu z’umutekano we.

Ikindi ngo yaje kujya mu itsinda ry’urugo mbonezamikurire y’abana babo bizigamiramo buri cyumweru ku buryo ku mwaka ashobora kuzabona amafaranga arenga 60,000 ndetse ngo akaba yiteguye kuguramo amatungo magufi.

Ati “Umwana w’imyaka ibiri yirirwa yiruka mu muhanda akaba yahura n’impanuka kandi ntawaguha akazi ufite umwana. Musiga hano nkajya gukora, byatumye mbasha kubona ayo nizigamira mu itsinda, 1000 ntanga buri cyumweru, umwaka nushira nshobora kubonamo nka 60,000, nzahita nguramo ihene andi nyashakemo akandi kantu nacuruza.”

Avuga ko mbere kubona icyo kurya byamugoraga kuko atakoraga ariko ubu akora cyane ndetse akabasha no kubona ibimutunga.

Uretse gutegereza ko umwaka ushira ngo bagabane, buri cyumweru bagira uwo baguza amafaranga agakora akazayagarura hiyongereyeho inyungu.

Iri tsinda ryatangiye mu 2021 rikaba rifite abanyamuryango 16 buri wese yizigamira bijyanye n’ubushobozi bwe.

Abagize iri tsinda kandi ngo baratekereza kuzakora imishinga ibahuriza hamwe nk’ubworozi bw’amatungo magufi n’ubucuruzi.

Mucunguzi yatangije ibihumbi 50 none ageze kuri Miliyoni 10

Uyu watangije igishoro cy’amafaranga y’u Rwanda ibihumbi 50 avuga ndetse yanitabiriye amarushanwa ya Youth Konnect akabona igihembo cya kabiri mu barushanwaga mu by’inganda, ubu akaba akoresha urubyiruko rugenzi rwe batanu (5) bafite amasezerano y’akazi, umunani ba nyakabyizi n’abanyeshuri 27.

Avuga ko igishoro ari mu mutwe atari amafaranga menshi bityo nta wukwiye kuvuga ko yabuze igishoro.

Ati “Igishoro si amafaranga ahubwo ni mu mutwe, niba ngeze kuri Miliyoni 10 mu myaka ibiri gusa, mu myaka itanu nzaba mfite amafaranga menshi kandi nkoresha n’abakozi benshi ndetse nigisha n’abandi.”

Umubyeyi ukora Imbabura za canarumwe ndetse n’ibikombe mw’ibumba, avuga ko ubu akoresha abantu 50, yemeza ko hari benshi bamaze gutera imbere kubera umushahara abahemba gusa imbogamizi ngo zikaba zikiri ku rubyiruko rushaka gukora imirimo y’ubusirimu.

Yagize ati “Imbogamizi dufite ni imyumvire y’urubyiruko ikiri hasi, dukeneye urubyiruko ruza kudufasha kongerera ubwiza ibyo dukora ariko urabwira umuntu akakubwira ngo oya sinajya kubumba si ndi umutwa.”

Abayobozi b’Uturere basabwe kurushaho kwegera urubyiruko bakarwereka amahirwe ahari

Umuyobozi w’Akarere ka Ngoma, Niyonagira Nathalie, avuga ko urubyiruko rwinshi rwifuza guhera ku gishoro kinini nyamara rutaragira n’ubushobozi bukoresha macye.

Ikindi ariko ngo kibabaje ni ubunyangamugayo bucye bwarwo aho bahabwa akazi bagahombya abakabahaye.

Agira ati “Uravuga uti n’ubwo ndi Meya reka ngurire abana batatu moto bazikoreshe mu mahanda, yamara kuyibona agatekereza uko akuramo aye akaguhombya, ni nako bigenda kuwamushyize mu iduka rye, ararihombya akikuriramo aye nyiraryo agasigara ahanganye n’inguzanyo ya banki.”

Mu nama yigaga ku ngamba zijyanye no guhanga imirimo ku rubyiruko hanarebwa ibimaze kugerwaho mu myaka 30 Igihugu kibohowe, yahuje abayobozi batandukanye mu Ntara y’Iburasirazuba, Minisitiri w’Abakozi ba Leta n’Umurimo, Prof. Bayisenge Jeannette, yasabye abayobozi kurushaho kwegera urubyiruko barugaragariza amahirwe ahari yarufasha kwihangira imirimo.

Ariko nanone yasabye abanyarwanda muri rusange kurangwa n’indangagaciro, kwirinda ubunebwe, gukorera ku ntego no gukorera hamwe ariko bakagira n’imyitwarire myiza.

Minisitiri Bayisenge yasabye urubyiruko kurangwa n’ubunyangamugayo

Yagize ati “Abanyarwanda dufite imyitwarire n’indangagaciro bituranga no guhanga umurimo dukwiye kugaruka ku ndangagaciro zijyanye nawo, kutagira ubunebwe, gukorera ku ntego, kugira gahunda, gukorera hamwe no kumva ko watangirira kuri bicye ukagenda waguka.”

Minisiteri y’Abakozi ba Leta n’Umurimo, ivuga ko ubukene bwavuye kuri 20% mu mwaka wa 2022, ubu bukaba bugeze kuri 17% mu gihe mu mwaka wa 2050 bugomba kuba buri 5%.

Ibi bikazajyana no guhanga imirimo mishya aho umwaka ushize hahanzwe 1,374,000 mugihe hari hateganyijwe guhangwa 1,500,000.

Mu ntara y’Iburasirazuba, umwaka ushize hahanzwe imirimo 43,000 uyu mwaka hakaba hamaze guhangwa igera ku 45,000.

Alex Mugabo yifuza ko Leta yarushaho kwegera abahinzi ikabafasha guhinga ibihingwa bifite isoko mpuzamahanga

Alex Mugabo, umucuruzi akanohereza ibikomoka ku buhinzi mu mahanga avuga ko mu buhinzi hakirimo ibibazo kuko abitabira guhinga ibihingwa ngengabukungu bakiri bacye ku buryo ababyohereza mu mahanga babibura kandi babifitiye isoko.

Avuga ko impamvu ibitera ari ubushobozi bucye, inkunga nkeya ndetse no kutagira amakuru ku buhinzi butanga amafaranga.

Agira ati “Hakwiye ubukangurambaga bwimbitse, tukereka abahinzi ko turi kumwe nabo kandi tubafitiye isoko ry’umusaruro wabo. Leta nayo ntikwiye kwicara ngo yashyizeho ingamba zituma bahinga neza ahubwo ikwiye no kumenyesha abahinzi ibihingwa byabahindurira ubuzima bitewe n’isoko bafite.”

Ibi kandi bishimangirwa na Gisa Leonard, umuhinzi akanongerera agaciro umusaruro ukomoka ku buhinzi akanawohereza mu mahanga, uvuga ko abahinzi benshi bagihagaze ku bihingwa barya gusa aho kureba ku bitanga amafaranga.

Ati “Abahinzi bacu benshi batekereza ibishyimbo, ibigori nyamara hari ibindi bihingwa wahinga ku buso buto ariko bikaguha umusaruro mwinshi bitewe n’ubwoko bw’igihingwa n’uburyo wakoresheje uhinga.”

Urubyiruko rutinya igihombo rushobora guhura nacyo mu buhinzi

Umuhinzi akaba n’umunyamuryango w’urubyiruko rukora ubuhinzi n’ubworozi (RYAF), Juliet Nyiransabimana, wo mu Karere ka Nyamasheke, avuga ko impamvu urubyiruko rutitabira ibikorwa by’ubuhinzi ari imyumvire micye, gutinya igihombo cyaterwa n’imihandagurikire y’ikirere ndetse n’igishoro kikiri hejuru n’ikiguzi bahabwa ku musaruro.

Yagize ati “Urebye igishoro dushyira mu buhinzi ni kinshi ugereranyije n’ikiguzi duhabwa. Urugero amatunda mpinga ungurira umusaruro ampa amafaranga 2000 ku kilo kandi iyo mbaze igishoro mba nashyizemo mba numva yakampaye nibura 2500 izi rero ni zimwe mu mpamvu zituma urubyiruko rwinshi rucika intege.”

Nyamara ariko Mudatenguha Ferdinand, Umukozi wa Minisiteri y’Ubuhinzi n’Ubworozi, mu ishami rishinzwe uruhererekane nyongeragaciro, avuga ko hari uburyo bwinshi Leta yashyizeho bugamije korohereza umuhinzi kubona umusaruro mwinshi binyuze muri gahunda ya nkunganire ku mbuto n’ifumbire, ubwishingizi bw’imyaka ndetse no gushakira abahinzi imbuto nziza.

Agira ati “Ikigo RAB, gifasha abahinzi kubona imbuto nziza, kuzitaho kugeza habonetse umusaruro, hari kandi nkunganire aho umuhinzi ashora ikiguzi gito andi agatangwa na Leta, ubwishingizi bw’ibihingwa n’amatungo ndetse Leta ikunganira ku kiguzi cy’ubwishingizi.”

Mu nama nyunguranabitekerezo yahuje abahinzi b’ibyoherezwa mu mahanga, abongerera agaciro umusaruro ukomoka ku buhinzi n’ubworozi, abohereza umusaruro ukomoka ku buhinzi n’ubworozi mu mahanga, bifuje ko Leta yashyira uburyo abahinzi bakongera umusaruro kandi bakitabira guhinga ibihingwa bifite isoko mpuzamahanga nk’imiteja, avoka, imyembe, ikawa, icyayi n’ibindi.

Nyiracari, wari waraye abyaye yamaze iminsi itanu muri Pariki y’Akagera atabarwa n’Inkotanyi

Ibi ni ibikubiye mu buhamya yatanze, ubwo kuri uyu wa gatandatu tariki ya 01 Kamena 2024, ku rwibutso rwa Jenoside rwa Nyagatare, hibukwaga ku nshuro ya 30 Jenoside yakorewe Abatutsi 1994, hakanashyingurwa mu cyubahiro imibiri itandatu yabonetse.

Nyiracari avuga ko urugamba rwo kubohora Igihugu rugitangira, Abatutsi bari batuye ahitwaga muri Ranshi (Lansh) mu Kagari ka Gakirage, batangiye gutotezwa ndetse bamwe bajya gufungirwa I Byumba, baranicwa.

Tariki ya 08 Ukwakira 1990, Interahamwe zarimo n’impunzi z’Abarundi bari mu nkambi I Rukomo ndetse n’abasirikare ba EX-FAR, barabateye batangira gutwika amazu n’ibiraro by’inyana, banica abantu.

Uyu biciye nyina mu maso, we ngo bamusize bavuga ngo azabare inkuru y’uko Abatutsi bishwe.

Ati “Jye na murumuna wanjye n’abana banjye baradukubise ariko umusirikare umwe aduhagararaho. Bakomeje kujya impaka bamwe bashaka kutwica abandi bakabyanga, umusirikare umwe aravuga ngo nimubareke bazagende babwire benewabo ibyo babonye.”

Imibiri itandatu yashyinguwe mu cyubahiro yabonetse mu Murenge wa Tabagwe n’uwa Nyagatare

Nyiracari, wari umaze umunsi umwe gusa abyaye, yisanze mu bandi bantu babashije guhunga, bamara iminsi itanu bazerera muri Pariki y’Akagera yarimo inyamanswa z’inkazi batabarwa n’abasirikare b’Inkotanyi basanzemo.

Yagize ati “Ukurikije umuntu iyo yabyaye bugacya akagenda urugendo rw’iminsi itanu uzenguruka mu ishyamba ntupfe kandi ryarimo inyamanswa ntizikurye, ibyabaye ni uburinzi bw’Imana. Ikindi cyamfashije ni umusore w’Inkotanyi twahuye nawe aduha amazi aratugaburira dukomeza inzira.”

Uwingabe Tereza Bukuba, washyinguye umubyeyi we mu cyubahiro nyuma y’imyaka irenga 30, avuga ko yashimishijwe no kuba icyo yaharaniye abashije kukigeraho akabasha gushyingura mu cyubahiro umubiri w’umubyeyi we.

Yagize ati “Ndanezerewe cyane, kuko maze kumenya amakuru y’aho bamwiciye natangiye kumushakisha ndamubona ndaruhuka. Kuva ninjiye muri iyi gahunda sinacitse intege n’Imana iramfasha, Data ashyinguwe mu cyubahiro nicyo naharaniye.”

Urwibutso rwa Jenoside yakorewe Abatutsi rwa Nyagatare, ubu ruruhukiyemo imibiri 99 y’Abatutsi bishwe muri Jenoside

Umuyobozi w’Akarere ka Nyagatare, Gasana Stephen, yashimiye abantu bose batanze amakuru kugira ngo iyi mibiri iboneke ndetse anashishikariza n’abandi kubikora kugira ngo itaraboneka nayo ishyingurwe mu cyubahiro.

Imibiri itandatu yashyinguwe mu cyubahiro yabonetse mu Murenge wa Tabagwe n’uwa Nyagatare. Urwibutso rwa Jenoside yakorewe Abatutsi rwa Nyagatare rwari ruruhukiyemo imibiri y’Abatutsi bishwe muri Jenoside 93 hakaba hiyongereyeho indi itandatu.

Abohereza umusaruro ukomoka ku buhinzi hanze y’Igihugu bamenyeshejwe ko boroherejwe kubona ibyangombwa

Yabitangaje kuwa gatatu tariki ya 29 Gicurasi 2024, mu nama yahuje abahinzi n’abacuruzi b’ibikomoka ku buhinzi n’ubworozi bakabyohereza mu mahanga.

Umukozi w’Ikigo cyunganira abacuruzi kohereza ibicuruzwa mu mahanga no kubyinjiza mu Gihugu, Mwesigwa William Gakuru, avuga ko hakiri imbogamizi ku bashaka kohereza ibicuruzwa mu mahanga bitewe n’ibigo byinshi bitanga ibyangombwa kandi bidakora amasaha yose.

Ibi ngo bigira ingaruka ku bacuruzi kuko rimwe na rimwe hari ababura isoko bari babonye bikabatera igihombo.

Yagize ati “Iyo utabonye ibyangombwa bihagije ku muzigo wawe cyane ibikomoka ku buhinzi, uwo muzigo ntugenda uguma mu bubiko, umucuruzi akaba ahombye isoko ndetse n’igishoro yaguze wa muzigo.”

Avuga ko habayeho ihuriro ry’ibigo bitanga ibyangombwa (One Stop Center), kandi ikora amasaha menshi byafasha abacuruzi gukora amasoko yabo neza kandi bakabona inyungu.

Umukozi wa RDB, ushinzwe gusesengura ibicuruzwa byoherezwa mu mahanga, Gasasira Martin, avuga ko mbere abahoreza ibicuruzwa mu mahanga bagorwaga no kubona ibyangombwa bitewe n’ibigo bitandukanye baganaga kandi bidakorera hamwe.

Kuri ubu ariko ngo iyi serivisi yarorohejwe ku buryo ibigo byose birebwa no gutanga ibyangombwa kubohereza ibicuruzwa hanze y’Igihugu byahurijwe hamwe mu rwego rwo gufasha abashaka iyi serivisi kandi mu minsi ya vuba hazashyirwaho uburyo bwo kubona ibyo byangombwa binyuze mu ikoranabuhanga.

Ati “Ibigo byose bifite aho bihuriye n’abacuruzi byagiye hamwe hariya muri RDB kuko mbere byadindizaga abacuruzi kandi ubu turi mu nzira zo gushyiraho uburyo bw’ikoranabuhanga buhuriweho n’ibyo bigo byose ku buryo umucuruzi yabisaba kandi akabibona ataje kuri RDB.”

Ikigo cy’Igihugu cy’Imisoro n’Amahoro kivuga ko cyakuyeho imisoro ku musaruro ukomoka ku buhinzi n’ubworozi woherezwa hanze mu rwego rwo korohereza abacuruzi no kugira ngo ibyoherezwa hanze byiyongere.

Umworozi yasigariye aho nyuma y’uko inka ze zose zigaragaweho indwara y’uburenge

Ku wa Gatatu tariki 22 Gicurasi 2024, nibwo mu rwuri rw’umworozi, Habineza Didace, wo mu Mudugudu wa Kayigiro, Akagari ka Gitengure, Umurenge wa Tabagwe, hagaragayemo inka 28 zifite ibimenyetso by’indwara y’uburenge, ku munsi wakurikiyeho zikurwa mu bworozi kugira ngo zidakwirakwiza indwara.

Hafashwe ibizamini by’izisigaye kugira ngo barebe izidafite indwara ariko nyuma y’iminsi itatu gusa na zo zigaragaza ibimenyetso ku buryo na zo zakuwe mu bworozi ku wa Mbere tariki ya 27 Gicurasi 2024, urwuri rusigarira aho.

Kayumba avuga ko inka 60 ari zo zimaze gukurwa mu bworozi by’umwihariko Habineza akaba agomba gutegereza igihe indwara izavira mu rwuri rwe akabona kongera korora.

Ati “Yari afite inka zirenga 50 kandi zose zagaragaje ibimenyetso by’indwara, inka zose zigomba gukurwa mu bworozi, urwuri rugasigara nta nka irimo hanyuma azashake imiti yica virusi ariko n’izuba na ryo rirafasha mu kwica virusi, ubwo amafaranga yakuye mu nka azayakoresha yongere agure izindi.”

Uretse Habineza, hari n’inka z’abaturanyi be babiri na zo zagaragaje ibimenyetso by’indwara, zikurwa mu bworozi.

Kayumba avuga ko bataramenya aho indwara yaturutse gusa ngo nyiri inka akaba akeka ko bushobora kuba bwaraturutse ku rujya n’uruza rw’amatungo anyura hagati mu rwuri rwe kuko harimo igihandagaza (inzira y’inka).

Indwara ikigaragara, aborozi buhiraga ku kidendezi cy’amazi kimwe (valley dam) n’uw’inka ze zagaragayemo uburenge basabwe gushaka uko inka zabo zabonera amazi mu nzuri zazo zidasohotse.

Mu gihe hagitegerejwe icyemezo cya Minisiteri y’Ubuhinzi n’Ubworozi, ibikomera by’amatungo byabaye bihagaritswe mu Karere ka Nyagatare, haherewe ku gikomera (isoko ry’inka) cyagombaga kubera Nyendo ku wa Gatanu tariki ya 24 Gicurasi 2024.

Abitangaje mu gihe hirya no hino mu Gihugu humvikana, abanyeshuri basiba ishuri kubera indwara y’amaso abaturage bita ay’amarundi.

Mahoro avuga ko bimwe mu bimenyetso biranga uwafashwe n’amaso yandura cyane ari uko ijisho ritangira kurira no kugira imirishyi, kuryaryatwa, kokerwa no kubyimba ndetse no gutukura igice cy’umweru kizengurutse imboni. Hari kandi kugira igihu mu maso no gufatana ibitsike cyane mu gitondo umuntu abyutse.

Asaba abantu bose bagaragaweho ibi bimenyetso kwihutira kugana ivuriro ribegereye ariko bakanirinda kujya ahari abantu benshi kugira ngo atabanduza.

Ati “Uwibonyeho kimwe muri ibi bimenyetso akwiye kwihutira kugana ikigo nderabuzima kimwegereye, kwirinda kujya ahateraniye abantu benshi cyangwa agahamagara ku murongo utishyurwa wa 114.”
N’ubwo tutabashije kuvugana n’Umuyobozi w’Akarere ka Nyagatare wungirije ushinzwe Imibereho myiza, Murekatete Juliet, kuko yari mu nama, mu butumwa bugufi kuri telefone yemeye ko iyi ndwara ihari mu bigo byinshi by’amashuri.

Umwarimu utifuje ko amazina ye ajya mu itangazamakuru, yavuze ko hashize ibyumweru bibiri umuryango we wose urwaye aya maso yandura cyane.

Ngo nyiri urugo niwe wabanje gufatwa ariko n’ubwo yihutiye kujya kwa muganga ngo ntibyabujije ko abana n’umukozi bose bayarwara uretse we utari uhari icyo gihe.

Yagize ati “Umugabo niwe wafashwe mbere ahita abona imiti mushyiriramo ariko nari mfite urugendo ndagenda sinaharaye ariko bose barayarwaye kugera no ku mukozi. Umugisha nagarutse bamaze kuyakira kandi aho nari ndi naho nasize umusaza waho nawe yamaze gufatwa.”

Undi mwarimu nawe utifuje ko amazina ye atangazwa wo mu Murenge wa Nyagatare, yavuze amaso yayatewe n’umwana we nawe ayakuye aho yiga. Ngo yamujyanye kwa muganga bagaruka nawe yamaze gufatwa ndetse kugeza ubu n’ubwo yasubiye mu kazi ntarakira neza.

Agira ati “Nafashwe tariki 11 z’uku kwezi, nafashe imiti n’ubwo ntarakira neza ubu nasubiye mu kazi kuko amakuru mfite n’uko iyo wafashe neza imiti ubukana buba bwagabanutse ku buryo ntawe nakwanduza. Gusa n’ubwo nambaye amalinete sinajya ku zuba cyangwa mu muyaga.”

Umwe mu bayobozi b’ishuri wavuganye na Kigalitoday, yavuze ko mu rwego rwo kurinda abana iyi ndwara basabye ababyeyi babo ko ugaragaweho ikimenyetso yihutira kujya kwa muganga kandi akazagaruka yamaze gukira kugira atanduza abandi banyeshuri.

Nanone ariko ngo banashyizeho ubukarabiro ku buryo abana bose bakaraba n’isabune kandi bakanasabwa kutitsiritana.

Julien Mahoro Ningabira, avuga ko iyi ndwara y’amaso yandura cyane isanzwe ibaho ku Isi rimwe na rimwe igakwirakwizwa mu Bihugu bitewe n’urujya n’uruza rw’abantu.

Iyi ndwara y’amaso umuntu ashobora kuyandura mu gihe akoze aho uyirwaye yakoze nawe akikora ku maso no gusuhuzanya n’uyarwaye ukikora ku maso.

Yirindwa hakarabwa intoki kenshi n’amazi meza n’isabune, kwirinda kujya ahateraniye abantu benshi mu gihe ufite by’iyi ndwara y’amaso yandura, uyarwaye akirinda gusuhuzanya cyangwa guhoberana n’abandi mu gihe yikoze ku maso, kwirinda kogera muri pisine n’ahandi hakoreshwa n’abantu benshi, kwirinda gusangira ibikoresho by’isuku no kwirinda guhererekanya ibikoresho n’uyarwaye nka telefone n’ibindi.

Imiryango 15 itishoboye niyo yorojwe mu rwego rwo kwikura mu bukene

Yabitangaje kuwa gatanu tariki ya 24 Gicurasi 2024, ubwo iri torero ku bufatanye na Compassion Internationale ryorozaga inka abatishoboye 15 bo mu Murenge wa Rwempasha mu Karere ka Nyagatare.

Mu guhitamo aborozwa inka, hifashishijwe inzego z’ibanze harebwa umukene ariko nanone wabasha korora inka.

Uyu n’umwaka wa gatanu iri torero ritangiye koroza imiryango itishoboye aho 1,046 ariyo imaze korozwa inka, abandi borozwa ihene, ingurube n’inkoko hagamijwe kuzamura imibereho yabo.

Bishop Gakwaya, avuga ko iki gikorwa bagikora bagamije gukundisha abantu Imana kuko kenshi umukene abaho yiyanze akanga n’Imana yamuremye.

Boroje imiryango itishoboye

Kuba mu bahawe inka abenshi ari abo badahuje imyemerere, avuga ko ikigamijwe ari ugukura abantu mu bukene kandi bitaye kubo bahuje imyemerere gusa bakirengagiza ababaye Imana itabareba neza.

Ati “Tureba abakene tubagobotora kubuvamo, ntiwareba abo mu itorero ryawe gusa ahubwo ureba abantu bakennye kuko uvanguye, Imana ntiyakureba neza, niyo mpamvu ubona abanyagaturika, abayisilamu n’abandi, mu idini nta mwihariko aho asengera si ikibazo, ikibazo ni ugukura umunyarwanda wese mu bukene.”

Umukozi w’Akarere ka Nyagatare uyobora ishami ry’Ubuhinzi, Ubworozi, Amashyamba n’Umutungo kamere, Shyaka Kenneth, avuga ko kuba hari abafatanyabikorwa bagenda boroza abatishoboye bifasha Akarere kwesa umuhigo wa girinka ndetse no gukura abaturage mu bukene.

Asaba n’abandi bafatanyabikorwa mu iterambere ry’Akarere kujya muri uwo mujyo ariko by’umwihariko agasaba abahabwa inka kuzifata neza no kutazimya igicaniro.

Abahawe Inka bishimiye ko bagiye kubona amata bikarinda abana babo kugwingira

Yagize ati “Turahamagarira n’abandi bafatanyabikorwa kudufasha gukura abaturage bacu mu bukene. Ariko nanone abahabwa izi nka bakwiye kuzifata neza, bakitura kugira ngo inka zigere kuri benshi ariko bakibuka ko kizira kuzimya igicaniro.”

Umwe mu bahawe inka, Musabimana Jack, usengera muri EAR, avuga ko ubusanzwe yagorwaga no kubona amata y’abana be ariko kuba abonye inka bizamufasha kutarwaza abana indwara zikomoka ku mirire mibi.

Ati “Mbonye ifumbire ndetse n’amata y’abana, urumva ko batazagwingira. Sinabona uko mbivuga kuko mbere nagorwaga cyane no kubonera abana amata ndetse no kugura ifumbire nshyira mu karima mfite.”

Uyu mwaka w’ingengo y’imari, Akarere ka Nyagatare kagombaga koroza inka imiryango itishoboye irenga 400 ndetse umuhigo ukaba waranagezweho 100%. Kuva iyi gahunda ya girinka yatangira mu Karere ka Nyagatare, imiryango itishoboye irenga 17,000 niyo imaze korozwa.

Urubyiruko rwasabwe kwirinda uwarubibamo ingengabitekerezo ya Jenoside no kurinda ibyagezweho

Yabibasabye ku gicamunsi cyo kuri uyu wa Gatandatu tariki ya 25 Gicurasi 2024, ubwo kaminuza ya East African University Rwanda, yibukaga ku nshuro ya 30 Jenoside yakorewe Abatutsi mu 1994.

Ni igikorwa cyabanjirijwe n’urugendo rwo kwibuka, rwaturutse aho iyi kaminuza ikorera kugera ku rwibutso rwa Jenoside rwa Nyagatare aho basobanuriwe amateka ya Jenoside by’umwihariko mu cyahoze ari Umutara bagaruka kuri kaminuza ahakomereje ibiganiro n’ubuhamya.

Sebutama John, warokokeye Cyabayaga, yavuze ko mbere bari babanye neza ariko buri mwaka Abatutsi bakagenda bahabwa amazina abapfobya dore ko hari n’igihe babwiwe ko atari abanyarwanda ahubwo ari abanyamahanga bahawe ubwenegihugu bw’u Rwanda.

Mbere gato y’urugamba rwo kubohora Igihugu batangiye kwicwa urusorongo ndetse urugamba rugitangira batangira guhigwa n’abaturanyi ndetse n’abo basangiraga.

Benshi ngo bafashwe bitwa ibyitso by’Inkotanyi bajya kwicirwa I Byumba abandi bicwa n’igitero cy’Abarundi babaga I Rukomo bafatanyije n’Interahamwe zo muri Komini Murambi.

Ati “Mu 1990, abo twasangiraga, twari inshuti batangiye kuduhiga, bamwe bajyanywe I Byumba bicirwayo, twe basigaye twihishahisha inaha, twatewe n’igitero giturutse I Gatsibo kirimo Abarundi bari bimutse hano I Rukomo, abanya-Kiyombe bari bahunganye ndetse n’Interahamwe za Gatete.”

Urubyiruko rwasabwe kwigira kuri bagenzi babo bahagaritse Jenoside

Yashimye ingabo zahoze ari iza RPA Inkotanyi zabarokoye zikabubakira ubuzima ubu bakaba babayeho neza kandi babanye neza ntakwishishanya.

Umuyobozi wa AERG muri kaminuza ya Eat Africa, Biruta Ian, yasabye urubyiruko rugenzi rwe gukoresha imbaraga bafite bubaka Igihugu kizira amacakubiri ari nabyo bagomba kuraga abazabakomokaho.

Yifuje by’umwihariko ko bashyirirwaho isomo rijyanye n’amateka ya Jenoside yakorewe Abatutsi ndetse hakaboneka n’ibitabo byinshi biyivugaho kugira ngo barusheho kumenya ayo mateka aho kujya bayumva igihe cyo kwibuka gusa.

Yagize ati “Twabasaga ko mwadushakira uburyo abanyeshuri bajya bamenya amateka atari umunsi nk’uyu gusa ahubwo bigashyirwa mu nyigisho duhabwa ndetse hakaboneka n’ibitabo byinshi bivuga ku mateka ya Jenoside yakorewe Abatutsi tukayiga tukarushaho kuyamenya.”

Umuyobozi wa kaminuza ya East Africa, Prof Callixte Kabera, avuga ko gutegura iki gikorwa cyo kwibuka haba hagamijwe gutanga amasomo ku rubyiruko rwavutse nyuma ya Jenoside kugira ngo rumenye amateka yayo ariko runafatire urugero rwiza ku rundi rubyiruko rwayihagaritse bubake Igihugu buri munyarwanda wese afitemo agaciro.

Ati “Urugero rwiza dufite rw’abahagaritse Jenoside, bashobora kubyubakiraho bakubaka Igihugu gikomeye, gifite urukundo, cya Ndi Umunyarwanda, aho Umunyarwanda avuka aziko azabaho ejo n’ejo bundi na buriya.”

Naho ku bijyanye n’isomo kuri Jenoside yavuze ritangwa ku biga amateka muri iyi kaminuza ariko n’abandi bashaka kuyamenya hari ibitabo byinshi bivuga kuri Jenoside yakorewe Abatutsi.

Umuyobozi w’Akarere ka Nyagatare wungirije ushinzwe Iterambere ry’Ubukungu, Matsiko Gonzague, avuga ko kuba abanyeshuri ba kaminuza bagira inyota yo kumenya amateka ya Jenoside ndetse bakiha n’intego zo kurwanya abagifite ingengabitekerezo yayo bitanga ikizere ko itazongera kubaho ukundi.

Yasabye urubyiruko rwiga muri za kaminuza by’umwihariko kurwanya abakwirakwiza ingengabitekerezo ya Jenoside ndetse no kurinda ibyagezweho.

Ati “Urubyiruko nirwo rukoresha cyane ikoranabuhanga, rukwiye gutinyuka rero rukanyomoza abarikoresha babiba ingengabitekerezo ya Jenoside ariko nanone tunafatanye kugira ngo turinde ibyagezweho.”

Yasabye kandi abazi ahari imibiri y’Abatutsi bishwe muri Jenoside kuhagaragaza kugira ngo nayo ishyingurwe mu cyubahiro. Urwibutso rwa Jenoside rwa Nyagatare ruruhukiyemo imibiri y’Abatutsi bishwe muri Jenoside 93, mu cyumweru gitaha hakazashyingurwamo indi itanu yabonetse.

Abaturage bishimira ko gukorana n’umushinga KIIWP byatangiye kubaha umusaruro

Babitangaje kuwa kabiri tariki ya 21 Gicurasi 2024, ubwo IFAD nk’umuterankunga, yasuraga ibikorwa by’umushinga wa KIIWP ikagirana ibiganiro n’abafatanyabikorwa (abaturage) b’uyu mushinga n’icyo umaze kubagezaho.

Ndayishimiye Théogène wo mu Kagari Cyinzovu, avuga ko mbere y’uko KIIWP itangira, bahingaga imyaka itandukanye kandi ivangavanze ibyo bita ko bahingaga mu kiganza kuko umusaruro warangiriraga mu nkono y’umuturage.

Nyamara ariko ngo mu gutangira k’uyu mushinga barawurwanyije bumva ko Leta yigabije ubutaka bwabo ariko batangira kugira ikizere ari uko batangiye guhabwa akazi mu gukora amaterasi, gutera ibiti by’imbuto no kubyuhira kandi umurima bakoramo ari uwabo.

Théogène avuga ko we n’ubwo ataratangira gusarura avoka ariko yizeye ko ibiti afite 108 bizamuha amafaranga menshi cyane.

Bishimira ko batangiye kubona umusaruro w’aimbuto

Ati “Hano ntawagurishaga umusaruro kuko utarengaga inkono ye, ariko ubu ibi biti byatubereye Paradizo bajya batubwira. Ejo bundi nahoze mbara igiti kimwe mbona kiriho avoka 100 kandi imwe ngo igura amafaranga 150, urumva ninsarura byose nzubakira n’abuzukuru n’ubwo ntarabagira.”

Avuga ko kubera ifumbire yashyizwe ku giti n’amazi acyuhirwa ndetse no kuba imirima irimo imirwanyasuri n’indi myaka bahinga isigaye yera inshuro hafi eshanu z’umusaruro babonaga mbere.

Uwitwa Mukamurwanashyaka Marie Louise, we yamaze kubona ku mafaranga ya mbere y’imbuto ziri muri uyu mushinga. Avuga ko yaterewe ibinyomoro byeze akuramo amafaranga y’u Rwanda 250,000, abasha kwisakarira inzu ye, agura ingurube n’ihene.

Avuga ko ibiti by’avoka ni byera bizamufasha mu kwigisha abana be kugeza basoje kaminuza.

Umwaka utaha biteze ko bazasarura toni zirenga 1000 z’avoka

Agira ati “Urumva ibinyomoro byaranyubakiye mbona n’amatungo, avoka nizera zo zizigisha abana banjye kugera basoje kaminuza.”

Umuyobozi w’Akarere ka Kayonza, Nyemazi John Bosco, avuga ko bishimira ko uyu mushinga wahinduye ubuzima bw’abaturage ba Kabarondo na Murama.

Ikindi ngo wafashije mu guhuza ubutaka ku buryo muri uyu mushinga bahafite hegitari 1,300 ndetse abaturage bakaba barigishijwe guhinga batababaza ubutaka.

Avuga ko ariko habayeho gutinda mu gushyira mu bikorwa ikiciro cya kabiri cyawo, ku buryo ugera mu Mirenge icyenda ikunze kurangwamo izuba ryinshi.

Umuyobozi wungirije wa IFAD, Dr Geraldine Mukeshimana, avuga ko mbere y’uko umushinga wa KIIWP utangira mu mwaka wa 2021, imibereho y’abaturage ukoreramo bari babayeho neza ariko bishimishije kuba warabafashije kwiteza imbere.

By’umwihariko ariko akishimira ko biteje imbere mu bukungu ndetse no mu mibanire myiza. Avuga ko uyu mushinga utegurwa wari ugamije gukora ubuhinzi buhangana n’imihindagurikire y’ikirere kandi byatangiye kugerwaho bityo nka IFAD ngo bishimiye ko ibikorwa bito bishobora guhindura imibereho myiza y’abaturage.

Yagize ati “Amasomo tuba dukuyemo nka IFAD ni uko ibikorwa bitoya nk’ibi biba bigaragaza ko bifite ubushobozi bwo guhindura imibereho myiza y’abaturage ndetse n’imibanire kuko twumvise ko hari imiryango myiza yabanaga mu makimbirane ikaza kwisubiraho ubu ikaba ibana neza ndetse iniyemeza gusezerana imbere y’amategeko.”

Umunyamabanga wa Leta muri Minisiteri y’Ubuhinzi n’Ubworozi, Eric Rwigamba, avuga ko urebye aho umushinga watangiriye ukareba n’ibikorwa, ubona akamaro k’ubufatanye kuko iyo hatabaho umuhate w’abaturage mu gushaka uko biteza imbere ndetse n’ubuyobozi bwiza uyu mushinga utaribushoboke.

Abayobozi bishimiye ko imbuto zatewe zatangiye kwera

Yasabye abaturage gufatanya n’ubuyobozi kugira ngo iterambere ryabo rigerweho by’umwihariko kuba barahaye agaciro ibikorwa bahawe bakabifata neza.

Naho kuba harabayeho gutinda ku ikiciro cya kabiri cy’uyu mushinga ngo byatewe no kubanza gutegura aho uzakorera, gushaka amafaranga no gusuzuma uko ikiciro cya mbere cyagenze.

Yagize ati “Umushinga nk’uyu urimo abaturage benshi ubanza gutegura ahantu ibikorwa bizakorerwa no gushaka amafaranga ariko no kureba uko icyiciro cya mbere cyagenze bisaba igihe.”

Guverineri w’Intara y’Iburasirazuba, Pudence Rubingisa, yasabye abaturage bakorana na KIIWP gusangiza bagenzi babo ubumenyi bungutse mu buhinzi bw’imbuto ku buryo nta mwana uzongera kurangwaho imirire mibi.

Batangiye kweza n’indi myaka

Abayobozi b’umushinga wa KIIWP bavuga ko amafaranga amaze kuwushorwamo azaba yamaze kugaruzwa mu myaka ibiri iri imbere kuko ubu hamaze gusarurwa toni 100 z’imbuto ndetse umwaka utaha hakaba hitezwe umusaruro urenga toni 1,000.

Icyiro cya mbere cy’umushinga wa KIIWP gifite agaciro ka Miliyoni 17 z’Amadolari y’Amerika mu gihe icya kabiri kizatwara Miliyoni 65 z’Amadolari y’Amerika.

Ubu KIIWP irakorana n’abaturage 4,000 ukazarangira ukorana n’abarenga 40,000, ukaba warafashije amakoperative y’abagore n’urubyiruko 50.

Visi Meya, Mutoni Jeanne avuga ko abafashirizwaga aho bimukiyeho hose bigiye kurangira

Umuyobozi w’ishami ryo kurengera abatishoboye, mu Kigo gishinzwe guteza imbere ibikorwa by’iterambere mu nzego z’ibanze, LODA, Jean Claude Rwahama, avuga ko Systeme Imibereho ari uburyo hakusanywa amakuru y’imibereho y’ingo z’abanyarwanda kugira ngo bifashe mu igenamigambi ry’Igihugu, mu bushakashatsi ndetse no kubona amakuru y’imibereho y’ingo zifite amikoro make.

Kumenya izi ngo bikazajya bifasha Leta kuzifasha no kuzunganira muri gahunda zitandukanye zibafasha kwivana mu bukene ndetse no gufasha abatishoboye badashoboye gukora.

Rwahama, avuga ko n’ubwo abanyarwanda bose batarajya muri iyi systeme igikorwa kigikomeza ku bufatanye n’urwego rw’Akagari bityo buri muturage akwiye kwegera uru rwego rukamufasha kwinjizamo amakuru y’urugo rwe.

Agira ati “Sintekereza ko ari benshi batarajya muri Systeme Imibereho kandi ni igikorwa gikomeza ku rwego rw’Akagari rwegereye abaturage kugira ngo umuturage wese yegere uru rwego rumufashe kwinjizamo amakuru ye.”

Utari muri iyi Systeme Igihugu ntiba ifite amakuru ye bityo no kumukorera igenamigambi bikagorana.

Minisiteri y’Ubutegetsi bw’Igihugu na LODA bari mu bukangurambaga bwa ’Systeme Imibereho’ kugira ngo abaturage bayitabire

Kugira ngo umuturage amenye ko ari muri iyi Systeme hashyizweho uburyo bw’ikoranabuhanga aho umuntu ashobora kwifashisha mudasobwa cyangwa telefone igendanwa akanze *195# ugakurikiza amabwiriza.

Umuyobozi w’Akarere ka Rwamagana wungirije ushinzwe Imibereho myiza, Mutoni Jeanne, avuga ko iyi Systeme izafasha mu buryo bworoshye guhitamo abaturage bafite ubushobozi bucye bakeneye ubufasha kuko ibyakorerwaga mu nteko y’abaturage rimwe na rimwe byabagamo amarangamutima cyangwa kwibeshya ku muntu.

Ikindi ariko ngo iyi Systeme izafasha mu gutahura abaturage bifuza gufashirizwa mu Turere tubiri.

Ati “Hari umuntu ushobora kuva inaha agasimbukira i Gatsibo nabo akababwira ugasanga baramufashije kandi Igihugu dukorera ni kimwe, ubushobozi bw’Igihugu ni bumwe, aho yafashirizwa hose ntabwo aba akwiye kongera kuba umutwaro w’akandi Karere.”

N’ubwo iyi gahunda y’Imibereho iganirwaho mu nteko z’abaturage hari abatazi ko bayibamo cyangwa ko inabaho gusa bakifuza ko bayisobanurirwa byimbitse.

Umwe ati “Jye simbizi n’ubwa mbere mbyumvise ariko ibyo aribyo byose ishobora kuba ari nziza ku buryo tuyisobanuriwe twayitabira.”

Abaturage b’Umurenge wa Munyiginya bamwe bafite amatsiko ku mikorere ya ’Systeme Imibereho’

LODA, ivuga ko muri ’Systeme Imibereho’, amakuru y’ibigo cyangwa imiryango (abihayimana n’abandi) akusanywa handikwa ababihagarariye ariko hakanafatwa n’amakuru y’inyongera kugira ngo hatazabaho kwitiranya ikigo n’urugo rusanzwe.

Ibishingirwaho mu kugaragaza imibereho y’urugo si ubutaka gusa kandi nanone kutabugira bidahagije ngo urugo rugaragare nk’urutishoboye ahubwo hanarebwa ubushobozi bwo gukora, amashuri, imitungo, iyinjizamutungo n’ibindi.

Uwamwezi umaze imyaka irenga 10 apfakaye, avuga ko yabanje kuba umuforomokazi wabifatanyaga n’ubukorikori akazi yaje kuvamo yisezereye kubera umushahara mucye utabasha gutunga umuryango we wari mugari.

Ubutaka akoreramo ibikorwa bye yabuguze ku nguzanyo ya Banki atangira guhinga inanasi guhera mu mwaka wa 1997.

Ku bufatanye n’umushinga wa Oxfarm na Duterimbere yaguye ubuso ndetse ahabwa n’ubumenyi bwo kuzitubura ndetse abona n’isoko rya RAB ryo kugemura imbuto aho yabonye Miliyoni eshanu (5,000,000frs).

Nyuma ariko ngo kubera kubura isoko yaje guhabwa ubumenyi butuma azumisha zikamara igihe kirekire ndetse Leta imuha ubwumishirizo bwifashisha imirasire y’izuba.

Yaje kubona isoko ryo mu Busuwisi ariko ananirwa kurihaza. Binyuze mu bufatanye bw’Akarere n’umushinga wa LCF, yaje guhabwa imashini yumisha toni imwe n’ibiro 200 mu masaha cumi n’umunani (18hrs).

Iri soko ariko ntiyaje kuribasha kubera ko yasabwe byinshi kugira ngo abone ibyangombwa by’ubuziranenge kandi mu bihe bigoye bya COVID-19 ariko no kwagura umushinga ntagume mu kumisha gusa ahubwo akanakora imitobe isembuye n’idasembuye.

Ati “Mbere numishaga imineke n’inanasi ariko nsanga mu nanasi numisha hazamo ingero zitandukanye. Hari idashobora kuma ariko yakorwamo umutobe (Juice) ndetse itakora Juice ahubwo yakora umutobe usembuye (Wine) nsanga ndangiza. Niho havutse gukora imitobe isembuye n’idasembuye na Confiture.”

Avuga ko kugira ngo agere ku byo yasabwaga byose kugira ngo abone ibyangombwa by’ubuziranenge yari amaze kugira inguzanyo y’amafaranga y’u Rwanda 20,000,000 ku buryo ubu uruganda rudakora uko bikwiye.

Cyakora ngo ibyo akora birakunzwe kuko akoresha imbuto z’umwimerere gusa ikibazo afite ubu ngo ni igishoro gicye ku buryo uruganda rwakora neza.

Yagize ati “Narwanye n’ibyangombwa ndabibona ariko bisiga nta gishoro mfite kuko amazu nasabwe kubaka naje guhura n’ibiza kandi mu gihe kibi cya COVID-19. Ari ugufasha abahuye n’ibiza sinafashijwe yewe n’inkunga yo kuzamura ingando nto n’iziciriritse ntacyo bamfashije. Ariko mbonye abagura umwenda wanjye (Top Up) nkasigarana igishoro nakora.”

Uwamwezi ufite uruganda rwitwa “Nature Life” avuga ko igituma adacika intege ahubwo akomera ku ntego yihaye ari ko ngo yanakuze akunda kwibonera ikintu aho kugihabwa n’undi kuko ngo gusabiriza ni umuco mubi cyane.

Ati “Inkweto ya mbere nijye wayiguriye, umwenda wo gusengana ni uko ndetse n’uw’ishuri wa kabiri. Nabohaga imikeka n’imifuka y’abanyeshuri nkayigurisha nkagura ibyo nshaka.”

Akomeza agira ati “Maze no gushaka niko nakomeje, hari ibyo narebaga nkumva ndabigaye, umugabo niba yinjiye ntuzi ibibazo yahuye nabyo, aho kumusuhuza ugatangira kumubwira ko nta munyu cyangwa isabune bihari, azane icyo azanye nkimwakire ariko ntamutuye ibibazo, jye niriwe nkora iki?”
Asaba abagore guhirimbanira ingo zabo kuko aribwo bazahabwa agaciro nk’abafite icyo bazinjizamo kuko gusaba umugabo buri cyose biteza amakimbirane mu ngo.

Umwe mu banyeshuri bimenyereza umwuga muri Nature Life Company, Ntezigeno Alphonse, umunyeshuri mu ishuri ry’imyuga n’ubumenyingiro rya Nyagahanga, mu ishami ryo gutunganya ibiribwa (Food Processing) mu gihe gito, avuga ko amasomo y’imenyerezamwuga abona ajyanye n’ibyo yiga kandi azahakura ubumenyi bushoboka ku buryo buzamufasha kwihangira umurimo.
Yagize ati “Ibyo bakora bijyanye n’ibyo niga kandi biri mu byo nifuzaga kumenya. Bakora Juice n’inzoga kandi biri mu ntekerezo zanjye kandi mfite gahunda yo kwikorera.”

Mugorewishyaka avuga ko gukora amavaze mu ibumba n’imigongo bimwinjiriza 100,000 ku kwezi

Uyu mubyeyi w’abana batandatu, atuye mu Mudugudu wa Kinunga, Akagari ka Mburabuturo, Umurenge wa Mukarange.

Ku myaka 18 gusa y’amavuko yari yatangiye gukora umwuga gakondo w’ababyeyi be wo kubumba inkono za Kinyarwanda, ibintu avuga ko bitamuhaye umusaruro kuko yari abayeho mu buzima bubi cyane.

Avuga ko yakuze imitekerereze ye ari ukubona icyo kurya no kwambara, nta byo kureba imbere.

Ati “Mbere ya Jenoside natekerezaga kurya no kwambara gusa mbese nk’umuntu uzapfa ejo. Muri macye ntitwari twiyizi, twibonaga nk’abantu ariko nta mitekerereze, ari uko tutabuze ibitekerezo, ahubwo ari ukubura ubwisanzure.”

Mu mwaka wa 2,000 yaje gupfakara, akomeza kurera abana be abatungishije kubumba inkono gusa.

Icyakora ngo kubera amahugurwa menshi no kubwirwa ko na we ari Umunyarwanda nk’abandi, yaje kwemerera abana be bari bakiri bato kujya mu ishuri, ndetse umwe ubu akaba asoje kaminuza.

Agira ati “Jye mvuka mu muryango witwaga Abatwa, nyuma baje kwitwa abasigajwe inyuma n’amateka, tuza guhagararirwa n’imiryango nka COPORWA n’indi ariko ntacyo byatugejejeho. Gusa gahunda ya Leta idukangurira gushyira abana mu ishuri nanjye abanjye mbashyiramo umwe asoje kaminuza.”

Mu mahugurwa yahawe ngo harimo aya Komisiyo y’Uburenganzira bwa Muntu, aho yamenye ko na we ari umunyagihugu nk’abandi kandi adakwiye kwiha akato no gusigara inyuma mu iterambere.

Uyu utarizege ukandagira mu ishuri ngo yaritinyutse ndetse ajya no mu buyobozi bw’inzego z’abagore, mu Mudugudu no mu Kagari atuyemo.

Mugorewishyaka yaje kujya mu matsinda, bituma abagore bagenzi be bamubera ingwate mu Kigo cy’imari, akuramo amafaranga 30,000 akora neza inzu yubakiwe na Leta ndetse aranayikinga.

Amatsinda yo kubitsa no kugurizanya yatumye ahura n’Umuryango utari uwa Leta, Women for Women, abona amahugurwa menshi ndetse anigishwa gukora imigongo ndetse no kubumba amavaze mu mwanya w’inkono za Kinyarwanda.

Ati “Nyuma yo guhura na Women for Women, nahuye na Gikuriro idukangurira kubitsa no kwizigamira, ntangira kubona amafaranga yo kugura inkweto, imyambaro n’ibindi ndetse inama zose z’abagore ntangira kuzitabira ngendana n’ubuyobozi.”

Uyu wabaye mu buyobozi bw’inama y’Igihugu y’Abagore, avuga ko kwamamara kwe kwaturutse ku kuba ari mu bantu batanze amafaranga 500,000 mu gushyigikira amatora ya Perezida wa Repubulika.

Ati “Ibihugu byimanye inkunga y’amatora nari muri CNF, Akarere kashyizeho ikigega Agaciro cyo gushyigikira amatora. Naje mu nama nitwaje amavaze atandatu (6), bitangaga amafaranga nanjye nitanga amavaze, ayo mavaze yaguzwe 500,000 urumva ko ndi mu bantu batanze amafaranga menshi kandi byaranshimishije binyereka ko mfite agaciro.”

Kuri ubu yamaze gukora itsinda ry’abantu bahujwe n’umwuga wo kubumba amavaze, byanamuhesheje Pasiporo (Passport) ajya mu Gihugu cy’u Buhinde nk’umunyabukorikori kugira ngo yige uko amatsinda y’abagore baho akora.

Yagize ati “Iyo hatabaho COVID-19, Pasiporo nahawe yakabaye yarangejeje mu Bihugu byinshi. Kuko nahawe Pasiporo yo guhagararira amatsinda y’abagore b’abanyabugeni n’abanyabukorikori njya mu Buhinde kureba uko abagore baho bakora kugira ngo tubigireho.”

Mu Buhinde ngo ni ho yamenyeye ko umugongo yakoze awushyizeho irange ry’amavuta wajya wandura bakawoza aho kuwujugunya.

Mugorewishyaka, akaba n’umwe muri ba Marayika Murinzi mu Karere ka Kayonza, avuga ko kuri ubu yishimira ko Leta yamufashije mu kwigisha abana be ku buryo umwe asoje kaminuza ndetse no kuba yarabashije kwiteza imbere ku buryo atabura amafaranga y’u Rwanda 100,000.

Gusa ngo ikirenze ibindi ni ukuba Leta yarubatse imiyoborere myiza yimakaza Ndi Umunyarwanda.

Agira ati “Mbaze abo ngaburira n’abo nambika nibarira ko buri kwezi ibihumbi ijana, mfite intebe nziza mu nzu, yewe n’abashyitsi bafite igitanda kiriho umufariso, byose nkesha imiyoborere myiza itarobanura, yazanye ubumwe n’ubwiyunge, igakuraho amazina (amoko) igashyiraho ndi Umunyarwanda.”

Avuga ko imiryango yabo (Abatwa), itakigira ipfunwe ryo kujya mu bandi ndetse akaba anishimira ko ntaho bajya ngo bavangurwe cyangwa ngo bitwe Abatwa.

Avuga ko afite intumbero yo gukomeza gutera imbere ndetse akagera kuri byinshi kuko ubu atakijya kwikurira ibumba ahubwo rizanwa n’imodoka akayishyura.

Yafashwe yari agitunze indangamuntu ya kera irimo amoko

Umuvugizi wa RIB, Dr Murangira B. Thierry, avuga ko Mukamana yabanaga nk’umugore n’umugabo na Ntarindwa Emmanuel, akekwaho icyaha cyo kutamenyekanisha icyaha cy’ubugome cyangwa gikomeye.

Avuga ko mw’ibazwa rya Ntarindwa Emmanuel, yemeye ko nyuma yo gukora Jenoside yahungiye muri Congo aza kugaruka mu Rwanda mu mwaka wa 2001.

Ngo yaje kwihisha kwa Mukamana Eugenie, bari baturanye kandi baziranye mbere ya Jenoside baza kubyarana umwana umwe.

Yemeye ko kuva yagera muri urwo rugo atigeze asohoka hanze ahubwo yabaga mu mwobo yari yaracukuye mu nzu, yubaka urutara hejuru yawo akaba yari amazemo imyaka 23 yihishe muri uwo mwobo.

Ntarindwa Emmanuel, kandi yiyemerera ko yakoze Jenoside, ko yishe abantu benshi atibuka umubare, kandi ko yayikorerye mu cyahoze ari Komini Kigoma na Nyabisindu, ubu ni mu Karere ka Nyanza Umurenge wa Busasamana.

Abafashwe bafungiye kuri Station ya RIB ya Busasamana mu gihe iprerereza rikomeje kugira ngo hakorwe dosiye ishyikirizwe Ubushinjacyaha.

Yiberaga mu mwobo akaba ari naho bamuzaniraga ibiryo

Ingingo ya 92 yItegeko riteganya ibyaha n’ibihano muri rusange ivuga ku ihanwa ry’icyaha cya Jenoside, iteganya ko umuntu wese ukoze Jenoside aba akoze icyaha. Iyo abihamijwe n’urukiko ahanishwa igifungo cya burundu kidashobora kugabanywa kubera impamvu nyoroshyacyaha.

Ingingo ya 2 y’itegeko riteganya ibyaha n’ibihano muri rusange isobanura ko ikitso ari umuntu wafashije uwakoze icyaha mu byagiteguye bigaragarira muri kimwe mu bikorwa bikurikira; uwahishe uwakoze icyaha, umufatanyacyaha cyangwa uwahishe ikitso kugira cyangwa ngo adafatwa, ataboneka, umufasha kwihisha cyangwa gucika cyangwa umuha aho kwihisha cyangwa uwamufashije guhisha ibintu byakoreshejwe cyangwa byagenewe gukoreshwa icyaha.

Ihanwa ry’umufatanyacyaha n’ikitso biteganywa n’ingingo ya 84 y’Itegeko nº 68/2018 ryo ku wa 30/08/2018 riteganya ibyaha n’ibihano muri rusange, ihinduwe ku buryo bukurikira, ivuga ko umufatanyacyaha cyangwa ikitso ahanwa hakurikijwe ibihano itegeko riteganyiriza uwakoze icyaha.

RIB ivuga ko bidakwiye kuba hari abantu bagihisha cyangwa ngo bahishire abantu bakekwaho gukora Jenoside. Ivuga kandi ko nta muntu n’umwe mu Rwanda utazi ingaruka zatewe na Jenoside yakorewe Abatutsi bityo kuba hakiri abantu bahishira abakekwaho iki cyaha bigayitse.

RIB, ikomeza isaba abantu bose bafite amakuru kuyatanga, kugira ngo abakoze ibyaha bahanwe.

Ibiro by’Akarere ka Nyagatare

Ikibazo cy’ubucye bw’abaganga cyagaragaye cyane ku Kigo Nderabuzima cya Muhambo mu Murenge wa Mukama aho ku baganga umunani bagomba kuhaba hari batatu gusa.

Ibi ngo byatumye abaturage batishimira serivisi bahabwa bagahitamo kujya kuyishaka ku Bigo Nderabuzima bibegereye nk’icya Nyagahita n’icya Mimuli byose byo mu Murenge wa Mimuli.

Umwe mu baturage yagize ati “Usanga umuganga umwe ukora mu isuzumiro ari nawe ujya gutanga imiti, rimwe abantu bakagenda batavuwe kubera ubwinshi n’ubucye bw’abaganga.”

Abaturage bavuga ko ahari ikibazo cyane ngo ni muri serivisi yo kwipimisha inda ku buryo ngo hari abajya kubyara bakagira ingorane kuko batipimishije ngo bamenye uko abana bameze mu nda.

Umuforomo kuri iki Kigo Nderabuzima cya Muhambo, Munyemana Eric, yabwiye RBA ko uretse abarwayi bahabwa serivisi mbi ngo nabo bahura n’ingorane kubera ubucye bwabo.

Yagize ati “Abaganga duhari turavunika kuko umwe akora muri serivisi zirenze imwe bigatuma tubura umwanya wo kuruhuka bishoboka twabona abaza kutwunganira.”

Umuyobozi w’Akarere ka Nyagatare wungirije ushinzwe Imibereho myiza, Murekatete Juliet, avuga ko ikibazo cy’abaganga bacye mu Bigo Nderabuzima atari umwihariko wa Muhambo gusa ahubwo ngo ni ikibazo kiri rusange mu Karere.

By’umwihariko ho ngo hari n’abaganga boherezwayo bakanga kuhakorera kubera ko ari mu cyaro.

Ati “Ntabwo ariho honyine n’ahandi niko bimeze ariko Muhambo by’umwihariko hari n’abamaze koherezwayo bakanga bakagerayo bakahava ngo ni habi kure ya kaburimbo.”

Mu gukemura iki kibazo mu buryo bw’ibanze, Ibitaro bya Gatunda byamaze kubatiza abaganga batatu bazaba bunganira abari bahasanzwe mu gihe hagishakishwa abandi bazajya gukorerayo.

Akarere ka Nyagatare gafite Ibitaro bibiri, Ibigo Nderabuzima 20 n’amavuriro y’ibanze 83 harimo ane (4) yo ku rwego rwa kabiri (Second Generation) atanga zimwe muri serivisi zitangirwa mu Bigo Nderabuzima.

Minisitiri Uwamariya yagaragaje uruhare rw’umugore mu iterambere ry’umuryango

Yabitangaje ku wa kabiri tariki ya 14 Gicurasi 2024, ubwo yifatanyaga n’abagore mu Karere ka Kayonza mu kwizihiza isabukuru y’imyaka 30 ishize n’uruhare rw’umugore mu iterambere ry’Igihugu.

Ni igikorwa cyabanjirijwe no gusura bimwe mu bikorwa by’abagore birimo iby’ubuhinzi n’ubworozi, ubuvumvu ndetse n’ubukorikori.

Mugorewishyaka Latifat w’imyaka 63 y’amavuko, avuga ko ku myaka 18 yatangiye gukora umwuga gakondo w’umuryango wabo w’ububumbyi bw’inkono. Gusa ngo uyu mwuga ntacyo wamumariye kuko yagumye mu bukene kuko byageze n’aho Leta imwubakiye inzu yo kubamo.

Kubera amahugurwa menshi no kungurwa inama yahisemo rya bumba kurikoramo amavaze ndetse no gukora imigongo, byamuhesheje itike y’indege yo kujya mu Buhinde kugira ngo yige uko abagore baho bakora.

Mugorewishyaka ubu usigaye yinjiza amafaranga y’u Rwanda 100,000 ku kwezi avuga ko byose abikesha imiyoborere myiza ishingiye kuri Ndi umunyarwanda.

Bagaragarije Minisitiri Uwamariya ibyo bakora mu kwiteza imbere

Ati: “Nshima gahunda ya Ndi Umunyarwanda itareba amoko, idini cyangwa amashuri. Nakabaye naruriye indege, nkarara muri Malliot Hotel, nkajya muri Convention? Minisitiri umbwirire Perezida wa Repubulika ko imiryango y’abiswe amazina menshi, twiswe Abatwa, abahejejwe inyuma n’amateke n’andi, uyu munsi twiteje imbere, numva namuheka.”

Gatesi Claire, amaze imyaka 21 akora umwuga w’ubudozi nyuma yo guhugurwa na Women for Women yahinduye ibitekerezo ava ku kudodera imyambaro isanzwe abaje bamugana ahubwo atangira gukoramo ibindi nk’imitaka yo kwikinga izuba. Kubera umusaruro byatanze byatumye umugabo we ava mu kazi k’ubushoferi nawe yiga kudoda ku buryo bahaye akazi abantu 18.

Gatesi avuga ko ubu ku kwezi binjiza amafaranga arenga 300,000 aturutse ku mwuga bakora, ubworozi bw’amatungo magufi ndetse n’ubuhinzi.

Yagize ati: “Umugabo yakoreraga kure bikangora gukora neza kubera kwita ku bana ahitamo kubivamo mwigisha kudoda none ubu arandusha. Tumaze kugura amasambu ya Miliyoni hafi eshanu, dufite urutoki rwiza rwa hegitari imwe ruvamo 200,000 ku kwezi, ihene n’inkwavu n’ubudozi bwacu ku buryo ku kwezi tutabura kwinjiza 300,000frs.”

Abagore bagaragaje ibyo bamaze kugeraho

Minisitiri w’Uburinganire n’Iterambere ry’Umuryango, Dr Valentine Uwamariya, avuga ko iyo inzego z’abagore zikora neza ibibazo by’amakimbirane mu miryango, imirire mibi mu bana ndetse n’ubukene bitabaho ahubwo habaho iterambere.

Agira ati: “Byaragaragaye aho inzego z’abagore zikora neza, nta kibazizo cy’amakimbirane mu miryango, nta kibazo cy’imirire mibi mu bana ndetse n’ubukene ntibuharangwa. Ibi bikaba bishimangira uruhare ndakuka rw’umugore mu iterambere ry’imiryango yacu, Imidugudu ndetse n’Akarere kacu.”

Dr Uwamariya, yasabye abagore bamaze kugira icyo bageraho kwegera bagenzi babo nabo bakabafasha kwiteza imbere.

Yabasabye kandi kurangwa n’isuku no kuyishishikariza abandi ndetse no kwirinda amakimbirane mu miryango ariko nanone bakarushaho kwagura ibikorwa byabo hagamijwe iterambere ryabo n’iry’Igihugu.

Urubyiruko rugera kuri 400 nirwo rwahawe serivisi yo kwifotoza

Iri murikabikorwa ryatangiye kuwa 08 risozwa kuwa 10 Gicurasi 2024 ryitabirwa n’abamurika 63 mu bikorwa ahanini bijyanye no kongerera umusaruro ukomoka ku buhinzi no gukora ubuhinzi bw’umwuga kandi butangiza ibidukikije.

Nk’Akarere bahisemo kuzana serivisi y’irangamimerere mu imurikabikorwa hagamijwe gufasha urubyiruko rugeze igihe cyo gufata indangamuntu kwifotoza ndetse no gutanga izakozwe zitarabona ba nyirazo.

Umuyobozi w’Akarere ka Kayonza, Nyemazi John Bosco, avuga ko imurikabikorwa ari umwanya wo kugaragariza abaturage serivisi babaha no kuzibegereza by’umwihariko iz’ubutaka n’izirangamimerere hagamijwe gufasha urubyiruko kubona indangamuntu bijyanye n’amatora yitegurwa.

Ati: “Serivisi z’irangamimerere dusanzwe tuzitanga ku Mirenge buri munsi ku baturage bose ariko nanone kuba hari urubyiruko rwinshi rugejeje igihe cyo gufata indangamuntu kandi tugana mu gihe cy’amatora, ntirukwiye kubura ayo mahirwe kubera kutagira ibyangombwa, mu imurikabikorwa 400 babashije kwifotoza kugira ngo babone indangamuntu.”

Kayonza yeramo ibitoki byinshi hakenewe ko byongererwa agaciro

Nyemazi, asaba abaturage gushyira imbaraga mu buhinzi butangiza ibidukikije hagamijwe kuburinda kujyanwa n’isuri no kongera umusaruro ariko no gushyira inka mu kiraro hakaboneka umusaruro w’ubuhinzi n’umukamo w’amata.

Umuyobozi w’Ihuriro ry’abafatanyabikorwa mu iterambere ry’Akarere ka Kayonza, Pasitori Gahigana Sam, avuga ko kuritegura biba bigamije gufasha Akarere gutera imbere ariko bahereye ku muturage ari nayo mpamvu abamurika benshi ari abafite ikoranabuhanga mu buhinzi n’abongerera agaciro umusaruro ubukomokaho.

Yagize ati: “Ntacyashoboka hatari ubufatanye hagati y’ubuyobozi bw’Akarere n’abafatanyabikorwa mu iterambere ry’Akarere. Ikindi ni ukugira ngo abaturage bacu bamenye ibibakorerwa kuko hari ibikorwa by’ubuhinzi n’ubworozi bigamije kubateza imbere.”

Hamuritswe ikoranabuhanga mu kuhira imyaka mu buryo bwikora hifashishijwe imirasire y’izuba

Umwe mu bamuritse ibikorwa, Jean Marie Habimana, wo mu mushinga ufasha mu burezi bw’abana n’abakuru batazi gusoma no kwandika, Ready for Reading, avuga ko iri murikabikorwa yaryungukiyemo byinshi cyane ibijyanye no gukora imfashanyigisho mu burezi bw’abana bato.

Agira ati: “Nk’ubu twe twakoraga ibikinisho bikozwe mu mpapuro ku bana b’incuke (Pre-Primary) ariko hari umufatanyabikorwa twabonye ukora imfashanyigisho mu makarito aho bashobora gukora indebakure (Binocular) ku buryo umwana udafite ubushobozi buyigura akareba uko ikorwa, uko batondekanya indorerwamo akareba ikintu kiri kure cyane.”

Ikindi ni uko ngo bishoboka ko abantu bakwikorera ibitabo by’abana biga mu marerero (ECD’s) hifashishijwe amakarito akandikaho inyuguti nini kuko n’ubusanzwe ibitabo bisanzwe byabagenewe ari bicye cyane.

Mu bindi yungutse ngo hari abafatanyabikorwa yabonye bafite umushinga wo kwigisha ibijyanye na Robot mu buryo butandukanye ku buryo bakora porogaramu yo kuhira imyaka mu buryo bwikoresha, kumenya ubuhehere bw’ubutaka n’ibindi bishobora kuzaba igisubizo ku bahinzi guhinga badategereje imvura.

Ibitabo by’abana b’incuke biracyari bikeya hakenewe ko abantu biga ubundi buryo haboneka izindi mfashanyigisho bikoreye mu bikarito

Nyiramafayida yiyubakiye inzu abikesha inkunga y’ingoboka ahabwa na Leta

Avuga yari abayeho nabi aba mu gikoni ndetse atagira n’umwambaro ariko nyuma yo gushyirwa muri gahunda ya VUP agahabwa inkunga y’ingoboka ingana n’amafaranga y’u Rwanda 7,500 ku kwezi yabashije kwiyubakira inzu yo kubamo, ubwiherero ndetse akaba afite n’amatungo magufi.

Avuga ko kugirango ibi abashe kubigeraho byaturutse ku kugana amatsinda yo kubitsa no kugurizanya akizigamira amafaranga ajyanye n’ubushobozi bwe.

Ati: “Nubatse inzu n’ubwiherero, ubu mfite ihene kandi ndarya nkanywa ndetse nkigurira imyambaro. Mbikesha amatsinda nizigamiramo ayo mbonye nka 500 ku kwezi, twagabana nkabona nka 30,000 cyangwa 40,000 niho nakuye ayo kubaka no kugura amatungo.”

Nyiramafayida avuga ko uretse kwizigamira mu matsinda yo kubitsa no kugurizanya ngo yanizigamiye 15,000 muri Ejo Heza.

Avuga ko nyuma yo kwiyubakira inzu ngo arateganya kuyishyiramo isima. Agira inama abandi bahabwa inkunga y’ingoboka kugana amatsinda bakizigamira aho kuyangiza bayashora mu bindi bitabateza imbere.

Agira ati: “Nabagira inama yo kureka kwangiza amafaranga Perezida wacu aduha kugira ngo twiteze imbere, bakagana amatsinda kuko yabafasha kongera iriya nkunga.”

Uyu mukecuru avuga ko uretse kuba abona inyungu mu kugana amatsinda yo kubitsa no kugurizanya ngo byanamufashije kuva mu bwigunge kuko ahura na bagenzi be mugihe ubusanzwe yibana mu nzu wenyine.

Uwitwa Bagwaneza Lucia, nawe avuga ko yaryaga rimwe ku munsi n’abana be batiga neza ariko nyuma yo gushyirwa muri gahunda ya VUP akora imirimo ahemberwa ubu ngo yabashije kugura imirima ahinga, inzu yo kubamo ndetse agura n’amatungo byose abikesha amatsinda yo kwizigamira.

Yagize ati: “Perezida wa Repubulika yo kabaho yo kabyara yaduhaye imirimo ya VUP sinkirya rimwe, nigisha abana, naguze ihene n’imirima yo guhinga ndetse nubaka n’inzu iyi ureba yari ibyondo itagira inzugi.”

Avuga ko amafaranga yagabanaga mu matsinda ngo yabanje kuyakodesha imirima arayihinga imyaka ivuyemo arayigurisha abona amafaranga atubutse ku buryo ubu we asigaye yikorera mu mirima ye VUP ayiharira abandi.

Umurenge wa Munyiginya nk’Umurenge ukennye kurusha iyindi mu Karere ka Rwamagana ni umwe mu yatangirijwemo gahunda zo gufasha abaturage kwikura mu bukene binyuze muri VUP mu mwaka wa 2009.

Akarere ka Rwamagana muri rusange kakaba gafite abafatanyabikorwa ba VUP, 3124.

Uko ari bane (4), batatu ni abo mu Karere ka Kayonza naho umwe (1) akaba uwo mu Karere ka Gatsibo.

Tariki ya 30 Mata, umwana witwa, Ingeri Mpambara Aviella, w’imyaka ibiri (2) y’amavuko yaguye mu kinogo gifata amazi mu Murenge wa Gahini, Akagari ka Gahini, Umudugudu wa Nyamiyaga.

Uyu ubusanzwe umuryango we utuye I Musanze ariko bakaba baraje gusura mubyara wa nyina ari naho yapfiriye.

Tariki ya 01 Gicurasi, umwarimu witwa Mayanjya Kiiza Ashraf w’imyaka 26 y’amavuko akaba yigishaga mu ishuri rya TVET Kayonza, ahagana saa kumi n’imwe z’umugoroba yarohamye mu kiyaga cya Muhazi.

Mwarimu ngo yajyanye na mukuru we kuri Jambo beach barasangira ariko ngo ajya koga mu kiyaga kuko ngo yari asanzwe abizi ku bw’ibyago ararohama, umurambo we ukaba wabonetse kuri uyu wa gatatu tariki ya 02 Gicurasi.

Kuri iyi tariki nanone, uwitwa Mutoni Peace, w’imyaka 18 y’amavuko, wari usanganywe uburwayi bw’igicuri yagiye kuvoma ku kidendezi cy’amazi (Valley dam) agwamo.

Byabereye mu Murenge wa Murundi, Akagari ka Buhabwa, ahagana saa munani z’amanywa.

Umwana witwa, Adusabe Iganze Regis, w’imyaka ine (4), wo mu Murenge wa Murambi, Akagari ka Murambi, Umudugudu wa Mataba, yarohamye muri barrage akina umupira ahita yitaba Imana.

Umurambo we wahise utwarwa mu bitaro bya Kiziguro kugira ngo ukorerwe isuzumwa.

Umuvugizi wa Polisi mu Ntara y’Iburasirazuba, SP Hamdun Twizeyimana, yasabye abaturage kujya bibuka gutwikira cyangwa kuzitira ibyobo bifata amazi kugira ngo hirindwe ko hari umuntu wagwamo.

Yasabye kandi ababyeyi kuba hafi y’abana babo aho bakinira ku buryo atamara umwanya atazi aho umwana aherereye kugira ngo hirindwe impanuka yahura nayo.

Naho ku boga bishimisha basabwe kogera ahantu hemewe kandi hari abafite ubumenyi mu koga ku buryo babafasha mu gihe bagize ikibazo no kwambara umwambaro wagenewe aboga (Life jacket).

Yagize ati “Aboga bishimisha bakwiye kongera ahantu hemewe kandi hari abantu babihuguriwe ku buryo babafasha mu gihe bagize ikibazo ariko bakagira n’umuco wo koga bambaye Life jacket.”

Umukecuru Nyiramyandagaro Perpetue w’imyaka 82 y’amavuko akaba yari inshuti ya nyakwigendera, avuga ko mu gitondo ku cyumweru yabyutse amushyiriye ibishishwa agaburira ihene ze, ariko nyuma yo kumuhamagara inshuro nyinshi atitaba, yigira inama yo gusunika urugi, ageze mu cyumba cy’uruganiriro asanga abicanyi ari ho bamutsinze.

Uyu mukecuru uvuga ko yatunguwe n’ibyabaye kuko bari birirwanye mu murima wa nyakwigendera yaje kumuha umubyizi, ni na we wahuruje abaturanyi.

Yagize ati “Nasanganiwe n’umurambo we uri hafi n’umuryango, ndiruka mpamagara umuturanyi we azana n’umugore we ariko mbwiye umugabo ngo amfashe tumukure mu nzira aransubiza ngo kumukoraho ni ikizira. Abantu benshi bahise baza, bahamagara abayobozi baraza.”

Abayobozi bifatanyije n’abaturage mu mugoroba wo kwibuka nyakwigendera

Nyamara nubwo Kantarama yishwe urupfu rubi, ngo yabaniraga neza buri wese guhera ku mukuru, harimo abo yahaye imbabazi ku byaha bya Jenoside bamukoreye, kugera ku bana bato kuko ngo ntawe atasangiraga na we icyo bamusanganye.

Uwambayinzobe Providence avuga ko nk’uko batojwe kubabarira, nyakwigendera na we yabikoze ndetse aturana n’abo yahaye imbabazi kandi abagaragariza urukundo hejuru ya byose akaba yari umukirisitu ukomeye wizeraga Imana.

Ati “Yari umubyeyi ukunda Imana w’umukirisitu wabanaga neza na buri wese uhereye ku mukuru kugeza ku mutoya. Twatojwe kubabarira no kubana mu bumwe n’ubwiyunge. Yari atuye ahantu yakorewe Jenoside gusa mu bo yahaye imbabazi hari abatamubaniraga neza.”

Umukuru w’Umudugudu wa Kumunini, Mutesi Anastasie, avuga ko nubwo nyakwigendera yabaniraga neza buri wese ariko hari abantu bajyaga bamukorera ibikorwa by’itoteza aho bajyaga bica amatungo ye ndetse ngo hari n’iryo bashyizeho umusaraba, kurandurirwa imyaka no kuyonesha akabyereka ubuyobozi ariko nanone ngo akarenzaho ijambo ryo kubabarira uwabikoze nubwo yabaga atamubonye.

Uretse n’ibi ariko ngo hari hashize umwaka hari uwamuteguje ko azamugirira nabi nyuma yo kumufata yamwibye nubwo yari yamuhaye imbabazi.

Agira ati “Hari igihe yabaga adahari bakamwicira amatungo akabivuga ariko ati ubwo ni sekibi uba waje reka tubyereke Yezu, kumwoneshereza cyangwa umuntu akamugira mu murima akamwangiriza, bakamwiba uwabikoze ugasanga amurwaye inzika ndetse hari n’uwamubwiye ko azamukorera ikintu kizamubabaza.”

Bayingana Aimable uhagarariye umuryango wa nyakwigendera, mu mugoroba wo kumwibuka, yavuze ko bigayitse cyane kuba amatungo abana ntiyicane, ariko byagera ku bantu bafite ubwenge bakaba ari bo babikora.

Bayingana avuga ko abantu bakwiye kwirinda umuvumo w’ubwicanyi

Yasabye abantu kwirinda ubugome bakabana neza kuko ari byo byafasha umuryango nyarwanda.

Ati “Mutekereze ukuntu uyu muvumo abantu bawikuraho, ese uyu musozi wa Gakoni wuzuyeho ibivume, si izina ryiza kuri uyu musozi kandi si n’ubwa mbere. Iyo mivumo rero mwikururira namwe izabageraho, niba hari uwibaza ngo ntazwi, Imana iramureba. Ntabwo wakwica umuntu ngo birangirire aho nubwo waba uzi ko wihishe.”

Umuyobozi w’Akarere ka Gatsibo, Gasana Richard, avuga ko muri rusange kurinda umutekano w’abaturage ari ihame ku nzego zose ariko nanone ngo hari umwihariko ku bakecuru barokotse Jenoside yakorewe Abatutsi, incike za Jenoside n’abandi ku buryo bakorana na IBUKA kugira ngo babone abo babana na bo mu miryango.

Kuri nyakwigendera na we ngo yabanaga n’umwuzukuru ariko mu gihe umwuzukuru yari yagiye gusura iwabo akaba aribwo abicanyi bitwikiriye ijoro mu mvura, bahitana ubuzima bwe.