Abatuye mu gece icyo kigo giherereyemo bavuga ko abashinzwe imiyitwarire y’abanyeshuri (Animateur na Animatrice), bahise batabwa muri yombi, uwo munyeshuri w’imyaka 20 agahita ajyanwa kwa muganga kugira ngo yitabweho.

Mu kiganiro BURAKEYE cya KT Radio, Umuyobozi w’ishuri Kibisabo TSS, Ntamugabumwe Faustin, yemeje aya makuru, ati: “Ni byo koko, uyu munyeshuri wari mu wa 6 wisumbuye, mu Ishami ry’ubuvuzi bw’amatungo, yararaga hejuru ku gitanda kigerekeranye, nta na rimwe yagaragaweho ikimenyetso cy’uburwayi cyangwa utwite, bavuye muri etude (mu gusubiramo amasomo), bagenzi be bahuruje bavuga ko uwo mukobwa ari gutaka cyane kubera imihango”.

Ntamugabumwe akomeza agira ati: “Muganga ahageze azi ko agiye kumujyana kwa muganga bisanzwe, asanga amaraso menshi ndetse duhita tubona indobo mu bukarabiro, yarimo uruhinja atwikirizaho imyenda, ariko mu kurukangura basanga rwapfuye. Muganga yihutiye gutabara uwo munyeshuri kuko yari afite ikibazo cy’ingobyi ya nyuma yari itarasohoka, bamufasha kuyikuramo maze ajyanwa kwitabwaho ku Kigo Nderabuzima cya Birembo, uruhinja rujyanwa mu buruhukiro”.

Uyu munyeshuri bivugwa ko yakuyemo inda, akomoka mu Murenge wa Shyira, Akagari ka Mutanda.

Uyu muyobozi ahamya ko batunguwe no gusanga atwite, kuko atigeze akorora, nta gicurane cyangwa ubundi burwayi, ndetse ko n’ababyeyi be ubwo bari bamaze kubimenyeshwa batunguwe, cyane ko ubwo yari mu biruhuko by’igihembwe cya mbere nta wamenye ko atwite, gusa bihutiye kuza kumurwaza aho ari kwa muganga.

Ibisa nk’ibi byabereye kandi mu ishuri ryisumbuye rya G.S Camp Kigali riherereye mu Karere ka Nyarugenge, aho umunyeshuri w’imyaka 16 wigaga mu mwaka wa kane w’amashuri yisumbuye (S4 HGL) abyariye mu kigo cy’ishuri nta n’umwe wari warigeze abikeka mu kigo cyangwa ababyeyi be.

Mu butumwa bw’uyu muyobozi, yagaragaje ko hari ingamba bagiye gufata zirebana no gukurikirana ubuzima bw’abanyeshuri. Ati: “Tugiye gufata ingamba zo gukurikirana umunota ku munota nibiba ngombwa tujye tubapimisha inda bagitangira igihembwe, kugira ngo tumenye ubuzima bwabo”.

Imibare y’Ikigo cy’Igihugu Gishinzwe Ibarurishamibare (NISR), mu bushakashatsi bwa DHS 7 buheruka bwerekanye ko mu mashuri yisumbuye, abangavu 4% baterwa inda.

Abana bibutse bagenzi babo bazize Jenoside

Ni mu rwego rwo guha agaciro no gusubiza icyubahiro abana n’impinja bazize Jenoside yakorewe Abatutsi mu 1994, ahatangwa ubutumwa butandukanye bujyanye n’ikigero cy’abana.

Mu Karere ka Nyabihu mu Ntara y’Iburengerazuba, ni ho icyo gikorwa kimaze iminsi itanu gikorerwa mu mashuri yose uko ari 115 agize ako karere, arimo ay’inshuke, abanza n’amashuri yisumbuye arimo ay’imyuga n’ubumenyingiro.

Ndayisaba Fabrice usanzwe uzwi mu bikorwa byo kwita ku bana bahuye n’ibibazo bitandukanye, akaba ari na we wateguye icyo gikorwa, aganira na Kigali Today yavuze ko nk’umufatanyabikorwa w’Akarere ka Nyabihu, yagiye agaragara kenshi mu bikorwa by’akarere birimo no kwibuka Jenoside yakorewe Abatutsi, akorwa ku mutima n’ubuhamya bwagiye butangirwa mu gikorwa cyo kwibuka, bituma atekereza ku bana n’impinja nk’umuntu usanzwe afasha icyo kiciro.

Ati ‟Nabonaga ko Nyabihu iri mu turere twacuriwemo umugambi wa Jenoside, nk’umufatanyabikorwa nsanga hari umusanzu ngomba gutanga. Binyuze mu mateka nagendaga numva mu buhamya bwatangwaga, nasanze nk’ahantu hacuriwe umugambi wa Jenoside ngomba kugira umusanzu ntanga”.

Arongera ati ‟Ndavuga nti ni uwuhe musanzu natanga mu gutuma abana b’aha hantu hacuriwe ingengabitekerezo ya Jenoside, bakurana umuco w’ubumuntu, umuco w’imitekerereze n’imyumvire myiza, bakure bafite umuco utarangwamo ingengabitekerezo ya Jenoside”.

Abana bahabwa ubutumwa bujyanye n’ikigero barimo

Uburyo kwibuka abana n’impinja bitegurwa, bitandukanye n’ubusanzwe, aho mu minsi itanu abana batangira amasomo bamaze kugezwaho ubutumwa butandukanye, bujyanye no kwibuka abana n’impinja bishwe muri Jenoside, nk’uko Ndayisaba abivuga.

Ati ‟Ni ubutumwa ntegura nkabugeza ku buyobozi bw’akarere ndetse n’ubwa Ibuka mu karere, bakareba ko hari ibyakosorwa n’ibyakongerwamo. Buri gitondo mu bigo byose by’amashuri ku isaha imwe, abana bose bahurizwa hamwe mbere yo kwinjira mu ishuri, bagafata umunota wo kwibuka noneho umwana umwe akabusomera bagenzi be, nyuma yaho bugashimangirwa n’umuyobozi w’ishuri noneho abana bagahabwa umwanya wo kubaza ibyo badasobanukiwe”.

Arongera ati ‟Muri uko kwibuka kandi habaho n’umwanya w’udukino dutandukanye dufasha kuzirikana no gusubiza agaciro n’icyubahiro abana bose bishwe, utwo dukino duhita twisanisha n’utwo abana bishwe bakundaga gukina, abana bagakina bisanisha na bo”.

Kwibuka abana n’impinja bazize Jenoside, ni igikorwa cyakiriwe neza n’ubuyobozi bw’Akarere ka Nyabihu, ubwa Ibuka n’ubw’ibigo by’amashuri aho basabye ko cyakwaguka kikagera mu gihugu hose.

Abanyeshuri babanza gufata umunota wo kwibuka

Nishimwe Samuel, Umuyobozi wa Ibuka mu Karere ka Nyabihu ati ‟Kwibuka abana n’impinja ni igikorwa cy’ingirakamaro, kuko inshuro ebyiri kibaye byatumye abana barushaho kumenya amateka, bumva ko ari n’inshingano zabo zo kuzirikana no kwibuka bagenzi babo bazize Jenoside yakorewe Abatutsi”.

Yavuze ko nk’uko bakomeje kubisabwa n’abarezi, ko icyo gikorwa gikwiye kugera hose mu gihugu kuko basanze ari ingirakamaro ku bana, ashimira Ndayisaba Fabrice ku gitekerezo cyiza yagize cyo gutegura icyo gikorwa.

Umuyobozi w’Akarere ka Nyabihu, Mukandayisenga Antoinette, yatanze ubutumwa butandukanye ku byaranze icyo gikorwa.

Ati ‟Ndayisaba warakoze cyane mu gutegura iki gikorwa, kandi turagushimira cyane umusanzu utanga mu kubaka Igihugu cyacu, by’umwihariko twibuka impinja n’abana bishwe muri Jenoside yakorewe Abatutsi. Ni amateka abana, abanyeshuri bagomba kumenya neza, bakayasobanukirwa twese tubigizemo uruhare. Dukomeze Twibuke Twiyubaka”.

Ndayisaba Fabrice wavuze ko icyo gikorwa cyabaye n’ubushakashatsi bwo kumenya imitekerereze n’imyumvire y’abana kuri Jenoside yakorewe Abatutsi hagendewe ku bibazo bagiye babaza.

Asaba Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), ubufasha kugira ngo icyo gikorwa kigere mu gihugu hose, nk’uko byagaragajwe mu byifuzo bya benshi mu bacyitabiriye, barimo abayobozi b’ibigo by’amashuri n’Abanyamabanga Nshingwabikorwa b’Imirenge.

Ndayisaba Fabrice wateguye igikorwa cyo kwibuka abana n’impinja bazize Jenoside

Ndayisaba ni inshuti y’abana

Abitabiriye ibiganiro bya BNR

Ni ubutumwa bwagarutsweho mu Karere ka Nyabihu kuwa gatanu tariki 20 Kamena 2025, mu gutangiza ku mugaragaro Umushinga ugamije gukangurira abagore kwitabira iryo koranabuhanga, igikorwa cyateguwe na Banki Nkuru y’u Rwanda (BNR).

Akarere ka Nyabihu, ahanini kagizwe n’igice cy’imisozi miremire y’icyaro, aho bamwe mu bagore, bavuga ko bakunze kugorwa no kwitabira gukoresha ikoranabuhanga rya telefoni muri serivisi z’imari, ahanini biturutse ku bumenyi bucye barifiteho, bikabatakariza amahirwe muri serivisi zimwe na zimwe.

Mukanema wo mu Murenge wa Jomba agira ati: “Turacyagira umuco wo kumva ko ifaranga ryose ryinjiye mu rugo yaba mu buryo busanzwe cyangwa ubw’ikoranabuhanga, rireba umugabo wenyine”.

Umuyobozi wungirije wa Banki Nkuru y’u Rwanda Dr Nsengiyumva Justin yagaragaje ko abagore basaga ibihumbi 35 bo mu Turere dutandatu two mu gihugu, harimo abo mu Karere ka Rulindo, Ngoma, Gakenke, Nyamashe, Nyamagabe na Nyabihu ari bo bamaze kugerwaho n’ubukangurambaga bugamije kubashishikariza kwitabira gukoresha Ikoranabuhanga ryifashisha telefoni muri serivisi z’imari, kandi iyi gahunda izakomereza no mu tundi Turere twose tw’igihugu.

Yagize ati: “Mu cyerekezo igihugu kiganamo cya 2050, Banki Nkuru y’u Rwanda ntishishikajwe gusa no kuzigamira ibigo n’ama banki byo mu gihugu byonyine ngo isige inyuma abaturage b’igihugu. Twatekereje kwibanda ku bagore, kuko inyigo twakoze, zagaragaje ko abagore batitabira gukoresha serivisi z’ikoranabuhanga uko bikwiye”
Ubushakashatsi bwa Banki Nkuru y’u Rwanda, bugaragaza ko ubwitabire bw’abagore mu gukoresha ikoranabuhanga rya telefoni muri serivisi z’imari uhereye ku bafite imyaka 16 kuzamura, bukiri ku kigero cya 72% ugereranyije n’abagabo bo bari ku bwitabire buri hejuru ya 80%.

Mu Karere ka Nyabihu habarurwa abagera ku 8% bataritabira gukoresha uburyo ubwo aribwo bwose bwa serivisi z’imari, naho abangana na 5% bo bakoresha serivisi z’imari mu buryo butagenzurwa cyane cyane nko guhererekanya imari binyuze mu bimina bibumbiyemo.

Abagore bakomeje kugerwaho n’ubu bukangurambaga hirya no hino, bitezweho gushishikariza bagenzi babo guhindura imyumvire, bityo bakarushaho kuryitabira.
Ubukangurambaga BNR ibuhuriyeho na za Minisiteri zitandukanye harimo Minisiteri y’Ubutegetsi bw’Igihugu (MINALOC), Minisiteri y’Uburinganire n’Iterambere ry’Umuryango(MIGEPROF) hamwe n’ibindi bigo birimo iby’itumanaho n’ibifite mu nshingano zabyo guteza imbere serivisi z’imari.

Bahawe umuceri n’ibikoresho bitandukanye nk’ubwasisi

Gutanga ubwasisi ni igikorwa ngarukamwaka, gitegurwa n’Ikigo cya Horizon SOPYRWA gishinzwe kwita ku bahinzi b’ibireti mu Rwanda, mu rwego rwo gushimira abahinzi b’ibireti no gukomeza kubaha imbaraga mu byo bakora bazamura iterambere ryabo n’iry’Igihugu.

Mu bagaragaje imbamutima z’ibyishimo nyuma yo guhabwa ubwo bwasisi, harimo uwitwa Nyirabasetsa Léonille, wavuze ko ubuhinzi bw’ibireti bukomeje kuzamura abahinzi mu iterambere.

Ati ‟Ubu ntashye nikoreye umuceri, babiri bari kugabana umufuka w’ibiro 25. Twahinze ibireti turabikorera turasarura baduha amafaranga none baduhamagaye ngo tuze baduhe n’umuceri, ku itariki umunani batubwiye ko buri wese azaba yamaze kwishyurirwa mituweli. Ubu ntiwareba ni ibyishimo gusa, ubu baduhaye n’itike ituzana n’iducyura”.

Uwo muhinzi arishimira uburyo amafaranga bahabwa ku bireti akomeje kuzamuka umunsi ku munsi, aho ikilo kigeze ku 1,260Frw, ubwo buhinzi bakaba bakomeje kubufata nka zahabu yabo, aho bakomeje kongera ubuso bahingaho icyo gihingwa gikomeje no gutuma ubutaka bwabo burumbuka.

Basanga ubuhinzi bw’ibireti buzabageza ku bukire

Abo banyamuryango 1,201 bahawe ubwasisi bugizwe n’umuceri ufite agaciro ka Miliyoni zisaga 20Frw, abanyamuryango 60 bahize abandi mu kongera umusaruro bongererwaho amahema yo kwifashisha mu gusarura ibireti, afite agaciro ka 995,200Frw, abamamazabuhinzi bahabwa inkweto za bote n’imitaka.

Ubuyobozi bwa Koperative KOAIKA, buvuga ko mu gihembwe cy’ihinga gishize bazamuye umuzaruro barenza umuhigo, nk’uko Muzuka Aloys, Umuyobozi wungirije w’iyo Koperative abivuga.

Ati ‟Ubwasisi twatanze bufite agaciro ka Miliyoni 24,052,000Frw, muri sezo ishize abahinzi bazamuye umusaruro mu buryo budasanzwe, aho twarengeje 100% ku muhigo twari twiyemeje. Mu mwaka ubanziriza uyu twagemuye ibireti ku ruganda rwa SOPYRWA dupimisha toni 545, ariko ubu twapimishije toni 728”.

Arongera ati ‟Abahinzi barishimye cyane kuba barinjiye mu gikorwa cy’indashyikirwa, kandi batahanye umuhigo wo kuzarenza ku mafaranga bagezeho muri sezo ihise. Turashimira ubuyobozi bw’Igihugu cyacu bukomeje kutuba hafi, tunashishikariza abahinzi gukomeza guhinga ingemwe zizewe, zitanga umusaruro mwinshi”.

Biyemeje kuzamura umusaruro w’ibireti

Amwe mu mahirwe abahinzi b’ibireti babona asumba ay’abahinga ibindi bihingwa, ngo ni uko Koperative zabo zibishingira muri SACCO ikabaha amafaranga yo kwifashisha mu gihe batareza, bikabafasha gukomeza kwita ku bihingwa byabo no guteza imbere ingo zabo bakora imishinga itandukanye.

Mu ihuriro ry’Amakoperative ahinga ibireti mu Rwanda, KOAIKA yakunze kuza ku isonga mu kugira umusaruro mu bwinshi no mu bwiza bwawo.

Intara y’Iburengerazuba, ihingwamo ibireti ku buso butari munsi ya hegitari 1500. Umwaka w’ubuhinzi wabanjirije uyu ushize, abibumbiye muri KOAIKA bejeje toni 545 z’ibireti, ubu bakaba bararengeje intego bari bihaye yo kweza toni 600, beza toni 728.

Barishimira ubwasisi bahawe

Umusaruro w’ibireti ukomeje kwiyongera

Ubwo Minisitiri Biruta yatangizaga iyubakwa ry’icyo kigombonezamikurire

Ni ikigo kizubakwa mu bikorwa bihuriweho n’inzego z’umutekano, mu gufasha abaturage kugira imibereho myiza n’iterambere, mu gihe u Rwanda rugiye kwizihiza imyaka 31 rwibohoye n’imyaka 25 Polisi y’u Rwanda ikorana n’abaturage.

Minisitiri Biruta avuga ko ibikorwa bihuriweho na Polisi n’Ingabo z’u Rwanda, bigira uruhare mu guteza imbere abaturage.

Agira ati "Buri mwaka Polisi igira ukwezi kwahariwe ibikorwa, ikora mu gufasha abaturage kwiteza imbere no kugira imibereho myiza.

Umwaka ushize bashyizeho ubufatanye bw’amezi atatu, hakozwe ibikorwa byinshi birimo kubaka imihanda n’ibiraro byangijwe n’Ibiza. Hubatswe amashuri, hakorwa ibikorwa by’ubuvuzi, hatanzwe amatungo n’ibindi bikorwa bifasha abaturage kugira ubuzima bwiza no kwihuta mu iterambere."

Uko iyo nyubako izaba imeze niyuzura

Akomeza avuga ko umutekano, iterambere n’imibereho myiza bigendana, kandi kimwe kibuze ibindi bitagerwaho.

Ati "Ndibutsa ko umutekano, iterambere n’imibereho myiza bihuriye hamwe, umutekano ubwawo tuwukeneye gufasha kugera ku iterambere n’imibereho myiza y’abaturage. Byose birajyana kandi biri mu nshingano z’inzego z’umutekano. Turizihiza imyaka 31 yo kwibohora n’imyaka 25 Polisi itangiye gukorana n’abaturage. Turiyibutsa akamaro k’umutekano n’iterambere rigezweho."

Minisitiri Biruta avuga ko umutekano udashoboka abaturage batabigizemo uruhare, abasaba gukemura ibibazo biri mu miryango.

Ati "Ibyaha biboneka bifitanye isano n’ubuzererezi bw’abana bata ishuri, bakajya mu muhanda bitewe n’amakimbirane mu muryango, na yo aterwa n’ubusinzi n’ibiyobyabwenge. Dufite uruhare mu gukemura ibibazo biboneka mu muryango, abaturage mu mudugudu bazi ingo zifite amakimbirane, nibabaganirize bitarafata igihe kirekire. Dukwiye gukurikirana ibibazo mu miryango ndetse tugashaka igisubizo kirambye."

Imirimo yahise ikomeza

Ikigo mbonezamikurire kigiye kubakwa mu Murenge wa Shyira mu Karere ka Nyabihu, kizuzura gitwaye Miliyoni 30Frw, kikazajya cyakira abana bari basanzwe bakirwa mu ngo z’abaturage. Ababyeyi bavuga ko bazabyishimira, kuko hari abatinyaga kubajyana mu ngo z’abaturanyi.

Umwe mu baturage wavuganye na Kigali Today yagize ati "Hari igihe umuturage wakira abana mugirana amakimbirane bigatuma utajyanayo umwana wawe, kandi utamujyanyeyo hari ibyo ahomba."

Ibikorwa bya Polisi y’u Rwanda n’Ingabo z’Igihugu byatangijwe, bizatahwa tariki 4 Nyakanga 2025, ubwo u Rwanda ruzizihiza umunsi wo Kwibohora.

Ubushakashatsi buheruka bwagaragaje uko ikibazo cy’igwingira giteye mu Ntara y’Uburengerazuba

Umurenge wa Jenda uri mu Mirenge ifite umubare munini w’abana bafite igwingira n’imirire mibi, kuko bagera kuri 542 mu Karere ka Nyabihu, mu gihe bamwe mu babyeyi baza imbere kubera imyumvire ikiri hasi mu kwita ku nshingano nk’ababyeyi.

Ikibazo cy’igwingira giteje inkeke nk’uko bigaragara mu bushakashatsi ku buzima n’imibereho y’abaturage DHS, bugaragaza ko mu Karere ka Nyabihu ibipimo by’igwingira mu bana byavuye kuri 59% mu mwaka wa 2015, bigera kuri 46,7% mu mwaka wa 2020 mu gihe ubwasohotse muri Kamena 2023, bwo bwagaragaje ko aka Karere kageze ku gipimo cya 34,2% by’abana bagwingiye.

Mu baganiriye na KigaliToday, bagaragaza ko bababazwa no kuba bahora baza imbere mu kugira abana bafite imirire mibi.

Mupenzi Theogene, umwe mu baturage batuye muri uyu Murenge, avuga ko rimwe na rimwe kutumvikana mu ngo biri mu bitera iki kibazo.

Ati: “Akenshi usanga imiryango yisanga mu makimbirane, nk’abagabo iyo habaye ibibazo mu rugo twigira mu kabari kuyanywera izindi nshingano cyane cyane ku mirire n’imikurire y’abana tukabiharira abagore. Ikindi kibitera kandi, ni ubujiji aho usanga dufite ubumenyi budahagije ngo duhe n’agaciro abana bacu, kuko iyo urebye inaha tureza ariko kumva ko indyo yuzuye itegurwa n’umukire bikatudindiza, ariko ubu tubonye amakuru tugiye gukaza ingamba turandure igwingira”.

Uwamahoro Emmanuel utuye mu kagari ka Bukinanyana, we yagize ati: “Igwingira rituruka ku kutita ku bintu kuko ni kenshi tubona inyigisho zisobanura uburyo umugore akwiye kwitwara kuva asamye kugeza umwana agize imyaka ibiri. Bamwe rero bumva ko gutegura indyo yuzuye bikorwa n’abakize hatabariwemo abahinzi cyangwa abakora bubyizi”.

Visi Meya ushinzwe imibereho myiza mu karere ka Nyabihu, Simpenzwe Pascal

Abagore muri uyu Murenge bo bagaruka ku kuba abagabo babo babatererana nabyo bikaza mu bizamura umubare w’abana bagwingiye.

Umwe muri bo yagize ati: “Hari ubwo urugo ruba rudafatanya kandi nyamara rutifashije, aho umugabo akorera 1500Frw akanywa ntiyite ku guhaha mu gihe umugore ayo yakoreye ajya guhahamo ibitunga urugo ariko ntiyibuke kureba niba ifunguro ateguye ryuzuye, kubera amakimbirane aza hagati y’ababyeyi bityo buri wese akihugiraho ntibite ku bana”.

Ntagisanimana Aline wo mu Kagari ka Rega, agaragaza ko hari n’ababyeyi bagira uruhare mu igwingira ry’abana bitewe no kudashyira hamwe.

Ati “Umugore hari ubwo abigiramo uruhare iyo asamye ntatangire kwiyitaho. Hari kandi kudashyira hamwe k’umugore n’umugabo, bigatuma umugore ahangayikishwa n’imibare yo kugabamo ya mafaranga 1500 yakoreye mo ubukode, imyambaro, amafunguro, ibyo byose bituma adatekereza ku bigize indyo yuzuye kubera kugira ibibazo byinshi atabasha gukemura wenyine”.

Umuyobozi wungirije w’Akarere ka Nyabihu, ushinzwe imibereho myiza y’abaturage, Simpenzwe Pascal, avuga ko Umurenge wa Jenda wonyine wihariye abana 542 bafite igwingira, ndetse bashyizeho ingamba zigamije kurirandura ndetse no kurikumira.

Zimwe mu ngamba Akarere gafite zirimo kongera ubukangurambaga busobanura uko indyo yuzuye itegurwa, bugamije guhindura imyumvire y’abaturage, kwirinda amakimbirane n’ibindi nk’uko bigarukwaho na Simpenzwe. Ati: “Turabizi ko hari ikibazo cy’ubukene ariko dufite ikibazo cy’abantu bakoresha nabi inkunga bahabwa, cyangwa bagakoresha nabi ibyo batunze cyangwa bakoreye. Iyo myumvire dukora ubukangurambaga bugamije kuyihindura kuko biri mu bituma iyi mibare ikomeza kwiyongera”.

Amon Rwasamanzi, ushinzwe imishinga mu kigo cy’Igihugu gishinzwe imikurire no kurengera umwana (NCDA), avuga ko iki kigo cyateguye ubukangurambaga mu bice bitandukanye by’Igihugu hibandwa ku duce twibasiwe cyane n’igwingira ndetse n’imirire mibi, hagamijwe ku gukaza ingamba mu kurirwanya.

Ati: “Tuzakomeza ingamba zisanzweho mu kurandura imirire mibi kuko zitanga umusaruro, gusa kuri ubu ibibazo cyangwa imbogamizi abaturage bafite, turasabwa ko tugenzura ibyo bigishwa dufatanyije n’inzego zibanze n’abandi bafatanyabikorwa”.

Amon Rwasamanzi, ushinzwe imishinga mu kigo cy’Igihugu gishinzwe imikurire no kurengera umwana (NCDA)

Imirire mibi ni ikibazo gitera ingaruka zikomeye ku buzima bw’umwana, imikurire n’ahazaza he. Imirire mibi igira ingaruka ku mikurire y’umubiri no mu bwenge, ibi bituma ifatwa nk’ikibazo gikomeye muri rusange.

N’ubwo hashyizweho ingamba zitandukanye, hari ahakigaragara imibare iri hejuru y’ahari imirire mibi n’igwingira mu bana bitewe n’impamvu zitandukanye zirimo kutagira ubumenyi ku gutegura indyo yuzuye, ibibazo by’amikoro, imyumvire no kutabona ibyo kurya bihagije birimo intungamubiri zikenewe, kugira ngo iki kibazo gikemuke, bikaba bisaba inzego zitandukanye zibifite mu nshingano hamwe n’abaturage gufatanya hagamijwe impinduka.

Ikibazo cy’imyumvire mibi n’amakimbirane mu byongera igwingira mu Karere ka Nyabihu

Ni amafaranga yishyurwa umushongi w’ibireti umaze gukundwa cyane, aho ubushakashatsi bw’ibigo bigurira u Rwanda ibireti bwamaze kwemeza ko uwo mushongi w’ibireti by’u Rwanda ari wo wa mbere ku rwego rw’Isi mu bwiza.

Ni ibyagarutsweho na Bizimungu Gabriel, Umuyobozi mukuru wa HORIZON SOPYRWA, ikigo gishinzwe kwita ku buhinzi bw’ibireti mu Rwanda, ari na cyo kigenzura n’uruganda rwa SOPYRWA rutunganya ibireti rufite ubushobozi bwo kwakira toni 3,000 ku mwaka.

Nyabihu ni ko Karere ka mbere mu Gihugu gakungahaye ku gihingwa cy’ibireti

Yabitangarije mu gikorwa cyo guhemba abahinzi b’ibireti babaye indashyikirwa mu Ntara y’Iburengerazuba cyabereye mu Murenge wa Kabatwa mu Karere ka Nyabihu ku wa Kane tariki 17 Ukwakira 2024, hahembwa abahinzi barenga 300 bagemuye umusaruro mwinshi kandi mwiza ku ruganda rwa SOPYRWA.

Yagize ati «Ibireti ni igihingwa SOPYRWA yishyura abaturage ku musaruro wabo amafaranga agera kuri Miliyari ebyiri na Miliyoni 300 buri mwaka, noheho iyo uruganda rutunganyije umushongi tukawugurisha hanze, winjiza mu Gihugu Miliyoni 10 z’Amadolari, ariko intego ni ukugera kuri Miliyoni 15 z’Amadolari.»

Umusaruro w’ibuhinzi bw’ibireti ukomeje kwiyongera aho muri 2009, habonekaga umusaruro ungana na toni 300, ubu mu mwaka ushize habonetse umusaruro ungana na toni 1,634 utangwa n’abahinzi b’ibireti bagera ku bihumbi 37 bafite intego yo kweza toni 1,800 muri uyu mwaka.

Kugira ngo uruganda rwa SOPYRWA rugere ku ntego zarwo zo kwakira toni 3,000 z’ibireti buri mwaka, HORISON SOPYRWA yaguye imikorere igera no mu gihugu cya Tanzaniya, nk’uko Bizimungu abivuga.

Ibirori byitabiriwe n’abayobozi batandukanye

Ati «Ishoramari dukora mu ruganda kugira ngo umushongi wacu ube mwiza ku Isi, bituruka ku buyobozi bwiza dufite butuba hafi bukadufasha, ni na yo mpamvu ubu ngubu dufite urundi ruganda muri Tanzaniya. Abahinzi b’ibireti muri icyo gihugu bari barabuze isoko aho bashora umusaruro wabo, tubashyira uruganda. Ibyo byose ni ukubera ubuyobozi bwiza dufite bworoshya ishoramari, buyobowe na Perezida Paul Kagame.»

HORIZON SOPYRWA ifite mu nshingano kugeza imbuto y’ibireti ku bahinzi, ku bubatanye n’Ikigo cy’Igihugu gishinzwe Ubuhinzi (RAB), bakomeje gukora ubushakashatsi bw’imbuto y’ibireti byera cyane mu gihe gito, kandi bigatanga umusaruro mwinshi.

Muri uyu mwaka icyo kigo cyateguye ingengo y’imari ya Miliyoni 164Frw zizifashishwa mu kubonera abahinzi ingemwe nshya, kugira ngo umusaruro urusheho kwiyongera, abo bahinzi kandi bemererwa ifumbire y’imborera iva mu bisigazwa by’ibireti byanyujijwe mu ruganda.

Nta koperative y’abahinzi b’ibireti idafite miliyoni 100Frw kuri konti

Koperative z’abahinzi b’ibireti mu Rwanda ni umunani, zose zikaba zibumbiye mu ihuriro ryitwa Rwanda Pyrethrum Cooperative Union Rwanda.

Izo koperative zamaze kuzamura ubukungu aho zigeze ku rwego rwo kuba buri koperative izigamye byibura miliyoni zirenga 100 Frw, aho muri ubwo bwizigame ukeneye amafaranga yo gukora igikorwa runaka mu buryo butunguranye ahabwa inguzanyo, nk’uko Semajeri Joseph ukuriye iryo huriro yabitangaje.

Yagize ati «Ubuyobozi bwa SOPYRWA buratwumva cyane, aka kanya mu makoperative umunani ahinga ibireti, nta n’imwe idafite miliyoni 100 Frw kuri konti, ashira mu cyumweru bashyiramo andi, nta muntu ukigemura ibireti ngo arare atishyuwe, n’uwaraye atayabonye biba byatewe na banki, ariko ntibirenza iminsi ibiri».

Hahembwe abasaga 300

Semajeri avuga ko kuba abahinzi b’ibireti bategurirwa umunsi wo kubashimira, bibaha imbaraga zo gukora cyane. Avuga ko ubuhinzi bw’ibireti bukomeje kubateza imbere haba mu miryango yabo, haba no mu masambu akomeje kurumbuka kubera ifumbire ituruka ku bireti. Avuga ko mu mwaka wa 2000 abahinzi bezaga toni zitarenga 300, ariko ubu bakaba bageze kuri toni zikabakaba 1,700.

Mu muhango wo guhemba abo bahinzi babaye indashyikirwa witabiriwe n’abashoramari bo muri Amerika bafite isoko ry’ibireti by’u Rwanda, bashimiye abahinzi b’ibireti uko bakomeje guhiga abahinzi bose ku Isi mu kugira umusaruro mwiza.

Michael Pollock ushinzwe ibikorwa by’ubucuruzi muri sosiyete y’Abanyamerika icuruza umushongi w’ibireti, ati «Bayobozi ba SOPYRWA mwumve neza ko muri abafatanyabikorwa twizera mu bucuruzi. Hashize imyaka 10 nza gusura u Rwanda, nishimiye uburyo abaturage b’iki gihugu bagira urugwiro, bagakunda umurimo baharanira guteza Igihugu imbere none bakaba bakomeje guhiga Isi yose mu kugira umusaruro mwiza w’ibireti».

Arongera ati «Ni na yo mpamvu nazanye n’umufasha wanjye ngira ngo yirebere ibyo nakunze kumubwira ku Rwanda. Akazi mukora karakomeye cyane, byanatumye rwagura imikorere kubera uburyo twabonye muri abakozi kandi muduha umusaruro mwiza, tuzahora tubashimira bahinzi beza, tuzahora twifatanya namwe muri byose».

Mike Allen, umuyobozi w’iyo Sosiyete icuruza umushongi w’ibireti muri Amerika, we yagize ati «Uburyo mwateje imbere ubuhinzi bw’ibireti ku Isi kugeza ubwo muba indashyikirwa, ijambo rimwe mfite ryo kubabwira ni Murakoze cyane».

Ubuyobozi bw’Akarere ka Nyabihu gafite ubuso bunini buhingwaho ibireti mu Rwanda aho burenga hegitari 1500, buvuga ko ibireti ari igihingwa gikomeje kuzamura iterambere ry’abaturage aho bibaha amafaranga bikabafasha no kurinda imirima yabo, nk’uko Umuyobozi w’ako Karere wungirije ushinzwe iterambere ry’ubukungu, Habanabakize Jean Claude yabitangarije Kigali Today.

Abanyamerika batsindiye isoko ry’ibireti by’u Rwanda na bo bitabiriye igikorwa cyo guhemba abahinzi b’indashyikirwa

Ati «Ibireti ni igihingwa abaturage bahinga basimburana n’ibirayi, ugasanga birongerera abaturage amafaranga cyane ko muri aka Karere dufite ubuso bugera ku 1500 duhingaho ibireti. Ariko nanone tukabona n’umusaruro ugera kuri toni 750, by’umwihariko umusaruro mwinshi ukava muri uyu Murenge wa Kabatwa, ariko Nyabihu ikaba ari yo ifite ubuso bwinshi n’umusaruro mwinshi w’ibireti mu Rwanda, ni kimwe mu bizamura iterambere ry’abaturage».

Mu gushimira abahinzi b’ibireti ku nshuro ya cyenda babaye indashyikirwa, abo mu Ntara y’Iburengerazuba bahawe inka 39 mu gihe mu Ntara y’Amajyaruguru bahawe inka 52, ziherekezwa na matola 80, n’ibindi bikoresho bazifashisha mu buhinzi birimo amasuka, inkweto za bote, shitingi n’imitaka.

Bahawe inka 39

Perezida wa Koperative KOAIKA, Munyandekwe Jean de Dieu (wambaye ishati y’umweru) na we ari mu bahinzi babaye indashyikirwa. Arimo guhabwa inka na Bizimungu Gabriel, Umuyobozi wa HORIZON SOPYRWA

Ababaye indashyikirwa basabwe gukomeza kunoza ubuhinzi no kongera umusaruro w’ibireti

Mu bihembo bahawe harimo na matola

Basusurukijwe n’itorero rya SOPYRWA

Bishimiye inka bahawe

Bahawe n’amashitingi yo kwanikaho ibireti

Mulindwa Prosper uyobora Akarere ka Rubavu ari mu bitabiriye ibyo birori

Umwe mu bagize sosiyete igura ibireti by’u Rwanda yashimiye urugwiro yakiranwe ageze mu Rwanda

Bahembwe matola 40

Bamwe mu bo ibiza byasenyeye ntibagira aho baba

Leta yakoze ibishoboka itabara abo baturage, ibashakira aho baba bacumbitse igihe gito, ndetse ibagenera n’ibikoresho bitandukanye byo kubafasha muri iyo minsi ibiza byari bigikomeje gusenya inzu zabo, ari nako ibaha n’ibiribwa.

Umushinga urambye wari uwo kubakira abo baturage ahantu hadashyira ubuzima bwabo mu kaga, ariko bamwe baremeza ko uwo mushinga utabagezeho aho kugeza ubu hari abagicumbitse mu baturanyi, abari bafite ubushobozi bwo kwikodeshereza inzu ubwo bushobozi bubashiranye batangira gusembera.

Abenshi mu bafite icyo kibazo, ni abo mu Murenge wa Shyira mu Karere ka Nyabihu, aho ibiza byabazahaje kugeza n’ubwo bisenye n’ibiro by’Umurenge, ubu serivisi zitangwa n’Umurenge zikaba ziri gutangirwa mu nzu bakodesheje umuturage, aho abaturage bavuga ko ari hato.

Abenshi mu baturage bafite ikibazo cyo kutagira aho baba, ndetse n’abari mu cyiciro cyabashobora kwifasha, bavuga ko bari bijejwe guhabwa ibikoresho bakiyubakira, bategereza ko ayo masezerano ashyirwa mu ngiro amaso ahera mu kirere.

Ibiza byasenyeye benshi

Abo baturage bavuga ko nyuma y’ibiza babashyize mu byiciro bitatu, aho icyiciro cya mbere cyari kigizwe n’abatishoboye, abo Leta yagombaga gushakira ibibanza ikanabubakira.

Hakaba n’icyiciro cya kabiri kigizwe n’abantu bagombaga kwishakira ikibanza bakubakirwa, icyiciro cya gatatu cy’abishoboye kikaba abantu bishakira ikibanza bagahabwa ibikoresho bijyanye no kubaka, ahasigaye bakiyubakira.

Hategekimana Jean Claude umwe mubasenyewe n’ibiza, avuga ko nk’umuntu wari mu cyiciro cya gatatu wagombaga guhabwa ibikoresho akiyubakira atigeze abihabwa nk’uko yari yabisezeranyijwe, akaba akomeje gusembera.

Ati "Badutumyeho tujya ku Karere gusinyira ibyo bikoresho birimo isima, imisumari, amabati n’ibindi, turasinya noneho tugaragaza n’ibibanza tuzubakamo, hashize igihe MINEMA (Minisiteri Ishinzwe Ibikorwa by’Ubutabazi) iradusura, bareba bya bibanza byacu barabyemeza".

Intara y’Iburengerazuba iri mu zibasiwe n’ibiza

Arongera ati "Umurenge nawo waraje urabyemeza dukora n’inama, baravuga bati, ibi bibanza nta kibazo biteje ni musize mutunde amabuye mubumbe n’amatafari, igisigaye tugiye kubagezaho ibikoresho mwubake".

Uwo mugabo avuga ko bamwe mu baturage bakiriye vuba icyo cyemezo cyo kubaha ibikoresho bakubaka, batema insina batangira gusiza, nyuma basurwa na komisiyo yari iturutse mu Karere ka Nyabihu ibemerera gukomeza gusiza ibasaba ko nibahabwa ibikoresho bazubaka inzu zigezweho.

Ngo mu gihe bari bacyisuganya ngo batangire kubaka, ngo nibwo ya Komisiyo yo ku Karere yongeye kubasura irabahagarika.

Ati "Komisiyo yaje bwa mbere yemera ibyo bibanza nk’uko MINEMA yabyemeje, noneho haza indi Komisiyo ya kabiri yari iturutse ku Karere irabyanga, mu gihe tucyibaza ibiri kutubaho haza Komisiyo ya rurangiza yari iyobowe na Meya na ba Visi Meya babiri, barabyanga burundu bavuga ko ari mu gishanga ko batagomba kongera kuhatuza abaturage, bavuga ko ahubwo tugomba kujya kubaka ahandi".

Ibiza byangije imihanda

Arongera ati "Bamwe bari bafite ibibanza za Musanze n’ahandi basaba ko babemerera kujya kubyubakamo, bati i Musanze naho ntihemewe, icyakora nyuma bamwe barabemerera hari abari kubaka, kuva icyo gihe nta kintu kirakorwa byarangiye gutyo, nta n’umuyobozi wibuka ko ibiza byabayeho ngo atugirire impuhwe".

Hategekimana avuga ko babayeho mu buzima bubi, aho babaho mu buryo bwo kwirwanaho, bamwe bakaba bacumbikiwe n’abaturanyi.

Ati "Twaratakambye tubonye batatwumvise urabona imyaka igiye kuzura ibiri, nta kindi twakwirirwa dusaba, njye bari banyemereye ibikoresho nkiyubakira, undi bati zana ikibanza tukubakire undi bati tuzagukorera byose, none se ko imyaka igiye kuba ibiri urumva batwitayeho?".

Ibiza byangije byinshi birimo n’imirima y’abaturage

Akomeza agira ati, "Mu Kagari kacu ni umuntu umwe nzi bubakiye ku gasozi bamukuye mu kibaya, ni umwe rwose mu miryango igera muri 60, twarasakuje banze kutwumva, ubushize Guverineri yaje gutangiza igihembwe cy’ihinga, bari hano imbere y’iwanjye ariko ntiyigeze avuga ku kibazo cy’ibiza mu gihe twari twishimye tuzi ko tugiye kumutura ibibazo, batera indirimbo bashyizeho morale tuyoberwa igihe yagendeye, twabonye ari kurengarenga".

Ugirase Petronile ucumbikiwe n’umuturanyi nyuma y’uko umuryango we w’abantu batandatu usenyewe n’ibiza, avuga ko ubuzima abayemo bubabaje.

Ati "Ibiza byanteye mu nzu Leta yari yaranyubakiye nk’umuntu utishoboye irasenyuka, batujyana mu nkambi kuri Shyira ku bitaro, aba ariho baducumbikira bigeze aho baratubwira ngo ni tujye gucumbika mu miryango yacu, ubu turara aho bwije, ndacyategereje ko nanjye banyubakira".

Ibiro by’umurenge wa Shyira biri mu byasenywe n’ibiza

Arongera ati "Abana bamwe barara kwa mukuru wanjye ubundi bakarara ku muturanyi gutyo gutyo, tugenda ducumbika aho batwakiriye, tubayeho nabi nonese kurara muri salo y’umuntu imyaka ibiri byo si ibibazo uba umuteje?".

Arongera ati "Turasembereye njye n’abana banjye, Leta ituboneye aho tuba ibindi byazaza nyuma".

Musabyimana Eugenie, umaze umwaka n’igice acumbikiye umukazana n’abuzukuru be bane, avuga ko babayeho mu buzima butaboroheye.

Ati "Umukazana wanjye n’abuzukuru tubana hano mu nzu, umugabo we yabonye ubuzima bumugoye ajya gupagasa ashaka udufaranga, bakomeje gutegereza ko bubakirwa biranga, babayeho nabi rwose nyuma y’uko inzu yabo iguye, mubakorere ubuvugizi haboneke ubufasha bwo kububakira".

Ibiza byasize iheruheru abaturage mu buryo bukomeye

Muri ako gace, n’ubwo imwe mu miryango yahuye n’ibiza ibayeho mu buzima butayoroheye, hari n’imiryango imwe yatangiye kubakirwa, gusa ikibazo hakaba hari impungenge z’inyubako ziri kubakwa zidakomeye, aho zimwe zangirika mbere y’uko zitahwa.

Twagirimana Innocent wo mu Kagari ka Kintarure kibasiwe n’ibiza, ni umwe mu bari kubakirwa aho yemeza ko inzu nyinshi mu ziri kubakwa ziri kwangirika harimo n’inzu ye.

Ati "Mu bikorwa byo kutwubakira ubona harimo uburiganya no kunyereza, aho inzu ziri kwangirika tutarazijyamo, nk’ubu iyanjye hari aho yaturitse binsaba kugurisha ku gasambu kanjye nkaba ndi kuyisubiramo, ni abayede biga kubaka baduhaye ngo batwubakire, ntabwo ari abafundi".

Abaturage bavuga ko zimwe mu nzu ziri kubakwa ziri gusenyuka batarazitaha

Uwo mugabo avuga ko mu gihe batarabona inzu, abenshi bacumbikiwe n’abaturage ati, "Twari ducumbitse muri site batubwira ko nta bukode buhari baradusezerera tujya gucumbika mu baturage bagenzi bacu, abenshi niho bari ndetse bamwe batangiye kubirukana bubaka udukoni kuri izo nzu zitari zuzura".

Ubuyobozi buratangaza iki kuri icyo kibazo?

Umunyamabanga nshingwabikorwa w’Umurenge wa Shyira, Ndandu Marcel, avuga ko bakomeje gahunda yo kubonera amacumbi abo baturage basenyewe n’ibiza, aho bamwe batangiye kubakirwa, abandi bakaba bari gushakirwa ibibanza.

Mu nzu ziri kubakwa hari iziri hafi gutahwa

Ati "Abantu bahuye n’ibiza turi mu rugamba rwo kugira ngo tubabonere amacumbi, twahereye ku bagomba gusanirwa inzu zimaze kuzura, ubu hari kubakirwa abari bafite ibibanza, hashize iminsi hari gukorwa isesengura ry’abantu badafite ubushobozi bwo kwigurira ibibanza kugira ngo ubuyobozi bubibagurire bubakirwe".

Akomeza agira ati "Hamaze iminsi hari gukorwa iryo sesengura ku bufatanye bw’ubuyobozi bw’Akarere ka Nyabihu na MINEMA, n’izindi nzego zitandukanye kugira ngo barebe uko bagurira ibibanza abo bantu batishoboye, hakabamo n’abandi bagishakisha ibibanza uko bazagenda babibona niko tuzajya tububakira. Aho bigeze harashimishije kuko abenshi bamaze kubona amacumbi, abatarayabona nabo turi mu rugamba rwo gushaka uko bayabona".

Zimwe mu nzu zubakirwa abasenyewe n’ibiza hari izamaze kuzura

Mu kumenya icyo ubuyobozi bw’Akarere ka Nyabihu buvuga kuri icyo kibazo, Kigali Today yagerageje kuvugana nabwo ku murongo wa telefone ntibyakunda.

Umuyobozi w’Intara y’Iburengerazuba, Lambert Dushimimana, avuga ko agiye gukomeza gukurikirana ikibazo cyo kubonera abo baturage amacumbi mu buryo bwihuse.

Ati "Turi muri gahunda yo gushakira ibibanza abatabifite, kuko ntitwabubakira ahantu hasubiza ubuzima bwabo mu kaga, icyo namenya ni ukubaza Akarere ngo gahunda bafite ni iyihe, kuko aho bavuye twahabakuye kuko hatari hakwiye, ubu ntabwo twabasubiza n’ubundi ahadakwiye".

Hari n’izimaze gusakarwa

Arongera ati "Icyo ndibukurikirane, ni ukumenya icyo Akarere kabateganyiriza kugira ngo badakomeza gusembera. Reka mbaze Visi Meya kuko niwe ubishinzwe, kugira ngo menye icyo bari guteganyiriza abo baturage".

Urubyiruko rwiyemeje gutanga amaboko mu bikorwa biteza imbere Igihugu

Mu Mudugudu wa Kabyaza, akagari ka Rurengeri mu Murenge wa Mukamira Akarere ka Nyabihu, abaturage baho kimwe n’abahagenderera, bari bamaze igihe babangamiwe n’ikiraro cyubatswe ku muhanda nyabagendwa, unyura muri uyu mudugudu, kubera ukuntu cyangijwe n’amazi aturuka mu misozi ihakikije, amanukana imicanga n’amabuye, bikakizibya.

Ni kenshi bagiye bagerageza kwihuza, bakakizibura ariko bikaba iby’ubusa bitewe n’uburyo cyari cyarangiritsemo.

Murenzi Théophile agira ati: “Twahoraga dufite impungenge mu gihe twambuka iki kiraro bitewe n’ibyondo n’imicanga byahoraga byuzuyemo. Imvura igwa igatembana amazi arabimanukana byose bikipakiramo kuhanyura bikaba bitagishoboka. Kandi abana bajya ku mashuri, abaturage bajya kwivuza n’abagana amasoko yo hirya no hino twese nta wundi muhanda tunyura. Iyo habaga huzuye rero, kugira ahantu tujya byajyaga bihagarara tukamara iminsi dutegereje ko ubukana bw’amazi bucogora tukabona ubwongera kuhanyura”.

Ni igikorwa cyitabiriwe n’abarimo inzego z’umutekano

Uretse iki gikorwa remezo, hari n’abari babayeho mu buzima bwo gusembera, abandi mu bukode kubera kutagira inzu, bidaturutse ku mahitamo yabo, ahubwo ari impamvu z’ubukene.

Mu gukemura ibyo bibazo, kimwe n’ibindi byugarije imiryango yo hirya no hino mu gihugu hose cyane cyane itishoboye, mu gutangiza uku kwezi kw’ibikorwa by’Urubyiruko rw’Abakorerabushake, ku ikubitiro ibi bibazo byari byarazengereje abatuye muri uwo Mudugudu wa Kabyaza kimwe n’indi yo muri Nyabihu byegeranye, bafatanyije mu gusana icyo kiraro, bubakira imwe mu miryango itishoboye inzu zo kubamo ndetse n’imirima y’igikoni.

Mu byishimo byinshi abahatuye bagaragaje ku bwo kubona amaboko y’inyunganizi, ngo bafite inyota yo kuzabibungabunga.

Mu bubakiwe inzu barimo na Manizabayo utagiraga aho kuba bishimiye uruhare rw’urubyiruko mu kuzamura imibereho y’abaturage

Manizabayo Clementine, umubyeyi w’abana babiri utagiraga aho aba akaba umwe mu bubakiwe inzu y’ibyumba bitatu n’uruganiriro yagize ati: “Nari ngowe n’ubuzima bwo gutera ibiraka rimwe na rimwe nkakorera amafaranga ari hagati y’1000 n’1500 ku munsi. Kugira ngo habonekemo ay’ibitunga abana, kubarihira amashuri, kubagaburira hiyongereyeho no kwishyura inzu y’ubukode byambizaga icyuya. Haba ubwo tubwiriwe cyangwa tukaburara. Kuba aba bagiraneza banyubakiye iyi nzu mbigereranya no kuntura umutwaro wari undemereye nari nikoreye. Imana yo mu ijuru ibakomereze imbaraga”.

Ni ibikorwa ngarukamwaka, bitangirana n’intangiriro ya buri kwezi k’Ukwakira. Muri uyu mwaka mu Nsanganyamatsiko igira iti ’Youth Volunteers, Nta kudohoka mu gushyira umuturage ku isonga’, urubyiruko rusaga Miliyoni 1 n’ibihumbi 700 rubarizwa mu muryango w’Abakorerabushake rwo mu gihugu hose, mu gihe cy’ukwezi, ruzafatanya mu gukangurira abaturage kugira uruhare muri gahunda za leta, nko kwirinda amakimbirane, gusubiza abana mu ishuri, kwimakaza isuku, imirire myiza, imibanire myiza mu miryango.

Mu gihe cy’ukwezi bagiye kumara bakemura ibibazo byugarije abaturage bazibanda ku kubaka imirima y’igikoni, gutera ibiti, gusana ibikorwaremezo, kubakira abaturage n’ibindi

Ariko kandi ruzongeraho n’imirimo y’amaboko nko kubakira abaturage, gusana ibikorwa remezo, kubungabunga ibidukikije n’ibindi bikorwa bitandukanye bijyanye n’umwihariko wa buri hantu.

Kubana Richard, Umuyobozi Mukuru muri Minisiteri y’Ubutegetsi bw’Igihugu Ushinzwe Ubukangurambaga n’Urubyiruko rw’Abakorerabushake, avuga ko ibi biri mu mujyo urubyiruko rwahisemo wo gutanga umusanzu warwo mu byubaka Igihugu batarindiriye ko bikemurirwa mu kwifashisha ingengo y’imari ahubwo bakabinyuza mu mirimo y’amaboko n’ubukangurambaga.

Guverineri w’Intara y’Iburengerazuba Lambere Dushimimana yakanguriye urubyiruko gukomera ku ntego z’ibyaka Igihugu

Guverineri w’Intara y’Iburengerazuba Lambert Dushimimana, avuga ko ibikorwa nk’ibi, ari urugero rwiza rutanga n’icyizere cy’ahazaza.

Ati: “Urubyiruko dukeneye ni urusobanukiwe neza aho u Rwanda rwavuye, aho ruri ubu n’aho rugana. Kandi iyo dusesenguye neza tugendeye ku bitekerezo byiza rufite n’ibikorwa bigamije ineza y’Igihugu no kukigobotora ibibazo bicyugarije, bigaragara ko urubyiruko ruri mu murongo mwiza; binashimangirwa n’ibi bikorwa baba biyemeje kugiramo uruhare mu kubikemura. Ndarushishikariza gukomereza aho, basigasira neza intego bihaye kandi natwe nk’ubuyobozi turahari ngo tubatere ingabo mu bitugu”.

Yasabye abaturage na bo kurushaho gushyiraho akabo, mu guhora bashishikajwe no kumva ko aribo ba mbere bakwiye kujya bishakamo ibisubizo no kurinda ibyagezweho, kuko bibafasha kuva ku rwego rumwe bajya ku rundi.

I Nyabihu ahatangirijwe Ukwezi kw’ibikorwa by’Urubyiruko rw’Abakorerabushake bafatanyije n’inzego z’ibanze n’izishinzwe umutekano mu Ntara y’Iburengerazuba bubakiye abatishoboye inzu, imirima y’igikoni ndetse no gusana ikirar

Muri uku kwezi kwahariwe ibikorwa by’urubyiruko rw’abakorerabushake birimo bazubaka inzu 500 mu gihugu hose, Bubake Imirima y’Igikoni 21,480, ubwiherero 6,444 batere n’ibiti 60,000 byose hamwe bikaba bibarirwa mu gaciro k’amafaranga angana na Miliyari imwe y’u Rwanda.

Mu bikorwa urwo rubyiruko ruzibandaho birimo no gukemura ibibazo byari byarabereye abaturage ingutu

Umugabo wo mu Karere ka Nyabihu bamusanze mu ishyamba amanitse mu giti yapfuye

Mu masaha y’igicamunsi cyo kuwa gatatu tariki 18 Nzeri 2024, abaturage batunguwe no gusanga uwo mugabo aziritse umugozi mu ijosi, amanitse mu giti cyo mu ishyamba riherereye mu Mudugudu wa Bisukiro, Akagari ka Gihorwe mu Murenge wa Kabatwa Akarere ka Nyabihu.

Uwamugezeho bwa mbere, warimo anyura mu gahanda kari hafi y’agashyamba uwo mugabo yari amanitsemo, yamusanze aziritse umugozi w’umukara mu ijosi anagana mu giti, ariko bigaragara ko atikwije igice cyo hasi (yambaye ubusa). Mu kugerageza guhisha ubwambure bwe, yahise amukenyeza umufuka yari ajyanye kwahiriramo, maze bihutira gutabaza inzego zibishinzwe.

Umunyamabanga Nshingwabikorwa w’Umurenge wa Kabatwa, Kampire Georgette yagize ati: “Umusore wahatambukaga akimubona yahise atabaza, turahagera dusanga aziritse akagozi mu ijosi ariko utasobanukirwa niba ariwe waba wiyahuye cyangwa niba ari abantu bamwishe barangiza bakamushyira aho ngaho. Iperereza ryahise ritangira kugira ngo hamenyekane mu by’ukuri intandaro y’urupfu rwe”.

Yakomeje agira ati, “Twabanje kuyoberwa inkomoke ye ariko ku bw’amahirwe tuza gusanga afite indangamuntu, turakurikirana dusanga yari atuye mu Murenge wa Bigogwe mu Kagari ka Rega. Umuryango we twahise tuwumenyesha urahagera, RIB na Polisi na bo bakora akazi kabo”.

Ishyamba uwo mugabo basanze amanitsemo, riri hafi y’inzira nyabagendwa ijya mu byerekezo bihuza Imirenge ya Kabatwa, Bigogwe, Jenda na Mukamira mu Karere ka Nyabihu.

Bivugwa ko uwo mugabo hamwe n’uwo bashakanye babanaga mu makimbirane, ariko Gitifu Kampire we, ngo ntiyabihamya kuko batamuzi neza cyane ko atari n’umuturage waho. Icyakora mu makuru bamenye, ngo ni uko yari asanzwe afite abagore babiri.

Yaboneyeho gukangurira abaturage kutihererana ibibazo no kujya bihutira kubigeza mu nzego z’ubuyobozi, kuko icyo zibereyeho ari ugufatanya na bo kubishakira ibisubizo.

Ati: “Iyo amakimbirane ari mu muryango cyangwa hari abantu bafitanye ibibazo, si byiza kubyihererana. Ubuyobozi ntabo butari hafi. Ni byiza ko bajya babwegera ibibazo bafite bikaganirwaho, hakanozwa uburyo byakemukamo aho kugira ngo bigere ku rwego rwo kwiyahura”.

Mu masaha ya nijoro, nibwo umurambo wahavanwe ujyanwa ku Kigo nderabuzima cya Bigogwe ngo ukorerwe isuzumwa dore ko hasanzwe hanakorera abaganga babifite mu nshingano.

Inzobere mu by’ubuzima bwo mu mutwe mu Kigo RBC zigaragaza ko umuntu ajya kugera ku rwego rwo kwiyahura yarabiteguye igihe kirekire kandi bikabanzirizwa no kugaragaza ibimenyetso birimo kugira agahinda gakabije, karangwa no kwiheba cyane, uburakari, umujinya, ubwigunge, kudasinzira no kumva atagishaka kubaho binajyana no guhora arwaye umutwe, umugongo n’umunaniro ukabije.

Nyamara ngo no kubikumira birashoboka mu gihe umuntu ku giti cye cyangwa ababana na we baba babigizemo uruhare.

Amababi y’inturusu yabaye imari ikomeye mu Karere ka Nyabihu

Abaturage barebwa n’icyo kibazo, cyane cyane ni abo mu Mirenge ine izo nganda zikoreramo, ariyo Rurembo, Rambura, Jomba na Mulinga, aho bemeza ko kuva izo nganda zigeze muri ako gace bari kwangirizwa amashyamba, dore ko amababi y’inturusu yahindutse imari ikomeye muri ako gace.

Nk’uko babitangarije Kigali Today, ngo amashyamba akomeje kwangizwa ari ku buso burenga hegitari eshanu, bakaba bibaza uko bazabaho mu minsi iri imbere.

Umuturage wo mu Murenge wa Jomba, yavuze ko izo nganda zigurira abaturage amababi y’inturusu, bigatera bamwe biganjemo abana kubigira ubucuruzi, kugeza ubwo birara mu mashyamba yabo bakayonona.

Ati "Tukimara kubona ko abiganjemo abana bakomeje kujya birara mu mashyamba yacu bakayangiza, twegereye ba nyiri inganda tubabwira icyo kibazo, batubwira ko nta kintu babikoraho, badusaba gushyiraho abarinzi barinda amashyamba yacu, tukavuga tuti, ese turashyira abarinzi mu mashyamba bishoboke, bahembwe nande?".

Abaturage barataka ko bakoze imishinga yo gutera amashyamba ariko bakaba batiteze umusaruro uzayavamo

Arongera ati "Njye nasanze umwana mu giti hejuru mu bushorishori agikonga, ambonye antera ubwoba ati, niba utagiye ngiye gusimbuka, ukagenda kugira ngo amahoro ahinde kuko ashobora gupfa bakagufunga. Twigeze gufata bamwe tubajyana kuri Polisi, komanda aravuga ngo ntabwo aburanisha ibishagari (amababi y’inturusu), twararize turihanagura".

Uwo muturage avuga ko uburyo ayo mashyamba ari kwangiza, bigira ingaruka zo kuma kw’ibiti bimwe na bimwe bavuna imitwe.

Ati "Igiti barakigonda kikagera hasi bakagica umutwe, urumva nta gikurikiraho uretse kuma, ishyamba ryanjye bararikokoye bararirangiza, nigeze kubwira abantu nti, ni muze murebe uburyo ishyamba ryanjye ryangijwe barumirwa, ubu byarandenze, amababi aba akenewe mu ruganda ngo ni ayo ku mitwe y’igiti".

Mugenzi we wo mu Murenge wa Rurembo ati "Twakoze imishinga dutera ibiti, mu gihe bitangiye gukura ngo bitubyarire inyungu, bazana inganda ziteka amababi y’inturusu zikayakamura, nta giti cyongeye gukura muri aka gace, baraza bakurira bakabikonda barangiza bakabica n’imitwe igiti kikuma".

Abaturage bavuga ko bimwe mu biti babivuna bakabica imitwe

Arongera ati "Ntaho tutabigejeje, ariko twabuze kivugira, abana bamwe batiga nibo bakokora ibiti byacu bakajya kugurisha abo banyenganda, rwose turasaba ko ibyo bihagarara, ubu abana bari mu biruhuko ho birarenze".

Akomeza agira ati "Ishyamba ryanjye ni igice cya hegitari, nta giti kizima wabonamo, biraduhombya cyane kuko niba narakoze umushinga wo gutera ishyamba abantu bakaryangiza ku nyungu zabo, urumva ni ikibazo".

Undi muturage ati "Abo banyenganda baratuzonze, mu Murenge wa Jomba aho ntuye, inganda zatumazeho amashyamba, baraza bakarikokora wageramo ukibaza niba ari ishyamba bikakuyobera, ariko ikibazo gihari n’uko ubuyobozi usanga busa naho bitabureba, kuko iyo utatse ntabwo bakumva".

Arongera ati "Nasanze banyangirije ishyamba mbigeza ku mukozi ushinzwe amashyamba mu Murenge, ati, muzadufatire umwe mumutuzanire tumuhane by’intangarugero, mu minsi ibiri dufata umusore tumujyanyeyo, bati, tugiye gukora raporo, bahita bamurekura arataha".

Ngo abangiza ayo mashyamba biganjemo abana

Abo baturage baravuga ko batagambiriye gufungisha izo nganda, gusa bakavuga ko uburenganzira bwabo ku mashyamba yabo nabwo bukwiye kubahirizwa, inganda zigakora ariko n’amashyamba yabo akabungabungwa, dore ko n’ayo mavuta bavuga ko nta kintu abamariye, kuko batamenya icyo akora n’aho agurishirizwa.

Ba nyiri inganda babivugaho iki?

Nyuma y’uko abaturage bagaragaje ikibazo cyabo, Kigali Today yaganiriye n’umwe mu bahagarariye izo nganda witwa Manizabayo Innocent, avuga ko ayo makuru abaturage bavuga atari ukuri.

Ati "Ibyo abo baturage bavuga ntabwo aribyo, twe tugura amashagari y’abantu batemye ibiti, tukagura n’amashyamba ayo dusaruye amababi akaba ariyo dukoresha, ubwo rero hari abantu bigize abantu utamenya, bakora ibintu by’imitwe".

Abajijwe ku bimenyetso abaturage bagaragaza byerekana ko amashyamba yabo yangizwa, yagize ati "Ubwiwe n’iki ko ataribo babyikorera bakiyangiriza, hari umuntu bafashe baramugaragaza bati, ng’uyu akavuga ko twamwohereje?, wabwirwa n’iki ko abantu bo muri iki gihe bakora ibintu utamenya, ko ashobora kugenda akiyangiriza ngo akunde aguharabike, urumva umuntu yatinyuka agakora bizinesi yo kwangiriza abaturage?".

Muri ako gace hari inganda eshatu zikamura amababi y’inturusu

Manizabayo yavuze ko bamwe mu baturage bari gukoreshwa kugira ngo bahagarikishe iyo bizinesi, asaba abo baturage kunyura mu nzego z’ubuyobozi.

Ati "Bamwe mu baturage barakoreshwa ngo basebye ibyo abantu bakora, twe tugurira abantu bakuru ntabwo tugurira abana, n’ubu ngiye gupakurura imodoka y’ahantu twaguze amashagara, naho ibyo ni ababiri inyuma bagenda bagafata abantu bakabagurira inzagwa, barangiza bakagenda baharabika bizinesi z’abantu".

Icyo ubuyobozi bw’Akarere buvuga kuri icyo kibazo

Ubuyobozi bw’Akarere ka Nyabihu buremeza ko buzi izo nganda zikora umushongi mu mababi y’inturusu, gusa ngo ntabwo bwari buzi iyo mikorere mibi yo kwangiza amashyamba y’abaturage.

Ubuyobozi buvuga ko bugiye gukurikirana icyo kibazo, nibusanga ibyo abaturage bavuga ari ukuri, izo nganda zifatirwe ibyemezo, nk’uko Umuyobozi w’Akarere ka Nyabihu wungirije ushinzwe iterambere ry’ubukungu, Habanabakize Jean Claude yabitangarije Kigali Today.

Ubuyobozi bw’Akarere bwatangaje ko bugiye gukurikirana iby’icyo kibazo cy’abangiza amashyamba y’abaturage

Ati "Iki kibazo cy’imikorere imeze ityo, cyo ntabwo tukizi ariko icyo tuzi n’uko izo nganda zikamura inturusu zigakoramo umushongi ziriho, harabaho gukurikirana ibijyanye n’imikorere byabo".

Arongera ati "Turumva ko iyo mikorere niba koko ari ukuri, ntabwo ihwitse nta n’ubwo byemewe na gato, tugiye kubikurikirana kugira ngo mu by’ukuri ababirimo ababikora gutyo bahanwe nk’uko amategeko abiteganya, turabikurikirana kandi biraza gukemuka niba biriho koko".

Imodoka ya coaster ya agence ya la Colombe yabuze feri igonga indi

Iyo mponuka yabaye ku gicamunsi cyo kuri uyu wa mbere tariki 26 Kanama 2024, aho imodoka ya Coaster ya Agence ya Colombe yerekezaga i Rubavu, yashatse kunyura ku ikamyo yari imbere yayo, ibura feri igonga Prado yerekezaga i Musanze.

Ni amakuru yemejwe n’Umunyamabanga Nshingwabikorwa w’Umurenge wa Bigogwe, Nsengimana Jean Claude abitangarije Kigali Today.

Ati "Coaster yabuze feri ubwo yari iri mu mukono utari uwayo ishaka kunyura ku ikamyo yari imbere yayo, igonga imodoka ya Prado yerekezaga i Musanze, ku bw’amahirwe ntawe iyo mpanuka yahitanye nta n’uwakomeretse, Polisi yahise ihagera".

Ku bw’amahirwe abagenzi barokokeye muri iyo mpanuka

Ibiro by’Akarere ka Nyabihu

Mu Karere ka Nyabihu ni na hamwe mu hakorerwa ubukerarugendo bushingiye ku bworozi bw’inka, ahazwi nko ku ‘Ibere rya Bigogwe’ hazwiho kugira amata aryoshye, muri ako Karere hakaba n’uruganda rwa Mukamira ruzwiho gutunganya amata (Amata ya Mukamira).

Kuba hari ubwo bukungu bujyanye n’ibiribwa, ntibivuze ko abaturage bari mu buzima buzira umuze, dore ko mu myaka itanu ishize ako Karere kagiye kagaragara mu turere dutandatu twugarijwe n’igwingira.

Nk’uko ubuyobozi bw’ako Karere bubivuga, muri raporo ijyanye n’ubuzima yasohotse mu mezi atandatu ashize, byagaragaye ko ako Karere kari ku gipimo cya 35,1% by’abana bagwingiye mu gihe umuhigo w’Igihugu wari kuri 19% muri uyu mwaka wa 2024.

Ni mu gace kandi kagaragaramo urugomo aho abangavu basambanywa baterwa inda imiryango bavukamo ikabatererana hakazamo no kubirukana.

Umuryango Imbuto Foundation yamaze gushinga ikigo gihuza ababyeyi n’abo bana baterwa inda, mu rwego rwo kubakura mu bwigunge n’agahinda gakabije baterwa n’ibyo bibazo.

Abaganiriye na Kigali Today bavuga ko Umuryango Imbuto Foundation wabakuye mu gahinda bari baratewe no gusambanywa bikabaviramo kubyara inda zitateguwe, ubu ngo baratekanye ndetse ngo bagaruye icyizere cy’ubuzima.

Umukobwa w’imyaka 20 wo mu Murenge wa Bigogwe, ni umwe mu bangavu basambanyijwe baterwa inda abyara afite imyaka 17. Avuga ko urugendo yanyuzemo rwari inzira iruhije.

Ati “Umusore waragiraga hafi yo mu rugo twajyaga tuvugana bisanzwe, rimwe njya gufatayo amata nk’uko byari bisanzwe, arankingirana aransambanya. Hashize igihe nisanze ntwite, mbimubwiye ati ‘umusarani uri ku nzira ntawe utawujyamo, menya ko uko wampaye ari na ko waha abandi’ ibyo nkomeza kubibana kubera gutinya kubibwira ababyeyi banjye”.

Avuga ko yabaye muri ubwo buzima bubi akabufatanya n’ishuri aho yigaga mu mwaka wa kabiri w’amashuri yisumbuye, ngo iko inda yagendaga ikura kwiga byaramunaniye ababyeyi be baza kuvumbura ko atwite, ise na basaza be batangira kumutoteza asigara yitabwaho na nyina.

Avuga ko umwana we yagize ikibazo cy’igwingira kubera ko umuryango we utamuhaga agahenge, aho ngo bajyaga bamukingirana akabura uko yita ku mwana we ngo abe yamutekera igikoma.

Mugenzi we watewe inda afite imyaka 15 avuga ko nyuma y’uko apfushije ababyeyi bombi yagiye gusaba akazi ko mu rugo mu Mujyi wa Musanze, umugore yakoreraga mu rugo atangira kumucuruza mu kabare kari kegereye urugo, aho yamushumirije umugabo aramusambanya bimuviramo gutwita.

Ati “Umugore nakoreraga mu rugo hari ubwo yampamagaraga ngo musange mu kabare, nibwo rimwe yampamagaye ansaba kwinjira muri lodge, nkigera mu cyumba mbona haje umugabo ntazi, arambaza ati icyo baguhamagariye urakizi, ndavuga nti ntacyo nzi, arambwira ngo icyo baguhamagariye ndakikubwira mu kanya ahita ankingiranira muri icyo cyumba aransambanya”.

Arongera ati “Muri uko kunsambanya naratabaje mbura untabara kuko bari bafunguye radio, nyuma nagiye kubibwira wa mugore wankoreshaga arambwira ati kariya ni akazi gasanzwe jya ugakora kazaguha amafaranga, uwo mugabo wansambanyije yishyura mabuja, nibwo n’umvise ntaye umutwe ndataha mva i Musanze n’amaguru nza mu Bigogwe, nyuma y’ukwezi mbura imihango inda itangira kugaragara, nibwo abanyabuzima banzanye ku bitaro barampima ndataha nyuma inda imfashe mbura uwabimpashamo, njya kubyarira mu bitaro bya Gisenyi kubera gutinya kubyarira iwacu, ntinya ko abantu bambona”.

Uwo mukobwa ufite imyaka 18, avuga ko yagize ibibazo byo kubura aho aba akajya arara hanze n’uruhinja, ku bw’amahirwe umushinga wa Imbuto Foundation uramutabara umushyira mu itsinda ry’abakobwa babyariye iwabo bafashwa, aho akodesherezwa inzu akagenerwa n’ibyo kurya bihoraho.

Ubuyobozi bwatangaje igitera izamuka ry’igwingira n’abangavu baterwa inda

Ubuyobozi mu Karere ka Nyabihu buravuga bimwe mu bikomeje gutera ikibazo cy’ubwiyongere bw’abangavu baterwa inda mu karere ka Nyabihu ndetse n’ikibazo cy’igwingira mu bana.

Dr. Mfashingabo Martin, Umuyobozi w’ikigo nderabuzima cya Bigogwe hamwe mu hibasiwe n’icyo kibazo cy’abangavu baterwa inda n’ikibazo cy’igwingira, yagize ati “Kurwaza igwingira bituruka kenshi ku makimbirane mu miryango aho usanga ababyeyi bagirana ibibazo umwana akabigenderamo, hari kandi imyumvire y’ababyeyi, bitewe n’agace turimo hari aho usanga kugira ngo barye ibifite intungamubiri zikenewe, batabikozwa bitewe n’imyemerere ituruka ku madini”.

Uwo muyobozi yagarutse ku mpamvu zituma abakobwa benshi baterwa inda muri ako gace zirimo kuba bamwe ari imfubyi badafite ababitaho, ikindi ngo ni ukuba ari agace karimo abashumba benshi batungwa agatoki mu guhohotera abangavu.

Umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal na we yagarutse kuri icyo kibazo cy’igwingira mu bana n’ikibazo cy’abangavu baterwa inda z’imburagihe.

Ati “Ni ikibazo gihari kandi nk’ubuyobozi kiraduhangayikishije, kuko umwana wabyaye ahura n’ibibazo bikomeye aho usanga ababyeyi badafite ubushobozi buhagije bwo kubitaho bakava mu ishuri bigatuma n’abo babyaye bagira ikibazo cy’igwingira, akenshi usanga mu bana dufite bagize ikibazo cy’igwingira ari ababyawe n’abo nangavu”.

Visi Meya yavuze ko mu mezi atandatu ashize Akarere ka Nyabihu kari kuri 35.1% by’bana bagwingiye, bakaba bakomeje gufata ingamba zo gukurikirana abo bana mu buryo bwihariye aho ku bufatanye n’abafatanyabikorwa batandukanye, hashyizweho amatsinda y’ababyeyi b’intangarugero bagenda bigisha abandi.

Kuba ubutaka bwihariwe na bamwe ngo ni kimwe mu bitera ikibazo cy’imirire mibi nk’uko Simpenzwe akomeza ku bivuga, ati “Hari ibyo kurya ariko dufite ikibazo cy’igwingira mu bana, n’ubwo duhinga tukeza hari ubwo usanga byihariwe n’abantu bamwe twakwita abakungu, ugasanga umuntu umwe afite nka hegirari eshanu undi afite 20, bikitwa ko abaturage bose bafite ubutaka bwo guhinga”.

Yagarutse no ku kibazo cy’imyumvire n’imyitwarire aho ababyeyi bamwe na bamwe batarinjira mu rugamba rwo kurwanya igwingira n’imirire mibi, aho usanga batabuze ibyo kurya ariko ntibamenya neza icyo umwana akenera kugira ngo akure neza, hakiyongeraho ikibazo cy’amakimbirane mu miryango, mu gukemura ibyo bibazo bakaba bafite gahunda y’amatsinda yitwa Bandebereho arwanya amakimbirane mu miryango.

Bamurikiwe ikiraro cyo mu kirere bitezeho koroshya ubuhahirane

Icyo kiraro cya Satura, kireshya na Metero 130, gihuza Utugari twa Gisizi na Mulinga two mu Murenge wa Mulinga.

Abaturage baho nk’uko babivuga, bari bamaze igihe bagowe n’ingendo zihambukiranya, bitewe n’ukuntu inzira zari zarangiritse, kandi n’ibiraro biciriritse by’ibiti bageragezaga gutinda ngo babone aho bambukira, byasenyukaga bitahamaze kabiri.

Munyampeta Ildephonse agira ati: “Ubuhahirane bwari bumeze nabi. N’ibiti twahoraga dutema mu mashyamba tukabitindaho byangirikaga bitamaze kabiri, ubundi bigatembanwa n’amazi, hakaba ubwo n’abantu bagwamo bagakomereka cyangwa bagasigarana ubumuga”.

Akomeza agira ati “Ikiraro kiri kuri uru rwego kijyanye n’igihe twari tukibabaye kuko aha hantu ari agace kagizwe n’imisozi miremire, ubona ko hakenewe byinshi nka byo. Ubuyobozi bwakitwubakiye ntacyo twabona twabunganya, abaturage twuzuye amashimwe gusa gusa”.

Ni ikiraro cyubatswe hagamijwe kubakura mu bwigunge nk’umwe mu mihigo y’uyu mwaka y’aka Karere.

Abaturage basabwe kukibungabunga

Umuyobozi w’Akarere ka Nyabihu wungirije ushinzwe Iterambere ry’Ubukungu Habanabakize Jean Claude, agira ati: “Akarere kafatanyije n’Ikigo kizobereye mu kubaka ibiraro byo mu kirere Bridges to Prosperity, kuko twifuzaga ko nibura ibibazo abo muri utwo tugari twombi n’utundi byegeranye bikurwaho mu gihe bahahirana”.

Yunzemo agira ati “Kariya gace, gakorerwamo ubuhinzi kandi ni nako hari kugenda hagezwa ibikorwa remezo nk’amashuri, amavuriro n’ibindi bikeneye kuganwa n’umubare utari mutoya w’abaturage. Ubwo rero kuba batabonaga uko babigeraho kubera kubura icyo bambukiraho, ubwabyo byari ikibazo gikomeye natwe byari biduhangayikishije”.

Yababwiye ko iki kiraro cyubatswe mu buryo burambye, dore ko n’ubwo imvura yagwa ari nyinshi, kidashobora kurengerwa n’amazi ngo acyangirize cyangwa agitembane nk’uko bisanzwe bigenda ku bindi biraro bisanzwe.

Ku bwa Habanabakize, asanga ari ah’abaturage gushyiraho akabo, bakakibungabunga bakagifata neza, bakirinda kwangiza insinga n’ibyumba bicyubakishijwe, kugira ngo kizamare igihe. Ni ikiraro cyuzuye gitwaye Miliyoni 135 z’amafaranga y’u Rwanda.

Uwo musore w’imyaka 24 y’amavuko, yageze muri imwe mu ma resitora iherereye mu Mudugudu wa Nsakira Akagari Ka Bukinanyana muri uwo Murenge wa Jenda, atumiza amafunguro ariho n’inyama y’inka itogosheje, mu kuyimira ihera mu muhogo, ananirwa kuyimira cyangwa kuyicira kuko yari yahagamye mu muhogo, imuheza umwuka kugeza bimuviriyemo gupfa.

Umwe mu bo mu muryango wa yagize ati: “Yarimo arya ayo mafunguro harimo n’inyama yari yatumije muri iyo resitora. Ikimara kumuniga yituye hasi, abari hafi ye babibonye bagerageza kumufasha ngo barebe ko iva mu muhogo yari yahagamywemo biranga, bakora ibishoboka ngo byibura bayisohoremo nabyo biba iby’ubusa arapfa. Urupfu rw’umwana wacu rwadushenguye”.

Umunyamabanga Nshingwabikorwa w’Umurenge wa Jenda Niyonsenga Jeanne d’Arc, wemeje iby’amakuru y’urupfu rw’uyu musore, yagize ati: “Bikimara kuba abaturage baradutabaje mu masaha y’umugoroba. Ni akaresitora gaciriritse gateka amafunguro harimo n’inyama z’inka baba batogosheje. Mu kuyirya rero, yaje kumuniga, abaturage bagerageza gukora ubutabazi bw’ibanze babonye byanze bamujyana kuri poste de santé ya Jenda bahamugeza yamaze gushiramo umwuka”.

“Amakuru twamenye ni uko muri uko kurya ayo mafunguro yari kumwe na bagenzi be b’inshuti ze. Na bo barimo barira muri iyo resitora. Za resitora zo muri kano gace n’ubwo inyinshi ziciriritse, nta kindi kibazo cy’abaziburiramo ubuzima biturutse ku mafunguro cyangwa ibinyobwa bayafatiyemo twari twagahuye na cyo, uretse icy’uyu musore. Twibutsa abaturage ko mu gihe bafata amafunguro, bajya babikorana ubwitonzi. N’ubwo ibyabaye bifatwa nk’impanuka, ariko ni byiza ko abantu mu gihe bafungura bajya batapfuna neza amafunguro, mu kwirinda ingaruka yabagiraho”.

Abasanzwe bazi Habanabakize, bavuga ko nta bindi bibazo by’uburwayi budasanzwe bari bamuziho. Umurambo we ukaba washyinguwe kuwa mbere tariki 3 Kamena 2024.

Abagabo biyemeje gufata iya mbere mu kwita ku mikurire y’abana

Ni ibirori byitabiriwe n’abiganjemo ababyeyi, abana, abajyanama b’ubuzima, abayobozi, n’abandi batandukanye, baganira kuri gahunda y’imbonezamikurire y’abana bato.

Ni umunsi wateguwe n’Akarere ka Nyabihu ku bufatanye n’abafatanyabikorwa batandukanye bafite ibikorwa biteza imbere imikurire y’abana bato, barimo Reach the Children Rwanda (RCR), ChildFund Korea, USAID Gikuriro kuri Bose, na USAID Uburezi Iwacu, n’abandi.

Ni igikorwa kandi cyaturutse ku busabe bw’Ikigo cy’Igihugu gishinzwe imikurire no kurengera umwana (NCDA) ko nibura kabiri mu mwaka abafatanyabikorwa bahuriye mu kwita ku marerero n’imikurire y’abana, bazajya bashyiraho umunsi nk’uyu, aho bagaragaza ibyakozwe, imbogamizi zikirimo, ariko bagatanga n’ubutumwa mu rwego rw’ubukangurambaga.

Akarere ka Nyabihu kari mu Turere dufite umubare munini w’abana bagwingira, aho ubu kari kuri 34,5%, abagabo bazwi ku izina rya Bendebereho bakaba bariyemeje gufatanya n’abagore babo mu kurwanya igwingira ry’abana.

Benjamin Mushuhukye, Umuyobozi w’Umuryango Nyarwanda witwa Reach the Children Rwanda, avuga ko bakorera hirya no hino mu Gihugu, by’umwihariko mu Karere ka Nyabihu bakita ku bijyanye n’uburezi ndetse n’ingo mbonezamikurire y’abana bato, aho bashishikariza ababyeyi kujyana abana mu ngo mbonezamikurire.

Benjamin Mushuhukye, Umuyobozi wa Reach the Children Rwanda

Mu Karere ka Nyabihu kuri ubu ngo bashyize ingufu mu gukangurira abagabo kugira uruhare mu kwita ku mikurire y’abana, kuko mu bushakashatsi bakoze mu Murenge wa Bigogwe mu kwezi kwa cumi 2023, basanze uruhare rw’abagabo mu kwita ku mikurire y’umwana ruri hasi cyane.

Ubwo bushakashatsi bwagaragaje ko hari abagabo badafite amakuru na macye ku kwita ku mikurire y’abana, ahubwo ugasanga bibera mu tubari, ibyo kwita ku bana bakabiharira abagore.

Benjamin Mushuhukye ati “Rero twumvaga ko niduhindura imyumvire y’abagabo, ahubwo bakaba intangarugero, umusaruro uzagaragara muri aka Karere.”

Mu gutangiza iyo gahunda, Akarere ku bufatanye na Reach the Children Rwanda babumbiye abagabo mu matsinda, batangira kubahugura, kuri ubu hakaba hari amatsinda arenga icumi arimo abagabo barenga ijana mu Murenge wa Bigogwe, bakaba bifuza ko n’indi mirenge yose yagira iyi gahunda, nk’uko Mushuhukye yakomeje abisobanura.

Ati “Nitubasha kugira itsinda rimwe muri buri Murenge, abo bazadufasha kugira ngo babijyane muri buri Kagari, ndetse no muri buri Mudugudu. Rero umusaruro dutegereje kuri iyi gahunda ya Bandebereho ni munini, by’umwihariko aho iyi gahunda twayitangirije mu Kagari ka Kora mu Murenge wa Bigogwe, umusaruro watangiye kugaragara.”

Imwe mu mihigo y’ababyeyi b’abagabo bahuguwe muri ‘Bandebereho’

Mu mahugurwa baherutse guhabwa n’Umuryango Reach the Children Rwanda, ababyeyi b’abagabo bibumbiye mu matsinda ya ‘Bandebereho’ biyemeje ko mu mezi atatu nta mwana uzaba ukiri mu mirire mibi n’igwingira mu miryango yabo.

Abo babyeyi biyemeje ko mu mezi abiri buri muryango uzaba utunze inkoko ebyiri kugira ngo babonere abana babo amagi yo kurya kandi baziguriye mu mafaranga yabo.

Aba babyeyi b’abagabo biyemeje ko mu Kagari ka Kora mu mezi atatu nta muntu uzaba adafite ubwiherero bwujuje ibisabwa mu muryango we. Aho bizagaragara ko batabufite, biteguye gutanga umuganda.

Aba bagabo biyemeje ko abana babo bose bagomba kuba bitabira ingo mbonezamikurire.
Ababyeyi b’abagabo bafite abagore bafata Shisha Kibondo biyemeje no gukora ubukangurambaga mu bandi bagabo bakababwira ko Shisha Kibondo igenewe umwana ufite imirire mibi, ko bitemewe kuyigurisha cyangwa kuyisangira n’abandi bo mu muryango, ahubwo ko ari iy’uwo mwana wenyine.

Mu birori byo kwizihiza umunsi wahariwe imbonezamikurire y’abana bato (ECD Day), abo babyeyi b’abagabo bagize itsinda rya Bandebereho bakinnye umukino ugaragaza uko abagabo bagomba kwita ku burere bw’umwana, ntibabuharire umugore wenyine. Bagaragaje ko umugabo ashobora kujyana umwana ku ishuri akajya no kumucyura, kumugaburira, kumukorera isuku, mbese bakaba ‘Bandebereho’.

Bakinnye umukino ugaragaza ko abagabo bakwiye guhindura imyumvire bagafatanya n’abagore kwita ku mikurire y’abana

Bagaragaje kandi ko abagabo batagomba kuba mu nzoga gusa, ahubwo ko amafaranga banywera bayahahisha ibyo gutunga umuryango, bakirinda gukubita umugore, umugore yaba yananiye umugabo akamuregera inshuti ze zikicara zikamuganiriza.

Ababyeyi bashishikarijwe kujyana abana mu ngo mbonezamikurire

Mwumvaneza Alain, umuhuzabikorwa w’umushinga USAID Gikuriro Kuri Bose mu Turere twa Nyabihu, Burera na Rulindo, umushinga ujyanye n’ibikorwa byo kurwanya imirire mibi no guteza imbere gahunda y’imbonezamikurire y’abana bato, yashishikarije ababyeyi kujyana abana bari hagati y’imyaka itatu n’itandatu mu ngo mbonezamikurire kuko zituma bakura neza batagwingiye kandi bagakura no mu bitekerezo.

Mwumvaneza Alain

Yasobanuriye ababyeyi ko ingo mbonezamikurire zifasha mu gukangura ubwonko bw’umwana biciye mu bikinisho, mu kuririmba babyina banakina, no mu kubaha indyo yuzuye.

Mwumvaneza yagize ati “Iyo ababyeyi bagiye mu mirimo itandukanye, hari igihe abana babasiga hirya no hino bandagaye. Umwana iyo ari mu rugo mbonezamikurire abasha kwitabwaho, akagira umutekano.”

Mu kandi kamaro k’ingo mbonezamikurire y’abana bato kandi, harimo kuba abana bapimwa ibiro buri kwezi kugira ngo barebe niba bataragwingiye. Bapima imikurire y’umwana bakareba niba adafite ikibazo cy’imirire mibi, uwo basanze afite imirire mibi bagashaka ingamba bafatanyije n’ababyeyi kugira ngo umwana ave mu mirire mibi, utazi gusoma bakabimwigisha agatangira kubimenya.

Abana barererwa mu rugo mbonezamikurire y’abana bato rwa Basumba bagaragarije abitabiriye ibirori byo kwizihiza umunsi wahariwe imbonezamikurire y’abana bato (ECD Day) ko bafite ubuzima bwiza, isuku, ko batojwe uburere n’ikinyabupfura, ndetse bagaragaza n’ubumenyi bafite babinyujije mu ndirimbo bariririmba basa n’ababyina kandi mu ndimi z’amahanga.

Biyemeje ko Nyabihu igomba kuva mu myanya ya nyuma mu igwingira

Benjamin Mushuhukye uyobora Umuryango Reach the Children Rwanda, ashima Leta yashyizeho gahunda y’ingo mbonezamikurire y’abana, ashima n’Akarere ka Nyabihu kemeye ko baza kuhakorera nk’abafatanyabikorwa.

Mu Karere ka Nyabihu kuri ubu habarurwa ingo mbonezamikurire y’abana bato zirenga 1222, abana basaga ibihumbi 30 bakaba bitabira ingo mbonezamikurire buri munsi. Ni mu gihe mu ntangiriro z’umwaka wa 2024 bari ibihumbi 24, bivuze ko muri uyu mwaka biyongereyeho ibihumbi bitandatu, ubu bwiyongere bukaba bugaragaza intambwe nziza yatewe mu kwita ku mikurire y’abana.

Benjamin Mushuhukye agaburira abana indyo yuzuye

Benjamin Mushuhukye yagarutse ku kamaro k’amatsinda y’ababyeyi b’abagabo bazwi nka ‘Bandebereho’, asaba ko aya matsinda yashyirwaho mu Karere hose, nibura buri Murenge ukagira itsinda nk’iryo rifasha mu bukangurambaga, bagafasha abandi bagabo kumva uruhare rwabo mu mikurire y’abana.

Yanagaragaje ko mu mbogamizi zikiriho ari uko hakiri ababyeyi benshi batarumva iyi gahunda y’ingo mbonezamikurire, aho usanga mu Tugari no mu Midugudu hakiri abana bajyana n’ababyeyi mu mirima, asaba ababyeyi n’abayobozi gufatanya abana bakabajyana mu ngo mbonezamikurire.

Benjamin Mushuhukye yanashishikarije ababyeyi kwita ku ngo mbonezamikurire zo mu miryango, Abapasiteri n’abandi bayoboye amatorero n’amadini abasaba ko bashyiraho ingo mbonezamikurire ku nsengero. Basabwe no gushyira ubwiherero ahari irerero, bakita no ku isuku yabwo.

Ababyeyi kandi yabashishikarije kwita ku bana igihe bari mu miryango yabo, abana bakabaho mu muryango batekanye.

Mu kwizihiza umunsi wahariwe imbonezamikurire y’abana bato (ECD Day), ingo mbonezamikurire zikorera mu miryango zahawe imikeka, buri umwe ufite metero eshatu kuri enye ku buryo abana bose bari mu rugo mbonezamikurire bashobora kwicaraho. Iyo mikeka yitezweho gukemura ikibazo cy’abana batagiraga aho bicara.

Banahawe indobo na kandagira ukarabe zizafasha abari bafite ikibazo cy’aho kubika amazi n’aho gukarabiriza abana.

Umuyobozi w’Akarere ka Nyabihu, Mukandayisenga Antoinette

Umuyobozi w’Akarere ka Nyabihu, Mukandayisenga Antoinette, mbere na mbere yashimye imiyoborere myiza y’u Rwanda irangajwe imbere na Perezida Paul Kagame kuko ibi byose ari we babikesha, avuga ko kwita ku mwana kuva agisamwa bifite akamaro kanini kuko ari ugutegura u Rwanda rw’ejo hazaza.

Mukandayisenga yashimye itsinda ry’ababyeyi b’abagabo rya Bandebereho, asaba ko abana bitabwaho neza no mu miryango batahamo.

Yashimye imihigo abagize iryo tsinda biyemeje ku bushake nta gahato, bikaba bitanga icyizere ko kubishyira mu bikorwa bizoroha.

Yagaragaje ko nta mpamvu y’igwingira muri Nyabihu, kuko haba ubutaka bwera kandi buhingwa igihe cyose cy’umwaka kuko hahora hagwa imvura, ahubwo agaragaza ko hakiri ababyeyi batita ku gutegura indyo yuzuye, abasaba no kwita ku mirima y’igikoni.

Mukandayisenga yagize ati “Igihe muganira mu rugo, mujye muvuga ku kwita ku mikurire y’umwana kuva agisamwa, mwibukiranye ko mu ndyo yuzuye habamo ibyubaka umubiri, ibitera imbaraga, ibirinda indwara, mwumve ko bidakwiriye ko umuntu agura inzoga buri munsi nyamara akananirwa kugura indagara zo kuvanga na za mboga ziri mu rugo.”

Ati “Nta kintu twaba dukora, ntabwo twaba tuyoboye mu gihe tuyobora abantu bagwingiye. Kuyobora umuntu ubizi neza ko ejo adashobora kuvamo Umuyobozi w’Akagari, Umuyobozi w’Umurenge cyangwa umuyobozi w’urugo rwe, ntabwo byaba ari byo.”

Mukandayisenga yashimiye abafatanyabikorwa batekereje kuza gukorera mu Karere ka Nyabihu, kuko umusanzu wabo mu kwita ku mikurire y’umwana ugaragara kandi utanga umusaruro mu gutegura Umunyarwanda wifuzwa.

Yagize n’icyo asaba ababyeyi, ati “ibyinshi barabifite, imboga n’imbuto n’indi myaka byose birahera. Icyo tubasaba, bakomeze bite ku murima w’igikoni, izo mboga bazikoreshe, kandi mu mafaranga babona bagure ibikomoka ku matungo nk’indagara, amagi n’iyo ryaba igi rimwe mu minsi ibiri cyangwa itatu, bashobora no korora inkoko zabafasha kubona igi umwana arya. Natwe turakomeza kubaba hafi nk’ubuyobozi, kandi dufite icyizere ko bizagenda neza.”

Ababyeyi bo barabivugaho iki?

Mukagatare Mariya utuye mu Mudugudu wa Bihinga mu Kagari ka Rega mu Murenge wa Jenda, yagaragaje ko ubwumvikane buke hagati y’umugabo n’umugore mu gucunga umutungo w’urugo ari bimwe mu bituma abana bagaragaraho igwingira n’imirire mibi.

Yagize ati “Twese ntabwo ari ko twejeje, bamwe dutunzwe no gukorera amafaranga yo kudutunga. Jyewe umugore niba nkoreye amafaranga 1,500 nkaba ngomba guhahira abana batanu cyangwa batandatu, nguramo ifu y’ibigori itubuka kugira ngo abana barye bahage, simbashe kubona ibifite intungamubiri zose zikenewe.”

Mukagatare asanga abagabo bakwiye kwisubiraho, bagafasha abagore kwita ku mirire myiza yo mu rugo, ati “Abagabo b’ino bo amafaranga bakorera bayajyana kwinywera inzoga bigatuma abana bagwingira. Umugore niba yakoreye icyo gihumbi na Magana atanu arakijyana mu rugo, ariko umugabo niba yakoreye bibiri cyangwa bitatu ni mu nzoga. Muturwaneho mugire inama abagabo bagabanye kujya mu nzoga, niba yakoreye ibyo bihumbi bitatu cyangwa bibiri, wenda ayahe umugore ajye kugura ibifite intungamubiri zihagije agaburire umwana.”

Umubyeyi w’umugabo witwa Nitabare Ildephonse utuye mu Murenge wa Jenda mu Kagari ka Rega mu Mudugudu wa Rubare ufite umugore n’abana babiri, na we yemeza ko mbere hari abagabo batitaga ku mikurire y’abana, ariko muri iyi minsi ngo baragenda bahindura imyumvire.

Nitabare Ildephonse, umwe mu babyeyi b’abagabo bazwi nka ‘Bandebereho’

Yagize ati “Kuri ubu abagabo twahagurukiye kurwanya igwingira ry’abana. Ubu uzengurutse muri aka Kagari ka Rega, wasanga buri muturage wese yarahagurukiye kwita ku bikorwa bituma umwana atagwingira. Twashishikarijwe kugira umurima w’igikoni duhingaho imboga n’ibindi bihingwa bifasha mu kurwanya igwingira ry’abana. Impamvu hakiri umubare munini w’abana bagwingira ni ikibazo cy’imyumvire y’ababyeyi bamwe itarahinduka aho bajya mu kwinywera inzoga, ntibite ku mwana, ariko muri iyi minsi twahagurukiye kurwanya igwingira twivuye inyuma dufatanyije n’inzego z’ibanze. Ndashishikariza abagabo ko niba wanywaga inzoga nyinshi ukageza saa tatu cyangwa saa yine, ko wanywa gake, saa moya ukitahira ukagera mu rugo ukareba uko umwana amerewe, ukareba niba yariye neza, mbese ukamwitaho.”

Imibare igaragaza ko igwingira mu bana mu Karere ka Nyabihu kuri ubu riri kuri 34,5% bakaba bafite intego yo kuyigabanya cyane, kandi bakizera ko bizashoboka kuko ubushake ngo buhari, dore ko mu 2015 bari bafite abana bari munsi y’imyaka itandatu bagwingiye bangana na 59% nk’uko ubushakashatsi bw’icyo gihe bwabigaragaje.

Bahawe ibikoresho bizabafasha mu kwita ku bana mu ngo mbonezamikurire

Gushyiraho ibuye ry’ifatizo ni igikorwa cyitabiriwe n’abayobozi batandukanye

Mu kwagura iryo shuri rya RCA, hatangijwe ku mugaragaro umushinga wo kubaka izindi nyubako aho ubushobozi ryari rifite bwo kwakira abanyeshuri 180 buzikuba kabiri, nk’uko Umuyobozi w’iryo shuri, Papias Niyigena yabitangarije Kigali Today, mu muhango wabaye kuri uyu wa Gatatu tariki 15 Gicurasi 2024, wo gushyira ibuye ry’ifatizo ku nyumako nshya (New Campus) zigiye kubakwa.

Yagize ati “Tugiye gukora indi Campus iziyongera kuyo dusanganwe yari ifite ubushobozi bwo kwakira abanyeshuri 180, hanyuma twakire abanyeshuri 360 hagendewe ku bushobozi dufite, ubu tumaze kugira abana 280, ntabwo tugendera ku mubare gusa tugendera ku bumenyi bw’umwana."

Uwo muyobozi avuga ko ishuri rimaze gushyira ku isoko ry’umurimo abarenga 100, aho yemeza ko intego bihaye iri kugerwaho hagendewe ku ruhare abasohotse muri iryo shuri bakomeje kugaragaza mu gufasha sosiyete nyarwanda, mu gukemura ibibazo bijyanye n’ikoranabuhanga.

Bashyize ibuye ry’ifatizo ahagiye kubakwa inyubako za RCA

Avuga ko bamwe mu barangije amasomo, bagenda babona bourse mu bihugu bikomeye hirya no hino ku isi, aho abenshi bari kwiga muri Amerika, biturutse ku bushobozi bwabo, abandi bakaba bakomeje kwifashishwa mu bigo bitandukanye.

Ati “Kugeza ubu hamaze kurangiza abana 118, dufite 13 babonye buruse muri Amerika mu mwaka ushize, n’ubu tumaze kubona abandi 15 bazajya kwiga muri Amerika muri Nzeri, mu kubona iyo myanya berekana ibyo bakoze bakabishyira muri Komite zo mu ma Kaminuza yo muri Amerika bagasuzuma iyo mishanga n’ubuhanga bwabo. N’ubu dufite umwana ejo yansabaga uruhushya baramutumiye muri Kaminuza muri Amerika gukora Conference."

Arongera ati “Abandi, hari ubufatanye dufitanye na African Leadership University, bakomereje kwiga muri iyo Kaminuza, ubu bose bafite akazi, ndetse impuzandengo y’umushahara wabo ku kwezi iri ku madolari 600$, hari n’abageza ku 2000$ ku kwezi."

Abarangije muri RCA bavuze uruhare rwabo ku iterambere ry’igihugu

Mu kumenya imibereho yabarangije amasomo yabo muri RCA, Kigali Today yavuganye na bamwe bari mu kazi, bavuga uruhare rwabo mu iterambere ry’igihugu hifashishijwe ikoranabuhanga.

Abiga muri RCA batoranywa hagendewe ku bwenge

Uwitwa Ntwari Liberiste wiga muri African Leadership Univeristy aho abifatanya no gukora muri RSSB mu ishami rya Digital Factory, yavuze ko mubyo afatanyije n’abandi gukora, harimo guhindura ubuzima bw’abanyarwanda hifashishijwe ikoranabuhanga muri serivise zimwe na zimwe bakenera.

Ati “Turi gufasha mu gushyiraho uburyo bunoze bw’ikoranabuhanga, mu kumenya amakuru, muri mituweri, ni gute ababyeyi bishyurwa amafaranga mu gihe babyaye, birazwi ko umubyeyi ugiye kubyara hari amafaranga Leta imwishyurira, umuntu agiye mu kiruhuko cy’izabukuru abona amafaranga ye ate, ni gute umuntu abona uko Kampani akorera imwishyurira imisanzu, n’ibindi."

Arongera ati “Ikintu cyantunguye ni ukugera mu kazi ngasanga ninjye muto cyane, baribaza bati ni gute umwana ungana utya akora muri serivise iremereye, isaba ubuhanga buhanitse nk’iyi, nababwira ko ndangije muri Rwanda Coding Academy, bati oh nibyo koko iryo shuri twararyumvise ritanga ubumenyi buhanitse, ariko bagakomeza gutungurwa n’ubushobozi bambonana ku myaka mike mfite."

Uwo musore yagarutse ku mpamvu abenshi mu barangiza muri iryo shuri bajya kwiga muri Amerika, abandi bakajya muri African Leadership University.

Abiga muri Rwanda Coding Academy bihariye imyanya itatu ya mbere mu marushanwa Nyafurika ku ikoranabuhanga

Ati “Muri Kaminuza zo mu Rwanda zigisha neza muri soft engineering, mu by’ukuri ntabwo bivuze ko hari ikintu gishyashya twaba tugiye kwiga, kuko bigisha ibyo twarenze, ibyo bireba umuntu ugiye kwiga ari mushyashya, ariko kuri twe wajya kwigayo ugiye gushaka urupapuro gusa, icyiza cya African Leadership University kuri twe, n’uko baduha umwanya wo kwiga dukora, ugasanga ubumenyi bwacu turabukoresha dufasha igihugu kandi tuniga."

Mahoro Phinah nawe ati “Tukirangiza bamwe bagiye gukomereza amashuri muri America, abandi tujya muri African Leadership University aho twiga tunakora, ubu hari umushinga nkoramo mpamaze amezi umunani, si ngombwa kuvuga umushahara wanjye icyo nzi cyo mu kazi nkora uruhare rwanjye ku iterambere ry’igihugu rurahari."

Arongeraho ati “Ndashimira RCA, ibyo twagezeho byose tubikesha iryo shuri kandi na n’ubu baracyakomeje kudufatira runini muri Kaminuza twigamo, hafi y’ibintu byose ubona ko harimo uruhare rwabo, bagakomeza kumenya aho tugeze mu gukorera igihugu tubikesha ubumenyi twahawe, birinda ko hagira ikibuhungabanya, ariko ngashimira na Leta yazanye igitekerezo cyo gushinga ririya shuri, natwe ntituzigera tuyitenguha."

Urwo rubyiruko rurasaba abana bifuza kuziga muri RCA cyane cyane abumva bafite urukundo rwa Mudasobwa, guharanira kugira umuhate kuko kugira ubwenge gusa bidahagije, bagakora cyane baharanira kurenga urwego rw’u Rwanda mu ikoranabuhanga.

Ni igikorwa cyitabiriwe na Ambasaderi wa KOREA mu Rwanda, HE Jeong Woojin

Ntwari ati “Ikintu nabwira abashaka kuziga muri RCA, bagomba gutekereza birenze, ndababwira ko igihugu cyacu gifite urugendo rurerure cyane cyane ku bijyanye na tekinoloji, bagomba gukora cyane kandi bagakora bareba ku rwego rw’ibihugu byateye imbere, kuko u Rwanda iyo urebye usanga ruri aho America yari muri za 1990 muri tekinoloji, nagira abana inama yo gutekereza bagendeye ku bihugu byateye imbere, cyane batekereza guhangana ku isoko ry’umurimo na za Singapore mu rwego rwo gufasha igihugu cyacu kuza mu bihugu bikomeye muri tekinoloji."

Mu marushanwa aherutse, abiga muri RCA baherutse kwiharira imyanya 3 ya mbere muri Afurika

Abiga muri RCA bakomeje kwesa imihigo, aho mu marushanwa ku ikoranabuhanga yateguwe n’impuguke kabuhariwe mu ikoranabuhanga za Carnegie Mellon University Africa, ajyanye n’umutekano ku by’ikoranabuhanga na murandasi (Cyber security) aherutse kuba muri uku kwezi kwa Gicurasi 2024, aho buri matsinda atatu ya mbere yagiye ahembwa ku rwego rw’igihugu andi atatu agahembwa ku rwego rwa Afurika, iyo myanya yose yihariwe na RCA.

Mwenedata Apôtre, umwe mubitabiriye ayo marushanwa yagize ati “Amakipe arihuza agahabwa ibibazo bitandukanye ahasigaye mukabishakira ibisubizo, bitewe n’uko irushanwa riteye bahemba amakipe atatu ku rwego rw’amashuri yisumbuye mu gihugu n’amakipe atatu ku rwego rwa Afurika, ibyo bihembo byose nitwe twabitwaye, birimo amafaranga n’ibikoresho by’ikoranabuhanga."

Ishimwe Chloe wari mu itsinda ryatwaye igihembo cya mbere mu Rwanda no muri Afurika, yagize ati “Mu bibazo batubajije byari byibanzemo ikoranabuhanga mu byitwa Guhakinga (Hacking), barebye rero ibisubizo byacu basanga twahize amashuri yose mu Rwanda, ndetse no muri Afurika tuba aba mbere, imyanya ya mbere ihemberwa turayitwara baduha amafaranga, ibikombe n’imidari."

Arongera ati “Abanyarwanda ntimugire ikibazo turahari, RIB nidukenera turi hafi kandi turi mu mishanga yo gukora Applications zitandukanye zifashishwa mu gufata abanyabyaha mu buryo bworoshye”.

Ni instinzi yashimishije Minisiteri y’Ikoranabuhanga no Guhanga Ibishya, aho yageneye iryo shuri ubutumwa bugira buti “Reka dushimire byimazeyo Rwanda Coding Academy, mu guca agahigo mwiharira imyanya itatu ikurikirana ya mbere, mu marushanwa yahuje amashuri yisumbuye mu cyiciro cya Cyber security-Africa 2024 yateguwe na Carnegie Mellon University Africa, ku rwego rw’Umugabane wa Afurika."

Gahunda Ikigo cy’igihugu gishinzwe guteza imbere inyigisho za Tekinike, imyuga n’ubumenyingiro (RTB) ifitiye RCA

Mu gukomeza kuzamura iterambere ry’ishuri rya RCA, Umuyobozi wa RTB, Paul Mukunzi wari witabiriye umuhango wo gushyira ibuye ry’ifatizo ku mushinga wo kubaka amashuri mashya ya RCA, yavuze ko aho RCA igeze hashimishije kandi ko Leta yiteguye kugeza iryo shuri ku rwego ruhambaye.

Ati “Ni ishuri ryicyitegererezo hano mu Rwanda, ryujuje ibipimo byose mpuzamahanga bijyanye n’ireme ry’uburezi, iri shuri rero aho rigeze harashimishije mu gutanga uburezi bufite ireme, bujyanye n’ukoranabuhanga rya mudasobwa”.

Arongera ati “Hagiye kujyaho akandi karusho, aho ibikorwaremezo byose bazajya bakoresha na none biri ku bikimo mpuzamahanga, abarimu bakaba bazakomeza guhugurwa bagere ku rwego rw’impuguke mpuzamahanga, tukibwira ko umwana wize aha atazaba atandukanye n’uwo muri Korea, muri Amerika cyangwa se mu Bwongereza, bya bihugu byose byateye imbere mu ikoranabuhanga rya mudasobwa”.

Uwo muyobozi yavuze ko umwana urangije muri RCA usanga ari imbere mu ikoranabuhanga rya mudasobwa, aho byamaze kurenga imbibi z’u Rwanda bakaba bakenerwa no mu mahanga, ibyo bikajyana n’uko batozwa gukora imishinga itandukanye bakiri ku ntebe y’ishuri.

Igishushanyombonera cy’inyubako nshya za RCA

Igikorwa cyo gushyira ibuye ry’ifatizo ku nyubako nshya za RCA, cyitabiriwe n’itsinda ry’abayobozi bahagarariye igihugu cya KOREA gitera inkunga uwo mushinga binyuze mu kigo cyayo cya KOICA, itsinda ryari riyobowe na Ambasaderi wa KOREA mu Rwanda, HE Jeong Woojin, washimye cyane Perezida Paul Kagame kuri gahunda y’u Rwanda, mu guteza imbere uburezi bushingiye ku ikoranabuhanga.

Ni inyubako zizaba zigizwe n’amashuri, amacumbi y’abanyeshuri, Workshops, Laboratoire, zikazatwara miliyoni 8$ (Miliyari 10 FRW) ku nkunga ya Leta ya KOREA, inyubako zikaziharira miliyoni zisaga 6$, andi akazashorwa mu bikoresho, guhugura abarimu no guteza imbere ikoranabuhanga.

Abaturiye mu gice cya Gishwati bavuga ko uyu muhanda uje kubafasha kugera ku iterambere

Abaturage batuye mu Kagari ka Rega mu murenge wa Bigogwe bavuga ko byari bigoye kugeza umusaruro ku isoko ndetse ko umuhanda mubi watumaga imodoka ziza gutwara umusaruro w’ubuhinzi n’ubworozi zitabageraho uko babyifuza, ariko kubera umuhanda uhuza uturere twa Rubavu, Nyabihu na Ngororero urimo gushyirwamo kaburimbo nimero ya kabiri byatumye bagerwaho n’imodoka zitwara umusaruro.

Ntambara Epimaque utwara Moto avuga ko umuhanda utarakorwa byari bigoye gutwara abagenzi bigatuma n’abageza umusaruro ku isoko bibagora.

Agira ati “Umuhanda utaraza twagendaga dusunika dutinya amabuye yari mu muhanda wareba nabi ugatogoka ku musozi, ariko kubera umuhanda wakozwe ubu ni ukunyerera umuntu akagera iyo ajya. Byoroheje ingendo ndetse n’abafite umusaruro ukomoka ku buhinzi n’ubworozi imodoka zibasanga hano, mu gihe kera umuhanda utaraza abaturage baburaga isoko ry’umusaruro wabo kubera imodoka zatinyaga kunyura muri uyu muhanda.”

Aborozi bavuga ko amata yahoraga apfa bitewe no gutinda kugera ku ikosanyirizo, bati: “imodoka zatinyaga umuhanda, zaza zikaza zigengesera zikagera ku makusanyirizo zitinze amata akangirika, umworozi agahora mu gihombo, ariko ubu igihe cyose amata ageze ku ikusanyirizo, imodoka ziza kuyatwara, akagerera ku rugand igihe. Ibi byatumye amata apfa agabanuka abarozi tubyungukiramo, kandi n’abahinzi imodoka zitwara ibirayi zibisanga ku muhanda mu gihe mbere byabahendaga ku bimanura bakabigeza kuri kaburimbo.”

Uyu muhanda uri gushyirwamo kaburimbo ya Kabiri

Uretse abakora ubuhinzi n’ubworozi, abaturage baturiye umuhanda wa Gishwati bavuga ko bagejejweho amazi n’amashanyarazi bituma ubuzima bwabo burushaho kuba bwiza. Bavuga ko ivuriro rya Arusha riherereye mu nkengero za Gishwati ritari rifite amashanyarazi ariko yamaze kuhagera.

“Abaganga mu gihe cy’ijoro bakoresha itoroshi mu kuvura abarwayi, ariko ubu twagejejweho amashanyarazi, byorohereza n’imodoka zitwara abarwayi zishobora kutugeraho mu gutwara abarwayi.”

Umuyobozi w’Akarere ka Nyabihu wungirije ushinzwe iterambere ry’ubukungu Habanabakize Jean Claude avuga ko Akarere ka Nyabihu gashima imihanda yakozwe igafasha abaturage kugeza umusaruro ku isoko.

Agira ati “Akarere kacu gakungahaye ku buhinzi n’ubworozi, kuba katari gafite imihanda ibafasha kugeza amusaruro ku isoko cyari igihombo gikomeye, ariko ubu hakozwe ibirometero 210 by’imihanda y’imigenderano yorohereza abahinzi n’aborozi kugeza umusaruro ku isoko, muri Gishwati harimo kubakwa umuhanda wa kaburimbo uzaba ufite ibirometero 93, muri byo ibirenga 30 byamaze kuzura, bituma abaturage bahindura ubuzima.”

Habanabakize Jean Claude avuga ko hamaze gukorwa amaterasi abarirwa kuri hegitare ibihumbi 10 bituma ubutaka butagenda ndetse ifumbire iguma mu butaka umusaruro ukiyongera.

Ubuyobozi bw’uruganda rwa Mukamira rukusanya umusaruro w’amata agera kuri litiro ibihumbi 30 ku munsi ava mu turere twa Musanze, Nyabihu, Ngororero na Rubavu buvuga ko bitezeko uyu muhanda wa Gishwati nurangira umusaruro uziyongera.

Ubworozi bw’Intama babufata nk’ikirombe cya zahabu

Ikirere cy’i Mukamira n’uturere tuhegereye twa Nyabihu, Rutsiro, Musanze, Gakenke, Burera na Gicumbi, usanga ari ahantu hakonja kandi hahora amafu, hagafasha itungo ry’Intama kororoka bitewe n’uko ridakunda ahashyushye.

Umuturage witwa Maniriho wo mu Karere ka Nyabihu mu Murenge wa Mukamira, Akagari ka Rurengere, avuga ko iwabo higanje ubworozi bw’intama bitewe n’abakunda kizigura bavuye hirya no hino mu Rwanda no hanze muri Congo(DRC).

Ati “Intama ni imari ishyushye hano. Ubundi akamaro k’itungo ni ukuryorora rikakubyarira inyungu, wagira akabazo ukaba waryitabaza ugacyemura ikibazo ufite.”

Maniriho wari washoye Intama ku isoko ry’i Mukamira avuga ko ari zo zoroshye korora agereranyije n’Ihene, kuko ngo zidasaba isuku nyinshi nyuma yo gusasirwa. Maniriho yahahuriye n’umucuruzi witwa Mwanyamisuchirezi Esperance, umwe mu bahora barema isoko ry’amatungo magufi rya Mukamira bavuye muri DRC, bakarangura Intama n’Ihene zo kujya kubaga hagamijwe inyama.

Intama yabaye imari ishyushye ku batuye Akarere ka Nyabihu

Mwanyamisuchirezi wari upfunyitse igifurumba cy’amafaranga yo kugura Intama, avuga ko zimwungukira cyane n’ubwo atavuga inyungu akuramo kuri buri ntama arangura hagati y’amafaranga ibihumbi 40 Frw na 60 Frw. Mwanyamisuchirezi na bagenzi be bavuye muri DRC barangura amatungo magufi bakayapakira imodoka zikambukira ku mupaka wa Goma.

Ibarura rusange ry’Abaturage ryakozwe n’Ikigo cy’Ibarurishamibare muri 2022 rivuga ko ubworozi bw’intama mu Rwanda bukorwa n’ingo zibarirwa munsi ya 5% mu Gihugu hose.

Ni imwe mu mpamvu zatumye Minisiteri y’Ubuhinzi n’Ubworozi (MINAGRI) ifatanyije n’Ikigega Mpuzamahanga giteza imbere Ubuhinzi n’Ubworozi, IFAD, bishyiraho umushinga witwa PRISM (Partnership for Resilient and Inclusive Small Livestock Markets) kugira ngo bongere umubare w’intama mu Gihugu.

Ni umushinga ugamije kurwanya ubukene binyuze mu guha abaturage b’amikoro make amatungo magufi arimo Ingurube, Inkoko, Intama n’Ihene kugira ngo ingo zikora Ubworozi ziyongere kuva kuri 205,924 zagaragajwe n’Ibarura rusange.

Aborozi b’intama b’i Nyabihu na Rutsiro bazigurisha ku bavuye muri Congo

PRISM iteganya ko mu myaka itanu kuva muri 2021 kugera muri 2026, ingo zigera kuri 23,355 zizahabwa amatungo magufi bahereye ku nkoko, ariko hakaba harimo gutangwa n’Intama mu turere twa Nyabihu, Rutsiro, Gakenke, Musanze, Burera na Gicumbi.

Umushinga PRISM uvuga ko kugeza ubu umaze gutanga intama zigera ku 1,208 muri utwo turere, hamwe no kubaka hirya no hino mu Gihugu amasoko 15 y’amatungo magufi arimo n’irya Mukamira.

Iyo mpanuka yabaye ku wa Gatanu tariki 04 Gicurasi 2024 mu masaha y’igicamunsi, ubwo abagenzi bari bamaze kuva muri iyo modoka, umushoferi yayiparitse ku muhanda mu gihe yari ategereje abandi bagenzi, igiti kirayigwira.

Iyo modoka yagwiriwe n’icyo giti nta muntu n’umwe wari uyirimo, nk’uko Umunyamabanga Nshingwabikorwa w’Umurenge wa Mukamira, Bizimana Placide yabitangarije Kigali Today.

Yagize ati “Umushoferi yamaze kugeza abagenzi aho abageza, aparika iyo modoka aho basanzwe baparika ku cyapa cya Taxi. Akimara guparika iyo modoka hari aho yanyarukiye, akiva aho, kubera umuyaga wari mwinshi, igiti kirayigwira irangirika cyane”.

Arongera ati “Imana yakinze ukuboko ntihagira umugenzi uhasiga ubuzima kuko igiti cyagwiriye iyo modoka ubwo abagenzi na shoferi bari bamaze gusohoka mu modoka”.

Uwo muyobozi avuga ko nyuma y’iyo mpanuka, nta yindi mpanuka yongeye guterwa n’imvura muri ako gace, nubwo imvura yakomeje kugwa ari nyinshi.

Abagemuye umusaruro mwinshi kurenza abandi bahawe n’ibikoresho bitandukanye

Abo bahinzi ni abibumbiye muri Koperative KOAIKA igizwe n’abanyamuryango 1,317, aho abahawe ubwasisi ari 1,116, nyuma yo kugemura umusaruro mwiza kandi mwinshi kuri SOPYRWA.

Mu bwasisi bahawe ku itariki 24 Mata 2024, harimo umuceri, ibikoresho bibafasha gutera imiti mu myaka no kwica udukoko ku matungo, ndetse na mituweli.

Abo bahinzi, bavuga ko bafite byinshi barusha abakora ubundi buhinzi, kubera amahirwe babona, aho Koperative ibishingira SACCO ikabaha amafaranga yo kwifashisha mu gihe batareza, dore ko n’igiciro cy’ibireti gikomeje kuzamuka.

Muzuka Aloys wejeje toni ebyiri n’igice z’ibireti, ati “Umuhinzi w’ibireti abayeho neza, tumaze kugera ku iterambere rihambaye, kuko duhemberwa ku gihe kandi ibiciro bikaba bikomeje kuzamuka. Muri uyu mwaka umusaruro wacu wazamutse inshuro ebyiri, ubu ikilo kigeze ku 1,260 FRW, ni amafaranga ashimishije. Uyu munsi twaje gufata ubwasisi duhabwa na SOPYRWA bitewe n’uko turi muri koperative y’indashyikirwa ya KOAIKA”.

Bahawe n’ibiribwa

Uwo muhinzi agaragaza uburyo ubuhinzi bw’ibireti bwunguka ati “Uyu mwaka nagemuye toni 2,5 ni ukuvuga amafaranga asaga Miliyoni 3. Umuhinzi w’ibireti ateye imbere cyan,e igishoro ni gito kandi umuhinzi arunguka, umurima ugira n’ubudahangarwa, aho ahavuye ibireti hera ibirayi byinshi”.

Mukagatare Annonciata ati “Umuhinzi w’ibiteri ameze neza, twaje gufata ubwasisi kubera ko koperative yacu yungutse. Ikindi batwishyurira umusaruro wacu ku gihe, ushatse amafaranga yo kwifashisha y’ingoboka mu gihe atari yeza bagahita bayamuha, hari byinshi turusha abandi bahinzi”.

Nsengiyumva Gaspard ati “Twaje kugabana amafaranga y’inyungu kubera ko twakoze neza, aho ntuye baranzi ndi umugabo witeje imbere, amatungo n’amasambu naraguze, umuntu udahinga ibireti aho bishobora gutanga umusaruro yarahombye”.

Mu ihuriro ry’Amakoperative ahinga ibireti mu Rwanda, KOAIKA ngo ni yo iza imbere mu kugira umusaruro mwinshi no mu bwiza bwawo, aho babona umusaruro uruta ibireti byose byera mu Ntara y’Amajyaruguru, nk’uko Perezida w’iyo Koperative, Munyandekwe Jean de Dieu abivuga.

Bamwe mu bagize ubuyobozi bwa Koperative

Ati “Mu makoperative agize ihuriro ry’ibireti mu Rwanda, KOAIKA niyo ya mbere, aho itanga umusaruro usumba uwera mu Ntara y’Amajyaruguru. Ibyo tubikesha kuba abaturage bacu barazamuye imyumvire y’ubuhinzi bw’ibireti, bakabikorana isuku kandi bagakurikiza amabwiriza y’ubuyobozi bwabo, bagahabwa n’ingemwe zituburwa mu buryo bunoze ku bufatanye na SOPYRWA”.

Ndangurura Cyprien, Umukozi wa Horizon SOPYRWA ushinzwe ubuhinzi bw’ibireti mu Ntara y’Iburengerazuba, aremeza ko muri iyo ntara ubuhinzi bw’ibireti bukunzwe na benshi, kuko bubafasha kubungabunga ubutaka bwabo, kandi n’imiti iva mu bireti bahinga ikabagarukira bakayikoresha haba mu buhinzi cyangwa mu bworozi.

Ndangurura yavuze ko ibireti byateje imbere kandi ubuhinzi bw’ibirayi muri iyo ntara, Ati “Mu Ntara y’iburengerazuba hazwi nk’ikigega cy’igihinga cy’ibirayi mu bihingwa nganduraruko, ibyo bigaterwa n’ubuhinzi bw’ibireti butuma ubutaka bukomeza kugira ubudahangarwa, mu Murenge wa Kabarwa abaturage bamaze kumenya icyiza cyo gusimburanya ibihingwa mu mirima, aho bikomeje gutanga inyungu ku baturage mu kongera ireme ry’ubutaka”.

Igihingwa cy’ibireti gitunze benshi

Intara y’Iburengerazuba, ihingwa ibireti ku buso butari munsi ya hegitari 1500. Umwaka ushize abibumbiye muri KOAIKA bejeje toni 545 z’ibireti, bakaba bihaye intego yo kweza toni 600.

Ndangurura Cyprien, Umukozi wa Horizon SOPYRWA ushinzwe ubuhinzi bw’ibireti mu Ntara y’Iburengerazuba

Perezida wa Koperative KOAIKA, Munyandekwe Jean de Dieu

Uko Yubahe yari ameze mbere na nyuma yo gufashwa akayungururirwa amaraso, ubu araseka

Mu kwezi kwa gashyantare 2024, nibwo Kigali Today yakoze inkuru itabariza Yubahe wari wakuwe ku buvuzi bwo kuyungurura amaraso kubera inshuro yemererwa n’ubwisungane mu kwivuza zari zarangiye.

Umuryango we wamucyuye mu rugo kugira ngo bategereze ko umunsi we wanyuma ugera, ariko ubwo inkuru yakorwaga igaragaza ko Yubahe urwaye impyiko akeneye ubufasha bwo kuyungurura amaraso, bw’amafaranga agera kuri Miliyoni eshanu mu gihe hategerejwe ko hakorwa ibizami byo gupima uwamwemereye impyiko no kuyimushyiramo, abantu batandukanye baritanze asubira ku buvuzi bwo kuyungurura amaraso yongera kugarura inseko.

Imwe mu ifoto yongeye kwereka umunyamakuru wa Kigali Today, Yubahe Beatrice yatangaje ko ashimira abantu bose bitanze akaba akiri muzima.

Agira ati “Kiriya gihe sinashoboraga kujya ku bwiherero, sinashoboraga kurya cyangwa kureba, numvaga ko ibyanjye byarangiye, ariko abagiraneza baritanze none narorohewe kandi mfite icyizere ko nzakira.”

Yubahe Beatrice wari ugeze mu mwaka wa gatatu w’amashuri yisumbuye, ariko akaza kurwara impyiko bitunguranye ndetse agahita ashyirwa ku buvuzi buyungura amaraso, avuga ko afite icyizere ko muri Nzeri azasubira ku ishuri agakomeza kwiga.

Agira ati “Ndizera ko abagiraneza bazakomeza kumfasha kugeza mpinduriwe impyiko maze ngasubira ku ishuri, kandi nifuza kwiga ikiganga, maze nanjye nkazajya nita ku barwayi.”

Nubwo yabyimbutse, akomeje ubuvuzi bwo kuyungurura amaraso ndetse akaba yarakuwe mu bitaro bya Gisenyi, aho yavurizwaga ahubwo yoherezwa kuvurizwa i Kigali ndetse yandikirwa imiti ababyeyi be bavuga ko ihenze, nubwo bitabaca intege zo kwizera ko umwana wabo azavurwa agakira.

Uwifashije Beatrice, umubyeyi wa Yubahe Beatrice ati “Iyabikoze izakomeza kubikora, kandi n’abagiraneza batwitayeho twizera ko bazakomeza kudufasha, kuko batangiye ibizami byo gupima ubushobozi bw’impyiko ya Yubahe Beatrice n’uzayimuha kugira ngo harebwe ko byahura.”

Bakomeje gusaba abagiraneza kubaba hafi

Uwifashije yabwiye Kigali Today ko iyo batagira abagiraneza umwana we aba yarapfuye, icyakora ngo ubufasha bwatanzwe n’abagira neza ni bwo burimo gukoreshwa mu kuyungurura amaraso no gukoresha ibizami n’ubwo amafaranga agiye kubashirana.

Agira ati “Twarafashijwe kandi turashima pe! Abantu tutazi twabonye baduha amafaranga, ndetse n’Umurenge wa Karago waduhaye ibihumbi 300, na ho Akarere ka Nyabihu kaduhaye ibihumbi 480. Twari twarabonye umuterankunga w’umuzungu wishyuraga buri cyumweru, ariko yaje guhagarara kuko ubu burwayi busaba amafaranga menshi, kuko ku Kimihurura dukoreyeyo ukwezi n’igice ari we wishyura.”

Uwifashije avuga ko we n’umwana we ubu barimo kuba muri Kigali, kuko umwana ayungururwa amaraso gatatu mu cyumweru bityo akaba atashobora gutaha iwabo i Nyabihu, akaba akomeje kugorwa no kubona aho kuba no kubona ibibatunga.

Agira ati “Nk’uyu munsi bamupimye basanga ari mu mutuku, kubera guhangayikishwa no kubona amafaranga yo kwa muganga, ntitwamenye ko akeneye imirire yihariye none abaganga batubwiye ko adashobora guhindurirwa impyiko akiri mu mutuku. Badutegetse ibyo tugomba kumugaburira ariko ntituzi aho bizava, twe twamuhaga ibishyimbo, akawunga n’ibindi tubonye, twabona yirira tukumva ko bimeze neza, ubu nabwo dutegereje ko Imana idufasha ikaduha icyerekezo.”

Umubyeyi we akomeza avuga ko ubufasha Yubahe Beatrice yari akeneye, hagiye kwiyongeramo kubona amafunguro yihariye, ariko akizera ko mu batuye muri Kigali hashobora kuboneka uwayabaha mu gihe bakomeje urugendo rwo gutegereza ko ahindurirwa impyiko.

Nubwo Ikigo cya RSSB cyari cyatangarije Kigali Today, ko umurwayi w’impyiko ukeneye kuyungurura amaraso ashobora kurenza inshuro 18 agenerwa, Uwifashije avuga ko kuva bakurwa mu bitaro bya Gisenyi, ubwisungane mu kwivuza ntacyo bwongeye kubafasha, ahubwo bishyura ijana ku ijana, akaboneraho gusaba abagiraneza gukomeza kubafasha kugira ngo bazashobore guhindura impyiko.

Ati “Turashimira abadufashije, kuko hari umusaruro byatanze, dukomeje kubona ubufasha umwana bamushyimo impyiko. Ndakomeza gusaba abagira icyo babona gukomeza kudufasha.”

Uwifashije ashingiye ku mafaranga bakoresha, avuga ko mu cyumweru kimwe bakoresha ibihumbi 240 mu kuyungurura amaraso, bakoresha imiti yishyurwa ibihumbi 60 ndetse hakaba n’ibindi bizamini bishobora gukorwa bitunguranye kandi na byo bihenda.

Akomeza avuga ko nubwo atamenya umubare w’amafaranga akenewe, ariko ngo kugeza mu kwezi kwa karindwi bazaba bakeneye nibura atari munsi ya miliyoni esheshatu.

Uwakwifuza gukomeza gutera inkunga uyu muryango, yanyura kuri nomero ya telefone ya nyina w’uyu mwana, Uwifashije Beatrice: 0791426650.

Inkuru bijyanye:

Yubahe urwaye impyiko akeneye ubufasha bwo kuyungurura amaraso

Aha ni hamwe izo nka zishokera

Muri uwo Murenge wa Bigogwe, nta hantu hagaragara amazi ashobora kwifashishwa mu gushora inka zabo, dore ko na robine nini bari bubakiwe itagikora, abaturage bakaba bakomeje gushora inka zabo mu biziba by’amazi y’imvura aba yiretse mu byobo.

Abaganiriye na Kigali Today, bagaragaje impungenge bafite kuri icyo kibazo, aho bemeza ko inka zabo zikomeje kugaragaza uburwayi bw’inzoka, ibyo bikagabanya n’umukamo.

Uwitwa Rwanamiza ati “Inka zacu zikomeje kugaragaza ibimenyetso bw’uburwayi bw’inzoka, zirakorora bikadutera impungenge, byose biraturuka ku kibazo cyo kubura amazi”.

Arongera ati “Iyo zinyweye ibi biziba bizitera kurwara, mwadukorera ubuvugizi tukagezwaho amazi, dushora ibitogogo (ibizima), iyo tugize amahirwe imvura ikagwa turareka, ariko ubundi zishoka ibiziba”.

Gakaramu Phenias ati “Muri aka gace dufite ikibazo cy’amazi, iyo zitabonye amazi y’imvura zishoka ibirohwa by’amazi aba yaretse mu byobo bitandukanye, ni ikibazo tumaze igihe kinini tubaza ariko nta gisubizo”.

Barasaba kugezwaho amazi inka zabo zikabona aho zishokera

Arongera ati “Kunywa ibiziba bituma inka irwara ikabura imbaraga n’umukamo ukagabanyuka. Kororera hano ntibitworohera, turasaba ko baduha amazi kuko amasoko arahari nk’aho hakurya Gatagara hari isoko, bashobora kudufasha bakayifatiraho amazi bakayatugezaho, ingaruka zo kunywa ibiziba ni ukurwara inzoka nyine, kuko inka itari kumywa amazi meza ntiyatanga umusaruro”.

Aburukundo Fulgence, umukozi ushinzwe ubworozi (Veternaire) mu Murenge wa Bigogwe, avuga ko icyo kibazo cy’amazi gihari, agashishikariza aborozi kujya bafata amazi y’imvura mu gihe kitarakemuka.

Ati “Hari agace hano batabona amazi meza bakajya gushora inka mu kidendezi, ariko ibyo ni ibintu tubakangurira kwirinda kuko icyo kidendezi kiba kirimo mikorobe nyinshi zanduza izo nka, ahubwo nkabashishikariza kugira ibigega bifata amazi ku ngo, nimba ari umworozi woroye inka nke byamufasha, kuko ino dukunze kugusha imvura cyane”.

Arongera ati “Hari n’abandi borozi bishyize hamwe, aho hari umushinga ugiye kubafasha kumanura amazi bayakwirakwize mu nzuri, hari uruhare rusabwa umworozi kugira ngo agezweho amazi. Ku migezi itagikora, harakorwa ubuvugizi izatunganywe abaturage babone amazi”.

Robine yabafashaga kubona amazi y’inka zabo imaze igihe kinini idakora

Bigogwe iza ku mwanya wa Kabiri mu Mirenge yoroye inka nyinshi mu Karere ka Nyabihu, ahabarurwa inka 6840 hagendewe mu ibarura riherutse gukorwa muri 2024, uwo Murenge ugakurikira uwa Rambura yabaruwemo inka zigera ku 7500.

Aba bahinzi biteze kongera ireme ry’umusaruro n’ubwinshi bwawo

Ibyo bikoresho bigizwe n’amashitingi agenewe kwanikaho umusaruro, byahawe abanyamuryango 55 mu bagera ku 118 bibumbiye muri Koperative Terimbere Muhinzi w’Ibigori Ibishyimbo (KOTEMII), mu gikorwa cyabaye ku wa Gatanu tariki 29 Werurwe 2024, bijyanirana no kwishyurira abagera mu 100 Mituweli n’umusanzu wa EjoHeza.

Uwagahutu Jean Damascène, ni umwe mu bahinzi witeze guca ukubiri n’imbogamizi zo gusarura adafite uburyo awubungabunga, kubera kutagira ibyo kuwanikaho bihagije.

Yagize ati “Nasaruraga ibigori cyangwa ibishyimbo, nabigeza mu rugo nkabura uko mbyanika ngo byume neza kuko nta buryo bikoresho bihagije nari mfite. Shitingi imwe nsanganywe yabaga ntoya bikaba ngombwa ko njya gutira mu baturanyi, hakaba ubwo banampakaniye ariko ubungubu kuba mbonye iyanjye bigiye kumfasha kubungabunga umusaruro”.

Mujawimana Liberatha yungamo ati “Imwe nsanganywe yarashaje cyane. Najyaga nanika umusaruro ukajyamo uruhumbu kubera kuwanika ku birago no ku mbuga. Habaga huzuye imyanda na za mikorobe, bimwe nkabimena n’ibyo njyanye ku isoko bakabigura biciraguraho. Iyi shitingi nshya mpawe ije kunyunganira no gukemura izo mbogamizi”.

Abanyamuryango 118 ba Koperative KOTEMII bavuga ko bari bakeneye amashitingi yiyongera ku bwanikiro buto bafite

Iyi Koperative yibanda ku gihingwa cy’ibigori n’ibishyimbo ku buso bwa Ha zisaga 100 mu Murenge wa Rugera mu Karere ka Nyabihu. Abahinzi bavuga ko hari ubwo byabagoraga kubona aho banika umusaruro mu gihe babaga bejeje ibihingwa, kuko n’ubwanikiro buhubatswe bwari bucye kandi ari butoya.

Kuba bahawe ibi bikoresho hiyongereyeho no kwishyurirwa Mituweli y’umwaka wa 2024-2025 n’umusanzu wa EjoHeza, Hakizimana Jean Claude, Umuyobozi wa Koperative KOTEMII, avuga ko ari mu rwego rwo kubaka ubushobozi bw’aba bahinzi, ngo babone uko bagera ku ntego yo kongera umusaruro mu bwiza no mu bwinshi, bityo bagure n’amasoko.

Ati “Ibikoresho bifasha mu kurushaho kubungabunga umusaruro beza twari twarabahaye ubushize, byari byaramaze gusaza dusanga ari byiza ko twabaha n’ibindi kugira ngo urusheho kubungabungwa neza, mu kwirinda ingaruka zaturuka ku kuwanika ahantu hadafututse kuko bituma ireme ry’umusaruro ridindira ndetse ukaba mucyeya”.

Ati “Kimwe n’ubwisungane mu kwivuza bishyuriwe, umuntu ntiyahinga ngo yeze abashe kugeza umusauro ku isoko mu gihe arwaye. Ni byiza ko n’ubuzima bwabo busigasirwa bityo n’intego bafite bazigereho neza”.

Mukandahunga Enathe, umukozi w’Umurenge wa Rugera ushinzwe amakoperative, ishoramari n’Iterambere ry’Umurimo wari unahagarariye ubuyobozi bw’ibanze muri iki gikorwa, yagaragaje ko ibi bikorwa byose bakorewe ari inyungu kuri bo.

Ati “Ni ngombwa rero kubifata neza kuko ubwo umusaruro uzaba wiyongereye kandi ari mwiza, bizababyarira inyungu mugere no ku iterambere”.

Akanyamuneza kari kose ku bahinzi

Iyi Koperative iri kunoza umushinga w’ubutubuzi bw’imbuto no kuzongerera agaciro, mu kwirinda guhanga amaso iziva ahandi. Mu rwego rwo kuzamura urwunguko rw’iyi Koperative bateganya kwagura isoko ry’umusaruro n’ingano y’uwo beza, ukajya hejuru ya toni 4 kuri Hegitari imwe.

Umuyobozi wa Koperative, Hakizimana Jean Bosco ashyikiriza uwari uhagarariye Ubuyobozi muri iki gikorwa amafaranga y’ubwisungane mu kwivuza n’Umusanzu wa EjoHeza by’abahinzi

Umuyoboro w’amazi watashywe witezweho guhaza ingo zisaga ibihumbi 13

Hagumimana Amani utuye mu Kagari ka Mpinga, mu Murenge wa Shyira, yavuze ko amazi bahawe bari bayakeneye, kandi ko azaba uw’imbere mu gukumira abayonona.

Ati “Umuyoboro w’amazi wahozeho mbere wari warashaje cyane, amatiyo yose yarangiritse, tukabura amazi bya hato na hato, tugashoka ibiziba by’umugezi wa Mukungwa, tugahora turwaye inzoka zo mu nda, bamwe bagahora bacibwamo, abandi barwaye indwara z’uruhu n’ibicurane, zaratuzonze tudafite aho tuzicikira”.

Ati “Ubu rero tugiye kubaho gisirimu, tujye tuyanywa kandi dukarabe, twambare imyenda imesesheje amazi meza. Ubungubu turi mu murongo mwiza Leta yacu ihora ishishikariza abaturage, kubaho neza tubikesha aya mazi meza twegerejwe".

Twizeyimana Clementine we ashimira Perezida Kagame ukomeje kubagezaho ibyiza.

Yagize ati “Uyu muyoboro ni umwe mu mpamvu nyinshi ziduteye gushimira byimazeyo Umuyobozi w’Igihugu cyacu Paul Kagame, uburyo adahwema kutugezaho ibikorwa bifatika nk’ibi bihindura imibereho ubuzima bukaba bwiza. Tumwizeza kubirinda tubifata neza kandi aho bigize ikibazo tukazajya twihutira gufatanya n’ababishinzwe tubibungabunge”.

Bavuga ko bazawufata neza bawurinda icyawangiza

Mu gikorwa cyabaye ku wa Gatanu tariki 22 Werurwe 2024, cyo gutaha uyu muyoboro w’amazi, wasanwe ku bufatanye n’Umuryango Water for People, mu mushinga wawo witwa ‘Isoko y’Ubuzima’, Umuyobozi wungirije w’uyu mushinga, Uwonkunda Bruce, yagaragaje ko Akarere ka Nyabihu kari mu Turere bigaragara ko dukeneye kurushaho kunoza isuku n’isukura, binyuze mu kwegereza abantu amazi meza.

Ati “Mu Turere 10 two mu gihugu dukoreramo, bigaragara ko abaturage benshi bakeneye amazi meza. Mu ntumbero dufite harimo no kubaka ubushobozi bwabo binyuze mu kuyabegereza no gukomeza gukora ubuvugizi mu bandi bafatanyabikorwa ngo bahagurukire kubigira intego. Nk’uko bigaragazwa n’inyigo ubwayo, ubona ko hakenewe nibura Miliyari 40 ngo abaturage bo muri kano Karere babone amazi meza. Ibyo rero kugira ngo bishoboke, ni ngombwa ko habaho ubutanye bw’inzego zose”.

Uretse abaturage biteze umusaruro kuri uyu muyoboro, ubaye n’igisubizo ku Bitaro bya Shyira ibigo by’amashuri, insengero, isoko rya Vunga n’ahandi hahurira abantu benshi ubusanzwe hagorwaga no gutanga serivisi bitayafite mu buryo buhagije nk’uko na Dr Mukantwaza Pierrette uyobora Ibitaro bya Shyira abivuga.

Ati “Ubu noneho twabonye amavomero ahagije ku buryo no kunoza isuku yaba iy’inyubako n’abatugana baje kwivuza babona amazi asukuye bigiye kujya byoroha, binagabanye umubare w’abarwaraga indwara ziterwa no gukoresha amazi mabi, kuko twajyaga tubacyira kenshi”.

Akanyamuneza ku baturage begerejwe umuyoboro w’amazi meza kari kose

Umuyobozi wungirije w’Akarere ka Nyabihu ushinzwe iterambere ry’ubukungu, Habanabakize Jean Claude, yavuze ko hari icyiyongereye ku bipimo aka Karere gafite mu gukwirakwiza amazi meza.

Ati “Turi ku kigero cya 77,9% by’abafite amazi meza. Gusa dukurikije umuvuduko w’intego twihaye, bigaragara ko tugifite umukoro ukomeye. Hari imiyoboro twagiye tubarura ngo tumenye imiterere yayo n’ibigomba gusanwa, aho nk’ubu dufite igera ku 9 turi mu nzira yo kuvugurura ku bufatanye na WASAC n’abandi bafatanyabikorwa. Birumvikana ko nitubigeraho, umubare munini w’abaturage uzagerwaho n’amazi meza bityo n’intego yo kuyabegereza ku kigero cya 100% na yo tuyigereho”.

Yashimiye aba bafatanyabikorwa bagize uruhare mu ivugururwa ry’uyu muyoboro, ndetse n’abaturage bemeye gutanga ubutaka bwabo bwanyujijwemo amatiyo y’amazi.

Uyu muyoboro Rubindi-Vunga ufite ibilometero 34.2, aho witezweho kugeza amazi ku ngo 13,456, ukaba wuzuye utwaye Miliyoni 600 z’Amafaranga y’u Rwanda.

Ni umuyoboro watashywe ku mugaragaro hanizihizwa Umunsi Mpuzamahanga w’amazi, wahujwe no kwibukiranya uruhare rw’amazi mu kurengera ibidukikuje n’urusobe rw’ibinyabuzima.

Ikarita igaragaza aho Akarere ka Nyabihu gaherereye

Uyu Mukuru w’Umudugudu, abaheruka kumubona bavuga ko mu ijoro ribanziriza umunsi byamenyekaniyemo ko yapfuye, ngo we n’undi mugabo basanzwe ari inshuti, baba baravuye aho mu gace yabagamo bajya kunywera muri kamwe mu tubari two mu Murenge wa Shyira, nyuma y’aho akaba aribwo yaje kuboneka yapfuye, bigakekwa ko yishwe dore ko umurambo we wasanzweho ibikomere.

Ni amakuru yemejwe n’Umunyamabanga Nshingwabikorwa w’Umurenge wa Shyira Ndandu Marcel, agira ati: “Umurambo wabonywe n’umuturage warimo agenda mu masaha ya mugitondo mu Mudugudu wa Mukaka, Akagari ka Mpinga mu Murenge wa Shyira. Bikimara kumenyekana abantu batatu barimo uwo bari baturukanye mu Murenge w’iwabo, nyiri akabari banyweragamo inzoga n’undi muntu basangiraga bahise batabwa muri yombi, kuko n’ubundi ni bo bari basangiye kandi ari muzima ariko nyuma biza kugaragara ko yapfuye. Bahise bashyikirizwa ubugenzacyaha ngo bakurikiranwe bityo n’iperereza rikomeze”.

Abaturage barimo n’abageze aho umurambo wa Mudugudu wari uri, bavuga ko yishwe urw’agashinyaguro dore ko wari ufite ibikomere byinshi ndetse yanaciwe ubugabo.

Basaba ko ababigizemo uruhare mu gihe bafatwa bagahamwa n’icyaha, bazahanwa mu buryo bw’intangarugero.

Mugabarigira Eric w’imyaka 45, ngo yari amaze ku buyobozi bw’Umudugudu ukwezi kurengaho iminsi micye. Gusa nanone ngo yari yarigeze n’ubundi kuyobora uwo Mudugudu mu myaka yashize; ndetse ngo mu miyoborere abaturage bamutoreye, ngo yakoraga inshingano ze neza.

Gitifu Ndandu Marcel asaba abaturage kujya bihutira gutangira amakuru ku gihe, mu gihe haba hari abafitanye ibibazo bikamenyekana hakiri kare.

Ati: “Abagirana ibibazo ibyo aribyo byose baba bakwiye kubimenyekanisha mu muryango, byananirana bakagana inzego zibegereye yaba Isibo, Umudugudu bikazamurwa mu Kagari cyangwa Umurenge. Izi nzego zose zubakitse mu buryo zifasha umuturage wese kwirinda kugongana na mugenzi we.”

“Amakimbirane abantu baba bafitanye ni ngombwa ko akemuka hakiri kare, kandi amategeko y’u Rwanda abereyeho guhana umuntu wese wakora icyaha icyo ari cyo cyose. Ntibikwiriye rero ko umuntu arindira kugongwa n’itegeko, ahubwo tubereyeho kubikumira binyuze mu kwirinda kwishora mu byaha”.

Umurambo wa Mugabarigira wahise ujyanwa mu bitaro bya Shyira ngo ukorerwe isuzumwa, ndetse iperereza ku bakekwaho uruhare mu rupfu rwe rihita ritangira.

Bahinga ibihumyo bakabyigisha n’abaturage

Ni ishuri riherereye mu Murenge wa Bigogwe mu Karere ka Nyabihu, rifite amashami atandukanye arimo ubuhinzi n’ubworozi.

Iyo abanyeshuri bashyira mu ngiro ibyo bigishwa, begera abaturage bakabigisha ubuhinzi bubafasha kurwanya imirire mibi n’igwingira mu bana, aho babigisha guhinga ibikungahaye ku ntungamubiri birimo imboga zidakunze kuboneka muri ako gace, nk’ahantu haba ubukonje bwinshi.

Ni abanyeshuri batangiriye ubwo buhinzi mu kigo cyabo, barihaza ku bihingwa bikungahaye ku ntungamubiri birimo ibihumyo n’ubwoko bw’imboga butandukanye, buhingwa ku buso buto ariko bugatanga umusaruro, bakabifashwamo n’ikoranabuhanga ryo guhinga mu nzu (Greenhouse).

Abaturiye iryo shuri baremeza ko kuba ribegereye ribafasha kunguka ubumenyi mu kwirinda indwara ziterwa n’imirire mibi n’igwingira mu bana, aho bamaze kumenya akamaro ko kurya iryo yuzuye bihingiye ku buso buto, nk’uko bamwe muri bo babitangarije Kigali Today.

Kubera ikoranabuhanga bahinga imboga zitaboneka muri ako gace

Mbanzamihigo Jérôme ati “Kubona abana nk’aba n’abayobozi babo badutekerezaho bakatwigisha uburyo bwo guhinga biradushimisha, ubu twamaze kumenya uko twarwanya indwara ziterwa n’imirire mibi, twamenye agaciro k’imboga n’imbuto, turatera ibiti bya Avoka, twamenye sereri, beterave n’ibindi, twaciye ukubiri n’igwingira mu bana”.

Nyirakazindu Speciose ati “Abaturiye iri shuri twagize amahirwe akomeye, ahandi twumva bavuga za bwaki mu bana, ariko twe iyo tugannye ibigo nderabuzima bapima abana bacu bagasanga bafite igikuriro, byose ni ubufasha twahawe n’aba bana biga muri Bigogwe TTS, batwigishije guhinga twibanda ku bifite intungamubiri batwigisha no gutunganya indyo yuzuye”.

Abanyeshuri baganiriye na Kigali Today, bavuga ko mu myigire yabo icyo bashyize imbere ari ugushakira abaturage imibereho myiza.

Tumaine Reminessi ati “Navuye iwacu i Nyagatare nza muri Nyabihu kwiga ubuhinzi, ni akarere kagira ubukonje bwinshi ku buryo byagoraga abaturage kubona imboga zihangana n’ubukonje, nk’izi cocombre turi guhinga ntizishobora kwera ahantu hari ubukonje, ariko ikoranabuhanga twiga ridufasha guhinga ibyo bihingwa bigatanga umusaruro, hano mu kigo twamaze kwihaza ni ngombwa ko dufasha n’abaturage”.

Bafasha n’abaturage gutegura indyo yuzuye, babakorera uturima tw’igikoni

Iradukunda Jean Pierre ati “Ubutaka buragenda bwangirika, ni yo mpamvu duhitamo kwiga ubuhinzi bujyanye n’icyerekezo, nk’ubu turimo guhinga mu nzu (Greenhouse), turahinga igihingwa cya cocombre gikungahaye ku ntungamubiri kandi nticyajyaga cyera ahantu hakonja nka hano. Turahinga n’ibihumyo ndetse n’izindi mboga tugafasha n’abaturage kwihaza muri izo ntungamubiri, byatubabaza twumvise ko hari umuturage urwajije bwaki duhari”.

Maniraguha Primier, Umuyobozi wa Bigogwe TSS, avuga ko iryo shuri ryigisha ubuhinzi n’ubworozi, rigomba kuba isoko y’ubuhinzi mu gace riherereyemo, avuga ko mu buhinzi bibanda ku mboga zera muri ako gace ndetse n’imboga zitahera, ibyo bakabigeraho bifashishije ikoranabuhanga.

Ati “Nk’ishuri dutanga umusanzu ujyanye cyane cyane n’umusaruro w’imboga, kuko byagaragaye ko mu muryango nyarwanda bateka ariko ntibite ku mboga, ibyo bikadufasha kubereka ko ku buso butoya umuntu ashobora kubuhinga imboga agahaza umuryango we”.

Uwo muyobozi yasabye abaturage gukangurira abana kwiga amashuri ya tekinike, imyuga n’ubumenyingiro kubera ko aho Isi igana ijyana n’ubumenyingiro mu rwego rwo gufasha urubyiruko guhanga umurimo birinda ubushomeri.

Beza ibihumyo byinshi

Ntabwo ari ubuhinzi gusa iryo shuri rifashamo abaturage, buri mwaka kandi bagira icyumweru cyo gukingira inka no kuziha imiti ya Vitamini nta kiguzi, bakaba bitegura gukingira inka zirenga 500.

Ubuyobozi bw’Umurenge wa Bigogwe burashimira abo banyeshuri, ku mibereho myiza bamaze kugeza ku baturage, cyane cyane mu bijyanye n’imirire myiza.

Aburukundo Fulgence ushinzwe amatungo muri uwo murenge ati “Bano banyeshuri bafasha abaturage bacu mu buhinzi n’ubworozi, uretse iki cyumweru batangiye cyo gutanga imiti y’inzoka na vitamini ku matungo, bagira n’uruhare mu kudufasha mu bikorwa byo gukingira amatungo no kwigisha abaturage uburyo bayagaburira, ibyo byose bikagenda bidufasha kugira ngo aborozi babikore kinyamwuga bongera umukamo”.

Ubusitani bw’ishuri babubyaza umusaruro

Amababi y’ibiti yabaye imari kuko bayagurisha abashoramari bayakamuramo umushongi uvamo amavuta

Ni ikibazo bavuga ko gikomeje gufata indi ntera, ku buryo abishora muri ibyo bikorwa baramutse badakumiriwe, ba nyiri amashyamba bashobora kuzisanga mu bukene bukabije ndetse hakaba havuka n’izindi ngaruka zikomoka ku iyangirizwa ry’ibidukikije.

Umwe mu batuye mu Kagari ka Birembo mu Murenge wa Rambura, agira ati: “Abo bajura bajya mu mashyamba yacu bakurira ibiti bakavunagura amashami yabyo, bakayakokoraho amababi, barangiza bakayapakira bakayajyana kuyagurisha mu nganda ziyakamuramo umushongi”.

“Burira ibiti bakabikuraho amashami bakanabica imitwe, n’amababi yose bagakokora ntibagire na rimwe basigaho bakayajyanira izo nganda. Twumva ngo bayakoramo amavuta yifashishwa mu kuvura. Amashyamba yacu bayatumazeho bayangiza, ibiti ntibigikura kuko baba babyangije bitagejeje igihe. Twabiteye duteganya ko nibyera tuzabigurisha cyangwa tukabibazamo imbaho tukazigemura ku masoko, tukabona amafaranga adutunga, none ababyangiza babimereye nabi. Leta nidutabare kuko aba bantu bakomeje kutubangamira badushyira mu gihombo”.

Iki kibazo ngo cyaba cyiganje mu Mirenge irimo uwa Rambura, Jomba, Rurembo na Muringa muri Nyabihu, kandi abangirizwa ibiti iyo bagerageje kwegera ba nyiri ibyo bikorwa ntacyo babikoraho; ndetse n’inzego z’Utugari bagiye bagerageza gushyikiriza iki kibazo, zabijeje kugikemura ariko kugeza ubu ngo babona ntacyo zibafasha gifatika.

Undi muturage wo mu Kagari ka Nyamitanzi, Umurenge wa Jomba, yagize ati: “Ayo mababi y’ibiti ino aha yabaye imari. Bayashongeshereza mu bintu bimeze nk’ibigunguru n’ibimashini binini bateretse ahantu byubakiye mu murima no mu mashyamba, ari na ho ababa batwibye ayo mababi babigemura bakabishyura amafaranga 20 ku kilo kimwe. Urumva rero ko uwakokoye nk’ibiro 100 cyangwa ibirenzeho ku munsi, bisa n’aho we aba abyungukiyemo nyiri ibiti akaba ari we usigara mu gihombo”.

Bayashyira mu bitanki binini bayashongesha akabyara amavuta

“Izo nganda zibitunganya zabaye nyinshi ku buryo nibura muri buri Murenge utaburamo nk’ebyiri cyangwa eshatu. Ntabwo turwanyije ibyo bikorwa bishobora kuba ari iby’iterambere zazanye ariko ba nyirazo bakagombye kujya babanza kugenzura aho ibyo bibabi babagemurira biba byavuye. Dufite impungenge ko haramutse hatabayeho gukumira ubu bujura, mu myaka iri imbere amashyamba azaba yadushizeho twongere twisange duhanganye n’ingaruka z’ubukene ndetse n’ibiza”.

Umuyobozi w’Akarere ka Nyabihu, Mukandayisenga Antoinette, avuga ko Akarere katigeze kamenya iby’iki kibazo ariko ko bagiye kugikurikirana, mu gihe byazagaragara ko hari abihishe inyuma y’ibyo bikorwa, yaba ku ruhande rwa ba rwiyemezamirimo ndetse n’abaturage bakorana, bakazabiryozwa.

Yagize ati: “Ntabwo twigeze tubimenya. Tugiye kugisesengura turebe imiterere yacyo abo bizagaragara ko babigizemo uruhare bakurikiranwe. Umuntu wese ugize ikibazo nk’iki, yakagombye kujya yihutira kukimenyesha inzego zimwegereye harimo n’Umurenge zikamufasha kugikemura”.

Abafite amashyamba bifuza ko hagira igikorwa mu gukumira abakomeje kuyangiza

“Ikindi ni uko mu byo twumvikanye n’abashoramari muri ibyo bikorwa, harimo nko kuba bagomba kujya babanza kugira ibyo bemeranywaho na ba nyiri amashyamba mbere yo kugira ibikorwa runaka bayakoreraho mu rwego rwo kwirinda amakimbirane yose yavuka n’ingaruka byateza. Ibyo byose turabikurikirana turebe niba byubahirizwa kuko rwose ntitwashyigikira abakomeza kwangiza ibikorwa nk’ibyo kuko usibye no kuba umuturage yabihomberamo, bishobora no kugira ingaruka ku muryango mugari w’abahatuye”.

Akarere ka Nyabihu kari mu Turere dukunze kwibasirwa n’ibiza. Gahunda yo gutera ibiti no kubibungabunga ikaba imwe mu zo abaturage bakomeje gushishikarizwa kwitaho mu rwego rwo kugabanya ubukana bw’ibiza n’isuri bikunze kuhibasira. Abaturage bibutswa kujya basarura amashyamba mu gihe bigaragara ko akuze, ndetse mu nama bagirwa zirimo no kuba mu gihe hagize utema igiti kimwe, yakagombye gutera ibiti bibiri mu rwego rwo kurushaho kubungabunga ubutaka no kurengera ibidukikije.

Kuvana aya mababi ku biti bitarageza igihe cyo gusarurwa bishobora guteza ingaruka zituruka ku kwangiza ibidukikije

Amazi agenda acukura itaka agasatira ingo nyamara ngo si uku hahoze

Ni ikibazo gikomeje kugaragara mu Mudugudu wa Kabagundu, Akagari ka Nyamugari mu Murenge wa Kintobo, aho inzu zituwemo n’izikorerwamo ubucuruzi, amazi agenda azisatira, ku buryo hari n’ahagaragara intera itarenga metero ebyiri hagati y’aho ayo mazi agarukiye n’aho izo nzu ziri.

Mukandori Stephanie agira ati “Amazi y’uyu mugezi agenda yinjira mu butaka bukariduka, akabona ubusatira inzu zacu kandi uko iminsi ishira ni na ko arushaho kuzisatira. Mu gihe cy’imvura ho haruzura agasandarira mu mazu akuzuramo, tukabura aho tunyura. Hari aho yagiye yishakira inzira hirema ibyobo birebire arekamo, ku buryo umuntu atanarebye neza yabigwamo. Ni ikibazo kidukomereye turasaba ubuyobozi ngo burebe uko bucyigaho budukize aka kaga”.

Uretse inzu z’abaturage, ayo mazi bigaragara ko asatira umuhanda mu buryo uri mu manegeka, bafite impungenge z’uko na wo ushobora kuzariduka.

Kabera Valens agira ati “Dutewe impungenge n’uburyo uyu muhanda wa kaburimbo na wo amazi akomeje kugenda awusatira akawushyira mu manegeka, ukaba ushobora kuzariduka. Kandi murazi neza uburyo uyu muhanda ukoreshwa n’abantu batabarika mu bikorwa by’ubuhahirane n’imigenderanire, uramutse wangiritse byadindiza ibintu byinshi. Dusaba ko ibyo byakumirwa ingaruka z’aya mazi zitaragira ubukana”.

Ngo iki kibazo kihagaragaye muri iyi myaka ya vuba, kuko bakihatura uwo mugezi wanyuraga mu Kagari ka Sahara mu Murenge wa Busogo; mu kuwutunganya bagamije gukumira ubukana bw’amazi aturuka mu misozi yo mu bice byo muri Nyabihu, akaba aribwo bawushakiye inzira bawuyobereza mu gace unyuramo muri iki gihe, ukiroha mu bibare byagiye bicukurwa mu Kibaya cya Mugogo.

Ati “Urebye imiryango ihatuye harimo ihamaze imyaka irenga na makumyabiri, kandi abo bose ubwo bahubakaga na nyuma yaho nta mugezi wahanyuraga. Izi mbogamizi dukomeje gukururirwa n’uyu mugezi utuma tutakirya ngo bitugere ku nzoka, cyangwa ngo turyame dusinzire”.

Yungamo ati “N’abayobozi dutakira ngo barebe uko badukiza aya mazi ntacyo badusubiza. Twibaza niba bazaza kudutabara twamaze kugwirwa n’izi nzu cyangwa hari abahirimye muri ibi byobo amazi yiretsemo twarayobewe”.

Kigali Today imaze iminsi igerageza kuvugisha Umuyobozi w’Akarere ka Nyabihu, Mukandayisenga Antoinette, igira ngo imubaze ingamba bafitiye icyo kibazo, ariko inshuro zose umunyamakuru yamuhamagaye kuri telefone ngendanwa, ndetse n’ubutumwa bugufi yamwandikiye abimubaza ntacyo yigeze abivugaho.

Abanyeshuri bato bambutswa n’abarimu ndetse n’ababyeyi babo

Mu baganiriye na Kigali Today, bavuze ko icyo kiraro kinyuraho umubare munini w’abaturage bo muri Jomba na Mulinga, ndetse n’abo mu Murenge wa Rambura, ariko bakagirira impungenge cyane abanyeshuri biga kuri GS Gitebe ryegereye icyo kiraro.

Ni ikiraro bigaragara ko gikomeye kuko gikoze mu nkingi z’ibyuma, ariko inzira y’abagenzi ikaba ikoze mu mbaho, zikaba zaramaze gusaza, aho hagaragara imyobo ishobora guteza impanuka ku bambuka icyo kiraro, cyane cyane mu masaha y’ijoro.

Umwe muri abo babyeyi barerera muri GS Gitebe yagize ati “Impamvu dufite impungenge cyane, ni uko abanyeshuri barenga 800 bambuka iki kiraro mu gitondo na nimugoroba, abo bana harimo abato bo muri Gardienne (amashuri y’incuke), abo mu mashuri abanza n’ayisumbuye”.

Ikiraro cyarangiritse

Arongera ati “Abo bana batoya iyo bahanyura usanga biteye ubwoba, bigasaba ko bamwe bategereza bakuru babo bakagenda babateruye, hari n’ubwo bamwe mu babyeyi bibatera impungenge bakiyizira ku kiraro kwambutsa abana babo”.

Mugenzi we witwa Dusingizimana Théophile ati “Iki kiraro kidutera impungenge kuko abana benshi bakinyuraho bajya kwiga, usanga bamwe mu babyeyi bibasaba guherekeza abana bakabanza kubambutsa. Imbaho zarashaje harimo imyenge minini ishobora guteza ibibazo abacyambuka”.

Arongera ati “Mu masaha y’ijoro, kucyambuka ntibyoroshye, ariko no ku manywa kubera ko abanyeshuri bacyambuka baba ari benshi kandi bakina, bashobora gusunikana gato bakaba bagwamo, badufashe basane iki kiraro kuko kiraduhangayikishije”.

Bafite impungenge z’uko iki kiraro gishobora guteza impanuka

Umunyamabanga Nshingwabikorwa w’Umurenge wa Mulinga, Rusingiza Heslon, aganira na Kigali Today, yahumurije abo baturage avuga ko icyo kiraro kiri mu nzira zo kubakwa.

Yagize ati “Umuhanda wa Gitebe watangiye gukorwa, icyo kiraro rero nacyo bagiye kugikora rwose, n’ubu hari ikiraro cy’ahitwa Kayanza barakirangije, barakurikizaho kiriya”.

Imbaho zigikoze zirashaje

Kudakorerwa dialyse byatumye abyimbagana

Yubahe yatangiye kugaragaza ibimenyetso by’uko arwaye impyiko muri Nzeri 2023, hakoreshejwe ubwisungane mu kwivuza bwa Mutuweli, yemerewe gukorerwa ubuvuzi bwo kuyungurura amaraso mu bitaro bya Gisenyi mu kiciro cy’umuntu ufite impyiko itarangiritse burundu.

Ubusanzwe abantu barwaye impyiko itarangiritse burundu bakoresha ubwisungane mu kwivuza bwa mituweli, bemererwa gukoresha kuyungurura amaraso inshuro 18.

Ukwezi kwa Gashyantare 2024 kwatangiye Yubahe amaze gukorerwa inshuro 18 yari yemerewe mu gukoresha dialye, acyurwa mu rugo aho akomeje guhangana n’iminsi y’ubuzima bwe ya nyuma, mu gihe atabonye abagiraneza bamufasha.

Umubyeyi umubyara, Uwifashije Beatrice yabwiye Kigali Today ko ubu umwana we Yubahe Beatrice ameze nabi aho yacyuwe mu rugo, icyakora barimo gushaka ubutabazi kugira ngo ashobore gusubira kuyungururirwa amaraso.

Agira ati “Ubu twamusubije mu rugo kubera ko nta bushobozi bwo kwishyura ijana ku ijana kandi amerewe nabi, turimo gusaba ubuyobozi bw’aho dutuye ubufasha niba bishoboka, ariko umwana amerewe nabi, yabyimbye inda no mu maso.”

Uwifashije avuga ko abaganga bamusezerera bamuhaye imiti imugabanyiriza uburibwe, ariko ntacyo ngo imufasha.

Agira ati “Afite uburimbwe bwinshi, n’imiti kwa muganga bamuhaye ntacyo irimo kumufasha, nawe urabibona ku mafoto uko amerewe, arigunze cyane kuko atabonye ubutabazi bwihuse arapfa.”

Dr Patrick Ntwari wakurikiyanye ubuzima bwa Yubahe, avuga ko uyu mwana akeneye ubufasha bwihuse bwo gukorerwa dialyse, bitewe n’uko ubwo yari yemerewe na Mituweli bwarangiye agacyurwa kandi akeneye gukomeza kwitabwaho.

Umubyeyi wa Yubahe Beatrice avuga ko bamaze kubona umuntu wemeye gutanga impyiko, ndetse mu gihe bapimye ibizamini bikagenda neza, ubuvuzi bwakorerwa mu bitaro byitiriwe umwami Faisal i Kigali, ariko gukoresha ibizamini byo kureba niba impyiko yatanzwe yakora muri Yubahe Beatrice bitwara igihe.

Ati “Ubufasha turimo gusaba ni ubwatuma umwana wacu ashobora kubaho mu gihe harimo gukorwa ibizami by’uwemeye gutanga impyiko, ubundi bufasha ni ubwo gukoresha ibizami byo gupimisha uwemeye gutanga impyiko.”

Umubyeyi wa Yubahe avuga ko umuryango wabo ukennye cyane, asaba abagiraneza kwitanga bagafasha umwana we, akaba yahindurirwa impyiko agashobora gukorera Igihugu.

Agira ati “Ndasaba abagiraneza gufasha umwana wanjye agashobora guhindurirwa impyiko, aracyari muto, uretse njye nk’umubyeyi n’Igihugu kiramukeneye kandi iyi ndwara ntituzi icyayizanye.”

Yubahe afite abantu babiri bemeye gutanga impyiko hari se umubyara, Nzabarinda Augustin, ariko hari na mukuru we watangaje ko yayitanga mu gihe iya papa wabo itemewe.

Yubahe akeneye ubufasha bwo kuyungurura amaraso (dialyse)

Ubusanzwe ku bantu barwaye impyiko bakoresha dialyse nibura gatatu mu cyumweru, cyangwa kabiri bitewe n’uko ubushobozi buhagaze, kandi abiyishyurira ijana ku ijana basabwa kwishyura agera mu bihumbi 100 inshuro imwe, iyo bibaye gatatu mu cyumweru bivuze ko hakenerwa ibihumbi 300Frw.

Abahanga mu gukoresha ibizami byo guhindura impyiko, bavuga ko ibizami byo gupima niba impyiko izatangwa izashobora gukora neza bitwara igihe cy’amezi atatu, bisobanuye ko ibizami Yubahe Beatrice akeneye nibura ibyumweru 12 ategereje ibizami bigaragaza ko yahindurirwa impyiko.

Ibi bigaragaza ko uwo mwana akeneye nibura miliyoni eshatu n’ibihumbi Magana atandatu, yiyongeraho ayandi agera kuri miliyoni yo gukoresha ibizami n’ingendo mu mujyi wa Kigali.

Uwakwifuza kugira icyo afasha uyu muryango, yanyura ku mubyeyi w’uyu mwana, Uwifashije Beatrice: 0791426650.

Abatuye Batikoti bishatsemo ibisubizo biyubakira ibiro by’Akagari, ariko bifuza kugezwaho amashanyarazi

Abo baturage ba Batikoti, bakunze kugaragaza gahunda yo kwishakamo ibisubizo bagendeye ku bushobozi bwabo, aho baherutse kwiyubakira ibiro by’akagari kabo bihagaze asaga Miliyoni 10Frw, nyuma y’uko inyubako bari basanganywe yari imaze gusaza batakibona aho basabira serivisi.

Mu kiganiro bagiranye na Kigali Today, abo baturage bavuga ko bazengurutswe n’utugari ducana, ariko bo bakibaza icyo bazira kugeza ubwo insinga z’amashanyarazi zibanyura hejuru zikajya gucanira abandi.

Umwe ati “Reba nawe umuyoboro w’amashanyarazi nguyu hano iwacu, aho kurahurira ahangaha, insinga barazifata zikatunyura hejuru zikajya gucanira abo hepfo yacu, basanzwe bafite umuriro. Ipoto ngiyi iwanjye, batwiriza mu gihirahiro bavuga ko bazatwimura bakatujyana mu Kinigi”.

Arongera ati “Mfite umwana wiga mu wa kabiri w’amashuri yisimbuye, namuguriye itoroshi yo kwigiraho ntabona aho ayicaginga, hari ubwo ajya ku bafite umuriro mu kanya kakaba karakonotse, akajya gushaka igishishimuzo mu kanya ati ya kaye irahiye, Perezida wacu yavuze ko ibyiza bitugeraho, ariko hari aho babizirikiye, izi ni insinga zitunyura hejuru, biratubabaje”.

Mugenzi we ati “Bakimara gukora umuyoboro mugari muri 2005, uturutse Kora ariwo muyoboro wa Karisimbi, amashanyarazi aruhukiye hano mu mudugudu wacu wa Kamuhe, mu kagari ka Batikote ariko ntibaduha umuriro”.

Arongera ati “Nigereye kuri REG incuro nyinshi, hari amabaruwa twanditse agera kuri ane dusaba tuti twe mwaduhaye umuriro ko utunyura hejuru! Kuki mwajya gucanira utundi tugari twe ntitubone umuriro, bati tuzawubaha ariko twarategereje amaso ahera mu kirere”.

Arongera ati “Icyizere dufite ni ibyifuzo bya Perezida wa Repubulika by’uko 2024 nta muturage uzasigara adafite umuriro, tugize amahirwe mwatubwirira Perezida ko hano mu Mudugudu wa Kamuhe twahejejwe inyuma cyane, mu Kagari ka Batikoti nta muriro, nta mazi”.

Abo baturage, bababazwa cyane cyane n’uburyo umuriro uvanwa iwabo ukajya gucanira akandi karere, bakemeza ko bakwiye kubwirwa icyo bazira, dore ko ngo bikomeje kubagiraho ingaruka zituma iterambere n’imibereho myiza yabo bidindira, nk’uko uwo muturage abivuga.

Ati “Insinga zirava iwacu zikajya gucanira Umurenge wa Bugeshi muri Rubavu, ariko twe dutuye mu Kagari ka Batikote ari naho umuriro unyura ntiturawuhabwa. Ingaruka ni nyinshi kubera ko umwana ntashobora kuva ku ishuri ngo asubire mu masomo, ntibyashoboka kuko nta mashanyarazi”.

Arongera ati “Urugi rw’inzu yanjye ruherutse gucika biba ngombwa ko ndukura ndujyana mu kagari duturanye ka Myuga, bamaze kurusudira binsaba kuzana umutekinisiye wo kongera kurusubiza ku nzu ayo ni amafaranga. Telefoni ishiramo umuriro ngakora urugendo rw’iminota 40 njya kuwushaka, badutabare”.

Uretse ikibazo cy’umuriro, abo baturage barasaba no kwegerezwa amazi, kuko ngo bavoma mu mashyamba ahari amazi yanduye, aho n’inyamaswa zishobora kubagirira nabi.

Mu kumenya icyo abafite mu nshingano kugeza umuriro ku baturage bavuga kuri icyo kibazo, Mutsindashyaka Martin, Umuyobozi wa REG mu Karere ka Nyabihu, avuga ko atigeze amenya ko abo baturage bafite icyo kibazo, avuga ko n’ayo mabaruwa yandikiwe atamugezeho.

Ati “Kuvuga ko banditse keretse mbonye iyo barwa cyangwa kopi yayo, kuko ntabyo nabonye, ariko muri rusange hari umushinga w’Abanya-Maroc, bamaze gusinyana contract n’Ikigo cy’igihugu gishinzwe gukwirakwiza ingufu, bashaka gukorera mu Karere ka Nyabihu na Ngororero. Uwo mushinga ufite intego yo kujya ahantu hose hatari amashyanyarazi bakora inyigo, barimo kugenda bashinga amapoto aho atari ku buryo bizarangirana n’ukwezi kwa Gatanu ikibazo cyarakemutse”.

Uwo muyobozi yavuze ko yizeza abo baturage ko ahatari amashanyarazi azaba yabagezeho bitarenze Gicurasi 2024.

Aba bayobozi bombi, hamwe n’abanyerondo bari kumwe, ubwo bari mu gikorwa cyo kugenzura irondo tariki 24 Ukuboza 2023, bageze mu rugo kwa Dushimimana ruherereye mu Mudugudu wa Bikingi mu masaha ya nijoro, bamusanga we n’umugore we baryamye babasohora mu nzu nk’uko bamwe mu baturage babigarutseho.

Umwe muri bo yagize ati "Baje bitwaje za ferabeto, babanza gusohora umugore we bamubohera amaboko inyuma bamusaba kubereka aho Dushimimana (Umugabo we) ari. Hashize akanya na we arasohoka, ageze hanze batangira kumuhondagura, baramukomeretsa cyane bamugira intere".

Uwo mugabo bivugwa ko yaba yarakubiswe n’aba bayobozi bamuziza ko asanzwe ari umunyarugomo (igihazi), byageze tariki 28 Ukuboza 2023 arapfa, bigakekwa ko yaba yarazize izo nkoni yakubiswe n’abo bayobozi ubwo bamusangaga iwe.

Undi ati "Abayobozi ba hano baratuzengereje, baduhoza ku nkoni, ntituzi icyo baba badushakaho. Leta nidutabare”.

Umuvugizi w’Urwego rw’Igihugu rw’Ubugenzacyaha, RIB, Dr Murangira B. Thierry yemeje iby’uko bombi bafunzwe.

Ati "Bakurikiranyweho icyaha cyo gukubita cyangwa gukomeretsa ku bushake bikaviramo umuntu gupfa. Bombi bafungiwe kuri RIB Station ya Mukamira, ndetse dosiye yabo yarakozwe yohererezwa Ubushinjacyaha. Haracyashakishwa n’ibindi bimenyetso hamwe n’abandi baba baragize uruhare muri urwo rupfu ngo babiryozwe".

Icyaha bakurikiranweho cyo gukubita cyangwa gukomeretsa ku bushake bikavamo urupfu, giteganywa n’Ingingo y’121 y’Itegeko N°68/2018 ryo ku wa 30/08/2018 riteganya ibyaha n’ibihano muri rusange, aho ugihamijwe ahanishwa igifungo kuva ku myaka 15 ariko itarenze imyaka 20, n’ihazabu y’Amafaranga y’ u Rwanda kuva kuri Miliyoni 5 ariko atarenze Miliyoni 7.

RIB iributsa abaturarwanda ko itazihanganira uwo ari we wese ukora icyaha nk’iki cyo gukubita cyangwa gukomeretsa ku bushake bikaviramo umuntu gupfa, ikanabasaba kwirinda kwihanira kuko hari inzego zibishinzwe kandi ko ubikora wese azafatwa agashyikirizwa Ubutabera.

Abo baturage uko ari 210 bakorera kuri site iri mu Mudugudu wa Futi mu Kagari ka Gisizi. Muri Kanama 2023, bahawe akazi ko gutunganya amaterasi hamwe n’abandi bo mu yandi masite byegeranye, aho bizezwaga ko bazajya bahembwa amafaranga yabo buri uko ikenzeni imwe irangiye, ni ukuvuga iminsi 15.

Nyuma yo gukora iyo minsi, batunguwe n’uko yarangiye hakiyongeraho indi, na yo yashyira hakiyongeraho indi bigera ubwo igera mu ma kenzeni 7, muri zo bahembwamo kenzeni 4 hasigaramo kenzeni 3 zihwanye n’iminsi 45 ari na zo batarishyurwa kugeza ubu.

Umwe mu bahakora agira ati: "Ako kazi bakaduhaye nk’abaturage batishoboye ngo tujye tubona aho dukura akunyu n’agasabuni tubashe kwikenura no gutunga imiryango yacu. Icyo cyizere ariko bisa n’aho kigenda gikendera kuko mu mafaranga yose twakoreye, hari amakenzeni atatu, ahwanye n’igihe kijya gukabakaba amezi abiri yose tutigeze duhemberwa".

Yongeyeho ati "Ubu inzara itumereye nabi, by’umwihariko muri iki gihe cy’iminsi mikuru, abandi barimo kuyizihiza banezerewe mu gihe twebwe imbabura twazimanitse, inzara ikaba itumereye nabi. Ayo materasi twayirirwagamo dukora dushishikajwe no kwinjiza amafaranga 1500 ku munsi. N’iyo tumenya ko bizageza iki gihe batatwishyuye twari kwishakira akandi kazi kaduhemba neza bikadufasha kuzigamira byibura n’iyi minsi mikuru".

Undi ati: "Ubu njye bamfitiye ibihumbi 68 batanyishyuye. Nakoze nyateganyiriza kuzakuraho udufaranga ducye two guhahisha iby’iminsi mikuru, nkashakira abana ibikoresho by’ishuri andi nkishyuraho umwenda w’ibyo niyindikishije (nikopesheje) kuri butiki none ubu nsigaye mpatambuka nububa, bamfata nka bihemu kuko igihe nari narabijeje kuyabahera kirenzeho amezi. Ababishinzwe nibadufashe baduhe ariya mafaranga twakoreye turebe uko twikemurira ibibazo".

Ngo iyo babajije aho amafaranga yabo ageze, Umukozi ubahagarariye ari na we ushinzwe kwegeranya imibyizi baba bakoreye uzwi ku izina rya Gombaniro, ababwira ko na we yamaze kohereza amalisiti yabo ku Murenge agaragaza imibyizi bakoze, ariko akaba atazi impamvu amafaranga batinze kuyabona.

Umuyobozi w’Akarere ka Nyabihu, Mukandayisenga Antoinette, avuga ko ukudahemberwa igihe kw’aba baturage byatewe n’ikibazo cy’ikosa ryagaragaye kuri konti bagombaga kwishyurirwaho, ariko kiri gukurikiranwa.

Yagize ati: "Abo baturage bose uko ari 210 bagomba kwishyurwa Miliyoni 2 n’ibihumbi bisaga 900. Ubwo bajyaga kuyabashyirira ku konti byaje kugaragara ko harimo ikosa, bituma habaho kubanza kurikosora ndetse biba ngombwa ko twongera gusinyisha abo baturage bose. Turi gukora ibishoboka ngo dukurikirane icyo kibazo mu buryo bwihuse, ku buryo bitarenze muri kiriya cyumweru kigiye kuza (icyumweru gitangiranye n’itariki ya 01 Mutarama 2024) amafaranga yabo bazaba bayabonye".

Amaterasi arimo gutunganywa yitezweho igisubizo mu gufata neza ubutaka hakumirwa isuri ikunze kwibasira kariya gace kagizwe ahanini n’imisozi miremire, akazatuma n’umusaruro ku buso urushaho kwiyongera.

Abahawe akazi ko kuyatunganya bibumbiye mu matsinda yitwa "Amakominote" aho buri imwe iba igizwe n’abaturage bagera muri 210.

Imwe mu miryango yabanaga mu buryo butemewe n’amategeko nyuma yo kunogerwa n’inyigisho yiyemeje gusezerana

Jean de Dieu Ntakaziraho wo mu Kagari ka Basumba mu Murenge wa Bigogwe, agaruka ku kuntu we n’umugore we bari barabaye iciro ry’imigani mu Mudugudu, biturutse ku makimbirane bahoranaga bikanagira ingaruka ku mikurire y’abana babo.

Ati "Navaga mu kabari nasinze, amafaranga yose nayamariyeyo, nkagera mu rugo ntanabahahiye. Umugore yabaga yakoze ibishoboka agahaha, ngasanga yambikiye ibyo kurya, rimwe na rimwe bitaba biriho nk’ingereko, umunyu cyangwa amavuta amasorori yabaga yabibitsemo nkayatera umugeri nkabimena, nyamara nta n’uruhare nabaga nagize mu kubihaha".

"Umugore namuhozaga ku nkoni ntasize n’abana ku buryo byanageze igihe bakajya banyihisha, ku bwo gutinya ko mbagirira nabi. Urugo rwari rwarishwe n’inzara kubera kutaruhahira, sinanatinyaga kuzitura itungo nkarijyana ku isoko umugore atabizi, umusaruro yabaga yavunikiye ahinga wakwera nkawujyana ku isoko ntanamubwiye, amafaranga avuyemo nkayajyana mu kabari no mu ndaya. Mu Mudugudu twari twarabaye akabarore kubera ubwumvikane bucye, umuryango ugwa mu bihombo turakena, imyigire n’imirire y’abana biradindira".

Imwe mu miryango yo mu Murenge wa Bigogwe mu Karere ka Nyabihu, yari ibayeho mu buryo busa n’ubwa Ntakaziraho, yagiye ihabwa amasomo yihariye arebana n’uburere buboneye buhabwa umwana, kumurinda ihohoterwa, gutegura indyo yuzuye, isuku n’isukura, kubakira ku mahoro mu muryango; igaruka ku cyo ayo masomo yabamariye.

Biyemeje kubana neza

Mukeshimana Consolée agira ati "Ni inyigisho zatugiriye akamaro kuko zaduciye ku mitekerereze twahoranye yo kumva ko umuntu yakora ibye n’undi ibye. Mu muryango tubayeho dushyize hamwe, aho tujya inama z’icyafasha mu iterambere ry’urugo. N’ikimenyimenyi ubu abandi babyeyi duturanye batugiriye icyizere, badusigira abana babo kuko urugo rwacu ari rumwe mu ngo mbonezamikurire y’abana bato mu zibarizwa mu Mudugudu. Twitabiriye kujya mu matsinda duhuriramo n’abandi baturage, twamaze gusobanukirwa ko kubana neza mu muryango ariryo banga ryo kugera ku byiza byinshi".

Imiryango 378 ibarizwa mu Tugari tw’Umurenge wa Bigogwe, ni yo yakurikiranye ayo masomo ibifashijwemo n’Umuryango wibanda ku Iterambere ry’imibereho myiza y’umwana Reach the Children Rwanda ku bufatanye na ChildFund Korea mu gikorwa cyo gusoza ayo masomo, imwe muri yo yari ibanyeho mu buryo butemewe n’amategeko yarasezeranye.

Benjamin Musuhukye ukuriye uyu muryango, avuga ko mu bibazo bicyugarije imiryango nk’ubujiji, guta ishuri kw’abana, amakimbirane mu muryango, imirire mibi n’igwingira, bihangayikishije, ari nayo mpamvu yo gukurikiranira hafi no kwigisha abagize bene iyi miryango mu rwego rwo guhangana na byo.

Ati "Iyo imiryango ibanyeho mu mahoro bifasha umwana gukura neza. Mfatiye nk’urugero rw’Akagari kamwe ka Basumba ko mu Murenge wa Bigogwe twakoreyemo ubushakashatsi mu mwaka wa 2019, icyo gihe nta rerero cyangwa urugo mbonezamikurire y’abana bato rwari ruhari mu Kagari hose. Abana ababyeyi babo babaga bagiye mu mirimo bakabasiga badafite ababitaho batagaburiwe, ubumenyi bw’ababyeyi mu kuzamura indangagaciro, uburere n’imibereho y’abana byari bikiri hasi kubera amakimbirane yari yaradindije ingo".

Ati "Kimwe mu bintu rero byagaragaye ko cyagabanya izo mbogamizi harimo no guhugura abagabo n’abagore, ariko tutirengagije no kubakira abana ubushobozi binyuze mu gushyiraho amarerero y’abana, bakegerezwa serivisi zijyanye n’imirire iboneye, gupimwa imikurire, gukingirwa, n’ubundi buryo bwose bwo kubakurikiranira hafi bakiri batoya mu kubategurira kuzakura buzuye kandi bafitiye umuryango akamaro".

Ntakaziraho n’umugore we ubu babanye neza mu gihe mbere babifataga nk’inzozi

Munyampeta Emmanuel, Umukozi w’Ikigo cy’Igihugu gishinzwe Imikurire no kurengera Umwana (NCD), akangurira ababyeyi kuzamura imyumvire mu bifasha umwana gukura yitaweho.

Ati "Imibanire idahwitse mu miryango igira ingaruka ku mikurire y’umwana yaba mu bwonko, mu gihagararo, imitekerereze, imbamutima n’imibanire ye n’abandi, byose birangirika agasa n’aho yapfuye ahagaze. N’iyo akuze abaho nta genamigambi rifatika afite, akaba wa muntu uhora ayobya abandi, utagira icyerekezo, ntiyigirira icyizere kuko na we ubwe ahora yumva yanzwe".

Ati "Ni ngombwa rero ko imiryango yita ku guharanira ko imibereho yaho iba ari ibereye kandi inogeye umwana mu kumurinda ko imibereho ye ihungabana".

Mu gihe cy’imyaka itatu ishize, umuryango Reach the Children Rwanda utangiye kwigisha imiryango uko yakwitandukanya n’amakimbirane ikimakaza imibanire myiza, mu Murenge wa Bigogwe ibarirwa muri 900 ni yo yagezweho n’iyo gahunda.

Mu gusoza izo nyigisho banabiherewe impamyabushobozi

Mu byo abaturage baho banishimira harimo nko kuba Iterambere ry’ingo zabo rurirushaho kwihuta ahanini bishingiye ku kuba barahinduye imyumvire bahoranye yari yarabasigaje inyuma mu gutera imbere idasize n’ingaruka ku bana by’umwihariko.

Bagahamya ko ibi byanafashije mu kumva umumaro wo kwita ku buzima bw’abana binyuze mu kubafasha kugana amarerero n’ingo mbonezamikurire aho nibura muri buri Mudugudu habarurwa Ingo mbonezamikurire y’abana zitari munsi y’enye mu gihe mbere ibyo byari nk’inzozi kuri bo.

Byukusenge Emmanuel witabye Imana

Amakuru y’urupfu rwa Byukusenge yamenyekanye ku wa kabiri tariki 12 Ukuboza 2023, mu masaha ya nimugoroba bikavugwa ko yaba yazize uburwayi yari amaze hafi amezi ane yivuriza mu Bitaro binyuranye.

Byukusenge wayoboraga Umurenge wa Rugera kuva mu mwaka wa 2021, abamuzi bavuga ko aho yagiye akorera hose, yarangwaga no gukorera hamwe na bagenzi be ndetse n’abaturage ku buryo n’ibipimo mu mihigo byabaga biri mu myanya y’imbere.

Umwe mu bo bakoranye yagize ati "Kubona ibyo navuga kuri Byukusenge biragoye cyane, kuko rwose yari umuntu w’Imana nk’uko n’izina rye ribisobanura. Twabyukanaga mu gitondo cya kare tujya mu baturage kubakangurira kwitabira gahunda za Leta nko kwishyura mituweli ku gihe. Uburyo yakoragamo ubukangurambaga yahavaga abaturage bose bahitira kuri SACCO bakishyura bakivuza ku gihe. Yari umukozi ubona ko ashishikajwe n’inshingano yaragijwe, ahantu hose yagiye ayobora, imihigo yabaga iri imbere. Imana imwakire mu bayo!"

Byukusenge Emmanuel (ibumoso) ubwo yashyikirizaga abaturage imbabura ya rondereza

Byukusenge yaguye mu bitaro bya Kaminuza bya Kigali, CHUK, yari amaze iminsi arwariyemo.

Byukusenge yahawe inshingano zo kuyobora Umurenge wa Rugera n’ubundi yarabanje kuyobora uwa Muringa n’Umurenge wa Rurembo, yose yo mu Karere ka Nyabihu. Atabarutse asize umugore n’abana batanu.

Mudugudu ushyirwa mu majwi n’abaturage ni uwambaye ishati y’umuhondo uhagaze imbere ku ruhande

Ubwo Guverineri w’Intara y’Iburengerazuba, Lambert Dushimimana, yakiraga ibibazo by’abatuye mu Mirenge ya Rugera na Shyira mu Karere ka Nyabihu, benshi mu baturage batunze agatoki Umukuru w’Umudugudu wa Bweru mu Kagari ka Gakoro Umurenge wa Rugera witwa Kiramiye Théogène, aho bamushinja kubakubita.

Ntabareshya agira ati “Uyu mukuru w’Umudugudu angendaho mu buryo bukomeye. Mu minsi ishize hari umugore yashatse gukubita, yirukira iwanjye agerageza gukiza amagara ye. Icyo gihe mudugudu yaraje arwana n’urugi rw’inzu ararutigisa rwenda gushingukamo, aho byansabye gushaka abatekinisiye baza kurusubizamo”.

Ati “Ibyo abonye bidahagije, mu minsi yakurikiyeho, we n’umuhungu we barankubitse bandema uruguma mu gahanga, mbajyana mu buyobozi bumusaba kwishyura amafaranga nari natanze nivuza. N’ubu nari maranye iminsi ibipfuko by’ibikomere yari yanteye ni uko babivanyeho. Uyu mukuru w’umudugudu aratuzengereje, aduhohotera yitwaje kuyobora; ubuyobozi nibudutabare bumudukize kuko arakabije”.

Ibibazo byagarutsweho cyane muri iyo nteko y’abaturage ni iby’abayobozi batungwa agatoki kudakemura ibibazo by’abaturage

Undi yungamo ati “Nanjye duheruka guhurira mu nzira arampagarika arankubita, abaturage batugezeho bwa mbere basanga ari kunigagura hafi yo kumaramo umwuka. Gukubita ni ibintu ashyira imbere cyane kandi si ubwa mbere, kabiri cyangwa ubwa gatatu abikoze”.

Uko kuba hari abagirana ibibazo n’umukuru w’Umudugudu, ngo bamwe bibaviramo kuvutswa amahirwe y’ibibagenewe.

Uwo ibyo byabayeho ati “Abaturage baheruka kuntoranya turi mu nteko, banshyira ku rutonde rw’abazahabwa inka ndetse n’umuyobozi w’Akagari yari ahibereye. Nyuma nibwo yatangiye kujya ampigira avuga ko nta kintu kivuye mu maboko ya Leta azigera yemera ko nkozaho imitwe y’intoki. Koko iyo nka byarangiye nyihombye mviramo aho mu gihe abo twari kumwe kuri urwo rutonde bo bagabiwe. Uyu muyobozi rwose yamaze kutuzambaguza atugeze ahabi”.

Ngo ikigiye gushyirwamo imbaraga ni ukwibukiranya n’abayobozi mu nzego z’ibanze ko bafite inshingano zo gukorera abaturage

Ubwo yahabwaga ijambo ngo asobanure ibyo abaturage bamushinja, uyu Mukuru w’Umudugudu yarabihakanye avuga ko muri manda eshatu amaze ayobora, abanye neza n’abaturage; gusa ngo ikibazo gihari ni icy’uko hari abigize intakoreka mu Mudugudu, ari na bo bamwijundika.

Ati “Ndarengana rwose. Ndetse n’ikimenyimenyi muri izo manda zose abaturage tubanye neza. Icyakora hari agatsiko k’abagera muri barindwi bananiranye, bafite imyitwarire mibi, twanakoreye raporo tuyishyikiriza umurenge. Abo rero ni bo usanga baranyijunditse bahora banyamagana”.

Guverineri Dushimimana yavuze ko bidakwiye ko umuyobozi ayoboza abaturage inkoni, ndetse ngo mu gihe haramuka hari uwo bigaragayeho yabiryozwa.

Yagize ati “Gukubita abaturage ni ikizira, binabaye ari byo kwaba ari ukwihemukira. Ni ikibazo duhaye Akarere ngo kagikurikirane mu maguru mashya, nikagera muri uwo mudugudu kazateranyirize hamwe abaturage basesengure ikibazo noneho uyu muyobozi nibigaragara ko ari mu makosa azafatirwe ibyemezo”.

Guverineri Dushimimana yavuze ko umuyobozi wese bizagaragaraho ko abangamiye ituze ry’umuturage azabiryozwa

Usibye uyu mukuru w’Umudugudu abaturage banakomoje ku bayobozi ku rwego rw’Utugari, Imirenge ndetse n’Akarere babapfukirana kugera ubwo ibibazo baba barabagejejeho bakomeza kubisiragirana.

Ngo ikigiye gushyirwamo imbaraga nk’uko Guverineri Dushimimana yakomeje abivuga, ni ukwibukiranya n’abayobozi mu nzego z’ibanze ko bafite inshingano zo gukorera abaturage, ariko kandi n’abaturage ubwabo bagasabwa kuzirikana ko babereyeho kubahiriza ibyo ubuyobozi bubifuzaho no gufata iyambere mu kubishyira mu bikorwa.

Akingeneye wahishiriye uwamuteye inda bikamuviramo no guterwa iya kabiri aburira abana b’abakobwa

Mu 2014, Akingeneye wari umwana w’imyaka 16 akora akazi ko mu rugo, umugabo (nyir’urugo) ngo yahoraga amusaba ko basambana, akamwangira bigera ubwo umunsi umwe yaje kumusambanya ku ngufu anamutera inda.

Ati “Yacungaga umugore we adahari ku manywa cyangwa nijoro, inshuro nyinshi akansaba ko turyamana nkamwangira, nkanatinya kubwira umugore we ko umugabo we ahora ansaba ko turyamana. Igihe cyarageze ansanga mu cyumba nararagamo ansambanya ku ngufu”.

Nyuma yo guterwa inda yasubiye iwabo, yibana wenyine mu nzu ababyeyi be bari barasize ari naho yabyariye uwo mwana. Uku kumurera ari wenyine ngo byaramugoye dore ko nta n’umuntu yari yarigeze ahishurira uwamuteye inda.

Ati “Namubyaye ndi muto ntabashije kwibeshaho ntamubonera ibimutunga, tukajya tubwirirwa tukaburara ngera aho ndwaza imirire mibi. Icyakora hashize igihe ubuyobozi bungirira impuhwe bumpa akazi ko gukubura ku irerero ryo mu gace k’iwacu, kugira ngo njye mbona igikoma cy’umwana udufaranga tuvuyemo nkaduhaha ibiryo nabwo bidafashije kuko ari ducyeya”.

Ati “Ubu sinshobora kwigurira agatenge cyangwa udukweto nk’abandi bagore, nta na mituweli ngira mbese meze nk’umuhirimbiri utagira epfo na ruguru”.

Nyuma yamenyanye n’undi mugabo wamwizega kumugira umugore, aza kumwihakana nyuma yo kumutera inda abyara undi mwana wa kabiri. Akingeneye atekereza ko iyo aza kuba yarahise abimenyesha ubuyobozi ubwo yasambanywaga mbere, uwabikoze yari kubiryozwa, nibura akabona ubutabera hakiri kare.

Mutoni Gatsinzi Nadine uyobora GMO

Aburira abana b’abakobwa kuba maso, umuntu wese bigaragaye ko afite umugambi wo kubahohotera bakamugendera kure, no kujya bihutira kumutungira agatoki mu nzego zibishinzwe zikamukurikirana.

Mu gikorwa cyo gutangiza Ukwezi kwahariwe kwimakaza Ihame ry’Uburinganire ku rwego rw’Intara y’Iburengerazuba, cyabereye mu Karere ka Nyabihu ku wa kabiri tariki 17 Ukwakira 2023, ikibazo cy’abana b’abangavu basambanywa bagaterwa inda kiri mu byagaragajwe nk’inzitizi ku iterambere ry’umuryango, kuko usibye abarikorerwa basigara bahanganye n’ingaruka riba ryabagizeho, bamwe mu barigiramo uruhare batoroka bakihisha inzego z’ubutabera cyangwa bagahishirwa.

Mutoni Gatsinzi Nadine, Umuyobozi w’Urwego rushinzwe kugenzura iyubahirizwa ry’ihame ry’uburinganire n’ubwuzuzanye hagati y’abagore n’abagabo mu Iterambere ry’Igihugu (GMO), akomoza ku ngamba zigamije kugabanya ubukana iki kibazo gifite.

Yagize ati “Iki ni igihe cyo kwegera ababyeyi n’abana bagafashwa gusobanukirwa ko hari icyo bakora bakirinda ihohoterwa, ariko kandi ko ntawe ukwiye kugira ipfunwe ryo kuvuga cyangwa ngo atereranwe mu gihe yarikorewe, kuko biburizamo ubutabera yakabaye ahabwa ku gihe. Serivisi zaba iz’ubuyobozi ndetse na Isange One stop Center zegereye abaturage, kandi navuga ko bigoye kuba hari icyo zabafasha mu gihe batazihaye amakuru nyayo ku warigizemo uruhare”.

Ati “Gutanga amakuru byorohereza ababishinzwe gukurikirana abo nakwita ko ari ibirura, biba byarigizemo uruhare kandi bigafasha abarikorewe kubona ubutabazi n’ubutabera byihuse”.

Guverineri w’Intara y’Iburengerazuba, Lambert Dushimimana

Guverineri w’Intara y’Iburengerazuba, Lambert Dushimimana, avuga ko bagiye gushyira imbaraga mu gufasha imiryango kugira amakuru ahagije ku buzima bw’imyororokere, ari nako hakazwa ingamba zituma uwahohoteye undi abiryozwa.

Muri uyu mwaka, mu Karere ka Nyabihu habarurwa abangavu 194 batewe inda n’abagabo bafite ingo, mu gihe abagore 223 bo bakorewe ihohoterwa rishingiye ku gitsina n’abo bashakanye.

Ubushakashatsi ku buzima n’imibereho y’abaturage DHS, bugaragaza ko mu Karere ka Nyabihu ibipimo by’igwingira mu bana byavuye kuri 59% mu mwaka wa 2015, bigera kuri 46,7% mu mwaka wa 2020 mu gihe ubwasohotse muri Kamena 2023, bwo bwagaragaje ko aka Karere kageze ku gipimo cya 34,2% by’abana bagwingiye.

Depite Odette Uwamariya, wari uyoboye itsinda ry’abadepite batandatu bari mu ruzinduko mu Karere ka Nyabihu, yagarutse ku bikwiye kunozwa mu kugabanya igwingira.

Depite Odette Uwamariya avuga ko nubwo ibipimo bigenda bigabanuka hakiri urugendo buri wese asabwa kugiramo uruhare

Ati: "Urebye ibipimo bigenda bigabanuka ariko ntituragera ku ntego twifuza kuko ubundi nta mwana n’umwe twakabaye dufite ugwingiye. Hano muri Nyabihu hagaragara ikibazo cy’abaturage bahinga, umusaruro wakwera bakawuhitishiriza ku isoko barangamiye amafaranga kuruta uko bakabaye babanza kwita ku mirire mu miryango bakihaza mu biribwa".

"Ni ikibazo inzego zikwiye kwitaho cyane zigafasha abagifite imyumvire nk’iyo kuyihindura, bityo n’icyuho cy’ibikomoka ku musaruro w’ubuhinzi ndetse n’ubworozi kikigaragara mu miryango kikavaho".

Mu bindi basanze bikwiye kongerwamo imbaraga birimo ko nanone imiryango yarushaho kumenya ububi bw’amakimbirane no gusobanukirwa uburyo ahari ubwumvikane bucye, kubona uko bashaka amafunguro no kuyategura mu miryango bidashoboka, ingaruka zihuse zikagera ku bana.

Aba badepite banasanze mu Karere ka Nyabihu hari abaturage bahitamo gukodesha ubutaka(kwatisha) bagasigara batagira aho bahinga bityo n’ibitunga imiryango bikabura.

Itsinda rigizwe n’Abadepite batandatu mu bagize Ihuriro FFRP barebera hamwe n’inzego zitandukanye z’i Nyabihu uko hanozwa ingamba zo kurandura igwingira mu bana

Icyakora bamwe mu baturage Kigali Today yaganiriye na bo, bemera koko ko hari aho bagiye badohoka mu kunoza imirire ariko bagasanga hari n’aho Leta yashyira imbaraga bikorohera buri wese kuyibona.

Uwitwa Zirimwabagabo Emmanuel yagize ati: "Ino aha dutunzwe n’ubuhinzi cyane cyane ubw’ibirayi. Imbuto n’ifumbire haba ubwo bitugezeho bitinze kandi bihenze. Kenshi tuba twabihinze mu mafaranga y’inguzanyo, byakubitiraho no gutenguhwa n’ikirere, tukaramuramo umusaruro mucye ugereranyije n’uwo tuba twiteze. Icyo gihe rero umuntu ahitamo kuwuhitishiriza ku isoko agira ngo abone ubwishyu by’ibyo yabushoyemo, tukabikora tutitaye ku byo kwihaza mu muryango n’abana bacu nyine ubwo bakabigenderamo".

Undi muturage witwa Uwizeyimana Goretti yungamo ati: "Ingo nyinshi zisigaye zirya rimwe ku munsi. Abana baba biriwe gutyo gusa nta kintu na kimwe bagaburiwe n’igihe ibyo bya nijoro bibonekeye bikaba bidashyitse bitanahagije. Twe ino aha dutunzwe no guca inshuro aho nk’umugabo wabonye ikiraka cyo guhingira abandi ahembwa amafaranga 1000 mu gihe umugore akorera 700 ku munsi wose".

"Ni amafaranga mu by’ukuri utajyana ku isoko ngo havemo ibitunze umuryango w’abantu bane, batanu cyangwa barenzeho n’ibiciro biri hanze aha by’ibiribwa bidasiba gutumbagira. Leta nidufashe irebe uko itworohereza mu kubona ku gihe iby’ibanze bikenewe mu buhinzi tujye duhinga ku gihe nyacyo, ndetse n’ibiciro ku masoko byorohere buri wese yaba uwifite n’utifite".

Abo badepite banasuye ingo za bamwe mu baturage bagamije kumva ibyifuzo byabo ku cyakorwa ngo imirire mibi n’igwingira bicike

Kuva muri Kamena 2023, Leta y’u Rwanda yatangije ubukangurambaga bukomatanyije bugamije kwihutisha gahunda zifasha kurwanya imirire mibi n’igwingira ry’abana mu Turere 10 two mu Rwanda na Nyabihu irimo.

Mu ruzinduko rw’aba badepite bagize Ihuriro FFRP, bakaba baganira n’inzego zose zo muri utwo Turere zifite aho zihuriye n’imibereho myiza y’abana, gusura ibigo nderabuzima harebwa ahakiri ibyuho n’uko byashakirwa ibisubizo.

Umuyobozi w’Akarere ka Nyabihu, Mukandayisenga Antoinette, yijeje aba badepite ko bagiye guhagurukana ingamba zidasanzwe, bakarushaho kwegera abaturage bakanoza ubufatanye ku buryo mu bipimo by’ubushakashatsi bizasohoka ubutaha, aka Karere katazongera kuza ku rutonde rw’utugifite umubare munini w’abana bafite igwingira n’imirire mibi.

Inzego zose zifite aho zihuriye n’iterambere ry’imibereho myiza y’abana zasabwe kongera imikoranire kandi zikarushaho kwegera abaturage

Umuvugizi wa RIB, Dr. Murangira B. Thierry, yabwiye Kigali Today ko abo bakozi barimo Umucungamutungo wa SACCO Mukamira, Ndizihiwe Epimaque w’imyaka 39 n’abandi bakozi babiri b’iyo SACCO, ari bo Nshizirungu Justin w’imyaka 34 na Kayitesi Espérence w’imyaka 31.

Dr. Murangira yavuze ko bakurikiranyweho icyaha cyo kunyereza umutungo wa SACCO ISOKO Y’AMAJYAMBERE MUKAMIRA, ungana na 18,259,010FRW, bakaba bavugwaho kuba barakoze icyo cyaha mu bihe bitandukanye, kuva muri 2018 kugeza muri 2021.

Yavuze ko ibyo byabereye aho iyo SACCO Mukamira iherereye mu Mudugudu wa Kazibake, Akagari ka Bugeshi, Umurenge wa Mukamira, Akarere ka Nyabihu.

Abafashwe bafungiye kuri RIB Stasiyo ya Mukamira, mu gihe dosiye yabo iri gutunganywa kugira ngo ishyikirizwe Ubushinjacyaha.

Nk’uko Dr. Murangira akomeza abivuga, icyaha abo bakozi ba SACCO Mukamira bakurikiranyweho cyo kunyereza umutungo, gihanwa n’ingingo ya 10 y’itegeko N°54/2018 ryo kuwa 13/08/2018 ryerekeye kurwanya ruswa.

Uhamwe n’icyo cyaha ahanishwa igifungo kitari munsi y’imyaka irindwi (7) ariko kitarenze imyaka icumi (10), n’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’umutungo yanyereje.

Urwego rw’Ubugenzacyaha RIB ruributsa abaturarwanda ko rutazihanganira uwo ari we wese ukora icyaha nk’iki cyo kunyereza umutungo ashinzwe kugenzura, awukoresha mu nyungu ze bwite. RIB inibutsa abantu bose ko uzabikora azafatwa agashyikirizwa Ubutabera”.

Bishimiye inzu yo kubyariramo bubakiwe

Bayubakiwe n’Abanyarwanda (Diaspora) baba mu gihugu cy’u Budage, muri gahunda yo korohereza abaturage kubona serivisi zishingiye ku bubyaza, mu kurushaho kwita ku buzima bw’umubyeyi n’umwana.

Nyirandeze Vestine yagarutse ku ngorane bahagiriraga, ati: “Akumba kari kagenewe abagore bazaga kubyarira ahangaha kari gatoya, hashaje cyane, ku buryo uwabaga ategereje kubyara, uri ku bise n’uwabyaye bose babaga bagacurikiranyemo, abantu bakabashungera, hakaba ubwo buzuranamo abamaze kubyara bakabavanga n’abandi barwayi. Hari abiyemezaga kugenda amasaha atanu n’ane bajya kubyarira ahandi, ndetse n’abahitagamo kubyarira mu ngo”.

Usibye abahabyarira, ngo n’abajyaga kubyarira kure baburaga ubagemurira. Ngo iyi maternité nshya yuzuye kuri iki kigo nderabuzima ibaruhuye izo ngorane.

Irimo ibikoresho nkenerwa mu gutanga serivisi z’ububyaza

Uwimana Xavéline agira ati: “Twishimiye ko serivisi z’ububyaza zitazongera kutugora kubera iyi maternité nshya batumurikiye. Umubyeyi wese uza kuhabyarira yihererana na muganga ahantu hafite isuku, hagutse hari ibikoresho byose bikenewe akamufasha kubyara neza mu bwisanzure. Ni igikorwa remezo twishimiye cyane kandi twiteguye kubungabunga kugira ngo kizarambe”.

Irimo n’ibikoresho byose nkenerwa mu gutanga serivisi z’ububyaza. Yubatswe n’Abanyarwanda baba mu gihugu cy’u Budage, mu mushinga batekereje, ugamije kunganira Igihugu muri gahunda yo kwita ku buzima bw’umubyeyi n’umwana.

Tuyisabe Providence, umwe mu bahagarariye Abanyarwanda baba mu Budage, yagize ati: “Umubare munini w’abaturage bo mu cyaro bakora ingendo ndende bakazishoramo amafaranga menshi kugira ngo babone serivisi z’ubuzima. Mu kubaka iyi maternité, bwari uburyo bwo kubegereza amahirwe na serivisi z’ubuzima bw’umubyeyi n’umwana, tugera ikirenge mu cya Leta y’u Rwanda yihaye intego yo kwegereza abaturage ubuvuzi nibura ahabasaba gukora urugendo ruri hagati y’iminota 30 n’isaha imwe kandi butabahenze”.

Umuyobozi w’Akarere ka Nyabihu Mukandayisenga (wambaye ishati y’umuhondo) yashyikirije itsinda ry’Abanyarwanda baba mu Budage impano babageneye nk’ikimenyetso cyo kubashimira uruhare rwabo mu kuzamura iterambere ry’ubuvuzi

Umuyobozi w’Akarere ka Nyabihu, Mukandayisenga Antoinette, ashima uruhare rw’abubatse iyi maternité mu iterambere ry’urwego rw’ubuvuzi, aboneraho gusaba abaturage kuzayifata neza kandi bakayigana.

Ati: “Ni igisobanuro cyo kubaka igihugu kuko nk’iyi maternite batwubakiye izatwunganira muri gahunda yo gushishikariza ababyeyi batwite kwipimisha inshuro zagenwe kandi bakabyarira kwa muganga.”

“Twibutsa abaturage ko gutanga ubwisungane mu kwivuza ari ingenzi kugira ngo na serivisi bazibone zitabagoye, kandi bakazirikana ko kubungabunga iyi maternité bayifata neza ari ishingiro ryo kwizera neza koko ko ubuzima bwabo bubungabunzwe”.

Batangiye kuyihererwamo serivisi

Mu Karere ka Nyabihu, Abanyarwanda baba mu gihugu cy’u Budage bamaze kuhubaka maternités eshatu harimo iya Rurembo yatashywe ku mugaragaro tariki 30 Kanama 2023, maternité yubatse ku Kigo nderabuzima cya Mukamira, n’iyubatswe ku Kigo nderabuzima cya Rugera.

Uretse guteza imbere urwego rw’ubuzima, bagira uruhare mu yindi mishinga harimo n’iy’Uburezi, aho bubatse ibyumba by’amashuri bikabakaba 30 mu Karere ka Nyabihu kubakira abatishoboye, n’indi inyuranye bamaze gushoramo Miliyoni zisaga 500 z’amafaranga y’u Rwanda.

Ibirori byo kwizihiza Umunsi w’Umwana w’Umunyafurika

Ubu butumwa bwagarutsweho n’Umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal, ku wa Gatanu tariki 16 Kamena 2023, mu gikorwa cyo kwizihiza Umunsi w’Umwana w’Umunyafurika, ku rwego rw’Akarere ka Nyabihu ukaba warabereye mu Murenge wa Mukamira.

Mu nsanganyamatsiko igira iti “Uburenganzira bw’Umwana mu Isi y’Ikoranabuhanga”, abana biga mu byiciro by’amashuri uhereye mu marerero, amashuri y’incuke, abanza n’ayisumbuye yo mu Mirenge igize aka Karere, bagaragaje impano bifitemo, binyuze mu kumurika ibishushanyo n’ibikoresho by’ubugeni hamwe n’iby’ikoranabuhanga, imyidagaduro n’izindi zinyuranye bagiye babasha kuvumbura.

Simpenzwe yavuze ko izi mpano kimwe n’izindi abana bafite, zidashobora kwaguka cyangwa ngo zirambe mu gihe ababyeyi batabigizemo uruhare.

Yagize ati “Mu maraporo atandukanye tugenda tubona, bigaragara ko hakiri ababyeyi bakoresha abana imirimo ivunanye, babahoza ku nkeke, babakubita cyangwa babavutsa uburenganzira bw’ibyo bakeneye ngo babeho kandi biga neza. Ibyo rero bigira uruhare mu kudindiza impano zabo kugeza zizimye burundu”.

Abana bahawe urubuga bagaragaza impano zabo, uwambaye itaburiya yera yarimo yigisha bagenzi be

Uwizeye Deborah, umukozi w’Umuryango Reach the Children Rwanda, ufatanya n’Akarere ka Nyabihu muri gahunda yo kwita ku bana bo mu marerero, na we asanga ababyeyi bakwiye kugira uruhare mu gukurikirana abana babo no kubitaho uko bikwiye.

Ati “Iyo umubyeyi afite imyumvire yo hasi ku kuba hafi y’umwana, bigira ingaruka ku myigire ye, n’ibyo abarezi baba bamwigishirije mu ishuri bigahinduka imfabusa kubera ko aba atakurikiraniwe hafi n’ababyeyi be, ngo bamenye icyo babafasha guhitamo cyangwa kureka”.

Ati “Mfashe nk’urugero rw’amwe mu masomo y’ikoranabuhanga abana bigishwa, usanga hakenerwa kwifashisha telefoni mu kuyasesengura neza no gukora imyitozo mwarimu aba yabahaye. Hari abagera iwabo basaba ababyeyi babo kubatiza telefoni bakabatwamira hejuru, babawira ko bizira kuyikoresha mu gihe umuntu akiri mutoya, nyamara ku ishuri mwarimu mu kumwigisha aba yamweretse ko ari ingirakamaro. Tugasanga rero ababyeyi guhindura imyumvire bakaba hafi y’abana babafasha guhitamo iby’ingenzi byabagirira akamaro”.

Mu mpano bagaragaje zirimo n’izo gukora ibishushanyo mbonera

Muri iki gikorwa hanatangijwe ubukangurambaga buzamara amezi atatu, bugamije kurinda umwana mu Isi y’ikoranabuhanga.

Abanyeshuri baturutse mu bigo by’amashuri bitandukanye byo mu Karere ka Nyabihu bawitabiriye, bashima uburyo Leta ikomeje kubitaho binyuze mu gusigasira uburenganzira bwabo, koroherezwa muri serivisi z’ibanze nk’uburezi, ubuvuzi, kwidagadura n’ibindi.

Umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal

Ababyeyi bigira ba ntibindeba mu burere n’imikurire by’abana bakebuwe

Bahaye amatungo Vitamini banayavura inzoka

Ni ishuri ry’itorero Anglican rifatanya na Leta, aho ryigisha ibijyanye n’ubworozi, ubuhinzi, amashyamba n’ikoranabuhanga rya Mudasobwa.

Abiga ibijyanye n’ubworozi bavuga ko bafashe icyemezo cyo guha amatungo imiti y’inzoka na Vitamini ku buntu, nyuma y’uko bakomeje kubona abaturage bataka ikibazo cy’inzoka zifata amatungo yabo, bakavuga ko biva ku kibazo cy’amazi mabi zishoka.

Bavuga ko gufasha abo borozi ari nko kwifasha, kuko amata banywa ku ishuri n’inyama barya, byombi biva kuri ayo matungo y’abaturiye icyo kigo.

Ibyo abo banyeshuri babitangarije Kigali Today ku wa Gatatu tariki 07 Kamena 2023, ubwo bari mu gikorwa cyo gutanga inkingo z’inzoka na Vitamini ku nka 200.

Babanza kuganiriza aborozi

Dushimimana Alliance ati “Nk’abanyeshuri twiga muri Bigogwe TSS yahoze yitwa EAV Bigogwe, impamvu zadukuye aho twiga tukegera abaturage ni ukugira ngo tubafashe turinda amatungo yabo indwara ziganjemo iz’inzoka. Ni igikorwa cyo gutanga Vitamini n’ibinini by’inzoka ku nka kugira ngo zigire ubuzima bwiza”.

Ariongera ati “Twamenye ko hano hari ikibazo cy’amazi yanduye inka zinywa, ibyo bibazo ntabwo twabirebera kandi twiga ibijyanye n’ubworozi, gufasha abaturage bisa no kwifasha, nk’abantu tunywa amata buri munsi tugomba guharanira ko inka muri aka gace zigira ubuzima bwiza, niyo mpamvu twabageneye iyi miti nta kiguzi”.

Niyonsenga Moïse ati “Turi aha mu gikorwa cyo gufasha abaturage mu bijyanye n’ubworozi kugira ngo amatungo yabo agire ubuzima bwiza, ibi tubyitezeho umusaruro mwinshi cyane kuko nk’amazi bajya bakoresha twasanze ashobora kuba yanduye, niyo mpamvu twafashe icyemezo cyo kubegera ngo tubafashe kurinda amatungo yabo indwara. Ibi ni ukwifasha dufasha n’abanyarwanda”.

Ni abanyeshuri biga ibijyanye n’ubworozi

Abo banyeshuri bavuga ko ari n’umwanya baba babonye wo gushyira mu ngiro ibyo biga, ubwo bumenyi bakabufashisha abaturage.

Ubuyobozi bwa Bigogwe TSS burishimira icyo gikorwa cy’abanyeshuri babo, aho buvuga ko ari gahunda imaze gushinga imizi, nk’uko Umuyobozi w’iryo shuri Maniraguha Primier abivuga.

Ati “Ni igikorwa dukora aho abanyeshuri begera abaturage baturiye iri shuri babafasha gukemura ibibazo bahura nabyo mu buhinzi n’ubworozi, cyane cyane barinda amatungo inzoka n’imikurire itari myiza”.

Uwo muyobozi avuga ko bakingiye inka 200, abo banyeshuri kandi bakaba bakomeje no kwegera abaturage babigisha uko babona indyo yuzuye, aho babakorera uturima tw’igikoni, banabashishikariza gutera ibiti byimbuto, bakaba bamaze gutanga ibiti by’imbuto 5100, birimo Avoka zibanguriye n’Amapapayi.

Abanyeshuri biga muri Bigogwe TSS biyemeje guhangana n’indwara z’inzoka zifata amatungo

Ni ibikorwa byashimishije abahinzi n’aborozi, aho bemeza ko nyuma y’uko inka zabo ziboneye imiti y’inzoka na Vitamini bigiye kubongerera umukamo.

Rwanamiza ati “Turashimira ubuyobozi bwacu butwitaho, bakaba batwoherereje abana bacu bari kutuvurira amatungo kugira ngo uburwayi yari afite bukire, bakabidukorera ku buntu. Indwara y’inzoka yitwa uruhika, yugarije inka zacu ubu zirakira”.

Veterineri w’Umurenge wa Bigogwe, Aburukundo Fulgence, arashima umusanzu ukomeje gutangwa n’abo banyeshuri mu buhinzi n’ubworozi, ahatangwa ibiti ndetse n’imiti y’inzoka na Vitamini, ibyo bikazamura iterambere ry’abaturage bo mu Murenge wa Bigogwe ufite inka 5800.

Ku kibazo cy’amazi yanduye inka zinywa, Aburukundo yavuze ko hari gukorwa inyigo yo kugeza amazi mu nzuri, mu rwego rwo korohereza aborozi.

Inka 200 zahawe imiti y’inzoka na vitamini

Uruganda rw’ibirayi rwa Nyabihu rwaradindiye

NIRDA iri mu bigo bya Leta bivugwa muri Raporo y’Umugenzuzi Mukuru w’Imari ya Leta (OAG), y’umwaka warangiye muri Kamena 2022, ivuga ko hari inganda ebyiri zahawe ingengo y’imari ya Leta ariko zikaba zitarakora kuva mu myaka irenga ine ishize.

Raporo ya OAG ivuga ko izo nganda ari urwenga umutobe na divayi mu bitoki ruri mu Karere ka Rwamagana, hamwe n’urw’ibirayi mu Karere ka Nyabihu, zikaba zarahawe ingengo y’imari irenga Miliyari imwe na miliyoni 500 muri 2019/2020.

Raporo ya OAG igira iti "Kugera mu kwezi kwa Nzeri 2022 ubwo hakorwaga igenzura, urwo ruganda rwa divayi n’umutobe (Rwamagana Banana Wine), ndetse n’urw’ibirayi rwitwa Nyabihu Potatoes Plant, zari zitaratangira gukora".

Umuyobozi Mukuru wa NIRDA, Christian Sekomo Birame, yaganiriye na Kigali Today avuga ko uruganda rw’ibitoki rw’i Rwamagana rwo rwatangiye gukora, ariko urw’ibirayi muri Nyabihu rukaba rugitereje abaruhaye imashini bagomba kuza kuyishinga neza(installation), hamwe no kwerekana uko ikora.

Sekomo yagize ati "Ikibazo dufite ni uko hari imashini twari twaratumije yaje mu gihe cya Covid-19 muri 2019/2020, ariko abayiduhaye ntabwo bigeze babona uko bagera mu Rwanda ngo bayikoreshe banerekane (ku batekinisiye bo mu Rwanda) uko ikora".

Sekomo avuga ko bakomeje kwibutsa ikigo cyitwa Amber, cyahaye u Rwanda imashini yoza, itonora ikanakora ifiriti mu birayi, kugira ngo baze gutoza Abanyarwanda uko ikora.

Sekomo asobanura ko abatekenisiye bo mu Rwanda badashobora kwiha gukoresha imashini y’uruganda batazi uburyo ikora, kuko iramutse yangiritse abo batekinisiye bayohereje ngo bahita babona urwitwazo.

Avuga ko akomeje gusaba abo batekinisiye kuza mu Rwanda muri uku kwezi kwa Kamena 2023, n’ubwo ngo bagaragaza ko bafite gahunda nyinshi z’aho babonye ibiraka bibahesha amafaranga menshi.

Umuyobozi Mukuru wa NIRDA, avuga ko iyo mashini yazanywe mu Rwanda ifite ubushobozi bwo koza, gutonora no gukata ibirayi bibarirwa hagati ya toni 5-10 ku munsi.

Uruganda rutunganya ibirayi rwa Nyabihu rwatashywe na Minisitiri w’Ubucuruzi n’Inganda (MINICOM), icyo gihe yari François Kanimba mu mwaka wa 2016, kugeza ubu rukaba rutarimo gutanga umusaruro bitewe n’iyo mashini itaratangira gukoreshwa.

Sekomo yakomeje asobanura ko ikibazo cy’uruganda rukora umutobe, divayi n’urwagwa mu bitoki cyo cyakemutse, ubu bimwe mu bikorwa n’uru ruganda ngo bimaze kugera ku isoko.

NIRDA ivuga ko kugeza ubu irimo kwiga uburyo bwo kugabanya igihombo cy’ibiribwa byangirika, amakuru yo kureba aho byangirikira hose akazakusanywa, agahabwa inzego zitandukanye kugira ngo zifate imyanzuro.

Abarokotse Jenoside, abayigizemo uruhare, ababakomokaho n’abatahutse bashishikajwe n’ibibahuza birinda ibibatanya

Ubuhamya bw’abaturage bitabiriye ibi biganiro harimo Numviyeho Emmanuel, wari ufite imyaka itatu mu gihe cya Jenoside yakorewe Abatutsi, akaba yarabashije kuyirokoka ariko abavandimwe be n’umubyeyi we bo bakicwa.

Ngo guhangana n’ibikomere yasigaranye ari imfubyi byabanje kumugora, ariko aho batangiriye ibi biganiro mu matsinda ya Mvura Nkuvure, yagiye arushaho kubikira bigera n’aho ababarira uwamwiciye.

Yagize ati “Abavandimwe banjye na Papa, ba data wacu ba masenge na nyogokuru, ubwo bicwaga muri Jenoside nasigaye ndi umwana muto wirera mu buzima bw’ubupfubyi, bigera ubwo njya no kuba mu muhanda. N’ubwo nyuma yaho naje guhura n’umugiraneza wo mu muryango wari warasigaye akanyitaho akandera, ariko nahoranaga agahinda kenshi ko kubura abanjye”

Ati “Nabaga ndimo kwiga hamwe n’abandi bana bafite ababyeyi babitaho, njye nakwibuka ko ntagira umuryango bikanshengura umutima, ngahorana ubwoba bw’uko abanyiciye bazaza nanjye bakanyica. Ariko uko nagiye mbana n’abandi mu matsinda ahumurizanya bikiyongeraho n’iyi gahunda ya Mvura Nkuvure, byatumye mbasha kubohoka, ndiyakira ngira umutima wo kubabarira abangiriye nabi”.

Numviyeho Emmanuel na Ntakemerino Ernest babashije gukira ibikomere none babanye neza

Ntakemerino Ernest wagize uruhare mu kwica abo mu muryango wa Numviyeho, yahamijwe icyaha cya Jenoside abifungirwa imyaka 12, aho yaje gufungurwa nyuma yo kwemera icyaha no kugisabira imbabazi.

Na we ngo yahoranaga inkomanga ku mutima n’ipfunwe, aza kubasha kubikira nyuma yo guhurira n’abandi mu matsinda ya Mvura Nkuvure harimo n’uwo yiciye.

Agira ati “Umuryango wa Numviyeho twari duturanye tubanye neza, dutumirana mu birori tugasabana, tugasangira ibyo kurya n’ibyo kunywa, badukamira amata. Muri Jenoside yakorewe Abatutsi naje kwijandika mu gitero cyabishe, nyuma yaho mpungira muri Kongo. Ubwo natahukaga nafungiwe icyo cyaha mara imyaka 12 muri gereza. Muri icyo gihe nagiye nigishwa, barangorora binyubakamo imbaraga zo kuvugisha ukuri ndetse nsaba imbabazi ndababarirwa”.

Ati “Mu kurekurwa, nibazaga ukuntu nzajya mpuza amaso n’abo nahemukiye, nkumva binteye ubwoba nkatekereza ko bazanyihimuraho. Gusa siko byagenze kuko banyakiranye umutima w’impuhwe noneho byiyongeraho no kwibumbira muri aya matsinda ya Mvura Nkuvure tuganira ku mateka buri wese arabohoka ampa imbabazi, ubu tukaba tubanye tutishishanya. Ubu umutima wanjye waruhutse uwo mutwaro nari nikoreye ku bw’imbabazi nahawe”.

Mu Karere ka Nyabihu abagera ku 147 nibo bari mu matsinda ya Mvura Nkuvure

Mu Karere ka Nyabihu, abaturage barimo abarokotse Jenoside yakorewe Abatutsi, abayigizemo uruhare, abakomoka kuri ibyo byiciro byombi n’abari barahunze guhera mu 1959, bose hamwe bagera ku 147, ni bo bari bamaze ibyumweru 15 mu rugendo rw’isanamitima binyuze muri Mvura Nkuvure.

Babifashijwemo n’Umuryango Prison Fellowship, Haguruka na Dignity in Detention Organization (DIDE). Iyi miryango ikabifashwamo n’Umuryango mpuzamahanga witwa Interpeace.

Mukamana Adélite, umukozi wa Prison Fellowship, avuga ko mu rugendo rw’ubumwe n’ubwiyunge urubuga ruhuza ibi byiciro byose rukaganira rukanomorana ibikomere, rwari ngombwa.

Yagize ati “Aya matsinda ni urubuga rutekanye, rufasha abantu kuganira mu buryo bwiza, bweruye butuma buri wese yitekerezaho agatinyuka mugenzi we, bagafatanya mu rugendo rwo kwiyubaka bose babohotse. Ari uwakomeretse ndetse n’uwakomerekeje bifasha buri wese gukorwa ku marangamutima ye, bikabafasha kubaka imibanire myiza mu buryo bwagutse bakagira ubumwe butajegajega, no gusuzumira hamwe uko bakubaka imibereho”.

Mukamana Adélite avuga ko amatsinda ya Mvura Nkuvure ari ingenzi mu rugendo abanyarwanda barimo rwo kwiyubaka

Mu gikorwa cyo gusoza ku mugaragaro ibyo biganiro, Umunyamabanga Nshingwabikorwa w’Umurenge wa Rugera, Byukusenge Emmanuel, yagarutse ku cyo biteze ku babyitabiriye.

Yagize ati “Urugendo turimo rw’ubumwe n’ubwiyunge ndetse no kwiyubaka kw’Abanyarwanda baharanira iterambere ryihuse kandi rirambye, rudusaba kwimakaza imibanire myiza abantu bakanga ibyabatanya ahubwo bagashyira imbere ibibahuza. Ibyo rero nibyo dusaba abitabiriye ibi biganiro, kugenda bakabyitaho kandi bakabitoza n’abandi”.

Kugeza ubu mu Turere dutanu tw’Igihugu iyi gahunda ikorerwamo, habarurwa abagenerwabikorwa 836 bibumbiye mu matsinda yo mu baturage, akorera mu mirenge itanu ya buri Karere ndetse n’abarizwa muri gereza enye; aha ho akaba ahuriramo ababa bitegura gufungurwa kugira ngo nibura bajye basubira mu muryango nyarwanda bafite impamba y’imibanire myiza n’abandi.

Imibanire mu matsinda yatumye batinyukana hagati yabo none ubu barasabana

Iyi myanda itabora ihangayikishije abahinzi

Bifuza ko hagira igikorwa byihuse hagatunganywa inzira zigana ku kimoteri cyo muri ako gace zangiritse, ndetse icyo kimoteri kikanavugururwa, mu gukumira igihombo giterwa no gusarura bike, bitewe n’iyo myanda idindiza imyaka baba bahinze.

Nsekanabo Théodomir ati: "Usanga imirima yacu yuzuye amashashi n’amacupa, tugahora buri munsi turwana no kubitoragura tubivanamo. Hari ubwo tuba turimo guhinga cyangwa tubagara ibicupa bikadukomeretsa yewe n’imyaka tuba twahinze ntibone uko ikura ngo itange umusaruro, bitewe n’ibyo bishashi hamwe n’amacupa biba byuzuyemo. Ababimenamo twibaza niba ari ifumbire baba badushyiriramo bikatuyobera".

Undi ati "Imirima n’imyaka yacu birangirika cyane, biturutse kuri iyo myanda itabora baba bamennyemo. Baba bayirunze mu bifuka bakaza bakabijugunyamo, ibindi bakabinyanyagizamo. Turabangamiwe cyane, dukeneye kumenya niba imirima yacu ariyo yatoranyirijwe kugirwa ingarani bitaba ibyo imyanda ikagira ahantu hazwi imenwa hatatubangamiye, kandi hadashyira ubuzima bwacu mu kaga".

Abaturage batunga agatoki abashinzwe gutunda imyanda bayivana mu masoko na santere y’ubucuruzi byo ku Kora, biri mu gace icyo kimoteri kibarizwamo, kuba aribo bacunga ku ijisho ba nyiri imirima, bakabimenamo.

Bamwe mu batunda iyo myanda, bo bakemeza ko kuyimena mu mirima y’abaturage, baba batinya urugendo rwa kure bakora bayijyanye ku kimoteri kandi n’inzira zijyayo zikaba zihoramo ibinogo n’icyondo cyinshi, ku buryo mu gihe cy’imvura haba hahindutse isayo kuhanyura bikagorana. Ibi kandi ngo biniyongeraho kuba icyo kimoteri ubwacyo gishaje cyane.

Simpenzwe Pascal, Umuyobozi w’Akarere ka Nyabihu wungirije ushinzwe imibereho myiza y’abaturage, avuga ko iki kibazo bakizi kandi ko bagiye kwihutira kukivugutira umuti.

Yagize ati "Turimo gukurikirana iby’iki kibazo dufatanyije n’ubuyobozi bw’Umurenge ndetse na kompanyi ishinzwe gutwara imyanda, kugira ngo abayitunda bubahe imirima y’abaturage, birinde kuyimenamo inyanda. Tugiye kujya dukora igenzura rihoraho ku buryo n’uzafatirwa muri iryo kosa azabiryozwa".

Ati "Dufite gahunda yo gutunganya kiriya kimoteri ku buryo imyanda ibora n’itabora itandukanywa, no kuba mu gihe imyanda yuzuye, hajya habaho kuyimurira mu bindi bimoteri by’ahandi mu kwirinda ko cyakuzura. Ni ingamba twizeye neza ko zizatanga umuti uzagira uruhare rufatika mu kuba icyo kibazo kitongera gusubira".

Usibye abahafite imirima, abaturiye icyo kimoteri bo banagaragaza ko umunuko ukabije ukunze kumvikanamo, cyane cyane mu gihe cy’imvura ubahangayikishije bidasize n’impungenge z’abana babo bagikiniramo, hakaba n’abarogotamo imyanda. Ibi bikaba bikomeje kubabera ihurizo mu guhangana n’indwara ziterwa n’umwanda.

Minisitiri w’Intebe Dr Ngirente aganira n’abaturage

Minisitiri w’Intebe Dr Ngirente, yabisabye abatuye Umurenge wa Rugera mu Karere ka Nyabihu, ahaguye imvura ituma ataganirira nabo ahari hateguwe, akabasanga aho bugamye.

Yagize ati "Abantu bagiye, ibintu birangirika, ariko turakomeza kubaba hafi, twaje kubihanganisha, ariko ntidushaka ko hagira uwongera gutwarwa n’inkangu, niyo mpamvu uwo basaba kwimuka yimuka vuba. Turakomeza kubaba hafi ndetse n’ibibazo byanyu turabikurikirana."

Minisitiri w’Intebe Dr Ngirente yahumurije abaturage bagizweho ingaruka n’ibiza

Ni ijambo ry’ihumure yatanze nyuma yuko ibiza byibasiye abatuye Akarere ka Nyabihu, bikica abantu 18 harimo abagwiriwe n’inkangu.

Imibare itangwa n’Intara y’Iburengerazuba igaragaza ko mu Karere ka Nyabihu, abantu 18 bapfuye bishwe n’ibiza kandi mu Murenge wa Rugera, abantu batandatu bapfuye bazira ibiza ndetse hangirika ibikorwa remezo, mu gihe abaturage benshi bangirijwe ibyabo.

Intara y’Iburengerazuba igaragaza ko abaturage babarirwa hejuru ya 75 bakomerekejwe n’ibiza, naho inzu zirenga 3118 zirasenyuka mu Turere twa Ngororero, Rubavu, Nyabihu, Rutsiro na Karongi, mu gihe izindi zangijwe n’amazi ariko zitaguye zibarirwa mu 3800.

Ibiza byatewe n’imvura mu Ntara y’Iburengerazuba byatumye abantu barenga 4200 bava mu byabo, naho amatungo 2376 arapfa, imyaka yari ihinze kuri hegitare 2412 irangirika, mu gihe ibiraro 85 byangiritse bituma ubuhahirane buhungabana.

Benshi mu bashyizwe mu nkambi zibacumbikira basaba Leta kubagezaho ibyo kurya byihuse, hamwe no gufasha abana gusubira mu mashuri kuko ibikoresho by’ishuri byose byagiye, kuva ku myenda kugera ku makayi, bagasaba ko bafashwa kubona ibindi bikoresho n’ubwo n’abiga mu mashuri yisumbuye mu Murenge wa Nyundo, nabo batorohewe kubera ibikoresho byatwawe na Sebeya.

Abana b’abakobwa beretswe amahirwe ari mu gutinyukira kwiga siyansi muri Kaminuza

Ibi ni ibikomeje gushimangirwa n’abafite ubunararibonye mu by’ubumenyi n’ikoranabuhanga, mu mahugurwa arimo kubera mu Ishuri rya Rwanda Coding Academy, riherere mu Karere ka Nyabihu, akaba ateraniyemo abana b’abakobwa 108 n’abarezi babo 20 baturutse mu bigo by’amashuri yisumbuye byo mu Ntara y’Amajyaruguru n’Intara y’Iburengerazuba.

Abo bana basanga aya mahugurwa ari ingirakamaro mu gutuma barushaho gusobanukirwa neza ko amasomo y’ubumenyi, ikoranabuhanga n’imibare atagenewe abahungu gusa.

Rwemera Karabo Vanessa, umunyeshuri wiga mu ishami rya MEG kuri ES Nyange, agira ati: “Aya mahugurwa nyitezeho gutuma ndushaho kwaguka mu bitekerezo, no kubasha kwisuzuma nkasobanukirwa neza urwego ngezeho n’aho ngifite intege nkeya, mu gushyira mu bikorwa ibyo niga, nkahongera imbaraga kandi nkasobanukirwa uko ibyo niga mu ishuri nabihuza n’ubuzima bwo hanze”.

Abo bana biga mu mwaka wa kabiri, uwa kane n’uwa gatanu, baturutse mu bigo by’icyitegererezo mu kwigisha amasomo y’ubumenyi n’ikoranabuhanga bakaba, bazamara icyumweru bongererwa ubumenyi butuma amasomo basanzwe biga, bayahuza n’ubuzima busanzwe no kuyabyaza udushya.

Dominique Mvunabandi, Umukozi muri Komisiyo y’Igihugu ikorana na UNESCO, mu ishami ry’ikoranabuhanga na inovasiyo, avuga ayo mahugurwa ari ingenzi.

agira ati: “Ahangaha bazabasha kugira ubumenyi butuma ibyo bize babikura mu mpapuro babishyire mu bikorwa mu buryo buzana igisubizo. Urugero niba mwarimu yakoreshaga uburyo bwo kwigisha imibare mu mpapuro gusa, ahangaha tuzakoresha ingero z’ibifatika biboneka hanze y’ishuri, bishyirwe mu ngiro ku buryo bufasha umwana gusobanukirwa neza ibyo yiga. Ikigamijwe ni ukugira ngo abana barusheho kumva neza ibyo biga kandi barusheho kubikunda bityo n’igihe basoje icyiciro runaka bajya mu kindi, bajye baba bazi neza umumaro w’ayo masomo n’uko bayahuze n’ubuzima busanzwe”.

Bashishikarizwa gutinyuka no gukunda amasomo y’ubumenyi, ikoranabuhanga n’imibare

Minisiteri y’Uburezi igaragaza ko hagikenewe imbaraga mu gushishikariza abana b’abakobwa bakomeza icyiciro cya Kaminuza, kwiga amasomo y’ubumenyi, ikoranabuhanga n’imibare kuko bakiri bacye.

Dr Fabien Harerimana, umukozi muri iyi Minisiteri ushinzwe ubumenyi ikoranabuhanga n’ubushakashatsi agira ati: “Nka Minisiteri, tubona ko nta mbogamizi zakabaye zibangamira umwana w’umukobwa, kuko afunguriwe amahirwe ku kigero kingana n’ay’umuhungu, yaba ku rwego rw’amategeko, imibereho n’imyigire. Ariko iyo urebye abakobwa biga ubumenyi, ikoranabuhanga n’imibare muri kaminuza, usanga bakiri bacyeya kuko bari kuri 33%”.

Ati “Ni ingenzi rero gutinyuka bagahindura imyumvire bakarushaho kumva uruhare rwabo mu kwitabira amasomo y’ubumenyi, ndetse bakanabishishikariza abandi kuko na bo bifitemo ubushobozi bwo kuyiga bakayatsinda neza, kandi bakaba abazana ibisubizo ku isoko ry’umurimo ushingiye ku bunararibonye mu bijyanye n’ubumenyi, ikoranabuhanga n’imibare”.

Ababyeyi na bo bakangurirwa kudaheranwa n’amateka ashingiye ku muco wa cyera, washyiraga imbere imyumvire y’uko amasomo y’ubumenyi agenewe abana b’abahungu gusa, abana b’abakobwa bagasigazwa inyuma.

Dr Marie Christine Gasingirwa, inararibonye mu by’amasomo ya siyansi, asanga n’abakobwa ubwabo, bakwiye gufata iya mbere bakumva ko bashoboye kimwe n’abahungu.

Aya mahugurwa yatangiye guhera tariki 1 Mata akazasozwa tariki 6 Mata 2023. Mu mpera z’uyu mwaka hakazahugurwa n’abo mu zindi Ntara zisigaye.

Kuva iyi gahunda yatangira mu mwaka wa 2018, abasaga 600 ni bo bamaze kuyitabira. Usibye mu Rwanda, gahunda nk’iyi inakorwa mu bihugu nka Kenya, Uganda na Tanzaniya, hagamijwe kubaka ubushobozi bw’abana b’abakobwa, kugira ngo babe ab’imbere mu guteza imbere umugabane wa Afurika.

Maternité irimo kubakwa muri Kamena 2023 izaba yatangiye gukorerwamo

Iyi Maternité iri kubakwa n’abagize Diaspora Nyarwanda yo mu gihugu cy’u Budage, bagamije kwegereza abaturage serivisi zishingiye ku bubyaza hafi yabo, mu kurushaho kwita ku buzima bw’umubyeyi n’umwana.

Ababyeyi Kigali Today yasanze kuri iki kigo nderabuzima, bagaruka ku ngorane baterwaga n’ubutoya bw’icyumba bacyirirwamo, mu gihe babyaye kandi gishaje.

Mukangwije Béatrice yagize ati “Aka kumba kamwe konyine karimo ibitanda bitatu, niko kacyirirwamo ababa bategereje kubyara ndetse n’ababa bamaze kubyara. Usanga tukabyiganiramo, abandi bacurikiranye ku bitanda, umuntu atabona n’aho gukandagira cyangwa aho ahumekera”.

Ati “Haba ubwo abaganga bibarenga, bikaba ngombwa ko bamwe babimurira mu kindi cyumba kigenewe abarwaye izindi ndwara, ku buryo tunatekereza ko byashyira mu kaga ubuzima bw’impinja zihavukira, bitewe n’uburyo abantu baba bavangavanze”.

Imirimo irimo gukorwa ni iyo gutera amarangi no gushyiramo amakaro

Umubyeyi witwa Abemeranye yungamo ati “Hari n’abaza kubyarira ahangaha, byaba ngombwa ko ambilanse ibajyana kubyarira ku bitaro byisumbuyeho bya Kabaya, bakagerayo ntibabashe kubona ababagemurira cyangwa ababarwaza, bitewe n’uko ari ahantu kure bisaba gutega moto yishyurwa amafaranga ibihumbi bitandatu. Iyi maternité nshya barimo kutwubakira ahangaha yari ikenewe cyane, kugira ngo idukure mu bwigunge tubyarire ahisanzuye heza kandi hajyanye n’igihe”.

Imirimo yo kuyubaka igeze ku kigero cya 85%, aho inyubako zirimo guterwa amarangi no gushyirwamo amakaro. Biteganyijwe ko muri Kamena 2023, izaba yatangiye gutanga serivisi.

Abanyarwanda baba mu Budage, batekereje uyu mushinga wo kuyubaka no kuyishyiramo ibikoresho byose nkenerwa bizajya byifashishwa mu kubyaza abagore, bagamije kunganira Igihugu muri gahunda yo kwita ku buzima bw’umubyeyi n’umwana; umushinga ukazatwara miliyoni zisaga 250 z’amafaranga y’u Rwanda.

Abaturage bagana iki kigo nderabuzima bagaragaza ko maternité yari ikenewe cyane

Kalimba Banga Claude, Umuhuzabikorwa w’uyu mushinga, agira ati “Ukubangamirwa n’ubutoya bw’aho ababyeyi bakirirwa baje kubyara kuri iki kigo nderabuzima, bujyana n’ibikoresho byari bicyeya kandi bitajyanye n’igihe. Ibi bikaba byagiraga uruhare rukomeye mu guca bamwe intege, bikabaviramo no kubyarira mu ngo. Ubu rero dutekereza ko iyi maternité ije kuba igisubizo kuri serivisi zihabwa abagore no korohereza abafite ububyaza mu nshingano zabo”.

Umukozi ushinzwe irangamimerere mu Murenge wa Rurembo, Kayihura Faustin, avuga ko ubukangurambaga bushishikariza ababyeyi kubyarira kwa muganga, buzarushaho kumvikana babikesha iyi maternité nshya.

Mu kurushaho kumvikanisha akamaro kayo, abajyanama b’Ubuzima bo mu Murenge wa Rurembo banahawe amahugurwa y’iminsi itanu, abongerera ubumenyi bwo gukangurira abaturage ibyiza byo kubyarira kwa muganga.

Iyi maternité igiye kuzura, yiyongera ku zindi ebyiri ziheruka kubakwa harimo iri ku kigo nderabuzima cya Nyakigezi n’iyubatswe kuri Peste de santé ya Jaba, kuri ubu zanatangiye gukora.

Ababaga bategereje kubyara n’ababyaye bagiraga icyumba kimwe kibagenewe gitoya kitajyanye n’igihe

Uretse ubuzima, Abanyarwanda bo muri Diaspora yo mu Budage bagira uruhare mu yindi mishinga harimo n’igamije guteza imbere Uburezi, aho bubatse ibyumba by’amashuri bikabakaba 30 mu Karere ka Nyabihu, birimo ibyubatswe kuri Centre Scolaire Nyarubara, GS Ruhehe no kuri GS Nanga.

Uhereye ibumoso, Minisitiri Mbabazi, Ngabo Karegeya na Meya wa Nyabihu Mukandayisenga

Umwambaro Rumbiya, bamwe muri iki gihe bakunze no kwita ‘Igishura’, Minisitiri Mbabazi yagaragaye awiteye, ndetse n’Umuyobozi w’Akarere ka Nyabihu Mukandayisenga Antoinette hamwe n’abandi bayobozi banyuranye, bari kumwe na bo, bafashe ibyansi mu ntoki ndetse n’inkoni, bari mu rwuri rw’inka, ruherereye mu Kagari ka Arusha, mu Murenge wa Bigogwe.

Ni umwambaro ufite igisobanuro gikomeye mu bijyanye n’umuco, kuko by’umwihariko ababyeyi b’abagore cyane cyane bo muri ako gace, mu myaka yo hambere, Rumbiya benshi bayidodeshagamo ingutiya yo kwambara n’umwitero. Kimwe n’abagabo, na bo barawukenyeraga bakanawitera, mu gihe barimbye cyangwa banaragiye inka.

Uyu mwambaro na n’ubu ufatwa nk’ufatiye runini abatuye mu Karere ka Nyabihu, kuko bawifubika, cyane cyane mu gihe cy’ubukonje n’imbeho nyinshi bikunze kuharangwa; dore ko ubungubu n’igitambaro usigaye ukorwamo gikozwe mu buryo umuyaga n’ubukonje bidapfa kuwumeneramo.

Basobanuriwe byinshi ku bukerarugendo bukorerwa mu Bigogwe

Mu gusura ibikorwa by’ubukerarugendo, bumaze umwaka urenga butangiye gukorerwa muri aka gace kagizwe n’imisozi miremire, yihariye ubuso bunini bugizwe n’inzuri, Minisitiri Rosemary Mbabazi n’abo bari kumwe, beretswe ibikorwa binyuranye bishingiye ku muco urebana n’ubworozi bw’inka; nko gukama, kunywesha amata inkongoro, gucunda, umukino wo kunyabanwa, gusimbuka urukiramende, kuvuga amazina y’inka n’ibindi.

Muri urwo ruzinduko Minisitiri Mbabazi yagiriye mu Karere ka Nyabihu, ku wa Kane tariki 19 Mutarama 2023, yasuye ibikorwa bitandukanye bya ba rwiyemezamirimo b’urubyiruko, anagirana ibiganiro n’urubyiruko rusaga 300 ruhagarariye urundi muri ako Karere, aho yabibukije ko hari amahirwe menshi abakikije bakwiye kubakiraho, harimo ubuhinzi n’ubworozi, ubukerarugendo, ubukorikori, inganda n’indi mishinga itanga imirimo ku bantu benshi, ikomeje kugera mu Karere ka Nyabihu, kandi bakaba bayungukiramo ibintu byinshi.

Yagize ati “Turifuza ko mugira intego, kandi musobanukiwe neza icyerekezo muganamo, mugendeye kuri aya mahirwe yose ari hano iwanyu. Ibi byajyana no guharanira kugira ubuzima buzira umuze, gukoresha ubwenge, umutimanama n’amaboko; bikababera intwaro ibafasha kunoza ibyo mukora. Ibyo bizabazanira inyungu ubwanyu n’Igihugu kidasigaye”.

Rumbiya ifatwa nk’umwambaro ufatiye benshi runini kuva kera

Yanasuye Ikigo cyitwa Ishema ry’Umuco Ltd, gikorera ibijyanye n’ubugeni n’ubukorikori mu Murenge wa Shyira, cyashinzwe na rwiyemezamirimo witwa Bayizere, wahaye akazi urubyiruko 9 akaba anigisha abandi 26 umwuga w’ubudozi.

Anagaragaza ko umuhate w’urubyiruko mu guteza imbere umuco n’amateka y’iwabo, biri mu bikenewe cyane, nk’intwaro yafasha urubyiruko mu kuyamenya byimbitse no kujya bayasangiza abandi.

Batambagiye urwuri

Imidugudu ya Nsakira na Bugarama yugarijwe bikomeye n’ayo mazi

Abaganiriye na Kigali Today batuye mu Kagari ka Bukinanyana mu Mudugudu wa Nsakira, n’uwa Bugarama, uduce twibasiwe cyane n’ayo mazi, bavuga ko ababangamiye.

Umwe ati “Imvura iragwa inzu zose zo muri kano gace, zikuzura amazi, abantu bakabura aho banyura bataha cyangwa abakeneye kugira iyo bajya, ntibabone aho kunyura. Hari abo inzu zahirimyeho bajya kuba ku gasozi, aho babayeho basembereye mu babacumbikiye”.

Ngo hashize imyaka isaga irindwi abahatuye batakambira ubuyobozi, ariko bategereje kubona igisubizo, amaso ahera mu kirere. Iyo ugeze muri iyi Midugudu yombi imvura yaguye, inzu aba ari mu bidendezi by’amazi, ku buryo no kubona aho ukandagira biba bidashoboka.

Undi muturage ati “Aya mazi aba afite ubukana, ku buryo hari n’igihe umuntu aba yicaye, ukumva inzu ya kanaka irahirimye. N’ubu tuvugana ijoro ryacyeye, imvura yaguye bamwe babonye inzu zabo zuzuyemo amazi, bafata utwangushye barasohoka, bajya hanze ngo zitabagwaho. Abo iyo mvura yaguye batarataha, na bo baheze mu mayira”.

Hashize igihe kinini abaturage batakambira ubuyobozi ngo bubakemurire iki kibazo

Ati “Ubu nta kindi kintu cy’iterambere tugitekereza, bitewe no guhora duhangayikishijwe n’aya mazi agiye kutumaraho, dore ko yanarengeye imirima twahingaga, ku buryo ubu tutakigira aho gukubita isuka. Abana bacu ntibakijya kwiga, twanagerageje kwirwanaho dusuka imicanga n’itaka mu mifuka, tugenda tuyitondeka aho ayo mazi amenera yinjira mu ngo zacu, tugira ngo tuyakumire biba iby’ubusa”.

Aya mazi, ngo yaba atizwa umurindi n’imiyoboro ya bimwe mu biraro byatunganyijwe ku muhanda Musanze-Rubavu, iroha amazi mu gace abo baturage batuyemo. Nanone kandi banavuga ko hari amazi aturuka ku nzu zo mu mudugudu w’icyitegererezo wa Bihinga, na za rigore zikikije umuhanda w’ibitaka wa Sashwara-Kabuhanga, zitembamo ayo mazi akamanukira mu ngo zabo.

Umuyobozi w’Akarere ka Nyabihu, Mukandayisenga Antoinette, avuga ko bari mu biganiro na ‘Rwanda Water Board’, kugira ngo hashakishwe inzira zo gukemura iki kibazo.

Yagize ati “Twatangiye inzira y’ibiganiro n’umufatanyabikorwa Rwanda water Board, bigamije kunoza umushinga wo kuyoborera ayo mazi mu mugezi wa Nyamukongoro, mu gukumira ko akomeza kwangiriza abaturage. Ni ibikorwa byabanjirijwe no kubarura ingo zibangamiwe n’ayo mazi, kugira ngo muri uko gushakisha igisubizo kirambye turimo guteganya, abo bigaragara ko inzu zabo zakwangirika, babe bakwimurwa noneho umushinga nyirizina ugatangira”.

Hari abo inzu zabo zasenyutse

Ati “Hari hashize nk’amezi tubiganiriyeho n’uwo mufatanyabikorwa, ubu ikiri bubeho, ni ukongera kubishyiramo imbaraga dufatanyije, kugira ngo ibyo bikorwa byihutishwe”.

Ku bijyanjye n’ibyo abaturage bavuga ko amazi abibasiriye, yaba aturuka mu Mudugudu wa Bihinga ndetse na za rigore z’imihanda inyura muri ako gace; Mayor Mukandayisenga, ntiyemeje cyangwa ngo ahakane ko ari byo koko; gusa atangaza ko mu gushyira mu bikorwa umushinga ugamije gushakisha igisubizo kirambye, bazaboneraho no gusuzuma byimbitse niba koko ibivugwa n’abo baturage ari byo.

Icyakora abizeza ko bagiye gushyira imbaraga mu gufatanya n’inzego zose zirebwa n’iki kibazo mu kukivugutira umuti.

Raporo iheruka gukorwa n’Akarere, igaragaza ko ingo 39 arizo zugarijwe n’amazi y’imvura akomeje kwibasira ako gace.

Hari aho imirima yarengewe

Bitarenze 2023 uyu muhanda uraba wuzuye

Ni umuhanda umaze imyaka irenga itatu ukorwa, ukaba uhuza uturere twa Rubavu, Nyabihu na Ngororero uciye mu ishyamba rya Gishwati, ahakorerwa ubuhinzi n’ubworozi.

Uwo muhanda ufite uburebure bw’ibilometero 93 ukaba uzafasha abahinzi n’aborozi kugeza umusaruro ku isoko bitewe n’imiterere yaho.

Habanabakize Jean Claude, Umuyobozi w’Akarere wungirije ushinzwe ubukungu n’iterambere, avuga ko ibyifuzo by’abaturage birimo kubahirizwa kuko bizeye ko umuhanda umaze imyaka ukorwa uzarangirana n’uyu mwaka.

Agira ati “Umurenge wa Muringa uhinga kandi worora inka zitanga umukamo, bagerageza kwiteza imbere bishoboka kuko hari amakaragiro y’amata atatu abafasha kwakira umukamo ugezwa ku ruganda rwa Mukamira. Turabizi ko hari ikibazo cy’imihanda n’ubwo hari ibisubizo byatangiye gushakwa, mu minsi yashize byari bigoye, ubu umuhanda watangiye gukorwa hari icyizere ko ibilometero 93 birimo gukorwa bizatanga igisubizo.”

Imirimo irarimbanyije

Habanabakize avuga ko barimo gushyira imbaraga nyinshi mu bikorwa byo kurangiza uwo muhanda, kugira ngo abaturage bave mu gihirahiro.

Ati “Turimo gushyiramo imbaraga mu kuyikora kuko Akarere kacu kagizwe n’imisozi miremire kandi gahoramo imvura, ariko imikoranire yacu n’abakora umuhanda imeze neza, twizera ko izarangirana n’uyu mwaka wa 2023 ikabyazwa umusaruro wifuzwa.”

Mu Karere ka Nyabihu habarizwa uruganda rutunganya amata, ahabarirwa hagati ya litiro ibihumbi 30 na litiro ibihumbi 45 kandi menshi akurwa mu nzuro za Gishwati.

Abaturage bafite inzuri muri Gishwati bavuga ko bishimiye kuba Leta yarongereye igiciro cy’amata, ariko bakaba basigaranye ikibazo cy’umuhanda banyuramo bayageza ku ruganda.

Ni agace karimo inka nyinshi

Ni umuhanda wa kaburimbo ugomba kuzoroshya ubuhahirane bwa Gishwati n’abatuye mu yindi mirenge ihuza Gishwati n’uturere twa Ngororero na Nyabihu, bigafasha abahinzi n’abarozi kugeza umusaruro ku isoko.

Ndayizeye, uworozi wo mu Murenge wa Muringa, avuga ko bashima Leta yabazaniye ikaragiro bakabona aho bashyira amata, bigatuma umukamo wabo ushobora kugurwa.

Ati “Mbere twabaga mu bwigunge, ariko ubu dufite ikaragiro ryakira umukamo wacu, imodoka yo ku ruganda rwa Mukamira ikaza gutwara amata, ariko iyo imvura yaguye umuhanda uba mubi bikagorana ko imodoka itugeraho, twifuza ko uyu muhanda watangiye gukorwa warangira.”

Zimwe mu mbogamizi zatumye umuhanda wa Gishwati utarangira vuba, Habanabakize avuga ko byatewe n’imvura ikunze kugwa mu misozi miremire, bikagorana gukora kuwukora ngo byiyongeyeho kuba hari abaturage benshi bagomba guhabwa ingurane bituma ibikorwa bitinda, ubu hakaba hamaze gutangwa ingurane zingana na 80%.

Isantere ya Mukamira

Mukamira iherereye mu Murenge wa Mukamira, uhana imbibi n’Umurenge wa Busogo mu Karere ka Musanze, ndetse hakaba n’abibagirwa iyo santere (Mukamira), bakayitirira Akarere ka Musanze, dore ko yegeranye n’isantere ya Byangabo mu Murenge wa Busogo.

Mu kumenya aho izina Mukamira ryaturutse, Kigali Today yegereye umusaza utuye muri ako gace w’imyaka 83 witwa Karega Callixte, wavuze ko iryo zina ryaturutse ku kizenga kinini cyari muri ako gace.

Karega Callixte

Ngo icyo kizenga cyatezaga abantu ibyago by’uburwayi, aho ngo cyafatwaga nk’indiri y’imibu itera malaria, ngo abenshi mu bagituriye bakarwaragurika ndetse bamwe bakahasiga ubuzima mu gihe batinze kugana ivuriro.

Ati “Icyatumye hitwa Mukamira, hariya hahoze ikintu kimeze nk’ikiyaga cyangwa ikizenga, cyaradendezaga nticyakamaga, hakaba ishyamba, abantu kikabatera malaria bakarwara cyane”.

Avuga ko muri ako gace kitwaga Buhoma, kafashe izina rya Mukamira ubwo icyo kizenga cyatangiye gukama, umwe mu baturage ahageze arishima agira ati “Cya kizega cyabaye Mukamira”, izina rifata rityo, abantu bose batangira kuvuga ko icyo kiyaga ari Mukamira, kugeza ubwo gikamye abaturage batangira kuhahinga.

Uwo musaza avuga ko izina Mukamira ryitiriwe iyo santere, iri muri metero nke ugana ku biro by’Akarere ka Nyabihu ahari umuhanda uhuza Nyabihu, Ngororero na Muhanga, ryabyawe n’icyo kizenga cyiswe Mukamira ubwo cyakamaga.

Ahahoze ikizenga cyakamye cyitiriwe Mukamira ubu harahingwa

Impunzi zibarirwa mu 100 nizo zimaze kugera mu Rwanda, kuva tariki ya 13 Ugushyingo 2022, ubwo imirwano yari ikomeye muri Kibumba, cyane cyane ku musozi wa Bizuru.

Abageze mu Rwanda bakiriwe n’imiryango baziranye, ariko ubuyobozi butangaza ko burimo gutegura aho bagomba kwakirirwa hamwe n’abandi bahungira mu Rwanda.

Ku wa 15 Ugushyingo 2022, Umuyobozi w’Akarere ka Rubavu, Kambogo Ildephonse yabwiye the New times ko impunzi zari zahungiye mu Rwanda 113 zajyanywe mu kigo cya Kijote.

Yagize ati "Bari bagumanye n’abo baziranye, ariko turimo kubajyana mu kigo cyakira impunzi cya Kijote."

Meya Kambogo abitangaje mu gihe imirwano ikomereje muri Kibumba na Ruhunda, ndetse impunzi nyinshi zikaba zabujijwe guhungira mu Rwanda zihatirwa kujya mu nkambi ya Kanyarucinya, iherereye ku bilometero bitanu uvuye mu mujyi wa Goma.

Ikigo cya Kijote gifite ibikenerwa byose mu kwakira impunzi, kuko n’ubundi aribyo cyateguriwe, gusa ni ikigo gitoya kidashobora kwakira benshi.

Mu gihe imirwano ikomeje gusatira umujyi wa Goma, nta gikozwe ngo intambara ihagarare, impunzi nyinshi zishobora kwisanga mu Rwanda, kuko ari nzira ishobora kuborohera bageze mu mujyi wa Goma.

Inkambi ya Kanyarucinya ibarirwamo impunzi ibihumbi zavuye mu bice bya Rutshuru na Rugari, kandi abenshi bavuga ko badafite ubutabazi bw’ibanze harimo ibyo kurya, amazi meza n’imiti.

Ku mugoroba tariki 15 Ugushyingo 2022, uwahoze ari Perezida wa Kenya, Uhuru Kenyatta, akaba n’umuhuza mu biganiro bihuje Leta n’imitwe yitwaza intwaro muri Repubulika Iharanira Demokasi ya Congo, yasuye inkambi ya Kanyarucinya atangaza ko impunzi zibayeho nabi.

Kenyatta aganira n’abanyamakuru yagize ati "Uburakari butera kwihorera, ariko buri wese yagombye kugira uruhare mu guhagarika iyi ntambara n’umubabaro abantu babayemo. Ndasaba abashoboye gufasha mu buryo bumwe cyangwa ubundi, kugira icyo mukora."

Kenyatta avuga ko yasanze impunzi zibayeho nabi, "Impunzi zibayeho mu buryo bugoye, ibyo nabonye Kanyarucinya birababaje."

N’ubwo imirwano ikomeje muri Teritwari ya Nyiragongo hafi y’umujyi wa Goma, indi mirwano ikomeje kwerekeza muri Teritwari ya Masisi mu nzira ya Tongo-Kalengera, impunzi zerekeza mu bice bya Bambu, Birambizo, Katsiru na Bukombo kandi ibintu bishobora kuba bibi imirwano idahagaze, kuko abaturage batarimo kugerwaho n’ubutabazi.

Kimwe mu bishobora guhagarika intambara ni ibiganiro biteganyijwe tariki ya 21 Ugushyingo 2022 i Nairobi muri Kenya, gusa hari impungenge ko bishobora kudashyirwa mu bikorwa nyuma y’uko Inteko Ishingamategeko ya Congo isabye ko nta biganiro, nta kuvanga abarwanyi ba M23 n’ingabo za Leta ya Congo.

Abakuru b’ibihugu mu Karere bakomeje gushaka igisubizo cy’intambara mu Burasirazuba bwa Congo binyuze mu biganiro, icyakora Leta yo ivuga ko izagishaka binyuze mu buryo bw’ibiganiro n’intambara, n’ubwo ku ruhande rwayo itarimo gutanga umusaruro.

Simpenzwe Pascal (ibumoso) yasabye urubyiruko kubyaza umusaruro aya mahirwe babonye

Iri shuri, ryubatswe mu Murenge wa Jenda. Urubyiruko rukomoka mu miryango itishoboye, bahamya ko biteguye kubakira ku bumenyi bazarivomamo, bakaba ba rwiyemezamirimo bakemura ibibazo biri ku isoko ry’umurimo.

Ishimwe Bienfait, wiga ubudozi, akaba yaraturutse mu nkambi y’impunzi ya Kigeme, mu Karere ka Nyamagabe ati “Nabagaho buri gihe ntegereje gufashwa gusa. Narangije amashuri yisumbuye sinagira amahirwe yo gukomeza amasomo. Ari inkweto, imyambaro byose nabibonaga binsabye gutegera amaboko abandi. Umwuga w’ubudozi nihaye intego yo kuwiga mbyitayeho, nzibesheho, ntunge umuryango, ntange n’akazi ku bandi”.

Urubyiruko rwatangiye kwiga imyuga ruvuga ko ari amahirwe arwegereye rugiye kubyaza umusaruro

Abarimo kwiga ibijyanye n’ubuhinzi, na bo basanga ubumenyi bazunguka, ari imbarutso yo kongera umusaruro.

Umutoniwase Divine wo mu Karere ka Nyabihu ati “Numva nkunze ubuhinzi cyane, ariko nkaba nababazwaga n’uko ntabufitemo ubumenyi bwatuma mbukora kinyamwuga. Ubu twatangiye kwiga uburyo bwo guhinga muri green house, kwikorera ifumbire irama mu murima, itangiza ubutaka kandi itagira ingaruka ku buzima bw’abantu. Twize kandi kwita ku buhinzi bw’imboga n’imbuto, bigafasha kwihaza mu biribwa, kubungabunga ibidukikije n’ibindi. Ibi bizamfasha gukora ubuhinzi buteye imbere, ku buso bunini, ku buryo mu gihe kiri imbere nzaba ndi umuhinzi ntangarugero”.

Iri shuri ry’imyuga ryashinzwe ku bufatanye n’Umuryango Impact Hope Rwanda, mu mushinga wawo witwa Center for Hope, ugamije guha urubyiruko ubumenyingiro butuma babasha kwigira.

Batamuriza Judith, umuyobozi wa Impact Hope Rwanda

Batamuriza Judith, Umuyobozi w’uyu muryango, avuga ko nyuma y’igihe kiri hagati y’amezi atandatu n’umwaka, uru rubyiruko rugomba kumara rwigishwa ayo masomo, haziyongeraho no kubaherekeza mu buryo bw’ubushobozi butuma bitabira guhangana ku isoko ry’umurimo.

Yagize ati “Intego ni uguha urubyiruko icyizere cy’ejo hazaza. Turifuza kubakira uru rubyiruko imbaraga zituma bazabasha kwifasha, bagafasha na barumuna babo bari inyuma. Ntitwifuza kubona abatega abandi amaboko ngo babasabe nyamara na bo ubwabo babashije kubakirwa ubushobozi hari icyo bakwifasha. Ubu bumenyingiro rero, ni kimwe mu bibaremamo imbaraga n’icyizere bituma bazabasha kubigeraho”.

Umuyobozi w’Akarere ka Nyabihu wungirije ushinzwe imibereho myiza y’Abaturage, Simpenzwe Pascal, yibukije urubyiruko kudapfusha ubusa amahirwe igihugu cyabahaye.

Yagize ati “Nabibutsa ko kimwe mu by’ingenzi mukwiye kuzirikana, ni uko kugira ngo umuntu agire icyo ageraho, abanza kumenya icyo ashaka kuba cyo. Iyo wamaze kugitoranya muri byinshi rero, igikurikiraho ni ukwiyemeza no gukora cyane, muzirikana ko mudafite umwaya wo gutakaza. Ibyo nibyo tubasaba kuzibandaho kuko aribyo bizabafasha kugera kure”.

Harimo n’abaiga ubuhinzi

Muri gahunda ya Leta y’imyaka irindwi igomba kugeza muri 2024, y’intego y’uko 60% bagomba kuba biga imyuga, ubumenyingiro na Tekiniki, imibare y’Akarere ka Nyabihu igaragaza ko mu banyeshuri basaga ibihumbi 21 biga mu mashuri asanzwe, abanyeshiri 2690 bangana na 11,3% bonyine, ari bo biga imyuga.

Simpenzwe ahera aha, akangurira abaturage kurushaho guha agaciro amashuri y’imyuga n’ubumenyingiro, no kumenya ko akomeje kugira uruhare rufatika mu iterambere ry’Igihugu.

Akanyamuneza kari kose ku bahinzi bahawe amashyiga ya kijyambere

Abahinzi 118 babarizwa mu Tugari tw’Umurenge wa Rugera, bibumbiye muri Koperative yibanda ku buhinzi bw’Ibishyimbo n’Ibigori, guhera ku wa kabiri tariki 4 Ukwakira 2022, batangiye gushyikirizwa amashyiga arondereza ibicanwa.

Buri shyiga, rikoranwe ahagenewe gucanirwa, rikagira amasafuriya abiri atekerwamo ndetse n’igikoresho kigenewe guterekwamo isafuriya irimo amafunguro ashyushye, bikayarinda gukonja.

Akimara kurishyikirizwa, Nyirakazamarwaniki Spesiose, n’ibyishimo byinshi yahamije ko asezereye guteka mu buryo bwa gakondo, n’umwanya munini byamutwaraga.

Yagize ati “Natekaga ku mashyiga asanzwe ya gakondo tumenyereye mu cyaro, bikansaba kurundamo ibitsitsi by’ibiti, nkavangamo ibishababa n’ibyakatsi, nabaga nararuje mu mashyamba no mu bisambu, ngahorana umutwe udakira kubera imyotsi, ikagera n’ubwo yivanga mu biryo dutetse, tukabirya byatuvuye ku nzoka. None ubu bampaye ishyiga rigezweho, ritumye nsezerera guteka mu buryo bwa gakondo”.

Ishyiga riri kumwe n’amasafuriya abiri n’igikoresho kibikwamo ibiribwa bishyushye ntibikonje

Ntamushobora Joseph ngo rizamurinda kwangiza amashyamba, ati “Buri giti cyose cyashibukaga mu mashyamba yanjye, sinatumaga kimara kabiri, kuko nahitaga ngitema kugira ngo abo mu rugo babone icyo batekesha. Ahari ayo mashyamba hari harabaye nk’intabire, naratangiye kototera ay’abandi. Iri shyiga rya kijyambere mpawe, rizandinda guhora mpangayikiye icyo mu rugo batekesha, kuko ryo risaba gukoresha udukwi dukeya”.

Abagore bahoranaga impungenge zo kugabura amafunguro akonje, ngo baciye ukubiri na zo.

Mukamurenzi ati “Ibiryo byabaga bihiye, twatinda tukabirya byahororombye, mbese tutanabishishikariye. Ubu ndishimira ko iri shyiga rishyize iherezo kuri izo mpungenge nahoranaga, kuko rifite ahagenewe kubikwa amafunguro, agakomeza gushyuha kugeza igihe cyo kuyagabura”.

Aya mashyiga yitwa “Save 80”, abahinzi bayashyikirijwe ngo anabafashe mu buryo bwo kurengera ibidukikije n’ibibikomokaho, harimo n’amashyamba nk’uko Hakizimana Jean Claude, Umuyobozi wa Koperative COTEMII (Koperative Terimbere Muhinzi Ibigori Ibishyimbo) abishimangira.

Gitifu w’Umurenge wa Rugera, Byukusenge Emmanuel (ibumoso) yasabye abahawe amashyiga kuyafata neza

Ati “Dufite ikibazo cy’amashyamba agabanuka, biturutse ku kuyatemamo ibiti byo gucanisha, aho ateye hagasigara hanamye bigatiza umurindi ibiza, ibihingwa n’umusaruro bikangirika. Izi mbabura zifite ubushobozi bwo kurengera inkwi ku kigero cya 80%. Bivuze ko mu myase nka 100 umuntu yacana mu gihe runaka akoresheje iziko risanzwe, iri shyiga rya kijyambere ryo rifite ubushobozi bwo kurengera imyase 80, hakaba hakoresha imyase 20 gusa”.

Akomeza ati “Bizadufasha mu kuramba kw’ibidukikije, tubeho tudahanganye n’ingaruka z’iyangirika ryabyo, tubeho dutekanye”.

Umunyamabanga Nshingwabikorwa w’Umurenge wa Rugera, Byukusenge Emmanuel yabakanguriye gufata neza aya mashyiga.

Yagize ati “Ni amashyiga agiye kudufasha kugabanya ikigero cy’amashyamba yatemwaga, n’abayashakamo inkwi cyangwa amakara, kuko akenera inkwi nkeya cyane mu gihe cyo guteka. Ikindi azanafasha mu kurengera umwanya abantu batakazaga bajya gushaka inkwi, n’amafaranga bazishoragaho; ibyo bikaba bigiye kugabanuka, bibe byabyazwamo ibindi bintu bibafitiye akamaro”.

Ati “Bayafate neza, bite ku isuku yayo kuko ari imbarutso yo gusezerera burundu izo mvune zose. Muri macye na bo nibakomereze mu mujyo w’ubusirimu nk’uko n’aya mashyiga akoranwe ubusirimu”.

Nyuma yo guhabwa amashyiga ya rondereza biyemeje kugira uruhare mu kubungabunga ibidukikije

Abasaga 80% by’abaturarwanda, kugeza ubu baracyakoresha uburyo bwa gakondo mu guteka ibiribwa. Ibi ngo biri mu bikomeje gutuma habaho itemwa ry’amashyamba, ridasiba guteza ingaruka z’ibiza n’isuri.

Uruganda rw’ibigori rwa Mukamira rwari rumaze imyaka 12 rudakora

Urwo ruganda rwafunze nyuma y’igihombo rwagize, na n’ubu abaturage bakaba bibaza amaherezo yarwo, dore ko bemeza ko rwari rubafatiye runini mu iterambere ryabo.

Ni uruganda rwatunganyaga kawunga n’amavuta y’ibihwagari, rugakora na SOSOMA ku buryo byoroheraga ababyeyi kubonera abana babo amafunguro akungahaye ku ntungamubiri.

Abo baturage bemeza ko iterambere ryabo ryadindijwe n’ifunga ry’urwo ruganda, bavuga ko rwatangaga akazi kuri benshi, bakabonera isoko umusaruro wabo w’ibigori n’uw’ingano, ndetse kawunga n’indi fu rwatunganyaga ubu bakaba bayibona bibagoye.

Nyiramahirwe Providence ati “Ni ikibazo gikomeye, twabonaga kawunga kuri make, none ubu ikiro cyayo ni amafaranga 1100, uruganda rugikora ntabwo ikiro cyigeze kirenga amafaranga 400, abana ntibakibona ka SOSOMA, uruganda nibarutugarurire”.

Undi ati “Uru ruganda rwafunze niga muri primaire none ndi umugore ubyaye kabiri, ibiribwa byarahenze, turi mu rujijo rwo kubura aho tugurishiriza ibigori cyangwa tugura kawunga kandi duturiye uruganda rw’ibigori. Rugarutse twashima kuko bari bararushyizeho ngo ruteze abaturage imbere, twahabwaga akazi tukabona ibitunga imiryango yacu, turibaza impamvu rwahagaze, ni rugaruke rwose”.

Uretse kubona Kawunga ihendutse, urwo ruganda kandi rwafashaga n’aborozi kubona ibiryo bw’amatungo mu buryo bworoshye, bakabona n’umuceri w’ibigori rwakoboraga n’ibindi.

Ubuyobozi burahumuriza abaturage bubizeza ko uruganda rugiye gufungura

Mu kumenya icyo ubuyobozi bw’Akarere ka Nyabihu buvuga kuri icyo kibazo cy’ifungwa ry’urwo ruganda, Kigali Today yegereye Simpenzwe Pascal, Umuyobozi w’akarere wungirije ushinzwe imibereho myiza y’abaturage, avuga ko urwo ruganda rwafunzwe bitewe n’igihombo rwagize.

Uwo muyobozi yizeza abaturage ko urwo ruganda ruri mu nzira zo gufungurwa rukongera gukora, abaturage bakava mu bwigunge.
Yagize ati “Urwo ruganda rwahagaritswe n’umusaruro utarabonekaga neza, ikindi cyaruhagaritse ni imicungire y’umutungo itaragenze neza, uruganda rugwa mu gihombo”.

Arongera ati “Rwahoze ari urwa Leta, ariko uyu munsi ruri mu maboko ya RDB, barimo gushaka umufatanyabikorwa ushobora kuza kugira ibyo ahakorera, mwabibonye ko rutangiye kuvugururwa amarangi bamaze kuyasiga, dutegereje ko umufatanyabikorwa aza kuhakorera, icyizere kirahari dutegereje ko ibikorwa bitangira”.

Biravugwa ko Umushoramari RDB igiye kwegurura imicungire y’urwo ruganda ari izemera kubanza gukemura imyenda rurimo.

Mu makuru bamwe mu baturage bafite ku gihombo cy’urwo ruganda, ngo babwiwe ko ifungwa ryarwo ryatewe n’amafaranga y’inguzanyo rwafashe yo gukora imishinga y’uruganda, anyerezwa n’ubuyobozi bwarwo, biruviramo igihombo gikabije.

RIB yakiriye ibibazo binyuranye by’abaturage

Ni igikorwa cyatwaye amasaha agera muri atanu, aho abaturage bavuga ko bari babonye urwego bizeye rwo gutura ibibazo byabo, aho hari n’ibibazo byabajijwe bimaze imyaka isaga itanu bitarabonerwa ibisubizo.

Icyo gikorwa cy’ibyumweru bitanu RIB yatangije, gifite insanganyamatsiko igira iti “Guhabwa serivise ni uburenganzira, turwanye akarengane na ruswa”, aho ku rwego rw’Igihugu cyatangirijwe mu Murenge wa Mukamira mu Karere ka Nyabihu, kikazasozwa ku itariki 13 Ukwakira 2022, mu bukangurambaga buzazenguruka mu gihugu hose.

Icyibandwaho muri uyu mwaka muri ubwo bukangurambaga, ni ugukumira ubujura bukorwa hifashishijwe imbuga nkoranyambaga, cyane cyane ku butekamutwe bukorerwa kuri telefoni hagamijwe kwambura abaturage. Ni muri urwo rwego RIB yifashishije abafatanyabikorwa barimo sosiyete y’itumanaho MTN n’ikigo (RSwitch) gifatanya n’ibigo bikora ishoramari mu kubihuza n’abaturage hagamijwe kubafasha kubona amafaranga yabo mu buryo buboroheye badakoze ingendo.

Abaturage bishimiye ko ibibazo byabo byagejejwe kuri RIB

Mbabazi Modeste, Umugenzuzi mu Rwego rw’Ubugenzacyaha wari uhagarariye icyo gikorwa, ubwo yahaga abaturage umwanya wo kubaza ibibazo, umubare munini wirukiye imbere, aho bagiye babaza ibibazo byiganjemo urugomo, ubwambuzi, amakimbirane mu miryango, ihohoterwa mu miryango, akarengane bakorerwa n’ubuyobozi bw’inzego z’ibanze butinda kubakemurira ibibazo.

Hari n’uburyo bwashyizweho ku baturage bashaka kubaza ibibazo byabo mu ibanga, aho hari imodoka nini zifite ibiro (ibiro bigendanwa), ibiro bimwe bya (Isange One Stop Center), byakira abafite ibibazo by’ihohoterwa rishingiye ku gitsina rikorerwa mu muryango, mu gihe ibindi biro byakiriye ibibazo bitajyanye n’ihohoterwa.

Ni gahunda byagaragaye ko yashimishije abaturage, aho bavuga ko bishimiye umwanya uhagije bahawe wo kubaza ibibazo byabo, bishimira n’uburyo byagiye bihabwa umurongo, nk’uko bamwe babitangarije Kigali Today.

Umwe muri bo witwa Munyantore Nicodeme ati “RIB iradufashije rwose kandi tuzakomeza kuyigana kuko iri kuturenganura, nkanjye hari urubanza mburanye imyaka 25, abayobozi bararurangije ariko uwo tuburana akabisubiza inyuma bitewe n’imbaraga andusha, kugeza bigeze mu myaka 25, icyo kibazo nkibwiye RIB bambwira uburyo bagiye kugikurikirana ku buryo mbibonyemo icyizere cyo kurenganurwa”.

Ngerero Jean Pierre ati “Ibi biganiro biradufashije cyane, RIB dusanzwe tuyizi, kuba yatwegereye kandi ikumva ibibazo byacu tugiye kurenganurwa nta kabuza, hari aho twajyaga turenganywa tukabura aho tubariza”.

Hari n’abaturage bavuga ko iyo gahunda ya RIB yo kwegera abaturage iramutse ikomeje ko Perezida wa Repubulika mu gihe yasuye abaturage, atakongera kwakira ibibazo byakagombye kuba bikemurirwa mu nzego z’ibanze.

Bahawe n’umwanya wo kubaza ibibazo mu ibanga

Ihohoterwa rikorerwa abana b’abakobwa, riri mu byaha bikomeje kugaragara mu Karere ka Nyabihu aho kuva mu kwezi kwa mbere muri uyu mwaka, abana b’abakobwa bahohotewe baterwa inda ari 107, nk’uko Simpenzwe Pascal, Umuyobozi w’Akarere ka Nyabihu wungirije ushinzwe imibereho myiza y’abaturage yabitangarije Kigali Today.

Ngo abo ni abana bamenyekana, kuko ngo hakiri n’umuco mubi wo guhishira cyangwa kumvikana n’uwakoze icyaha ukomeje kugaragara mu miryango. Uwo muyobozi avuga ko agereranyije n’imyaka yashize imibare y’abahohoterwa igenda igabanuka biturutse ku mbaraga ubuyobozi bushyira mu bukangurambaga bugamije kurwanya ihohoterwa.

Visi Meya Simpenzwe yishimiye iyo gahunda RIB yatangirije mu Karere ka Nyabihu, yemeza ko hari icyo igiye gufasha abaturage mu kurushaho guhabwa ubutabera bunoze, ariko agira inama abaturage bakomeje kugana amabanki yiswe Lamberi asaba inyungu z’umurengera, aho zikomeje kuba nyirabayazana y’amakimbirane akomeje kugaragara hagati y’abashakanye.

Bishimiye ko ibibazo byabo byagiye bihabwa umurongo unoze

Yagize ati “Mwumvise ikibazo cy’amabanki ya Lamberi, bariya bantu baguriza abantu amafaranga kandi bitemewe n’amategeko, bafite amayeri menshi ku buryo bagusha abaturage mu mutego w’ubugure, ayo mabanki muyaveho dufite za SACCO zisaba inyungu nto, ni zo musabwa kugana.

Uwo muyobozi yijeje abaturage ko ibibazo byabajijwe, haba ibyo mu rwego rw’imirenge ari no mu rwego rw’Akarere agiye kubikurikirana bigakemurwa bitarenze iminsi 15.

Gahunda ya RIB igiye kumara ibyumweru bitanu igezwa mu turere twose tw’Igihugu, yatangijwe kuri uyu wa kabiri tariki 06 Nzeri 2022, ikazasozwa tariki 13 Ukwakira 2022, aho ibikorwa by’ubukangurambaga bizasozwa tariki 6 Ukwakira, tariki 13 Ukwakira 2022 hagakorwa inama y’abafatanyabikorwa bose.

Iyi gahunda yitabiriwe n’abayobozi batandukanye bafite mu nshingano kurenganura abaturage

Mbabazi Modeste, Umugenzuzi mu Rwego rw’Ubugenzacyaha yavuze ko RIB itazahwema kwegera abaturage no kumva ibibazo byabo

Hari abavuga ko ibibazo byabo byari bimaze imyaka irenga 20

Mu ma saa kumi n’ebyiri n’igice z’umugoroba wo ku cyumweru tariki 04 Nzeri 2022, ngo nibwo umwana we wari wagiye gukora yatashye, asanga ise amanitse mu mugozi yapfuye, nk’uko Byukusenge Emmanuel, Umunyamabanga Nshingwabikorwa w’Umurenge wa Rugera yabitangarije Kigali Today.

Yagize ati “Byari saa kumi n’ebyiri n’igice, hari umwana we wari wagiye gukora, ubwo yari atashye yageze muri salo asanga ise yihahuye, aho yari amanitse mu mugozi yapfuye”.

Arongera ati “Uwo mwana yahise ahamagara mukuru we wari hafi aho, ubwo na nyina wari wagiye gusura mugenzi we mu Murenge wa Cyintobo, saa moya aba arahageze asanga ni uko byagenze”.

Uwo muyobozi ubwo yaganiraga na Kigali Today, yari mu nzira yerekeza ahabereye ibyago, aho yari kumwe na Polisi n’Urwego rw’Ubugenzacyaha (RIB), avuga ko ikigiye gukorwa ari iperereza kuri urwo rupfu hanyuma umurambo ukajyanwa mu bitaro bya Shyira gukorerwa isuzuma.

Yavuze ko nta bibazo bari bazi uwo musaza yari afite, ati “Nta burwayi tumuziho, ariko buriya umuntu ni mugari wasanga hari ibibazo yari afite, nta kindi turamenya”.

Gitifu Byukusenge yagize ubutuma ageza ku baturage, ati “Abaturage turabasaba ko uwaba afite ikibazo yakigaragariza ubuyobozi tukagikemura, kuko ikintu cyo kwiyahura si wo muti w’ibibazo”.

Inzu ababyeyi babyariramo imaze imyaka itatu idakora

Muri iki gihe cy’imyaka itatu ishize Maternité y’ikigo nderabuzima cya Nyakiriba idakora, abiganjemo abagore, bemeza ko bahorana impungenge zo kuba umubyeyi mu gihe atwite cyangwa agiye kubyara, aba afite ibyago byo kuba yabura ubuzima cyangwa umwana.

Uwitwa Uwimana, yagize ati: “Nturiye iki kigo nderabuzima nko muri metero zitagera no mu ijana. Mperutse kujya kubyara, biba ngombwa ko banjyana ku kindi kigo nderabuzima cya Nyakigezi, kiri kure y’iki cya Nyakiriba twegeranye na cyo kidakora. Byabaye ngombwa ko bampeka mu ngobyi, mu rugendo ruvunanye kandi rurerure. Ubwo twari mu nzira tugenda, abari bampetse mu ngombyi, babonye ukuntu merewe nabi, bigaragara ko n’umwana agejeje igihe cyo kuvuka, bantereka hasi mu nzira, mbyarira ahongaho, nta muganga umfashije. Nendaga gupfa, ku bw’amahirwe njye n’umwana tuba bazima”.

Undi mubyeyi yagize ati: “Hari ubwo nk’umubyeyi inda imufata, binagaragara ko agejeje igihe cyo kubyara, bamugeza ku Kigo nderabuzima cya Nyakiriba, akeneye ubufasha bwihuse, abaganga bakamubwira ko badafite ubushobozi bwo kumwitaho. Ibyo bigira ingaruka nyinshi, zirimo no kuba umubyeyi cyangwa umwana yagirira ibibazo mu nzira ajya kubyarira ahandi, yaba we cyangwa umwana, bakaba bapfira mu nzira. Muri kano gace ababyeyi tubyara turushye mu buryo burenze”.

Umuhanda uhuza Ikigo Nderabuzima cya Nyakiriba n’Ibitaro bya Shyira utameze neza wadindije serivisi zitangirwa ku Kigo nderabuzima cya Nyakiriba

Abagabo barimo n’abahetsi bo muri ako gace, na bo bahamya ko ubuzima bw’umubyeyi n’umwana atwite, buba buri mu kaga, bakifuza ko hari icyakorwa mu maguru mashya, iyi maternité ikongera gufungura imiryango, bakajya babonera serivisi hafi.

Ubuyobozi bw’Ikigo nderabuzima cya Nyakigezi, buvuga ko gufunga imiryango y’inzu ababyeyi babyariramo, byaturutse ku ngorane bahuraga na zo mu gihe cyo kubyaza, ahanini zishingiye ku kutabonera imiti n’ibikoresho ku gihe, bitewe n’ikibazo cy’umuhanda wangiritse, ku buryo kubihageza biba bigoranye.

Muhirwa Marceline, Umuyobozi wungirije w’Ikigo nderabuzima cya Nyakiriba, yagize ati: “Ikibazo gikomeye dufite ahangaha ni icy’umuhanda wangiritse mu buryo bukomeye, aho na ambulance idashobora kuwugendamo ijyanye cyangwa izanye umurwayi hano. Yewe n’imiti dukoresha, biba ngombwa ko bayigeza hano, bayipakiye mu mifuka bayikoreye ku mutwe. Mu gihe cy’imvura haba hari ibyondo, ku buryo na yo ubwayo ishobora kwangirika, biturutse ku bunyereri. Ni ikibazo natwe kiduhangayikishije, kuko bituma tudaha abatugana serivisi inoze”.

Simpenzwe Pascal, Umuyobozi w’Akarere ka Nyabihu wungirije ushinzwe imibereho myiza y’abaturage, avuga ko bari gushakisha igisubizo cyihuse, kugira ngo iyi maternité yongere gukora.

Yagize ati: “Mu gihe tutari twabona ubushobozi bwo gukora umuhanda wo hasi uhuza Ikigo nderabuzima cya Nyakiriba n’Ibitaro bya Shyira, turateganya kuzaba dusannye umuhanda Nyakiriba-Kintobo, kugira ngo iyo maternité yongere ikore. Ibyo bizaba byafasha n’umubyeyi byagaragara ko akeneye ubuvuzi bwisumbuyeho, kuko yajya ahita yoherezwa ku bitaro bikuru bya Ruhengeri, hakaba hakoreshwa uwo muhanda wa ruguru. Nabwo ni urugendo rurerure cyane, rufata amasaha arenze abiri, ariko nta yandi mahitamo dufite”.

Ikigo nderabuzima cya Nyakiriba giherereye mu Murenge wa Rugera mu Karere ka Nyabihu

N’ubwo Ubuyobozi bw’Akarere ka Nyabihu butatangaje igihe nyacyo cyo gutangira gutunganya uwo muhanda, ariko bwizeza abaturage ko ari vuba.

Inzu ababyeyi babyariramo(Maternité) yo ku Kigo nderabuzima cya Nyakiriba itarafungwa, nibura mu kwezi kumwe ababyeyi batwite bari hagati ya 20 na 30, bahahererwaga serivisi. Muri iki gihe itagikora, ngo n’amezi atatu ashobora gushira, cyakiriye abatarenga 10, kandi ngo ni abahagezwa bamaze kubyarira mu nzira, bagahabwa ubufasha bw’ibanze.

Imbabura zirondereza ibicanwa zigera ku bihumbi 12 ni zo zizahabwa abaturage

Gukwirakwiza izo mbabura, bizakorwa mu gihe cy’amezi atandatu, aho ku ikubitiro zimwe mu ngo z’abatishoboye bo mu Mirenge y’Akarere ka Nyabihu, ari zo zizaherwaho, ubusanzwe zikaba zakoreshaga amashyiga ya gakondo mu guteka, bikangiza ikirere n’ibidukikije, ndetse bamwe bakahandurira n’indwara ziterwa no guhumeka imyotsi.

Eng. Umwizerwa Prosper, Umuyobozi w’Ikigo Quality Engineering, gikora ubushakashatsi mu bijyanye no guteka hatangijwe ibidukikije; kikaba ari nacyo kizashyira mu bikorwa uwo mushinga, avuga ko babikora hagamijwe kurengera ibidukikije.

agira ati “Guteka amafunguro hifashishijwe uburyo bwa gakondo, bikomeje kugira uruhare rukomeye mu kwangiza ibidukikije, kubera ko biba byasabye gutema amashyamba no kwangiza ibimera by’ukwoko butandukanye, abantu bakajya kubicanisha. Ibi ntabwo twakomeza kwicara ngo tubireberere, kuko byaba bikomeje kutuganisha ahabi. Ni na yo mpamvu twatekereje gushyiraho ingamba, zirimo no gukora imbabura zirondereza kandi zikazigama ibicanwa no kuzikwirakwiza mu baturage, mu rwego rwo kunganira Leta muri gahunda zo kubungabunga ikirere no kurengera ibidukikije”.

Abafite mu nshingano zabo gahunda zo kubungabunga ibidukikije bo mu Karere ka Nyabihu babasobanuriye imiterere y’uyu mushinga

Abasaga 80% by’abaturarwanda, kugeza ubu baracyakoresha uburyo bwa gakondo mu guteka ibiribwa. Ibi ngo bikaba biri mu bikomeje gutuma habaho itemwa ry’amashyamba n’iyangirizwa ryayo, ingaruka z’ibiza n’isuri ntizisibe kwigaragaza.

Hakizimana Roger, wo mu Murenge wa Shyira, ahamya ko ikoreshwa ry’izo mbabura, rizaba igisubizo gikomeye ku bibazo by’ibiza bahoraga bahanganye nabyo.

Yagize ati “Guteka dukoresheje inkwi twe nk’abaturage, cyane cyane b’amikoro macyeya, bikomeje kutubera ingorabahizi, kuko usanga tutagira amashyamba dutemamo ibiti, cyangwa yo gutashyamo inkwi zo gutekesha. Zaba izo nkwi cyangwa amakara tubibona biduhenze cyane, aho ababura ubushobozi, bahitamo gucanisha ibyatsi cyangwa ibikarito n’impapuro. Usibye n’ibi inaha iwacu usanga mu gihe cy’imvura ingaruka z’ibiza tudasiba guhura na zo, bitewe n’uko amashyamba ahari adahagije. Izi mbabura zirondereza ibicanwa rero nizitugeraho, tuzaba twigobotoye ibyo bibazo byose, twabagaho duhanganye na byo”.

Umuyobozi w’Akarere ka Nyabihu wungirije Ushinzwe Iterambere n’Ubukungu, Habanabakize Jean Claude, agaruka ku nyungu biteze kuri ubu buryo bwo kugabanya ibicanwa, yagize ati: “Ikoreshwa ry’imbabura zirengera ibicanwa, bizadufasha cyane cyane mu kugabanya imyotsi yangizaga ikirere, n’itemwa ritari ngombwa ry’amashyamba. Ikindi gikomeye ni uko umwanya n’igihe abaturage bacu bakoresha bajya gushakisha inkwi n’amakara byo gutekesha, bazajya bawukoresha mu yindi mirimo ibateza imbere, imibereho yabo irusheho kugenda neza”.

Akomeza ati “Tuributsa abaturage ko ubwo bazaba bahawe izo mbabura, bajya bazikoresha neza bashingiye ku mabwiriza bazaba bahawe y’uburyo zikoreshwamo, bakajya bazibungabunga kandi bakazikoresha icyo baziherewe, kugira ngo uru rugamba twese turiho rwo gukumira iyangirika ry’ibidukikije muri rusange, tuzarubashe twese dufatanyije”.

Ubwo bwoko bw’imbabura zigiye guhabwa abaturage, bufite ubushobozi bwo kugabanya ibicanwa ku kigero kiri hagati ya 50 na 60%, kandi ubushakashatsi bugamije kongera ubushobozi bwayo mu kurengera ibicanwa bukazakomeza.

I Nyabihu harimo gukorwa imihanda y’imigenderano ireshya n’ibilometero 93

IPRC-Kigali ivuga ko irimo kubyaza umusaruro amasezerano RP yagiranye na Minisiteri y’Ibikorwaremezo, agamije gufasha abanyeshuri kwigira ku mishinga minini y’iterambere, harimo iyo gushyira kaburimbo iciriritse mu mihanda migenderano, ireshya n’ibilometero 30,000 hirya no hino mu Gihugu.

Umuyobozi wa RP/IPRC-Kigali, Eng Diogène Mulindahabi agira ati “Hari abanyeshuri bajyayo muri izi ngendo-shuri turimo gukora, ariko iyo barangije kwiga habaho kujya kwimenyereza umurimo, ndetse no kuduhuza na biriya bigo bikora imihanda, uko guhura bibifasha kubona akazi.”

Abanyeshuri ba IPRC-Kigali basobanurirwa uko imihanda ikorwa

Umuyobozi wa IPRC-Kigali avuga ko kugeza ubu abanyeshuri barangiza kwiga muri iryo shuri, bagahita babona akazi bitarenze amezi atandatu, bangana na 75%.

Umunyeshuri witwa Eric Niyizurugero wiga iby’imihanda mu mwaka wa kabiri muri IPRC-Kigali, avuga ko amasomo bigira hanze mu ngendo-shuri ari yo abungura ubumenyi burenze ubwo kwicara mu ishuri, ndetse bakahava babonye aho bazasaba kwimenyereza umurimo, byaba ngombwa bakagirwa abakozi baho.

Yagize ati “Nahavuye nzanye nimero za telefone z’umwenjeniyeri wa hariya, ni amahirwe akomeye kubonana n’abantu bakomeye nka bariya, baduhaye na ‘contacts’ zabo. Ubutaha nimbahamagara byaba byoroshye ko bampa ‘stage’(aho kwimenyerereza umwuga).”

Umuyobozi wungirije ushinzwe Iterambere ry’Ubukungu mu Karere ka Nyabihu, Jean Claude Habanabakize, avuga ko muri ako karere harimo gukorwa imihanda mishya y’imihahirano yerekeza ku ishyamba rya Gishwati ireshya n’ibilometero 93.

Habanabakize agira ati “Uyu munsi kwita ku mihanda birakorwa n’urubyiruko rufite ubumenyi, birumvikana ko uko tugenda dukora imihanda nanone, ni ko tuzagenda dukenera abayitaho mu gihe kirambye, byumvikane ko ibi ari isoko riba ribonetse ku rubyiruko mu gihe kizaza, kiri ngombwa.”

Akarere ka Nyabihu kavuga ko imihanda y’imigenderano irimo gukorwa yerekeza muri Gishwati, igiye gufasha kugeza ku isoko umusaruro ahanini ukomoka ku buhinzi n’ubworozi nk’amata n’amatungo, ibirayi, ingano, icyayi n’ibishyimbo biboneka muri kariya gace.

Akarere ka Nyabihu kavuga ko imihanda irimo gukorwa izajya yitabwaho n’urubyiruko rw’abanyeshuri bagasura

Ako karere kavuga ko kagiye no gushyira kuri Gishwati ubukerarugendo bushingiye ku kumenya inka, ubworozi bwazo n’ibizikomokaho.

Umuhanda utunganyijwe ugakomeza kubungabungwa ugira uburambe bw’imyaka isaga itanu

Ubu ni uburyo bwo gusana imihanda hakoreshejwe iyo tekiniki, aho bafata igitaka bakagitsindagira mu mifuka, bakagenda bayishyira mu muhanda, barangiza bakayirenzaho itaka rya laterite, na ryo batsindagira bakoresheje ibyuma byabugenewe biremereye, kugira ngo umuhanda urusheho gukomera. Urwo rubyiruko 50 rwabyigishijwe n’Umuryango witwa Community Road Empowerment CORE, uterwa inkunga na Leta y’Igihugu cy’u Buyapani.

Abahawe ubu bumenyi, barimo na Rukundo Jean wo mu Murenge wa Jenda. Agira ati: “Ubumenyi twungutse bwo gusana imihanda dukoresheje iyi tekiniki, dusanga buzatugirira akamaro cyane, kuko ahanini butanasaba amikoro y’ibikoresho ahambaye. Ubu tugiye gubwigisha na bagenzi bacu, kugira ngo nibura, tuzafatanyirize hamwe kujya dusana imihanda yabaga yarangiritse, ku buryo mu gihe gito, ibyo bibazo bizaba byabaye amateka”.

Do-Nou ni tekiniki yo gusana imihanda hifashishijwe imifuka batsindagiramo igitaka

Undi wahawe ubu bumenyi ni uwitwa Mpuhwezamariya Liliane. Yagize ati: “Imihanda myinshi yari yarangiritse, twe nk’abaturage tudafite uburyo bwo kuyisana kandi binagaragara ko n’imbaraga z’ubuyobozi na zo zidahagije. Dusanga ubu bumenyi, budufitiye akamaro, kuko ibikoresho byinshi bikenerwa, nk’imifuka yo kurundamo itaka, imigozi bayifungisha n’ibyuma batsindagiza, ari ibiboneka hano hafi iwacu. Tugiye kuyoboka ubu buryo, tuvugute umuti w’ikibazo cy’imihanda itari ikiri nyabagendwa”.

Muri uko guhabwa ubumenyi mu bijyanye no gusana imihanda hakoreshejwe tekiniki ya Do-Nou, uru rubyiruko rwakoze umukoro ngiro, aho rwatunganyije umuhanda wa metero 200 uherereye mu Murenge wa Bigogwe, banakora inzira z’amazi ziwukikije, ndetse banawushyiraho amateme; kuri ubu ukaba warongeye kuba nyabagendwa, nyamara mbere wari wararengewe n’amazi.

Obed Ntakirutimana, umukozi ushinzwe amahugurwa mu muryango CORE, avuga ko iyo umuhanda utunganyijwe hakoreshejwe iyi tekiniki, ugakomeza kwitabwaho, ugira uburambe bw’imyaka isaga itanu.

Ibi bikaba ari na byo abigishijwe, basabwe kuzajya bibandaho. Yagize ati: “Tekinoloji ya Do-Nou, ni uburyo navuga ko bukiri bushyashya hano mu Karere ka Nyabihu. Bwavumburiwe mu gihugu cy’u Buyapani, ariko tukaba turimo kubwifashisha, mu rwego rwo kurushaho gufata neza imihanda, rimwe na rimwe yabaga idakomeye, cyangwa se n’imiterere y’aho iherereye wenda hafite ubutaka bworoshye, cyangwa se mu bishanga. Ni yo mpamvu mu guhugura uru rubyiruko, twanarusabye gufata aya masomo, nk’igikoresho cy’ingirakamaro bazakomeza kwifashisha no mu gihe kizaza, mu rwego rwo kubaka no gushyigikira ibikorwa remezo biramba”.

Akarere ka Nyabihu kagizwe n’imisozi miremire, kakaba kanakunze kwibasirwa n’ibiza bya hato na hato, bituruka ku mvura nyinshi, byajyaga bituma imihanda, irengerwa n’amazi ndetse n’inkangu, abaturage ndetse n’ubuyobozi bagahora mu gihirahiro n’ihurizo ry’ahashobora guturuka umuti urambye.

Ubu buryo, ngo buje kuba inyongera ku bundi bwari busanzweho nk’uko Habanabakize Jean Claude, Umuyobozi w’Akarere ka Nyabihu wungirije ushinzwe Iterambere n’Ubukungu abivuga.

Yagize ati: “Mu kubungabunga imihanda inyuranye no kuyirinda kwangirika, twajyaga turwanya isuri mu misozi, cyangwa tugasana imihanda binyuze mu miganda, ariko bitewe n’uburyo aka Karere kacu gahorana imvura iteza ibiza, ugasanga tudafite igisubizo kirambye cyadufasha gukumira izo ngaruka biba byateje. Dusanga rero tekiniki ya Do-Nou, izanye igisubizo cyo gusigasira no gufata neza imihanda dufite, cyane ko n’imyinshi ifatiye benshi runini, yaba mu koroshya uburyo bwo kugeza ku masoko umusaruro uturuka ku buhinzi n’ubworozi”.

Abakurikiranye aya mahugurwa bavuga ko bagiye kubyigisha abandi

Mu rwego rwo kurushaho kubungabunga ibikorwa remezo by’imihanda, mu Karere ka Nyabihu, abiganjemo urubyiruko bifashishwa mu bikorwa byo kuyibungabunga no kuyisana buri munsi. Gusa ubuyobozi bugaragaza ko hakiri urugendo, kuko mu mihanda ibarizwa muri aka Karere, ireshya n’ibirometero bisaga 137 ari yo bigaragara ko ikeneye izindi mbaraga mu kuyitunganya, hagamijwe gukomeza gushimangira ubuhahirane bw’abaturage.

Sitasiyo nshya y’amashanyarazi iherutse kuzura i Nyabihu

Akarere ka Nyabihu kari mu turere dukataje mu iterambere ndetse kakaba karangwamo ibikorwa by’ubuhinzi n’ubworozi byinshi ku buryo nta washidikanya ko ari kamwe mu twohereza umusaruro mwinshi hirya no hino mu gihugu by’umwihariko mu Mujyi wa Kigali.

Ibikorwaremezo byinshi by’amashanyarazi bigenda byubakwamo mu rwego rwo gukwirakwiza amashanyarazi no kuyongerera imbaraga. Mu minsi ishize, hujujwe sitasiyo y’amashanyarazi izafasha mu kongera imbaraga z’amashanyarazi muri aka Karere ndetse no mu turere tugakikije.

Akarere ka Nyabihu kandi karangwamo ingomero zitandukanye zibyara amashanyarazi akoherezwa hirya no hino mu gihugu. Muri zo harimo urwa Giciye ya 1, iya 2 ndetse n’iya gatatu zitanga amashanyarazi.

Ingo zigera kuri 62% muri Nyabihu zifite amashanyarazi

Bwana Martin Mutsindashyaka, Umuyobozi w’ishami rya Sosiyete y’u Rwanda Ishinzwe Ingufu (REG) mu Karere ka Nyabihu, avuga ko mu gukwirakwiza amashanyarazi banazirikanye abatuye hafi y’ingomero ziri muri aka Karere kugira ngo nabo babone amashanyarazi atabanyuze hejuru ajya ahandi.

Yagize ati: “Gahunda dufite ni ukugeza amashanyarazi kuri bose. Ariko ku ikubitiro twanazirikanye abaturiye ingomero ziri muri aka Karere, babonaga insinga zibaca hejuru zijyana amashanyarazi ahandi. Nabo bagomba kumva ibyiza by’amashanyarazi aturuka aho batuye. Muri uyu mwaka w’ingengo y’imali twayagejeje ku ngo nyinshi zegereye ingomero za Giciye, ubu baracana kandi barishimye, batangiye no kuyakoresha ibikorwa bibyara inyungu.

Avuga kandi ko kubera ubuhaname bw’imisozi iri muri aka Karere, abatuye ahataragera imiyoboro nabo bahawe amashanyarazi akomoka ku mirasire y’izuba ku kiguzi gito kuko Leta itangamo nkunganire.

Urugomero rwa Giciye ya II rutanga Megawati 4 rukikijwe n’ingo nyinshi zahawe amashanyarazi

Ati : “Abatuye ahagenewe gukwirakwizwa amashanyarazi akomoka ku mirasire y’izuba bagenerwa nkunganire iborohereza ikiguzi cy’ibikoresho byayo. Ibi rero byatumye umubare w’abayahabwa nawo wiyongera, tubasha kuyageza ku basaga 2750, batandukana n’umwijima wa nijoro ndetse n’akatadowa. Intego ni uko nta muturage n’umwe ucikanwa n’amahirwe yo kubona amashanyarazi.”

Abagejejweho amashanyarazi barishimye

Nkurunziza Theogene, ni umusore wiga mu mashuri yisumbuye. Twamusanze avuye gukora ibiraka by’ubwubatsi kuko ari mu biruhuko, atubwira ibyiza yabonye iwabo mu Murenge wa Rurembo, Akagari ka Rwanda mu mudugudu wa Rugote, kuva hagezwa amashanyarazi.

Yagize ati: “Ino aha imidugudu myinshi yo muri aka Kagari yabonye amashanyarazi hatera imbere. Ubu hari abasudira ibikoresho bitandukanye ku buryo tutagikora ingendo tujya kubishaka. Hari n’ishuri ryahawe amashanyarazi, abana bariga neza kandi banakoresha mudasobwa. Nkanjye ubwanjye, iyo nshatse gukoresha mudasobwa ntibingora kuko umuriro uba uhari. Mbese ni iterambere”.

Ingo zikikije urugomero rwa Giciye I zahawe amashanyarazi

Niyibizi Jean Marie Vianney, atuye mu mudugudu wa Kidandari, Akagari ka Mutanda mu Murenge wa Shyira. Avuga ko amashanyarazi yamufashije mu mirimo ye yo kogosha kandi ko umusaruro akuramo umutunze we n’umuryango we.

Yagize ati: “Mbere twari mu kizima tubabazwa rwose no kubona amashanyarazi atunyura hejuru aturutse iwacu akajya ahandi. Ubungubu turacana, abantu bakarira ahabona. Nk’ubu nta rusyo twagiraga inaha, ariko ubu insyo zarabonetse abantu babetesha (bashesha) hafi, mu gihe bakoraga ibirometero nka bibiri cyangwa bitatu bajya gushaka agafu k’igikoma. Nkanjye ndogosha, nkabona udufaranga nanjye nkabasha kwiteza imbere”.

Imibare igaragaza ko mu Rwanda, ingo zifite amashanyarazi muri rusange zisaga 73% harimo izikoresha afatiye ku muyoboro mugari n’izikoresha adafatiye ku muyoboro mugari yiganjemo akomoka ku mirasire y’izuba.

Gasore Mateso yatangiye umwuga wo kogosha akimara kubona amashanyarazi

Udusantere twegereye urugomero rwa Giciye twagejejwemo amashanyarazi

Batatu muri aba bana bamaze kwwitaba Imana

Umwe muri abo bana yitabye Imana mu gitondo cyo ku wa Mbere tariki 18 Nyakanga 2022, mu gihe abakobwa babiri bitabye Imana mu gitondo cyo kuri uyu wa Kabiri, nk’uko Kigali Today yabitangarijwe n’Umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal, ukomeje gukurikirana ubuzima bw’uwo mubyeyi.

Yagize ati “Wa mubyeyi wibarutse abana bane, ku bw’ibyago hasigaye umwana umwe abandi batatu bavuye mu mubiri. Uyu mubyeyi arimo kwitabwaho n’abaganga i Rubavu, Dukomeje kumwihanganisha”.

Kigali Today yavuganye kandi na Ntegerejimana Jean Pierre, umugabo wa Maniragena Clementine, mu rwego rwo kumenya neza uko ubuzima bw’umubyeyi n’ubw’umwana usigaye buhagaze, avuga ko yaba umwana w’umuhungu basigaranye, yaba na nyina bombi bameze neza.

Batatu muri aba bana bamaze kwwitaba Imana

Uwo mubyeyi yabyariye mu bitaro bikuru bya Gisenyi, aho abo bana yari yababyaye ari bazima, ariko umwe akaba amaze kwitaba Imana mu gitondo cyo kuri uyu wa mbere tariki 18 Nyakanga 2022.

Nzayikunda Evariste, Umunyamabanga Nshingwabikorwa w’Akagari ka Kabatezi, yavuze ko uwo mubyeyi w’imyaka 35 asanzwe afite abana bane, abahungu batatu n’umukobwa umwe.

Ati “Asanzwe afite abana bane, abahungu batatu n’umukobwa umwe, amakuru atugezeho muri iki gitondo ni uko mu bana bane yabyaye umwe amaze kwitaba Imana, ariko abandi bameze neza. Aracyari mu bitaro bya Gisenyi, maze kuvugana n’umugabo we ubu abaturage turimo kwisuganya ngo tumwakire”.

Gitifu Nzayikunda, avuga ko kuba uwo muryango uri mu cyiciro cya gatatu cy’ubudehe, byatewe n’uko hagendewe ko bakiri bato, ariko ngo mu buzima busanzwe ntabwo bifashije, ngo batunzwe n’umwuga w’ubuhinzi.

Avuga ko biteguye kwishyirahamwe nk’abaturage b’Akagari ka Kabatezi gukusanya inkunga yo kuremera uwo mubyeyi, bamushakira ibyangombya byihutirwa birimo ibiribwa bigizwe n’amata, isukari n’ibindi, dore ko ngo nta nka bagira.

Mu kumenya icyo ubuyobozi bw’Akarere ka Nyabihu buvuga kuri icyo kibazo cy’uwo mubyeyi, Kigali Today yegereye Umuyobozi w’ako karere wungirije ushinzwe imibereho myiza y’abaturage, Simpenzwe Pascal, avuga ko akarere kiteguye gufasha uwo muryango.

Yagize ati “Nk’uko bisanzwe, usibye n’uriya wabyaye n’abandi batishoboye turabafasha, urumva we ni umwihariko, turagerageza gukora ibishoboka tumwiteho umunsi ku wundi, ubu turi kwitegura kumwakira no kumufasha mu bushobozi turaba dufite bwose nk’umuturage wacu”.

Hari amapoto ashobora kugwira inzu agateza impanuka

Ababangamiwe n’icyo kibazo cyane, ni abo mu mirenge ihana imbibi hagati y’Intara y’Amajyaruguru n’Intara y’Iburengerazuba, by’umwihariko mu Murenge wa Mugunga mu Karere ka Gakenke n’uwa Shyira muri Nyabihu.

Ni amapoto y’ibiti, iyo ashaje agatinda gusimbuzwa aragwa, rimwe na rimwe bikagwira inzu z’abaturage, kimwe mu bikomeje kubatera impungenge z’impanuka zishobora guterwa n’umuriro w’amashanyarazi.

Umwe mu batuye Umurenge wa Shyira ati “Turashima ko amashanyarazi yatugezeho, ariko ikibazo dusigaranye ni uburyo bwo kuturinda ko yadutera ibibazo, kugira ngo akomeza atubere ibisubizo. Ni gute igiti gifashe insinga gisaza kikagera aho kigwa ababishinzwe barebera!”

Undi ati “Agahenge dufite ni uko turi mu gihe cy’izuba, mu minsi ishize twararaga dufite ubwoba, aho imvura yagwaga tukumva ko tutari buramuke, kubera impanuka twaterwa n’amashanyarazi biturutse kuri ibi biti byashaje”.

Muri iyo mirenge hari aho insinga usanga zanyujijwe mu rutoki zimwe zikora hasi, abaturage bakavuga ko batizeye umutekano w’uwo muriro.

Ni mu gihe bamwe muri abo baturage, hari ubwo ibyo biti bibagwira bakirwanaho mu bushobozi bwabo bagerageza kubitega ibindi ariko mu buryo butarambye, ariko na none bagakomeza kugira izo mpungenge.

Niho bahera basaba ko icyo kibazo cyakurikiranwa kigakemuka, bagahabwa amapoto y’ibyuma mu rwego rwo gukumira impanuka zaterwa n’amashanyarazi.

Mu kumenya icyo ubuyobozi buvuga kuri icyo kibazo, Kigali Today yegereye Umuyobozi w’Akarere ka Nyabihu wungirije ushinzwe iterambere ry’ubukungu, Habanabakize Jean Claude, avuga ko icyo kibazo Ubuyobozi bw’akarere bugiye kukiganiraho n’Ikigo cy’igihugu gishinzwe ingufu (REG), mu rwego rwo kugishakira umuti urambye.

Yagize ati “Kugira impungenge ku baturage byo ni ngombwa, kuko buriya iyo ikintu gishaje ntabwo kiba kigifite ireme, ariko mu by’ukuri icyo kibazo turaza kugikoranaho n’ubuyobozi bwa REG, kugira ngo gahunda bapanga banjye bibuka uburyo bwo gusimbuza amapoto ashaje, kugira ngo bitange umutekano ku baturage”.

Ni ikiraro cyambukiranya umugezi wa Nyamukongoro n’uwa Rusekera, aho abaturage bajyaga bambukira mu mazi bigatera impanuka kuri bamwe biganjyemo abana.

Umwe muri abo baturage witwa Harerimana Jean Bosco ati “Kano kagezi ka Rusekera iyo gahuye n’uyu wa Nyamukongoro, mu gihe cy’imvura abaturage bahera hakurya, abashirutse ubwoba bakishora muri iyi migezi bamwe ikabatwara. Duherutse gusanga umwana mu mugezi wa Karago yapfuye, hari n’abashumba amazi yagiye atwara, iki kiraro kiziye igihe”.

Niyonsaba Mbanza Theoneste ati “Iki kiraro bakidukoreye kubera ko iyo twavaga mu mirimo yacu dutashye, hari ubwo twasangaga imvura yaguye bamwe amazi akabatwara tugasanga imirambo muri Karago, ariko kuba badukoreye ikiraro turagenda twidagadura ntawe usitaye”.

Ibyishimo ni byinshi nyuma y’uko bubakiwe ikiraro

Ntahonkiriye Jesephine we avuga ko inshuro nyinshi yararaga mu gasozi kubera kubura aho yambukira ataha, mu gihe imvura iguye yagiye guhinga mu murima we uri hakurya y’umugezi.

Ati “Batarashyiraho iki kiraro, iyi migezi yarahuraga ikuzura abantu bakabura uko bambuka ndetse bagacumbika. Nanjye inshuro nyinshi naraye ahangaha nabuze uko nambuka, ariko ikiraro batwubakiye turimo kucyambuka tunezerewe”.

Ubuyobozi bw’Akarere ka Nyabihu buremeza ko mbere y’uko icyo kiraro cyubakwa, abaturage bahuraga n’imbogamizi zo gukora ibikorwa byabo, bikadindiza iterambere ryabo kubera kubura uko bambuka umugezi.

Umuyobozi w’Akarere ka Nyabihu wungirije ushinzwe iterambere ry’Ubukungu, Habanabakize Jean Claude, ati “Aha ni mu gace k’inzuri za Gishwati ahakorerwa ubworozi n’ubuhinzi, hakaba imbogamizi ku baturage aho akararo gato kahabaga nyuma y’ibiza twagize mu mwaka ushize, kacitse ndetse umuturage umwe ahaburira ubuzima”.

Avuga ko nyuma y’uko ubuyobozi bubonye ko ari ikibazo cy’ingutu, ku buryo imvura yagwaga ugasanga abaturage bamwe baheze mu gice bari bagiye gukoreramo kandi bagomba gutaha, ngo nibwo ku bufatanye bw’ubuyobozi bw’akarere n’abaturage bashatse aho ingengo y’imari yava.

Ngo icyo kiraro cyahise gishyirwa mu mihigo, bashaka n’umuterankunga, Bridge to Prosperity, ikiraro kirubakwa kiruzura, nk’uko Visi Meya Habanabakize akomeza abivuga.

Ubutaka buhingwaho ibireti bwahujwe ku buso bwa hegitari 1,273 muri uyu mwaka

Ati “Ikiraro kiruzuye kandi abaturage baracyishimiye, bakaba bizeye no kukibyaza umusaruro, kubera ko uyu munsi noneho nta mpungenge bafite zijyanye n’impanuka. Ni ikiraro cyubatswe mu buryo bwa gihanga kizabafasha rwose gukora imirimo yabo ya buri munsi, kandi kikaba gikoreshwa cyane n’abanyeshuri bajya kwiga muri ako gace, ni ikiraro cyaje gikenewe kandi kirimo gutanga umusaruro mu baturage”.

Kuri icyo kiraro cyatwaye miliyoni zikabakaba ijana, uruhare rw’Akarere ka Nyabihu rurangana na 40%.

Mu gusoza uyu mwaka w’ingengo y’imari, mu Karere ka Nyabihu hakomeje gutahwa ibikorwa remezo binyuranye, muri gahunda yo kwizihiza isabukuru y’imyaka 28 yo kwibohora, birimo amaterasi y’indinganire yubatswe ku buso bwa hegitari 162, yatwaye miliyoni 283 z’Amafaranga y’u Rwanda, ubuyobozi bwishimira ko ayo mafaranga yasigaye mu baturage bahawe akazi muri icyo gikorwa.

Sitasiyo y’amashanyarazi yuzuye mu Karere ka Nyabihu izatanga megawatt 40

Hubatswe kandi n’ikusanyirizo ry’amashanyarazi rizatanga megawatt 40, ryuzuye ritwaye Miliyari eshanu z’Amafaranga y’u Rwanda, hatahwa inyubako z’ibiro by’utugari n’ibikorwa byo guhuza ubutaka ahahingwa ibireti ku buso bwa hegitari 1,273 ahasaruwe agera kuri 593,137,000 FRW ajya mu baturage, muri toni 541 zasaruwe muri uyu mwaka n’ibindi.

Amaterasi y’indinganire yakozwe mu Murenge wa Rambura

Iyi sitasiyo ifite ubushobozi bwa Megawati 40 hamwe n’umuyoboro wa Mukungwa-Nyabihu bizagabanya cyane icikagurika ry’amashanyarazi ndetse n’ihindagurika ry’ingano yayo mu Turere twa Nyabihu, Rubavu, Musanze, Ngororero na Muhanga, kuko yagabanyije uburebure bw’umuyoboro wa Gisenyi wagezaga amashanyarazi muri utu turere twose uturutse kuri sitasiyo ya “Camp-Belge” i Musanze ku ntera ya kilometero zisaga 700.

Uburebure bw’umuyoboro wa Gisenyi bwatezaga ibibazo birimo icikagurika rya hato na hato ry’amashanyarazi ryagiraga ingaruka ku bafatabuguzi baherereye mu turere twa Nyabihu, Rubavu, Musanze, Ngororero na Muhanga, bikanatinza imirimo yo gushakisha aho ikibazo cyabereye bityo n’igihe umuriro ubuze ntugaruke vuba. Na none kandi, hari ingomero nto eshatu zibyara amashanyarazi zayoherezaga muri uyu muyoboro, bikarushaho kubangamira imikoreshereze y’uyu muyoboro.

Uyu mushinga watumye umuyoboro wa Gisenyi ugabanywamo indi miyoboro ine ari yo Camp-Belge, Giciye, Rubavu na Ngororero. Ibi byongereye imbaraga z’amashanyarazi akwirakwizwa muri kariya gace ndetse bigabanya gucikagurika kwa hato na hato kw’amashanyarazi.

Umunyamabanga wa Leta muri Minisiteri y’Ibikorwaremezo, Eng. Patricie Uwase yashimye uyu mushinga avuga ko ukubiye mu ngamba za Leta zo kongera ingano y’amashanyarazi hose kugira ngo ahaze abayakeneye ndetse ajyane n’iterambere Igihugu kigezeho.

Yagize ati: “Mu ntego zacu zo kugeza amashanyarazi ku Baturarwanda 100% bitarenze umwaka wa 2024, turanashyira imbaraga mu kuyongerera ubuziranenge ku buryo agera hose yizewe adacikagurika, cyane cyane mu bice birimo ibikorwa bibyara umusaruro, kuko ari inkingi ikomeye y’iterambere ry’ubukungu bw’Igihugu. Iyi sitasiyo rero, izongera amashanyarazi akwirakwizwa muri aka gace, ndetse n’inganda ziri mu aka gace ziyabone ahagije uko ziyakeneye. Aka gace kandi kagira umusaruro mwinshi w’amata, bityo amakusanyirizo y’amata ahari ndetse n’andi azubakwa azaba afite amashanyarazi ahagije”.

Umuyobozi Mukuru wa Sosiyete y’u Rwanda Ishinzwe Ingufu (REG), Eng. Ron Weiss yavuze ko uyu mushinga uje ukenewe kuko mbere REG yagorwaga no kubura k’umuriro kwa buri kanya muri kariya gace.

Basobanuriwe uko iyi sitasiyo y’amashanyarazi ikora

Ati : “Uyu mushinga watumye amashanyarazi yo muri aka gace atongera gucikagurika ndetse ubu rwose akwirakwizwa muri aka gace yizewe kandi afite imbaraga zihagije. Twabashije kugabanya cyane umubare w’inshuro umuriro ubura ndetse n’igihe bimara kugira ngo ugaruke, ubu rwose amashanyarazi yo muri aka gace arizewe kandi afite imbaraga zihagije. Imiyoboro yacu ubu imeze neza kandi irakora neza, ubu rwose dufite ubushobozi bwo guhaza inganda ziri muri aka gace ndetse n’ibindi bikorwa bikenera umuriro mwinshi, byaba ibihari ubu n’ibindi bizaza mu gihe kiri imbere.

Mu rwego rw’iterambere ry’ubukungu, Guverinoma y’u Rwanda ibinyujije muri Sosiyete y’u Rwanda Ishinzwe Ingufu yashyizeho gahunda yo kugeza amashanyarazi ku baturarwanda bose 100% bitarenze umwaka wa 2024. Ubu ingo zifite amashanyarazi zisaga 71.92%.

Mu Banyarwanda 103 baje mu Rwanda abagabo ni 15, mu gihe abasigaye ari abagore n’abana.

Uwase Kamanzi ufite imyaka 28, yatahanye abana batatu. Avuga ko umugabo we yishwe mu ntambara ziheruka muri Masisi mu bice bya Mweso bituma ajya mu nkambi aho bari Abanyarwanda babarirwa muri 410.

Uwase avuga ko yatunguwe no gusanga u Rwanda ari rwiza bitandukanye n’ibyo babwirwa.

Agira ati: "Batubwira ko bavuye mu Rwanda ibintu bicika kandi ko n’ubu bimeze nabi, abantu batashye bicwa, abandi banyerezwa bigatuma dutinya kuza tukaguma muri ubu buzima bubi. Gusa twatunguwe tugeze ku mupaka munini tubona tugeze ahantu heza, hari inyubako nziza."

Mu buhamya yahaye Kigali Today, Uwase yakomeje ati:"Twageze ku mupaka, tubona ni heza, nkuramo inkweto ngo ntahanduza ariko mbona ntibihagije. Numvaga ko twageze muri Amerika cyangwa i Burayi, ariko u Rwanda na rwo ni Igihugu cyiza."

Binjira mu Rwanda bakiriwe mu kigo cyakira impunzi cya Kijote mu Karere ka Nyabihu, aho bagomba kwandikwa no gufotorwa bakazahabwa ibyangombwa.

Abatashye bari biganjemo abana n’abagore

Ingabire Veneranda, Umuyobozi ushinzwe imishinga muri Minisiteri Ishinzwe ibikorwa by’Ubutabazi (MINEMA), avuga ko Abanyarwanda batashye bahabwa ibiryo by’amezi atatu, ubwisungane mu kwivuza, hamwe n’amafaranga yo kubasubiza mu buzima busanzwe; aho umuntu mukuru agenerwa amadolari 250 ya Amerika naho umwana akagenerwa amadolari 150.

Ingabire avuga ko Abanyarwanda bataha bava mu Nkambi bahawe 20% by’amafaranga bagenerwa naho 80% bayahabwa iyo bamaze kugera mu miryango yabo.

Abanyarwanda batashye bibumbiye mu miryango 36 bakaba bavuye mu bice bitandukanye bya Kivu y’Amajyaruguru muri Masisi, Walikale na Nyiragongo, bakaba binjiriye mu Ntara y’Iburengerazuba.

Abo baturage bo mu ngo 1,404 zigize ako Kagari, bavuga ko bagiye banyagirwa kenshi ubwo babaga bagiye ku kagari kwaka serivise zinyuranye, kubera ko Akagari bakoreragamo amabati yari yarashaje kava dore ko ngo kari kanasakaje amabati atujuje ubuziranenge ndetse ari n’agatirano.

Bavuga kandi ko iyo nyubako ishaje yari nto, bikaba ngombwa ko bahabwa serivise ahantu hato babyigana aho bise mu muvundo, mu biro bari baratiye Ushinzwe ubworozi mu hahoze hirwa selire, nk’uko babitangarije Kigali Today ubwo iyo nyubako nshya yafungurwaga ku mugaragaro tariki 28 Kamena 2022.

Singirankabo Idrissa mu byishimo byinshi, ati “Murabona ko twiyujurije akagari gasobanutse, abantu barahanyura bagakeka ko ari ho Umurenge wimukiye, twarabitekereje ubwacu buri wese agatanga uko yifite dukora umuganda, PSF n’Akarere kacu badutera inkunga none turakujuje, abaturage turashoboye ntacyari kutubuza kwiyubakira Akagari”.

Arongera ati “Aka mbere karavaga ari n’agatirano, hari kwa Veterineri umwe wa kera gasakaje na ya mabati atujuje ubuziranenge, dufata icyemezo cyo kugura ikibanza twubaka Akagari keza gasobanutse. Turishimye cyane kuko twe abaturage twikoreye amabuye tugatanga n’amafaranga bitewe n’uko twifite, none turakujuje, byose tubikesha ubuyobozi bwiza butugira inama”.

Nyirambabazi Anonciatta ati “Ndashimira Leta y’Ubumwe yaduhaye umutekano twiyubakira Akagari kacu ka Kora. Twari turi ahantu hadatunganye ku buryo umuntu yahabwaga serivise adatekanye rimwe na rimwe anyagirwa. Amabati yari yarashaje inzu iva, ni ho twahereye dufata icyemezo cyo kwiyubakira Akagari”.

Arongera ati “Twishyize hamwe mu masibo dukora inama kenshi dushaka uko twakwiyubakira Akagari, ubu umuturage nta kibazo afite agiye guhabwa serivise yemye, Akagari kacu twujuje twagatangiye tariki ya 22 Kanama 2021, none tariki 28 Kamena 2022 nibwo bakadufunguriye ku mugaragaro, ubu abayobozi bose b’Akagari bafite ibiro turajya twaka serivise twemye”.

Ni akagari bubatse batangiriye nko ku busa, kuko mu nama ya mbere abaturage bakusanyije miliyoni n’ibihumbi Magana arindwi bahita bagura ikibanza, barongera baraterana bishakamo amafaranga ibihumbi Magana atanu batangira umuganda wo gutwara amabuye bayajyana mu kibanza.

Ngo n’ubwo bari bafite amafaranga make kandi Akagari kagomba kubakwa neza, ntibacitse intege bakomeje gukora umuganda ikibanza bacyuzuza amabuye aho byari bimaze kugera mu gaciro ka miliyoni ebyiri, ibyo bibaha imbaraga bakomeza gutanga inkunga uko bifite.

Bakimara kuzuza amabuye mu kibanza bakoze inama yo kwishakamo ibisubizo bakomeza gukusanya inkunga ari nako bakomeza gufatanya n’abafundi kugeza ubwo ibiro by’Akagari byuzuye bihagaze akabakaba miliyoni 50 ku bufatanye n’abacuruzi bibumbiye muri PSF n’inkunga y’Akarere ihagaze Miliyoni zisaga 15.

Ibyishimo byari byinshi ku baturage bo mu Kagari ka Kora

Nk’uko Kigali Today yabitangarijwe n’Umunyamabanga Nshingwabikorwa w’ako Kagari ka Kora witwa Gashegu Kalimwabo Justin, umusanzu w’abaturage waragaragaye cyane aho mu miganda bagiye bakoresha imbaraga zabo zahawe agaciro k’amafaranga angana na miliyoni 13.

Ibindi byakoreshejwe nk’uko Gitifu Gashegu yakomeje abivuga, harimo abafundi bahembwe Miliyoni 8,5; Igisenge n’amabati bitwara miliyoni 6,5; Amatafari n’igitaka cyifashishijwe mu kubaka byatwaye miliyoni 5,2; Sima na Ferabeto bitwara Miliyoni 6,2; Gukinga (inzugi n’amadirishya) byatwaye miliyoni 7,5 mu gihe Parafo yatwaye miliyoni 2,6.

Gutaha iyo nyubako, ni kimwe mu bikorwa byagezweho mu mihigo y’Akarere ka Nyabihu ya 2021/2022, muri gahunda ijyanye n’icyumweru cyahariwe kwibohora aho umunsi wo gusoza icyo cyumweru uzizihizwa tariki 04 Nyakanga 2022.

Ubwo bwitange bw’abaturage burashimwa n’ubuyobozi bw’Akarere ka Nyabihu aho bufata abo baturage nk’abafatanyabikorwa ba mbere mu gutuma Akarere gakomeza kwesa imihigo kahigiye imbere ya Perezida wa Repubulika, nk’uko byavuzwe na Habanabakize Jean Claude, Umuyobozi w’Akarere wungirije ushinzwe iterambere ry’ubukungu wari umushyitsi mukuru muri uwo muhango.

Yagize ati “Twe nk’abaturage ba Nyabihu ndetse n’ubuyobozi, ibi bikorwa tubitashye mu gihe dusoza umwaka w’imihigo, aho turi no mu cyumweru cyahariwe kwibohora. Turarya imbuto nziza zituruka mu kwibohora tunisuzuma muri uyu mwaka w’imihigo, tureba niba ibyo twahize bigerwaho, twereka n’abaturage uruhare rwabo muri iyo mihigo”.

Umuyobozi w’Akarere wungirije ushinzwe iterambere ry’ubukungu, Habanabakize Jean Claude, ni we wafunguye ibyo biro ku mugaragaro

Arongera ati “Twatashye ibiro by’Akagari ka Kora kandi byose ni abaturage babigizemo uruhare, ariko bikaba n’ibikorwa byari bikenewe muri aka Karere, cyane cyane abantu badafite aho bakorera cyangwa bakorera mu nzu itajyanye n’igihe. Ntabwo wajya kuvuga ngo serivise iranoze kandi imvura inyagira uje akugana asaba serivise. Ni igitekerezo bagize cyo kwiyubakira ibiro by’Akagari byari mu mihigo y’uyu mwaka, bikaba bishimishije ko umuhigo tuwesheje ku mbaraga z’abaturage”.

Abaturage barasaba abayobozi gutanga serivise nziza bakira neza abaturage, kandi babaha serivise babishimiye.

Ni Akagari kagizwe n’ibyumba binyuranye birimo icyumba kinini kigenewe gukorerwamo inama no kwakira abaza kwaka serivise, hakaba ibiro by’Umunyamabanga Nshingwabikorwa w’Akagari, icyumba kigenewe Mudugudu, icyumba cy’Abunzi.

Hari kandi n’icyumba kigenewe ikoranabuhanga, icyumba kigenewe ushinzwe iterambere n’imibereho myiza y’abaturage, icyumba kigenewe ububiko, n’ibindi byumba bibiri biteganyirijwe abakozi bashya baziyongera mu Kagari.

Akanyamuneza kari kenshi mu baturage

Aborojwe muri gahunda ya Girinka Munyarwanda bishimira ko yabakuye mu bukene

Mukagatare Odette, umugore w’imyaka 47, yahawe inkunga y’ingoboka muri gahunda ya VUP, bimufasha gutangira ubucuruzi bw’ibinyampeke, yafatanyaga n’ubudozi. Amafaranga yakuragamo, yagendaga akuramo ayo yizigamira, bituma abasha kwigurira ikibanza yubatsemo inzu ubu atuyemo.

Yagize ati “Nari umukene wo ku rwego rukomeye, ntagira aho kuba, ntagira umwambaro, ku buryo n’abo nanyuragaho mu nzira batanzi, bakekaga ko ndi umurwayi wo mu mutwe, biturutse ku kuntu nabaga nsa nabi. Mu mwaka wa 2013 ubwo Leta yatangiraga kujya ingenera amafaranga ibihumbi 18 y’inkunga y’ingoboka, natangiye ubucuruzi bw’ibishyimbo, nkabifatanya no kudoda imyenda, bingeza ku rwego rwo kwigurira ikibanza, mbasha no kucyubakamo iyi nzu ntuyemo”.

Mukagatare agaragariza Umuyobozi Mukuru wa LODA uburyo inkunga y’ingoboka yatumye yiyubakira inzu

Ati “Ubu ibyo turya hafi ya byose ni ibituruka mu mirima itatu nabashije kwigurira. Ari njye n’abana, ntitubura ibyo twambara cyangwa dukenera mu buzima bwacu bwa buri munsi, tutarinze kugira uwo tubisabiriza; byose mbikesha inkunga y’ingoboka nakuyemo igishoro”.

Ubu buhamya bwa Mukagatare, bufitanye isano n’ubwa Ndungutse Manasse, wahawe inka muri gahunda ya Girinka Munyarwanda; kuri ubu na we ugaruka ku byiza akesha inka yagabiwe, ikaba imaze kororoka ikabyara eshanu mu bihe bitandukanye, aho yemeza ko zagize uruhare rufatika mu kumurinda ikibazo cy’imirire mibi mu muryango we, kandi zikamufasha kubona ifumbire yifashisha mu buhinzi.

Mu gikorwa cyo kurasa ku ntego, aho abaturage basaga 3000 bo mu Mirenge yose igize Akarere ka Nyabihu, bafashwa muri gahunda zibakura mu bukene, bamuritse ku mugaragaro bimwe mu bikorwa bakomeje kwigezaho, babikesha gahunda ya Girinka Munyarwanda, abahawe inguzanyo za VUP, Inkunga y’ingoboka, abakora imirimo ibahemba bakabasha kwizigamira. Izo gahunda bazubakiyeho, bazibyaza umusaruro, zikabageza ku rwego rwo kwiyubakira cyangwa gusana amazu batuyemo, kwigurira amatungo, amasambu, kurihira abana amashuri n’ibindi, bituma batera intambwe yo kwikura mu bukene.

Claudine Nyinawagaga uyobora LODA avuga ko Leta ikomeza kugenzura uko abaturage biteza imbere

Ni ibikorwa bemeza ko batari kwishoboza iyo hatabaho Politiki y’imiyoborere ishyira imbere iterambere ry’umuturage.

Umwe muri bo ati “Twaritinyutse tubasha kugera aho abandi bari, bitewe n’ubuyobozi bwacu burangajwe imbere na Perezida Paul Kagame, uhora adushishikariza kwishyira hamwe mu matsinda, tukizigamira, tukagurizanya. Ubu icyo dushyize imbere ni ugukomereza mu murongo w’ibituma iterambere tugezeho, ridasubira inyuma”.

Claudine Nyinawagaga, Umuyobozi Mukuru w’Ikigo Gishinzwe Guteza Imbere ibikorwa by’Iterambere mu Nzego z’Ibanze (LODA), avuga ko Leta ikomeje gushyira imbaraga mu kwita ku buryo buhamye, bwo gukurikirana ko gahunda zinyuranye zikura abatishoboye mu bukene, zibagirira akamaro.

Abana babona ifunguro ryuzuye

Yagize ati “Mu Turere twose tw’Igihugu, twashyizeho abafashamyumvire b’abajyanama mu by’imibereho myiza n’iterambere, bari kuri buri Mudugudu; kugira ngo bajye bakurikirana mu buryo buhamye bariya bagenerwabikorwa b’izo gahunda, mu rwego rwo kubaba hafi, kugira ngo bijye binatworohera kumenya mu gihe runaka, urwego buri wese agezeho yikura mu bukene. Tumenye niba ashobora gucutswa cyangwa se niba yakomeza gufashwa”.

Ati “Ikindi ni no gutoza abaturage umuco wo kwigira, no kumenya umukoro cyangwa uruhare bafite mu murongo igihugu cyihaye wo kwikura mu bukene. Aha rero tubinyuza mu gikorwa twise icyo ‘Kurasa ku ntago’, aho igihe kigera buri wese mu bagenerwabikorwa, akamurika ibyo yabashije kwigezaho, bishobora no kubera abandi urugero, rutuma bagira ishyaka ryo kumva ko na bo bashobora kwigira, bakikura mu bukene, barebeye ku byo abandi bagiye bakora”.

Binyuze muri gahunda yo kurasa ku ntego, abagenerwabikorwa bagaragaje ko bagenda barushaho guhindura imibereho

Bamwe mu bagenerwabikorwa b’izi gahunda, barimo n’abagaragaza icyifuzo cyo gukurwa mu cyiciro kimwe bashyirwa mu byisumbuyeho, kuko ubufasha bagenda babona butuma bigeza kuri byinshi.

Umuyobozi w’Akarere ka Nyabihu, Mukandayisenga Antoinette, ahamya ko bakomeje gushyira imbaraga mu gukurikirana ko gahunda zose umuturage agenerwa zimugeraho uko bikwiye, kugira ngo mu gihe kiri imbere, umubare w’abakiri mu murongo w’ubukene na wo uzagabanuke.

Rotary Club yishyuriye imiryango 100 mituweri

Bamwe mu bahawe ubwo bwisungane mu kwivuza, ngo bajyaga bagira ipfunwe ryo kujya kwa muganga, bitewe n’uko batagiraga mituweri, bakivurisha ibyatsi cyangwa bakajya kwivuza magendu.

Nzayisenga Elizabeth, umwe mu bahabwe ubwisungane mu kwivuza, yagize ati “Nari mbayeho mu buzima bugoye, buturuka ku kubura uko nivuza mu gihe ndwaye cyangwa ndwaje abana. Byabaga ngombwa ko ndwarira mu rugo, ntinya no kuba nasohoka mu nzu ngo abatunyi batabona ukuntu narembye, bakaba banyohereza ku ivuriro ntafite ubushobozi bwo kwivuza”.

Ati “Byabaga ngombwa ko nivurisha ibyatsi bya kapusini, imiravumba n’imibirizi nabaga nahiye mu bisambu; gukira byananirana nkajya kwivuriza muri ba magendu baca amafaranga macyeya. Ubu rero kuba duhawe ubwisungane mu kwivuza, twongeye kugarura ubuzima; ubu rwose turumva dutekanye, kuko tudatewe impungenge n’ikiguzi cy’ubuvuzi abaganga bazajya baba badukoreye”.

Nzayisenga Elizabeth ari mu basezereye kwivurisha ibyatsi abikesha ubwisungane mu kwivuza yahawe

Igitekerezo cyo gufasha aba baturage bo mu Murenge wa Kabatwa, by’umwihariko babarizwa mu nkengero z’ikirunga cya Kalisimbi, abanyamuryango ba Rotary club Kigali Kalisimbi, bakigize nyuma y’aho iyi club yari imaze guhabwa uburenganzira bwo gukora ku mugaragaro nka nk’iyemewe ya Rotary.

Ibi bikaba biri mu rwego rwo gushimangira ubufatanye n’imikoranire hagati y’aba baturage n’abagize iyi club, mu mishinga iramba kandi ihindura imibereho y’abaturage.

Rtn (Rotarian) Kelech Anyanwu, Umuyobozi wa Rotary Club Kigali Kalisimbi, yagize ati: “Twahisemo guha abaturage 100 ubwisungane mu kwivuza, mu rwego rwo gutangiza gahunda y’imishinga tuzagirana na bo y’igihe kirekire, iri mu murongo wo gushyigikira iterambere ryabo. Amahitamo twagize yo gukorana n’abaturage b’aka gace kegereye ikirunga cya Kalisimbi, gifite umwihariko wo kuba gihiga ibindi birunga bibarizwa mu Rwanda mu burebure, tubihuza n’izina rya club yacu, kuko na yo ifite intego yo guhora ku isonga, mu bikorwa byose n’imishinga yose tuzakorana n’abaturage, kandi tugaharanira ko igaragaza udushya tw’umwihariko”.

Imiryango yo mu Murenge wa Kabatwa yanahawe ibikoresho by’isuku y’abagore n’abana

Ubwisungane mu kwivuza bwashyikirijwe iyi miryango, bwiyongeraho n’ibikoresho by’isuku y’abana bato (Pampers) ndetse n’ibyifashishwa mu kunoza isuku y’abagore mu gihe bari mu mihango (Cotex), mu rwego rwo kurushaho kubakangurira no kubibutsa ko isuku ari isoko y’ubuzima.

Umunyamabanga Nshingwabikorwa w’Umurenge wa Kabatwa, Kampire Georgette, ahamya ko iki gikorwa kije gushyigikira ubuyobozi, muri gahunda zizamura imibereho y’abaturage.

Yagize ati “Kugeza ubu Umurenge wa Kabatwa twatangiye gutanga amafaranga y’ubwisungane mu kwivuza y’umwaka wa mituweri wa 2022-2023, aho kugeza ubu tugeze kuri 33%. Dufite intego y’uko ukwezi kwa gatandatu, kugomba kurangira, abaturage bose bamaze kwishyura 100%, cyane ko n’abafatanyabikorwa nk’aba, barimo na Rotary club Kigali Kalisimbi, biyemeje kudufasha kwesa uyu muhigo, ku buryo dufite icyizere cyuzuye cy’uko bizashoboka”.

Rtn Kelech Anyanwu, avuga ko hari imishinga myinshi bazafatanya n’abaturiye ikirunga cya Kalisimbi

Mu tugari dutandatu tugize Umurenge wa Kabatwa, dutatu muri two dukora ku kirunga cya Kalisimbi. Ubufatanye hagati y’abaturiye iki kirunga ndetse na Rotary Club Kigali Kalisimbi, uretse kuba bwitezweho umusaruro w’imishinga iramba, buzongera n’abanyamuryango b’iyi club bo muri ako gace.

Abahawe ubwisungane mu kwivuza bashimishwa n’uko batazongera kurembera mu ngo

Gukemura ibibazo hagati y’abantu n’abandi birinda abaturage gusiragira mu nkiko

Ibi Ihuriro ry’Imiryango itegamiye kuri Leta, ishinzwe gushyira mu bikorwa umushinga witwa “Ubutabera bwegereye Umuturage-Ituze Iwacu”, riheruka kubigarukaho mu bukangurambaga, ryateguye, bukitabirwa n’abaturage bo mu Mirenge ya Bigogwe, Mukamira na Rugera yo mu Karere ka Nyabihu.

Bamwe mu babwitabiriye, barimo na Mukamulisa Josephine wo mu Murege wa Bigogwe, uvuga ko hari igihe abantu bagirana ikibazo, bagashorana mu manza zishobora no gutuma umwe muri bo afungwa, nyamara mu bigaragara bashoboraga kugikemura hagati yabo, cyangwa babifashijwemo n’abo mu muryango, batarinze kwisanga mu nkiko.

Yagize ati “Umuntu agirana na mugenzi akabazo gato, wenda bakarwana, umwe yakomeretsa mugenzi we akajyana ikirego bikabyara ibifungo n’imanza. Ibyo bintu usanga bitudindiza nk’abaturage, harimo no kuhatakariza igihe n’amafaranga, nyamara bakabaye barabanje kubikemurira hamwe mu muryango, uwahemutse akiyunga n’uwo yahemukiye, batarindiriye kujya mu nkiko”.

Bizumuremyi Donatien na we yunga mu rya mugenzi we, ahamya ko kutiyambaza ubutabera bwunga, umuntu akishora mu manza zo mu nkiko, byanze bikunze atabura ingaruka ahura na zo.

Yagize ati “Iyo abantu bagiranye ikibazo, ntibihutire kugikemura ahubwo bakishora mu manza, byanga bikunze ntibabura guhura n’ibibasaba gushora amafaranga. Urugero nko kwishyura igarama ry’urubanza, umwunganizi, ndetse utirengagije n’amatike bifashisha bajya cyangwa bava kuburana mu rukiko. Nyamara bicaranye bagakemurira hamwe ibyo bibazo hagati yabo, byaba na ngombwa bakiyambaza imiryango, bakabaye barengera igihe cyabo ntibagipfushe ubusa, yewe n’ayo mafaranga bagashoye mu manza, bakayifashisha mu bindi bintu bibyara inyungu zihuse”.

Muri ubwo bukangurambaga bwigisha akamaro k’ubutabera bwunga, abaturage barushijeho gusobanurirwa uburengazira ku butabera, imikorere y’inzego z’ubutabera zo mu Rwanda, uko bakwikemurira amakimbirane mu mahoro, ubuhuza bukorewe mu nkiko n’ibindi.

Hugo Moudiki Jombwe, uyobora umuryango wibanda ku guha abaturage ubutabera, RCN Justice et Démocratie, avuga ko bita cyane ku kwifashisha inzira y’amakinamico mu kwereka abaturage uburyo ubutabera bwunga, bwababera imbarutso yo gukumira amakimbirane no gusiragira mu manza bya hato na hato.

Byiyongeraho nanone kuba byanabera abaturage inzira ituma batihererana akarengane kabo, bakageza ibyo bibazo byabo ku bo bireba, bakaba babakorera ubuvugizi mu nzego zibegereye, nko mu masibo, mu Midugudu, mu Bunzi, hagamijwe ko ibibazo bafitanye bivugutirwa umuti kandi badasabwe n’ikiguzi.

Umuhuzabikorwa wa MAJ mu Karere ka Nyabihu, Kabandana Janvier, asaba abaturage guharanira ko ibibazo byabo bajya babikemurira hasi, batarinze kubigeza mu nkiko.

Yagize ati “Ubutabera butangwa n’inkiko bugira ikiguzi; ndetse hakaba n’ubwo ubwo butabera butinda kuboneka, kubera uburyo inkiko na zo ubwazo zifite inshingano nyinshi cyane. Ikindi ni uko abantu baburaniye mu rukiko, hari igihe usanga umubano wabo ujemo agatotsi, kubera icyemezo cy’urukiko rimwe na rimwe kiba gikakaye”.

Ati “Abantu bamwe usanga batamenya uburyo bwo kwiburanira, bagatinya kwisobanura imbere y’umucamanza, ntibanamenye gutanga ibimenyetso bibarenganura mu gihe baburana, bikaba byabaviramo no gutsindwa, bagahomba n’imitungo yabo. Ni yo mpamvu dushishikariza abaturage kumva inyungu ikomeye, iri mu kwikemurira ibibazo hagati yabo, batarinze kubigeza mu nkiko”.

Hifashishijwe uburyo bw’ikinamico mu gusobanurira abaturage akamaro k’Ubutabera bwunga

Muri ubu bukangurambaga, bwateguwe ku bufatanye na Minisiteri y’Ubutabera, ibitewemo inkunga na Ambasade y’u Buholandi mu Rwanda na Koperasiyo y’Abasuwisi mu Rwanda; abaturage bahawe urubuga rwo kuganira n’abo mu nzego zikora mu butabera, bazigezaho ibibazo byabo, banahabwa ubufasha mu by’amategeko, n’andi makuru y’inyongera.

ASmazi aruzura agasandarira mu ngo no mu mirima

Bavuga ko icyo kiyaga cya Nyirakigugu cyahoze ari umugezi muto, nyuma gihinduka ikiyaga, aho mu gihe cy’imvura cyuzura amazi akabatera mu ngo zabo.

Umwe muri abo baturage yagize ati “Amazi aruzura akadusanga mu ngo. Ejobundi baraje bakora umuyoboro amazi aragabanuka, ndavuga nti tugize agahenge wabona inzu itaridutse, hashize iminsi ibiri ya mazi noneho aza ari menshi yuzura mu nzu, ubu ndi mu bibazo”.

Mugenzi we ati “Rimwe umuyoboro w’amazi barawufunga ubundi bakawufungura, ugasanga aragenda adusatira adusanga mu ngo. Iyo Nyirakigugu yuzuye usanga twe duturiye iki kiyaga duhangayika, aho amazi aba yasandaguritse mu ngo no mu mirima yacu”.

Ikiyaga cya Nyirakigugu gihangayikishije abagituriye

Abo baturage bavuga ko nyuma y’uko hari hashatswe inzira yamazi y’icyo kikiyaga cyatangiye gusenyeraho bamwe, ababishoboye barahimutse hasigara ab’ubushobozi buke.

Mu gihe iyo nzira yamaze gufungwa, abahatuye bakaba bahangayikishijwe n’ayo mazi abasanga mu ngo, aho basaba gufashwa agacukurirwa umuyoboro ujyanye n’igihe, byakwanga bakabimura aho hantu bafata nk’amanegeka.

Umuyobozi w’Akarere ka Nyabihu, Mukandayisenga Antoinette, yavuze ko barimo kwiga umushinga w’uburyo icyo kibazo cyakemuka burundu, abaturage bakongera gutura batekanye byaba na ngombwa bakahimurwa.

Ati “Amazi ni menshi aragenda asandara mu mirima y’abaturage, byabaye ngombwa ko habaho uburyo bwihuse kugira ngo ayo mazi babe bayafunzeho gato mu rwego rwo kuyashakira inzira, kugira ngo ikibazo gituma asandagurika gikemuke, ahari inzira ntoya yagurwe ikibazo gikemuke”.

Amazi y’ikiyaga cya Nyirakigugu akomeje kubasatira mu ngo zabo

Uwo muyobozi avuga ko mu gihe icyo kiyaga gikomeje gukura, abatishoboye bagituriye bazafashwa kuhimurwa, mu rwego rwo kurengera umutekano wabo.

Bavuga ko icyo kiyaga gikomeje kubasenyera inzu

Aho bahunikaga imbuto y’ibirayi ngo ubungubu hababereye imfabusa bibasubiza inyuma

Aba bahinzi baratangaza ibi, bahereye ku kuba Akarere kamaze imyaka isaga umunani kabizeza kubishyura ingurane z’amazu abiri n’umurima, ariko kugeza ubu bikaba bidakorwa, mu gihe abandi baturage bari bahatuye n’abari bahafite ibikorwa, bo bimuwe bajya gutura no gukorera ahandi.

Umwe muri abo bahinzi agira ati: “Aka gace kose ubona, gakikije izi nyubako zacu, mbere kahoze gatuwe n’abaturage, hakorera SACCO ndetse n’iyahoze ari Banki y’Abaturage. Abo bose Akarere kabahaye ingurane barimuka bajya gukorera ahandi, twe dusigaramo twenyine, katwizeza kuduha ingurane natwe tukahava”.

Icyo gihe ubwo Akarere kari muri gahunda zo gutanga ingurane, byabaye ngombwa ko n’abagize iyi Koperative bahagarika ibikorwa bahakoreraga, kuko bizezwaga kuhimurwa byihuse.

Aba ni bamwe mu bagize Koperative KOGUGU. Bavuga ko bamaze imyaka isaga umunani mu gihirahiro cy’imitungo yabo itaratangirwa ingurane

Undi muhinzi agira ati: “Twizezwaga kwimurwa byihuse, bituma n’ibikorwa twakoreraga muri aya mazu birimo ubucuruzi bw’ifumbire n’ibikoresho by’ubuhinzi ndetse no guhunikamo ibirayi, byose bihagarara, kuko n’ubundi abakabituguriye bari baramaze kwimukira kure yacu, tuhasigara nta baguzi tugifite. Kugeza ubu imyaka isaga umunani irinze ishira, batwizeza ingurane, na n’ubu twarayitegereje turaheba”.

Bakomeza bavuga ko iki kibazo banakigejeje ku nzego, zirimo n’iz’Akarere, intumwa za rubanda yewe n’Urwego rw’Umuvunyi, rwanageze ubwo rusaba Akarere gukurikirana iby’iki kibazo no kugikemura byihuse, ariko kugeza ubu nta gisubizo gifatika babona, nk’uko undi muhinzi akomeza abishimangira.

Agira ati: “Twagerageje kenshi kwandikira Akarere na Njyanama yako, ndetse n’Abadepite buri uko badusuye, ntidusiba kubagaragariza ikibazo cyacu, bakatwizeza kugikemura, bamara kuhashingura ibirenge, bigaherera iyo. Ubu abahinzi bo muri iyi Koperative, twasubiye inyuma mu iterambere, ndetse nta n’irindi twiteze, kuko ibikorwa byacu, byahagaze ari na byo twakuraga amaramuko”.

Bavuga ko imyaka ishize ari umunani badahabwa ingurane mu gihe abandi bo bishyuwe bakajya gutura no gukorera ahandi

Umurima n’amazu uko ari abiri, abagize iyi Koperative bagaragaza ko bakeneye ingurane zabyo, harimo inzu bifashishaga mu guhunikamo umusaruro w’ibirayi usaga toni 80, hakaba n’indi bacururizamo ifumbire n’ibikoresho by’ubuhinzi, na yo baje guhagarika gukoreramo bayikodesha Akarere, aho ubu kayifashisha mu kuyibikamo ibikoresho by’ubwubatsi.

Aba bahinzi bavuga ko n’ubwo bukode bw’inzu batabwishyurwa ku gihe, na byo bikabagiraho ingaruka.

Ni byo basobanura bati: “Amasezerano dufitanye n’Akarere y’ubukode bw’iyi nzu, avuga ko tugomba kujya twishyurwa amafaranga ibihumbi 100 buri kwezi, ariko na yo usanga tutayishyurwa ku gihe. Dore nk’ubu turi kubara amezi hafi icumi tutayahabwa. Amazu yari mashyashya, ariko ubu arinze asaza tudafite n’uburenganzira cyangwa ubushobozi bwo kuyasana, bitewe n’uko nta hantu bwaturuka. Kudahabwa ingurane hamwe n’ubukode twijejwe ku gihe, byadushyize mu gihombo, bituma na bamwe mu bahinzi ntangarugero bari muri Koperative yacu basubira hasi”.

Kuri ubu ngo ahari iyo mitungo, ari na ho bakoreraga imirimo ya buri munsi ya Koperative, ngo ntibahafite ubwinyagamburiro, kuko hazengurutswe n’uruzitiro, n’izindi nyubako zitangirwamo serivisi ku rwego rw’Akarere, harimo Farumasi y’Akarere, inyubako ikorerwamo na Polisi, salle y’Akarere, inzu y’ibiro by’ubutaka; iyo mitungo yo ikaba yarasigayemo hagati.

Iyi nzu ngo bayikoreragamo ubucuruzi bw’ifumbire n’ibikoresho by’ubuhinzi byarabateje imbere none byarahagaze

Bati “Nta bwinyagamburiro tugifite bw’aha hantu tuzengurutswe n’inyubako zitangirwamo serivisi zinyuranye z’Akarere. Nawe reba kuba abantu nka 200 baturuka icyarimwe nko mu murima, basaruye ibirayi, bose uko bakabaye bikoreye imifuka y’ibirayi, buzuweho n’uburimiro, wenda n’imvura yabanyagiye; bakinjirira mu muryango umwe ureba hariya, bakihura muri ibi biro by’Akarere, ngo bazanye umusaruro muri ayo mazu ya Koperative. Ubona ari ibintu bidahesheje ishema. Twifuza guhabwa ingurane bahora batwizeza z’ibyacu, kugira ngo tubone uko tujya gushaka ahandi hantu dukorera twisanzuye, turebe uko twakongera kuzanzamuka tukiyubaka”.

Umuyobozi w’Akarere ka Nyabihu Mukandayisenga Antoinette, yijeje aba bahinzi ko agiye gukurikirana iby’iki kibazo, ku buryo kizakemurwa vuba.

Yagize ati: “Ikibazo cyabo koko gikwiriye kumvwa, tukagisubiza tugendeye ku byo igenagaciro rizagaragaza. Icyo nakwizeza abahinzi, ni uko ngiye kucyihutisha mfatanyije n’inzego zibishinzwe mu Karere, ku buryo mu gihe kiri hagati y’ukwezi kumwe n’amezi abiri, cyangwa na mbere yaho, kigomba kuzaba cyavugutiwe umuti”.

Abanyamuryango bagize Koperative KOGUGU, ni abahinzi basaga 1000 bibanda ku guhinga ibirayi; bakaba bakorera mu Mirenge ya Karago, Jenda, Kintobo na Mukamira.

Itaka ryose ryari riri mu muhanda ryakuwemo, ubu ni nyabagendwa

Umuhanda Mukamira-Ngororero wari wafunzwe n’inkangu ku mugoroba wok u itariki 4 Gicurasi 2022.

Ibyo byatumaga imodoka zitwara abagenzi ziva i Muhanga na Ngororero zidashobora gutambuka kimwe n’iziva Mukamira ntizashoboraga gutambuka, ahubwo zaguranaga abagenzi mu buryo bwo gufasha abantu mu ngendo.

Umuyobozi wungirije ushinzwe ubukungu n’iterambere mu Karere ka Nyabihu, Jean Claude Habanabakize, yabwiye Kigali Today ko umuhanda wongeye kuba Nyabagendwa kandi imodoka zibisikana ahari habaye inkangu.

Habanabakize avuga ko inkangu ikimara kuba hashyizwemo imashini ikuramo ibitaka, icyakora ngo mu mpera z’icyumweru byari bimaze gushiramo.

Agira ati "Ubu umuhanda ni Nyabagendwa, imodoka zirabisikana, icyo dusigaje ni ugusibura inzira y’amazi kugira ngo adakomeza kureka akaba yatera ikindi kibazo, naho ahavuye inkangu tugomba kwiga uburyo tuhabungabunga mu buryo burambye."

Hifashishsijwe imashini kugira ngo gukuramo itaka byihte

Ahantu habereye inkangu hari hasanzwe hateye amashyamba kandi biboneka ko hari ubutaka bukomeye.

Umuyobozi w’Akarere ka Nyabihu Mukandayisenga Antoinette, akaba yarabwiye Kigali Today ko ababyeyi n’abandi bantu bagenda bagomba kwigengesera, kuko bazi ahandi haba inkangu.

80% by’abanyeshuri uko ari 700 biga muri GS Nanga banyura kuri iki kiraro cyagateganyo bajya cyangwa bava kwiga

Ahishakiye Damien ni umwe mu bo Kigali Today yasanze mu Mudugudu wa Gashonero Akagari ka Rubaya iki kiraro giherereyemo. Yagize ati: “Muri iki gihe imvura ikomeje kwiyongera, dufite ubwoba bw’amazi yuzura, akarengera iki kiraro, bigatuma abana bacu babura uko bataha cyangwa bajya ku ishuri. Kubera ko baba batinye kucyambuka. Usanga babanza gutegereza ko uwo muvu w’amazi ucogora, hakaba abasiba ishuri, abagerayo bakererewe, ntibige uko bikwiye, cyangwa kwaba ari nko gutaha, bakagera mu rugo bwabiriyeho”.

Iki kiraro cyambukiranya umugezi wirohamo amazi aturuka mu misozi, ikikije aho iri shuri riherereye. Mu gihe cy’imvura abana bajya ku ishuri, cyane cyane abatoya, bisaba kwambutswa n’ababyeyi babo cyangwa bagenzi babo bakuru, ku bwo gutinya ko bahirima muri uwo mugezi.

Mukabeza Dolice wiga mu mwaka wa kabiri w’amashuri yisumbuye ku Rwunge rw’Amashuri ya Nanga, twahahuriye na we, mu ma saa tatu, aribwo aje kwiga, yakererewe amasomo, kubera imvura yari yaramutse igwa muri aka gace, bituma we n’abandi bagenzi be bahagera batinze.

Hari igihe imvura igwa ari nyinshi uwo mugezi ukuzura bikabangamira abana bajya kwiga

Yagize ati: “Imvura iragwa ubwoba bw’aho turi bunyure bukadutaha, bitewe na kiriya kiraro gitoya kandi gishaje; kigira ubunyereri duhora tunyuraho. Dore nk’ubu ngeze hano ku ishuri nkererewe, kubera ko imvura yaguye, nkabanza gutegereza ko ihita ngo ntagera kuri kiriya kiraro nkasanga cyuzuye amazi akaba yantembana. Nakabaye nageze hano mbere ya saa moya, nkatangirira amasomo ku gihe, none dore nakererewe. Kuba kino kiraro kimeze gitya, bituma twiga imitima itari hamwe, dutinya kuzagwamo tukahaburira ubuzima”.

80% by’abana 700, barimo abo mu cyiciro cy’amashuri y’inshuke, abanza ndetse n’abiga mu cyiciro cya mbere cy’amashuri yisumbuye; mu minsi yo kwiga, bose banyura kuri iki kiraro, gitindishijwe ibiti bitarenga bitanu, nabwo bigaragara ko ari bito.

Uretse no mu gihe cy’imvura, aho usanga ubwitabire bw’abanyeshuri buba bwagabanutse, bitewe n’impungenge zo kukinyuraho, ngo n’iyo itaguye, usanga kenshi abana batangira amasomo bakererewe, kubera kucyambuka ari bake bake, kubera ko n’ubugari bwacyo ari butoya.

Igihe cyo kuhambuka abanyeshuri bafite imbaraga ni bo bambutsa abana bato ngo batagwamo

Rev. Munyaneza Marcel uyobora GS Nanga, avuga ko ubushobozi bw’ikigo bwari bwagarukiye mu kubaka iki kiraro mu buryo buciriritse, hakaba hakenewe izindi mbaraga zirenze, zakwifashishwa mu kubaka ikirambye.

Yagize ati: “Twari twagerageje kwishakamo amikoro bijyanye n’ubushobozi twari dufite nk’ikigo, ikiraro tucyubaka muri buriya buryo. Urebye imiterere y’uyu mugezi, bigaragara ko hakenewe ikiraro cyubatswe mu buryo bukomeye, ku buryo n’igihe imodoka ije nko mu kigo, yajya ibona uko ikinyuraho, bidasabye ko iparika hirya yacyo ku muhanda nk’uko bigenda ubu. Kandi ibyo birenze ubushobozi bw’iki kigo. Ari na yo mpamvu dusaba izindi mbaraga zisumbuyeho, kugira ngo harebwe uko batwubakira ikiraro gikomeye”.

Umuyobozi w’Akarere ka Nyabihu Mukandayisenga Antoinette, avuga ko bagiye gufatanya n’Umurenge, bakareba uko hategurwa umuganda wihuse ku bufatanye n’abaturage, bakazatinda ikiraro cy’agateganyo mu gihe hagitegerejwe ikizubakwa mu buryo bugezweho.

Yagize ati: “Turashakisha uko twakwegeranya imbaraga dufatanye kuhakora umuganda, nibura hariya habe hashyizweho ikiraro cy’agateganyo abana baba bambukiraho. Gusa icyifuzo dufite, ni ukuzahubaka ikigezweho, ariko nk’uko mubizi, biba ari ibintu bisaba ingengo y’imari ihagije. Ni yo mpamvu mu gihe tugitegereje uko izaboneka, twaba twubatse icyo kuba bifashisha”.

N’ubwo bahangayikishijwe n’ikiraro kidakoze, baranishimira imbaraga zashyizwe mu kongera ibyumba by’amashuri kuri iki kigo byubatswe mu buryo bugezeho

Gusa ababyeyi, abarezi n’abana biga ku rwunge rw’amashuri rwa Nanga, n’ubwo bagaragaza iyo mbogamizi y’uko batoroherwa no kuva cyangwa kugera ku ishuri bitewe n’icyo kiraro, barishimira ko hashyizwe imbaraga mu kubongerera ibyumba by’amashuri, byubatswe mu buryo bugezeho.

Mayor Mukandayisenga avuga ko kimwe n’ahandi hagaragara ibikorwa remezo by’ibiraro mu Karere ka Nyabihu, bakomeje gukora ibishoboka ngo babirinde kwangirika, ahanini binyuze mu gusana no gusimbuza ahagaragara ibiti n’ibyuma bishaje, mu rwego rwo kwirinda ko byagera aho bihagarika ubuhahirane hagati y’uduce tumwe n’utundi.

Umuyobozi w’Akarere ka Nyabihu, Mukandayisenga Antoinette, avugana na Kigali Today yemeje ko umuhanda ufunze, avuga ko imodoka ziva mu Ngororero zizana abagenzi kimwe n’iziva ku Mukamira zigera ahabereye inkangu zigahererekanya abagenzi.

Inkangu yabereye mu Murenge wa Karago mu Kagari ka Gihirwa mu mudugudu wa Rurwangiro, biba mu masaha ya saa cyenda ariko inkangu ikomeye yabaye saa moya kugera saa mbiri z’ijoro, ifunga umuhanda n’inzu enye.

Meya Mukandayisenga avuga ko inkangu yabaye nta mvura yaguye, ahubwo yatewe n’imaze iminsi igwa.

Yongeyeho ko bashyizemo imashini ikura itaka n’amabuye mu muhanda, n’ubwo bitizewe ko byakurwamo mbere ya saa sita uyu munsi.

Ati "Si ibintu bitunguranye ku hantu nk’aha hari ubutaka bworoshye, kuko iyo ubutaka bwasomye biroroha ko inkangu iba."

Ahantu habereye inkangu hari hasanzwe hateye amashyamba kandi biboneka ko hari ubutaka bukomeye.

Meya Mukandayisenga akaba asaba ababyeyi n’abandi bantu kugenda bigengesereye, kuko bazi ko hari ahandi haba inkangu.

Uko bagiye barushaho kumenya kwita ku bireti, byabafashije kongera umusaruro ku buso babihingaho

Nyuma y’aho byari bimaze kugaragara ko igihingwa cy’ibireti kigenda gikendera, kuva mu mwaka wa 2008 Leta yongeye imbaraga mu gukangurira abahinzi bo mu Mirenge imwe n’imwe y’aka Karere harimo n’uwa Kabatwa, kwitabira kubihinga.

Abo bahinzi barimo na Hategekimana Innocent, bari barihebeye igihingwa cy’ibirayi, bahingaga muri ako gace basimburanya mu mirima yabo buri uko ihinga ritashye. Bagitangira gushishikarizwa kujya babisimburanya n’igihingwa cy’ibireti, ngo kubyiyumvisha byabanje kubagora.

Yagize “Iyi zone yose yegereye ibirunga, wasangaga twibanda ku guhinga ibirayi, tubisimburanya mu mirima byonyine. Ubwo ubuyobozi bwatangiraga kudushishikariza kujya duhinga ibireti tubisimburanya n’ibirayi, bamwe ntitwabyiyumvishaga twibwira ko ari amayeri bwazanye yo kutwicisha inzara bitewe n’imyumvire twari dufite, y’uko ibireti, ari igihingwa umuntu asarura ntabe yagira utwo afataho ngo ajyane mu rugo atekere abana barye, nk’uko n’ibindi bihingwa bigenda”.

Ati “Buhoro buhoro uko twagiye turushaho gusobanukirwa guhinga neza ibireti, byagiye bituzanira inyungu, aho ubu tubisarura umuguzi wabyo akatugurira ku giciro cyiza, imiryango tukayishyurira za mituweli, abana bacu tukabarihira amashuri. Benshi muri twe twiyubakiye amazu agezweho, abandi bagura amamodoka. Mbese urebye iki gihingwa kidufitiye inyungu”.

Aba bahinzi bahamya ko mu gihe iki gihingwa cyitaweho, kubibagarira igihe, bigafumbizwa imborera bitanga umusaruro ufatika, aho nibura umuhinzi ashobora kubona umusaruro w’ibireti, uri hagati ya toni imwe n’igice kugeza kuri toni ebyiri kuri hegitari imwe.

Abahinga ibireti muri ako gace, ikiro kimwe cy’ibireti byumye neza, bakigurirwa ku mafaranga 1080, hanyuma Koperatve iba yawukusanyije, yo ikishyurwa amafaranga 1122.

Mu gace kegereye ibirunga ubuhinzi bw’ibireti bugenda bwitabirwa cyane kuko buvamo agafaranga

Hategekimana avuga ko igihembwe cy’ihinga ry’ibireti, gishobora kurangira akuyemo ibihumbi biri hagati ya 800 na Miliyoni imwe y’Amafaranga y’u Rwanda. Kimwe na bagenzi be bagera ku 1201 bo mu Murenge wa Kabatwa, bishyize hamwe bashinga Koperative bagamije kugwiza imbaraga.

Kuri ubu bakaba bariguriye imodoka yo mu bwoko bwa fuso, ibunganira mu buhinzi bwabyo n’ubw’ibindi bihingwa, yaba mu kugemura umusaruro ku masoko yo hirya no hino mu gihugu, bakaba banifashisha iyo modoka mu kubagezaho ibikenerwa mu buhinzi bwabo bwa buri munsi nk’ifumbire, imbuto n’ibindi.

Mu Rwanda ubuhinzi bw’ibireti bukorwa mu buryo bw’ubuhinzi buri ‘organic’, ni ukuvuga bwifashisha ifumbire y’imborera yonyine, kandi bikaba bidaterwa imiti yica udukoko; ahanini bigaterwa n’uko imiterere yabyo ubwayo, biba byifitemo ubudahangarwa bubirinda kwangizwa n’udukoko utwo ari two twose kandi ubwo budahangarwa bwabyo bufasha mu kurinda ubutaka, ari nako birushaho kubufumbira bukisubiranya.

Ibi bigenda bifasha abahinzi, by’umwihariko bo muri iyi zone yegereye ibirunga, hafatwa nk’agace gakunda kweramo iki gihingwa kimwe n’ibirayi, aho basimburanya ibyo bihingwa byombi, umusaruro wabyo urushaho kwiyongera.

Hakizimana Fidele, umukozi ushinzwe igihingwa cy’ibireti n’ibihingwa bivamo amavuta y’imibavu mu Kigo cy’Igihugu gishinzwe guteza imbere ibyoherezwa mu mahanga bikomoka ku buhinzi (NAEB), ashishikariza abahinzi gukomeza kwitabira guhinga ibireti mu buryo bwa kijyambere, kuko bufasha.

Agira ati “Iyo tuvuga guhinga kijyambere, ni hahandi umuhinzi ahingira igihe, ku buso bupimwe neza, akoresha imbuto nziza kandi itanga umusaruro. Umuhinzi kandi aba akwiye gukoresha ifumbire y’imborera, yabisarura byeze, akanika umusaruro neza. Ibyo biri mu byongera umusaruro ukaba mwinshi, mwiza kandi ufite ubukana buri ku rwego rukenewe(qualite),ukifashishwa mu gutunganya ibiwukomokaho harimo n’umushongi, ahanini usanga byishimirwa ku masoko yo hirya no hino”.

Abahinzi b’ibireti bo mu Murenge wa Kabatwa babashije kwigurira imodoka, uyu ni umusaruro wabo iba igemuye

Kampani yitwa Sopyrwa isanzwe inafite uruganda rutunganya ibireti, bigakorwamo ibintu bitandukanye byiganjemo imiti yifashishwa mu kwica udukoko, ni yo ifasha abahinzi mu kubaba hafi ibaha ubujyanama mu by’ubuhinzi bwabyo no kubagezaho ibikenewe byose, mu gutuma umusaruro wiyongera, akaba ari nayo ibagurira umusaruro.

Toni zisaga 10 z’umuceri ni zo abahinga ibireti basaranganyijwe

Nyuma y’aho abahinzi b’ibireti bibumbiye muri iyo Koperative bagera ku 786, bashyikirijwe ubwasisi bw’ibiribwa bigizwe na Toni zisaga 10 z’umuceri, ku wa Gatatu tariki 27 Mata 2022, bishimiye uburyo ubuhinzi bwabyo bukomeje kugira uruhare rufatika mu iterambere ryabo, bakaba bafite intego yo kongera ubuso babihingaho, kugira ngo iryo terambere rirusheho kwihuta.

Kanzayire Denyse, ni umwe muri abo bahinzi, utuye mu Murenge wa Kabatwa, washyikirijwe ubwasisi bw’ibiribwa bigizwe n’umuceri, nyuma y’uko yitwaye neza mu guhinga ibireti.

Yagize ati “Uyu muceri tuwuhawe twari tuwukeneye cyane, kuko twari tumaze iminsi turi mu bihe by’inzara ikomeye, bitewe n’uko turi mu gihe cy’ihinga ry’ibirayi no kubibagara, ndetse no kubitera imiti. Bisa n’aho nta kintu na kimwe twari dusigaranye mu nzu kuko umusaruro twejeje ubushize twawumaze. Kuba duhawe uyu muceri, tugiye kumara igihe turya, bizatugirira akamaro biturinde inzara kuzageza mu gihe tuzaba twejeje undi musaruro”.

Abatuye muri ako gace, umuceri bawufata nk’ikiribwa cy’imbonekarimwe, bitewe n’uko batawuhinga, ibituma bawugura ubahenze nk’uko Nyiramacumu Daphrosa, abivuga.

Ati “Umuceri ntituwuhinga, yewe no kuwugura usanga uduhenze kuko muri butiki usanga ikiro kigura amafaranga ari hejuru ya 1200. Urumva rero abaturage nkatwe kucyigondera bidusaba kuba waronse ifaranga ritubutse. Kuba Koperative yacu yaratekereje iki gikorwa cyo kuduha umuceri ungana gutya, ni iby’agaciro kanini”.

Umwe mu bahinzi b’ibireti ashyikirizwa agafuka k’umuceri

Buri bantu babiri bagabanaga umufuka w’umuceri w’ibiro 25. Ngo ubu bwasisi bahawe, abanyamuryango ba KOAIKA bubateye akanyabugabo ko gushishikarira ubuhinzi bw’ibireti babyongera ku buso bunini no mu bwiza.

Hategekimana Innocent, umwe muri bo agira ati “Ubu bwasisi baduhaye butumye turushaho kugira imbaraga zo gushishikarira guhinga neza ibireti, twubahiriza uburyo bwose bwo kubyitaho nko kubibagararira, kubifumbira no kurinda kubyonesha. Ikindi tugiye gushyiramo ingufu ni ukongera ubuso twabihingagaho, kugira ngo umusaruro wabyo ukomeze kwiyongera yaba mu bwiza no mu bwinshi”.

Abahawe ubwasisi, ni ababashije kugemura umusaruro uri hejuru y’ibiro 50 muri sezo y’ihinga ry’ibireti ishize.

Perezida wa Koperative KOAIKA, avuga ko ikigamijwe ari no kugaragariza abahinzi, inyungu iri mu gushyira imbaraga muri ubwo buhinzi.

Yagize ati “Twari twihaye intego yo guhinga neza ibireti kugira ngo nibura tugeze kuri Toni 260 z’umusaruro muri iki gihembwe gitambutse. Igihe cy’isarura ubwo cyageraga, twabashije kubona Toni 393 z’ibireti byumye, bituma twesa umuhigo ku kigero cya 160%. Ni naho twahereye tugira iki gitekerezo, cyo guha abanyamuryango bacu ubwasisi, duhera ku bagemuye hejuru y’ibiro 50 by’umusaruro, mu rwego rwo kubagaragariza inyungu y’ubu buhinzi, kwibumbira hamwe, ariko tunabashishikariza kongera imbaraga mu bituma umusaruro urushaho kwiyongera”.

Eng. Karomba Desire, Umukozi w’uruganda rwa Sopyrwa ushinzwe guhuza ibikorwa birebana na gahunda zijyanye no kwita ku buhinzi bw’Ibireti mu Ntara y’Iburengerazuba, ahamya ko kugira ngo u Rwanda rukomeze kubona uko ruhaza isoko mpuzamahanga, abahinzi b’ibireti, basabwa kurushaho kwitabira kubihinga neza, kandi bakubahiriza uruhererekane rw’imirimo yose ireba umuhinzi wabyo, uhereye igihe cyo gutegura umurima kugeza bigejejwe ku ruganda.

Nyuma y’aho byari bimariye kugaragara ko igihingwa cy’ibireti kigenda gikendera, mu mwaka wa 2010, Leta yashyize imbaraga mu kuzahura iki gihingwa, binyuze mu kongerera ubushobozi amakoperative y’abahinzi bacyo, aho bagenda bafashwa kubona imbuto nziza no kuyitaho; ibyatumye umusaruro bagemurira uruganda rwa Sopyrwa ugenda urushaho kuzamuka, narwo rukaboneraho kugira ibyo rwohereza ku masoko yo hanze.

Kugeza ubu u Rwanda ruhiga ibindi bihugu byose byo ku isi mu kugira ubwiza bw’umusaruro w’ibireti, rukaba urwa abiri ku isi mu kohereza ku isoko mpuzamahanga umushongi mwinshi wabyo, nyuma y’igihugu cya Australia.

N’ubwo ibi ari ibyo kwishimira ariko, urugendo ngo ruracyari rurerure nk’uko Hakizimana Fidèle, umukozi ushinzwe igihingwa cy’ibireti n’ibihingwa bivamo amavuta y’imibavu mu Kigo NAEB abivuga.

Yagize ati “Turacyasabwa gukora cyane ngo twongere umusaruro kuko tutarabasha guhaza isoko nk’uko byifuzwa. Ni ngombwa ko inzego z’ibanze, Sopyrwa ndetse n’amakoperative ahinga ibireti ubwayo, barushaho gufatanya abahinzi bagakomeza kwihugura mu buryo igihingwa cy’ibireti cyitabwaho, bakabona imbuto nziza za kijyambere zongera umusaruro, kubihinga ku gihe nyacyo kandi hibandwa ku gukoresha ifumbire y’imborera. Kubisarurira ku gihe kandi bikanikwa neza, bityo n’umusaruro ukomeze kwiyongera kandi ufite ubukana buri ku gipimo gikenewe”.

Nyiramacumu Daphrosa ni umwe mu bishimiye guhabwa ubwasisi bukomoka ku musaruro w’ibireti

Muri Ha 717 z’ubuso buteganyijwe guhingwaho ibireti mu Murenge wa Kabatwa, hamaze guhingwa Ha zigera kuri 670, bingana na 93%. Abahinzi b’ibireti bo muri ako gace kegereye ibirunga, bemeza ko gusimburanya iki gihingwa n’ibindi bihingwa harimo n’ibirayi, bituma babasha kubona umusaruro utubutse.

Abarokotse Jenoside bashimishwa n’uko urwibutso rwa Mukamira rwavuguruwe

Urwibutso rwa Jenoside yakorewe Abatutsi rwa Mukamira, ruherereye mu Murenge wa Mukamira, rukaba ruruhukiyemo imibiri 2,206 y’Abatutsi biciwe mu bice binyuranye by’icyahoze ari Komini Nkuri.

Imirimo yo kuruvugurura, yibanze ku kubakira neza imva iruhukiyemo imibiri, hiyongereyeho stade ifite ubushobozi bwo kwakira abasaga 2000, bahibukira inzirakarengane z’Abatusti bazize Jenoside, ndetse rukaba rwarazitiwe runasigwa amarangi.

Abarokotse Jenoside yakorewe Abatutsi, barimo uwitwa Munyantwari Martin, agira ati “Uru rwibutso rutarasanwa, twagiraga impungenge z’uko imibiri y’abacu ihashyinguye ishobora kuzagera igihe ikangirika. Natwe ubwacu twazaga kwibuka, dufite imitima itari hamwe, bitewe n’uko hari hato, igihe cyo kwibuka imvura yagwa, ikatunyagira cyangwa tugakwirwa imishwaro tujya kugama, bikatubangamira”.

Ati “None ubungubu murareba ukuntu rwavuguruwe, rukubakwa neza, tukaba tuza kuhibukira abacu twisanzuye, twicaye ahabugenewe, ku buryo izuba cyangwa imvura nyinshi bitabangamira abantu bahagana. Muri make. Urebye ukuntu hatunganyijwe, biranejeje cyane”.

Ni Urwibutso ruruhukiyemo imibiri 2206 y’Abatutsi bazize Jenoside

Murekatete Diane yunga mu rya mugenzi we ati “Ni iby’agaciro gakomeye, kuba uru rwibutso rwa Jenoside yakorewe Abatutsi rwa Mukamira, rwavuguruwe rukagurirwa ku buso bwisanzuye, kandi mu buryo bugaragarira buri wese ko rujyanye n’igihe. Turashimira ubuyobozi imbaraga bwashyize mu kurwubakira neza, aho twe tuhagereranya n’urugo abacu baruhukiyemo. Ubu tugiye kujya noneho tuza kubunamira tubazaniye indabo tutikandagira, kuko bigaragara neza ko aho baruhukiye habahesha agaciro”.

Nyuma y’imyaka isaga 28 ishize Jenoside yakorewe Abatutsi ihagaritswe, abayirokotse bashima umuhate w’igihugu muri gahunda zinyuranye, zituma imibereho yabo irushaho kuba myiza.

Ngo kuba uru rwibutso rwaravuguruwe, ni igihamya cy’urugendo rufatika rwo kwiyubaka kw’abacitse ku icumu rya Jenoside yakorewe Abatutsi mu 1994, nk’uko Juru Anastase, Umuyobozi wa IBUKA mu Karere ka Nyabihu yabigarutseho.

Agira ati “Aha tuhafata nk’urugo rw’abacu bazize Jenoside, kuko niho baba. Iyo dukeneye kubasura niho tubasanga. Ubuyobozi bw’Akarere bwashyize umuhate mu kuhatunganya, hagakorwa neza, turabushimira ku bw’iki gikorwa giha abacu agaciro bambuwe ubwo bicwaga muri Jenoside”.

Stade igenewe kwakira nibura abagana uru rwibutso bagera mu 2000 icyarimwe

Ahera kuri ibi, ashima Umukuru w’Igihugu, Paul Kagame, ati “Ndashima Perezida wacu Paul Kagame ku bw’imiyoborere izira ivangura. Rya ringaniza mu mashuri ryari ryarimitswe n’ubutegetsi bubi bwo hambere ryavuyeho, ubu abana bose bariga, bakarangiza hatitawe ku moko”.

Ati “Nta muntu uza ngo apime mugenzi we uburebure bw’izuru, indangamuntu zicamo abantu ibice ntizikirangwa mu gihugu cyacu, nta muntu ugikubitirwa mu nzira, yewe na za nka zacu bariye n’amazu yacu yasenywe muri Jenoside, Umukuru w’igihugu cyacu yarabidushumbushije. Ubu turubaka igihugu tudafite ubwoba bw’uko Jenoside yakongera kubaho, kuko Ingabo za RPF Inkotanyi arangaje imbere, zayihagaritse, kandi zikaba zikitubereye maso”.

Mu mbwirwaruhame abayobozi banyuranye bagiye bageza ku baturage, muri iki gihe twibuka ku nshuro ya 28 Jenoside yakorewe Abatutsi, abaturage basabwe kwamagana icyo ari cyo cyose, cyangwa umuntu wese washaka gusubiza Abanyarwanda inyuma, mu rugendo rwo kwiyubaka no komorana ibikomere.

Guverineri w’Intara y’Iburengerazuba, Habitegeko François, asanga urubyiruko cyane cyane, rukwiye gufata iyambere, rukaba intangarugero.

Yagize ati “Muri uru rugendo twatangiye rwo kwiyubaka no komorana ibikomere, turacyahanganye n’abapfobya kandi bagahakana Jenoside yakorewe Abatutsi, ahanini bifashisha imbuga nkoranyambaga. Urubyiruko rukwiye kwirinda kuyobywa n’abo banzi b’amahoro, ahubwo rugafata iya mbere rukabarwanya, rukananyomoza ibyo binyoma bakwirakwiza, kugira ngo dukumire ingengabitekerezo ya Jenoside”.

Abagana uru rwibutso ntibakigorwa no kubona aho bahagarara cyangwa biwicara

Imirimo yo kuvugurura Urwibutso rwa Jenoside yakorewe Abatutsi rwa Mukamira, biteganyijwe ko izakorwa mu byiciro bibiri. Icyiciro cya mbere cyarangiye gishowemo miliyoni zisaga 45 z’Amafaranga y’u Rwanda, icyiciro cya kabiri cyo kikaba kigikorerwa inyigo, kikazasubukurwa mu ngengo y’imari y’umwaka wa 2023-2024.

Mu Karere ka Nyabihu, kamwe mu tugize icyahoze ari Komini Nkuri, habarurwa Abatutsi 7645 bishwe mu gihe cya Jenoside. Kugeza ubu imibiri igera ku 1216, niyo itaraboneka ngo ishyingurwe mu cyubahiro.

Aya mahugurwa y’umunsi umwe yahawe aba DASSO 61 barimo abayobozi babo ku rwego rw’Akarere ndetse no ku rwego rw’umurenge, n’abaturutse mu mirenge itandukanye igize kano Karere.

Abahuguwe basobanuriwe ibitera inkongi, amoko yazo n’ibizigize. Basobanuriwe uko bakumira inkongi, berekwa n’uko bakwirwanaho haramutse habaye inkongi ndetse banerekwa uko bakwitabara bazimya umuriro bakoresheje bimwe mu bikoresho birimo za kizimyamuriro n’uburingiti butose.

Umuyobozi w’ishami rya Polisi rishinzwe kurwanya inkongi n’ubutabazi, ACP Paul Gatambira, yavuze ko aya mahugurwa agamije guha ubumenyi abantu batandukanye ku gukumira inkongi no kuyirwanya mu gihe yaba ibaye.

Yagize ati “Abahugurwa basobanurirwa ibitera inkongi kugira ngo babyirinde kandi tukabereka uko bakwitabara mu gihe habaye ibaye. Ikindi tubereka ni uburyo ibikoresho bizimya umuriro bikoreshwa. Ku bakozi bashinzwe umutekano mu karere tubereka uko bakwitwara mu guhangana n’inkongi no kugabanya ingaruka yatera ku bakozi b’akarere ndetse n’abaturage baza gusaba serivisi hamwe n’inyubako."

Nyuma y’amahugurwa hasuwe hamwe mu hantu hashobora guteza inkongi mu nyubako y’akarere, nyuma abayobozi bagirwa inama y’ibyo bakwiye gukosora mu rwego rwo gukumira inkongi, nk’uko byatangajwe n’urubuga rwa Internet rwa Polisi y’u Rwanda.

Abaturage bakangurirwa guhamagara Polisi kuri telefoni: 111,112 cyangwa 0788311224 mu gihe habaye inkongi y’umuriro kugira ngo batabarwe byihuse.

Imibiri ine y’Abatutsi bazize Jenoside yashyinguwe mu cyubahiro

Ibi yabigarutseho ku wa Gatatu tariki 13 Mata 2022, mu Karere ka Nyabihu, mu muhango wo gusoza icyumweru cyo kwibuka ku nshuro ya 28 Jenoside yakorewe Abatutsi, umuhango wabereye ku rwibutso rwa Mukamira, ahanashyinguwe mu cyubahiro imibiri ine y’inzirakarengane z’Abatutsi bishwe muri Jenoside.

Muri iyi myaka 28 ishize Jenoside yakorewe Abatutsi ibaye, Murekatete Diane wayirokotse, yari ayimaranye intimba ituruka ku kuba atari yakabonye bamwe mu bagize umuryango we, ngo abashyingure mu cyubahiro.

Kuri ubu bisa n’aho iyo ntimba yatangiye gucogora, nyuma y’aho imibiri itatu ya babyara be, ibonetse aho yari yarajugunywe; bakaba ari bamwe mu bashyinguwe mu Rwibutso rwa Mukamira.

Yagize ati “Imyaka 28 yari ishize tugishakisha imibiri yabo, twarayibuze. Mu gihe aho yari yarajugunywe ba nyiri amasambu bo bayihingiragaho, bakayirohaho itaka, twe tugahorana imitima ihagaze, twibaza irengero ryabo byaratuyobeye. Nyuma yo kubabone ubu bakaba banashyinguwe mu cyubahiro hamwe n’abandi, umutima wanjye ndumva wururutse, ndishimye cyane, kuko ubu noneho baruhutse imvura yahoraga ibanyagirira mu bisambu. Ubu igisigaye ni ukujya tuza kubibuka, tubazaniye indabo tuzi neza ko baruhukiye mu mahoro”.

Abarokotse Jenoside yakorewe Abatutsi bo mu Karere ka Nyabihu, bagaragaza ko bagishengurwa no kuba hari abagitsimbaraye ku kudatanga amakuru y’ahajugunywe imibiri y’Abatutsi bazize Jenoside; n’aho iyo mibiri igenda iboneka, hakaba abayitirira ukundi kuntu, gutandukanye no kuba ari iy’Abatutsi bishwe muri Jenoside.

Ibi abarokotse Jenoside, babifata nko kuyobya uburari ku babikora, no kuba baba bagamije gusibanganya ibimenyetso. Ibi bakabifata nk’ibyabangamira inzira y’ubumwe n’ubwiyunge.

Juru Anastase, Perezida wa IBUKA mu Karere ka Nyabihu agira ati “Tumaze iminsi tugira imbogamizi zo kuba hari abantu bagira ubushake bwo kuduha amakuru y’ahajugunywe imibiri y’abacu bishwe muri Jenoside, tukayishakisha, yamara kuboneka, bamwe bakayitirira ukundi kuntu. Aho usanga hari n’abatinya kuyitirira iy’abo mu gihe cy’abacengezi. Ibi tubibona nk’ibishobora kudusubiza inyuma mu ntambwe twari twaratangiye y’ubumwe n’ubwiyunge”.

Juru atanga ingero z’imibiri 19 yabonetse mu Murenge wa Karago, ariko ikaba imaze hafi imyaka ibiri itarashyingurwa mu cyubahiro, kubera izo mbogamizi.

Minisitiri Mujawamariya yabwiye abaturage ko komora ibikomere nyako ku barokotse Jenoside binajyana no kubaha amakuru y’ahajugunywe imibiri y’ababo

Innocent Tuyizere, na we warokotse Jenoside ati “Hari abacu bazimiye burundu, bitewe n’uko babaga bishwe bakaribwa n’imbwa zo mu mashyamba harimo n’irya Gishwati; ariko hakaba n’abo tutazi iyo abicanyi bagiye babajugunya. Nyamara bamwe mu babigizemo uruhare, barimo abo twari duturanye dusangira akabisi n’agahiye, babireberaga bikorwa, abandi banabyijandikamo, ariko kugeza uyu munsi bakaba bakomeje kutwima amakuru y’aho abacu bari ngo tubashyingure mu cyubahiro”.

Ati “Abo nk’uko twateye intambwe yo kubababarira, na bo tubasaba tubinginze ko batwereka aho abacu bari, tubavaneyo, tubazane bashyingurwe mu cyubahiro”.

Ubuhamya bwatangiwe muri uwo muhango bwagarutse ku buzima bushaririye Abatutsi babayemo mbere ya Jenoside no mu gihe yakorwaga, ariko kandi by’umwihariko, bashima Ingabo za RPF Inkotanyi zunamuye icumu, zikagahagarika Jenoside, ubu Abanyarwanda bakaba babayeho batekanye.

Murekatete Diane ufite abe bashyinguwe muri uru rwibutso ashima Inkotanyi zabarokoye

Murekatete ati “Ingabo za RPF Inkotanyi zunamuye icumu ryari ritumereye nabi, zihagarika Jenoside yakorewe Abatutsi, none ubu turatekanye. Ese ubu iyo zitabaho, ngo zongere kubaka amashuri abana bari kwiga gute koko? Iyo zitabaho ngo ziduhe amacumbi, abari batwikiwe amazu abandi basenyewe, ubu baba batuye hehe?”

Ati “Ko zatugabiye inka zidukamirwa mu gihe izacu zari zarasahuwe, izindi barazitemaguye, ubu tuba tunywa amata dukuye hehe? Ya majoro twararaga mu bigunda, imvura itunyagira, benshi muri twe twaratemaguwe, tutagira udutabara, iyo zitahaba twari kuba aba nde? Turazishimira ukuntu zitangiye ubuzima bwacu n’igihugu, zigaharanira ko Abarokotse Jenoside bongera kugarura icyizere cy’ubuzima”.

Minisitiri w’Ibidukikije, Dr Mujawamariya Jeanne d’Arc, akaba n’imboni y’Akarere ka Nyabihu muri Guverinoma, yagaye abagitsimbaraye ku kudatanga amakuru y’ahajugunywe imibiri y’Abatutsi bazize Jenoside.

Yagize ati “Ntabwo ari ibintu byoroshye kwiyubaka, mu gihe hari abagifite ababo bakinyagirirwa hirya no hino, aho bamwe banyagirwa n’imvura abandi banatembanwa n’amasuri. Twibutsa buri Munyarwanda wese, ko kubaka uwacitse ku icumu rya Jenoside, bitagarukira gusa mu kumuha inzu, ifunguro, kumurihira ishuri cyangwa kumuha amafaranga; ahubwo binajyana no kumumenyesha aho abe bajugunywe, kugira ngo bashyingurwe mu cyubahiro. Ababyirengagiza nkana, ni abo kugawa. Tubasaba ko bishyira mu mwanya w’abarokotse Jenoside. Nibatange amakuru yafasha kumenya ahakiri imibiri itarashyingurwa mu cyubahiro”.

Imibiri ine yashyinguwe mu cyubahiro mu rwibutso rwa Mukamira, yiyongera ku yindi mibiri 2202 y’Abatutsi bazize Jenoside, isanzwe iruhukiye muri uru rwibutso.

Ni mu gihe muri ako Karere kari mu tugize icyahoze ari Komini Nkuri, habarurwa Abatutsi 7,645 bishwe mu gihe cya Jenoside. Kugeza ubu imibiri igera ku 1216, ikaba ariyo itaraboneka ngo ishyingurwe mu cyubahiro.

Juru Anastase, Perezida wa IBUKA mu Karere ka Nyabihu

Ntirujyinama yari yahagaritse akazi k’ubwarimu yakoreraga ku ishuri rya Nganzo ku itariki ya 1 Ukuboza 2021, kubera ko yari atarafata icyemezo cyo kwikingiza icyorezo cya Covid-19.

Ntirujyinama yongeye kwandikira Umuyobozi w’Akarere ka Nyabihu amusaba gusubizwa mu kazi ubwo yari amaze gufata urukingo tariki ya 30 Ukuboza 2021, nk’uko bigaragazwa n’icyangombwa gitangwa n’ikigo cy’igihugu gishinzwe ubuzima RBC.

Umuyobozi w’Akarere ka Nyabihu, Mukandayisenga Antoinette, avuga ko Ntirujyinama azasubizwa mu kazi kuko yanditse agahagarika, ariko ubwo akarere kari kataramusubiza yongera kwandika asaba gusubizwa mu kazi.

Agira ati “Birajyana n’uko yari yatinze kwikingiza, nk’abayobozi b’abaturage harimo no kubegera no kubagira inama, atubwira ko akurikije uko abyumva azadusubiza, dutegereje ko atubwira ko akomeje umurongo we, atubwira ko yikingije twumva ni byiza. Ikiri icyiza kurushaho ni uko yaganirijwe nyuma agahita yikingiza ahita asaba kuriya, kubera tutari twakamusubije, ubusabe bwe twarabwumvishe, nyuma yaho abandi barikingije.”

Abanyarwanda bakomeje gushishikarizwa kwikingiza, abamaze gufata dose ya mbere bamaze kuba 7,733,886, na ho abamaze gufata dose ya kabiri ni 5,555,134, mu gihe abamaze gufata dose yo gushimangira bamaze kuba ibihumbi 237, 448.

Minisiteri y’Ubuzima igaragaza ko Abanyarwanda bamaze guhitanwa na Covid-19 ari 1,362 na ho ijanisha ry’abandura mu minsi irindwi rigeze kuri 6.2%.

Ibi byabereye mu Mudugudu wa Nyamitanzi, Akagari ka Nyamitanzi, Umurenge wa Jomba mu Karere ka Nyabihu, nyuma y’aho abagabo babiri bikekwa ko ari benewabo wa Ntezimana, bari bamaze gutahurwa na DASSO, basarura ishyamba mu buryo butemewe.

Ubwo bari bajyanywe kuri Polisi, Ntezimana yagerageje guha umu DASSO witwa Ruzindana Jean Pierre, ruswa y’amafaranga 5,000 ngo babarekure, uwo mu DASSO ni ko guhita abimenyesha Polisi imufatira mu cyuho agerageza kuyamuha.

Umunyamabanga Nshingwabikorwa w’Umurenge wa Jomba, Kabariza Salomon yemeje ayo makuru, anagira inama abaturage yo kwirinda ruswa kuko ihanwa n’amategeko.

Ntezimana ukekwaho icyaha cya ruswa, yahise afatwa, ashyikirizwa Urwego rw’ubugenzacyaha (RIB), station ya Jomba, nk’uko byemejwe na Kabarisa.

Ambasaderi w’u Buyapani mu Rwanda Masahiro Imai (hagati) ashyikiriza Akarere ka Nyabihu umuyoboro w’amazi meza

Uwo muyoboro w’amazi ureshya na Km 4,370 wubatswe mu Kagari ka Rega, ku nkunga ya Ambasade y’Igihugu cy’u Buyapani mu Rwanda, aho witezweho gufasha by’umwihariko abatuye mu Midugudu ya Kinamba, Nyagafumberi na Kabaya.

Niwemugeni Oliva ni umwe mu batuye muri ako gace, wemeza ko bagorwaga no kubona amazi meza, bigatuma bavoma ay’ibirohwa yabateraga guhora barwaye cyangwa barwaje indwara ziterwa n’umwanda.

Yagize ati “Twavomaga amazi y’umugezi munini utemba wa Mizingo, hakaba igihe tuyadashye, tugasanga yivanze n’imisundwe, ibyatsi n’indi myanda itandukanye ituruka mu ngo z’abaturage cyangwa ku matungo. Twayanywaga yanduye, tukayatekesha ari na ko tuyifashisha mu yindi mirimo yose yo mu rugo, kubera kubura uko tugira”.

Ati “Byaduteraga guhora ku gasambi turwaye cyangwa turwaje indwara z’inzoka, ntitubone uko dukora, abana bakabura uko biga kubera kuzahazwa na za amibe n’izindi ndwara. None kuba tubonye aya mazi meza kandi atwegereye hafi yacu, bigiye kuturuhura ako kaga kari katwugarije”.

Umuyoboro w’amazi abaturage bashyikirijwe ugiye kubarinda ingendo ndende bakoraga bajya kuvoma ibirohwa

Undi muturage witwa Niyigena Marie, avuga ko batazongera guhendwa n’amazi meza babonaga nabwo bibasabye gukora ingendo ndende.

Yagize ati “Twajyaga kuvoma ku masoko ya kure mu misozi, tugakora urugendo rw’amasaha asaga abiri n’amaguru. N’uwaterezaga igare ngo rimuvomere, ijerekani imwe yamutwaraga amafaranga ari hagati y’150 na 200. Ubu aya mazi meza duhawe aratwegereye cyane. Bamwe amavomo yubatswe no mu mbuga zabo, abandi barakora akagendo katarenga iminota itatu kandi bakishyura amafaranga atarenga 10 ku ijerekani imwe. Iki ni igitego cy’umwaka wa 2021 twishimiye ko dutsinze, tubifashijwemo n’Umukuru w’Igihugu cyacu Paul Kagame, udahwema kubanira neza ibindi bihugu, no gufatanya nabyo kutugezaho ibikorwa remezo bidufitiye akamaro nk’ibingibi”.

Mu gikorwa cyo gushyikiriza ku mugaragaro abaturage uyu muyoboro w’amazi, cyabaye kuwa kabiri tariki 7 Ukuboza 2021, Ambasaderi w’u Buyapani mu Rwanda, Masahiro Imai, yashimangiye ko igihugu cye, gishyigikiye kandi kikagira ubushake mu bufatanye n’u Rwanda mu kongera imishinga iteza imbere abaturage.

Yagize ati “U Rwanda ni kimwe mu bihugu byo ku mugabane wa Afurika, bifitanye imikoranire ya hafi n’u Buyapani, kandi kigaragaza ubushake bufatika mu gushyikira imishinga iteza imbere abaturage, no kuyishyira mu bikorwa. Tubibonamo urugero rwiza ibindi bihugu byakwigiraho.

Ambasade y’u Buyapani mu Rwanda yanatanze za kandagirukarabe mu rwego rwo kunganira abaturage kunoza isuku

Hari imishinga myinshi dukomeje gukorana na Guverinoma y’u Rwanda ndetse n’imiryango itegamiye kuri Leta ihabarizwa, kugira ngo duhaze ibyifuzo by’ibanze by’abaturage.

Ati “Ikigambiriwe ni uko ubucuruzi burushaho gutezwa imbere ndetse n’umubare munini w’abaturage bakahabonera uburyo bwo guhanga akazi. Turanateganya ko mu gihe kiri imbere, hazagenda havuka n’indi myinshi. Kimwe n’uyunguyu wo gushyikiriza abaturage aya mazi meza, na wo tuwufata nk’ingirakamaro cyane ku mibereho y’abazawubyaza umusaruro”.

Umuyobozi w’Akarere ka Nyabihu wungirije ushinzwe Iterambere ry’Ubukungu, Habanabakize Jean Claude, yasabye abaturage kubyaza umusaruro amazi bahawe no kuyabungabunga kugira ngo azarambe.

Yagize ati “Ubuzima butagira amazi meza busa n’aho buba budahari. Uyu munsi rero kuba abaturage bayabonye, ni igisobanuro cy’uko babonye ubuzima bwisumbuye ku bwo bari bafite. Akaba ariyo mpamvu ari ingenzi kuyabyaza umusaruro bayakoresha neza, kandi kuyarinda kwangirika, bakaba ari byo bashyira imbere, by’umwihariko babungabunga ibikorwa remezo, kugira ngo bitangirika, bikomeze koko bikoreshwe icyo byagenewe, mu hazaza tuzagende tubona intambwe nziza abaturage bateye babikesha aya mazi meza bahawe”.

Akarere ka Nyabihu kuri ubu kari ku kigero cya 63% mu kwegereza abaturage amazi meza. Habanabakize avuga ko n’ubwo umubare w’abafite amazi meza ukiri hasi, ngo mu mishinga Akarere gateganya gushyira mu bikorwa buri mwaka, imishinga yo kwegereza abaturage amazi mezi na yo idasigara inyuma; bityo ko mu myaka iri imbere abatuye aka Karere bazaba bihagije ku kugira amazi meza.

Kwita ku burenganzira bw’abafite ubumuga bibaha urubuga rwo gutegura ahazaza habo neza (Ifoto yo mu bubiko)

Ubushakashatsi uyu muryango wakoreye mu Karere ka Nyabihu bwagaragaje ko hari abantu bakifitemo imyumvire ya kera, ishyira abafite ubumuga mu rwego rw’abadashoboye nk’uko Adrien Habiyaremye, Umukangurambaga mu muryango Chance for Childhood abivuga.

Yagize ati: “Usanga abantu bamwe bataracika ku muco wo kwita abantu bafite ubumuga amazina abatesha agaciro, aho bamwe bakibita ibiragi, impumyi, ibicumba, ba kanyonjo n’andi mazina mabi ubona ko abantu bagikomeyeho. Izi nyito zisesereza, zigira n’uruhare mu kwangiza imitekerereze y’abafite ubumuga. Bigatuma bahora biyumva nk’abari inyuma y’abandi, no gukura batagifite icyizere cy’icyo bazamarira abandi cyangwa ngo bo ubwabo bacyimarire; bityo n’ahazaza habo ntihabe hafite umurongo uhamye”.

N’ubwo mu Rwanda hari ibimaze gukorwa mu kubahiriza uburenganzira bw’abantu bafite ubumuga, mu kubashyiriraho gahunda zituma biyumvamo ikaze mu muryango nyarwanda no kwigirira icyizere, Habiyaremye Adrien, asanga urugendo mu kwigisha no gufasha abantu guhindura imyumvire, ituma bacika ku nyito, akato cyangwa ihezwa bikorerwa abantu bafite ubumuga, rukiri rurerure.

Yagize ati: “Kubaka umuryango udaheza abantu bafite ubumuga, tubifata nk’umusingi ukomeye, abafite ubumuga bakubakiraho bakabaho batekanye. Turifuza ko ibyiciro byose, bisobanukirwa ku rwego rumwe n’icyo buri wese asabwa mu guha abafite ubumuga uburenganzira mu buryo bungana n’ubw’abandi bantu badafite ubumuga. Ibyo kubigeraho nta kindi bisaba, ni ukubiganiraho no kwigisha kenshi n’inzego n’ibyiciro byose, mu rwego rwo kuzamura urwego rw’ubumenyi n’imyumvire ituma ibibangamiye abafite ubumuga, biranduka burundu; bityo na bo babonereho kwiyumva mu muryango batekanye”.

Inzobere mu birebana no kwita ku mibereho y’abana bafite ubumuga, zigaragaza ko, bakeneye urukundo, kwitabwaho babonerwa ibikenewe byose nko kugaburirwa, kwambikwa, kujijuka, gukina n’ibindi bituma biyumvamo ubuzima bwiza; bakabifashwamo n’ababyeyi babo cyangwa abandi bantu babana.

Bamwe mu baturage bo mu Murenge wa Mukamira mu Karere ka Nyabihu, basanga abagifite imyitwarire yo gutandukira ibi, bakwiye kubicikaho.

Nuwamungu Josephine yagize ati: “Kuba warabyaye umwana ntumufate kimwe n’abandi, umuziza ko afite ubumuga ni ibintu tunenga kandi tutifuza ko biranga umubyeyi w’iki gihe urerera u Rwanda. Hari ababyeyi, bakigaragaraho imyitwarire idaha agaciro abana bafite ubumuga, aho bamwe banitwaza kujya mu mirimo, bagasiga babazirikiye mu ngo, abandi bakabavutsa amahirwe yo kwiga no kugera aho abandi bari. Twumva bene nk’abo bakwiye kwisubiraho, bakumva ko abana bose bahawe amahirwe angana, bose bakura kimwe”.

Umunyamabanga Nshingwabikorwa w’Umurenge wa Mukamira Ndandu Marcel, avuga ko bakomeje kwifashisha gahunda zitandukanye, zihuza abantu benshi harimo n’Inteko z’abaturage, mu kubigisha akamaro ko kwita ku burenganzira bw’abana bafite ubumuga. Ikindi ni no kwifashisha ingero zifatika z’ibyo abafite ubumuga bakora, bifite uruhare rungana n’urw’abandi mu iterambere.

Yagize ati:“Umwana wese ufite ubumuga, afite ubushobozi bungana n’ubw’abandi bana badafite ubumuga. Ngendeye nko ku rugero rw’abo dufite muri uyu Murenge, bafite ubumuga bwo kutumva no kutavuga, babashije kugana ishuri, bakaba bari ku rwego rwo gukoresha ururimi rw’amarenga, mu kumvikanisha ubutumwa bwabo mu bandi no kugaragaza izindi mpano bifitemo, ibigaragaza ko na bo bashoboye”.

Yongera ati: “Usibye n’ibi, iyo ugiye kureba muri buri cyiciro cy’abafite ubumuga, bigaragara ko ari abantu bashoboye kandi bakora ibintu mu buryo buboneye kimwe n’abandi. Akaba ariyo mpamvu dushishikariza abaturage kudaheza abana bafite ubumuga cyangwa ngo babavutse uburenganzira bwabo”.

Mu rwego rwo kurushaho gufasha ibyiciro by’abaturage, kurushaho kwiyumva no kwita ku bana bafite ubumuga, mu gihe cy’imyaka itanu iri imbere umushinga wo kwita ku mibereho y’abana bafite ubumuga bo mu Mirenge igize Akarere ka Nyabihu uzamara ushyirwa mu bikorwa, Umuryango Chance for Childhood, uteganya guhuriza hamwe mu matsinda ababyeyi b’abana bafite ubumuga no kubongerera ubushobozi mu buryo bwo kubitaho. Ibyiciro bitandukanye birimo abarezi, abakora mu nzego zishinzwe ubuzima, inzego z’ubutabera, n’inzego z’ibanze, na byo bizongerera ubumenyi, binyuze mu bukangurambaga n’amahugurwa abongera ubumenyi muri serivisi zidaheza abantu bafite ubumuga.

Mu Karere ka Nyabihu, habarirwa abantu bafite ubumuga bakabakaba ibihumbi bitatu.

Umunyamabanga wa Leta muri MYICT, Yves Iradukunda, ashyikiriza smartphone umuturage

Icyo gikorwa cyasubukuriwe mu turere turindwi ari two Gicumbi, Bugesera, Gatsibo, Nyabihu, Ngororero, Gisagara na Huye, ahatangwa smartphones 4,144.

Umunyamabanga wa Leta muri MYICT, Yves Iradukunda, yatangarije Kigali Today ko kuva tariki 2019 gahunda ya Connect Rwanda yatangira hamaze gutangwa telefone 7000, na ho kugera tariki 3 Ukuboza 2021 hazatangwa izindi ibihumbi 16 byuzuza ibihumbi 23.

Mu Karere ka Nyabihu ahatanzwe telefone 469, abaturage batangaje ko bari bazikeneye kugira ngo bagere ku ikoranabuhanga mu miryango, mu gutanga amakuru no kuyashaka byihuse.

Guverineri w’Intara y’Iburengerazuba, Habitegeko François, avuga ko smartphone ikoreshwa mu kwihutisha amakuru no kwaka serivisi mu buryo bwihuse haba serivisi z’ irangamimerere, serivisi za banki n’iz’ubuzima na Ejoheza bidasabye umuntu gukora ingendo, avuga ko iyo telefone itagomba kuba iy’uwayihawe gusa, ahubwo iba iy’umuryango.

Agira ati "Smartphone igenewe umuryango, igafasha umwana kwiga, umubyeyi gusaba serivisi, gushaka amakuru no kuyatanga, bigatuma umuryango wihuta mu iterambere."

Guverineri Habitegeko François ashyikiriza umuturage smartphone

Habitegeko avuga ko gukoresha smartphone mu ikoranabuhanga aribyo abaturage bitezweho, ariko bagomba kwirinda n’ibikorwa bibi bizikorerwaho nko gupfobya Jenoside yakorewe Abatutsi, gukwirakwiza ibihuha n’ibindi byaha bihanwa n’amategeko.

Iradukunda avuga ko bifuza ko ukwezi k’Ukuboza 2021 kuzatangira nibura umuturage umwe mu Mudugudu afite smartphone.

Mu Rwanda abaturage babarirwa muri miliyoni ebyiri barakennye ntibashobora kwigurira smartphone, Leta y’u Rwanda ikaba irimo kuganira n’abafatanyabikorwa uburyo abantu bajya bafata izo telefone bakagenda bishyura buhoro buhoro.

Kuva 2019 hari abantu bemeye gutanga smartphone ariko bakaba batarazishyikiriza Minisiteri y’Ikoranabuhanga, aho izemewe zari ibihumbi 44 nyamara izimaze gutangwa zibarirwa mu bihumbi 23.

Umuturage wahabwaga telefone agomba kuzuza no gusinya impampuro zabugenewe

Iradukunda akaba ashishikariza Abanyarwanda n’ibigo gukomeza gutanga smartphone zihabwa abaturage, ariko yibutsa abatanze isezerano ryo kuzitanga kuryubahiriza.

Uyu muyobozi avuga ko akamaro ka smartphones kagaragaye mu gihe cya Covid-19, kuko zafashije abana gukurikirana amasomo hamwe no gufasha abaturage kumenya amakuru.

Ishuri Rwanda Coding Academy, riherereye mu Karere ka Nyabihu, rifite umwihariko mu kwigisha abana b’abanyeshuri, ibijyanye no gukora porogaramu za mudasobwa (softwares).

Mudasobwa 30 hamwe n’ibikoresho bigendana na zo ni byo byashyikirijwe ishuri Rwanda Coding Academy

Iryo shuri ryahawe ibyo bikoresho by’ikoranabuhanga muri gahunda y’ubufatanye bwatangijwe ku wa Gatanu tariki 5 Ugushyingo 2021, hagati y’uruganda Samsung na Guverinoma y’u Rwanda, binyuze muri Minisiteri y’Ikoranabuhanga na Minisiteri y’Uburezi.

Umuyobozi ushinzwe ibikorwa by’ubucuruzi no guhanga udushya mu kigo Samsung, ku rwego rwa Afurika y’Iburasirazuba, yagize ati: “Twishimiye ubufatanye bwatangiye hagati ya Samsung n’Ishuri Rwanda Coding Academy, kuko buri ku rwego rufasha abanyeshuri, binyuze muri uyu mushinga wo guteza imbere ikoranabuhanga rishingiye ku guhanga udushya. Iyi ni intangiriro, dutezeho gufasha aba bana kurushaho kuba abanyamwuga mu by’ikoranabuhanga, bashishikajwe no guhanga udushya”.

Yongera ati: “Ni ibikoresho bigizwe n’icyumba cy’ikoranabuhanga kirimo mudasobwa 30 zo ku rwego ruhanitse n’ibindi bikoresho by’ikoranabuhanga bijyana na zo, abana b’abanyeshuri bazajya bigiraho, bikaba binakoranywe ikoranabuhanga rya interineti; twitezeho korohereza abana kuzamura ireme ry’imyigire n’ubumenyi bushingiye ku guhanga udushya, muri za porogaramu nshya, yaba izo batangiye n’izo bagikoraho ubushakashatsi”.

Abanyeshuri biga muri iri shuri, barimo uwitwa Ishimwe Gervais, wishimiye ibikoresho by’ikoranabuhanga bungutse, akaba abyitezeho kumufasha mu myigire ye.

Abana biga muri iri shuri bavuga ko mudasobwa bashyikirijwe zizabunganira mu masomo ajyanye no guhanga porogaramu

Yagize ati: “Twakoreshaga imashini zisanzwe za laptop, ariko zifite ingufu nkeya, zimwe zigapfa buri kanya, izindi zikagenda gahoro kubera ibintu byinshi zabaga zidafitiye ubushobozi buhagije bwo kubika. Izi mudasobwa zindi z’inyongera, hamwe n’ibindi bikoresho by’ikoranabuhanga duhawe, bizatworohereza gukoresha igihe cyacu neza, tunoze imyigire yacu, bitume n’urwego rw’imishinga turi gukoraho ubushakashatsi kuri za porogaramu nshya rwiyongera ku kigero gishimishije”.

Kobusinge Sharon na we wiga mu mwaka wa wa gatandatu muri Rwanda Coding Academy, ahamya ko urwego we na bagenzi be b’abanyeshuri bariho rw’imyigire ibaganisha ku kuzarangiza amasomo bahanga udushya, ruzarushaho kwaguka, babikesha ibikoresho by’ikoranabuhanga bijyanye n’igihe, bibunganira mu myigire yabo; ku buryo badashidikanya ko bazabyubakiraho bakabasha gusohoza inzozi bafite zo kuzaba abavumbuzi b’udushya.

Dr Papias Niyigena, uyobora Ishuri Rwanda Coding Academy, ahamya ko iri shuri ryari rikeneye kubakirwa ubushobozi mu bikoresho nk’ibi, kugira ngo biryunganire kugera ikirenge mu byo ibindi bigo mpuzamahanga byabashije kugeraho, bibikesha gukoresha ikoranabuhanga.

Abiga muri iri shuri bavuga ko ibikoresho bahawe bazabyubakiraho bakabasha guhanga udushya

Yagize ati: “Turi mu isi y’iterambere, ryibanda ku kureba ibisubizo by’ahazaza, atari ukwibanda gusa ku hahise cyangwa ibiriho ubungubu gusa. Natanga nk’ingero z’imishinga imwe n’imwe ikomeye aba bana batangiye gukoraho ubushakashatsi ndetse no gukorera igerageza. Harimo nk’irebana n’ikoranabuhanga rikoreshwa mu mitangire y’akazi ku barimu, kubashyira mu myanya n’ibindi birebana n’imicungire yabo”.

“Hari n’undi mushinga aba bana b’abanyeshuri bari gukoraho, w’igare rigenewe abafite ubumuga, rikozwe mu buryo bw’ikoranabuhanga rituma nyirayo aritegeka kumujyana mu cyerekezo runaka yifuza kujyamo, haba imbere, inyuma cyangwa ku ruhande, bitamusabye kurikoraho cyangwa kurisunika nk’uko bisanzwe bigenda ku yandi magare asanzwe bakoresha.

Ati: “Niba aba banyeshuri bageze ku rwego nk’uru rwo kuba bavumbura imishinga isubiza ibibazo runaka; bakeneye n’ibikoresho by’ikoranabuhanga bigezweho bakwifashisha mu kuyinonosora, cyangwa no kuvumbura n’indi mishinga, iri ku rwego ruri hejuru y’urwo bariho ubu; kugira ngo binadufashe muri ya ntego yo guhanga udushya twinshi, dushingiye kuri porogaramu bakora”.

Umuyobozi mukuru w’Ikigo gishinzwe amasomo y’Ubumenyingiro, Rwanda TVET Board, Paul Umukunzi, ashimangira ko mu byo aba bana b’abanyeshuri bazungukira muri ubu bufatanye hagati ya Samsung na Guverinoma y’u Rwanda, harimo no guhanahana amakuru mashya yerekeye ikoranabuhanga ku ruhando mpuzamahanga mu buryo bwimbitse, ku buryo abazajya barangiza amasomo, bazajya baba bafite ubushobozi buhagije, bwo kwitwara neza mu byo isoko ry’umurimo rikeneye, haba mu Rwanda no hanze yarwo.

Umuyobozi mukuru w’Ikigo gishinzwe amasomo y’Ubumenyingiro, Rwanda TVET Board, Paul Umukunzi, ashimangira ko hari byinshi aba banyeshuri bazungukira muri ubu bufatanye

Yagize ati: “Kuba aba banyeshuri bahawe bino bikoresho, biri ku rwego rw’ikoranabuhanga ryo hejuru(High tech), ni intambwe nziza bateye, izabarinda kirogoya mu myigire n’ubushakashatsi bakora. Mu mikoranire izakomeza kubaho hagati ya Samsung na Leta ibinyujije muri Rwanda Coding Academy, ni ukurushaho kungurana ibitekerezo, duhanahana amakuru y’uko barushaho kubikoresha neza, bakabibyaza umusaruro uhagije, hagamijwe kuzamurira aba bana ubumenyi, kugeza no ku ruhando mpuzamahanga”.

Yongeyeho ko iyi gahunda ari ingenzi mu gushyigikira ingamba Leta yihaye, zo kurushaho guteza imbere uburezi mu cyerekezo 2024, cyitezweho kwimakaza ikoranabuhanga mu myigire n’imyigishirize y’amasomo y’ubumenyingiro, mu rwego rwo kongerera ireme ry’ubumenyi ku bayarangiza, bakajya ku isoko ry’umurimo biteguye kurigirira akamaro.

Bishimiye gusubira ku ishuri

Bibaye nyuma y’icyumweru kimwe, ubwo uwo muryango wakurwaga muri shitingi wari ucumbitsemo, aho wari warirukanywe kenshi mu mazu y’ubukode kubera kubura ubwishyu, ubu bakaba barimo kubakirwa n’urubyiruko rw’abakorerabushake ku bufatanye n’inzego za Leta, aho Akarere ka Nyabihu katanze inkunga y’isakaro.

Ubwo uwo mubyeyi yagarigaga na Kigali Today tariki 21 Ukwakira 2021, mu muganda wo gutangiza gahunda yo kumwubakira, mu byishimo byinshi yagaragaje ko yishimiye kuba agiye kubona inzu ye nyuma yo kwirukanwa mu bukode, akamara icyumweru abana n’abana be muri shitingi.

Ni nyuma y’uko yigeze gusohorwa mu nzu amara icyumweru arara ku ibaraza ry’umuturanyi, abana be baratoroka bamwe bajya mu Mujyi wa Kigali abandi bajya mu mujyi wa Musanze, biba ngombwa ko Leta ijya kubashaka irabagarura.

Bahawe ibikoresho byose n’imyambaro y’ishuri

Ibyo byishimo by’uwo mubyeyi, byakurikiwe n’agahinda ubwo Kigali Today yamubazaga ku mibereho y’abana be, mu gusubiza agira ati “Ubu bose bavuye mu ishuri, ntiwaba urara muri shitingi ngo ubone icyo kubarihira, nta n’ibikoresho bagira, nta bushobozi nanjye mfite murabibona, none murumva bakwiga bate?”

Nsabimana Cyprien, Umunyamabanga Nshingwabikorwa w’Akarere ka Nyabihu wari waje mu muganda wo gutangiza igikorwa cyo kubakira uwo muryango, akimara kumva agahinda k’uwo mukecuru uvuga ko abana be batiga kubera kubura ubushobozi, yahise asaba Umunyamabanga Nshingwabikorwa w’akagari, kumukorera urutonde rw’ibyo abo bana bakeneye ngo bajye ku ishuri, yemerera uwo mubyeyi ko agiye kubagurira byose bagasubira kwiga bidatinze.

Imvugo y’umuyobozi yamaze gushyirwa mu ngiro, aho abana bagaragaye mu myambaro y’ishuri mishya bahetse ibikapu ndetse bakaba barahawe n’amafaranga y’ishuri, aho ubu bamaze kugera ku ishuri kandi bishimye.

Yishimiye ko abana be basubiye ku ishuri akaba arimo no kubakirwa inzu

Ntizihabose (Nyina w’abo bana) arashimira uwo muyobozi, ku bufasha yageneye uwo muryango abana bakaba bamaze gusubira mu ishuri, avuga ko urwo rukundo uwo muyobozi yabagaragarije ruva ku miyoborere myiza irangajwe imbere na Nyakubahwa Perezida wa Repubulika.

Yagize ati “Uyu muyobozi udufashije abana bakaba basubiye ku ishuri ntacyo namunganya, Imana izabimuhembere. Ngashimira n’imiyoborere myiza ya Perezida wacu Paul Kagame, ntaho nari mfite ho kuba none ndimo kubakirwa, abana bari barabuze uko bajya ku ishuri, none bagiyeyo kandi basa neza, ndishimye cyane”.

Urubyiruko rw’abakorerabushake rukomeje kubakira uwo muryango

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko ubwo Nkurikiyimana yari ageze ku bapolisi bamwatse ibyangombwa barebye icyangombwa gihabwa uwakoresheje ubuziranenge bw’ibinyabiziga basanga ni igihimbano.

Yagize ati "Abapolisi barebye icyo cyangombwa bakigirira amacyenga barakitegereza, bahise babona ko ari igihimbano ariko Nkurikiyimana akomeza kwemeza ko ari umwimerere. Abapolisi bahise bahamagara mu kigo cya Polisi gishinzwe gusuzuma ubuziranenge bw ’ibinyabiziga basanga iyo modoka icyangombwa cyayo cyarangiye tariki ya 06 Nyakanga 2021. Uyu muturage yari yaranditse asaba kujya gusuzumisha iyo modoka ye ahabwa gahunda yo kuzajya gukorerwa isuzuma (Rendez-Vous) ya tariki 25 Kanama uyu mwaka."

CIP Karekezi akomeza avuga ko mu ikoranabuhanga ry’ikigo gisuzuma ubuziranenge bw’ibinyabiziga iriya modoka ntabwo yigeze izanwa gukorerwa isuzuma ry’ubuziranenge.
Bigaragara ko we yagiye guhimba icyangombwa cyagombaga kuva tariki ya 30 Kanama 2021 kikazarangira muri Gashyantare 2022.

CIP Karekezi yongeye kwibutsa abantu ko gukoresha inyandiko mpimbano ari icyaha gihanirwa n’amategeko. Yagaragaje ko kubeshya ko imodoka yakorewe isuzuma bishobora guteza impanuka mu muhanda.

Yagize ati "Uriya muturage ibyo yakoze ni icyaha gihanwa n’amategeko. Guhimba ko imodoka yakorewe isuzuma kandi bitarabaye bishobora guteza impanuka mu muhanda kuko iriya modoka irafatwa nk’iyagendaga mu muhanda itujuje ubuziranenge, turakangurira abantu kubyirinda kuko uzafatwa azabihanirwa."

Nkurikiyimana n’imodoka ye yahise ashyikirizwa Urwego rushinzwe ubugenzacyaha (RIB) rukorera muri sitasiyo ya Polisi ya Mukamira kugira ngo hatangire iperereza, nk’uko bigaragara ku rubuga rwa Internet rwa Polisi y’u Rwanda.

Itegeko no68/2018 ryo ku wa 30/08/2018 riteganya ibyaha n’ibihano muri rusange, Ingingo ya 276 ivuga ko umuntu wese uhimba cyangwa uhindura mu buryo ubwo ari bwo bwose inyandiko cyangwa ikindi kintu cyanditseho igitekerezo, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, aba akoze icyaha.

Umuntu wese, ku bw’uburiganya, wandika, wandikisha ibintu bidahuye n’ukuri cyangwa ukora imenyekanisha ritari ryo afatwa nk’uwakoze icyaha cyo gukora ibihimbano.

Iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi ya miliyoni eshatu (3.000.000 FRW) ariko atarenga miliyoni eshanu (5.000.000 FRW) cyangwa kimwe gusa muri ibyo bihano.

Limuzini ni igare ripakira imizigo n’abantu

Ayo magare yemerewe gutwara abagenzi babiri cyangwa umugenzi n’umuzigo we afite uburebure bwa metero ebyiri, aho intebe y’inyuma ireshya na metero, akagira n’uburyo buyorohereza kugenda ahazamuka bahetse.

Bavuga ko ayo magare ataboneka ku isoko ry’u Rwanda, ngo yaje ari impano Abanyamerika bazaniye abahinzi ba kawa, mu rwego rwo kuborohereza gutunda umusaruro mwinshi mu gihe gito bawujyana ku ruganda, abo baturage bagenda bayagurisha abafite ubushobozi, ibyari ugutunda kawa bivamo gutwara abantu n’imizigo.

Bamwe mu rubyiruko rukoresha ayo magare, bavuga ko abafitiye akamaro, ngo hari ubwo ku munsi bakorera ibihumbi bitatu, mu gihe ufite igare risanzwe akorera igihumbi na magana atanu. Icyakora ngo inyungu igenda igabanuka kubera ko abamaze kugura ayo magare ari benshi cyane.

Urwo rubyiruko kandi ruvuga ko, gukoresha ayo magare byakuye bamwe mu ngeso mbi z’uburembetsi no kunywa ibiyobyabwenge baterwaga no kubura umurimo, ubu bakaba batunze imiryango yabo.

Umwe muri bo witwa Niyitegeka Olivier yagize ati “Njye ukoresha iri gare ntandukanye n’abandi banyonzi bakoresha asanzwe, nk’ubu ku munsi iyo nakoreye ibihumbi bitatu, ufite ugare risanzwe aba yakoreye igihumbi na magana atanu, murumva rero ko afite akamaro, mbere twirirwaga tuzerera bamwe bakishora mu biyobyabwenge, ariko ubu byarahagaze ni twe dutunze imiryango, gusa amafaranga twinjiza ku munsi agenda agabanuka kuko tumaze kuba benshi kandi abagenzi ari bake”.

Undi witwa Manirakiza Eric, ati “Iyi Limuzini yanjye iramfasha igatuma nkorera amafaranga menshi kuko nemerewe guheka abagenzi babiri, ubu muri karitsiye ntuyemo ndiyubashye nta wansuzugura cyangwa ngo mbe nashukwa n’ibyatuma njya mu ngeso mbi”.

Ndizeye Modeste ukoresha igare rito, ati “Icyiza cya Limuzini, ni uko ipakira babiri, yagera ku mugenzi ufite imizigo akamushyiranaho n’imizigo ye amafaranga akiyongera, naho aka kanjye sinarenza umugenzi umwe, ndakorera 1000, undi yakoreye 3000, nk’ubu nta bushobozi nabona bwo kugura Limuzini rirahenze, udafite ibihumbi 300 ntiwaribona”.

Riheka imizigo inyuranye

Abagenzi bavuga ko bashimira uruhare runini rw’ayo magare mu kazi kabo ka buri munsi, aho rifasha mu ngendo zinyuranye cyane cyane abagendana imizigo.

Umugenzi witwa Nizeyumukiza Makurata yagize ati “Aya magare aradufasha cyane, nk’ubu tuvuye kwa muganga, nari kumwe n’umuvandimwe wanjye tugenda ku igare rimwe, ibi bintu byo kuduheka turi ababyeyi babiri tukagendera hamwe tuganira ni byiza cyane, umugabo iyo ari kumwe n’umugore we bakagenda ku igare rimwe biba akarusho, nk’ubu twishyuye amafaranga 200 turi babiri”.

Uhujenayo Aimable ati “Iri gare ryiswe Limuzini, kubera uburebure bwaryo no gupakira cyane, ubundi ryaje ryitwa Vélo kawa. Aradufasha pe, aheka byinshi ku buryo gutega imodoka bitakiri ngombwa”.

Aba ngo bishyuye amafaranga 200 ari babiri

Ubuyobozi bw’imirenge ayo magare akoreramo, buremeza ko yagiriye akamaro kanini urubyiruko, aho rwavuye mu bushomeri bwarushoraga mu ngeso mbi, ubu ibibazo by’urugomo bikaba byaragabanutse, urubyiruko rukaba rukomeje ibikorwa biruteza imbere.

Umunyamabanga Nshingwabikorwa w’Umurenge wa Shyira, Bizimana Placide, ati “Aya magare urubyiruko rwayahaye izina rya Limuzini, kubera uburyo apakira byinshi kandi bagakoreraho n’amafaranga, kuko iyo atwaye abantu babiri amafaranga ariyongera, benshi bateye imbere batunze imiryango yabo, bagiye bakora ibikorwa bitandukanye, akakubwira ati naguzemo inka, ati iri gare ryamfashije kubona umurima wo guhinga, naguze ikibanza ndubaka n’ibindi”.

Ryorohereza abajya guhaha mu isoko

Arongera ati “Bafite koperative hano nini, irimo urubyiruko rurenga 80 rukora uyu mwuga, kandi ubona bafite ubushobozi bubabeshaho, byarabafashije kuko batabona umwanya wo kujya muri ibyo bintu bidafite akamaro, byaba kunywa ibiyobyabwenge cyanga kuzerera mu mujyi, hano haba hari umusaruro mwinshi w’ibitoki baba bakeneye kugeza mu isoko, haba no gutwara indi mizigo, no gutwara abantu. Twabashishikariza gukora bazigama, banateganyiriza n’izabukuru muri gahunda ya Ejo Heza, kugira ngo kera nibagera mu zabukuru babone ikibagoboka”.

Limuzini nshyashya, ngo igura amafaranga y’u Rwanda agera mu bihumbi 400, mu gihe iryakoze riboneka ku bihumbi 300.

Aya magare bayitiriye ubwoko bw’imodoka ndende zitwa Limousine zizwiho kuba ziyubashye kandi zikaba zitwara abantu benshi.

Ryorohereza abantu mu ngendo

Inzu ya Ntizihabose iraba yuzuye mu byumweru bibiri

Ni umubyeyi uvuga ko we n’abana be batanu bababayeho imyaka isaga icumi mu buzima bw’agahinda gakabije, aho ngo bamusohoye mu nzu inshuro enye, biviramo abana be gutorokera i Kigali mu buzererezi, umukobwa atorokera mu mujyi wa Musanze, umubyeyi asigara ari nyakamwe atagira aho acumbika.

Ati “Bakimara kunsohora inshuro enye mu nzu nari ncumbitsemo, abana banjye bahize batorokera i Kigali, Umukobwa atorokera mumujyi wa Musanze, abayobozi nibo bagiye kumukurayo baramungarurira”.

Ngo muri ubwo buzima butoroshye yanyuzemo abana be bakimara gutoroka, umugabo w’umugiraneza atazi, ngo yamusanze ku ibaraza ry’umuturage imvura imunyagira.

Ngo yaramubajije ati “Ko unyagirirwa ku ibaraza bite? Na we ati ntabwo ngira aho mba nakomanze ngo nugame banga kunkingurira”.

Ni umuganda witabiriwe n’abayobozi mu nzego zinyuranyendetse n’Ingabo z’u Rwanda

Ngo uwo mugiraneza yamugiriye impuhwe amwemerera kumwishyurira ubukode mu gihe cy’umwaka, ni nabwo abana be bahise bagaruka babana muri iyo nzu yakodesherejwe ubuzima busa n’ubugarutse.

Avuga ko ubwo yari amaze umwaka yishyurirwa iyo nzu, nyuma y’uwo mwaka byongeye gusubira rudubi, nyiri inzu akamuhoza ku nkeke ngo amuvire mu nzu kugeza ubwo ayisohowemo, ari bwo yashatse shitingi yigira inama yo kuyishinga mu kibanza yari yarahawe n’abagiraneza.

Bikimara kugaragara ko uwo mubyeyi n’abana be baba muri shitingi, Urubyiruko rw’abakorerabushake mu Karere ka Nyabihu n’ubuyobozi bw’Umurenge wa Shyira bafashe icyemezo cyo guhuza imbaraga ku bufatanye n’abaturage batangira igikorwa cyo kubakira uwo muryango, Ubuyobozi bw’akarere butanga isakaro.

Ntizihabose Charlotte yishimiye ko agiye kubona inzu ye

Ni mu muganda watangijwe ku wa Kane tariki 21 Ukwakira 2021, hanatangizwa ukwezi kwahariwe ibikorwa by’urubyiruko rw’abakorerabushake mu Karere ka Nyabihu.

Richard Kubana, Umuyobozi muri Minisiteri y’Ubutegetsi bw’igihugu ushinzwe ibikorwa by’urubyiruko rw’abakorerabushake n’ubukangurambaga wari intumwa ya Minisiteri y’Ubutegetsi bw’igihugu muri icyo gikorwa, yashimiye buri wese mu bagize uruhare rwo gutekereza kubakira uwo muryango, by’umwihariko urubyiruko rw’abakorerabushake rukomeje ibikorwa byo kuzamura imibereho myiza y’abaturage.

Ashima uburyo nyuma y’uko bamenye ikibazo cy’uwo mubyeyi utagira aho aba, bafashe ingamba zo kumwubakira.

Uwo muyobozi yavuze ko gukorera ubushake bitanga isomo ku gihugu, ati “Ikintu cya mbere gikenewe ni ugukunda igihugu, igihugu ntabwo ari igishushanyo, igihugu kigizwe n’abagituye n’abakirimo kandi ugasabwa kugikunda ndetse no gukunda ibyo byose bikirimo. Turasaba urubyiruko rw’abakorerabushake gukomeza kurangwa na disipuline, kuko ni yo itugeza kuri byinshi”.

Urubyiruko rw’abakorerabushake mu bikorwa binyuranye biteza imbere imibereho y’abaturage

Arongera ati “Murabizi ko disipuline ariyo idufasha gukora tutiganda, tugashyiramo imbaraga zacu tuzi ko igihugu ari icyacu, tuzi ko igihugu ntawe tugikodesha ari icyacu, tugakora bene ni ibi bikorwa by’umutima, ubu bwitange bushobora kubera abandi isomo, bushobora gufasha ibindi bihugu”.

Raporo ya MINALOC iragaragaza ko mu mwaka wa 2020, urubyiruko rw’abakorerabushake mu Rwanda rwakoze ibikorwa binyuranye, birimo kubakira abatishoboye, kubaremera amatungo, kubatangira ubwisungane mu kwivuza n’ibindi, aho habaruwe ibifite agaciro ka Miliyari zisaga ebyiri.

Uretse igikorwa cyo kubakira uwo muryango, urubyiruko rw’abakorerabushake bwaremeye n’umuturage utishoboye wahoze ku rugerero, rumushyikiriza inka ifite agaciro k’Amafaranga y’u Rwanda angina na 310,000, aho bujuje izindi nzu ebyiri zubakiwe imiryango ibiri itishoboye, bakaba bamaze no gukusanya amafaranga angina na miliyoni icyenda yo kwifashisha mu mishanga iri imbere, nk’uko Bunezero Jean Baptiste, umuhuzabikorwa w’urubyiruko rw’abakorerabushake mu Karere ka Nyabihu yabitangarije Kigali Today.

Urubyiruko rw’abakorerabushake rworoje inka umuturage utishoboye

Ati “Mu rwego rwo kugira ngo urubyiruko rw’abakorerabushake rwiteze imbere mu bukungu, tumaze gukusanya asaga miliyoni icyenda yo kwifashisha mu mishinga ifatika izadufasha kwiteza imbere, ndetse nkanaboneraho umwanya wo gushishikariza abandi kureba uburyo twashyiraho gahunda yo kwizigamira bikaba byadufasha kubona uko twakore neza akazi kacu k’ubukorerabushake”.

Ku ruhande rw’Akarere ka Nyabihu, Nsabimana Cyprien, Umunyamabanga Nshingwabikorwa w’ako karere, avuga ko kubakira umuturage utishoboye binyuze mu mbaraga z’abaturage, bivuze byinshi ku karere kamaze iminsi gashaka ibisubizo bigamije gukemura ibibazo byugarije imibereho myiza y’abaturage.

Avuga ko uruhare rw’urubyiruko rw’abakorerabushake ari isomo rikomeye ku baturage, akagaruka ku ruhare rwarwo mu iterambere ry’akarere.

Ati “Muri COVID-19, akarere kacu kari mu turere twagaragayeno ubwandu buke, imbaraga ziba zakoresheje ni ubuyobozi dufatanyije n’uru rubyiruko kandi banatanga ubufasha mu bindi. Twe nk’ubuyobozi bw’akarere izo ni imbaraga, binatanga n’isomo ryiza dufatanyije nabo mu kwishakamo ibisubizo, nk’iyi nzu batangiye kubaka ni urugero rw’ibishoboka”.

Richard Kubana, umuyobozi muri MINALOC

Uwo muyobozi yavuze ko ibibazo by’uwo mubyeyi bikemuka akajya mu nzu ye bitarenze ibyumweru bibiri.

Ati “Ibibazo Charlotte yatugaragarije biba bifite uburyo bikurikiranwa, kandi haba hari n’ingamba nyinshi ziba zarashyizweho kugira ngo bibe byakemuka, dufatanyije n’uru rubyiruko, turakomeza tubikurikirane ku buryo n’iyi nzu, nyuma y’ingamba twihaye mu byumweru bibiri Charlotte araba ayituyemo. Hari umuturage w’umutima mwiza ubaye amucumbikiye, ariko ni yo mpamvu dufatanya n’urubyiruko kugira ngo iyi nzu yihutishwe atahe aho yita iwe”.

Urubyiruko rw’abakorerabushake mu Karere ka Nyabihu ni 25,360, rumaze kubakira abatishoboye inzu zisaga 100.

Inkuru dukesha Ikinyamakuru The New Times, ivuga ko PAC yihanagirije ubuyobozi bw’ako Karere nyuma y’uko bugaragaje ko icyorezo cya Covid-19 ari cyo cyabatindije mu gutanga inkunga yari igenewe kuzamura imirire myiza mu bana bari munsi y’imyaka itanu ndetse n’abagore batwite n’abonsa baturuka mu miryango ikennye.

Abayobozi b’Akarere ka Nyabihu bari bitabye PAC ku wa Kane tariki 23 Nzeri 2021, kugira ngo basobanure ikibazo cy’imicungire mibi y’imari cyagaragaye muri raporo y’Umugenzuzi mukuru w’imari ya Leta mu myaka y’ingengo y’imari 2019/2020.

Raporo yakozwe n’ikigo cy’igihugu cy’ibarurishamibare ku bushakashatsi bwakozwe mu 2014-15 bwiswe ‘Rwanda Demographic and Health Survey 2014-15 (2014-15 RDHS)’, yagaragaje ko ikibazo cy’igwingira kiri hejuru cyane mu Karere ka Nyabihu, aho mu 2015, 59 % by’abana bo mu Karere ka Nyabihu bari bafite ikibazo cy’igwingira, mu gihe ku rwego rw’igihugu ikibazo cy’igwingira cyari kuri 38 %.

Gusa mu bigereranyo byakozwe, byagaragaje ko ikigero cy’igwingira mu Karere ka Nyabihu cyaje kugabanuka mu 2019, kigera kuri 46 %, mu gihe ku rwego rw’igihugu cyari kuri 33%. Muri raporo y’umugenzuzi mukuru w’imari ya Leta kandi,byagaragaraga ko mu bindi bibazo ako Karere ka Nyabihu gafite, harimo no gutinda gutanga inkunga y’ibiribwa iba igenewe kuzamura imirire myiza, ku basanzwe bayihabwa (Nutrition Sensitive Direct Support ‘NSDS’).

Iyo raporo igaragaza ko ubundi iyo nkunga ya ‘Nutrition Sensitive Direct Support (NSDS)’ ihabwa abagore batwite n’abakimara kubyara bakomoka mu miryango ikennye n’abana bato, kugira ngo bashobore kubona indyo yuzuye, byityo n’imibereho yabo ihinduke.

Urebye ku mabwiriza aganga ibyo gutanga iyo nkunga ya ‘Nutrition Sensitive Direct Support’ yashyizweho na ‘LODA’ tariki 28 Ukuboza 2018, gutanga iyo nkunga ku bayigenewe on December 28, 2018, byagombye kutarenga mu minsi 10 ibanza kuri Kalindari.

Ariko ngo byagaragaye ko inkunga ya ‘NSDS’ yakererewe kugera ku bagenerwabikorwa ingana na 84.7 z’amafaranga y’u Rwanda, ikaba yarakererewe iminsi iri hagati ya 56 na 81 ukurikije igihe kuyitanga byari kubera.

Depite Muhakwa Valens, umuyobozi wa PAC yagize ati “ Tubona ko habayeho uburangare no gutinza iyo inkunga, kandi gutinda kuyitanga bituma abagenerwabikorwa bakomeza guhur an’ikibazo cy’imirire mibi”.

Abayobozi b’Akarere ka Nyabihu babwiye PAC ko ibyo byatewe n’ingorane Akarere kahuye na zo bitewe n’icyorezo cya Covid-19, mu gukoresha ikoranabuhanga ry’abafatanyabikorwa bako muri iyo gahunda barimo ‘LODA’ na ‘RBC’ kugira ngo bashobore kugira ku bagenerwabikorwa.

Sibo Mutwarangabo, Umuyobozi ushinzwe kubungabunga imibereho myiza mu Karere ka Nyabihu yagize ati“ Inkunga isanzwe itangwa ku bagenerwabikorwa bayo, hishashishijwe ‘systems’ imwe ya ‘LODA’ indi ya ‘RBC’. Amahugurwa yari gutuma abantu bagira ubumenyi mu kuzikoresha yadindijwe n’icyorezo cya ‘Covid-19’ by’umwihariko, gahunda ya ‘guma mu rugo’ “

Umugenzuzi mukuru w’imari ya Leta, muri raporo yavuze ko gutinda gutanga iyo nkunga ku bagenerwabikorwa byagira ingaruka mbi ku mibereho myiza yabo ndetse n’intego zifuzwaga kugerwaho ntizigerweho uko bikwiye.

Depite Mukabalisa Germaine yavuze ko Akarere ka Nyabihu, kari mu turere dufite ikigero cy’igwingira n’imirire mibi kiri hejuru mu gihugu hose, kari kagize amahirwe yo kubona inkunga kugira ngo icyo kibazo gikemuke, ariko ntikayabyaje umusaruro.

Depite Mukabalisa ati “ Nimutubwire niba imirire mibi nayo ijya mu kirihuko cyangwa se niba nayo yarashyizwe muri ‘guma mu rugo’”. Ibyo Depite Mukabalisa yabijije ashaka, kugaragaza ko intege nkeya z’Abayozi b’ako Karere ari zo zatumye bagomwa abana amahirwe yo kubona inkunga ifasha mu kurwanya igwingira.

Depite Uwineza Beline, umuyobozi wa PAC wungirije, yagize ati “ Mu by’ukuri, ibyo bibazo byo gutinza inkunga y’ibiribwa ntibyakabaye byumvikana mu Karere ka Nyabihu, kandi ari ko ka mbere mu kugira umubare munini w’abafite ikibazo cy’imirire mibi”.

Ikindi kibazo cyagaragajwe n’Umugenzuzi mukuru w’imari ya Leta muri ako Karere ka Nyabihu, ni uko inkunga gahabwa kadashobora kuyikoresha yose, muri Miliyoni 70 z’amafaranga y’u Rwanda kahawe mu mwaka w’ingengo y’imari 2018/2019, hari miliyoni 15 z’amafaranga y’u Rwanda yasigaye adakoreshejwe.

Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko abo bantu bafashwe n’abapolisi ubwo bari mu kazi gasanzwe ko gucunga umutekano wo mu muhanda. Bahagaraitse igare ryari ririho abantu 3, barebye ibyo bafite mu mufuka basanga harimo urumogi.

Yagize ati “Abapolisi bari mu kazi k’umutekano wo mu muhanda babona igare rije ririho abantu batatu, Niyomugabo Theoneste ni we wari uritwaye (umunyonzi) abandi babiri bicaye inyuma hagati yabo harimo umufuka munini. Abapolisi bagize amakenga barabahagarika, bakimara kubahagarika umwe yahise yiruka aracika.

CIP Karekezi akomeza avuga ko abapolisi barebye ibiri mu mufuka bari bafite basanga harimo urumogi udupfunyika 7, 493. Bamaze gufatwa bavuze ko bari bavuye mu Karere ka Musanze bagiye mu Karere ka Muhanga banyuze mu muhanda wa Shyira, ariko ntibavuga uwari ubahaye urwo rumogi n’uwo bari barushyiriye i Muhanga.

CIP Karekezi yaboneyeho gukangurira abatwara abagenzi kujya bitondera abantu n’ibintu batwaye, bagashyira imbere umutekano w’Igihugu aho kwihutira indonke z’amafaranga.

Ati “Uriya munyonzi Niyomugabo yanze kuvuga amafaranga yari guhembwa ariko uko yangana kose duhora dukangurira abatwara abagenzi kujya birinda indonke zishobora kubashyira mu kaga, ahubwo bagashyira imbere umutekano w’Igihugu. Uriya yari atwaye abantu bafite urumogi kandi na we abizi ko ari rwo, ubu agiye gushyikirizwa ubutabera”.

Yakomeje akangurira abaturarwanda gufatanya n’izindi nzego mu kurwanya abashaka guhungabanya umutekano no gukwirakwiza ibiyobyabwenge kuko na byo biri mu bihungabanya umutekano w’Igihugu.

Abafashwe uko ari babiri bashyikirijwe Urwego rushinzwe ubugenzacyaha (RIB) rukorera muri sitasiyo ya Polisi ya Rugera kugira ngo hatangire iperereza, mu gihe hagishakishwa undi bari kumwe wahise acika, nk’uko byatangajwe ku rubuga rwa Internet rwa Polisi y’u Rwanda.

Iteka rya minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Isuri iri mu byatumye ikiyaga cya Karago kigenda gikama

Umuturage witwa Bwanakweli waganiriye n’ikinyamukuru BBC dukesha iyi nkuru, ni umwe mu bagize Koperative yari isanzwe ikora uburobyi muri icyo kiyaga cya Karago, akaba avuga ko ubwo burobyi butagitanga umusaruro nk’uko byari bimeze mbere.

Yagize ati "Kubera hariya basatuye byatumye amazi asohoka mu Kiyaga atangira kugenda, n’amasuri aturuka mu Gishwati akazamo, amafi agahunga andi akanapfa".

Duhuze Remy Norbert, umukozi w’Ikigo cy’Igihugu gishinzwe kubungabunga umutungo kamere w’amazi, yavuze ko ikama ry’icyo Kiyaga ryatewe n’imvura idasanzwe yaguye mu ntangiriro z’uyu mwaka.

Yagize ati "Gukama kw’icyo kiyaga byaturutse ku mvura idasanzwe yaguye mu kwezi kwa mbere n’ukwa kabiri k’uyu mwaka 2021, imanura ibitaka byinshi byiroha mu Kiyaga".

Bwanakweli avuga ko mbere, umuntu yashoboraga gukora uburobyi bukamutunga, ariko ubu ngo ntibishoboka kuko amafi yagabanutse cyane muri icyo Kiyaga.

Yagize ati "Uretse no kuba amafi yarabuze muri iki Kiyaga, hari n’ abakerarugendo bajyaga baza kugisura ariko ubu batakiza".

Duhuze yavuze ko hari ingamba zafashwe mu rwego rwo kubungabunga icyo Kiyaga, harimo guca amaterasi aho bikenewe no gutera ibiti aho bikenewe kugira ngo barwanye isuri ijyana itaka muri icyo Kiyaga.

Ikindi Remy Norbert Duhuze yatangaje, ngo ni uko mu myaka 13 ishize, n’ubundi icyo Kiyaga kigeze gukama, kuri hegitari 118 gisanganywe ziragabanyuka, hasigara hegitari 98, ariko nyuma cyongera kuzura.

Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Twizere Karekezi, yavuze ko bariya bantu bari umunani, batandatu bikoreye imyenda ya caguwa buri umwe yikoreye ibalo. Abandi babiri bari babari inyuma bafite imihoro (imipanga) biteguye kurwanya uwabahagarika.

CIP Karekezi yagize ati “Uko bari 8 bari baturutse mu Murenge wa Bugeshi mu rugo rw’uwitwa Nyirabeza ari na we nyiri iriya myenda. Bageze ku bashinzwe umutekano bari ku irondo (Patrol) barabahagarika, abari bafite imihoro bashaka gutema abashinzwe umutekano babonye bafite imbunda bagira ubwoba barabireka bariruka. Hahise hafatwa bariya babiri abandi baracika.”

CIP Karekezi akomeza avuga ko iriya myenda iva mu gihugu cya Repubulika iharanira Demokarasi ya Congo (DRC) ikinjizwa mu Rwanda mu buryo bwa magendu.

Ati “Abafashwe bavuze ko iriya myenda iva muri Congo ikinjirira mu Murenge wa Bugeshi mu buryo bwa magendu. Yari iy’uwitwa Nyirabeza, bariya bari bayimutwaje agiye kuyicuruza mu isoko rya Kora riri mu Karere ka Nyabihu mu Murenge wa Bigogwe.”

Umuvugizi wa Polisi mu Ntara y’Iburengerazuba yibukije abantu ko ubucuruzi bwa magendu ari bubi kuko budindiza Igihugu mu iterambere kuko binjiza ibicuruzwa badasoze. Yakanguriye urubyiruko rukoreshwa mu gutwara ibicuruzwa bya magendu n’ibiyobyabwenge kubicikaho bagashaka indi mirimo bakora kuko ibyo bakora ntibyemewe n’amategeko.

Abafashwe bahise bashyikirizwa Urwego rw’Igihugu rushinzwe ubugenzacyaha (RIB) rukorera muri sitasiyo ya Polisi ya Jenda. Ni mu gihe magendu bari bafite yashyikirijwe ishami rya Polisi rishinzwe kurwanya ubucuruzi bwa magendu (RPU).

Itegeko ry’umuryango w’ibihugu byo mu Karere k’Iburasirazuba rinakoreshwa mu Rwanda ingingo yaryo ya 199 rivuga ko ibicuruzwa bya magendu byafashwe bitezwa cyamunara.

Imodoka yakoreshejwe muri ubwo bucuruzi bwa magendu na yo itezwa cyamunara ndetse umushoferi wayo agacibwa amande angana n’ibihumbi bitanu by’amadorali ya Amerika.

Ni inkuru dukesha Polisi y’u Rwanda

Bashyize indabo ku mva mu Rwibutso rwa Mukamira mu rwego rwo kunamira abaharuhukiye

Nyabihu Survivors Family, ni umuryango ugizwe n’abantu basaga 200, babarizwa hirya no hino mu gihugu no hanze yacyo, barokokeye Jenoside yakorewe Abatutsi mu byahoze ari amakomini ya Nkuri, Karago, Giciye, Nyamutera na Mutura, ayo makomini akaba ari yo yaje guhuzwa, akabyara Akarere ka Nyabihu.

Ngabonziza Louis, uhagarariye uyu muryango yagize ati “Muri aka gace Jenoside yakorewe Abatutsi yagize ubukana bukomeye, bitewe n’uko ahanini benshi mu bategetsi bayiteguye bakanayishyira mu bikorwa, ariho banakomokaga. Kuba twaragize amahirwe akomeye yo kuyirokoka, dushaka gukomeza kuyubakiraho, tunifashisha ibimenyetso bigaragaza neza ayo mateka, tukarushaho kwigisha abana bacu ingaruka byagize ku gihugu cyacu”.

Kuba mu bagize uruhare muri Jenoside yakorewe Abatutsi harimo n’abari urubyiruko, byatewe n’uko abateguye umugambi wa Jenoside, babatoje urwango n’amacakubiri, kuva bakiri bato, bigera ubwo babumvisha ko no kumena amaraso ari ibintu bisanzwe.

Bamwe mu bagize Umuryango Nyabihu Survivors Family basanga kubwira abakiri bato amateka mabi igihugu cyanyuzemo bizabarinda abayababwira mu buryo bugoretse

Urubyiruko n’abakiri bato b’iki gihe ngo icyo bakwiye kwigishwa mu buryo bwimbitse, ni ingaruka byagize ku muryango nyarwanda, no kubakangurira kurangwa n’imyitwarire yo guharanira ko ayo mateka atazasubira ukundi.

Ati “Icyo twifuza ni ukugira ngo ayo mateka nibayamenya neza uko ari, na bo bazakure baharanira ko inyungu iri kurinda ko igihugu cyabo gihungabana, ari na ko barwanya ikintu icyo ari cyo cyose cyabashora mu mutego w’abashaka kongera kucyoreka”.

Ku wa Gatandatu tariki 3 Nyakanga 2021, ubwo hasozwaga iminsi 100 yo kwibuka Jenoside yakorewe Abatutsi, abagize umuryango Nyabihu Survivors Family, bibutse ababo bishwe muri Jenoside yakorewe Abatutsi; umuhango wabereye mu Karere ka Nyabihu ku rwibutso rwa Mukamira, abawitabiriye bunamira banashyirwa indabo ku mva iruhukiyemo imibiri 2202.

Juru Anastase ukuriye Ibuka mu Karere ka Nyabihu

Juru Anastase, umuyobozi wa Ibuka mu Karere ka Nyabihu, yibukije abitabiriye uyu muhango ko bafite umukoro wo gukomeza urugamba rwo kubaka igihugu, nyuma y’amateka mabi cyanyuzemo.

Yagize ati “Dushima Leta yemeye guhuza Abanyarwanda ikanabashyiriraho gahunda zibahuza, hadashingiwe ku moko nk’uko Leta yateguye Jenoside yabigenje. Ubu nta muntu ukibona mugenzi we, mu ndorerwamo y’Ubututsi, Ubuhutu cyangwa Ubutwa. Gusa na none ntitwakwirengagiza ko hari abahora bifuza ko iyo mbuto nziza twabibye y’ubunyarwanda nyabwo irandurwa, bashaka kubiba imbuto mbi y’ingengabitekerezo ya Jenoside”.

Yongera ati “Icyo mbwira urubyiruko nk’imbaraga z’igihugu, nirufatire urugero ku rugamba FPR Inkotanyi yarwanye, baharanire kubaka Ubunyarwanda nyabo, bakunde igihugu cyababyaye, bashyire hamwe kandi baharanira kugikorera batiganda. Ni wo musingi igihugu cy’ahazazakizira amacakubiri kizaba cyubakiyeho”.

Abitabiriye uyu muhango, boroje inka, umubyeyi w’abana bane warokotse Jenoside yakorewe Abatutsi, witwa Nyirafishi Consolée, wo mu Kagari ka Jaba, Umurenge wa Mukamira, akaba yishimiye ko igiye kujya imukamirwa.

Agira ati “Kuba aba bagira neza bantoranyije bakangabira iyi nka nziza gutya, byandenze kandi biranejeje cyane. Ngiye kuyifata neza kugira ngo izabashe kudukamirwa tunywe amata. Ikindi ni uko izaduha ifumbire yo kwifashisha mu buhinzi, umusaruro na wo wiyongere. Muri macye ntewe ishema no kuba norojwe inka”.

Nyirafishi yagabiwe inka

Abarokotse Jenoside yakorewe Abatutsi bakomoka mu Karere ka Nyabihu, ngo ihaye intego y’uko buri mwaka bajya boroza bagenzi babo, mu rwego rwo kubafasha kurushaho kwiyubaka. Umuryango wa Nyirafishi ukaba wiyongereye ku yindi miryango ibiri na yo yorojwe inka, kuri ubu zanatangiye kororoka.

Umuvugizi wa Polisi mu Ntara y’Iburengerazuba, CIP Bonaventure Twizere Karekezi yavuze ko gufatwa kwa abo bantu bose byaturutse ku makuru yatanzwe n’abaturage.

Yagize ati “Ku wa Kane tariki ya 27 Gicurasi 2021 abapolisi bo mu ishami rishinzwe kurwanya ibiyobyabwenge bafatiye Byukusenge Angelique mu Karere ka Kicukiro mu Murenge wa Nyarugunga mu Kagari ka Kamashashi, Umudugudu wa Kibaya. Yafatanwe udupfunyika tw’urumogi 1,000 avuga ko yari aruvanye i Nyabihu aruzaniye uwitwa Semana David w’imyaka 31 na we utuye muri uyu mudugudu wa Kibaya, gusa yasanze twari tumaze iminsi tumufatanye udupfunyika 26 tw’urumogi tumushyikiriza Urwego rw’ubugenzacyaha (RIB)”.

CIP Karekezi akomeza avuga ko Byukusenge asanzwe atuye mu Karere ka Nyabihu mu Murenge wa Bigogwe, amaze gufatwa yavuze aho akura urwo rumogi mu Karere ka Nyabihu mu Murenge wa Bigogwe, ayo makuru ni yo yatumye hafatwa Uwiduhaye Marie Therese, nk’uko bigaragara ku rubuga rwa Internet rwa Polisi y’u Rwanda.

Ati “Byukusenge yatubwiye ko hari umuntu usanzwe umuha urumogi akaza kurucuruza mu mujyi wa Kigali, gusa uwo muntu ntiyashoboye gufatwa aracyarimo gushakishwa. Ariko ngo bose baruhabwa na Uwiduhaye Marie Therese na we arukura mu gihugu cya Repubulika ihanira Demokarasi ya Congo, Uwiduhaye abapolisi bamufatanye udupfunyika 1,836”.

CIP Karekezi yongeye gukangurira urubyiruko kwirinda ibiyobyabwenge kuko ni bo bigiraho ingaruka nyinshi mu buzima ndetse no ku gihugu muri rusange.

Yagize ati” Abenshi muri bariya dufata bakwirakwiza urumogi bo ntabwo baba barunywa ahubwo bajya kurucuruza mu rubyiruko rukajya kurunywa rukangiza ubuzima, rugafatwa rugafungwa imyaka myinshi”.

Yakomeje aburira abakwirakwiza urumogi, abibutsa ko barimo kwangiza ubuzima bw’Abanyarwanda kandi bakaba barimo kwangiza ejo hazaza h’igihugu.

Yabagaragarije ko ku bufatanye n’abaturage bazajya bafatwa bafungwe mu gihe nyamara usanga ari bo bari batunze imiryango yabo.

Byukusenge na Uwiduhaye bahise bashyikirizwa RIB ikorera muri sitasiyo ya Polisi ya Jenda kugira ngo bakorerwe idosiye.

Iteka rya minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Abafashwe bose uko ari batandatu barimo abagore bane n’abagabo babiri bakwirakwizaga urumogi

Barimo abagore bane n’abagabo babiri bakomoka mu turere twa Rubavu na Nyabihu, bafatiwe ahantu hatandukanye, barugemuye mu tundi turere.

Umugore witwa Musabyimana Damarisi w’imyaka 50 y’amavuko ni umwe mu bafashwe. Yabwiye Kigali Today ko yahamagawe n’uwitwa Fabien bari basanzwe bakorana mu gutunda ibiyobyabwenge, amubwira ko agenda akamuha akazi. Ngo nibwo yagezeyo amuha igipfunyika cy’inzitiramibu gihishemo udupfunyika 1000 tw’urumogi, adufatanwa agerageza kurujyana aho yari atumwe.

Yagize ati: “Uwo Fabien yampamagaye ambwira ko ngenda akandangira akazi, akampemba amafaranga ibihumbi 10. Nkigera iwe yampaye icyo gipfunyika, ntega moto ingeza ku muhanda, manuka n’amaguru buhoro buhoro ariko mfite icyoba cyinshi. Gusa sinari nzi ko bari bumfate. Ngeze imbere gato mbona haje imodoka ihagarara iruhande rwanjye. Abarimo bambaza ibyo mfite mbabwiza ukuri ko ari urumogi, baba bantwaye gutyo no kuri RIB”.

Uyu mugore avuga ko bwari ubwa kabiri atunda urumogi, dore ko yari abimazemo amezi abiri. Ngo yigiriye inama yo kutabitwara mu gikapu, kuko bashoboraga kumutahura byoroshye, niko kubipfunyika mu nzitiramibu.

Ati: “Bwari ubwa kabiri ntunda urumogi. Icyaha ndacyemera kuko nagikoze kandi nzi neza ibyo nari ntwaye. Ndasaba imbabazi, mboneraho no gushishikariza bagenzi banjye, kutazigera na rimwe bijandika mu bikorwa nk’ibi kuko ari bibi”.

Undi mugore witwa Irankunda Vestina wo mu Karere ka Nyabihu mu Murenge wa Muringa, na we yafatanwe udupfunyika 1000 tw’urumogi, akaba avuga ko bwari ubwa mbere abikora, aho yari yijejwe igihembo cy’amafaranga ibihumbi 10.

Yagize ati: “Bamfatanye udupfunyika tw’urumogi ubwo nari ndi mu modoka ya Coaster mbijyanye I Nyanza. Nari nzi ko ari rwo ntwaye, kuko uwari wampaye icyo kiraka yari yansabye kubimujyanirayo, ariko ambwira ko uwo mbishyiriye mumenya ari uko ngezeyo. Nta makuru ahagije nari mfite y’uko ibyo narimo nkora ari icyaha gikomeye kuri uru rwego. Bwari uburyo bwo gushakira abana banjye imibereho”.

Bikorimana Fabien wafatiwe mu cyuho mu bucuruzi bw’urumogi iwe mu rugo aho yanafatanwe udupfunyika twarwo ibihumbi 6, akagerageza no guha Polisi ruswa ngo imureke. Yiyemerera ko yajyaga arukwirakwiza mu bantu bakarujyana kurucuruza.

Yagize ati: “Urwo rumogi rwari ruhishe iwanjye mu gihe nari ntegereje ko nduha abantu twari dufitanye gahunda. Polisi yaraje irarutahura aho nari naruhishe, ngerageza kubinginga ngo bambabarire, nanabizeza kubashakira amafaranga miliyoni imwe y’u Rwanda ngo bandeke. Icyo gihe nari mfite kuri telefoni ibihumbi 370 yonyine, biba ngombwa ko nitabaza inshuti, inyongereraho andi, yuzuye ayo nari nabijeje, ngize ngo nyabahe, bahita banta muri yombi gutyo”.

Mu bandi bafashwe ni Mukasine Marie Louise wafatiwe hamwe na Bikorimana Fabien. Hakaba Nyirahakuzimana Sifa wafatanwe udupfunyika 3500 hakaba na Mutarambirwa Jean de Dieu ukurikiranyweho icyaha cyo gutunda no gucuruza urumogi. Bose hamwe bakaba barafatanwe udupfunyika ibihumbi 11 magana atanu.

Aba bose uko ari batandatu bafashwe tariki ya 5 Gicurasi 2021 bahita bashyikirizwa RIB Station ya Mukamira. Umuvugizi w’Urwego rw’Ubugenzacyaha RIB Dr Murangira Thierry, aburira abishora mu bikorwa nk’ibi kubireka hakiri kare.

Yagize ati: “Abantu bishora mu biyobyabwenge bari bakwiye kubivamo hakiri kare kuko RIB ikomeje gufata n’inzego zitandukanye mu kubirwanya. Amazi si yayandi, ibihano byarakajijwe kandi n’ingamba mu kubirwanya zariyongereye. Ibihano biri hagati y’imyaka irindwi na burundu bitewe n’icyiciro cy’ibiyobyabwenge umuntu afatanwe. Ndetse n’ihazabu y’amafaranga ziri hagati ya miliyoni eshanu na miliyoni 30. Ngira ngo birumvikana neza ko ibihano biremereye”.

Mu bindi yagarutseho birebana na ruswa yagize ati: “Ruswa ituma ibikorwa bibi nk’ibi bidacika. Ni ikintu kidakwiriye kwihanganirwa na gato kuko ruswa imunga igihugu, ikabangamira iterambere ryacyo n’itangwa rya serivisi nziza. Ibangamira bikomeye iyubahirizwa n’ishyirwa mu bikorwa ry’uburenganzira bw’ikiremwamuntu. Abishora mu byaha bakeka ko bazatanga ruswa ntibakurikiranwe baribeshya cyane”.

Agaruka ku buremere bw’ibyaha bifitanye isano n’ibiyobyabwenge na ruswa, Umuvugizi wa RIB Dr Murangira Thierry, yashimangiye ko ingingo ya kabiri y’iteka rya Minisitiri w’Ubuzima rishyira ibiyobyabwenge mu byiciro bitatu aribyo: Ibiyobyabwenge bihambaye nka Cocaine, Urumogi, Heroine na Mugo. Iyo umuntu abifatanwe, urukiko rukabimuhamya, ahanishwa igifungo cya burundu n’ihazabu iri hagati ya miliyoni 20 na 30 z’amafaranga y’u Rwanda.

Uwafatanwe ibiyobyabwenge bikomeye nka Mayirungi, Shisha, Rwiziringa na Electronic Cigarette, ahanishwa igifungo kiri hagati y’imyaka 20 na 25 n’ihazabu ya miliyoni 15 kugeza kuri 20. Ni mu gihe uwafatanywe ibiyobyabwenge byoroheje we, ahanishwa igifungo cy’imyaka 7 kugeza ku myaka 10 n’ihazabu ya Miliyoni eshanu kugeza kuri miliyoni 10 z’amafaranga y’u Rwanda.

Ku muntu uhamijwe n’urukiko icyaha cya ruswa, ahabwa igihano kiri hagati y’imyaka itanu n’irindwi, hakiyongeraho n’ihazabu y’amafaranga yikubye inshuro eshatu kugeza ku nshuro eshanu z’agaciro k’indonke yatanze.

Umuvugizi w’Urwego rw’Ubugenzacyaha RIB Dr Murangira Thierry, ahamagarira abantu bose kwirinda ibyaha ibyo aribyo byose, kuko bibangamira iterambere ry’ababyishoramo n’iry’Igihugu.

Imirimo yo kubaka iyi sitasiyo yatangiye muri Nyakanga 2019 ikaba izasozwa mu kwezi gutaha kwa Kamena 2021.

Iyi sitasiyo yubatse mu Mudugudu wa Ruzuba, mu Kagari ka Rugeshi, Umurenge wa Mukamira, mu Karere ka Nyabihu, ni yo sitasiyo ya mbere yujujwe muri aka Karere ndetse iyi sitasiyo ikazafasha abatuye aka Karere ka Nyabihu n’Uturere tukegereye turimo Rubavu, Rutsiro, Ngororero na Musanze kubona amashanyarazi adacikagurika nk’uko byajyaga bibaho rimwe na rimwe.

Sosiyete y’u Rwanda Ishinzwe Ingufu (REG) yubatse iyi sitasiyo ya Nyabihu mu rwego rwo kunoza imitangire ya serivisi muri Nyabihu n’ibice bihegereye.

Martin Mutsindashyaka, Umuyobozi w’ ishami rya REG muri Nyabihu, avuga ko iyi sitasiyo yuzuye izatangira gutanga amashanyarazi muri Kamena 2021, ndetse izagabanya uburebure bw’imiyoboro ya REG, kuko ahanini abatuye muri Nyabihu n’ibice bihegereye, bacanaga amashanyarazi aturutse kuri sitasiyo ya Camp Belge muri Musanze, bityo bigatuma amashanyarazi babona acikagurika cyane kubera uburebure bw’uwo muyoboro.

Mutsindashyaka akomeza avuga ko iyi sitasiyo kandi izafasha inganda nyinshi ziri kubakwa muri iki gice kubona amashanyarazi ahagije.

Mutsindashyaka avuga ko kandi ibi bigabanya ibihombo ikigo gishobora kugira bitewe n’uko umuriro watakaraga kubera uburebure bw’umuyoboro wavaga i Musanze uzagabanuka abaturage bagafatira hafi amashanyarazi.

Kuri ubu ingo zisaga 53% zo mu Karere ka Nyabihu zifite amashanyarazi.

Mu rwego rwo kurushaho kwihutisha iterambere ry’ubukungu, Leta y’u Rwanda yihaye intego ko buri muturarwanda azaba afite amashanyarazi bitarenze umwaka wa 2024.

Imibare igaragazwa na REG kugeza ubu yerekana ko abasaga 60,9% bamaze kugezwaho amashanyarazi mu Rwanda.

Ndizeye Emmanuel wari Gitifu w’Akarere ka Nyabihu yeguye

Perezida wa Njyanama y’Akarere ka Nyabihu, Gasarabwe Jean Damascène, avugana na Kigali Today, yemeje ko yakiriye ibaruwa yo gusezera ku kazi, avuga ko n’ubwo havuzwe byinshi ku mikorere ya Gitifu na nyobozi ntacyo yabivugaho kuko ntagenzura ryakozwe.

Gasarabwe avuga ko nyuma yo kwakira ibaruwa yandikiwe, agiye kuyishyikiriza Inama njyanama bakagira umwanzuro babifataho.

Ndizeye Emmanuel amaze amezi atatu asabwa kuva mu mirimo arabyanga, ndetse byagarutsweho mu bitangazamakuru bitandukanye byavugaga ku makimbirane muri ako Karere.

Guverineri Habitegeko avuga ko Nyobozi y’Akarere ifite inshingano zo gukurikirana imikorere y’abakozi b’Akarere.

Ubwo Guverineri Munyantwali yahererekanyaga ubuyobozi na Guverineri Habitegeko, yatangaje ko mu Karere ka Nyabihu hagomba gukurikiranwa ibibazo by’imihanda muri Gishwati.

Iyo mihanda ikaba ivugwaho kudindira mu iyubakwa ryayo, mu gihe gitifu Ndizeye ari we wari ushinzwe imari y’Akarere no kuyishyira mu bikorwa.

Bashyize indabo ku mva banunamira abashyinguwe mu rwibutso rwa Jenoside rwa Mukamira mu rwego rwo kubaha icyubahiro

Icyahoze ari Komini Nkuri, ubu ni mu Karere ka Nyabihu. Benshi mu bari bahatuye barokotse Jenoside yakorewe Abatutsi, bavuga ko imbarutso ya Jenoside atari indege y’uwahoze ari umukuru w’Igihugu Juvenal Habyarimana nk’uko abakunze gupfobya Jenoside babivuga kenshi, kuko guhera mu 1959 Abatutsi baho batotejwe bikomeye, birushaho gukaza umurego hagati y’umwaka wa 1990 kugeza mu gihe cya Jenoside.

Amateka yo muri aka gace, Uwamahoro Espérance ayazi neza, kuko ari umwe mu batutsi bari bahatuye. Ubwo urugamba rwo kubohora u Rwanda rwari rutangijwe n’Ingabo za RPF Inkotanyi mu mwaka w’1990, Abatutsi bo mu cyahoze ari Komini Nkuri, biganjemo abize n’abari bafite amikoro; baratotejwe, bagafungwa bya hato na hato, abandi bakicwa bakajugunywa mu buvumo bwitwa Nyaruhonga.

Yagize ati: “Kuva urugamba rwatangira, Ubuyobozi bwariho bwatangiye kutwihimuraho, budushinja ko turi ibyitso by’Inyenzi zateye Igihugu. Interahamwe zifatanyije n’abasirikari babaga mu kigo cya Mukamira, uwtwaga Nyirakamanzi alias Nyirakamodoka wari Konseye, hakaba na Burugumesitiri wa Nkuri witwaga Mpiranya Mathias; bari ku isonga mu bwicanyi bwibasiraga Abatutsi, imirambo yabo ikajugunywa mu buvumo bwa Nyaruhonga nyuma yo kuyishinyagurira ko bayijyanye kwiga i Makerere ya Uganda”.

Uwamahoro akomeza avuga ko hagati y’amatariki ya 7 kugeza tariki 20 Mata 1994, Abatutsi bari barahasigaye, Interahamwe zifatanyije n’abasirikari babaga mu kigo cya Mukamira n’icya Bigogwe bari baranagize uruhare mu kuzitoza ubwicanyi, bafatanyije n’abayobozi bariho icyo gihe, bahiga Abatutsi bukware aho bari bihishe; aho bamwe babasangaga mu ngo zabo bakabicisha ibisongo, imipanga n’izindi ntwaro gakondo, barabsahura ndetse banabatwikira amazu.

Yagize ati: “Ahagana mu ma saa tatu z’igitondo cy’umunsi Jenoside yatangiriyeho, amazu y’Abatutsi bo muri Nkuri, bayasutseho essence aba umuyonga. Abatari bakabashije kwihisha bishwe batemaguwe, abagore bo mbere yo kwicwa babanzaga kubafata ku ngufu. Inzira y’inzitane y’amahwa, Abatutsi bahoze batuye muri ako gace cyangwa abari bahahungiye, bayinyuzemo bicwa urw’agashinyaguro kugeza tariki 20 Mata 1994 ubwo umututsi wanyuma yicwaga”.

Ababashije kurokoka bo mu cyahoze ari Komini Nkuri, ni abari barahungiye mu bindi bice cyangwa abari batuye mu bindi bice ariko basanzwe bahakomoka.

Ubwo abicanyi bari bamaze kumaraho Abatutsi baho nk’uko Uwamahoro akomeza kubivuga mu buhamya bwe, ngo bakomereje mu Bisesero no mu zindi Komini gutangayo umusada(ubufasha) wo kwica Abatutsi baho.

Tariki 20 Mata buri mwaka, Abarokotse Jenoside bo mu cyahoze ari Komini Nkuri bibuka inzirakarengane zahiciwe

Abarokotse Jenoside bo mu cyahoze ari Komini Nkuri(Nyabihu), batuye mu bice bitandukanye by’Igihugu no hanze yacyo, bishyize hamwe bashinga Umuryango bise Nyabihu Survivors Family, ugizwe n’abasaga 200.

Ni umuryango bafata nk’umuyoboro utuma amateka y’ababo bishwe mbere no mu gihe cya Jenoside yakorewe Abatutsi adasibangana, no guharanira ko amacakubiri atazongera ukundi.

Abarokotse Jenoside yakorewe Abatutsi bakomoka mu cyahoze ari Komini Nkuri baharanira ko amateka mabi atazongera kubaho binyuze mu muryango bashinze

Ku wa Kabiri tariki 20 Mata 2021, abagize umuryango Nyabihu Survivors Family bibutse ababo bazize Jenoside, umuhango witabirwa n’abatarenga 20, mu rwego rwo kubahiriza amabwiriza yo kwirinda icyorezo Covid-19.

Ngabonziza Louis, umuyobozi w’uyu muryango yagize ati: “Uyu ni umwanya duha uburemere bukomeye cyane, kuko tuba twaje kuri uru rwibutso ruruhukiyemo abacu, duturutse ahantu hatandukanye; tukongera kubibuka, bigatuma twumva ko turi kumwe na bo. Twe abakiriho, uba ari umwanya wo guhumurizanya, gukomezanya no kurebera hamwe ibiduha imbaraga n’intumbero nziza y’ahazaza”.

Umuyobozi w’Akarere ka Nyabihu wungirije ushinzwe iterambere n’ubukungu, Habanabakize Jean Caude, yashimye uburyo ingabo za RPF Inkotanyi zahagaritse Jenoside, zigatuma Abanyarwanda bongera kugira umudendezo.

Abarokotse Jenoside bakomoka mu Karere ka Nyabihu bishyize hamwe, yaboneyeho kubakomeza muri ibi bihe, abasaba kurushaho guharanira kwiteza imbere.

Yagize ati: “Ingabo z’igihugu cyacu zahagaritse Jenoside, hakaboneka ababasha kurokoka, ni ibyo kwishimira ko uyu munsi ari bazima kandi babayeho neza. Tubikesha Politiki y’imiyoborere myiza. Igikomeye mbasaba ni ukubyubakiraho, mukirinda guheranwa n’amateka mabi yaranze Igihugu”.

Ati: “Nimuharanire gushyira imbere gahunda zose zigira uruhare mu iterambere ry’Abanyarwanda, yaba mu bukungu n’imibereho myiza. Mukomere ku ndangagaciro y’ubumwe bw’Abanyarwanda, murwanye ingengabitekerezo ya Jenoside kandi mboneraho no gusaba abagifite amakuru y’ahakiri imibiri itaraboneka, gutanga amakuru, kugira ngo ishyingurwe mu cyubahiro”.

Ngabonziza Louis uyobora umuryango Nyabihu Survivors Family

Urwibutso rwa Jenoside yakorewe Abatutsi rwa Mukamira, rushyinguwemo imibiri 2202 y’Abatutsi bazize Jenoside n’abicwaga mbere yaho. Imibiri myinshi ikaba ari iyakuwe mu buvumo bwa Nyaruhonga y’Abatutsi babaga bishwe bakajugunywamo.

Umubare munini wabo ni abahoze batuye muri Komini Nkuri n’abakurwaga mu zindi Komini nka Karago na Mukingo na Mudende.

Abagize umuryango Nyabihu Survivors Family, bakomoka mu Karere ka Nyabihu barokotse Jenoside, bashyize indabo ku mva iruhukiyemo imibiri nk’ikimenyetso cyo kubunamira. Ni umuhango bakoze ku nshuro ya kabiri, kuva bashinga uwo muryango bahuriyemo.

Habanabakize Jean Claude yasabye abarokotse Jenoside kudaheranwa n’amateka mabi yaranze igihugu

Uwamahoro Espérance, umwe mu barokotse Jenoside bo mu cyahoze ari Komini Nkuri

Ubuvumo bwa Nyaruhonga bwajugunywagamo Abatutsi bishwe muri Jenoside no mu myaka yayibanjirije

Bafashwe basenga barenze ku mabwiriza yo kwirinda Covid-19

Umuyobozi wa Polisi mu Karere ka Nyabihu, SSP Paul Byuma, avuga ko kumenyekana kw’abasengeraga mu rutare ari abaturage batanze amakuru bitewe n’uko gusengera mu makoraniro bitemewe, bikaba byakururira akaga abandi baturage igihe hagize uhandurira Covid-19, cyane ko abafashwe batari bipimishije cyangwa ngo bashyire intera hagati yabo.

SSP Byuma avuga ko uretse kuba bari mu makoraniro atemewe, n’aho bafatiwe basengera ntihemewe kuko bashobora kugira impanuka bakaba bahaburira ubuzima.

Uwo muyobozi avuga ko bari bamaze iminsi bafite amakuru y’ abaturage bajya gusengera mu buvumo mu Murenge wa Bigogwe, bituma bategura uburyo bwo kubafata ku itariki ya 17 Mata 2021.

SSP Byuma avuga ko Polisi y’u Rwanda itazemerera bamwe gukururira abandi akaga bitewe no kutubahiriza amabwiriza yashyizweho.

Asaba abaturage kumva ubukana bwa Covid-19 no kuyirinda, na ho abashaka gusenga abagira inama yo kujya mu nsengero zujuje ibisabwa.

Ubuyobozi bw’Umurenge wa Bigogwe buvuga ko abafashwe basengera mu matorero arindwi atandukanye yo mu Karere ka Nyabihu na Rubavu.

Umunyamabanga Nshingwabikorwa w’Umurenge wa Bigogwe, Jean Pierre Gahutu Tebuka, avuga ko abafashwe harimo abatambaye udupfukamunwa, abatwambaye nabi, bakaba bari munsi y’urutare begeranye, mu gihe amabwiriza yo kwirinda Covid-19 abuza abantu guhura hatubahirijwe intera, kwambara agapfukamunwa no gupimwa umuriro.

Ati "Harimo abaturutse mu Karere ka Rubavu, baza bagahura n’abandi baturutse mu Karere ka Nyabihu, bahura batipimishije mbere kugira ngo bamenye uko bahagaze, kandi hari impungenge ko hari uwanduye ashobora no kwanduza abandi, bikaba byakwihutisha gukwirakwiza ubwandu bwa Covid-19”.

N’ubwo Akarere ka Nyabihu katabonekamo imibare myinshi y’abandura icyorezo cya Covid-19, abaturage n’abayobozi basabwa gufatanya kwirinda ko bacyandura.

Mu Rwanda imibare itangwa na Ministeri y’ubuzima igaragaza ko abantu 23,888 bamaze kwandura icyorezo cya Covid-19, na ho abamaze gukira ni 22,241, mu gihe abakirwaye ari 1,322.

Kuva muri Werurwe 2020 icyorezo cya Covid-19 cyagera mu Rwanda, abantu 325 kimaze kubahitana naho abamaze gupimwa ni 1,256,919 mu gihe 349,702 bamaze gukingirwa.

Abaturage babitangaje nyuma y’uko umuhanda wabafashaga kugeza umusaruro ku isoko wangijwe n’imashini zagiye kuwukora zikavamo zitarangije ibikorwa ahubwo ukangirika kurushaho kugeza n’aho imodoka zidashobora kuwunyuramo.

Toni zibarirwa muri eshatu ni zo zibarwa ko zimaze kubora kubera kutabona uko zigezwa ku isoko, ibi bikiyongeraho n’igihombo gishyirwa ku bahinzi kugira ngo bishyurire amagare ageza ibirayi ku muhanda wa Kaburimbo kugira ngo bishobore gutwarwa n’imodoka.

Nsengiyumva ni umwe mu bahinzi muri uyu mudugudu waganiriye na Kigali Today. Avuga ko kwangirika k’umuhanda byabateye ibihombo.

Agira ati "Dusanzwe twakira imodoka nyinshi ziza gutwara ibirayi. Ugereranyije ku munsi twakiraga nka Fuso 15 na Daihatsu 5 zije gutwara ibirayi byera muri aka gace, ariko kuva umuhanda wanyuzwamo imashini zikawusigamo ibitaka watangiye kunyerera ubu nta modoka ishobora kuhagera."

Nsengiyumva avuga ko akazi kakorwaga n’imodoka gakorwa n’amagare igihombo kikajya ku bahinzi.

Ati "Batarashyiramo imashini, imodoka zageraga ku Kibumbiro tukagurisha ibirayi, ariko imashini inyuze mu muhanda, byateje kunyerera ndetse habamo n’imisozi y’ibitaka ku buryo imodoka zidashobora kongera kuhagaruka, iyo imvura yaguye ntizanyuramo."

Akomeza avuga ko akazi kakorwaga n’imodoka gakorwa n’amagare agera ku 100 akabigeza ku muhanda kandi igare rikora inshuro 10, iyo igare ritwaye ibirayi ryishyurwa amafaranga 1000.

Kugira ngo ibirayi bibore byatewe n’uko abanyamagare batangiye kwaka amafaranga 1500 ku mufuka abahinzi basanga baba bahomba cyane baranga ibirayi bitinda aho byashyizwe biranyagirwa bitangira kubora.

Kugira ngo umusaruro ugere ku muhanda aho imodoka ziwusanga bisaba ko umuhinzi ikilo kimwe acyishyura amafaranga 45. Mu gihe abandi bagurirwa umusaruro ku mafaranga 225 ku kilo, umuhinzi ngo yishyura ubwikorezi agasigarana amafaranga 180.

Sibomana Theogene, umwe mu bahinzi ukora akazi ko gupima ibirayi ku munzani avuga ko igihombo cy’ibirayi cyabagezeho kuko imodoka zidashobora kugera aho bakura ibirayi bigasaba gukoresha amagare.

Ati "Ibirayi byaboze kuko byatinze kugezwa ku modoka. Uubu ni igihombo twabonye niba duhombye toni 3 kandi ikilo kigura amafaranga 225, urumva harimo ibihumbi byinshi."

Sibomana avuga ko ubusanzwe iyo basarura ibirayi imodoka ziza kubitwara ntibihure n’ikibazo, ariko ubu kubera ko nta modoka zihagera, abaturage barabikura bikuzura umusozi bakarindira ko amagare abitwara kandi ari byinshi, iyo imvura iguye ntibitwikirwe, bikabora.

Sibomana avuga ko basaba Leta kubafasha umuhanda ugakorwa, kugira ngo boroherezwe kugeza umusaruro ku isoko.

Ati "Niba twarakoreshaga amafaranga 500 kugira ngo umufuka ugezwe aho imodoka zisanga umusaruro, ubu abafite amagare bakaba bageze ku mafaranga 1500 ni igihombo ku muhinzi."

Umunyamabanga Nshingwbikorwa w’Umurenge wa Rambura, Kampire Georgette, avuga ko iki kibazo kizwi haba ku murenge ndetse n’Akarere ariko impamvu nyamukuru ngo ni imvura igwa n’igitaka cyaho.

Agira ati "Imashini zari zigiye gukora umuhanda ariko kubera igitaka cyaho kinyerera byatumye gukora umuhanda bihagarara ndetse n’imodoka zawunyuragamo zitwaye imyaka zinanirwa no kuwunyuramo bigira ingaruka ku bahinzi b’ibirayi bahatuye."

Kampire avuga ko imodoka zigiye muri uwo muhanda kubera ubunyerere zinanirwa kuvamo bigatuma imodoka zirinda kujyayo zigategereza umusaruro kuri kaburimbo nabwo kubihageza bigahenda abahinzi.

Ikibazo cy’umuhanda cyatangiye ubwo imodoka zatangiye gukora umuhanda zihereye muri santere ya Gasiza mu Murenge wa Rambura mu Karere ka Nyabihu werekeza ahitwa ku Kibisabo.

Sosiyete ikora umuhanda yanyujijemo imashini ariko haza kuboneka ikibazo cy’aho bashyira ibitaka kuko ahari hateguwe nyiri umurima yabagoye. Ibi byatumye sosiyete ikora umuhanda ihera ku rundi ruhande. Ubwo abaturage bagaragazaga iki kibazo mu kwezi kwa Gashyantare muri uyu mwaka wa 2021, imashini yagarutse gukura mu nzira ibitaka zari zarasizemo ariko ntibyakunda kubera imiterere yaho n’ubutaka bunyerera.

Umunyamabanga Nshingwabikorwa w’Umurenge wa Rambura avuga ko bategereje ko haboneka umucyo kugira ngo imashini zongere zinyuremo, umuhanda ushobore kuba nyabagendwa.

Abaturage bo mu Murenge wa Rambura bagaragaje ikibazo cy’umusaruro wabuze uko ugera ku isoko mu gihe hari n’abahinzi b’imboga nk’ibitunguru na bo batangiye kubihingiraho mu murima nyuma yo kubura isoko kandi bibatwara akayabo kugira ngo babihinge.

Guverineri Munyantwali ubwo yahererekanyaga ubuyobozi na Guverineri Habitegeko, yamusabye gukurikirana ikibazo cy’imihanda muri Gishwati mu Karere ka Nyabihu kugira ngo umusaruro uhaboneka ushobore kugezwa ku isoko.

Ni nyuma y’uko iryo bendera ribuze mu ijoro rishyira tariki 05 Werurwe 2021, aho ryabonetse mu rugo rw’uwo ushinzwe umutekano mu mudugudu wa Mwambi.

Biracyari urujijo ku makuru y’iryo bendera ry’akagari ka Nyarutembe, aho ubuyobozi bw’Umurenge wa Rugera bukeka ko uwo muturage ariwe waba yarashatse kwihimura kuri uwo muyobozi ngo afatirwe mu cyaha cyo kwiba ibendera ry’igihugu.

Ngo ni nyuma y’uko kuri uwo mugoroba bari batonganye umuturage asabwa ubahiriza amabwiriza ya COVID-19, batandukana uwo muturage akubita agatoki ku kandi, nk’uko Hakizimana Innocent, Umunyamabanga Nshingwabikorwa w’Umurenge wa Rugera yabitangarije Kigali Today.

Yagize ati “Ni umuturage wagiranye amakimbirane na Mutekano nyuma yo gutongana uwo muturage ahenga bwije, yururutsa ibendera arijyana rwihishwa kwa Mutekano. Nyuma mu gitondo riboneka mu rugo rw’uwo mukozi ushinzwe umutekano, twasanze nta kibazo ryagize risa neza”.

Arongera ati “Urumva bururukije iryo bendera mu ijoro ndatekereza ko uwo muturage ariwe waba yarabikoze ariko ni ugukeka, gusa muri uwo mugoroba uwo muturage yari yabwiye uwo ushinzwe umutekano ati ibyo unkoreye nzabikwishyura nzaguhima uzabibona. Iryo joro rero ibendera rihita ribura rifatirwa kwa Mutejano, murumva ko hari icyihishe inyuma yabyo kuko uwo muturage yatashye akubita agatoki ku kandi”.

Gitifu Hakizimana, avuga ko uwo muturage yaba yararyinjije kwa Mutekano mu ibanga, aho ngo yaba yararinyujije munsi y’urugi rwo ku irembo.

Ati “Uko dukeka, uwo muturage yarijyanye kwa Mutekano mu rwego rwo kugira ngo amwihimureho amusige icyaha cyo kwiba ibendera, yararijyanye mu ijoro arinyuza munsi y’urugi rwo ku irembo. Gusa abashinzwe iperereza bari mu kazi kabo kuko ntawe twashinja ngo yarabikoze tutaramwiboneye, ni ugukeka gusa n’uko uwo ushinzwe umutekkano yatashye rihari anapanga irondo rihari”.

Mu gihe uwo muyobozi avuga ko abo bashinjwa kwiba ibendera bahize bashyikirizwa Polisi ngo batange ibisobanuro kuri icyo kibazo kigikorwaho iperereza, avuga ko bahise bakoresha inama abaturage bakangurirwa kwirinda amakimbirane.

Yagize n’ubutumwa aha abaturage ati “Abaturage turabasaba kwegera ubuyobozi, inzego zirahari kuva ku isibo kugeza ku nzego z’umurenge bakagirwa inama abafitanye ibibazo bakabikemura mu mahoro, ariko ntihabeho guhimana muri ubwo buryo, umwe akumva ko yatega undi akaba yamugirira nabi. Inzego zinyuranye z’ubuyobozi turahari ni batwegere tubafashe ibibazo bafitanye bikemuke”.

Umunyamabanga Nshingwabikorwa w’Umurenge wa Rugera , Hakizimana Innocent, mu kiganiro yagiranye na Radio Rwanda mu gitondo cyo kuri uyu wa Gatatu, yavuze ko bataramenya impamvu y’ubwo bugizi bwa nabi.

Icyakora aremeza ko ari ubugome atari ubujura kuko ibitoki byatemwe babisize aho akavuga ko bafatanyije n’inzego zibishinzwe zirimo Urwego rw’igihugu rw’ubugenzacyaha (RIB) na Polisi barimo gukora iperereza.

Uwo muyobozi yakomeje avuga ko igikorwa nk’icyo cyari giherutse mu kwezi kwa Gatandatu k’umwaka ushize, uwakoze urugomo akaba yarafashwe agahanwa.

Amakuru ava mu baturage ndetse no kuri Ntamezayino, hari abaremeza ko urwo rugomo rwaturutse ku businzi, abandi bagahamya ko ari amakimbirane.

Ayo makuru akaba ari gukusanywa ngo bamenye impamvu nyayo, umuyobozi w’umurenge agasaba abaturage gukomeza gutanga amakuru kugira ngo bafashe iperereza ririmo gukorwa.

Yasezeranyije ubufasha Ntamezayino wakorewe urwo rugomo, bamufasha kumenya abamwangirije urutoki, kandi ko ubuyobozi n’abaturage bazamuba hafi kugira ngo urutoki rwe rukomeze rugire umusaruro.

Abana bombi bararohamye, umwana mukuru abanza kubura, nyuma aza kuboneka yashizemo umwuka. Aha umurambo we abaturage bari bawuzanye kwa muganga bawutwaye mu ngobyi ya kinyarwanda

Aho abo bana barohamye, ngo ni ahantu hasanzwe hanyurwa n’abaturage kuko nta mugezi munini uhari, ahubwo ngo ni umugende muto, ariko iyo imvura iguye cyane, amazi aturuka hejuru mu birunga ni yo aza akawuzuza cyane bikanagorana kuhanyura.

Uko rero ngo ni ko byagenze, abana bavuye kugura amakara basanga amazi y’imvura yari yaraye igwa ndetse n’uwo munsi ku wa gatatu yaguye, uwo mugende uruzura, bagerageje kwambuka amazi arabakubita, abarusha imbaraga bombi bagwamo.

Umuturage utuye hafi y’aho impanuka yabereye ngo yarasohotse abona umwana w’imyaka ine ari mu mazi ariko agihumeka, mu gihe umukuru wa cumi n’ine we, amazi yari yamumanuye hepfo bamukuramo atagihumeka.

Umunyamabanga Nshingwabikorwa w’Umurenge wa Jenda avuga ko icyo bahise bakora bakimara kumva iby’iyo mpanuka, ngo bajyanye abana bombi ku kigo nderabuzima cya Bigogwe, kugira ngo uwari agihumeka yitabweho, ubu ngo ameze neza nta kibazo.

Uwo barohoye yamaze gupfa,na we yajyanywe kwa muganga kugira hakorwe ibizamini byo gusuzuma umurambo, kuko ariko biteganywa n’amategeko,ngo umuntu wese wapfuye mu buryo butunguranye kandi atari kwa muganga agomba gukorerwa ibyo bizamini mbere y’uko ashyingurwa.Uwo mwana wapfuye ngo yashyinguwe tariki 19 Ugushyingo 2020.

Imvura imaze iminsi igwa kandi ngo yanangije imyaka mu mirima aho mu Murenge wa Jenda, kuko ngo bagira ikibazo cy’amazi aturuka mu birunga amanuka ari menshi, kandi no kuyaha inzira bikozwe n’imiganda y’abaturage gusa ngo usanga bidahagije.

Icyakora ngo ikibazo kirazwi ku rwego rw’Akarere ndetse ngo kakoze n’ubuvugizi ku buryo ngo bategereje icyo inzego zibifite mu nshingano zizafasha.

Mu rwego rwo gukumira ibiza muri aka gace, Umurenge wa Jenda ku bufatanye n’Akarere ka Nyabihu ndetse n’abaturage babinyujije mu muganda, baciye amaterasi ku musozi wa Rubare, kuri hegitari 24 mu rwego rwo kongerera ubutaka agaciro, ndetse no kuburinda gutwarwa n’amazi amanuka ku misozi.

Abaturage bavoma amazi begerejwe n’uruganda rw’icyayi rwa Nyabihu

Umuyoboro w’amazi washyikirijwe abaturage ufite ibirometero 3,7km, ukazagera ku baturage ibihumbi 3000 bagizwe n’imiryngo 500.

Uwingabire Christine, umwe mu baturage, avuga ko batari bafite amazi meza, n’ushaka amazi meza bikamusaba gukora urugendo rurerure.

Agira ati “Ikibazo cy’amazi cyari gihari, amazi twari dufite ni uyu mugenzi utemba kandi uba urimo umwanya cyane ku buryo bawukandagiramo hakaba n’abawitumamo, umuntu wageragezaga gushaka amazi meza yakoraga urugendo rw’ibirometero birenga bitatu kandi na bwo agatega, naho wahagera ukahasanga abantu benshi ukamara umunsi”.

Amazi uruganda rwa Nyabihu rwashyikirije Akarere ka Nyabihu kugira ngo akoreshwe n’abaturage, yahawe n’ikigo cy’amashuri cya Cyamabuye. Munyandinda Claver umuyobozi wacyo avuga ko baruhuye abana.

Umugezi w’amazi washyizwe ku ishuri rya Cyamabuye

Ati “Uyu muyoboro w’amazi tuwubonye tuwukeneye, twakoreshaga Nyamukongoro kandi tutayizeye, abana batindaga kuza ku ishuri abandi bagasiba kubera kujya gushaka amazi kure, ariko ubu bazajya bavoma hafi babone umwanya wo kujya ku ishuri badakererewe, ikindi banywaga amazi mabi bakarwaragurika, turizera ko bigiye guhinduka”.

Ikigo cya Cyamabuye cyatangiye mu 1960 abakizeho bose bakoreshaga amazi mabi, ndetse benshi bagahorana isuku nke kubera kutagira amazi meza.

Mu gihe abana biga bakagira umwanya wo gukina bakagira inyota bakabona amazi yo kunywa, Munyandinda avuga ko abana bahiga batagiraga amazi meza yo kunywa.

Uruganda rw’icyayi rwa Nyabihu rwatanze umuyoboro w’amazi, ruvuga ko aya amazi agiye gufasha abaturage baturiye uruganda nk’imwe mu nyungu yo kubana na bo neza.

Thushara Pinidiya, umuyobozi wa Nyabihu Tea Factory, avuga ko uyu muyoboro w’amazi bawubatse bafatanyije n’umuguzi w’cyayi cya Nyabihu uba mu Bwongereza witwa Taylors of Harrogate.

Nyamukongoro umugezi usanzwe unyura mu cyayi ni wo bavomaga

Agira ati “Iki si cyo gikorwa cya mbere dukoze mu kubana neza n’abaturage bakaba n’abahinzi b’icyayi, uyu ni umusaruro w’imikoranire myiza mu kwiteza imbere, kuko uyu muguzi atugurira kubera aba baturage bahinga icyayi, yishimiye icyayi bahinga adufasha kubagezaho ibikorwa bibateza imbere”.

Thushara Pinidiya avuga ko muri 2018 bari batanze undi muyoboro w’amazi wa Cyashamba, ndetse bubaka n’ishuri ababyeyi basoroma icyayi basigamo abana b’incuke.

Agira ati “Iyo umuturage agiye gushaka amazi kure ntabasha gukora akazi ke neza, iyo umuturage akoresha amazi mabi ararwaragurika iminsi yo gukora ikagabanuka, ibi kandi bijyana no gusarura icyayi ahetse umwana, akagira umwanya wo kujya kumuha ibyo kurya, cyangwa akamusiga mu baturanyi ntiyitabweho uko bikwiye, twasanze kubashyiriraho ishuri abana basigaramo bakiga kandi bakitabwaho bituma ababyeyi bakora batekanye, ibi bijyana no kubaha amazi meza kuko bizagabanya akazi ko gushaka amazi no kubarinda kurwara”.

Ibi bikorwa byo kugeza amazi meza ku baturage ba Karago cyatwaye ibihumbi 20,710 by’amadolari ya Amerika, ibikorwa ubuyobozi bw’uruganda buvuga ko bizakomeza kugezwa ku baturage mu kubafasha kwiteza imbere.

Ubuyobozi bw’akarere n’uruganda bahana ibimenyetso by’amazi

Habanabakize Jean Claude, umuyobozi wungirije ushinzwe ubukungu n’iterambere mu Karere ka Nyabihu, avuga ko kwegereza amazi meza abaturage bibarinze indwara ziterwa n’umwanda, n’umwanya munini bakoreshaga bashaka amazi meza.

Uyu muyobozi avuga ko nubwo Akarere ka Nyabihu gafite amazi kugera kuri 82%, imirenge yegereye ibirunga nka Kabatwa na Mukamira ifite ikibazo cy’amazi nubwo hari icyizere ko umwaka wa 2020 uzarangira bayabonye avuye ahitwa Kagohe.

Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Twizere Karekezi, yavuze ko gufatwa kwa Nsanzimana byaturutse ku makuru yatanzwe n’abaturage.

Ati “Abaturage bari bafite amakuru ko Nsanzimana akora inzoga zitujuje ubuziranege, barabitubwiye tujyayo dusanga koko akora izo nzoga. Byaje kugaragara ko atari ubwa mbere Nsanzimana afatwa akora ziriya nzoga”.

Ku rubuga rwa Polisi bavuga ko ubwo abapolisi bageraga mu rugo kwa Nsanzimana basanze mu nzu ye harimo litiro 1,980 z’inzoga yari amaze gukora.

Umuvugizi wa Polisi mu Ntara y’Iburengerazuba yaboneyeho kongera gukangurira abaturage kwirinda kunywa inzoga zitujuje ubuziranenge bitewe n’uko zishobora kugira ingaruka ku buzima bwabo ndetse no ku mutekano.

Ati “Ibi ni byo duhora dukangurira abaturage, inzoga zitujuje ubuziranenge zigira ingaruka ku buzima bw’umuntu no ku mutekano, ntabwo byemewe gukora ziriya nzoga. Abantu bakora ziriya nzoga bazikorana isuku nkeya ndetse n’ibyo bazikoramo ntabwo bizwi, bazikora bibwira ko tutabareba, ariko baribeshya kuko mu mikoranire myiza n’abaturage tuzajya tubafata”.

CIP Karekezi yashimiye abaturage bakomeje gutanga amakuru, anabasaba gukomeza ubwo bufatanye mu kurwanya ibyaha no kubikumira bitaraba.

Yabagaragarije ko ibyaha byinshi bikunze kugaragara bijyanye no kurwana ndetse n’amakimbirane yo mu miryango akenshi bikorwa n’abanyoye inzoga zitujuje ubuziranenge.

Si ubwa mbere muri aka Karere ka Nyabihu hagaragaye abakora inzoga zitujuje ubuziranenge, kuko no mu ntangiriro z’uku kwezi hari undi muturage Polisi yari yafashe azikora.

Ingingo ya 5 y’Iteka rya Minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira inzoga zikozwe mu buryo budakurikije ibisabwa n’amabwiriza y’ubuziranenge n’andi mategeko mu biyobyabwenge byoroheje.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni eshanu (5.000.000 FRW) ariko atageze kuri miliyoni icumi (10.000.000 FRW) ku byerekeye ibiyobyabwenge byoroheje.

Ku rubuga rwa Polisi y’u Rwanda baravuga ko uwo muturage yafashwe nyuma y’amakuru yatanzwe n’abaturage.

Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Twizere Karekezi, yavuze ko Segahutu yari yarakoze igisa nk’uruganda iwe mu rugo, kuko ni naho ziriya nzoga zafataiwe.

Yagize ati “Tumaze kumenya ayo makuru twateguye igikorwa cyo kujya iwe kureba, twasanze ahafite igisa nk’uruganda kuko twasanze amaze gukora litiro 1000 ategereje abakiriya be baza kuzirangura. Hari kandi n’ibindi bikoresho bitandukanye yifashisha akora iyo nzoga”.

CIP Karekezi yavuze ko Segahutu iyo akora iriya nzoga yifashisha ibintu bitandukanye birimo isukari ndetse n’umusemburo wa Pakimaya. Yakomeje avuga ko uruvange rw’ibintu yifashisha bitizewe, bikaba ari byo bitera imyitwarire itari myiza ababinyoye.

Yagize ati “Nk’uko inzoga ubwayo yitwa (Dunda Ubwonko) abayinyweye iyo bamaze gusinda bararwana bagakora ibyaha bitandukanye birimo gukubita no gukomeretsa, amakimbirane mu miryango ndetse n’urundi rugomo rutandukanye.

Iriya nzoga kandi ishobora kugira ingaruka ku buzima bw’uwayinyoye akaba yakwitaba Imana cyangwa ikamutera uburwayi kubera umwanda bayikorana”.

Umuvugizi wa Polisi yakanguriye abaturage kwirinda izo nzoga bakajya bihutira gutanga amakuru, anashimira abakomeje gufatanya na Polisi mu kurwanya izo nzoga ndetse n’ibindi byaha batangira amakuru ku gihe.

Inzoga zahise zimwenwa, naho nyirazo Segahutu Yotam ashyikirizwa ubuyobozi bw’inzego z’ibanze acibwa amande hakurikijwe amategeko.

Si ubwa mbere mu Karere ka Nyabihu hafatirwa abantu bakora inzoga zitemewe, kuko mu kwezi gushize kwa Nzeri, Polisi yakoze igikorwa cyo kurwanya abakora inzoga zitujuje ubuziranenge hafatwa litiro zirenga 1,900.

Ingingo ya 5 y’Iteka rya minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo, rishyira inzoga zikozwe mu buryo budakurikije ibisabwa n’amabwiriza y’ubuziranenge n’andi mategeko mu biyobyabwenge byoroheje.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni 20, ariko atarenze miliyoni 30, ku byerekeye ibiyobyabwenge bihambaye.

Nyuma yo guhabwa amabati abasenyewe n’ibiza bavuga ko bagiye kwishakamo ibisubizo bakayasakara

Nyabihu ni kamwe mu turere twagizweho ingaruka n’ibyo biza, aho imiryango ituye mu mirenge inyuranye yasenyewe n’ibiza bamwe bikabambura ubuzima, inzu, ibiraro, n’ibindi bikorwa remezo bigasenyuka.

Mu guhabwa ubufasha bwihuse, imwe mu miryango yagizweho ingaruka n’ibi biza yabaye icumbikiwe mu mashuri, ariko kugeza ubu yose yamaze kuvanwa mu mashuri, imwe ikaba icumbikiwe n’abaturanyi mu gihe indi miryango yafashijwe n’imirenge ituyemo kubona aho iba icumbitse.

Mu kumenya neza uko ubuzima bw’abo baturage buhagaze kugeza ubu, Kigali Today yasuye imwe mu mirenge yazahajwe n’ibyo biza by’imvura ari yo Rugera, Rurembo, Kintobo, Karago na Rambura, ahasenyewe imiryango igera kuri 400 ubu ifite ubushobozi ikaba yiyubakira igafashishwa isakaro.

Bamwe mu bayobozi baganiriye na Kigali Today baremeza ko bakomeje gushaka igisubizo kuri icyo kibazo, aho imiryango yahuye n’ibiza yakomeje gufashwa kubona inzu zisimbura izasenywe n’ibiza.

Umukozi ushinzwe imibereho myiza y’abaturage mu Murenge wa Rugera Gahima Kabera Gerald, agira ati “Rugera ni umwe mu mirenge yazahajwe n’ibiza mu buryo bukomeye aho abagera ku 115 bahuye n’ibiza birabasenyera bamwe bajyanwa gucumbika mu mashuri”.

Ibiraro byagiye byangizwa n’ibiza by’iyo mvura

Uwo muyobozi avuga ko abo bahuye n’ibiza batagicumbikiwe mu mashuri, aho ubuyobozi bwabafashije bubakodeshereza amazu, ubu abashoboye kwizamurira inzu bakaba bafashwa kubona isakaro n’ibindi bikoresho.

Agira ati “Ubu nta n’umwe usigaye mu mashuri kuko hari inkunga yatanzwe n’akarere yo gufasha bamwe kuba twabakodeshereza abandi bakakirwa n’abo bafitanye isano.

Ubu turi gufasha abari kwiyubakira, aho turi kubagezaho isakaro. N’ubu tuvugana tugiye gutanga amabati ku nkunga ya Minisiteri ishinzwe ibikorwa by’Ubutabazi, ndetse hari n’umuterankunga witwa Bamporeze, abaturage 18 bagiye gufashwa aho umwe ahabwa amabati 30.

Muri ubwo bufasha bw’isakaro, Umuryango Nyarwanda uteganmiye kuri Leta witwa ‘Bamporeze’, ukomeje gutanga ubufasha bw’amabati aho ku wa mbere tariki 31 Kanama 2020 bafashije imiryango 21 yo muri iyo mirenge itanu aho yagenewe amabati 630, imisumari n’ibindi bikoresho byo gusakara”.

Nyagashubi Jean Damascène, ushinzwe gahunda y’ubufasha mu muryango Bamporeze, yavuze ubwo bufasha bw’amabati bujyanye na gahunda bafitanye n’Akarere ka Nyabihu mu gufasha abaturage kubona aho baba muri ibi bihe imvura itangiye kugwa.

Ati “Imiryango 21 ni yo twahaye amabati mu mirenge itanu yagizweho ingaruka n’ibiza, aho buri muryango twawugeneye amabati 30, ibiro 10 by’imisumari n’imigozi yo kuzirika ibisenge.

Ni igikorwa kitari gisanzwe kuko dusanzwe dukora gahunda ijyanye n’iterambere rirambye, aho imiryango itishoboye twayishishikarizaga kujya mu matsinda bitoza kwizigamira. Ibi biza byaraje bisa n’aho bibasubiza inyuma, tubona ko bigiye guca intege imishinga yabo, byabaye ngombwa ko tubaremera tubaha amabati mu kubakura mu bibazo cyane ko hiyongereyeho n’icyorezo cya COVID-19”.

Abaturage barashimira ubuyobozi bwababaye hafi muri ibyo bibazo

Musengimana Petronille wo mu Murenge wa Rugera, ibiza byasenyeye inzu, arishimira imfashanyo y’amabati yahawe n’umuryango Bamporezi.

Agira ati “Naje gufata amabati twemerewe n’umuterankunga Bamporeze. Bakimara kubitubwira, ibyishimo byarandenze bampamagaye ngo nze kuyafata ibyishimo birushaho. Inzu narubatse igeze mu madirishya nari narategereje ko amabati aza ngasakara, ubu abafundi barazinduka bayasakaye. Ndashimira na Perezida wa Repuburika wadusuye mu murenge wacu nyuma y’ibiza, ubuyobozi ntibwahwemye kutwitaho mu bibazo byatugwiriye”.

Perezida Kagame yahise asura Nyabihu mu duce twari twugarijwe n’ibiza

Dukuzumuremyi Jean Baptiste na we wahawe amabati, ati “Hari mu ijoro ndyamye imvura iragwa inzu ingwaho njye n’umugore turarokoka.

Twamaze ukwezi tuba mu mashuri ariko ubu ncumbikiwe n’umuturanyi. Kuba mbonye amabati biramfashije, inzu nari nyujuje ariko nta mabati nari mfite kandi imvura yatangiye kugwa. Dushimiye ubuyobozi n’umuryango Bamporeze uduhaye amabati”.

Iyi nzu abagize Koperative KOGUGU bavuga ko akarere kayibakodesha ariko ntikabishyure

Aya mafaranga agera kuri miliyoni imwe n’ibihumbi 300, abagize iyi koperative bavuga ko kutayishyurwa byadindije ubukungu bwayo.

Umwe muri bo yagize ati “Ni inzu Koperative yahoze ikoreramo akarere kaza kuyidukodesha, kayigira ububiko babikamo sima, ikindi gice gicumbitsemo abapolisi.

Twari twumvikanye ko kazajya katwishyura amafaranga ibihumbi 100 buri kwezi, none kuva mu ntangiro za Nyakanga 2019 kugeza magingo aya muri 2020, umwaka urarenga batatwishyura; turi kubara amafaranga arenga miliyoni imwe n’ibihumbi 300 tutarishyurwa”.

Nk’uko bamwe mu bagize Koperative KOGUGU bakomeza kubivuga, iruhande rw’ayo mazu iyi koperative ihafite ikigega bakoreshaga mu guhunikamo umusaruro w’ibirayi uri hagati ya toni ebyiri n’eshanu, bikaba byarafashaga abanyamuryango kubona imbuto bitabagoye ndetse bagasagurira amasoko.

Bongeraho ko hari n’umurima byegeranye babujijwe guhinga kuko ngo ari mu mbago z’ahubatse akarere, ngo bari basezeranyijwe kuzahabwa ingurane y’ibi bikorwa byose, ariko barayitegereje na n’ubu ntibayibwa.

Ibi byose ngo bikomeje gushora iyi koperative mu gihombo nk’uko bakomeza babivuga.

Undi yagize ati “Turi mu mbago z’Akarere kuko mu myaka yashize hari ibindi bikorwa by’abandi byahozemo ariko baza kuhimurwa twe dusigaramo. Tuhafite n’umurima twakoreragamo ubuhinzi ariko batubujije kongera kuwuhinga.

Duhora tubasaba kwihutisha gahunda yo kutwimura kugira ngo turebe ko twakomereza ibikorwa byacu ahandi ntibikorwe, kandi uko batinda kutwishyura ayo mafaranga ni nako Rwanda Revenue Authority ikomeza kutubaraho umwenda n’ubukererwe”.

Iki kigega cyakoreshwaga mu guhunikamo imbuto y’ibirayi bigatuma abanyamuryango bayibona bitabagoye bakanasagurira amasoko

Yongeraho ko “Nk’ubu mu gihe cya Coronavirus andi makoperative yabashije kugoboka abanyamuryango bayo, ariko twe ntibyashobotse kuko tudafite ubwinyagamburiro. Twifuza ko akarere kadukura mu gihirahiro, kakatwishyura amafaranga yacu cyangwa kakaduha ingurane nk’uko bakomeza babivuga ariko tukaba tutabona bikorwa”.

Umunyamabanga nshingwabikorwa w’Akarere ka Nyabihu Ndizeye Emmanuel, avuga ko akarere kahagaritse amasezerano y’ubukode n’iyi Koperative, kuko gateganya kuyiha ingurane y’ubutaka cyangwa amafaranga, dore ko ibikorwa byayo biri mu mbago z’ubutaka bw’akarere.

Bityo ngo nta mpamvu kari gushingiraho kishyura iyi Koperative ubukode bw’amazu kandi amasezerano yari yarahagaritswe bagitegereje ko icyo cyemezo gishyirwa mu bukorwa.

Yagize ati “Ibikorwa by’iyi Koperative biri mu butaka bw’ahubatswe akarere, twaje gusanga icyiza ari uko twakumvikana tukababarira kugira ngo turebe uko tubimura.

Yaba kubaguranira ubutaka cyangwa kubishyura amafaranga, ikizemeranywaho hagati y’impande zombi twiteguye kugikora. Icyabanje gukorwa ni ugusaba urutonde rw’abanyamuryango bose, bagasinya bemera iyo ngurane, ni byo byari bigikorwa kugeza ubu”.

Iyi nyubako ubu ikoreshwa mu kubikwamo ibikoresho nka sima n’ibindi

Yongeraho ko “Ikibazo cy’amafaranga y’ubukode abagize iyi Koperative bavuga, mu gihe cyose twari twarasinyanye kontaro, amafaranga yabo yose yishyuwe Koperative, gusa iyo kontaro yaje guhagaraga kuko n’inyubako akarere katari kakiyikoresha, urumva ko nta cyagombaga gushingirwaho kongera kwishyura andi mafaranga y’ubukode.

Icyakora wenda mu gihe byagaragara ko hari ibyo akarere kahakorera, abanyamuryango bafite uburenganzira bwo kwegera ubuyobozi bw’Akarere bagasuzumira hamwe imiterere y’ikibazo byaba ngombwa bakishyurwa”.

Uyu muyobozi avuga ko bagiye kwihutisha gahunda zo kwimura iyi Koperative ku buryo bitarenze uku kwezi kwa Kanama uyu mwaka, hazaba hafashwe icyemezo cy’ikigomba gukorwa hagati yo gutanga ingurane y’amafaranga cyangwa ubutaka.

Koperative KOGUGU igizwe n’abanyamuryango 120 bibanda ku gihingwa cy’ibirayi mu mirima bakodesha bakanahunika imbuto yabyo. Ikorera mu Kagari ka Rubaya mu Murenge wa Mukamira Akarere ka Nyabihu.

Abibumbiye muri Koperative Tunoze ubwubatsi bababajwe no gukurwa mu mitungo yabo

Ni ikibazo kimaze ukwezi, aho Akarere ka Nyabihu kemeza ko iyo Kampani ari yo ikwiye gukora uwo murimo wo gucukura umucanga wifashishwa mu bwubatsi wo mu mugezi wa Nyamutera, kuko ngo ari yo ibifitiye icyangombwa cyemewe n’amatekeko, nk’uko Umuyobozi w’ako Karere Mukandayisenga Antoinette abivuga.

Agira ati “Uko twasanze ikibazo giteye, ni uko Kigali Trust yasabye icyangombwa irakibona, mu gihe abagize Koperative Tunoze ubwubatsi basabye icyangombwa bagarukira mu Karere ntibakomeza ngo bagere mu zindi nzego zibishinzwe.

Umuyobozi w’Akarere ka Nyabihu Mukandayisenga Antoinette

Ni yo mpamvu Kigali Trust irimo kuko ifite icyangombwa cyemewe gukora ako kazi. Gusa abaturage turabasaba kuba bashaka ibyangombwa igihe icya Kigali Tust cy’imyaka itanu cyarangira, na bo bakaba basaba kuhakorera”.

Ibyo ubuyobozi bw’akarere buvuga, abo baturage bibumbiye muri iyo Koperative bo ntibabyishimiye, kuko bemeza ko aho hakorerwa ibyo bikorwa ari mu butaka bwabo kandi ngo batanzeho amafaranga menshi, bakavuga ko badashobora kwamburwa ibyabo barebera.

Hategekimana Jean Claude ati “Iriya Kampani ni iyo kuduhombya gusa, baje bavuga ko tugiye gukorana, hari ibikorwa byacu twahubatse bifite agaciro ka miliyoni umunani, baba baratwirukanye.

Noneho akarere kaba karaje baratwumvikanisha ndetse barabyandika baranadufotora, dore ifoto duhagararanye. Abayobozi bakimara kuva aho, abo bagabo barongera baratwirukana ubu turicaye mu gihe aha hari hadutunze, ni na ho twifashishije dukemura bya bibazo byo kugwingira mu bana”.

Abo baturage barasaba Kampani ya Kigali Trust gushaka ahandi ikorera aho kwigabiza ibyabo kandi byarabavunnye, bagasaba n’ubuyobozi bw’akarere kutabirengagiza buzi neza imvune bahuye na yo batunganya ubwo butaka bw’inkengero z’uwo mugezi.

Umwe mu migezi icukurwamo umucanga

Nzamuye Eric ati “Ubutaka dukoreraho ni abanyamuryango bikusanyije turabuhuza, RCA iza kudusura iduha icyangombwa, nyuma akarere karaza kati iyi micanga ni iy’akarere mureke dukorane.

Twaremeye turakorana nyuma yaho dutakambira akarere tukabwira ko turi mu bihombo kuko amafaranga menshi ari kujya mu isosiyete yishyuriza akarere”.

Arongera ati “Byageze n’aho dusaba icyangombwa cyo gucukura mu buryo bwemewe n’amategeko, akarere karatudindiza iki kibazo kigera n’ubwo cyeguza na bamwe mu bayobozi b’akarere turongera turikorera.

Ni bwo muri iyi minsi tugiye kubona tubona haje Kampani yitwa Kigali Trust, akarere karatwumvikanisha turakorana, ntihashize ibyumweru bibiri, iyo Kampani iti nimuvemo, byaratubabaje kuvanwa mu mitungo yacu twavunikiye.

Ni yo mpamvu iki kibazo kigomba gukemurwa n’ubuyobozi bukuriye akarere kuko akarere ko tubona katatwitayeho”.

Abo baturage bahuriye muri Koperative Tunoze ubwubatsi, bavuga ko aho iyo Kampani ibirukanye mu mitungo yabo, bikomeje kubagiraho ingaruka z’ubukene mu miryango.

Umucanga ni imari ikomeye mu Karere ka Nyabihu

Nyiramirimo Daphrose ati “Aha dukorera haratuvunnye ku buryo twakoze imihanda yadutwaye amafaranga menshi, hari hadutungiye imiryango kuko nabaga ngiye kugura akanyana Koperative ikanguriza.

Abana banjye bose barize, mbabwije ukuri nagize ikibazo umwana wanjye akorerwa ihohoterwa aterwa inda, ariko umwana naramureze muha amata, umukobwa wanjye asubira mu ishuri ubu yari ayarangije, hari hadufitiye akamaro”.

Mu kumenya icyo Kampani ya Kigali Trust ivuga kuri icyo kibazo, Kigali Today yegereye Mukeshimana Didas uyobora ibikorwa by’iyo Kampani mu Karere ka Nyabihu, avuga ko iyo Kampani idafitanye ikibazo n’abo baturage, ngo ni abanyamuryango bake bashatse kugumura abandi babangamira imikoranire y’abaturage n’iyo Kampani.

Yagize ati “Mbona Umuyobozi wa Koperative ari we uzana ibibazo byo gutuma imikoranire yacu n’abaturage igenda nabi, rwose abaturage ntacyo dupfa na bo, abaturage 340 bose nta kibazo bafitanye na Kampani”.

Umuyobozi wa Koperative Tunoze ubwobatsi, Hategekimana Jean Claude, we avuga ko ibyo ubuyobozi bwa Kigali Trust buvuga nta kuri kurimo, kuko ngo basohowe mu byabo birengegije amasezerano y’imikoranire bari baragiranye ubwo bari bahujwe n’ubuyobozi bw’akarere, bikarangira iyo Kampani ibirukanye kandi aho bakorera ari mu mitungo yabo yabavunnye.

Mu gihe hakomeje kutavuga rumwe hagati ya Koperative Tunoze ubwubatsi na Kampani ya Kigali Trust, Ikigo cy’Ubucukuzi bw’Amabuye y’Agaciro, na cyo cyamaze kwinjira muri icyo kibazo mu rwego rwo kugishakira umuti.

Kanyangira John, ushinzwe ubugenzuzi muri icyo kigo, avuga ko igikomeje guteza ayo makimbirane ari ihangana hagati y’umuyobozi wa Koperative n’ubuyobozi bwa Kigali Trust.

Agira ati “Kigali Trust ifite uruhushya rwo kwinura imicanga muri aka gace, ariko yahasanze abaturage bahakorera badafite icyangombwa, tuyisaba ko izakomeza gukorana n’abo baturage, kandi koko barakorana ariko hakabamo iyo koperative igizwe n’abantu 24, bakavuga bati aha mwarahadusanze, Kampani na yo iti nta ruhushya mufite”.

Kanyangira John Uuhinzwe ubugenzuzi mu Kigo cy’Ubucukuzi bw’Amabuye y’Agaciro

Arongera ati “Ikibazo nyamukuru kigaragara ndabona kiri hagati y’umuyobozi wa Koperative n’umuyobozi wa Kampani batumvikana, ubundi bapfaga igiciro Kampani yabaheragaho batumvikanagaho ariko cyari cyarakemutse, n’ubu mvuyeyo ntazi icyo bapfa, mvuyeyo nta kibazo nyamukuru menye ngo inzego z’ubuyobozi zibe zagikemura”.

Kugeza ubu uko kutumvikana kwa Kigali Trust na Koperative kirakomeje, aho bakomeje kurebana ay’ingwe bamwe bati “ntitwemera ko mwigabiza imitungo yacu muza gucukura umucanga”, abandi bati “tubifitiye ibyangomba mwe mudafite tugomba gucukura”.

Amakimbirane aba mu bucukuzi bw’umucanga mu Karere ka Nyabihu si aya none, kuko mu myaka ishize uwo mucanga ngo waba warabaye nyirabayazana mu iyegura rya bamwe mu bagize komite nyobozi y’Akarere ka Nyabihu, aho bakekwagaho ruswa muri ibyo birombe.

Ibyumba by’amashuri biri kubakwa bigiye kugabanya ubucucike mu mashuri

Ni igikorwa cyabaye ku itariki ya 27 Nyakanga 2020, cyateguwe na Kampani T.Commit Ltd, ifashwa n’Abanyarwanda baba mu gihugu cy’u Budage bahuriye mu mushinga witwa T.4188, usanzwe ufasha u Rwanda muri gahunda y’uburezi, bongera umubare w’ibyumba by’amashuri.

Abo bafundi n’abayede bagera ku 150 bahawe amahugurwa ku ikubitiro, ni abari kwifashishwa mu kubaka ibyumba bitanu by’amashuri n’icyumba cy’umukobwa ndetse n’ubwiherero mu rwunge rw’amashuri rwa Nanga mu Kagari ka Rubaya mu Murenge wa Mukamira mu Karere ka Nyabihu.

Umuhuzabikorwa w’umushinga T.4188 mu Rwanda, Kalimba Banga Claude, yabwiye Kigali Today ko kwigisha abaturage uburyo bwo kwirinda COVID-19 biri mu nshingano zabo nk’abantu bakorana umunsi ku wundi.

Basabwe kwirinda COVID-19 bivuye inyuma

Agira ati “Dushaka kwigisha abaturage benshi ibijyanye na COVID-19 uburyo bayirinda. Ni muri urwo rwego twahereye ku bafundi twakoranye twubaka ibi byumba bitanu by’amashuri n’icyumba cy’umukobwa, ubwiherero n’ibindi, bahuye n’ingaruka za COVID-19 nk’uko igihugu cyose cyahuye na yo. Ni uburyo bwo kubigisha ibijyanye no kwirinda COVID-19 twirinda ko bamera nk’abatarakoranye na Kompanyi T.Commit LTD”.

Uretse guhabwa izo nyigisho zo kwirinda COVID-19, abo baturage banahawe ibikoresho byo kubafasha mu kwirinda icyo cyorezo birimo isabune, ibase, igikombe, agapfukamunwa ndetse n’ibiribwa byo kubafasha kuva mu bibazo batewe na COVID-19, biromo umuceri, amavuta na kawunga.

Abafundi mu kazi ngo bajyaga birengagiza amabwiriza yo kwambara neza agapfukamunwa

Ni inyigisho zakiriwe neza n’abo baturage, biyemeza gukangurira abandi kwirinda COVID-19 baharanira kuyirwanya bivuye inyuma, dore ko Nyabihu ari kamwe mu turere twakunze kugaragaramo icyo cyorezo, bavuga ko bagiye guharanira kurushaho kwirinda banarinda abandi.

Uwineza Francine ukora umwuga wo guhereza abafundi, ati “Ndashimira uyu mushinga waduhaye akazi ukaba unaduhuguye. Dusanzwe tuzi amabwiriza yo kwirinda COVID-19 mu kazi dukaraba, duhana intera nubwo wasangaga tutabisobanukiwe neza, ariko uyu munsi twize byinshi bizadufasha kwirinda no kurinda abandi, dore ko baduhaye ibikoresho by’isuku birimo n’udupfukamunwa”.

Umufundi witwa Ndindiriyimana Fidèle, ati “Turirinda nubwo bamwe bibagora ugasanga barabyibagiwe ugasanga agapfukamunwa bakamanuye. Ariko kuva uyu munsi amahugurwa duhawe aratwubatse, tugiye kuyirinda twivuye inyuma”.

Abafundi n’abayede biyemeje kurwana COVID-19

Ibyumba bitanu by’amashuri n’icyumba cy’umukobwa byubakwa muri uwo Murenge wa Mukamira, bifite akaciro k’amafaranga y’u Rwanda angana na miliyoni 153, ngo bije gukemura ikibazo cy’ubucucike mu mashuri hagamijwe no kurushaho kwirinda icyorezo cya COVID-19,nk’uko Kalimba Banga Claude yabibwiye Kigali Today.

Asaba buri wese mu bahuguwe gukurikiza amabwiriza ya Leta mu kwirinda COVID-19 no kugeza ubwo butumwa ku bandi hagamijwe guhashya icyo cyorezo.

Ati “Ubutumwa tubaha ni ugukomeza gukorana umurava kandi mwubahiriza amabwiriza ya Leta nk’uko twabibasobanuriye, ikindi mudufashe muhugure abandi duhashye burundu COVID-19”.

Ubuyobozi bw’Umurenge wa Mukamira buvuga ko muri uwo murenge hakiri abantu batarumva neza ububi bwa COVID-19, nubwo ubuyobozi budasiba kubigisha.

Bushimira abo Banyarwanda bakomeje kubaka amashuri muri uwo murenge no gutera inkunga ibikorwa bikangurira abaturage kurwanya COVID-19, bunasaba abo bahuguwe kurushaho kubahiriza amabwiriza yo kwirinda icyo cyorezo nk’uko bivugwa n’Umunyamabanga nshingwabikorwa w’Umurenge wa Mukamira, Munyansengo Fred.

Bahawe ibikoresho bibafasha kwirinda COVID-19

Ati “Muri ibi bihe icyo dukomeza kubwira abaturage ni uko COVID-19 igihari. Hari ubwo ubona rimwe na rimwe abaturage bateshutse ugasanga hari aho bagiye mu tubari, bagiye gusangira kandi bitemewe. Icyo tubwira abaturage ni ugukomeza kwirinda kandi bakubahiriza amabwiriza yose duhabwa n’inzego z’ubuyobozi zidukuriye”.

Muri abo bafundi n’abayede bahawe izo nyigisho, hatumiwemo n’abaturage 15 bo muri ako gace bakennye kurusha abandi, mu rwego rwo kubafasha kuva muri izo ngaruka batewe n’icyo cyorezo.

Bipfuyekubaho yafashijwe n’umwana we gutahuka ava mu mashyamba ya Kongo

Uwo mugabo utuye mu Kagari ka Gakoro mu Murenge wa Rugera mu Karere ka Nyabihu, yari afite ipeti rya Caporal mu ngabo za Ex-FAR. Avuga ko bakimara kuneshwa ku rugamba, yahunganye na bamwe mu bayobozi bari bagize Guverinoma, ajya muri Kongo ahitwa i Masisi.

Uwo mugabo ubwo yageraga mu ishyamba yari kumwe n’umugore we bari babyaranye rimwe, ariko ngo uwo mugore aza kugwa mu mirwano nyuma y’uko umugabo we yinjiye mu mitwe irwanya u Rwanda amusigira abana babiri.

Uwo mugabo ngo yashatse undi mugore ari na we bari kumwe bakaba bamaze kubyarana abana bane barerana n’abandi babiri b’umugore mukuru.

Bipfuyekubaho avuga ko ubwo bari mu mashyamba ngo bitaboroheraga kuko imbunda za rutura ngo bari barahunganye bahise bazamburwa, izo bakoreshaga mu mirwano zikaba ari izo bamburaga aba Maimai, izindi bakazambura ingabo za Kongo mu gihe ngo bazigabyeho ibitero.

Avuga ko umuntu uri mu mashyamba bitamworohera kumenya uko u Rwanda ruteye, kuko akenshi abayobozi babo bababwira amakuru y’ibinyoma, aho bamaze kumvishwa ko nta mutekano uri mu Rwanda.

Agira ati “Muri Kongo twabagaho twirwanaho, abadukuriye batwangisha igihugu, batubwira ko nta mutekano gifite. Ikindi cyaduteraga imbogamizi ni uko nta tumanaho ryabonekaga ngo tumenye uko u Rwanda rumeze, ibyo byose byaduteraga ibibazo tukaguma mu ishyamba dushaka uburyo twazafata igihugu nk’uko abayobozi bacu babitwizezaga”.

Andi makuru y’ibinyoma yabahezaga mu ishyamba, ngo ni uko babwirwaga ko mu Rwanda hatuwe n’abanyamahanga, ngo babwirwaga ko Abanyarwanda bahunze bashira mu gihugu, ngo na bo bakwibuka uburyo bahunze ari benshi bakumva ko u Rwanda rutuwe n’abanyamahanga nk’uko babibwirwaga.

Uwo mugabo avuga ko nubwo bizezwaga ko bazafata igihugu, ngo hari ubwo byageraga agacika intege, akumva ko ubuzima babayeho mu ishyamba ntaho buzabageza.

Avuga ko byageze aho batangira kubara ubukeye, aho baraswagaho bamwe bakagenda bapfa abandi bakicwa n’indwara zinyuranye, ngo ni bwo yatangiye gushyira ubwenge ku gihe atangira gutekereza u Rwanda.

Ati “Twageze aho tubona ko kuba bwije bugacya umuntu aba yaramye, ariko ukumva ko ibyo bakubwira ari ko bimeze byanze bikunze umugambi tuzawugeraho, ariko uko bwije n’uko bukeye ni bwo nanjye natangiraga gushyira ubwenge ku gihe, nareba ingaruka z’uburwayi aho udashobora kwivuza, bakurasa nk’akaguru ukabura uko wivuza, ingaruka ziba nyinshi noneho no gucengerwa no kumva amakuru yo hirya no hino bigatuma numva uko igihugu cy’u Rwanda giteye”.

Nyuma yo kubona ibyo byose, ni bwo mu mwaka wa 2011 yigiriye inama yo kohereza umwana we mukuru w’umukobwa mu Rwanda, ari na bwo yamenye amakuru nyayo atangira gushaka uburyo bwo gutoroka ishyamba.

Ati “Nohereje umwana wanjye aza kundebera, ageze mu Rwanda asanga ni amahoro. Ntabwo nahise menya amakuru kuko mu mashyamba itumanaho nti ryari ryoroshye, kujya kwitaba telepfone byasabaga kugenda iminsi itatu, namaze imyaka ibiri ntazi amakuru y’umwana nohereje mu Rwanda, nkeka ko yapfuye”.

Arongera ati “Nahuye n’umuntu wari uvuye mu Rwanda twari duturanye ampa nimero z’abo mu miryango yanjye ndabavugisha bambwira ko mu Rwanda ari amahoro, bikubitiraho n’uko urwandiko wa mukobwa wanjye yanyoherereje rwari rumaze kungeraho ansaba gutaha, ntangira imipango yo guhunguka”.

Gutoroka bagenzi be ataha mu Rwanda byaramugoye

Bupfuyekubaho wari umaze kumenya amakuru yo mu Rwanda, nk’umuntu washakaga gutahuka ntibyamworoheye, ngo yashatse uburyo yaca mu rihumye abayobozi be n’abasirikare 12 yari ayoboye.

Avuga ko byabaye ngombwa ko abeshya abamukuruye kugira ngo abone uburyo atoroka agataha mu Rwanda, kuko ngo uwo bamenyaga ko agiye gutaha yahitaga yicwa.

Yakoresheje amayeri yo gusaba ko ajya mu irondo ry’iminsi ibiri n’ingabo ze, nyuma yo kubimwemerera ngo yahise aca mu rihumye ingabo ze yerekeza inzira y’ishyamba n’umuryango we.

Ati “Ngeze hafi y’ahari umuryango wanjye nategetse ingabo gukambika aho, nzibeshya ko ngiye kuganiriza abaturage ngo turebe ko baduha ibyo kurya. Icyo gihe najyanye n’abasirikare babiri twari dufitanye umugambi wo gutoroka.

Ako kanya twahise dusiga izo ngabo aho, njyana na ba basirikare babiri tugeze ahari imuryango yacu twinjira ishyamba tugeze ahitwa i Ntoto ingabo za MONUSCO zitwuriza indege batugeza i Goma”.

Akomeza agira ati “I Goma twakiriwe neza badutekera imiceri, ibishyimbo baduha imyambaro, nuko batwuriza imodoka batugeza mu Rwanda i Mutobo, tumera nk’aho tugeze i Burayi”.

Uwo mugabo akigera mu Rwanda ngo umubyeyi we yaramutekesheje, amuha amasambu yo guhinga ubuzima bukaba bukomeje kugenda neza.

Ubu yarubatse, abana be babiri bakuru bariga, akomeje n’ibindi bikorwa by’iterambere aho ubu yamaze kugura isambu mu birombe bicukura umucanga, bikaba bimutungiye umuryango.

Bapfuyekubaho arasaba abakiri mu mashyamba ya Kongo gutaha

Uwo mugabo umaze imyaka isaga itandatu ahungutse, arasaba abo yasize mu mashyamba gutahuka.

Agira ati “Mu ishyamba baracyarimo, abagitsimbaraye nabifuriza gutahuka mu gihugu cy’amata n’ubuki bima amatwi ibyo ababakuriye bababeshya bababwira ko mu Rwanda nta mutekano urimo, umutekano urasesuye rwose mwitakaza ubuzima, nimutahuke mu gihugu cyababyaye”.

Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Karekezi avuga ko ziriya nzoga zafashwe mu kwezi kwa Kamena kose. Zikaba zarafashwe mu bihe bitandukanye.

Yagize ati “Hari hashize iminsi dufite amakuru ko hari abantu bava mu mirenge yo mu karere ka Gakenke bakanyura mu mirenge yo mu karere ka Nyabihu bagiye gucuruza ziriya nzoga mu karere ka Musanze. Muri Kamena nibwo twakoze imikwabu yo gufata izo nzoga, hari imodoka yo mu bwoko bwa DAIHATSU iheruka gufatirwamo litiro zirenga ibihumbi 2,200 indi ifatanwa litiro zirenga 1000 izindi twagendaga tuzifatana abantu bazitwaye ku magare na za Moto.”

CIP Karekezi yagaragarije abaturage ko ziriya nzoga zitujuje ubuziranenge zigira ingaruka ku buzima bwabo ndetse zikanaba isoko y’umutekano muke.

Ati “Inshuro nyinshi dukunze kubona ibyaha byakozwe n’abantu banyoye ziriya nzoga, ibyaha byo gukubita no gukomeretsa, gufata abagore n’abakobwa ku ngufu ndetse n’amakimbirane mu miryango.”

Iyi nkuru yatangajwe n’urubuga rwa Internet rwa Polisi iravuga ko Umuvugizi wa Polisi mu Ntara y’Iburengerazuba yanagarutse kuri bamwe mu baturage bacuruza mu tubari izi nzoga kandi babizi neza ko utubari tutemerewe gucuruza muri ibi bihe byo kurwanya icyorezo cya COVID-19.

Yasabye abaturage cyane cyane abayobozi b’imidugudu n’utugari ndetse n’abashinzwe umutekano muri izo nzego kujya batanga amakuru hakiri kare.

Ati “Turasaba abantu kwirinda ibintu bya ntiteranya, mujye mutanga amakuru, nimushaka mutwandikire ubutumwa bugufi . Abantu bahurira mu tubari ari benshi mutazi aho bavuye, umwe muri bo ashobora kwanduza abandi Koronavirusi bigakururira ibibazo akarere kose.”

Ingingo ya 5 y’Iteka rya minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira inzoga zikozwe mu buryo budakurikije ibisabwa n’amabwiriza y’ubuziranenge n’andi mategeko mu biyobyabwenge byoroheje.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranyije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Ikarita igaragaza aho Akarere ka Nyabihu gaherereye (mu ibara ry’umutuku)

Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Karekezi yavuze ko ku mugoroba Saa moya, Hitimana Emmanuel w’imyaka 34 n’umugore we Mukandutiye Liliane w’imyaka 28 bafatanyije gutwika umwana wabo w’imyaka 10.

Yagize ati “Nyina w’uriya mwana yagiye kureba amafaranga igihumbi aho yari ari arayabura, yegera umwana yumva arahumura amandazi amenya ko ari ya mafaranga yayaguzemo. Ubwo yahise afatanya n’umugabo we bafata intoki z’umwana wabo bazishyira mu ziko barazitwika.”

CIP Karekezi akomeza avuga ko ubwo batwikaga uwo mwana ngo yaratatse cyane abaturanyi barabyumva babimenyesha umuyobozi w’umudugudu na we atabaza Polisi iraza irabafata.

Iyi nkuru Polisi yatangaje ku rubuga rwayo rwa Internet ivuga ko umwana yahise ajyanwa kwa muganga naho ababyeyi be bashyikirizwa Urwego rw’Ubugenzacyaha rukorera muri sitasiyo ya Polisi ya Kabatwa kugira hakorwe iperereza.

Umuvugizi wa Polisi mu Ntara y’Iburengerazuba yaboneho gusaba ababyeyi ndetse n’abandi bantu bafite inshingano zo kurera kwirinda guhana abana mu buryo ndengakamere.

Yagize ati ‘Nta muntu ukwiye guhana umwana muri buriya buryo kabone n’iyo waba utaramubyaye. Nk’umubyeyi hari ukuntu wakosora umwana n’iyo wamuganiriza gusa ariko utamuhaye ibihano bibabaza umubiri.”

Yashimiye Umuyobozi w’Umudugudu watanze amakuru anasaba n’abandi kudahishira abakora ibyaha.

Itegeko n°71/2018 ryo ku wa 31/08/2018 ryerekeye kurengera umwana mu ngingo ya 28 ivuga ko umuntu wese uhoza umwana ku nkeke cyangwa umuha ibihano biremereye cyangwa bitesha agaciro harimo n’ibyo ku mubiri, aba akoze icyaha. Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarenze imyaka itatu (3) n’ihazabu y’amafaranga y’u Rwanda atari munsi y’ibihumbi magana abiri (200.000 FRW) ariko atarenze ibihumbi magana atatu (300.000 FRW).

Iyo icyaha kivugwa mu gika cya mbere cy’iyi ngingo kiviriyemo umwana ubumuga, igihano kiba igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW). Iyo icyaha kiviriyemo umwana urupfu, igihano kiba igifungo cya burundu.

Nkundibiza n’umugore we Nyirantegerejimana Clementine bishimira ubwuzuzanye burangwa mu rugo rwabo n’uburyo bafatanya imirimo yakundaga guharirwa abagore.

Nkundibiza aherutse kugaragara mu ruhame mu Mujyi wa Kigali ahetse umwana, mu nama yari yazanyemo n’umugore we.

Icyo gihe Nkundibiza yabwiye Kigali Today ati “Ubu meze neza, ndumva nezerewe cyane, bitewe n’uko ari umwana wanjye, kandi imbaraga ndazifite, jyewe n’iyo ndi mu rugo ndamuheka.”

Nkundibiza avuga ko hari abajya bamuseka cyane cyane abasaza n’abandi bagabo bagenzi be, bakamubwira ko aba abateza abagore, ariko kuri we ngo ntibimuca intege kuko icyo aba agamije ari ugufatanya n’umugore we mu mirimo.

Asanga imwe mu myumvire yaranze abo hambere ikwiriye guhinduka kuko igaragaramo ubusumbane no gukandamiza abagore.

Umugore we witwa Nyirantegerejimana Clementine avuga ko atita ku byo abantu bavuga by’uko yaba yararoze umugabo we ahubwo ngo kuba buzuzanya ni umusaruro w’amahugurwa bahawe yerekeranye n’uburinganire n’ubwuzuzanye.

Ati “Usibye no guheka umwana, n’iyo babonye umugabo agufasha imirimo yo mu rugo, bahita bavuga ko ari inganzwa. Twebwe ntabwo tureba ibyo abantu hanze bavuga, ahubwo tureba icyo bitugezaho mu iterambere.”

Uyu mugabo n’umugore bavuga ko uyu mwana wabo ajya yanga ko nyina amuheka, nyamara umugabo yamuheka agahita atuza mu gihe yari arimo nko kurira.

Indi mpamvu ngo biyemeje gufatanya ni nyuma y’uko basanze abagore bagira akazi kenshi urugero hakaba nk’igihe bamara guhinga, umugore agasubira inyuma agatera intabire wenyine, bagera mu rugo umugore akajya guteka ibyo kurya, ari nako umugore arwana no kwita ku bana nyamara umugabo we yiyicariye, aruhuka cyangwa se agatembera.

Minisiteri y’Uburinganire n’Iterambere ry’Umuryango (MIGEPROF) ibinyujije kuri Twitter, yifurije umunsi mwiza ababyeyi b’abagabo. Umunsi wahariwe kuzirikana ababyeyi b’abagabo wizihijwe hirya no hino ku isi kuri uyu wa 21 Kamena 2020.

Ubutumwa bwa MIGEPROF buragira buti “Umunsi mwiza w’abapapa ku babyeyi bose b’abagabo! Turashimira uruhare ntagereranywa rwabo mu guha abana uburere buboneye.”

Ubwo butumwa bukomeza bugira buti “Mu gihe twizihiza uyu munsi, turongera gukangurira abagabo/abahungu gukomeza kugira uruhare mu kubaka umuryango ushoboye kandi utekanye.”

SP Byuma Paul aganira n’abatwara ibinyabiziga

Ubuyobozi bwa Polisi y’u Rwanda bubitangaje mu gihe butangiza ubukangurambaga bwiswe ‘Rwanya covid-19’ bugamije kwigisha abantu ibyo bagomba kubahiriza mu kwirinda ikwirakwira ry’icyorezo cya COVID-19.

Kwambara neza agapfukamunwa, gukaraba kenshi intoki, kwirinda kuramukanya bahana ibiganza, gukora ingendo zitari ngombwa, kubahiriza amasaha yo gutaha no gusiga intera yagenwe hagati y’umuntu n’undi, ni byo Polisi y’u Rwanda isaba Abanyarwanda, igasaba abatwara abanyabiziga kubyibutsa abagenzi.

Umuyobozi wa Polisi mu Karere ka Nyabihu, SP Byuma Paul, avuga ko kwirinda icyorezo cya COVID-19 bifasha abaturage kugira ubuzima bwiza no gukorera mu bwisanzure ariko bukoreshejwe nabi babwamburwa, agasaba abaturage kwirinda ko basubizwa muri guma mu rugo.

Imodoka zambitswe ibirango bya Rwanyacovid-19

Ati “Tutitwaye neza ejo Nyabihu yashyirwa mu kato, abantu bakava Ngororero bakajya Rubavu badaciye Nyabihu, twumve ko uburenganzira twahawe tugomba kubwubahiriza”.

SP Byuma avuga ko abatwara abagenzi kuri moto bakunda inyungu bagakora amakosa yo gutwara abagenzi bakora ingendo mu Karere ka Rubavu kandi bitemewe.

Agira ati “Hari abamotari bakunda inyungu bakajyana abagenzi hafi y’Akarere ka Rubavu kugira ngo bakomereze mu Karere ka Rubavu cyangwa bakabakurayo babazana Nyabihu. Mushobora kutuzanira Corona kandi Leta yarafashe ingamba zo kuyiturinda. Ejo nagiye kubyuma bya Bigogwe nshyira imodoka ahantu mfata abamotari batandatu barimo batwara abagenzi bavuye Rubavu kandi bitemewe”.

Umuyobozi w’Akarere ka Nyabihu wungirije ushinzwe imibereho y’abaturage Simpenzwe Pascal, avuga ko kuba Rubavu na Rusizi biri mu kato Leta itabyanga, ahubwo ari ukugira ngo ibanze igenzure icyorezo cya COVID-19 igikure mu nzira Abanyarwanda batekane.

Imodoka zisiga abagenzi ku muryango wa gare kugira ngo babanze bakarabe

Ati “Ntabwo Leta yacu yanga Uturere twa Rubavu na Rusizi kugira ngo idushyire mu kato, ahubwo ni uburyo bwo gukemura no kumara amakenga ko ntabwandu bwa COVID-19 buhari, niba twarahawe amahirwe yo kurindwa mureke tuyubahirize kandi utayubahiriza ntakwiye kwihanganirwa”.

Akarere ka Nyabihu guhagarika ingendo zihuza Rubavu na Nyabihu bashyizeho amabwiriza ko imodoka zitwara abagenzi rusange zitarenga ku Mukamira zijya Rubavu, kugira ngo hakumirwe abashaka kwinjira muri Rubavu.

Icyakora hari abagenzi bakoresha abamotari bakabanyuza inzira y’igitaka mu Mirenge ya Kanzenze, Mudende na Bugeshi bakinjira Rubavu, kimwe n’abashaka kuva Rubavu bajya mu zindi ntara banyura muri izo nzira.

Nubwo Akarere ka Nyabihu kemerewe gukora ingendo, abaturage baho kimwe n’ahandi basabwa kwirinda icyorezo cya COVID-19, kuko hari aho byagaragaye ko benshi batambara udupfukamunwa uko bikwiye mu Mirenge ya Jenda na Bigogwe kandi bagahurira mu matsinda ari abantu benshi.

Polisi ibinyujije ku rubuga rwayo rwa Internet yatangaje ko Irakiza yarimo atanga amafaranga y’u Rwanda angana n’ibihumbi 40 kugira ngo bamufungurire abavandimwe bari baherutse gufungirwa gukubita no gukomeretsa.

Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Karekezi avuga ko Irakiza yafashwe tariki ya 04 Kamena 2020 arimo guha ruswa y’amafaranga y’u Rwanda angana n’ibihumbi 40 umugenzacyaha kugira ngo amufungurire abavandimwe batatu bari bafungiye muri sitasiyo ya Polisi ya Mukamira.

CIP Karekezi yagize ati “Kuva abavandimwe be batatu bafatwa bagafungwa tariki ya 28 Gicurasi kubera gukubita no gukomeretsa, Irakiza yatangiye guhamagara umugenzacyaha asaba ko bahura kugira ngo bumvikane amafaranga amuha akarekura abavandimwe be.”

CIP Karekezi akomeza avuga ko uwo mugenzacyaha yahise abimenyesha abapolisi bategura igikorwa cyo gufata uwo mugore, afatirwa mu cyuho arimo gutanga ayo mafaranga.

Umuvugizi wa Polisi mu Ntara y’Iburengerazuba asaba abaturarwanda kwirinda ikintu cyose cyatuma batanga ruswa cyangwa bayakira, abashishikariza kujya batangira amakuru ku gihe igihe cyose hari uwo babonye ari mu bikorwa bya ruswa.

Itegeko no 54/2018 ryo ku wa 13/08/2018 rirwanya ruswa ingingo yaryo ya 4 ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

Ibiza bimaze iminsi byibasira ibice bitandukanye by’Igihugu

Umunyamabanga Nshingwabikorwa w’Umurenge wa Mulinga, Byukusenge Emmanuel, yabwiye RBA dukesha iyi nkuru ko ku wa Gatanu ahagana saa sita n’iminota 30 z’amanywa aribwo iyo nkangu yadutse mu Kagari ka Gisizi mu Mudugudu wa Kabyuma.

Abahatuye ngo batunguwe n’ibiza by’iyi nkangu yaje ku manywa ndetse iza muri iki gihe cy’izuba, mu gihe bari bamenyereye inkangu ziza mu gihe cy’imvura.

Ishyamba ngo ni ryo ryabanje kumanuka, rikurikirwa n’umusozi, byibasira imiryango itanu igizwe n’abantu 24 baturiye aho hafi, biba ngombwa ko abo bantu bava mu nzu zabo barahunga.

Umunyamabanga Nshingwabikorwa w’Umurenge wa Mulinga, Byukusenge Emmanuel, avuga ko ibyo biza byatwaye intama esheshatu n’ihene imwe z’uwitwa Ntibashoboka Jean d’Amour zari ziri muri iryo shyamba ryamanutse.

Iyo nkangu kandi yatwaye n’imirima y’abaturage igera kuri Hegitari n’ishyamba ry’inturusu n’urusasa bigera kuri metero kare 500.

Aho hantu ngo ni ubwa mbere habaye inkangu.

Abaturage babaye bacumbikiwe n’abaturanyi babo, bakaba ngo batazasubira kuhatura, ahubwo ngo baraza kugurana isambu na bagenzi babo, babone ahandi bashobora gutura, hanyuma bubakirwe binyuze mu miganda, Akarere na ko kakazabaha amabati.

Aho hantu hacitse mu buryo butunguranye kuko nta bimenyetso byagaragazaga ko hashobora kwaduka inkangu. Icyakora ngo bishobora kuba byatewe n’imvura yaguye mu minsi ishize, amazi akaba yaracengeye cyane mu butaka.

Ikigiye gukorwa ngo ni ugukomeza kuba maso kugira ngo n’ahandi muri ako gace byagaragara ko hashobora kuvuka inkangu, abaturage baburirwe mbere bahave bitarabageraho.

Mu makuru Kigali Today yatangarijwe n’Umunyamabanga nshingwabikorwa w’Umurenge wa Jenda, Kampire Georgette, yavuze ko ayo makuru bayamenye mu gitondo cyo ku wa kabiri, aho avuga ko uburyo ibyo bikoresho byibwe burimo urujijo rwo kuba abantu bakwiba ahantu hari umuzamu ntatabaze.

Uwo muyobozi yavuze ko bakeka ko uwo muzamu warindaga urwo rusengero, yaba yagize uruhare mu iyibwa ry’ibyo bikoresho, ati “Biragaragara ko umuzamu yabigizemo uburangare kuko ntiyigeze atabaza ngo abo bajura bafatwe.

Mu gitondo ni bwo yavuze ko bibye ibikoresho by’umuziki bakoreshaga mu rusengero, twagiriye inama ubuyobozi bw’itorero gutanga ikirego kuri RIB, ubu nta muntu urafatwa”.

Arongera ati “Dufatanyije n’ubuyobozi bw’itorero gushakisha abo bajura, gusa uwo muzamu arakemangwa kuko byabaye mu ijoro ariko aricecekera abivuga mu gitondo, ntiyigeze ataka kandi hafi aho hari irondo ry’umwuga, ariko ntawigeze abimenya”.

Ubuyobozi bw’iyo Paruwasi ya Kora, buremeza ko ibyibwe birimo igikoresho cyifashishwa mu muziki kitwa Mixer, gifite agaciro k’amafaranbga y’u Rwanda abarirwa mu bihumbi 600, indangururamajwi , inanga (Synthetiseur), icyuma gisohora impapuro (Printer) n’ibindi.

Gitifu Kampire aragira inama abantu bafite ibigo bisaba uburinzi, kumenya imikorere y’abazamu barinda ibyo bigo, ubushobozi n’ubunyangamugayo bwabo, mu kurushaho kurinda umutekano w’ibigo byabo.

Ati “Ubutumwa twatanga nk’abayobozi, ni uko umuntu ufite umuzamu umurindira adakwiye guterera iyo ngo aryame asinzire. Ahubwo akwiye gukurikira kugira ngo amenye neza ubushobozi n’ubunyangamugayo bw’umuntu umurindira ikigo, mu kumenya niba akora akazi uko bikwiye, kuko niba warashyizeho umusamu kugira ngo akurindire ibintu, akiryamira agasinzira cyangwa akaba afitanye ubucuti n’abajura bigira ingaruka ku mukoresha”.

Uwo Murenge wa Shyira wo mu Karere ka Nyabihu, ni umwe mu yibasiwe cyane n’ibiza by’imvura, aho ibiraro byaridutse, ibiro by’umurenge birengerwa n’amazi y’imvura, ndetse n’inzu z’abaturage zirasenyuka kugeza ubwo bamwe mu baturage bahasiga ubuzima bitewe n’iyo mvura idasanzwe yaguye mu ijoro ryo ku itariki 6 Gicurasi 2020.

Hakozwe ibiraro bishya bisimbura ibyangijwe n’imvura

Abaturage ntibashoboraga kugana ibitaro bya Shyira n’ibigo nderabuzima mu buryo bworoshye, kugeza ubwo n’abaganga babuze uburyo bwo gusura ibigo nderabuzima kubera ko imihanda yari yangiritse.

Umurwayi wagezwaga mu bitaro ni uturiye ibitaro na bwo hagakoreshwa ingobyi za kinyarwanda, kugeza ubwo ubitaro biva ku barwayi 120 byakiraga buri munsi bigera ku barwayi batarenze 30.

Mu kiganiro kirambuye Kigali Today yagiranye na Dr. Zimaziki Théogène, Umuyobozi w’ibitaro bya Shyira ku murongo wa telefoni, yagize ati “Amazi yuzuye ahakikije ibitaro aho abaturage baturuka, ibiraro birariduka abaturage babura aho banyura ku buryo byagoye benshi, baba abarwayi, abarwaza, abaganga n’abakozi, kugera ku bitaro byari bigoye cyane”.

Ibitaro bya Shyira bikomeje gutanga serivisi z’ubuvuzi nyuma y’uko inzira zisibuwe

Akomeza agira ati “N’amazi icyo gihe yarabuze mu bitaro, umuriro uragenda kuko amapoto yose yari yaguye kubera inkangu. Ibyo ntibyatinze byabaye mu minsi mike itarenze itatu amazi arongera araboneka, umuriro uraboneka, ndetse n’inkangu zari zaridukiye mu mihanda ijya mu bitaro zahise zivanwamo, ariko n’ubundi dusigarana ikibazo cy’uko nta kigo nderabuzima na kimwe twabashaga kugeraho, uretse Poste de santé imwe yegereye ibitaro ni yo twabashaga kugeraho”.

Dr. Zimaziki yavuze ko nta murwayi wigeze ugira ikibazo nyuma y’uko hitabajwe ingobyi za kinyarwanda mu kugeza abarwayi mu bitaro, gusa umubare w’abagana ibitaro ukomeza kugaragara ko ari muto kurusha uko byari bisanzwe.

Yagize ati “Mu by’ukuri ubona ko abagana ibitaro batangiye kugaruka nk’uko byari bisanzwe aho dutangiye kubona abarwayi bagera muri 80 ku munsi, mu gihe mu byumweru bibiri bishize twajyaga twakira abatarenze 30 kubera ibiza”.

Iki ni ikiraro cy’abanyamaguru, Moto n’amagare cyo ku mugezi wa Giciye. Gihuza umurenge wa Rugera na Shyira

Muri uwo murenge, inzira z’abanyamaguru zamaze kuba nyabagendwa, aho ibiraro birimo icya Nyamutera gikoreshwa n’abanyamaguru cyamaze kuzura, abanyamaguru kandi bashyirirwaho uburyo buboroheye bwo kwambuka ahahoze ikiraro cyo ku mugezi wa Giciye, mu gihe n’ikiraro cy’imodoka kiri mu nzira yo kuzura”.

Ku kiraro gihuza Akarere ka Nyabihu, Gakenke na Muhanga na cyo cyari cyararidutse ubu umirimo yo kugitunganya igeze kure nk’uko umuyobozi w’ibitaro akomeza abivuga.

Ibiraro byagiye byangizwa n’ibiza by’iyo mvura

Ati “Ku kiraro cyari cyarasenyutse kiduhuza n’Akarere ka Gakenke na Muhanga uyu munsi cyangwa ejo imodoka zizaba zigenda kuko imirimo yo kucyubaka igeze ku musozo. Bamaze kugishyiraho bari kucyicazaho neza, ku buryo haba za Gakenke, Muhanga na Musanze umuntu ashobora kujyayo. Umuntu yavuga ko imirimo yo gutuma ibyangijwe n’ibiza bigaruka imeze neza”.

Uwo muyobozi w’ibitaro yashimiye Umukuru w’igihugu Paul Kagame wabasuye muri ibyo bihe bari mu bibazo by’ibiza, yemeza ko urwo ruzinduko ari kimwe mu byabahaye imbaraga.

Ati “Burya iyo umubyeyi yagusuye urishima cyane ukabona ko ibibazo biri gukemuka byose. Ibi byose nkubwira biri gukorwa, byagiye bikorwa n’ubuyobozi bwite bw’igihugu, kugeza ubu ibintu bimeze neza n’ibyo bisigaye bifite inyigo ku buryo bizakemuka vuba”.

Mu bindi bikorwa remezo byazahajwe n’ibiza, harimo n’ibiro by’Umurenge wa Shyira watewe n’umuvu w’amazi yinjiye mu biro bitangirwamo serivisi zinyuranye.

Umunyamabanga nshingwabikorwa w’Umurenge wa Shyira Bizimana Placide, yavuze ko iyo nyubako ubu yasukuwe ikaba ikomeje gutangirwamo serivisi nk’uko byari bisanzwe.

Abo ni ba Gitifu bo mu mirenge ihana imbibi n’uwa Shyira aho bakomeje kungurana ibitekerezo mu gukemura ikibazo cy’ibiza byugarije ako gace

Yagize ati “Amazi yari yuzuye mu biro by’inyubako y’umurenge, dufatanyije n’abaturage tuhakorera umuganda turahasukura, igisigaye ni ukureba uburambe bw’inyubako ariko ubundi akazi karakomeje. Birumvikana hari inyandiko zangiritse kubera ayo mazi n’ubwo atari zose, urumva ibiza nk’ibyo ntibyabura icyo byangiza kuko amazi yinjiye mu nzu hose, inyinshi mu zangiritse ni izishaje, turacyashaka uburyo twazisimbuza”.

Gitifu yavuze ko abayobozi b’imirenge ikikije ako gace bamaze guhura aho bafashe ingamba zo kubungabunga ayo mazi y’imvura mu kongera ibiti no gucukura n’imirwanyasuri.

Isosiyete y’ubwubatsi yitwa Engineering Brigade ku bufatanye n’Ikigo cy’Igihugu cy’Ubwikorezi, ni byo bigo biri kwifashishwa mu gutunganya inzira n’ibiraro byagiye byangirika, aho Gitifu Bizimana avuga ko mu minsi ya vuba n’inzira z’imodoka zongera kuba nyabagendwa, ahari gukorwa ikiraro cya Kiruruma ku mugezi wa Mukungwa, ikiraro cyo ku mugezi wa Nyamutera, ikiraro cyasenyutse cy’imodoka cyo ku mugezi wa Giciye kiri mu nzira zo kuzura.

Kuba izo nzira zikorwa, ni kimwe mu bikomeje gushimisha abaturage basanzwe basaba serivisi zinyuranye nk’uko umwe muri bo yabitangarije Kigali Today.

Perezida Kagame yahise asura Nyabihu mu duce twari twugarijwe n’ibiza

Ati “Ntako ubuyobozi butagize ngo budufashe mu biriya bihe. Twari tuzi ko tutazongera kubona inzira kuko ibiraro byari byaridutse imihanda yarengewe, ariko ubu turi kugera ku murenge, tukajya mu bitaro no mu bigo nderabuzima tukivuza. Dushimiye n’Umukuru w’Igihugu watuzirikanye aradusura, ubu turi amahoro”.

Gitifu Bizimana avuga ko kuba Umukuru w’Igihugu yarabasuye byatumye bakora cyane mu rwego rwo kumwereka ko ubuyobozi buri gukora ibishoboka, kugira ngo yumve ko ibibazo by’abaturage biri gukemuka.

Ati “Turashima Umuyobozi w’Igihugu wumvise uburemere bw’ikibazo akagera aho cyabereye, biraduha imbaraga zo kuba twakora ibishoboka kugira ngo na we nibura abone igisubizo cy’uko abaturage bari kubona inzira, ubuhahirane, inzira zibajyana kwivuza, mbese imbaraga zose turazikoresha dufatanyije n’izindi nzego”.

Ku itariki 16 Gicurasi 2020, ni bwo Perezida Paul Kagame yasuye ako gace k’Umurenge wa Shyira mu Karere ka Nyabihu nk’ahantu ibiza byibasiye, mu rwego rwo gushaka uburyo ibyangijwe n’ibiza byakongera kubakwa, hagamijwe gufasha abaturage kongera kugana amavuriro n’izindi serivisi bakenera.

Ni ibiza byahitanye abantu 72 mu turere tunyuranye tugize Intara y’Amajyaruguru, Uburengerazuba n’Amajyepfo.

imihanda yangijwe n’ibiza

Ni abayobozi mu Kagari ka Myiga bayobowe na Bariyanga Bernard Umunyamabanga Nshingwabikorwa w’Akagari, Hakizimana Desiré SEDO w’Akagari na Nyagasaza Jean Daniel Umukuru w’umudugudu wa Kabeza.

Bakurikiranyweho kunyereza inkunga yagenewe abaturage basenyewe n’umuyaga tariki ya 08 Mata 2020.

Kigali Today ivugana n’Umunyamabanga Nshingwabikorwa w’Umurenge wa Kabatwa Muhirwa Robert mu gitondo cyo kuri uyu wa kabiri tariki 21 Mata 2020, yatangaje ko aba bayobozi bataje mu kazi ko na we agiye kubaza Umuyobozi w’Akarere ka Nyabihu, mu gihe Polisi y’u Rwanda ivuga ko bafungiye kuri Sitasiyo ya Mukamira mu gihe iperereza rigikomeje.

Muhirwa avuga ko umuyaga wasenyeye abaturage 52, mu Kagari ka Myuga ukaba warasenyeye abaturage 22 mu gihe inkunga iheruka kugezwa mu murenge gufasha Abasenyewe n’umuyaga yahageze tariki ya 18 Mata 2020.

Bamwe mu baturage bo mu murenge wa Kabatwa bavuga ko aba bayobozi bazira uburiganya bwo kuba amabati yagenewe abasenyewe n’umuyaga barayahaye abatarasenyewe.

Abaturage basenyewe n’umuyaga wadutse tariki 8 Mata 2020 babaye bacumbikiwe mu mashuri mu rwego rwo kwirinda gukwirakwiza icyorezo cya COVID-19.

Kabarisa Salomon, uhagaze imbere wambaye ikote (Photo:Internet)

Ku rubuga rwa Twitter, Polisi y’u Rwanda yatangaje ko uyu muyobozi yatawe muri yombi akekwaho gukubita umuturage wari uvuye ku kazi.

Uwo muyobozi arakekwaho gukubita uwitwa Dusingizimana Kadafi w’imyaka 27, ubwo yari avuye ku kazi ku ruganda rw’icyayi rwa Nyabihu, ruherereye mu Murenge wa Karago.

Ibyo byabaye kuwa kabiri tariki 14 Mata 2020, mu Mudugudu wa Mwiyanike, Akagari ka Kadahenda mu Murenge wa Karago, ubwo uwo Dusingizimana yari ageze imbere yinzu yu bucuruzi y’uwitwa Kimondo, agahura n’umuyobozi w’Umurenge wa Karago Kabarisa Salomon, ari kumwe n’Umunyamabanga nshingwabikorwa w’Akagari ka Kadahenda na DASSO w’Umurenge, maze ngo Kabarisa agahagarika uwo muturage amubaza aho avuye, undi akamubwira ko avuye ku kazi.

Uwo muyobozi ngo yahise avana inkoni mu modoka atangira kumukubita, ndetse aranamukomeretsa.

Umuturage Dusingizimana wakubiswe, yajyanywe ku kigo nderabuzima cya Mwiyanike, giherereye mu Murenge wa Karago kugira ngo yitabweho, naho uwo muyobozi ukekwaho kumukubita afungiye kuri sitasiyo ya Mukamira.

Ingingo ya 121 mu gitabo cy’amategeko ahana ibyaha mu Rwanda, iteganya ko umuntu wese, abishaka, ukomeretsa undi, umukubita cyangwa umusagarira ku buryo bwa kiboko bubabaje aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka itatu ariko kitarenze imyaka itanu, n’ihazabu y’amafaranga y’u Rwanda atari munsi y’ibihumbi 500,000 Frw ariko atarenze 1,000,000 Frw.

Mwaramutse,

Polisi yataye muri yombi Kabarisa Solomon Umunyamabanga Nshingwabikorwa w'umurenge wa Karago, nyuma yo kugira uruhare mu gukubita no gukomeretsa Dusingizimana Kadafi ukora mu ruganda rw'icyayi Nyabihu.

Yafashwe afungiye kuri sitasiyo ya Mukamira.

— Rwanda National Police (@Rwandapolice) April 15, 2020

Muhirwa Robert, Umunyamabanga Nshingwabikorwa w’Umurenge wa Kabatwa mu Karere ka Nyabihu, avuga ko uwo muyaga wasenye ayo mazu mu ma saa tanu z’amanywa arangirika cyane ndetse n’ibikoresho byose.

Agira ati “Twahuye n’ibiza by’umuyaga, aho mu ma saa tanu umuyaga waje usenya amazu 35 y’abaturage bo mu tugari tunyuranye tugize umurenge wa Kabatwa”.

Mu gufasha abo baturage kubabonera aho kuba bategeranye mu rwego rwo kubarinda Coronavirus, ngo bacumbikiwe mu mashuri kugira ngo babone uburyo bwo kwisanzura.

Uwo muyobozi arasaba ubuvugizi, abo baturage bagafashwa nyuma yo guhura n’ibibazo by’ibiza bibatunguye, amazu yabo agasanwa bagasubira mu ngo zabo, ikindi bagahabwa ubufasha bw’ibikoresho by’ibanze kuko ngo ubu babayeho mu buzima butaboroheye.

Yagize ati “Abafatanyabikorwa turabasaba gufasha abo baturage bari mu bibazo, bagahabwa ubufasha bwihutirwa bwo gusanirwa amazu, dore ko isakaro ry’ayo mazu ryangiritse aho ibisenge byagiye biguruka bikagwa nko muri metero 500”.

Uwo muyobozi, yavuze ko bavuganye n’umuryango wa Croix Rouge (Red Cross) kugira ngo ube watabara abo baturage ukabaha ibikoresho by’ibanze, mu gihe ibyo bari bafite byose byangiritse, asaba ko hakenewe n’ibiti ndetse n’isakaro mu gusubiza abo baturage mu buzima busanzwe mu rwego rwo kubafasha kubahiriza gahunda ya Leta ya Guma mu rugo birinda Coronavirus.

Ni inkunga ya kawunga igenewe abanyamuryango 1011

Abo bahinzi b’ibireti, bavuga ko nubwo icyorero cya Coronavirus gikomeje kwibasira abatuye isi, imbaraga za mbere zo kukirwanya ari uguhinga bongera umusaruro, kandi bubahiriza n’amabwiriza ya Leta ajyanye no kwirinda icyo cyorezo.

Ni koperative igizwe n’abanyamuryango 1,011, aho buri wese yagiye agenerwa ibiro 10 bya kawunga mu rwego rwo kubafasha, muri gahunda ya guma mu rugo birinda Coronavirus.

Bamwe muri abo baturage baganiriye na Kigali Today, bavuga ko kuba ubuyobozi bwa koperative yabo bwabazirikanye bubagenera iyo nkunga, bibahaye imbaraga zo gukomeza guteza imbere ubuhinzi bw’ibireti, birinda gucibwa intege n’icyo cyorezo.

Nyangufi Léocadie ati “Mu gihe twari twicaye mu ngo, imfashanyo iratuziye ikomoka ku kireti, biduhaye imbaraga zo gukomeza guhinga ibireti tudaciwe intege na Coronavirus. Iyi ni ingoboka, iratugobotse mu gihe muri iyi minsi turi mu rugo kandi turakomeza duhinge, Coronavirus ntiyaduca intege, bigenze bityo inzara yatwica.

Abanyamuryango ba KOAIKA bagenewe toni 11 za kawunga

Turakomeza duhinge kandi twubahiriza amabwiriza ya Leya, turava mu mirima duhita dutaha tukinjira mu nzu ari uko dukarabye amazi meza n’isabune”.

Kayonde Jerome ati “Iyi mfashanyo ya kawunga iradutunguye ntitwari tuyiteze, ibiro 10 bya kawunga biramfasha n’umuryango wanjye muri iki gihe.

Coronavirus yo turayirwanya kandi twirinda n’inzara, kandi turizera ko iki cyorezo kirangira vuba, icyangombwa ni ukubahiriza ibyo Leta itubwira kandi amabwiriza turayakurikiza neza no mu gihe turi mu mirima yacu duhinga”.

Abo bahinzi bavuga ko muri iyi minsi ya gahunda ya guma mu rugo, hirindwa ikwirakwizwa ry’icyirezo cya Coronavirus baticaye, ahubwo ko biteguye kuzamura umusaruro wabo hagamijwe kurwanya inzara yaterwa n’icyo cyorezo.

Ibireti byiganje mu duce tw’imisozi miremire

Mutuyimana Martin ati “Mu bireti mperutse kuguramo telefoni igezweho, nayiguze ibihumbi 100, ubu amakuru yose ku cyorezo cya Coronavirus ndayafite, banatubwiye ko abantu barindwi bakize, twishimye cyane kandi natwe twiteguye kuyirwanya duhinga kandi twubahiriza amabwiriza ya Leta nk’uko twayabwiwe”.

Umuyobozi wa Koperative KOAIKA, Sebusogo Jean de Dieu, yavuze ko muri iki gihe isi yugarijwe n’icyorezo, bateguye iyo ngoboka y’amafaranga asaga miliyoni esheshatu, mu kunganira abahinzi mu mirire no kubaremamo ubushake bwo kudacika intege, bakomeza kurushaho kwita ku buhinzi bw’ibireti.

Ati “KOAIKA igizwe n’abaturage 1,011, aho buri wese atahanye ibiro 10 bya kawunga. Bihagaze miliyoni 6.066.000 z’amafaranga y’u Rwanda, ku banyamuryango bose mu kubereka ko badakwiye gucibwa intege n’icyo cyorezo, kandi babona icyo kurya.

Muri iyi minsi basabwa kuguma mu rugo, barasabwa kwitabira ubuhinzi bongera umusaruro, kandi nidusigasira ubuhinzi ni byo bizatuma igihugu kirushaho gutera imbere”.

Mu gihe gito gishize igihembwe cy’ihinga ry’ibireti gitangiye, abaturage bo mu Murenge wa Kabatwa bamaze gutera ibireti ku buso bungana na hegitari 664, kuri hegitari 726 zingana na 91%, by’ubutaka bwagenewe guhingwaho ibireti.

Barashinjwa guterana no kunywa inzoga mu kabari, binyuranyije n’amabwiriza ya Minisitiri w’Intebe

Ni igikorwa cyabaye mu masaha y’ijoro saa tatu n’igice (21h30) ku wa 06 Mata 2020 mu Murenge wa Jenda, Akagari ka Nyirakugugu, Umudugudu wa Jenda.

Abo bantu batandatu ngo bagiye mu gikari cy’akabari banywa inzoga binyuranyije n’amabwiriza yashyizweno na Minisitiri w’Intebe mu rwego rwo gukumira icyorezo cya COVID-19.

Umwe mu bayobozi batifuje ko amazina ye atangazwa wavuganye na Kigali Today yatangaje ko nyiri akabari yahise acibwa amafaranga ibihumbi 50 karanafungwa, naho abari mu kabari buri wese acibwa ibihumbi icumi uretse ko yishyuye babiri, naho abandi ngo bahise batoroka, bahita batangira gushakishwa.

Yagize ati; “Nyiri akabari yaciwe ibihumbi 50 akabari karafungwa, naho abarimo kunywa inzoga babiri ni bo babonetse abandi bahise babura ubu barimo gushakishwa.”

Umuyobozi w’Akarere ka Nyabihu, Mukandayisenga Antoinette, yabwiye Kigali Today ko akabari abo bantu banyweragamo kari karafunzwe.

Uwo muyobozi yongeyeho ko mu barimo banywa harimo n’Umukuru w’Umudugudu wahise akurwa ku mirimo, naho abandi bacibwa amande y’ibihumbi 10 ndetse bajyanwa mu kigo ngororamuco, ariko nyiri akabari kubera ko afite umwana w’umwaka umwe w’amavuko, we ngo ntibamujyanyeyo.

Umuyobozi w’Akarere ka Nyabihu asaba abaturage kuguma mu ngo, ukeneye icyo kunywa akakigura akakijyana iwe, birinda guhura ari benshi kugira ngo iki cyorezo kizacike vuba.

Amabwiriza yashyizweho mu gukumira icyorezo cya COVID-19 avuga ko uhereye tariki ya 21 Werurwe 2020 i saa tanu na mirongo itanu n’icyenda z’ijoro (23:59) hashyizweho ingamba zikumira icyorezo cya Coronavirus zigomba kumara ibyumweru bibiri ndetse ubu zongerewe kugera tariki 19 Mata 2020.

Izo ngamba zivuga ko ingendo zitari ngombwa zibujijwe kandi gusohoka mu rugo nta mpamvu zihutirwa bitemewe keretse abajya gutanga no gushaka serivisi z’ingenzi harimo kwivuza, guhaha, serivisi za banki n’izindi.

Kwishyurana hakoreshejwe ikoranabuhanga bigomba gukoreshwa ahashoboka hose, kurusha kujya muri za banki na za ATM.

Abakozi ba Leta bose n’abikorera basabwa gukorera akazi mu ngo zabo, keretse abatanga serivisi z’ingenzi zavuzwe haruguru.

Imipaka yose irafunzwe keretse ku Banyarwanda bataha ndetse n’abandi batuye mu Rwanda byemewe n’amategeko, abo bose bakaba bazashyirwa mu kato mu gihe cy’ibyumweru bibiri (2) ahantu hateganyijwe. Ubwikorezi bw’ibicuruzwa byinjira cyangwa ibisohoka mu Rwanda burakomeza.

Ingendo hagati y’imijyi n’uturere tw’igihugu ntabwo zemewe keretse ku bajya kwivuza cyangwa abafite impamvu zihutirwa. Ubwikorezi bw’ibicuruzwa burakomeza nk’uko bisanzwe.

Amasoko n’amaduka arafunzwe keretse abacuruza ibiribwa, ibikoresho by’isuku, za farumasi, esansi na mazutu n’ibindi bikoresho by’ibanze.

Za moto ntabwo zemerewe gutwara abagenzi, keretse izigemuye ibicuruzwa. lmodoka zitwara abagenzi mu mijyi zo zirakomeza gukora hubahirijwe intera ya metero imwe hagati y’abagenzi.

Utubari twose turafunga.

Resitora zirakomeza gukora hatangwa serivisi yo guha ibyo kurya abakiriya bakabitahana (take away).

Uyu mubyeyi arimo gucana televiziyo abonye bwa mbere. Ngo nta rungu bazongera kugira

Kuri uyu wa 04 Werurwe 2020, ubwo Sosiyete y’u Rwanda Ishinzwe Ingufu (REG) ku bufatanye n’Umurenge wa Jenda yari mu bukangurambaga busobanura imikoreshereze y’amashanyarazi akomoka ku zuba, abatangiye kuyafata bavuze ko abafitiye akamaro kanini.

Mu gihe kugeza imiyoboro y’amashanyarazi mu duce twose mu gihugu bishobora gufata igihe, hari uduce twagenewe kuzahabwa amashanyarazi adafatiye ku muyoboro munini ibi bikazaba igisubizo kizafasha kugera ku ntego igihugu kiyemeje yo kugeza amashanyarazi kuri bose bitarenze umwaka wa 2024.

Uwizerwa Jean Marie Vianney ukora mu ishami ry’amashanyarazi y’izuba muri REG yaganiriye n’abaturage ku kamaro k’ayo mashanyarazi

REG igenda ikora ubukangurambaga bwo gushishikariza abaturage batuye mu bice byagenewe guhabwa amashanyarazi adafatiye ku muyoboro mugari kwitabira kugura no gukoresha amashanyarazi akomoka ku mirasire y’izuba na bo bakiteza imbere.

Aya mashanyarazi kuyabona no kuyashyira mu ngo birihuta kandi ntibigoye, igisabwa ni ukumva ko ari amashanyarazi meza, kandi hari ibyo yakora nk’ayo ku muyoboro rusange.

Byiringiro Fabien atuye Mu Mudugudu wa Kagano, amaze amezi atandatu akoresha amashanyarazi y’izuba. Avuga ko kuva yatangira gukoresha umurasire hari byinshi byahindutse mu buzima bwe.

Byiringiro Fabien amaze amezi 6 akoresha umurasire

Yagize ati : «Ni byiza cyane. Ubuzima bwarahindutse ndetse na nimugoroba abana baba barimo kwiga nta kibazo, n’abana barabyishimira cyane.»

Uwayo Nayigiziki Claudine na we utuye muri Kagano avuga ko na we yatangiye gukoresha umurasire.

Mukayuhi amaze imyaka itatu akoresha amashanyarazi y’izuba

Ati «Twe tumaze imyaka itatu dukoresha umurasire. Dufite televiziyo, tureba indirimbo, tugacana nijoro hakaba habona, mbese ntitugicana amatoroshi twarabyishimiye ndetse twarangije no kwishyura ».

Mukayuhi Ziripa utuye mu Kagari ka Kareba na we avuga ko aya mashanyarazi yabakijije agatadowa .

Yagize ati : “Twe aya mashanyarazi aradufasha, usanga abana bacu babyishimiye biga neza, ntitugicana agatadowa kaduteraga imyotsi mbese ubuzima ni bwiza.”

Nk’uko imibare ibigaragaza, ingo zisaga 52.8% mu Rwanda zifite amashanyarazi, zirimo izigera kuri 38.5% zifite amashanyarazi afatiye ku muyoboro mugari ndetse n’izisaga 14.3% zifite amashanyarazi adafatiye ku muyoboro rusange yiganjemo akomoka ku mirasire y’izuba.

Imbangukiragutabara yashyikirijwe ikigo nderabuzima cya Bigogwe ifite agaciro ka miliyoni 80 z’amafaranga y’u Rwanda

Iyi mbangukiragutabara yo mu bwoko bwa Land Cruiser V8 ifite agaciro ka miliyoni 80 z’amafaranga y’u Rwanda.

Abaturage bahivuriza n’abajyanama b’ubuzima ngo bahoranaga imvune baterwa n’ingendo ndende bakoraga bahetse abarwayi mu ngobyi za gakondo, dore ko imbangukiragutabara ihasanzwe yashaje, ikaba itagikora mu buryo buhoraho.

Umujyanama witwa Nyiramajyambere Bernadette ushinzwe ubuzima bw’umubyeyi n’umwana mu Murenge wa Jenda yagize ati: “Imbangukiragutabara yari ihasanzwe yari yarashaje, itagifite imbaraga zo kugera ahantu kure nko mu misozi cyangwa ahandi hagoranye. Kenshi twahitagamo guheka abarwayi mu ngobyi za gakondo, tukagenda mu bunyereri, imvura ituri ku mutwe, umurwayi akajya kugera kwa muganga yarushijeho kuremba. Iyi nshya tubonye iradushimishije mu buryo burenze, kuko igiye kudukemurira ibyo bibazo, abarwayi ntibazongera guhera iwabo, ababahekaga mu ngobyi na bo bazaboneraho gukora indi mirimo yabo isanzwe".

Nzayikorera Christophe wari uhagarariye Umuryango ADRA Rwanda watanze iyi mbangukiragutabara binyuze mu mushinga ‘Embrace Hobe’, yasobanuye ko ibi byakozwe mu rwego rwo gushyigikira gahunda ya Leta yo kwita ku mibereho myiza y’abaturage, bagezwaho serivisi z’ubuvuzi bwihuse.

Yagize ati: "Ahantu hose abaturage bari baba bagomba kubona uko bagera kwa muganga. Iyi mbangukiragutabara tuyitanze yiyongera ku zindi ebyiri na zo duheruka gutanga, kugira ngo izabafashe kwigobotora ingaruka baterwaga no kutabona ubuvuzi ku gihe, bitume turengera ubuzima, by’umwihariko bw’umwana n’umubyeyi".

Umunyamabanga Nshingwabikorwa w’Intara y’Iburengerazuba yashyikirijwe ibyangombwa byose by’iyi modoka

Umunyamabanga Nshingwabikorwa w’Intara y’Iburengerazuba, Uwambajemariya Florence, avuga ko bagiye gufatanya n’abaturage kubungabunga no kubyaza umusaruro iyi mbangukiragutabara; by’umwihariko Intara ikaba ifite gahunda yo kongera ibikorwa remezo birimo n’imihanda bizatuma iyi mbangukiragutabara igera byoroshye ku mubare munini w’abakeneye ubuvuzi.

Yagize ati: "Kwegereza abaturage serivisi z’ubuvuzi bijyana no kubagezaho amavuriro y’ibanze, ibigo nderabuzima n’ibitaro. Ibyo rero ntabwo byafasha abaturage kuzamura ibipimo by’ubuzima mu gihe bategereje ibindi bikorwa remezo nk’imihanda. Tugiye kurushaho guhanga imishya, dusane n’iyangiritse, izi mbangukiragutabara zijye zibona aho zinyura, zigere henshi hashoboka".

Uyu muyobozi yasabye abaturage kujya bihutira gutanga amakuru y’ahagaragaye umurwayi hakiri kare, kugira ngo ahabwe ubuvuzi bwihuse.

Ikigo nderabuzima cya Bigogwe kiri ku rwego rwisumbuye rw’ibindi bigo nderabuzima kuko kiri muri bike cyane bibarizwa mu gihugu bifite serivisi yo kubaga ababyeyi babyara, babifashijwemo n’umudogiteri uhakora mu buryo buhoraho. Ibi ngo bituma hari ibigo nderabuzima bisa n’ibihegereye birimo icya Kabatwa, Kora, Arusha n’ikigo nderabuzima cya Kareba bihohereza umubare munini w’abajya guhabwa iyo serivisi. Yaba abahaturiye n’abahakenera serivisi, bagereranya iyi mbangukiragutabara n’ikiraro bazajya bambukiraho muri urwo rujya n’uruza.

Abaganiriye na Kigali Today ubwo bari mu isantere ya Jenda biteguye gupakiza umusaruro wabo, bavuze ko icyo gihingwa kibabeshejeho aho kibafasha mu kubona indyo yuzuye, bakazohereza no mu bindi bice by’igihugu.

Uburyo abo baturage bapanga umusaruro wabo wa karoti mu mifuka, butangaza benshi banyura muri iyo santere baturutse ahandi.

Ubwo buryo bwihariye bwo gupanga izo karoti aho umufuka ureshya na Metero ebyiri, bikurura benshi mu baguzi aho karoti nyinshi ari izirenga ku mufuka, kuri uwo mufuka upakiye umuhinzi agahabwa amafaranga ibihumbi 50 y’u Rwanda.

Abenshi mu bahinzi ba karoti muri ako gace, bavuga ko nta kindi gihingwa bashobora gusimbuza karoti ngo babone inyungu nk’iyo bavana muri karoti. Bavuga ko batajya bahura n’ikibazo cy’ubukene kubera icyo gihingwa.

Maniriho Théogène ati “Ndi urubyiruko, nize amashuri atatu gusa yisumbuye ariko abarangiza Kaminuza baza kunsaba. Hari abo ntunze baminuje ndetse bamwe maze kubazana muri ubu buhinzi. Mu myaka itanu maze muri ubu buhinzi maze kugira ikimasa kandi ntangiye no kubaka inzu ndashaka kuzana umugore”.

Kundayezu Michel we yagize ati “Hano mu Murenge wa Jenda n’ahitwa Bazirete ni ho gicumbi cya karoti mu Rwanda hose. Abasirimu bose b’i Kigali n’ahandi, barya izivuye hano. Abenshi mu bakora ubuhinzi bwa karoti ni abarangije Kaminuza. Babanje kwanga kubizamo, ubukene bubafashe baraza turabigisha ubu bamaze kuba benshi. Ubu twateye imbere nyuma yo kwibumbira muri koperative”.

Ubwo buhinzi bwa karoti ntabwo bwateje imbere abahinzi gusa, ahubwo n’abakora akazi ko kuzipakira mu mifuka no mu modoka, bavuga ko ako kazi kabatungiye imiryango nk’uko Ntawuguranayo Didas yabitangarije Kigali Today.

Ati “Twe turazipakira umukoresha wacu w’umuhinzi akaduhemba n’umukoresha wundi uzigemura tukamupakirira akatwishyura ugasanga turahahira ingo zacu. Ku munsi simbura ibihumbi bitatu. Ubu umufuka umwe upakiye neza wa karoti ugura amafaranga ibihumbi 50 twe tuwupakira tugahembwa amafaranga 500 cyangwa 1000. Aha Jenda ni ko kace kazwi ku buhinzi bwa karoti mu gihugu hose. Hari n’abagerageza kutwigana ariko byarabananiye. Ubu dufitiye igihugu akamaro kuko karoti nziza ziboneka ku masoko ni iziva hano”.

Undi ati “Mu gihugu hose barabizi karoti ni aha bazishakira. Nkanjye zirantunze cyane, ndi umunyeshuri kandi ndirihira, iyo mvuye ku ishuri nza gupakira. Gupakira umufuka umwe ni amafaranga magana atanu. Ubu zanteje imbere no mu bworozi mfite intama eshatu n’ihene ebyiri”.

Abo bahinzi ngo baciye ukubiri n’ikibazo cy’igwingira, kuko bamenye ko igihingwa cya karoti gikubiyemo intungamubiri aho bazigurisha nyuma yo guhaza ingo zabo.

N’ubwo abo baturage bishimira iterambere ry’abo bakesha ubuhinzi bwa karoti, bavuga ko bahura n’imbogamizi zinyuranye aho umurama wazo, ifumbire n’imiti bitangiye kuzamurirwa ibiciro.

N’ubwo bishimira umusaruro babona, barasaba ko ibiciro by’umurama wa karoti n’ibiciro by’ifumbire n’imiti bigabanuka

Umwe muri bo ati “Umurama watangiye guhenda, ikilo twakiguraga ibihumbi 10 none cyageze ku bihumbi 15, ifumbire yariyongereye, imiti na yo ni uko. Ababishinzwe badufashe bagabanye ibiciro twihingire neza nta mbogamizi”.

Habanabakize Jean Claude, Umuyobozi w’akarere wungirije ushinzwe iterambere ry’ubukungu muri Nyabihu, yavuze ko kuba ubuhinzi bwa karoti bwiganje mu Karere ka Nyabihu, bituruka ku kuba ari igihingwa kiberanye n’ako gace kazihinga karimo umurenge wa Jenda, Bigogwe na Mukamira.

Avuga ko irindi banga ryo kuba abaturage bitabira guhinga izo karoti, biva ku kuba babona isoko, kuba ari igihingwa cyera vuba ikindi abo bahinzi bakaba bibumbiye no mu makoperative.

Agira ati “Impamvu bitabira kuzihinga ni ukubyitaho bakagira n’ubutaka bwiza bubereye icyo gihingwa kandi bakaba bafite isoko ry’umusaruro wabo aho beza bagahita bazohereza ku isoko i Kigali ku giciro bifuza”.

Akomeza agira ati “Ikindi gishimishije ni uko bariya bahinzi bose bibumbiye hamwe muri koperative y’abahinzi ba karoti, hakiyongeraho kuba tugenda tububakira amakusanyirizo aho mu Murenge wa Mukamira twamaze kububakira ubwogerezo bwa Karoti mu gihe no mu Murenge wa Jenda tugiye kububakira ubundi bwogerezo buzabafasha gukuzanyirizamo umusaruro. Ikindi ni n’igihingwa cyera vuba, ibyo bikabaha imbaraga zo gukora”.

Ku kibazo cy’ibiciro by’umurama, imiti n’ifumbire bihenze, Umuyobozi w’akarere wungirije yavuze ko icyo kibazo batakimenye, abizeza ko bagiye kureba uburyo niba gihari cyakemuka.

Agira ati “Icyo kibazo ntabwo bakitugejejeho, nibwo ncyumvise. Gusa turareba uko cyifashe ariko ntabwo ntekereza ko umurama wa karoti waba imbogamizi ku muhinzi kuko igiciro cyawo kiba kiri hasi, ni na yo mpamvu bahinga bakunguka”.

Umuyobozi w’akarere wungirije ushinzwe iterambere ry’ubukungu muri Nyabihu, Habanabakize Jean Claude, yasabye abahinzi gukomeza guhinga neza karoti, kandi bakazihinga kinyamwuga kugira ngo zikomeze kubona isoko hirya no hino mu gihugu mu mahoteri akomeye ndetse zibe zakoherezwa no hanze y’igihugu.

Uwo muyobozi avuga ko icyo gihingwa ari kimwe mu byifashishwa mu kugabanya igwingira mu bana bato ryari ryarugarije ako gace.

Ati “Icyo tubakangurira ni ukubabwira ko n’ubwo bazijyana ku isoko bibuka ko zikubiyemo intungamubiri zishobora kuba zabafasha zigafasha n’abana babo. Tubakangurira ko bazijyana ku isoko ariko na bo bakaryaho kandi tubona babyumva”.

Abahuguwe basabzwe kugira ubushishozi mu gutoranya ba Malayika murinzi

Mu nama y’umunsi umwe yabaye mu kwezi gushize k’Ugushyingo 2019, yateguwe n’umushinga ‘Hope and Homes for Children’ abayitabiriye basabwa kwirinda amarangamutima mu gutoranya ba Malayikamurinzi.

Muri gahunda y’umuryango Hope and Homes for Children, harimo ko abana bavanwa mu bigo bakarererwa mu miryango, ariko bakarerwa na Bamalayika murinzi bihariye kandi bemera kwakira abana bafite ibibazo bikomeye, aho basabwa kubarera nta kiguzi bategereje, ahubwo barangwa n’urukundo rwa kibyeyi nkuko bivugwa na Musonera Marie Louise, umukozi wa Hope and Homes for Children.

Agira ati “Umuryango Hope and Homes for Children ukorana na komisiyo y’igihugu ishinzwe abana (NCC), mu gushakisha ba Malayika murinzi ubu turibanda ku gushaka imiryango y’impuhwe yakira abana bafite ibibazo bikomeye, abo ni ba Malayikamurinzi badasanzwe”.

Avuga ko abana bakirwa bari mu byiciro binyuranye, aho ba Malayika murinzi badasanzwe ari babandi bakira abana bafite ubibazo byihariye, barimo abafite ubumuga bukabije, abafite ubwandu bw’agakoko gatera SIDA n’abandi.

Ni yo mpamvu n’abo bana baba bakeneye umuntu ufite urukundo n’impuhwe ndetse n’ubushobozi buhagije bwo kubitaho kandi atagamije igihembo nkuko Musonera Marie Louise akomeza abivuga.

Abitabiriye inama batahanye umugambi wo kurengera abana

Ati “Ba Malayika murinzi badasanzwe dushaka gutoranya, ni abakira ba bana bafite ibibazo cyane cyane twibanda ku bafite ubumuga. Wa mwana ufite indwara idakira, ufite ubwandu. Hari aho ugera ugasanga abana bafite ibyo bibazo barabahunga bakanga kubafata, ayo mahugurwa ni cyo agamije aho tuzatoranya ba Malayika murinzi badasanzwe, bishimira kwakira abana nk’abo bafite ubuzima buruhije kandi nta nyungu bagamije, gusa bakarangwa n’impuhwe n’urukundo”.

Uwo mukozi wa Hope and Homes For Children avuga ko abo bana bafite ibibazo byihariye badapfa kubatanga mu miryango iyo ari yo yose, kuko baba bakeneye ubufasha bwihariye.

Ni yo mpamvu ba Malayika murinzi bazatoranywa bakiyemeza kwakira abo bana, bagomba kuba bafite umutima w’urukundo n’ubwitange bwa kibyeyi nyuma yuko abana nkabo bagendaga babura ababafata kubera imyumvire ikiri hasi.

Ati “Byagiye bigaragara aho abantu bagendaga bafata abana bategereje inyungu aho bahabwaga inka n’ibindi, na bwo kandi bagahitamo ba bana bafite ubuzima birinda ko abafite ibibazo ngo babagora. Abo dushaka ni abakira abo bana n’umutima mwiza ndetse n’impuhwe za kibyeyi”.

Yatanze ingero za ba Malayika murinzi bamwe bahitagamo abana bagamije kubakoresha imirimo kandi binyuranyije n’amategeko.

Ati “Hari ubwo umuryango usanga avuga ati mukampe kazajya kandagirira inka, cyangwa ugasanga ni umukecuru uba wenyine afata umwana agamije kumukoresha imirimo ngo ajye amuvomera, amukuburira n’ibindi. Abo ntabwo twemera kubaha abana”.

Bamwe mu bayobozi bahuguwe, bavuga ko inyigisho bahawe hari icyo zizabafasha mu kurushaho kugira ubushishozi bwo gutoranya ba Malayika murinzi babikwiye hagamijwe kurengera ubuzima bw’abana.

Rwisumbura Gerald, umukozi w’umurenge wa Cyintobo ushinzwe imibereho y’abaturage, agira ati “Mu myaka ishize hari ubwo twatoranyaga ba Malayika murinzi nta bushishozi bubayeho, aho wasangaga babarwanira kubera inyungu babategerejemo.

Ugasanga umuntu afashe umwana ashaka indonke aho gukorera rwa rukundo. Mu nama twagiriwe ni uko tugiye gutoranya ba Malayikamurinzi dushaka abafite urukundo kandi barangwa n’imyitwarire myiza kugira ngo abana bazafata babafate neza”.

Mukagaga Annet, umukozi wa komisiyo ishinzwe abana mu karere ka Nyabihu, yavuze ko impamvu iyo komisiyo ishaka guhuza abana n’imiryango ibarera, ari uburyo bwo kubakura mu bigo binyuranye aho batagiraga ubwisanzure n’uburenganzira bakwiye.

Mukagaga avuga ko ba Malayika murinzi ari urwego rwashyizweho na Nyakubahwa Jeannette Kagame, bikorwa n’umuryango Imbuto Foundation muri 2008, hagamijwe kurengera umwana, akavanwa mu bigo akajyanwa mu miryango aho nyuma byaje kwegurirwa komisiyo y’igihugu ishinzwe abana.

Asaba inzego zinyuranye z’ubuyobozi zitabiriye iyo nama, gutoranya ba Malayikamurinzi bagendeye ku bushishozi.

Mukagaga Annet, umukozi wa NCC mu karere ka Nyabihu

Ati “Icyo tubasaba ni uko babasha kuduha ba Malayika murinzi babikwiye. Barabaduha tukabereka ibyo bashinzwe, tunabageraho mu miryango ngo tumenye neza uburyo babo ubwabo babanye, kugira ngo tumenye niba wa mwana tuzabaha bazamurera neza. Tureba Malayikamurinzi wa wundi uzarera umwana neza.

Akomeza agira ati ”Icyo dutsimbararaho ni ukureba Malayika murinzi uzarengera umwana, turebera ku nyungu z’umwana. Ni yo mpamvu hari ubwo tubona ba Malayikamurinzi nka 100, twasesengura neza tugasigarana 10 gusa, bisaba ubushishozi”.

Igikorwa cyo gutoranya ba Malayika murinzi bo kurera abana bafite ibibazo gitegurwa na Hope and Homes for Children, kirategurwa mu turere tunyuranye mu ntara zose z’igihugu, aho bategura ba Malayika murinzi bashobora kwitabazwa mu gihe habonetse umwana wahura n’ikibazo akeneye ubutabazi.

Mu karere ka Nyabihu hamaze guhugurwa imiryango igizwe na ba Malayika murinzi 19, aho muri iyo miryango hatoranyijwemo 12.

Abana mu karasisi

Ni nyuma y’uko muri uwo murenge hafunguwe ishuri ry’inshuke n’icyiciro cy’amashuri abanza ryitwa Christ the King Nursery and Primary School, rimaze umwaka ryigisha abana b’inshuke rikaba rigiye gutangiza amashuri abanza.

Ugirihirwe Alodie, Umuyobozi w’iryo shuri yavuze aho igitekerezo cyo kurishinga cyaturutse, nyuma yo kubona ko muri ako gace hafite icyuho cy’amashuri y’inshuke n’amashuri abanza, ibyo bikaba imbogamizi ku myigire y’abana bakora ingendo ndende bagana ishuri, bamwe bikabaviramo ubuzererezi.

Agira ati “Igitekerezo cy’iri shuri cyaturutse kuba nari nsanzwe ndi umurezi nk’umuntu ufite ubunararibonye bw’imyaka 19. Nagize igitekerezo cy’uko nakorohereza ababyeyi n’abana bahoraga bifuza ko bakwegerezwa ishuri, njye ubwange nshaka ahantu nafatanya na Leta kugira ngo abo bana babone ahantu bigira habegereye.

Ugirihirwe Alodie umuyobozi wa Christ the King Nursery and Primary School

Akomeza agira ati “Hano mu Murenge wa Jenda ni hamwe mu gace katagiraga ishuri ry’inshuke, aho abana bahoraga bagenda bazerera batabasha kubona uko biga. Nta mashuri y’inshuke yari ahari iri ni ryo shuri ryonyine ry’inshuke rifasha abana kwigira hafi badakoze ingendo”.

Ababyeyi batuye muri uwo murenge wa Jenda, bavuga ko kuba babonye ishuri ari umugisha kuri bo, kuko abana babo bajyaga biga bibagoye kubera ingendo ndende bajyaga bakora, ndetse bamwe bikabaviramo kureka ishuri.

Majyambere Saidi ati “Iri shuri ni ingenzi bijyanye n’uko hano mu Murenge wa Jenda tutagiraga ishuri, abana bakoraga ingendo aho bajyaga kwiga za Mukamira ahantu bakoraga ibirometero byinshi, abandi bakareka ishuri, ibyo bikadindiza iterambere ry’umwana mu myigire”.

Akomeza ati “Ikindi gishimishije ni uko rigiye kwakira n’abana mu mashuri abanza, turaruhutse cyane nta mwana uzongera kuva mu ishuri kandi n’amafaranga y’ishuri ni make cyane. Twiteguye kwitanga tugafasha abarezi kugira ngo iterambere ry’abana bacu rirusheho kwiyongera”.

Abana 21 nibo barangije icyiciro cy’amashuri y’inshuke

Uwimana Esperance ati “Inyungu muri iri shuri zatangiye kutugeraho, aho abana bacu barangije icyiciro cy’amashuri y’inshuke. Ntibagiraga aho biga aho birirwaga mu rugo, ariko ubu natwe twararuhutse kuko imirimo yacu tuyikora neza kuko tuba twizeye ko abana bacu bari ku ishuri kandi bafite umutekano”.

Akomeza agira ati “Turi abafatanyabikorwa beza cyane kuba twarazanye abana bacu, kandi twiteguye no kohereza abiga mu mashuri abanza. Ikizakenerwa cyose mu guteza imbere iri shuri twiteguye gutanga imbaraga zacu, kuko turuhutse ibibazo byinshi”.

Iryo shuri ryakira abana b’inshuke rigiye gutangiza n’icyiciro cy’amashuri abanza, hagamijwe gufasha uburezi mu murenge wa Jenda no mu duce tuwukikije. Ubu rikaba ryaraguye n’inyubako aho ryatangiriye ahantu hato, ariko kugeza ubu rikaba ryaramaze kubona aho rikorera hafite ubushobozi bwo kwakira abana basaga 500.

Ugirihirwe Alodie Umuyobozi w’iryo shuri, avuga ko mu nyubako nshya iryo shuri ritangiye gukoreramo harimo izari ishuri ryisumbuye ryaguzwe nyuma yo gufungwa na Minisiteri y’uburezi.

Ati “Ni ishuri rifite ibyumba 16 bishobora kwakira abana barenze 500, ryari ishuri ryisumbuye rifite amashami anyuranye. Buri mwana wese ahawe ikaze, ntawe tuzasubiza inyuma kandi twiteguye kurerera igihugu dutanga n’ireme ry’uburezi, ku buryo umwana uzajya asohoka muri iki kigo azajya aba afite ubumenyi buhagije buzamufasha gukomeza mu bindi byiciro by’amashuri”.

Abana ngo ntibazongera gukora ingendo bajya kwiga kure

Iryo shuri rirateganya kwakira abana mu mwaka w’amashuri wa 2020, bo mu mashuri y’inshuke, n’abana baziga mu mashuri abanza kugera mu mwaka wa kane aho ubu rifite abana basaga 80 biga mu mashuri y’inshuke barimo 21 basoje icyo cyiciro ku itariki 28 Ugushyingo 2019.

Abana barangije amasomo y’icyiciro cy’amashuri y’inshuke ni abakiriwe baracikanwe n’amahirwe yo gutangirira igihe kubera kubura ishuri ribegereye aho bize mu gihe cy’umwaka umwe, bahabwa n’icyemezo kibemerera gutangira umwaka wa mbere w’amashuri abanza.

Ababyeyi barerera muri iryo shuri na bo bakoranye akarasisi n’abana babo

Akimanimpaye Judith yagiraga umwanda ubu ni we wigisha abandi kugira isuku

Uwo mubyeyi avuga ko mbere yari azi ko ingutiya ajyana guhinga itagomba kumeswa, aho yahingaga akagera mu isarura atameshe imyambaro yahinganye.

Avuga ko n’ibyo yatekeragamo, ibyo yariragaho yabonaga bitari ngombwa ku byozwa agapfa kugabura.

Ati “Nari umunyamwanda mu buryo bukabije, murabona ndi umuhinzi. Najyaga guhinga, ubwo nkiyumvisha ko ingutiya yanjye ari iyo guhingana nkazarangiza ubuhinge ntayimeshe”.

Akomeza agira ati “Murumva ibyo gutekamo ntibyozwaga, navaga guhinga nkakwakwanya nshaka ibyo kurya, ibyo koza isafuriya sinabikozwaga, isahani ni ukwaruriraho uko nabyumvaga”.

Uwo mubyeyi avuga ko umwanda wamukurikiranye ageza nubwo yari asigaye ava guhinga bwakwira akaryama atoze, ari nako imbaragasa zimutera, dore ko atagiraga umufariso wo kuryamaho ari nako ngo n’inda zitabaga zimworoheye mu ngutiya ye.

Ati “Kuryama ni uguhirima uko nabyumvaga, ari nako imbaragaza zazaga ari nyinshi, mu ngutiya ho inda zabaga zuzuye akazuba kava zikabyuka nkarwana na zo nishimagura hakaba ubwo nishishimuye nkanibagirwa n’ibyo nakoraga.

Uburoso n’umuti w’amenyo (colgate) mbimenye vuba, kuko sinari kubimenya ntarabikoresha. Umugabo we urabyumva ntiyagira ibyishimo urebye uko nari meze. Ntaho ibyishimo byava”.

Uwo mubyeyi avuga ko uwo mwanda wagiye umugiraho ingaruka nyinshi, aho yahoraga mu mavuriro yarwaje impiswi ati “Indwara zabaga nyinshi mu muryango, buri gihe akaba ari njye uri mu bitaro ndwaje indwara z’umwanda, inzoka, malariya zahoraga aho kubera ibihuru byabaga bikikije urugo”.

Uwo mugore kandi avuga ko kuva mu mwanda byaturutse ku muryango ‘Gikuriro’, waje mu murenge wabo wa Jomba, ubashyira mu matsinda aho bahawe amahugurwa ku isuku n’isukura. Atangira gucika ku mwanda wari waramaze kumubaho icyorezo.

Agira ati “Uburyo navuye mu mwanda biratangaje. Umushinga Gikuriro wadushyize mu matsinda isuku itangira kuza kubera inyigisho zatangwaga. Abafashamyumvire baratwigisha dutangira na gahunda yo gusasirana tugura matora, twigishwa kwirinda malariya dutema ibihuru, indwara ziterwa n’umwanda zirakira”.

Uwo mugore waganiye na Kigali Today yambaye imyambaro y’ibara ry’umweru, avuga ko yahisemo kujya yambara iryo bara kugira ngo yereke abantu aho yavuye naho agana, ubu aho atuye basigaye bamwita inyange”.

Aho atuye ubu bamwita inyange kubera uko asigaye agira isuku

Ati “Murabona ko nkeye mu gihe nari ku isonga mu mwanda. Dore agasatsi kanjye uko gasa, amenyo arera. Ubu basigaye banyita inyange kubera uko bambona”.

Akimanimpaye avuga ko kuba yaragiraga umwanda byari ibibazo by’imyumvire, kuko mu murenge wabo amazi abegereye.

Atanga ubutumwa asaba abaturage kwirinda umwanda kuko ugira ingaruka ku buzima.

Ati “Ikibura ni ubushake, amazi aratwegereye. Ikibazo ni imyumvire, aho ntuye amazi arahari pe. Nta muntu nshobora kubona afite umwanda ngo mureke agende ntamwigishije. Ndasaba abaturage kwirinda umwanda kuko ugira ingaruka nyinshi ku buzima”.

Mu gukangurira abaturage kwirinda umwanda, nyuma y’amasomo Uwimanimpaye yanyuzemo byamugize umuhanzi aho asigaye atanga ubutumwa bwe abinyujije mu mivugo.

Mu karere ka Nyabihu hubatswe utuzu tw’amazi tunyuranye

Ni muri gahunda y’imyaka itanu yo guteza imbere gahunda y’isuku n’isukura mu karere ka Nyabihu, no kurwanya igwingira mu bana ako karere gakomeje guterwamo inkunga n’abafatanyabikorwa banyuranye barimo umushinga ‘Gikuriro’ ku nkunga n’ikigega cy’Abanyamerika USAID.

Abaturage baganiye na Kigali Today bo mu murenge wa Mukamira, bavuga ko bagerwagaho n’ingaruka z’umwanda n’indwara zinyuranye ziterwa n’umwanda, bitewe no kuvoma amazi y’ibiziba.

Muhayimana Aline ati “Biradushimishije kuko twavomaga amazi mabi y’ikidendezi twise Firigiti. Hari abayatekaga ariko si bose kuko hari abapfaga kuyanywa, ugasanga inzoka ni nyinshi, cyane cyane ku bana. Wayogeshaga n’ibikoresho ntibicye, ndetse wayoga ugasanga umubiri aho gusa neza urashishuka”.

Abaturage baruhutse kuvoma aya mazi y’ibiziba bitaga ’Firigiti’

Akomeza agira ati “Ubu tugiye kugira isuku ku rwego rushimishije, n’abana bacu bagiye kujya bajya kwiga basa neza. Aba bagiraneza batugejejeho aya mazi baratubyaye, ni Imana yatumye badukorera iki gikorwa ngo tubeho kuko twari tugiye kwicwa n’umwanda”.

Mu karere ka Nyabihu kandi abaturage bahawe irindi vomero mu kagari ka Rugeshi rihuriweho n’imidugudu itanu, aho isoko bari basanganywe yari yarakamye, bagakora ingendo bajya kuvomera mu murenge wa Jenda ari nako batanga amafaranga menshi ku kiguzi cyayo.

Bafunguye ku mugaragaro amavomero anyuranye

Umwe mu baturage bishimiye uryo vomero agira ati “Iri vomo ryagiye rikama buhoro buhoro, bigeze aho rirakama burundu abaturage bagakora urugendo rusaga isaha yose bajya kugura amazi mu murenge wa Jenda ku ijerekani amafaranga 30. Kuba batugejejeho amazi ibibazo birakemutse. Ubu abaturage bagize imidugudu itanu bose batangiye kuvomera hano, umwanda ubaye amateka. Ntacyo Gikuriro itadukoreye”.

Umuyobozi w’ishami ry’imiyoborere mu karere ka Nyabihu, Jean Claude Nsengimana, yavuze ko amazi abaturage bahawe bayabonye bayakeneye. Abasaba kuyafata neza, birinda kuyangiza kandi baharanira kurwanya umwanda n’ibindi bibazo byaterwaga no kutagira amazi meza.

Agira ati “Aya mazi tuyafate neza, kuyarinda bibe ibyacu. Kubera uburyo twari tuyakeneye hashyizweho abantu bashinzwe buri vomero, aho uzajya ajya kuvoma azajya ahabwa inyigisho ku isuku n’isukura n’izindi gahunda z’ubuzima.

Turashimira abaterankunga bafashije ubuyobozi bw’akarere mu bikorwa binyuranye bifasha abaturage kugera ku iterambere n’imibereho myiza”.

Umushinga Gikuriro ukorera mu turere umunani tunyuranye, ufite gahunda yo guteza imbere gahunda y’isuku n’isukura, guteza imbere imirire iboneye y’abagore bari mu gihe cy’uburumbuke n’abana kuva bagisamwa kugeza ku myaka ibiri.

Uwo mushinga ukagira gahunda yo kurwanya inzara no kwigisha abaturage guhinga kijyambere.

Abaturage bagejejweho amazi

Muri uyu mwaka, ibikorwa byakozwe mu turere umunani tunyuranye byatwaye amafaranga asaga miliyoni 590Frw, aho mu karere ka Nyabihu hubatswe amavomero 35 n’utuzu rw’amazi turindwi, hubakwa n’ubwiheroro bw’ishuri bufite n’icyumba cyihariye kigenewe abakobwa.

Batanage Charlotte uhagarariye CRS umuryango Nyamerika w’abepiscopi ba Kiliziya Gatolika, yashimye abaturage bo muri Nyabihu n’ubuyobozi batahwemye gushyira imbaraga mu kurwanya indwara zinyuranye ziterwa n’umwanda. Asaba abaturage gufata neza ibikorwaremezo bagejejweho nk’ibyabo.

Abagore bamurika ibyo bagezeho

Ni muri gahunda yashowemo miliyoni zisaga 590 z’amafaranga y’u Rwanda, binyuze muri Minisiteri y’ubuzima ishami rishinzwe gahunda mbonezamikurire, umushinga ‘Gikuriro’ watewe inkunga n’ikigega USAID cy’Abanyamerika, Umuryango w’Abepisikopi ba Kiliziya Gatolika(CRS) n’umuryango mpuzamahanga w’Abaholandi witwa SNV.

Mu muhango wo kwishimira ibikorwa byagejejwe ku baturage no gushimira abaturage babaye indashyikirwa mu kubahiriza gahunda yo kurwanya indwara ziterwa n’imirire mibi no kugwingira wabereye mu Murenge wa Jomba mu Karere ka Nyabihu, mu buhamya bw’abaturage bagaragaje uburyo abana babo bakize igwingira binyuze mu nyigisho bahawe, ubu bakaba bameze neza.

Umuryango wa Niyitegeka Béatrice n’umugabo we Hategekimana Athanase, mu buhamya bwabo, bavuga ko abana babo uko ari batandatu bakize igwingira bari baratewe no kutamenya gutegura indyo yuzuye.

Bavuga ko nyuma yo guhabwa amasomo ku mirire, bihutiye kuyabyaza umusaruro, nyuma y’umwaka umwe abana babo biyongera ibiro, ndetse kwa muganga bababwira ko batakiri mu murongo w’abafite imirire mibi.

Niyitegeka ati “Abashakaga kumenya uburyo umwana wagwingiye amera bose bazaga iwanjye. Abana banjye batandatu bari baragwingiye, ntawabashaga gutandukanya umukuru n’umuto. Ibaze umwana w’imyaka irindwi gupima ibiro 10! Twateguraga ibiryo bitubutse kugira ngo abana bibakwire ariko bitagira umumaro, icyo twapfaga ni uko abana baryaga bakuzuza inda”.

Akomeza agira ati “Nyuma twahuguwe n’umushinga wa Gikuriro tumenya uko abana bategurirwa indyo yuzuye, turabikora abana bacu bagenda bongera ibiro umunsi ku wundi none barakize. Ubu bariga kandi ubwenge bwariyongereye, bagira amanota meza. Abaturanyi baza gusoroma imboga iwanjye. Ndetse bamwe bampa amafaranga nkajya kububakira n’uturima tw’igikoni”.

Umugabo we Hategekimana Athanase ati “Byarambabaje kuba akarere kanjye karaje imbere mu kugwingira nanjye mbigizemo uruhare. Umugore yarambwiraga ati dore ikibazo cy’inzara kiratwishe, nanjye nkakugira mu isoko ngaterura ibyinshi ariko bidafite akamaro ndwana no kugira ngo mbone abana bijuse.

Abana baragwingiye biratuyobera, umushinga Gikuriro uraza uhera iwanjye utwigisha gutegura indyo yuzuye, none ubu iwanjye ni amahoro”.

Si amasomo ajyanye n’imirire bahawe gusa, kuko bamwe bize n’ubukorikori bubafasha kwihangira imirimo, bahurizwa mu matsinda anyuranye nk’uko abaganiye na Kigali Today babivuga.

Ngo abenshi bigishijwe kuboha no gufuma, gukora amasabune aho bakura amafaranga abafasha mu kubonera abana indyo ikwiye.

Ntawigena Pascasie ati “Abana banjye bari bararwaye bwaki, nari umukene w’umutindi nyakujya, umushinga Gikuriro uraza uradufasha. Bampaye ingurube ndorora mbona ifumbire ndahinga nkarya ngahaga ngasagurira n’isoko. Bampaye inkoko ndorora ziba nyinshyi ubu ndagurisha amagi ngaya nanayazanye”.

Mu gukemura icyo kibazo cyo kugwingira cyari cyugarije abatuye akarere ka Nyabihu, aho byagaragaye ko ari n’akarere gakungahaye ku biribwa byatewe n’ubumenyi buke bw’abaturage mu itegurwa ry’imirire, ariko ubuyobozi bwiyambaje abafatanyabikorwa banyuranye mu kurwanya burundu icyo kibazo aho bafite icyizere ko icyo kibazo kizavaho burundu.

Bamwe mu bafatanyabikorwa baremeza ko hari impinduka zifatika kandi ko icyo kibazo cy’imirire mibi n’igwingira gishobora gucika burundu, nk’uko bivugwa na Batanage Charlotte, uhagarariye CRS.

Ati “Gahunda yatuzinduye ni ukwishimira ibikorwa byakorewe muri Nyabihu. Gikuriro ni umushinga w’imyaka itanu, watewe inkunga n’umuryango wa Amerika USAID yemeye gutanga inkunga ya miliyoni 24 z’amadorari ya Amerika, mu gihe cy’imyaka itanu mu guteza imbere imirire y’abagore mu gihe cy’uburumbuke, n’abana.

Iyo turebye abaturage aho bavuye n’aho bageze, biratanga icyizere cyinshi ko ikibazo cy’igwingira mu bana kizacika. Byose ni ku bufatanye bwa benshi”.

Abaturage bishimira ibihembo bahawe

Yavuze ku Gikuriro ifite intego yo gushyigikira gahunda ya Leta mu kurwanya indwara ziterwa n’imirire mibi hakurikiranwa imikurire y’abana.

Ni gahunda yakozwemo byinshi mu turere twa Nyabihu, Nyanza Ngoma, Rwamagana, Kayonza, Kicukiro, Nyarugenge Nyanza na Ruhango, ahubwatswe utuzu 57 tw’amazi, amavomo 184, ubwiherero bugezweho burimo n’icyumba cyihariye cy’abakobwa mu mashuri 11, bitwara asaga miliyoni 590 z’amafaranga y’u Rwanda.

Ubuyobozi bw’akarere ka Nyabihu bwishimira aho abaturage bavuye n’aho bageze mu kurwanya ikibazo cy’igwingira mu bana, aho bwemereye abafatanyabikorwa ko buzasigazira ibyagezweho kandi ko bwiteguye guca ukubiri n’ikibazo cy’igwingira mu bana kimaze iminsi cyugarije ako karere.

Alexis Mucumbitsi uhagarariye gahunda y’imirire, isuku n’isukura muri gahunda y’igihugu y’imbonezamikurire, yanenze uburyo akarere ka Nyabihu kaje ku isonga mu ndwara ziterwa n’imirire mibi n’igwingira mu bana, ariko ashimira abaturage n’ubuyobozi uruhare bakomeje kugaragaza mu kurandura burundu icyo kibazo, aho bishyize hamwe bagana ibikorwa by’iterambere.

Agira ati “Ubushakashatsi bwagaragaje ko Nyabihu mu turere twose mu gihugu ari iya mbere mu kugira abana bagwingiye, ariko ndabashimira kuba mwararebye icyo kibazo mukakigira icyanyu, mukaba mwarafashe iya mbere mu kurwanya imirire mibi n’isuku n’isukura.

Noneho tugiye gukora ubundi bushakashatsi bugiye gutangira mu kwezi kwa cumi buzatugaragariza uko Nyabihu ihagaze. Ariko ibikorwa nabonye n’ubushake mufite, ndizera ko Nyabihu ikibazo cyo kugwingira kigiye gucika ko mutazongera kuza kuri uriya mwanya wa mbere mu kugwingira”.

Bunamiye abazize Jenoside bashyira indabo aho bashyinguwe

Ni mu muhango wo kwibuka ku nshuro ya 25 Jenoside yakorewe Abatutsi, ariko bikaba ari ku nshuro ya mbere muri iryo shuri, byabaye kuwa gatanu tariki 28 Kamena 2019.

Mu biganiro byatanzwe, abanyeshuri bisobanuriwe amateka y’uburyo Jenoside yateguwe n’ubuyobozi bubi, bwavanguraga abaturage bubacamo ibice bigeza kuri Jenoside yakorewe Abatutsi mu 1994.

Kayisire Anastase warokokeye Jenoside mu karere ka Nyabihu, mu buhamya bwe yabwiye abanyeshuri uburyo bishe umuryango we wose bazira ubwoko, asigara ari umwe mu muryango.

Abana bakoze urugendo rwo kwibuka Jenoside yakorewe Abatutsi

Kayisire avuga ko abavuga ko Jenoside yatewe n’ihanuka ry’indege ya Habyarimana, ari ugukwirakwiza ibinyoma kuko n’ikimenyimenyi umuryango we bawutsembye mu 1992, agasaba abana kwima amatwi abapfobya Jenoside bavuga ko yatewe n’ihanuka ry’iyo ndege.

Ati “Kuva kera, Abayobozi bavanguye abaturage, ibaze kuba mwicaranye gutyo umuntu ushinzwe kubarinda akaza akabateranya, ibyo byatangiye kera tubaho mu buzima bubi bigera aho umuryango wanjye wose bawurimbura mu 1992 babajugunya mu buvumo”.

Akomeza agira ati “Najye kuba nkiriho ntabwo ari impuhwe nagiriwe, baramfashe barankubita umubiri wose bansiga ndi intere bazi ko napfuye, barangiza ngo Jenoside yatewe n’ihanuka ry’indege ya Habyarimana, abavuga ibyo mubime amatwi”.

Ndagijimana Jean Bosco, Umurinzi w’igihango wagize uruhare mu kurokora umubare munini w’Abatutsi barimo na Kayisire, yavuze ko yakuriye mu buyobozi burangwa n’ivangura n’amacakubiri yashoye u Rwanda muri Jenoside.

Nyuma yo gukurikira ibyo biganiro, abanyeshuri batangarije Kigali Today ko isomo babomye ku mateka ya Jenoside ribafasha kwiga batagambiriye ubumenyi gusa, ahubwo ko bagomba gushyira imbaraga mu guharanira kugira indangagaciro z’ubumuntu.

Kobusinge Charon wiga muri Rwanda Coding Academy ati “Batweretse ishusho ya Jenoside, uburyo yateguwe n’ubuyobozi, icyo tugiye gukora ni ukwiga kuko niyo nshingano dufite, ariko muri uko kwiga biradusaba no twiga dufite indangagaciro n’umutimanama kimwe mu bizadufasha guteza imbere igihugu turwanya Jenoside”.

Abana mu dukino tunyuranye

Ngabire Fiona we, ati “Urubyiruko nitwe u Rwanda ruhanze amaso, twabonye uburyo ubuyobozi bwashyize ingengabitekerezo mbi mu baturage bica abandi, twe dufite inshingano zo kurwanya abagihembera amacakubiri twiyubakamo ubunyarwanda”.

Ibyo byifuzo by’abo banyeshuri byo kwiga baharanira kurangwa n’indangagaciro na kirasira, byashimangiwe n’ubuyobozi bwasabye abanyeshuri gukura birinda ikibi, ahubwo bakarangwa n’urukundo.

Nshimiyimana Jean Damascene wari uhagarariye Rwanda Polytechnic yibukije abo bana ko bakwiye kurangwa n’umutimanama wo kwanga ikibi.

Nshimiyimana Jean Damascene waje ahagararie Rwanda Poltechnic Schools asabe abana gukurana indangagaciro na kirazira z’Umunyarwanda

Ati “Muri hano murahabwa ubumenyi bunyuranye, ariko byose bisaba n’umutimanama, ubumenyi butagira umutimanama ntacyo buba bumaze, kuko n’abayobozi bateguye Jenoside bakayishyira mu bikorwa bari barize baraminuje, ni yo mpamvu tubakangurira kwiga ariko bikajyana n’umutimanama n’indangagaciro z’ubunyarwanda”.

Egide Gakwaya Umuyobozi w’iryo shuri, yavuze ko igikorwa cyo kwibuka Jenoside muri iryo shuri kibaye ku nshuro ya mbere nyuma y’uko Nyakubahwa Perezida wa Repuburika ahaye abaturage iryo shuri rigatangira kwakira abanyeshuri mu ntangiro za 2018.

Yavuze ko kuba abana bakomeje kurangwa n’ituze ubwo hatangwaga ibiganiro mu gihe kirekire, ari indangagaciro batozwa n’icyo kigo zo kumva bagatega amatwi ibyo abakuru bababwira ku mateka y’u Rwanda.

Ati “Aba bana 132 biga muri Nyabihu TVET School basanga 60 biga muri Rwanda Coding School, bose bavutse nyuma ya Jenoside yakorewe Abatutsi, bafite amatsiko yo kureba no kumva amateka yaranze abanyarwanda, ababyeyi babo. Bafite n’inyota yo kuvuga ngo ibyabaye ntibizongere”.

Akomeza avuga ko urebye ubushake n’inyota bafite, ubona ko hari icyizere cy’uko urubyiruko rw’u Rwanda ruri mu mashuri rwigira ku mateka y’ibyahise, atari ukubisubiramo ahubwo ari ukubikumira ngo ntibizongere.

Simpenzwe Pascal, umuyobozi w’Akarere wungirije ushinzwe imibereho myiza y’abaturage mu Karere ka Nyabihu yasobanuye impamvu bavuye i Nyabihu barenga inzibutso nyinshi baza gusura urwibutso rwa Gisozi.

Simpenzwe ati “Twaje kuri uru rwibutso rwa Gisozi nk’urwibutso rufite amateka yihariye kugira ngo dushobore kumva neza amateka ya Jenoside kubera ko hano hari amakuru menshi yihariye asa n’aho yunganira ayo mu turere dutandukanye.

Bazanye n’urubyiruko rugize urunana rw’urungano. Urwo rubyiruko rurimo urufite ababyeyi bagize uruhare muri Jenoside, hakabamo urubyiruko rwo mu miryango yakorewe Jenoside yakorewe Abatutsi. Harimo n’urubyiruko rwatahutse vuba ruva mu buhungiro butandukanye. Mu basuye urwo rwibutso kandi harimo abavutse ku bafashwe ku ngufu muri Jenoside ndetse n’abana bavuka ku bakoze Jenoside.

Simpenzwe Pascal, umuyobozi w’Akarere wungirije ushinzwe imibereho myiza y’abaturage mu Karere ka Nyabihu

Bazanye n’abayobozi mu nzego zitandukanye barimo aba Ibuka, AVEGA, n’imboni z’ubumwe n’ubwiyunge kugira ngo bashobore gufatira hamwe ingamba zo gukumira ingengabitekerezo ya Jenoside, bamaze kwirebera amateka ya Jenoside agaragara ku rwibutso rwa Gisozi.

Simpenzwe ati “Ntabwo duhagaze neza muri raporo yagaragajwe na Komisiyo y’Igihugu y’Ubumwe n’Ubwiyunge, byagaragaye ko turi inyuma cyane, ariko ni yo mpamvu tuba tugomba gufata ingamba kugira ngo tugere ku bumwe n’ubwiyunge bukwiriye.”

Uwo muyobozi avuga ko hari byinshi byakozwe, aho nk’urubyiruko rwavuye mu itorero. Ibyo bigishijwe mu itorero byatumye batekereza ku byo bahura na byo mu ngo zabo bituma bafata umugambi wo kuvuga ngo “Reka twimenyere amateka y’ukuri, atari ya mateka y’amagambo cyangwa se yo mu mpapuro, ahubwo dusure n’inzibutso zishoboka zose kugira ngo dushobore kwigisha ababyeyi bacu n’abaturanyi kuko iyo urebye nk’abana bafite ababyeyi bagize uruhare muri Jenoside, ababyeyi babo bajyaga kubasura bakababwira ko bafunzwe kubera bariya, ntibavuge ko bafunzwe kubera Jenoside ahubwo bakababwira ko bafunzwe kubera Abatutsi.”

Ati “Icyo ngicyo cyatumye tuza kubereka ukuri kw’ibintu. Mboneyeho n’umwanya wo gusaba ababyeyi kubwiza abana babo ukuri kuko ukuri ni ko kuzubaka iki gihugu. Dukomeje kugendera ku kinyoma ntitwazagera iyo twifuza.”

Banasuye ingoro ndangamateka y’urugamba rwo kubohora igihugu iri mu nyubako Inteko Ishinga Amategeko ikoreramo.

Simpenzwe avuga ko amateka agaragara kuri iyo ngoro n’agaragara ku rwibutso afite aho ahuriye kuko Abanyarwanda bagize uruhare muri Jenoside, ariko na none Abanyarwanda b’intwari bagira uruhare mu kuyihagarika.

Ati “Iyo ngoro tuyigiraho isomo ryo gukunda igihugu, isomo ry’ubwitange, isomo ryo kutireba ahubwo ukareba inyungu rusange. Ni cyo twifuza ku Rwanda rwacu, ni cyo twifuza ku rubyiruko rwacu.”

Niyoyita Jean Claude wo mu Karere ka Nyabihu mu Murenge wa Jenda avuga ko impamvu baje ku rwibutso rwa Kigali ruri ku Gisozi ari ukugira ngo bamenye neza amarorerwa yabaye mu Rwanda.

Ati “Iwacu tugira inzibutso mu Karere ariko twagize amatsiko twumva ko tugeze na hano ku Gisozi byarushaho kudufasha gusobanukirwa no kumenya amarorerwa yabereye na hano muri Kigali nubwo no mu Karere iwacu na ho byahabaye.”

Niyoyita Jean Claude avuga ko gusura inzibutso zitandukanye bituma bamenya neza uko Jenoside yakozwe hirya no hino mu gihugu

Niyoyita warokotse Jenoside avuga ko yasigaranye na mushiki we umwe gusa, mu gihe mu muryango wabo bari abantu barindwi. Ibyo yabonye ku Gisozi ngo azabihuza n’ibyabaye iwabo muri Nyabihu, bityo bimufashe kwigisha abagipfobya n’abahakana Jenoside.

Antoinette Niyonteze wo mu Karere ka Nyabihu mu Murenge wa Jenda we yagize ati “Kuza hano byamfashije cyane kuko twasuye ibice bitandukanye. Twatangiriye ku mateka y’u Rwanda mbere y’umwaduko w’Abakoloni, tureba uburyo Abanyarwanda bari babanye mbere y’umwaduko w’Abakoloni. Abanyarwanda bari abavandimwe, basangira akabisi n’agahiye, nta wabameneramo, nta n’uwabacamo ibice kuko bari abavandimwe.”

Niyonteze asobanura ko bamenye ko abakoloni baje bacamo Abanyarwanda ibice, abakoloni bafata ibyo Abanyarwanda bitaga ibyiciro bijyanye n’ubukungu, babyita amoko. Mu gihe mu Rwanda mbere hari amoko 18 mu muryango nyarwanda, abakoloni bo ibyiciro by’ubukungu Abanyarwanda babarizwagamo babihindura amoko.

Ayo macakubiri abakoloni bayacengeje mu Banyarwanda b’icyo gihe na bo barabyumva, kugeza ubwo bigeza Abanyarwanda kuri Jenoside yakorewe Abatutsi mu Rwanda.

Niyonteze asaba Abanyarwanda kubana nk’abavandimwe bakima amatwi ibibatandukanya

Niyonteze ati “Mu by’ukuri nkanjye w’urubyiruko wageze aha ngaha, nkareba uburyo Abanyarwanda bari babanye mbere y’umwaduko w’Abakoloni, nkareba uko babanye mu gihe cy’abakoloni, nkareba n’icyo byatugejejeho, icyo nsabwa nk’urubyiruko ni uko ngomba kujya gusobanurira bagenzi banjye tutazanye aha ngaha, nkabasobanurira uko u Rwanda rwahoze, uko u Rwanda rwabaye mu gihe cya Jenoside n’uko u Rwanda ubu ngubu rugomba kuba. Ubu ngubu Abanyarwanda bagomba kubana nk’Abavandimwe kuko abiyita Abahutu n’Abatutsi usanga basangiye amoko y’Abanyarwanda bose babarizwamo uko ari 18.”

Ati “Amoko y’Abahutu, Abatutsi n’Abatwa si amoko akwiye kuranga Abanyarwanda, ahubwo Abanyarwanda dukwiye kurangwa na Ndi Umunyarwanda, mbere yo kwiyumvamo ubundi bwoko ukumva ko uri Umunyarwanda kuko kuba Umunyarwanda ni ko gaciro k’u Rwanda ni na ko gaciro k’Umunyarwanda.”

Andi mafoto:

Biyemeje guhindura imyumvire bahitamo gufatanya n’abagore kwita ku bana babatekera

Abo bagabo bavuga ko bitabiriye ayo mahugurwa nyuma yo kwisuzuma, bagasanga bari bafite imyumvire mibi ku buringanire bagatererana abagore babo, bibwira ko uburere bw’umwana bureba abagore gusa.

Abaganiye na Kigali Today, bavuga ko nyuma yo kwiyemeza gufasha abagore babo mu kwita ku bana hari impinduka zifatika bagenda babona, aho abana batangiye gukira indwara zari zibugarije ziterwa n’imirire mibi.

Hategekimana Tharcisse agira ati “Nyabihu ni akarere gafite ibyo kurya, ariko kakagira n’ibibazo byo kugwingira ku bana, niyo mpamvu abagabo twitabiriye amahugurwa yo guteka, twiga guteka indyo yuzuye. Aho tumenyeye ko tugomba gufasha abagore bacu, abana bari barwaye indwara ziterwa n’imirire mibi, baragenda bakira”.

Abagabo bize gutegura indyo yuzuye ngo bahangane n’imirire mibi

Dufatanyishimwe James Patrick nawe ati “Tucyumva ko Nyabihu iza ku mwanya wa mbere ku bana bagwingiye, twamenye ko abagabo twabigizemo uruhare, twegera umushinga ‛Hinga weze’, udukangurira gufatanya n’abagore bacu.

Twize guteka nyuma dushyiraho amatsinda mu tugari akurikirana ubuzima bw’abana”.

Akomeza agira ati “Ubu mu Murenge wa Rurembo, indwara ziterwa n’imirire mibi ziragenda zikira”.

Gutegura indyo yuzuye bijyana no kugira isuku

Gusa aba bagabo bavuga ko hari bamwe muri bagenzi babo banze guhinduka bakigendera mu myumvire igoramye kuri gahunda y’uburinganire n’ubwuzuzanye aho bacyumva ko imirimo yo mu rugo yose igenewe umugore.

Dufatanyishimwe ati “Bamwe mu bagabo bafite ya myumvire ikiri hasi, uratambuka bati dore inganzwa, yahawe inzaratsi. Gusa turagenda tubakangurira guhinduka bakifatanya n’abagore babo, mu kurera abana babo hagamijwe kurwanya igwingira mu karere kacu”.

Abagore barashima ko abagabo babo bamaze kumva ko ubufatanye bw’umugabo n’umugore mu rugo ari ingenzi, bakanenga abagikomeje kubaca intege babita inganzwa.

Mukamusoni Rehema agira ati “Kuba abagabo bafasha abagore guteka, byaradufashije ndetse bigabanya n’ibibazo by’igwingira kubera ubufatanye bw’umugore n’umugabo.

Umugore arajya mu kazi kanyuranye agasanga umugabo yatetse abana bariye, abana babayeho neza kuruta mbere, aho abagabo bigiraga mu kabari imirimo yose bakayiduharira”.

Abana bishimiye amafunguro yatetswe n’ababyeyi b’abagabo

Ubuyobozi bw’akarere ka Nyabihu nabwo buremeza ko nyuma yuko abagabo bamenye inshingano zabo zo gufasha abagore mu burere bw’umwana, ikibazo cyo kugwingira gikomeje kugabanuka ku buryo gishobora kuzaba amateka.

Umuyobozi w’akarere ka Nyabihu Mukandayisenga Antoinnette yemeza ko bafite icyizere ko Nyabihu itazongera kugaragara mu turere dufite abana bugarijwe no kugwingira.

Mukandayisenga Antoinette Umuyobozi w’akarere ka Nyabihu

Ati “Twakomeje gushishikariza abagabo kuva mu myumvire mibi ku buringanire, baragenda bahinduka aho bamaze kumenya ko imirimo yose y’urugo idaharirwa umugore gusa.

Mu kigereranyo cyo muri 2020, nibwo hazabaho isesengura kugira ngo barebe uko duhagaze ku kibazo cy’igwingira, mu ntego twihaye ubutaha tuzagira imyanya myiza, aka karere ntacyo kabuze ibiribwa byose turabifite”.

Imibare yo mu mwaka wa 2015, igaragaza ko igipimo cyo kugwingira cyari kuri 38% ku rwego rw’igihugu, aho akarere ka Nyabihu ariko kari ku isonga mu kugira abana benshi, n’abana 59% bagwingiye.

Abenshi mu babyeyi b’aba bana batangiye kumenya iby’iyo ndwara bahamagawe n’ubuyobozi bw’ikigo bubasaba kwihutira kukigana kugira ngo bajyane abana babo mu buvuzi bwisumbuyeho.

Bamwe muri abo babyeyi baganiriye na Kigali Today bavuze ko iyi ndwara imaze ibyumweru bibiri ivugwa muri iki kigo, ikaba ikomeje kubabera urujijo.

Umwe muri aba babyeyi yagize ati: “Ikigo giheruka kumpamagara ngo njye gufata umwana kuko yari yarembye akeneye kuvuzwa. Narahageze nsanga aribwa cyane mu mavi, ataka kandi atabasha gukandagira. Nabajije abamuyobora icyo babikozeho bambwira ko bagerageje kumuvuza ku kigo nderabuzima ariko ntibyagira icyo bitanga”.

Icyo gihe yamujyanye kumuvuza ku rindi vuriro bamuha imiti, amaze kubona ko umwana yorohewe amusubiza ku ishuri. Icyakora ngo uwo mubyeyi yongeye guhamagarwa nta n’icyumweru cyari cyashira, abwirwa ko umwana we yarushijeho kuremba.

Yagize ati: “Nasubiyeyo igitaraganya nsanga atabasha kuva aho ari, ku buryo kumuvana mu kigo njya gutega imodoka byansabye kumuheka ku mugongo, ubu twageze mu bitaro dutegereje ko muganga amufata ibizamini tukareba ko hari icyo byatanga”.

Aba babyeyi bavuga ko bakomeje kuba mu rujijo kuko iyi ndwara batazi iyo ari yo, n’inshuro zose babaza ubuyobozi bw’ikigo bubabwira ko itaramenyekana. Bakibaza uburyo ishobora kwirindwa cyangwa kuvurwa.

Hari uwagize ati “Kuba tutazi ngo iyi ndwara ni iyihe biratuma twibaza niba yandura cyangwa ifata umuntu mu bundi buryo, bigatuma tunibaza icyerekezo turi bufate ngo tuvuze abana bacu kuko; none se ahari tubajyane mu masengesho byibura ho bazahakirira?”.

Ubuyobozi bw’Ikigo nderabuzima cya Rambura bwemeje ko mu gihe cy’ibyumweru bibiri bishize iki kibazo kimenyekanye bamaze kwakira abana 20 bagaragaza ibimenyetso byo kuribwa mu mavi hakaba n’abagagara icyo gice kugeza ku birenge bakananirwa kugenda.

Ibitaro bya Shyira byakurikiranye ikibazo cy’iyi ndwara dore ko ikibazo kikimara kumenyekana byahise byohereza mu kigo itsinda ry’abaganga bapima abana indwara ariko ibizamini ntacyo byagaragaje.

Umuyobozi wabyo Dr Maj. Kayitare Emmanuel yagize ati: “Mu minsi yashize twaratabajwe biba ngombwa ko twoherezayo itsinda ry’abaganga barimo n’abadogiteri bapima abana ariko nta ndwara twabonye, byabaye ngombwa ko tubaha imiti ibagabanyiriza ububabare n’ituma babasha kuruhuka mu gihe tugishakisha imiterere y’indwara”.

Hari gukekwa indwara ebyiri

Uyu muyobozi w’ibitaro bya Shyira yavuze ko bakeka ko aba banyeshuri baba barwaye iyitwa ‘Maladie Psychique’ iri mu bwoko bw’indwara zo mu mutwe ishobora gufata umuntu akagaragaza ibimenyetso bitandukanye birimo n’ibigaragara kuri aba bana. Gukora siporo kenshi, n’ibindi bituma baruhuka bihagije bifasha kwirinda iyi ndwara nk’uko muganga yabihamirije Kigali Today.

Ikindi kiri gutekerezwa ngo ni imirire ishobora kuba itanoze. Yagize ati: “Kutarya indyo yuzuye bishobora gutuma umubiri utakaza ubudahangarwa, turacyeka ko n’aba bana baba bafite icyo kibazo, twagiriye inama ubuyobozi bw’ikigo kwita cyane ku byo babagaburira bigomba kuba ari indyo yuzuye, kwita ku kurya imboga zihagije n’imbuto kuko iyo byirengagijwe ni ho ujya kubona umuntu yarwaye, umubiri ntubashe kugira ubwirinzi”.

Umuyobozi w’Akarere ka Nyabihu, Mukandayisenga Antoinette, yahamije ko ubu hamaze gushyirwaho itsinda riri gukurikirana ikibazo cy’aba bana ku buryo bikomeje ikibazo bakigeza ku nzego zikuriye akarere.

Yagize ati: “Iki kibazo twakimenye mu byumweru bibiri bishize abana barakurikiranwa bagenda boroherwa, ariko ku munsi w’ejo twongeye kumenya ko na none hari abongeye kurwara, turi gukora ibishoboka byose ngo dukorane n’abaganga b’inzobere baturebere imiterere y’iyo ndwara, ariko ntibiri bugarukire aha kuko bikomeje gutyo turiyambaza inzego zidukuriye zize zigire icyo zigikoraho”.

Kigali Today yagerageje inshuro nyinshi kuvugana n’Ubuyobozi bwa Groupe Scolaire Rambura/Fille ku murongo wa telefoni ariko ntibwaboneka.

Ababyeyi bavuga ko bamwe muri bo barangazwa n’imirimo ntibite ku bana

Imibare yo muri 2015, igaragaza ko mu karere ka Nyabihu 51% by’abana bari munsi y’imyaka itanu bagwingiye, bivuze ko ari abarenga ½.

Abajyanama b’ubuzima bo bavuga ko bakora ibishoiboka byose bagakurikirana ubuzima bw’ababyeyi batwite ndetse n’abana bavuka, ariko ko imyumvire no gutwarwa n’imirimo bituma ababyeyi batagaburira abana babo uko bikwiye.

Umwe mu bajyanama b’ubuzima ushinzwe gukurikirana ubuzima bw’umwana n’umubyeyi mu kigonderabuzima cya Rwankeri mu murenge wa Mukamira, avuga ko muri aka karere hera imyaka yose, kuburyo abenshi mu miryango baba bashobora kubona amafunguro ahagije, ariko ababyeyi ntibayagaburire abana.

Agira ati “Ababyeyi b’ino bakunze gushaka imibereho, abana bakabona ifunguro bamaze gusonza cyane. Ibiryo ntibibuze, agace kacu karera turabihinga”.

Ibi kandi binemezwa na bamwe mu babyeyi bavuga ko hari bagenzi babo bahugira mu mirimo, bakibagirwa gutegurira abana amafunguro no kubagaburira.

Sibomana Immaculee wo mu murenge wa Mukamira, yabwiye Kigali Today ati “Umubyeyi ashobora kubyuka mu gitondo, akazagaburira umwana nyuma ya saa sita kandi tuzi neza ko ifunguro rya mu gitondo ariryo rifite akamaro.

Hari n’ababyeyi birirwa iyo mu mirimo, yavayo akajya kwinywera, ubwo se urumva abe ari bugaburire umwana ryari”!

Ku rundi ruhande ariko, hari n’ababyeyi bemera ko ubumenyi buke ku gutegura indyo igenewe umwana muto nabwo ari kimwe mu bitera abana benshi guhura n’ibibazo by’imirire mibi.

Umukecuru Nyirantiguye Alvera yigeze gupfusha umwana w’umwaka n’igice azize bwaki, we avuga ko yari yatewe no kutamenya uburyo bwo gutegurira umwana muto indyo yuzuye.

Agira ati “Umwana wanjye wa kabiri yishwe na bwaki, ariko kwari ukutamenya uburyo bwo kumutegurira ibyo kurya bigenewe umwana, rwose ntabwo byari byatewe no kubura ibyo kubagaburira”.

Umuyobozi w’akarere ka Nyabihu wungirije ushinzwe imibereho y’abaturage Pascal Simpenzwe nawe avuga ko muri aka karere hari ababyeyi batuzuza inshingano zabo mu kwita ku bana.

Avuga kandi ko ikibazo gikomeye ari icy’imyumvire ku gutegurira abana amafunguro, kuko muri aka karere ibiribwa byose bikenerwa mu gutegura indyo yuzuye bihera.

Uyu muyobozi ariko avuga ko ubu akarere katangiye gahunda y’ubukangurambaga kuri buri rugo, mu rwego rwo kurushaho gusobanurira ababyeyi uko bakwiye kwita ku bana.

Ati “Twavuye ku bukangurambaga buri rusange, tujya mu bukangurambaga bureba umuntu ku giti cye, urugo ku rugo. Kuburyo tumenya ngo uru rugo rwigishijwe, rukeneye ubufasha ubu n’ubu”.

Imibare itanga n’akarere ka Nyabihu igaragaza ko ubu muri aka karere habarurwa abana 177 afite ibibazo by’imirire mibi, muribo abana umunani bakaba aribo bari mu ibara ry’umutuku.

Iyi ngobyi y’ababyeyi yatanzwe yitezweho kugabanya ikibazo cy’ababyariraga mu nzira

Iyo nyubako ifite ibikoresho bikenerwa mu kwakira ababyeyi bagiye kubyara n’imodoka itwara abarwayi byashyikirijwe Akarere ka Nyabihu, na ko kabiha ikigo nderabuzima cya Kareba mu Murenge wa Jenda.

Ni inkunga yatwaye miliyoni 250 z’amafaranga y’u Rwanda ikaba yarabonetse ku bufatanye bwa ADRA Rwanda na ADRA Canada. Iyo nkunga igiye kuba igisubizo ku baturage babarirwa mu bihumbi 15 batuye mu tugari dutatu mu Murenge wa Jenda bagorwaga no kugera ku kigo nderabuzima cy’uyu murenge kiri kure aho abaturage bakoraga ibirometero 15.

Kanyamihanda Jean Damascene, umuyobozi w’ikigo nderabuzima cya Kabera, avuga ko bari bafite ikibazo cy’abarwayi bakora urugendo rurerue bigatuma bamwe baremba cyane, abandi bakabyarira mu nzira kubera urugendo.

Iyi nyubako izafasha mu kwita ku babyeyi bagiye kubyara

Kanyamihanda avuga ko hari ababyeyi babyariraga mu ngo kubera kugorwa no kugera kwa muganga, abandi bakabyarira mu nzira.

Ati “Twari dusanganywe ikibazo cy’ababyeyi babyara bakoze ibirometero 15. Kuba tubonye iyi nzu y’ababyeyi biraturuhuye. Ku munsi twakira abarwayi 60 n’ababyeyi batanu baje kubyara ku munsi, ni benshi ugereranyije n’ingendo bakoraga ubu boroherejwe.”

Kanyamihanda akomeza avuga ko izi ngendo ndende zatumaga hari ababyarira mu ngo no mu nzira bashingiye ku mibare bafite ngo ababyeyi babiri cyangwa 3 babyarira mu ngo abandi mu nzira kubera ivuriro riri kure byiyongeraho abarembera mu ngo batinya kujya kwivuriza kure.
Inzu y’ababyeyi n’ibikoresho byayo hamwe n’ingobyi y’abarwayi byatanzwe, byashyizwe muri santere ya Jenda ahari harashyizwe ivuriro (poste de santé) kubera kwitarura ikigo nderabuzma cya Kareba.

Ni Poste de santé yakira abaturage ibihumbi 15 ariko hakiyongeraho abaturuka mu yindi mirenge bakarenga ibihumbi 20.

Abayobozi ba ADRA Rwanda, Akarere ka Nyabihu n’Intara bitabiriye umuhango wo gutaha inyubako y’ababyeyi

Umuryango wa ADRA Rwanda wita ku mibereho y’umwana n’umubyeyi bakaba barasanze ari ngombwa ko iyi poste de santé yongererwa ubushobozi mu gufasha ababyeyi n’abarwayi bakora ingendo ndende.

Umuyobozi wa ADRA Rwanda, Kayonde Geoffrey, avuga ko bahisemo kuza gukorera mu Karere ka Nyabihu kubera ikibazo cy’imirire mibi cyahabonetse muri 2016 aho yari ku kigero cya 59% mu gihugu, mu gihe muri ako gace bo bari kuri 38%.

ADRA Rwanda ikaba yarafashije imiryango ibihumbi birindwi, ishyiraho ibikoni 100 byigiahirizwamo abaturage gutegura indyo yuzuye naho mu kurwanya imirire mibi bamaze gutanga inka 300.

Umunyamabanga Nshingwabikorwa w’Intara y’Iburengerazuba yibukije abaturage gukomeza kurwanya imirire mibi

Akarere ka Nyabihu nubwo gafashwa na ADRA Rwanda kurwanya imirire mibi, Umunyamabanga Nshingwabikorwa w’Intara y’Iburengerazuba, Habiyaremye Pierre Célestin avuga ko n’ubu iki kibazo kitarakemuka. Habiyaremye avuga ko abaturage babishatse babigeraho kuko bafite ibikenerwa mu kurwanya imirire mibi.

Dr Innocent Turate, umuyobozi mu kigo cy’igihugu gishinzwe ubuzima (RBC) avuga ko ADRA Rwanda yafashije abatuye muri Nyabihu gukemura ikibazo cy’ingendo ku bashaka serivisi z’ubuzima.

Koroshya izo ngendo byafashije mu guhangana n’ikibazo cy’igwingira ry’abana, gukingiza abana no gufasha ababyeyi batwite. Dr Turate ahamagarira abaturage kwita ku buzima bw’abana cyane cyane mu minsi igihumbi ya mbere, ariko na nyuma yaho kwita ku bana bigakomeza.

Dr Innocent Turate, umuyobozi muri RBC, ashima uruhare rwa ADRA mu iterambere ry’abaturage

Abatuye Gasiza barasaba ko inzego zishinzwe umutekano zakemura iki kibazo ku buryo burambye

Izi nsoresore zinywa ibiyobyabwenge zikunze kwambura abaturage no kubiba ibyabo zikanakora urugomo. Abatuye muri iyi Centre no mu nkengero zayo bavuga ko uretse kubiba ibyabo ku manywa, izo nsoresore zinahengera amasaha y’ijoro zikajya gutobora amaduka n’amazu by’abaturage zitaretse n’ibigo by’amashuri bihari.

Umwe mu bahatuye yagize ati “Umutekano wacu cyane cyane mu masaha y’ijoro uba ugerwa ku mashyi kubera izi nsoresore zihengera bugorobye zikambura abo zihuye na bo batashye, yaba telefoni, amafaranga cyangwa ibyo umuntu yahashye ntacyo zigusigira mu gihe ugize ibyago ugahura nazo”.

Uyu kandi avuga ko abakora amarondo y’umwuga bakwiye kwiyongera bafatanyije n’abashinzwe umutekano bakabakiza aba bajura. Ati “Ntibyumvikana ukuntu izi mburamukoro ziduhungabanyiriza umutekano zitwaka ibyo tuba twavunikiye mu gihe zo ziba ziriwe zikinira amakarita, zinywa ibiyobyabwenge gusa aho gukora nk’abandi, abakora amarondo badufashe n’abashinzwe umutekano ababikora bafatwe bose”.

Ni ikibazo ubuyobozi bw’Umurenge wa Rambura buvuga ko bukizi; ariko bukaba bugerageza kugikemura bufatanyije n’abaturage n’inzego z’umutekano dore ko ubu ngo hari n’abazwiho iyi ngeso bamaze gushyikirizwa inzego z’ubutabera abandi bakaba bagishakishwa.

Abo bamaze gufatwa barimo abazwi cyane muri ako gace ku mazina ya Kazungu, Kirenge na Serugendo bari mu bagize iri tsinda ry’Abadida baguwe gitumo bafite ibiyobyabwenge birimo urumogi, banatoboye zimwe mu nyubako z’ikigo cy’amashuri cya Kibihekane bakaba bari gukurikiranwa n’inzego z’ubutabera.

Rusingiza Esron Umunyamabanga nshingwabikorwa w’umurenge wa Rambura yagize ati: “Ntabwo twicaye kubw’aba bajura babuza abaturage bacu amahoro, hari n’abandi basigaye bagenda bihishahisha tugishakisha ku buryo tuzakomeza gufatanya n’abaturage bakomeza kuduha amakuru tukabafata kugeza ubwo tubahashya burundu”.

Umuyobozi w’akarere ka Nyabihu Mukandayisenga Antoinette we yongeraho ko ikibazo cy’insoresore zizwiho imyitwarire idahwitse kigenda kigaragara mu ma Centre y’aka karere; ariko agakangurira urubyiruko kugira ubushake mu bikorwa leta irugenera bijyanye no kwihangira imirimo kuko ariyo nzira nyayo ituma abantu batiba cyangwa ngo basabirize.

Yagize ati “Turacyahanganye n’ikibazo cy’urubyiruko rwigira indakoreka rurangwa n’urugomo n’ubujura, ntabwo dushobora kubihanganira na rimwe; niyo mpamvu abo dufatiye muri byo tubahana, ariko mbere na mbere no kubigisha kugira ngo bahinduke bave mu myumvire nk’iyo yo gutungwa n’ibyo batavunikiye nyamara bizwi na buri wese ko urubyiruko arirwo maboko y’ahazaza n’igihugu”.

Ashimangira ko hari amahirwe ahari bakwiye kubakiraho arimo kwiga amashuri arimo n’ay’imyuga no gutangirira ku bishoro bito bagakora imirimo ituma babona amafaranga bayakoreye.

Umuvunyi mukuru agaragaza ko ruswa n’akarengane nibitungirwa agatoki ababikora bazajya babiryozwa

Ibi yabitangarije mu murenge wa Rambura mu karere ka Nyabihu mu biganiro byateguwe n’Urwego rw’igihugu rw’Umuvunyi bigamije kumva ibibazo bishingiye ku karengane no gutanga umurongo w’uko bikemurwa.

Umuvunyi mukuru avuga ko hari abaturage bakigorwa no kugezwaho gahunda zigenewe kubateza imbere, kuberako ababifite mu nshingano zabo rimwe na rimwe hari ubwo baba bashaka kubaka ruswa ngo babikore.

Yibutsa ko ruswa n’akarengane byuzuzanya kuko uwayatswe aba avukijwe uburenganzira bwe, cyangwa uwarenganyijwe hari igihe biba ngombwa ko yakwa ruswa kugira ngo arenganurwe. Yagize ati “Kurwanya ibi twivuye inyuma birasaba gutanga amakuru y’aho bikigaragara, ababikora cyangwa n’ababifiteho umugambi bakabiryozwa”.

Atanga ingero za bamwe mu barenganyijwe bageze mu za bukuru bo muri uyu murenge wa Rambura bamugaragarije ikibazo cyo gukurwa ku rutonde rw’abahabwaga inkunga y’ingoboka ya VUP nyamara bujuje ibisabwa Umuvunyi mukuru Anastase Murekezi yahamije ko bibabaje kuba hari abayobozi bakirenganya abo bayobora.

Aha yashingiye ku busobanuro yahawe na bamwe mu bayobora utugari abo bageze mu zabukuru batuyemo bamugaragarije ko icyo kibazo cyatewe n’uko imashini yabasimbutse urutonde rugasohoka bataruriho.

Abaturage bitabiriye ibi biganiro ari benshi

Umuvunyi yagize ati “Ni gute umuntu wagiriwe icyizere agahabwa inshingano zo gushyira umuturage ku rutonde rw’abagomba guhabwa inkunga ya VUP yakwihanukira akavuga ngo imashini yaramusimbutse? Ese aba yibuka neza ko ari akazi yahawe? Tuzi neza ko umuntu ari we ukoresha imashini siyo imukoresha; Twifuza ko imikorere nk’iyi ituma umuturage arengana ihinduka byaba ngombwa bene nk’abo bantu bakajya babibazwa”.

Umuvunyi mukuru yagaragaje ko hari gahunda nyinshi leta ishyiraho mu gufasha abaturage kwikura mu bukene no kubagezaho iterambere kandi ziba zashowemo amafaranga menshi cyane; iyo ababishinzwe bashyize imbere akarengane ntibazishyikiriza abo bigenewe, bikaba byagera ubwo bivamo bivamo ruswa.

Mu bindi bibazo byabajijwe umuvunyi mukuru ibyinshi bishingiye ku byananiranye gukemurwa n’inzego zitandukanye kugeza ubwo bishyikirizwa inkiko ariko bikaba bitararangizwa; byahawe umurongo n’ubujyanama bufasha uko byakemurwa, anibutsa abayobozi ko babereyeho kwegera abaturage bakamenya ibibabangamiye kugira ngo bibarinde akarengane.

Ibi biganiro byateguwe n’Urwego rw’Umuvunyi bimaze iminsi bibera mu turere twose tw’igihugu, aka Nyabihu kakaba ariko kari gatahiwe aho abakozi b’uru rwego bamara iminsi umunani basobanurira abaturage amwe mu mategeko yavuguruwe arebana no guhana icyaha cya ruswa, imikorere n’inshingano z’Urwego rw’Umuvunyi no kubibutsa uko bitwara n’aho bagana mu gihe bahuye n’ikibazo cya ruswa cyangwa akarengane.

Ingingo zirebana n’akarengane, ububi bwa ruswa, ingaruka zayo n’icyo abaturage basabwa ngo babirwanye ziri mu zibanzweho muri ibi biganiro byateguwe n’Urwego rw’Umuvunyi rugaragaza ko bigikomeje kwimikwa n’abatandukira inshingano zabo zo gukemura ibibazo by’abaturage. Hari abaturage bavuga ko ibyo bibagiraho ingaruka.

Atanga urugero rw’ububi bwa ruswa Umuvunyi mukuru Anastase MUREKEZI yagaragaje ko hari gahunda nyinshi leta ishyiraho mu gufasha abaturage kwikura mu bukene; iyo ababishinzwe bashyize imbere ruswa bishyirwa mu maboko y’abo bitagenewe.

Mu bibazo byabajijwe umuvunyi mukuru ibyinshi bishingiye ku byananiranye gukemurwa n’inzego zitandukanye kugeza ubwo bishyikirizwa inkiko ariko kugeza ubu bikaba bitararangizwa, byahawe umurongo n’ubujyanama bufasha uko byakemurwa anibutsa abayobozi ko babereyeho kwegera abaturage bakamenya ibibabangamiye kugira ngo bibarinde akarengane.

Ibi biganiro byateguwe n’Urwego rw’Umuvunyi bimaze iminsi bibera mu turere dutandukanye tw’igihugu, aho abaturage banasobanurirwa amwe mu mategeko yavuguruwe arebana no guhana icyaha cya ruswa, imikorere n’inshingano z’Urwego rw’Umuvunyi no kubibutsa uko bitwara n’aho bagana mu gihe bahuye n’ikibazo cya ruswa cyangwa akarengane.

Dr Gashumba yizeza Abanyarwanda ko iri koranabuhanga rizabagirira akamaro

Ibi babigarutseho mu ruzinduko aba bayobozi bombi bagiriye mu Ishuri ry’imyuga n’ubumenyingiro rya TVET Kibihekane riherereye mu murenge wa Rambura Akarere ka Nyabihu ahari guhugurirwa abazigisha abandi.

Abahugurwa ni Abarimu 14 bahagarariye abandi bo mu gihugu hose basanzwe bigisha amasomo ajyanye n’ubumenyi ngiro bigishwa uburyo bushya bwo kubyaza umusaruro ingufu z’imirasire y’izuba hakoreshejwe ikoranabuhanga bikaba byafasha abantu mu gushyushya amazi, guhangana n’ikibazo cy’ubukonje mu ngo n’ahantu hahurira abantu benshi cyane cyane mu bihe by’imvura no kubyazwa amashanyarazi akomoka ku mirasire y’izuba akifashishwa mu gucana mu ngo.

Muri uyu mushinga wateguwe n’ishami ry’ikigo mpuzamahanga cy’Abadage cyigisha ibijyanye n’ubumenyi ngiro ku bufatanye na Leta y’u Rwanda binyuze mu Ishuri rikuru ry’imyuga n’ubumenyingiro Rwanda Polytechnic. Umuyobozi mukuru wa Rwanda Polytechnic Dr James Gashumba asobanura ko hari icyo bizamarira abanyarwanda mu gihe kiri imbere.

Yagize ati “Ni uburyo bwifashisha ikoranabuhanga butari bumenyerewe hano mu gihugu cyacu, abari kwigishwa ni bo bazabukwirakwiza mu bandi binyuze mu masomo bazaba batanga aho bigisha cyane cyane urubyiruko rwiga imyuga rubumenye mu gihe kiri imbere nibuba bwashinze imizi, abanyarwanda bazatangira kububyaza umusaruro”.

Dr Avelina Parvanova ukuriye Ishami ry’ikigo kiri kwigisha ikoranabuhanga mu kubyaza ingufu imirasire y’izuba

Mu Rwanda uburyo bwo kubyaza umusaruro ingufu z’imirasire y’izuba bumenyerewe cyane ni amashanyarazi azikomokaho; ikoranabuhanga rituma izo ngufu zishyushya amazi cyangwa guhangana n’ubukonje ryo rikaba ritajyaga ryibandwaho mu kwigishwa mu mashuri y’Ubumenyingiro.

Dr Avelina Parvanova Umuyobozi w’ishami ry’Ikigo mpuzamahanga cy’Abadage cyigisha ibijyanye n’ubumenyingiro cyitwa German Chamber of Skilled Crafts (CSC) Koblenz ahereye ku rugero rw’igihugu cye yahamije ko kubyaza ingufu imirasire y’izuba mu buryo buteye imbere bifite akamaro.

Agira ati: “ubu buryo twabukoresheje iwacu bizamura umubare w’abihangira imirimo, bituma bava mu bushomeri;turishimira ko u Rwanda rufite ubushake mu kwigisha abana barwo kugira ngo bagire ubumenyi buhagije mu guteza imbere iyi myuga, rero nidufatanya abantu bagasobanukirwa neza uko bayubakiraho, bagatangira guhanga imirimo na bo baziteza imbere, haterwe n’intambwe mu kurengera ibidukikije”.

Ibi abihera ku kuba ikoreshwa ry’imirasire y’izuba ridasaba ibikoresho cyangwa uburyo butuma habaho iyangirika ry’ikirere, kuri Dr Parvanova agahamya ko ari intambwe nziza izaba itewe mu gihe Abanyarwanda bazaba batangiye gukoresha ubu buryo.

Abari gukurikirana aya masomo bemeza ko nibatangira kwigisha abandi ubu buryo bushya bizagabanya icyuho kikigaragara mu kubyaza umusaruro ingufu zituruka ku mirasire y’izuba.

Uyu mushinga uzamara umwaka umwe harateganywa ko mu bagizze iri tsinda riri guhugurwa bazajya gukomereza amasomo y’igihe gito mu gihugu cy’Ubudage, mu mwaka wa 2020 batangire kwigisha abanyeshuri biga muri amwe mu mashuri y’imyuga n’ubumenyingiro ari mu gihugu na bo bazajya barangiza bafite ubushobozi bwo kwihangira imirimo ishingiye ku gukwirakwiza mu banyarwanda ubu buryo. Ikigo Rwanda Polytechnic kikavuga ko bizunganira leta muri gahunda ifite yo kwihaza mu kubyaza umusaruro ingufu z’imirasire y’izuba.

Iyo imodoka ije bava ku mirongo bakarwanira kwinjira abintegenke bakihungira

Abo Kigali Today yasanze mu isoko rya Vunga, ubwo bari ku mirongo miremire bategereje imodoka zibacyura, barinubira uburyo bataha amajoro bakemeza ko umubare wa coasters bahawe udahagije.

Ntibyari byoroshye kwinjira mu modoka cyane cyane kubanyantege nke, kuko ubwo imodoka yabaga ije hinjiraga ufite imbaraga, abasaza n’abakecuru bagasigara mu rujijo.

Umusaza witwa Nzabarinda Anastase yagize ati “Badutegeka kujya ku mirongo ariko imodoka yaza, twe abafite intege nke tukaburizwamo, ubu nshobora no kurara mu nzira kubera kubura imodoka.

Akomeza agira ati “Hano habaga za Twegerane zikadufasha, ugasanga turagendera ku gihe kubera ko zabaga zihagije, ariko aho bazihagarikiye bazana coasters, ngizi ingaruka dukomeje guhura nazo”.

Ikindi abaturage binubira, ni uko imodoka bahawe za coasters zitabemerera gutwara imisigo, mu gihe abakoresha uwo muhanda hafi ya bose baba bitwaje imizigo y’ibicuruzwa bajyanye ku isoko, abandi bajya cyangwa bava guhaha.

Bavuga ko kuba batabonera imodoka ku gihe bibagiraho ingaruka mu kazi kabo

Niho abo baturage bahera bavuga ko babangamiwe no kuba badafite imodoka zibatwara n’imizigo yabo, bagasaba ko Twegerane zakomorerwa, ibikorwa byabo bigakomeza.

Umubyeyi witwa Twasaba wo mu Byangabo ukorera ubucuruzi mu isoko rya Vunga agira ati “Reba nawe isoko ryaremuye kare, tumaze amasaha atatu ku mirongo, ntituzi uko tuva hano kuko izi coasters uretse no kuba zidahagije, ntizemera kudutwara nkatwe abafite imizigo.

Ubu sinzi uburyo mva hano, niba badashaka kujya badutwara n’imizigo yacu, batuzanire Twegerane zacu zaduhaga serivise nziza”.

Gahamanyi Jean Damascene ati “Ibi biraturambiye byo kuturaza mu nzira. Ni gute umuntu yamara amasaha atatu ku murongo?, ni gute bakwanga gutwara umuntu uvuye guhaha ngo afite imizigo? ibi turabirambiwe”.

Nubwo abo baturage binubira ihagarikwa rya Twegerane, Ubuyobozi bw’Impuzamakoperative atwara abagenzi mu Rwanda (RFTC), buvuga ko kuba barahawe Coasters zisimbura Twegerane, ari uburyo bwiza abaturage bashyiriweho mu kubafasha mu ngendo no kurwanya akajagari.

Col Dodo Twahirwa, Umuyobozi w’icyo kigo, avuga ko Twegerane zakoraga muri uwo muhanda zabaga zitagira ibyangomba bisabwa, aho zakoraga mu kajagari gashobora guteza abagenzi ibibazo.

Avuga ko Coasters esheshatu abagenzi bakoresha uwo muhanda bahawe zisanga Twegerane ebyiri zakoraga zujuje ibyangombwa zihagije ku baturage bakora ingendo bajya mu isoko rya Vunga.

Ku bijyanye no gutwara imizigo Col Dodo Twahirwa, avuga ko bagiye gukemura icyo kibazo bitarenze mu kwezi kwa Gicurasi 2019.

Ati “Ikibazo kiri mu isoko rya Vunga, si ikibazo cyo kubura imodoka zitwara abagenzi, ikibazo ni icy’imizigo y’abagenzi uburyo igenda, icyo kibazo turakizi tugiye kugikemura kuko mu kwezi kwa gatanu kurangira twabagejejeho bisi ebyiri nini zifite aho batwara imizigo n’abagenzi”.

Avuga ko mu gihe bahawe bisi ebyiri imwe itwara toni eshanu bizaba igisubizo mu gihe izo modoka zitwaye toni 10 icyarimwe zigakora inshuro eshanu.

Ati “Nta muturage uzasigarana ikibazo cy’imizigo, ikibazo cyaje gitewe n’amabwiziza y’ikigo ngenzuramikorere, mu mabwiriza asanzwe ntabwo utwara imizigo n’abantu.

Avuga ko kuko hariya ari mu cyaro, abaturage bahaha bakaba banafite uburenganzira bwo gurwara ibihahwa byabo.

avuga ko bagiye kkuganira na RURA maze hagashakwa uburyo abaturage bagenda bisanzuye kandi bafite ibicuruzwa n’ibihahwa byabo”.

Kuva mu mujyi wa Musanze kugera mu isoko rya Vunga ni ahantu imodoka ikoresha iminota iri hagati ya 40 na 50.

Mu masaha ya saa munani tariki ya 8 Mata 2019 nibwo aborozi bo mu Karere ka Rwamagana bari bazimugejejeho baherekejwe n’umuyobozi w’akarere wungirije ushinzwe imibereho myiza y’abaturage mu Karere ka Nyabihu.

Umuyobozi w’akarere wungirije ushinzwe imibereho myiza y’abaturage mu Karere ka Nyabihu, Simpenzwe Pascal, yakiriye itsinda ry’aborozi baturutse mu Karere ka Rwamagana, bayobowe na Bugabo Abdulkarim, abashimira umutima mwiza bagize.

Abdulkarim Bugabo Busisi wari uyoboye itsinda ry’aborozi ba Rwamagana avuga ko bababajwe n’ibyo yakorewe, bahitamo kumushumbusha.

Ndabarinze (wambaye ingofero) yashumbushijwe

Ati "Twabibonye bitambuka mu itangazamakuru biratubabaza, twumva hari icyo twakora kandi tubibwiye ubuyobozi bubyakira neza."

Ndabarinze yahawe inka zirindwi harimo imwe ihaka n’indi yonsa ku buryo zizagoboka vuba umuryango wa Ndabarinze ukongera ukabona amata.

Ndabarinze we avuga ko atari yizeye kuzongera kubona amata. Yagize ati "Ndishimye kuko ntatekerezaga ko nzongera kubona amata no kujya munsi y’inka gukama nyuma y’uko inka zanjye zishwe. Ubu Ndishimye kandi n’abana nibazibona barishima rwose."

Inka za Ndabarinze zatemwe ku itariki ya 24 Werurwe 2019 mu Mudugudu wa Gakamba, Akagari ka Mulinga, nyuma biza kumenyekana ko byakozwe na Karabayinga wivugiraga ko yabitewe n’uko atamwituye kandi bari basanzwe bagabirana inka.

Usibye aba borozi b’i Rwamagana, hari abandi bantu batandukanye na bo bababajwe n’ibyakorewe Ndabarinze biyemeza gushaka uko bamworoza. Muri bo harimo uwitwa Cyubahiro Robert washinze itsinda rizafasha Ndabarinze. Cyubahiro yatangatije Kigali Today ko hamwe n’ Abanyarwanda baba mu Rwanda no hanze bemeye gukusanya amafaranga y’u Rwanda angana na miliyoni imwe n’ibihumbi 600 azagurwamo inka enye.

Bazayateranya yose hamwe tariki 11 Mata 2019 naho ku wa 12 Mata 2019 ashyikirizwe umuyobozi wa Ibuka hamwe n’abo bakorana, bazamugurire inka.

Bivuze ko nyuma y’inka zirindwi Ndabarinze yahawe n’aborozi b’i Rwamagana, hiyongeraho enye yahawe n’abaturanyi be i Mulinga aho atuye, ziziyongeraho n’izo enye zizatangwa n’itsinda ryishyize hamwe riyobowe na Cyubahiro. Ubuyobozi bw’Akarere ka Nyabihu na bwo bwateganyije kuzamugabira inka eshanu.

Inkuru bijyanye:

Nyabihu: Uwarokotse Jenoside yatemewe inka 11

Ubuyobozi bwa Ibuka mu karere ka Nyabihu buvuga ko buhangayikisijwe n’iki gikorwa cy’ubugizi bwa nabi bwibasira abarokotse Jenoside mu gihe u Rwanda rwitegura kwibuka Jenoside yakorewe Abatutsi mu 1994.

Inka 11 Ndabarinze Kabera yari atunze zose zatemwe ibitsi zishyirwa hasi, kandi umunani muri zo zishobora gupfa kubera ibikomere, Juru Anastase umuyobozi wa Ibuka mu karere ka Nyabihu avuga ko biteye inkeke kuko byerekana ko ababikoze bagifite ingengabitekerezo ya Jenoside.

“Mbihuje n’iminsi Abanyarwanda tugiye kujyamo yo kwibuka Jenoside yakorewe abatutsi, ababikoze si impanuka, ahubwo ni ukugira ngo bagaragaze ko bagikomeye ku mugambi wabo, uwabikoze Jenoside iracyamurimo, ibyo yakoze bigaragaza ko n’umuntu yamwica, bigaragaza ko bagifite ingangabitekerezo yayo no kugambirira kwangiza.”

Ibi bikorwa by’ubugizi bwa nabi byabaye mu mudugudu wa Gakamba akagari ka Mulinga, mu nka 11 zitemwe inka icyenda ntizishobora kuvuzwa kuko bagiye bazica imitsi y’amaguru y’inyuma.

Abazitemaguye bazisanze mu ishyamba rya pinusi ahitwa mu Kinyantozi aho Kabera yari yazishyize kuri uwo mugoroba, yagaruka kuzireba mu gitondo agasanga zatemwe.

Nubwo ntawe uremezwa ko yagize uruhare muri iki gikorwa, ubugenzacyaha bwatangiye iperereza hakaba hari amakuru avuga ko hari bamwe mu bakekwa batangiye kubazwa.

Iri ni ryo shuri Rwanda Coding Academy

Aba banyeshuri bazajya kumara imyaka itatu muri aka karere kazwiho kutagira ibirangaza ndetse kakaba gafite ikirere kiza cyafasha abana kwiga neza kdi bagafata.

Gordon Kalema, umuyobozi muri minisiteri y’ikoranabuhanga n’itumanaho, yabwiye KT Press ko bizafasha aba bana kwibanda ku bikeneye abahanga mu ikoranabuhanga.

Iri shuri rizatangirana n’abana 60 bazaba batsinze ku rugero rwo hejuru, kandi bakunze cyane ibijyanye no kwegeranya no guhuza imibare hagamijwe gukora porogaramu za mudasobwa.

Guverinoma ivuga ko izatanga ibisabwa byose kugira ngo aba bana bige ibijyanye n’ikoranabuhanga nk’umutekano w’ikoranabuhanga (cyber security), kwandika porogaramu n’ibindi byinshi.

Nyuma y’iyi myaka itatu, abana bazahabwa impamyabumenyi y’icyiciro cya kabiri cy’amashuri yisumbuye mbere yo koherezwa mu bigo bitandukanye bikora ibijyanye n’ikoranabuhanga ngo batangire akazi.

Kalema yagize ati “Guverinoma yavuganye n’ibigo bitandukanye bikora ikoranabuhanga, ku buryo bazahita batangira gukora nyuma yo kurangiza amashuri yabo”.

ANDELA, ikigo cy’ikoranabuhanga, kiri mu bizakira aba bana bamaze kwiga, kivuga ko kizaba gitangiranye na batandatu muri bo bakora porogaramu za mudasobwa, umwarimu umwe w’imibare ndetse n’umwarimu w’icyongereza.

Hazaba kandi hari abarimu b’icyongereza n’igifaransa.

Iki kigo kizitwa ‘Rwanda Coding Academy’ kigamije kugabanya umubare w’abahanga mu ikoranabuhanga igihugu gikura hanze.
Iyubakwa ry’iki kigo cya leta, ryatwaye amafaranga agera kuri miliyoni 500 z’amafaranga y’u Rwanda.

Minisitiri w’Ubutabera Johnston Busingye

yabitangarije muri gahunda yiswe “umuriri w’ubutabera”, igamije kwigisha abaturage amategeko abarengera mu miryango, yabereye mu Murenge wa Shyira mu Karere ka Nyabihu, tariki 28 Nyakanga 2018.

Minisitiri Businge avuga ko gahunda “Umuriri w’ubutabera” (Justice Caravan), ukubiye mu nyigisho z’ikinamico n’amagambo abwirwa abantu bateraniye hamwe, hagamijwe kubasobanurira amategeko abarengera mu mibereho yabo no gusobanurirwa aho bakurikiranira ibibazo byabo.

Yanenze abenshi mu baturage bakigendera ku mico yo ha mbere, aho umugore cyangwa umugabo bakorerwaga ihohoterwa bigafatwa nk’umuco, avuga ko ubu byahindutse avuga ko ihohoterwa iryariryo ryose ribujijwe mu Rwanda.

Yagize ati “Ndabamenyesha ko nta muntu uri hejuri y’amategeko, ikintu cyitwa ceceka niko zubakwa,Mama niko yambwiye, na nyogokuru niko yambwiye na nyogosenge ni ko yavuze,umuntu agahohoterwa yaba umugore, yaba umugabo cyangwa umwana ibyo ni imvugo igayitse igamije ihohoterwa.”

Abaturage bahawe umwanya wo kubaza ibibazo byabo

Minisitiri Busingye ati “Hari aho abantu babona umuturanyi ahohoterwa bagaceceka ngo batiteranya, ni amakosa akomeye, haba kubayakorerwa baceceka cyangwa abaturanyi bayabona bagaceceka.

“Ndagira ngo abanyarwanda bamenye ko kuba ubizi ko hari gukorwa icyaha ugaceceka, uba uri umunyacyaha n’ubwo wowe nta cyaha wakoze.”

Bamwe mu baturage bo mu Murenge wa Shyira bavuga ko gahunda y’umuriri w’ubutabera igiye kubafasha byinshi mu gukumira ihohoterwa n’amakimbirane akunze kugaragara muri ako gace.

Mukamurigo Donatille agira ati“Twari dufite ibibazo binyuranye byiganjemo iby’ubutaka,ihohoterwa mu ngo n’amakimbirane, ibiganiro by’umuriri w’ubutabera biradufasha cyane kuko nkurikije ibyo tubwiwe uyu munsi, ubuzima bwose birabukoraho, twanyuzwe n’inyugisho zatanzwe,ndahamya ko ihohoterwa rigiye kuba amateka muri aka gace.”

Nyirabagarura Emillienne ati“Twari twarashize tutazi uburyo twakwirengera, ino hari ubuharike bukabije n’ibibazo by’amasambu byari bigiye kudusiga ahaga, kuba Minisiteri yadusuye ikatwigisha amategeko aturengera ntitugipfuye.”

Mukamurigo Donatille umwe mu baturage bishimiye igikorwa cyo gusobanurirwa amategeko

Jonathan Lea Howarth umuhuzabikorwa w’umushinga RCN utegura ibiganiro by’Umuriri w’ubutabera, avuga ko batanga ubufasha mu by’amategeko nta kiguzi, akemeza ko u Rwanda ari igihugu kiri ku rwego ruri hejuru mu kwegereza abaturage ubutabera.

Ati “Mu Bwongeraza aho nkomoka, nta serivise y’abunzi ihaboneka, ndifuza ko n’iwacu byagera yo kuko nabonye ko ari intambwe ikomeye u Rwanda rwateye mu kwegereza abaturage ubutabera.”

Umuriri w’iterambere ni gahunda ya Minisiteri y’Ubutabera k’ubufatanye na Ambasade ya Swede, aho iyo gahunda imaze kugezwa mu turere dutandatu, Ngororero, Rutsiro, Nyabihu, Burera, Gicumbi na Nyarugenge.

Muri iyi gahunda abaturage baganizwa bafasha gutinyuka bakagaragaza ibyaha bibera mu miryango no gusobanurirwa amategeko abarengera yaba y’ubutaka, amashuri, imiryango, imbonezamubano n’ibindi.

Gitifu Ngandu Marcel w’Umurenge wa Rurembo mu Karere ka Nyabihu yatunguye benshi ubwo yahuraga n’umukecuru wikoreye inkwi akazimutwaza

Uwo muyobozi ngo yahuye n’umukecuru wo mu kigero cy’imyaka 80 yikoreye umutwaro w’inkwi,agenda asukuma mu nzira intege zashize, aramwakira arazimutwaza amugeza iwe mu rugo.

Ndandu Marcel wari utashye n’amaguru ava gusura abaturage ku mugoroba wo kuri uyu wa 23 Gicurasi, avuga ko ibyo yakoze bidakwiye kugira uwo bitangaza, ahubwo bikwiye kubera isomo buri wese, ryo kuba hafi no gufasha abafite intege nke batitaye ku bindi.

Yagize ati” Mbere yo kuba umuyobozi tugomba kugira ubumuntu. Byose biterwa n’aho umuntu yavukiye, uburere yahawe ndetse n’abo umuntu yabanye nabo ku ishuri. by’umwihariko njye nabaye umukorerabushake wa Croix Rouge imyaka myinshi.”

Minisitiri w’Intebe Eduard Ngirente aha abana amata

Abivuze mu gihe Leta y’u Rwanda ikomeje igikorwa cy’ubukangurambaga, mu kurandura burundu igwingira ryibasira abana bari munsi y’imyaka 6, iharanira ko igihugu kigira abaturage bafite ubuzima buzira umuze.

Minisitiri w’Intebe yabivugiye mu muhango wo gutangiza gahunda y’ubukangurambaga mu kurwanya igwingira ry’abana, wabereye mu Murenge wa Bigogwe, Akarere ka Nyabihu kuri uyu wa kane tariki 16 Gicurasi 2018 ku rwego rw’igihugu.

Yagarutse ku bushakashatsi bwakozwe ku buzima bw’abaturage mu mwaka wa 2016, bugaragaza ko umubare w’abana bagwingira ugenda ugabanuka ariko asaba ko habaho guhozaho mu gukumira icyo kibazo kigacika burundu.

Agira ati“ Muri 2016, ubushakashatsi bwagaragaje ko ikibazo cy’imirire mibi by’umwihariko kugwingira ku bana bari munsi y’imyaka itanu, byari bigeze kuri 38% bivuye kuri 51% twariho muri 2015.

N’ubwo bigaragara ko uwo mubare ugenda ugabanuka, nk’igihugu, twifuza ko iki kibazo cyacika burundu ntihagire umwana w’u Rwanda ugwingira”.

Minisitiri w’Intebe asaba ababyeyi kurushaho kwita ku mirire y’abana barwanya igwingira

Minisitiri w’intebe agaragaza ingaruka ziterwa no kurwara indwara zituruka ku mirire mibi n’ingaruka mbi zigera ku bana, ku miryango yabo n’igihugu muri rusange.

Ati“Umwana wahuye n’ikibazo cy’imirire mibi ntiyiga neza, ntabwo akora imirimo yo mu kigero cye neza kandi akurana uburwayi imyigire ye ikamugora. Uwo mwana kandi ahorana indwara zitandukanye rimwe na rimwe zikanamuhitana”.

Minisitiri w’intebe akomeza avuga ko izi ndwara ziterwa n’imirire mibi, zikenesha imiryango kuko kuzivuza bitwara amikoro menshi mu gihe kurwanya imirire mibi bitwara amikoro aciriritse, abana bagakurana ingufu.

Ingabo z’u Rwanda na zo zahagurukiye urugamba rwo guhashya umwanzi w’imirire mibi mu bana

Avuga kandi ko atari abaturage gusa batakaza amikoro ahubwo n’igihugu gitakaza byinshi kuri abo bana bagwingiye, ndetse n’umusaruro igihugu gitegereje kuri abo bana ntuboneke uko igihugu kibyifuza.

Minisitiri w’Intebe Eduard Ngirente yasabye abaturage kwitabira gahunda y’imbonezamikurire ku bana, irimo ubukangurambaga ku minsi 1000 ya mbere y’ubuzima bw’umwana, uruhare mu migoroba y’ababyeyi, kwirinda amakimbirane mu miryango n’ibindi.

Bamwe mu baturage ba Nyabihu baremeza ko igitera abana kugwingira ari ubukene n’imyumvire y’abagabo bamwe bangiza imitungo y’ingo zabo bayimarira mu tubari.

Tuyisabe Petronille ati“ Kugwingira kw’abana bacu biterwa n’inzara, ikindi ni uko ubona umugabo yirirwa mu kabari anywera amafaranga menshi kandi mu rugo abana badafite icyo barya ugasanga bwaki yatongoye”.

Barayavuze Felicien agira ati “ Inzara ni ikibazo ariko no gusesagura biriho. Hari ubwo ubona urugo rukize ariko ugasanga umugabo aratundira byose mu kabari,inkoko yatera igi akihutira kurigurisha ugasanga umwana abiguyemo. Dukwiye kujijuka tukita ku buzima bw’abana bacu.”

Abaturage bagaragaje ko imirire mibi rimwe na rimwe iterwa n’ubujiji ariko no gusesagurira umutungo w’urugo mu tubari bikorwa n’abagabo

Akarere ka Nyabihu kari ku isonga mu kugira umubare munini w’abana bagwingiye, aho bari kuri 51% mu gihe igihugu kiri kuri 38%.

Mu gukemura icyo kibazo, Akarere ka Nyabihu ku bufatanye n’umuryango Imbuto Foundation na Banki y’isi, bakomeje gahunda yo gukurikirana imikurire y’abana, hashingwa ibigo binyuranye byakira abana bose bari munsi y’imyaka 6.

Nyirasafari Esperence Minisitiri w’uburinganire n’iterambere ry’umuryango akaba yashimiye Akarere ka Nyabihu kashyizeho ikigo ECD Bigogwe (Early Childhood Development) gikurikirana imikurire y’abana 546.

Insanganyamatsiko y’uyu mwaka igira iti: “Munyarwanda, kumira igwingira ry’umwana kuva agisamwa wita ku mirire myiza n’isuku.”

Nyirasafari Esperence Minisitiri w’uburinganire n’iterambere ry’umuryango

Min Alvera Mukabaramba na Gov Alphonse Munyentwari bita ku karima k’igikoni nka kimwe mu gisubizo abaturage bakanguriwe mu kurwanya imirire mibi mu bana

Mu iki gikorwa abana bagaburiwe indyo yuzuye

Musabimana Odette, wari umuyobozi w’ishuri ryisumbuye rya Rega atorewe kuyobora akarere ka nyabihu

Musabimana wari usanzwe akuriye komisiyo y’imibereho myiza muri Njyanama y’aka Karere atorewe kuyobora aka Karere ku majwi 95.5%, aho ahigitse Ntirugirimbabazi Jean Marie Vianney ukuriye PSF, wagize amajwi 4.5 %.

Uyu muyobozi ngo agiye kuyobora igihe cy’amezi atatu, ubundi hakorwe amatora y’Umuyobozi w’Akarere n’abamwungirije.

Musabimana akimara gutorwa yavuze ko agiye gukomereza aho abandi bari bageze mu murongo w’iterambere ry’akarere. Yavuze ko anizeye ubufatanye n’abo asanze mu Karere kugira ngo abashe kugera ku ntego.

Guverineri Munyantwari Alphonse wari muri iki gikorwa, yamugiriye inama yo kurushaho kwegera abaturage no kubabera urugero rwiza, avuga ko ibyo kubigeraho bisaba kugira ubwitange, kwigombwa no gukorera hamwe.

Uyu muyobozi asimbuye Uwanzwenuwe Theoneste weguye kuri uyu mwanya ari kumwe na Mukansanga Clarisse wari umwungirije tariki ya 11 Gicurasi 2018.

Ubwegure bwabo bwakiriwe bunemezwa na Njyanama mu gitondo cyo kuri uyu wa Mbere tariki 14 Gicurasi 2018.

Guverineri Munyantwari yagiriye inama Meya mushya yo gukora nk’ikipe kugira ngo bashobore kwesa imihigo

Mukansanga Clarisse wari umuyobozi wungirije ushinzwe imibereho myiza y’abaturage muri Nyabihu

Hari tariki 12 Mata 2018 ubwo muri aka karere bari mu gikorwa cyo kwibuka abazize Jenoside yakorewe Abatutsi mu 1994, igihe cyo gucana urumuri kigeze batangira guha buji abitabiriye uwo muhango nk’uko bisanzwe bigenda.

Ariko we bamugezeho ngo yarayanze avuga ko we atayikeneye ahubwo bakwiye kuziha abazikeneye.

Abari muri uwo muhango bumvise ayo magambo byarababaje batangira kwijujutira ayo magambo yavuze nk’umuyobozi. Bukeye bwaho ni bwo inkuru zatangiye gusakara mu bitangazamakuru bikorera mu Rwanda ari nako igitutu gikomeza kumwotsa ngo yegure.

Umuryango IBUKA ukorera muri aka karere na wo wasabye ko umuyobozi nk’uwo adakwiye kurangwa n’iyo mvugo, usaba ko yahita yegura ku mirimo.

Nyuma y’ukwezi yahise yegura, tariki 11 Gicurasi 2018, ariko IBUKA yizeza ko icyo kibazo kitazagarukira aho kuko iperereza rizakomeza, byagaragara ko yabivuganye ingengabitekerezo agakurikiranwa n’ubutabera.

Mu gitondo cyo kuri uyu wa Gatandatu tariki 12 Gicurasi 2018, ni bwo Urwego rushinzwe Ubugenzacyaha rwemeje ko dosiye ye yamaze gukorwa akaba agomba gushyikirizwa ubugenzacyaha , nk’uko byemejwe n’umuvugizi w’uru rwego Mbabazi Modeste.

Yagize ati "Uyu munsi yafashwe arafungwa azashyikirizwa urukiko ku wa Mbere."

Ku ikubitiro, Mukansanga ashinjwa ibyaha birimo ibyo gupfobya Jenoside, ibyaha by’ingengabitekerezo n’ibindi bifitanye isano nayo.

Gusa we arabihakana akavuga ko yabivuze agamije kugira ngo babanze bahe buji abandi batazifite kandi ari bo bari benshi.

Aramutse ahamwe n’ibyaha ashinjwa, Mukansanga yahanishwa ingingo ya 135 mu gitabo cy’amategeko ahana, iteganya ko umuntu wese ukoze icyaha cy’ingengabitekerezo ya jenoside n’ibindi byaha bifitanye isano na yo, afungwa hagati y’imyaka itanu kugeza kuri icyenda n’ihazabu y’amafaranga y’u Rwanda kuva ku bihumbi 100Frw kugeza kuri miliyoni 1Frw.

Umuyobozi w’akarere Uwanzwenuwe na Mukansanga wari umwungirije ashinzwe imibereho myiza y’abaturage ngo bamaze kwwgura

Amakuru agera kuri Kigali Today avuga ko beguye ku mpamvu zabo bwite ariko ababikurikiranira hafi bemeza ko bifite aho bihuriye n’amagambo uyu Mukansanga yavuze ubwo muri aka karere bibukaga.

Uwanzwenuwe Theonetse yabwiye Kigali Today ko kwegura ari impamvu ze ku giti cye.

Ati “Nahoze ndi umurezi kandi nubu ntawabinkuyemo, nibyo nize, nakoze, nshobora no kubisubiramo ngakomeza kurerera igihugu, nabwo ni uburyo bwiza bwo kugikorera.”

Uwanzwenuwe abajijwe niba kwegura kwe ntaho bihuriye n’ikibazo cy’umuyobozi wari umwungirije yavuze ko ntaho bihuriye.

Ati “Ntaho bihuriye kuko umuntu amenya ibye, gusa sinzi impamvu bihuriranye, ariko njye nta kibazo nari mfite.”

Ubwo bari mu gikorwa cyo kwibuka ku itariki 12 Mata 2018, Mukansanga yanze buji bari bamuhereje avuga ko we atayikeneye ahubwo ikwiye guhabwa abafite ababo bibuka.

Ayo magambo ntiyashimishije abenshi mu bayumvise bari muri icyo gikorwa, bituma umuryango uharanira inyungu z’abarokotse Jenoside IBUKA usaba ko yegura ndetse bakaba baratangiye no kumukoraho iperereza.

Uwanzwenuwe na Mukansanga beguye bakurikira uwari umuyobozi w’akarere wungirije ushinzwe Imari n’ iterambere n’Umunyamabanga nshingwabikorwa w’ akarere nabo beguye bavuga ko ari impamvu zabo.

Ariko byakomeje guhwihwiswa ko bishobora kuba biterwa n’amakosa bakoze mu kazi n’arebana n’inyubako y’akarere.

Mu Karere ka Nyabihu baributse ku nshuro ya 24 Jenoside yakorewe Abatutsi mu 1994

Ni ikibazo cyagaragajwe kuwa Gatatu tariki 2 Gicurasi 2018, mu gikorwa cyo kwibuka ku nshuro 24 Jenoside yakorewe Abatutsi mu Murenge wa Jenda, uvugwamo ubwicanyi ndega kamere.

Ni umurenge wari ukomokamo abakomeye bagize uruhare mu gutegura Jenoside yakorewe abatutsi barimo Theoneste Bagosora.

Kayumba Jean Pierre umukozi wa Ibuka Nyabihu, avuga ko mu karere ka habarurwa Abatutsi barenga ibihumbi birindwi bicwe mu gihe cya Jenoside.

Ariko ngo iyo barebye abamaze gushyingurwa mu cyubahiro basanga imibiri y’abatutsi bagera ku 1200 batarashyingurwa mu cyubahiro.

Agira ati “Tubarura ibihumbi birindwi, nyamara abashyinguwe mu cyubahiro ntibageraho. Mu rwibutso rwa Mukamira dushyinguye abarenga gato ibihumbi 2, naho mu rwibutso rwa Kanzenze duhuriyeho n’Akarere ka Rubavu hashyinguwemo ababarirwa mu bihumbi bine, dusanga imibiri ya bene wacu igera ku 1200 itaraboneka ngo ishyingurwe mu cyubahiro.”

Kayumba avuga ko hari abaturage bagira ubutwari bwo kwerekana ahatawe imibiri y’abishwe muri Jenoside, cyakora ngo hari n’abandi binangira bakabihisha.

Ati “Duheruka ku bona umubiri mu kagari k’Akabatezi mu murenge wa Jenda, ni umubiri w’umubyeyi yishwe ahetse umwana, umuhinzi niwe wabitubwiye dushatse amakuru dusanga ko uwo mubyeyi bamwicanye n’umwana dushaka imibiri yabo iraboneka.”

Akomeza avuga ko hari n’abinangira, “Mu kagari ka Bukinanyana twahawe amakuru ko hari abana batatu bishwe bakajugunywa mu musarane, tugiye kureba banyiri urugo batwereka ubwiherero bwo muri 2012, abaturage bemeza ko isenywa, twaje gusanga ubwiherero bwatawemo abantu barabwubakiyeho igikoni, tugisenye dasangamo ibice by’imibiri imwe ibindi birabura. Tubajije banjiri urugo batubwira ko ibice twabonye ari amagufa y’imbwa zabo.”

Kayumba avuga ko iri ari ipfobya riri ku rwego rwo hejuru, mu gihe umuntu adashobora gutanga amakuru, n’igihe abonetse agatesha agaciro ibyakozwe avuga ko amagufa y’abantu ari amagufa y’imbwa.

Ati “Ancilla Nyirandemeye abaturanyi bavuga ko atigeze yorora imbwa, ikindi amagufa y’umuntu n’imbwa biratandukanye cyane, ni ikibazo cy’ipfobya dufite mu karere ka Nyabihu, abantu banga gutanga amakuru ngo dushyingure abacu.”

Niyoyita ukuriye Ibuka mu murenge wa Jenda avuga ko abatanze amakuru y’abishwe muri Jenoside ntiwe ubakurikirana, agahumuriza abaturage gutanga amakuru.

Ati "Hari imibiri myinshi yandagaye ku musozi, mudufashe tubabone, abapfuye ntibiyishe, kandi ntibihambye, byakozwe n abariho bikiza umunuko. Mubatwereke tubashyingure mureke kubita amagufa y imbwa."

Uwanzwenuwe Théoneste Umuyobozi w’ Akarere ka Nyabihu ashishikariza abaturage gutanga amakuru kuhatawe abantu akanenga abantu bakuru babizi bagaceceka mu gihe abana aribo batanga amakuru.

Ati "gutanga amakuru ugaragaza ahatawe abantu ntibihanirwa, mudufashe mutange amakuru, biratangaje kuba abana bato aribo batanga amakuru mu gihe abakuru babibonye batayatanga kandi babizi."

Abacitse ku icumu rya Jenoside mu murenge wa Jenda mu karere ka Nyabihu, bavuga ko Jenoside yari ifite ubukana, bitewe no kuba haravukaga abayobozi bakuru, ariko yongerwa umurenge na Konseye waho witwa Nyirakamodoka.

Mu makomini ya Giciye, Karago, Nkuri na Mutura, ibikorwa byo kwica abatutsi byatangiye 1990, ibi byatumye hari imiryango myinshi yazimye bitewe n’igihe kirekire ubwicanyi bwagiye bumara.

Minisitiri Kabarebe yifatanyije n’abaturage ba Nyabihu mu gikorwa cyo gutera ibirayi

Ibikorwa ngarukamwaka by’Ingabo z’igihugu bigamije gufasha abaturage kwiteza imbere mu buzima bwa buri munsi byiswe "Ingabo mu iterambere ry’abaturage."

Minisitiri Kabarebe avuga ko bahinduye izina kuko ibikorwa bitamara icyumweru ahubwo bimara Igihe kirekire.

Yavuze ko ingabo z’u Rwanda zishinzwe imibereho myiza y abaturage, iterambere, umutekano w’abanyagihugu. Yagize ati "Umuturage udafite ubwishingizi, ufite inzara, udafite amafaranga, udafite iterambere nta mutekano aba afite."

Ingabo zifatanya n izindi nzego mu guteza imbere igihugu, kandi ni wo mutekano usesuye ingabo zishaka mu gufasha abaturage kwiteza imbere.

Ati "Ahandi hatangijwe ibikorwa by ubuzima, ahandi bubaka amashuri, ahandi bubakira abatishoboye no kubaka ibikorwa remezo, Nyabihu twifatanyije namwe mu buhinzi.

Minisitiri Kabarebe avuga ko umuturage agomba no kugira ibimutunga

Ingabo z’u Rwanda aho, zitandukaniye n izindi ngabo, nyuma yo kugarura umutekano, mu gihe cy’amahoro ingabo z’igihugu zigira uruhare mu kubaka igihugu mu bikorwa by iterambere kuko niyo nshingano zahawe n’umugaba w’ikirenga."

Minisitiri Kabarebe avuga ko ibikorwa bizakomeza mu gufatanya n’abaturage mu bikorwa by’iterambere kuko ingabo zibereyeho kwegera abaturage aho kubakanga.
Ati "Kera abasirikare bakangaga abaturage, mu bukwe bagahunga mu nzira bagahunga, ubu ingabo ni abana banyu babavukamo.

Ni yo mpamvu bagaruka kubafasha mu iterambere, naho Umuturage afite inshingano zo kubahiriza gahunda za leta, kandi dufatanyije iterambere riratugeraho vuba."

Minisitiri Kabarebe avuga Imbaraga ziva mu gufatanya no gukorera hamwe ari umuco mwiza wo gukomeza kuko bitanga amahoro bigatuma igihugu gitera imbere.

Zimwe mu mbuto z’ibirayi zatewe

Minisitiri w’ingabo yifatanyije n’abaturage gutera imbuto y’ibirayi ku butaka butunganyijweho amaterasi ya hegitari 20. Izo hegitari zizaterwaho Toni 40 z Ibirayi zikazatanga umusaruro wa Toni 500.

Ni mu mirima ihanamye, abaturage bavuga ko ntacyo bezaga ariko barizera ko amaterasi yakozwe n’inkeragutabara azatanga umusaruro bashingiye ko isuri itazongera kubatwarira Ubutaka, kandi bagiye kuzajya bakoresha inyongera musaruro.

Nyirabanze Clemence ahorana agahinda k’ibyamubayeho mu gihe cya Jenoside yakorewe Abatutsi

Uyu mubyeyi, yaciye mu nzira y’umusaraba mbere, mu gihe ndetse na nyuma yo kubyara bucura bwe, umukobwa ugize imyaka 24.

Ku mezi atandatu atwite, avuga ko yagiye guhaha mu isoko rya Gasiza ahitwaga mu Bushiru, akahahurira na Munanu umwe mu Nterahamwe zari zikomeye muri ako gace.

Iyo nterahamwe bahuye ngo yahise imukanga igira iti “Ubwo rero nawe witeguye kubyara wa Nyenzi we?” Aya amagambo ngo yamukuye umutima amarira amuzenga mu maso, bituma ataha adahashye ibyamujyanye.

Ibi byamubayeho ngo byatumye umugabo we agira impungenge atangira kumubuza kujya ku isoko.

Ati “Buri munsi umugabo wanjye yambuzaga kujya ku isoko kugira ntagira ikibazo mpura nacyo.”

Uko iminsi ishira niko Nyirabanze ibimenyetso byamwerekaga ko umunsi wo kubyara wegera, maze nawe akagana ivuriro bakamubwira ko mu ntangiriro z’ukwezi kwa Mata 1994 azibaruka.

Ku kigo nderabuzima cya Rambura kiri hafi ya Paruwasi ya Rambura, muri metero nke uvuye ku rugo rw’uwari umukuru w’igihugu Juvenal Habyarimana niho yivurije.

Nyirabanze avuga ko yakomeje gutegereza, ndetse tariki ya 6 Mata yari yagiye kwa muganga ngo bamurebere ariko bamubwira ko agomba gutegereza.

Mu gitondo kuwa 7 Mata, Nyirabanze wari utuye hafi y’ivuriro na Paruwasi, ni bwo yumvise amasasu na gerenade biturika. Icyo gihe, ngo interahamwe zari ziri kurasa abapadiri batatu ba Paruwasi Rambura.

Umuturanyi uvuye kuri Paruwasi ngo yaje yiruka, aburira Nyirabanze ko abishe abapadiri bavuze ko ariwe baje gukurikizaho, maze ubwoba buramutaha.

Ati “Umuturanyi ni we waje kumburira ko Interahamwe zishe abapadiri zinshakisha, nibajije aho kwihisha, uwo muturanyi ambwira ko nashaka aho naba ngiye. Nanjye nirukira kwa data bukwe ngo bampishe kuko bari Abahutu.”

Nyirabanze avuga ko tariki ya 7 Mata i saa tanu z’amanywa, Interahamwe zari mu rugo rwe zimushakisha bavuga ko bashaka “Kanjogera”. Uko “Niko banyitaga bantuka ngo kuko mfite amenyo maremare.”

Nyirabanze avuga ko bamushatse mu nzu n’ahandi hashoboka baramubura, basaba umugabo we kumutanga, nawe abasubiza ko atazi aho ari.

Mu gihe Interahamwe zigiraga inama yo kujya gushaka iwabo w’umuhungu, uwari wamuburiye yahise ahamusanga amubwira ko baje kumushaka aho yihishe.

Ati “Nabuze icyo nkora, Mabukwe nawe biramuyobera kuko ntahandi yari kumpisha, ni ko kwigira inama yo guhungira kwa muganga ngira ngo nzahabyarire, kuko numvaga ko nta mwicanyi watinyuka kujyayo.”

Iri ni isoko Nyirabanze yahuriyeho n’Interahamwe yashakaga no kumwica mbere ya Jenoside yakorewe Abatutsi

Nyirabanze wari uziko akize Interahamwe zamuhiga aho atuye, yatunguwe no gusanga umuyobozi w’ivuriro ari Interahamwe ivurana imbunda.

Uyu ngo ni Felicien Ngaboyisonga wari umuyobozi w’ivuriro, akaba umwe mu Nterahamwe zari zikomeye muri Karago, ndetse agakora akazi ko kuvura izakomerekeye mu bitero byo kwica no gusahura Abatutsi.

Nyirabanze akomeza agira ati “Muganga namubwiye ko nkeneye ubufasha, maze niko kunyereka igitanda ngo nindyame igihe nikigera nzabyara.”

Uko igihe gihita, Nyirabanze wari ugejeje igihe cyo kubyara niko yatabazaga muganga, nawe akamubwira ko agomba gutegereza kuko nta miti afite yo kuvura Inyenzi, ahubwo imiti ihari ari iyo kuvura abakozi “Interahamwe.”

Nyirabanze, avuga ko uko aryamye ku gitanda ariko ububabare bwari bwose ariko nta bufasha yabonaga, ahubwo ngo Ngaboyisonga yakomezaga kumubwira ko igihe cyo kubyara ni kigera azabyara.

Ati “Ntiyabaga yitaye ku barwayi, ahubwo yakoranaga n’Interahamwe zari mu bikorwa byo gusahura kuko zabimuzaniraga.”

Kwa muganga aho Nyirabanze aryamye, Munanura wari Interahamwe yari yarakomeretse mu bitero byo kwica Abatutsi, yari arwariye hafi ya Nyirabanze.

Uko kwa Sebukwe wa Nyirabanze bagemuye ibyo kurya, Munanura yahitaga afata ingemu akayirya umurwayi “Nyirabanze” arebera.

Nyirabanze avuga ko yabuze icyo akora kuko abo yarategerejeho ubufasha yari yabubuze, ndetse n’inzara yari yose kuko ibyo agemuriwe byaribwaga n’Interahamwe.

Ati “Ngaboyisonga uko yazaga kundeba yantungaga imbunda ambwira ko umunsi nugera nzabyara, aho kugira ngo amfashe akongera akagenda. Byatumye niheba kuko ntakindi nari nshoboye, ntegereza ko umunsi wo gupfa ugera.”

Umurinzi w’ivuriro ni we wabyaje Nyirabanze abaganga barabyanze

Ububabare bwa Nyirabanze abagera kwa muganga barabubonaga, ariko kubera gutinya muganga Ngaboyisonga ntacyo yari gufashwa.

Hari tariki ya 10 Mata 1994, mu masaha y’ijoro, umuzamu w’ivuriro witwa Mpozi, niwe waje kureba Nyirabanze yitwaje imiti ya Kinyarwanda kugira ngo amufashe.

Ati “Numva ko Mpozi yari yarahawe amahugurwa y’ababyaza, niwe wazanye imiti ya Kinyarwanda ashobora kumfasha ku bw’ibitangaza mbyara umwana w’umukobwa.”

Mu gitondo amasaha y’akazi ageze muganga Ngaboyisonga yatunguwe no gusanga Nyirabanze aryamanye n’uruhinja.

Ati “Nkuko bisanzwe yazaga kundeba, maze uwo munsi asanga ndi kumwe n’uruhinja niko kumbwira ngo, ndabona wabyaye ni byiza.”

Nyirabanze wari umaze kubona ko nta buzima arikumwe na muganga Ngaboyisonga wahoraga amutunga imbunda, yatangiye gutekereza uburyo yatoroka ibitaro. Gusa ntibyari byoroshye kuko atari gusohoka mu ivuriro atishyuye.

Umuryango w’umugabo we ngo waje gusaba ko wamwishyurira agataha, maze Ngaboyisonga abwira ya nterahamwe yitwa Munanu ko iduca amafaranga.

Munanu wari utunzwe n’ingemu za Nyirabanze, yahise abwira Nyirabanze ko niba ashaka kuva mu bitaro ari muzima yishyura ibihumbi 40.

Umuryango w’umugabo wa Nyirabanze ngo warayashatse mu minsi itatu barayatanga.

Ati “Ntambaraga nari mfite, kandi narinzi ko Interahamwe zinshakisha, Muramukazi wanjye niwe wahetse umwana tugenda dutorotse.”

Nyirabanze avuga ko umunsi yatorotse ari bwo Ngaboyisonga na Munanu bagombaga kumwicana n’umwana we.

Ati “Mugitondo muganga na Munanu baje kunshakisha barambura, baje kunshakira iwanjye mburirwa n’abaturanyi ko nshakishwa njya kwihisha mu mibyuko.”

Nyirabanze avuga ko Interahamwe zamubuze iwe, zikajya gushaka no kwa sebukwe ariko zikamubura.

Avuga ko aho yari mu kigunda yahihishe n’uruhinja rw’iminsi runyagirwa n’imvura y’itumba kugeza Jenoside ihagaritswe, Interahamwe zigahunga.

Nyuma y’imyaka 24 umwana wa Nyirabanze yifuza kuba umunyamategeko

Nubwo Nyirabanze n’umugabo we batabashije kwishimira no kwakira neza bucura bwabo kubera ibihe bibi barimo, ntibyababujije kumuha izina rimukwiye “Mizero Alice”

Nyirabanze avuga ko ari izina umugabo yatekereje kubera ibitangaza Imana yamukoreye. “Ubwo nari kwa muganga, umugabo wanjye yajyaga gupfukama ku ishusho ya Bikira Mariya iba kuri Paruwasi ya Rambura asaba ko njye n’umwana tumera neza. Uko kwizera niko yakuyeho kumwita Mizero.”

Nyirabanze Clemence uri iburyo aganira n’umuturanyi we

Mizero ni umukobwa w’imyaka 24, warangije kwiga amashuri yisumbuye; imibare, ubutabire n’ubugenge “MPC” ndetse wabonye amahirwe yo gukomeza kaminuza mu mwaka wa 2018.

Mizero aganira na Kigali Today avuga ko adashaka gukomeza amasomo y’ubumenyi “Sciences” ahubwo yifuza kwiga amategeko.

Ati “Sinzakomeza amasomo y’ubumenyi, ahubwo nifuza kwiga amategeko kuko inzozi zanjye ni ukuba umucamanza.”

Abajijwe aho yakuye igitekerezo cyo kwifuza kuba umucamanza, avuga ko yifuza gutanga umusanzu we mu gutanga ubutabera; ngo kuko Umunyamategeko ari umuntu ufite agaciro.

Mizero wavutse bigoranye, ubutabera ntabwo yabonye kuko yari kuvuka afite ibikwiye ndetse akavukira mu mutuzo ariko ibihe u Rwanda rwarimo bitagira ubutabera, byatumye abyazwa Kinyarwanda kandi ari kwamuganga, aho gutaha mu rugo ataha mu kigunda anyagirwa nk’utagira iyo ataha.

Abaturage basanga ibikorwa bamaze kugeraho birimo amavuriro, amashuri, imihanda, amashanyarazi n’amazi bitabemerera kuguma gutura mu murenge witwa Kabatwa.

Mu Rwanda hamenyerewe inyito nyinshi ziganisha ku mazina y’amagenurano bitewe n’abahatuye icyo bashatse kuvuga cyangwa bagendeyeho.

Biratangaje kumva ahantu hitwa “Bannyahe” bitewe n’uko abahatuye bagorwa no kubona ubwiherero. Ahandi ugasanga hitwa mu “Rwabayanga” bitewe n’uko hari icyobo cyateje urujijo kubera uko cyahaje cyangwa bikavugwa ko uguyemo atagaruka.

Abaturage bo mu Karere ka Nyabihu mu Murenge wa Kabatwa, ni bamwe mu bafashe iya mbere bamagana izina ry’umurenge batuyemo. Bavuga ko ribapfobya kuko ukurikije aho bageze n’aho bavuye batari bakwiye kugereranywa n’izina ry’ubutwa ryamaze no gucibwa mu Rwanda kuri ubu.

Bavuga ko urwego bamaze kugeraho mu bikorwa by’iterambere bitabemerera gutura mu murenge witwa “Kabatwa”, ari naho bahera basaba inzego zishinzwe kubyigaho bakabashakira irindi nka “Kabakire” cyangwa andi abateza imbere.

Ntabanganyimana Esperance utuye muri uwo murenge, avuga ko n’abatwa bahinduriwe izina kuko ryabapfobyaga, agasanga nta mpamvu umurenge wabo utahindurirwa, kuko gukomeza gutura ahantu hitwa Kabatwa bibagiraho ingaruka mu mitekerereze.

Agira ati “Iryo zina rintera ipfunwe kuko ridupfobya kubera ko n’abatwa atari ko bakitwa. Ntabwo umurenge wacu wagakomeje kwitwa Akabatwa ahubwo bawuhindura bakawita Akabakire.”

Bizimana Jean Baptiste avuga ko gukomeza gusanisha abantu n’amoko byagejeje u Rwanda kure, akifuza ko amazina nk’ayo asigaye nayo yakurwaho.

Ati “Ntabwo twagakomeje kuba Kabatwa kandi Umutwa, Umuhutu, Umututsi tuzi ingaruka n’aho byatugejeje. Ahubwo dushingiye ku iterambere turiho nonaha izina ry’umurenge wacu ryaba Kabaratwa.”

Mugwiza Antoine, umuyobozi w’akarere wungirije ushinzwe iterambere ry’ubukungu, avuga ko leta ikorera abaturage kandi ikanagendera ku byifuzo byabo ku buryo bibaye ngombwa byahindurwa.

Avuga ko biramutse bigaragaye ko umubare munini w’abatuye uwo murenge bifuje ko bahindukrirwa izina, babikorera raporo bakabishyikiriza inzengo zibishinzwe gusa nta cyatuma nabo batabemerera.

Ati “Tuzakomeza kubikurikirana nidusanga koko umubare w’abantu benshi udashaka ko uriya murenge wabo witwa Kabatwa.

Igihugu cyacu ntabwo cyabangira ko iryo zina ryahinduka, abaturage babyemeje bakavuga ngo ntidushaka ririya zina natwe twatanga raporo ku nzego zidukuriye.”

Minisiteri y’Ubutegetsi bw’igihugu (MINALOC) yo ivuga ko ikibyigaho, cyane ko atari ikibazo cy’abatuye mu Murenge wa Kabatwa gusa. Ivuga ko hari n’abandi Banyarwanda bagiye basaba ko bahindurirwa amazina y’aho batuye bitewe n’uko atabahesha agaciro nk’Abanyarwanda.

Gusa guhindura amazina y’ahantu si ikintu cyo kwihutirwa kuko byagira ingaruka no mu guhindura ibyangombwa cyangwa ibindi byemezo n’ibirango byagiye bitangirwa aho hantu, nk’uko MINALOC ibitangaza.

Abatuye ku Kabatwa bahamya ko iri vuriro begerejwe rizatuma batongera kurembera mu rugo

Iryo vuriro ryubatswe mu Kagari ka Gihorwe, ku nkunga y’ikigo cy’igihugu cy’iterambere (RDB) n’abafatanyabikorwa bacyo n’abaturage, ryafunguwe ku mugaragaro kuri uyu wa kane tariki ya 24 Kanama 2017.

Iryo vuriro ryuzuye ritwaye miliyoni 49.5RWf, ni umwe mu mishinga yashyizwe muri Nyabihu iturutse ku mafaranga ava mu bukerarugendo angana na 10%, muri gahunda yo gusangira n’abaturiye Pariki z’igihugu umusaruro ukomoka ku bukerarugendo. Nyabihu ni kamwe mu turere duturiye Parike y’ibirunga.

Emérence Ingabire, kimwe n’abandi bagenzi be barwaye bahise bajya kwivuza kuri iryo vuriro mu gihe bari gukora urugendo rw’ibirometero bajya kwivuza ahandi.

Ingabire avuga ko iyo iryo vuriro ritahaba yari gutanga ibihumbi 10RWf by’urugendo rw’isaha imwe rumugeza ku bitaro bya Gisenyi.

Agira ati “Kubona aho wivuriza byari ikibazo muri aka gace. Rimwe na rimwe byatumaga turembera mu rugo kubera ko kujya kwivuza byari kudutwara amafaranga menshi. Ariko iri vuriro ni igisubizo. Abantu ntibazongera kurembera mu ngo.”

Abivuriza kuri iri vuriro bazajyaba banafashwa n’imbangukira gutabara

Speciose Nyirambonyinzanye, nawe wari waje kwivuriza kuri iryo vuriro yishimiye kuba begerejwe ivuriro.

Agira ati “Bizajya bintwara iminota 10 gusa kugira ngo ngere aha. Mbere byantwaraga 5000RWf y’urugendo rungeza ku bitaro bya Ruhengeri. Iri vuriro rizatuma ndushaho kubungabunga iyi Pariki y’ibirunga.”

Kariza Belise, umuyobozi w’ishami ry’ubukerarugendo muri RDB asobanura ko hari abashakaga kurengera ubuzima bwabo bakifashisha imiti y’ibyatsi bakuye muri pariki bikagira ingaruka no ku nyamaswa.

Agira ati “Si uko twanga ko ibigize pariki byagirira akamaro abayituriye nko gushakamo imiti. Ahubwo igihe cyose byagiye bikorwa,hagaragaraga n’abinjira bagatega inyamaswa cyangwa bakangiza ibiri muri Parike mu bundi buryo.

Iri vuriro rero ni iryo gusana amagara ariko rinarengera urusobe bw’ibinyabuzima bwa Parike bizaba bitakivogerwa ukundi.”

Ivuriro rya Kabatwa ryatangiye kwakira abarwayi

Ivuriro rya Kabatwa ryakira abaturage bari hagati ya 40-50 ku munsi , bikaba biteganijwe ko rizita ku baturage basaga ibihumbi 10 baturuka mu tugari tune.

Gahunda yo gusangira n’abaturiye Pariki z’igihugu umusaruro ukomoka mu bukerarugendo imaze kugeza muri Nyabihu miliyoni 361RWf zashyizwe mu mishinga 55. Mu rwego rw’igihugu iyo gahunda imaze gushorwamo asaga miliyari 2RWf yagiye mu mishinga 560.

Gutaha iryo vuriro rya Kabatwa biri mu bikorwa bibanziriza ibirori ngarukamwaka byo “Kwita Izina” Ingagi.

Ibitaro bya Shyira ni icyitegererezo mu bwiza no mu bunini mu Ntara y’u Burengerazuba

Ni ibitaro bya mbere by’icyitegerezo mu bwiza no mu bunini byubatswe mu Ntara y’i Burengerazuba, kuko bifite ibyumba 150 bigezweho byifashishwa muri serivisi zitandukanye z’ubuvuzi, nk’uko bitangazwa na Malick Kayumba ushinzwe itangazamakuru n’itumanaho muri Minisiteri y’Ubuzima.

Avuga kandi ko abaganga bakora muri ibyo bitaro na bo bashyiriweho akarusho ko gukora bacumbikirwa kuko bubakiwe amacumbi 34 yubatswe hafi yabyo, mu rwego rwo kuborohereza mu kazi kabo ka buri munsi.

Uwo muyobozi kandi avuga ko ibyo bitaro byubatswe mu gihe gito ugereranije n’icyo byagombaga kuzuzuriraho, bitewe n’uko byubatswe n’inararibonye mu bwubatsi zaturutse mu Nkeragutabara.

Ati” Mu kubaka ibi bitaro ndetse n’amacumbi y’abaganga babikoramo byatwaye amezi 11 mu gihe ubusanzwe iyo bitubakwa n’Inkeragutabara byagombaga gutwara imyaka itatu kugira ngo bibe byuzuye.

Kuba iyo mirimo yarihutishijwe byatumye hazigamwa Miliyari 4 z’amafaranga y’u Rwanda.”

Ibi bitaro bizakira abantu benshi bavunikaga bakora ibirometero bitandatu

Abaturage baturiye ibyo bitaro bavuga ko mbere y’uko begerezwa ibi bitaro, bakoraga urugendo rw’ibirometero bitandatu bajya kwivuza, kandi batwaye abarwayi mu ngobyi.

Mukeshimana Dancilla utuye ku birometero bike byaho ibitaro bya Shyira byubatse
yabwiye Kigali Today ko kwegerezwa ibyo bitaro byababereye igisubizo.

Yagize ati “Mbere y’uko twegerezwa ibi bitaro bishya bya Shyira ibyari bisanzweho
byadusabaga gukora urugendo rw’ibiremetero birenga bitandatu kugira ngo tugezeyo umurwayi twabaga duhetse mu ngobyi.”

Akomeza avuga ko ikibazo bahuraga nacyo ari nk’umubyeyi uri kunda cyangwa undi murwayi urembye cyane byasabaga ko yihutishwa kandi uburyo bwo kumuheka mu ngobyi butabimerera.

Abaturiye ibitaro bya Shyira bahuriza ku kuvuga ko nta murwayi azongera kugezwa kwa muganga bigoranye kuko ibitaro bya Shyira bizajya byifashishwa mu kugeza abarwayi kwa muganga hakoreshejwe imbagukiragubara zabyo.

Ikindi bishimira n’uko igihe bageze kwa muganga bazajya bahabwa serivisi zose kubera ko ibitaro bya Shyira byubatswe ari icyitegerezo .

Ubusanzwe ibitaro bya Shyira byari bisanzweho byari byarubatswe mu 1937, bitakijyanye n’igihe, ugereranije n’ibyo bishya bubakiwe na Leta y’u Rwanda.

Kuri uyu munsi wo kwibohora kandi Perezida Kagame yanatashye umudugudu w’icyitegererezo wa Kazirankara, watujwemo abatishoboye bahereye ku bari batuye mu manegeka bari mu cyiciro cya mbere cy’ubudehe.

Umudugudu w’icyitegererezo ugizwe n’inzu 17

Uwo mudugudu ugizwe n’inzu 17, agakiriro ndetse n’inzu mberabyombi, inzu imwe ikaba igomba kuzajya iturwamo n’imiryango ine.

Umubyeyi wo muri Nyabihu aha umwana we ufite ubumuga igikinisho yamukoreye mu bitambaro

Abo babyeyi bavuga ko amahugurwa bahawe n’umuryango utegamiye kuri Leta wita ku burenganzira bw’abana bafite ubumuga ECD (Empowering Children with Disabilities) ariyo yatumye bamenya gukora ibikinisho by’abo bana no kumenya icyo byabafasha mu mikurire yabo.

Mukandekezi Elina utuye mu Murenge wa Mukamira mu Karere ka Nyabihu avuga ko ubu yamaze kumenya gukora bimwe mu bikinisho by’abana yifashishije bimwe mu bikoresho biboneka iwabo mu giturage.

Agira ati “Gukora igikinisho cy’umwana wanjye wavukanye ubumuga bukomatanije ntibikiri ikibazo kuko ushobora gufata umwenda ushaje ukawumubangiramo umupira wabona umwanya mu gakina.”

Uwambajimana Marie Goretti nawe yahawe amahugurwa nk’ayo yo gukora ibikinisho by’abana avuga ko kwibwira ko ibikinisho by’abana bikorerwa mu mahanga gusa byari ukwibeshya.

Yunzemo ati “Binyuze mu mahugurwa twahawe twize byinshi byakorwamo ibikinisho by’abana.Urugero ushobora gufata urupapuro ukarukoramo indege ndetse n’aho bahinga amasaka ushobora gufata igikenyeri ukagikoramo aka modoka umwana agakina nta kibazo”

Abana bo muri Nyabihu bafite ubumuga bahurizwa hamwe bagatozwa gukina kugira ngo bitazabaviramo kwigunga

Turatsinze Félicien, umukozi w’umuryango ECD wita ku burenganzira bw’abana bavukanye ubumuga bukomatanije wahuguye abo babyeyi avuga ko ibikinisho by’abana bifite uruhare rukomeye mu mikurire y’ubwonko bwabo yaba abafite ubumuga cyangwa abatabufite.

Agira ati “Umwana udakina burya aba afite icyo abura. Niyo mpamvu igikinisho kimufasha mu gukura k’ubwenge bwe ndetse n’iyo akina n’ababyeyi be nabyo bimwongerera ubusabane akumva ko yitaweho.”

Yongeraho ko umwana udafashwa mu gukina ngo yidagadure,iyo akuze bimuviramo guhora yigunze kuko aba ataratojwe gukina akiri muto kugira ngo abikurane.

Ibikinisho bihabwa abana si ngombwa kugura ibyakorewe mu mahanga. Ababyeyi nabo bashobora kubikora bagendeye ku bikoresho bibari hafi. Iki cyakozwe n’umubyeyi wo muri Nyabihu ni moto ikozwe mu mikwege

Ngabonziza Louis, umuyobozi mukuru wa ECD akangurira ababyeyi kugirana ubusabane n’abana bakina bifashishije ibikinisho baguze cyangwa bikoreye ubwabo mu miryango.

Umushinga wa ECD ukorera mu Turere twa Musanze, Gakenke na Nyabihu wita ku burenganzira b’abana bafite ubumuga ariko by’umwihariko abavukanye ubumuga bukomatanije.

Iki gikino nacyo cyakozwe n’umubyeyi wo muri Nyabihu. Ni intare ibaje mu giti

Ingabo zigize umutwe udasanzwe (Special Operations Forces) zatanze amaraso yo gufasha indembe

Icyo gikorwa cyo gutanga amaraso cyakorewe muri icyo kigo kuri uyu wa gatandatu tariki 06 Gicurasi 2017.

Kitabiriwe na Brig Gen Innocent Kabandana uyobora umutwe w’Ingabo udasanzwe mu ngabo z’u Rwanda.

Yabwiye Kigali Today ko icyo gikorwa cyo gutanga amaraso cyakozwe muri gahunda rusange ingabo z’u Rwanda zirimo yo gutanga umusanzu wazo zifasha abaturage binyuze muri gahunda izwi nka “Army week”.

Agira ati “Twebwe icyo twashoboye ni ukunganira dutanga amaraso tuzi ko akenerwa n’abantu mu buryo bunyuranye."

Yongeyeho ko hirya no hino abasirikare barimo kuvura abaturage ku buntu abandi bakaba barimo kubafasha mu bikorwa bijyanye n’ubuhinzi, ubwubatsi no gusana ibiraro n’ibindi byose hagamijwe kuzamura imibereho myiza yabo.

Ati “Ntabwo kubaka igihugu ari ukukirwanira gusa iyo ukirwaniriye haba hasigaye no kucyubaka iyo ni inshingano duhabwa n’amategeko kandi ni umuco mu ngabo z’u Rwanda (RDF).”

Abarenga 400 batanze amaraso yo gufasha indembe

Alexia Mukamazimpaka, umukozi w’ikigo cy’Igihugu gishinzwe ubuzima mu Rwanda (RBC) ukora mu ishami rishinzwe gutanga amaraso avuga ko kuba ingabo z’Igihugu zitanga amaraso yo gufasha indembe ari urugero rwiza rwo kwigira ku ngabo z’u Rwanda.

Agira ati “Kuba ingabo z’u Rwanda zitanga amaraso ntabwo ari ibintu bikwiye kubonwa na RBC gusa bikwiye kubonwa n’amaso y’Abanyarwanda bose bakabona ko ari urugero rwiza ingabo zirimo gutanga.”

Akomeza avuga ko kuba umusirikare arwanirira igihugu cye yarangiza akagira n’uruhare mu gutuma abaturage bagira ubuzima bwiza ari ibintu byo gushimira ingabo z’u Rwanda. Abarenga 400 batanze amaraso.

Ibitaro bya Shyira biri kubakwa mu buryo bugezweho

Bitewe n’imiterere y’akarere ka Nyabihu, hari abivuriza ku bitaro bya Shyira biri mu murenge wa Shyira, bavuga ko bakora urugendo byibura rw’amasaha abiri, bikabavuna cyane.

Mukandori Fortune umubyeyi twasanze amaze kubyarira mu bitaro bya Shyira, asobanura ko kugera kwa muganga ari imvune ikabije, kandi umuntu aba aje n’ubundi atameze neza.

Yagize ati “Kugirango ngere hano nabanje kwambuka uruzi rwa nyabarongo, ubundi ntega igare ringeza muri Vunga, nterera umusozi mbona ngeze hano nka sa munani kandi naje kare.”

Ibitaro bishya bya Shyira birimo kubakwa muri santere ya Vunga hafi y’umuhanda munini, bavuga ko bizabaruhura ingendo kuko ho hanagendetse neza, ahandi bakoraga ibitrometero birenga 10 hanagendetse nabi.

Ibitaro bya Shyira bizaba byuzuye mu kwezi kwa 2

Mukandori akomeza agira ati “Urumva ibyo barimo kubaka muri Vunga bizadufasha kubera ko nk’ababyeyi nkatwe ntabwo tuzajya turuha, ushobora gutega nkiryo gare rigahita rikugeza imbere y’ibitaro utagombye guterera agasozi”.

Ruhetamacumu Eugene uhagarariye inkeragutabara zirimo kubaka ibitaro bishya bya Shyira, asobanura ko murwego rwo kwihutisha imirimo byahawe ingabo.

Avuga kandi mu kwezi kwa kabiri uyu mwaka wa 2017 bazaba barangije.

Ati “ibanga ni uko dukora amanywa n’ijoro, ikindi nta bunebwe burimo dukora nyine nk’abasirikare.

Abenshi ubona ni abantu bahoze mu ngabo n’abahoze mugicengezi n’abaturage bino aha nibo bakora, kandi abantu bino n’abakozi pe”.

Ruhetamacumu avuga ko akazi biyemeje bazakarangiriza igihe

Ibitaro bishya bya Shyira byubatse mu buryo bugezweho, imirimo yo kubyubaka ikazarangira itwaye hafi miriyari enye z’amafaranga yu Rwanda.

Uretse kwakira abarwayi baturutse mu mirenge itandukanye igize akarere ka Nyabihu, ibitaro bya Shyira binakira abarwayi baturuka mu turere twa Ngororero, Gakenke, na Muhanga.

Uko ari inzu 200 imwe muri zo yuzuye itwaye asaga miliyo 9RWf

Babitangaje mu muhango wo gutaha ku mugaragaro inzu 200 z’icyerekezo, zubakiwe abahoze mu manegeka bo mu mirenge itandukanye y’uturere twa Nyabihu na Musanze, wabaye tariki ya 23 Ukuboza 2016.

Ayo mazu yubatswe mu mudugudu wiswe Green Village uherereye mu Kagari ka Kabyaza mu murenge wa Mukamira, mu karere ka Nyabihu, yuzuye atwaye miliyari 1 na miliyo ni 684RWf.

Mukanoheri Béatrice, umwe mu bari batuye mu manegeka avuga ko inzu nziza yubakiwe igiye kumufasha kujya aryama agasinzira ntacyo yikanga.

Agira ati "Ahantu nari ntuye narengerwaga n’amazi Ingabo na Polisi by’igihuhu akaba aribo baza kuntabara.’’

Uyu mubyeyi w’abana umunani atanga ubuhamya avuga ko kuba ubu yinjiye mu mwaka wa 2017 afite aho kuba heza kandi hajyanye n’icyerekezo ari ibintu ashimira Leta y’u Rwanda.

Mukanoheri Béatrice avuga ko abakuwe mu manegeka ubu batujwe mu nzu z’icyerekezo

Usibye ku ba abo baturage barubakiwe inzu, banubakiwe ikiraro cy’inka, igikoni, ubwiherero n’ubwogero, ibigega bifata amazi bahabwa n’amashanyarazi n’imirindankuba. Ibikoresho byo mu nzu nibo babyishakira.

Aho bari batuye mu manegeka, bakozwe neza hashyirwa amaterase y’indinganiro kuburyo bakomeza gusubirayo bakajya kuyahinga.

Abatujwe muri uwo mudugudu banejejwe no gutura aho batazongera guhura n’ibiza

Dr Vincent Biruta, Minisitiri w’umutungo kamere avuga ko bitarenze umwaka wa 2020 abaturage babarirwa muri 65 % bazaba batuye mu mudugudu naho 35% basigaye bakazaba batuye mu mijyi.

Abo baturage bahawe amazu y’icyitegererezo yaberetse amahirwe bafite yo kuba batuye mu mudugudu.

Agira ati "Mufite amahirwe yo gutura hafi y’ibikorwaremezo birimo imihanda, amashuri, amazi n’umuriro. Icyo musabwa ni ukubibyaza umusaruro kugira ngo bibateze imbere."

Dr Vincent Biruta yahamagariye abavanwe mu manegeka kubyaza umusaruro ibikorwaremezo begerejwe hafi yabo

Imirimo yo kuyubaka yo mazu uko ari 200, yakurikiranwe n’Inkeragutabara bahawe isoko n’umushinga ugamije guhangana n’ingaruka z’imihindagurukire y’ikirere mu majyaruguru y’iburengerazuba bw’u Rwanda (RV3CBA).

Yubatswe ku nkunga y’ishami ry’umuryango w’abibumbye ryita ku bidukikije (UNEP) ribinyujije mu kigega « Adaptation Fund’’.

Ikiraro bubakiwe kizakuraho inzitizi mu buhahirane

Icyo kiraro gihuza abaturage bo mu tugari twa Guriro na Birembo mu murenge wa Rambura mu karere ka Nyabihu cyatashwe kuri uyu wa 27 Ukwakira 2016.

Senzira Jean Claude umwe mu bakoresha iki kiraro, avuga ko kizoroshya ingendo n’ubuhahirane, kuko umugezi cyambukiranya wa Basera wajyaga wuzura bakabura aho banyura.

Yagize ati “Abanyeshuli baburaga uburyo bajya kwiga kimwe n’abantu bakuru, cyane iyo umugezi wa Basera wabaga wujujwe n’amazi y’imvura”.

Uwitwa Murekatete Esperance yatangaje ko ubuhahirane n’imigenderanire hagati y’abatuye muri ako gace igiye kurushaho koroha bitewe n’uko imbogamizi ku mpande zombi yavanweho.

Uburebure bw’icyo kiraro bungana na metero 40

Ati “Ubu nta muturage imvura ishobora kugwa yagiye guhaha hakurya mu kandi kagari ngo agumeyo ategereze ko amazi agabanuka abone gutaha”.

Uretse kubura uko abaturage bambuka uwo mugezi wa Basera hari n’abagiye bawugwamo bagerageza kuwambuka mu gihe amazi y’imvura yabaga yuzuye, bakahasiga ubuzima barohamye.

Umuyobozi wungirije ushinzwe iterambere ry’ubukungu mu karere ka Nyabihu, Mugwiza Antoine yavuze ko icyo kiraro cyubakiwe abaturage nyuma y’uko babisabye ubuyobozi.

Ati “Iki kiraro mukibonye nyuma y’uko mwari mwarabisabye kenshi ubuyobozi, kugira ngo mworoherwe n’ubuhahirane n’imigenderanire, muzagifate neza kandi mukibyaze umusaruro”.

Ubuyobozi bw’Akarere ka Nyabihu n’abafatanyabikorwa babo

Icyo kiraro cyuzuye gitwaye akayabo ka miliyoni zisaga 20 z’amafaranga y’u Rwanda.

Uruhare rw’Akarere ka Nyabihu rwari 40% urw’umufatanyabikorwa Bridges To prosperty ari 60% ari nayo yakurikiranye imirimo yo kucyubaka.

Abaturage bari benshi ahabereye ubwo bwicanyi

Uwo mugore w’imyaka 26 y’amavuko yari afite inda y’imvutsi n’umwana w’imyaka ibiri yishwe mu ijoro rishyira kuri uyu wa 14 Ukwakira 2016 ari iwe mu rugo.

Umugabo avuga ko umugore we yishwe n’abagizi ba nabi. Ariko abaturanyi be bamushinja bakamushinja kuba ariwe wiyiciye umugore kuko ngo iyo aba yatewe n’abagizi ba nabi yari kuvuza induru.

Nyirakamana Dative, umuturanyi w’uwo muryango yatangarije Kigali Today ko nyakwigendera yaba yishwe n’umugabo we biturutse ku makimbirane.

Agira ati “Ntabwo nabihamya neza ariko hagati yabo hagiye havuka intonganya za hato na hato, umugore anenga imyifatire y’umugabo we ko itari myiza mu buryo bw’imibanire yabo.”

Inzu yabo nta hantu yatobowe cyangwa ngo hicwe urugi ku buryo byakorohera buri wese kwemeza ko muri urwo rugo batewe n’abagizi ba nabi bakabinjirana mu nzu; nkuko umwe mu baturage abihamya.

Agira ati “Umugabo yabyutse avuga ko yabanje kurwana n’abo bagizi ba nabi ariko nta gikomere ndetse no mu gihe avuga ko yari yatewe n’abagizi ba nabi nta nduru yumvikanye. Njye mbona ariwe wamwishe.”

Gakina Kaliwabo Gerard, umuyobozi w’Akagari ka Bukinanyana, ahabereye ubwo bwicanyi, avuga ko bigoye kwemeza ko uwo mugabo yaba yatewe n’abagizi ba nabi.

Agira ati "Uriya mugabo yatubwiye ko yabanje kurwana nabo bagizi ba nabi bakamukubita isuka akayikinga ukuboko ariko nta gikomere na mba yagize byongeye nta nduru yumvikanye.’’

Polisi y’igihugu ikorera mu Karere ka Nyabihu yatawe muri yombi uwo mugabo n’abandi babiri bikekwa ko bari bafatanyije.

Bose ubu bafungiye kuri Station ya polisi ya Mukamira mu gihe iperereza rigikomeje.

Mu murenge wa Kabatwa hafi y’ ibirunga niho inkuba yakubitiye abaturage

Ba nyakwigendera ni Zaninka Peruth w’imyaka 22 n’umwana we Igizeneza Response, w’umwaka umwe n’amezi umunani.

Byarabereye mu mudugudu wa Kamuhe, Akagari ka Batikoti mu Murenge wa Kabatwa.

Bakubiswe n’inkuba ubwo Zaninka yari mu nzira ava gusura iwabo agana iwe, imvura ikabasanga mu nzira.

Uwanzwenuwe Theoneste uyobora Akarere ka Nyabihu, avuga ko aba ba Nyakwigendera, bahise bajyanwa mu buruhukiro, mu kigonderabuzima cya Kabatwa.

Uyu muyobozi yagiriye inama abaturage, zabafasha kwirinda inkuba muri ibi bihe by’imvura binjiyemo.

Yagize ati” Abaturage bakwiye kwirinda kugenda mu mvura, kugama munsi y’ibiti, no kuvugira ku ma terefone mu bihe by’imvura n’imirabyo.

Bakwiye no kwirinda gucomeka ibyuma bikoreshwa n’amashanyarazi mu mvura n’ ibindi byakurura inkuba zabateza ibibazo”.

Yasabye ko ahantu hahurira abantu benshi muri aka Karere, harimo mu masoko, mu mavuriro, mu mashuri n’ahandi, hashyirwa imirindankuba, mu rwego rwo gukumira imfu ziterwa n’inkuba.

Uwanzwenuwe Theoneste asaba abaturage kwirinda icyabakururira ibibazo by’inkuba mu bihe by’imvura

Intara y’ Iburengerazuba ikunze kwibasirwa n’inkuba zihitana abantu zikanahitana amatungo, cyane cyane mu Karere ka Rutsiro, Karongi na Nyabihu.

Babisabwe na Minisitiri w’ ubutegetsi bw’igihugu Kaboneka Francis kuri uyu wa 14 Nzeli 2016.

Hari mu muhango wo gutangiza ukwezi kw’imiyoborere ku rwego rw’igihugu, wabereye mu Karere ka Nyabihu mu Ntara y’Uburengerazuba.

Minisitiri Kaboneka avuga ko yasanze muri utu turere hari abaturage bagishaka indonke kubaturanyi babo.

Yavuze ko hakiri n’abaturage banga kuva ku izima kubyemezo byafashwe n’inkiko, ndetse n’abafite umuco wo kwitakana abayobozi b’inzego z’ibanze igihe babonye abo mu nzego zo hejuru.

Yagize ati “ Nagira ngo mbasabe muri rusange mujye mworoherana. Ntabwo ari byiza gushaka kubona ibintu utavunikiye. Ntabwo biduhesha agaciro twisubireho”.

Minisitiri Kaboneka yahwituye abayobozi batinda gukemurira ibibazo abaturage, anahwitura abaturage banga kuva ku izima, igihe inkiko zabafatiye ibyemezo.

Ati “Simpakana ko hari abayobozi barangarana abaturage. Ariko dufite n’ikibazo cy’abaturage batemera kuva ku izima “.

Abayobozi b’inzego z’ibanze bo mu turere twa Nyabihu, Ngororero, Muhanga na Gakenke

Prof. Shyaka Anastase umuyobozi mukuru w’ikigo cy’igihugu cy’imiyoborere (RGB), avuga ko muri uku kwezi hazafatwa ibipimo bizatuma hamenyekana urutonde rw’ibibazo byakemuwe n’ibitarakemuwe .

Ibi bipimo ngo bizafasha gukurikirana ibitarakemuwe, kugirango bikurikiranwe birangizwe.

Prof Shyaka Anastase avuga ko hazafatwa ibipimo by’imikemurire y’ibibazo, ibitarakemuwe bigashakirwa ibizubizo

Insanganyamatsiko izibandwaho muri uku kwezi kw’imiyoborere igira iti “Imiyoborere myiza, imiyoborere ishingiye ku muturage, inkingi y’iterambere rirambye”.

Mu bibazo abaturage bagaragaje basanze harimo ibifite ishingiro n’ibindi bigaragaza guhuguzanya hagati yabo

umuhanda_nyakinama-vunga_nyuma_yo_gukorwa_woroheje_ingendo

Uyu muhanda umaze imyaka ibiri ukozwe. Uwamariya avuga ko igiciro cyo kuva i Shyira ujya mu karere ka Musanze cyagabanutse, bituma no kugera i Kigali kigabanukaho 650frw.

Yagize ati “Kuva hano i Shyira ujya i Musanze mbere watangaga 1000frw, ubu ni 600frw. Kujya i Kigali watangaga 3000frw none ubu ni 2350frw.”

Munyakazi avuga ko uyu muhanda watumye umusaruro wabo w’ibisheke n’ibitoki ugera ku isoko ku buryo bworoshye, n’agaciro kariyongera. Igisheke kimwe kirangurwa hagati ya 100frw na 200frw, mbere cyaragurwaga ari munsi ya 100frw.

Umuhanda watumye umusaruro w’ibisheke wongera agaciro

Kanamugire Noel, umunyamabanga nshingwabikorwa w’umurenge wa Shyira, avuga ko uyu muhanda wagabanyije umwanya abantu bataga mu ngendo. Ibi bituma abacuruzi n’abaguzi batinyuka kugana amasoko.

Ati “Uyu muhanda utarakorwa, kugirango uve ahangaha ujye Musanze byafataga amasaha atatu. Ariko ubu ntago byarenza iminota 50.”

Kanamugire avuga ko kuva uyu muhanda wakorwa, abaturage bo mu murenge wa Shyira 15, bamaze kwigurira imodoka, kuko batagitinya ko zangirika.

Abaturage bo mu murenge wa Shyira bavuga ko bagifite ikibazo cy’ikiraro cya Rubagabaga, gihuza akarere ka Nyabihu n’akarere ka Ngororero na Muhanga. Bavuga ko gikozwe neza cyarushaho kongera ubuhahirane.

Ubukerarugendo bw’u Rwanda burimo n’ingagi bukurura abanyamahanga benshi ariko Abanyarwanda babusura baracyari bacye.

Bitangazwa na Kaliza Belise, umuyobozi w’ishami rishinzwe bukerarugendo muri RDB, mu gihe u Rwanda ruri mu myiteguro yo kwita izina abana b’ingagi, igikorwa ngarukamwaka kiba gitegerejwe n’abantu benshi baturutse hirya no hino ku isi.

Agira ati “Akenshi abanyarwanda ntituragira uwo muco wo kuruhuka, kuvuga ngo wikendi irageze uragiye hanze ya Kigali cyangwa hanze y’aho utuye.”

Avuga ko ibyo bituma mu mafaranga yinjizwa n’abakerarugendo usanga ayatanzwe n’ABanyarwanda akiri hasi ugereranyije n’abanyamahanga.

Ati “Mu myaka itanu ishize twagiye tubona inyongera y’amafaranga aturuka mu bukerarugendo ya 4% buri mwaka. Tugereranije umwaka wa 2014 na 2015 nabwo niko byagenze. Mu 2015 twinjije miliyoni 318 z’amadorali. Uyu mwaka tukaba duteganya inyongera navuga ngo kuri 5 cyangwa 6%.”

Kaliza Belise ushinzwe ubukerarugendo muri RDB, yemeza ko ubukerarugendo butera imbere uko umwaka utashye.

Abajijwe ibyo bakora ngo yiyongere yavuze ko kwita izina biri mu by’ingenzi mu bikorwa ngo ibyiza by’u Rwanda bimenyekanishwe.

Ati “kimwe mu bikorwa ni “Kwita izina”kuko ni kimwe mu byerekana u Rwanda, ibyo rwagezeho mubyo kubungabunga ibinyabuzima mu maparike y’igihugu. Hari n’ibindi byinshi, kwamamaza bisanzwe, imbuga za interineti dukoresha, hari ingero nyinshi.”

Mu Rwanda hateganijwe igikorwa cyo “Kwita Izina” abana b’ingagi, kikazabera mu Karere ka Musanze mu Ntara y’Amajyaruguru kuri uyu wa gatanu 2 Nzeri 2016.

Ibyumba by’amashuri bitandukanye byagiye byubakwa ahatandukanye na RDB hagamijwe guteza imbere abaturiye Pariki y’Ibirunga.

Ni nyuma y’uko Ikigo cy’Igihugu gishinzwe Iterambere (RDB) gisigaye kibasangiza ku mutungo uva mu bukerarugendo, kibakorera ibikorwa bitandukanye bibateza imbere birimo amashuri.

Uwitwa Nizeye uyituriye avuga ko abenshi bumvaga ko inyungu ari ukujya gushakamo inka n’utundi tunyamaswa, bakibwira ko ubukerarugendo ari ubwa leta gusa nta ruhare babufitemo.

Agira ati “Ubungubu ibikomoka ku bukerarugendo bigera ku baturage, tubonamo inyungu zigaragara koko. Amashuri aragaragara, gutera inkunga kwa RDB biragaragara. Leta yazanyemo itandukaniro rikomeye cyane.”

RDB yagiye ibubakira bimwe mu bigega bibafasha kubona amazi.

Manirabaruta Charlotte nawe avuga ko mbere ubukerarugendo bwafatwaga nk’ubw’abanyamahanga bazana amadevize, akagirira akamaro leta gusa.

Manirabaruta avuga ko bitewe na 5% by’ibikomoka ku bukerarugendo RDB ibasangiza, bashoboye kubona amashuri, ibigega by’amazi no korozwa amatungo, bituma barushaho kwibona mu bukerarugendo.

Kuri ubu biyemeje gukumira ba rushimusi n’abandi bakwangiza parike, kandi bakazakomeza kuba ijisho mu kubungabunga parike, bakumira uwayangiza wese.

Kaliza Belise umuyobozi ushinzwe ubukerarugendo muri RDB, ashimira abaturage ku buryo bazamuye imyumvire mu bukerarugendo no kubungabunga amapariki.

Umuyobozi w’ubukerarugendo muri RDB Kaliza Belise, ashimira abaturage bahinduye imyumvire bakaba babafasha kubungabunga Pariki y’Ibirunga no mu bindi bikorwa by’ubukerarugendo.

Ati “Hari byinshi abaturage bakora. Nibo badufasha gusana urukuta twakoze iyo tugize nk’ibyago rugasenyuka. N’inyamaswa iyo zivuye muri Parike badufasha hamwe n’inzego z’umutekano kuzisubizayo. Imyumviye yarahindutse kandi iracyakomeza guhinduka.”

Uyu mwaka hatashywe ibigo by’amashuri bitatu bifasha abaturage harimo ikigo cya Gatebe hafi ya Pariki y’Akagera, icya Kanyove hafi ya Pariki y’Ibirunga n’icya Gisakura kiri hafi ya Pariki ya Nyungwe. Byakozwe hitegura igikorwa cyo kwita izina ingagi kizabera i Musanze tariki 2 Nzeri 2016.

RDB ivuga ko ibikorwa byo gusangiza abaturage umutungo ukomoka ku bukerarugendo bimaze gutwara agera kuri miliyari 1,6Frw kuva byatangira gukorwa muri 2006.