Ba Visi Perezida bacyuye igihe ari bo Gakuba Jeanne d’Arc na Fatou Harelimana na bo bahererekanyije ububasha nababasimbuye ari bo Nyirasafari Espérance na Mukabaramba Alvera, ihererekanyabubasha ryabo rikaba ribaye nyuma y’umunsi umwe Abasenateri bashya barahiriye inshingano zabo.

Ihererekanyabubasha ryabaye nyuma y’ibiganiro byamaze amasaha hafi abiri n’igice, abayobozi bacyuye igihe bagaragariza abashya ibyo bagezeho mu myaka umunani ishize, banagaragariza abashya akazi kabategereje.

Ku wa kane tariki 17 Ukwakira 2019, nibwo abasenateri batoreye Dr. Iyamuremye Augustin gusimbura Bernard Makuza ku mwanya wa Perezida wa Sena.

Senateri Iyamuremye Augustin yungirijwe na Esperance Nyirasafari hamwe na Dr Mukabaramba Alivera ku myanya ibiri ya Visi Perezida wa Sena.

Senateri Nyirasafari Esperance ni we watorewe kuba Visi Perezida wa Sena ushinzwe kugenzura amategeko n’ibikorwa bya Guverinoma.

Umwanya wa Visi Perezida ushinzwe gukurikirana imirimo ijyanye n’imari n’abakozi muri Sena wo wegukanywe na Dr Alivera Mukabaramba.

Nyuma yo kurahira, Abasenateri batoreye Dr. Iyamuremye Augustin gusimbura Bernard Makuza ku mwanya wa Perezida wa Sena.

Uretse indahiro z’Abasenateri, Perezida Kagame yanakiriye indahiro y’Umugaba Mukuru w’Ingabo zirwanira mu kirere, Maj Gen Bayingana Emmanuel, hamwe n’indahiro y’Umuyobozi Mukuru w’Urwego rushinzwe Imiyoborere RGB, Dr Usta Kayitesi ndetse n’Umwungirije ari we Dr Nibishaka Emmanuel.

Abitabiriye uwo muhango bari babukereye nk’uko aya mafoto abigaragaza:

Perezida Kagame na Dr. Iyamuremye Augustin watorewe kuyobora Sena

Abayobozi bakuru b’Igihugu hamwe n’abagize Sena nshya bafashe ifoto y’urwibutso

Amafoto: Plaisir Muzogeye

Kureba andi mafoto menshi y’uyu muhango, kanda HANO

Senateri Iyamuremye Augustin avuga ko batayobewe ko umuvuduko w’iterambere Igihugu kirimo kugeraho ngo uterwa n’umubare munini w’urubyiruko rukigize, ariko ko na bo(Abasenateri) bagomba kwihuta.

Yagize ati "Igihugu cyacu gifite umuvuduko uri hejuru, iyo bavuze Sena uba wumva ko ari abantu bakuze bagenda gahoro,(ariko) tuzihuta".

"Igice kinini cy’Abanyarwanda ni urubyiruko, nta burenganzira dufite bwo kugenda gahoro".

Dr. Augustin Iyamuremye, Perezida mushya wa Sena y’u Rwanda

Ikigo cy’Igihugu gishinzwe ibarurishamibare (NISR), mu ibarura rusange riheruka ryo muri 2012, kigaragaza ko Abanyarwanda batarengeje imyaka 35 y’ubukure bangana na 70%.

Perezida wa Sena mushya yakomeje yizeza Umukuru w’Igihugu ko buri musenateri watowe muri iyi manda ya gatatu, ngo agomba kuzagaragaza uruhare rwe mu kurwanira inyungu z’Abanyarwanda.

Ubwo yari amaze kwakira indahiro z’abagize Sena nshya, Perezida wa Repubulika, Paul Kagame yasabye aba basenateri kuba hafi abaturage.

Umukuru w’Igihugu ati "Abanyarwanda babatezeho byinshi.

Bazi ko ibyo mufite muzabikoresha mu guhindura imibereho yabo ikaba myiza, bizabasaba kubegera kugira ngo ibibazo bafite mubitangeho inama z’uburyo byakemurwa".

"Uyu mwanya ntabwo ari uwo gutora gusa amategeko abagezwaho, ahubwo ni ukureba ko Abanyarwanda babona ibyo bakeneye bituma bagira ubuzima bwiza".

Perezida Kagame yashimye ibikorwa byagezweho na Sena icyuye igihe, akavuga ko ari byo abatowe bazashingiraho mu gukurikirana iyubahirizwa ry’amategeko, kugenzura amahame remezo agenga Igihugu hamwe n’ibikorwa bya Guverinoma.

Uretse indahiro z’abasenateri, Perezida Kagame yanakiriye indahiro y’Umugaba Mukuru w’Ingabo zirwanira mu kirere, Maj Gen Bayingana Emmanuel
hamwe n’indahiro y’Umuyobozi Mukuru w’Urwego rushinzwe Imiyoborere RGB, Dr Usta Kayitesi ndetse n’Umwungirije ari we Dr Nibishaka Emmanuel.

Perezida Kagame akomeza asaba abayobozi bashya barahiye hamwe n’abasanzweho, gushingira politiki zose ku miyoborere myiza y’abaturage.

Amafoto: Plaisir Muzogeye

Kureba andi mafoto menshi, kanda HANO

Hon. Iyamuremye yatowe n’Abasenateri 25 akaba yahatanaga kuri uwo mwanya na Hon. Zephyrin Kalimba wabonye ijwi rimwe.

Dr. Iyamuremye Augustin yinjiye muri Sena atanzwe na Perezida wa Repubulika.

Dr. Iyamuremye w’imyaka 73 yari asanzwe ayobora Urwego Ngishwanama rw’Inararibonye.

Uyu musenateri wabaye muri manda ya mbere ya Sena, yamamajwe na Senateri Prof Chrisologue Karangwa(usigaje umwaka umwe muri Sena), akaba abarizwa mu mutwe wa Politike wa PSD nk’uko bimenyerewe.

Senateri Iyamuremye Augustin azaba yungirijwe na Esperance Nyirasafari hamwe na Dr Mukabaramba Alivera ku myanya ibiri ya Visi Perezida wa Sena.

Senateri Nyirasafari Esperance niwe watorewe kuba Visi Perezida wa Sena ushinzwe kugenzura amategeko n’ibikorwa bya Guverinoma, akaba yatsinze Senateri Murangwa Ndangiza Hadija ku majwi 23.

Umwanya wa Visi Perezida ushinzwe gukurikirana imirimo ijyanye n’imari n’abakozi muri Sena wegukanywe na Dr Alivera Mukabaramba wagize amajwi 22, akaba yatsinze Senateri Umuhire Adrie.

Kuri ubu Sena nshya y’u Rwanda igizwe n’abasenateri 26 barimo batandatu bari basanzwe muri uwo mutwe mukuru w’Inteko ishinga amategeko, bakaba bashinzwe kumenyereza bagenzi babo bashya baherutse gutorwa.

Dr. Iyamuremye Augustin yakoze imirimo inyuranye, cyane cyane muri Politiki yo mu Rwanda:

Mu 1977-1984 yari umuyobozi wa Laboratwari ya kaminuza y’u Rwanda, mu Kuboza 1990-1992 yari Perefe wa Gitarama, kuva muri Kamena 1992- Mata 1994 yari umuyobozi w’ibiro by’iperereza mu gihugu.

Kuva muri Nyakanga 1994-1998 yabaye Minisitiri w’Ubuhinzi, kuva mu 1998-Nyakanga 1999 aba Minisitiri w’Itangazamakuru, kuva muri Nyakanga 1999-Werurwe 2000 yabaye Minisitiri w’Ububanyi n’Amahanga, naho kuva mu 2001-2003 yari Umudepite mu Nteko ishinga amategeko.

Kugira ngo ubashe kumenya ibigwi by’Abasenateri 20 bagize manda ya gatatu ya Sena, kanda HANO

Amafoto: Plaisir Muzogeye

kanda HANO Niba ushaka kureba andi mafoto menshi yaranze umuhango wo kurahira kw’Abasenateri n’abandi bayobozi bakuru.

Aba 20 barasanga abandi basenateri batandatu bari mu bagize manda ya kabiri ya Sena, ariko basigaje umwaka ngo manda yabo irangire, aribo: Hon. Consolée Uwimana, Charles Uyisenga, Jeanne d’ Arc Mukakalisa, Chrysologue Karangwa, Zephyrin Kalimba na Margaret Nyagahura.

Aba batandatu na bo nyuma y’umwaka bazasimburwa n’abandi bane bazatangwa na Perezida wa Repubulika n’abandi babiri bazatangwa n’imitwe ya Politiki yemerewe gukorera mu Rwanda.

Tariki ya 16 Nzeri 2019, ni bwo habaye amatora y’abasenateri 12 bahagarariye intara n’umujyi wa Kigali. Nyuma y’umunsi umwe, tariki ya 17 Nzeri 2019, hatowe abasenateri babiri, uhagarariye amashuri makuru na kaminuza bya Leta, n’uhagarariye amashuri makuru yigenga.

Hakurikiyeho abasenateri bane batanzwe na Perezida wa Repubulika, nyuma hatangwa abasenateri babiri baturutse mu ihuriro ry’imitwe ya politiki yemerewe gukorera mu Rwanda.

Benshi mu bagize manda ya gatatu ya Sena, bakoze imirimo inyuranye harimo iya politiki, ndetse benshi babaye abarimu muri za kaminuza zinyuranye zo mu Rwanda.

Dushimimana Lambert uhagarariye Uburengerazuba

Dr. Dushimimana Lambert

Dushimimana Lambert yavutse tariki ya 29 Kanama 1971, avukira mu karere ka Rubavu mu ntara y’Uburengerazuba.

Amashuri abanza yayize ku ishuri ribanza rya Shwemu, ayisumbuye ayiga mu rwunge rw’amashuri Indatwa n’Inkesha rwa Butare (GSO Butare).

Dushimimana yize icyiciro cya kabiri cya kaminuza muri kaminuza y’u Rwanda, icya gatatu acyiga muri kaminuza ya Pretoria muri Afurika y’Epfo, aho yize amategeko mpuzamahanga (International Law).

Mu mirimo yakoze, Dushimimana yabaye umushinjacyaha ku rukiko rw’ibanze rwa Budaha mu karere ka Ngororero.

Yigishije muri kaminuza imyaka itanu, kugeza n’ubu akaba yigishaga mu ishuri ry’amategeko riherereye mu karere ka Nyanza (ILPD).

Yakoze muri Minisiteri y’Ubutabera (MINIJUST), aho yari ashinzwe kwandika amategeko.

Kuva muri 2014, yatangiye gukora muri komisiyo ishinzwe kuvugurura amategeko, kugeza n’ubu akaba yari akuriye ishami rishinzwe kwandika no guhindura amategeko muri iyo komisiyo.

Mu mirimo ya politiki, Dushimimana yabaye perezida w’inama njyanama y’akarere ka Rubavu, akaba kandi yaranabaye mu nama y’ubutegetsi y’icyahoze ari ikigo gishinzwe amazi isuku n’isukura (WASAC).

Dushimimana kandi yigeze no kuba mu nama y’igihugu ishinzwe gutanga ubuhungiro (CNR).

Arubatse afite abana bane.

Dr. Emmanuel Havugimana, na we ahagarariye intara y’Uburengerazuba

Dr. Emmanuel Havugimana

Dr. Havugimana yavutse tariki 4 Mutarama 1956, avukira mu Bufundu, ubu ni mu karere ka Nyamagabe, umurenge wa Mbazi.

Amashuri abanza yayize aho i Mbazi kuva 1962 kugeza 1968. Yize icyiciro rusange cy’amashuri yisumbuye mu Birambo, mu karere ka Karongi kuva 1968 kugeza 1971.

Yakomereje icyiciro cya kabiri cy’amashuri yisumbuye muri Institut Saint Cyprien, ubu yitwa Groupe Scolaire Saint Joseph mu karere ka Nyamasheke.

Kuva muri 1971 yahungiye i Burundi, bituma amashuri yisumbuye ayarangiriza muri College Saint Albert i Bujumbura muri 1980.

Nyuma yakomereje muri Kaminuza y’u Burundi, arangiza icyiciro cya kabiri cya Kaminuza mu bumenyi bw’isi (Geography) muri 1984.

Amaze kugaruka mu Rwanda muri 1999, Leta y’u Rwanda yamwishyuriye amasomo mu cyiciro cya gatatu cya kaminuza, ajya kwiga gutunganya imiturire n’ubutaka muri kaminuza ya Laval i Quebec muri Canada, aho yarangije muri 2001.

Nyuma yaho, yakomeje kwiga icyiciro cya kane cya kaminuza muri kaminuza ya Goteborg muri Suède, aho yaboneye impamyabumenyi y’ikirenga muri Ecologie Humaine muri 2009.

Dr. Havugimana yakoze umurimo umwe ari wo wo kwigisha, yatangiye tariki ya 4 Mutarama 1975.

Yigishije mu mashuri abanza imyaka ine mu gihugu cy’u Burundi, yigisha indi myaka 12 mu mashuri yisumbuye, aho imyaka irindwi yayigishije mu Burundi indi itanu akayigisha mu gihugu cya Djibouti.

Dr. Havugimana yatorewe kwinjira uri Sena, amaze imyaka 22 yigisha muri Kaminuza y’u Rwanda.

Mu yindi mirimo, Dr. Havugimana ni perezida w’inama y’ubutegetsi ya Komisiyo y’igihugu yo kurwanya Jenoside (CNLG).

Dr. Havugimana arubatse, akaba afite abana bane n’umwuzukuru umwe!

Mureshyankwano Marie Rose, nawe ahagarariye Uburengerazuba

Mureshyankwano Marie Rose

Mureshyankwano yavukiye mu cyahoze ari Perefegitura ya Gisenyi, ubu ni mu murenge wa Karago akarere ka Nyabihu.

Uyu mubyeyi w’imyaka 61, kimwe n’abandi batorewe kwinjira muri Sena, imirimo ye yayitangiriye mu burezi.

Yabaye umwarimu mashuri abanza, ndetse aza no kwigisha mu mashuri yisumbuye aho yigishije mu ishuri ryisumbuye ryitwa Bumba Complex School riherereye mu karere ka Rutsiro.

Muri 2005, Mureshyankwano yinjiye mu nteko ishinga amategeko umutwe w’abadepite, ku itike y’Umuryango FPR Inkotanyi.

Mu mwaka wa 2016, Mureshyankwano yagizwe guverineri w’intara y’amajyepfo, umwanya yavuyeho mu mwaka ushize wa 2018.

Mureshyankwano afite icyiciro cya kabiri cya kaminuza (A0) mu bumenyi mu mibanire y’abantu (Social Sciences).

Mureshyankwano arubatse, akaba afite abana batatu.

Bideri John Bonds, ahagarariye intara y’Uburasirazuba

Bideri John Bonds

Bideri John Bonds yavukiye mu Rwanda mu mwaka wa 1958.

Yize amashuri abanza n’ayisumbuye mu gihugu cya Uganda, akomereza icyiciro cya mbere cya Kaminuza muri Kenya, naho icya kabiri akigira muri Uganda, aho yize ubuhinzi n’ubworozi.

Mu mirimo yakoze haromo kuba yarabaye umwarimu muri Kenya igihe gito, nyuma atangira gukorana n’ihuriro ry’Abadage ryigishaga abahinzi n’aborozi bo muri Kenya.

Nyuma yagarutse mu Rwanda, atangiza umuryango Nyarwanda witwa ‘Rwanda Rural Agricultural Initiative’.

Bideri kandi yabaye perezida w’inama njyanama y’umurenge wa Mukarange mu karere ka Kayonza, ndetse aba na Visi Perezida w’inama njyanama y’akarere ka Kayonza.

Yabaye kandi umuyobozi w’inama y’ubutegetsi y’ibitaro bya Rwinkwavu mu karere ka kayonza.

Bideri John Bonds arubatse, afite abana bane.

Mupenzi George, ahagarariye intara y’Uburasirazuba

Mupenzi George

Mupenzi George yavukiye mu karere ka Kamonyi tariki ya 18 Nzeri mu mwaka wa 1956.

Mu mwaka wa 1959, we n’umuryango we bahise bahungira mu ntara y’Uburasirazuba ahitwa i Rukumberi.

Yize mu Iseminari ntoya y’I Zaza, nyuma yinjira muri kaminuza y’u Rwanda aho yize indimi akaba abifitiye impamyabumenyi y’icyiciro cya kabiri cya kaminuza.

Afite kandi impamyabumenyi y’icyiciro cya kabiri cya kaminuza mu mategeko yakuye muri kaminuza yigenga ya Kigali (ULK), akaba kandi ari hafi kurangiza mu ishuri ry’amategeko rya Nyanza (ILPD), ishami rya Kigali.

Mupenzi yabonye amahugurwa yimbitse amuha ubumenyingiro mu miyoborere myiza yaherewe i Paris mu Bufaransa, mu ivugururabukungu, yaherewe mu Butaliyani, no mu mategeko mpuzamahanga arengera impunzi.

Mupenzi yabaye umujyanama mu by’amategeko mu yahoze ari MINITRASO (Ministere du Travail et Affaires socials), ndetse yanabaye umunyamabanga wihariye wa Minisitiri w’umurimo. Yabaye kandi umuhuzabikorwa w’Ikigo iwacu ku Kabusunzu.

Ubu Mupenzi yari umujyanama mu mategeko wigenga, akaba n’uhugura abantu (senior trainer) mu iterambere ry’icyaro.

Mupenzi George arubatse, akaba afite abana batatu yabyaye n’abandi babiri arera (Adoption).

Ntidendereza William, ahagarariye umujyi wa Kigali

William Ntidendereza

Mu mwaka wa 2012, William ntidendereza yari Umuyobozi wungirije w’itorero ry’igihugu.

Ntidendereza yanabaye umuyobozi w’akarere ka Kicukiro kuva mu 2006 kugeza 2008, ubwo yeguraga kuri uyu mwanya.

Dr. Habineza Faustin, ahagarariye intara y’Amajyaruguru

Dr. Faustin Habineza

Dr. Habineza ni umuhanga akaba n’impuguke mu mibare n’uburezi.

Afite impamyabumenyi y’ikirenga mu mibare, yakuye muri Kaminuza ya Kwa Zulu-Natal muri Afurika y’Epfo.

Yize imibare muri kaminuza ya Sherbrooke yo muri Canada, ndetse anafite impamyabumenyi y’icyiciro cya kabiri cya kaminuza mu mibare n’ubugenge, yakuye muri kaminuza y’u Rwanda.

Dr. Habineza amaze imyaka 13 ari umwarimu muri kaminuza, aho yigisha akaba n’umuyobozi w’ishami rya ‘Applied Sciences’ muri INES-Ruhengeri kuva mu 2015.

Dr Habineza kandi, ni umushakashatsi mu bijyanye n’imibare n’ubumenyi, by’umwihariko yibanda ku burezi.

Prof. Niyomugabo Cyprien, yatorewe guhagararira amashuri makuru ya Leta

Prof. Niyomugabo Cyprien

Prof. Niyomugabo Cyprien asanzwe ari umwarimu akaba n’umuyobozi w’ishami ry’uburezi muri kaminuza y’u Rwanda, akaba n’intebe y’inteko Nyarwanda y’ururimi n’umuco, (RALC).

Prof. Niyomugabo afite impamyabumenyi y’ikirenga mu bijyanye n’uburezi mu by’indimi, akaba n’umunyamuryango w’ikigo cy’indimi cy’umuryango wa Afurika yunze ubumwe.

Ni umwanditsi w’ibitabo akaba n’umushakashatsi wibanda ku ndimi n’uburezi.

Dr. Nyinawamwiza Laetitia ahagarariye intara y’Amajyaruguru

Dr. Laetitia Nyinawamwiza

Dr. Nyinawamwiza asanzwe ari umwarimu muri kaminuza y’u Rwanda, ndetse yanabaye umuyobozi wungirije ushinzwe amasomo muri ISAE Busogo.

Ubu Dr. Nyinawamwiza yari umuyobozi mukuru w’iryo shuri rikuru ry’ubuhinzi n’ubworozi, ribarizwa muri kaminuza y’u Rwanda (UR-CAVM).

Dr. Nyinawamwiza asanzwe ari umuyobozi wungirije w’inama y’ubutegetsi ya ‘Rwanda Mountain Tea’, akaba no mu bagize inama y’ubutegetsi mu nganda z’icyayi za Rubaya Nyabihu Tea Company Ltd na Kitabi Tea Company Ltd.

Dr. Nyinawamwiza yabaye umuyobozi wungirije w’inama y’ubutegetsi mu kigo cy’ubushakashatsi n’iterambere ry’inganda mu Rwanda (NIRDA).

Dr. Nyinawamwiza ni umubyeyi wubatse, afite impamyabumenyi ihanitse mu bijyanye n’ubworozi, yakuye muri kaminuza ya NAMUR mu Bubiligi.

Nkusi Juvénal, ni umwe mu ba Senateri batanzwe n’ihuriro ry’imitwe ya Politiki

Nkusi Juvenal

Nkusi Juvenal amaze imyaka 24 ari intumwa ya rubanda mu nteko ishinga amategeko umutwe w’abadepite, yinjiyemo itike y’ishyaka rya PSD yigeze no kubera umuyobozi.

Ku myaka 64 afite, inteko ishinga amategeko y’u Rwanda yagiriyemo amateka akomeye kuko kuva mu 1994 kugera mu 1997 yari umuyobozi wayo mu nzibacyuho.

Yamenyekanye cyane ubwo yari umuyobozi wa komisiyo y’inteko ishinga amategeko umutwe w’abadepite, ishinzwe gukurikirana imikoreshereze y’umutungo wa leta (PAC).

Murangwa Ndangiza Hadidja, yatanzwe n’ihuriro ry’imitwe ya Politiki

Murangwa Ndangiza Hadidja

Murangwa Ndangiza Hadidja yemejwe n’ihuriro ry’imitwe ya Politiki yemerewe gukorera mu Rwanda nk’umu Senateri, asimbuye Uwamurera Salama wari wemejwe n’iri huriro ariko urukiko rw’ikirenga rukaza kwanga kumwemeza.

Amakuru yavuzwe ni uko uyu Uwamurera Salama atari afite ubunararibonye bumwemerera kuba muri Sena y’u Rwanda.

Murangwa Hadidja wamusimbuye na we yaturutse mu ishyaka rya PDI, kimwe na Uwamurera yasimbuye.

Uyu Murangwa Hadidja w’imyaka 44, ni impuguke mu bwakirizi bw’imisoro, akaba n’umunyamategeko.

Ni umwe mu bagize ikigo mpuzamahanga nkemurampaka (Kigali International Arbitration Center), akaba anabifitiye seritifika yavanye i London mu Bwongereza.

Yakoze imirimo inyuranye mu bijyanye n’imisoro ndetse n’ubujyanama mu mategeko haba mu bigo bya Leta n’ibyigenga.

Murangwa ni umunyamayegeko ubimazemo igihe kandi akaba n’umujyanama mu by’imisoro.

Yabaye muri nama z’ubutegetsi za MMI, RBC na BRD ubu akaba ari mu nama y’ubutegetsi ya Banki nkuru y’igihugu (BNR).

Dr. Mukabaramba Alvera, yatanzwe na Perezida wa Repubulika

Dr. Alvera Mukabaramba

Dr. Mukabaramba ubu ni inshuro ya kabiri agiye muri Sena, kuko yigeze kuyibamo kuva muri 2003 kugera muri 2011.

Alvera Mukabaramba yari arambye cyane muri Guverinoma, kuko yari umunyamabanga wa Leta muri Minisiteri y’Ubutegetsi bw’igihugu ushinzwe imibereho y’abaturage, guhera mu Kwakira 2011.

Afite impamyabumenyi ihanitse yakuye muri First Pavlov State Medical University, mu Mujyi wa St.Petersburg mu Burusiya, aho yize kuvura abana.

Habiyakare François na we yatanzwe na Perezida wa Repubulika

Habiyakare Francois

Habiyakare François yari asanzwe ari Perezida w’inama y’abakomiseri ba komisiyo y’igihugu ishinzwe abakozi ba Leta, aho yinjiyemo muri Kamena 2012.

Nyirasafari Espérance, yatanzwe na Perezida wa Repubulika

Ni umunyamategeko, afite impamyabushobozi yo ku rwego rwa ‘Masters’ mu bijyanye n’amategeko mpuzamahanga mpanabyaha n’uburenganzira bwa muntu.

Yabaye kandi Minisitiri w’Uburinganire n’Iterambere ry’Umuryango kuva ku wa 04/10/2016 kugeza ku wa 18/10/2018; mbere yahoo, yari umudepite mu Nteko Ishinga amategeko y’u Rwanda muri komisiyo ya Politiki, Uburinganire n’Ubwuzuzanye hagati y’abagore n’abagabo mu iterambere ry’Igihugu kuva ku itariki ya 04/10/2013 kugeza agizwe Minisitiri muri MIGEPROF ku wa 04/10/2016.

Yanabaye kandi uwunganira abandi mu by’amategeko( avoka), 2011-2013, aba Umunyamabanga Uhoraho muri Minisiteri y’Ubutabera kuva ku itariki ya 23/01/2007-11/5/2011.

Yabaye umushinjacyaha ufite ububasha mu gihugu hose kuva mu 2004-2007; yanabaye kandi Procureur wa Repubulika mu cyahoze ari Perefegitura ya Gitarama kuva mu 2001-2004, yanakoze kandi mu muryango utari uwa Leta uharanira uburenganzira bw’umugore n’umwana (Haguruka) kuva 1999-2001.

Madamu Nyirasafari Espérance arubatse ni umubyeyi w’abana 4.

Dr. Iyamuremye Augustin, yatanzwe na Perezida wa Repubulika

Dr. Iyamuremye Augustin

Dr. Iyamuremye w’imyaka 73 yari asanzwe ayobora Urwego Ngishwanama rw’Inararibonye.

Uyu mugabo yakoze imirimo inyuranye, cyane cyane muri Politiki yo mu Rwanda:

Mu 1977-1984 yari umuyobozi wa Laboratwari ya kaminuza y’u Rwanda, mu Kuboza 1990-1992 yari Perefe wa Gitarama, kuva muri Kamena 1992- Mata 1994 yari umuyobozi w’ibiro by’iperereza mu gihugu.

Kuva muri Nyakanga 1994-1998 yabaye Minisitiri w’Ubuhinzi, kuva mu 1998-Nyakanga 1999 aba Minisitiri w’Itangazamakuru, kuva muri Nyakanga 1999-Werurwe 2000 yabaye Minisitiri w’Ububanyi n’Amahanga, naho kuva mu 2001-2003 yari Umudepite mu Nteko ishinga amategeko.

Fulgence Nsengiyumva, ahagarariye intara y’Uburasirazuba

Nsengiyumva Fulgence

Nsengiyumva yahoze ari Perefe w’icyahoze ari perefegitura ya Gitarama, ndetse yanabaye Umunyamabanga wa Leta muri Minisiteri y’Ubuhinzi n’Ubworozi muri 2016.

Prof. Ephraim Kanyarukiga, ahagarariye amashuri makuru yigenga.

Kanyarukiga yakoze muri Kaminuza y’Abadivantisiti b’umunsi wa karindwi ya Afurika yo Hagati, akaba ari umuhanga mu ndimi n’ubuvanganzo.

Pelagie Uwera, ahagarariye intara y’Amajyepfo

Ni umwe mubagore bakoze muri komisiyo y’igihugu y’amatora nka komiseri.

Nkurunziza Innocent ahagarariye intara y’Amajyepfo

Nkurunziza Innocent

Nkurunziza yavutse mu mwaka wa 1961, avukira i Sazange mu murenge wa Kinazi mu Karere ka Huye.

Amashuri abanza yayigiye i Maza mu Karere ka Huye, ayisumbuye ayiga i Nyanza muri Collège du Christ-Roi.

Amashuri makuru na kaminuza yayigiye muri Grand Seminaire ya Nyakibanda, yiga muri Université ya Santa Croce na Université Salesianum zo mu gihugu cy’Ubutaliyani, yize kandi SFB na Maastrich School of Management.

Mu byo yize harimo ubumenyi rusange Humanités Greco-Latines, Philosophie, Théologie, yiga Droit Canonique (Licence) Sciences of Social Communication (Masters) na Business Management -MBA (Masters in Project Management).

Yatowe yari Umuyobozi w’Ishami ry’Igenamigambi, ikurikiranabikorwa n’Isuzumabikorwa muri servisi za Minisitiri w’Intebe.

Mbere yaho, yari Umujyanama wa Minisitri w’Intebe Ushinzwe Imibereho myiza.

Mu yindi mirimo yakoze harimo ko yabaye Umuyobozi Mukuru (DG) wa Programu muri Komisiyo y’Igihugu y’Ubumwe n’Ubwiyunge, Umujyanama wa Minisitiri muri Minisiteri y’Ubucuruzi Inganda n’Ubukerarugendo, ndetse yanabaye umuyobozi w’ishuri rya Groupe Scolaire St. Jean Baptiste Cyahinda.

Arubatse afite abana bane.

Umuhire Adrie, ahagarariye intara y’Amajyepfo

Umuhire yavutse mu mwaka w’ 1977, avukira mu murenge wa Karama mu karere ka Huye.

Amashuri abanza yayize Ku ishuri ribanza rya Kibingo, ayisumbuye ayiga kuri Ecole Secondaire de Karubanda mu ishuri ry’inderabarezi rusange.

Nyuma yakomereje muri kaminuza y’u Rwanda mu ishami ry’uburezi, guhera muri 2000-2004 mu gashami k’igifaransa n’icyongereza.

Kuva muri 20004-2005, Umuhire yabaye umwarimu w’icyongereza mu ishuri ryusumbuye rya CEFOTEC mu karere ka Huye.
Kuva muri 2006 kugeza ubu, Umuhire yari umwarimu n’umushakashatsi muri ‘Center for Language Enhancement’ muri kaminuza y’u Rwanda.

2011-2015, Umuhire yatorewe kuba ushinzwe imibereho mu nama y’igihugu y’abagore mu murenge wa Ngoma mu karere ka Huye.

2010-2013, yize ‘master in Development studies’ muri kaminuza y’u Rwanda, ubu akaba arimo yigira impamyabumenyi y’ikirenga (Phd) muri ‘communication’ muri kaminuza ya ‘Hallym University’ yo muri Korea y’Amajyepfo.

NCHR yanyuzwe n’uko amatora y’Abasenateri yagenze

Byatangarijwe mu kiganiro abayobozi muri iyo komisiyo bagiranye n’abanyamakuru kuwa Gatanu 20 Nzeri 2019, kikaba cyari kigamije kugaragariza Abanyarwanda uko amatora y’Abasenateri yagenze, kuko iyo komisiyo yayakurikiranye kuva mu myiteguro, bigera aho gutanga kandidatire no kwiyamamaza ndetse no ku munsi nyirizina wo gutora.

Itegeko Nshinga rya Repuburika y’u Rwanda mu ngingo yaryo ya 42, riha inshangano komisiyo y’igihugu y’uburenganzira bwa muntu gukurikirana uko ubwo burenganzira bwubahirizwa, ibyo ngo ikaba igomba kubikora no mu bikorwa bijyanye n’amatora.

Umuyobozi wa komisiyo y’igihugu y’uburenganzira bwa muntu Nirere Madeleine, avuga ko komisiyo yakurikiranye igikorwa cy’amatora kuva cyatangira, ireba ibijyanye n’ibikoresho isanga bihari kandi byarageze ahatorerwa ku gihe, akemeza ko muri rusange byagenze neza.

Agira ati “Muri rusange amatora yagenze neza kuko umutekano mbere, mu gihe cy’amatora na nyuma yayo wari uhari kuko nta mvururu zayakurikiye. Ibyo bigaragaza ko abantu banyuzwe n’uko amatora yagenze, cyane ko no mu kubarura amajwi byitabiriwe n’abantu batandukanye barimo n’indorerezi”.

Yungamo ati “Nakwanzura mvuga ko amatora yagenze neza, ko u Rwanda rumaze kugira ubunararibonye muri demokarasi, cyane cyane mu matora yaba ay’inzego z’ibanze, ay’abadepite, ay’abasenateri n’andi. Ubwo bunararibonye kandi buri no mu bashinzwe imitegurire y’amatora”.

Uyu muyobozi ariko yagize icyo avuga ku cyo yabonye nk’imbogamizi, kijyanye n’uko hari ahabereye amatora hatoroherezaga abafite ubumuga.

Ikiganiro cyitabiriwe n’abanyamakuru ndetse n’abandi bakozi b’iyo komisiyo

Ati “Hari inyubako zikenerwa mu gihe cy’amatora zikibangamiye abafite ubumuga, ndavuga cyane cyane iza kera zifite ingazi z’abazamuka, bituma nk’abagendera ku tugare bitaborohera cyangwa abafite imbago. Tugasaba ko byakosorwa, izo nyubako nazo zigashyirwaho inzira zorohereza abafite ubumuga”.

Komisiyo ariko ngo yashimye ko abafite ubumuga bwo kutabona bari bateganyirijwe uburyo buborohereza gutora, ni ukuvuga inyandiko yabagenewe ya ‘braille’.

Nirere kandi yasabye ko abashinzwe ubukangurambaga ku bijyanye n’amatora bwakongerwa, kuko hakiri abaturage bataramenya ishingano z’urwo rwego rwatowe.

Ati “Komisiyo y’amatora yahuguye abaturage ariko hari aho twasanze no mu bari mu nteko itora badasobanukiwe iby’inzego zitorwa. Ugasanga abantu ntibazi inshingano za Sena, ndetse ntibamenye kuyitandukanya n’umutwe w’abadepite, ni ngombwa rero ko hongerwa ubukangurambaga”.

Ikindi cyagaragaye muri ayo matora nk’uko NCHR yabitangaje, ni uko mu gutanga kandidatire abagore bari bake kuko mu bakandita 63 abagore bari 21 gusa, bangana na33.6%, iyo komisiyo ikabakangurira kujya babyitabira ari benshi kugira ngo bongere uruhare rwabo mu buyobozi bw’igihugu.

Amatora y’Abasenateri yabaye kuva ku ya 16-18 Nzeri 2019, akaba yarakozwe mu byiciro bitandukanye ndetse hakaba hari n’abashyirwaho na Perezida wa Repuburika.

Itangazo ryagiye ku rubuga rwa Twitter rwa Guverinoma y’u Rwanda, riragira riti “Ashingiye ku Itegeko Nshinga rya Repubulika y’u Rwanda ryo mu 2003 ryavuguruwe mu 2015, cyane cyane mu ngingo yaryo ya 80 igika cya mbere, agace ka 2, n’igika cya 5, none ku wa 20/9/2019, Nyakubahwa Perezida wa Repubulika ashyizeho Abasenateri bakurikira: Dogiteri IYAMUREMYE Augustin, Madamu NYIRASAFARI Espérance, Bwana HABIYAKARE François, Dogiteri MUKABARAMBA Alvera.”

Madamu Nyirasafari Espérance, ntiyakunze kugaragara cyane mu itangazamakuru kimwe n’abandi bayoboye minisiteri y’umuco na siporo bamubanjirije. Gusa mu gihe cye, ikipe y’igihugu “Amavubi” yatangiye gutsinda, ndetse ubwo u Rwanda rwatsindaga ikipe ya Seychelles uyu muyobozi yashimiye ikipe y’igihugu avuga ko yashakaga no kuzayakira agasangira n’abakinnyi bayo.

Nubwo uyu muyobozi atakoze byinshi mu mikino n’imyidagaduro, yagaragaye atangiza ibitaramo byiswe ‘IWACU MUSIKA FESTIVAL’ byazengurutse intara zitandukanye.

Nyirasafari mbere y’uko ajya muri ministeri y’umuco na Siporo, yari asanzwe ari Minisitiri w’uburinganire n’iterambere ry’umuryango MIGEPROF, Minisiteri yahawe kuyobora kuva ku wa 05 Ukwakira 2016 asimbuye Dr Diane Gashumba wari wagizwe Minisitiri w’ubuzima.

Yakoze imirimo itandukanye muri Leta, irimo no kuba mu nteko ishinga amategeko, n’indi mirimo itandukanye.

Uwamurera salama

Itangazo ryashyizwe ahagaragara n’ihuriro ry’imitwe ya politiki rivuga ko kuri uyu wa kane tariki ya 19 Nzeri 2019 inama idasanzwe y’inama rusange y’ihuriro ry’igihugu nyunguranabitekerezo ry’imitwe ya politiki yateranye iyobowe n’umuvugizi w’ihuriro, Depite Mukabunani Christine.

Iyo nama yateranye igamije gushyiraho abakandida b’Abasenateri bashyirwaho n’ihuriro ry’imitwe ya politiki.

Iyo nama rusange ni yo yafatiwemo umwanzuro wo gushyiraho abakandida b’Abasenateri babiri batangwa n’ihuriro ry’imitwe ya politiki mu nteko ishinga amategeko, umutwe wa sena.

Abakandida babiri bashyizweho n’ihuriro ni Uwamurera Salama watanzwe n’umutwe wa politiki PDI na Nkusi Juvenal watanzwe na PSD.

Nkusi Juvenal

Nkusi Juvenal yahoze ayobora komisiyo y’Abadepite ishinzwe kugenzura imikoreshereze y’imari n’umutungo wa Leta (PAC). Azwiho kuba atarihanganiraga abakoreshaga nabi umutungo wa Leta.

Muri 2018, nyuma y’imyaka 24 yari amaze mu nteko ishinga amategeko, Nkusi Juvenal ntiyagaragaye ku rutonde rw’abazavamo Abadepite bagombaga guhagararira PSD mu nteko ishinga amategeko.
Ishyaka rye ryasobanuye ko yanze kongera kwiyamamaza ku bushake bwe, kugira ngo ahe umwanya abakiri bato na bo ngo bashobore kuba Abadepite.

Nkusi na Uwamurera nibemezwa n’urukiko rw’ikirenga, bazasimbura Senateri Mukankusi Perrine na Senateri Harerimana Fatou barimo gusoza manda yabo, na bo bakaba barinjiye muri Sena batanzwe n’ihuriro ry’imitwe ya politiki.

Iryo huriro riba ryemerewe abasenateri bane, ariko rikabanza gutanga babiri, abandi babiri bakazatangwa nyuma y’umwaka. Abazatangwa nyuma y’umwaka bazasimbura Jeanne d’ Arc Mukakalisa na Charles Uyisenga bagifite umwaka umwe muri Sena kugira ngo babe barangije manda yabo y’imyaka umunani.

Prof Niyomugabo ni we watorewe guhagararira amashuri makuru na za Kaminuza bya Leta muri Sena

Prof Niyomugabo yatsinze mugenzi we bari bahanganye Prof Kayumba Pierre Claver ku majwi 66,6% kuri 34.3%.

Aba bakandida-senateri babiri ni bo bahataniraga umwanya umwe uteganyirijwe Umusenateri uhagarariye amashuri makuru na Kaminuza bya Leta, bakaba batowe n’abashakashatsi n’abarimu muri Kaminuza babarirwa mu 1800 batoreye kuri Site 14 mu gihugu.

Komisiyo y’igihugu y’Amatora yagaragaje ko Abasenateri batorwa mu byiciro bitandukanye ariko bakaba bafite inshingano zo guhagararira Abanyarwanda bose.

Icyakora ku barezi, Perezida wa Komisiyo y’Igihugu y’Amatora Prof Kalisa Mbanda agaragaza ko hari umwihariko.

Agira ati, “Ntabwo ibyiciro byose by’abaturage byabona Umusenateri ariko nko ku barimu baba bafite ubunararibonye bwinshi mu kazi bakora kandi bafite ubuhanga mu gukurikirana ibisabwa ngo uburezi bugende neza, bazana rero agashya muri Sena ku buryo uburezi bukwiye gutera imbere”.

Bamwe mu batoye bagaragaza ko biteze ko Abasenateri bazabahagararira neza, bakabakorera ubuvugizi mu gukora ubushakashatsi ku barezi n’abanyeshuri.

Babatezeho kandi kuvuganira abarimu mu kubahiriza uburenganzira bwabo, no kuvumbura mu byiciro bitandukanye by’amasomo.

Mu gihe komisiyo y’igihugu y’Amatora yari yatangaje ko amatora yabaye ku wa 16 Nzeri 2019 yitabiriwe hejuru ya 95%, ku matora yabaye kuri uyu wa 17 Nzeri ho byagaragaye ko hari amasite yagize ubwitabire bukeya, nko kuri Site ya KIE ahari hategerejwe Inteko itora ingana n’abantu 317, hatoye gusa 172, naho kuri site ya KIST hatoye 231 kuri 342 bari bategererejwe.

Senateri Niyomugabo ugiye guhagararira amashuri makuru na Kaminuza bya Leta yari asanzwe ari umuyobozi w’Inteko Nyarwanda y’Umuco n’Ururimi RALC.

Abaye umusenateri wa 13 utowe muri 26 bategerejwe mu Nteko Ishinga Amategeko umutwe wa Sena muri manda y’imyaka itanu iri kwiyamamarizwa.

Kuri uyu 18 Nzeri 2019 nibwo haza kumenyekana Umusenateri uzahagararira Amashuri makuru na za Kaminuza zigenga, ahari guhatana abakandida batatu.

Perezida wa Komisiyo y’igihugu y’amatora, Prof. Kalisa Mbanda

Aba basenateri batowe ni Abaturuka mu Ntara n’Umujyi wa Kigali aho Amajyepfo, uburengerazuba n’uburasirazuba hatowemo batatu batatu Amajyaruguru hagatorwamo babiri naho Umujyi wa Kigali ugahagararirwa n’umusenateri umwe.

Dore urutonde rw’abakandida senateri batowe n’intara bazaba bahagarariye muri Sena y’u Rwanda:

Amajyepfo hatowe:

1.Umuhire Adrie yabonye amajwi 55%
2.Uwera Pélagie n’amajwi 48%
3.Nkurunziza Innocent ku majwi 55%

Uburengerazuba hatowe:

1.Mureshyankwano Marie Rose n’amajwi 68%
2.Havugimana Emmanuel n’amajwi 56%
3.Dushimimana Lambert watowe ku majwi 53%

Uburasirazuba hatowe:

1.Nsengiyumva Fulgence n’amajwi 68%
2.Bideri John n’amajwi 75%
3.Mupenzi Georges ku majwi 63%

Amajyaruguru hatowe:

1.Nyinawamwiza Laetitia wagize amajwi 60%
2.Habineza Faustin wagize amajwi 72%

Mu mujyi wa Kigali hatowe Ntidendereza William n’amajwi 60%

Perezida wa Komisiyo y’Igihugu y’Amatora Prof Kalisa Mbanda avuga ko amatora yagenze neza kuko yitabiriwe ku kigero Kiri hejuru ya 95%.

Avugaga ko amatora ya mbere y’abasenateri 12 muri 26 bagomba gutorwa muri iyi minsi itatu nta mbogamizi n’imwe yabayemo kuko yatangiye saa yine za mu gitondo kandi abatora bakaba bahagereye igihe kandi akaba mu mucyo.

Prof. Karisa Mbanda avuga ko amazina y’abatowe yatangajwe ari ay’agateganyo kuko amategeko ateganya ko abatowe bemezwa burundu nyuma y’iminsi ibiri ikurikura uwo amatora yabereyeho.

Avuga kandi ikoranabuhanga rirI gukoreshwa ryatumye ibarura ry’amajwi mu mafasi ni ukuvuga mu Ntara n’Umujyi wa Kigali ryatumye ayo majwi y’agateganyo arara abaruwe.

Agira ati "Byagenze neza ku buryo saa yine amatora yari atangiye kandi saa kumi n’imwe amajwi yose yari yamaze kuva mu mafasi n’Umujyi wa Kigali hakoreshejwe ikoranabuhanga kandi nta kibazo cyabayemo".

"Nyuma y’amasaha 48 nibwo tuzabamenyesha ibizaba byavuye mu matora ku buryo bwa burundu kuko tuba dutegereje niba nta bibazo, nta birego byatanzwe kuri ibyo byavuye mu matora".

Amatora y’abasenateri arakomeza kuri uyu wa 17 Nzeri 2019 ahatorwa Abasenateri babiri bahagarariye amashuri makuru na Kaminuza, Inteko itora ikaba igizwe n’abarimu bo ku rwego rw’abungirije mu masomo bafite impamyabumenyi y’icyiciro cya gatatu cya Kaminuza (Masters).

Amatora yabo n’ubundi aratangira saa yine za mugitondo arangire saa saba, Kaminuza zigenga zikaba zihagarariwe n’Abakandida batatu batorwamo umwe naho Kaminuza y’u Rwanda ikaba ifite abakandida babiri na bo batorwamo umwe.

Biteganyijwe ko ku wa 18 Nzeri aribwo amatora azarangira ahazaba hamenyekana abasenateri babiri batorwa mu ihuriro ry’imitwe ya Politiki.

Hari kandi abasenateri umunani bazashyirwaho na Perezida wa Repubulika, ariko abanza gutanga bane, abandi bane bakazaza nyuma y’umwaka.

Ihuriro ry’imitwe ya politiki na ryo ryohereza abasenateri bane, ariko rikabanza gutanga babiri, abandi babiri rikabatanga nyuma y’umwaka.

Mu ntara y’Amajyepfo hatowe abasenateri batatu, Uburengerazuba batatu, Uburasirazuba batatu, Amajyaruguru babiri naho Umujyi wa Kigali hatorwa umusenateri umwe.

Dore urutonde rw’abakandida senateri batowe n’intara bazaba bahagarariye muri Sena y’u Rwanda:

Amajyepfo hatowe:

1.Umuhire Adrie

2.Uwera Pélagie

3.Nkurunziza Innocent

Uburengerazuba hatowe:

1.Mureshyankwano Marie Rose

2.Havugimana Emmanuel

3.Dushimimana Lambert

Uburasirazuba hatowe:

1.Nsengiyumva Fulgence

2.Bideri John

3.Mupenzi Georges

Amajyaruguru hatowe:

1.Nyinawamwiza Laetitia

2.Habineza Faustin

Mu mujyi wa Kigali hatowe Ntidendereza William

Uretse aba basenateri batorewe guhagararira intara, hasigaye abandi basenateri babiri bazahagararira za kaminuza, umwe uhagarariye iza Leta n’undi uhagarariye izigenga.

Hari kandi abasenateri umunani bazashyirwaho na Perezida wa Repubulika, ariko abanza gutanga bane, abandi bane bakazaza nyuma y’umwaka.

Ihuriro ry’imitwe ya politiki na ryo ryohereza abasenateri bane, ariko rikabanza gutanga babiri, abandi babiri rikabatanga nyuma y’umwaka.

Emmanuel HATEGEKA agiye guhagararira u Rwanda muri Leta zunze ubumwe z’Abarabu

Abo ba Ambasaderi bashya icumi bari muri 15 baherutse gushyirwaho na Perezida wa Repubulika Paul Kagame.

Komisiyo ya Sena ishinzwe ububanyi n’amahanga, Ubutwererane n’umutekano yavuze ko muri abo icumi harimo Wellars Gasamagera ugiye guhagararira u Rwanda muri Angola, Emmanuel Hategeka ugiye guhagararira u Rwanda mu bihugu byunze ubumwe by’Abarabu (UAE) na Maj. Gen. Charles Karamba, Ambasaderi mushya w’u Rwanda muri Tanzania.

Maj. Gen. KARAMBA Charles ni we Ambasaderi mushya w’u Rwanda muri Tanzania

Muri abo ba Ambasaderi 10 bemejwe na Sena kandi harimo
Jean de Dieu Uwihanganye ugiye guhagararira u Rwanda muri Singapore, François Nkurikiyimfura, Ambasaderi w’u Rwanda muri Qatar, Yasmin Amri Sued ugiye guhagararira u Rwanda muri Korea y’Epfo, na Dr Aissa Kirabo Kakira ugiye muri Ghana.

Hari na James Kimonyo ugiye guhagararira u Rwanda mu Bushinwa, Higiro Prosper ugiye guhagararira u Rwanda muri Canada, na Marie Chantal Rwakazina wayoboraga Umujyi wa Kigali akaba agiye guhagararira u Rwanda mu Busuwisi.

RWAKAZINA Marie Chantal agiye guhagararira u Rwanda mu Busuwisi

Itegeko Nshinga rya Repubulika y’u Rwanda ryo muri 2003, ryavuguruwe muri 2015, ingingo yaryo ya 86 iha Sena y’u Rwanda ububasha bwo kwemeza bamwe mu bayobozi bakuru baba bashyizwe mu myanya, barimo na ba Ambasaderi.

YASMIN Amri Sued yagizwe Ambasaderi w’u Rwanda muri Koreya y’Epfo

Komisiyo ya Sena ishinzwe ububanyi n’amahanga, Ubutwererane n’umutekano ifite inshingano zo gusuzuma no kugenzura abo bayobozi bashya baba bashyizwe mu myanya kugira ngo koko irebe niba baba babifitiye ubushobozi.

Wellars Gasamagera agiye guhagararira u Rwanda muri Angola

Icyakora mu myaka ishize, nta Ambasaderi wigeze ushyirwaho na Perezida wa Repubulika ngo abe yabuzwa amahirwe yo kujya kuri uwo mwanya n’iyo komisiyo.

Uwihanganye Jean de Dieu agiye guhagararira u Rwanda muri Singapore

Senateri Rugema Michel uyobora iyo komisiyo yabwiye abitabiriye umuhango wo kwemeza abo ba Ambasaderi ko Komisiyo yasanze bose bujuje ibisabwa kugira ngo bahagararire u Rwanda mu mahanga.

HIGIRO Prosper agiye guhagararira u Rwanda muri Canada

Senateri Rugema yasobanuye ko abandi batanu baherutse gushyirwaho na Perezida Kagame Sena itiriwe ibakorera isuzuma kubera ko bari basanzwe ari ba Ambasaderi, icyabaye kikaba ari ukubahindurira ibihugu bari bahagarariyemo u Rwanda.

Aissa Kirabo Kakira agiye guhagararira u Rwanda muri Ghana

Abo ba Ambasaderi bahinduriwe ibihugu ni Eugene Segore Kayihura wavuye muri Tanzania ajya guhagararira u Rwanda muri Afurika y’Epfo asimbuye Vincent Karega, naho Vincent Karega we ajya guhagararira u Rwanda i Kinshasa muri Repubulika ya Demokarasi ya Congo.

KIMONYO James, Ambasaderi w’u Rwanda mu Bushinwa

Dr Francois Xavier Ngarambe yavuye i Geneva mu Busuwisi yerekeza i Paris mu Bufaransa, naho Sheikh Saleh Habimana avanwa mu Misiri yerekeza muri Maroc. Ni mu gihe Alfred Kalisa we yavuye i Luanda muri Angola, yerekeza i Cairo mu Misiri asimbura Sheikh Saleh Habimana.

Nkurikiyimfura François ni we Ambasaderi mushya w’u Rwanda muri Qatar

Mu masaha ya mu gitondo, umurambo wa nyakwigendera Bishagara wakuwe ku bitaro byitiriwe Umwami Faisal kugira ngo umuryango we n’inshuti ndetse n’abo bakoranaga bamusezereho bwa nyuma.

Umuhango wo kumusezeraho bwa nyuma wabereye mu Ngoro y’Inteko Ishinga amategeko, nyuma yaho hakurikiraho misa yabereye muri Regina Pacis i Remera, na yo ikurikirwa n’umuhango wo kumushyingura.

Aya ni amwe mu mafoto yaranze umuhango wo guherekeza nyakwigendera Senateri Bishagara Kagoyire Therese.

Amafoto: Plaisir Muzogeye

Reba uko umuhango wo gushyingura Senateri Bishagara Kagoyire wagenze

Inkuru bijyanye:

Senateri Bishagara Kagoyire Thérèse yitabye Imana

Senateri Bishagara yashizemo umwuka ari muri Leta Zunze Ubumwe za Amerika mu bitaro John Hopkins muri Leta ya Maryland aho yari yaragiye kwivuriza.

Bishagara wari ufite imyaka 67, yari ahagarariye intara y’Uburengerazuba muri SENA, akaba mbere yaho yarakoze imirimo itandukanye nko kuyobora itsinda ry’ubushakashatsi muri PNLS/CNLS HIV/AIDS Center mu 1995-1996.

Yayoboye kandi ishuri rikuru ry’ubuzima KHI hagati y’umwaka w’ 1996 na 2004. Yabaye kandi umwarimu mu cyahoze ari Kaminuza nkuru y’u Rwanda hagati y’umwaka wa 1999 na 2003.

Senateri Bishagara yayoboye ku rwego rw’igihugu umuryango PIEGO /MCHIP ushamikiye kuri Johns Hopkins University.

Mu yindi mirimo yakoze harimo kuba umujyanama mu bya tekinike muri Save the children UK, aza kuba perezida wa pro femme twese hamwe n’ikitwa COCAFEM / Great Lakes hagati ya 2007 na 2011.

Senateri Bishagara yabaye kandi mu nama z’ubutegetsi z’ibigo bitandukanye nk’ikigega gishinzwe gutera inkunga ibikorwa by’iterambere cyaje guhinduka LODA, aba mu nama y’ubutegetsi ya FAWE, White Ribbon Alliance ndetse na ASSETIF (Association d’Execution des travaux d’interet public) yabayemo hagati ya 2008-2011.
Senateri Bishagara Kagoyire Thérèse yitabye Imana ari umwe mu bagize SENA, aho yayinjiyemo mu Kwakira 2011.

Imana imuhe iruhuko ridashira