Nsabimana Callixte, Paul Rusesabagina na Herman Nsengimana bose batawe muri yombi bashinjwa ibyaha bifitanye isano

Icyakora ngo igihe dosiye ye y’urubanza yaburanishirizwa hamwe n’iya Herman Nsengimana, ubucamanza bwahita bunazana dosiye ya Paul Rusesabagina wayoboraga impuzamashyaka ya MRCD yanashinze uwo mutwe wa FLN bose bakoreraga bakaburanira hamwe.

Ni urubanza rwari rwasubukuwe kuri uyu wa 10 Nzeri 2020 iburanisha rikaba hakoreshejwe ikoranabuhanga, Nsabimana Callixte ari muri gereza ya Mageragere aho afungiye, ubushinjacyaha buri ku kicaro cyabwo ku Kimihurura, inteko iburanisha n’abaregera indishyi bari i Nyanza, mu Ntara y’Amajyepfo ku rugereko rw’urukiko rukuru ruburanisha imanza mpuzamahanga n’ibyaha byambukiranya imipaka.

Me Ndutiye Yousuf wunganira abaregera indishyi, yashyigikiye ko dosiye ya Paul Rusesabagina na yo yazanwa hamwe n’iya Nsabimana Callixte ariko Umucamanza agaragaza ko Rusesabagina atararegerwa Urukiko ngo rufate umwanzuro kuri icyo cyifuzo.

Ubwo urubanza rwasubukurwaga ngo hakomeze kumvwa ubwiregure bwa Nsabimana Callixte ku byaha aregwa yakoze ubwo yari umuvugizi wa FLN, ubushinjacyaha bwagaragaje impapuro zisaba ko urubanza rwa Nsabimana Callixte rwakomatanywa n’urwa Herman Nsabimana kuko bose baregwa ibyaha bakoze ari abavugizi ba FLN.

Ibyo ngo bikaba byatuma urubanza rwihutishwa kuko ibyaha bombi bakurikiranyweho ari bimwe. Nsabimana Callixte ubwo yahabwaga umwanya ngo agire icyo avuga kuri iyo nyandiko y’ubushinjacyaha, yagaragaje imbogamizi z’uko dosiye ya Herman Nsengimana wamusimbuye ku mwanya w’umuvugizi wa FLN yamuvangira kuko urubanza rwe rwari rumaze igihe ruburanishwa.

Ibyo kandi byanashimangiwe n’umwunganizi we mu mategeko Me Moise Nkundabarashi aho yagaragaje ko Nsabimana Callixte aburana yemera ibyaha byose ashinjwa, bikaba byasubiza inyuma urubanza igihe dosiye ye yahuzwa n’iya Herman Nsengimana.

Me Nkundabarashi yongeyeho ko ubushinjacyaha bukwiye kugaragaza ibisobanuro birambuye bushingiraho buhuza dosiye zombi maze bwisobanura ko hashingiwe ku iperereza ry’ibanze ryakozwe n’Urwego rw’Igihugu rw’Ubugenzacyaha (RIB) ko ibyaha byakozwe n’umutwe w’ingabo z’inyeshyamba za FLN abo bose babereye abavugizi, bityo ko gutandukanya imanza byatwara igihe kirekire.

Ubucamanza bwafashe umwanya wo kwiherera ngo busuzume ibyifuzo bya buri ruhande maze bwanzura ko urubanza rusubikwa rukazasubukurwa ku wa 01 Ukwakira 2020.

Nsabimana Callixte wiyise Sankara yaherukaga imbere y’urukiko ku wa 13 Nyakanga 2020, ubwo yireguraga ku byaha 17 ashinjwa, akaba yari amaze kwiregura ku byaha icyenda hasigaye ibindi umunani, byose akaba abyemera akanabisabira imbabazi.

Yabitangarije mu rubanza rwe rwasubukuwe kuri uyu wa 13 Nyakanga 2020 ku rugereko rw’Urukiko Rukuru ruburanisha imanza z’ibyaha mpuzamahanga n’ibyambukiranya imipaka ruri i Nyanza mu Ntara y’Amajyepfo, ubwo yamenyeshwaga ibyaha aregwa ngo agire icyo abisobanuraho.

Ku cyaha ashinjwa cyo kurema umutwe w’ingabo utemewe, Nsabimana yavuze ko acyemera akanagisabira imbabazi kandi yemera ko ku wa 15 Nyakanga 2018 ari bwo yinjiye mu mutwe wa FLN awubera umuvugizi ariko atagize uruhare mu kuwushinga.

Asobanura ku gushakira abarwanyi ba FLN ibikoresho n’inkunga yavuze ko abyemera akaba yarabikoze binyuze kuri radiyo aho yahamagariraga abantu gutera inkunga uwo mutwe koko, ariko we nta mbunda cyangwa amasasu yaguze ngo aboherereze.

Ku kijyanye no kwinjira muri FLN kandi azi ko ari umutwe w’iterabwoba, yavuze ko atari ko bawufataga, naho ku cyaha cyo kwinjira mu mutwe witerabwobo abizi neza kandi abishaka yabwiye urukiko ko umutwe yinjiyemo icyo gihe utari ugamije iterabwoba no guhirika ubutegetsi bw’u Rwanda.

Naho ku bitero byagabwe na FLN muri Nyaruguru na Nyamagabe mu Ntara y’Amajyepfo, yemera uruhare rwe akabisabira imbabazi kuko byagabwe ashinzwe ubukangurambaga no gusaba Abanyarwanda gushyigikira ibyo bikorwa.

Ku cyaha cyo gutanga amabwiriza ku gikorwa cy’iterabwoba yavuze ko ntaho yahera agihakana kuko yari umwe mu bayobozi bakuru ba MRCD, ariko ko atatangaga amabwiriza ya gisirikare kuko we yari ashinzwe ubukangurambaga.

Nsabimana Callixte yemeye anasabira imbabazi uruhare mu bikorwa by’iterabwoba ariko akavuga ko ubushinjacyaha hari ukundi bubifata kuko ngo yinjiye muri uwo mutwe tariki ya 15 Nyakanga 2018.

Nsabimana Callixte yemera kandi icyaha cyo gukora ibikorwa by’iterabwoba, kugambana no gushishikariza gukora iterabwoba, akemera ko yagiye akorana n’abantu batandukanye ndetse na Leta z’amahanga zirimo n’iya Uganda, bagamije guhirika ubutegetsi bw’u Rwanda.

Yanemeye kandi icyaha cyo kuba icyitso cy’abateye bakica no gufata abantu bugwate, kuko abarwanyi ba FLN yavugiraga bafashe bugwate abaturage mu bitero bagabye i Nyaruguru, ariko avuga ko atigeze abyigamba nk’uko Ubushinjacyaha bubivuga.

Yahakanye iby’uko yari icyigomeke no muri Kaminuza yiga

Nsabimana Callixte asobanura ku bijyanye n’amateka ye yahakanye ko yitwaraga nabi muri Kaminuza y’u Rwanda ubwo yari ari kwiga, ahubwo ko Ubushinjacyaha bwagiye bwibeshya ku mateka ye bugaragaza ko akiri umunyeshuri muri Kaminuza Nkuru y’u Rwanda n’ubundi yari icyigomeke bikaza no kumuviramo kwirukanwa.

Yasobanuye ko yigeze kwirukanwa muri Kaminuza Nkuru y’u Rwanda (UNR) koko, ariko akaza kurenganurwa n’inzego zibishinzwe ndetse agahabwa ibizamini n’amanota, byanatumye yitabira umunsi wa nyuma wo guhabwa impamyabumenyi (graduation).

Naho kuvuga ko yatangiye kurwanya Leta akiga muri UNR, ngo ibyo si byo kuko ibyabaye muri Kaminuza ari ibibazo yagiranye n’abantu ku giti cyabo, kandi inzego za Leta zikaba ari zo zanamurenganuye.

Avuga ku mateka ye yo kwinjira mu mitwe irwanya Leya yasobanuye ko muri 2013 ari muri Tanzania yumvikanye n’umuntu avuga ko yabaga muri Afurika y’Epfo niba yaza gukomerezayo amasomo.

Icyo gihe ngo Nsabimana yagiye muri Afurika y’Epfo koko ngo yakirwa n’ababa mu mutwe wa RNC ya Kayumba Nyamwasa, mu biganiro bagiranye byibanda cyane kuza bakifatanya ari na ko byaje kugenda.

Yavuze kandi ko ubwo yagiye kubonana na Kayumba Nyamwasa mu biganiro byabahuje bikaba byaribanze ku migambi yo guhirika ubutegetsi bw’u Rwanda ari ho ngo yamusabye kujya kuri radiyo itahuka bagafatanya icengezamatwara.

Ibyo ngo byatumye aza no kubonana na Patrick Karegeya na we bagirana ibiganiro bigamije guhirika ubutegetsi mu Rwanda, kandi RNC yamwerekaga ingingo nyinshi zigamije gusebya u Rwanda ari na zo zatumye afata umwanzuro wo gukorana na yo.

Abajijwe impamvu yemeye gushukwa kandi ari umuntu uzi ubwenge dore ko yanarangije Kaminuza, yasubije ko ngo “ihene mbi ntawe uyizirikaho iye” bivuze ko na we yakoze amakosa yifatanya n’abagizi ba nabi.

Hari ibyaha avuga ko bimushyira muri ba ruharwa

Abajwijwe icyo asobanura ku cyaha cyo gukwiza amakuru atari yo n’icengezamatwara rigamije kwangisha Leta y’u Rwanda mu mahanga, yavuze ko icyo acyemera atazuyaje kandi kimushyira mu rwego rwa ba ruharwa kuko ari ibyaha yakoze imyaka igera kuri itandatu.

Iki cyaha yagisabiye imbabazi Abanyarwanda, Perezida wa Repubulika n’urukiko maze iburanisha ryongera gusubikwa urukiko rutegeka ko iburanisha rizakomeza ku wa 10 Nzeri 2020, aho Nsabimana Callixte azakomeza kwiregura ku byaha akurikiranyweho birimo no guhakana no gupfobya Jenoside yakorewe Abatutsi.

Nsabimana Callixte aburana yemera ibyaha aregwa akanabisabira imbabazi

Ibyaha ubushinjacyaha bukurikiranye kuri Nsabimana wari umuvugizi w’umutwe w’abarwanyi ba FLN bikaba birimo ibyo gushinga umutwe utemewe witwaje intwaro hagamijwe guhirika ubutegetsi bw’u Rwanda.

Nsabimana kandi mu byaha 17 akurikiranyweho harimo icyo kugaba ibitero mu Ntara y’Amajyepfo mu Turere twa Nyamagabe na Nyaruguru bigahitana abaturage bikanangiza ibyabo.

Ubwo yageraga mu rubanza rwabereye ku ikoranabuhanga abacamanza bari i Nyanza naho Nsabimana Calixte ari muri gereza ya Mageragere aho afungiye, yabwiye urukiko ko hari icyo yifuza guheraho, maze avuga ko umutwe wa FLN yari abereye umuvugizi watewe inkunga y’amadolari ya Amerika ibihumbi 150 na kimwe mu bihugu byo ku mugabane wa Afurika.

N’ubwo Nsabimana Callixte yari yatangiye avuga ko hari umuperezida n’igihugu bateye inkunga FLN adashaka kuvuga, urukiko rwategetse ko abitangaza kuko hari abakurikiye urubanza bagomba kubimenya barimo n’abaregera indishyi.

Nsabimana Callixte yatunze agatoki Perezida w’Igihugu cya zambiya, Edgar Lungu, ko yaba yaragiranye ibiganiro na bamwe mu bayobozi b’imitwe bibumbiye mu cyo bise P5 ngo icyo gihugu kibafashe guhirika ubutegetsi bw’u Rwanda.

Yavuze ko mu mpera z’umwaka wa 2017, Perezida wa Zambia Edgar Lungu yemereye Paul Rusesabagina, uyoboya MRCD ko azamutera inkunga yo guhirika ubutegetsi bw’u Rwanda, ku ikubitiro amuha ibihumbi 150 by’amadolari ya Amerika.

Yasobanuye kandi ko mu ntangiriro z’umwaka wa 2019, uwitwa Nsengiyumva Appolinaire uri mu bayobozi ba PDR Ihumure, rimwe mu mashyaka agize MRCD, yahuye na Perezida Edgar Lungu bakaganira ku nkunga yo gutera FLN, ibyo bikaba byaratije umurindi ibitero FLN yatangiye kugaba ku Rwanda.

Yisobanura ku cyaha cyo kurema umutwe w’ingabo utemewe, Nsabimana yavuze ko abyemera ariko atagize uruhare mu gushinga uwo mutwe wa FLN bityo akaba abisabira imbabazi.

Uru rubanza rwanitabiriwe n’abaregera indishyi batandatu barimo Nsengiyumva Vincent wari Umunyamabanga Nshingwabikorwa w’Umurenge wa Nyabimata mu Karere ka Nyaruguru, uyu akaba yaratwikiwe imodoka mu bitero byo mu ijoro ryo kuwa 19 rishyira 20 Kamena 2018 akanakomeretswa.

Biteganyijwe ko muri uru rubanza abaregera indishyi bose bahabwa umwanya bakagaragaza ibyo baregera ndetse n’imyirondoro yabo. Iburanisha rizasubukurwa tariki ya 10 Nzeri 2020.

Umucamanza yamenyesheje abitabiriye iburanisha ko kubera ikibazo cy’ikoranabuhanga byatumye abaregera indishyi bo mu turere twa Rusizi na Nyamasheke batitabira urubanza, kandi kubera ko hari ibibazo bya Coronavirus byatumye ingendo mu Karere ka Rusizi zitemewe, abaregera indishyi babura uko bitabira.

Iburanisha ry’uyu munsi ryabaye hifashishijwe ikoranabuhanga ku cyicaro cy’urukiko ndetse no muri gereza ya Mageragere aho Nsabimana afungiye, ku buryo Nsabimana Callixte we yari yanamenyeshejwe iby’isubukurwa ry’urubanza rwe.

Abaregera indishyi bo mu Karere ka Rusizi bavuga ko ibyaha Nsabimana akurikiranyweho byabagizeho ingaruka, kubera ibitero bitandukanye by’inyeshyamba za FLN Nsabimana yari abereye umuvugizi.

Urugero ni nka Sosiyete zitwara abantu nka Omega na Alpha ziregera indishyi z’akababaro kubera imodoka zazo zatwitswe mu bitero byo ku itariki ya 15 Ukuboza 2018, mu ishyamba rya Nyungwe. Icyo gihe imodoka ebyiri za Coaster za Kompanyi ya Omega zaratwitswe, mu gihe Kompanyi ya Alpha iregera indishyi y’imodoka imwe ya Coaster na yo yatwikiwe muri ibyo bitero.

Hari kandi Umunyamabanga Nshingwabikorwa w’Umurenge wa Nyabimata mu Karere ka Nyaruguru, Nsengiyumva Vincent, watwikiwe imodoka akanakomeretswa mu ijoro ryo ku wa 19 rishyira ku wa 20 Kamena 2018 mu bitero byahagabwe n’inyeshyamba za FLN.
Nsabimana Callixte aregwa ibyaha 15 byose kandi arabyemera akanabisabira imbabazi, muri byo harimo, kurema umutwe w’ingabo utemewe, icyaha cy’iterabwoba, gukora no kugira uruhare mu bikorwa by’iterabwoba, gutanga amabwiriza mu gikorwa cy’iterabwoba.

Aregwa kandi kuba mu mutwe w’iterabwoba, icyaha cyo kugambana no gushishikariza abandi gukora iterabwoba, ubwicanyi n’ubwinjiracyaha mu bwicanyi, gufata bugwate, gukwiza amakuru atari yo cyangwa icengezamatwara rigamije kwangisha Leta y’u Rwanda mu bihugu by’amahanga.

Nsabimana kandi aregwa guhakana Jenoside, ubujura bwitwaje intwaro, gutwika, kugirana umubano n’ibihugu by’amahanga hagamijwe gushoza intambara, gukora cyangwa gukoresha impapuro mpimbano, gukubita no gukomeretsa ku bushake no gutanga, kwakira no gushishikariza kwakira ibikomoka ku iterabwoba.

Nsabimana Callixte yafatiwe mu birwa bya Comores mu mwaka ushize wa 2019, urubanza rwe rukaba rwimuriwe tariki ya 08 Nyakanga 2020.

Urubanza rwatangiye urukiko ruha umwanya ubushinjacyaha busubukura ibirego bwari bwagejeje ku rukiko mu rubanza ruheruka.

Muri ibyo byaha harimo kurema umutwe w’ingabo utemewe, icyaha cy’iterabwoba ku nyungu za politiki, gukora no kugira uruhare mu bikorwa by’iterabwoba, gutanga amabwiriza mu gikorwa cy’iterabwoba, kuba mu mutwe w’iterabwoba, n’icyaha cyo kugambana no gushishikariza abandi gukora iterabwoba, ubwicanyi n’ubwinjiracyaha bw’ubwicanyi.

Aregwa kandi icyaha cyo gufata bugwate, gukwiza amakuru atari yo cyangwa icengezamatwara rigamije kwangisha Leta y’u Rwanda mu bihugu by’amahanga, guhakana Jenoside, kwiba yitwaje intwaro, gutwika, kugirana umubano na Leta z’amahanga hagamijwe gushoza intambara.

Harimo kandi icyaha cyo gukora cyangwa gukoresha impapuro mpimbano, gukubita no gukomeretsa no gutanga, kwakira no gushishikariza kwakira ibikomoka ku iterabwoba.

Ubwo yatangiraga kwiregura, Nsabimana yashimiye Imana yamurinze akaba agihumeka yavuze ko anashimira Leta y’u Rwanda yamufashe neza ikamwitaho kuva yafatwa kugeza ubu.

Nsabimana Callixte yemera ibyaha byose 17 akanabisabira imbabazi

Nsabimana Callixte kuva yafatwa yakomeje kwemerera inzego z’ubutabera ibyaha byose ashinjwa akabisabira imbabazi Abanyarwanda ndetse na Perezida wa Repubulika Paul Kagame. Icyakora yavuze ko mu mitegurire ya dosiye hari aho ubushinjacyaha bwaba bwaribeshye ku bijyanye n’inyito.

Avuga ku mateka ya MRCD na FLN, ubushinjacyaha bwavuze ko MRCD ari yo yabyaye FLN. Nsabimana yasobanuye ko FLN ari yo yabayeho mbere ikomotse ku gice cy’abarwanyi ba FDLR imaze gucikamo ibice.

Yavuze ko ku wa 6 Kamena 2016 hashinzwe umutwe w’ishyaka wa CNRD uyobowe na Wilson Irategeka, hahita hashingwa n’umutwe w’abarwanyi wa FLN.

Icyo gihe ngo abarwanyi benshi bazamuwe mu ntera bashingwa ibikorwa by’ingabo muri FLN. Nsabimana ashingwa ibikorwa by’itumanaho muri RNC ya Kayumba Nyamwasa.

Ku itariki ya 4 Nyakanga 2017 ngo habayeho gusinya amasezerano hagati ya CNRD ya Irategeka na PDR Ihumure ya Paul Rusesabagina maze bibyara MRCD.

Nsabimana yavuze ko ku wa 28 Ukwakira 2017 we n’abandi bantu barindwi biyomoye kuri RNC muri Afurika y’Epfo bashinga ishyaka ryitwa Rwandese Revolutionary Movement, RRM, bafatanyije na Noble Marara.

Yavuze ko nyuma yo gushaka abayoboke hirya no hino ku Isi bashinze amashami muri Zambia, Malawi, Amerika, Canada, u Budage, u Bubiligi, na Afurika y’Epfo, aho ku wa 18 Ugushyingo 2017, aribwo binjiye mu ihuriro MRCD, agirwa Visi Perezida wa kabiri.

Yavuze ko ku wa 15 Nyakanga 2018 aribwo yinjiye muri FLN ari na bwo yasohoye itangazo rya mbere nk’umuvugizi wa FLN.

Asobanura ku bitero bya Nyungwe, Nsabimana yavuze ko Barnabé Sinayobye wari umugaba w’ingabo muri FLN ushinzwe ibikorwa bya gisirikare, ari we watangije icyo gikorwa maze Paul Rusesabagina yemera inkunga ya Miliyoni imwe y’amadolari ya Amerika.

Yasobanuye ko inyeshyamba za mbere za FLN zageze mu Rwanda muri Mata 2018 ataraba umuvugizi wa FLN kandi ko ibitero bya mbere bitatu byabaye i Nyaruguru byateguwe atabizi abimenyeshwa nyuma mu nama yabaye ku wa 15 Nyakanga 2018 iyobowe na Rusesabagina.

Nsabimana uvuga ko yari mu birwa bya Comores agakurikira inama kuri telefone zahuje imirongo, ngo nibwo yumvise Gen Barnabé Sinayobye ababwira ko ari bo batangiye kugaba ibitero ku Rwanda kandi biyemeje kudasubira inyuma.

Icyo gihe ngo Nsabimana ni nabwo yatorewe kuba umuvugizi wa FLN abyemera atazuyaje nk’umwe mu bari biyemeje kwifatanya n’abashoza intambara ku Rwanda, maze anatangaza ku maradiyo mpuzamahanga ko ibyo bitero ari ibya FLN.

Yanasobanuye uko bagabye ibitero ku modoka muri Nyungwe

Nsabimana yemera ko igitero ku modoka muri Nyungwe cyabaye ku wa 15 Ukuboza 2018 cyabaye abigizemo uruhare ngo bigaragare ko abarwanyi ba FLN hari ibikorwa bari gukora ariko ngo atari azi ko hazabaho kwica abaturage no kwangiza ibyabo.

Icyakora nyuma yo kumenya ko batwitse imodoka bakica n’abantu ngo nibwo bacuze umugambi wo gusohora itangazo ryamagana icyo gitero bavuga ko cyakozwe na Leta y’u Rwanda.

Kwisobanura kwa Nsabimana icyaha ku kindi bizakomeza ku itariki ya 31 Werurwe 2020 saa mbili n’igice za mu gitondo.

Kuri iyo tariki ni nabwo abandi bashaka kuregera indishyi bazahabwa umwanya mu gihe bazaba barujuje ibisabwa n’urukiko birimo kurwandikira no gutanga igarama.

Uyu munsi hakaba hagaragaye abantu batandatu baregera indishyi ariko batanu biza kugaragara ko batigeze bandikira urukiko bategekwa kubanza kuzuza ibisabwa.

Urubanza ruregwamo Sankara rwasubitswe (Ifoto: RBA)

Mu masaha ya saa tatu za mugitondo ubwo Nsabimana Callixte yagezwaga mu rukiko mu myenda y’abafunze y’ibara rya Rosa, ubushinjacyaha bwagaragarije urukiko ko hari ibirego byo mu rukiko rwa Gisirikare biregwamo umusirikare wahoze mu ngabo za RDF bishobora kuba bifitanye isano n’ibyaha Nsabimana akurikiranyweho.

Ibyo byatumye ubushinjacyaha busaba urukiko ko urubanza rwasubikwa bukabanza gukurikirana niba ibyo byaha by’uwari Umusirikare muri RDF witwa Private Muhire wagiye mu mutwe wa FLN Nsabimana yabereye umuvugizi hari isano bifitanye bityo akazabiburanira hamwe.

Ahawe umwanya ngo agire icyo abivugaho, Nsabimana Callixte yabwiye urukiko rukuru urugereko rwa Nyanza ko uwo Muhire atamuzi bityo ko ntacyabuza urubanza gukomeza mu mizi dore ko n’ubundi aburana yemera ibyaha.

Ni imvugo yari ahuriyeho n’umwunganizi we mu mategeko Me.Nkundabarashi wanamwunganiye ubwo haburanwaga iby’ifunga n’ifungurwa ry’agateganyo, na we wavuze ko umukiriya we atazi uwo Private Muhire uvugwa.

Ubushinjacyaha bwasabye urukiko ko kuba uregwa atemera ko azi uwo Private Muhire urubanza rwasubikwa maze hakabanza gusuzumwa iyo dosiye ye hanyuma urubanza rukabona kuburanwa mu mizi .
Urukiko rumaze kumva impande zombi rwanzuye ko urubanza rwa Nsabimana Callixte rusubikwa rukazasubukurwa ku wa 17 Mutarama 2020.

Nsabimana Callixte akurikiranywe n’ubushinjacyaha ku byaha 16 birimo n’ibitero umutwe FLN yari abereye umuvugizi wakunze kwigamba wakoreye mu Ntara y’Amajyepfo y’u Rwanda bigahitana abantu bikangiza n’ibintu.

Hari kandi kuba Nsabimana yarakoranye n’ibihugu bituranyi n’u Rwanda mu mugambi wo guhungabanya umutekno w’u Rwanda, kurema umutwe wa gisirikare utemewe, no gushaka kugirira nabi umukuru w’igihugu n’ubutegetsi buriho.

Ni ibyaha byose Nsabimana yemera kandi yasabiye imbabazi Perezida wa Repubulika n’Abanyarwanda bose muri rusange.

Nsabimana Callixte ubwo yerekwaga itangazamakuru ku wa gatanu tariki 17 Gicurasi 2019

Umucamanza yabanje gusubiramo ibyaha byose Nsabimana aregwa uko ari 16, byiganjemo iby’iterabwoba. Umucamanza yavuze ko ibyaha byose Nsabimana yabyemeye.

Umucamanza yasubiyemo mu nshamake, uko ubushinjacyaha bwaketseho kandi bugashinja Nsabimana ibyo byaha, ndetse n’uburyo Nsabimana n’abo bari bafatanyije bashinze amashyaka akaza kwihuriza hamwe, kugira ngo arwanye Leta y’u Rwanda.

Umucamanza kandi yanagarutse ku byaha ubushinjacyaha bwareze Nsabimana by’ibitero umutwe wa FLN yari abereye umuvugizi wagabye mu turere twa Nyaruguru na Nyamagabe.

Umucamanza yavuze ko urukiko rwasanze impamvu zikomeye ubushinjacyaha bwagaragaje zatuma Nsabimana akekwaho ibyaha, rusanga zifite ishingiro.

Umucamanza ati "Sankara ubwe na we arabyemera. Kuba abyemera, hakaba hari abantu bamushinja, hari amavidewo agaragara uburyo yigambye, rurasanga ari impamvu zikomeye zituma akurikiranwaho ibyaha".

Kuba Nsabimana yakurikiranwa afunze by’agateganyo, umucamanza yavuze ko "urukiko rurasanga hari impamvu zikomeye kandi zidashidikanywaho zituma uregwa akekwaho ibyaha, hakaba hari impungenge ko aramutse arekuwe ashobora gutoroka, akaba yasubira mu ishyamba, kandi hakaba hari impungenge ko aramutse arekuwe yakomeza ubufatanye n’imitwe bakoranaga".

Umucamanza yavuze ko n’ubwo Nsabimana yemera ibyaha akanabisabira imbabazi, mu gutaha kwe atatashye ku bushake kuko yafashwe, hakaba hari impungenge ko aramutse arekuwe ashobora gusubirayo.

Urukiko rukaba rutegetse ko Nsabimana afungwa by’agateganyo mu gihe cy’ukwezi, iperereza rigakomeza.

Mu kwezi kwa gatandatu 2018, i Nyaruguru abarwanyi ba FLN bigambye gutwika imodoka y’uwari Umunyamabanga Nshingwabikorwa w’Umurenge wa Nyabimata

Aba bavuga ko kuba Nsabimana yaratangiye kuburanishwa ari byiza kugira ngo aryozwe ibyaha yakoze, ariko bagasaba ko bakwiye guhagararirwa mu rubanza kugira ngo hazabeho guhabwa indishyi z’akababaro.

Igitero cya FLN mu Karere ka Nyaruguru cyahitanye abantu batatu, gikomeretsa babiri. Cyatwitse inzu imwe, imodoka, Moto, ndetse kinasahura amatungo, imyaka n’imyambaro by’abaturage.

Igitero cyo mu ishyamba rya Nyungwe mu Murenge wa Kitabi, Akarere ka Nyamagabe, cyo cyahitanye abantu batandatu, gikomeretsa 19, gitwikirwamo imodoka ndetse kinasahura bimwe mu byo abagenzi bari bafite.

Mukashyaka Josephine utuye mu Murenge wa Nyabimata mu Karere ka Nyaruguru, yaburiye umugabo we Munyaneza Fidèle mu gitero cya FLN cyo ku wa 19 Kamena 2019 mu Murenge wa Nyabimata. Uwo mugabo yari asanzwe ari umuyobozi w’ishuri, akaba kandi yari Perezida w’Inama Njyanama y’Umurenge wa Nyabimata.

Mukashyaka avuga ko bashimishijwe no kuba Nsabimana Callixte wari umuvugizi wa FLN wiyemereye ko yagize uruhare muri icyo gitero yarafashwe, akaba yarashyikirijwe ubutabera.

Gusa Mukashyaka avuga ko umugabo we wishwe ari we wamufashaga kurera abana, akavuga ko byari bikwiye ko ababuze ababo muri ibyo bitero bahabwa umwanya wo kuregera indishyi mu rubanza rwa Nsabimana Callixte wiyita Sankara.

Agira ati “Nk’ubu umugabo ni we wamfashaga kurera abana, baracyari bato cyane, urumva nyine ni ibibazo. Sinzi niba wenda ubutabera buzamutegeka gutanga indishyi. Nta kintu bigeze batubwira niba wenda hari uruhare twagira muri urwo rubanza, nta kintu tubiziho”.

Mukashyaka kandi avuga ko nk’ababuriye ababo muri ibyo bitero, igihe urubanza rwazatangira kuburanishwa mu mizi, Nsabimana wabigizemo uruhare yazajyanwa kuburanira aho byakorewe.

Ati “Bibaye byiza rwose, yazaza kuburanira ahakorewe icyaha, hanyuma nyine n’indishyi z’akababaro akazitanga”.

Umugabo yasigiye Mukashyaka abana babiri, uw’imyaka 11 n’uw’imyaka irindwi.

Ingabire Marie Chantal utuye mu Murenge wa Kibeho mu Karere ka Nyaruguru, na we yaburiye umugabo we, Maniraho Anatole, mu gitero FLN yagabye mu Murenge wa Nyabimata mu Karere ka Nyaruguru.

Maniraho yari asanzwe ari umuyobozi wungirije ushinzwe amasomo mu Rwunge rw’Amashuri rwa Nyabimata.

Uyu mugabo yasigiye Mukashyaka abana babiri, barimo umukuru w’umwaka n’amezi atandatu, ndetse n’uwo yasize ataravuka, kuko ubu aribwo yujuje amezi atandatu.

Ingabire na we avuga ko ibyo gufatwa no kugezwa mu rukiko kwa Nsabimana Callixte wiyita Sankara abyumva mu makuru kimwe n’abandi.

Avuga ko nta ruhare na ruto yigeze ahabwa mu rubanza rwa Nsabimana ngo abashe kuregera indishyi, agasaba ko habaho kwibuka ko abahitanywe n’ibitero bya FLN bari bafatiye runini imiryango yabo.

Ati “Ubuzima ntibworoshye cyane cyane ku bana b’impinja ndera jyenyine. Bararwara, ni jye biba bireba, mbese byose bindi ku mutwe. Niba hari ukuntu yatanga indishyi ku bantu yagiriye nabi yategekwa kubikora”.

Umuvugizi w’Ubushinjacyaha Bukuru bw’u Rwanda, Faustin Nkusi, yabwiye Kigali Today ko urubanza rwa Nsabimana Callixte rukiri mu ntangiriro, aho aburana ifunga n’ifungura ry’agateganyo.

Nkusi yavuze ko igihe cyo kuburanisha uru rubanza mu mizi nikigera, abagizweho ingaruka n’ibitero by’umutwe wa FLN Nsabimana yari abereye umuvugizi na bo bazaba bafite uburenganzira bwo kuregera indishyi.

Nkusi kandi avuga ko icyo gihe nikigera, abafite aho bahuriye n’urwo rubanza bose bazabimenyeshwa, hanyuma abashaka kuregera indishyi bakabikora.

Ati “Mu gihe dosiye yaregerwa mu rukiko, iregerwa kugira ngo aburanishwe mu mizi y’urubanza, na bo bashobora kugaragara mu rubanza bakaregera indishyi nta kibazo. Bazamenyeshwa, kuko iyo victims (abakozweho) bahari bamenyeshwa ko dosiye yamaze kuregerwa. Bafite ubwo burenganzira rero bwo kuza bakaregera indishyi, ni uburenganzira bwabo”.

Nsabimana Callixte wiyise Sankara akurikiranyweho ibyaha 16 byiganjemo iby’iterabwoba, ubwicabyi, kurema umutwe w’ingabo utemewe, guhakana Jenoside, gutwika, gusahura, gukubita no gukomeretsa, n’ibindi.

Ubwo yagezwaga mu rukiko kuwa kane tariki 23 Gicurasi 2019, aburana ku ifunga n’ifungura ry’agateganyo, Nsabimana Callixte yemereye urukiko ibyaha byose aregwa, ndetse aboneraho kubisabira imbabazi abo byagizeho ingaruka, Abanyarwanda bose ndetse n’umukuru w’igihugu.

Umwanzuro ku gufungwa by’agateganyo iminsi 30 cyangwa kuburana adafunze, uzasomwa ku wa kabiri tariki ya 28 Gicurasi 2019, saa cyenda z’igicamunsi.

Nsabimana Callixte n’umwunganizi we bisobanuye bemera ibyo Sankara aregwa banabisabira imbabazi

Nsabimana yabyemereye mu rukiko, ndetse ngo no mu bugenzacyaha, abazwa yarabyemeye, ndetse ngo yanabisabiye imbabazi.

Sankara yagize ati “Murakoze nyakubahwa mucamanza. Ngira ngo nta byinshi mfite byo kwiregura, kuko nk’uko natangiye mbyemera, ibyaha byose ndegwa hano, ibyo nakoze ku giti cyanjye, nk’ibyo bijyanye na pasiporo nagombaga gukoresha mu kazi kanjye ka camouflage (mu buryo bw’ibanga) nakoraga. Ibindi byaha ni ibyakozwe n’inyeshyamba za FLN nari mbereye umuvugizi, nkaba kandi nari n’umwe mu bayobozi bakuru b’impuzamashyaka MRCD, ari rwo rwego rukuru rwayoboraga FLN. Ibyaha ndegwa hano ni 16, ntabwo nzi niba navuga kuri buri kimwe, cg navuga ku by’ingenzi.”

“Nagira ngo mvuge ku byabaye ku itariki ya 15 Ukuboza , ku gitero cyagabwe ku mamodoka muri Nyungwe. Mu by’ukuri impuzamashyaka MRCD twari twarahaye amabwiriza abayobozi bakuru ba FLN ko mu bikorwa bya gisirikare bagomba gukora, intego twari twarabahaye, twabasabaga guca ibiraro biri mu muhanda, gutega igico imodoka za gisirikare zinyura muri uriya muhanda, ko babishoboye bareba n’ibiro by’imirenge cg uturere biri hafi aho. Icyo ni cyo twari twabasabye, hanyuma tukabasaba ko bareba ahari ibigo byoroheje bya gisirikare cyangwa ibya polisi.”

Ati “Mbere y’iminsi nk’itanu, ko kiriya gitero kiba, njye navuganye na Maj Gen Sinayobye Barnabé, yari ampamagaye ambwira ko ashaka gukora akantu mu mpera z’uriya mwaka. Numvaga yuko agiye gukora kimwe mu byo twari twaramugiriyeho inama, cyane ko jye nk’umuvugizi namusabaga ko yakora igikorwa ushobora kujya ku maradio ukavuga ko wagikoze. Uteye ikigo cya gisirikare, ugatwara intwaro cyangwa ukica abasirikare, Icyo gihe byari kunyorohera kujya ku maradiyo ukabivuga, ariko ntiwajya ku maradiyo ngo uvuge ko wishe abasivile cyangwa warashe mu isoko.”

Mu kwiregura kwe, Nsabimana yavuze ko ibitero byagabwe na FLN atari byo bari baravuganyeho n’ihuriro MRCD ryashinze FLN.

Ngo kugeza afatwa tariki 12 Mata 2019, amakuru yari afite ku bitero bya Kitabi i Nyamagabe, yari uko FLN yahagaritse imodoka igakuramo abagenzi, bakabigisha politiki ya MRCD barangiza ngo bakarasa abasirikare babiri bashatse kubarwanya.

Ngo aho agereye mu bushinjacyaha bukamwereka ibihamya by’uko mu bantu batandatu bahitanywe n’icyo gitero, batanu ari abari n’abategarugori, yasanze yari afite amakuru atari yo.

Aho abimenyeye kandi ngo yarakoraga amanywa n’ijoro ngo abashakire ubushobozi bajye kurwanya igisirikare, ariko barangiza bakica abasivile, ati "Nahise mfata umwanzuro wo kutagira ikintu na kimwe mpishira muri FLN kuko ’ils ont trahi ma parole’ (bakoze ibyo ntababwiye).

Nsabimana yakomeje ati “Numvise nta kindi navuga imbere y’ubutabera, uretse kwemera uruhare nagize muri ibyo bitero, nubwo atari jye wazitumye. Akaba ari yo mpamvu nsaba imbabazi abantu bose bagizweho ingaruka na biriya bitero, ngasaba imbabazi Abanyarwanda bose, ngasaba n’imbabazi Umukuru w’Igihugu".

Nsabimana yavuze kandi ko imyitwarire ya FLN, kuri we ntaho itandukaniye n’ibyakozwe n’umutwe wa Fodey Sanko, ari na yo mpamvu yitandukanyije na FLN, Ati "Ntaho ngihuriye na yo, ejo cyangwa ejobundi bafazakora n’ibindi bikorwa bikaba byanyitirirwa."

Gukorana na Leta z’amahanga na byo yabyemeye anabisabira imbabazi

Nsabimana Callixte wiyita Sankara yemeye ko yagiranye umubano na bamwe mu basirikare ba Uganda n’u Burundi.
N’igihe bamufataga ngo yari amaze kuvugana na Major Bertin w’i Burundi. Gusa ngo u Burundi nta gikoresho cya gisirikare bwigeze bubaha, ndetse ngo nta n’ubwo Perezida w’u Burundi yari abizi. Kuri Uganda ho, na ho yemera ko yagiranye umubano na bamwe mu basirikare ba Uganda. Icyo cyaha na cyo aracyemera akanagisabira imbabazi.
Ibyo kurema umutwe w’ingabo zitemewe byo yasobanuye ko umutwe wa FLN wavutse muri 2016, ari umutwe wa gisirikare wiyomoye kuri FOCA ya FDLR.
Umwunganizi wa Nsabimana(Me Nkundabarashi Moise) ahawe ijambo yavuze ku mpungenge z’ubushinjacyaha ku gufungura Sankara. Me Nkundabarashi we ngo akurikije ubufatanye Nsabimana yagaragarije ubugenzacyaha, ndetse n’ibyo yagaragarije urukiko, izo mpungenge ngo zikwiye kuvanwaho.

Ubwunganizi bwasabye urukiko ko rwashingira ku mategeko yerekeye imiburanishirize y’imanza z’inshinjabyaha mu ngingo ya 89, iteganya ko ari ihame ko uregwa ashobobora kuburana adafunze. Ubwunganizi bwasabiye uregwa gufungurwa, ariko urukiko rukagira ibyo rumutegeka yajya yubahiriza.

Sankara ati "Icyo nongeraho ni ugusaba imbabazi, kandi nk’umuntu wize amategeko nzi ingaruka zo kuruhanya n’amategeko. Icyo mvuga ni uko ntiteguye kuburana urwa ndanze ku byaha nshinjwa kuko byabaye ku mugaragaro, yemwe n’inyoni zo mu kirere zabinshinja".

Urukiko rwanzuye ko icyemezo cy’urukiko kizasomwa ku wa kabiri tariki 28 Gicurasi 2019 saa cyenda.

Inkuru bijyanye:

Nsabimana Callixte (Sankara) yemeye ibyaha ashinjwa uko ari 16

Nsabimana Callixte n’umwunganizi we Me Nkundabarashi Moise

Nsabimana Callixte yagaragaye mu rukiko yambaye Ipantalo ya kaki, inkweto z’umukara n’amasogisi y’umukara, ishati y’ubururu, n’aka jacket ka Adidas karimo amabara menshi.

Urubanza rwe ruri mu manza z’inshinjabyaha, akaba yari kumwe n’umwunganizi we witwa Nkundabarashi Moise.

Abacamanza binjiye mu cyumba cy’iburanisha saa mbili n’iminota 45 za mugitondo, icyumba cy’iburanisha kikaba cyari cyakubise cyuzuye. Hari higanjemo abanyamakuru n’abakozi b’imiryango mpuzamahanga.

Yabanje gusabwa kuvuga indi myirondoro ye uretse amazina ye n’ay’ababyeyi be: ati “Amajyepfo, Nyanza, Rwabicuma, Gacu.” Umudugudu we ntabwo awibuka. Nta telefoni afite.

Umucamanza yabajije Sankara niba yemera ibyaha aregwa uko ari 16, na we avuga ko abyemera.

Ibyaha aregwa birimo kurema umutwe w’ingabo zitemewe, icyaha cy’iterabwoba ku nyungu za politiki. Ashinjwa kandi gukora no kugira uruhare mu bikorwa by’iterabwoba, gutanga amabwiriza mu gikorwa cy’iterabwoba, kuba mu mutwe w’iterabwoba, kugambana no gushishikariza abandi gukora iterabwoba, ubwicanyi n’ubwinjiracyaha bw’ubwicanyi.

Nsabimana Callixte wiyita Sankara ashinjwa gufata bugwate, gukwirakwiza amakuru atari yo, cyangwa icengezamatwara rigamije kwangisha Leta y’u Rwanda mu bihugu by’amahanga.

Ashinjwa no guhakana Jenoside, kwiba witwaje intwaro, gutwika, kugirana umubano na Leta y’amahanga hagamijwe gushoza intambara, guhabwa ku bw’uburiganya, gukora cyangwa gukoresha impapuro mpimbano, gukubita no gukomeretsa ku bushake, no gutanga , kwakira no gushishikariza kwakira ibikomoka ku iterabwoba.

Ubushinjacyaha bwavuze ko ibyo ari byo byaha Nsabimana Callixte bita Sankara akekwaho. Ngo hari ibyo yakoze ku giti cye, hakaba n’ibyo yakoze ku bufatanye n’abandi barimo Paul Rusesabagina, Ndagijimana Laurent, Habimana Hamada na Sinayobye Barnabé. Ibyo byaha ngo yabikoze hagati ya Werurwe 2013 na Werurwe 2019, akaba kandi yarabikoze ari ahantu hatandukanye, harimo hanze y’u Rwanda nko muri Afurika y’Epfo, naho ibindi byaha byakorewe ahantu hatandukanye mu Rwanda nko mu Ntara y’Amajyepfo mu turere twa Nyamagabe na Nyaruguru.

Ubushinjacyaha buvuga ko Nsabimana yakoze ibikorwa byinshi bikubiyemo ibyaha akurikiranyweho, harimo gushinga no kuyobora ishyaka ryitwa Rwandese Revolutionary Movement yashinze ku wa 28 Ukwakira 2017 ari muri Afurika y’Epfo afatanyije n’abandi bantu barindwi ari bo Noble Marara, Butoyi, Nahimana Straton, Kazigaba André, Abega Abdulay Rwabagina, Twihangane Pacifique Sherif na Nkurunziza Camille.

Nyuma yo kurishinga, ryakomeje gushaka abayoboke, ku buryo ubu bageze ku bayoboke 200, imiterere yaryo yaravuguruwe, rigaba amashami ahantu hatandukanye ku isi, rigira n’abarihagarariye ahantu hatandukanye harimo muri Afurika, Amerika, Canada, mu Budage, u Bubiligi, Zambia, Malawi na Afurika y’Epfo.

Nyuma yo gushinga iryo shyaka ryihuje n’indi mitwe irwanya Leta y’u Rda ari yo Ishyaka Nyarwanda Riharanira Demukarasi (PDR Ihumure) riyoborwa na Paul Rusesabagina, hamwe n’iryitwa Inama y’igihugu Iharanira Impinduka muri Demukarasi (CNlD Ubwiyunge).

Bihuje muri 2018 aribwo bashinze ihuriro ryiswe MRCD , bagabana inshingano, Paul Rusesabagina aba Perezida, Ndagijimana Laurent aba Visi Perezida wa mbere, Nsabimana Callixte aba Visi Perezida wa kabiri.

Nyuma bashinze umutwe w’ingabo witwa FLN banagabana inshingano. Habimana Hamada yahawe inshingano zo kuyobora uwo mutwe, yungirizwa na Sinayobye Barnabé, naho Nsabimana Callixte aba umuvugizi wa FLN.

Mu gushinga uwo mutwe, wahawe inshingano zo kugaba ibitero by’iterabwoba ku butaka bw’u Rwanda, unahabwa ibikoresho nk’imbunda n’amasasu.

Mu kurema uwo mutwe, abawushinze bahereye ku ngabo zavuye muri FDLR ziyobowe na Ndagijimana Laurent, ariko wanashatse izindi ngabo binyuze mu gushakisha abandi barwanyi hirya no hino bawinjiramo.

Ubushinjacyaha buvuga ko harimo abantu 30 Nsabimana Callixte ubwe yavanye muri Uganda abohereza muri Repubulika Iharanira Demokarasi ya Congo (RDC) guhabwa imyitozo ya gisirikare, akaba yarabishoboye yifashishije abandi bantu yakoreshaga babaga muri Uganda.

Abaterankunga b’uwo mutwe barimo Leta y’u Burundi yabahaye inzira, Leta ya Uganda yatanze ibikoresho n’abantu bajyanwa mu myitozo ya FLN yakorerwaga muri Kivu y’Amajyepfo muri RDC.

Inkunga yo gushyigikira ihuriro rya MRCD ngo zatangwaga n’impunzi z’Abanyarwanda ziba mu bihugu bitandukanye birimo Mozambique, Afurika y’Epfo, Canada, u Bubiligi, Amerika, Zambia, Malawi, Australia n’u Bwongereza.
Amafaranga amwe ngo yanyuzwaga kuri Paul Rusesabagina, andi akanyuzwa kuri Nsabimana Callixte.

Ibitero bya FLN muri Nyaruguru

Ubushinjacyaha bwavuze ko ku itariki ya 19/06/2018, umutwe w’abarwanyi wa FLN uyobowe na Maj Rusangantwari wagabye ibitero mu Karere ka Nyaruguru mu Murenge wa Nyabimata, wica abaturage b’abasivili batatu, unakomeretsa abandi benshi. Abishwe ni Munyaneza Fidèle, Maniriho Anatole na Habimana Joseph.

Kuri iyo tariki kandi, uwo mutwe watwitse imodoka imwe ya Rav4, RDA 802K ya Nsengiyumva Vincent, batwika inzu Nsengiyumva Vincent yari atuyemo, batwika moto ebyiri, basahura amatungo, imyaka, banafata abaturage batandatu bugwate.

Ku itariki ya 01 Nyakanga 2018, nabwo umutwe wa FLN wagarutse muri Nyaruguru muri Nyabimata, basenya inzu, bakubita abaturage, banasahura imyaka, amafaranga n’imyenda.

Ikindi bakoze ni uko bafashe bamwe mu baturage babagira ingwate babikoreza iyo mitwaro y’ibyo bari bamaze gusahura, berekeza mu ishyamba rya Nyungwe bagenda barasa amasasu hejuru.

Muri uwo mwaka na none, abagize FLN bongeye gutera mu Karere ka Nyaruguru, mu Murenge wa Kivu, bavuye muri Nyungwe.

Nyuma y’ibyo bitero byavuzwe, Nsabimana Callixte yumvikanye ku maradio mpuzamahanga nka BBC, Ijwi rya Amerika (VOA) no ku mbuga nkoranyambaga nka YouTube yigamba ibyo bitero, avuga ko ari ibya FLN iyobowe na Hamada Habimana.

Umucamanza yibukije ko uwo mutwe ari uw’ingabo zitemewe washinzwe n’ihuriro rya MRCD, Nsabimana abereye Visi Perezida wa kabiri.

Icyo gihe mu kwigamba ibyo bitero hari aho Sankara yagize ati "Tugamije guhirika ubutegetsi bwa Leta y’u Rwanda binyuze mu mirwano, ... iyi ni yo nzira twahisemo yo guhirika Leta y’u Rwanda iyobowe n’agatsiko. N’iyo nakwicwa nkanjye Sankara, intambara ntabwo izahagarara...”

Ibitero bya FLN i Nyamagabe

Mu yandi makuru ubushinjacyaha bwavugiye mu rukiko harimo avuga ko tariki ya 15 Ukuboza 2018, inyeshyamba za FLN zagabye ibitero mu Karere ka Nyamagabe, mu Murenge wa Kitabi mu ishyamba rya Nyungwe. Kuri iyo tariki bahagaritse imodoka zari zitwaye abagenzi batwika imodoka eshanu zirimo Coasters eshatu, mini bus imwe n’ivatiri imwe.

Kuri iyo tariki inyeshyamba zishe abantu batandatu mu bari muri izo modoka, bakomeretsa abantu benshi batandukanye. Kuri iyo tariki kandi basahuye ibintu bitandukanye birimo amatelefoni, mudasobwa, amafaranga, imyambaro n’amaherena by’abo bantu bari bamaze kwicwa no gukomeretsa.

Icyo gihe nabwo Nsabimana Callixte yumvikanye yigamba icyo gitero, anabeshya ko abarwanyi ba FLN bafashe ishyamba rya Nyungwe.

Yanumvikanye ku maradiyo mpuzamahanga ahakana Jenoside yakorewe Abatutsi, avuga ko mu Rwanda habaye Jenoside ebyiri, akagenda anongeraho kwangisha abaturage ubutegetsi.

Nk’umuvugizi wa FLN, Nsankara ngo yahabwaga amadorari igihumbi buri kwezi yo gukoresha mu itumanaho (Communication), hakaba n’igihe yahawe amadolari ya Amerika ibihumbi bitanu. Yanahawe kandi telefoni yakoreshaga muri izo nshingano, ubu zikaba zarafatiriwe ziri muri dosiye.

Imikoranire ya FLN n’ibihugu by’u Burundi na Uganda

Ubushinjacyaha bwasomeye Nsabimana ibyaha bumushinja byiganjemo ibyo gushaka ubufatanye n’ibihugu bituranye n’u Rwanda by’u Burundi na Uganda.

Ubushinjacyaha buvuga ko muri Werurwe 2019, Nsabimana yagiranye umubano na bamwe mu bagize igisirikare cy’u Burundi, barimo Maj Bertin bita Moses ushinzwe ubutasi bwo hanze y’igihugu (renseignement extérieur).

Bimwe mu byo bakoranye ni ukuganira ku buryo bwo guhuza ingabo za FLN n’ingabo z’abitwa Col Kanyemera na Karemera kugira ngo bakorane, iyo mikoranire ikaba yari igamije gushoza intambara ku Rwanda.

Mu bindi Ubushinjacyaha bwavuze harimo kuba muri 2013 Sankara yarihesheje ku bw’uburiganya indangamuntu na Pasiporo byatanzwe n’igihugu cya Lesotho, akaba yarabihawe abanje kubeshya amazina ye(yabeshye ko yitwa Kabera Joseph wavukiye i Masisi muri RDC tariki 10/03/1982).

Nsabimana ngo yabonye ibyo byangombwa atanyuze mu nzira zemewe, kuko yatanze ama Land 5000, ayaha umunya Lesotho ari na we wamushakiye ibyo byangombwa.

Guhera icyo gihe muri 2013, kugeza ubwo yafatwaga mu kwa kane 2019, Nsabimana yagendaga akoresha urwo rwandiko rw’inzira mu ngendo no mu bikorwa bitandukanye yakoraga.

Ubushinjacyaha bwamusabiye gufungwa by’agateganyo iminsi 30

Ubushinjacyaha bwavuze ko ibyo bikorwa byose byagize ingaruka nyinshi ku muryango nyarwanda. Zirimo guhitana abantu, gusiga ubumuga ku mubiri no mu bitekerezo, abo basahuye bakabasiga iheruheru, n’ibindi.

Ubushinjacyaha bwanagaragaje ko ibihuha n’icengezamatwara yakoze byashoboraga gutera rubanda cyangwa amahanga kwanga u Rwanda. Ngo byanahungabanyije ubukerarugendo kuko hari bamwe muri ba mukerarugendo bahise bahagarika gusura Nyungwe.

Ubushinjacyaha bushingiye ku mpamvu z’uko arekuwe yatoroka ubutabera, kubera uburemere bw’ibyo aregwa, no kuba aho atuye hatazwi, bwamusabiye gufungwa by’agateganyo iminsi 30.

Gufungwa by’agateganyo ngo nibwo buryo bwonyine bwatuma ubutabera bumukeneye bwamubona. Ngo byatuma kandi adasibanganya ibimenyetso, ndetse ntanatere ubwoba abatangabuhamya. Ikindi ubushinjacyaha bushingiraho, ngo ni uko ari bwo buryo bwatuma ibyaha akekwaho bihagarara cyangwa ntibyongere gukorwa.

Ubushinjacyaha bwavuze ko ibyinshi muri ibi byaha yabikoze akoresheje amaradiyo n’imbuga nkoranyambaga, ku buryo hari impungenge ko aramutse arekuwe yakongera kubikora.

Inkuru bijyanye:

Sankara yisobanuye: "Ndasaba Abanyarwanda n’Umukuru w’Igihugu imbabazi"

Ubwo Nsabimana Callixte yerekwaga itangazamakuru tariki 17/05/2019

Tariki 30 Mata 2019, Ubugenzacyaha bw’u Rwanda (RIB) bwavuze ko bufite uyu Nsabimana Callixte, ndetse ko buri gushyira ku murongo ibyaha byose aregwa kugirango ashyirikirizwe ubushinjacyaha.

Uyu muntu akurikiranyweho ibyaha yakoreye ku butaka bw’u Rwanda birimo gushinga umutwe witwaje intwaro, ubufatanyacyaha mu gukora ibyaha by’iterabwoba, ubugambanyi ndetse no gushishikariza abantu gukora iterabwoba, gufata abantu bugwate, ubwicanyi n’ibindi nk’uko byatangajwe na RIB.

Dosiye ya Nsabimana yoherejwe mu bushinjacyaha tariki 17 Gicurasi, nyuma gato y’uko yeretswe itangazamakuru.

Ubutumwa bwashyizwe ku rubuga rw’ubushinjacyaha bw’igihugu kuri uyu wa gatatu tariki 22 Gicurasi 2019, buravuga ko bwamaze kugeza dosiye y’uyu Nsabimana mu rukiko.

After investigations conducted by @RIB_Rw and Prosecutors at the National Public Prosecution Authority(NPPA) in the case of NSABIMANA Callixte alias SANKARA, Prosecution has submitted his case to court for pre-trial arraignment.@JusticeSectorRw @RIB_Rw

— Rwanda Prosecution (@ProsecutionRw) May 22, 2019

Buragira buti “Nyuma y’iperereza ryakozwe n’ubugenzacyaha ndetse n’abashinjacyaha ku rwego rw’ubushinjacyaha, kuri dosiye ya Nsabimana Callixte wiyita Sankara, Ubushinjacyaha bwohereje mu rukiko iyo dosiye ngo hitegurwe urubanza”.

Uwo munsi ‘Sankara’ yaneretswe itangazamakuru, ni bwo umunyamategeko we Me Moise Nundabarashe yabwiye abanyamakuru ko umukiriya we ameze neza.

Umushinjacyaha mukuru w’igihugu Jean Bosco Mutangana, abwiye KT Press ko igihe cy’ibazwa mbanzirizarubanza kizagenwa n’urukiko. Yagize ati “Ibyo bizagenwa n’urukiko”.

Umuvugizi w’urwego rw’Ubugenzacyaha(RIB), Modeste Mbabazi, yabwiye abanyamakuru ko Nsabimana Callixte atari buvugishe itangazamakuru. Ngo niko yabisabye kandi ngo ni uburenganzira bwe. Umwunganizi we mu mategeko ni we wavugishije itangazamakuru.

Sankara ni we wihitiyemo umwunganira.

Umwunganizi we yitwa Me Nkundabarashe Moise, akaba yarahoze yigana na Sankara muri kaminuza i Butare mu ishami ry’Amategeko (Law/Droit).

Yavuze ko yabonye umwanya uhagije wo kuganira n’umukiliya we nk’amasaha abiri.

Me Nkundabarashe Moise wunganira Sankara

Me Nkundabarashe yavuze ko umukiliya we ameze neza, afite ubuzima bwiza, kandi ko ibyo akeneye byose abibona. Ikiri gukorwa ubu ni ngo ugukurikirana dosiye ye.

Umuvugizi wa RIB, Mbabazi Modeste, yavuze ko Sankara afunzwe byemewe n’amategeko.

Yafashwe ku itariki 13 Mata 2019, u Rwanda rutangaza ko rumufite tariki 30 Mata 2019. Biteganyijwe ko agezwa mu bushinjacyaha bitarenze uyu munsi ku wa gatanu tariki 17 Gicurasi 2019.

Ibyo gusurwa byo ngo ntibirashoboka kubera ko akurikiranyweho ibyaha by’iterabwoba. Igihe cyo kumusura nikigera ngo bizatangazwa.

Umuvugizi wa RIB, Mbabazi Modeste

Mu kiganiro n’Abanyamakuru cyabaye ku wa kabiri tariki 30 Mata 2019, Minisitiri w’Ububanyi n’Amahanga w’u Rwanda, Dr. Richard Sezibera, yavuze ko ubu u Rwanda rufite Sankara, naho abo bari bafatanyije guhungabanya umutekano w’u Rwanda muri Nyungwe biciwe iyo.

Yagize ati "Uwiyita Majoro Sankara umaze iminsi avuga ko yafashe Nyungwe, yigamba bya bitero byishe abantu za Kitabi n’ahandi, akajya ku maradiyo akabivuga, akavuga ko azakora n’ibindi kuko ibyo bidahagije, akigamba urupfu rw’Abanyarwanda... ku bufatanye n’abandi Major Sankara yagaruwe mu Rwanda, inzego zibishinzwe zikaba ziri bumushyikirize ubucamanza kugirango asobanure ibyo bintu akora."

Dr Richard Sezibera aherutse kuvuga ko n’abandi bashakira inabi u Rwanda vuba bazatabwa muri yombi

Minisitiri Sezibera yaboneyeho kuvuga ku bihugu bimaze iminsi bisaba abaturage babyo kwitonda igihe basura ibice by’u Rwanda byegereye umupaka, avuga ko babikora bashingiye ku mpuha nyamara bakwiye kubaza u Rwanda kuko rufite amakuru yimbitse kurushaho.

Urwego rw’ubugenzacyaha RIB rubicishije kuri twitter, uwo munsi ku wa kabiri tariki 30 Mata 2019 rwahise rutangaza ko rwafunze Nsabimana Callixte wiyita Majoro Sankara, mu gihe hagikorwa iperereza ku byaha aregwa.

Callixte Nsabimana yashakishwagwa n’ubutabera kubera ibyaha bitandukanye aregwa birimo kurema umutwe witwaje intwaro, gushishikariza no gutanga amabwiriza yo gukora ibikorwa by’iterabwoba,gushimuta, ubwicanyi, gufata bugwate abantu, ubujura bwitwaje intwaro, gusahura n’ibindi.

Andi mafoto ya Nsabimana Callixte (Sankara) ubwo yagezwaga imbere y’abanyamakuru:

Amafoto: Plaisir Muzogeye

Dr Richard Sezibera avuga ko n’abandi bashakira inabi u Rwanda vuba batabwa muri yombi

Yabitangaje mu kiganiro yagiranye n’Itangazamakuru nyuma yo kubonana n’abahagarariye ibihugu byabo mu Rwanda, kuri uyu wa kabiri tariki 30 Mata 2019.

Minisitiri Dr Sezibera yatangarije ibihugu bikomeye ku isi byasabye abaturage babyo kwigengesera mu gusura u Rwanda, ko u Rwanda rutekanye kandi ko nta mitwe irurwanya iri muri iki gihugu.

Ati "Bamwe mu bayobozi b’iyo mitwe bamaze iminsi bigamba ko bagiye gutera u Rwanda, ndetse banabeshya ko bari muri Nyungwe".

"Ba Rusesabagina, ba Kayumba, ba Himbara baravuga ko bagiye gutera u Rwanda, abantu bavuga batyo ntibibagireho ingaruka aho bari, twabwiye ibyo bihugu kubakurikirana, nibatabakurikirana tuzabikurikiranira".

"Uwiyita Maj Sankara nawe wigamba ko hari ikindi azakora, yagaruwe mu Rwanda ari hano, vuba aha aragezwa mu butabera inzego zibishinzwe zirabimubaza".

"Hari n’abandi bari mu nzira bagiye gufatwa, abantu bayoboye iyi mitwe yiyita P5 ishaka kwica Abanyarwanda, turakorana n’ibi bihugu kugira ngo bafatwe".

Minisitiri w’Ububanyi n’Amahanga avuga ko ibihugu bimwe byabujije abagenzi gusura u Rwanda ngo byashingiye ku makuru atari yo y’uko imitwe irwanya u Rwanda iri muri Nyungwe.

Dr Sezibera ahakana ko iyo mitwe itari muri Nyungwe ahubwo ko iri muri Congo, kandi ngo iyo pariki ikomeje kuba nyabagendwa.

Minisiteri y’Ububanyi n’Amahanga ikomeza ivuga ko ibihugu by’amahanga bidafite amakuru ku mutekano aruta ayo Leta y’u Rwanda ubwayo ifite.

Uyu ni we Nsabimana Callixte wiyise Majoro Sankara akigamba ibikorwa byinshi byo guhungabanya umutekano cyane cyane ibiheruka mu ishyamba rya Nyungwe

Mu kiganiro n’Abanyamakuru kuri uyu wa kabiri tariki 30 Mata 2019, Minisitiri w’ububanyi n’amahanga w’u Rwanda Dr. Richard Sezibera avuze ko ubu u Rwanda rufite Sankara, naho abo bari bafatanyije guhungabanya umutekano w’u Rwanda muri Nyungwe biciwe iyo.

agize ati "Uwiyita Majoro Sankara umaze iminsi avuga ko yafashe Nyungwe, yigamba bya bitero byishe abantu za Kitabi n’ahandi, akajya ku maradiyo akabivuga, akavuga ko azakora n’ibindi kuko ibyo bidahagije, akigamba urupfu rw’Abanyarwanda... ku bufatanye n’abandi Major Sankara yagaruwe mu Rwanda, inzego zibishinzwe zikaba ziri bumushyikirize ubucamanza kugirango asobanure ibyo bintu akora."

Minisitiri w’Ububanyi n’amahanga w’u Rwanda Dr Richard Sezibera

Minisitiri Sezibera yaboneyeho kuvuga ku bihugu bimaze iminsi bisaba abaturage babyo kwitonda igihe basura ibice by’u Rwanda byegereye umupaka, avuga ko babikora bashingiye ku mpuha nyamara bakwiye kubaza u Rwanda kuko rufite amakuru yimbitse kurushaho.

Urwego rw’ubugenzacyaha RIB rubicishije kuri twitter, ruvuze ko rwafunze Nsabimana Callixte wiyita Majoro Sankara, mu gihe hagikorwa iperereza ku byaha aregwa.

Callixte yashakishwagwa n’ubutabera kubera ibyaha bitandukanye aregwa birimo kurema umutwe witwaje intwaro, gushishikariza no gutanga amabwiriza yo gukora ibikorwa by’iterabwoba,gushimuta, ubwicanyi, gufata bugwate abantu, ubujura bwitwaje intwaro, gusahura n’ibindi.

Abanyamakuru batandukanye mu kiganiro na Minisitiri w’Ububanyi n’amahanga

Gen Mubarakh Muganga yabitangarije mu nama mpuzabikorwa y’Akarere ka Bugesera ku wa kane tariki 04 Mata 2019, ikaba yahuje bamwe mu bayobozi bakuru b’Igihugu, ab’inzego z’ibanze, abikorera n’abagize imiryango itagengwa na Leta.

Iyi nama yasanze Akarere ka Bugesera gakeneye gufatira ingamba ikibazo cy’imirire mibi mu bana bato ndetse n’ikijyanye n’umutekano.

Mu batanze ikiganiro ku ishusho y’umutekano muri ako karere no ku rwego rw’Intara muri rusange, harimo Gen Mubarakh Muganga uyobora Ingabo mu Ntara y’Iburasirazuba no mu Mujyi wa Kigali.

Uyu muyobozi w’Ingabo avuga ko amakuru y’uwitwa Sankara n’abandi ari ku mbuga nkoranyambaga nka YouTube, ari iterabwoba ngo ridashobora kugira icyo rihungabanya ku mutekano w’Abanyarwanda.

Akarere ka Bugesera kakoranye inama n’abafatanyabikorwa bako mu iterambere

Yagize ati “YouTube nyifata nk’ikiryabarezi, nta gihugu nk’u Rwanda cyafatwa na yo, u Rwanda ruri mu bihugu bibiri by’ibihangange ku isi. Mu 1998-2001 twarwanye n’ibihugu 11”.

“U Rwanda ntabwo tugwingira mu mutekano, twarakuze rwose, ibya YouTube mubibaze Sankara n’abandi nka we bagwingiye, twe ibihugu twarwana na byo ni nka 20-30 na byo byishyize hamwe kandi intambara tukayirangiriza iyo!”

Gen Mubarakh akomeza asaba Abanyarwanda kwirinda kujya muri Uganda no mu Burundi n’ubwo “Leta itigeze ifunga imipaka” ku mpamvu z’uko iyo bagiyeyo bagaruka bavuga ko bahohotewe.

Umuyobozi w’Urwego rushinzwe Ubugenzacyaha(RIB) mu Ntara y’ Iburasirazuba, Hebert Rutaru, avuga ko mu mwaka ushize Akarere ka Bugesera kagaragayemo ibyaha 1,297 kakaba kaza ku mwanya wa kane mu kugira ibyaha byinshi muri iyo ntara.

Kimwe mu bibazo byicaje Akarere ka Bugesera n’abafatanyabikorwa bako kijyanye n’imirire mibi

Mu byaha byiganje muri ako karere harimo ubujura, gukubita no gukomeretsa, gusambanya abana, ibiyobyabwenge, ibikangisho, kwinjira mu gihugu mu buryo bunyuranyije n’amategeko, kwiyahura, ubwicanyi, ruswa ndetse no kunyereza umutungo.

Ku kibazo cy’imirire mibi, Minisitiri w’Ikoranabuhanga na Inovasiyo, Ingabire Paula, witabiriye iyi nama, we asaba abayobozi n’abaturage by’umwihariko kujya beza imyaka ariko bakirinda kuyigurisha yose batarabanza kwihaza.

Ati “Umubyeyi arahinga imboga n’imbuto byakwera akabijyana ku isoko byose kubera amafaranga, yiyibagije ko wa mwana utariye imboga n’imbuto azarwara bwaki, hanyuma ya mafaranga ahindukire abe ari yo akoresha mu kumuvuza”.

Gahunda y’igihugu mbonezamikurire igaragaza ko kugeza mu mwaka ushize wa 2018, ku rwego rw’Igihugu abana bari bafite ikibazo cy’imirire mibi bari 36%, by’umwihariko mu karere ka Bugesera bakaba bari bageze ku gipimo cya 34.9%.

Umuyobozi w’aka karere, Richard Mutabazi, asobanura ko bakomeje kugenda urugo ku rundi bigisha abaturage, banatanga ubufasha bw’ibiribwa birimo intungamubiri aho bukenewe, ku buryo ngo abagera kuri 80% batangiye gukira.

Minisitiri Paula Ingabire witabiriye inama mpuzabikorwa y’Akarere ka Bugesera agira inama abaturage kutagurisha imyaka ngo bicure

Avuga ko aba bose “bameze nk’inzuki cyangwa inzukira ziduhera ku gutwi k’umuntu ariko zikaba zidashobora kumudwinga”.

Gen James Kabarebe wabaye Minisitiri w’Ingabo, yabitangaje ubwo yaganiraga n’abahagarariye urubyiruko mu turere no mu mashuri makuru kuri uyu wa gatatu tariki 03 Mata 2019 i Rusororo mu Karere ka Gasabo.

Yasobanuye ko Kayumba Nyamwasa ari mu bananiwe gukomeza urugendo rw’Umuryango FPR Inkotanyi bitewe n’uko ngo yifuzaga gusahura no kwica, nk’aho “yari yarikubiye amahegitare y’amasambu mu Mutara”.

Gen Kabarebe avuga ko umuryango FPR Inkotanyi wagiye usakuma abantu benshi ariko na none ngo hakavamo benshi bananiwe kwihangana.

Avuga ko Sankara atazi uwo ari we, icyakora ngo amuziho kuba ari umutekamutwe w’urubyiruko uri ahantu runaka, akaba “yarabanje kwiga i Butare bikamunanira, ajyana na Kayumba, aza gushwana na we ngo biturutse ku mafaranga y’imisanzu”.

Amakuru ngo yageze kuri Gen Kabarebe ko uwo Sankara yabanje kwiyunga n’uwitwa Marara “wari umusirikare w’u Rwanda muto”, nyuma bakaza gushwana kubera ko Sankara ari uwacitse ku icumu rya Jenoside, Marara akaba Umugande.

Umujyanama wa Perezida wa Repubulika akomeza agira ati “Ubu Sankara ari kumwe na Rusesabagina ariko na bo ejo muzumva bashwanye,…erega izi ‘forces’ zose ikiba cyaratumye batekereza nabi, kibagumamo bakirya bakimara batageze ku cyo bashaka gukora”.

Avuga ko FDLR na yo kuri ubu ngo imaze gucikamo ibice bibiri, aho Abanyenduga bamaze kwitandukanya n’Abakiga.

Gen Kabarebe akomeza agira ati “Aba rero sinzi icyo bahagarariye, sinzi intego bafite, nta n’ikibazo na kimwe baduteje, muzi uruyuki kuguma ruza ntirukudwinge, ariko rukaguma ku gutwi ruduhera!”.

“Abo ni nk’inzukira ziguma ziduhera, ukaguma uhungura ku gutwi gusa,…rero muve ku nzukira ntizibateshe umwanya, ahubwo nimwubake igihugu”.

Umujyanama wa Perezida wa Repubulika ni umwe mu bayobozi baganirije abahagarariye urubyiruko, abasaba kurwanya abapfobya Jenoside yakorewe Abatutsi mu 1994.

Minisitiri Francis Kaboneka aganiriza abaturage bo mu Karere ka Nyaruguru

Bimwe mu bitangazamakuru bishyigikiye abatavuga rumwe na Leta y’u Rwanda bimaze iminsi bitangaza amakuru ko hari umutwe wahagurikiye kurwanya ubutegetsi bw’u Rwanda, ukaba warinjiriye mu ishyamba rya Nyungwe.

Umuyobozi mukuru wa Polisi y’igihugu IGP Emmanuel K. Gasana we ntabifata nk’abantu bateje ikibazo,ahubwo avuga ko ari amabandi yari agambiriye kwiba kandi akizeza ko ikibazo cyayo cyakurikiranywe ku buryo yahunze agasubira aho yari yaturutse.

Yabitangarije mu nama yagiranye n’abatuye mu Karere ka Nyaruguru, mu Ntara y’Amajyepfo, kuri uyu wa Kabiri tariki 18 Nyakanga 2018, mu rwego rwo kubahumuriza no kubasaba kuba maso no gutanga amakuru ku nzego z’umutekano.

Yagize ati “Hari amabandi yinjiye mu Rwanda yiba imitungo muri aka gace. Ibi ni ibintu inzego z’umutekano zitakwihanganira. Icyo tubakeneyeho ni ubufatanye bwanyu n’inzego z’umutekano, mugatanga amakuru ku gihe ku bantu mutizeye cyangwa ibikorwa mwaketse.”

Muri iyi nama Minisitiri w’Ubutegetsi bw’igihugu Francis Kaboneka yasabye abayobozi kwegera abaturage, bagafatanya gukaza umutekano, bafasha abaturage gufata iya mbere mu kwicungira umutekano.

Ati “Umutungo munini dufite ni umutekano twishimira twese uyu munshi. Ntabwo tuzihanganira icyo ari cyo cyose cyangwa uwo ari we wese wabangamira umutekano dufite. (Umutekano) ni wo shingiro ry’iterambere dushaka kandi na mwe nk’abaturage mugomba gufata iya mbere mu kuwurinda.”

Minisitiri Kaboneka yavuze ko umutungo wa mbere igihugu gifite ari umutekano, asaba abaturage kuwurinda

Abo Bayobozi basabye abaturage kwima amatwi amakuru y’impuha akomeza gukwirakwizwa, ahubwo bagashyira imbaraga mu kazi kabo kuko umutekano w’igihugu urinzwe 100%.

Umuvugizi wa Polisi ACP Theos Badege we yamaganiye kure iby’umutwe wiyita ko waje kurwanya Leta y’u Rwanda. Yavuze ko uwo mutwe uyobowe n’uwitwa “Sankara” udateze gukandagiza ikirenge ku butaka bw’u Rwanda.

Yanatangaje ko uwo Sankara ari umuturage wahunze ubutabera kandi ubutabera bw’u Rwanda bukomeje gukorana n’ibindi buhugu ngo atabwe muri yombi agezwe imbere y’urukiko.