Abitabiriye ibiganiro bya BNR

Ni ubutumwa bwagarutsweho mu Karere ka Nyabihu kuwa gatanu tariki 20 Kamena 2025, mu gutangiza ku mugaragaro Umushinga ugamije gukangurira abagore kwitabira iryo koranabuhanga, igikorwa cyateguwe na Banki Nkuru y’u Rwanda (BNR).

Akarere ka Nyabihu, ahanini kagizwe n’igice cy’imisozi miremire y’icyaro, aho bamwe mu bagore, bavuga ko bakunze kugorwa no kwitabira gukoresha ikoranabuhanga rya telefoni muri serivisi z’imari, ahanini biturutse ku bumenyi bucye barifiteho, bikabatakariza amahirwe muri serivisi zimwe na zimwe.

Mukanema wo mu Murenge wa Jomba agira ati: “Turacyagira umuco wo kumva ko ifaranga ryose ryinjiye mu rugo yaba mu buryo busanzwe cyangwa ubw’ikoranabuhanga, rireba umugabo wenyine”.

Umuyobozi wungirije wa Banki Nkuru y’u Rwanda Dr Nsengiyumva Justin yagaragaje ko abagore basaga ibihumbi 35 bo mu Turere dutandatu two mu gihugu, harimo abo mu Karere ka Rulindo, Ngoma, Gakenke, Nyamashe, Nyamagabe na Nyabihu ari bo bamaze kugerwaho n’ubukangurambaga bugamije kubashishikariza kwitabira gukoresha Ikoranabuhanga ryifashisha telefoni muri serivisi z’imari, kandi iyi gahunda izakomereza no mu tundi Turere twose tw’igihugu.

Yagize ati: “Mu cyerekezo igihugu kiganamo cya 2050, Banki Nkuru y’u Rwanda ntishishikajwe gusa no kuzigamira ibigo n’ama banki byo mu gihugu byonyine ngo isige inyuma abaturage b’igihugu. Twatekereje kwibanda ku bagore, kuko inyigo twakoze, zagaragaje ko abagore batitabira gukoresha serivisi z’ikoranabuhanga uko bikwiye”
Ubushakashatsi bwa Banki Nkuru y’u Rwanda, bugaragaza ko ubwitabire bw’abagore mu gukoresha ikoranabuhanga rya telefoni muri serivisi z’imari uhereye ku bafite imyaka 16 kuzamura, bukiri ku kigero cya 72% ugereranyije n’abagabo bo bari ku bwitabire buri hejuru ya 80%.

Mu Karere ka Nyabihu habarurwa abagera ku 8% bataritabira gukoresha uburyo ubwo aribwo bwose bwa serivisi z’imari, naho abangana na 5% bo bakoresha serivisi z’imari mu buryo butagenzurwa cyane cyane nko guhererekanya imari binyuze mu bimina bibumbiyemo.

Abagore bakomeje kugerwaho n’ubu bukangurambaga hirya no hino, bitezweho gushishikariza bagenzi babo guhindura imyumvire, bityo bakarushaho kuryitabira.
Ubukangurambaga BNR ibuhuriyeho na za Minisiteri zitandukanye harimo Minisiteri y’Ubutegetsi bw’Igihugu (MINALOC), Minisiteri y’Uburinganire n’Iterambere ry’Umuryango(MIGEPROF) hamwe n’ibindi bigo birimo iby’itumanaho n’ibifite mu nshingano zabyo guteza imbere serivisi z’imari.

Uwo mwana w’umuhungu witwa Mfitumukiza Samson, kuri ubu ufite imyaka 15, Mukanoheli avuga ko yatangiye kugaragaza ibimenyetso by’uko afite ubumuga ubwo yari afite amezi icyenda.
Ubwo bumuga bwagiye burushaho gufata indi ntera, bugenda bumuzahaza kugera ku rwego atabasha kuvuga, gukoresha amaboko n’amaguru, bigera n’aho kugenda bimusaba gukuruza ikibuno kubera guhinamarana kw’ingingo.

Agira ati: “Namujyanye ku bitaro byita ku bafite ibibazo birimo n’iby’ubumuga by’I Rilima mu Karere ka Bugesera, bamusuzumye basanga byaatewe n’umutsi uturuka mu kaguru ujya ku bwonko watakaje ubushobozi bwo kuguma mu mwanya wawo, bambwira ko kubikosora bisaba kumubaga mu byiciro”.

“Ubwa mbere bansabye kwishyura Miliyoni 1 n’ibihumbi 200. Icyo gihe ntaho nagombaga kuyakura kubera ubushobozi bucye, icyakora ku bw’amahirwe ubwo navagayo uwo munsi nageze muri gare ya Nyabugogo, mpahurira n’umugiraneza w’umukobwa, wabonye ukuntu mpetse uwo mwana ungana atyo ku mugongo, agira amatsiko y’icyarimo kintera kurira mbimubwiye yemera kuntangira ibihumbi 400 mu mafaranga nasabwaga n’ibitaro”.

“Nayongeranyije n’andi macye abagiraneza bagiye bampa, umwana ndamujyana baramubaga batangira no kumukorera ubugororangingo ndetse banamuha inyunganirangingo zimufasha kubona uko agenda”.

Nyuma y’ubwo buvuzi, byatangiye kugaragara ko aramutse akomeje kwitabwaho akavurwa uko bikwiye ashobora gukira neza.

Mu nzu nto uyu muryango ubamo y’ibyumba bibiri hiyongereyeho n’uruganiriro bashyizemo igitanda uyu mwana ahora aryamishiijweho, umubyeyi we anyuzamo akamuhagurutsa akamwicaza nibura akaba yamara nk’iminota 10 yicaye.

Iyo akeneye guhaguruka, bamwegereza imbago agenderaho atera intambwe nkeya arambura ingingo, yasoza bakongera kumuryamisha mu buriri.

Mukanoheli avuga ko no kuba ibyo abibasha, abikesha ubwo buvuzi yahawe kuko mbere nta na kimwe yabashaga gukora.

Ati: “Ubwo buvuzi yari yakorewe bwagombaga gukurikira no kongera kumubaga indi nshuro yanyuma noneho agakira neza. Abaganga bambwiye ko ndamutse nishyuye Miliyoni eshatu n’igice kuri konti y’ibitaro, bahita babumukorera agakira neza”.

Mu kiniga giherekejwe n’amarira menshi uyu mubyeyi ababazwa no kuba atabona aho ayavana.
Ati: “ Byahuriranye n’uko nkennye nkaba ntagira ikintu na kimwe kinyinjiriza yewe nkaba ntanafite icyo nagurisha ngo aboneke. Inzu yonyine na yo turambikamo umusaya itadukwiye kubera ukuntu ari ntoya, nigeze ntekereza kuyigurisha ngo ndebe ko havamo udufaranga ducye, ariko nsigarana ihurizo ryo kwibaza aho uyu mwana na barumuna be nzaberekeza hanyobeye ndabireka”.

Ducye akura mu kudandaza amakara n’ubuyede umugabo akora nitwo bakesha amaramuko
Mukanoheli ukora ubucuruzi bwo kudandaza amakara muri santere y’ubucuruzi y’ahazwi nko ku Ngagi mu Murenge wa Cyuve, avuga ko hari ubwo akora agataha amaramasa, ubundi akabura ubwo asohoka kubera inshingano zo kwita ku mwana we urwaye, bityo ntabone ibumutunga.

Ni mu gihe umugabo we aca inshuro, mu kazi k’ubuyede rimwe akakabona ubundi yakabura agatahira aho.

Ati: “Ari njye ari na se iyo twagize icyo tubona ni we tuba duhangayikiye kurusha abandi kuko aba agomba kugaburirwa nk’imbuto cyangwa imboga”.

Umuyobozi w’Akarere ka Musanze wungirije ushinzwe imibereho myiza y’abaturage Kayiranga Théobald avuga ko bazashakisha umufatanyabikorwa wakunganira uyu muryango mu kumwitaho.

Agira ati “ubona ko serivisi akeneye gukorerwa zisaba ubushobozi burenze, bikaba ngombwa ko twiyambaza abandi bafatanyabikorwa. N’uwo muryango tuzareba niba twawushakira umufatanyabikorwa ushobora kuwunganira mu gukurikiranira hafi uwo mwana azavuzwe”.

Abikorera bashyize indabo ku mva iruhukiyemo imibiri isaga 800 mu rwibutso rw’Akarere ka Musanze

Ubu butumwa bwagarutsweho na Guverineri w’Intara y’Amajyaruguru Mugabowagahunde Maurice ku wa Kane Tariki 12 Kamena 2025, mu gikorwa cyo Kwibuka ku nshuro ya 31 Jenoside yakorewe Abatutsi, cyateguwe n’abagize Urugaga rw’Abikorera bo mu Karere ka Musanze.

Cyabimburiwe n’Urugendo bakoze berekeza ku Rwibutso rwa Jenoside yakorewe Abatutsi rw’Akarere ka Musanze, rwahoze ari Urukiko rw’Ubujurire rwa Ruhengeri (Cour d’Appel Ruhengeri).

Bakihagera, bashyize indabo ku mva iruhukiyemo imibiri isaga 800 y’Abatutsi biciwe mu nzu yahoze ari iy’ubutabera y’urwo rukiko, nk’ikimenyetso cyo kubunamira no kubasubiza agaciro bambuwe.

Mu baruhukiye muri urwo Rwibutso, barimo na bamwe mu bahoze ari abikorera, bishwe mu gihe cya Jenoside, bazira kuba Abatutsi. Mu kubibuka hazirikanwe uruhare n’ubushake bari bafite mu Iterambere ry’Igihugu.

Perezida wa Ibuka mu Karere ka Musanze Twizere Rusisiro Festo, yagize ati: “Abikorera bahoze mbere ya Jenoside batuye muri aka gace kimwe n’ahandi, iyo baticwa bazira kuba Abatutsi, bakabaye ubu ari abafatanya natwe mu Iterambere ry’ubukungu bw’Igihugu cyacu”.

Ati “Bamwe muri bo bari bafite inganda abandi bakora mu ma banki. Hari abari bafite amaduka y’ubucuruzi n’ababukoraga abandi barashinze za ateriye z’ubudozi n’izo gusudira. Mu bacuruzi bandi harimo abari bafite za resitora n’ibindi bikorwa tutarondora; byagaragaraga ko bari bafatiye runini Igihugu, kuko bari barahanze imirimo bagatanga n’akazi kuri benshi bakanasorera Igihugu. Ibyo byose kuba byarirengagijwe bakicwa, ni ikimwaro n’umugayo kuri Leta yariho yateguye Jenoside yakorewe Abatutsi”.

Mu butumwa bwagarutsweho na Guverineri Mugabowagahunde, bwibanze ku kugaragaza uruhare rwa bamwe mu bari abacuruzi, mu itegurwa n’ishyirwa mu bikorwa ry’umugambi wa Jenoside yakorewe Abatutsi.

Abikorera bakoze urugendo rugamije kuzirikana inzira y’inzitane Abatutsi banyuzemo

Mugabowagahunde yifashishije inyandiko yatahuwe, Paulina Nyiramasuhuko wahoze ari Minisitiri w’Umuryango yiyandikiye muri ajenda ye, igaragaza umugambi w’ubutegetsi bwariho mbere ya Jenoside yakorewe Abatutsi, mu gukorana bya hafi na bamwe mu bari abacuruzi mu kugura imbunda zabo bwite n’izahawe abaturage, kuzikwirakwiza mu bigo by’amashuri n’ahandi.

Yagize ati “Hari abacuruzi bazwi cyane barimo nka Kabuga Félicien uzwi cyane ku ruhare rwe muri Jenoside, hakaba uwitwa Ruzindana Obed wari umucuruzi ukomeye ahitwa ku Mugonero, hari Gaspard Kanyarukiga w’i Nyange, Bandora wari umucuruzi ukomeye ku Ruhuha ya Bugesera n’abandi benshi bari bakomeye. Bose bagiye bagira uruhare mu gutanga amafaranga yo kugura intwaro n’ibikoresho gakondo byifashishijwe mu kwica Abatutsi, abandi batanga imodoka zatundaga interahamwe, ibiribwa zaryaga n’ibindi”.

Ati “Mu Ntara y’Amajyaruguru natanga urugero rwa Esdras Baheza wari umucuruzi ukomeye mu Byangabo akaba yari ayoboye n’interahamwe zaho. Uyu yari mu bikomerezwa byateguye binitabira inama yabaye tariki 7 Mata 1994 yayobowe na Nzirorera Joseph, yacuriwemo umugambi wo kwica Abatutsi barimo abari bahungiye mu cyahoze ari Ishuri ry’Ubuhinzi n’Ubworozi rya ISAIE Busogo, Abatutsi bari bahungiye muri Paruwasi ya Busogo n’abari bahungiye muri Cour d’Appel Ruhengeri”.

Mu gukomeza aya mateka Guverineri Mugabowagahunde yagaragarije abikorera ko igikenewe mu kurinda ko amateka nk’aya yisubira, ari uko baharanira kurwanya ikintu cyose cyabaroha mu migambi mibisha, nk’uwo bagenzi babo bababanjirije biroshyemo.

Ati “Turashimira abikorera bahagaze ku ndangagaciro za kimuntu bakagira uruhare mu kurokora abahigwaga, ndetse hakaba n’abandi bagiye bavuga ukuri ku byaberaga mu Rwanda. Hari abikorera bafashije Ingabo za RPA mu guhagarika Jenoside yakorewe Abatutsi, abandi na bo bakomerezaho mu kubaka u Rwanda bundi bushya”.

“Icyo mbakangurira ni ugukomereza muri uwo murongo, amahirwe Igihugu gikomeje kubaha mu birebana n’ishoramari ribyara imari, mukomerezeho muyashora mu bikorwa bisigasira iterambere ryagezweho”.

Bamwe mu bikorera bo mu Karere ka Musanze basanga amateka ashaririye Igihugu cyanyuzemo ari isomo rituma birinda ko yazasubira

Abagize PSF mu Karere ka Musanze, banaremeye imiryango 20 y’Abarokotse Jenoside yakorewe Abatutsi, bayishyikiriza amafaranga angana na Miliyoni 13 y’u Rwanda, y’igishoro kizabafasha mu gukora imishinga y’ubucuruzi, mu rwego rwo gukomeza kuyunganira mu rugendo rwo kwiyubaka.

Baziruwiha Abdu Al Aziz, Visi Perezida wa PSF mu Karere ka Musanze, yavuze ko amateka ashaririye Igihugu cyanyuzemo, abikorera bayigiyeho isomo rikomeye rituma bakomera ku kubaka u Rwanda, no gushyigikira imibereho y’abarokotse Jenoside yakorewe Abatutsi.

Yagize ati “Icyo tugamije ni ukubakira ku mahirwe Igihugu kiduha, tukayakoresha mu gukumira Jenoside binyuze gusigasira ubumwe ubufatanye n’urukundo, bikadufasha kubaka u Rwanda rushya. Urugamba Abanyarwanda bariho by’umwihariko abarokotse Jenoside rwo kwiyubaka ni ingenzi cyane mu kubashyigikira tubaremera, mu rwego rwo kubarinda guheranwa n’agahinda, tukomora ibikomere basigiwe na yo”.

Usibye ibikorwa by’iterambere bigaragarira mu bikorwa remezo n’ibindi abikorera bakomeje kugaragaramo, buri mwaka bageranya ubushobozi, bagaha bamwe mu barokotse Jenoside yakorewe Abatutsi amafaranga yo kwifashisha mu gukora imishinga ishingiye ku bikorwa by’ubucuruzi, kandi intego abikorera bafite ikaba ari ukugera ku mubare munini bahereye ku bababaye kurusha abandi.

Guverineri Mugabowagahunde yifashishije ingero za bamwe mu bari abacuruzi biroshye mu mugambi wo gutegura Jenoside no kuyishyira mu bikorwa

Mu gushyigikira abarokotse Jenoside yakorewe Abatutsi abikorera babashyikirije Miliyoni 13 z’Amafaranga y’igishoro bazifashisha mu mishinga y’ubucuruzi

Igishushanyo mbonera cy’iryo soko

Iryo soko ryitwa Kigali Whole Sale Market (KWSM), rizubakwa mu buryo bugezweho rigatwara Miliyoni 46 z’ama Euro (asaga Miliyari 65Frw), rizubakwa i Masoro mu Mujyi wa Kigali, rikazaba rifite ubushobozi bwo kwakira Toni ziri hagati y’ibihumbi 260 na Toni ibihumbi 350 z’umusaruro, ungana na 70% by’Imboga n’Imbuto biribwa mu Mujyi wa Kigali.

Ubuhinzi bw’Imboga n’Imbuto mu Ntara y’Amajyaruguru, ababukora kinyamwuga binyuze mu Makoperative, bavuga ko bubafatiye runini ariko bakaba bagiraga imbogamizi zo kuwuburira isoko ukangirika ukababera imfabusa.

Nyirandikubwimana Mariya, umwe mu banyamuryango ba Koperative Twitezimbere Isangano, ikorera ubuhinzi bw’imboga mu Murenge wa Muko mu Karere ka Musanze, avuga bagiye gutandukana noguhomba.

ati “Kenshi twagiraga imbogamizi zo kweza umusaruro mwinshi tukamara iminsi dutegereje abawugura twarababuze zikatuboreraho. Ni ibintu biduhangayikisha cyane kuko tuba twarashoye amafaranga menshi mu kwatisha imirima, abakozi, ifumbire, imiti n’ingemwe ugasanga ntituyagaruje bikatuviramo igihombo”.

Ati “Kuba haboneka isoko rihoraho tugemuraho umusaruro, byadutera imbaraga zo kujya duhinga dutekanye ari nako dushoramo imbaraga zose zishoboka, kuko twaba twizeye neza ko tutagwa mu bihombo”.

Imirimo yo kubaka iri soko izatwara Miliyari zisaga 65Frw

Iby’ibihombo abahinzi b’imboga n’imbuto bagarukaho, binashimangirwa n’imibare igaragaza ko mu musaruro wose uboneka wabyo uhereye mu murima kugera ku masoko, haba hari ibyago byo kwangirika nibura umusaruro uri hagati ya 20 na 30%.

Abahinzi bo mu Turere turimo Musanze, Gakenke, Rulindo mu Ntara y’Amajyaruguru, abo mu Karere ka Nyabihu mu Ntara y’Iburengerazuba, ku wa Gatatu tarik 11 Kamena 2025, bahurijwe mu biganiro bigamije kubasobanurira ibikubiye mu mushinga wo kubaka iryo soko.

Christophe Ayabagabo, Umuyobozi w’Umushinga IFS-Kungahara mu Turere twa Musanze na Nyabihu, asobanura iby’iryo soko.

Agira ati “Ni isoko twavuga ko rizaba ari ijwi rya buri muhinzi. Ikirimo gukorwa rero ni ukubereka inyungu iri mu kwibumbira hamwe kugira ngo iryo jwi rizarusheho kumvikanira kure. Ibyo bizabafasha gushyiraho gahunda zihamye mu kugena umusaruro ukenewe ku isoko, igihe ukenerewe n’ingano y’umusaruro ukenewe mu buryo buhoraho. Ni amahirwe akomeye yaba ku bahinzi ndetse n’inzego zishyira mu bikorwa politiki zijyanye n’iterambere ry’ubuhinzi”.

Ni isoko rizaba ryubatswe mu bice bitandukanye harimo ahazaba hagenewe ibiro, resitora n’igice kizajya kibikwamo umusaruro mu buryo bwiza kandi busigasiwe.

30% by’ahazajya hakorerwa, hazaba ari igice kigenewe abahinzi bato n’abibumbiye mu Makoperative, mu gihe 70% hazaba hagenewe abahinzi bafite ibigo binini harimo abanyenganda n’abohereza ibicuruzwa ku masoko yo hanze y’u Rwanda.

Ni isoko rizaba riri ku rwego rumwe n’urw’andi masoko yo mu bindi bihugu byateye imbere

Umuyobozi w’Intara y’Amajyaruguru Mugabowagahunde Maurice, avuga ko ingamba zifasha abahinzi mu gutuma umusaruro utababera imfabusa ari ingenzi cyane mu gutuma iterambere ry’abahinzi ryihuta.

Yagize ati “Icyo dukangurira abahinzi ni ukumva agaciro ko guhinga neza bakeza bazirikana ko gusagurira isoko bibanzirizwa no kwihaza mu biribwa. Isoko rigiye kubakwa turifata nk’ingenzi cyane mu kurushaho gutuma iyi Ntara iba koko ikigega cy’Igihugu, kuko abahinzi bazaba bahinga bizeye neza ko nta nkomyi z’aho bagemura umusaruro wabo”.

Yungamo ati “Ibyo kubigeraho bizajyana no gushyira imbaraga mu guhinga kijyambere, bita ku ngamba zose zigamije gutuma bongera umusaruro mu bwiza no mu bwinshi, kugira ngo bazabashe guhaza isoko yaba mu bijyanye n’ireme ndetse n’ubuziranenge, kugira ngo koko n’intego Leta ishyiriyeho iri soko zizatange igisubizo kirambye”.

Byitezwe ko bizagera mu mwaka wa 2028 iryo soko ryaramaze kuzura ndetse rinakorerwamo, umushinga wo kuryubaka uzashyirwa mu bikorwa na Leta y’u Rwanda ku bufatanye n’Umuryango w’Ibihugu by’Ubumwe bw’u Burayi (EU) binyuze mu Mushinga IFS-Kungahara.

Abafatanyabikorwa bibanda ku bikorwa bigamije iterambere ry’ubuhinzi barimo Minisiteri y’Ubuhinzi n’Ubworozi (MINAGRI), ibigo birimo RAB, RICA, RCA NAEB hamwe n’abandi bafatanyabikorwa nka Rikolto, CARE International, FXB, Action Aid Rwanda, Concern World Wide, Kilimo Trust n’abandi batandukanye.

Nyirandikubwimana Mariya yishimiye ko hagiye kuboneka igisubizo cy’umusaruro bajyaga babura iyo berekeza

Isoko Kigali Whole Sale Market (KWSM), rifatwa nk’igikorwa remezo cy’ingenzi kuko usibye gukuraho igihombo cy’umusaruro w’abahinzi wangirikaga, rizanatuma umusaruro woherezwa mu mahanga urushaho kwiyongera, rinahange imirimo ku ngeri zitandukanye z’abaturage.

Imboga iyo zitinze kubona umuguzi zirangirika

Ndungutse hamwe n’umwana w’umuhungu arera avuga ko hari byinshi byarushijeho kuba byiza kubera kumwitaho

Uyu mugabo utuye mu Mudugudu wa Cyanya, mu Kagari ka Nkumba mu Murenge wa Kinoni Akarere ka Burera, ubwo bamwegeraga bakamusaba kurerera mu muryango we umwana w’umuhungu ufite ubumuga bukomatanyije, byabanje kumugora kubyumva ndetse abanza no gutekereza ko azamubera umutwaro, ahanini biturutse ku kuba nta kintu na kimwe uwo mwana yabashaga gukora bitewe n’ubumuga yavukanye.

Ni umwana kuri ubu ufite imyaka 17 wakuze arererwa mu kigo cy’Abihayimana b’Ababikira cya Mutagatifu Visenti wa Pawulo b’i Lenderede (Saint Vincent de Paul de Lendrede), nyuma y’uko abo mu muryango we bari baramutereranye bakanamuta bamuziza ubumuga yari yaravukanye.

Ati “Yari afite ubumuga bw’ingingo zose atabasha kugira ikintu na kimwe ashoboye gukora yaba kuvuga, kwicara, kwitamika icyo kurya, kujya ku bwiherero byose byasabaga kubimufasha, dore ko yanagendeshaga amaboko akambakamba nk’uruhinja kandi ari mukuru”.

Ati “Mu gushakisha umuryango we baje kumenya ko ndi nyirarume(mvukana na nyina), biba ngombwa ko bansanga baza kunsaba kumufata nkamurerera mu muryango. Byabanje kungora kwiyumvisha ukuntu umuntu umeze atyo nzashobora kumwitaho, mbanza no kwivovota kuko natekerezaga ko azambera umutwaro uremereye ntazabasha”.

Kurerera umwana mu muryango bifatwa nk’uburyo bw’ibanze mu gutuma yigirira icyizere no kwiyumva mu bandi

Muri icyo kigo cy’ababikira uwo mwana yakuriyemo, bari baragerageje kumwitaho mu buryo bwo kumukorera ubugororangingo no kumuha ubundi bumenyi bw’ibanze, mu gufasha ubwonko bwe gukanguka ku buryo byatangaga icyizere ko bikomeje bityo uwo mwana yagera ku rwego rwo kugira ibintu bimwe na bimwe abasha kujya akora.

Ndungutse akimara kumwakira yakomeje kumwitaho muri ubwo buryo, no kumuvuza mu bitaro byo ku rwego rwisumbuye ku buvuzi yagiye ahabwa akiri muri icyo kigo, bigera ku rwego ibyo atashoboraga gukora, kuri ubu abibasha.

Agira ati “Ubu umwana abasha kuganira n’abandi nk’uko bisanzwe nyamara atarabishoboraga, abasha kwigenza n’amaguru urugendo n’undi muntu wese yakora. Ni wa muntu usiga ku rugo, akamenya ngo imvura iraguye akanura ibiri hanze, twajya mu murima akajyana n’abandi akaba yagira imirimo imwe n’imwe bafatanya, nko kwahira ubwatsi bw’amatungo n’ibindi”.

Yungamo ati “Mbese imirimo yose ibaho dukora ya buri munsi nta n’umwe adashoboye gukora. Yagiye mu ishuri nk’abandi kandi abasha gutsinda neza. Ni ibintu byambereye nk’igitangaza Imana yankoreye, kuko no kumutoza ibyo byose ntabwo nari narigeze na rimwe ntekereza ko azakira bikagera kuri urwo rwego”.

Bamwe mu barerewe muri icyo kigo basubijwe mu miryango

Ndungutse asanga uyu mwana yaramubereye umugisha, kuko ahanini ibikorwa by’iterambere umuryango we umaze kugeraho, nko kuba atuye mu nzu nziza mu gace k’iwabo n’ibindi bitandukanye ,yabigezeho aho amariye kwakira uyu mwana mu muryango.

Mu Karere ka Musanze, abana 29 biganjemo abafite ubumuga bari baratereranywe n’imiryango yabo, bari bamaze igihe barererwa muri Saint Vincent de Paul de Lendrede, mu Karere ka Musanze, basubijwe mu miryango yabo, igikorwa cyabaye ku wa kane tariki 5 Kamena 2025.

Umuryango Hope and Homes for Children ku bufatanye n’Ikigo cy’Igihugu gishinzwe imikurire no kurengera umwana (NCDA), hamwe n’Akarere ka Musanze, bafatanyije mu gushakira abo bana imiryango ibarera, kuyitegura mu buryo bw’imyumvire no kuyishyigikira mu bijyanye n’amikoro, mu rwego rwo gushyira mu bikorwa Politiki igamije gutuma abana barererwa mu muryango.

Karangwa Immaculée, Umuyobozi wa Hope and Homes for Children ku rwego rw’Igihugu agira ati “Abenshi muri aba bana baba baratereranywe n’imiryango yabo, ahanini biturutse ku bumuga baba bafite. Kubera uwo mwihariko kubashakira indi miryango ibitaho bidusaba kubanza gusuzuma mu bushishozi no gusesengura byimbitse urwego rw’ubushobozi bw’abagize iyo miryango, n’urwimyumvire bariho, yo kuba koko bashobora kwiyumva mu nshingano zo kwita kuri abo bana. Aho tubonye bikiri hasi tubafasha kugera ku rwego ruboneye rutuma babasha kubitaho”.

Mukandayisenga Domina, umukozi wa NCDA, avuga ko kurinda umwana no kumurengera, biri mu by’ibanze mu kumutegura kuzavamo umuntu ufitiye Igihugu akamaro, ari na yo mpamvu hakomeje gukorwa ibishoboka mu gushyira mu bikorwa Politiki y’Igihugu yo kurerera abana mu muryango.

Umuyobozi w’Akarere ka Musanze wungirije ushinzwe imibereho myiza y’abaturage Kayiranga Théobald, yashimye umuhate w’abafatanyabikorwa ndetse n’imiryango yakiriye abana mu gushyigikira gahunda ya Tubarerere mu muryango, no kuyishyira mu bikorwa.

Aboneraho kwizeza ubufatanye bw’Akarere mu kuzakomeza gukurikirana ko bitaweho biboneye, ubuyobozi bukaba kandi bugiye no kurushaho gukurikiranira hafi ahakigaragara imbogamizi zishingiye ku bana bamwe, bagihezwa mu miryango n’abakivutswa uburenganzira.

Abihayimana b’ababikira bo mu Kigo cya Mutagatifu Visenti wa Pawulo b’i Lenderede, usibye kuba bitaga kuri aba bana basubijwe mu miryango, hari n’ibindi byiciro by’abatishoboye batagira amikoro bitaho, harimo abarwaye indwara y’imidido, SIDA n’izindi ndwara zidakira, mu buryo butuma barushaho kwigirira icyizere no kwiyumva mu bandi.

Mabuti Muvara na bagenzi be bo mu Kagari ka Nyamicucu Mu Murenge wa Butaro, bishimira inzu batujwemo kuko ngo zigiye kubabera amasaziro meza.

Yagize ati: "Twari tubayeho nabi mu nzu nto z’ibyatsi, aho imvura yagwaga tukabundabunda ari nako itunyagira kubera ukuntu zari zarashaje zenda kuduhirimaho. Twararaga mu mbeho dutitira, bamwe tugahora kwa muganga kubera umusonga. Turashimira Nyakubahwa Perezida Paul Kagame watekereje kudukiza iyo mihangayiko yose akaba adutuje mu nzu nziza yatwubakiye zifite ibyangombwa byose twari dukeneye."

Undi muturage witwa Dundi Venant wahawe inzu na we yagize ati: "Twabaga mu duhema twari twaragondagonze dukoresheje ibiti, tukabaho mu myambaro y’ibiremo yadusaziyeho kubera ubuzima bubi bw’ubukene. Ibisimba hari ubwo byazidusangagamo tukarara turwana nabyo tudafite iyo tugana. Kuba twubakiwe izingizi zikomeye kandi zagutse, ni igitego dukesha imiyoborere myiza w’umukuru w’igihugu cyacu dushima Kagame, we ntwari idacogora ku rugamba. Natwe tugiye kumwitura kujya tuzikorera isuku tuzibungabunge zihore zisa neza, cyane ko ari na zo masaziro yacu.

Buri nzu ifite ibyumba bitatu n’uruganiriro, ikagira igikoni hanze, ubwogero ubwiherero; kandi buri wese mu bagenerwabikorwa yahawe ibikoresho by’ibanze bigizwe n’ibiryamirwa nka matela, ibikoresho byo mu gikoni n’iby’isuku mu rwego rwo kubafasha kwirinda indwara ziterwa n’umwanda.

Umuyobozi w’Akarere ka Burera Mukamana Soline, avuga ko ubukungu bw’igihugu buhera ku kuba umuturage atuye neza aho atekanye.

Ati: "Umutungo w’igihugu ugaragarira mu kuba abaturage babayeho neza batekanye. Izi nzu bahawe buri Murenge ugiye ufite umwihariko wawo mu buryo zubatswemo, butera abaturage ishyaka ryo gukomeza gukora cyane no kuzifatiraho urugero rwo kwishakamo ibisubizo".

"Muri ya gahunda yo kurwanya imirire mibi n’igwingira, iruhande rwa buri nzu twahubatse umurima w’igikoni hanaterwa ibiti nibura bitatu by’imbuto ziribwa, ku buryo mu minsi iri imbere bazaba babisarura bakabasha no kwihaza mu biribwa. Akarere n’abafatanyabikorwa tuzakomeza kubaba hafi mu kubashishikariza gufata neza ibi bikorwa, kugira ngo koko bazabibyaze umusaruro mu gihe kirambye nk’uko tunabifite mu nshingano gushyira umuturage ku isonga".

Inzu 348 iyi miryango itujwemo ziyongera ku zindi 32 zaherukaga kuzura mu cyiciro cyabanjirije iki, na zo zatujwemo indi miryango yari yarakuwe mu byayo n’ibiza; zose hamwe zikaba zaratwaye ingengo y’imari ingana na Miliyari 2 z’Amafaranga y’ u Rwanda.

Mu gukomeza gufasha kuva mu manegeka no gutandukana n’ingaruka z’ibiza, Akarere ka Burera gateganya kubakira indi miryango 259 inzu zo kubamo, imirimo izatangirana n’ukwezi kwa Nyakanga 2025. Ni umushinga uzashyirwa mu bikorwa ku bufatanye bwa MINEMA.

Abaturage bagaragaza ko hari ibikorwa byinshi izi nzu zije zisanga nk’imihanda, amavuriro, amazi meza amashanyarazi n’ibindi bagejejweho bizamura urwego rw’imibereho myiza n’ubukungu.

Ubushakashatsi bwerekana ko umuntu umwe kuri 20 afite indwara itandura

Ibi babigarutseho ku wa Kane tariki 29 Gicurasi 2025, ubwo bamurikaga ubushakashatsi bwibanze ku kugaragaza uruhare rw’ibiribwa abantu bafungura, mu kugirana isano ya hafi no guteza indwara zitandura, kugira ngo binafashe abantu gufata ingamba zafasha mu kuzirinda.

Muri ubwo bushakashatsi batangiye guhera mu mwaka wa 2019 ari itsinda ry’abarimu n’abanyeshuri 12, bakabukorera ku bantu 1247 bo mu turere 17 two mu Rwanda, bafite imyaka iri hagati ya 18 na 35 byagaragaye ko nibura umuntu umwe mu bantu 20 aba arwaye nibura indwara mwe mu ndwara zitandura.

Nsabimana Phenias umwarimu muri UR-CAVM akaba n’umwe mu bayoboye ubwo bushakashatsi, agira ati “Mu isesengura twakoze twasanze ibi biterwa no kuba ahanini abantu bitabira kwibanda ku gufata amafunguro twakwita ko ari ay’inzaduka cyangwa ay’iterambere agizwe n’ibikorerwa mu nganda. Ibitekanwe amavuta umunyu cyangwa isukari byinshi n’ibindi birungo byongerera amafunguro icyanga. Ibi usanga bigaragara ku mubare munini w’abantu batuye mu bice by’imijyi cyane cyane kurusha abo mu cyaro”.

Ati “Hari kandi kuba muri iki gihe abantu bamwe batitabira gufata amafunguro ahagije ahubwo bakibanda ku mafunguro nkene (macye kandi akennye ku ntungamubiri), kuruta uko ahubwo bakwitabira gufata amafunguro gakondo cyane ko yo byagaragaye ko adateje ikibazo”.

Mu bantu ubu bushakashatsi bwasanze bafite ibyago bifatwa nka nyirabayazana w’indwara zitandura nka Diyabete, Umutima, Kanseri, Asima, Stroke n’izindi harimo abasanganywe umubyibuho ukabije bangana na 4,6% , abafite ibiro byinshi bo bangana na 20,6%, abafite umuvuduko w’amaraso uri hejuru bangana na 18,1%, naho abangana na 23% bo bari bafite ibiro bidahura n’indeshyo yabo.

Muri rusange mu bakoreweho ubushakashatsi bose, bikaba byaragaragaye ko abangana na 4,5% bugarijwe ku kigero kiri hagati ya 3 kugeza kuri 5 by’ibyago bitera indwara zitandura.

Abanyeshuri n’abarimu bo muri UR-CAVM bagaragaje imwe mu mishinga y’ibiribwa bakozeho ubushakashatsi bikaba byafasha mu gukumira indwara zitandura

Bimwe mu biribwa bititabwaho aba bashakashatsi batangiye kubyongerera agaciro mu kunoza imirire.

Mu gukora ubwo bushakashatsi abarimu n’abanyeshuri bo muri UR-CAVM bakoze imishinga kuri bimwe mu biribwa abantu badakunze kwitaho mu mirire, aho bafashe ibijumba bifite ibara by’umuhondo bikungahaye kuri Vitamini A hamwe na Soya bivanze, babikoramo ifu ivangirwa mu mazi ashyushye bikabyara igikoma kinyobwa n’abantu b’ingeri zose.

Prof. Umuhozariho Marie Goreti uri mu barimu bakoze uwo mushinga agira ati: "Dushaka uburyo ibyo biribwa bikungahaye mu ntungamubiri nyinshi zifasha umubiri kugira ubudahangarwa abantu b’ingeri zose bitabira kubifata mu mafunguro yabo. Ni naho twahereye ku gufata ibijumba ndetse na soya nka bimwe mu bizwiho kuba byihagije muri zimwe mu ntungamubiri tubitunganya mu buryo buri wese mu rwego rwe yakwitabira kubigira mu mafunguro y’ingenzi yitaho".

Ubushakashatsi bugamije gufasha abaturage kwereka abaturage ibibazo biriho ubuyobozi bwa UR-CAVM, buvuga ko bugikomeje kubushyiramo imbaraga mu rwego rwo gutanga umusanzu mu ngamba zizamura udushya duhangwa mu rwego rw’ubuhinzi nk’uko byagarutsweho na Dr Musemakweli John.

Imbaraga nyinshi Leta ikomeje gushyira mu gukumira indwara zitandura n’ubwo zitanga icyizere cy’igabanuka ryazo, aba bashakashatsi bagaragaza ko abantu badakwiye kwirara mu kwitabira kugira imyitwarire yaba mu kunoza imirire abantu bafata umunsi ku munsi n’izindi ngamba zunganira imirire nko gukora siporo.

Mu byo abantu bagirwamo inama harimo no kwibanda ku mafunguro akize ku ntungamubiri no kwitabira gukora siporo

Abitabira imurikabikorwa ngo si umwanya w’ubutembere ahubwo ni ukwiga

Iryo murikabikorwa ryatangirijwe mu Murenge wa Cyanika guhera ku wa Kabiri tariki 28 Gicurasi 2025, ryateguwe n’Ihuriro ry’Abafatanyabikorwa mu Iterambere ry’Akarere ka Burera, JADF.

Abamurika uko ari 63, barimo abo mu bigo bya Leta, imiryango itari iya Leta n’ishingiye ku myemerere, abikorera, abanyenganda, sosiyere sivile n’izindi nzego bibanda ku bikorwa bishingiye ku guteza imbere ubuhinzi n’ubworozi, uburezi, ubuzima, ubugeni, ubucuruzi, serivisi n’ibindi byose biganisha ku gushishikariza abaturage guhindura imyumvire no kwikura mu bukene.

Muhorana Edouard ukuriye JADF y’Akarere ka Burera, avuga ko iki gikorwa ari umuyoboro ufasha abaturage guhindura imyumvire bakikura mu bukene.

Yagize ati “Hari abafatanyabikorwa bakora mu kwimakaza imibereho myiza harwanywa imirire mibi, abakorana n’abaturage binyuze mu matsinda agamije kubahindurira imyumvire ku kwikura mu bukene, abibanda ku kuzamura uburezi, abibanda ku bikorwa by’ubuhinzi n’ibindi. Abo bose baba baje ahangaha ngo berekane umurongo bakoreramo, kujya inama y’ibyo bashobora kuvugurura cyangwa gukomeza; byose biganisha mu kuzamura iterambere ry’abaturage”.

Ati “Aba ari n’umwanya wo kumenyana hagati yacu ubwacu, buri wese akaboneraho kwigira kuri mugenzi we ku cyo yahindura cyanoza imikorere ye ya buri munsi”.

Abamurika bagaragaza ibyo bakora bifite aho bihuriye no kuzamura imyumvire y’abaturage

Umuyobozi w’Akarere ka Burera wungirije ushinzwe Iterambere ry’Ubukungu Nshimiyimana Jean Baptiste, yagaragaje ko Akarere kadashobora kugira icyo kageraho mu kuzamura imibereho y’abaturage bako, hatabayeho uruhare rw’Abatanyabikorwa mu iterambere.

Yabashimiye umusanzu wabo mu kuzamura ibipimo by’imihigo n’izindi gahunda za Leta, binyuze mu nkingi y’ubukungu, Imibereho myiza n’Imiyoborere myiza; abibutsa kurushaho kunoza ibyo bakora, kugira ngo Akarere agakomeze kugera ku ntambwe nziza.

Mu gihe cy’iminsi itatu iri murikabikorwa rizamara, ngo abaturage bazajya baryitabira batajyanwemo no gutembera, ahubwo bamije kwiga.

Umwe mu babashije gusura ahamurikirwa uburyo bwo kwitabira ubuhinzi bubungabunga ubutaka yagize ati: “Bansobanuriye uburyo bwiza bwo guhinga hitabwa ku gusasira ibihingwa, bigafasha mu kurinda ubutaka bw’imusozi gutembanwa n’isuri, ifumbire ikaba yaguma mu butaka kandi ibihingwa bikagira isuku y’umwimerere”.

Ati “Ni uburyo bushya nabonye muri iri murikabikorwa bushobora gufasha abahinzi benshi muri twe, cyane ko n’umubare munini w’abatuye aka Karere aribwo butubeshejeho”.

Ubukorikori ntibwatanzwe

Nkurunziza Alphonse, Umukozi w’Intara y’Amajyaruguru ushinzwe Igenamigambi akaba yari anahagarariye Umuyobozi w’iyi Ntara mu gutangiza iri murikabikorwa ku mugaragaro, yagaragaje ko ibibazo bikibangamiye imibereho y’abaturage b’Akarere ka Burera, bishobora kubonerwa umuti habayeho gutahiriza umugozi umwe hagati y’abaturage, abafatanyabikorwa b’Akarere ndetse n’ubuyobozi ubwabo.

Ati “Gahunda za Leta kuzigiramo uruhare rufatika no kuzigira izacu byadufasha kwigobotora amakimbirane, imirire mibi, ibiyobyabwenge, magendu, urugomo n’ibindi byose bisubiza inyuma iterambere ry’umuturage”.

Yungamo ari “Biradusaba guhagurukira hamwe buri wese mu ruhande rwe agakora ibyo asabwa, akaba ijwi ryigisha abandi, kuko aribyo bya mbere bizatuma intumbero z’Akarere zigerwaho mu buryo burambye. Nimurushejo guhozaho ibyo abaturage bigishwa ntibikabe amasigaracyicaro.”

Buri mwaka Imurikabikorwa ryo kuri uru rwego ritegurwa na JADF nk’uko biteganywa n’Amabwiriza ya Minisitiri w’Intebe No 00/03/ yo kuwa 27/12/2013, agena ko umufatanyabikorwa wese, aba agomba kugaragariza abaturage ibyo akora.

Mu mwaka w’ingengo y’Imari wa 2024-2025 ibikorwa by’a JADF Burera byagize uruhare rungana na Miliyari 9 na Miliyoni zisaga 757.

Insanganyamatsiko y’umwaka wa 2025 y’iri murikabikorwa igira iti “Dukomeze gushyira umuturage ku isonga mu rugendo rwo kwikura mu bukene”. Biteganyijwe ko rizasozwa ku mugaragaro ku wa Gatanu tariki 30 Gicurasi 2025.

Imurikabikorwa ryatangijwe rizamara iminsi itatu

Iyo miryango uko ari 17, yabishyikirijwe mu rwego rwo gukomeza kuyiba hafi no kuyigaragariza ko itasigaye yonyine.

Rosette Dusabimana utuye mu mudugudu wa Mbatabata Akagari ka Mbatabata, nyuma yo gushyikirizwa izo mpano, yagize ati: “Uku kuba barishyize hamwe bakagira ishyaka ryo kuzamura imibereho y’umuryango wanjye bandemera ibiribwa n’itungo, birerekana urugero rwiza n’umuco abaturage bimitse wo kurwanya amacakubiri twimakaza urukundo no gushyira hamwe.”

Igikorwa nk’iki abaturage bo muri Kamubuga bagikora buri mwaka, mu gihe cy’iminsi 100 yo Kwibuka Jenoside yakorewe Abatutsi, aho nibura bakusanya amafaranga atari munsi ya Miliyoni 2 bakaremera imiryango yarokotse Jenoside yakorewe Abatutsi.

Umunyamabanga Nshingwabikorwa w’Umurenge wa Kamubuga Dunia Sa’ad agira ati: “Ni igikorwa bagize umuco, aho buri mwaka begeranya ubushobozi bakaremera imwe mu miryango yarokotse Jenoside yakorewe Abatutsi itishoboye. Tuboneraho gusaba abarokotse Jenoside yakorewe Abatutsi kudaheranwa n’agahinda, ahubwo bagahera ku mahirwe ahari bakayabyaza umusaruro biteza imbere.”

Yongeyeho ko muri iki gihe umuntu uremewe itungo akarifata neza ritanga ifumbire ihagije ikaba yamwunganira mu buhinzi, ryanororoka akagira ayo agurishaho, amafaranga avuyemo akayabyaza ibindi bikorwa bimufasha kuba mu nzira njyabukire.

Inzu yahihe n’ibyarimo birakongoka

Iyi nzu iherereye mu Mudugudu wa Sangano Akagari ka Kivugiza mu Murenge wa Muko mu Karere ka Musanze, yari isanzwe ikoreramo akabari na resitora.

Mu masaha y’igicamunsi cyo kuri uyu wa Mbere tariki 26 Gicurasi 2025, ubwo abakorera muri ako kabari bari mu kazi ko mu gikoni, gaz bari batetseho ngo yagize ikibazo ifatwa n’umuriro, waje kuyitera guturika ukwira mu nzu hose ku buryo ibyarimo byahiye bigakongoka.

Bisengimana Janvier, Umunyamabanga Nshingwabikorwa w’Umurenge wa Muko yagize ati "Yakoreragamo akabari. Ni iy’ahazwi nko kwa Vincent. Gaz yo mu gikoni ikimara guturika yakongeje igisenge cy’inzu umuriro ukwira mu bindi byumba byayo byose ibyarimo bihiramo".

Abamenyereye aka gace inkongi yabereyemo, bavuga ko iyo nzu iri mu zafatwaga nk’iz’icyitegererezo muri iyi santere y’ubucuruzi.

Umwe agira ati "Iri mu nzu z’icyitegererezo zikomeye twabonaga muri Muko. Igitangira gushya, umwotsi mwinshi n’umuriro byayicucumutsemo ku buryo buteye ubwoba. Abaturage bakoze iyo bwabaga bagerageza kuyizimya birananirana, biba ngombwa ko bahamagara Polisi. Iyi nkongi yaduteje igihombo gikomeye cyane".

Biravugwa ko hari n’izindi nzu byegeranye zatangirwagamo serivizi z’amacumbi n’izituwemo n’abaturage iyo nkongi yaba yangije.

Umuvugizi wa Polisi y’u Rwanda mu Ntara y’Amajyarugu SP Jean Bosco Mwiseneza, avugako bakimara kubimenya, Ishami rya Polisi y’u Rwanda rishinzwe ubutabazi no kuzimya inkongi y’umuriro ryihutiye gutabara no kuyizimya.

Ikindi gice iyo nkongi yibasiye ni depo y’inzoga na atelier y’ubudozi ya Koperative yitwa Ihogoza Muko.

Police y’u Rwanda igira Inama abaturage kugira ubumenyi ku mikoreshereze ya Gaz no kugira fire Extinguisher (Kizimyamoto) mu nzu zabo, kandi bakagira n’ubumenyi mu kuyikoresha. By’umwihariko ngo banakwiye kwitabira gushaka ubwishingizi bw’Inyubako zabo n’Ubucuruzi.

Ntiharamenyekana agaciro k’ibyangiritse, kandi nta muntu uramenyekana iyi nkongi yaba yakomereje cyangwa ngo ihitane.

Iperereza ku cyaba cyateye iyi mpanuka ryahise ritangira.

Polisi yahagobotse izimya uwo muriro n’ubwo hari ibyangiritse

VIDEO – Inkongi yibasiye inzu y’ubucuruzi bw’akabari na resitora i Musanze mu Mudugudu wa Sangano Akagari ka Kivugiza mu Murenge wa Muko, yari ifite ubukana ku buryo ibyari mu nzu byakongotse. Birakekwa ko inkongi yatewe n'iturika rya Gaz ubwo abakorera muri iyo nzu bari mu kazi… pic.twitter.com/C4Ggtt6L0F

— Kigali Today (@kigalitoday) May 26, 2025

Umunyamabanga wa Leta muri Minisiteri y’Uburezi, Irere Claudette

Ibi yabigarutseho mu nama igamije gusesengurira hamwe ibikibangamiye ireme ry’uburezi, yabereye mu Karere ka Musanze ku wa Gatanu tariki 16 Gicurasi 2025, igahuza abahagarariye inzego zifite aho zihuriye n’uburezi, bo muri zimwe muri Minisiteri, hamwe n’Ibigo bya Leta n’Ibyigenga byo mu Ntara y’Amajyaruguru.

Mu bana babarurwa nk’abataye ishuri, barimo abarivuyemo burundu, hakaba n’abiga inshuro nkeya mu gihembwe, ikindi gihe bakaba bari mu yindi mirimo irimo ijyanye n’ubucuruzi bwo mu masoko, ubucukuzi mu birombe by’amatafari cyangwa amabuye y’agaciro, ubuhinzi mu mirima irimo n’iy’ibyayi, abazerera mu muhanda, abakora mu bijyanye n’ubwubatsi, gusabiriza n’ibindi.

Uku guta ishuri bamwe mu bana barimo n’abakobwa bagaragaza ko bibagiraho ingaruka nyinshi. Umwe muri abo bana wavuye mu ishuri bikamuviramo ibishuko no guterwa inda, yaganiriye na Kigali Today.

Yagize ati “Ishuri nkirivamo bandangiye akazi ko mu rugo, ko kujya ndera umwana w’amezi atandatu waho. Mazeyo nk’ibyumweru bibiri batangira kujya bambwira gukora isuku yo mu kabari kabo kari kegeranye naho, nkajya mbyuka kare mbere yo gusigarana umwana nkabanza gukubura no kuhakoropa”.

Ati “Hashize amezi abiri nyiraho yatangiye kujya ansaba ko turyamana, nkamwangira, akajya akomeza kumpatiriza anshyiraho igitutu ko nintabikora azanyirukana, birangira nemeye kuryamana na we anantera inda. Akimenya ko yayinteye baranyirukanye njya kwandagara mu muhanda, kuko n’iwacu batemeye kongera kunyakira”.

Buri gihembwe inama yo kuri uru rwego ihuza izi nzego hagamijwe kuvuguta umuti w’ibibazo byugarije uburezi

Umunyamabanga wa Leta muri Minisiteri y’Uburezi Irere Claudette, asanga abafite mu nshingano uburezi, bakwiye kujya bakurikirana ko mu muryango ndetse no mu bigo by’amashuri hayobowe neza.

Ati “Ahanini ikigo cy’ishuri kigaragaramo ibibazo harimo n’icy’umubare munini w’abana basiba cyangwa bata ishuri, mwarimu cyangwa umuyobozi w’ikigo biba bivuze ko na bo batahaboneka uko bikwiye, ngo bakurikiranire hafi imyigire y’abana n’ibibazo byihariye bafite”.

Yungamo ati “Niba uhuye n’umwana bigaragara ko yasibye ishuri, kuki utakurikiranira hafi ngo umenye impamvu yatumye atajyayo? Nkeka ko atari ibintu bigoye kuba wafata umwanya wawe mu gihe uhuye n’umwana atagiye kwiga ukaba wamubaza icyabimuteye, kandi nabwo ntugarukire aho gusa, ahubwo utere n’indi ntambwe yo kumuhwitura mu buryo butuma arisubiramo”.

Mu zindi mbogamizi zikigaragara nk’izibangamiye ireme ry’Uburezi muri bimwe mu bigo by’amashuri yo mu Majyaruguru, ni umwanda ugaragara hamwe na hamwe aho abana bigira, ku mubiri no ku myambaro; hakaba ikibazo kirebana n’imyubakire y’ibyumba by’amashuri n’ibikoni bishaje, ubucucike bw’abanyeshuri, ibikorwa remezo nk’amazi meza n’amashanyarazi bikiri bicye n’ibindi.

Muri ibi n’ubwo hari ibyo Leta ikomeje gushakira igisubizo kirambye, Minisitiri Irere asanga hari n’ibyo ababyeyi ubwabo bakwikemurira badategereje uruhare rwa Leta, cyane ko inshingano z’uburere n’uburezi bw’umwana ari bo mbere na mbere zitangiriraho.

Ati “Hari ibibazo byoroheje nko kubungabunga isuku n’umutekano by’aho abana bigira, ababyeyi ubwabo n’abarezi bakagombye kwikemurira bidasabye andi mikoro ya Leta. Aho bishoboka nibashyireho akabo noneho n’ibikeneye gushorwamo ingengo y’imari bijye bisanga hari icyakozwe”.

Sinzi Marie Louise, umukozi ushinzwe uburezi mu Murenge wa Rushashi mu Karere ka Gakenke na Emmanuel Nizeyimana uyobora GS St Aloys Musanze I ryo mu Karere ka Musanze, bakaba bari mu bitabiriye iyi nama, bavuga ko mu ngamba batahanye, zirimo kujya bakurikirana umwana ku wundi mu kumenya imibereho ye mu muryango, uwo bigaragaye ko umuryango we udashoboye kubikemura, habeho kumufasha.

Buri gihembwe inama yo kuri uru rwego ihuza izi nzego hagamijwe kuvuguta umuti w’ibibazo byugarije uburezi, kandi nk’uko ubuyobozi bw’iyi ntara bwabigarutseho, ngo n’ubwo hakigaragara imbogamizi zigishakirwa ibisubizo, hari intambwe igenda iterwa ugereranyije no mu myaka ishize.

Abana ibihumbi 22 bataye ishuri mu Majyaruguru

Munderere yabaye umworozi w’intangarugero

Uyu mugabo w’imyaka 40 y’amavuko, yavukiye anakurira mu Mujyi wa Kigali, ariko ababyeyi be bakaba bakomoka mu gace akoreramo umushinga we. Ni mu Mudugudu wa Kanyegenyege, Akagari ka Kinyovu, Umurenge wa Ruganda mu Karere ka Karongi.

Nyuma yo kugororwa, agataha iwabo mu muryango, Munderere yigiriye inama yo gufata amafaranga yari yarazigamiye kujya aguramo ibiyobyabwenge no kuyinezezamo, ayongeranya n’andi yagiye abona, aguramo inka ebyiri, ari na zo afatiraho nk’itangiriro ry’ibikorwa agezeho, kuri ubu bibarirwa mu gaciro ka Miliyoni zisaga 300 z’Amafaranga y’u Rwanda.

Agira ati “Ibiyobyabwenge byari byarambase, kugeza ubwo n’ifaranga ryose nagiraga icyo narimazaga kwabaga ari ukurigura urumogi n’ibindi biyobyabwenge. N’iyo natekerezaga kugira ayo nzigama nta kindi kintu nashyiraga imbere uretse ibiyobyabwenge no kuyatemberamo ninezeza. Mbese navuga ko ibiyobyabwenge byari byaransaritse ku buryo ntashoboraga kugira undi mushinga ufatika ntekereza wanteza imbere”.

Ati “Nkigera mu rugo hari amafaranga nari narazigamiye gushora mu biyobyabwenge, ni yo nahereyeho nyungikanya n’andi nagiye mbona, bigeze mu mu 2020 aba aribwo ntangira umushinga, mpereye ku korora inka ebyiri, ku butaka bwahoze ari kwa sogokuru”.

Munderere ngo ntajya yibagirwa amagambo akubiye muri ‘slogan’ we na bagenzi be bigishijwe ubwo yari Iwawa igira iti “Kumva vuba birafasha, ukuri kurakiza, impinduka igufitiye akamaro”.

Ubutaka bwa Hegitari 10 Munderere amaze kugeraho abukoreraho ubuhinzi burimo n’ubw’ibigori

Ngo iyo yayatekerezagaho neza, byamuremagamo imbaraga no kwiyumvamo icyizere cy’uko aramutse adacitse intege, umushinga yari amaze gutangira hari aho wamugeza.

Ati “Icyo gihe ngitangira umushinga w’ubworozi hari aho nageraga ngatekereza kubivamo, cyane ko nk’ibiraro by’amatungo nari narabyubatse mu buryo buciriritse bwo kwirwanaho, hakaba ubwo amatungo arwaraguritse ntiyororoke uko bikwiye. Byageraga igihe nakwibuka ko nkiri Iwawa badutozaga kugira indoto no guharanira kuzigeraho, nkumva binsubijemo imbaraga zo gushaka igisubizo cy’ahagaragaye ikibazo”.

Muri uko korora inka zavuye kuri ebyiri ubu zigeze kuri 15, hakiyongeraho n’ingurube 100 yoroye.

Uko yagendaga yagura ubworozi bukabyara inyungu, ni na ko Munderere yongeraga ubuso bw’ubutaka bwe, nabwo buva kuri Hegitari ebyiri yatangiriyeho, none ubu ageze kuri Hegitari 10.

Muri bwo hari igice yororeraho inka n’icyo yororeraho ingurube. Ikindi gice agihingaho imbuto za Macadamia, Ibinyomoro, hakaba ahahinze Ibigori n’ahateye shyamba.

Mu rwego rwo kumwunganira mu buhinzi akora, umushinga SAIP wamufashije gushyiraho uburyo bwo kuhira ibihingwa biri kuri uwo musozi hakoreshejwe damu ivana amazi mu mibande; aho binamufasha guhangana n’imbogamizi z’ingutu zabangamiraga umushinga we z’imihindagurukire y’ibihe.

Munderere yorora n’ingurube akavuga ko zimufatiye runini

Umushinga wa Munderere washibutsemo Ikigo cyahaye urubyiruko akazi

Munderere kuri ubu ufite Ikigo cyitwa Ntare Community Farming gihuza ibyo bikorwa byose, aho yahaye abiganjemo urubyiruko akazi bagera kuri 25. Barimo abakora mu buryo buhoraho ndetse n’abakora nka nyakabyizi baturiye aho akorera uyu mushinga.

Musabyimana Eshter arakora, ku kwezi agahembwa amafaranga ibihumbi 50.

Agira ati “Ntarabona akazi ko guhinga muri iyi mirima, narasabirizaga, nanagira aho ndonka ikiraka cyo guhingira abandi, nta wandengerezaga amafaranga 600. Nabwo kandi bayampembaga nakoze amasaha menshi, imvune ari yose ndetse hari n’aho banyamburaga”.

Yungamo ati “Mu gukora hano, imibereho yarahindutse. Ndi wa muntu wigurira igitenge ntarindiriye kugisaba umugabo. Mituweli mbasha kuyishyura, nkabona ibitunga abana. Mbese urebye hari aho tumaze kugera”.

Iyamuremye Japhet, amaze imyaka ine akora akazi k’ubuzamu. Na we ahamya ko imibereho ye n’iy’abo mu muryango we igenda irushaho kuba myiza.

Uburyo bwo kuhira ibihingwa yashyizeho butuma ubuhinzi bwe budakangwa n’ibihe by’izuba ryinshi

Ngo intego afite ni ugukorana ubwitange n’umurava, kuko ngo iyo arebye urwego Munderere agezeho, amukuraho isomo ry’uko ikintu cyose umuntu yakora ashyizeho umutima, byanze bikunze cyamufasha kugera ku ntambwe nziza.

Umusaruro ukomoka ku matungo ndetse n’ibihingwa, Munderere awohereza ku masoko yo mu Mujyi wa Kigali; by’umwihariko nko ku gihingwa cya Macadamia, cyo arasarura zikagemurwa ku masoko yo hanze y’u Rwanda.

Kugeza ubu ibikorwa byose bikubiye mu mushinga we, Munderere avuga ko bibarirwa mu gaciro k’Amafaranga y’u Rwanda asaga Miliyoni 300, kandi ngo ateganya gukomeza akagura ibikorwa, kugira ngo birusheho kuzamubyarira n’irindi shoramari.

Mu bo yahaye akazi barimo n’urubyiruko ruvuga ko rutakiri mu mibereho mibi

Ni ibikorwa abo bahinzi bakomeje kugeraho biturutse ku mushinga ugamije gufasha abahinzi kongera umusaruro w’ubuhinzi, kuwushakira amasoko no kwihaza mu biribwa, SAIP II.

Uyu mushinga ubakurikiranira hafi mu kubazamurira imyumvire mu birebana n’ubuhinzi bukozwe kijyambere.

Bitwayiki Jean de Dieu wo mu mudugudu wa Kigarama Akagari ka Rurangazi Umurenge wa Nyagisozi, yatangiye ubwo buhinzi ahereye ku biti 500 bya Avoka yateye mu murima we abihawe n’umushinga SAIP.

Agira ati: “Nagiraga ikibazo cy’ubutaka busharira bigahurirana n’uko ikirere gikonja, nahinga imyaka ntiyere, ngera igihe ncika intege zo kongera kubuhinga kuko ntacyo nabukuragamo. Aho SAIP igereye inaha igatangira gukorana n’abahinzi nanjye ndimo, yampaye ingemwe 700 za Avoka, nteramo izibarirwa muri 500 mu rwego rwo kugerageza.”

“Mu kuzirinda kwangirika byansabye kubanza gushyira ishwagara mu murima, nkajya ntera imiti izirinda udukoko, nkurikiza n’izindi nama zose bagiye bangira, kugira ngo byibura zibashe kwihanganira ubutaka. Naje gusaruramo ibiro 400, nzigurisha ku kilo kimwe 400. Ikiza cy’izi avoka, n’iyo zihiye ntizibora vuba. Kandi noneho zikorwamo ibintu byinshi nk’amavuta, amasabuni n’ibindi, ku buryo twe nk’abahinzi zidufitiye akamaro."

Mu Mirenge Rwabicuma, Nyagisozi na Cyabakamyi Karere ka Nyanza, abahinzi baho bafashijwe kwitabira ubuhinzi bw’umwuga binyuze mu kubyaza umusaruro icyanya cya Nyanza ya 23 cyuhirwa, mu rwego rwo kongera ubuhinzi bw’ibihingwa byoherezwa hanze, birimo imiteja, water melon, urusenda ndetse na avoka.

Abahinzi baho bagaragaza ko ibyo bikorwa hari benshi byahaye akazi, baboneramo amafaranga kandi bahindura imyumvire bikura mu bukene.

Nko ku guteza imbere ubuhinzi bwa Avoka, byatangiriye ku kwigisha abaturage hifashishijwe imirima y’icyitegererezo, mu rwego rwo kuberekera no kubafasha gutandukana n’imihingire ya cyera, bakanoza ubuhinzi butanga umusaruro mwiza kandi wishimiwe ku isoko, kugira ngo bibafashe kujya babwikorera ku giti cyabo.

Sebazungu Modeste Umukozi wa RAB-SPIU Nyanza, mu mushinga SAIP, agira ati:
“Binyuze mu matsinda twabahurijemo, twashyizeho imirima y’icyitegererezo tubigishirizamo ubwo buhinzi, bikajyana no kubakurikiranira hafi uko babushyira mu bikorwa. Ubundi mbere inaha abaturage bahingaga avoka mu buryo bwa gakondo, igiti kimwe kiri aha ikindi hakurya, batanasobanukiwe uko zabyazwamo ishoramari ry’ubucuruzi."

Aha rero ngo bagenda babikangurirwa bikabafasha kuvugurura ubuhinzi binyuze mu kuzihinga ku buso bwagutse no kuhira, kuzisasira neza, kuzitera imiti izirinda udukoko; ubu abenshi bigenda bibafasha kuzamura umusaruro bakabasha guhangana n’ibibazo by’ubukene”.

Kugeza ubu mu Karere ka Nyanza, habarurwa ubutaka bwa Hegitari 400 bukorerwaho ubuhinzi bwa Avoka muri gahunda y’uyu mushinga ugamije kubigisha kuzihinga kijyambere.

Hegitari imwe nibura ihingwaho ibiti 277 biba bifite ubushobozi bwo kweraho ibiro bitari munsi ya 15 ku giti kimwe buri uko gisaruwe.

Abahinzi ibihumbi 56 babarizwa mu matsinda 256 bo mu Karere ka Nyanza, ni bo bakorana n’Umushinga SAIP.

Uru rugomero rufite ubushobozi bwo kuzigama Meterokibe Miliyoni ebyiri n’ibihumbi bisaga 400 z’amazi, kandi rukuhira imyaka iri ku buso bwa Hegitari 1100, iherereye mu Kibaya cya Muyanza mu Karere ka Rulindo.

Yayobotswe n’abahinzi kuva mu mwaka wa 2019, nyuma yo kubifashwamo n’Umushinga SAIP (Sustainable Agriculture Intensification and Food Security Project), ugamije gufasha abahinzi kongera umusaruro w’ubuhinzi, kuwushakira amasoko no kwihaza mu biribwa.

Bigirimana Ildephonse, ni umuhinzi usimburanya ubuhinzi bw’imboga abikoreye muri green house no hanze yayo. Mu myaka ine amaze akora ubwo buhinzi bwibanda ku kuhira, byamugejeje ku rwego rufatika nk’uko abivuga.

Ati: “Idamu itarubakwa, nahingaga amasaka, ibigori n’ibindi bihingwa bitaduhaga umusaruro. Kubera ukuntu nabikoraga mu kajagari nasaruraga ibyo kurya gusa, ukaba utambaza umusaruro runaka najyana ku isoko”.

Mu bwoko bw’imboga z’indobanure Bigirimana ahinga mu buryo bwa kjyambere, harimo Powavuro, imiteja, urusenda, ibitunguru n’amashu.

Aho Kigali Today yamusanze muri imwe muri Green House yahinzemo imeteja, ku buso bwa Are 4, yasobanuye uburyo mbere ataritabira kuhira imyaka no guhinga kijyambere, yahasaruraga ibiro bitarenga 50 by’ibishyimbo by’imishingiriro.

Ati: “Damu bakimara kuyubaka, badufashije kuyoboka ubuhinzi bw’umwuga, banaduha ibikoresho bidufasha kuhira imyaka, bigizwe n’amapompo ayobora amazi mu bihingwa, aho ubu mpinga ntarindiriye gutegereza igihe cy’imvura, kuko igihe cyose amazi aba ahari”.

“Ubu aho nakuraga uwo musaruro w’ibiro 50 by’ibishyimbo bishingirirwa, iyo mpahinze nk’imiteja mpasarura ibiro biri hagati ya 800 na toni imwe y’imiteja.”

Nzamuhabwanimana Isabelle, ukuriye Koperative Icyerekezo Muyanza, igizwe n’abahinzi borozi bahinga Ibigori n’Ibishyimbo, na we avuga ko umushinga wo kuhira imyaka wabafashije bikomeye.

Agira ati “Twari abahinzi batatanye bari baraheze inyuma kuko ubumenyi bucye twari dufite bwadufatanyaga n’imiterere y’aka gace yakundaga kuzahazwa n’izuba ryinshi, twahinga ntitweze”.

Binyuze muri uyu mushinga SAIP, aba bahinzi bibumbiye muri Koperative, barabahugura ku buryo aho bezaga nk’ibiro 800 by’ibishyimbo ubu bahasarura toni ziri hagati y’ebyuri n’eshatu.

Abahinga mu cyanya cyuhirwa n’Urugomero rwa Muyanza ni abo mu Mirenge ya Buyoga, Burega na Ntarabana; kugeza ubu bahinga kuri Hegitali 655.

Barimo ababarirwa mu 3745 bibumbiye muri Koperative ebyiri zibanda ku guhinga Imboga n’Imbuto; ziyongeraho izindi Koperative ebyiri na zo zibumbiyemo abanyamuryango bibanda ku buhinzi bw’Ibishyimbo n’ibigori bukorewe imusozi.

Anselme Hakizimana, Umukozi w’Umushinga RAB-SPIU mu Karere ka Rulindo ushinzwe ubuhinzi, avuga ko abahinzi bahoranaga imbogamizi z’imihindagurikire y’ibihe yarangwaga n’izuba ryavaga igihe kinini kandi ari na ryinshi, bigatuma bahinga sezo imwe.

Ati: “Ni na yo mpamvu haziyeho umushinga wo kubaka iyi damu, hashyirwaho n’uburyo bwo kujya tubakurikiranira hafi yaba mu bumenyi n’ibikoresho bifatika, mu rwego rwo guhangana n’icyo kibazo’.

Mu buhinzi bw’imboga zigizwe n’imiteja, inyanya, ibitunguru n’urusenda bwibandwaho n’abahinga mu cyanya cyuhirwa n’urugomero rwa Muyanza habonekamo umusaruro ugemurwa ku masoko yo mu Rwanda n’ayo mu mahanga. Banahinga ibindi bihingwa bigizwe n’ibigori, ibishyimbo, n’ibindi bitandukanye.

Uru rugomero rwubatswe binyuze mu mushinga LWH, ku nkunga ya Banki y’Isi, ari nabwo haje gushyirwaho umushinga SAIP ngo ufashe abahinzi kugira ubushobozi n’ubumenyi buhagijwe bwo kubyaza umusaruro icyo gikorwa remezo bari begerejwe. Umushinga wose kugeza ubu umaze gushorwamo Miliyari 19 z’amafaranga y’u Rwanda.

Abahinzi bose muri rusange bagezweho n’ibikorwa by’uyu mushinga mu Karere ka Rulindo, babarirwa mu bihumbi 11 bo mu Mirenge ya Buyoga, Burega, Ntarabana, Kinzuzi, Tumba, Mbogo, Cyungo na Base.

Kugeza ubu ngo haracyari imbogamizi z’ingo zigituye mu cyanya cyagenewe kuhirwa n’iyi damu, bikaba bituma n’ubuso bwakabaye bwuhirwaho bukiri butoya ugereranyije n’ubushobozi damu ubwayo ifite.

Kumara amezi atanu bakora badahembwa bibangamiye imibereho yabo

Abafite iki kibazo ni abakora akazi ko kuyacungira umutekano, abakora isuku ndetse n’ababitsi; aho bavuga ko amasezerano bagiranye n’Akarere, nta na rimwe yubahirizwa, nyamara bo bakora akazi bashinzwe badasiba.

Mu bakora kuri Poste de Santé zirimo iya Gatsibo ndetse n’iya Nyamicucu aho Kigali Today yabashije kugera, barimo uwagize ati “Turi mu bibazo bituremereye bitewe n’uko aho twagakuye amaramuko tuhakora ariko ntiduhembwe. Buri munsi binsaba kubyuka kare, saa moya nkaba ngeze mu kazi. Nkora isuku y’inyubako yose, nkatunganya ubusitani, nkakoropa ubwiherero, nkakubura imbuga ihazengurutse n’ibindi. Ni akazi nkora bukarinda bunyiriraho, kuva ku wa mbere kugera ku cyumweru”.

Ati “Ntibinshobokera ko nashaka akandi karaka ku ruhande cyangwa ngo ngire undi muntu ubimfasha, mu kwirinda kurenga ku masezerano. Ayo masezerano hagaragaramo ko Akarere kagomba kujya kaduhemba buri kwezi, ariko biratubabaza cyane kuba kugera hakiyongeraho andi mezi, dore ubu ari hafi kuba atandatu tudahembwa. Mu rugo abana barashonje, twababuriye ibikoresho by’ishuri, amadeni atumereye nabi mbese ni ibibazo bidukomereye”.

Undi mukozi ukora akazi ko gucunga umutekano wa Poste de santé na we agira ati “Twaratakambye ngo baduhembe, tubonye umwuka ugiye kudushiramo turarekera. Bagomye kuduha agaciro bakaduhembera igihe”.

Yungamo ati “Maze imyaka ine muri kano kazi, ariko nta na rimwe baraduhembera igihe. Baduhoza mu birarane by’imishahara, ku buryo tujya guhembwa inzara yatunogoye; nabwo kandi agasanga turi mu madeni ku buryo tuyahembwa tujya kuyishyura. Dusaba ubuyobozi ko iki kibazo bagishakira igisubizo kirambye, kuko rwose tubayeho mu buzima bwo gupfundikanya nyamara byitwa ko dukora”.

Muri rusange abo bakoze ni 56 bakora imirimo inyuranye, abafite ikibazo cyo kumara amezi asaga atanu badahembwa akaba ari 26.

Umuyobozi w’Akarere ka Burera Mukamana Soline, avuga ko Akarere kari muri gahunda yo gucutsa za Poste de Santé, zikajya zicungwa n’Ibigo nderabuzima kandi ngo ibirarane Akarere kabereyemo abatarishyurwa, mu gihe cya vuba ikibazo kizaba cyakemutse.

Ati “Duteganya kubishyura ibyo birarane mu gihe cya vuba, ndetse mu kwezi kumwe bizaba byakemutse. Ariko hagati aho twanamaze kunoza gahunda y’uko ibigo nderabuzima byajya bireberera za Poste de santé bikaba aribyo bizicunga”.

Akomeza agira ati “Impamvu ni uko mu busanzwe Poste de santé ubwazo hari amafaranga zinjiza ziyakuye mu bakiriya bazivurizamo. Kuba hari amafaranga zibasha kwinjiza, binasobanuye ko no guhemba abakozi bazo bishoboka. Uwo ni wo mujyo twifuza ko Poste de santé zakoramo, mu rwego rwo kwishakamo ibisubizo”.

Poste de Santé zubatswe mu Mirenge itandatu y’Akarere ka Burera ikora ku mupaka uhuza u Rwada na Uganda, muri gahunda yo kwegereza ubuvuzi hafi abaturage bahaturiye, no kubarinda ingorane bagiriraga mu kubushakira mu bindi bihugu, bajyagamo bibasabye kwambukiranya umupaka mu buryo bunyuranyije n’amategeko.

Bashyize indabo ku mva yo ku Rwibutso rwahoze ari Cour d’Appel ruruhukiyemo imibiri isaga 800 y’Abatutsi

Byagarutsweho mu Kwibuka ku nshuro ya 31 Jenoside yakorewe Abatutsi mu 1994, by’umwihariko abahoze ari abaganga bahakoraga n’abo mu bigo Nderabuzima byari bishamikiye kuri ibi Bitaro, abarwayi abarwaza n’abandi bari babihungiyemo.

Mukapasika Agnès, umwe mu barokotse Jenoside, uvuga ko bakimara kumva iby’ubu bushakashatsi, biruhukije kuko ngo bizatuma haboneka amakuru y’ukuri ku hajugunywe imibiri y’ababo, kugira ngo bashyinguwe mu cyubahiro bambuwe.

Ati “Impamvu ubwo bushakashatsi tubwitezeho igisubizo, ni uko ubwo buzaba bwatangiye gukorwa, abahanga bazakurikirana bagasesengura byimbitse iby’abantu bacu babyiciwemo, kugeza ubu tutaramenya aho bajugunywe”.

“Twari tumaze igihe kinini dutegereje inzira iyo ari yo yose twamenyeramo amakuru, yadufasha kubona imibiri y’abacu tukayishyingura mu cyubahiro. Inzego zose zitureberera yaba Leta ubwayo, IBUKA, Ingabo zaturokoye barahari, dufite icyizere ko igihe kizagera ibyo bikagerwaho”.

Umuyobozi mukuru w’ibitaro bikuru bya Ruhengeri Dr Muhire Philbert, avuga ko ubu bushakashatsi buzatuma hamenyekana amakuru nyayo y’uko Jenoside yakorewe Abatutsi muri ibi bitaro yagenze, uruhare rwa buri wese mu bayikoze, hakanamenyekana amakuru ku mibiri y’abazize Jenoside bahiciwe bakaburirwa irengero.

Agira ti “Ibijyanye n’imyiteguro yo gutangira ubwo bushakashatsi twarabitangiye, duhereye ku kuvugana n’Akarere, Intara na MINUBUMWE mu buryo ki bwakorwamo”.

Ati “Ubwo rero icyo duteganya gukora ni ugushakisha amakuru y’ibanze no kuyahuza. Imyaka 31 ishize Jenoside yakorewe Abatutsi n’ubwo ari myinshi, ariko n’abakwiye gutanga amakuru y’ubwicanyi bwabereye muri ibi bigo by’ubuvuzi byanze bikunze barahari”.

Yungamo ati “Tuzifashisha cyane cyane ibyiciro birimo iby’abari abakozi bahakoraga, abageraga mu bitaro muri ibyo bihe, abarokotse Jenoside yakorewe Abatutsi, abatarahigwaga bakoraga mu bitaro n’abandi. Kuba kugeza ubu hataramenyekana byimbitse amateka ajyanye n’uko Abatutsi bicirwaga muri ibi bitaro n’aho imibiri yabo iri, natwe nk’urwego rw’ubuvuzi tubibona nk’icyuho gikomeye dukwiye gukora ibishoboka kikavaho”.

Dr Muhire Philbert (iburyo) avuga ko ubu bushakashatsi bwari bukenewe cyane

Visi Perezida wa IBUKA mu Karere ka Musanze, Fidèle Karemanzira, avuga ko biteguye gutanga umusanzu wabo muri ubu bushakashatsi no gufatanya n’izindi nzego bireba, kugira ngo imitima y’abahaburiye ababo yururuke.

Umunyamabanga Nshingwabikorwa w’Intara y’Amajyaruguru Pascal Ngendahimana, na we yanenze bikomeye ubugwari bw’abadatanga amakuru y’aho imibiri y’abazize Jenoside biciwe mu Bitaro yajugunywe nyamara bayazi, abasaba kuvugisha ukuri kwafasha mu kuyibona igashyingurwa mu cyubahiro.

Yasabye urubyiruko kugira intego yo kumenya amateka u Rwanda rwanyuzemo, kuko bizarufasha gukura ruyazi neza, runasobanukiwe uko rwakwirinda abaruyobya, n’uwarushora mu cyerekezo kitari cyo.

Abazi amateka yo mu bitaro bikuru bya Ruhengeri, mu gihe cya Jenoside yakorewe Abatutsi mu 1994, bavuga ko benshi mu Batutsi babihungiragamo baturutse mu Makomini atandukanye bafite ibikomere, bakeneye ubufasha bw’ubuvuzi ariko bagatereranwa kugeza ubwo bicwa, bamwe bakarohwa mu mugezi wa Mukungwa, hakaba n’abataramenyekanye aho bajugunywe.

Ngo bamwe mu bakozi b’ibi bitaro bazaga mu kazi bitwaje imbunda, bakazirenzaho amataburiya babaga bambaye mu gihe bavura abarwayi, ibikorwa bifatwa nk’ubugwari no gutandukira amahame y’umwuga w’ubuvuzi, no gutandukira inshingano zo kwita ku barwayi batagize uwo barobanura.

Ni igikorwa cyitabiriwe n’abo mu ngeri zinyuranye mu Karere ka Musanze

Imiryango ifite abana bari mu mirire mibi yirojwe inkoko zitera amagi ngo bajye babona ibyunganira amafunguro bategurira abana

Ubwo bukangurambaga butangijwe ku ntego igira iti "Tozwa kurya indyo yuzuye ubigizemo uruhare", bwatangijwe ku wa Mbere tariki 21 Mata 2025, mu Kagari ka Gatsibo mu Murenge wa Butaro, aho Abagore n’Urubyiruko bo mu Rugaga rushamikiye ku muryango RPF-Inkotanyi, bifatanyije n’abaturage baho gukora uturima tw’igikoni, kugaburira abana indyo yuzuye; ndetse imiryango 50 ifite abana bugarijwe n’imirire mibi bayoroza inkoko zitera amagi.

Ni igikorwa biyemeje gushyiramo imbaraga mu buryo budasanzwe, aho bihaye igihe cy’amezi atatu, yo kuba abana bose bari mu mirire mibi, muri ako Karere ka Burera bazaba bayivuyemo.

Chairman w’Umuryango RPF-Inkotanyi mu Karere ka Burera, Jean Pierre Bizimana, akomoza ku nzira ibi bazabinyuzamo yagize ati "Abagore n’urubyiruko babarizwa mu Ngaga zishamikiye kuri RPF-Inkotanyi biyemeje guhaguruka ikibazo cy’imirire mibi n’igwingira bakakigira icyabo”.

Ati “Ubu bukangurambaga bwabanjirijwe n’ibarura babanje gukora mu minsi ishize harebwa abana bafite ibyo bibazo, bamaze kumenyekana habaho kwiyemeza ko buri munyamuryango nibura afata umwana umwe, akazajya amakurikirana hafi umunsi ku munsi, akamenya ubuzima bwe, uko umuryango akomokamo ubayeho yaba mu bijyanye n’amikoro cyangwa imyumvire, ahagaragaye icyuho akazajya akora ibishoboka kikavaho".

Abana bagaburiwe indyo yuzuye

Yungamo ati "Umwana ufite imirire mibi iyo akurikiranwe neza akitabwaho uko bikwiye harimo no kumugaburira indyo yuzuye, abasha kuyivamo kandi ntibitwara igihe kirenze ukwezi. Twe rero twihaye intego yo gukurikirana abo bana mu gihe cy’amezi atatu, kugira ngo tuzabe twizeye neza ko ubuzima bwabo bumeze neza, ari nako tugenda twigisha ababyeyi babo mu buryo bwo kubafasha guhindura imyumvire y’uburyo babitaho".

Yongeraho ko mu nkingi z’ingenzi eshatu zikubiye muri Manifesto ya RPF-Inkotanyi, yo muri Manda y’imyaka itanu, harimo ijyanye no kwita ku mibereho myiza y’abanyarwanda.

Ati "Guhuza imbaraga muri ubu buryo ngo imire mibi icike, byafasha abana gukura neza bafite icyo bazaba bamariye igihugu kuko bazaba barateguwe hakiri kare".

Abagore n’urubyiruko, bafatwa nk’inkingi ya mwamba mu kubaka umuryango utekanye, uzira imirire mibi n’igwingira.

Kuba ubu bukangurambaga babutangije, byongeye ari n’abantu babarizwa mu Muryango RPF-Inkotanyi ufatwa nka moteri ya Guverinoma y’u Rwanda, abaturage babyitezeho kubatera ingabo mu bitugu mu kubafasha kwihutisha ingamba zo guhangana n’ikibazo cy’imirire mibi n’igwingira ry’abana.

Mukajyambere Godeliva agira ati "Bamwe muri twe twari twariraye tutakigaburira abana bacu indyo yuzuye bitewe n’ibi bihe usanga duhugiye mu bindi dushakisha imibereho. Twishimiye ko aba bagore n’urubyiruko badusanze inaha bakaza kutwibutsa kuvugurura imyitwarire ibangamiye abana bacu. Turikubita agashyi, tuve mu bunebwe twite ku bituma bagira uburenganzira busesuye harimo no kugaburirwa neza uko bikwiye".

Ababyeyi bashishikarijwe kwikorera uturima tw’igikoni

Mu bindi abagore n’urubyiruko bazibandaho harimo no gushishikariza abaturage kujya bitabira gupimisha imikurire y’abana buri wa Kane w’icyumweru cya gatatu cya buri kwezi, uyu ukaba ari umunsi mu Karere ka Burera hose abana bapimwa imikurire. Ikigamijwe akaba ari ukugirango bibafashe gukurikiranira hafi uko ubuzima bwabo buhagaze.

Mu Karere ka Burera Kugeza ubu habarirwa abana 126 bafite imirire mibi. Muri aba abagera kuri 15 ni abo mu Murenge wa Butaro, byagaragaye ko bafite imirire mibi ihutiyeho.

Ni mu gihe Akagari ka Gatsibo ubu bukangurambaga bwatangirijwemo, ari ko kari imbere y’utundi Tugari tugize Akarere ka Burera mu kurangwamo umubare munini w’abana bafite imirire mibi n’igwingira.

Ubusanzwe Akarere ka Burera kagenderaga ku gishushanyombonera cyakozwe ku rwego rw’igihugu kizwi nka National Land Use and Development Master Plan (NLUDMP 2050) cyasohotse mu mwaka wa 2020; iki ngo nticyari cyagahujwe n’imiterere y’aka Karere mu buryo bwimbitse nk’uko byagaragajwe n’Umuyobozi w’Akarere ka Burera wungirije ushinzwe iterambere ry’ubukungu Nshimiyimana Jean Baptise.

Yagize ati: “Nk’ubu dufite abashoramari babarirwa mu 100 bagiye bagura ubutaka, ariko babura uko babwubaka, kubera ko bazitiwe no kuba ibice buherereyemo, uyu munsi hakibarwa nk’ahantu hakorerwa ubuhinzi, nyamara twifuza ko haba agace k’ubukerarugendo”.

Mu gukomeza kugaragaza icyo biteze kuri iki gishushanyo mbonera kigiye gutunganywa yagize ati:

“Tucyitezeho kugena neza ahantu nyaho hazakorerwa ubuhinzi, imiturire, ishoramari, ubukerarugendo, uburezi n’ibindi bitandukanye. Kizaturinda imikoreshereze y’ubutaka mu kajagari, abagishyira mu bikorwa aribo baturage nubuyobozi biturinde kwirengagiza amabwiriza n’amategeko agishingiyeho, bityo bidufashe kuzamura iterambere ry’aka Karere”.

Umushinga wo gukora iki Gishushanyombonera uzamara amezi umunani; ukaba uri gukorwa ku bufatanye bw’Ikigo Mpuzamahanga cyitwa Global Green Growth Institute (GGGI) gisanzwe gifatanya n’u Rwanda mu mishinga y’iterambere, kurengera ibidukikije, no guhangana n’ingaruka z’imihindagurikire y’ikirere.

Iki gikorwa kinahuriweho n’Ikigo cy’Igihugu Gishinzwe Ubutaka, ndetse n’Ikigo cy’Igihugu cyo Kubungabunga Ibidukikije (REMA).

Rutagengwa Alexis, umukozi mu Kigo cy’Igihugu gishinzwe ubutaka mu ishami rishinzwe iby’imikoreshereze y’ubutaka, avuga ko ikusanyamakuru ryo kunonosora igishushanyombonera rizakorerwa mu Tugari n’Imirenge, hagamijwe guha abaturage urubuga rw’ibitekerezo by’ibyo babona byakwibandwaho.

Ati: “Iyo tugendeye ku makuru akubiye mu gishushanyombonera cy’imikoreshereze y’ubutaka cyo ku rwego rw’Igihugu, tubona ko Akarere ka Burera ari Akarere keza, kaberanye n’Ubuhinzi, Ubukerarugendo n’Ubucuruzi bwambukiranya imipaka, bikenewe ko hanozwa ibigendanye n’ishoramari n’ibikorwa remezo bibishingiyeho”.

“Igishushanyombonera cy’Akarere kizashingira ku mirongo migari ikubiye mu gishushanyombonera cyo ku rwego rw’igihugu, isesengurwe mu buryo bwagutse, kigene ubutaka bwakorerwaho ibikorwa runaka.”

Abaturage bagaragaza inyota bafitiye igishushanyombonera cyane ko barimo n’abafite ibikorwa byari byaradindiye kubera ko kitari cyagatunganyijwe.

Nzavugimana, wo mu Mudugudu wa Rutuku Akagari ka Kabona mu Murenge wa Rusarabuye agira ati: “Ibiro by’aka Karere bikimara kuzura abantu benshi twaguze ibibanza ahabyegereye. Mu gushaka kubyubaka byabaye ngombwa ko twandika dusaba uburenganzira, none umwaka urinze ushira baratwirengagije”.

“Ubu ibibanza byarengewe n’ibihuru. Twari twarashoye amafaranga harimo n’abari barayagujije muri banki none yadupfiriye ubusa. Abayobozi iyo tubabajije, batubwira ko ibyo kuduha uburenganzira bwo kubaka bikiri mu nyigo zo kubanza kureba uko bakora igishushanyombonera, twarategereje turaheba”.

Akarere ka Burera gafite ubuso bwa Kirometerokare 645. Kagizwe n’Imirenge 17, ituwe n’abaturage bangana na 387,729 ku bucucike bw’abantu 601 kuri Kirometerokare 1.

Imibare y’Ikigo cy’igihugu cy’Ibarurishamibare yo mu mwaka wa 2022, igaragaza ko abagore bihariye 52,3% mu gihe abagabo bangana na 47,7%.

Bibanda ku mirimo irimo ijyanye n’ubucuruzi bwambukiranya imipaka, ubuhinzi n’ubwoborozi n’ubucukuzi bwy’amabuye y’agaciro.

Iby’uko iyo modoka ya DAIHATSU ipakiye inzoga zitujuje ubuziranenge zizwi ku izina rya "Akamashu" Polisi yabimenye ibikesha amakuru yahawe n’abaturage.

SP Mwiseneza, Umuvugizi wa Polisi y’u Rwanda mu Ntara y’Amajyaruguru, yavuze ko inzoga zikimara gufatwa zamenewe mu ruhame imbere y’abaturage, banigishwa ububi bwazo ku bukungu n’imibereho by’abishora mu kuzinywa.

Yongeyeho ko umugabo w’imyaka 27 wari uyitwaye yahise ashyikirizwa Police Station ya Busogo, kugira ngo yigishwe anatange amande hashingiwe ku cyo amategeko ateganya ndetse n’imodoka ikaba ari ho yajyanwe.

Polisi y’u Rwanda ishima ubufatanye bw’abaturage mu gukumira ibyaha no gutanga amakuru y’ababyishoramo, ikaboneraho no kuburira abacuruza inzoga zitujuje ubuziranenge kubireka burundu kuko atari ibikorwa byabagirira akamaro.

Abakwirakwiza inzoga zitujuje ubuziranenge inzego zishinzwe umutekano n’ubuyobozi, ntizisiba kugaragaza ko bagira uruhare mu guhungabanya umutekano no gushyira ubuzima bw’abazinywa mu kaga, ari na yo mpamvu abaturage bagirwa inama yo kujya bihutira gutanga amakuru ku gihe, ku bantu bacuruza inzoga zitujuje ubuziranenge kugira ngo bajye bafatwa bigishwe.

Bafatanywe toni 40 z’ibishyimbo

Abo bantu babyambutsaga babinyujije mu nzira zitemewe zizwi nka panya, bagiye bafatwa mu bihe bitandukanye.

Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza, yagize ati “Ibyinshi mu byo bafatanwe, bagiye babikura mu Ntara y’Iburasirazuba, bakabitunda n’imodoka zabijyanaga muri utwo Turere, bakabibika mu ma depo ya bamwe mu bacuruzi begereye imipaka”.

Yungamo ati “Mu makuru y’ibanze tumaze gukusanya, ni uko ababirangurira kuri izo depo bagendaga bakuraho bike bike, bakabiha ababitunda ku mutwe, bakabinyuza mu nzira zitemewe, bakajya kubigurisha mu bihugu by’abaturanyi”.

Mu bikorwa byo gutahura abo bantu, hafatiwemo ibishyimbo by’ubwoko butandukanye burimo ibyitwa Rutuku, Injyamani n’ibyo abaturage bakunze kwita Colta. Ibimaze gufatwa uhereye muri Mutarama kugeza muri Werurwe 2025, bipima Toni 40 n’ibiro 321.

Ababyambutsa ngo baba bakurikiyeyo igiciro babigurishaho kiri hejuru, ugereranyije n’iby’aho baba babivanye; nyamara ngo ibi ni ukwibeshya gukomeye nk’uko SP Mwiseneza yakomeje abivuga.

Ati “Abaturage barasabwa kureka gushukwa n’ibiciro babigurishaho bakurikiye ifaranga, kuko bituma babyimaraho burundu bagasigara imiryango yabo ishonje. Iyo babyimazeho byanze bikunze barahindukira bagakenera ibyo kwifashisha mu ngo, byaba ngombwa ko bajya kubigura ku masoko bikabahenda”.

Ati “Nanone kandi ziriya nzira banyuzamo magendu, ntizitekanye kuri bo, kuko igihe kinini bazihanganiramo n’inzego zishinzwe kuyikumira, bamwe bikabaviramo kubijugunya mu bihuru bagahomba, abandi bagafatwa bagafungwa, iterambere ryabo rikadindira”.

Bafunzwe bazira magendu y’ibishyimbo

Yungamo ati “Polisi y’u Rwanda yamaze gutahura imigambi n’amayeri yose bakoresha, ntizabihanganira, ikomeje gushakisha n’abasigaye ngo babiryozwe”.

Abafashwe bose bafungiwe kuri za Station Polisi ziherereye muri utwo Turere twombi.

Polisi y’u Rwanda ikangurira abaturage kuyitungira agatoki, no kujya bihutira gutanga amakuru y’abo bazi bishora mu bikorwa bya magendu, kuko babangamiye iterambere ry’Igihugu n’iry’umuryango.

Minisitiri w’Ibikorwa Remezo, Dr Jimmy Gasore

Minisitiri Gasore, yagaragaje ko gusigasira umutekano atari akazi k’inzego zishinzwe umutekano zonyine, ko ahubwo n’abaturage bibareba.

Yagize ati “Igihugu gitekanye kandi giteye imbere nticyabigeraho abaturage bacyishora mu bikorwa bihungabanya umutekano. Haracyagaragara abantu bishora mu bujura, ibiyobyabwenge no kwambukiranya imipaka mu buryo butemewe. Dukangurira abaturage kubyamagana no kubigendera kure, kuko bigira uruhare runini mu kumunga umutekano w’Igihugu”.

Ati “Ubufatanye n’uruhare rufatika rwa buri wese mu kubaka Igihugu kirangwa n’iterambere birakenewe. Ibyo twabigeraho dukoreye hamwe kandi dushyize imbaraga mu kwibungabungira umutekano, dusesengura ibyawusubiza inyuma tukabyirinda hakiri kare”.

Yagaragaje ko Leta hari imbaraga nyinshi ikomeje gushyira mu kuzamura iterambere ry’abaturage, binyuze mu kububakira ibikorwa remezo birimo imihanda, amashuri, ibiraro, amashanyarazi, amazi meza, amavuriro n’ibindi bitandukanye. Abaha umukoro wo kubisigasira babifata neza, kugira ngo n’abazabakomokaho bazabisange na bo bakomeze babibyaze umusaruro.

Mu gutangiza iyi gahunda, inzego z’Umutekano zatanze inkunga ya Miliyoni 10 z’Amafaranga y’u Rwanda ku baturage bahoze mu bucuruzi bwambukiranya imipaka mu buryo bunyuranyije n’amategeko, bibumbiye muri Koperative yitwa ‘Twiheshe Agaciro Cyanika’, aya mafaranga akaba ari ayo kubunganira mu buhinzi bw’ibirayi n’ibigori iyi Koperative ikora.

Iyi gahunda Inzego zishinzwe umutekano zatangije mu Karere ka Burera, abaturage bishimira ko ari imbarutso yo kwivana mu bukene, bakagera ku rwego rwiza rw’imibereho.

Abayobozi bashyikiriza koperative Twiheshe Agaciro Cyanika Sheki ya Miliyoni 10Frw azabunganira mu buhinzi

Murekatete Julienne, wahoze mu bucuruzi bwa magendu, n’ibindi byaha bishingiye ku kwambukiranya umupaka mu buryo bunyuranyije n’amategeko akaza kubivamo, agaruka ku ngorane yagiye abugiriramo.

Yagize ati “Nahoraga ncengacengana n’inzego z’umutekano, zikanyirukaho amanywa n’ijoro zintesha magendu nabaga nanyujije mu nzira za panya, nzikuye muri Uganda. Natundaga amashashi, kanyanga n’ibindi biyobyabwenge, narabaye imbata yabyo. Ikibabaje kurushaho ni uko igishoro cyose nabaga nashyizemo, cyahindukaga imfabusa”.

Ati “Njye n’umugabo twahoraga mu ntonganya, abana batarya kuko ibyo nabaga narembetse byabaga byafashwe. Bwari ubuzima bw’ubwoba budashira, ku buryo byageze n’aho nkurizamo kurwara Diyabète, ahanini ntekereza ko nayitewe n’umuhangayiko no kutiyitaho mu by’imirire".

Uyu mugore kimwe na bagenzi be bahuriye muri Koperative Twiheshe Agaciro Cyanika, ni kenshi bahoraga bafungirwa mu Kigo Ngororamuco, ari naho bungukiye igitekerezo cyo kwishyira hamwe, babikesha inyigisho bagiye bahabonera, ziganisha ku kugaragaza ububi n’ingaruka z’ibikorwa by’ubucuruzi bwo kwambukiranya imipaka mu buryo bunyuranyije n’amategeko.

Muri iki gikorwa kandi hari Umuyobozi Mukuru wa Polisi y’u Rwanda CG Félix Namuhoranye, hamwe na Lt Col Charles Kamari ukuriye Inkeragutabara mu Ntara y’Amajyaruguru n’abandi bayobozi mu nzego zitandukanye.

CG Félix Namuhoranye

CG Félix Namuhoranye, mu butumwa yagejeje ku baturage bwibanze ku kubashishikariza gukumira ibyaha.

Ati “Abaturage banywa ibiyobyabwenge, abakora uburembetsi birirwa birukankana n‘inzego zishinzwe umutekano, abo bose babayeho mu buzima budatekanye. Uko tugira abarembetsi cyangwa abanywa ibiyobyabwenge benshi, ni na ko ibyaha bigwira kandi bigateza umutekano mucye”.

Ati “Kuba ijisho ribirwanya rero abaturage bafatanyije n’ubuyobozi n’abashinzwe umutekano, bifasha abantu gukora ibyabo bafite ituze”.

Mu Karere ka Burera kuva ibikorwa byatangira by’ubufatanye bwa Polisi n’Ingabo mu guteza imbere abaturage, ni byinshi abahatuye bishimira ko byabafashije kwigezaho, aho ubu batakirarikira kwishora mu burembetsi n’ibindi bitemewe n’amategeko, bahozemo mbere batarahindura imyumvire.

Koperative Twiheshe Agaciro yahawe Miliyoni 10 z’Amafaranga y’u Rwanda, igizwe n’abanyamuryango 70 b’abagabo n’abagore batuye mu Murenge wa Cyanika, bafashe umwanzuro wo kwitabira ubuhinzi bw’ibirayi n’ibigori bahinga kuri Hegitari imwe, guhera mu mwaka wa 2024, nyuma yo kwitandukanya n’ubucuruzi bwambukiranya umupaka, bakoraga mu buryo butemewe n’amategeko ndeetse n’ibiyobyabwenge.

Umuvugizi wa Polisi y’u Rwanda ACP Boniface Rutikanga, yavuze ko ibikorwa Polisi ndetse n’Ingabo z’u Rwanda zatangije, bizamara amezi atatu bibera mu Turere dutandukanye two mu gihugu; aho bazitsa ku kubakira imiryango 70 itishoboye inzu, hubakwe amarerero 10 (ECDs), ibiraro 13 hagamijwe koroshya ubuhahirane.

Abayobozi batandukanye bitabiriye icyo gikorwa

Inzego z’umutekano kandi zizatanga ubuvuzi bw’indwara zitandukanye hirya no hino mu Gihugu, haterwe nkunga ama Koperative y’Imboni z’impinduka, abaturage bazegerezwa amazi meza mu kwimakaza isuku n’isukura n‘ibindi bikorwa binyuranye, byose hamwe bizashorwamo Miliyari 2 na Miliyoni zisaga 700Frw.

ACP Rutikanga yavuze ko umutekano utagaragarira gusa mu kuba abaturage barindishijwe imbunda n’amasasu, ko ahubwo unashingiye ku kubegereza ibikorwa baheraho bagira ubuzima bwiza mu mibereho yabo ya buri munsi.

Iyi gahunda ibaye hitabwa ku nsanganyamatsiko iri mu murongo wo kwizihiza imyaka 31 ishize u Rwanda rwibohoye, n’imyaka 25 y’ubufatanye bwa Polisi, Ingabo hamwe n‘abaturage mu iterambere ry’Igihugu.

Ibyishimo byari byose ku baturage

Abantu barakangurirwa kureka gucukura amabuye y’agaciro mu buryo butemewe

Mu bugenzuzi bugamije gukumira abakora ubucukuzi bw’amabuye y’agaciro, bukorwa mu buryo butemewe n’amategeko, Polisi y’u Rwanda n’izindi nzego bifatanya barimo bakorera mu Karere ka Rulindo, mu masaha y’urukererera rwo ku wa Gatandatu tariki 15 Werurwe 2025, nibwo abo bantu bafatiwe mu cyuho bahita batabwa muri yombi.

SP Jean Bosco Mwiseneza, Umuvugizi wa Polisi y’u Rwanda mu Ntara y’Amajyaruguru yagize ati “Ibirombe bagiye bafatirwamo bimaze igihe byarafunzwe, ndetse ubu hahinduwe imirima abaturage bahinga. Abo bantu bahengera amasaha ya nijoro bakajyamo bakangiza imyaka y’abaturage, bagacukura bagambiriye gushakamo amabuye y’agaciro yo mu bwoko bwa Zahabu”.

Yungamo ati “Uko kuba hatemerewe gukorerwa ubucukuzi ni uko Leta yagenzuye igasanga bidakwiye ihafunga burundu. Ubwo rero abantu nk’abo babirengaho bakabwishoramo. Ku ruhande rumwe babangamiye ibidukikije, havamo ko banangiza imyaka y’abaturage. Ikindi gikomeye ni uko no muri uko gucukura bihishahisha, ntibaba bikingiye, ibyo byose biteza ingaruka mu buryo bumwe cyangwa ubundi”.

Abafashwe bose bafungiye kuri Polisi Station Bushoki, kandi ibikorwa byo gushakisha n’abandi bakibyishoramo Polisi irabikomeje, dore ko n’abaturage badasiba kugaragaza ko babangamiwe n’ibyo bikorwa.

Polisi y’u Rwanda iraburira abishora mu bucukuzi bw’amabuye y’agaciro butemewe n’amategeko, ibasaba kwitandukanya nabwo burundu, kuko ari icyaha gihanwa n’amategeko y’u Rwanda.

SP Mwiseneza ati “Ubucukuzi bw’amabuye y’agaciro butemewe n’amategeko, bubagiraho ingaruka zirimo nko kuba bwateza ukugwirwa n’ibirombe, bakahasiga ubuzima abandi bakahakomerekera bikabaviramo n’ubumuga”.

Yongeraho ati “Ni umwanya wo kuburira abantu tubamenyesha ko Polisi y’u Rwanda irimo gukoresha imbaraga zose zishoboka, mu kubukumira kimwe n’ibindi byaha bibushamikiyeho cyangwa bifitanye isano nabwo. Abagifite umutima wabyo nibabireke, kuko ntabwo tuzatuma bagera kuri iyo migambi”.

Bafatiwe mu cyuho

Bamwe mu bafashwe bakekwaho ubujura bw’amatungo

Bamenyekanye biturutse ku makuru Polisi y’u Rwanda yahawe n’abaturage, y’uko bari bamaze igihe barembejwe n’abajura barimo n’abitwikira ijoro bakazitura amatungo mu biraro, bakayajyana akaburirwa irengero.

Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza, avuga ko Polisi y’u Rwanda yahagurukiye abakora ibikorwa nk’ibyo, kugira ngo ababifatirwamo babihanirwe.

Ati: “Ibikorwa byo gushakisha n’abandi birakomeje kuko ni ikibazo kimaze iminsi kigaragara henshi. Nta na rimwe Polisi izihanganira ubujura ubwo aribwo bwose harimo n’ubw’amatungo, ari naho duhera dusaba abakibwishoramo kubucikaho ingaruka zitarabageraho”.

“Gutekereza ko ubujura nk’ubwo hari icyo bwabagezaho ni ukwibeshya no kuyoba bikomeye. Imirimo yo gukora mu buryo bunyuze mu mucyo irahari ni myinshi nibayihereho, maze bitandukanye n’ibikorwa bibi byo kurya ibyo bataruhiye”.

Mu bindi SP Mwiseneza yibutsa abaturage ni ugufatanya n’inzego zishinzwe umutekano, mu gutangira amakuru ku gihe no kwitabira amarondo cyane cyane akorwa mu masaha ya nijoro, kuko akenshi abajura ariyo bitwikira bakiba iby’abaturage.

Ati: “Iyo bamenyekanye hakiri kare barigishwa, bakibutswa ububi n’ingarua z’ibyaha nk’ibyo bagahindura imyitwarire mibi, bakaba abafatanyabikorwa mu gukumira icyaha kitaraba”.

Mu bafashwe bakekwaho kwiba amatungo barimo abantu 9 bo mu Karere ka Gicumbi bafatanwe inka 3, ihene 3 n’intama 1. Mu Karere ka Burera abantu 6 bakekwaho ubwo bujura, babafatanwe inka 6 Intama 1 n’inkwavu 4, mu Karere ka Gakenke ho, abantu 7 bahafatiwe bakekwaho kwiba intama 3, Akarere ka Rulindo hafashwe abakekwaho ububujura b’Amatungo bane, mu gihe mu Karere ka Musanze ho umuntu umwe ari we wafashwe akekwaho ububujura bw’Amatungo.

Amatungo yose bafatanwe yasubijwe ba nyirayo, naho abakekwaho kuyiba, bo bafungiye kuri Polisi Station zitandukanye, bakaba bari gukorwaho iperereza.

Basanga abanyeshuri batagaburirwa ibifite intungamubiri zihagije

Ni nyuma y’aho itsinda ry’abarimu bigisha muri Kaminuza y’u Rwanda Ishami rya UR-CAVM riri i Busogo, mu rwego rwo kureba uko gahunda yo kugaburira abanyeshuri ku mashuri (School Feeding Program) ishyirwa mu bikorwa, bakoze ubushakashatsi mu bigo by’amashuri byo hirya no hino mu gihugu, birimo ibya Leta ndetse n’iby’abigenga, basanga amafunguro abanyeshuri bagaburirwa, ahanini atihagije ku ntungamubiri.

Dr Jean d’Amour Manirere, ukuriye Umushinga ugamije guteza imbere ibihingwa bikize ku ntungamubiri, hitabwa ku kubyifashisha mu kugaburira abashyeshuri, akaba umwarimu muri UR-CAVM, uri mu bayoboye ubwo bushakashatsi, bwakozwe ku bufatanye n’Ikigo Imperial College London ndetse n’Ikigo mpuzamahanga cyita ku Iterambere ry’Ubushashatsi cyo muri Canada, IDRC Canada.

Agira ati “Gahunda yo kugaburira abana ku mashuri kuva aho itangiriye mu Rwanda, bigaragara ko hari intamwe igenda iterwa bigendanye n’ingamba Leta ishyiraho, ariko haracyari urugendo runini rw’ibigomba gukorwa ngo abana bagaburirwe amafunguro akungahaye ku ntungamubiri”.

Ati “Ahenshi mu bigo by’amashuri usanga abanyeshuri bagaburirwa ibigori, kawunga, ibishyimbo, imboga z’amashu, umuceri n’ibindi ariko wareba ugasanga ni ibidakungahanye ku ntungamubiri zikenewe. Mpereye nko ku rugero rw’ibishyimbo ba rwiyemezamirimo baba bagemuriye amashuri, usanga ari bya bindi baba baraguze ku masoko bitihagije ku butare; wafata nk’urugero rw’imboga, usanga ahanini izibandwaho ari amashu, nyamara na yo iyo ugenzuye neza, ntiyihagije ku ntungamubiri zikenewe”.

Baganiriye ku bijyanye n’ibyo abanyeshuri bagaburirwa ku ishuri

Yungamo ati “Twatekereje rero kugaragaza umumaro wo kwifashisha ibihingwa bikize ku ntungamubiri ku bana b’abanyeshuri, nk’uburyo bwatuma babasha kugira ubuzima buzira umuze, kandi nta handi byatururuka atari mu kubagaburira ibiribwa bifitiye umubiri akamaro”.

Mu biribwa bikungahaye ku ntungamubiri aba bashakashatsi bagaragaza, ko byajya byibandwaho mu byo abanyeshuri bagaburirwa ku ishuri, birimo ibishyimbo bikungahaye ku butare, ibijumba by’ibara ry’umuhondo bikungahaye kuri Vitamini A, ibigori by’ibara ry’umuhondo, karoti, imboga rwatsi zikungahaye ku butare zirimo izo bakunze kwita ‘Ndamutibikanye’ n’imboga z’ibara ritukura.

Byagarutswe mu biganiro byamaze iminsi itatu bibera mu Karere ka Musanze, bigasozwa tariki 12 Werurwe 2025, byahuje abagize uruhare muri ubwo bushakashatsi ndetse n’inzego zifite aho ihuriye n’ishyirwa mu bikorwa rya gahunda yo kugaburira abanyeshuri ku mashuri.

Hagaragarijwemo ko ikibazo cy’imyumvire ikiri hasi y’ababyeyi, batitabira kunganira Leta mu gushyigikira iyi gahunda yo kugaburira abana ku mashuri, ubushobozi bucye, hamwe n’ubumenyi bukiri hasi mu gutoranya ibiribwa by’ibanze bikungahaye; biri mu bigaragara nk’inzitizi zituma hataraterwa intambwe ifatika mu kugaburira abanyeshuri ibiribwa bikungahaye ku ntungamubiri zikenewe.

Frère Pierre Céléstin Niyonsenga, Umuyobozi wa GS Jean de la Mennaie Kirambo, ishuri riherereye mu Karere ka Burera, agarukaku ruhare rw’ababyeyi.

Ati “Ababyeyi ntibariyumvisha ko hari uruhare rwabo rukenewe, mu kugira ngo gahunda yo kugabuira abanyeshuri ku mashuri igerweho uko bikwiye, ugasanga birasa n’aho byahariwe Leta yonyine. Ni na ho uzasanga icyuho biteza, kivamo ko ba rwiyemezamirimo bashinzwe kurambagiza ubwoko bw’ibyo kurya bigenewe abana, bahitamo guhaha ibiri ku giciro kiri hasi, rimwe na rimwe usanga bidahagije kandi bitanihagije ku bipimo nyabyo by’intungamubiri zikenewe”.

Bamwe mu bashakashatsi berekana ubwoko bw’ibigori by’umuhondo bikungahaye ku ntungamubiri zifuzwa

Abayobora ibigo by’amashuri, na bo basanga hari imyumvire bagiye guhindura kuko akenshi mu biribwa bajyaga bibandaho mu kugaburira abanyeshuri, batabanzaga kwita ku kugenzura ikigero cy’intungamubiri bikungahayeho.

Mukafeza Solange uyobora GS Birira mu Karere ka Musanse ati “Ubundi mu mafunguro tugaburira abana twibandaga ku bishyimbo, ibigori, kawunga, imboga z’amashu ahanini, dutekereza ko bigize indyo yuzuye. Gusa ibyo ubu bushakashatsi butugaragarije, bidufashije gusubiza amaso inyuma no gufata ingaba z’ibyo tugiye kuvugurura”.

Ati “Turahera ku by’ibanze twe nk’ibigo duhaha ku masoko, n’ibyo twihingira mu mirima y’ishuri, ku buryo twiyemeje ko tuzajya twibanda ku bihingwa bigwije ibipimo by’intungamubiri zikenewe”.

Ingabire Sam, umukozi muri Minisiteri y’Uburezi, muri School Feeding Program, agaragaza ko mu Rwanda, kuva mu myaka 10 ishize hatangijwe gahunda yo kugaburira abana ifunguro rya saa sita ku ishuri, ingengo y’imari ishorwamo buri mwaka igenda yiyongera; aho ubu igeze kuri Miliyari 94, ivuye kuri Miliyari 4Frw iyo gahunda itangira.

Yongeyeho ko uruhare rwa buri wese cyane cyane ababyeyi rukenewe, kugira ngo iyi gahunda irusheho gutanga umusaruro.

Ati “Uruhare rw’ababyeyi mu kwitabira gutanga umusanzu wabo mu buryo bufatika rurakenewe, kuko nibabigira ibyabo, bizafasha Leta kugera ku ntego zo kugaburira abana, amafunguro yujuje ireme n’ibipimo biri ku rwego rufatika. Bizatuma babasha kwiga neza kandi n’imitsindire yabo ibe iri ku rugero rwiza. Turifuza Igihugu cyubakiye ku iterambere rirambye, kandi rishyize imbere uguhangana n’ibibazo by’imirire mibi n’igwingira, ibyo rero ntitwabigeraho ibituma ubuzima bw’abana bumera neza bidahari”.

Ibigo by’amashuri bigirwa inama yo kwita ku bihingwa bikungahaye ku ntungamubiri z’ibanze abana bakeneye

Ati “Umusanzu wacu nka Minisiteri y’Uburezi ni uko Politiki yo kugaburira abana ku mashuri, ihuzwa n’ibikubiye muri ubu bushakashatsi hakarebwa ko bihura neza n’intumbero Leta ifite, mu guteza imbere gahunda yo kugaburira abana ku ishuri”.

Ubushakashatsi bwakorewe mu bigo by’amashuri 10 byo hirya no hino mu gihugu, bwibandaga ku gufata ingero nto (samples) z’amafunguro abanyeshuri bagaburirwa, zikajyanwa gupimirwa muri Laboratoire hagamijwe kureba ingano z’intungamubiri ziyagize.

Ibyo bigo bifatwa nk’ibyitegererezo muri ubwo bushakashatsi, ubu birimo kunganirwa muri gahunda yo kwitabira ubuhinzi bw’ibihingwa byagaragajwe muri ubwo bushakashatsi, nk’ibyihariye ku kuba bikize ku ntungamubiri zikenewe mu kunoza imirire.

Amashuri agirwa inama yoguhinga ibigori byuje intungamubiri

Inzego zitandukanye zifite aho zihuriye no guteza imbere gahunda yo kugaburira abanyeshuri ku mashuri zahuriye mu biganiro

Kugaburira abana ku ishuri bituma biga neza

Igishushanyo mbonera kigaragaza imiterere y’inyubako zizabimburira izindi

Imirimo yo kubaka iki Kigo, yatangijwe ku wa Kane tariki 6 Werurwe 2025, aho byitezwe ko kizunganira imiryango myinshi, by’umwihariko iy’abana bafite ubumuga.

Uwizeyimana Laetitia yagize ati “Hari abana bavuka mu miryango itifashije, itanasobanukiwe uburyo bwo kubitaho no kubakurikirana uko bikwiye bigendanye n’ubumuga bafite. Ibyo byabaga inzitizi zituma abo bana bapfukiranwa, hakaba uburenganzira bavutswa yaba ku buvuzi, uburezi, bikabangamira n’imibanire yabo n’abandi. Iki kigo bagiye kutwegereza, bakizanye inaha tugisonzeye. Twacyishimiye ndetse by’akarusho no kuba ababyeyi tugiye kujya duhabwa ubujyanama budufasha kwita kuri abo bana”.

Icyiciro kibanza kizamara amezi atatu, cy’imirimo yo kubaka inyubako zirimo icyumba kizajya gitangirwamo serivisi z’ubugororangingo, ibyumba bitatu by’Irerero ry’abana, icyumba kizajya gikorerwamo inama n’amahugurwa, ibiro by’ubuyobozi ndetse n’igikoni; kikazatwara Miliyoni 150 z’Amafaranga y’u Rwanda.

Kayiranga Théobald yagaragaje ko Ikigo cyita ku bana bafite ubumuga cyari gikenewe

Ni umushinga Akarere ka Musanze gafatanyije n’Umuryango Hope and Homes for Children, hamwe n’umuryango Ubumwe Community Center. Ni mu rwego rwo korohereza abana bafite ubumuga kubonera hafi serivisi bakenera za buri munsi, nk’uko bigarukwaho na Karangwa Immaculée, Umuyobozi w’agateganyo wa Hope and Homes for Children.

Ati “Umwana ufite ubumuga, kumwitaho mu buzima bwe bwa buri munsi mu muryango bisaba umwanya uhagije kandi bigakorwa mu buryo bwihariye ugereranyije n’abandi. Ku babyeyi bamwe wasangaga bitaborohera kubifatanya n’indi mirimo baba bagomba gukora igira icyo yinjiriza ingo, hakaba ubwo binavuyemo ko batabyumva ku rwego rumwe, bikavamo agasigane, ugutereranwa mu buryo bumwe cyangwa ubundi”.

Ati “Iki kigo rero kizorohereza imiryango kugira ahatekanye abana babo bazajya birirwa, bitabwaho mu buryo bw’imibereho, bityo n’ababyeyi babo cyangwa abandi babana na bo mu miryango, bagire umwanya uhagije wo kugira ibindi bakora bifasha ingo”.

Ahazubakwa icyo kigo hamaze gusizwa

Umuyobozi w’Akarere ka Musanze wungirije ushinzwe imibereho myiza Kayiranga Théobald, na we yungamo agaragaza ko hari byinshi iki kigo kizakemura.

Ati “Hari imiryango myinshi y’abana bafite ubumuga yajyaga yiyambaza Akarere, ikeneye ubufasha bwo kuvuza abana. Byadusabaga kubohereza i Rilima, i Gatagara n’ahandi hari ibigo bifite izo serivisi. Bisaba amafaranga y’urugendo rujyayo, hiyongereyeho n’ibindi by’ibanze umuntu yashoboraga gukenera ngo ahabwe izo serivisi. Twishimiye ko iki kigo kije kugarurira abana n’imiryango yabo icyizere no koroshya ingorane zose zari zibugarije”.

Ubuyobozi bukomeza buvuga ko uko umushinga wo kwagura Ikigo cyita ku bana bafite ubumuga uzagenda urushaho gukura, ni nako kizagera ku rwego rwo kwakira n’abandi bana badafite ubumuga, mu rwego rwo gushyigikira iterambere ridaheza.

Bamwe mu bafashwe bakekwaho ubujura

Abo bantu biganjemo urubyiruko, barimo 15 bo mu Karere ka Musane bakekwaho gushikuza abantu ibintu mu ntoki nk’amasakoshi, telefoni n’ibindi, bakaba babukoreraga mu Mirenge ya Muhoza, Cyuve na Musanze; mu gihe abandi 6 bafatiwe mu Mirenge ya Nemba, Gakenke na Mataba yo mu Karere ka Gakenke, bo bikekwa ko batoboraga inzu z’abaturage, bakiba ibikoresho ndetse n’ibiribwa.

Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza, yagize ati “Bafashwe ubu bari mu maboko ya Polisi. Abo mu Karere ka Gakenke bafungiwe kuri Polisi Station ya Gakenke mu gihe abo mu Karere ka Musanze bo bafungiwe kuri Polisi Station ya Muhoza. Iperereza rigamije kumenya uburyo ibyo byaha bakekwaho babikoragamo, aho ibyo bakekwaho kwiba byarengeye ndetse n’abo bafatanyaga ryahise ritangira”.

Ati “Icyo dukangurira abaturage ni ugukomeza kujya badutungira agatoki, kugira ngo abakora ibyaha nk’ibyo by’ubujura bamenyekane bafatwe kandi bahanwe hakiri kare”.

SP Mwiseneza yakanguriye abaturage kureka ubujura bakayoboka indi mirimo, cyane ko hari uburyo bwinshi Leta yashyizeho bworohereza abantu gukora bakiteza imbere.

Ati “Ubujura uretse kuba ubwabyo ari n’icyaha gihanwa n’amategeko, ni n’igisebo ku muntu wese ubwishoramo, nyamara yakabaye agira ibindi abyaza umusaruro, binyuze mu mucyo. Hari amahirwe y’ibikorwa byinshi bitanga imirimo Leta yashyizeho y’uburyo bwose bushoboka, bufunguriwe buri wese. Igikwiye ni uko abantu babuyoboka bakiteza imbere, batarangamiye kwiba iby’abandi”.

Mu mirenge itandukanye y’uturere twa Musanze, Gakenke n’utundi tugize Intara y’Amajyaruguru cyane cyane mu bice by’imijyi, abaturage bakunze kugaragaza impungenge batewe n’ubujura bukozwe mu buryo busa n’ubwo aba bafashwe bakekwaho, hiyongereyeho ubw’amatungo, imyaka ihinze mu mirima bagasaba ko buhagaragara, bagahamya ko ari ikibazo kibateye inkeke.

Barasuzuma bakanavura indwara zo mu matwi

Muri iki gikorwa abaganga b’inzobere mu kuvura indwara zo mu matwi, mu muhogo no mu mazuru bahuriye mu Rugaga rwita ku kuvura izo ndwara, barimo gutanga serivisi zo kuzisuzuma no kuzivura, ari nako batanga ubujyama bwo kuzirinda.

Imibare y’Ikigo cy’Igihugu cyita ku Buzima (RBC), igaragaza ko indwara zifata mu matwi ziri ku rutonde rw’indwara 20, ziza imbere y’izivuzwa n’umubare munini w’abagana ibitaro byo hirya no hino mu gihugu.

Abagana ibitaro bikuru bya Ruhengeri, bishimira ko muri ibyo bitaro, hari umuganga w’inzobere mu kuvura izi ndwara uhakorera, ndetse bikaba byaranahawe ibikoresho by’ikoranabuhanga rigezweho ryifashishwa mu kuzisuzuma no kuzivura.

Ni ibintu bemeza ko byabagabanyirije ingendo zivunanye bakoraga, bajya kuzivuriza mu bitaro byo mu Mujyi wa Kigali.

Mu gihe cy’amezi atatu ashize mu bitaro bikuru bya Ruhengeri, hatangiye gutangirwa Serivisi zo gusuzuma no kuvura indwara zo mu matwi, mu muhogo no mu mazuru, bimaze kwakira abarwayi 630, biganjemo abagiye bavurwa indwara zirimo n’iy’Umuhaha ndetse na Anjine.

Mu bantu babarirwa mu bihumbi 390 bo mu Rwanda bafite hejuru y’imyaka itanu, byagaragaye ko bafite ubumuga, muri bo abagera ku bihumbi 42 bafite ubumuga bwo kutumva no kutavuga, kandi ahanini bituruka ku ndwara zo mu mu matwi ziba zitaravuwe neza.

Ubu butumwa yabugarutseho kuwa 28 Gashyantare ubwo yatangizaga Igihembwe cy’Ihinga 2025B, igikorwa cyabereye kuri Site y’Ubuhinzi ya Rutuku iherereye mu Mudugudu wa Rutuku Akagari ka Kabona mu Murenge wa Rusarabuye mu Karere ka Burera.

Mu gutangiza igihembwe cy’ihinga, Minisitiri w’Intebe Dr Ngirente yifatanyije n’abaturage gutera ibirayi ku buso bwa hegitari 16.

Yagize ati: "Gukora twiteza imbere bisobanuye gukora tudasesagura umusaruro twejeje, twitabira kuwubika neza hanyuma tukazigama”.

Yongeyeho ati “Kuzigama bijyana no gukumira ibiteza amakimbirane mu muryango, twirinda gucunga nabi ibiva ku musaruro umuryango winjiza kandi hakabaho kwirinda ko abawugize babirwaniramo."

Gucunga neza umusaruro kandi, ngo bijyana no kuwukoresha mu kwitabira gahunda zibereye abaturage nko kwisungana mu kwivuza, urwaye akivuza byoroshye.

Aha kandi yagize ati "Nanone kandi dukwiye kwitabira gahunda ya Ejo Heza kuko ari uburyo bwiza butuma duteganyiriza ahazaza, no kuzigamira amasaziro meza".

Minisitiri w’Intebe yanagaragaje ko ubuhinzi butitaye ku bwinshingizi bw’ibihingwa n’amatungo budatanga icyizere cy’umusaruro urambye. Yibukije abahinzi ko igikwiye ari ukubyaza umusaruro amahirwe Leta yashyizeho agamije gutuma boroherezwa mu gushinganisha ibihingwa.

Ati: "Ubwishingizi bw’ibihingwa n’ubworozi, Umukuru w’Igihugu yabushyize mu ngamba zifasha mu kuzamura ubuhinzi, aho ubu Leta yishingira abahinzi cyangwa aborozi ku kigero cya 40% mu gihe 60% yo atangwa n’uruhande rw’umuturage ushinganisha ibihingwa cyangwa amatungo”.

Mu nzitizi Dr Ngirente yagaragaje zishingiye ku mihanda imwe n’imwe idakoze ikunze kubangamira ubuhahirane bw’abaturage no kugeza umusaruro ku masoko, yabijeje ko Leta hari byinshi ikomeje gukora ngo ziveho, kandi ko umusaruro wabyo utazatinda kwigaragaza.

Yanakanguriye abaturage kwita ku isuku, birinda gushora mu tubari amafaranga baba bakuye ku musaruro, kuko bibakururira ubusinzi bagahora mu bukene. Yanongeyeho ko gutoza abana gukunda ishuri biri mu ntego yafasha gushyigikira umuryango utekanye Leta ishyize imbere. Ibi byose ariko, ngo ntibyagerwaho umuturage adashyize imbere umutekano, wo shingiro rya byose.

Imibare igaragazwa n’ubuyobozi bw’Akarere ka Burera, yerekana ko 82,6% by’Abaturage b’aka Karere batunzwe n’umwuga w’ubuhinzi, dore ko bamwe banavuga ko bakuyemo ubukire.

Ndacyayisenga Théobald, umuhinzi wabigize umwuga wo mu murenge wa Rwerere muri aka Karere, yatangiriye ubuhinzi bw’ibirayi kuri Are 25 yasaruragaho toni ziri hagati y’ebyiri n’eshatu z’ibirayi.

Nyuma yinjiye muri gahunda ya Nkunganire, none byamufashije kongera ubuso ahingaho, ku buryo ubu ageze ku musaruro wa toni umunani.

Agira ati “Byamfashije kubaka inzu ifite agaciro ka Miliyoni zisaga 18 ntuyemo ubu. Ndihira abana banjye batandatu amashuri, ndetse ntanga akazi ku bankorera mu mirima kandi noroye inka 8. Navuga ko ubuhinzi bwitaweho hari intambwe ndende bwageza kuri benshi ari nabyo nkomeza gukangurira bagenzi banjye bari hirya no hino”.

Mu Mirenge igize Akarere ka Burera, ibirayi bizahingwa kuri hegitari 14.500, mu gihe ibigori bizahingwa kuri hegitari 15.200. Ibishyimbo ni byo biziharira ubuso bunini kuko biziharira hegitari 24.000.

I Burera, Minisitiri w’Intebe yanasuye ishuri rya Tekiniki Imyuga n’Ubumemyingiro (TVET Cyanika) riherereye mu Murenge wa Cyanika ryakira abanyeshuri 246 biga iby’amashanyarazi n’ububaji.

Yanasuye kandi Uruganda rukora imyenda rwa NOGUCHI HOLDINGS Ltd rubarizwa mu Murenge wa Rugarama, aho rwahaye akazi abanyarwanda 450.

Umwe mu bafashwe n’ibikoresho bafatanywe

Abo bantu barimo abagore ndetse n’abagabo, ni abo mu Midugudu ya Ntyaba n’uwa Kabuga mu Kagari ka Mvuzo mu Murenge wa Murambi, bafashwe ku wa gatanu Tariki 21 Gashyantare 2025.

Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza, wemeje aya makuru yagize ati "Mu byo bafatanwe harimo ibikoresho bajya bifashisha mu guteka kanyanga, kuyitunda n’ibyo batwaramo imisemburo bayikoramo. Bimwe muri byo ni ingunguru 1, amajerekani 84 harimo ayo bari bashyizemo umusemburo witwa Melase ukorwamo kanyanga, andi abereye aho ndetse na Litiro 17 za kanyanga nyirizina".

Yunzemo ati "Polisi yabifashe igendeye ku makuru yahawe n’abaturage, y’uko abo bantu bazwiho kwishora mu biyobyabwenge, bakaba bakekwaho guteka kanyanga bakanayikwirakwiza hirya no hono. Bakimara gufatwa bahise bajyanwa kuri Polisi Station ya Murambi, bakaba barimo gukorwaho iperereza".

SP Mwiseneza yibukije abaturage kwirinda kwishora mu bikorwa bigayitse, byo gukora no gucuruza ibiyobyabwenge, kuko ari icyaha gihanwa n’Amategeko, kandi bigira ingaruka ku buzima bwabo.

Ati "Polisi irabamenyesha ko bagifite amahirwe yo kubireka burundu, kuko bitazigera bibahira. Amafaranga bashoramo n’ikindi kiguzi cyose bibasaba ngo babijyemo, byose bizahora biba ibihombo kuri bo. Nibazibukire babireke kuko Polisi yashyizeho ingamba zikarishye zirimo kubashakisha aho bari bakabihanirwa zikomeje".

Aha barebaga bimwe mu bigize umuco nyarwanda

Muri iri Murikamuco ryateguwe na INES-Ruhengeri, ryabaye ku wa Gatanu tariki 21 Gashyantare 2025, abanyeshuri bo muri ibyo bihugu, bamuritse ibikoresho gakondo byifashishwa mu mirimo ya buri munsi, ibiribwa n’amafunguro ateguye muri gakondo, ari nako banyuzamo bagasobanurira abitabiriye iki gikorwa amwe mu mateka y’ibihugu bakomokamo.

Mu myiyereko yabo igaragazwa n’imyambarire gakondo, abo banyeshuri basusurukije abitabiriye iri murikamuco mu ndirimbo n’imbyino zerekana umuco gakondo w’ibihugu byabo.

Kuri bo ngo ni umwanya mwiza wo kugaragariza abandi isura y’aho bakomoka, ibigize umuco wabo ndetse ukaba n’umwanya wo gusabana basangira ubunararibonye bw’ibihugu bitandukanye, bwubakiye ku muco.

Asimba Andy Francky wiga mu wa gatatu mu Ishami ry’Ibinyabuzima muri INES-Ruhengeri, akaba akomoka mu gihugu cya Gabon yavuze ko ari igikorwa gifite akamaro.

Yagize ati “Ni igikorwa kidufitiye akamaro kanini, kuko bituma turushaho kwisanzuranaho, tukiyumva mu bandi tutishishanya. Twabonye umwihariko w’abo mu bindi bihugu bigendanye n’uko bategura amafunguro, uko bambara, uko bavuga indimi z’iwabo, imbyino n’ibindi”.

Ati “Ibi bidufasha gusobanukirwa umwimerere nyakuri wa buri gihugu, ndetse nta wamenya ejo cyangwa ejobundi nshobora kwisanga ntuye mu gihugu runaka, ku bw’imirimo cyangwa izindi nshingano. Kumenya umuco rero, bifasha ko mu gihe byabaho umuntu ahamenyera byihuse, no kuba yahaba atagize ibyo yishe cyangwa abangamira bigendanye n’umuco waho”.

Ku baturuka mu gihugu cy’u Burundi barimo Simbizi Orli, wagize ati: “Ni amahirwe akomeye kuri twe kuko bidufasha kumva turushijeho gukunda umuco wacu no gusigasira umwimerere waho. Bagenzi bacu baturuka mu bindi bihugu, muri byinshi bamuritse, nasanze hari ibyo duhuriyeho. Urugero nk’igihugu cya Repubulika Iharanira Demokarasi ya Kongo, u Rwanda n’ahandi, hari amafunguro amwe n’amwe nk’isombe, ubugari, amafi n’ibindi byinshi”.

Ati “Ibi icyo bishatse kwerekana ni iki, ni uko hari isano rikomeye twe nk’Abanyafurika n’abandi twese dukwiriye gusigasira, ry’uko ibiduhuza cyangwa duhuriyeho, twarushaho kubigira impamba idufasha mu rugendo rw’ahazaza”.

Fidèle Cyuzuzo na we ni umunyeshuri w’Umunyarwanda, wishimira ko INES-Ruhengeri yubatse ihame ryo kugururira amarembo abanyeshuri bo ku ruhando mpuzamahanga.

Ati “Kwigana na bagenzi bacu bo mu bindi bihugu byagiye bidufasha kumva twitinyutse, tugendeye ku kuba umunsi ku munsi tuganira tugasabana, tukiyumvanamo ubucuti, ibyo bikatwungura byinshi cyane ko hari ibyo baza basobanukiwe natwe hakaba ibyo tuba dusobanukiwe, buri ruhande rukabisangiza urundi. Navuga ko ibyo birushaho no kutwagura ku buryo ubwo bucuti burenga tukagendererana mu bihugu tuba duturukamo dusurana, dutembera, twigayo se n’ibindi bikorwa kubera ubwo bucuti”.

Mu banyeshuri babarirwa mu Ishuri Rikuru ry’Ubumenyingiro rya INES-Ruhengeri uko ari 5849, barino abanyamahanga 1150; baturuka mu bihugu 21, birimo ibyo ku mugabane w’u Burayi n’uwa Afurika.

INES-Ruhengeri kuva yashingwa, yatangiranye intumbero yo kwaguka ikaganwa n’abarimo abo ku ruhando mpuzamahanga, kandi ngo iyi ntego ikomeje kugerwaho.

Ibi bifite igisobanuro gikomeye nk’uko Umuyobozi w’Ikirenga wa INES-Ruhengeri, Musenyeri Harolimana Vincent yabigarutseho.

Yagize ati “Umunsi nk’uyu w’Imurikamuco, uba ari n’umwanya wo guha abanyeshuri ubwisanzure bwisumbuyeho, bwo kugaragarizanya ibikubiye mu muco, bikabafasha kwidagadura no kungurana ibitekerezo. Ni no mu rwego rwo kwagura imitekerereze ituma banoza ingamba zo gukunda umuco wabo, kuwusigasira no kuwukomeraho kuko igihugu kitagira umuco kiba kitariho”.

Yongeyeho ko Uburezi budashobora kugera ku ntego busize inyuma umuco. Ati: “Amasomo ya buri munsi biga, ni ngombwa kuyajyanisha no gusigasira indangagaciro zo gukunda umuco no kuwukomeraho bikajyana no kubaka ubumwe, ubuvandimwe no kumva ko gahunda bahuriyeho, mbere na mbere ari iyo kwiteza imbere. Ibyo rero ntabwo babigeraho umuco wirengagijwe”.

Imurikamuco mu Ishuri Rikuru rwa INES-Ruhengeri ribaye ku nshuro ya kane. Abanyeshuri biga muri iri shuri bamuritse umuco w’ibihugu bakomokamo 14, barimo abakomoka muri South Sudan, Repubulika Iharanira Demokarasi ya Congo, Liberia, u Rwanda, u Burundi, Nigeria, Chad, Sudan, Congo Brazaville, Niger, Gabon, Italie na Cameroon.

Ni ubutumwa bwagarutsweho n’inzego zitandukanye mu bukangurambaga bugamije gushishikariza abaturage by’umwihariko bakora ubucukuzi bw’amabuye y’agaciro, kwirinda indwara ya Malariya, bwatanzwe kuwa gatatu tariki 19 Gashyantare.

Mu bakorera ubucukuzi bw’umucanga mu kirombe giherereye mu Mudugudu wa Karambi Akagari ka Bikara mu Murenge wa Nkotsi barimo Nsengiyumva Jean Bosco.

Yagize ati: “Imibu dukunze kuyumva cyane cyane mu masaha ya mugitondo kare turimo dukora. Iba iduhira cyane ari nako iturya ku maboko no ku maguru mu buryo rwose ubona ko iturembeje. Bamwe muri bagenzi bacu bibaviramo kurwara bajya kwivuza bakabasangamo Malariya, bikadutera impungenge. Abatarayirwara kugeza ubu ni uburinzi bw’Imana bubariho”!

Mu bafite ibyago byo kurwara Malariya biturutse ku murimo bakora n’imiterere y’aho bawukorera harimo n’abakora ubukucuzi bw’amabuye y’agaciro nk’uko byemezwa na Musabemariya Jeanne d’Arc, Umukozi w’Ihuriro ry’Imiryango Itari iya Leta, yita ku kurwanya SIDA, Igituntu, indwara ya Malariya, kwita ku buzima no kurengera Uburenganzira bwa Muntu RNGOs Forum.

Yagize ati: “Mu bucukuzi usanga hari abasiga ibinogo cyangwa ibyobo, abandi bakibagirwa kubisiba cyangwa se ntibanabyiteho, noneho imvura yagwa amazi akabirekamo yamaramo iminsi hakaba hahindutse indiri y’ubwororekero bw’imibu. Ibyo biri mu bikurura akaga n’ingorane nyinshi zo kurumwa n’umubu utera Malariya”.

“Ikindi cyiyongeraho, abakora ubucukuzi bakunze gukora amasaha y’ikirenga ya nijoro, aho bamwe baba badafite ubwirinzi buhagije bubarinda kurumwa n’imibu itera Malariya. Ni byiza rero ko bamenya ko hari imyumvire bakwiye kongera ku bijyanye n’ubwirinzi mu kwambara imyambaro ifubitse umubiri wose, gutema ibihuru bikikije aho bakorera, kwisiga amavuta yabugenewe abarinda kurumwa n’imibu n’ubundi buryo bwose bushoboka.”

Raporo ya y’Ikigo RBC yo mu Kuboza 2024, yerekanye ko Umurenge wa Nkotsi, wari ufite ubwiyongere bwa Malariya ku gipimo cya 43,6/1000, ukaba ariwo Murenge wari imbere y’indi yose igize Intara y’Amajyaruguru.

Ihuriro RNGOs Forum rigizwe n’Imyiryango 139 itari iya Leta yahawe inshingano na Minisiteri y’Ubuzima, zo kurwanya indwara zirimo na Malariya mu byiciro byihariye bifite ibyago byinshi byo kwandura iyi ndwara, birimo Abakora Uburobyi, Abahinzi b’Umuceri, Abakora mu Birombe, Abacunga Umutekano, Abakora mu ma Hoteli n’abayagana.

Hari kandi abanyeshuri biga bacumbika mu bigo, Impunzi, Imfungwa n’abagororwa, ndetse n’abatanga serivisi z’Ubuzima.

Raporo y’Ikigo cy’Igihugu cy’Ubwiteganyirize RSSB igaragaza ko mu Gihugu hose, abanyarwanda bizigamiye ahazaza akabakaba miliyari ebyiri mu mwaka wa 2024.

Iyi raporo igaragaza ko abanyamuryango ba Ejoheza mu gihugu bose, ku ntego uturere twari twihaye, y’ubwizigame bw’abanyamuryango ya Miliyari 9 na Miliyoni 510, kugeza muri Gashyantare 2025 amafaranga bari bamaze kuzigama agera kuri Miliyari 7 na Miliyoni zisaga 540 y’u Rwanda; bingana n’igipimo cya 79,3%.

Kuva muri Nyakanga 2024, uturere twose tw’u Rwanda twari twihaye imihigo, aho umuhigo wo hejuru kurusha iyindi, wari kuri miliyoni 375 mu karere ka Gakenke, Rubavu, Gicumbi, Rusizi, Gasabo, ndetse na Nyamasheke.

Akarere ka Gakenke kesheje uyu muhigo ku kigero cya 100.1%, aho ku muhigo wabo barengejeho 495,219 Frw.

Umuhigo muto kurusha iyindi wari Miliyoni 300, nawo ukaba warahuriweho n’uturere dutandukanye.

Akarere ka Nyanza ni ko kinjije amafaranga macye kurusha utundi, aho abanyamuryango batanze 192,664,979 Frw.

Umuyobozi w’Akarere ka Gakenke Mukandayisenga Vestine, avuga ko kuba barabaye aba mbere babikesha kuba abaturage barushaho gusobanukirwa icyo Ejo Heza izabagezaho.

Agira ati: “Icyo twahereyeho ni ukumvisha buri muturage ko ari ku isonga kandi ko akwiye kugira uruhare mu bimukorerwa. Twegereye abakozi b’ibigo bitandukanye, za Koperative ndetse n’abo mu bigo by’abikorera, tubasobanurira icyo kwiteganyiriza muri Ejo Heza bivuze, kandi ko ari uguteganyiriza umuryango utekanye, cyane ko iyo uwiteganyirije apfuye cyangwa se ageze mu gihe atakibasha kugira icyo akora, Ejo Heza imugoboka. Ibyo rero usibye abagenerwabikorwa, natwe ubwacu nk’Ubuyobozi n’inzego dufatanya, twabigize ibyacu uhereye ku Muyobozi w’Isibo kugeza ku Muyobozi w’Akarere twese tujyana mu ngamba”.

Mutumwinka Martha wo mu Karere ka Gakenke, akaba ari n’umunyamurango wa Ejo Heza, avuga ko kuba Akarere kabo kanikiye utundi bitavuze ko bagiye kwirara.

Ati: “Kuza imbere y’abandi twabigezeho kuko gahunda twayumvise vuba tukayigira iyacu tutagoranye cyangwa ngo twirindirize.”

“Dufite Ibimina, Amatsinda cyangwa Amakoperative tubamo, nanone kandi hari abakiri batoya bafite imirimo ibinjiriza amafaranga, icyo tuzakora abo bose ni ukubashishikariza ko kwizigamira buri gihe, ari byo bigira inyungu cyane kandi ko akabando k’iminsi gacibwa kare kakabikwa kure”.

Kugeza ubu muri ako Karere honyine habarurwa Abanyamuryango ba gahunda ya Ejo Heza 177,719 bamaze kwizigamira 2,397,780,708 y’u Rwanda kuva Ejo Heza yatangira ku mugaragaro,

Muri rusange, Uturere twose tw’Igihugu nk’uko Raporo ya RSSB ikomeza ibigaragaza,

Abafashwe uko ari 68 bacukuraga mu buryo bunyuranyije n’amategeko

Amakuru y’ubucukuzi bakoraga, yamenyekanye muri gahunda y’ibikorwa bya Polisi y’u Rwanda imazemo iminsi, byo kurwanya ubucukuzi bw’Amabuye y’Agaciro butemewe, igendeye ku makuru yahawe n’abaturage, ko mu rukerera rwo ku wa Kane tariki 13 Gashyantare 2025, barimo bacukura amabuye y’agaciro.

Mu Karere ka Rulindo abarimo bacukura uko bagera kuri 52, batahuwe mu kirombe gicukurwamo amabuye y’agaciro yo mu bwoko bwa Gasegereti, giherereye mu Mudugudu wa Kamatongo, Akagari ka Budakiranya, mu Murenge wa Kinzuzi; mu gihe abandi 16 bo batahuwe bacukura Zahabu mu birombe by’amabuye y’agaciro biherereye mu Mirenge ya Muhoza, Gacaca na Remera.

Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza, yaburiye abishora mu gucukura amabuye mu buryo butemewe, ko Polisi itazigera ituma bagoheka.

Ati "Turagira inama abaturage kwirinda ibikorwa nk’ibyo, kuko ari icyaha gihanwa n’amategeko. Bibagiraho ingaruka zirimo impanuka zo kugwirwa n’ibirombe bamwe bakahatakariza ubuzima, abandi bakahakomerekera ndetse abenshi zibasigira ubumuga".

"Police y’u Rwanda yashyize imbaraga mu bikorwa byo kurwanya ubucukuzi bw’amabuye y’agaciro bukorwa binyuranyije n’amategeko. Ni yo mpamvu rwose tutazigera dutuma bagoheka mu gihe bakiburimo".

SP Mwiseneza yongeyeho ko hashyizweho ingamba zidasanzwe mu gushakisha abakora ibikorwa ibyo ari byo byose bitemewe n’amategeko, harimo n’ubucukuzi bw’amabuye y’agaciro bukorwa muri ubwo buryo.

Mu bafashwe n’ubwo harimo abagore, umubare munini ni abagabo.

Abafatiwe mu Karere ka Rulindo ubu bafungiwe kuri Polisi Station ya Murambi, naho abafatiwe mu Karere ka Musanze bafungiwe kuri Polisi Station ya Muhoza.

Iyo modoka yari itwaye abagenzi 53 ibakuye mu Mujyi wa Kigali yerekeza mu Karere ka Musanze, yageze hafi y’ahitwa ku Kirenge mu Murenge wa Rusiga muri ako Karere ka Rulindo, mu ma saa saba n’iminota 20 z’amanywa, irenga umuhanda wa kaburimbo, imanuka yibarangura, igwa mu manga y’umusozi, muri metero zibarirwa muri 800 uturutse kuri kaburimbo.

Umuvugizi wa Polisi y’u Rwanda, ACP Boniface Rutikanga, wemeje amakuru y’iyi mpanuka, ndetse avuga ko inzego zitandukanye zihutiye kugera aho yabereye zitangira gutanga ubutabazi.

Yagize ati “Impanuka biragaragara ko yatewe no kunyuranaho kwakozwe nabi k’umushoferi wari uyitwaye. Ikimara kuba ubutabazi bwahise butangira gukorwa. Yari impanuka ikomeye yasabye ubufatanye bw’inzego zitandukanye yaba Polisi, Ingabo, inzego z’ibanze n’abaturage kugira ngo abantu babashe gukurwa aho bari bari tubageza ahari imodoka zibatwara kwa muganga. Aho yabereye ni ahantu hasanzwe hagendwa, ni nabwo bwa mbere haberere impanuka imeze kuriya”.

Abakomerekeye muri iyi mpanuka hiyambajwe imodoka zirimo na za ambulance, zibajyana mu bitaro bitandukanye byo mu mujyi wa Kigali birimo na CHUK kuvurirwayo, kuko aribyo byari hafi ugereranyije n’ibindi bitaro biherereye mu Karere ka Rulindo bya Rutongo n’ibya Kinihira.

ACP Rutikanga, yakanguriye abakoresha umuhanda by’umwihariko ku batwara abagenzi kwitwararika.

Ati “Umuntu wese utwaye ikinyabiziga by’umwihariko atwaye abagenzi, aba afite ubuzima bw’abo bantu mu maboko ye. Akwiye kuzirikana ko igihe cyose atwaye, igihe abisikana n’ikindi kinyabiziga akwiye kurangwa n’amahitamo atanga umutekano usesuye w’abagenzi atwaye. Nanone no gukurikirana ko ubuziranenge bw’ikinyabiziga buhagaze neza, hagenzurwa ko utwuma tugabanya umuvuduko dukora neza, ariko kandi na ba nyiri sosiyete z’ibinyabiziga bitwara abagenzi bakabigira inshingano, kugira ngo twimakaze umutekano wo mu muhanda”.

Yihanganishije imiryango y’ababuze ababo anaha ihumure abayikomerekeyemo, kuri ubu bari gukurikiranirwa kwa muganga.

Kari agahinda ku bamenye iby’iyi mpanuka, kuko ikimara kuba, ku mbuga nkoranyambaga hakwirakwiye amafoto na za video zigaragaza iyo modoka ya bisi yangiritse mu buryo bukomeye, inkomere ndetse n’abahitanwe na yo bakurwa aho yabereye, mu musozi muremure, ugizwe n’ibyiganjemo ibihuru n’amashyamba ngo bashyikirizwe inzego z’ubuvuzi.

VIDEO - Mu Karere ka Rulindo mu Murenge wa Rusiga habereye impanuka y'imodoka yarenze umuhanda igwa mu kabande ihitana abantu, abandi barakomereka bikomeye. Iyo modoka itwara abagenzi ya International yavaga i Kigali yerekeza mu Karere ka Musanze.
Polisi n'izindi nzego… pic.twitter.com/pFehww729Q

— Kigali Today (@kigalitoday) February 11, 2025

VIDEO – Imodoka ya International yari itwaye abagenzi 52 yakoze impanuka igeze mu Murenge wa Rusiga mu Karere ka Rulindo, abantu 16 bahita bapfa nk’uko amakuru y’ibanze abivuga. Iyi Bisi yari ivuye i Kigali yerekeza i Rubavu, na yo yangiritse bikomeye. pic.twitter.com/zV1L6Ionnx

— Kigali Today (@kigalitoday) February 11, 2025

Guverinoma y'u Rwanda yihanganishije ababuriye ababo mu mpanuka y'imodoka yaguyemo abantu 20 abandi bagakomereka.

Guverinoma iratanga ubufasha bukenewe ku miryango yabuze ababo no ku bakomerekeye muri iyi mpanuka. pic.twitter.com/0HWRgjwS1H

— Kigali Today (@kigalitoday) February 11, 2025

Muri iri murikamateka, harimo kugaragazwa inyandiko zikubiye mu bitabo, itsinda ry’abahanga b’Abashakashatsi bagiye bandika ku mateka ya Jenoside yakorewe Abatutsi mu Rwanda; abo bashakshatsi babihuriyeho bakaba baturuka mu bihugu birimo u Bufaransa, u Rwanda, u Bubirigi, u Bwongereza na Afurika y’Epfo.

Inyandiko zimurikwa, zikubiyemo insanganyamatsiko 10, zijyanye n’amateka y’u Rwanda zashyizwe mu byiciro bine.

Ibyo byiciro harimo ikijyanye n’amateka mabi u Rwanda rwanyuzemo uhereye mu gihe cya mbere y’ubukoloni, amateka yo mu gihe cy’ubukoloni ari nabwo ivanguramoko ryimakajwe, inyandiko zigaragaza amateka yo mu gihe cya Repubulika ya mbere n’iya kabiri yagejeje u Rwanda kuri Jenoside yakorewe Abatutsi, ndetse n’urugendo rugaragaza ukwiyubaka kw’u Rwanda binyuze mu Butabera, Kwibuka no guhangana n’ibibazo by’Ihungabana.

Dr Philibert Gakwenzire, Umuyobozi wa IBUKA akaba n’umwe mu bagize uruhare muri ubwo bushakashatsi, yagaragaje ko zimurikwa hagamijwe gusakaza amakuru mu buryo buboneye, yafasha abasomyi bo mu byiciro bitandukanye kurushaho gusobanukirwa amateka.

Yagize ati “Hari inyandiko nyinshi abashakashatsi bagendaga babona ugasanga zigarukira mu bitabo banditse byabo bwite gusa, zikaba zanagaragara mu mazu y’isomero amwe n’amwe cyangwa n’ahandi inyandiko zishyingurwa, ariko ntizigere ku mubare munini w’abantu. Iri murikamateka rero, rigamije kuzisakaza mu basomyi bo mu byiciro byinshi, ngo bungukiremo ugusobanukirwa byimbitse n’amateka nyakuri y’u Rwanda, ikiremwamuntu gitezwe imbere, habeho kwirinda icyasenya Abanyarwanda”.

Ahamurikirwa izo nyandiko zisobanura amateka, mu Rwibutso rwa Jenoside yakorewe Abatutsi rw’Akarere ka Musanze, ni mu cyumba amateka agaragaza ko cyaberagamo iburanisha, muri urwo rwibutso rwiciwemo Abatutsi basaga 800 tariki 15 Mata 1994, bikozwe n’interahamwe zakoresheje intwaro gakondo, amasasu na gerenade.

Zabicaga zibavanye muri Sous-perefegitura ya Busengo no mu makomini ya Kigombe na Kinigi, zibizeza kuhabonera ubutabazi.

Umuyobozi wari Uhagarariye Ambasade y’u Bufaransa mu Rwanda, mu gikorwa cyo kuritangiza ku mugaragaro, Aurelien Picquenot, akaba ari n’umujyanama mu by‘imikoranire n’umuco muri iyo Ambasade, yashimangiye ko igihugu cye gishishikajwe no kumenyekanisha amateka nyakuri y’u Rwanda.

Ati “Nk’uko mubizi, uruzinduko rwa Perezida w’u Bufaransa mu Rwanda rwo mu mu 2021, rwabaye umwanya w’ingenzi mu kurushaho kugaragaza ubushake buri hagati y’u Bufaransa n’u Rwanda binyuze mu nkingi eshatu tubona z’ingenzi harimo gusigasira amateka, kwibuka ndetse n’ubutabera. Twashyize imbaraga mu gufatanya mu gikorwa nk’iki kitugejeje ku kugaragaza amateka twifashishije ibikubiye mu nyandiko zisaga ibihumbi 8 zagiye zituruka mu bubiko bw’inyandiko hirya no hino ku Isi, tugamije ko amateka nk’aya amenyekana”.

Iri murikamateka ryahereye mu gihugu cy’u Bufaransa muri Gicurasi 2024, rikomereza ku cyicaro cy’Umuryango IBUKA mu kwezi k’Ukwakira 2024, rikaba ryarakomereje muri Kaminuza y’u Rwanda ishami rya Huye.

Ubu ryatangijwe mu Karere ka Musanze rikaba rigiye kumara ibyumweru bitatu, nyuma rikazakomereza mu kigo cy’Umuco cy’Abafaransa kiri mu mujyi wa Kigali.

Gen (Rtd) Kabarebe aha abana amata

Ubu butumwa Rtd Gen Kabarebe, yabugarutseho ku wa Gatanu Tariki 7 Gashyantare 2025, mu gikorwa yatangije mu Karere ka Burera, cy’ubukangurambaga buhuriweho bugamije kurwanya imirire mibi n’igwingira mu bana, kikaba cyatangirijwe mu Murenge wa Cyanika.

Ni ubukangurambaga bukubiyemo ibikorwa binyuranye bigamije iterambere rishingiye ku mibereho myiza y’abaturage, bukaba butangijwe binyuze muri gahunda yihariye y’aka Karere, y’umuganda uhuriweho wo kurwanya imirire mibi n’igwingira ‘Umuganda Professional Program’.

Muri ubu bukangurambaga, Gen (Rtd) Kabarebe, akaba ari n’imboni y’Akarere ka Burera, yifatanyije n’abaturage bo mu Murenge wa Cyanika mu gutera ingemwe 1000 z’ibiti by’imbuto za Avoka, kubakira umuturage utishoboye inzu, umurima w’igikoni n’ubwiherero.

Nanone kandi buri muryango muri itatu itishoboye worojwe inka ndetse hamenwa ibiyobyabwenge byiganjemo Kanyanga yafatiwe mu Mirenge itandukanye y’Akarere ka Burera, abana bagaburirwa indyo yuzuye.

Muri icyo gikorwa hari abagabiwe inka

Gen (Rtd) Kabarebe yagaragaje ko iterambere abantu baharanira ritagerwaho, mu gihe haba hirengagijwe gushyira imbere umwana.

Yagize ati "Kugira ngo Igihugu gitere imbere, gihera ku bana. Iyo abantu bose bavuga abana, Nyakubahwa Perezida wa Repubulika akavuga abana, Minisitiri cyangwa Guverineri na Meya bakavuga abana; ni icyerekana ko abana ari ingirakamaro cyane. Twese uko tungana uku tuba twarahereye mu bwana. Iyo tutarerwa neza ntituba duhari, nta n’ubwo tuba dukora aka kazi cyangwa ngo tube dufite aho tugeze. Kurera umwana rero ni ukurerera Igihugu".

Yunzemo ati "Ibihugu byose byateye imbere, ni ibyitaye ku bana bikabaha ubuzima bwiza, bagakura neza bafite ubwenge. Natwe ni ho tugomba gushyira imbaraga zacu, tukabakorera ibyiza tukarwanya ibibi".

Yanakanguriye abaturage kwamagana ibiyobyabwenge birimo na Kanyanga, kuko ihungabanya imitekerereze ikamunga umutekano ndetse ikaba ikomeje gusiga aka Karere isura mbi, ari na ko yangiza ubuzima bwa benshi.

Bubatse imirima y’igikoni

Yongeyeho ko abaturage ba Burera badakwiye gukomeza kureberera Akarere kabo kaba mu myanya y’inyuma, muri gahunda zinyuranye zirimo kwesa Imihigo no kurwanya imirire mibi.

Ati "Uyu mwanya mubi tuwamagane. Ibintu byose murabifite. Ari ikirere cyiza, ubutaka bwiza, byose birahari. Nimukomere ku muvuduko n’imyumvire myiza twiyemeje yo gushyira hamwe mu kwesa Imihigo, ibyo bizadukura mu myanya y’inyuma bitugeze ku mwanya wa mbere, ku buryo abitiranyaga Akarere ka Burera na Kanyanga bitazasubira".

Akarere ka Burera kari mu Turere 10 two mu gihugu tugaragaramo umubare munini w’abana bafite imirire mibi n’igwingira, bikagaragazwa n’ibipimo byagiye bishyirwa ahagaragara mu myaka ishize, aho nko mu 2010 igipimo cy’ubugwingire cyari kuri 52%, mu 2015 cyaramanutse kigera kuri 42,9% naho muri 2020 cyageze kuri 41,6%.

Ni mu gihe imibare yagaragajwe n’ibyavuye mu cyumweru cyahariwe ubuzima bw’umubyeyi n’umwana giheruka, igipimo cy’ubugwingire ku bana bari munsi y’imyaka ibiri bo mu Karere ka Burera, cyari kuri 29,4%.

Gen (Rtd) Kabarebe yafatanyije n’abaturage kubakira utishoboye

Abaturage bavuga ko batewe ipfunwe no kuba hakigaragara imirire mibi n’igwingira, bagasanga na bo hari icyo bagiye gukora mu guhangana n’iki kibazo nk’uko Mujawamariya Speciose yabigarutseho.

Ati "Tugiye guhaguruka ubu burangare bukomeje kugaragara mu babyeyi, butuma imirire mibi idacika tuburwanye kuko natwe biratubabaza. Abana bacu twasanze hari umwenda tubafitiye wo kuba dukwiye kunoza uko tubitaho, tunoza isuku y’ibyo tubagaburira kandi tubaha indyo yuzuye. Nyakubahwa Perezida Paul Kagame turamusezeranya ko tugiye kwivugurura, imirire mibi n’igwingira tukabihashya".

Iyi gahunda y’ubukangurambaga nk’uko byagarutsweho n’Umuyobozi w’Akarere ka Burera, Mukamana Soline, itangijwe nk’imwe mu ntego yafasha mu kugera ku ntego zo kugabanya ibipimo by’igwingira, bikaba byagera nibura kuri 15% mu cyerekezo cya NST2.

Yongeyeho ko kuba barabinyujije mu bikorwa by’umuganda ari umwanya abaturage bahurira hamwe, bakabasha gutekereza ku ngamba zihamye buri wese yagiramo uruhare, zo gukumira ikintu cyose gifitanye isano n’imirire mibi n’igwingira.

Habayeho kuremera abatishoboye

Bamennye ibiyobyabwenge byiganjemo kanyanga

Mu gutangiza iyi gahunda, Gen (Rtd) Kabarebe usanzwe ari n’imboni y’Akarere ka Burera, yifayanyije n’abaturage bo mu Murenge wa Cyanika mu muganda wo gutera ingemwe 1000 z’ibiti by’imbuto za Avoka, kubakira umuturage utishoboye inzu, umurima w’igikoni n’ubwiherero.

Muri iki gikorwa kandi imiryango itatu itishoboye yorojwe inka ndetse hamenwa ibiyobyabwenge byiganjemo Kanyanga yafatiwe mu Mirenge itandukanye y’Akarere ka Burera.

Burera iri mu Turere 10 two mu gihugu tugaragaramo umubare munini w’abana bafite imirire mibi n’igwingira ukurikije ibipimo byagiye bishyirwa ahagaragara mu myaka ishize.

Mu mwaka wa 2010 Igipimo cy’ubugwingire cyari kuri 52%, ariko mu myaka icumi yakurikiye kiramanuka kigera kuri 41,6%.

Ni mu gihe imibare Yagaragajwe n’ibyavuye mu cyumweru cyahariwe ubuzima bw’umubyeyi n’umwana giheruka, igipimo cy’ubugwingire ku bana bari munsi y’imyaka ibiri bo mu Karere ka Burera cyari kuri 29,4%.

Iyi gahunda y’ubukangurambaga nk’uko byagarutsweho n’Umuyobozi w’Akarere ka Burera Mukamana Soline, itangijwe muri aka Karere nk’imwe mu ntego yafasha kugabanya ibipimo by’igwingira kugera kuri 15% mu cyerekezo cya NST2.

Musenyeri Mugiraneza Mugisha yahakanye ibyaha byose aregwa

Musenyeri Mugiraneza Mugisha, Urwego rw’Igihugu rw’Ubugenzacyaha (RIB) rwamutaye muri yombi ku itariki 21 Mutarama 2025, nyuma y’iminsi micye yari ishize yeguye ku nshingano zo kuba Umushumba wa EAR Diyosezi Shyira, ku mpamvu yatangaje ko ari ize bwite.

Mu byaha akurikiranweho uko ari bitatu, birimo icy’itonesha, icyenewabo, ubucuti n’urwango; kigaragara mu itegeko rihana ibyaha bya ruswa n’ibifitanye isano na yo. Icyaha cya kabiri akurikiranyweho ni icyo kwigwizaho umutungo wa Diyosezi n’icyo kwiha inyungu zinyuranye n’amategeko.

Imbere y’inteko iburanisha, Musenyeri Dr Mugiraneza wari wambaye kositimu isa n’ibara ry’ivu, ari hamwe n’abunganizi be babiri, yagaragarijwe ibyaha byose ashinjwa, ndetse ubwo yahabwaga umwanya ngo yiregure byose arabihakana.

Kuri ibi byaha ubushinjacyaha bwagaragaje ko Musenyeri Dr Mugiraneza akimara guhabwa inshingano zo kuba Umushumba wa EAR Diyosezi Shyira, yagize umugore we Umuyobozi wa ‘Mothers Union’ nyamara bitari bikwiye.

Aha Musenyeri Mugiraneza yagaragaje ko no mu yandi ma Diyosezi ya EAR menshi ndetse n’iya Shyira irimo, mu bantu benshi azi bagiye bahabwa inshingano zo kuba abashumba ba Diyosezi, abagore babo bahitaga bagirwa abayobozi ba Mother’s Union, ndetse yanongeyeho ko uwo mwanya atari na we ubwe wawumushyizeho, ko ahubwo byakozwe mu bubasha bwa Sinodi ya Diyosezi cyane ko (umugore we), yari anasanzwe ari mu kazi k’ubunyamabanga muri Diyosezi. Bityo ngo ntibyakabaye biba icyaha akurikiranwaho cy’itonesha cyangwa icyenewabo.

Ku cyaha cyo kwiha inyungu zinyuranye n’amategeko, umushinjacyaha yakomoje ku magi y’inkoko abana bo mu bigo by’amashuri ya ECDs bagaburirwaga, mu rwego rwo kurwanya imirire mibi, aho avuga ko rwiyemezamirimo yayaguraga kwa Musenyeri nyamara bitari bikwiye.

Aha Dr Mugiraneza yagaragaje ko mu by’ingenzi byihutirwa yakurikiranaga mu kazi ke ka buri munsi, ibyo kumenya aho rwiyemezamirimo yabaga yaguriye amagi, bitari mu nshingano ze zihutirwa, ngo icyakora ibyo yitagaho kwabaga ari ugukurikirana ko hatabamo ubundi buriganya bwo kuyavutsa abana babaga bayagenewe.

Hanakomojwe ku mucanga wagiye ukoreshwa mu mirimo yo kubaka isoko rigezweho rya EAR, ndetse n’ibindi bikoresho byose bijyanye n’ubwubatsi bwaryo, aho umushinjacyaha yashinje Musenyeri kuba yari yaratanze ibwiriza ry’uko nta yindi modoka yari yemerewe kubitunda uretse Fuso ye yakoraga ako kazi yonyine.

Musenyeri Mugiraneza yireguye agaragaza ko hari komite igizwe n’abantu batandatu, yafataga umwanzuro w’ibikorwa byose bijyanye n’imirimo y’ubwubatsi harimo no gutanga isoko, bityo ko icyo cyemezo atari agifitye ubushobozi mu gihe hari abandi babifite mu nshingano.

Yongeyeho ko mu nshingano nyinshi yabaga afite zo kuyobora Diyosezi, atari kugira umwanya uhagije wo gukurikirana ngo amenye imodoka zabaga zemerewe gutunda ibyo bikoresho n’izitari zibyemerewe. Kuri iyi ngingo kandi Musenyeri Mugiraneza yagaragaje ko rwiyemezamirimo yari yaremereye Diyoseze ko isoko rizaba ryuzuye mu gihe kitarenga amezi atandatu. Ngo akurikije uburyo ari rinini kandi imirimo isaba imbaraga nyinshi zishoboka, bitumvikana ukuntu yari kwemera ko imodoka imwe yonyine itunda ibikoresho byose bijyanye n’iyo mirimo.

Ku cyaha cy’uko yororeye inka ze bwite mu rwuri rwa Diyoseze ruherereye mu Karere ka Musanze, n’icy’uko imodoka ya Diyoseze yayikoreshaga mu kuzitundira ubwatsi, ndetse abashumba be bagahembwa na Diyoseze, Musenyeri Mugiraneza yagihakanye avuga ko inka ze uko ari 19 azororeye mu rwuri rwa Diyosezi ruherereye mu ishyamba rya Gishwati mu Karere ka Nyabihu, kandi ko ubwo yajyaga ku buyobozi yasanze n’abandi Basenyeri bagiye bamubanziriza mu myaka yindi myinshi yatambutse, ariho bororeraga izabo; aha ngo akaba atumva ukuntu kuba yarahorereye byahinduka icyaha.

Umushinjacyaha yagaragaje ko Abatangabuhamya barimo Kwubayo Charles na Kabaragasa Jean Baptiste babajijwe, bari bafite inshingano muri Diyoseze, bagaragaje ko izi ari impamvu zikomeye zituma yakurikiranwaho ibi byaha.

Abanyamategeko babiri bunganira Musenyiri Mugiraneza barimo Uwizeyimana Jean Claude, bagaragarije Urukiko ko umukiriya wabo yarekurwa akaburana ari hanze, cyane ko afite umuryango uzwi, aho atuye hazwi kandi ko afite ingwate n’abishingizi.

Urukiko rwasabye Musenyeri kugaragaza ingano y’umutungo afite, ariko abunganizi be bungamo ko bibaza impamvu yakomeza kuburana afunzwe nyamara ubushinjacyaha butarigeze bukora iperereza cyangwa ubugenzuzi ngo hamenyekane ingano n’agaciro k’ibyo Musenyeri yanyereje n‘igihombyo byateje Diyoseze.

Bagashingira kuri ibi bibaza impamvu mu minsi yose amaze afunzwe n’indi yabanjirije ifungwa rye iryo perereza ritakozwe. Ibi bakabiheraho bagaragaza ko ugufungwa kwe kurimo n’akarengane.

Musenyeri Dr Mugiraneza yasabye ubucamanza ko yarekurwa akajya aburana ari hanze, ku mpamvu z’uburwayi afite, ndetse ngo hari ingwate yemeye gutanga zirimo n’ibyangombwa by’imitungo ye ndetse n’abishingizi, mu rwego rwo kugaragaza ko atatoroka ubutabera.

Urubanza ku ifungwa n’ifungurwa ry’agateganyo rwatangiye mu ma saa tanu rusozwa saa cyenda n’iminota 40, rukaba rwamaze amasaha ane. Umwanzuro ku ifungwa n’ifungurwa ry’agateganyo rya Musenyeri Mugiraneza Mugisha Samuel uzasomwa ku itariki 11 Gashyantare 2025.

Ubuke bw’amashuri butuma abanyeshuri bavunika kubera kwiga kure

Mu bigo by’amashuri bibarizwa mu Kagari ka Karukungu n’utundi byegeranye, yaba muri uwo Murenge wa Janja n’indi byegeranye, ni iby’amashuri abanza gusa.

Aho abayasoza baba bimuriwe mu cyiciro cya mbere cy’amashuri yisumbuye, mu bigo by’Amashuri y’Uburezi bw’Ibanze bw’imyaka 12, abenshi bibasaba gukora urugendo ruri hagati y’isaha n’igice n’amasaha abiri n’igice bajya kwiga, bakongeraho n’urundi nka rwo bakora bataha iwabo buri munsi.

Sara Mukanzabonimpa, ahera ku rugero rw’Ikigo cy’Amashuri Abanza cya Karama, aho abana baharangiza bakimurirwa mu mashuri byitwa ko abegereye, bagerayo bagenze amasaha atari munsi y’abiri.

Ati “Ni urugendo ruvuna abana bacu, bamwe bikabatera kurivamo abandi bajya kwiga badashaka kubera ukuntu rugoye. Nimugoroba basoza saa kumi n’igice, bakongeraho ayo masaha arenga abiri bakagera mu rugo mu ma saa moya z’ijoro. Bwacya n’ubundi bakazinduka igicuku, ku buryo nibura saa kumi n’imwe baba bahagurutse bajya kwiga. Nawe wibaze ibyo bicuku n’amajoro abana bahoramo, aho rimwe na rimwe imvura igwa ikabanyagirira mu nzira, bakagera ku ishuri cyangwa imuhira, bo hamwe n’ibikoresho by’ishuri nk’amakayi byatose”.

Mu mashuri abanza adafite 12YBE yaba ayo mu Murenge wa Janja n’indi byegeranye, harimo iryitwa Giramahoro Primary School ryo mu Murenge wa Gakenke, ishuri ribanza rya Kirabo ryo mu Murenge wa Busengo, ishuri ribanza rya Kiryamo mu Murenge wa Muzo, ishuri ribanza rya Rwingoma mu Murenge wa Busengo, ishuri ribanza rya Gahondo hiyongereyeho n’iribanza rya Karama mu Murenge wa Janja.

Ayo mashuri abana bose bahasoreza umwaka wa gatandatu w’amashuri abanza, baba bemerewe gukomeza icyiciro cya 12YBE, bamwe bajya kwiga kuri GS Rutake muri Janja, GS Nganzo na GS Karuganda mu Murenge wa Gakenke, byitwa ko ariyo ahegereye; aho bibasaba nibura gukora urugendo rw’amasaha asaga abiri n’igice kugira ngo bahagere kandi nabwo bakiga bacucitse.

Yagize ati “Hari abana bajya kwiga, bakagarukira mu nzira ntibagere ku ishuri kubera kunanirwa, abandi bakirirwa bazerera mu mihanda mu gihe ababyeyi babo baba bazi ko bagiye kwiga. Bamwe barambirwa izo ngendo za buri munsi bikabaviramo guta ishuri. Twifuza ko Leta yadufasha ikatwegereza amashuri ya 12YBE hafi, kuko kuba adahagije ari inzitizi ikomeye cyane ku hazaza h’imyigire y’abana bacu”.

Ibigo by’amashuri abanza bimwe na bimwe nta 9YBE cyangwa 12YBE bigira

Umuyobozi w’Intara y’Amajyaruguru Mugabowagahunde Maurice, yizeza abaturage ko hagishakishwa ubushobozi bwo kongera ibyumba by’amashuri, ndetse n’ibindi bikorwa remezo byorohereza abana mu myigire aho bikiri bicye.

Ati “Birasaba ubushobozi ndetse icyo dukomeje gushyiramo imbaraga ni ukureba ahakigaragara ingorane kurusha ahandi, no kugira icyo tuzikoraho mu guteza imbere uburezi. Mu bufatanye bw’Igihugu cyacu n’abafatanyabikorwa bacyo mu kwita ku burezi, ubuvugizi buganisha ku kongera ibyumba by’amashuri, ibibuga by’imikino n’ibikoni byo gutekeramo ku bigo by’amashuri, birimo gukorwaho kandi igishimishije ni uko ubushake bwo kubona ubushobozi bwo kubikora buhari, ndetse bugiye kwihutishwa nibura buri mwaka hakazajya hagira igikorwa, cyane ko muri ako Karere ka Gakenke hatangiye gahunda yo guteza imbere uburezi binyuze mu Kigega Pro-Poor Basket Found”.

Aba banyeshuri uko ari 30 bari bamaze umwaka biga ibijyanye n’ubucuruzi bukorerwa kuri murandasi

Aba bagize icyiciro cya mbere cy’abasoje amasomo muri gahunda y’igihe kirekire, yo kohererezanya abanyeshuri no gusangira ubumenyi, iri hagati y’aya mashuri yombi.

Abanyeshuri bayarangije bigaga mu mashami y’ubucurizi bukorerwa kuri murandasi (E-Commerce), ndetse n’ikoranabuhanga ryikoresha (Electrical Automation Technology).

Natacha Umwari Ange, Umwe mu banyeshuri basoje aya masomo mu Bucuruzi bukorerwa kuri Murandasi (E-commerce), avuga ko ubufatanye bwa Rwanda Politechnic na Jinhua Technology y’u Bushinwa, bwatumye abona amahirwe yo kwagura ubumenyi no kugira ubunararibonye mu bijyanye na E-commerce, binamuha amahirwe yo gukorera muri sosiyete y’ubucuruzi bukoresheje Murandasi yitwa ‘Cainiao’.

Ati “Ubumenyi n’imico mpuzamahanaga nigiye mu Bushinwa byatwubatsemo ubushobozi bukenewe ku rwego rwiza, aho njye n’itsinda nari ndimo twitabiriye amarushanwa y’ibigo by’imyuga ku rwego rw’Isi mu 2024, binatuma twegukana umudali wa zahabu. Ubu niteguye gutangiza no kumenyekanisha ubucuruzi bwo kuri Murandasi mu buryo bwiza kandi butanga umusaruro, haba mu gihugu ndetse n’ahandi.”

Uwamahoro Alphonsine, na we warangije mu bijyanye n’ubucuruzi bukorerwa kuri murandasi, agira ati “Mu masomo twize arebana n’ubucuruzi bukorerwa kuri murandasi, twagiye tubona amahirwe kenshi yo kubishyira no mu ngiro tubyitoreje mu nganda zaho, cyane ko zo ziri ku rwego ruhambaye kandi ruzobereye mu bucuruzi nk’ubwo. Mu byo twahamenyeye harimo uburyo butandukanye bwo kureshya abakiriya, kumenya ibyo bakeneye ku isoko n’inzira binyuramo ngo bibagereho hakoreshejwe ikoranabuhanga”.

Ati “Ubu njye ntahanye umushinga wo kuzifashisha kuzajya nkorana bya hafi n’inganda zo mu Bushinwa, nkajya nkora ubucuruzi bw’ibikoresho byifashisha ikoranabuhanga mu gutunganya uruvange rw’imbuto hakorwamo umutobe, cyane ko byagaragaye ko abantu benshi muri iki gihe, bakenera imitobe itunganyijwe muri ubwo buryo mu gihe bifuza kubungabunga ubuzima bwabo, ariko ntibabone uburyo buboroheye babikoramo kubera ko byaba ibikoresho biyitunganya ahanini biba binahenze ku masoko”.

Abasoje amasomo bahawe impamyabumenyi

Umuyobozi mukuru w’Ishuri Rikuru ry’Imyuga n’Ubumenyingiro, ishami rya Musanze, Eng. Emile Abayisenga, yavuze ko imikoranire y’izi kaminuza zombi ikomeje kugira uruhare mu kuzamura ireme ry’uburezi, bufungurira abanyeshuri amahirwe yo guhanga imirimo cyangwa kubona akazi.

Yagize ati “Twanejejwe cyane n’umurava abanyeshuri bacu bagaragaje. Ubu bufatanye hamwe na Kaminuza ya Jinhua yo mu Bushinwa, bugaragaza neza icyerekezo dusangiye cyo kurema abakozi bafite ubushobozi bwo guhatana ku isoko ry’umurimo, kuzana udushya n’iterambere mu Rwanda no ku rwego mpuzamahanga.”

Ibi kandi byashimangiwe na Zhu Chonglie, Umunyamabanga uhagarariye ishyaka ry’umujyi wa Jinhua iyo Kaminuza ibarizwamo.

Yagize ati “Imikoranire yacu na Rwanda Polytechnic yerekana imbaraga z’imishinga y’Uburezi mpuzahanga. Tunejejwe n’umuhate ndetse n’ishyaka mu myigire aba banyeshuri babashije kugaragaza mu gihe cy’amasomo, kandi twizeye ko ubu bufatanye buzakomeza kugirira umumaro impande zombi.”

Muri iyi gahunda, abanyeshuri ba RP Ishami rya Musanze batsinze neza imyaka ibiri ya mbere, nibo bafashijwe gusoreza amasomo yabo muri kaminuza y’icyitegererezo yo mu Bushinwa mu gihe cy’umwaka.

Ngo icyagaragaye ni uko mu gihe bamaze muri iyo Kaminuza, batigeze basubira inyuma mu mitsindire ndetse ngo hari n’amarushanwa abahuza n’andi ma Kaminuza Mpuzamahanga bagiye bitabira, kandi bakayitwaramo neza, aho bagiye begukana imidari ya Bronze n’iya Zahabu; hakabamo n’abagiye bahabwa akazi mu nganda zitandukanye zo mu Bushinwa.

Abo banyeshuri bari hamwe n’abayobozi muri Ambasade y’u Rwanda mu Bushinwa ndetse na bamwe mu bayobozi bo muri Kaminuza ya Jinhua n’ab’Umujyi iherereyemo

Nk’uko byagarutsweho n’abayobozi ku mpande zombi, isozwa rya mbere ry’aya masomo rishimangira imikorere irambye hagati y’u Rwanda n’u Bushinwa, ndetse rikanatanga icyizere cy’ubufatanye buzakomeza no mu gihe kizaza hagati y’amashuri yombi.

Icyiciro cya mbere cy’abanyeshuri cyasoje amasomo mu Bushinwa, cyasesekaye mu Rwanda muri iki cyumweru, hakaba abasigaye mu Bushinwa ku bw’impamvu z’imirimo no kuhakomereza andi masomo yisumbuyeho.

Byitezwe ko ikindi cyiciro cya Kabiri kizagera mu Bushinwa gutangira umwaka usoza amasomo yabo muri Werurwe 2025.

Abitabiriye uwo muhango wabereye mu Bushinwa basusurukijwe n’imbyino zirimo n’iz’Abanyarwanda

Ibigage byagashwe byamenwe

Ibikorwa byo gushakisha abo bagabo bengera ibyo bigage mu Murenge wa Gahunga mu Karere ka Burera, byatangiye guhera mu ma saa cyenda y’urukerera rwo kuri uyu wa Gatanu Tariki 24 Mutarama 2025, nyuma y’uko hari abaturage bari bamenye ko hari abitwikiriye icyo gicuku barimo benga ibyo bigage, bimenyereweho kuzengereza ubuzima bwa benshi, bahita batungira agatoki Polisi barashakishwa bamwe bafatirwa mu cyuho.

Abo bagabo barimo Niyonzima Innocent wo mu Kagari ka Nyangwe, wafatanywe Litiro 140, Ntiranyibagirwa JMV wo mu Kagari ka Buramba we bamusanze arimo yitegura kubishigisha, Maniraguha wo mu Kagari ka Karangara wafatanywe Litiro 140 n’abandi bane bo mu Kagari ka Buramba harimo Hakizimana Gaspard wafatanywe Litiro 160, Bampericyera Emmanuel wafatanywe Litiro 160, Niyitegeka Samuel na we wafashwe yitegura kwenga ibyo bigage.

Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza wemeje aya makuru, yagize ati "Bafatanwe Litiro zibarirwa muri 600. Ubu bose bafungiwe kuri Police Station Gahunga, aho barimo kwigishwa. Ibyo bigage twabafatanye twabimennye mu ruhame rw’Abaturage, naho ingunguru n’ibijerekani bifashisha mu kubibikamo n’ibyo babyengeragamo, bibitswe ku Murenge wa Gahunga".

Aho ibyo bigage byagiye bitahurwa byari bitaze mu ngunguru n’ibidomoro, byakusanyirijwe hamwe bimenerwa mu ruhame.

Abaturage bagiriwe inama yo kwirinda amakosa

Nyuma yaho abaturage bo muri ako gace bakoranye inama n’inzeho zishinzwe umutekano ndetse n’iz’ibanze, bibutswa ububi bw’ibyo bigage, banasabwa kongera ubufatanye mu kubirwanya, by’umwihariko batanga amakuru bitaroreka ubuzima bw’abantu.

SP Mwiseneza ati "Ubutumwa duha abaturage ni ukwirinda kunywa no kwenga ibigage nk’ibi, ndetse n’inzoga z’inkorano kuko ari zo nyirabayazana w’Umutekano muke n’amakimbirane mu miryango. Turagira inama abishora mu bikorwa nk’ibyo ko bitemewe kandi ko bihanirwa. Icyiza ni ukubireka kuko bidashobora kubahira habe na gato. Police y’u Rwanda yarabahagurukiye, iri maso impande zose".

Basuye ishuri ribanza rya Karama

Muri urwo ruzinduko aba ba Ambasaderi, bari hamwe n’Umunyamabanga wa Leta muri Minisiteri y’Ubutegetsi bw’Igihugu (MINALOC), Kayisire Marie Solange, ndetse n’Umuyobozi Mukuru w’Ikigo LODA, bakaba basuye Ikigo Nderabuzima cya Rutake ndetse n’ishuri ribanza rya Karama (EP Karama), biherereye mu Murenge wa Janja muri aka Karere ka Gakenke.

Ikigo nderabuzima cya Rutake aba bayobozi basuye, cyatwaye Miliyoni 339, kikaba giha serivisi abagera mu 27837, mu gihe ibyumba by’amashuri byubatswe uko ari 40 byuzuye bitwaye Miliyoni zisaga 357 z’amafaranga y’u Rwanda.

Ikigega Pro-Poor Basket, cyatangijwe na Guverinoma y’u Rwanda ku bufatanye n’igihugu cy’u Budage binyuze muri Banki ishinzwe iterambere ya KfW, iki gihugu kikaba cyarashoyemo Miliyoni 31 z’ama Euro, igihugu cy’u Bufaransa cyashoyemo Miliyoni 16 z’ama Euro kibinyujije mu Kigo cy’Abafaransa gishinzwe Iterambere, Agence Française de Développement (AFD), mu gihe igihugu cya Luxembourg cyo cyatanze Miliyoni 3 z’ama Euro kibinyujije mu Kigo cy’icyo gihugu gishinzwe Iterambere ’Luxembourg Development Agency’, hakaba n’andi yagiye yiyongeraho yose hamwe akaba abarirwa muri Miliyoni 57 z’ama Euro umushinga wose muri rusange uzarwara.

Birebeye ibikorwa bitandukanye ibihugu byabo byateye inkunga

Ni ikigega cyatangijwe muri 2023, imishinga ikubiyemo itangira gushyirwa mu bikorwa mu Turere 16 tw’u Rwanda muri mutarama 2024, ukaba uhuriweho n’ibihugu by’u Budage, u Bufaransa na Luxembourg.

Ibikorwa byibandwaho birimo ibijyanye no gutera inkunga Uturere two mu cyaro, hitabwa ku mishinga ikomeye y’ibikorwa remezo.

Abaturage begerejwe ibyo bikorwa bavuga ko byaje kubakura mu bwigunge, aho babyitezeho kubona serivisi z’ubuzima ndetse n’iz’uburezi birushaho kubanogera ugereranyije na mbere.

Amasaderi w’u Budage mu Rwanda Heike Uta Dettmann hamwe na Guverineri Mugabowagahunde Maurice

Abari batuye ku kirwa cya Bushongo bakomeza gusubirayo guhinga

Iyo miryango uko ari 84, kuri ubu ituye mu Mudugudu wa Birwa, uherereye mu Kagari ka Rurembo, Umurenge wa Rugarama mu Karere ka Burera, yahoze ituye rwagati mu mazi y’Ikiyaga cya Burera ku kirwa cya Bushongo.

Kutagira ubutaka bahingaho muri uyu mudugudu bimuriwemo cyangwa no hanze yawo, bituma bahora bararikiye imirima yabo basize mu biyaga bya Burera.

Buri gitondo abatuye muri uyu mudugudu, bifashisha ubwato bumwe rukumbi bwa moteri buhabarizwa, abandi bakifashisha ubwato butoya bwo kugashya berekeza kuri icyo kirwa gushakirayo amaramuko, byagera nimugoroba basoje imirimo bakongera bagataha.

Nyiraziboneye Domina agira ati “Ibyo birwa badushishikarije kubivamo bagamije kudukiza amanegeka yari atwugarije, maze badutuza muri uyu mudugudu. Gusa mu kuhagera twagiye tugira imbogamizi z’uko nta masambu yo guhinga tuhafite, tubonye inzara igiye kuzawudutsindamo, duheraho dutangira kujya twongera kwambuka dusubira muri ibyo birwa guhingayo imirima yacu twahasize, no kujya tuyahiramo ubwatsi bw’amatungo”.

Ati “Birasa n’aho ari ukwihara amagara, kuko nk’ubu muri uko kwambuka amazi kwa buri munsi tujyayo ndetse no gutaha tuvuye muri iyo mirimo, twese abo mu mudugudu twipakira mu bwato bumwe bwonyine buhari bwa moteri, mu gihe abandi bakoresha ubwato buto cyane bwo kugashya. Dufite impungenge z’uko igihe kimwe umuyaga n’umuvumba bizadusangamo bikaturoha muri aya mazi abo mu mudugudu wose bakahashirira, cyane ko n’ibimenyetso twatangiye kujya tubibona, duhereye ku kuntu ubwo bwato bumwe ducungiraho, moteri yabwo isigaye yizimya bya hato na hato, kandi bikaba bikunze kubaho turi mu rugendo”.

Aba baturage bifuza gufashwa bakabona umushoramari ubagurira ubutaka, bagatandukana no gukomeza kwambuka ayo mazi bajya gushaka amaramuko muri ibyo.

Karimunda Bosco ati “Igisubizo kirambye cyadukiza iyambuka rya hato na hato tujyayo cyangwa tuvayo, ni ukudufasha kubona abatugurira buriya butaka, kugira ngo tubone ubushobozi duheraho tugura ahandi hantu hadashyira ubuzima bwacu mu kaga”.

Umuyobozi w’Akarere ka Burera Mukamana Soline, avuga ko bakomeje gukora iyo bwabaga bashakisha abafatanyabikorwa bagura ubwo butaka ku kiguzi kidahenze abaturage.

Ati “Hakunze kuza abashoramari barambagiza biriya birwa bagira ngo babigure, ariko ugasanga amafaranga bifuza gutanga ari macyeya cyane ugereranyije n’agaciro ka buriya butaka. Nta byumweru bibiri bishize dusuye bariya baturage aho twabasabye gutegereza bihanganye, tugakomeza kubashakira umushoramari utabafatirana ku gaciro ku butaka bwabo ngo abahende, cyane ko icyo tubereyeho ari ukureberera inyungu z’umuturage wacu, kuko iyo abayeho naza natwe ubwacu biba biduteye ishema”.

Ikirwa cya Bushongo gifite ubuso bubarirwa hejuru ya Hegitari 37. Abahoze bagituyeho, bamaze imyaka igera ku 8 bahavuye, bimurirwa mu Mudugudu wa Birwa.

Mu Mirenge itandukanye y’aka Karere harimo nk’uwa Kagogo, Kinyababa na Butaro aho uyu muhanda unyura, abaturage bavuga ko umuhanda wagiye usatira inzu zabo, zigenda zisaduka, izindi zigasigara ziregetse hejuru y’imikingo ku buryo batinya ko zishobora kuriduka ubuzima bwabo bukajya mu kaga.

Mukandori Esperence utuye mu Murenge wa Kagogo agira ati: “Inzu bazisatirije umuhanda zisigaramo rwagati, ku buryo no kuzisohokamo bisaba kwigengesera ngo udakubitwa n’imodoka. Mbere twagiraga imbuga abana bakiniramo cyangwa twanikamo imyaka, yewe hamwe bakagira n’uturima tw’igikoni ku irembo; ariko ubu byose byabaye amateka kubera ko mu gutunganya umuhanda bagiye babivanaho dusigara mu manegeka”.

Yongeraho ati “Ababishinzwe bakomeje kubirebera, bakaba batarigeze natwe batubarurira imitungo yacu nk’uko babikoreye n’abandi, ngo tuhave twimukire ahandi”.

Umuturanyi we Senkera Pierre na we agira ati: “Mu kubarira abandi, ababishinzwe batubwiraga ko twe ibipimo by’umuhanda bitazigera bigira icyo bihungabanya ku mitungo yacu, ariko twatunguwe n’uko ahubwo byanarenzeho tugasigaramo rwagati mu muhanda, aho inzu tuzibayemo mu bwoba dutewe n’uko isaha ku isaha imodoka yaza ikatugongeramo”.

Uyu muturage avuga ko n’ahatari amanegeka, ubu hashyizwe ibitaka ku buryo ntacyo habamarira

“Tuhafite imirima yarindimukiwemo n’itaka ubu ikaba yaratubereye imfabusa kuko hamwe tutahahinga n’aho tubigerageje imyaka ikaba itabasha kwera ngo tuyisarure”.

Umuhanda Base-Kirambo-Butaro-Kidaho ureshya na Kirometero 63 ndetse imirimo yo kuwutunganya ngo ushyirwemo kaburimbo ikaba irimbanije. Uri gukorwa mu buryo buhuriweho na Kampani ebyiri zizobereye muri ibyo bikorwa byo gukora imihanda, harimo iy’inyarwanda izwi nka NPD ifite igice gituruka Base-Kirambo-Butaro mu gihe indi kampani yo mu gihugu cy’u Bushinwa izwi nka CRBC yo iri gukora igice gituruka Butaro-Kidaho.

Iyo mirimo yatangiye guhera mu mwaka wa 2022, bikaba biteganyijwe ko igomba gukorwa mu gihe cy’imyaka itatu.

N’ubwo bitakundiye Kigali Today guhita imenya umubare nyawo w’abaturage bahuje ikibazo cyo kuba barasigaye batabariwe ingurane, bo ubwabo bivugira ko ari benshi, cyane ko mu Mirenge uwo muhanda unyuzemo, abenshi bagaragaza ko ari ikibazo kibahangayikishije.

Mukamana Soline uyobora Akarere ka Burera, avuga ko bagiye gukurikirana iby’iki kibazo kikabonerwa umuti byihuse.

Ati: “Tugiye kwegeranya abarebwa n’ikibazo tubahuze n’abashinzwe kubikemura. Leta ibereyeho umuturage no kumukemurira ibibazo bimwugarije, ku bw’ibyo rero n’ibijyanye n’ingurane, muri iki gihe nta gikorwa kijyanye no kwegereza abaturage ibikorwa remezo kikibaho hatabanje kubaho kubarura ibyabo. Turaza kubikurikirana kandi nanabizeza ko vuba bizaba byabonewe umuti”.

Uyu muhanda uzarangira gukorwa utwaye Miliyari 96 z’amafaranga y’u Rwanda. Aba baturage bavuga ko ari igikorwa cy’ingirakamaro bazaba bagezeho kuko bari bawubabaye cyane, ngo uborohereze mu buhahirane.

Bahitamo kuvoma amazi y’ikiyaga ngo kuko ariyo bamenyereye

Mu Kagari ka Rurembo, Umurenge wa Rugarama ahagaragara icyo kibazo, ku nkengero y’ikiyaga muri ako gace, uhasanga bamwe mu baturage, barimo ababa bamesera imyenda mu mazi y’ikiyaga, abandi bayogeramo ndetse n’ababa bogerezamo ibiribwa; mu gihe ku rundi ruhande abandi baba bavoma amazi y’iki kiyaga yokubafasha mu mirimo nko guteka, ndetse akaba ari na yo bakunze kunywa.

Mukandanga Jeanne, agira ati “Tuyifashisha mu bikorwa byose bijyanye n’isuku yo mu ngo tutitaye ku kuba baba bayameseyemo imyenda cyangwa yandujwe mu bundi buryo ubwo ari bwo bwose, kuko n’ubundi ariyo twakuze tunywa, tuyakaraba, tuyatekesha tukayakoresha n’ibindi bikorwa bijyanye n’isuku yo mu ngo, kandi uretse kuba wenda turwara indwara z’inzoka, urebye nta bindi bibazo bihambaye adutera”.

Ati “Ino aha bamaze iminsi baratwegereje amavomo y’amazi, ariko akenshi ntituyavomaho bitewe n’uko icyanga cy’amazi yayo gitandukanye n’icy’aki kiyaga twamenyereye, ndetse bamwe usanga iyo bayanyweye bibaviramo kurwara ibicurane n’umutwe, tugakeka ko ahanini biba byaturutse ku miti babanza gushyira mu mazi yo muri ayo mavomo”.

Nyamara ngo uku gukoresha amazi y’ikiyaga no kuyanywa, nabwo bikunze kubateza indwara z’inzoka zo mu nda, bahora bivuza ariko bakanga bagakomeza kuyakoresha.

Barasabwa kureka kuvoma amazi y’ikiyaga abateza uburwayi

Umuyobozi w’Umusigire w’Ikigo Nderabuzima cya Gitare, Muhawenimana Seraphine, akangurira abaturage kwirinda gukoresha amazi adasukuye, kuko biteza ingaruka z’indwara zitari nkeya.

Ati “Twakira abantu benshi baza barwaye twabasuzuma tukabasangamo inzoka zo mu nda, kandi iyo dusesenguye neza, dusanga zifitanye isano no kuba akenshi bakoresha amazi y’ikiyaga mu bikorwa by’ubuzima bwabo bwa buri munsi”.

Ati “Tubakangurira duhereye ku begereye amavomo y’amazi meza kuyayoboka bakaba ariyo bakoresha, mu mwanya wo gukoresha ay’ikiyaga kuko yo ateza ingaruka bitewe n’imyaka iba yagiyemo. Abo bidakundiye wenda amavomo akaba abari kure, bajya babanza guteka ayo baba bavomye y’ikiyaga, akabira neza mbere yo kuyakoresha ibindi, mu kwirinda indwara za hato na hato ziterwa n’umwanda”.

Mukamana Soline, Umuyobozi w’Akarere ka Burera, avuga ko bagiye gushyira imbaraga mu gukangurira abaturage kwirinda ikintu cyose cyabakururira umwanda, harimo n’ikoreshwa ry’amazi y’ikiyaga.

Ati “Ubwabyo kuba bigeze iki gihe hari abatarumva umumaro amavomo begerejwe abafitiye, bigaragara ko hagikenewe kubegera tukabigisha bagahindura iyo myumvire. Tugiye kurushaho kongera ubukangurambaga abaturage babyaze umusaruro ibyo bikorwa remezo by’amazi begerejwe, ari na ko bibafasha gusigasira ubuzima bwabo birinda indwara”.

Ikiyaga cya Burera

Indwara z’inzoka zo mu nda, raporo zagiye zishyirwa ahagaragara na Minisiteri y’Ubuzima harimo n’iyo mu mwaka wa 2020, igaragaza izo ndwara nk’iziri ku isonga mu zibasira umubare munini w’abantu, ugera ku kigero cya 41%, kandi muri aba yibasira abenshi ni abakuze ugereranyije n’abakiri batoya.

Abacururiza mu Ryabazira bifuza ko ryubakwa bagatandukana no gucururiza hasi

Muri centre y’ubucuruzi iri ku muhanda wa kaburimbo Musanze-Kigali, mu Mudugudu wa Karombero, Akagari ka Muhaza mu Murenge wa Cyabingo, aho iryo soko riremera, usanga ibicuruzwa byiganjemo ibiribwa, imyambaro n’ibikoresho bitandukanye, babitanditse hasi ku mifuka.

Mukanoheli Immaculée, uricururizamo inyanya agira ati “Abacuruzi b’imboga n’imbuto duhurira n’akaga k’umwihariko muri iri soko, kuko nk’iyo izuba rivuye ari ryinshi byangirika tugatahira ibihombo gusa. Nkanjye ubu ku munsi w’isoko nzindukana ibitebo bibiri by’inyanya, nzana kugurishiriza muri iri soko. Bigera mu ma saa yine izuba ryamaze gukariha cyane, zigahirirana zikangirika, ku buryo hataburamo nk’izuzuye ipaniye y’ibiro 10 zimbera imfabusa nkazimena. Iyo bingendekeye gutyo usanga mpomberamo amafaranga ari hagati y’ibihumbi bitandatu na birindwi”.

Ni isoko rifatwa nk’irikomeye kuko ubwaryo riri ku muhanda wa kaburimbo, unyurwamo n’urujya n’uruza rw’abaturuka mu turere tumwe bajya mu tundi, bitwaye cyangwa batwawe mu binyabiziga ndetse abandi bahagenda n’amaguru.

Ibyo bikanajyanirana n’uko iminsi riremeraho irimo uwo ku wa kabiri, ku wa kane no ku cyumweru, usanga ryuzuyemo abantu benshi cyane, ku buryo rimwe na rimwe no kubona aho ukandagira, biba ari ihurizo rikomeye.

Ibiribwa babitandika ku dufuka turambitse hasi ku itaka

Bisa n’aho nta mahitamo y’igihe nyacyo ikirere kibaha agahenge, kuko uretse kuba izuba ribangiriza, n’iyo imvura iguye, ibanyagirana n’ibicuruzwa, ikanahateza ibyondo byinshi byangiza bimwe mu bicuruzwa.

Ati “Imvura iragwa tukanyagiranwa n’ibyo twazanye gucuruza, kuko nta hantu hagutse tubasha kugamana na byo hahari, cyane ko n’ubwo aho iri soko riri hakikijwe n’inzu z’ubucuruzi, nta bwinyagamburiro zifite, ni ntoya, ugereranyje n’ikivunge cy’ababa bariremye. Iri soko ugendeye ku kuntu abantu benshi baba bisukiranya baza kurihahiramo, abandi bazanywe no kuricururizamo biguha ishusho y’uburyo riramutse ryubakiwe, agaciro k’umusaruro uturuka muri kano gace karushaho kwiyongera kandi n’abahacururiza bagakora batekanye”.

Umuyobozi w’Akarere ka Gakenke Mukandayisenga Vestine, avuga ko ubu bari kunoza umushinga mugari wo kuryubaka.

Ati “Aho riremera ubu ni mu mbago z’igishanga bidashoboka ko twashyira inyubako. Ubu turimo kunoza umushinga mugari wo kuzaryimurira n’ubundi muri ako gace, ahantu heza hisanzuye kandi hategereye igishanga. Duteganya ko ryazubakwa ruguru y’umuhanda wa kaburimbo unyura aho riremera muri iki gihe. Nabwira abaturage ko bashonje bahishiwe, ni ikibazo dukomeje gukoraho dufatanyije n’abafatanyabikorwa b’akarere, ku buryo umwaka utaha tuzaba tumaze kubona neza icyerekezo cy’uburyo uwo mushinga uzakorwamo”.

Ubuke bw’Inzu z’ubucuruzi zihari ntibworohera abakenera kugamisha ibicuruzwa mu gihe cy’imvura

Nta mubare nyawo w’abacururiza mu isoko ryo mu Ryabazira Kigali Today yabashije kumenya, kuko umuyobozi urikuriye Niringiremungu atigeze yemera kuyitangaza.

Icyakora abaricururizamo bo bavuga ko iyo ryaremye badashobora kubarirwa munsi ya Magana atanu, utabariyemo abakorera mu nzu z’ubucuruzi zo muri iyo santere.

Bakifuza ko ubuyobozi bwakwihutisha gahunda yo kuryubaka, na bo bakagira aho bacururiza hajyanye n’igihe nk’uko n’ahandi hagenda hubakwa amasoko.

Ubwinshi bw’abarirema ngo bukwiye kuba impamvu yashingirwaho ryubakwa byihuse

Umugabo witwa Mubano Alain yahitanywe n’impanuka ubwo yari atwaye moto aturuka mu Murenge wa Cyabingo ajya mu Mujyi wa Musanze.

Uwo mugabo bivugwa ko yari mu myiteguro y’ubukwe bwa mushiki we, bwaburaga amasaha macye ngo bube, ubwo yavaga aho ababyeyi be batuye mu Karere ka Gakenke atwaye moto mu masaha ashyira ay’umugoroba wo kuwa gatanu tariki 3 Mutarama 2025, yageze mu Mudugudu wa Muhororo Akagari ka Muhororo ahazwi nko kuri Mukinga, atambuka ku ikamyo ya Bralirwa itwara inzoga (Camion Mercedes) bari mu cyerekezo kimwe, ageze hagati ahuriramo na Bus ya Ritco babisikanaga iturutse I Musanze, agongana na yo.

Amakuru y’iyi mpanuka yemejwe n’Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza agira ati: “Imodoka yamugonze atwaye iyo moto ayiriho wenyine, akomereka bikabije, bamwihutishiriza kwa muganga, ariko ku bw’amahirwe macye bahamugejeje ahita ashiramo umwuka. Iperereza ku cyateye impanuka ryahise ritangira ngo hamenyekane neza icyo aricyo”.

Aba hafi bo mu muryango wa Mubano bari ku bitaro bikuru bya Ruhengeri ubwo ibyo byamaraga kuba, babwiye Kigali Today ko muri uko gukora impanuka, hari ibikoresho yari avanye iwabo abijyanye mu mujyi wa musanze byari kuzifashishwa mu migendekere y’ubukwe bwa mushiki we, bwari buteganyijwe kuba kuri uyu wa gatandatu tariki 4 Mutarama 2025.

Mu gahinda kenshi ko kubura uwabo, umwe muri bo yagize ati: “Imyiteguro y’ubukwe yari irimbanije, ndetse n’amasaha yaburaga ngo bube, twayabariraga ku mitwe y’intoki. Ibiribwa n’ibinyobwa twari twaramaze kubihaha. Abenshi bari bamaze gukatisha amatike y’imodoka, abandi bari mu nzira bajya aho ubukwe nyirizina bwari kubera I Kigali. Ni akababaro n’agahinda gakomeye, mbese twahumaniwe. Aka kaga katugwiriye ntitwamenya uburyo tugasobanuramo, nawe wibaze gupfusha umuntu mu gihe haburaga amasaha ngo ubukwe, byongeye tutanamurwaje byibura n’umunsi umwe. Natwe twahindutse nk’ibiti, muri macye byashoboka ko twaba turi mu nzozi”.

Agahinda kari kose ku muntu wese wumvaga iby’iyi nkuru y’incamugongo yaburijemo ibyishimo by’ibirori by’ubukwe bwari bwitezwe kuba bw’umuvandimwe w’uwo mugabo.

Umwe yagize ati: “Urabona ubukwe bwari bumaze iminsi bwitegurwa bunozwa, buri kimwe cyose kiri ku murongo, ibigurwa byaraguzwe, ibikorwa ari uko, none undorere ukuntu ibyishimo bisimbujwe aka gahinda. Nyine byose n’ubwo bibaho mu mugambi w’Imana, ariko mu by’ukuri kubyakira no kubyihanganira birasiga n’ubundi imitima ya benshi ishengutse. Iyi si itubereye ingome mu buryo utakwiyumvisha.”.

Mubano Alain yari afite imyaka 34, asize umugore n’umwana umwe na we ukiri mutoya. Yari atuye mu Kagari ka Cyabagarura mu Murenge wa Musanze, Akarere ka Musanze.

Ubutumwa SP Mwiseneza yageneye abatwara ibinyabiziga, bukomoza ku kubahiriza amategeko agenga imikoreshereze y’umuhanda n’uburyo bwo kuwugendamo.

Ati: “Abatwara ibinyabiziga nibirinde inyuranaho ribera ahatemewe, birinde uburangare igihe cyose babitwaye kandi bakumire umuvuduko urengeje uwagenwe. Igikomeye nanone abantu bakwiye kwirinda ni ugutwara ikinyabiziga mu gihe umuntu yanyweye ibisindisha kuko bikurura ibyago byinshi byo guteza impanuka kuko n’iyo tugenzuye tubona ko inyinshi usanga zifitanye isano n’ibi tuvuze haruguru. Abantu nibitwararike babyirinde”.

Aba bagore bahoze mu itsinda ryiyise Abarembetsi ryambutsa ibicuruzwa ku buryo bwa magendu, ndetse n’ibiyobwenge mu mirenge ya Cyanika na Kagogo.

Mu mpera z’uku kwezi, akarere katangiye ubukangurambaga bugamije kureba icyafasha abavuye mu burembetsi kubona igishoro cyatuma batazasubira muri magendu.

Aha ni ho abagore bitandukanyije n’ibi bikorwa batanze ubuhamya bugaragaza igihombo byabasigiye.

Bavuze ko bashyizemo amafaranga bari bakoreye biyushye akuya, ariko akabapfira ubusa, bigeretseho no kuba baririrwaga cyangwa bakarara amajoro bihishahisha ngo inzego z’umutekano zitabafata.

Bagaragaza ko nta muntu wagakwiye kuba arambiriza ku bikorwa nk’ibyo, kuko bitaramba kandi nta cyiza n’inyungu zabyo usibye kuririra mu myotsi.

Igirimbabazi, ni umugore umaze imyaka 2 aretse kwambutsa magendu, ayivanye muri Uganda ayinjiza mu Rwanda nyuma yo guhomba amafaranga asaga Miliyoni eshatu yari yarashoye muri ibyo bikorwa.

Yagize ati: “Nambukaga nyuze inzira zitemewe nkajya Uganda kuzana yo ikinyobwa cya “Novida”, nkayinjiza mu Rwanda mu buryo bwa magendu. Najyaga nifashisha abantu batuye mu bice byegereye umupaka, bitewe n’inzira nabaga nanyuzemo, akaba ari bo bazinjiza, byagera ku butaka bw’u Rwanda nkarwana no gushaka imodoka iza kubimpakirira, nabwo kandi twabikoraga mu masaha ya nijoro inzira zose tunyuzemo tugacunganwa na Polisi n’inzego z’umutekano, kugeza tuzigejeje mu mujyi.”

Yongeraho ati “Aka ya minsi bajya bavuga 40 y’igisambo, nanjye yangereyeho igihe kimwe ubwo najyagayo nitwaje amafaranga menshi ntekereza ko bimpira. Novida nazipakiye mu modoka, ariko mu nzira tuvayo duhura na Polisi iba iradufashe irabijyana. Icyo gihe ayo nari nashoye yose asaga Miliyoni 3 n’igice narayahombye nsigarira aho.”
Ubuhamya bw’igihombo nk’iki, Igirimbabazi, abuhuje na mugenzi we witwa Nyiransenga Clementine uvuga ko akiburimo yafungwaga hafi ya buri munsi bigahungabanya umuryango abana be bakabaho bandagaye.

Ati: “Natundaga magendu y’inzoga zengerwa mu Buganda zitwa Rasita, nkazizana mu Rwanda. Byansabaga guhaguruka mu ma saa cyenda z’igicuku nkisunga abandi barembetsi twajyanaga yo, tukazinjiza mu Rwanda ducunganwa n’uko abayobozi batatubona .”

Nyiransenga si we byagiragaho ingaruka wenyine, ahubwo byakoraga ku muryango wose.

Agira ati “Abana nabasigaga mu nzu bagisinziriye, bagakanguka basanga nagiye. Aho nirirwaga sinabashaga kumenya uko biriwe, no gutaha mu rugo byabaga ari mu ma saha ya nijoro. Natahaga naniwe kubera igihunga, kuko twirirwaga twirukanka ibihuru dukwepana n’abashinzwe kudukumira. Magendu nari narayimariyemo ntakigira ikindi kintu cyose nitayeho, hakaba ubwo bamfashe bakamfunga, bamfungura bugacya nabisubiyemo.”

Isomo rimuganisha ku kureka ibyo bikorwa bitemewe, yaryinjiyemo ubwo yafatwaga agafungwa igihe cy’amezi ane.

Ati: “Bamfatanye ibyo biyobyabwenge by’inzoga zitwa Rasita nari mvanye Uganda, nanazishoyemo ibihumbi 700. Bahise babijyana nanjye banjyana kumfunga, aho namazemo amezi ane. Muri iyo kasho bwari ubuzima bugoye.”

Nyuma yaje kurekurwa arataha: “ Nkisohoka umuryango wa kasho ibyishimo byari byose n’ubwo nageze mu rugo, nkasanga abana banjye barandagaye mu muhanda, bataye ishuri, birirwa basabiriza.”

Aha kandi ngo yasanze barasahuye urugo rwe bamusiga iheruheru.

Yaje kwisunga ishyirahamwe yari asanzwe abarizwamo, rimuguriza amafaranga y’igishoro yifashishije mu kurangura imifuka itatu y’amakara ari nabwo bucuruzi kuri ubu akora.

Ati: “Ubu ncuruza mu mahoro ntekanye, abana banjye mbona umwanya wo kubitaho nkabagaburira ku gihe nkakurikirana imyigire yabo nta gihunga mfite.”

Umuryamgo utari uwa Leta MCBO (Mukamira Community Base Organization) uri muri gahunda zo gushyiraho uburyo aba bagore barushaho kuzamuka binyuze mu kubaha ubujyanama bw’uburyo bwo gutera imbere no kubunganira mu mishinga bateganya gukora.

Mategeko Safia uyobora uwo muryango, agira ati: “Ibyo byabafasha kuzinukwa burundu uburembetsi bikabaha imbaraga n’umuhate wo gukoresha amaboko yabo mu bifite umumaro kandi byemewe. Abagore nk’abantu dusanzwe tuzi neza ko bifitemo ubushobozi bwo kwigisha bakanahindura abandi, dusanga turushijeho kubongerera imbaraga yaba mu bumenyi ndetse n’amaboko, hari imyumvire ya benshi bakiri muri ibyo bikorwa bitemewe hirya no hino bahindura, bakabagarura mu murongo muzima igihugu cyacu cyifuza ko babamo.”

Abagore mirongo itatu babimbuye mui Ishyirahamwe ‘turwanye magendu’ubu bakora ubucuruzi buciriritse bw’ibiribwa nk’inyanya, imboga, imbuto n’ibindi ariko bakagaragaza ko bagikeneye izindi mbaraga zibunganira muri ubwo bucuruzi, kugira ngo burusheho kwaguka.

Aba bangavu barimo uwahohotewe, abyara afite imyaka 17. Avuga ko yakundanye n’umusore akamwizeza ko bazabana, aza kumutera inda, bimukururira ibyago bikomeye.

Yagize ati: “Uwanteye inda nkibimuhingukiriza yampinduye umusazi, anyamaganira kure ambwira ko atakwemera ko inda ari iye mu gihe batadupimye ngo laboratwari zibe ari zo zibyemeza. Ubu yanyanze urunuka ku buryo amfata nk’aho tutigeze tunamenyana.”

Yongeraho kandi ati “Iwacu bakibimenya batangiye kumvumagura, bantura umujinya kugeza aho banciye mu rugo banantegeka kutazongera kuhakandagira n’umunsi n’umwe. Narinze mbyara nta n’agashwangi mfite ko guteruriramo mwana. Ni nyogokuru wemeye kungoboka arancumbikira, ashaka udufaranga angurira utwenda tw’umwana. Yaba ababyeyi banjye ndetse n’umusore wanteye inda, bose nta numwe wongeye kundeba n’irihumye, kugeza n’iki gihe umwana arinze agira umwaka n’igice nta n’umwe uzi uko asa.”

Imwe mu myenda abangavu badoda

Uyu mwangavu ikibazo agisangiye n’abandi batewe inda z’imburagihe, ubu babuze byose none bari mu buzima bugoye hamwe n’abo bibarutse.

Umwe muri bo, watewe inda afite imyaka 15, ubu umwana yabyaye akaba agize imyaka ibiri, agira ati: “Ababyeyi baranyirukanye nkajya njya kurara iwabo w’abakobwa twiganaga, aho ndaye uyu munsi bugacya bandambiwe bakansezerera nkajya gucumbika ahandi gutyo gutyo, ngera ubwo numva ntaye umutwe mera nk’umusazi nkahora nigunze, ndetse rimwe nigeze nshaka kwiyahura kuko nabonaga kubaho kwanjye ntacyo bikimaze”.

Icyakora aba kimwe n’abandi bagenzi babo batewe inda zitateguwe ari abangavu uko ari 46, baje gufashwa kwigobotora ibyo bibazo; aho ubu bari hafi kumara umwaka bigishwa umwuga w’ubudozi, ndetse abana b’incuke babakomokaho na bo bashyiriweho urugo mbonezamikurire.

Irerero ryashyiriweho abana bavutse ku bangavu

Ni mu Kigo cyashinzwe n’Umuryango witwa Muhisimbi Voice of Youth in Conservation, kibarizwa mu Murenge wa Kinigi, cyita ku kugarurira icyizere abana b’abakobwa batewe inda bagatereranwa n’imiryango yabo.

Tuyizere Martin umwe mu bakozi b’uwo muryango, agira ati: “Hari abo twagiye tubona batereranwe n’imiryango, bakirukanwa bagahabwa akato, ntibemererwe kugira uburenganzira ku kintu icyo aricyo cyose, yaba ibiribwa, kuryama n’ibindi. Icyo gihe umwana agira ibikomere bituruka ku kuba nta muntu umutega amatwi afite bamwe bikabaviramo no kwandagara mu mihanda, agahinda gakabije n’ibindi”.

Yongeraho ati “Guhitamo kubigisha imyuga ni uburyo bwo kubereka ko ubuzima butagarukira muri ibyo bibazo byonyine, ko ahubwo bashobora kugira imirimo bakwihangira ikabinjiriza bakiteza imbere”.

Muri uko kwiga banahabwa inyigisho zibakangurira kwirinda ibishuko no kubaganiriza mu buryo bubafasha gukira ibikomere, baba barakomoye ku gutereranwa n’ababateye inda cyangwa imiryango, bigatuma bafata ingamba zo kwiyakira no kudasubira mu bishuko.

Mu myaka ine itambutse abana b’abakobwa 186 barangije kwiga umwuga w’ubudozi muri Muhisimbi Voice of Youth in Conservation, ndetse n’izindi nyigisho zituma barushaho kwita ku mibereho yabo.

Bigishwa ubudozi

Ikibazo cy’inda ziterwa abangavu kiri mu bihangayikishije, cyane ko uko imyaka igenda ihita haba ubwo imibare yiyongereye cyangwa ikagabanukaho. Nk’ubu dufatiye urugero rw’imibare y’Ikigo cy’igihugu cy’Ibarurishamibare mu Rwanda NISR, mu mwaka wa 2017 abangavu batewe inda bari 17,331, bigeze mu 2019 baba 23,622, naho mu 2020 wagabanutseho bagera mu 19,701.

Umwaka wakurikiyeho wa 2021 umubare wongera kuzamuka bagera 23,534, mu gihe umwaka ushize wa 2023 mu Rwanda habaruwe abakobwa 19,406 bari bafite imyaka iri hagati y’10 na 19 batewe inda.

Kuzigamira inyama zo gufungura mu minsi mikuru bikomeje kwitabirwa na benshi

Muri aka Karere habarirwa amatsinda agera muri 80, yibumbiyemo abaturage bagiye bakusanya amafaranga, bigendanye n’amabwiriza buri tsinda ukwaryo ryagiye ryishyiriraho, ngo bibafashe kwinjira neza mu minsi mikuru harimo uwa Noheli ndetse n’uw’Ubunani usoza umwaka wa 2024.

Mu bice bitandukanye abagize ayo matsinda babarizwamo byo hirya no hino mu Karere ka Musanze, mu masaha y’igitondo cyo ku wa Kabiri tariki 24 Ukuboza 2024, umunsi ubanziriza uwa Noheli, abayibumbiyemo wabonaga bafite akanyamuneza kenshi, batewe no kuba babashije kugera ku ntego bihaye mu gihe cy’umwaka, yo kwizigamira amafaranga macye macye, bagamije kuyaguramo inka yo kubaga bakagabana inyama.

Urugero rwa bamwe muri bo ni abagize itsinda Mugorenezerwa, ribarizwa mu Murenge wa Kimonyi.

Umwe mu bagize iryo tsinda agira ati “Dukusanya amafaranga buri wese uko yifite ariko umuntu ntajye munsi y’ibihumbi bitatu. Hari n’abayarenza bitewe n’uko bahagaze noneho bigakurikirwa no kuyagurizanya hagati yacu ku nyungu ntoya. Agenda yunguka gutyo gutyo, ku buryo igihe cyo gusoza umwaka kigera tukaguramo inka tukayibaga tukagabana inyama. N’ubungubu twabaze utahanye nkeya atwaye ibiro bitanu. Usesenguye neza agaciro k’ukuntu ku isoko igiciro cyazo gihagaze, ubona ko twe twubyungukiyemo cyane ugereranyije n’ayo buri wese yagiye atanga”.

Mu kwitegura Noheli abari mu matsinda babaze inka bagabana inyama

Ati “Ni mu rwego rwo kugira ngo twizihize iminsi mikuru twe n’abo mu miryango yacu tutigunze, ahubwo dufite amafunguro aduhagije kandi asobanutse. Kuko nk’uko ubibona, izi nyama ntahanye, ninongeraho uburisho bwazo bugizwe n’umuceri n’agafiriti, uwangenderera wese kuri Noheli twasangira amafunguro ntafite ipfunwe. Kuzigamira iminsi mikuru ntako bisa, twihaye intego yo kubikomeza ndetse tukanarenza urwego turiho ubungubu”.

Mu Karere ka Musanze kugeza mu masaha y’igicamunsi cyo ku wa Kabiri tariki 24 Ukuboza 2024, hari hamaze kubarurwa inka zibarirwa muri 80 zabazwe binyuze mu matsinda y’abagiye bizigamira kugabana inyama, zikabarirwa mu gaciro k’amafaranga asaga Miliyoni 40 y’u Rwanda, nk’uko byemejwe n’umukozi w’aka Karere ushinzwe Ubworozi, Dr Jean Bosco Nsengiyumva.

Yagize ati “Twari tumaze iminsi twakira ubusabe bw’abo mu matsinda, biba ngombwa ko nk’abegereye ibagiro rusange ry’Akarere riri mu Gataraga tubasaba kuba ari ryo bifashisha mu zihabagira, mu gihe abari kure yaryo bo, ubwabo bihitiramo ahaboroheye babikorera ariko tubanje kuhagenzura ngo tumenye neza ko ari ahantu haboneye hatateza ibibazo byo guhungabanya ubuziranenge bw’inyama”.

Ati “Mu minsi nk’iyingiyi, ariko cyane cyane mu kwitegura Ubunani, tuba twiteze ko habagwa inka zirenze umubare w’izibarirwa muri 80 babaze uyu munsi ubwo biteguraga Noheli. Usanga uku guhuriza hamwe rero kw’abaturage bazigamira kwizihiza iyi minsi ari ibintu byiza, cyane ko uretse no kuba baba bagamije kuyizihiza mu byishimo, ayo matsinda yarenze ibyo akaba anatuma abayarimo biteza imbere, biturutse ku mafaranga bagurizanya bo ubwabo bakikenura cyangwa bagakora imishinga iciriritse”.

Mu ibagiro ry’inka riri mu Gataraga habagiwe inka zibarirwa muri 40 z’abibumbiye mu matsinda

N’ubwo bimeze gutya ariko ku rundi ruhande, hari ahagiye hagaragara abibumbiye muri amwe mu matsinda harimo ayo mu Murenge wa Nkotsi na Cyuve, bari kurira ayo kwarika, nyuma y’aho bakusanyije amafanga bizeye kuyagura inka bagombaga kugabana muri iki gihe cy’iminsi mikuru, ariko bakaba batageze ku ntego bitewe n’igiciro cy’inka kimaze iminsi cyaratumbagiye, zikaba zihenze ku masoko ugereranyije n’uko byahoze mbere, ndetse n’amafaranga bari bakusanyije, akaba yarababanye macye bananirwa kwigondera icyo giciro, aho byabaye ngombwa ko buri wese asubizwa ayo yari yarizigamiye.

Abana bishimiye guhura na bagenzi babo bagasabana bizihiza Noheli

Muri icyo gikorwa cyabereye mu Murenge wa Muhoza, tariki 22 Ukuboza 2024, hifashishijwe uburyo bw’imikino no kwidagadura binyuze mu ndirimbo, imbyino n’izindi mpano zitandukanye by’abafite ubumuga, nk’uburyo bwo kwerekana ko na bo hari byinshi bashoboye, bagenzi babo bashobora no kubigiraho.

Kankundiye Jeanne, umubyeyi ufite umwana w’umukobwa w’imyaka irindwi, wavukanye ubumuga bukomatanyije, yishimira ko umwana we yifatanyije na bagenzi be mu kwishimira Noheli.

Ati “Ibihe nk’ibi by’iminsi mikuru usanga kwishimana n’abandi baba abo mu miryango cyangwa abaturanyi biba bitatworoheye, cyane ko hari nk’abafata abana nk’aba bafite ubumuga nk’abadakwiriye kugera aho abandi bari”.

“Ngendeye nko kuri uyu mwana wanjye, igihe cyose ntabasha kwicara cyangwa ngo ahagarare, ibintu byose bisaba kubimufasha kuko atamenya ngo iki ni igiki kiriya ni igiki. Wasangaga rero bamwe babyuriraho bambaza impamvu ntakabaye mugumisha mu rugo simujyane ahari abandi bantu. Uku kuba abana bacu baratekerejweho, bagafashwa kuza gusabana n’abandi, natwe ababyeyi babo tugasabana na bo bakidagadura, ni ibintu twishimiye cyane kandi ubona ko byanashimishije abana bacu”.

Hagaragajwe impano zitandukanye zisusurutsa abana bafite ubumuga

Iki gikorwa cyateguwe ku bufatanye bw’Akarere ka Musanze n’Umuryango Hope and Homes for Children, mu rwego rwo gufasha aba bana n’abo mu miryango yabo kumva ko ari bantu nk’abandi, kandi bakwiye guhabwa uburenganzira bwose harimo no gusabana cyane cyane bihereye mu miryango yabo.

Murerwa Betty, Umukozi w’uyu muryango, agira ati “Uba ari n’umwanya mwiza wo kwereka abo mu miryango aba bana bakomokamo ko mu by’ibanze baba babakeneyeho harimo no kubaba hafi, hatitawe ku mbogamizi izo ari zo zose umuryango waba uhura na zo, ko zidakwiye kuba impamvu yo kubavutsa uburenganzira”.

“Hari nk’abo twagiye tubona imiryango yihunza cyangwa yiyambura inshingano zo kurera, ikaba yafata abana nk’aba ikabajyana mu bigo by’imfubyi, yitwaje ko idafite ubushobozi cyangwa ubumenyi bwo kubitaho. Uyu rero aba ari n’umwanya wo kurebera hamwe uko ibyo bibazo twahangana na byo n’uburyo bwo kubirenga tugendeye ku ngero z’impano z’imikino ndetse n’imyidagaduro tugezwaho na bamwe mu bana bafite ubumuga, bikongera ubusabane no kutabaheza ku mahirwe ayo ariyo yose”.

Muri iki gikorwa abana bahawe impano zigizwe n’ibiribwa ndetse n’ibikoresho by’isuku, bazifashisha muri iki gihe cyo kwizihiza iminsi mikuru.

Mu kubifuriza Noheli abana bagenewe impano zitandukanye

Byiringiro Esron, Umukozi w’Akarere ka Musanze Ushinzwe Abafite ubumuga, abifata nk’intambwe nziza mu gushyigikira gahunda ziteza imbere imibereho myiza y’abafite ubumuga.

Ati “Iyo bahuye nk’ukunguku bakamenyana bagasabana biri mu burenganzira batagomba kuvutswa, cyane ko n’amategeko Igihugu cyadushyiriyeho twese nk’Abanyarwanda ntawe ashyira hejuru cyangwa ngo agire uwo ashyira imbere ngo undi amusige inyuma. Byonyine uku kuntu aba bana bahuye bakishima, bagatarama, bakisanzuranaho, birushaho kuba byiza, bityo na wa wundi wari ugifite umutima wo kwibwira ko umwana ufite ubumuga adashobora kugira icyo yigezaho, ahindura imitekerereze”.

Mu Karere ka Musanze habarurwa abantu bafite ubumuga babarirwa mu bihumbi 17. Mu Mirenge yose uko ari 15 y’aka Karere, ine muri yo harimo Muhoza, Cyuve, Musanze na Busogo ni yo Umuryango Hope and Homes for Children ukoreramo, binyuze mu kwita ku mibereho y’abana bafite ubumuga cyane cyane bwo mu mutwe n’ubw’ingingo, no gukangurira imiryango guhindura imyumvire ikita ku buryo buboneye bwo kubakurikiranira hafi, no kubaha uburenganzira busesuye butuma babaho neza.

Byiringiro Esron ukuriye abantu bafite ubumuga mu Karere ka Musanze

Abakunzi b’ibirayi baravuga ko iminsi mikuru y’impera z’umwaka isanze ameza yabo ateguye neza, n’abashyitsi babo bakazagirira ibihe by’umunezero mu ngo zabo.

I Musanze ni ho hari igicumbi cy’ibirayi byitwa Kinigi bikunzwe cyane kurusha ibindi muri aka karere. Bvuga ko ikiro cy’ibi birayi cyaragabanutse kikagera ku mafaranga 450 y’u Rwanda, kivuye ku mafaranga ari hagati ya 800 ns 900 cyariho mu mezi abiri ashize.

Abaguzi Kigali Today yasanze ku masoko acururizwamo ibirayi yaba mu ry’ibiribwa rya Musanze rizwi nka Kariyeri, iry’ibiribwa rikorera Muri gare ya Musanze no muri za butiki zo mu mujyi no mu nkengero zawo, bahuriza ku byishimo byo kuba ubu ku mafunguro bategura mu ngo zabo hataburaho ibirayi.

Nikuze Assoumpta agira ati: “Mu munsi ishize ibirayi twari twabiretse kubera ukuntu byakoshaga cyane. Wibaze nawe ikiro cyaguraga 800 na 900. Kubihahira urugo rw’abantu batari munsi y’umunani bari bubirye byibura bakumva bagerageje guhaga mo gakeya ntibyatwaraga munsi y’amafaranga ibihumbi 7, utabariyemo amakara yo kubiteka, ingereko n’imboga. Bisa n’aho imbabura iteka ibirayi twari twarayimanitse kubera guhenda. None ubu byamanutse turi kubirya tukimara ipfa n’inzara yabyo”.

N’ubwo bimeze bitya ariko ku bakunzi b’imboga ndetse n’imbuto bo bararira ayo kwarika, bitewe n’uburyo igiciro cyabyo aho kugabanuka gikomeza kwiyongera.

Dufatiye nk’urugero rw’imboga za karoti, ntabwo ari inshuro nyinshi igiciro cyazo kigeze kizamuka kugera aho kigura amafaranga 1000 ku kilo nk’aho bigee ubu.
Uwimanintije Clenia ati: “Mu busanzwe mu mezi atanu ashize, washoboraga kujyana amafanga 1000 ku isoko, ukeneye karoti ugatahana agatebo kazo gapima ibiro birenga 8 cyangwa 10. None ubu undebere ukuntu turi kuyaguramo ikilo kimwe. Zatumbagiye mu buryo butangaje”!

Usibye karoti, mu bindi abaguzi bakomeje gufata nk’imbonekarimwe kubera ukuntu bihenze muri iki gihe harimo nk’inyanya na zo bikomeje kwibazwa impamvu zitagabanuka nyamara mu mezi nk’ayangaya zakundaga kuboneka ku masoko ku bwinshi kandi zinahendutse.

Ubu indobo y’inyanya iragura amafaranga ibihumbi cumi na bitanu y’u Rwanda. Iki kiribwa kiri mu byifashishwa na benshi nk’icy’ibanze mu mafunguro yabo ya buri munsi, ariko kuba zirushaho kuzamuka ku giciro bikomeje gutuma abakunzi bazo, bazigura bivovota ndetse bamwe ngo ingano y’izo bateguraga mu mafunguro barayigabanyije cyane.

Mu bindi bisa n’ibyagabanutse igiciro ugereranyije n’uko mu minsi ishize byari bihagaze harimo ibitunguru kuri ubu ikiro kiri kugura amafarahga 800 kivuye ku mafaranga 1400 cyariho mu bihe bishize.

Urunyogwe ruri kugura amafaranga 1300 ugereranyije n’igiciro cy’amafaranga ari hagati ya 3500 na 4000 rwariho mu minsi ishize, ifu y’ubugari iri kugura 800 ivuye ku mafara 1000 yariho.
Icyakora, ku ifunguro ry’iminsi mikuru, imbuto zishobora kutazaboneka.

Uyu munsi, imineke iri mu zihagazeho kuko umwe wagurwaga amafaranga 100 ubu uragura amafaranga 200. Ubu inanasi nini nziza iragura mu mafaranga 1200, naho ikiro cy’ibinyomoro cyo kikaba kiri kugura amafaranga 1500.

Icyakora abakunzi b’imyembe bo ifunguro bazafata rizaba rishyitse. Ubu ufite amikoro aciriritse abasha kuwubona ku mafaranga ari hagati ya 300 na 500 ku kiro, uvuye ku mafaranga ibihumbi 2000 waguraga mu minsi ishize, hakaba n’indi isanzwe mitoya igura amafaranga 100 umwe.

Ku macunga, yo rimwe riragura amafaranga ari hagati y’100 na 200 byagera kuri water melon zo zikagura hagati yamafaranga 2000 na 3000 bitewe n’ingano yayo.

Mu bindi biciro by’ibiribwa abaguzi bakomeje kugaragaza ko byiyongereye harimo nk’igiciro cy’umuceri, isukari, kawunga, amavuta n’ibindi.

Mupenzi ku murima w’ibirayi yahinze aho arekeye kuba rushimusi agatwaza ba mukerarugendo bajya mu birunga(hakurya y’umurima we)

Mu minsi yashize, umwana wa Rushimusi yabaga ari rushimusi, kandi koko ni ko byagenze kuri Mupenzi Valentin wakuriye mu buzima bwo gushimuta inyamaswa zo muri Pariki y’Igihugu y’Ibirunga.

Ku myaka umunani, Mupenzi yakurikiraga ba rushimusi mu ishyamba aho bicaga inyamaswa bakazibaga ndetse bakanatemamo imigano n’ibindi bifashishaga nk’ibicanwa.

Yagize ati: “Ishyamba narijyanagamo n’abantu bakuru , tugakoresha imitego mu kwica inyamaswa cyane cyane nk’Impongo cyangwa Imbogo. Twabaga tuzi neza ibice iherereyemo n’aho zakundaga kunyura akaba ariho tuzitegera, hagira igwa muri uwo mutego natwe tukayihuraho turi nk’abantu umunani cyangwa abarenzeho tukayitemagura tukageza ipfuye, tukayibaga, tukagabana inyama”.

“Ubushimusi bwakorwaga ku mugaragaro, inyama z’inyamaswa twabaga twishe, twazimanukanaga tuzikoreye ku mutwe, hakaba izo tugurishije kuri macye, izindi tukazijyanira abo mu rugo. Muri kano gace kose wasangaga bamwe botsa abandi batogosa, ugasanga birarangirira aho ngaho. Icyo gihe ingamba zo kubungabunga Pariki ntizari zagashinze imizi, imyumvire yacu ku kubungabunga Pariki n’ibiyirimo yari hasi cyane”.

Uko yakuraga, Mupenzi yibwiraga ko ari ho hari amakiriro ye, ariko gahoro gahoro abona ko aka kazi katababuzaga guhora mu bukene cyane.

Yagize ati: “Ubundi uretse kuba twari twaradindiye mu mitekerereze yo kumva ko kwishora mu bushimusi aribyo byadukiza, nta kindi gikorwa cy’iterambere. Ntiwaba umuhigi cyangwa umushimusi ngo wubake inzu, ngo worore inka cyangwa ngo ube umuhinzi. Abenshi muri twe tubyize aho tubuviriyemo.”

Aha ni ho yahereye yitandukanya n’uyu mwuga, yiyegurira umwuga wo gutwaza imizigo ba mukerarugendo basura Pariki y’ibirunga, maze amafaranga akuyemo akajya ayashora mu buhinzi.

Agira ati: “Iyo ntwaje mukerarugendo umuzigo, simbura nk’amadorari ari hagati y’10 na 20 ampa, hakaba ubwo anarenzeho bitewe n’uko ibihe bimeze. Ubwo rero iyo ngiyeyo kabiri gatatu mu cyumweru, urumva ko mpakura umusanzu ukomeye wubaka urugo.”

Aha ni naho yakuye igishoro cy’amafaranga ibihumbi 150 yahereyeho atangiza ubuhinzi ku buso bwa are 20, yasimburanyagaho ibirayi n’ibireti, uko asaruye akazigama, bigenda bimufasha kwagura ubuso ahingaho, aho ubu ageze kuri Hegitari 4 harimo izigera muri 2 n’igice z’ubutaka bwe bwite.

Nibura ngo buri gihembwe asarura toni 25 bikamwinjiriza amafaranga atari munsi ya Miliyoni 5 y’u Rwanda.

Atungishije benshi

Ibyo bikorwa by’ubuhinzi hari benshi babiboneramo imirimo bo mu gace atuyemo, aho na bo bahamya ko ari umusaruro bakura mu kuba Mupenzi yaravuye mu bushimusi.

Nyuma yo kubona atagarukira ku guhinga kijyambere no gutwaza ba mukerarugendo imizigo, Mupenzi yongeyeho no gushinga ishuri mu gace atuyemo ryigwamo n’abana babarirwa muri 400 bo mu cyiciro cy’amashuri y’inshuke.

Ishuri ry’inshuke Mupenzi yashinze

Mu Karere ka Musanze habarirwa abantu 494 bibumbiye muri Koperative Mupenzi Valentin abarizwamo, bakora umwuga wo gutwaza imizigo ba mukerarugendo, kandi umubare munini muri bo, ni abahoze mu bushimusi bw’inyamaswa baza kubureka.

Bisamaza Jacques ukuriye Koperative Kabeho Ngagi Sabyinyo yagize ati: “Mbere tutarihuriza hamwe muri Koperative, cyari ikizira kuri twe ko inyamaswa isohoka muri Pariki ikaba yasubirayo ari nzima; bitewe n’imyumvire yacu yari ikiri hasi, aho twayibonaga byanze bikunze twarayicaga ikaribwa.”

“Nyuma yo kubona ko ubushimusi aho kuduteza imbere butudindiza, twatekereje uko twajya tujyana muri pariki n’ibikorwa by’ingirakamaro, bigaragaza isura nziza yayo ku bajya kuyisura, niko kwinjira muri uyu mwuga wo gutwaza ba mukerarugendo imizigo”.

Aka ngo ni akazi imibereho yabo ya buri munsi ishingiyeho, kanafasha benshi mu bagakora kugira indi mishinga byunganirana bikorera harimo nk’ubuhinzi bwaba ubw’ibirayi, ibigori, amashaza, ibireti n’ibindi, cyane ko nk’abaturiye agace k’ibirunga aribwo bisangamo cyane. Hari n’abagiye bigurira amashyamba bakaba bafatanya ibyo bikorwa byombi n’ububaji.

Ni akazi bakora basimburana buri munsi kandi nibura umuntu umwe muri bo iyo yaherekeje mukerarugendo amutwaje umuzigo, aba ashobora guhembwa amadorari 20 ku munsi, kandi mu cyumweru kimwe buri wese akora nibura inshuro ebyiri.

Mupenzi(ureba inyuma) na bagenzi be mu mujishi w’ingobyi bafasha mukerarugendo

Janvier Kwizera Umukozi wa Pariki y’Ibirunga Ushinzwe ubufatanye n’abaturage, avuga ko urugendo rumaze nibura igihe cy’imyaka 15, rwo kwegeranya abahoze mu buhigi n’ubushimusi bw’inyamaswa zo muri Pariki y’Igihugu y’Ibirunga, bagahugurwa bagakangurirwa kwiteza imbere.

Agira ati: “Aho batandukaniye n’andi makoperative, bo icyo bakora kimeze nk’akazi ka buri munsi basimburanaho kandi uwakoze, ku munsi atahana ayo yakoreye. Bagitangira, nibura ku munsi uwaherekeje mukerarugendo amutwaje igikapu yahembwaga amadorari 10. Aya mafaranga yagiye azamuka aho ubu ageze ku madorari 20 ndetse hari na gahunda y’uko na yo mu gihe kiri imbere aziyongera.”

Uretse aba batwaza imizigo ba mukerarugendo bakorera mu Karere ka Musanze, no mu tundi Turere imiryango y’ingagi yagiye yagukiramo turimo aka Rubavu, Burera na Nyabihu naho hakorerayo amakoperative yibumbiyemo abatwaza ba mukerarugendo imizigo.

Mu Kagari ka Cyabararika mu Murenge wa Muhoza, Akarere ka Musanze abaturage bishyize hamwe bagura amapoto n’insinga bagamije kwizanira umuriro w’amashanyarazi, ariko babwirwa ko amapoto bashakaga gukoresha atujuje ubuziranenge.

Abo baturage uko babarizwa mu ngo 54, ni abo mu Mudugudu wa Gasanze bakusanyije arenga miliyoni 1 y’amafaranga y’u Rwanda, ngo bakore umuriro w’amashanyarazi kuri kilometero imwe.

Nyiringabo Germain agira ati: “Twashatse kwivana mu mwijima maze buri rugo rutanga amafaranga ibihumbi 21, tuyaguramo amapoto ndetse n’insinga. Ariko byageze mu gihe cyo gusaba REG ko yaza ikaduha umuriro iradutsembera.”

Umuturanyi we Mukanoheli Elisabeth nawe avuga ko iki kibazo bari babonye uburyo bwo kugikemura burundu. Aho agira ati: “Ubwo twatekerezaga kwizanira amashanyarazi, hari bamwe muri twe bari baramaze kunoza imishinga yo gushyiraho aho kogoshera no gutunganya imisatsi, abandi bateganya kuygura imashini zisya, ariko REG iradutenguha.”

Umuyobozi w’Ikigo cy’u Rwanda Gishinzwe Ingufu REG Ishami rya Musanze Batangana Regis, avuga ko aba baturage bategura uwo mushinga, batigeze begera iki kigo, ari na yo ntandaro yo gukoresha ibiti bitujuje ubuziranenge.

Yagize ati“Abaturage bashize ibiti bitari amapoto ya nyayo, ntibagisha inama ngo bamenya ibyujuje ibipimo by’ubuziranenge. Byashoboka ko hari nk’umuntu wabihereranye akabashuka abizeza ko ibyo bikoresho byemewe ariko mu by’ukuri si ko bimeze. Twabagiriye inama y’uko ibyo biti n’insinga babisubiza abo babiguze na bo bakabaha amafaranga babiguze, mu rwego rwo kwirinda ko bahomba.”

Agaruka ku miterere n’ibigenderwaho ngo igiti kibe icyujuje ubuziranenge buherwaho gikoreshwa nk’ipoto ishyirwaho insiga z’amashanyarazi, Batangana yagize ati: “Igiti kibonetse cyose gicibwa mu ishyamba n’ubwo cyaba kinini cyangwa cyumye gite, ntabwo ari ihame ko gihita kigirwa ipoto mu gihe kiba kitaratunganywa mu ruganda ahabugenewe. Hari imiti kiba kigomba guterwa ituma kirushaho gukomera ndetse n’uburambe, ikagiha ubudahangarwa bukirinda gusaza vuba cyangwa kwangizwa n’udusimba two mu butaka nk’imiswa”.

“Igiti cyatunganyijwe muri ubwo buryo kigahinduka ipoto, kiraramba kugeza mu myaka irenga 20 gishinze mu itaka, mu gihe igiti gisanzwe cyo, kiba kidashobora kurenza nk’umwaka umwe kitaraborera mu butaka”.

Icyakora ngo n’ubwo bafite inyota y’umuriro w’amashanyarazi, ngo bashonje bahishiwe kuko REG iteganya kongera ingufu z’umuriro w’amashanyarazi uzakwirakwizwa muri ako gace, cyane ko n’uwahabarizwaga wari usanzwe ufite ingufu nkeya.

Imibare y’ikigo REG, igaragaza ko kugeza muri Mutarama 2024, ingo zingana na 21% by’abacana, zakoreshaga akomoka ku mirasire y’izuba mu gihe 55% zo zakoreshaga akomoka ku muyoboro mugari.

Bahura n’igihombo gikabije kubera igisenge cy’isoko bacururizamo

Ahagaragara iki kibazo, ni igice cyo mu igorofa rihera ryo hejuru muri iryo soko, n’abafite ibisima mu kindi gice cyo hasi urumuri rw’ayo mabati rugera nk’uko abacuruzi barimo n’uwitwa Ihirwe Joselyne abivuga agira ati “Igice kinini cy’iri soko ry’ibiribwa kubera ko bagisakaje amabati abengerana y’umweru, urumuri rw’izuba runyuramo rukamanukana ubushyuhe bwinshi, byagera ku mboga n’imbuto bikumira ku bisima ibindi bikabora. Ibyo tuba twaranguye mu masaha ya mu gitondo, bigera nimugoroba byangiritse cyane ku buryo ibyinshi tubimena tutabicuruje”.

Mujawamariya ucururiza avoka muri iri soko, buri cyumweru aba yiteze kumena nibura amabase abiri ya avoka zaboze.

Ati “Ndangura nk’imifuka ibiri ya avoka nkazitara uko zigenda zishya ni na ko ngenda mfataho nkeya gutyo gutyo, nkazitandika ku gisima. Ngira imbogamizi z’uko izuba iyo rivuye rizangiriza zigahirirana izindi zikabora ku buryo ugiye kureba izo ngurisha n’izo njugunya mu kimoteri bijya kungana. Nshobora gushora nk’amafaranga ibihumbi 40 simburemo nk’ibihumbi 12 na 15 mpomba kubera izimboreraho nkazimena”.

Niyonzima Dominique ati “Abenshi twagiye tuva ku bisima twatomboye tujya gucumbikisha ibicuruzwa ku bindi bisima bya bagenzi bacu bacururiza ahatagera iki kibazo, duhunga izuba. Usibye ibiribwa ryangiriza, natwe ubwacu kwirirwa turihagazeho cyangwa turyicayeho dutegereje abaguzi nabyo ubwabyo biratubangamiye. Dusanga abize umushinga wo gusakara iri soko, hari aho bateshutse ntibatekereza neza uburyo buboneye barisakaramo none dore bikomeje kudukenesha”.

Imboga bazitwikiza imifuka mu kuzirinda ko izuba rizangiza byihuse ariko iyo zitinze kugurwa zirangirika

Hari abasanga iryo sakaro ryakurwaho rigasimbuzwa irindi. Mujawamariya yakomeje agira ati: “Byari kuruta bagasakaza amabati asanzwe noneho wenda urumuri rwajya ruba rukeya tukifashisha amatara amurika aho kugira ngo dukomeze guhomba ibyo tuba twashoyemo amafaranga turangura. Hari abagiye batombora ibisima byugarijwe n’izuba babivuyeho bajya kwicara mu rugo aho batagifite imikorere ibinjiriza. Mbese agahenge kaboneka mu gihe cy’ubukonje cyangwa imvura, nabwo kandi bikaba iby’amasaha macye”.

Iri soko ryatwaye Miliyari zisaga esheshatu z’Amafaranga y’u Rwanda, rigeretse inshuro imwe. Ni rishya kuko ryuzuye muri Kamena 2024, ritangira gukorerwamo hagati yo muri Nyakanga na Kanama uyu mwaka.

Umuyobozi w’Akarere ka Musanze Nsengimana Claudien, avuga ko barisakara muri ubwo buryo, bari bigamije ko rigira urumuri cyane cyane mu gihe cyo ku manywa kuko aribwo haba harimo urujya n’uruza rw’abaje kurihahiramo bakeneye kugurishiriza cyangwa kugurira ahabona.

Gusa ngo n’ubwo atariko byaje kugenda nk’uko byifuzwaga, kuri ubu ngo bari mu biganiro n’umufatanyabikorwa wafashije Akarere kuryubaka, ngo barebe icyakorwa mu kurinda ko abacuruzi bakomeza kugwa mu bihombo.

Ati “Twasakaye kiriya gisenge dutekereza ko aribwo buryo bwiza bwo kumurikira isoko, ahubwo birangira urwo rumuri ruteje ikibazo kandi koko kiranumvikana. Turimo turareba ikoranabuhanga cyangwa uburyo bundi bwakoreshwa mu kurinda ko urwo rumuri rugira ibyo rwangiza”.

Mu gusakara isoko bakoresheje amabati ahitisha urumuri n’izuba

“Turimo turabiganiraho n’umufatanyabikorwa wadushyigikiye mu kuryubaka ngo turebe uko icyo kibazo gikemuka, ndetse kandi kuba mu gihe cya vuba hagiye no kujyaho Komite y’isoko, tuzafatanyiriza hamwe kunonosora uko twabikora. Abaturage nabasaba kuba bihanganye kuko bashonje bahishiwe”.

Reserve Force ni yo yaryubatse; mu mushinga Akarere ka Musanze katewemo inkunga n’Ikigo cy’Ababiligi Gishinzwe Iterambere(Enabel).

Barasaba ko icyo gisenge cyahindurwa

Icyo kirombe kiri mu murima w’umuturage witwa Singirumukiza Fidèle, giherereye mu Mudugudu wa Gasanze, Akagari ka Cyabararika mu Murenge wa Muhoza ho mu Karere ka Musanze.

Ubwo Nsengiyumva yari akirimo acukuramo zahabu, ngo itaka ryaba ryamugwiriye, aburiramo umwuka bimuviramo urupfu.

Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza wemeje amakuru y’uru rupfu agira ati: "Impanuka yamenyekanye mu ma saa tanu z’igitondo. Mu gihe uwo musore yarimo acukura zahabu birashoboka ko itaka ryamugwiriye, bimuviramo gupfa. Iperereza ryahise ritangira ngo hamenyekane mu by’ukuri intandaro y’uru rupfu".

Umuvugizi yavuze kandi ko icyo kirombe cyahoze gicukurwamo amabuye y’agaciro kiza gufungwa kuko kitari cyemewe n’amategeko.

Agace icyo kirombe giherereyemo gakunze kuvugwaho ubucukuzi bw’amabuye y’agaciro bukorwa rwihishwa.

Umurambo wa Nsengiyumva wajyanwe ku bitaro bikuru bya Ruhengeri gukorerwa isuzumwa.

Mwarimu Rukundo Janvier(Hagati wambaye umweru) ubwo yashyikirizwaga inka yagabiwe na bagenzi be

Ibi babimukoreye nyuma y’uko agaragaje ubudasa mu myigishirize ifite ireme, bashaka kumubwira ngo komereza aho.

Rukundo ngo yagaragaje gukunda umurimo, bidasanzwe, bituma ashobora gutsindisha abanyeshuri yigisha ku kigero cy’100%.

Akimara gushyikirizwa inka yagize ati “Gutoranywa muri bagenzi banjye nk’umwarimu witwaye neza mu kazi byanshimishije cyane. Byanyongereye imbaraga zo gukora cyane no gushyira umuhate wisumbuyeho mu nshingano zanjye."

Akomoza ku cyabateye koroza mugenzi wabo inka, Bukuba Cyriaque, Umuyobozi wa ES Gahunga TSS yagize ati: “Ni mu rwego rwo gutera abarimu umwete ngo bumve ko bagomba gukora neza."

Abarimu barimo n’uwitwa Mberabagabo Dismas, bavuga ko ubu nta rundi rwitwazo bagifite rwababuza kwita ku myigishirize inoze, cyane ko n’ubuyobozi bw’igihugu bwabahaye amahirwe mu buryo bwose bushoboka.

Ati: “Mbere abenshi mu barimu twakoraga nk’abikiza kubera gucibwa intege n’imibereho mibi. Icyo dushima ubu ni uburyo Ubuyobozi bw’igihugu cyacu bwatongeje imishahara imibereho ikaba igenda irushaho kuba myiza”.

Insanganyamatsiko y’Umunsi w’Umwarimu y’umwaka wa 2024, ishimangira ko umwarimu uhawe agaciro bimwongerera imbaraga ashyira mu burezi.

Abafite ikibazo, babwiye Kigali Today ko ubwo uwo muhanda w’igitaka wakorwaga mu gace ka Kidaho ugana ahitwa kwa Mutabazi-Kanyirarebe no ku Rukiko, wasize zimwe mu nzu zabo zisigara zinegetse ku mukingo.

Niyibizi Anastase umubyeyi w’abana umunani uturanye n’uyu muhanda agira ati: “Inzu ntuyemo n’umuryango wanjye yasigaye mu manegeka, kuko iteretse hejuru y’umukingo uwo muhanda unyuraho. Abana bahora bagwamo nkajya kuvuza. Mporana impungenge ko iyi nzu izaturidukiraho.”

Uyu muturage, avuga ko iyi nzu ubwayo yatangiye kwangirika, abakora umuhanda bakamwizeza ko bazayisana, ariko ngo amaso yaheze mu kirere.

Undi muturage na we agira ati: “Hari ibitaka n’amabuye abakozi barunze ku rugo rwanjye, bihinduka umugina muremure, ku buryo byamfungiye inzira imbere y’inzu. Ubuyobozi bukwiye kudufasha ibi bintu bigakosoka, aho bishoboka bakaza bakabikuraho.”

Abaturiye uyu muhanda bavuga ko uretse n’imitungo yabazwe, hari n’ibyasigaye bitabazwe, ariko bikaba bigaragara ko bizapfa ubusa, kuko n’ubundi umuhanda wabisize mu manegeka.

Uyu muturage kandi agira ati“Birakwiye ko ibyangijwe bitarabarirwa bihabwa agaciro bikishyurwa kuko turabangamiwe cyane.”

Uyu muhanda w’ibirometero bisaga 15, wubatswe hagamijwe korohereza abaturage kugeza umusaruro ku masoko. Ku ruhande rumwe, abawuturiye bavuga ko iyi ntego yagezweho, ariko ngo abangirijwe n’aho wanyuze, na bo ngo ntibakwiye kviramo aho.

Umuyobozi w’Akarere ka Burera Mukamana Soline, avuga ko bari muri gahunda yo kureba imbogamizi zasizwe n’ikorwa ry’umuhanda.

Yagize ati “Hari itsinda ry’Akarere ribishinzwe riheruka gukurikirana ngo hamenyekane neza imiterere y’iki kibazo. Haramutse hagaragaye itaka ryatinzwe ahabangamiye abaturage, twakoresha uko dushoboye rikahava.”

Ku bijyanye n’ingurane, avuga ko imiryango 66 ari yo yasigaye itabaruriwe imitungo, kuko ngo hari amakuru amwe n’amwe itabashije kuzuza mu byasabwaga.

Yagize ati: “ Iyo tugiye kubarura ahagenewe ingurane, hari ibigenderwaho, nyamara ugasanga bamwe batabyujuje. Hari nk’aho wasangaga umuturage yaragurishije ubutaka, ariko atarabwiyandukujeho.”

Uyu muyobozi icyakora yongeraho ati “Ni inshingano zacu nk’inzego kubikurikirana. Tugiye gushyiramo imbaraga tuzanonsore neza ikibazo ku kindi tubikemure.”

Muri iki gihe cy’imvura, abaturiye uyu muhanda bavuga kandi ko ahatarashyizwe imiyoboro y’amazi hashobora kuzabateza isuri, dore ko ngo ubu amazi azana umuvumba mwinshi, akisuka mi mirima yabo, akangiza imyaka.

Bakifuza ko na zo zatunganywa inzira zikigendwa.

Mu Karere ka Musanze hakomeje kuzamurwa inyubako mu rwego rwo kuvugurura Umujyi

Inyubako z’amagorofa nshya zikomeje kubakwa zisimbura inzu zirimo n’izari zarubatswe mu myaka isaga 60 ishize, bigaragara ko zitari zikijyanye n’icyerekezo.

Tugengwenayo Théonas, ukuriye Komite ishinzwe kuvugurura Umujyi wa Musanze, agereranyije ubu na mbere y’umwaka wa 2016 umushinga wo kuvugurura utarangira gushyirwa mu bikorwa, ahamya ko hari byinshi byahindutse.

Ati: “Bamwe bavugaga ko uyu Mujyi wa Musanze udashobora kubakwamo inzu zigeretse, bitwaje ko ubutaka bwose wubatseho buri hejuru y’amazi. Ibyo byakunze kudindiza imyubakire ivuguruye binagaragazwa n’uburyo mu myaka yo hambere ya 1994, inyubako zigeretse zari zihari, zari ebyiri zonyine, harimo iy’ibitaro bikuru bya Ruhengeri ndetse n’inyubako Akarere ka Musanze gakoreramo ubu”.

Inyubako zigaragara mu Mujyi wa Musanze zubatswe mu buryo bugezweho

Arongera ati, “Ibyo byatumaga n’abatekerezaga kugira ibikorwa by’ishoramari bifatika bahakorera, babigendamo gake kuko Umujyi wari ku rwego rwo hasi, utagira inyubako ziberanye n’ibyo bikorwa. Abageragezaga kuvugurura, wasangaga basiga amarangi, guhindura ibisenge gusa, ariko ibyo kwagura ubuso bwo gukoreramo byo ntibyitabweho”.

Ku ikubitiro Akarere ka Musanze kakimara kugirwa kamwe mu Turere twunganira Umujyi wa Kigali, byabaye nk’ibikangura ishoramari mu bijyanye no kuvugurura Umujyi, maze mu mwaka wa 2016, ritangirana n’icyiciro cya mbere, cyahereye ku kuzamura inyubako mu bibanza 45, bikora ku muhanda Kigali-Musanze n’igice cy’umuhanda gishamikiye kuri wo, cyerekeza ku isoko ry’ibiribwa rya Musanze, abenshi bazi nka Kariyeri, icyo gice cyose izo nyubako ziherereyemo ni mu Tugari twa Cyabararika, Mpenge na Kigombe.

Tugengwenayo avuga ko urwego Umujyi wa Musanze uriho mu kuvugururwa rushimishije

Muri byo ibyubatswe bikuzura bigera kuri 22, mu gihe ibindi 13 byo imirimo yo kubyubaka igikomeje, bijyanirana n’izindi nyubako 29 ziteganyijwe kubakwa mu cyiciro cya kabiri cyo kuvugurura uyu Mujyi, kuri ubu nacyo kirimbanyije.

Dukunzumuremyi Claver agira ati: “Uyu Mujyi batarawuvugurura inzu zari zihari zari mbi, ntoya kandi zishaje, none ubu zigenda zisimbuzwa izindi zarushijeho kuwongerera agaciro no kuwuha isura nziza. Ntekereza ko ubu hari n’abantu benshi bawufatiraho urugero, by’umwihariko ku basura u Rwanda babona ko ruteye imbere. Iyo ibi bidakorwa uku ntituba tuwita Umujyi, biba ari ibindi bindi. Perezida Paul Kagame duhora tumushimira uburyo adutekerereza kure hatugeza ku byiza nk’ibi”.

Inyubako Isoko ririni rya Musanze rizwi nka Goico rikoreramo riri mu zatangiriweho kubakwa mu cyiciro cya mbere cyo kuvugurura umujyi wa Musanze

Mu bibanza 29 biteganyijwe kubakwa muri iki cyiciro cya kabiri, mu byiciro bitanu uyu Mujyi uzubakwamo, ibibanza 9 nibyo byamaze kuzura, mu gihe ibisigaye uko ari 20 byo harimo ibikiri kubakwa n’ibitaragira icyo bikorwaho.

Mu nyubako yaba izamaze kuzura n’izikirimo kubakwa, ngo nibura buri imwe igera ku rwego rwo gutangira gukorerwamo itanga imirimo mishya ku basaga 200.

Ikigo cy’Urubyiruko cy’Akarere ka Musanze cyubatswe mu Mujyi rwagati wa Musanze

Ibi ngo bifite igifatika bivuze ku kugabanya ubushomeri bwugarije abiganjemo urubyiruko. Tugengwenayo akomeza agira ati: “Iyuzuye igatangira gukorerwamo hari benshi bahabonera akazi. Kaba akajyanye n’ubucuruzi, serivisi zitandukanye, kubungabunga isuku yazo ya buri munsi; abo bose igihe kiragera bagahembwa, bakibeshaho babikesha kuhakorera”.

Mu myaka itanu iri imbere, inzu zo mu gice cy’Umujyi rwagati wa Musanze, zose zizaba zubatswe mu buryo bujyanye n’igihe, kandi kuvugurura Umujyi birajyanirana no kuvugurura inyubako ziri mu Mirenge y’Akarere ka Musanze igize igice cy’Umujyi, ndeste n’inkengero zawo.

Kuvugurura umujyi wa Musanze bizakorwa mu byiciro bitanu ubu ikigezeho kikaba ari icya kabiri

Izi nyubako zombi nta mezi abiri ashize zuzuye kandi ubu zatangiye no gukorerwamo

Inzu zigenda zubakwa mu byiciro ubu ikigezweho kikaba ari icya kabiri

Miliyari eshatu n’igice zashowe mu kugura imiti, ikigo RMS gisanga kutayishyurira ku gihe bikibangamira muri serivisi gitanga

Ayo mafaranga y’amadeni ibyo bigo y’ubuvuzi bibereyemo icyo Kigo, akomoka ku buvuzi bwagiye buhabwa abanyamuryango ba RSSB babyivurijemo mu bihe bitandukanye ntibishyurirwa ku gihe serivisi bagiye bahabwa nk’uko bigarukwaho na Ayingeneye Alphonsine, uhagarariye Ibigo nderabuzima byo mu Karere ka Musanze.

Ati: “Ibigo nderabuzima bimwe bifite imyenda ikomoka ku kuba hari igihe twajyaga tuvura abanyamuryango ba RSSB bagiye baturuka mu Turere no mu Ntara zitandukanye, ubwo nyuma y’aho RSSB yashyiragaho impinduka z’uko buri munyamuryango wayo agomba kujya yivuriza ahamwegereye, ayo mafaranga ntiyishyuwe, ibyo bigo nderabuzima byisanga abantu bagiye bavurwa batari muri zone bikoreramo, bibereyemo ikigo gishinzwe imiti amadeni”.

Ku rundi ruhande ngo usanga ibigo nderabuzima bifata amafaranga y’imiti bikayakoresha ibindi bikorwa atagenewe, ku mpamvu zitabiturutseho nk’uko Ayingeneye akomeza avivuga.

Ati: “Ibyinshi mu bigo nderabuzima nta ngengo y’imari (fonctionnement) bigira. Hari nk’ubwo ikigo nderabuzima kiba cyihembera abakozi bacyo, ugasanga ya mafaranga yo kugura imiti ariyo bakoresheje mu kubahemba, cyangwa se kikaba cyanayifashisha mu gusimbuza wenda nk’ikintu cyangiritse kuko nta bundi buryo ikigo kiba cyabashije kubona byihuse byakorwamo”.

Mu Ntara y’Amajyaruguru habereye inama yari igamije gusuzumira hamwe uko urwego rw’ubuvuzi rwarushaho kurangwa n’imikorere inoze

Akomeza agira ati, “Indi mbogamizi ibirimo ni uko za raporo zijyanye n’imyishyurize ya serivisi z’ibizamini n’imiti ibigo nderabuzima biba byahaye ababigana, zikorwa mu buryo budahamye kandi zikaba zitishyurwa mu buryo bumwe, hakaba n’ibikoresho byinshi ibigo nderabuzima bigura, kugeza ubu usanga bikibarwa ku giciro kitakijyanye n’isoko ry’ubungubu, bigateza ibigo nderabuzima gushora amafaranga, ntibiyasubizwe bitewe n’ibyo biciro biba byaragenwe”.

Mu bigo nderabuzima ndetse n’ibitaro bibarizwa mu Ntara y’Amajyaruguru, kugeza ubu bibarwaho umwenda wa miliyari eshatu na miliyoni zisaga 500 z’amafaranga y’u Rwanda, y’amadeni y’imiti byagiye bihabwa n’Ikigo cy’Igihugu Gishinzwe Ibijyanye n’Imiti.

Rurangwa Clement, Umuyobozi Ushinzwe kubika imiti, kuyigeza mu bigo nderabuzima, ibitaro ndetse n’ubucuruzi muri iki Kigo, avuga ko uku gutinda kwishyurwa bihungabanya imikorere.

Ati: “Amafaranga ibyo bigo by’ubuvuzi byakabaye bitwishyura, ni adufasha mu mikorere ijyanye no gutwara imiti tuyikwirakwiza ku rwego rwo hasi, kuyibika neza, guhemba abakozi, n’ibindi byose bijyanye no kugira ngo igere aho igomba kugera yujuje ubuziranenge. Iyo rero batinze kutwishyura, natwe bituma dutinda kwishyura abandi, n’isura yacu ku masoko mpuzamahanga ntigaragare neza”.

Akomeza agira ati, “Abagana izo nzego bakeneye ubuvuzi iyo badahawe serivisi z’imiti, binatuma bivovotera serivisi baba batishimiye. Niyo mpamvu rero ibigo by’ubuvuzi bikwiye kwitsa cyane ku kubigira mu by’ibanze bagomba kwibandaho, kandi ibyo ntibyagerwaho hatabayeho ko imiti yishyurwa ku gihe nyacyo”.

Ubuyobozi bw’Ikigo cy’Igihugu Gishinzwe Ubwiteganyirize RSSB gifite mu nshingano zacyo kwishyura uwo mwenda, ntiburabasha kugira icyo butangaza ku bikivugwaho.

Guverineri Mugabowagahunde Maurice (wicaye hagati) yavuze ko agiye gukora ubuvugizi mu nzego zirebwa n’iki kibazo

Gusa mu nama yari igamije gusuzumira hamwe uko urwego rw’ubuvuzi mu Ntara y’Amajyaruguru rwarushaho kurangwa n’imikorere inoze, yabereye mu Karere ka Musanze kuwa gatatu tariki 4 Ukuboza 2024, Guverineri w’Intara y’Amajyaruguru Mugabowagahunde Maurice, yavuze ko iki kibazo bagiye kugikorera ubuvugizi, mu nzego zose zibishinzwe kugira ngo gikemuke.

Yagize ati, “Ni ibibazo tugiye gukurikirana tugamije ko bikemurwa, bityo n’imitangire ya serivisi ntikomeze guhungabana. Ariko nanone abayobozi b’ibigo nderabuzima n’ibitaro, twanabagiriye inama yo kwirinda gukoresha ingengo y’imari icyo itagenewe cyane ko ibyo bigo bitanashobora gukora bidafite imiti biha abarwayi. Abayobozi ni birinde rero gushora ayo mafaranga mu bindi, mu kwirinda imicungire mibi ituma n’ayo madeni agenda arushaho kuzamuka buri gihe”.

Hejuru ya 99% by’imiti ikoreshwa mu Rwanda, iba yatumijwe hanze y’Igihugu. Uko gutinda kwishyura ikiguzi kiyishorwaho, ni nako biba umuzigo utorohera Ikigo Rwanda Medical Supply mu bijyanye n’imyishyurire y’iyo miti kiba cyakuye mu bihugu byo hanze kiyiranguramo.

RIB yageze ahabonetse uyu murambo ujyanwa mu bitaro gukorerwa isuzumwa

Uwo mugabo wamenyekanye ku mazina ya Nkundabakura Elie w’imyaka 43 y’amavuko wari utuye mu Kagari ka Bukinanyana muri uwo Murenge wa Cyuve, umurambo we bawuhasanze mu ma saa kumi n’ebyiri z’igitondo.

Umwe mu bahageze mbere yagize ati: “Uwo murambo twawusanze mu gacaca kari hamwe n’umuhanda, inyuma neza y’uruzitiro rw’ikigo cy’amashuri. Ntitwabashije kumenya icyamwishe, natwe tukiwubona muri ako gacaca twatunguwe. Uko byamera kose birashoboka cyane ko hari abihishe inyuma y’urwo rupfu”.

N’ubwo iperereza rigikorwa ngo hamenyekane intandaro yarwo, abaturage bavuga ko ngo mu masaha y’umugoroba w’ijoro byabereyemo, ngo hari abo bumvise bavuga ko banyuze ku mugabo wari watangiriwe na bagenzi be, barimo bamwishyuza amafaranga yari ababereyemo, bagakeka ko yaba ari uwo waje kwicwa nyuma yaho.

Aba baturage basaba ko hashyirwaho ingamba zikomeye zituma umutekano urushaho gukazwa, kuko n’abajura bakunze kwitwikira ijoro bagategera abaturage mu nzira bakabaniga bakanabambura ibyabo, bari mu batiza umurindi imfu za hato na hato zikomeje zumvikana hamwe na hamwe mu Karere ka Musanze.

Ati: “No mu minsi ishize hari umuntu basanze amanitse mu giti yapfuye, hafi y’ahangaha ibi byabereye. Bisanga nanone undi murambo na wo, basanze ku muhanda wa kaburimbo, bigaragara ko ari uw’umuntu bakubise bikamuviramo gupfa mu gihe uwo bari hamwe ubwo bahabategeraga, we bamukomerekeje bikomeye biba ngombwa ko ajyanwa kwa muganga ari intere”.

“Muri iyi minsi abakora urugomo baratuzengereje, kuko uretse kuba bategera abantu mu mihanda bakabaniga bakabambura, hari n’ubwo basanga abantu mu nzu bakiba ibirimo; kandi ikibabaje ni uko n’iyo ugerageje gutabaza cyangwa kubarwanya aba yishyize mu byago byinshi byo kuba yanahatakariza ubuzima”.

Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza, yemeje amakuru y’urupfu rwa Nkundabakura, avuga ko bahise batangira gukora iperereza ngo hamenyekane icyabiteye, mu gihe umurambo na wo wahise ujyanwa mu bitaro gukorerwa isuzumwa.

Guverineri w’Intara y’Amajyaruguru Mugabowagahunde Maurice, aherutse gutangaza ko abagaragaraho imyitwarire nk’iyo batazigera na rimwe bihanganirwa, anavuga ko bagiye gukora ibishoboka bagahashya ibyo bikorwa ariko: “N’uruhare rw’abaturage mu gukaza amarondo, bayashyigikira binyuze mu kubahiriza amabwiriza arebana no kwishyurira igihe imisanzu basabwa, yifashishwa mu guhemba abakora irondo ry’umwuga, nabyo bakwiye kubyitaho kugira ngo koko irondo ry’umwuga ribe igisubizo mu guhangana n’abakora ibyaha cyane cyane mu masaha ya nijoro”.

Urutonde rw’ibyaha byagaragaye mu gihe cy’amezi atatu uhereye muri Kanama kugeza mu kwezi k’Ukwakira 2024, Polisi y’u Rwanda iherutse kugaragariza itangazamakuru, rwerekana ko Akarere ka Musanze kagaragayemo ibikorwa 28 bishingiye ku bujura bwo kwambura abantu mu nzira no gutobora inzu, naho ibyaha bishingiye ku gukubita no gukomeretsa byahagaragaye icyo gihe byageraga muri 17.

Inzego zikorera ku rwego rw’imidugudu zirashinjwa guhishira ihohoterwa rikorerwa abagabo

Urugero, ni urw’umugabo wo mu Murenge wa Bigogwe utarifuje ko amazina ye atangazwa, ugaragaraho inkovu nini mu gice cyo mu maso no mu mutwe, akomora ku rugomo yakorewe n’abamutemye ibice byose by’umubiri birimo n’amaguru byanamuviriyemo kugira ubumuga, bimubera n’intandaro yo guhohoterwa n’umugore we waje no kumuta.

Yagize ati: “Mu gukorerwa urwo rugomo byamviriyemo no gutakaza akazi, nyuma umugore atangira kujya anshyurira ko ntacyo nkimumariye yaba mu buryo bwo guhaha ndetse n’ubundi buzima bw’urugo kuko ntari ngifite ubushobozi bwo kugira icyo nkora. Yahoraga ambwira ko ntaho mpuriye n’abandi bagabo kuko bo bajya gukorera ingo bakazibeshaho, naho njye nkirirwa hamwe nta na kimwe nshoboye gukora. Byantesheje agaciro cyane”.

Uko gukomeza guhohoterwa ngo byamuteye kwegera ubuyobozi mu mudugudu, ngo bumukiranure n’umugore we cyangwa bunamufashe kuzamura ikibazo mu nzego zisumbuyeho zirimo n’iz’ubutabera, birangira bumusabye kuriceceka, kuko ngo n’ubwo umugore bagombaga kumukorera raporo ikubiyemo ubusobanuro bw’ibibazo bafitanye byashoboraga kumuviramo gufungwa, uwo mugabo agasigarana abana wenyine, nyamara atanashoboye kubacira incuro bitewe n’ubwo bumuga bwari bwaramuhejeje hamwe.

Bombi ntibakibana kuko batandukanye umugore n’abana babiri babyaranye abasubirana iwabo, naho uwo mugabo we akaba acumbitse mu bagiraneza.

“Ibintu byose twari twarashakiye hamwe njye, yarabinyaze nsigarira aho meze nk’igiti gishinze mu butaka kitagira amashami ntikigire na nyiracyo. Mu bahisi n’abagenzi undebye akangirira impuhwe ni we umfasha, kuko ahandi hose natabaje yaba ku rwego rw’imiryango n’urwego rw’ubuyobozi bunyegereye hafi nta gifatika byatanze”.

Ikibazo cy’ihohoterwa rishingiye ku gitsina n’irikorerwa abana, kiri mu bibangamiye iterambere ry’imiryango irimo n’iyo mu Karere ka Nyabihu, ari na yo mpamvu Urwego rw’Igihugu rw’Ubugenzacyaha RIB, rwahurije hamwe abayobozi bo mu nzego zo hasi mu Midugudu, yo mu Murenge wa Jenda nk’abantu babana n’abaturage buri munsi, kandi bakunze kuba ab’imbere mu kumenya aho riba ryabereye n’ababa barigizemo uruhare.

Ntirenganya Jean Claude umukozi wa RIB ukorera mu Ishami ryo gukumira ibyaha, avuga ko mu mbogamizi zikigaranara harimo abagihishira Ihohoterwa cyangwa abahitamo kunga uwarikorewe n’uwarigizemo uruhare, bigatuma ubutabera budatangwa.

Ati: “Mu ntego z’ibanze RIB ifite, zirimo nko gukangurira abantu kurwanya ihohoterwano no kubatoza gucika ku muco mubi wo kudahana, ariko tunakangurira inzego zose kurushaho gusangira imyumvire imwe, yaba ku rwego rw’ubuyobozi ndetse n’abaturage ubwababo, yo guha uburemere iki kibazo, ntihabeho agasigane cyangwa gutekereza ko cyaharirwa kanaka cyangwa runaka, ahubwo twese tugasenyera umugozi umwe mu kurirwanya”.

Murorunkwere Chantal, Umujyanama w’Ubuzima mu Kagari ka Bukinanyana hamwe na bagenzi be, bahuriza ku kuba batari bafite amakuru ahagije y’uburyo ihohoterwa rikorwamo, ibimenyetso biriranga ndetse n’amategeko arihana, ibyatumaga batariha uburemere.

Ati: “Mu nzego z’ibanze byatugoraga gutanga amakuru mu gihe ba nyiri uguhohoterwa bo bahisemo guceceka. Ibyo tubikora twanga kwiteranya na bo, kuberako akenshi baba ari n’abantu tuba dusanzwe tuziranye bya hafi, rimwe na rimwe ari n’abo mu miryango yacu. Icyo dutahanye muri ibi biganiro twagejejweho na RIB, ni uko ayo marangamutima tugomba kuyarenga tukerekana ko guceceka ihohoterwa ari cyo cyaha cya mbere dukwiriye gukumira tugamije ko Ihohoterwa turica intege”.

Mu myaka ibiri ishize, ni ukuvuga guhera muri Nyakanga 2022 kugeza muri Kamena 2024, Urwego rw’Igihugu rw’Ubugenzacyaha RIB mu Ntara y’Iburengerazuba rwashyikirijwe ibirego 2373 by’abahohotewe.

Akarere ka Rusizi niko kari imbere y’utundi, gakurikirwa n’aka Nyamasheke, Rutsiro, Karongi, Nyabihu, Ngororero na Rubavu.

Ikibazo cy’Ihohoterwa kiri mu bibazo bihangayikishije isi. Muri iki gihe cy’iminsi 16 yo kurikumira, u Rwanda rufatanyije n’Amashami y’Umuryango w’Abibumbye harimo irishinzwe kwita ku Abimukira OIM, irishinzwe kwita ku buzima OMS n’irishinzwe kwita ku bana UNICEF.

N’ubwo kuri iyi nshuro isanze hari intambwe u Rwanda rwateye mu bijyanye no kurirwanya, ngo haracyari urugendo ruganisha ku kurica burundu. Ari na yo mpamvu hanashyizwe imbaraga mu gukangurira ibyiciro bitandukanye by’abanyarwanda, guhaguruka hakabaho kurirwanya bivuye inyuma, uwarikorewe agafashwa kugana serivisi za Isange One Stop Centre, ariko kandi hatirengagijwe ko n’uwarigizemo uruhare ashyikirizwa inzego z’ubutabera.

Iyi nkongi yatijwe umurindi n’iturika rya Gaz

Iyo nzu iherereye mu Mudugudu wa Marantima Akagari ka Rwebeya mu Murenge wa Cyuve mu Karere ka Musanze, yari igizwe n’imiryango ibiri, harimo ahatunganyirizwa imisatsi n’ibikorwa by’ubwogoshi (salon de coiffure) yari yegeranye n’igice ba nyiri iyo salon batuyemo, ndetse n’undi muryango w’iduka ry’ibicuruzwa, byafashwe n’inkongi mu masaha y’igicamunsi cyo kuwa Kane tariki 28 Ukwakira 2024.

Umunyamabanga Nshingwabikorwa w’Akagari ka Rwebeya, Odette Mukeshimana wemeje amakuru y’iyi nkongi yagize ati: “Icyateye impanuka y’iyo nkongi ntikiramenyekana, biracyari urujijo ariko biracyekwa ko yaba yakomotse ku nsinga z’amashanyarazi zitari zimeze neza, kuko abari hafi yaho ubwo iyo nkongi yabaga, babonye umuriro uyikongokeramo ari mwinshi uhereye mu gice batunganyirizagamo imisatsi, nyuma y’akanya gato bumva ikintu kimeze nka Gaz giturikiyemo, umuriro urushaho kugira imbaraga”.

Ibyari muri iyi nzu ntacyo bashoboye kuramura

Yakomeje agira ati “Umuryango umwe watunganyirizwagamo imisatsi, uwawukoreragamo yari anatuye mu gice byegeranye. Yaba icyo gice, iyo salon de coiffure ndetse n’ibicuruzwa byari mu wundi muryango w’iduka wundi byari bikurikiranye, byahiriyemo birakongoka, ku buryo nta na kimwe ba nyirabyo baramuyemo”.

Ku bw’amahirwe y’abakoreraga muri iyo nyubako bari banayirimo ubwo iyo nkongi yabaga, ngo nta n’umwe wakomeretse cyangwa ngo apfiremo.

Hitabajwe RIB na Polisi y’u Rwanda birahagoboka bazimya inkongi hahita hanatangizwa iperereza ku cyaba cyayiteye.

Iyi nkongi uretse ibyo yangije, ntawakomeretse cyangwa ngo ahaburire ubuzima

Gitifu Odette Mukeshimana yakanguriye abaturage kwitabira gukoresha ubugenzuzi busuzuma insinga ziyobora amashanyarazi mu ngo zabo, mu kwirinda impanuka za hato na hato zishobora guteza.

Ati: “Dukangurira abaturage gusubiramo ubugenzuzi busuzuma insinga bakoresheje bayobora amashanyarazi mu ngo zabo, kuko hari ingo usanga bikozwe mu buryo butaboneye bikaba byateza akaga k’impanuka ziteza urupfu cyangwa ubumuga. Haba hari ibikoresho byujuje ubuziranenge ku masoko ndetse n’abazobereye mu buryo bwo kubishyira ku nzu mu gihe cyo kuyoboramo amashanyarazi. Ni ngombwa rero kubyitaho”.

Abaturage barasabwa kwitabira gukoresha ubugenzuzi busuzuma insinga ziyobora amashanyarazi mu ngo zabo

Biravugwa ko nyiri iyo nzu y’ubucuruzi, asanzwe atuye mu Karere ka Burera, ariko akaba yayikodeshaga. Urebye ibyarimo byahiriyemo, inyubako ubwazo na zo zangiritse kandi ngo ntabwo yariri mu bwishingizi.

Biravugwa ko bacukuraga amabuye y’agaciro muri aka gace mu buryo butemewe

Icyo kirombe gicungwa na Kampani ikora ubucukuzi bw’amabuye y’agaciro yitwa Rutongo Mines Ltd, icyakora abo bagabo ngo barimo bagicukuramo amabuye y’agaciro mu buryo butemewe n’amategeko, bagwirwa n’igitengu cyacyo. Uretse abo batatu bahise bapfa, abakomerekejwe na cyo uko ari bane bakuwe mu itaka ryari ryabarengeye, bajyanwa kuvurirwa ku kigo nderabuzima cya Masoro harimo n’aboherejwe ku bitaro bya Rutongo.

Umuyobozi w’Akarere ka Rulindo, Uwanyirigira Judith, avuga ko mu makuru y’ibanze ku cyaba cyateye iyo mpanuka babashije kumenya, ngo ni uko amazi y’imvura imaze iminsi igwa, yagiye acengera mu butaka, burushaho gusoma, buroroha, maze ubwo abo baturage bageragezaga gucukura rwihishwa bugahita bubaridukira.

Umuvugizi wa Polisi mu Ntara y’Amajyaruguru, SP Mwiseneza Jean Bosco, yaboneyeho kwibutsa abaturage kutishora mu bikorwa by’ubucukuzi bw’amabuye y’agaciro butemewe, kuko ari ugushyira ubuzima bwabo mu kaga.

Ati: “Ubwo bucukuzi bukozwe muri ubwo buryo nibabwirinde kuko ari n’icyaha gihanwa n’amategeko. Ahubwo bakwiye kuba ari abatangira amakuru ku gihe, ku muntu wese bamenya cyangwa babonye abwishoramo kuko ari bwo buryo bwadufasha kubuca burundu”.

Ubucukuzi bw’amabuye y’agaciro bukorwa mu buryo butemewe n’amategeko bukunze kugaragara mu Karere ka Rulindo, bukunze gushyira ubuzima bw’abatari bacye mu kaga, ahanini bishingiye ku kuba hari abahatakariza ubuzima, abandi bukabasigira ubumuga buhoraho.

Ubuso bungana na Hegitari enye nibwo bwateweho ibiti bibarirwa mu bihumbi 6

Abafite ubutaka kuri uwo musozi, bari bamaze igihe bagerageza kubucukuraho imiringoti n’ibyobo bifata amazi, ariko isuri ikarenga ikabutengura bukamanukira mu myaka, babaga bahinze mu mubande kuko nta biti byari biteye kuri uwo musozi.

Mukasine Veneranda wo mu Mudugudu wa Mucaca Akagari ka Muharuro, yagize ati: “Imvura yagwaga bigahura n’uko umusozi utari uteyeho ibiti, ikamanukana itaka n’ibyondo, bikuzura mu mirima iri munsi y’umusozi bikarenga bikagera no mu kiyaga kigahinduka isayo. Abafite imirima munsi y’umusozi duhinga ibishyimbo, tugahinga ibigori twizeye kubona umusaruro ariko imvura yagwa isuri ikayimanukiramo byose ikabyangiza”.

Akomeza agira ati, “Byari ikibazo cy’ingorabahizi, twari twaraburiye igisubizo kirambye bitewe n’uburyo ari ahantu hahanamye hasabaga imbaraga ziturenze ubushobozi”.

Kuba umusozi wa Mbwe uhanamye kandi utanateyeho ibiti byatezaga ingaruka ku bafite imirima mu mibande n’ikiyaga kiwukikije

Ubuso bungana na Hegitari enye (4) nibwo bwateweho ibiti bibarirwa mu bihumbi 6, mu gikorwa cyabaye kuwa Gatandatu tariki 23 Ugushyingo 2024, kikaba cyarateguwe na Minisiteri y’Umutekano yari ihagarariwe muri iki gikorwa n’umunyamabanga uhoraho muri iyi Minisiteri.

Ni muri gahunda iyi Minisiteri igira, yo kunganira abaturage no kubakangurira kwita ku kubungabunga ibidukikije, hagamijwe kwimakaza umuryango ubayeho mu buryo butekanye.

Umuyobozi w’Akarere ka Musanze, Nsengimana Claudien avuga ko mu Mirenge igize Akarere ka Musanze hari gahunda yo gukomeza gutera ibiti bishya no gusazura amashyamba, mu rwego rwo kurushaho kubungabunga ibidukikije harwanywa isuri.

Kuba kuri uyu musozi hari ahatari hateye ibiti byari ikibazo gikomereye abaturage

Ati: “Icyo dusaba abaturage ni ukubigira ibyabo, ahagaragara ibiti byatewe mbere bakabibungabunga aho babona ibishaje babisimbuze ibishyashya cyane cyane ibiti bivangwa n’imyaka ndetse n’iby’imbuto”.

Yungamo agira ati, “Ni igikorwa tuzakomeza gukora no mu muganda uzagenda ukorwa mu gihe kiri imbere, mu rwego rwo kongera ubuso buteweho ibiti, turusheho kubungabunga ibidukikije, ariko tunazirikana umumaro ukomeye ibiti bidufitiye mu kuzamura ubukungu no kubungabunga ikirere”.

Nyirandama Chantal yapfuye azize impanuka y’imodoka ubwo we na bagenzi be bari bagiye mu nama ya FPR Inkotanyi

Uyu mugore ni umwe mu bantu 28 b’abanyamuryango ba FPR Inkotanyi bari mu modoka ya Coaster, yakoze impanuka mu ma saa mbili z’igitondo cyo ku Cyumweru tariki 24 Ugushyingo 2024, ubwo yari igeze mu Mudugudu wa Sakara, Akagari ka Rwili, Umurenge wa Cyungo mu Karere ka Rulindo igata umuhanda, ahita apfa, mu gihe abandi barimo abakomeretse bikabije n’abakomeretse byoroheje.

Hoteli yitwa Nice Garden Hotel Nyirandama yaherukaga kuzuza mu Karere ka Gicumbi, ndetse ikaba yari yanatashywe ku mugaragaro muri Kanama 2024, abamuzi bavuga ko ayikomora ku murava no kwiyemeza byamuranze, cyane ko nta myaka myinshi yari ishize yinjiye mu ruhando rw’abikorera mu rwego rw’amahoteli aho yatangiriye kuri bicye bishoboka.

Mutangana Alain Fabrice ukuriye abikorera mu Karere ka Gicumbi, yari asanzwe azi Nyirandama nk’umwe mu bagore b’intangarugero.

Ati: “Yari umubyeyi utinyuka kandi witaga cyane ku kuzamura abandi no kubatinyura, akaba atabikoraga ku munwa gusa ahubwo akabigaragarisha ibikorwa bifatika. Yari umubyeyi wahoranaga intumbero yo gutera imbere no kuzikumbuza abandi”.

Nta mezi atatu yari ashize Hoteli Nyirandama yujuje itashywe ku mugaragaro

“Nibuka mu minsi micye ishize ubwo twatahaga ku mugaragaro Hoteli nshya yaherukaga kuzuza mu mujyi wa Gicumbi, aho yatubwiraga ubuzima yanyuzemo bw’ukuntu yatangiriye ku gukodesha inzu y’icyumba kimwe, n’ibikoresho yabaga yatiye ahandi, ariko afite intumbero yo kuziyubakira Hoteli ye bwite. Yari wa muntu utaryamira ibitekerezo bye ngo abigundire, ahubwo yabisakazaga mu bandi kandi agaharanira ko ibyifuzo n’ibitekerezo bye bibyara imbuto zigaragarira amaso kandi zifitiye abandi akamaro; ndetse hari n’ibihembo yagiye ahabwa ku bw’imikorere myiza no kubera abandi urugero mu rwego rw’abikorera”.

Imikorere yamurangaga ngo yatumaga n’abo bakora mu rwego rumwe barushaho kumugirira icyizere ndetse yari n’umwe mu bayobora urwego rw’amahoteli muri aka Karere, kandi ngo inkunga yaba iy’ibitekerezo no mu buryo bw’amaboko byakunze kumuranga ngo ni benshi byagiye bigirira akamaro barimo n’abakozi babarirwa muri 40 yari yarahaye akazi gahoraho muri iyi Hoteli n’ahandi yari ifite amashami muri Gicumbi, Gakenke na Rulindo utabariyemo n’abandi bakora nka ba nyakabyizi.

Ubwo iyi mpanuka yabaga, abari muri iyo modoka bari bagiye mu nama yari guhuza abanyamurango ba FPR Inkotanyi ku rwego rw’Intara y’Amajyaruguru, ikabera mu Karere ka Musanze, ariko ikaba yaje gusubikwa ubwo iyo nkuru y’incamugongo yamaraga kumenyekana.

Uretse Nyirandama wahitanywe na yo, ngo mu bayikomerekeyemo harimo n’abandi bikorera, ndetse n’abakora mu zindi nzego basanzwe ari abanyamuryango ba FPR Inkotanyi bahise bajyanwa kuvurirwa mu bitaro birimo ibya Byumba, ibya Kinihira, na CHUK.

Nyirandama yari azwiho gukora cyane no kugira umutima mwiza

Nyirandama yari yarahaye akazi abakozi bahoraho babarirwa muri 40 n’abandi benshi bakoraga by’igihe gito

Welcome in #NiceGardenHotel. pic.twitter.com/wyFUY1KV8J

— Nyirandama Chantal (@nyirandama18370) October 11, 2024

Ibikorwa bye by’indashyikirwa yagiye abihererwa ibihembo

Nyirandama yajyaga agaragara no mu bikorwa by’imikino ihuza abagore

Impanuka yaguyemo umuntu umwe abandi benshi barakomereka

*Kwihanganisha abagizweho ingaruka n'impanuka*

Uyu munsi ahagana saa 7h30 AM , mu Mudugudu wa Sakara, Akagari ka Rwiri,Umurenge wa Cyungo mu Karere ka Rulindo, mu muhanda Gicumbi-Base habereye impanuka y'imodoka ya Coaster yari itwaye Abanyamuryango ba @rpfinkotanyi . 1/2

— RPF GICUMBI (@gicumbi_rpf) November 24, 2024

Inkuru bijyanye:

Rulindo: Imodoka yari itwaye abanyamuryango ba FPR Inkotanyi yakoze impanuka

Iyo modoka yari itwaye abantu 28, bari bagiye mu nama y’Umuryango FPR Inkotanyi mu Karere ka Musanze. Impanuka yabereye mu muhanda wa kaburimbo Gicumbi-Base, mu Mudugudu wa Sakara, Akagari ka Rwili, Umurenge wa Cyungo mu Karere ka Rulindo. Umushoferi wari uyitwaye birakekwa ko yaba yananiwe gukata ikorosi, imodoka ihita ita umuhanda igwira urubavu.

Umuvugizi wa Polisi mu Ntara y’Amajyaruguru, SP Jean Bosco Mwiseneza, yabwiye Kigali Today ati: “Abagenzi bari bayirimo uko ari 28 barimo umwe wahise witaba Imana, barindwi barakomereka bikomeye, abandi 19 bo bakomeretse byoroheje barimo baritabwaho ku bitaro bya Byumba”.

Yakomeje avuga ko hahise hatangizwa iperereza ngo hamenyekane icyateye impanuka ndetse umushoferi wari utwaye iyo modoka kuri ubu ari mu maboko ya Polisi, Sitasiyo ya Bushoki.

SP Mwiseneza yibukije abatwara ibinyabiziga kwirinda uburangare mu gihe batwaye, no kujya bita ku kuringaniza umuvuduko bubahiriza amategeko y’umuhanda.

*Kwihanganisha abagizweho ingaruka n'impanuka*

Uyu munsi ahagana saa 7h30 AM , mu Mudugudu wa Sakara, Akagari ka Rwiri,Umurenge wa Cyungo mu Karere ka Rulindo, mu muhanda Gicumbi-Base habereye impanuka y'imodoka ya Coaster yari itwaye Abanyamuryango ba @rpfinkotanyi . 1/2

— RPF GICUMBI (@gicumbi_rpf) November 24, 2024

Inkuru bijyanye:

Asize yujuje Hoteli i Gicumbi: Ibitazibagirana kuri Nyirandama Chantal waguye mu mpanuka

Imodoka yagonganye na moto ahagana saa yine z’amanywa, iriruka, ifatwa saa moya z’ijoro

Iyo modoka y’ikamyo, ubwo yageraga hafi y’ikibuga cy’umupira kiri ahitwa i Nyakarambi mu Mudugudu wa Rusaki Akagari ka Nyarubuye mu Murenge wa Rwaza, yahagonganiye na moto, umuntu umwe ahita ahasiga ubuzima, mu gihe undi yakomeretse bikomeye, mu gihe uwari utwaye iyo modoka we yahise ayitorokana.

Umuvugizi wa Polisi mu Ntara y’Amajyaruguru, SP Jean Bosco Mwiseneza, yemeje iby’ifatwa ry’iyo modoka, ati: “Impanuka ikimara kuba, uwari utwaye imodoka yahise atorokana na yo biba ngombwa ko dutangira ibikorwa byo kuyishakisha nyuma aza gufatirwa mu Byangabo ku makuru twahawe n’abaturage. Umugabo wari uyitwaye w’imyaka 24 ndetse n’iyo modoka ari kuri Sitasiyo ya Polisi ya Muhoza”.

Polisi y’u Rwanda ikorera mu Ntara y’Amajyaruguru ikangurira abatwara ibinyabiziga kujya bihutira kubimenyekanisha mu nzego zibishinzwe mu gihe habayeho impanuka, kuko iyo amakuru yerekeranye na yo atamenyekanye hakiri kare, ubutabera butinda gutangwa.

Ati: “Birashoboka cyane ko impanuka yabaho, uwayigizemo uruhare agahitamo kutaguma aho yabereye ku bwo gusigasira umutekano we. Ariko nanone ibyo niba binabayeho, niyihutire kwishyikiriza Polisi, ayimenyeshe imigendekere y’impanuka ikiba, kugira ngo binafashe ababishinzwe gutanga ubutabera hakiri kare”.

“Iyo bitabaye gutyo uwagize uruhare mu migendekere y’impanuka ntiyigaragaze, ku ikubitiro tubifata nko gushaka kuyobya uburari no kujijisha inzego z’umutekano kandi ibyo ubwabyo bigize icyaha gihanwa n’amategeko”.

Umuntu umwe yaguye muri iyi mpanuka, undi arakomereka bikomeye, ariko na ye nyuma yitaba Imana

Mu makuru Kigali Today yamenye ni uko Bamperikera wahitanwe n’impanuka ikimara kuba, yahoze ari umuforomo ku Kigo nderabuzima cya Cyabingo mu Karere ka Gakenke, ariko kuri ubu akaba yari mu kiruhuko cy’izabukuru.

Umumotari wari uyimutwayeho witwa Hagenimana ngo banafitanye amasano ya bugufi cyane, abo mu muryango we babwiye Kigali Today ko nyuma y’amasaha macye agejejwe kwa muganga, na we yashizemo umwuka kuko yari yakomeretse bikomeye.

Polisi y’u Rwanda n’inzego z’ibanze, zibutsa abakoresha umuhanda kubahiriza amategeko n’amabwiriza awugenga mu kwirinda impanuka zivamo n’urupfu.

Nubwo bitaremezwa neza kuko iperereza rigikomeje gukorwa, umuvuduko ukabije wa kimwe muri ibyo binyabiziga cyangwa se byombi uri mu bitekerezwa ko ari yo nyirabayazana w’iyo mpanuka.

Inkuru bijyanye:

Umuhanda Kigali - Musanze ubereyemo impanuka

Mu itangazo Banki Nkuru y’u Rwanda yashyize ahagaragara, igaragaza ko urwego rw’ibigo by’imari iciriritse na rwo rutasigaye inyuma kuko na rwo mu mezi icyenda abanza ya 2024 rwiyongereyeho Miliyari 581,4 z’amafaranga y’u Rwanda.

Uko iri zamuka ry’inguzanyo rigaragazwa nk’ingirakamaro ku bukungu bw’u Rwanda ni na ko abakorana n’amabanki cyangwa ibigo by’imari iciriritse, binyuze mu kwaka inguzanyo na bo bagaragaza ko zikomeje kubahindurira imibereho.

Bikorimana Vital, ni umwe mu bikorera ku giti cye, kuri ubu urimo kubaka inzu mu Murenge wa Cyuve mu Karere ka Musanze abikesha inguzanyo yahawe na Banki ya Kigali abereye umukiriya.

Yagize ati: “Nahereye ku kwegeranya ubushobozi bw’amafaranga yanjye ku giti cyanjye ngejeje kuri miliyoni zirindwi nyaguramo ikibanza, hanyuma nisunga banki impa inguzanyo ya Miliyoni 10 yo kubakamo inzu. Ubu imirimo irarimbanyije kuko ndi hafi kuyisakara nkazanayikinga, ku buryo nizeye neza ko uyu mwaka ugomba kurangira mvuye mu bukode”.

Abakorana n’ibigo by’imari biciriritse na bo bavuga ko hari urwego bigejejeho binyuze mu mishinga iciriritse baba barakiye inguzanyo zikabunganira kuyishyira mu bikorwa bakiteza imbere.

Uwamariya Solange, akora ubucuruzi buciriritse. Avuga ko atari kwishoboza iyo adasaba inguzanyo ya Miliyoni imwe muri Inyongera SACCO Cyuve yahereyeho atangira ubwo bucuruzi.

Ati: “Natangiriye ku gucuruza ibinyampeke, ubushobozi bugenda bwiyongera nongeramo n’amoko y’ifu abikomokaho bingeza ku rwego mbasha kujya ndihira abana amashuri, barimo batatu bayarangije n’undi umwe nkirihira. Ibibatunga nta handi mbikura hatari muri ubu bucuruzi; kandi nkabijyanirana no kwishyura neza inguzanyo. Igihe cyo kuyisoza iyo kigeze ndongera nkuzuza ibisabwa nkaka indi nguzanyo nkikenura gutyo gutyo”.

Mu nama ngarukagihembwe ya Komite ishinzwe kubungabunga Ubudahungabana bw’Urwego rw’Imari (FSC) yateranye muri iki cyumweru, yabonye ko Urwego rw’Imari rukomeje kugira ubudahangarwa kandi ruhagaze neza mu guhangana n’Ingorane n’ubwo hari ibibazo bigihari.

Banki Nkuru y’u Rwanda, igaragaza ko muri rusange inguzanyo zakomeje kwishyurwa neza mu mabanki no mu bigo by’imari iciriritse.

Naho igipimo cy’inguzanyo zitishyurwa neza cyari kuri 4,2% mu mabanki na 3,8% mu bigo by’imari iciriritse, byose bikaba biri munsi y’igipimo ntarengwa cya 5% giteganywa na Banki Nkuru y’u Rwanda.

Mu Rwanda habarurwa ibigo by’imari 688 birimo amabanki 11 yihariye 65% by’urwego rw’imari rwose.

Harimo ibigo by’imari iciriritse(microfinance), SACCOs 458, ibigo by’ubwishingizi, ibyo kwizigamira, ibigo bifasha mu kwishyura hakoreshejwe ikoranabuhanga ndetse n’ibigo bishinzwe ivunjisha.

Amabanki n’ibigo by’imari biciriritse BNR ibigaragaza nk’ibikomeje gushyigikira ishoramari mu bukungu bw’u Rwanda.

Abanyuraga muri uyu muhanda batunguwe no gusanga umurambo w’umuntu umwe ndetse n’undi wakomeretse bikabije, bari mu muhanda, iruhande rwabo hari kasike za moto zangiritse mu buryo bukomeye.

Ngo abo bantu bombi barimo umumotari wari utwaye moto hamwe n’umugenzi yari ayitwayeho ari na we witabye Imana, baganaga mu cyerekezo cya Kigali, bageze hafi y’ikibuga cy’umupira kiri ahitwa i Nyakarambi mu Mudugudu wa Rusaki, Akagari ka Nyarubuye mu Murenge wa Rwaza mu Karere ka Musanze, bahahurira n’imodoka yavaga i Kigali ijya mu cyerekezo kigana i Musanze bagongana na yo ihita ikomeza kwirukanka.

Niragire Octavie, Umunyamabanga Nshingwabikorwa w’agateganyo w’Umurenge wa Rwaza, yagize ati: “Umuntu umwe yahise apfa undi akomereka bikomeye. Imodoka yabagonze ntiyahise imenyekana kuko ikimara kubagonga yahise ikomeza ikagenda. Gusa amakuru turi kubwirwa n’abaturage ngo ni uko ari imodoka nini ifite kariseri y’umweru yabagonze igakomeza kwiruka. Turacyashakisha amakuru arenzeho”.

Yaboneyeho kwibutsa abakoresha umuhanda kwitwararika no kubahiriza amategeko n’amabwiriza awugenga mu kwirinda impanuka zivamo n’urupfu.

Ati: “Uko biri kose turacyeka ko intandaro y’impanuka yaba ari nk’umuvuduko ukabije n’ubwo tutabyemeza 100% kuko iperereza ririmo gukorwa. Ari ibinyabiziga, ari abanyamaguru, bakwiye kujya bitwararika, aho bishoboka kimwe kikabererekera ikindi kandi ibyo bishoboka mu gihe ababiyobora bitaye ku kwirinda umuvuduko ukabije”.

Iby’iyi mpanuka bikimara kumenyekana, hitabajwe Polisi na RIB bagera aho yabereye, umurambo ndetse n’uwakomeretse bajyanwa mu bitaro ndetse hahita hatangizwa iperereza ku cyayiteye, ndetse no gushakisha iyo modoka.

Inkuru bijyanye:

Musanze: Imodoka yagonganye na moto igahita yiruka yafashwe

Abagenzi bajya mu byerekezo bitandukanye, barimo abakoresha umuhanda uturuka Musanze-Cyanika, uva Musanze-Vunga n’uwa Musanze-Kinigi batwawe muri izo modoka, bamaze iminsi binubira uburyo bagenda babyigana, aho nk’intebe ifite ubushobozi bwo kwicarwaho n’abantu bane, usanga yicaweho n’abagera muri batanu cyangwa batandatu, abandi bahagaze ari nako zibapakiranye n’imizigo bavuga ko iba ari myinshi ugereranyije n’iyakabaye itwarwa muri izo modoka.

Mukazirahiga agira ati: “Abashoferi badushyira mu modoka mu buryo tuba tugerekeranye, tubyigana, ku buryo no guhumeka biba ari ikibazo gikomeye".

"Hari nk’abagenzi batega Imodoka bafite intege nkeya cyangwa ari nk’umugore utwite, bakamubyiga akaba yakurizaho ibindi bibazo".

Undi mugenzi agira ati: "Uba wicaye mu modoka ukabona bazanye imirundo y’ibitebo byuzuyemo inyanya cyangwa imineke, n’imifuka y’ibindi biribwa baba bakuye mu masoko ya hamwe babijyanye mu y’ahandi, bakabipakirana n’abagenzi mu modoka ku buryo nk’umugenzi arinda agera iyo ajya adafite ahisanzuye yicara, yanareba nabi bikamenekaho imyambaro igahindana".

"Polisi nidufashe, abashoferi badutwara bibutswe kubahiriza umubare w’imyanya iri mu modoka, ndetse n’uburenganzira bw’umugenzi bwubahirizwe".

Mu mbogamizi bamwe mu bashoferi bagaragaza zituma ibi babikora, ngo ni uko imodoka zijya muri ibyo byerekezo zikunze kuba ari nkeya ugereranyije n’umubare w’abagenzi bava mu bice bimwe bajya mu bindi, babatega bagahitamo kubashyiramo banga kubasiga ku nzira.

Mu kiganiro giheruka kumuhuza n’itangazamakuru rikorera mu Ntara y’Amajyaruguru cyabaye kuwa gatandatu Tariki 16 Ugushyingo 2024 Umuvugizi wa Polisi y’u Rwanda ACP Boniface Rutikanga, yagaragaje ko umushoferi wese uzafatirwa muri ayo makosa, azahanwa.

Ariko kandi anashishikariza abaturage kutajya bareberera umuntu wese wabangamira ishyirwa mu bikorwa rya gahunda zo gutwara abantu n’ibintu, no kujya bihutira gutanga amakuru.

Ati:"Byanze bikunze twe nka Polisi tugomba kugira icyo dukora binyuze mu gukaza ibihano z’ibihano bitaganyijwe ariko reka n’abagenzi ubwabo badufashe, baharanire uburenganzira bwabo, bareke kwemera ko umushoferi abatsindagira mu modoka nyamara baba bishyuye amadaranga yabo. Abagenzi nibadufashe babihagurukire igihe hari nk’umushoferi ubatendetse bamuhakanire nibiba ngombwa bahamagare police, Ndetse bibaye na byiza imodoka twazajya tuyikurikirana tukamenya ko yahagurutse abantu bicaye neza."

Itegeko No 34/1987 ryo kuwa 17 Nzeri 1987 rigena amabwiriza agenga imihanda n’uburyo bwo kuyigendamo, mu ngingo yaryo ya 27, rigena ko iyo ikinyabiziga gisa n’igipakiye birenze urugero, umukozi ufite ububasha bwo kukibuza kugenda ashobora gutegeka ugitwaye kugishyira ku munzani cyangwa ku bindi bipima uburemere, kugira ngo gipimwe, ndetse byaba ngombwa kigahagarikwa ariko uwo munzani cyangwa ibyo byuma bindi bipima, bikaba biri ahantu hafite urugendo ruri munsi ya kirometero icumi z’aho ikinyabiziga cyahagarikiwe.

Amabwiriza Polisi y’u Rwanda agena ko umuntu ufashwe yarengeje umubare w’abo ikinyabiziga cyemerewe gutwara, ahanishwa amande y’ibihumbi 30 kuri buri muntu, yafatwa yavanze abantu n’ibintu agahanishwa amande y’ibihumbi 10 y’u Rwanda.

Uwizeye Jean de Dieu, mu buhamya bwe, aburira abagitsimbaraye ku ngengabitekerezo ya Jenoside, akabasaba kwitandukanya na yo kuko ari mbi

Uwo mugabo ukomoka mu Karere ka Huye mu Ntara y’Amajyepfo, kuri ubu ufite imyaka 46 y’amavuko, Jenoside ubwo yabaga, yigaga mu mwaka wa kabiri w’amashuri yisumbuye.

Ibyinshi mu byo yigishwaga yaba mu ishuri, ubutumwa bukubiye mu mbwirwaruhamwe z’abayobozi, n’inyigisho bahabwaga n’ababigishaga ijambo ry’Imana, yaba mbere ya Jenoside yakorewe Abatutsi na nyuma yaho ubwo bari barahungiye muri Repubulika Iharanira Demokarasi ya Congo, inyinshi zashimangiraga urwango, gutoteza no gupfobya Abatutsi.

Yagize ati: “Abanyeshuri b’Abatutsi bahoraga batotezwa, bagateshwa agaciro, bakirukanwa no mu mashuri; ndetse nibuka ko kenshi abarimu iyo babaga barimo kutwigisha bakundaga kutubwira inkuru z’Umugabekazi witwa Kanjogera, ko buri uko yajyaga guhaguruka, babanzaga kumuzanira abana b’Abahutu, akabashinga amacumu mu bitugu no mu mutima kugira ngo abashe guhaguruka. Ibyo iyo twabyumvaga, twabifataga nk’ubugome bw’indengakamere Abatutsi bagiye bakorera Abahutu, bigatuma natwe twumva tubanze urunuka”.

Ubwo bageraga muri Repubulika Iharanira Demokarasi ya Congo, bahunze urugamba rwo guhangarika Jenoside yakorewe Abatutsi, abari abategetsi bo muri Leta yahoze ari iya Habyarimana ngo babahozaga ku cyizere cy’uko batahuka vuba bagasubirana Igihugu cyabo bahoranye.

Ati: “Abiyitaga ko ari abakozi b’Imana twahunganye hamwe badusomeraga bibiliya bakanaduhanurira ko ubwoko bw’Abatutsi Imana ibwanga, kandi ko yabuvumye, ndetse ko Igihugu bafashe batazakirambamo. Batwemezaga ukuntu Abatutsi bagisigayemo bazahita bapfira gushiraho burundu, hanyuma Abahutu bagasubirana Igihugu”.

“Abajyaga babitwizeza barimo n’uwari uheruka kuba Perezida Sindikubwabo Théodore wanadupfiriye mu maboko tumuhetse mu ngombyi ya shitingi ubwo twari mu buhungiro, Kambanda wigeze kuba Minisitiri w’Intebe n’abandi bari bahungiye mu mashyamba”.

“Badusabaga Imisanzu ya buri kwezi yo gushyigikira FDLR umuntu wese uwutanze bakamwandika mu Gitabo cy’Ubugingo. Ni igitabo batwigishaga ko umuntu wese ucyanditswemo ku bwo kuba yatanze uwo musanzu, Imana izamwibukira ku gushyigikira ubwoko bwayo ikazamurinda mu gutahuka kandi yazanapfa ikamuha ijuru”.

Buri muntu yatangaga umusanzu uko yifite ariko ntajye munsi y’idolari rimwe rya Amerika nk’uko Uwizeye yakomeje abivuga.

Ati: “Najyaga mbyuka njya gushaka ibiraka byo guhingira abandi, amafaranga nkoreye nkagenda nyabika gahoro gahoro, yamara kugwira nkakuramo Idorari rimwe nkaritangamo umusanzu wo gushyigikira FDLR, nibwira ko uko bigomba kugenda kose Imana izabimpera ingororano n’ijuru nkazaritahamo nk’uko bajyaga babitwigisha”.

Muri icyo gihugu bari bahungiyemo hadutseyo umutekano mucye, biturutse ku ntambara yo gucyura impunzi, bamwe baratahuka, abandi na we arimo bakomereza muri Congo Brazaville, bagera no muri Gabon. Ngo ayo mashyamba yose birirwaga birukankamo, Uwizeye ntiyashakaga kuzigera na rimwe atahuka ngo ayoboke Inkotanyi yumvaga afitiye urwango rukomeye.

Ati “Ingabo z’icyo gihugu cya Gabon, ubwo mu 1997 zaducyuraga ku ngufu, twageze ku Kibuga cy’indege kiri i Kanombe, ntangira gushya ubwoba ntekereza ko ningera mu maboko y’Inkotanyi twafataga nk’abanzi bacu, zihita zinyicisha ifuni, dore ko ubwo twari tukiri mu mashyamba, ari byo bahoraga batwigisha”.

Icyari ukwicishwa ifuni cyavunjwemo gushyirwa mu ishuri

We n’abandi b’urubyiruko bo mu gace k’iwabo, bari bamaze igihe gito batahukanye mu Rwanda, batunguwe no kubona bakiranwa ubwuzu, kugera n’aho bongera gushyirwa mu ishuri ryisumbuye rya Kiruhura, ryatangijwe n’umubikira witwa Anastasie Murekeyisoni, warokotse Jenoside yakorewe Abatutsi mu Rwanda.

Uwizeye ati: “Byatubereye nk’igitangaza natwe ubwacu tutiyumvishaga, kubona uwo mubikira bari bariciye umuryango we wose muri Jenoside yakorewe Abatutsi, yiyemeza kwirengagiza ubugome yakorewe, bwo kwicirwa umuryango we, agashinga ikigo cy’ishuri, akemera ko kigwamo abanyeshuri b’ingeri zose atarobanuye. Byabaye ngombwa ko abana bose bari bandagaye atwakira, ndetse abenshi muri bo banakomoka mu miryango yari yaragize uruhare muri Jenoside yakorewe Abatutsi”.

Mu kigo cy’Inderabarezi kiri i Save, ari na ho yakomereje icyiciro cya kabiri cy’amashuri yisumbuye ni ho yayasoreje afite na Buruse yo kujya kuminuza i Butare, ariko yanga kujyayo, kuko ngo atari yakagirira icyizere Inkotanyi, aho yatekerezaga ko byanze bikunze igihe kizagera zikihorera ku Bahutu.

Ati: “Narangije mfite Buruse nanga gukomeza Kaminuza kuko nibazaga nti ubundi naba ndimo kwirirwa niruhiriza iki niga amashuri menshi, ko amaherezo bazanyica. Nkimara kwiyemeza kudakomeza kaminuza nagiye mu bwarimu, aho nakoreraga ibihumbi 23 mvuga nti nibananyica byibura nzabe narakoreye amafaranga macyeya. Ubwo icyo gihe abo twari twatsindiye rimwe bagiye bakiga, ubu baraminuje abenshi ni ba Dogiteri, mu gihe njye nize ubungubu nabwo ari njye ubwanjye wirihiye kaminuza, nyamara nari naritesheje iyo Leta yagombaga kundihira”.

Uko isanamitima ryamufashije kuva ku izima akitandukanya n’ingengabitekerezo

Mu kuva mu bwarimu, Uwizeye yaje kuba umukozi w’Umuryango Ubuntu, wita ku gukumira ingaruka za Jenoside yakorewe Abatutsi no kwimakaza isanamitima binyuze mu matsinda ahuza abayirokotse n’abayigizemo uruhare, bahurira mu biganiro, aho bibanda ku mateka y’ibyababayeho, bagamije komorana ibikomere no guhumurizanya.

Mu kuba umukozi w’uwo muryango yagiyemo agamije gukorera amafaranga, ku bwe ngo igikomeye kurushaho yawungukiyemo, ni uko ibitekerezo bibi byari byaramuboshye igihe kinini, byagiye bimushiramo nyuma yo gusobanukirwa neza ukuri ku mateka y’u Rwanda no kubohorana hagati ye n’abandi bawubarizwagamo.

Ni byo yasobanuye ati “Icyo gihe imitekerereze mibi nari narakuranye y’urwango ku Batutsi, natangiye kwitandukanya na yo, twe n’abo twari duhuriye hamwe muri ayo matsinda twaganiraga ku byatubayeho, turabohorana, turatinyurana, tuvurana ibikomere, ku buryo ubu tubanye neza nta muntu n’umwe wishisha undi, kandi n’abari bafite imyumvire mibi ku mateka y’Igihugu cyacu ubu yarahindutse twongera kuba bazima”.

Mu Ihuriro ry’Ubumwe n’Ubudaheranwa ku rwego rw’Intara y’Amajyaruguru riheruka kubera mu Karere ka Musanze tariki 13 Ugushyingo 2024, rigahuza abayobozi mu nzego zitandukanye zihakorera ndetse na bamwe mu bigeze kuba mu nzego z’ubuyobozi ku rwego rw’igihugu, Guverineri w’iyi Ntara Mugabowagahunde Maurice, yagaragaje ko kuganira ku mateka y’Igihugu binyuze mu kwifashisha ubuhamya bugaruka ku kuri kw’amateka, hari ibifatika bifasha kwigisha abaturage no guhindura imyumvire ya benshi, bityo n’urugendo rwo gusigasira ubumwe bw’Abanyarwanda rukoroha.

Ubushakashatsi bwa Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) bwagaragaje ko mu myaka 10 ishize igipimo cy’Ubumwe n’Ubwiyunge cyagiye kizamuka, aho nko mu mwaka wa 2020 cyari kigeze kuri 94,7% kivuye kuri 92,5% cyariho mu mwaka wa 2015, ndetse kuri ubu mu Turere two hirya no hino mu gihugu hari gukorwa ubushakashatsi buzavamo ibindi bipimo bishya, byitezwe kugaragaza indi ntambwe nziza muri uru rwego.

Ubuyobozi bw’Akarere ka Musanze bwasobanuwe ko kwimura irimbi ry’Akarere byatewe no kuba rir mu marembo y’Umujyi

Ni nyuma y’Itangazo Akarere ka Musanze kasohoye, kamenyesha abaturage ko guhera Tariki 5 Ukuboza 2024, irimbi ry’aka Karere riherereye mu Mudugudu wa Mukungwa Akagari ka Kabirizi mu Murenge wa Gacaca rizaba rifunze hagakoreshwa irindi rishya riri mu Mudugudu wa Mata Akagari ka Kabirizi n’ubundi muri uwo Murenge.

Umuyobozi w’Akarere ka Musanze Nsengimana Claudien yasobanuye ko iki cyemezo cyaturutse ku kuba aho ryari riri hari mu marembo y’umujyi wa Musanze, kandi n’imiterere y’aho ikaba yari igoranye cyane.

Yagize ati: "Aho ryari riri, abantu babaga bavuye mu bice bitandukanye, bagera aho riri, kubera ko hari mu marembo y’Umujyi wa Musanze, kandi ari no mu musozi, batererayo amaso ugasanga baraharangarira. Ikindi ni uko n’umuhanda uganayo wanyereraga cyane mu gihe cy’imvura, kandi bikanagora abantu babaga bagize ibyago mu gihe bagiye kuhashyingura. Byari ibintu bitoroshye, ndetse n’abaturage bari bamaze igihe batugaragariza imbogamizi zo kuba ari ahantu hagoranye cyane".

Aho irimbi rishya riri hafi gutangira gukoreshwa rizaba riherereye, imiterere yaho izajya yorohereza abazajya baryifashisha mu gushyinguramo ababo, bitandukanye n’iri ryari rimaze imyaka ibarirwa muri ine rikoreshwa.

Nsengimana yakomeje agira ati: "Irimbi rishya riri hafi gutangira gukoreshwa riherereye mu Kagari kamwe n’iryo rindi ryari risanzwe. Byibura ryo ahi riri ni ahantu hatarangaza abinjira mu Mujyi. Hari umuhanda mwiza ugerayo watunganyijwe mu buryo butazagorana kuwugendamo, kandi na rwiyemezamirimo ubishinzwe arimo gukora indi mirimo isigaye nko kuhashyira amahema abantu bashobora kuzajya bugamamo imvura cyangwa izuba ndetse no kuhubaka ubwiherero".

Irimbi riri mu nzira yo guhagarikwa ryari rimaze gushyingurwamo ku kigero kingana na 1/3 kuva ryatangira gukoreshwa mu mwaka wa 2020.

Ryatangiye gukoreshwa nyuma y’aho irindi ryari risanzwe ahitwa muri Bukinanyana mu Murenge wa Cyuve ryari ryamaze kuzura.

Nirimara guhagarikwa ubutaka butari bwagakoreshejwe, Akarere ka Musanze gateganya kuzahita kabuteraho ibiti, cyane ko ari no mu musozi wateraga benshi impungenge z’uko igihe kimwe ushobora kuzariduka bitewe n’uko nta biti bifata ubutaka byari bihari.

Guhera Tariki 5 Ukuboza 2024, iryo rimbi rizaba ryahagaritswe hatangire gukoreshwa iryo rindi rishya riherereye mu Mudugudu wa Mata Akagari ka Kabirizi mu Murenge wa Gacaca nk’uko itangazo ryashyizweho umukono n’Umuyobozi w’Akarere ka Musanze ribigaragaza.

Iyo mvura n’umuyaga mwinshi, byibasiye Akagari ka Bikara mu Murenge wa Nkotsi, yagurukanye ibisenge by’inzu eshanu, yangiza imyaka yari ihinze mu mirima y’abaturage, harimo ibigori byari bihinze kuri site iri ku buso bwa Hegitari 30, insina z’urutoki, ibishyimbo, inavuna ibiti birimo n’ibyimbuto za avoka, bishyira benshi mu gihombo.

Umunyamabanga Nshingwabikorwa w’Umurenge wa Nkotsi Herman Micomyiza, yavuze ko mu nzu zangiritse, hafi ya zose zitari ziziritse ibisenge, bikaba biri mu bikekwa gutiza umurindi uwo muyaga wari ufite imbaraga.

Ati: “Ibisenge byagiye biguruka, bigaragara ko bitari biziritse. Ubwo rero n’ubwo kubisubizaho bishoboka, birasaba ko hazitabwa ku kuzirika cyane ibisenge byazo, kugira ngo no mu gihe umuyaga wakongera kugaruka, utazongera ukazisenya”.

“Ku ruhande rw’insina zavunaguwe n’umuyaga zo n’izagwiriranye, bigaragara ko nta rindi garuriro ry’umusaruro wazo twakwitega, ni ugutegereza izindi zizamera bundi bushya. Keretse wenda izavunitse zari zeze ibitoki, ba nyirazo bagiye babikuraho, baba aribyo baramura. Naho ku bigori ho ibyinshi byagiye bigwirirana, twakanguriye abaturage kureba uko batangira kubyegura no kubiseguza ibiti kugira n’ubundi turebe ko byazanzamuka ntibagwe mu bihombo bya burundu”.

Ntiharamenyekana agaciro k’ibyangijwe n’iyo mvura kuko ubwo Gitifu yatangaza ibi, bari bakigakusanya.

Gitifu Micomyiza, yakanguriye abaturage kujya bitwararika ibihe by’imvura nyinshi bibanda ku myubakire yujuje ibisabwa harimo no kuzirika ibisenge by’inzu.

Nanone kandi ngo ni ngombwa kujya birinda imihingire y’akajagari, ahubwo bakajya bitabira guhinga bagendeye ku nama bagirwa n’abafite ubumenyi mu by’ubuhinzi, ndetse igihe cyose habaye ibiza nk’ibi bagahuriza hamwe amaboko mu gusubiranya ibyangijwe na byo, kuko n’ubundi iyo byateye ntawe birobanura.

Imvura nk’iyi ariko noneho yo ivanze n’urubura, yanaguye mu Tugari tumwe na tumwe two mu Murenge wa Nyange, maze urwo rubura rwangije ibihingwa byiganjemo ibigori n’ibishyimbo.

Ababyeyi beretswe ingero z’uburyo bwo gutegurira abana indyo yuzuye no kuyibagaburira

Mu ngo mbonezamikurire 37 zabarwaga nk’iziri ku rutonde rw’izibarizwa mu Murenge wa Gataraga honyine, izigera kuri 20 ni zo zikora, mu gihe izindi zafunze imiryango; aho ubu abana bakabaye bazibarizwamo birirwana n’ababyeyi babo.

Mu mpamvu ababyeyi bagarukaho zituma badashyira imbaraga muri iyo gahunda, barimo n’abagaragaza ko bagorwa n’ubushobozi bukiri hasi mu kubona amikoro yo kubonera abana babo bimwe mu by’ibanze bakenera ngo bayigemo.

Zaninka Clementine agira ati: “Tugorwa no kubona ibiraka, twanagira ibyo turonka ugasanga amafaranga ari hagati ya 1000 cyangwa 1500 umuntu akorera aba adahagije. Ubu umwambaro w’ishuri w’umwana uba uhagaze mu mafaranga ibihumbi bigera mu icumi. Iyo bihuriranye n’uko mu rugo hakenewe ibyo kurya wanabisanisha n’uburyo na byo ubwabyo bisigaye bihenda, tubona bitavamo tugahitamo kureka kubajyana mu marerero”.

“Hari nk’ubwo nk’ukuntu umubyeyi arundarunda udufaranga ducyeya akaba yaguriramo umwana imyambaro y’ishuri ya macye, yayigana ikamusaziraho atayimaranye kabiri. Haba ubwo rero nk’uwo mubyeyi arebye ukuntu abandi bana bigana utwenda n’udukweto twiza, akumva ugize isoni n’ipfunwe byo kumujyanayo, agahitamo kumureka ntarimujyanemo”.

Ku rundi ruhande abafite abana bitabwaho binyuze mu ngo mbonezamikurire n’amarero, basanga hari inyungu nyinshi zitagaragarira gusa ku bana ahubwo n’ababyeyi ubwabo.

Muteteri Marie Claire, agira ati: “Mbere twirirwanaga abana mu mirima cyangwa tukabakingirana mu nzu kuko tutabaga dufite aho tubasiga. Ubu rero abana ntibakirirwa bandagaye mu mihanda, kuko ubu baba bari kwitabwaho mu rugo mbonezamikurire, aho bahabwa amata n’igikoma, kandi natwe ubwacu nk’ababyeyi babo byagiye bidukura mu bujiji kubera ko twigiyeho no gufata abana neza.

Mu Karere ka Musanze Umurenge wa Gataraga ni wo uza inyuma y’indi Mirenge mu bwitabire bw’abana mu ngo mbonezamikurire y’abana bato. Mu busesenguzi bwakozwe n’inzego z’ubuyobozi bwasanze imwe mu mpamvu nyamukuru y’ubwo bwitabire bucye, ari uko hari bamwe mu babyeyi babaga biteze inyungu z’amafaranga, nyuma bagenda bacika inege kugeza ubwo hari n’izagiye zifunga imiryango.

Emmanuel Ntacyumpenze, Umukozi w’Akarere ka Musanze ushinzwe gahunda mbonezamikurire y’abana bato, agira ati: “Bamwe mu babyeyi bari baremeye ko ingo zabo zigirwa Ingo mbonezamikurire y’abana bato barimo abagiye babyumva nabi, noneho bakumva ko icyo gikorwa bakoze, Leta yajya ibagenerwa amafaranga. Ubu rero icyo turimo gukangurira ababyeyi guhindura iyo myumvire no kubabwira yuko uruhare rwabo muri bwa burere bwabo, rugomba kugaragara, ku buryo n’iyo na Leta yagira icyo ikora, bisanga n’ababyeyi barayigize iyabo”.

Mu kurushaho kwegera abaturage no kubashishikariza uruhare rwabo mu kwitabira gahunda y’ingo mbonezamikurire n’amarerero, guhera ku wa kabiri tariki 12 Ugushyingo 2024, muri uyu Murenge wa Gataraga ikibazo cyahagurukije Inzego zitandukanye zikorera muri aka Karere, aho zigiye kumara icyumweru zikangurira imiryango kwitabira ibikorwa na gahunda zose zigamije kurengera ubuzima bw’umwana.

Abaturage bo mu Murenge wa Gataraga basabwe guhindura imyumvire bakitabira gahunda y’ingo mbonezamikurire y’abana bato

Ntirenganya Gerome wari uhagarariye Ubuyobozi bw’Intara y’Amajyaruguru muri iki gikorwa, akaba ari n’Umukozi w’iyi Ntara Ushinzwe Imiyoborere n’Imibereho myiza y’abaturahe, yagaragaje ko imwe mu nzira yo gukemura bimwe mu bibazo akarere kagihanganye nabyo, harimo no gukumira imirire mibi no kurwanya igwingira, ngo kandi ibyo ntibyagerwaho abana batitabiriye kujyano mu ngo mbonezamikurire, nk’ahantu babonera bimwe mu by’ibanze mu kuyikumira.

Ati: “Muri manda ishize, twagombaga kurwanya igwingira ku kigero cya 19%, ariko uwo muhigo ntitwabashije kuwugeraho kuko twasoje umwaka tukiri ku kigero cya 21,3%. Muri iyi myaka itanu iri imbere dufite intego yo kugera kuri 15% kandi ubuyobozi ntibwabigeraho budafatanyije n’abaturage. Ubwo bufatanye rero, bujyana no kwitabira kujyana abana mu ngo mbonezamikurire y’abana bato”.

Mu Karere ka Musanze habarirwa Ingo Mbonezamikurire y’abana bato 799 zibarizwamo abana basaga 42,236.

Bahisemo guhagarika imirimo yo kubaka ubwo bwiherero rusange nyuma yo gukora ntibishyurwe

Mu gihe bubakaga ubwo bwiherero rusange, bari barijejwe kuzajya bahembwa buri uko iminsi 15 ishize (Kenzeni); gusa baje gutungurwa n’uko inyandiko bagiye basinyishwa zemezaga ko amafaranga bari barakoreye bayahawe, batahise bayishyurwa nk’uko babyizezwaga ubwo bazisinyishwaga.

Umwe muri bo agira ati: “Turi mu mazi abira nyuma y’uko twagiye dukorera amafaranga ntibaduhembe, none ba nyiri inzu dukodesha bamwe bakaba baratangiye kuzidusohoramo bitewe n’uko tubishyura nabi”.

“Nk’ubu njye bandimo kenzeni ebyiri zihinganye n’ibihumbi bibarirwa mu 150 bagombaga kumpemba nkabasha kwishyura inzu nkodesha no guhahira abana. Nyiri inzu kubera kutamwishyurira igihe twumvikanye, yansabye kumuvira mu nzu nkajya gukodesha ahandi.

Ubu ndibaza uko nzayivamo n’aho nzerekeza ntafite amafaranga y’ubwishyu narayobewe”.
Undi agira ati: “Baraje badusinyisha impapuro zanditseho ko twishyuwe amafaranga twakoreye, tukimara kuzisinya bazijyana batwizeza ko mu masaha macye akurikiraho baduhembera ku matelefoni. Tubabazwa n’uko ibyo byahereye mu magambo gusa kugeza na n’iyi saha tukaba tukibirukankaho batatwishyura. Ikibazo twanakigejeje ku Murenge, babubwira ko amafaranga ari mu nzira zo kuboneka, ariko na n’ubu ntacyo byatanze”.

Ngo bagerageza inshuro nyinshi kwegera ababakoresheje ndetse bakanabahamagara ku ma telefoni, bababaza aho amafaranga yabo ageze, bakabasubiza babizeza gukemura ikibazo byihuse, ariko ntibigire icyo bikorwaho.

Ngo iby’uko aba baturage baba barasinyishijwe inyandiko zemeza ko bishyuwe nyamara batarishyuwe, uyu mu rwiyemezamirimo wabubakishaga agira ati: “Ibyo abo bakozi bavugako basinyiye amafaranga mbere yo guhembwa ntabwo ari ukuri, ahubwo basinyiye amafaranga bazahembwa kuko bahemberwa kuri telephone. Kandi twarabasobanuriye bihagije nk’uko n’iyo lisiti ibisobanura, ko buri wese yuzuzamo amazina ye, indangamuntu, Telefone azahemberwaho amafaranga azahembwa n’umukono wemezako nyiri ubwite abyemera”.

“Ikibazo wenda cyaba cyarabayeho, ni uko amafaranga yatinze kuboneka. Turimo gukora uko dushoboye kugirango aboneke, ku buryo nko mu cyumweru kimwe bazaba bayahawe.
Umuyobozi w’Akarere ka Musanze wungirije ushinzwe iterambere ry’Ubukungu Uwanyirigira Clarisse, yizeza abo baturage ko ikibazo bagiye kugikurikirana byihuse.

Ati: “Ntabwo twakwifuza ko rwiyemezamirimo akoresha abaturage ntabishyure. Tugiye gushyira ingufu mu kubikurikirana dusesengurire hamwe imbogamizi zabayeho tuzazishakire umuti urambye”.

Imirimo yo kubaka ubwo bwiherero rusange, abo baturage bamaze iminsi barayihagaritse itarangiye, mu kwerekana akababaro kabo.

Kugeza ubu ababarirwa muri 40, bagiye bahakora basimburana ariko ntibahembwe, ni bo bahuriye kuri iki kibazo. Icyakora ntihamenyekanye umubare w’amafaranga bishyuza bose hamwe, kuko rwiyemezamirimo wabakurikiranaga umunsi ku munsi akanabakoresha atayigaragaje.

Ubunyamwuga n’umurava biranga Ingabo z’u Rwanda aho zibungabunga amahoro bishimwa na benshi

Abasirikari n’Abapolisi b’u Rwanda boherezwa mu butumwa, bwaba ubw’Umuryango w’Abibumbye(ONU) ndetse n’ubw’Umuryango wa Afurika Yunze Ubumbwe (AU), mu bihugu birimo nka Repubulika ya Santarafurika, Mozambique, Sudani y’Amajyepfo, Sudani n’ahandi; ibyo bahakorera byarenze urwego rwo kuba ari ibyibanda ku kugarura umutekano n’ituze ku baturage b’ibyo bihugu, bigera no ku rwego rw’ibikorwa by’ubufatanye binyuze mu muganda, ubuvuzi, uburezi, gusana no kubaka ibikorwa remezo n’ibindi bizamura imibereho myiza y’abaturage.

Bubatse ibigo n’ibyumba by’amashuri byazamuye ireme ry’uburezi

Iterambere ry’uburezi binyuze mu kubaka ibigo by’amashuri, gutanga ibikoresho by’ishuri ku bana b’abanyeshuri, biri mu byo Ingabo z’u Rwanda zitayeho mu bihugu zikoreramo ubutumwa bwo kubungabunga amahoro.

Urugero nk’Igihugu cya Sudani cyashegeshwe n’umutekano mucye wahagaragaye kuva mu mwaka wa 2003, bitewe n’Abarwanyi b’inyeshyamba z’aba Janjaweed, mu bitero bagaba bya hato na hato, byagiye byibasira abaturage batari Abarabu, aho izo mvururu kugeza ubu zimaze guhitana ubuzima bw’abasaga ibihumbi 300, ndetse abandi basaga Miliyoni imwe bakuwe mu byabo.

Ingabo z’u Rwanda zoherejwe mu bikorwa byo kugarurayo amahoro, zongeyeho n’ibindi bikorwa birimo nko kubaka ibyumba by’amashuri mu bice bitandukanye by’Intara ya Darfur, harimo nk’ibigera ku 10 byubatswe mu nkambi y’abaturage bakuwe mu byabo ya Abushouk mu Karere ka El Fasher, ibyumba bine byubatswe ahitwa Kabkabiya, bine byubatswe ahitwa Saraf Umra n’ahandi.

Mu handi hagaragara ibikorwa bishimangira akamaro k’uburezi butejwe imbere bigizwemo uruhare n’Ingabo z’u Rwanda, ni mu bice bimwe na bimwe byo mu gihugu cya Sudani y’Epfo, harimo nk’ahitwa Kapuri, ahubatswe Ikigo cy’amashuri abanza mu mwaka wa 2015, kikaba gifite ubushobozi bwo kwigwamo n’abana basaga 500 bo mu mashuri y’incuke hamwe n’abanza.

Ibyo ntibyagarukiye aho, kuko na nyuma yaho, hakomeje ibikorwa bitandukanye by’umuganda ugenda ukorwa, ukibanda ku kubungabunga inyubako z’ikigo no kunoza isuku, ari nako haterwa ibiti by’imbuto ziribwa.

Hirya no hino aho Ingabo ziri mu bikorwa byo kugarura amahoro, zinatanga ibikoresho by’ishuri birimo amakayi ku banyeshuri, ibitabo, ibikapu, ibikoresho byifashishwa mu kunoza isuku y’abakobwa (Cotex) ndetse n’ibyifashishwa mu kwidagadura mu mikino itandukanye, cyane cyane nk’umupira w’amaguru na Volleyball.

Ubuvuzi:

Ubuvuzi bushingiye ku gusuzuma indwara, kuzivura, kuzikingira no kuzitangaho ubujyanama bwo kuzikumira, biri mu byo Ingabo z’u Rwanda zibandaho mu bikorwa byo kubungabunga amahoro, dore ko no muri ibyo bihugu, kubera intambara n’imvururu ziberayo, biba biri mu byashegeshwe cyane.

Mu nkambi ya Malakal, imwe mu zibarizwa muri Sudani y’Epfo ikaba inatuwe n’umubare munini w’Impunzi dore ko zibarirwa mu bihumbi 50, Ingabo z’u Rwanda ziheruka kuhatanga ubufasha mu by’ubuvuzi, ibyishimiwe cyane n’abaturage bagaragaje ko hirya y’umutekano izi ngabo zibabungabungiye, hiyongeraho kubavura indwara, bikaba biri mu by’ingenzi baba bakeneye.

Mu kubungabunga ubuzima bw’abaturage, zinabaha ubuvuzi

Mu kwezi k’Ukwakira 2024, mu gikorwa cyabereye muri iyo nkambi, cyo kuvura abaturage, barimo abasuzumwe indwara nka Malariya, Virusi itera SIDA, indwara z’amaso ndetse banahabwa ubujyanama bwo kuzikumira hamwe n’izindi ndwara zitandukanye.

Muri ako gace kimwe n’ahandi muri icyo gihugu, serivisi z’ubuvuzi byakunze kugorana kuzibonera hafi, bitewe n’intambara zagiye zishegesha amavuriro n’amaguriro y’imiti; ndetse mu rwego rwo gukemura izo mbogamizi, Ingabo z’u Rwanda ziteganya kubaka ivuriro muri ako gace mu minsi ya vuba.

Kimwe n’abaturage bo muri iyo nkambi, abo mu gace kitwa Amadi, kari mu mujyi wa Juba bishimiye ibikorwa Ingabo z’u Rwanda zidasiba kubagezaho, birimo nko kubaha amazi meza.

Umuvugizi wungirije w’Ingabo z’u Rwanda, Lt Col Simon Kabera, yavuze ko kwita ku buzima n’isuku y’abo zibungabungiye umutekano, biri mu nshingano Ingabo zishyize imbere.

Ati: “Gutanga ubutabazi nk’ubu, biri mu nshingano duhabwa n’Itegeko rigenga Ingabo z’u Rwanda, ziyongera ku zo gucunga umutekano w’Igihugu no kurinda ubusugire bwacyo dufite mu by’ibanze”.

“RDF ishyize imbere ubumuntu, busesengura ibyifuzo byihutirwa ku bantu nk’aba no kwihutira gushaka ahava ubushobozi bwo kugira uko tubikemura. Mu bibazo izi mpunzi ziba zifite birimo n’uburwayi zikomora ku buzima bugoye baba baranyuzemo kandi nk’intego dufite harimo ko aho bishoboka tubaha ubuvuzi”.

Abana b’abakobwa bahabwa ibikoresho bibafasha kunoza isuku

Lt Col Kabera yanongeyeho ko kuva muri 2014 ubwo Ingabo z’u Rwanda zageraga muri Sudani y’Epfo, ibikorwa byaziranze bishingiye ku masezerano zifitanye na Loni mu butumwa bw’amahoro.

Ubutumwa bwo kubungabunga amahoro bubera mu gihugu cya Sudani y’Epfo, kugeza na n’ubu u Rwanda rukigiramo uruhare, buri mu butumwa bufatwa nk’ubunini ku Isi, kuko bwihariye Ingabo zisaga ibihumbi 13 mu bice bitandukanye byacyo, ndetse u Rwanda nk’uko Lt Gen. Mohan Subramanan uyoboye ubwo butumwa yabikomojeho mu kwezi k’Ukwakira 2024, ubwo yagarukaga ku musanzu w’Ingabo z’u Rwanda muri ubwo butumwa, yagize ati: “Ingabo z’ u Rwanda tuzifata nk’urutirigongo rw’ubu butumwa, kuko inyinshi mu Ngabo n’Abapolisi muri UNMISS, ni Abanyarwanda barimo abarwanira ku butaka mu duce turimo i Juba na Malakal”.

“Aho zikorera ubutumwa ni mu duce tugoranye harimo nko muri Leta ya Upper Nile mu Majyaruguru. Habera imvururu kenshi kandi hakaba Inkambi irimo impunzi nyinshi, zirenga ibihumbi 42 zicungiye umutekano”.

U Rwanda ni cyo gihugu gitanga Ingabo nyinshi mu bikorwa bya Loni byo kubungabunga amahoro muri Sudani y’Epfo, kuko n’ubu zihafite izisaga 2500, rukahagira n’abapolisi basaga 400.

Kugeza ubu Ingabo z’u Rwanda usibye ibikorwa byo kurinda abaturage, zimaze kugira uruhare mu bikorwa 84 byo gutera ibiti, ibikorwa 54 by’ubuvuzi, n’ibikorwa 39 byo kugeza amazi meza ku baturage, guha abanyeshuri ibikoresho by’ishuri, gutanga rondereza, kurwanya imirire mibi, guteza imbere imikino, gutanga ubumenyi burimo n’ubwo kwigisha abo mu cyiciro cy’abagore imyitozo ibaha ubumenyi bwo kwirwanaho, Umuganda, kubaka imihanda, kwita ku isuku no gufatanya n’abaturage bo mu bihugu bitandukanye mu gusesengura ahari ibibazo bibugarije n’uburyo byakemuka.

Kugarura umutekano no gusigasira amahoro:

Mu bihugu byagiye birangwamo imvururu n’umutekano mucye, Ingabo ndetse na Polisi by’u Rwanda byoherejwemo kuzihosha, ahenshi abaturage ndetse n’inzego zaho z’ubuyobozi, bakunze guzigaragaza nk’izabagaruriye icyizere cy’ubuzima bari baratakaje kubera umutekano mucye.

Mu kwibukiranya gato ku mateka y’Igihugu cya Mozambique, kigizwe n’Intara 11, iyakunze kugarukwaho cyane muri iyi minsi, kubera kurangwamo umutekano mucye, ni Intara ya Cabo Delgado, iherereye mu Majyaruguru ashyira Uburasirazuba bw’icyo gihugu.

Iyi Ntara ikora ku gihugu cya Tanzaniya, ituwe n’abasaga miliyoni ebyiri, biganjemo abari barakuwe mu byabo, kubera intambara za hato na hato, zikomoka ahanini ku mitwe y’iterabwoba, yashakaga kuhashinga Leta ya Kiyisilamu.

Abana b’abanyeshuri bashyikirizwa ibikoresho by’ishuri

Ni imyitwarire ifitanye isano n’amateka y’ahagana mu 1990 ubwo Leta y’iki gihugu yoherezaga urubyiruko rwinshi kwiga mu bihugu byiganjemo iby’Abarabu birimo Arabia Sawudite, Misiri, Algeria, Somaliya na Sudani; rwaje gusoza ayo masomo rugatahukana amatwara mashya atandukanye n’ayo rwari rusanganywe rutarajya kwiga muri ibyo bihugu.

Ayo matwara yaje kubyara ibibazo hagati yabo n’abanyagihugu bari bahasanzwe, byaje no kuvamo ko urwo rubyiruko rushinga Umuryango rwise Ansar Al Sunnah, mu gace kitwa Mocimboa da Praia, wagenderaga mu kwaha k’Umunyakenya Abdoul Rogo Mohammed, wamenyekanye cyane ku bitero by’iterabwoba byigeze kwibasira Ambasade za Leta Zunze Ubumwe za Amerika mu bihugu birimo icya Kenya ndetse na Tanzaniya mu 1998.

Ubwo uwo Abdoul Rogo Mohammed yamaraga kwicwa mu 2012, abenshi muri abo bayoboke be, baje kuva mu Majyepfo ya Tanzaniya berekeza muri Mozambique i Cabo Delgado, biyunga na Ansar Al Sunnah; bagera no ku rwego rwo kwiyita abagendera ku mahame akaze y’Intumwa y’Imana Mohammed.

Izo nyigisho batangiye kuzibiba mu bandi baturage, bikurura ibibazo hagati yabo n’abanyagihugu bari basanzwe, uko iminsi ishira bikibasira na Leta.

Muri ako gace, Ansar Al Sunnah, yaje no gushyiraho itegeko ngenderwaho rya Kiyislam ryo kubahiriza Sharia, inatangaza ku mugaragaro ko idafite aho ihuriye n’ibikorwa bya Leta birimo nko kwishyura imisoro, bashishikariza abaturage kutitabira amatora, baburizamo serivisi z’ubuvuzi, uburezi n’izindi, byanavuyemo ko abana b’abakobwa, batangiye kubuzwa kujya mu ishuri, ndetse ibyo byihebe ntibyasiba kugaragaza ko byitegura gukuraho Leta yariho bikishyiriraho ubutegetsi bugendera kuri Sharia.

Uko niko i Cabo Delgado mu myaka ya za 2015, hatangiye kugaragara umutwe ugendera ku mahame akaze ya kiyisilamu unitwara kinyeshyamba watangiye kugaragaza umwihariko yaba mu myitwarire aho abawugize bagiraga inzu zabo zihariye basengeramo, gukumira ubucuruzi bw’inzoga, bategeka abagore kujya bambara imyenda ihisha mu maso ntibemererwe no kujya ahagaragara kenshi.

Uko iyo migenzereze yagendaga ikura, ni nako ubwigomeke bwa Ansar Al Sunnah ku butegetsi bwarushagaho kwiyongera, ahenshi abambari bawo bakanagaragara bitwaje imbunda, bigera ubwo n’abaturage batangira kubita Al Shabab, biturutse ku myitwarire babonaga idafite aho itandukanye n’iy’ibyihebe, byari byarayogoje bimwe mu bihugu byiganjemo ibyo ku mugabane wa Aziya.

Mu mwaka wa 2017, abitwaje intwaro bo muri uwo mutwe wa Ansar Al Sunnah (abaturage bari barise Al Shabab), biraye muri sitasiyo ya Polisi, bicamo abapolisi 12 ndetse bahiba intwaro zabo, nyuma yo kurasana na bo bamwe muri abo barwanyi baje gufatwa.

Gusa ibi byabaye nk’ibikojeje agati mu jisho rya bagenzi babo, barushaho kongera ibitero hirya no hino byakoranwaga ubugome bw’indengakamere.

Muri 2018, uturere tune tw’iyo Ntara twaje kwigarurirwa n’ibyo byihebe bya Al Shabab, ari nako uwo mutwe ugenda wongera abandi barwanyi bashya, barimo n’abaturukaga mu bindi bihugu nka DRC, Tanzaniya, Kenya; ibyo bisa n’ibiwutije umurindi mu guhangana na Leta, aho wakomeje kugenda utega ibico bya hato na hato ndetse igihe kimwe wibasiye ibirindiro by’ingabo z’igihugu i Mocimboa da Praia, mu gitero bashimutiyemo intwaro nyinshi.

Muri 2019 Leta yagerageje gusubiza inyuma ibitero by’ibyihebe, ariko biba iby’ubusa birayiganza, ndetse ahenshi bagafata abaturage b’abasivili bakabaca imitwe mu ruhame, igikorwa cyishimiwe mu buryo bukomeye n’Umutwe Mpuzamahanga w’Iterabwoba ISIS wanabihereyeho utangaza ko Al Shabab ari Ingabo z’Intumwa Mohammad.

Mu bikorwa Ingabo z’u Rwanda zigiramo uruhare harimo no kwegereza abaturage amazi meza

Leta muri icyo gihe, byasaga n’aho itari yagahaye uburemere ibikorwa by’uwo mutwe byareberwaga mu ndorerwamu y’agatsiko kadakanganye, kitwara nk’amabandi, ku bwayo, ikaba yarakabonaga nk’akadafite imbaraga zakwisukira iz’ingabo z’Igihugu.

Ibi ariko kuri bamwe babibonaga nk’uburyo bwo guhisha amahanga intege nke za Leta ya Mozambique, ariko ntibyayibuza kugirana amasezerano n’abari barimo abancanshuro b’Abarusiya bitwa Wagner Group ndetse n’abo muri Afurika y’Epfo DAG, na bo bagerageje guhangana n’ibyo byihebe ariko bikananirana.

Ibyo byaje kuvamo ukwemera byeruye kwa Perezida Filippe Nyusi, ko igihugu cye cyugarijwe n’ibikorwa by’umutwe w’iterabwoba wa Al Shabab, dore ko gukura kwawo kwagiye kuvamo ko ugera no ku rwego rwo kugira ibirindiro mu Majyepfo, Amajyaruguru no hagati mu gihugu, bihafite intwaro zikomeye n’abarwanyi basaga 2,500.

Abo kandi bari baramaze kwiyubaka mu buryo bw’ubutasi n’imikoranire hagati yabo na bamwe mu bari bagize igisirikari cy’Igihugu no mu baturage ubwabo; ibyo bikorwa byose bikaba byari bimaze gutikiriramo ubuzima bw’abasaga ibihumbi bitatu, abandi babarirwa mu bihumbi umunani bo barakuwe mu byabo.

Uko ibyo byabaga, Leta ya Nyusi yashyirwagaho igitutu n’ibihugu bituranyi bye birimo nka Tanzaniya, ndetse n’amwe mu makampani akomeye harimo nk’iy’Abafaransa yakoreraga ibikorwa bikomeye imbere muri Mozambique bijyanye n’ubucukuzi bwa Gaz, yagaragaje ko hakwiye kugira igikorwa mu kurushaho gukaza umutekano no kurinda ko ibikorwa by’ingenzi bikomeza guhungabanywa.

Ibyo ntibyatinze kugaragara kuko nko muri 2020 Al Shabab yambuye Ingabo za Leta agace ka Mocimboa da Praia, bikurikirwa n’igitero simusiga yagabye mu mujyi wa Palma muri 2021 cyazambije byinshi ndetse bigashyira n’igitutu kuri Perezida Nyusi.

Ibi byaje kuvamo ko atumiza inama idasanzwe y’ibihugu bigize Umuryango w’Ubukungu w’Ibihugu bya Afurika y’Amajyepfo yari abereye n’umuyobozi muri icyo gihe, ivamo ko hagomba koherezwa impuguke i Maputo zagombaga kwiga neza imigendekere y’urugamba rwo guhangana n’ibyo byihebe.

Uko kwiyemeza ariko byakunze kuvugwa ko kwagiye kugenda gacye, biturutse ku kuba Nyusi na we ubwe atari yakiyumvishije ko imikoranire y’izo ngabo n’igisirikari cya Leta ye, hari umusaruro bishobora gutanga.

Perezida Kagame na mugenzi we Nyusi basuye ingabo z’u Rwanda muri Mozambique bari mu mpuzankano za gisirikare

Muri uwo mwaka wa 2021, ni nabwo yagiriye uruzinduko i Kigali mu biganiro byamuhuje na mugenzi we w’u Rwanda, Paul Kagame, byibanze ku kureba uburyo ubunararibonye bw’u Rwanda mu gukumira ibikorwa by’iterabwoba, bwakwiyambazwa mu guhashya abo barwanyi bari barayogoje icyo gihugu.

Agisubira mu gihugu cye, yagize ati: “Iyi ntambara turimo iterwa n’ibintu byinshi kandi ihatse inyungu nyinshi ziyihishe inyuma. Mu byo twaganiriye n’umuvandimwe wacu Paul Kagame, harimo no kuba twiteguye kwakirana yombi ubufasha ubwo ari bwo bwose azatugenera”.

Nyuma y’amezi atatu ibyo bibaye, muri Nyakanga 2021, hasohotse itangazo rivuga ko urugendo rwo kohereza Abasirikari n’Abapolisi b’u Rwanda i Cabo Delgado bisabwe na Mozambique ruri hafi gutangira, ndetse ubwo zahageraga, zigira uruhare rukomeye mu kugaruza imijyi nka Mocimboa da Praia na Palma yari yarahindutse indiri y’ibyihebe.

Ahongaho byabaye ngombwa ko ingabo z’u Rwanda zigabamo ibice birimo icyanyuze mu Majyaruguru ya Palma ahazwi nko ku cyambu cya Afungi kiriho n’ikibuga cy’indege, gikomereza ahitwa Quitunda-quelimane-Maputo,…, habaho no guhura n’abanyuze muri Mueda, mu mirwano ikomeye yahanganishije ibyo byihebe n’ingabo z’u Rwanda, mu mashyamba yaho y’inzitane, zibona kubohora uwo mujyi wari umaze imyaka ibiri mu maboko ya Al Shabab.

Ibyo byihebe byakomeje kwirukankanwa mu duce turimo utwa Mbeu mu Majyepfo y’iyo Ntara n’ahitwa Siri ya 1 na Siri ya 2, byari byarahungiye ndetse n’ahacukurwaga Gaz i Cabo Delgado.

Icyo gihe Nyusi yagize ati: “Ingabo z’Igihugu cyacu (Mozambique) zibifashijweno n’iz’u Rwanda zimaze kwigarurira ibice hafi ya byose byari mu maboko y’ibyihebe mu Ntara ya Cabo Delgado”.

Uko ingabo z’u Rwanda zasurwaga n’abayobozi mu duce zarimo ku rugamba muri Mozambique, yaba ku ruhande rwa Leta ya Nyusi ndetse na Leta ya Kagame, ntibasibye kugaruka ku gaciro baha u Rwanda ku kuba rwaremeye guhara abana barwo bakajya guhashya ibyo byihebe muri Mozambique, ndetse Perezida Nyusi ubwe yivugiye ko ari “Igihango kidashobora kwibagirana”.

Ni mu gihe Kagame we yagaragaje ko ingabo “zifite inshingano zo gukomeza kurinda ibyagezweho”.

Kugeza ubu iyo Ntara yongeye kuba nyabagendwa, ibikorwa byari byarahagaze byongera gukora, ubuzima busubira uko bwari bumeze, ibikorwa remezo nk’amazi meza n’amashanyarazi byari byarangijwe byongera gukora, aho abaturage babihereyeho bashima Ingabo na Polisi by’u Rwanda, uburyo bakoresheje ubunyamwuga n’ubwitange bakongera kubagarurira ubuzima n’icyizere bari baratakaje cy’imibereho.

Ntabwo ari muri Mozambique zagaragaje ubudasa mu kugarura amahoro no kuyabungabunga honyine gusa kuko mu gihugu cya Santarafurika bazirahira agahenge bazikesha.

Ubutumwa bwo kubungabunga amahoro zoherejwemo muri iki gihugu, nyuma y’amasezerano ahuriweho n’ibihugu byombi, yo gucunga umutekano mu murwa mukuru Bangui no guhangana n’inyeshyamba zari zarayogoje umutekano w’iki gihugu, ibikorwa byari byarakuye abaturage mu byabo.

Ingabo z’u Rwanda zigaragara mu busabane n’abaturage binyuze mu mikino

Ibyo bikorwa, Ingabo z’u Rwanda zishimirwa ko byatanze umusaruro mu buryo bwihuse, kuko kuva zahagera, zabashije gukumira izo nyeshyamba zakoreraga mu kwaha k’uwigeze kuyobora icyo gihugu François Bozizé wari wangiwe kwiyamamaza.

Izo nyeshyamba zari zarishyize hamwe na zimwe mu zibarizwa muri icyo gihugu, zari zigize icyiswe Coalition des Patriotes pour le Changement (CPC), zihurije mu bikorwa bigamije guhungabanya umutekano, zigenda zifata ibice bitandkanye by’igihugu n’ubwo n’ubundi hari hasanzwe izindi ngabo za MINUSCA.

Ubwo yari mu kiganiro n’abanyamakuru cyabereye i Kigali mu mwaka wa 2021, mu ruzinduko rw’iminsi ine yari yagiriye mu Rwanda, Perezida w’iki gihugu Faustin-Archage Touadéra, yagaragaje ko uruhare rw’ingabo z’u Rwanda mu kugarura amahoro muri iki gihugu rwatanze umusaruro ufatika.

Ati: “Twitabaje Perezida Kagame, Leta n’Abanyarwanda bemera kohereza vuba ingabo, ku masezerano twagiranye ngo zidufashe kurwanya ibikorwa bya CPC”.

“Iyo hataba ukuza kw’izo ngabo zafashije izacu, nibaza ko ibintu byari kuba bitandukanye n’ibyo tubona ubu. Ibyo bikorwa by’u Rwanda bikomeje kutunyura”.

Icyo gihe kandi na Perezida w’ u Rwanda Paul Kagame yashimangiye iby’umumaro w’izi ngabo agira ati: “Kohereza ingabo ku masezerano y’ibihugu byombi cyari igisubizo cyihuse, kuko iyo hakomeza kubaho ugutegereza amategeko MINUSCA igenderaho, birashoboka ko kugerwaho kw’intego y’ubutumwa byari gutwara igihe kirekire”.

Icyo gihe yanagaragaje ko n’ubwo ingabo za MINUSCA n’iz’u Rwanda zari zihuriye ku nshingano zisa, byashobokaga cyane ko bamwe bakora akazi kabo vuba kurusha abandi.

Ati: “Iyo mitwe yari yahayogoje ku muvuduko wari hejuru, ishaka guhungabanya amatora no kwigarurira umujyi wa Bangui. Amasezerano yacu rero, yatumaga dushobora koherezayo ingabo vuba, ngo zikore akazi nk’ako UN yagombaga gukora, ariko bikagaragara ko bikorwa gacye gacye gashoboka”.

U Rwanda kandi rwakomeje gufasha Repubulika ya Santarafurika kubungabunga amahoro ndetse no kuyifasha gukora impindukana mu nzego zirimo iz’umutekano.

Ingabo z’u Rwanda zifasha abana b’abakobwa kwirinda ihohoterwa

Ingabo z’u Rwanda kandi uretse kuba zigira uruhare rukomeye mu bikorwa byo guhangana n’abagamije guhungabanya umutekano w’ibihugu zagiye zoherezwamo kugarurayo amahoro, zinafite inshingano zo kurinda inkambi zitandukanye zicumbitsemo impunzi zagiye ziva mu byazo, kurinda umutekano, zikora amarondo mu duce tw’imijyi itandukanye, no gucunga umutekano wa zimwe mu ntumwa za Loni ziba ziri mu butumwa bwo kubungabunga amahoro.

Mu bindi bihugu nka Côte d’Ivoire, Liberia na Sierra Leone, amateka ahagaragaza nk’ahantu u Rwanda rwagize uruhare rukomeye mu bikorwa byo kugarurayo amahoro ndetse no mu gihugu nka Haiti cyashegeshwe n’umutingito wacyibasiye mu mwaka wa 2010.

Uwo mutingito ufatwa nk’umwe mu yagize ubukana bukomeye, kuko wahitanye abasaga ibihumbi 300 abandi bantu ibihumbi n’ibihumbi bava mu byabo.

Abapolisi b’u Rwanda bagiye basimburanayo mu gihe cy’imyaka icyenda ubwo butumwa bwamaze, bagize uruhare mu kunoza uburinzi bw’inkambi zari zarahungiyemo abari barakuwe mu byabo, gutanga ubutabazi bw’ibanze no gucungira umutekano intumwa za ONU; ibyo byose bakabikorana ubunyamwuga n’imikorere izana ibisubizo.

Mu gihe cy’imyaka 20 Ingabo z’u Rwanda zimaze mu bikorwa byo kurinda umutekano no kubungabunga amahoro, abakurikiranira hafi ibikorwa byaziranze n’umusaruro wabivuyemo, bakunze kuzigagaza nk’abarangwa n’ubudakemwa, ukwiyubaha no kubaha abaturage no gufatanya na bo.

Inzego z’Umutekano ntizisiba buri gihe gusangira amakuru y’ahabera ibibazo by’umutekano mucye ku Isi no kwihugura mu buryo ki bwo kubikemura

Ni imikorere igendera ku mahame y’ibanze yo kurinda abasivili u Rwanda rwiyemeje, cyane ko n’amateka rwanyuzemo yo gutereranwa n’amahanga mu gihe cya Jenoside yakorewe Abatutsi mu 1994, kugera ubwo hicwa Abatutsi basaga Miliyoni imwe, byasize isomo rikomeye ku Rwanda, ryo kurinda abaturage no gusigasira uburenganzira bw’ibanze bw’ikiremwamuntu aho kiri hose, u Rwanda rwanashyize no mu Itegeko Nshinga rugenderaho.

Ubwo yari mu nama yabereye i Seoul muri Nzeri 2024, yigaga ku mbogamizi n’ibibazo by’ingutu byugarije umutekano ku Isi, no kureba uko hakongerwa ubufatanye bw’amahanga mu kubihashya, mu ijambo Minisitiri w’Ingabo z’u Rwanda Juvenal Marizamunda yagejeje ku bayitabiriye, yakomoje ku rugendo rwo kwiyubaka k’u Rwanda, n’umusanzu warwo mu gucunga umutekano mu bihugu byo hanze.

Agira ati: “Amateka yacu yatubereye isomo rikomeye ku kubaka imikoranire mu gukuraho imbogamizi. Nta gihugu cyakwishoboza guhangana n’ibibazo by’umutekano mucye cyonyine, kandi mu gihe imbaraga zihujwe imbogamizi iyo ari yo yose yavaho”.

“Urugendo rw’u Rwanda mu gutanga umusanzu mu bikorwa byo kugarura amahoro no kuyabungabunga, ni igihamya cy’uko amahoro ashoboka mu gihe icyo ari cyo cyose abantu baramuka babigize ibyabo, binyuze mu kwiyemeza, n’ubushake bwa Politiki kandi biherekejwe n’imikoranire ihamye”.

Yongeyeho ko ibikorwa byo gushyigikira amahoro u Rwanda rubigizemo uruhare bigenda byaguka, ndetse kuri ubu u Rwanda rukaba ruri ku mwanya wa kabiri ku Isi, mu bihugu bitanga Ingabo nyinshi mu butumwa bwa Loni bwo kubungabunga amahoro.

Kuva mu 1948 ubutumwa bwa Loni butangiye, ibihugu 125 bimaze gutanga ingabo zisaga Miliyoni, mu butumwa burenga 71 bwabereye mu bihugu byo ku isi. Kugeza ubu ibice bibarirwa muri 11 byugarijwe n’imvururu n’intambara byo muri Afurika, Aziya, u Burayi no mu Burasirazuba bwo hagati bikomeje gukorerwamo ubutumwa bwo kubungabunga amahoro.

Ingabo z’u Rwanda zifasha abaturage mu bikorwa by’ubuvuzi

Mu myaka isaga 20, ubunararibonye bw’u Rwanda mu kubungabunga amahoro, bwafashije mu kwitwara neza no gusohoza ubutumwa ruhabwamo inshingano

Mu butumwa bwo kubungabunga amahoro ingabo z’u Rwanda zoherezwamo, abaturage n’ubuyobozi bashima ubunyamwuga buziranga

Mu bihugu zoherezwamo kubungabunga amahoro harimo n’aho zubaka ibigo by’amashuri

Ingabo z’u Rwanda zigaragara no mu bikorwa by’umuganda

Ikarita igaragaza Imirenge igize Akarere ka Musanze

Ni amakuru yamenyekanye tariki 9 Ugushyingo 2024, nyuma y’aho umurambo w’uwo mugabo abaturage bawusanze hafi y’umuhanda mu masaha y’urukerera.

Mu makuru Kigali Today yamenye, ni uko uwo mugabo wari hamwe n’undi mugenzi we, ubwo bageraga ahitwa i Nyarubande mu Mudugudu wa Marantima, Akagari ka Rwebeya mu Murenge wa Cyuve, bahuye n’agaco k’abanyarugomo, barabakubita bikomeye, we bimuviramo gupfa mu gihe uwo mugenzi we bari kumwe, yakomeretse cyane ahita ajyanwa mu bitaro aho arimo kwitabwaho.

Ni amakuru yemejwe n’Umunyamabanga Nshingwabikorwa w’Umurenge wa Cyuve, Kalimba Kalima Augustin, wagize ati: "Mu bakekwaho kugira uruhare muri urwo rupfu harimo abamaze gufatwa. Bahise bashyikirizwa Polisi".

"Uwo muyobozi mu Mudugudu ubwo yicwaga ntabwo yari ari mu kazi. Abaturage bagendaga mu muhanda mu ma saa cyenda z’urukerera bakibona umurambo urambitse hafi y’umuhanda bihutiye gutabaza. Birakekwa ko yaba yishwe mu masaha y’ijoro, iperereza riracyakomeje".

Gitifu Kalimba yahumurije umuryango wa Ndahayo, aboneraho no gusaba abaturage kwirinda amakimbirane, n’igihe hagize ibyo batumvikanaho bakajya babimenyesha inzego zibegereye zikabakiranura.

Yanakanguriye abaturage kujya bihutira gutabara umuntu wese babonye uri mu kaga.

Abantu babiri mu bakekwaho uruhare muri urwo rugomo rwavuyemo urupfu rwa Ndahayo, bahise batabwa muri yombi ubu bakaba bari kuri Polisi, sitasiyo ya Cyuve nk’uko Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza, yabitangaje.

Basanga iyi nyubako iramutse ivuguruwe igakorerwamo ibindi byarushaho kuzana impinduka

Iyo nyubako igizwe n’ibyumba bibarirwa muri 42 byiyongeraho na salle yagombaga kujya ikorerwamo inama, iherereye mu Kagari ka Muhororo.

Bizimungu Innocent, umwe mu batuye muri ako gace, avuga ko kuva mu mwaka wa 2002 yatangira kubakwa, imbaraga zayishowemo yaba ku ruhande rw’abaturage bayikoragaho umuganda, abagiye batanga umusanzu w’amafaranga n’ubutaka, byiyongeraho akayabo k’amafaranga y’u Rwanda abarirwa muri Miliyoni 200 Leta yashoye mu kuyubaka, bababazwa n’uko byabaye impfabusa.

Yagize ati: “Ubwo yamaraga kuzura bakanayitera amarangi, twayisamiye hejuru kuko twatekerezaga ko ituzaniye amajyambere. Kuva ubwo nta gikorwa na kimwe kigeze gikorerwamo, barayikinze barigendera bikurikirwa n’uko uko imyaka yagiye ishira, yagiye isaza, bigera ubwo itangira kumeramo ibiti by’imivumu, itonda urubobi, ibihuru birayirengera hahinduka ikigunda”.

“Urebye imbaraga zahatikiriye dukora imiganda yo gutunda amatafari n’itaka byayubatse, abagiye batanga umusanzu w’amafaranga n’ubutaka byo gushyigikira imirimo yo kuyubaka, ubona ko ari igihombo gikomeye twagize nk’abaturage, cyiyongera ku kayabo k’amafaranga Leta yayishoyeho”.

Iyo nyubako yari kuba iy’icyahoze ari Akarere ka Bugarura kari gahuje ibyahoze ari amakomini harimo iya Cyabingo na Ruhondo ari yo Gakenke y’ubu, abaturage batekereza ko yakagombye gusanwa, hagakorerwamo ibindi bikorwa bakeneye hafi yabo.

Inyubako zimaze imyaka myinshi zidakorerwamo zatangiye kwangirika

Umuturage witwa Niyonzima Martin agira ati: “Bashobora kuyivugurura neza bakaba bahagira uruganda, ishuri ry’imyuga cyangwa Irerero. Ino aha ibikorwa remezo byinshi bituri kure ku buryo bidusaba gukora ingendo zivunanye tujya gushaka izo servisi aho biri. Ntibigeze banatekereza kuhagira byibura ibiro by’Akagari ngo bagakure iriya hejuru mu misozi kubatswemo. Cyangwa se ibyo byaba bidashobotse, bakareba imiryango igituye mu bihanamanga by’amanegeka igiye kuzatembanwa na byo, hakarebwa uko nibura buri umwe, bamutiza icyumba kimwe kimwe, abawugize bakabona aho bakinga umusaya”.

Umuyobozi w’Akarere ka Gakenke Wungirije ushinzwe Iterambere ry’Ubukungu, Niyonsenga Aimé François, avuga ko impinduka zagiye zibaho mu kuvanaho ibyahoze ari amakomini bihurizwa mu Turere ziri mu byatumye icyari kigenderewe mu kubaka iyo nzu kitagerwaho.

Yagize ati: “Tumaze iminsi mu mikoranire n’Ikigo RTB, turebera hamwe uko iyo nzu yazavugururwa ikazajya yigishirizwamo imyuga. Hanabayeho ko tugishyikiriza icyangombwa cy’ubutaka iyo nzu yubatsweho kugira ngo hatangire harebwe uko hagenwa imivugururire yayo ikajyanishwa n’ibigomba kuzayikorerwamo”.

Izi nyubako zari gukorerwamo n’icyahoze ari Akarere ka Bugarura

Ibijyanye n’inyubako za Leta zadindiye mu myubakire n’izagiye zuzura ariko zikaba zidakorerwamo, bikunze kumvikana hirya no hino mu gihugu.

Raporo y’Umugenzuzi Mukuru w’Imari ya Leta yasohotse muri 2022, igendeye ku bugenzuzi bwakozwe n’Urwego rw’Umuvunyi ndetse n’Ikigo cy’Igihugu Gishinzwe Guteza imbere Imiturire, icyo gihe yagaragaje ko mu nyubako Leta ifite mu gihugu hose uko zabarirwaga mu bihumbi bisaga 49, izigera mu 1000 zitakoreshwaga.

Intara y’Amajyepfo icyo gihe ni yo yari yihariye inyubako nyinshi kuko zabarirwaga muri 300, ikurikiwe n’Intara y’Uburengerazuba yari ifite 252, iy’Amajyaruguru ifite 245, iy’Iburasirazuba 180 naho Umujyi wa Kigali ukaba wari ufitemo izigera muri 60.

Urwo ruganda ruzubakwa ku buso bwa Hegitari 21 z’ubutaka buri mu cyanya cy’Inganda cy’Akarere ka Musanze

Ku buso bungana na Hegitari 21 bw’ubutaka uru ruganda rwa Sosiyete A1 Iron&Steel Rwanda Ltd ruri kubakwaho, mu cyanya cy’Inganda cy’Akarere ka Musanze giherereye mu Murenge wa Kimonyi, byitezwe ko nirumara kuzura rugatangira gukora, ku masoko y’u Rwanda n’ayo hanze yarwo hazajya haboneka ibyuma birimo fer à beton, amabati n’ibindi byuma bitandukanye byifashishwa mu bwubatsi no mu yindi mirimo itandukanye yo mu nganda.

Mu busanzwe ibyuma byifashishwa muri iyo mirimo, ngo byabonekaga bitumijwe hanze y’u Rwanda bigatwara akayabo k’amafaranga menshi, ariko ngo kuba u Rwanda rugiye kujya rubyitunganyiriza, iyi ifatwa nk’intambwe nziza mu gushyigikira iterambere ry’ishoramari nk’uko byagarutsweho n’Umunyamabanga Uhoraho muri Minisiteri y’Ubucuruzi n’Inganda Antoine Kajangwe.

Yagize ati: “Muri gahunda ya Leta y’u Rwanda y’imyaka itanu iri imbere(NST2) harimo y’uko ibikomoka ku nganda z’imbere mu Rwanda bigomba kwiyongera ari na ko byongera agaciro kagera nibura mu 10% ku bukungu bw’u Rwanda, hakabamo ko ibyoherezwa mu mahanga, byazava ku gaciro ka Miliyari 3 bikagera kuri miliyari 7 ndetse ishoramari rikava kuri Miliyari 2,2 rikagera kuri Miliyari 4,6 z’Amadorari ya Amerika; kandi ubwiyongere bw’inganda yaba mu mibare no mu rwego rw’ubushobozi bw’ibyo zitunganya, bifatwa nk’inkingi ya mwamba izatuma iyo ntego tuyigeraho”.

Antoine Kajangwe agaragaza ko ingano y’ibyuma byatumizwaga hanze izagabanuka

“Iyi nyongeragaciro y’amabuye uruganda ruzaba rukora, izafasha mu kugabanya ibyuma twatumizaga hanze y’u Rwanda no guhangana n’icyuho cyagaragaraga mu bucuruzi bwambukiranya imipaka bityo n’ishoramari mu by’inganda rirusheho gushyigikirwa”.

Mu gutangiza imirimo yo kubaka urwo ruganda, mu gikorwa cyabaye ku wa Kane tariki 7 Ugushyingo 2024, Ambasaderi w’u Buhinde mu Rwanda, Mridu Pawan Das, yagaragaje ko iyi ntambwe itewe mu kongerera agaciro amabuye y’Ubutare, igezweho biturutse mu bufatanye bwiza hagati y’u Rwanda n’Igihugu cy’u Buhinde.

Ati: “Ni igikorwa cy’ingenzi gituruka mu bufatanye n’imikoranire myiza hagati y’ibihugu byombi binyuze mu bushake no gushyira hamwe kw’Abayobozi yaba ku ruhande rwa Minisitiri w’Intebe w’Igihugu cyacu cy’u Buhinde Narendra Modi na Perezida Paul Kagame. Ukwiyemeza kwabo mu gushakira ineza ibihugu byombi no kongera imikoranire binyuze mu ishoramari ry’inganda ni wo musaruro tubona w’ibirimo gukorwa ubu”.

Ambasaderi w’Igihugu cy’u Buhinde mu Rwanda, Mridu Pawan Das, avuga ko Igihugu cye gishishikajwe no kugira uruhare mu ishoramari mu Rwanda nk’ahantu hatanga amahirwe

“Uru ruganda ruzatanga umusanzu ukomeye ku bukungu bw’u Rwanda, cyane ko u Rwanda rushyigikiye ishoramari, rukagira na politiki ihamye ndese n’umutekano usesuye, byorohereza abashoramari cyane cyane b’Abahinde gukora mu buryo bwiza kandi bisanzuye; ndetse intego yacu ni ugukomeza ubwo bufatanye no kubushyigikira bukazavamo n’ibindi bikorwa byinshi byiyongera kuri ibi”.

Mu gihe cy’umwaka imirimo yo kurwubaka izamara, byitezwe ko abaturage babarirwa mu 1000 bazaba bahakora akazi bahemberwa. Ndetse ubu bariruhutsa ubushomeri.

Gahutu Emmanuel, agira ati: “Twari mu bushomeri burenze, bwateraga bamwe ubujura bukomeye cyane, bwaba ubw’imyaka yo mu mirima n’ubwo mu mazu y’abaturage kuko batabaga bafite aho bakora ngo babone ibibabeshaho. Ariko kuba abensakazio aha twabonye akazi karebana n’ubwubatsi bw’uru ruganda, biraca burundu ibyo bikorwa ahubwo dukore twiteze imbere”.

Abaturage bahabonye akazi bibakiza ubushomeri bwari bwarabadindije

Amabuye y’Ubutare uru ruganda ruzajya rutunganya, amenshi ruzajya ruyakura mu Murenge wa Butaro mu Karere ka Burera, no mu bindi bice nka Ngororero, Nyagatare n’ahandi hihariye mu kugira amabuye yo muri ubwo bwoko.

Ibi bifatwa nk’intambwe nziza mu kongerera agaciro amabuye agaragara ku butaka bw’u Rwanda, bitagombeye ko yo ubwayo n’ibiyakomokaho nk’ibyo byuma bitumizwa hanze.

Imibare ya Minisiteri y’Ubucuruzi n’inganda, igaragaza ko ingano y’ibyuma bitumizwa hanze y’u Rwanda, muri iki gihe cy’imyaka ibiri ishize yagabanutse, kuko nko muri uyu mwaka wa 2024, hari hatumijwe Toni zisaga Miliyoni 146 z’ibyuma, byashowemo Miliyoni zisaga 113 z’Amadolari ya Amerika. Ni mu gihe mu mwaka ushize wa 2023, hatumijwe Toni Miliyoni 194 z’ibyuma byatwaye Miliyoni zisaga 164 z’Amadolari ya Amerika zivuye kuri toni Miliyoni.

Uruganda ruzajya rukora ibyuma rwatangijwe, imirimo yo kurwubaka izatwara Miliyoni 20 z’amadolari ya Amerika.

Umuyobozi warwo, Himashu Tiwari, yavuze ko ruzajya rutunganya toni ibihumbi 250 z’ibyuma ku mwaka, kandi ngo ruzaba ari rwo ruganda rwonyine mu Rwanda rukora muri ubwo buryo bwo kongerera agaciro amabuye y’Ubutare ruyakoramo ibyuma. Icyakora mu Karere u Rwanda ruherereyemo ka Afurika y’Iburasirazuba ruzaba rubaye urwa kane.

Ruje muri iki cyanya cy’Inganda rwiyongera ku zindi nganda ebyiri zihakorera, zirimo urukora sima ndetse n’urutunganya imyenda.

Imirimo yatangijwe yo kubaka uruganda rukora ibyuma mu mabuye y’ubutare izamara umwaka umwe

Ubufatanye bw’u Rwanda n’u Buhinde mu by’ishoramari mu by’inganda bwitezweho kuzamura ubukungu ku mpande zombi

Imashini zisiza ubutaka buri kubakwaho urwo ruganda zimaze iminsi zitangiye akazi

Umuyobozi w’ikigo cy’amashuri yatawe muri yombi akekwaho gufata umusore ku ngufu

Ntawukuriryayo Jean d’Amour w’imyaka 48 y’amavuko, uyobora ikigo cy’amashuri cya GS Bitaba giherereye mu Kagari ka Rwa, Umurenge wa Muzo mu Karere ka Gakenke, watawe muri yombi, ngo yari amaze iminsi ashakishwa n’inzego zishinzwe umutekano nyuma yo gukekwaho icyaha cyo gufata ku ngufu umwana w’umuhungu ukomoka mu Murenge wa Kamubuga Akagari ka Kidomo.

Ubwo amakuru yamaraga kumenyekana, uwo muyobozi yahise atangira gushakishwa, arafatwa ahita atabwa muri yombi, ashyikirizwa Urwego rw’Ubugenzacyaha (RIB), Station ya Janja mu Karere ka Gakenke nk’uko byagarutsweho n’Umunyamabanga Nshingwabikorwa w’Umurenge wa Muzo, Jean Pierre Niyoyita.

Ati: "Natwe twamenye amakuru y’uko yafashwe. Yari amaze amezi atatu mu gihano yari yarahawe ku bwo kugaragaza imyitwarire mibi mu kazi, bikaba bishoboka ko n’icyo cyaha cyo gusambanya umwana akekwaho yaba yaragikoze muri icyo gihe yari mu gihano".

Yakomeje agira ati "Gusa icyo gihano nabwo yari yakirangije agaruka mu kazi ariko bihurirana n’uko hari hatanzwe ikirego cy’uko yafashe uwo muhungu ku ngufu. Ubwo yabimenyaga rero ko bamureze yahise atoroka, biba ngombwa ko inzego zibishinzwe zirimo DASSO, Umurenge na RIB zimushakisha, aza gufatwa, amakuru dufite ni uko afungiwe kuri RIB Station Janja".

Mu butumwa bwe, Gitifu Niyoyita yakanguriye abarezi kurangwa n’imyitwarire myiza, bakaba intangarugero ku bo bayobora n’abo barera.

Ati: "Imyitwarire myiza ku muyobozi wo kuri urwo rwego ibera abarezi n’abanyeshuri urugero, bigafasha no mu gutegura ahazaza hano hazira ibyaha nk’ibyo".

Ibimenyetso by’ibanze byakusanyijwe ku isambanywa ryaba ryakorewe uwo muhungu, byashyikirijwe Isange One Stop Center ya Nemba muri Kanama 2024, ndetse uwo bikekwa ko yafashwe ku ngufu anahabwa serivisi za Isange.

Ibiti bahawe ngo bazabibungabunga neza kuko babyitezeho kugira uruhare mu gukumira imirire mibi

Izo ngemwe z’ibiti iyo miryango yazihawe ku wa Gatandatu tariki 2 Ugushyingo 2024, binahurirana n’uko abenshi mu bayigize, na bo ubwabo bari basanzwe bazi neza akamaro izi mbuto zigirira ubuzima mu kurwanya imirire mibi zirinda n’indwara, ariko ngo ntibagiraga agatima ko kugira byibura n’urugemwe rumwe batera barwiguriye.

Maniraguha Augustin agira ati: “Avoka ikungahaye ku ntungamubiri nyinshi zirengera ubuzima bwacu. Kuko kuyongera mu mafunguro, tuyafungura dufite akanyamuneza, byagera ku bana batoya bwo zikabatera gukurana ubuzima bwiza, bagashisha bumva. Gusa twagiraga imbogamizi zo kutazirya inshuro nyinshi umuntu akaba yanamara amezi atayiriyeho, kuko dutinya kuzigura ku masoko kubera ukuntu zihenda”.

“Inaha iwacu nibura imwe igura amafaranga ari hagati y’100 na 300. Wareba nk’izo umuryango w’abantu batanu cyangwa abarengaho bakenera ku munsi, ukabona ko zitajya munsi ya avoka eshanu. Usibye no guhendwa, twari twaratereye iyo, tudafite n’umuhate wo kugira byibura n’urugemwe dutera turwiguriye ku isoko, kubera n’ubujiji no kutabiha agaciro. Turashimira aba bagiraneza baduhaye ingemwe z’ubuntu bakongeraho n’ubumenyi bwo kutwigisha uko tuzajya tuzitaho kugez bikuze, bisaruwe ndetse n’uburyo bwo kubibungabunga”.

Kuri bamwe ngo ni n’uruganda bazabyazamo amafaranga, cyane ko uretse kuyirya mu muryango, bazajya banasagurira amasoko.

Imiryango 1000 ni yo yahawe ingemwe z’ibiti bya Avoka

Basomingera Joseph agira ati: “Igiti cyeze neza gishobora gusarurwaho avoka zabarirwa hagati ya 200 na 400. Noneho rero ukubiye ku gaciro k’amafaranga nka 200 cyangwa arengaho imwe igura muri iki gihe, ubaze neza ubona ko umuntu ataburamo mituweri, minerivale y’abana cyangwa n’ibikoresho by’ishuri. Ubu umugambi ntahanye ni uwo kukibungabunga kikazakura neza kikabyara umusaruro uhagije ku buryo tuzajya tubonamo izo twifashisha mu mirire tukanagurishaho tukabona agafaranga”.

Uretse ingemwe, iyo miryango yanahawe toni 8 z’ifumbire y’imborera itunganyijwe neza, mu rwego rwo kuyunganira mu guteza imbere ubuhinzi.

Uwamariya Eva Christine, Umuyobozi w’Ikigo Recycl’Africa, gicunga imyanda kikanayibyaza umusaruro mu rwego rwo kubungabunga ibidukikije, ari nacyo cyashyikirije iyi miryango izo ngemwe, avuga ko uretse kurwanya imirire mibi, ibyo biti bizagira n’uruhare rufatika mu kubungabunga ibidukikije.

Ati: “Ni igikorwa dukora buri myaka ibiri, kugira ngo dutange umusanzu mu kurwanya imirire mibi, no kunganira abaturage mu kubungabunga ibidukikije; cyane ko nk’ibyo biti bifata ubutaka bikaburinda isuri. Imirire mibi ndetse n’iyangirika ry’ibidukikije ni ibibazo bihangayikishije umuryango nyarwanda, ku buryo tubona ko buri wese mu rwego arimo, akwiye kugira icyo akora mu kubikumira”.

“Tubihaye aba baturage ngo bagende babitere ariko ntibaterere iyo. Ahubwo bazabyiteho uko bikwiye kugeza bikuze, bityo n’umusaruro tubyitezeho uzaboneke imiryango irusheho kubaho neza. Kimwe n’ifumbire y’imborera bahawe na yo, dukeneye ko bayifashisha mu buhinzi, ibihingwa bibonereho kubona intungagihingwa zuzuye kandi zihagije, nabyo bizazamure umusaruro bihaze mu biribwa”.

Ngo icyo ubuyobozi bugiye gukora nyuma yo gutera ibyo biti, ni ugukurikirana urugo ku rundi ko bizaba byitaweho.

Ifumbire yahawe iyo miryango na yo izayifashisha mu buhinzi yongere umusaruro w’ibyo beza

Ibiti bahawe mu gihe cy’imyaka iri hagati y’ibiri n’itatu biba byatangiye gutanga umusaruro

Abaturage basanga ubusinzi busubiza inyuma imiyango bakifuza ko abacuruza inzoga zitujuje ubuziranenge bahagurukirwa

Ikibazo cy’ubusinzi bwugarije abiganjemo urubyiruko, kivugwa hamwe na hamwe mu Karere ka Musanze harimo no muri Santere y’ubucuruzi ya Byangabo mu Murenge wa Busogo, bibangamiye imiryango.

Nyirandimwabo Jacqueline agira ati: “Abana bacu b’urubyiruko banywa inzoga mu mafaranga bakura mu biraka baba bakoreye cyangwa bakanazigurirwa na bagenzi babo, bataha bakaturaza ku nkeke tukabura umutekano kuko ziba zibasindishije. Duhangayikishijwe n’abantu bazenga, kuko bishoboka cyane ko baba bazivangavanzemo ibindi binyabutabire, birimo n’amatabi bibagira nk’abasazi, bakabura ubwenge, bakaba batakitwubaha nk’ababyeyi ahubwo bakadukorera urugomo”.

Ubwo businzi hari abaturage batekereza ko bwaba butizwa umurindi no kuba hari ba nyiri utubari biyiba bakadufungura guhera mu masaha ya mugitondo, abirirwa batunyweramo izo nzoga z’inkorano, zabasindisha ntibabe bagifite ubushobozi bwo gukora indi mirimo cyangwa ngo banagire uruhare mu zindi gahunda za Leta.

Izo nzoga hari n’abagenda bazita amazina, bagendeye ku bukana ziba zifite aho harimo nk’iyitwa Umumanurajipo, Nzogejo, Muhenyina hakaba n’indi bavuga ko iba yenganywe ubukana bwinshi bise Kinyundo.

Abayobozi ku rwego rwegereye umuturage bashyikirijwe udutabo dukubiyemo amakuru y’imihgo izibandwaho

Kanyabugoyi agira ati: “Igice cy’icupa rimwe cyonyine kiba gihagije kugira ngo uwakinyweye ahinduke umutamutwe. Uburyo ziba zenzemo bwatubereye amayobera kuko abazinywa, bahera mu gitondo bakageza amasaha akuze bari muri utwo tubari basinze. Amabwiriza n’amategeko n’izindi gahunda Igihugu kiba cyashyiriyeho abaturage babimenya bate kandi ubwabo na bo baba batakurikiranye ngo bamenye iyo ibintu biva n’iyo bigana”?

Undi agira ati: “Ubuyobozi nibudufashe utwo tubari dukomeje kurarura abo mu miryango yacu no kubayobya dufungwe, ba nyiratwo bafashwe kujya bubahiriza amasaha dufunguriraho, kandi n’izo nzoga bacuruza zitujuje ubuziranenge bazice burundu, wenda twagira umutekano, utwo umuntu ariye tukamugera ku nzoka, tukajya turyama tugasinzira. Nibwo bufasha dukomeje gutabaza dusaba ubuyobozi ngo buturinde kurindagizwa n’ubusinzi bukomeje gutuma benshi batagira ikintu na kimwe bigezaho”.

Mu Mihigo Akarere kahize kuzashyira mu bikorwa uko ari 112 muri uyu mwaka wa 2024-2025; imyinshi muri yo, abaturage ubwabo ni bo bagiye bayitoranyiriza, bayitangaho ibitekerezo, ikorerwa inonosorwa n’isesengura, ihindurwamo ibikorwa n’imishinga, iremezwa kandi inashakirwa ingengo y’imari.

Mu gikorwa cyo kugaragariza abaturage ibikubiye muri iyo mihigo, cyateguwe ku bufatanye bw’Akarere ka Musanze n’Umuryango utegamiye kuri Leta witwa Mukamira Community Base Organisation (MCBO), cyabereye mu Murenge wa Busogo muri iki cyumweru, Umuyobozi wa Polisi y’u Rwanda mu Karere ka Musanze, SP James Bagabo, yagaragaje ko ishyirwa mu bikorwa ry’iyo mihigo ridashobora kugera ku ntego mu gihe abakabaye bafatanya n’ubuyobozi baba bakomeje kwibera mu bidafite umumaro.

Ati: “Ubusinzi ni izingiro ry’ibindi byaha bikomeye birimo urugomo n’amakimbirane avamo impfu za hato na hato bihungabanya umutekano w’imiryango. Kugira ngo imihigo tuyigire iyacu, kandi tuyese uko bikwiye, biradusaba kutirara ngo twishore muri ubwo businzi duterere iyo twibwira ko hari abashinzwe kuyishyira mu bikorwa; ibyo ntibikwiye na mba”.

Inzego zishinzwe umutekano n’iz’ubuyobozi zacyebuye abaturage zinabibutsa ko Imihigo Akarere kahize itashoboka bo ubwabo batabigizemo uruhare

Ibi kandi byabagarutsweho n’Umuyobozi w’Akarere ka Musanze wungirije ushinzwe iterambere ry’Ubukungu Uwanyirigira Clarisse. Ati: “Imihigo twahize yose iri mu murongo uganisha ku kuzamura iterambere ry’abaturage kandi ibyo ntitwabigeraho hakigeragara abijandika mu bikorwa bidafututse harimo ibiyobyabwenge n’ubwo businzi. Amabwiriza agenga utubari n’amasaha tuba tugomba gufunguriraho arahari kandi arasobanutse ndetse tugiye kurushaho gukaza ubugenzuzi bureba ko akurikizwa, ubirenzeho azajya abihanirwa”.

Mu mihigo yose y’uyu mwaka Akarere kazashyira mu bikorwa harimo 64 yubakiye ku mibereho myiza, 26 izibanda ku bukungu na 22 izubakira ku miyoborere myiza; yose hamwe izashorwamo miliyari 16 na miliyoni zisaga 121 z’amafaranga y’u Rwanda.

Muri uko kuyishyira mu bikorwa, bijyanye no kuba abaturage bayisobanukiwe, kandi bayizi, cyane ko n’inyandiko ziyibasobanurira ubu zitakigaragara mu rurimi rw’Icyongereza gusa, ahubwo zanahinduwe mu rurimi rw’Ikinyarwanda, Akarere kabifashijwemo n’Umufatanyabikorwa wako MCBO, zinegerezwa abaturage ku rwego rw’Imirenge, Utugari n’Imidugudu ngo bijye byorohera buri muturage wese ukeneye kugira amakuru amenya y’ibikubiye mu mihigo.

Ako gace gaherereye mu Mudugudu wa Bukurura Akagari ka Gahinga mu Murenge wa Nemba Akarere ka Gakenke uwo muhanda unyuramo, ubutaka bwaho bugenda buridukira mu mubande mu buryo bugenda buwusatira, hakaba hari uruhande rurimo intera itarengeje metero ebyiri, hagati y’umuhanda n’aho ubutaka bugeze butwarwa.

Umwe mu bakoresha uwo muhanda witwa Dukuzemungu Pierre, agira ati: “Imvura yagiye igwa ubutaka bw’uwo musozi busoma amazi menshi, bugatenguka. Bigaragara ko habura akantu gato ngo bigere ku muhanda. Nta ntera ya metero zigera muri ebyiri irimo uvuye aho iyo nkangu itangirira. Dufite ubwoba bw’uko imvura niramuka iguye ari nyinshi, umuhanda uzariduka ugahirima mu manga bigafata no mu gice cya ruguru yawo, cyane ko unakoreshwa n’imodoka nini ziba zikoreye ibintu biremereye”.

Umuhanda Kigali - Musanze ufatwa nk’umwe mu mihanda minini Igihugu gifite ifitiye benshi akamaro, bitewe n’uburyo ukoreshwa n’urujya n’uruza rw’abiganjemo abakoresha ibinyabiziga, bituruka mu Turere tw’Igihugu no hanze yacyo.

Bakurikije uburyo uwo musozi ugenda wangirikamo, ngo n’agahenge bagize ni uko muri iki gihe cy’imvura itigeze igwa ari nyinshi nk’uko mu bindi bihe bigenda; ngo naho ubundi iyo bitaba ibyo, biba byarabaye ibindi bindi.

Hatagize igikorwa mu maguru mashya hari impungenge z’uko imvura ishobora kugwa ari nyinshi ikawuridukana mu mibande iri munsi y’uyu musozi wangiritse

Nzabahorana Stefano agira ati: “Twagize amahirwe imvura ntiyagwa ari nyinshi kuko noneho yagombaga kuwasa bikaridukira epfo iyo mu mibande. Ni Imana yabibayemo ikinga akaboko, ariko nabwo nk’uko bigaragara isaha n’isaha imvura ishobora kuza ari simusiga, ikagwa tukabura ayo ducira n’ayo tumira mu gihe waba udakozwe ngo bikumirwe hakiri kare”.

“Twatabaje inzego zitwegereye ku Kagari n’Umurenge; na zo zibigeza hejuru, bimanura abayobozi ku Karere na za Minisiteri baraza bareba uko byifashe. Na n’ubu bigeze iyi saha bikiri ahongaho turacyategereje”.

Mu minsi ishize ngo babonye ibimashini bikora imihanda bihazanwa hamwe n’ibikoresho, baharunda n’amabuye, bakeka ko noneho hagiye gutunganywa batangira no kwiruhutsa, ariko ntizahamaze kabiri, kuko ba nyirazo bongeye kuzipakira barazijyana.

Nzabahorana ati “Uyu muhanda uraduhangayikishije cyane. Ni igikorwa remezo dufata nk’ingenzi ku gihugu kuko hanyura imodoka nyinshi zikoreye ibicuruzwa biva i Kigali na za Rubavu biba byinjiye mu Rwanda bikuwe mu mahanga. Usibye ibyo n’umusaruro tweza muri tuno Turere twose tw’Amajyaruguru n’izindi ntara, nta handi binyuzwa hatari muri uyu muhanda. Kandi ubwo simbariyemo ibihumbi n’ibihumbi biwunyuranamo by’abantu bava hamwe bajya ahandi bakoresheje imodoka, moto, amagare cyangwa b’abanyamaguru. Muri macye uyu muhanda uramutse wangiritse cyaba ari igihombo gikomeye”.

Abaturage baherutse kubona harundwa amabuye babwirwaga ko ari ayo gusanisha ahangiritse na n’ubu ngo baracyategereje ko bikorwa

Icyakora ngo ikibazo cy’aha hantu kirazwi, nk’uko n’Umuyobozi w’Akarere ka Gakenke Mukandayisenga Vestine abivuga, ati : “Inyigo yo kuhasana yararangiye, ubu dutegereje ko Ikigo gishinzwe guteza imbere ubwikorezi mu Rwanda (RTDA) ari na cyo kiwufite mu maboko, cyegeranya ibisabwa n’ibikenewe byose, kikazaza kuhakora. Amakuru dukurayo ni uko bitazatinda gukorwa, cyane ko n’ibikoresho bimwe na bimwe bizifashishwa bigenda bihagezwa”.

Kigali Today yifuje kumenya igihe imirimo yo gusana aho hantu izatangirira, ingengo y’imari izashorwamo n’igihe bizamara ngo ibe irangiye, ubuyobozi bwa RTDA ntibwabasha kuboneka. Mu gihe ayo makuru yaboneka, na yo twayatangariza abasomyi ba Kigali Today.

Baherutse amapoto ashingwa bategereza ko ashyirwaho insinga z’amashanyarazi baraheba

Ahiganje iki kibazo, ni mu Midugudu hafi ya yose igize Akagari ka Cyogo mu Murenge wa Muko. Ituwemo n’imiryango yari ihasanzwe hamwe n’indi ibarirwa muri 600 yahimukiye iturutse mu Kagari ka Mbizi mu Murenge wa Kimonyi, ikuwe mu byayo n’ibiza byahibasiriye.

Masengesho Shadrack agira ati: “Imyaka ibiri iri gushira ayo mapoto bayashinze ntibashyiramo insinga z’amashanyarazi, ku buryo rwose nta n’ikimenyetso kindi kigaragaza ko byibura bari mu nzira zo kuyahageza. Turi ingo nyinshi cyane, kuko harimo izirenga 600 zahoze mu misozi yo muri Kimonyi zihava burundu zihunga ibiza, tuza gutura ahangaha tuhasanga abandi bari bahatuye na bo batigeze babona ku mashanyarazi. Dukomeje kwibaza icyo tuzira kuba tugicana amatadowa n’ibikongi by’ibishirira, mbese icuraburindi riraturembeje”.

Mu zindi ngaruka ngo zirimo no gusigara inyuma, mu gihe abandi bo bayafite yabahinduriye imibereho.

Nsengiyumva agira ati: “Ingaruka zo ni nyinshi kuko nk’uko mubizi, ubu ibintu byose abantu babikora mu buryo buri digital basezereye analogue. Twe rero biratubabaza kuba abana bacu bataha bakeneye kwiga no gukora imikoro, bakaba bifashisha ibishirira bikomeje kubatera amaso”.

Ingo zo muri kano gace zugarijwe n’icuraburindi kubera kutagira amashanyarazi

Yungamo agira ati, “Ikindi hano dukunda umurimo cyane. Umuntu ataha iwe mu rugo, akeneye kuruhuka akaba yanareba ka televiziyo. Abenshi twifuza kwiyogoshesha no gusharija telefoni, gusudira ibyuma cyangwa no kubetesha (gushesha) ibinyampeke tweza dukeneye ifu; ibyo byose tukajya kubikorera kure tuvunitse kuko nta mashanyarazi tugira. Aya mapoto rwose nibaze badutabare bagire uko bayagenza tubone amashanyarazi natwe tube nk’abandi Banyarwanda”.

Umukozi w’Ikigo cy’u Rwanda Gishinzwe Ingufu REG utarifuje kugira byinshi atangaza kuri iki kibazo, ufite mu nshingano ze gukurikiranira hafi iby’ikwirakwizwa ry’amashanyarazi mu Mirenge imwe n’imwe y’Akarere ka Musanze harimo n’uwa Muko, avuga ko abo baturage bashonje bahishiwe, cyane ko muri uyu Murenge honyine hari Transfo zibarirwa mu 100 ziheruka kugezwa mu bubiko, bikaba byitezwe ko mu minsi ya vuba, n’insinga z’amashanyarazi zatumijwe na zo zizaba zahagejejwe abaturage bagatangira kuyegerezwa.

Umuyobozi w’Akarere ka Musanze wungirije ushinzwe Iterambere ry’Ubukungu, Uwanyirigira Clarisse, avuga ko bagiye gufatanya na REG mu kwihutisha iyo mirimo ku buryo nibura ukwezi k’Ugushyingo kugomba kurangira, abaturage bari kuri gahunda yo kwegerezwa amashanyarazi bayabonye.

Ati: “Turabizeza ko iki kibazo kigiye gukorwaho byihuse dufatanyije na REG ibikoresho bikibura biboneke, ku buryo bitarenze hagati y’ukwezi k’Ugushyingo n’Ukuboza bagomba kuzaba bacana umuriro w’amashanyarazi”.

Amashanyarazi baramutse bayahawe barushaho kwiteza imbere

Banki y’Isi iherutse gushyira u Rwanda ku mwanya wa 3 muri Afurika no ku mwanya wa 11 ku isi mu bihugu byakwirakwije amashanyarazi ku muvuduko munini, dore ko ruri ku gipimo cya 77% mu gihe ibyinshi mu bindi bihugu bikiri hagati ya 30-50% by’ingo ziyafite.

Iyi Banki kandi imaze gushora miliyari 1 na miliyoni zisaga 300 y’amadorari ya Amerika, mu rwego rw’Ingufu mu Rwanda kuva mu mwaka wa 2009, kandi intego ihari ni uko bitarenze muri Kamena 2026 ingo zisaga 450,000 zingana na 83% by’izibarurwa mu gihugu, zizaba zahawe amashanyarazi; byazagera mu mpera ya 2028 ingo zose muri rusange zikazaba zacaniwe ku kigero cy’100%.

Mu Rwanda Ingo zifatiye ku muyoboro mugari w’amashanyarazi zisaga miliyoni 1 n’ibihumbi 800 birenga, naho izikoresha izindi ngufu ziganjemo iz’imirasire y’izuba zo sigasaga ibihumbi 785.

Mu kuzibashyikiriza Umuyobozi w’Akarere ka Gakenke Mukandayisenga yabasabye kurangwa n’imikorere ishyira umuturage ku isonga

Abanyamabanga Nshingwabikorwa 18 bayobora Utugari ni bo bazihawe, muri 79 bayobora Utugari tugize Akarere ka Gakenke. Abazihawe barimo abakorera ahantu bigoranye kugenda n’amaguru cyangwa imodoka, bitewe n’uburyo aka Karere kagizwe n’igice kinini cy’imisozi miremire. Ibyo ngo byabangamiraga imikorere yabo, ntibuzuze inshingano basabwa ku muturage uko bikwiye.

Hategekimana Laurien uyobora Akagari ka Bumba mu Murenge wa Muyongwe, agira ati: “Akazi dukora ubundi kadusaba gusohoka mu biro tukajya mu baturage kugira ngo tumenye ibibazo bafite no gufatanya na bo kubikemura. Rero nkanjye agace nyobora, byangoraga kubageraho kubera intera ndende kandi y’imisozi ihari, byongeyeho no kuba hari imiryango ituye mu buryo butatanye. Icyakora ku bw’amahirwe hagiye hari utuyira n’uduhanda duto byorohera moto kunyuramo, ariko nabwo bikansaba kwishyura umumotari. Ubwo rero kuba bampaye moto yanjye bwite, biranshimishije cyane kuko ngiye kujya nkora akazi binyoroheye kandi ntahenzwe”.

Guturuka aho Akagari ayobora kubatse ajya ku biro by’Akarere nko mu nama cyangwa ibindi bikorwa bihabera, byamusabaga gukora urugendo rw’ibirometero birenga 35, yaba yateze moto akayishyura amafaranga atari munsi y’ibihumbi 12 yo kumugezayo no kumucyura atashye.

Ni amafaranga yemeza ko ari menshi kuri we, cyane ko ngo iyo byageraga mu masaha ya nijoro byabaga ibindi bindi, kuko ayo bamutwarira ku manywa kuri moto, nijoro abamotari bayahanikaga hafi no kuyakuba inshuro ebyiri; ndetse rimwe na rimwe hakaba ubwo anatinye kugira aho ajya, atabitewe n’icyo kiguzi gihenze gusa, ahubwo no kuba hari uwamugirira nabi.

Ku ikubitiro ba Gitifu 18 ni bo babimburiye abandi mu guhabwa Moto muri aka Karere ka Gakenke

Ba Gitifu b’Utugari bahawe moto, abenshi bari barize kuzitwara ndetse banabihererwa impushya, icyakora hakabamo n’abafite iz’agateganyo, mu gihe hari n’abakirimo kwigana ishyaka ryinshi kugira ngo vuba aha bazabashe gukorera impushya za burundu.

Mu gikorwa cyo kubashyikiriza izo Moto ku mugaragaro, cyabereye ku cyicaro cy’ibiro by’Akarere ka Gakenke, tariki 28 Ukwakira 2024, Umuyobozi w’Akarere ka Gakenke Mukandayisenga Vestine, yagaragaje ko zizoroshya imikorere muri gahunda aka Karere gashyize imbere, yo kuzuza inshingano, begera umuturage byihuse, kumva ibibazo afite, no kumufasha kubibonera igisubizo atarinze gusiragira.

Ati: “Ingendo zivunanye mwakoraga mujya gukemura ibibazo by’umuturage natwe ubwacu nk’ubuyobozi bubakuriye, byatugiragaho ingaruka zo kutesa Imihigo uko bikwiye. Ubu rero ubwo muzihawe, icyo tubakeneyeho ni ukubona impinduka nziza, yaba mu mikorere no kuba hafi y’abaturage. Imitangire ya serivisi inoze ijyana no kwimakaza ihame ry’imiyoborere myiza, ishyira umuturage ku isonga; tubigire umuco dukomeyeho kuko uzatugeza kure hashoboka”.

“Aho musanze umuturage mu Mudugudu mumutege amatwi, musesengurire hamwe ibitagenda maze buri Kagari kabe ishingiro ryo gukemura ibibazo byabereye abaturage ingutu. Uburyo bwo kumugeraho byihuse rero nta handi buzagaragarira, ni cyo muherewe izi moto”.

Yakomoje kuri gahunda ba Gitifu b’Utugari bakunze kugiramo uruhare, zirimo gukangurira abaturage kwita ku isuku, kurwanya imirire mibi, kwitabira umuganda, gahunda ya Ejo Heza, Ubwisungane mu kwivuza, gusigasira ibyagezweho no gukumira amakimbirane; maze agaragaza ko bitagerwaho ba Gitifu bategereye abaturage ngo bakurikiranire hafi uko babishyira mu bikorwa.

Moto bahawe buri imwe ibarirwa agaciro ka Miliyoni ebyiri n’ibihumbi 62 by’amafaranga y’u Rwanda. Bazagenda bazishyura mu byiciro ariko uruhare runini rukazatangwa n’Akarere, bikorwe mu gihe cy’imyaka ine.

Bashimiye Umukuru w’Igihugu watekereje ku kazi katoroshye bakora, akabagenera moto

Ikiguzi cya esanse bazajya bakoresha, kizajya cyishyurwa n’Akarere nk’uko ubuyobozi bwakomeje bubivuga.

Igikorwa cyo gushyikiriza n’abandi Banyamabanga Nshingwabikorwa b’Utugari dusigaye tw’aka Karere, kizakomeza ku buryo mu gihe cya vuba bose zizaba zabagezeho.

Baboneyeho gushimira Perezida Paul Kagame, wazirikanye ko Abanyamabanga Nshingwabikorwa b’Utugari bafite inshingano zikomeye zibasaba guhura n’abaturage kenshi, akaborohereza muri ubu buryo bwo kubashakira moto.

Imiryango yasenyewe n’ibiza irasaba kubakirwa inzu yijejwe

Muri uyu Murenge habarurwa imiryango igera kuri 59 yagizweho ingaruka n’ibiza byibasiye ibice bimwe na bimwe by’uyu Murenge mu mwaka wa 2023.

Umubyeyi wo mu Mudugudu wa Kabere, Akagari ka Cyogo, imvura yaguye umwaka ushize, yamusenyeye we n’abo bari baturanye, ndetse inangiza imyaka bari bahinze, ntibagira na kimwe baramura, kugeza ubu baracyagowe no gutura mu nzu bacumbikiwemo n’ubuyobozi bubakodeshereza.

Yagize ati: “Imvura igihe cyose iguye itangatanga ikibaya hafi ya cyose ikangiriza imitungo yacu. Nk’ubu njye iyaguye umwaka ushize, yansanze mu nzu mbanamo n’akuzukuru kanjye nijoro, mu gukangukira hejuru dusanga amazi yaturengeye umubiri wose hasigaye agace gato k’umutwe, tuyajabukamo dukizwa n’amaguru. Hari abantu twari tuziranye byahitaniye ubuzima abandi bibasenyera burundu inzu babagamo”.

“Icyo gihe ubuyobozi bwahise budukodeshereza inzu, nyuma yaho abari bafite ibibanza ahandi bagerageza kuzamuramo amazu Leta na yo irabunganira ibaha isakaro, abataragiraga na busa bubakirwa inzu abandi basanirwa inzu, twe dusigara nta na kimwe usibye kudukodeshereza, kandi nabwo nkanjye nyiri inzu mbamo amaze iminsi yaranteguje kuyivamo nkajya gushaka ahandi ntura kubera ko atishyurirwa ku gihe”.

Ibiza bikunze kwibasira ako gace k’ikibaya cya Kinyababa gihuriweho n’Imidugudu ya Kadahenda na Kabere, bikomoka ku mazi y’imvura igwa mu birunga, ku gice cy’Umurenge wa Busogo, Shingiro, Gataraga, ndetse n’ikindi gice cy’Akarere ka Nyabihu; akamanukana umuvumba akiroha mu mugezi wa Mutobo, agakomereza mu mugezi wa Mbizi n’utundi tugezi duto turimo akitwa Nyabeshaza, Mararo, Nyamukwana, Kagenza n’utundi tugenda tuyishamikiraho. Iyo ageze muri icyo kibaya asandarira mu ngo n’imirima by’abaturage, kuko nta handi aba afite akomereza urugendo rwayo.

Imiryango itishoboye yari yagizweho ingaruka n’ayo mazi yayibasiye umwaka ushize, igakurwa mu byayo, yahise icumbikirwa mu nzu ikodesherezwa n’ubuyobozi. Imwe muri yo igenda yubakirwa, ariko hakaba n’igitegereje kugerwaho, ari na yo kugeza ubu ivuga ko igihanganye n’ingaruka zo kubaho itarubakirwa amacumbi.

Basaba ko hashyirwaho uburyo buhoraho bwo kuzibura ibyobo byirohamo amazi bizwi nk’ibibare cyangwa se ubuvumo. Kubizibura ngo byajya biyabuza gusandarira mu mirima n’ingo by’abaturage

Bisengimana Janvier, Umunyamabanga Nshingwabikorwa w’Umurenge wa Muko, agira ati: “Ayo mazi atizwa umurindi no kuba bimwe mu Bibare/Ubuvumo yakarigitiyemo bikunze kuzibywa n’ibibuye binini hamwe n’imyanda bimanurwa n’amazi aba yaturutse hejuru mu birunga, dore ko icyo kibaya gikikijwe n’imisozi”.

“Abaturage bakora iyo bwabaga bagakora umuganda kenshi gashoboka wo kubizibura, ariko bikanga bikaba iby’ubusa bikananirana. Aho bigeze twe tubona hakenewe ubufasha bwatuma haboneka ingengo y’imari yihariye hagashyirwaho abakozi bahoraho bagomba kujya basibura ibyo bibare bisaga 12 bihari abantu bakagira agahenge”.

Umuyobozi w’Akarere ka Musanze wungirije ushinzwe Iterambere ry’Ubukungu, Uwanyirigira Clarisse, agira ati: “Hari ubuvugizi bukiri gukorwa muri Minisiteri ifite mu nshingano zayo gukumira ibiza, kugira ngo haboneke ubushobozi bwo kuba iyo miryango yakubakirwa byihuse, ndetse natwe nk’Akarere tugiye kurebera hamwe uko hajyaho itsinda ry’abantu bazajya bazibura ibyo bibare mu buryo buhoraho, hirindwa ko byakongera kujya biziba bikangiza iby’abaturage”.

Imiryango yari yakuwe mu byayo n’ibiza byaturutse kuri ayo mazi umwaka ushize ibarirwa muri 59.

Igera kuri 25 muri yo, yasaniwe inzu zari zangijwe na yo, isigaye ikaba ari yo igitegereje gukurwa mu bukode ikubakirwa bundi bushya, kuko aho yari ituye amazi yahangije mu buryo hatakongera guturwa.

Ubwo bari mu masaha y’ikiruhuko cya mbere ya saa sita, ku wa Mbere tariki 28 Ukwakira 2024, barwaniye mu ishuri bapfa umwembe, umwe muri bo yitura hasi ananirwa guhaguruka, mu kugerageza kuhamukura ngo bamujyane kwa muganga basanga yamaze gushiramo umwuka.

Urubuto rw’umwembe ruravugwaho kuba intandaro y’amakimbirane yabyaye urupfu

Ni amakuru yemejwe n’Umuvugizi w’Umujyi wa Kigali, Ntirenganya Emma Claudine, agira ati: “Abo bana bari ku ishuri mu masaha yo gukina. Umwe muri bo yari yazanye umwembe yawubitse mu gikapu cye. Mugenzi we yawukuyemo, nyirawo akimubona amukubita urushyi, undi na we mu kugerageza kwirwanaho amukubita ingumi ebyiri, bikimubaho yitura hasi ananirwa guhaguruka”.

“Abana babibonye bihutiye gutabaza abarimu, bamugeraho bamuryamisha ahantu bahita bahamagara imbangukiragutabara ngo imujyane kwa muganga, mu kumugeraho barebye basanga yamaze gushiramo umwuka. Ubungubu dutegereje iperereza rya RIB riza kujyanirana no gufata ibipimo, harebwe niba koko urupfu rw’uwo mwana rufitanye isano n’izo ngumi yakubiswe cyangwa se niba hari ubundi burwayi yari afite”.

Abasanzwe bazi uwo mwana bavuga ko nta bundi burwayi yajyaga arwara. Emma Claudine Ntirenganya ahamagararira ababyeyi kujya babanza kugenzura ko ibyo abana babo bajyana ku ishuri ari ibiba byemewe.

Ati: “Uko kwirinda kujyana ibintu bitemewe ku ishuri birinda ko habaho amakimbirane yo kuba bagira ibyo abana barwanira. Ibigo by’amashuri na byo ni ngombwa ko byajya biba hafi y’abana, bagakurikiranira hafi ibyo baba bahugiyemo yaba mu gihe cy’amasomo n’igihe bari mu karuhuko, kugira ngo n’igihe hagize abagirana ikibazo bagikumire hakiri kare”.

Amakuru y’urupfu rw’uwo mwana akimara kumenyekana, umurambo we wahise ujyanwa kwa muganga ngo ukorerwe isuzuma.

Gukorera hamwe mu itsinda byabakuye mu bwigunge

Ni umushinga batangiye guhera mu mwaka wa 2018, binyuze mu itsinda ribahuje ari abantu 30 bahuriye ku kuba baragiye bagira ibibazo by’uburwayi bwo mu mutwe ariko babuvuwe bagakira, uwo mushinga bawukora bagamije kwirinda guheranwa n’ubwigunge.

Batangiye bakusanya amafaranga 200 kuri buri muntu ya buri cyumweru bakayazigama, umwaka washira bakarasa ku ntego (bakayagabana), buri wese akabasha kwikenura akemura ibibazo runaka cyangwa akaba yanagura itungo rigufi.

Niyibizi Jean Baptiste wamaze imyaka itatu yirirwa ndetse akarara azerera mu mihanda, biturutse ku burwayi bwo mu mutwe yari afite, ubuzima yari abayemo ngo bwari bubi cyane.

Ati: “Nirirwaga nirukanka imihanda yose nkanayiraramo hakaba ubwo ndyama mu bihuru nibwira ko ndi mu buriri bw’iwanjye. Imvura yaranyagiraga simenye ibyo ari byo, hakaba ubwo mvuye mu gace k’iwacu nkaba namara iminsi ibiri njya iyo ntazi, ntarya, ntanywa bitewe n’uko ubwenge bwari bwarahumye, ndetse byageze n’aho numva nshaka kwiyahura”.

Bavuga ko gukora inkweto bibatungiye imiryango

Nyiramfakwita Anne Marie ukuriye “Itsinda Twite ku buzima”, avuga ko uku kwihuriza hamwe, uretse kuba byarabafashije kuva mu bwigunge, ngo byanabongereye amahirwe yo gushyigikirwa n’abafatanyabikorwa, mu mushinga wo gukora inkweto z’abagabo, abagore n’izigenewe abana.

Agira ati: “Umuryango Partners in Health icyo gihe wabonye ukuntu dufite ishyaka ryo kugira icyo twakora kiduteza imbere dushishikajwe no gukora tukikura mu bukene, waduteye inkunga z’imashini ebyiri zikora inkweto n’ibindi bikoresho bijyana na zo, Akarere ka Burera na ko kaduha amafaranga angana na Miliyoni imwe, kanakomeza kudukorera ubuvugizi duterwa indi nkunga ya Miliyoni eshanu z’amafaranga y’u Rwanda yaturutse ku rwego rw’Igihugu”.

Inkweto bakora bazigemura ku masoko yo mu bice bitandukanye by’Akarere ka Burera, ku buryo ngo nibura buri kwezi batabura ibihumbi bibarirwa muri 200 zibinjiriza, kandi intego bafite ngo ni ugukomeza gukora cyane, bakagura umushinga bakaba bagera no ku rwego rwo gushinga uruganda rwongerera agaciro impu.

Urwego bagezeho ngo barukesha ubuvuzi bagiye bahererwa ku kigo nderabuzima cya Ntaruka, na cyo giherereye muri uwo Murenge wa Kinoni, cyagiye kibakurikiranira hafi kikanabaha ubuvuzi, n’ibiganiro byagiye bibafasha kurushaho kwigirira icyizere no kwiyumva nk’abantu bashoboye kimwe n’abandi.

Mbarubukeye Bosco Esdras, Umuyobozi wungirije w’iki kigo, avuga ko uburyo bw’amatsinda, buri mu bufasha abayagize kwisanzura bagasangira ubuhamya bw’ubuzima baba baranyuzemo.

Ati: “Iyo bari mu matsinda babasha kuganira ku hahise habo, buri wese akisanzura kuri bagenzi be ababwira uko yari ameze n’uburyo yabashije gusohoka muri ibyo bibazo. Niba hari nk’ugaruka ku kuntu yumviye inama za muganga, agafata imiti neza, bikaba byaramufashije kugira urwego rumwe avaho akagera ku rundi, kugeza ubwo akira; ibyo bikaba nk’aho yigisha bagenzi be, abafasha mu buryo bwo kutigunga, ahubwo bakabona ubuhangana n’ibibazo ahanini biba bifatwa nk’intandaro y’icyabateye kugira uburwayi bwo mu mutwe bigakumirwa mu buryo badashobora kongera kubyisangamo”.

Abenshi mu bagana ikigo nderabuzima bafite uburwayi bwo mu mutwe, ngo bigaragara ko baba barabutewe n’imibereho mibi mu miryango, n’ibindi bibazo baba barahuye na byo bakananirwa kwiyakira bikabatera kugira agahinda gakabije.

Mbarubukeye ashishikariza imiryango kudaha akato umuntu wese ufite uburwayi bwo mu mutwe, no kujya bihutira gushyikiriza ubuvuzi umuntu wese ugaragaweho n’ibimenyetso birimo nko guhinduka mu myitwarire n’amarangamutima, kubura ibitotsi, kwigunga, kwitakariza icyizere n’ibindi biganisha ku kugira uburwayi bwo mu mutwe, kuko iyo akurikiranwe hakiri kare yitabwaho, akaba yavurwa agakira.

Musaneza Françoise yarambiwe ubuzima bushaririye abagore babayemo muri FDLR ahitamo kuyitoroka aratahuka

Ni ubuzima uwo mugore ukomoka mu Murege wa Bungwe mu Karere ka Burera, yinjiyemo afite imyaka 17, ubwo mu 1998 yahungiraga mu mashyamba yo muri Repubulika Iharanira Demokarasi ya Kongo akanashakirayo umugabo, wari umwe mu babarizwa mu mutwe wa FDLR.

Musaneza avuga ko intambara za hato na hato zihungabanya umutekano, uwo mutwe w’iterabwoba uhoramo uhanganyemo n’indi mitwe yitwara gisirikari, ndetse n’imigambi yayo mu guhora ishaka guhungabanya u Rwanda, zishyira mukaga ubuzima bw’abiganjemo abagore n’abana babarizwa muri uwo mutwe.

Ati: “Umutekano muke kubera intambara abo barwanyi bahoramo, uraduhungabanya cyane nk’abagore ndetse n’abana. Badutana ingo twenyine tukabaho ari twe ubwacu twibeshejeho, ugerageje guhinga yakweza imyaka bakayisahura cyangwa tukava mu byacu tukayita ugasanga turicwa n’inzara, urwaye ntabashe kuvurwa, waba ufite nk’udukoresho mu nzu cyangwa utwambaro ntitumare kabiri kuko nabyo babisahura; na n’ubu undeba muri kano kambaro ni umugiraneza wakampaye ubwo nageraga hano mu Rwanda akabona ko nambaye ubusa. Mbese urebye twabagaho mu buzima bw’amarira gusa”.

Akomeza agira ati “Abagore babo tubayeho nk’ibikoresho bibafasha kwikemurira ibibazo by’akanya gatoya, nta kandi gaciro baduha nk’ako undi mugore wese yahabwa. Birirwa biba iby’abaturage ntawe ushobora gutekereza ko hari aho afite umugore cyangwa umwana yabyaye ngo byibura anamujugunyire ikilo kimwe cy’inyama, imiti baba basahuye, umugore ntiyarwara ngo hagire n’ikinini bafata bamuvurishe, ntawe usonza ngo bamugaburire; na cyane ko baba bitwaje ko amabwiriza yabo bagenderaho atebemerera kugira abagore batunga, n’ubigerageje bakabana rwihishwa”.

Ababazwa n’uko imyaka yose yahamaze, ubuzima abagore babayemo, busa n’aho birirwa bateshwa igihe cyabo, biruka inyuma y’abo barwanyi, badashobora no kubona aho bapfumurira ngo batahuke.

Ati: “Nta rukundo byibura rw’umunsi n’umwe cyangwa impuhwe na nkeya nigeze mbabonaho. Ibyo biradushegesha tukifuza gutahuka tukabibura kuko ahubwo icyo bashyiramo imbaraga, ari ukuduhozaho ijisho ngo hatagira uwinyagambura akabatoroka; n’iyo hagize ubigerageza bakabimenya bahita bamwica urubozo. Twabayeho mu buzima bubabaje cyane, tugera n’aho twifuza kugira amababa ngo tugurukire mu Rwanda turayabura. Nkurikije umuruho n’uburyo muri ariya mashyamba ubuzima buba bushaririye, iyo binkundira sinari kuba narahamaze iyi myaka yose ntaratahuka”.

Ibihuha byinshi yabwirwaga ku Rwanda yatunguwe no gusanga ari ibinyoma

Ubwo yageraga mu Rwanda we n’abandi bantu 13 batorokeye hamwe bava muri FDLR batunguwe n’uburyo ingabo z’u Rwanda zirinda umupaka wa ‘Kabuhanga’ uhuza u Rwanda na Repubulika Iharanira Demokarasi ya Kongo, zabakiranye ubwuzu, mu gihe bo bahageze bikandagira, mu bwoba bwinshi bakeka ko byanze bikunze bicwa.

Ati: “Tukigera ku mupaka baratwakiriye badushyira ahantu twamaze ibyumweru bibiri turuhuka. Batugaburira amafunguro meza, n’ubwuzu bwinshi ubona ko batwubashye cyane, mbese kuva navuka nibwo bwa mbere nari mbonye abasirikari bagirira abantu urugwiro, bakabasekera, bakababwira neza, bagaterura utwana bakatuganiriza bagakina natwo bakadutetesha, Polisi na yo ikaza ikatuganiriza mbese dutangira kugarura icyizere cy’uko batacyitwishe”.

Musaneza na bagenzi be bahuguriwe hamwe i Mutobo batahanye umukoro wo kutazatatira u Rwanda

Ari mu bagize Icyiciro cya 72 cy’abahoze ari abarwanyi mu mitwe yitwara gisirikari ibarizwa muri Repubulika Iharanira Demokarasi ya Kongo, kigizwe n’abantu 39 barimo abasirikari 32, abana 2 bahoze mu mitwe ya gisirikari ndetse n’abafasha mu byagisirikari 5.

Bari bamaze amezi atatu bahabwa amasomo arimo n’ay’uburere mboneragihugu, aho mu kuyasoza ku wa kabiri tariki 22 Ukwakira 2024, bagaragaje umunezero w’uko ayo masomo yatumye bitandukanya burundu n’imyumvire hamwe n’ibitekerezo bibi bahoranye kuva na cyera bakiri mu mashyamba, yo guhora bafite inyota yo guhungabanya u Rwanda.

Lt Munyaneza, ni umwe muri bo: “Nishimira ko iterambere n’imibereho myiza Abanyarwanda bafite ubu, bivuguruza ibinyoma twahoraga tubwirwa by’uko ugeze mu Rwanda yicwa urubozo. Mu nyigisho zose twaboneye ahangaha i Mutobo, byatweretse ko Perezida wacu Kagame agifite akazi katoroshye ko gukomeza kubaka ubumwe bw’Abanyarwanda. Twiteguye kumuherekeza muri urwo rugendo arimo kandi ntiduteze guhindukira inyuma”.

Ababarirwa muri 80% by’abagize iki cyiciro cya 72 cy’abasezerewe, ni abagiye bavukira mu mashyamba ya Repubulika Iharanira Demokarasi ya Kongo nk’uko Perezida wa Komisiyo yo gusubiza mu buzima busanzwe abahoze ari abasirikari, Valerie Nyirahabineza, yabitangaje.

Ati: “Baza mu Rwanda badasobanukiwe byinshi k’u Rwanda birimo nk’amategeko, amabwiriza ndetse na gahunda zose abagituye bagenderaho, bikadusaba ko babanza kubigisha amasomo y’uburere mboneragihugu, gahunda za Leta no guhanga umurimo. Ibyo byose nibyo duheraho, kuko navuga ko ari nka Bibiliya cyangwa igitabo cy’ibanze buri Muturarwanda wese akwiriye guhora ashikamyeho, asoma buri munsi ngo bimufashe kuba mu mujyo mwiza igihugu kirimo”.

Guverineri w’Intara y’Amajyaruguru Mugabowagahunde Maurice, yagaragaje ko: “Uku kuva ku izima, mugashyira intwaro hasi mukitandukanya n’imyumvire mibi yo kwanga u Rwanda mwakuze mutorezwa mu mashyamba, mugafata icyemezo cyiza cyo gutahuka ku bushake nta gahato mushyizweho, bigaragaza uburemere bw’inyota y’ineza ku gihugu mwe ubwanyu mwagize”.

Arongera ati, “Ibyiza kigezeho ubu byavuye ku musingi w’ubumwe n’ubudaheranwa Abanyarwanda bubakiyeho. Igihe ni iki rero ngo namwe mushyireho akanyu mufatanye n’abandi mu mahoro, mu bikorwa bibateza imbere birimo na gahunda za Leta, mube abakunda Igihugu, biteguye kugikorera no kugihesha ishema, yaba ku rwego rwacyo no ku ruhando mpuzamahanga kandi natwe nk’ubuyobozi ndetse n’umuryango Nyarwanda musanze tuzabifatanya”.

Mu bantu babarirwa mu bihumbi 70 bamaze gusezererwa no gusubizwa mu buzima busanzwe na Komisiyo y’Igihugu yo gusezerera no gusubiza mu buzima busanzwe abahoze ari abasirikari, abagera mu bihumbi 14 bahoze ari abarwanyi mu mashyamba ya Kongo, ni bo kugeza ubu bahuguriwe mu Kigo cya Mutobo kuva mu mwaka wa 2001.

Bamwe mu babatse Maternité yo ku Kigo nderabuzima cya Karwasa basaba guhembwa amafaranga bakoreye

Abo baturage bivugwa ko basaga 80, ubwo bahabwaga akazi ko kubaka iyo Maternité, bari babwiwe ko buri minsi 15 bazajya bayihemberwa; gusa bakaba bababazwa n’uko ibyo basezeranyijwe bitubahirizwa kugeza ubwo harimo n’ababerewemo amafaranga y’ibirarane abarirwa mu bihumbi amagana.

Nkurikiyimana Léonard agira ati: “Twubatse iyo Maternité dutegereza guhembwa turaheba. Ubu muri twe hari abo barimo ibihumbi birenga 300, abandi ibihumbi bibarirwa muri 200 n’abandi gutyo gutyo.

Arongera ati, “Tugirana amasezerano n’abashinzwe kudukurikirana barimo na Reserve Force, byagaragaraga ko buri minsi 15 (Kenzeni) imwe tuzajya duhembwa. None dore zibaye kenzeni zibarirwa muri enye. Abafite imirima bahingaga yaraye kubera kubura imbuto, ifumbire n’ayo guhemba abaduhingira, abana bacu babuze uko bajya kwiga ubu natwe n’imiryango turashonje. Twategereje ko bayaduha twararambiwe, turi kurara tudasinziriye mbese ibibazo biduteye agahinda ni byinshi”.

Akomeza agira ati, “Ntidusiba kubabaza igihe amafaranga bazayaduhembera, na bo bakadusubiza batubwira ngo twihangane. Byageze n’aho imirimo yo kubaka bayisubika iyo Maternité ituzuye. Ubu inyubako zibereye aho gusa, abazamu bashinzwe kuyicunga ni bo bahasigaye bonyine”.

Bari mu ihurizo ry’imibereho nyuma yo gukora ntibishyurwe

Muri aba baturage barimo n’abagiye baturuka mu zindi Ntara, babayeho mu bukode, kuri ubu bakomeje kuba mu ihurizo ry’ahazava ubwishyu bwa ba nyiri inzu bacumbitsemo; ndetse bamwe ngo ntibakivuga rumwe n’abo basize mu miryango yabo biturutse ku kuba batabasha kubabonera ibibabeshaho.

Umwe mu baturutse mu Ntara y’Amajyepfo agira ati: “Navuyeyo umugore n’abana mbasigayo nitwa ko nje gukorera urugo, nshaka inzu hafi y’akazi ngira ngo byibura njye ngira udufaranga nsagura, ntuboherereze tuve mu mibereho mibi twarimo. Ubu simfite n’igiceri cy’100 yaba ku mufuka cyangwa ahandi hantu aho ariho hose. Inzara itumereye nabi, abo naje guhahira bahora bampamagara kuri telefoni bantabaza ko bagiye kwicwa n’inzara, ndetse byageze n’aho umugore anshinja ko nyahembwa nkayamarira mu bandi bagore n’inzoga nyamara ataribyo koko”.

Akomeza agira ati, “Maze iminsi ntumvikana n’umugore ndetse bigeze n’aho ntakimwitaba kuri telefoni ngo tutavugana nabi. Nibaza niba nakwisubirira mu rugo, ariko natekereza kuhahinguka ntafite na kimwe mbajyaniye nk’umuntu byitwa ko naje gukorera amafaranga, bikanshobera nkahitamo kubyihorera cyane ko nta n’itike nabona ingezayo. Byibura ababishinzwe nibadukurikiranire iby’iki kibazo amafaranga twakoreye tuyishyurwe, turebe uko twongera kwiyunga n’imiryango, twongere tugire umutekano mu ngo zacu. Byongeye kandi n’imirimo yo kubaka yongere isubukure dukore nta ngingimira, bizaba bidufashije”.

Ntibyoroheye umunyamakuru kumenya ingano y’amafaranga abo baturage baberewemo bose hamwe, n’umubare nyirizina wabo, kuko umukozi ushinzwe gukurikirana umunsi ku munsi imirimo yo kuyubaka, atemeye kugira icyo abibwiraho itangazamakuru, n’ubwo mu mvugo ye yiyemerera koko ko hari amafaranga barimo abaturage bahubatse.

Muri aba baturage barimo n’abagiye baturuka mu zindi Ntara

Umuyobozi w’Akarere ka Musanze Nsengimana Claudien, mu butumwa bugufi yasubije binyuze kuri telefoni y’Umunyamakuru, yagize ati “Iki kibazo sinakimenye, reka nshake amakuru ngikurikirane”.

Maternité y’ikigo nderabuzima cya Karwasa, giherereye mu Murenge wa Cyuve, ni imwe muri eshatu ziri kubakwa mu Karere ka Musanze, mu mushinga mugari aka Karere kari gushyira mu bikorwa, wo kwagura ibigo nderabuzima no kubyongerera ireme rya serivisi biha ababyeyi babyara no kuborohereza kubyarira hafi, mu kurengera ubuzima bw’umubyeyi n’umwana.

Ibyo bigo nderabuzima bindi birimo icya Shingiro ndetse n’ikigo nderabuzima cya Rwaza.

Buri Maternité muri zo, izaba igizwe n’ibyumba bisaga 18 birimo ahagenewe kwakirirwa ababyeyi bisuzumisha inda, ahakirirwa abategereje kubyara, aho babyarira, aho kuruhukira nyuma yo kubyara, ibigenewe abaforomo n’ibindi bitandukanye byose bifite ubushobozi bwo guha serivisi ababyeyi bari hagati ya 40 na 60 ku munsi buri imwe. Zose hamwe zikazuzura zitwaye miliyoni zisaga 480 z’amafaranga y’u Rwanda.

Abazunguzayi bagaragara mu bice bitandukanye by’umujyi wa Musanze batembereza ibicuruzwa baba bikoreye ku mutwe

Abo bacuruzi bakunze kugaragara kenshi mu mihanda yo mu Mujyi wa musanze bafite ibyiganjemo imbuto n’ibindi biribwa baba bikoreye ku mutwe cyangwa banabitanditse hasi; bavuga ko ibibazo bibugarije mu miryango nk’ubukene no kuba bamwe baba baratereranywe n’abo bashakanye, bahitamo kuyoboka ubwo bucuruzi kugira ngo babone ibibatunga n’abana babo.

Uwamahoro agira ati: “Umugabo yantanye abana batanu, ubu yibera mu businzi n’indaya ku buryo nta n’igiceri cye cy’ijana nzi. Nk’ubu iyo badufashe turimo dutembereza ibi bicuruzwa baradufunga, tugasiga abana batagira ubamenyera icyo kurya, kwiga kwabo bigahagarara, n’igihe baturekuye tugasanga na bo baragiye kwandagara mu mihanda barabaye inzererezi."

Arongera ati, “Nk’ubungubu baheruka kumfunga, abana bamara iminsi barabuze ibyo barya, kamwe muri bo k’agahungu gakuru k’imyaka 12, kageze igihe katagishoboye kwihanganira induru barumuna bako bagahozagaho, bakabwira ko bashonje, kareka ishuri kayoboka ubuzererezi mu muhanda, kakajya kirirwaga gasabiriza abahisi n’abagenzi. Ikibabaje ni uko na ko bitigeze bigahira, kuko mu gukora umukwabu baragafashe ntungurwa no kubona nako bakansangishije muri Transit center ya Busogo dufungirwamo twembi”.

Akomeza agira ati, “Nyuma y’amezi atatu namazemo, nafunguwe nsanga abana baragize imirire mibi, barataye ishuri bararwaye n’amavunja, mbese babayeho nabi. Abenshi twishora muri ubu bucuruzi tutanze kumvira ibyo Leta idusaba, ahubwo ari ukugira ngo turamuke dore ko ubukene butwugarije”.

Mu bice by’Umujyi wa Musanze hagaragara abazunguzayi benshi

Ubwo bucuruzi, bwakunze kugaragazwa nk’ubuteza akajagari mu Mujyi wa Musanze, kubangamira isuku yawo n’abacururiza mu masoko mu buryo bwemewe kandi batanga imisoro.

Zikaba zimwe mu mpamvu abo bazunguzayi akenshi baba bacunganwa ku ijisho n’inzego zishinzwe kubakumira zirimo n’iz’umutekano.

Urugero rw’umugore Kigali Today iherutse gusanga ari mu gahinda k’uko we na bagenzi be, izo nzego zabasanze aho bari batanditse ibicuruzwa ku muhanda, zirabibambura ndetse bamwe muri bo zirabafata zibajyana kubafunga, icyakora we yarazitorotse n’ubwo ibyo yarimo acuruza byo babimwatse agasigarira aho, avuga ko ubu bucuruzi babukora babizi neza ko butemewe ndetse ngo ntibaba babwishimiye, ariko kubera ubukene bakanga bakabwishoramo.

Ati: “Urushoro rwanjye ni agatelefoni gato ngwatiriza bakanguriza nk’ibihumbi bitandatu nkarangura amacunga cyangwa ibinyomoro nkabitembereza, nagira amahirwe yo kunguka nk’1000 akaba ariyo mpahiramo abana. Ubwo rero iyo ngize ibyago bakamfata bakabijyana, mpita nsubira hasi ari telefoni baba bagwatiriye ndetse n’ibyo naranguye nkabihomba”.

Arongera ati, “Nk’ubu uyu munsi nahombye ibihumbi 7 kuko bamfashe nkimara kuyashora mu kurangura ibyo gutembereza. Ndabizi neza ko mba ndi mu makosa, ariko aho kugira ngo nibe iby’abandi cyangwa ngo ndwaze abana bwaki byaruta nkaza ahangaha nkacuruza. Nindamuka nanaronse utundi dufatanga, ari ejo cyangwa ejo bundi nzongera mbugarukemo kuko nta yandi mahitamo mfite”.

Gucururiza ahabonetse hose ubuyobozi bubifata nk’akajagari. Uyu muzunguzayi yari yateretse imbuto mu nzira igenewe kunyurwamo n’abanyaguru

Ubwo isoko ry’ibiribwa rya Musanze ryubakwaga, bagiye bizezwa kenshi n’ubuyobozi ko bazabonamo imyanya igenewe ab’amikoro macye.

Niyibaruta Anonciata agira ati: “Ab’ahandi babubakira amasoko bakanabaha igishoro, ariko twebwe twibaza niba ubuyobozi bujya bwibuka ko tubaho byaratuyobeye. Nk’ubu muri ririya soko rishyashya batubwiraga ko bazatugenera ahantu tuzajya dukorera hajyanye n’ubushobozi bwacu buke, ariko ubwo batomboraga ntibigeze batwereka ngo ni aha n’aha, n’abagerageje kujya gutombora bose igisubizo babonaga ni oya nta kindi”.

Undi muturage agira ati: “Bakwiye kubakusanyiriza mu matsinda bajya bakoreramo aho kugira ngo bajye bahora bahanganye n’abashinzwe umutekano, bagerekaho no kubambura ibyo baba barimo gucuza, byongeyeho no kubafungira aho bamara amezi atatu batari mu miryango yabo”.

Ni ikibazo ubuyobozi bw’Akarere ka Musanze bwemeza ko buzi, cyane ko ubwo imyanya yo muri iri soko yahabwaga abatanze ubusabe bwo gukoreramo, babaye benshi bagera mu bihumbi bisaga bitanu, mu gihe ryo ubwaryo rifite ubushobozi bw’ibisima bigera mu bihumbi bibiri.

Ubuyobozi bw’Akarere ka Musanze bwemeza ko buzi iki kibazo cy’abazunguzayi

Uwanyirigira Clarisse, Umuyobozi w’Akarere ka Musanze wungirije ushinzwe iterambere ry’ubukungu. Agira ati: “Nk’uko byumvikana umubare w’ibisima wabaye mutoya ugereranyije n’abari babikeneye, byagaragaye ko abaturage bacu bafite inyota yo gucuruza biduha undi mukoro. Turimo gukorana n’umufatanyabikorwa Enable mu kunoza umushinga wo kuzubaka ikindi gice kizajya ahakikije rirya soko ariko cy’agateganyo, ku buryo twizera ko nibura hazunganira ririya abatari bafite aho gukorera bahabone.

Akomeza akangurira abaturage by’umwihariko no kwitabira amahirwe y’inguzanyo igenewe ab’amikoro mato isabirwa ku rwego rwa buri Murenge muri gahunda ya VUP Financial Services, aho umuturage akora umushinga agahabwa ibihumbi 200 nta n’ingwate atanze, akaba yayibyazamo umushinga muto umuteza imbere; akazayishyura ku nyungu ya 2% gusa.

Igihembo cya Moto bahawe ku bwo kwita ku isuku no kurwanya imirire mibi, kizabafasha kuzuza n’izindi nshingano

Yitabiriwe binyuze mu kugaragaza impano z’imikino itandukanye, biganisha ku kubungabunga ubuzima bwiza no gutanga ubutumwa bukangurira abaturage kwita ku isuku n’isukura ndetse no kwibungabungira umutekano nk’izingiro ryo kurwanya ibiyobyabwenge, imirire mibi, amakimbirane mu miryango.

Ni igikorwa abaturage bo mu Karere ka Burera bagereranya n’ishuri ryabakebuye.

Muteteri Donatha agira ati: "Aya marushanwa twabonye ari nk’ishuri ryadufashije kwikebuka tumenya byimbitse aho tugifite intege nkeya n’uko twavugurura imyitwarire y’uburyo ki bwo gutegurira abana bacu indyo yuzuye. Bamwe muri twe wasangaga duhugira mu gushaka imibereho, umwanya dukoresha mu kwita ku byatuma abana bacu bakura neza tukawugira mutoya. Tumaze iminsi twigishwa uburyo ki dushobora guhuza gahunda zose zireba umuryango nta gikorwa na kimwe kibangamiye ikindi, imibereho y’abagize urugo uhereye ku bana ikaba myiza bityo n’imirire mibi igacika".

Imiryango ifite abana bahoze bari mu mirire mibi yorojwe amatungo magufi harimo n’inkoko ngo bifashe kuva mu mirire mibi byihuse

Ikibazo cy’imirire mibi, igwingira n’isuku nke bikunze kugaragara hamwe na hamwe muri aka Karere, bitizwa umurindi na bamwe mu bagifite imyumvire yo kwishora mu biyobyabwenge na magendu, biteza n’amakimbirane mu miryango, ubusinzi, ihohoterwa cyangwa urugomo.

Muri ubwo bukangurambaga bwanyujijwe mu marushanwa y’imikino yagiye ahuza ibyiciro bigizwe n’urubyiruko, abatwara abagenzi ku magare n’ababatwara kuri moto, abahoze mu biyobyabwenge bakaza kubireka ndetse n’icyiciro cy’Abapolisi.

Umuyobozi w’Akarere ka Burera wungirije ushinzwe Iterambere ry’ubukungu, Nshimiyimana Jean Baptiste, yagize ati: "Twateguye aya marushanwa nk’uburyo abantu bahuriramo ari benshi, bakidagadura, bagasabana ariko kandi bakanaboneraho kungurana inama n’ubumenyi bw’ibibagirira akamaro. Imirenge y’Akarere ka Burera harimo n’ikora ku mupaka, bikenewe cyane ko abaturage tubaba hafi no kwibukiranya mu buryo buhoraho ibifasha imiryango kubaho neza kandi itekanye".

Uburyo bw’imikino bwifashishijwe mu gukebura abaturage kwitabira isuku no kurwanya imirire mibi

Umurenge wa Butaro wahize indi mirenge unahembwa moto ibarirwa mu gaciro k’asaga miliyoni ebyiri ndetse Akagari ka Rusumo nako kahize utundi Tugari tw’aka Karere, gahembwa igihembo cy’amafaranga angana na miliyoni imwe y’u Rwanda.

Umunyamabanga nshingwabikorwa w’Umurenge wa Butaro, Kayitsinga Faustin avuga ko batagiye kwicarana ibyo bihembo ngo bumve ko bageze iyo bajya.

Ati: "Twashyizeho uburyo bwo kubungabunga isuku duhereye mu ma centre y’ubucuruzi, tugenda dufata buri ngo nibura 10 dushyiraho ibikoresho bigenewe kujugunywamo imyanda, ku buryo amashashi, amacupa n’indi myanda byabaga byandagaye hirya no hino, abaturage bagiye bigishwa buri wese agasobanukirwa ko ikintu cyose cyandagaye hasi kitari itaka kiba ari umwanda, naho ikinyanyagiye mu busitani kitari ubwatsi kiba ari umwanda; Ibyo bakabijyanirana no kubungabunga isuku yo mu ngo, ibikoresho no ku mubiri".

Aya marushanwa yateguwe ku bufatanye bwa Polisi y’u Rwanda

Akomeza agira ati, "Naho mu kurwanya imirire mibi ho, ubu bukangurambaga twabutangiye dufite abana 23 bari mu mirire mibi, dushyiraho ikigega abaturage bagiye bakusanyirizamo ubushobozi bw’amafaranga, amaze kugwira tuyaguramo amatungo magufi harimo n’inkoko zitera amagi, tuzishyikiriza imiryango y’abo bana bagaburirwa amagi, imirire mibi bayivamo. Ni uburyo twabonye dukwiye gukomeza kugira umuco, mu guhangana n’ibibazo nk’ibyo biba byugarije abantu".

Ibyo bihembo ngo bagiye kubiheraho barusheho guhanga udushya, cyane ko ngo hari gahunda nyinshi zirimo iy’Igitondo cy’Isuku, Irondo ry’Umwuga zasabaga ko zikurikiranirwa hafi mu buryo bwo kuzishyira mu bikorwa, bikagora abakozi babishinzwe kuko babaga badafite uburyo buborohereza mu rugendo.

Abaturage bari bitabiriye isozwa ry’aya marushanwa

Aya marushanwa yateguwe ku bufatanye bwa Polisi y’u Rwanda muri gahunda yo kwimakaza umutekano, isuku n’isukura ndetse no kurwanya imirire mibi.

Hari gutekerezwa buryo ki yajya abaho nibura inshuro ebyiri buri mwaka, mu kurushaho kubaka umuco uhoraho mu baturage, wo gukumira ibibangamiye iterambere n’imibereho myiza y’umuryango.

Abakora muri VUP bavuga ko kutabahembera igihe bidindiza iterambere ryabo

Mu Kagari ka Cyahi mu Murenge wa Rugarama mu Karere ka Burera, abagenerwabikorwa ba VUP basaga 280 bahakorera imirimo bahemberwa yo gusibura ibyobo n’imigende amazi anyuramo, ku nkengero z’umuhanda uri muri ako gace uturuka ku Birunga, bakanacukura imiringoti mu mirima yaho mu gukumira amazi y’imvura akunze guturuka muri ibyo Birunga akangiza ibikorwa by’abaturage.

Aba ariko ni kenshi bakora, amafaranga bakoreye ntibayahemberwe ku gihe nk’uko umwe muri bo abivuga, ati: “Mu busanzwe biba biteganyijwe ko baduhembera amafaranga tuba twakoreye buri minsi 10, ariko tukagira ikibazo cy’uko icyo gihe irengaho indi minsi ndetse ikaba yakwikuba tugitegereje kubona ibyo birararane”.

“Ba nyiri butiki tubahoramo amadeni twananiwe kwishyura. Mituweli na zo kuzishyura twabiburiye ubushobozi, umwana ikaramu cyangwa ikayi ishiranye, kubona n’igiceri cya 100 cyo kubisimbuza usanga na byo binanira benshi. Inzara itumemereye nabi byitwa ngo dukora akazi duhemberwa. Abadushinzwe rwose bakomeje kuturangarana twarayobewe. Bakwiye kudukemurira iki kibazo!”

Buri wese mu bakora imirimo bahemberwa, muri gahunda igamije guhindura imibereho y’abaturage no kubakura mu bukene iyo agitangira asinya inyandiko ikubiyemo imihigo, yiyemeza ko agomba gukoresha neza amafaranga akomoka ku mirimo aba yarahawe gukora muri iyo gahunda, nibura mu myaka ibiri mbere y’uko acutswa.

Gusa ku bw’aba baturage, bo ngo ukurikije imbaraga bashora muri iyo mirimo, n’umusaruro wakabaye uyivamo batabonera igihe, icyizere cyo kwesa iyo mihigo kigenda kiba gikeya.

Ati: “Mu guhiga iyo mihigo twiha intego y’uko amafaranga baduhemba tuba tugomba kuyabyaza umusaruro tukivana mu bukene. Nk’ubu hari bagenzi bacu bateganyaga korora, abandi imishinga y’ubuhinzi cyangwa ubucuruzi; ariko ukuntu batwishyura bigoranye ukabona ko kubahiriza ibyo twiyemeje tutabishobora.”

Mu biganiro nyunguranabitekerezo biherutse kubera mu Karere ka Musanze bigahuza Ikigo gishinzwe guteza imbere ibikorwa by’Iterambere mu Nzego z’Ibanze (LODA) n’abayobozi mu nzego zitandukanye ku rwego rw’Uturere tugize Intara y’Amajyaruguru zirebwa n’ishyirwa mu bikorwa rya gahunda zigamije gufasha abaturage kwikura mu bukene, iki Kigo cyari cyagaragaje ko mu Turere tugize iyi Ntara, bigaragara ko tutishyuriye ku gihe bamwe mu bagenerwabikorwa ba VUP turimo aka Burera kari karishyuye ku kigero cya 29%, aka Gicumbi kari kuri 71% mu gihe Akarere ka Gakenke kari kuri 80%.

Maurice Nsabibaruta, Umuyobozi muri LODA ushinzwe iterambere ry’umuturage, ari na we uherutse kubigarukaho, yagize ati: “Uko kuba hari amafaranga akiri kuri konti z’Uturere, nyamara bakagombye kuba barayahawe biteye kwibaza icyatumye adakoreshwa akagumishwa kuri konti. Ababishinzwe bakwiye kuba bishyira mu mwanya w’abo yari agenewe, bagaha uburemere ingaruka baterwa no kuba batayabonera igihe.”

Zimwe mu mpamvu zagarutsweho, ni nko kuba hamwe na hamwe abashinzwe gutanga raporo bakorera ku rwego rw’Imirenge bakunze gutinda kuzuza amakuru muri sisiteme abagenerwabikorwa ba VUP bahemberwamo, ndetse n’imitangire y’amasoko ikunze kuzamo ubukererwe.

Mu gushaka kumenya icyo ubuyobozi bukomeje gukora mu guha iki kibazo umurongo, cyane ko bwari bwaniyemeje ko mu cyumweru kimwe gikemurwa, Umunyamabanga Nshingwabikorwa w’Intara y’Amajyaruguru, Pascal Ngendahimana yabwiye Kigali Today ko ubu, Akarere ku kandi, ababishinzwe bakomeje kunoza ibyaburaga ndetse ko amafaranga yatangiye gukoreshwa.

Abakoze muri VUP batarishyurwa barizezwa ko iby’ingenzi bisabwa birimo kunozwa kugira ngo bishyurwe

Ati: “Navuga ko hatangiye guterwa intambwe aho ubu ibyaburaga n’ibisabwa byose ababishinzwe mu Turere bakomeje kubyegeranya ndetse aho bishoboka agenda ashyikirizwa abagenerwabikorwa, aho nko mu Karere ka Burera bageze ku kigero cya 90%, Akarere ka Musanze 63%, Rulindo 84% Gakenke na bo bageze kuri 62%.”

“Ni gahunda dukomeje gushyiramo imbaraga kugira ngo n’abo atarageraho bikemurwe kandi icy’ingenzi turebaho cyane cyane, ni ukwitwararika umurongo n’amabwiriza biba bigomba kugenderwaho ngo ahabwe abo agenewe. Duhereye ku ho buri Karere gahagaze hagendewe ku ijanisha rigenda ryiyongera umunsi ku munsi, twizeza abatari bakabonye amafaranga bagenewe kuzayabona nta bundi bucyererwe bubayeho.”

Muri rusange gahunda zigamije gufasha abaturage kwikura mu bukene hagendewe ku ntego zari zikubiye muri NST1 Nsabibaruta avuga ko hari umusanzu ufatika zatanze, bikagaragazwa n’ibipimo byagabanutse mu buryo bufatika, ariko ngo byanze bikunze ni ngombwa gukuraho inzitizi zose no gukosora ibitagenda, kugira ngo n’umusaruro witezwe mu cyerekezo cyo gukura abantu mu bukene mu ntego za NST2 uzagerweho.

Hagaragajwe isano riri hagati ya Hotel Muhabura n’itangiriro ry’ubukerarugendo mu Majyauguru

Iyi Hotel ibitse amateka y’amwe mu mazina y’abantu bamamaye cyane mu Rwanda barimo Umushakashakashatsi w’umuhanga mu by’ubuzima bw’Ingagi, Dian Fossey wamenyekanye ku izina rya Nyiramacibiri, akaba ariyo yacumbikagamo ubwo yabaga yaje mu Rwanda mu bushakashatsi yahakoreraga burebana n’imibereho y’Ingagi zo mu Birunga n’uburyo bwo kuzibungabunga; hakaba n’Umwami Rudahigwa Mutara III wayicumbikagamo ubwo yabaga yaje bikorwa byo guca imanza no gukemura impaka.

Rusingizandekwe Gaudence yagize ati: “Yubatswe n’umuzungu wari Umukoroni w’Umubiligi mu 1954, ayitangiza yitwa Mimosa. Yayakiriragamo abazungu bene wabo bonyine. Nta wundi muntu w’umwirabura wari wemerewe kuyikandagiramo uretse abazungu; yewe no ku bwinjiriro bwayo bari barahamanitse ibyapa bibuza umuntu wese w’umwirabura aho aturuka hose ndetse n’imbwa kuyikandagizamo ikirenge. Ku bw’uwo muzungu cyari ikizira”.

Rusingizandekwe Gaudence, ahagaze imbere y’icyumba Dian Fossey yararagamo ubwo yabaga yaje mu Rwanda kuhakorera ubushakashatsi ku mibereho y’Ingagi

Ngo n’ubwo byari bimeze bityo ariko, iyo byageraga ku Munyarwanda witwaga Rusingizandekwe Otto, ari na we mubyeyi wa Rusingizandekwe Gaudence, we yemererwaga kuyinjiramo, kuko yari n’umushefu wakoraga imirimo inyuranye kandi ikomeye ari n’injijuke; abandi birabura n’Abanyarwanda bakayihezwamo kubera kubanena.

Ibi ngo byarakazaga cyane Rusingizandekwe, binamutera umuhate wo kuzayigura akayegukana agira ngo abone uburyo bwo guca agasuzuguro abirabura bashyirwagaho n’abazungu muri icyo gihe aho bahoraga babatesha agaciro barabahinduye insuzugurwa. Ndetse mu mwaka w’1968 ibyari inzozi za Rusingizandekwe Otto byaje kuba impamo, Hotel ayigura n’uwo muzungu wari usubiye iwabo mu Bubiligi, akimara kuyegukana anayihindurira izina ayita Hotel Muhabura.

Bamwe mu bakozi bayo bari mu gahinda batewe n’uko aho bavanaga amaramuko hangiritse

Umukobwa we unayiyobora Rusingizandekwe Gaudence, akomeza avuga ko Se yakunze kubabwira ko mu kuyita Muhabura, yabihereye ku kuntu yabonaga Ikirunga cya Muhabura, nk’igifite umwihariko w’ubwiza mu buryo bugaragarira amaso y’umuntu wese wageraga mu byice byinshi by’Amajyaruguru y’u Rwanda n’imiterere yacyo ihebuje ugereranyije n’uko ibindi birunga byari bimeze.

Ibi ngo yatekerezaga ko igihe kimwe iki kirunga n’ibindi byegeranye nacyo bizahinduka isoko y’ubukerarugendo cyane ko uko imyaka yagiye ikurakiraho usibye kuba Hotel Muhabura, yaracumbikagamo Dian Fossey n’abandi bafatwaga nk’abakomeye muri icyo gihe, na nyuma yaho ingeri zinyuranye yaba ku bava mu mahanga no mu gihugu imbere bakunze kuyigana.

Igice cyibasiwe n’inkongi ibyarimo byahatikiriye

Ibyari mu nyubako byose byakongotse ntibagira icyo baramura

Iyi Hotel ibarizwa mu Mudugudu wa Mubuga Akagari ka Rwebeya mu Murenge wa Cyuve, ubwo yafatwaga n’inkongi y’umuriro, ibyarimo byose bigizwe n’ibikoresho byifashishwa mu gikoni, harimo ibyuma bikonjesha, amashyiga akoranywe ikoranabuhanga yifashishwa mu mirimo yo guteka, ibinyobwa by’amoko anyuranye byari mu bubiko, ibiribwa, intebe, ameza n’ibindi bikoresho by’agaciro byatikiriyemo.

Rusingizandekwe agira ati: “Byari ibikoresho byinshi cyane, birimo za frigo, congerateur, cuisinière, micro onde, congerateur zirimo ibiribwa, za riquer n’amoko y’inzoga ntarondora; mbese ibintu byose bigize igikoni yaba amasafuriya n’amadongo byose twakoreshaga byahiye birashonga [....]. Na n’ubu agaciro kabyo turacyakabarura, biri kudusaba kwibukiranya n’abandi bakozi, ntiturabirangiza”.

Ibikoresho byose byari mu nyubako yafashwe n’inkongi byatikiriyemo

Akomeza agira ati, “Ahafashwe n’inkongi twahafataga nk’ah’ingenzi cyane mu buzima bwa Hotel, hangiritse cyane, haduteje igihombo gikomeye. Gusa icyo nashimira Imana ni uko nta wakomerekeyemo cyangwa ngo apfiremo kuko byo iyo biba byari kuba ibindi bindi. Ugereranyije ubukana bukaze iyi nkongi yari ifite, ukareba n’ibyo yangirije, yari ikomeye cyane”.

N’ubwo kubisana bizamusaba iminsi kugeza ubu na we ataramenya uko ingana, ku bw’amahirwe ye ngo yaba inyubako n’ibyarimo yari yarabishyize mu bwishingizi. Akizera neza ko mu gihe kidatinze inzego zibishinzwe zirimo na sosiyete y’ubwishingizi akorana na yo, hakorwa igenzura ry’ibangiritse hamwe n’andi makuru yose akenewe agakusanywa agashumbushwa ibyangiritse.

Inyubako igizwe n’igice batekeragamo, Bar, Resitora, n’ububiko ni yo yatwitswe n’inkongi

Ati: “Ntabwo birangiriye aha. N’ubwo iyi mpanuka y’inkongi idukomye mu nkokora, ikaba yankomerekeje cyane mu buryo bw’amarangamutima, byongeye tukaba tugiye kumara iminsi tudakora, ntabwo ncitse intege cyane. Mfite icyizere cy’uko ibintu bitazatinda gusubira mu buryo kuko dufite ubuyobozi bwiza, butureberera”.

Arongera ati, “Mu myaka yose twari tumaze dukora, ni ubwa mbere duhuye n’isanganya nk’iyingiyi, byadutunguye, ntituramenya icyayiteye. Polisi yaje iradutabara izana na za kizimyamoto barara bazimya bucya hatagishya”.

Ubwo iyo mpanuka yabaga mu ma saa yine z’ijoro ryo ku wa mbere tariki 14 Ukwakira 2024 Polisi yahanganye n’iyo nkongi, iyizimya ahagana mu ma saa saba z’ijoro.

Polisi y’u Rwanda igaragaza ko mu Ntara y’Amajyaruguru mu mezi atandatu ashize habereye Impanuka 31 z’inkongi z’umuriro

Mu Ntara y’Amajyaruguru hakunze kumvikana ahabera inkongi, Polisi ikabiheraho yibutsa abantu kujya birinda ikintu cyose cyaba nyirabayazana wayo, kandi igihe cyose inabayeho bakihutira gutanga amakuru kugira ngo ubutabazi bukorwe itarangiza byinshi.

Mu mezi atandatu ashize muri iyi Ntara, habaruwe impanuka z’inkongi 31 zirimo izibarirwa muri 7 zabereye mu Karere ka Musanze, izigera ku 8 zabereye mu Karere ka Gakenke. Ni mu gihe Akarere ka Gicumbi ho habereye inkongi 3 Rulindo habera 4 naho Burera ho habera impanuka 9.

Nyiri Hotel Muhabura avuga ko yari asanzwe yarashyize inyubako n’ibikoresho byibasiwe n’inkongi mu bwishingizi

Mu butumwa bwagarutsweho n’Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza, bwitsa cyane ku gushishikariza abantu gukumira inkongi no kwitabira gushyira ibikorwa byabo birimo n’iby’ubucuruzi mu bwishingizi.

Nanone kandi abaturage cyane cyane bakorera ahahurira abantu benshi bahamagarirwa gutunga ibikoresho by’ibanze byifashishwa mu kuzimya inkongi bigizwe na za kizimyamoto kuko iyo ibayeho bibafasha kwikorera ubutabazi bw’ibanze mu gihe baba bagitegereje ko inzego zishinzwe gutabara zibageraho.

Hagaragajwe ko amakoperative aramutse acunzwe neza yagirira akamaro abanyamuryango bayo

Mu gika cya mbere cy’Ingingo ya 57 y’iryo Tegeko rishya ryasohotse ku wa 20/06/2024, ivuga ko Abagize inzego z’Ubuyobozi n’abakozi ba Koperative bagomba kujya bamenyekanisha imitungo yabo ku Kigo cy’Igihugu gishinzwe Amakoperative.

Ni itegeko rifatwa nk’irizarushaho guca intege abari barazihinduye nk’uturima twabo banyunyuzaga imitsi y’abanyamuryango bazo.

Dr Patrice Mugenzi, Umuyobozi Mukuru w’Ikigo cy’Igihugu Gishinzwe Guteza Imbere Amakoperative agira ati: “Uku kumenyekanisha umutungo kw’abayobora amakoperative n’abakozi bazo, bizakumira ibibazo byabagaho byo kwigwizaho umutungo, cyane ko bizanajyanirana no kuwugenzura harebwa niba ibyo batunze bitaravuye mu mitsi ya Koperative”.

“Ikindi ni uko muri iri tegeko hakajijwe n’ibihano byahabwa umuntu wese bishobora kugaragara ko hari imitungo afite ifitanye isano n’umutungo wa Koperative. Bityo rero, dufatanyije n’izindi nzego zirimo iz’ubutabera, iz’umutekano n’iz’ibanze zegereye abaturage, twiteze ko akajagari ka ba bihemu bajyaga bishingikiriza iturufu y’ubuyobozi cyangwa kuba bayifitemo ijambo bakanyunyuza imitungo ya Koperative bayibyaza ibiri mu nyungu zabo birengagije iz’abanyamuryango kazagabanuka bifatika”.
Bamwe mu banyamuryango b’amakoperative, barimo abigeze kugira ibibazo by’imitungo ya Koperative yanyerejwe bisanga ubukungu bwayo buri hasi, ku buryo na n’ubu bagihanganye n’izo ngaruka.

Urugero rwa hamwe, ni muri Koperative yitwa Twihangire Umurimo (COTUMU), igizwe n’abanyamurango babarirwa mu 1100, yigeze kugwa mu gihombo cya Miliyoni zisaga 300 z’amafaranga y’u Rwanda hagati y’umwaka wa 2019-2021, zinyerejwe n’abahoze bayiyobora.

Abanyamuryango b’amakoperative babonye umwanya wo kugaragaza ibyo bakora n’icyo bungukiramo

Umwe mu banyamuryango bayo agira ati: “Abarimo abayobozi b’abari abakozi bayo banyereje amafaranga menshi aho bimariye kumenyekana ko hari ayo bafataga bagahimba inyandiko ziyitirira ko yagurijwe abanyamuryango nyamara ari bo ubwabo bayijyaniye, izindi mpapuro zari zikubiyemo amakuru y’umutungo wa Koperative barazirigisa ku buryo hari umutungo mwinshi kugeza na n’ubu tutaramenya uko wanganaga twaburiye irengero. Bamwe bahise batoroka bahunga ubutabera, abandi barafatwa barafungwa”.

“Byasize Koperative mu gihombo gikomeye, abanyamuryango ducika intege, imyumvire yacu ku byiza bya koperative isubira hasi, tuyitakariza icyizere turayizinukwa abandi bayigumamo ku bw’amaburakindi. Usibye ingaruka mu buryo bw’amafaranga twahuye na zo, hari n’uruganda twari dufite rwatunganyaga Kawunga rwahombye burundu kugeza ubu imashini ziracyaparitse nyamara rwarakoraga”.

Ku ruhande rw’abayobozi b’amwe mu makoperative, na bo basanga hari byinshi bifatika iri tegeko rishya rije kurengera nubwo ku rundi ruhande hari ababitekereza ukundi.

Umwe muri bo agira ati: “Rizadufasha gukora tudafite umutima wo kwigwizaho ibya rubanda, dukore twitwararika amategeko”.

Bamwe ariko bo, ngo bashingira ku kuba hari abayobora za Koperative basanzwe bafite imitungo bakomora ahandi. Hari uwagize ati “Nk’abantu akenshi baba baranasezeranye ivangamutungo risesuye, mfite impungenge ko mu kugenzura uwo mutungo bashobora kuwitirira nyiri ugukorerwa igenzura nyamara wenda ukomoka mu byo uwo bashakanye yinjiza, bityo rikaba ryagonga abantu”.

Umuyobozi w’Intara y’Amajyaruguru Mugabowagahunde Maurice, avuga ko ubuyobozi buzakomeza gukurikiranira hafi ko ibikubiye muri iri tegeko rishya impande zose zirebwa na ryo ziryubahiriza.

Mu bindi abanyamuryango ba za Koperative babona nk’umusaruro witezwe muri iri tegeko rishya, ni ukwigenga kwa Koperative bitandukanye n’uko mbere wasangaga hari izabaga zifite abafatanyabikorwa ugasanga ari bo bazigiramo ijambo kurusha abanyamuryango bazo, bakazibamo nta bwisanzure bafite, batanahabwa urubuga rusesuye bafatiramo ibyemezo, bigasa n’aho bahejwe mu kuyigiramo ijambo.

Ibi kandi binajyana no kuba igihe abayobozi bamaraga ku buyobozi cyarongerewe kikava ku myaka itatu kikagezwa ku myaka itanu, ibishobora kuzajya bituma abatorewe imyanya mu buyobozi bwayo bagira igihe gihagije cyo gukora no kugira urwego rufatika bagezaho Koperative.

Iri tegeko kandi rinaha za Koperative urubuga ruhagije rwo kugira indi mirimo zishobora gukora ibyara inyungu, bikazifasha kugira urwunguko rufatika rwazigeza ku rwego rwo kujya zigenera abanyamuryango bazo ubwasisi bufatika.
Kugeza ubu mu Rwanda habarurwa Koperative 10,676 zibumbiyemo abanyamuryango basaga Miliyoni eshanu.

Abayobozi mu nzego zitandukanye mu Gihugu baherutse kwitabira igikorwa cyo kwizihiza Umunsi Mpuzamahanga w’Amakoperative

Hatangajwe bimwe mu byangijwe n’inkongi yibasiye Hotel Muhabura

Mu masaha ya saa yine z’ijoro ryo kuwa mbere Tariki 14 Ukwakira 2024, nibwo inyubako z’iyi Hoteli zafashwe n’inkongi y’umuriro, bikavugwa ko wahereye mu gice cy’aho batekera ugakongeza n’ibindi bice.

Muri ayo masaha, umuriro mwinshi cyane byagaragaraga ko urimo uturuka mu nyubako zayo zitandukanye, wagurumanaga ndetse ukanagaragarira mu kirere cy’aho iyi Hoteli yubatse.

Polisi y’u Rwanda Ishami ryayo rishinzwe kuzimya inkongi y’umuriro yitabajwe, ibikorwa byo kuyizimya hifashishijwe imodoka za kizimyamoto bihita bitangira, bigeza mu ma saha ashyira saa saba z’ijoro ubwo butabazi bugikorwa ari nabwo yabashije kuyizimya.

Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza, avuga ko icyateye iyi nkongi kitaramenyekana iperereza rikaba rigikomeje.

Yagize ati: "Ku bw’amahirwe nta muntu yahitanye cyangwa ngo akomeretswe na yo n’ubwo ibyangijwe na yo ari byinshi cyane".

Ntiharamenyekana agaciro k’ibyangijwe n’uwo muriro, nk’uko SP Mwiseneza yakomeje abivuga. Icyakora urebye ubukana wari ufite mu gihe wakaga, bigaragarira ku nzu zarimo zishya n’ibyarimo, bishoboka ko ibyahatikiriye bibarirwa muri za miliyoni.

Iyi Hoteli iherereye mu Mudugudu wa Mubuga Akagali ka Rwebeya Mu murenge wa Cyuve Akarere ka Musanze iri mu ma hoteli abarurwa mu Karere ka Musanze yabimburiye izindi mu kuhubakwa. Kugeza n’ubu ikaba iganwa n’umubare munini wiganjemo ba mukerarugendo baturuka hanze baba baje mu Majyaruguru kuhasura ibyiza nyaburanga birimo n’Ingagi zo mu Birunga

SP Mwiseneza yakanguriye abaturage kwirinda ikintu icyo aricyo cyose cyaba nyirabayazana w’Impanuka y’Inkongi y’Umuriro.

Ati: "Inkongi y’umuriro itwara ubuzima bw’Abantu ndetse igatera ibihombo. Abantu nibirinde ikintu cyose cyayitiza umurindi kandi barusheho kwitabira gushyira ubucuruzi bwabo mu bwishingizi, kuko babukora batekanye n’igihe cyose bwagerwaho n’ibiza nk’ibi bagashumbushwa".

Iyi nkongi ngo yaba yahereye ahagenewe gutegurirwa amafunguro

Umuvugizi wa Polisi y’u Rwanda mu Ntara y’Amajyaruguru, SP Jean Bosco Mwiseneza yemeje iby’iyi nkongi agira ati: "Nibyo Koko hari igice cyafashwe n’inkongi cy’iyo Hoteli, ubutabazi bw’ibanze bujyanye no kuyizimya burimo burakorwa. Ibindi birebana na yo turacyabikurikirana".

Iyi Hoteli yubatswe hafi y’ibiro by’Akarere ka Musanze, ifatwa nk’imwe mu zubatse izina ahanini bishingiye ku kuba iri mu zabimburiye izindi mu kubakwa mu mujyi wa Musanze, kugeza ubu ikaba iganwa n’abiganjemo abanyamahanga akenshi baba bagenzwa n’ibikorwa bishingiye ku bukerarugendo.

Zimwe mu nyubako za Hotel Muhabura zafashwe n’inkongi bivugwa ko yahereye mu gikoni

Mu Rwanda habarirwa Koperative zigera mu bihumbi 10

Ni ubutumwa yagarutseho ku wa gatanu tariki 11 Ukwakira 2024, mu kwizihiza Umunsi Mpuzamahanga w’Amakoperative, wabereye ku rwego rw’Igihugu mu Karere ka Musanze.

Ku nshuro ya 19 uyu munsi wizihizwa mu Rwanda, usanze benshi mu banyamuryango b’amakoperative bishimira urwego rw’iterambere zabagejejeho.

Hitayezu Eudecie, umunyamuryango wa Koperative IAKIB, ihuje aborozi ba kijyambere babarirwa mu 4000 bakorera mu Karere ka Gicumbi, agira ati: “Twatangiye turi 300 bisa n’aho dupfundikanya, tugenda twaguka aho ubu dufite inganda eshatu zitunganya umusaruro w’ubuhinzi n’ubworozi n’iziwongerera agaciro, tukagira n’amakusanyirizo. Tubikesha Leta yaduhaye umutekano ikanashyiraho Politiki zituma abanyamuryango tumenya umumaro wo gukorera hamwe, no gushaka amasoko tugenda dukura tugera kuri urwo rwego”.

Abanyamuryango b’Amakoperative babonye umwanya wo kugaragaza ibyo bakora n’icyo bungukiramo

Akaomeza agira ati, “Nari umukene ntanatekereza kuzigera mbuvamo. Ariko aho ngereye muri Koperative nkanayiboneramo akazi kampemba buri kwezi, byamfashije guhindura imibereho, ngura amatungo norora kijyambere, niyubakira inzu, ngira umuryango kandi nteganya n’indi mishinga myinshi mu gihe kiri imbere”.

Uwimana Betty, ubarizwa muri Koperative KOPAKAMA yibumbiyemo abahinzi 1062 ba Kawa, ikorera mu Karere ka Rutsiro, agira ati: “Kuba amakoperative yitaweho kandi ashyigikiwe, bikomeje kuzamura iterambere ry’abayabarizwamo by’umwihariko b’abagore. Twarahumutse tumenya agaciro ko gukorera hamwe. Ubu abana turabarihira amashuri, duhahira ingo, turishyura za Mituweli, tugana ibigo by’imari tukabitsa tukanagurizanya; mu by’ukuri icuraburindi twararisezereye ubu tumeze neza”.

Amakoperative yishimira iterambere amaze kugeraho

Mu makoperative abarizwa mu Rwanda arimo ayibanda ku buhinzi, ubworozi, ubukorikori, gutwara abantu n’ubwikorezi, ubucukuzi bw’amabuye y’agaciro, kubitsa no kugurizanya, ubwubatsi n’izindi serivisi zitandukanye; aya agafatwa nk’afatiye runini Igihugu n’abanyamuryango bayo bigaragarira mu mubare munini w’imirimo yahanzwe kubera yo, ubwiyongere bw’umusaruro, iterambere ry’abanyamuryango ubwabo, iry’inganda n’ibyoherezwa mu mahanga.

Zimwe mu ngorane zakunze kugaragara nk’izadindije amwe n’amwe ariko, harimo imicungire itanoze, yagiye inateza inyerezwa ry’umutungo w’abanyamuryango, bakabihomberamo bamwe bikabakururira ubukene n’ubwo ababigiragamo uruhare bakomeje guhagurukirwa.

Urugero rugarukwaho muri iyi nkuru ni urwa bamwe mu bahoze muri Koperative COVATRAMO, iri mu makoperative yahoze ahuriyemo abatwara abagenzi kuri moto yabarizwaga mu Karere ka Musanze yasheshwe kubera imicungire mibi.

Abayobozi basobanurirwa bimwe mu byo amakoperative akora

Hitimana Selaphin agira ati: “Abatuyoboraga itarasenyuka, bari baratudindije bahora badusaba kwishyura amadeni y’imyenda tutabaga twaramenyeshejwe aho yafashwe n’igihe yafatiwe bikaduhoza mu bukene. Wibaze ko hari ideni bigeze kudutura ku mutwe rya Miliyoni 50 baduhatira kuryishyura mu gihe cy’imyaka itatu, na yo yaje kurengaho ikagera mu myaka irindwi tucyiryishyura, iryo deni hamwe n’urundi ruhuri rw’ibibazo byari bitwugarije bigera aho biturenga twitabaza ubuyobozi bikaba biri no mu byayiviriyemo guseswa”.

Yunzemo agira ati, “Imicungire mibi ya Koperative ituma abanyamuryango bacika intege kugera ku rwego bumva ko ntacyo ibamariye. Nta cyizere baba bakiyifitiye kuko n’ubundi iyo irangwa n’imikorere mibi ntaho baba bashobora kuva cyangwa ngo bagane”.

Kugeza ubu mu Rwanda habarurwa Koperative ibihumbi 10,676 zibumbiyemo abanyamuryango basaga Miliyoni 5, zikagira imari shingiro ya Miliyari 74 z’amafaranga y’u Rwanda.

Abayobozi basobanurirwa bimwe mu byo amakoperative akora

Umuyobozi Mukuru w’Ikigo cy’Igihugu gishinzwe guteza imbere Amakoperative, Dr Patrice Mugenzi yagarutse ku ntumbero ihari mu kurushaho kuyubakira ubushobozi.

Agira ati: “Dushyize imbaraga mu guteza imbere ikoranabuhanga ryifashisha mudasoba mu mirimo yayo ya buri munsi harimo n’imicungire y’imari, ari nako twongera abakozi b’abanyamwuga bazifasha kunoza imikorere, kugira ngo n’ubugenzuzi bwayo burusheho koroha”.

Yakomeje agira ati, “Nitugira Koperative zubakiye ku mikorere ifite ireme zigendana n’aho isi igeze, bizafasha kongera ubukungu, abanyamuryango bazo bazibemo batekanye kandi banogewe n’iterambere zibagezaho”.

Abayobozi mu nzego zitandukanye mu gihugu hose bitabiriye igikorwa cyo kwizihiza umunsi mpuzamahanga w’Amakoperative

Muri gahunda y’icyerekezo cy’Igihugu cya 2050 ndetse na gahunda yo kwihutisha Iterambere NST2, hamwe n’Intego z’Iterambere rirambye SDGs, Umuyobozi w’Intara y’Amajyaruguru Mugabowagahunde Maurice, yagaragaje ko zitagerwaho uruhare rw’amakoperative rutagaragaye.

Ati: “Icyo twifuza ku bagize amakoperative ni ugutahiriza umugozi umwe mu gukurikiranira hafi no kumenya neza ko imiyoborere n’imikorere yazo binoze; abaziyobora bakamenya ko kubazwa inshingano n’uburyo bazikoramo bakwiye kubigira umuco kandi igihe cyose hagize ikibazo kivuka, bakajya bihutira gufatanyiriza hamwe kugikemura, kugira ngo Koperative zirusheho kugira imicungire myiza kandi inoze”.

Guverineri Mugabowagahunde, yanagaragaje ko kuva hatorwa iteka rya mbere mu mwaka w’1949 rigenga amakoperative n’amategeko ayagenga yagiye ashyirwaho mu myaka yakurikiyeho, bitigeze biha abanyamuryango urubuga n’ubwisanzure mu micungire yayo bagahora inyuma.

Imicungire n’imoyoborere inoze byagaragajwe nk’imbarutso y’iterambere ry’amakoperative

Uko iterambere n’ingamba zigamije impinduka byarushagaho kwitabwaho, n’amakoperative ntiyasigaye kuko nko mu mwaka wa 2006 na 2018 hatowe amategeko hanashyirwaho Politiki zigenga amakoperative hagamijwe gushishikariza Abanyarwanda gukorera hamwe kugira ngo bagire ibyo bigezaho bifatika.

Mu kwizihiza uyu munsi mu nsanganyamatsiko igira iti: “Koperative yubaka ejo hazaza heza kuri bose”, hanatanzwe ibihembo kuri Koperative zitwaye neza kurusha izindi ku rwego rwa buri Ntara, ndetse na Koperative ASOPTHE yabaye indashyikirwa ku rwego rw’Igihugu irabihemberwa.

U Rwanda rwizihije uyu munsi ku nshuro ya 19 mu gihe ku rwego rw’isi wizihijwe ku nshuro y’101 ndetse no ku nshuro ya 29 ku rwego rw’Ishami ry’Umuryango w’Abibumbye.

U Rwanda rwizihije umunsi mpuzamahanga w’amakoperative ku nshuro ya 19

Bimwe mu bigo nderabuzima bivuga ko bihomba bitewe no kutishyurwa imwe mu miti n’ibizamini bifatwa abarwayi

Ibi ngo bikomeje gushyira ibyo bigo nderabuzima mu ihurizo ry’igihombo n’amadeni bibereyemo za Farumasi z’Uturere, ku buryo hatagize igikorwa ngo inzego zirebwa n’iki kibazo zigishakire umuti urambye, ibyo bigo nderabuzima byazisanga bitagitanga ubuvuzi buboneye ku babigana.

Abakozi babwiye Kigali Today ibi ntibifuje ko imyirondoro yabo n’ibigo nderabuzima bakoreramo bijya mu itangazamakuru, batekereza ko biramutse bimenyekanye ko batanze aya makuru, bitabagwa amahoro; bakaba bavuga ko ari ikibazo kibakomereye.

Umwe muri bo agira ati: “Mbere umukozi wa RSSB ukorera ku rwego rw’ikigo nderabuzima ushinzwe gusesengura raporo z’imiti ndetse n’ibizamini bikorerwa umurwayi, yakusanyaga amakuru yerekeranye n’imiti ndetse n’ibizamini byafashwe, akabikorera fagitire akayoherereza ababishinzwe muri RSSB bakorera ku cyicaro cyayo kiri i Kigali, bamara kuyisesengura bakishyura ibigo nderabuzima nta yandi mananiza”.

“Ikibazo dufite kugeza ubu ni uburyo bavuguruyemo iyo mikorere, aho noneho ushinzwe gusesengura ayo makuru yose y’uko umuwayi yivuje, ibijyanye n’ibizamini yakorewe ndetse n’imiti yahawe, yamara kubyemeranywaho n’ikigo nderabuzima, akabishyikiriza urwego rumukuriye rwo ku Karere, na rwo rwamara kubyemeza bikohererezwa ababishinzwe ku rwego rw’Igihugu. Iyo bigezeyo akenshi barabitugarurira bakatubwira ko hari ibyo tugomba kuvana ku rutonde kuko RSSB iba itari bubyishyure, nyamara ugendeye ku rutonde dusanganywe rw’ibizamini dufatira abarwayi ndetse n’imiti tubaha, bigaragara ko biba biri mu byo RSSB iba igomba kwishyura”.

Abakozi b’ibigo nderabuzima ntibumva uburyo raporo zijyanye n’imyishyurize ya serivisi baba bahaye ababigana basabwa kuzisubiramo no kugira ibyo bavanamo nyamara aho ziba zabanje kugenzurirwa yaba ku rwego rw’ibigo nderabuzima ndetse n’urw’Uturere biba byagaragaye ko nta kibazo kirimo.

Undi agira ati: “Nk’urugero hari umurwayi mu minsi ishize twafatiye ikizamini cy’igituntu. Mu gutanga urutonde rw’ibyo twishyuza, byageze muri RSSB abakozi babishinzwe barutugarurira badusaba kuvanaho icyo kizamini kuko ngo twagifatiye umurwayi bitari ngombwa. Nyamara uwo murwayi twari twakimusanzemo na n’ubu aracyari ku miti. Nawe wibaze aho tuzavana ubushobozi bwo kwishyura amafaranga aho twaranguye ibikoresho twifashishije mu gufata icyo kizamini, kimwe n’ibindi bizamini byinshi bagenda batubwira gukura ku rutonde tuba twabahaye”.

“Akenshi batugarurira fagitire tukazisubiramo na bo bakongera bakazitwoherereza gutyo gutyo inshuro zikaba zanarenga eshanu kandi muri uko kuzigarura ni nako tuba tugikomeje guha serivisi abatugana. Ubu za farumasi tuzirimo amadeni y’ibyo badukopye, abakozi bamwe bahemberwa ku rwego rw’ibyo bigo nderabuzima usanga hamwe badahemberwa igihe kuko ahakabaye hava ubushobozi bwo kubishyira mu bikorwa haba hasa n’ahifunze. Uko guhozwa mu rujijo uyu munsi bitwishyura imiti cyangwa ibizamini runaka, bwacya bagahindura imvugo ngo ntibyemewe, tubibonamo nk’amananiza no kutwicira urwego rw’ubuvuzi, bikaduca intege mu mikorere yacu ya buri munsi”.

Bifuza guhabwa amahugurwa hakabaho no kugena uburyo buhamye kandi buzwi bugaragaza ibyo bemerewe gukorera ababagana n’ibyo batemerewe bagakora batabangamiwe.

Ni byo basobanura bati “Nk’uko tugira protocole yo kuvura malariya n’izindi ndwara runaka, nibaduhe n’ibyo tugenderaho twese, bikorwe mu buryo busa mu bigo nderabuzima byose, kugira ngo abatugana tubahe ubuvuzi bufite umurongo nyawo”.

Umuyobozi Mukuru w’Urwego rw’Ubwiteganyirize mu Rwanda (RSSB), Regis Rugemanshuro, avuga ko ahenshi mu hagaragara ibyo bibazo, haba hakozwe isesengura bikagaragara ko bavuye abarwayi mu buryo butanyuze mu nzira zemewe, hakaba n’abo bigaragara ko hari ibyo bimwe mu bigo nderabuzima biba bitujuje ibigenderwaho ngo byishyurwe.

Yagize ati: “Mu havugwa ibyo bibazo ahenshi biba byagaragaye ko hari ibyo batemeranywaho n’abashinzwe guhuza ayo makuru yose muri RSSB. Hari nk’ibigo nderabuzima dusanga hari imwe mu miti iba yaratanzwe bigaragaza ko yahawe abarwayi runaka, twagenzura tugasanga itarigeze itangwa, hari abavura abarwayi mu buryo butubahirije ibigenderwaho, ahandi ugasanga kohereza ibisabwa ngo bishyurwe hari amwe mu makuru atemeranywaho hagati y’impande zombi, hakaba n’ahagaragara amakuru amwe n’amwe atuzuzwa uko bikwiye mu busabe bwabo bwo kwishyuza serivisi baba barahaye abaturage”.

“Rero nk’urwego rwa Leta rukorera mu mucyo, kandi rugenzurwa n’inzego zirukuriye harimo n’Umugenzuzi w’Imari ya Leta, dukora ibishoboka mu kwirinda ikintu cyatuma umunyamuryango wacu agira ibyo ahomba, cyane ko ubu tunifashisha ikoranabuhanga ryoroshya uburyo bwo kubona amakuru yose ashoboka kandi mu buryo busobanutse bwihuse”.

Mu kurushaho kongera ireme ry’ubuvuzi butangirwa mu mavuriro y’ibanze harimo n’ibigo nderabuzima, igihe yajyaga yishyurirwaho cyavuye ku mezi atandatu kigera ku minsi 23.

Gusa ngo iyo habayeho gusubizwa za fagitire bya hato na hato, bibiviramo no kumara amezi ari hejuru y’atatu amafaranga byishyuza bitarayahabwa n’igihe biyaherewe akaba ari macye ugereranyije n’ayo biba byakoresheje.

Rugemanshuro avuga ko hari kwigwa uburyo ibiciro byose birebana n’imitangire ya serivisi z’ubuzima bya RSSB byahuzwa n’uko isoko ry’ubu rihagaze, mu rwego rwo kubijyanisha n’igihe kigezweho hanakumirwa ibintu byose byakurura igihombo.

Urubyiruko rwiyemeje gutanga amaboko mu bikorwa biteza imbere Igihugu

Mu Mudugudu wa Kabyaza, akagari ka Rurengeri mu Murenge wa Mukamira Akarere ka Nyabihu, abaturage baho kimwe n’abahagenderera, bari bamaze igihe babangamiwe n’ikiraro cyubatswe ku muhanda nyabagendwa, unyura muri uyu mudugudu, kubera ukuntu cyangijwe n’amazi aturuka mu misozi ihakikije, amanukana imicanga n’amabuye, bikakizibya.

Ni kenshi bagiye bagerageza kwihuza, bakakizibura ariko bikaba iby’ubusa bitewe n’uburyo cyari cyarangiritsemo.

Murenzi Théophile agira ati: “Twahoraga dufite impungenge mu gihe twambuka iki kiraro bitewe n’ibyondo n’imicanga byahoraga byuzuyemo. Imvura igwa igatembana amazi arabimanukana byose bikipakiramo kuhanyura bikaba bitagishoboka. Kandi abana bajya ku mashuri, abaturage bajya kwivuza n’abagana amasoko yo hirya no hino twese nta wundi muhanda tunyura. Iyo habaga huzuye rero, kugira ahantu tujya byajyaga bihagarara tukamara iminsi dutegereje ko ubukana bw’amazi bucogora tukabona ubwongera kuhanyura”.

Ni igikorwa cyitabiriwe n’abarimo inzego z’umutekano

Uretse iki gikorwa remezo, hari n’abari babayeho mu buzima bwo gusembera, abandi mu bukode kubera kutagira inzu, bidaturutse ku mahitamo yabo, ahubwo ari impamvu z’ubukene.

Mu gukemura ibyo bibazo, kimwe n’ibindi byugarije imiryango yo hirya no hino mu gihugu hose cyane cyane itishoboye, mu gutangiza uku kwezi kw’ibikorwa by’Urubyiruko rw’Abakorerabushake, ku ikubitiro ibi bibazo byari byarazengereje abatuye muri uwo Mudugudu wa Kabyaza kimwe n’indi yo muri Nyabihu byegeranye, bafatanyije mu gusana icyo kiraro, bubakira imwe mu miryango itishoboye inzu zo kubamo ndetse n’imirima y’igikoni.

Mu byishimo byinshi abahatuye bagaragaje ku bwo kubona amaboko y’inyunganizi, ngo bafite inyota yo kuzabibungabunga.

Mu bubakiwe inzu barimo na Manizabayo utagiraga aho kuba bishimiye uruhare rw’urubyiruko mu kuzamura imibereho y’abaturage

Manizabayo Clementine, umubyeyi w’abana babiri utagiraga aho aba akaba umwe mu bubakiwe inzu y’ibyumba bitatu n’uruganiriro yagize ati: “Nari ngowe n’ubuzima bwo gutera ibiraka rimwe na rimwe nkakorera amafaranga ari hagati y’1000 n’1500 ku munsi. Kugira ngo habonekemo ay’ibitunga abana, kubarihira amashuri, kubagaburira hiyongereyeho no kwishyura inzu y’ubukode byambizaga icyuya. Haba ubwo tubwiriwe cyangwa tukaburara. Kuba aba bagiraneza banyubakiye iyi nzu mbigereranya no kuntura umutwaro wari undemereye nari nikoreye. Imana yo mu ijuru ibakomereze imbaraga”.

Ni ibikorwa ngarukamwaka, bitangirana n’intangiriro ya buri kwezi k’Ukwakira. Muri uyu mwaka mu Nsanganyamatsiko igira iti ’Youth Volunteers, Nta kudohoka mu gushyira umuturage ku isonga’, urubyiruko rusaga Miliyoni 1 n’ibihumbi 700 rubarizwa mu muryango w’Abakorerabushake rwo mu gihugu hose, mu gihe cy’ukwezi, ruzafatanya mu gukangurira abaturage kugira uruhare muri gahunda za leta, nko kwirinda amakimbirane, gusubiza abana mu ishuri, kwimakaza isuku, imirire myiza, imibanire myiza mu miryango.

Mu gihe cy’ukwezi bagiye kumara bakemura ibibazo byugarije abaturage bazibanda ku kubaka imirima y’igikoni, gutera ibiti, gusana ibikorwaremezo, kubakira abaturage n’ibindi

Ariko kandi ruzongeraho n’imirimo y’amaboko nko kubakira abaturage, gusana ibikorwa remezo, kubungabunga ibidukikije n’ibindi bikorwa bitandukanye bijyanye n’umwihariko wa buri hantu.

Kubana Richard, Umuyobozi Mukuru muri Minisiteri y’Ubutegetsi bw’Igihugu Ushinzwe Ubukangurambaga n’Urubyiruko rw’Abakorerabushake, avuga ko ibi biri mu mujyo urubyiruko rwahisemo wo gutanga umusanzu warwo mu byubaka Igihugu batarindiriye ko bikemurirwa mu kwifashisha ingengo y’imari ahubwo bakabinyuza mu mirimo y’amaboko n’ubukangurambaga.

Guverineri w’Intara y’Iburengerazuba Lambere Dushimimana yakanguriye urubyiruko gukomera ku ntego z’ibyaka Igihugu

Guverineri w’Intara y’Iburengerazuba Lambert Dushimimana, avuga ko ibikorwa nk’ibi, ari urugero rwiza rutanga n’icyizere cy’ahazaza.

Ati: “Urubyiruko dukeneye ni urusobanukiwe neza aho u Rwanda rwavuye, aho ruri ubu n’aho rugana. Kandi iyo dusesenguye neza tugendeye ku bitekerezo byiza rufite n’ibikorwa bigamije ineza y’Igihugu no kukigobotora ibibazo bicyugarije, bigaragara ko urubyiruko ruri mu murongo mwiza; binashimangirwa n’ibi bikorwa baba biyemeje kugiramo uruhare mu kubikemura. Ndarushishikariza gukomereza aho, basigasira neza intego bihaye kandi natwe nk’ubuyobozi turahari ngo tubatere ingabo mu bitugu”.

Yasabye abaturage na bo kurushaho gushyiraho akabo, mu guhora bashishikajwe no kumva ko aribo ba mbere bakwiye kujya bishakamo ibisubizo no kurinda ibyagezweho, kuko bibafasha kuva ku rwego rumwe bajya ku rundi.

I Nyabihu ahatangirijwe Ukwezi kw’ibikorwa by’Urubyiruko rw’Abakorerabushake bafatanyije n’inzego z’ibanze n’izishinzwe umutekano mu Ntara y’Iburengerazuba bubakiye abatishoboye inzu, imirima y’igikoni ndetse no gusana ikirar

Muri uku kwezi kwahariwe ibikorwa by’urubyiruko rw’abakorerabushake birimo bazubaka inzu 500 mu gihugu hose, Bubake Imirima y’Igikoni 21,480, ubwiherero 6,444 batere n’ibiti 60,000 byose hamwe bikaba bibarirwa mu gaciro k’amafaranga angana na Miliyari imwe y’u Rwanda.

Mu bikorwa urwo rubyiruko ruzibandaho birimo no gukemura ibibazo byari byarabereye abaturage ingutu

Bamwe mu bana b’abakobwa n’ababyeyi babo bahishira ababahohoteye banga kwiteranya na bo

Umwana w’umukobwa utarifuje ko amazina ye agarukwaho mu itangazamakuru, wo mu Murenge wa Gacaca mu Karere ka Musanze, ubwo yari afite imyaka 15 bamurangiye akazi ko mu rugo, ahageze bakajya banamukoresha ako gukora isuku mu kabari kabo, ahamaze amezi abiri nyirako aramusambanya anamutera inda.

Agira ati: “Nkimara kubona ko yanteye inda natekereje ko umugore we yazamerera nabi, ndabatoroka nsubira iwacu, naho mpageze mbihisha n’ababyeyi ariko hashize iminsi inda itangira kugaragara bagera ubwo bambaza uwayinteye mbabwira ko boss w’aho nakoraga ari we wayinteye, Papa ajya kumushaka ngo amubaze impamvu yampohoteye kandi ko agiye no kumufungisha”.

Yakomeje agira ati “Uwo mugabo yiramwinginze, anamuha ibihumbi 50 byo kuba bifashisha mu kunyitaho, amwizeza ko buri mezi atatu bajya bashaka uko bahura, akagira amafaranga amuha yo kumbungabunga kandi ko na nyuma yo kubyara bizakomeza. Ntibiriwe biteranya na we ngo bamurege mu buyobozi, bwari kumufunga n’ubwo bufasha yari yemeye tukabubura”.

Nyuma y’ibyo umugabo ntibongeye kumubona. Ati: “Igihe yari yahaye ababyeyi banjye cyo kongera guhura na we cyarageze bamuhamagaye telefoni ye ntiyacamo, banajya aho yakoreraga basanga atakihaba. Kugeza nanubu umwana naramubyaye arinze agira amezi atandatu tutazi aho aherereye”.

Mu Ntara y’Amajyaruguru haheruka kubera ubukangurambaga bwamaze icyumweru bukorerwamo isesengura ryimbitse ry’ibibazo byugarije abana basambanyijwe bikabaviramo guterwa inda no kubyarira iwabo.

Mu bahabarurwa, abagera ku 1200 baraganirijwe, 237 muri bo bigaragara ko abana babyaye batanditswe mu bitabo by’irangamimerere bahabwa iyo serivisi, abagera kuri 291 bahuzwa na RIB binyuze muri Isange One Stop Center, bagirwa n’inama z’uburyo bagana ubutabera bukabafasha gushakisha no gukurikirana ababateye inda.

Ni mu gihe abandi 391 bahawe serivisi z’isanamitima zibafasha kugira imitekerereze n’imibereho myiza, abandi 444 bahabwa ubuvuzi.

Inzego zifite aho zihuriye no kurwanya ihohoterwa rikorerwa abana zisanga ubufatanye mu gukumira abarigiramo uruhare bugomba gushyirwamo imbaraga

N’ubwo bimeze bityo ariko, mu mbogamizi benshi muri aba bana bahuriyeho, zirimo nko kuba abababahohoteye baba barabanje kubihengekana bo n’ababyeyi babo, bakabasaba kubakingira ikibaba babizeza ubufasha, nyuma yaho bakabona ubutoroka ubutabera ntibongere kuboneka.

Umuhoza Gatsinzi Nadine, Umuyobozi w’Urwego rushinzwe kugenzura Iyubahirizwa ry’Ihame ry’Uburinganire n’Ubwuzuzanye hagati y’abagabo n’abagore mu iterambere ry’Igihugu.

Agira ati: “Iki dukwiye kukibona nk’ikibazo gihangayikishije umuryango Nyarwanda buri wese akwiye guhagurikira, guhishira abakora ibyo byaha tukabyamagana mu kwirinda ko bakomeza kubikorera n’abandi. Inzego zishinzwe guhana ndetse n’amategeko abakanira urubakwiye birahari, ni ngombwa ko bibyazwa umusaruro”.

Akomeza agira ati “Ikindi kigaragara ni uko abenshi mu bana baterwa inda baba barabanje kuva mu mashuri, bagera mu mibereho yo hanze yaryo akaba aribwo bafatiranwa. Uko byagenda kose, na bo si ibitambambuga; bakwiye kumenya kugira amahitamo y’ibidashyira ubuzima bwabo mu kaga, bakamenya guhakana mu gihe hari nk’abasore cyangwa abagabo babashuka bagamije kubasambanya”.

Yungamo ati “Abo na bo kandi bazirikane ko icyo cyaha cyangiza ubuzima bw’ugikorewe n’ubw’umuryango, bamenye ko amategeko n’ibihano bitegereje umuntu wese wabyishoramo, kuko tudateze kujenjekera abakomeza koreka ahazaza h’abana b’u Rwanda”.

Ibyuho bikigaragara, Umuyobozi w’Intara y’Amajyaruguru Mugabowagahunde Maurice, avuga ko bagiye gufatanya n’inzego zose zifite aho zihuriye n’iterambere ry’umwana mu kubivanaho, bahereye mbere na mbere ku kwegera imiryango.

Mu Ntara y’Amajyaruguru ubukangurambaga bwamaze icyumweru bukorerwamo isesengura ryimbitse ry’ibibazo byugarije abana basambanyijwe

Ati: “Hari ababyeyi ubona ko inshingano za kibyeyi bazirambitse hasi, bumva ko ntacyo bagishinzwe mu burere bw’abana babo. Ikiriho ni ukurushaho kubafasha guhindura imyumvire, bagasobanukirwa neza ko aribo bakwiye gufata iyambere mu guha abana babo umurongo muzima bagenderaho, noneho ubuyobozi n’abafatanyabikorwa babwo barimo n’inzego zishinzwe umutekano n’izirengera umwana bagahuriza hamwe na bo mu guhanahana amakuru y’uburyo bwose bushoboka bwarinda abana n’ubwabafasha kubona ubutabera mu gihe buhungabanyijwe”.

Itegeko No 59/2008 ryo ku wa 10/09/2008 rikumira kandi rihana ihohoterwa iryo ariryo ryose rishingiye ku gitsina, mu Ngingo yaryo ya 36 ivuga ko umuntu wese wanze gutabara cyangwa gutabariza uwakorewe ihohoterwa rishingiye ku gitsina, uwanga gutanga ubuhamya ku ihohoterwa ryamukorewe cyangwa rikorewe undi, ahanishwa igifungo kuva ku mezi atandatu kugeza ku myaka ibiri, n’ihazabu y’amafaranga kuva ku bihumbi mirongo itanu kugeza ku bihumbi magana abiri (200,000Frw), cyangwa kimwe muri ibyo bihano.

Rulindo: Abantu 26 bariye umuceri bikekwa ko uhumanye babiri muri bo barapfa

Uwo muceri ngo bari bawuhahiye ku iduka riherereye n’ubundi muri uwo Mudugudu.

Mu bawuhashye, ngo yawugezaga mu rugo akawuteka, bawufungura (kuwurya), ukabagwa nabi, hari abagiye kwivuza bagahabwa imiti ndetse bakanasezererwa; ariko ngo ibintu byaje guhindura isura nyuma y’aho abana babiri barimo umwe w’imyaka 10 n’undi w’imyaka 3, bo kuwa kabiri tariki 1 Ukwakira 2024, bajyanwe ku bitaro bagejejweyo bahasiga ubuzima.

Umuyobozi w’Akarere ka Rulindo Mukanyirigira Judith, wemereye Kigali Today iby’urupfu rw’abo bana yagize ati: “Uwa mbere yapfuye mu ijoro rishyira kuri uyu wa gatatu, undi na we yapfuye bari hafi kumugezayo. Ntituramenya icyabishe n’ubwo hari abakeka ko byaba byatewe n’umuceri bariye. Ntabwo twakwemeza ko aribyo na cyane ko hari ibizamini byafashwe bikajyanwa gukorerwa isuzumwa muri laboratoire y’Igihugu, turacyategereje ibisubizo bizatangwa n’inzego zibishinzwe”.

Meya Mukanyirigira, akangurira abaturage ko mu gihe hari ugize ikibazo cyangwa ikimenyetso kidasanzwe ku buzima bwe, aba akwiye kwihutira kwegera inzego z’ubuzima, kugira ngo asuzumwe anakurikiranirwe hafi hakiri kare.

Ati: “Inzego z’ubuzima zegereye abaturage ku rwego rw’Umudugudu. Mu nshingano nyamukuru z’ibanze ni ukubungabunga ubuzima bwabo ndetse kandi natwe nk’ubuyobozi tuba dufite inshingano zo kunganirana na zo. Ni byiza ko ubonye ikidasanzwe ku buzima bwe yajya yihutira kubimenesha izo nzego zose kugira ngo zikumire ingaruka zabaho amazi atararenga inkombe”.

Kugeza mu masaha y’umugoroba wo ku wa Gatatu tariki 2 Ukwakira 2024, imirambo y’abo bana bombi yari ikiri mu buruhukiro bw’Ibitaro bya Rutongo. Naho nyiri iduka abo baturage bahahiyemo uwo muceri utungwa agatoki kuba intandaro yo kubagwa nabi, akaba ari gukorwaho iperereza.

Amakuru Kigali Today yamenye ngo ni uko kuva ku cyumweru, buri wese mu bagiye bawuryaho, baguwe nabi hakaba abagiye kwa muganga bagahabwa imiti, mu bagezeyo bose uko 24 babarirwa mu ngo 7 zo muri ako gace, barasezerewe barataha.

Aborora ingurube mu Karere ka Gakenke biyemeje kubahiriza ibisabwa byose mu kubikora kinyamwuga

Igihe iryo koranabuhanga ritari ryagatangiye muri ako Karere, aborozi barimo na Kagoyire Marie Claire, bagorwaga no kwagura ubworozi bwabo.

Ati: “Nahereye ku bworozi bw’ingurube z’amashashi zonyine, hagira izigeza igihe cyo kurinda, bikaba ngombwa ko nkora ingendo nzijyana ku mfizi zabaga zororewe mu bandi borozi. Hari ubwo zageragayo zananiriwe mu nzira izindi zikavunika, zanakororoka buri imwe ntirenze ibyana bitatu”.

Arongera ati, “Nta mafaranga afatika nakuragamo kabone n’ubwo nabaga nanazigaburiye bihagije. Aho ubu buryo bwo kutwegereza intanga hakoresheje ikoranabuhanga bwaziye, buradufasha cyane kuko isaha iyo ariyo yose, iyo umuntu azikeneye ahita azibona bitamusabye gukora ingendo za kure. Ibyo byamfashije kongera icyororo bingeza ku rwego rwiza mu bukungu”.

Umworozi, mu gihe ingurube yoroye yarinze, abimenyesha Veterineri, yamara kubigenzura neza akuzuza amakuru akoresheje telefoni ye ngendanwa akubiyemo imyirondoro y’umworozi, ubwoko bw’intanga akeneye n’ingano zayo; yarangiza ayo makuru akayohereza muri centre imwegereye ishinzwe kuyakusanya, na yo igahita iyohereza mu Kigo Zipline gishinzwe iby’imicungire y’utudege duto tutagira Abapilote; hanyuma mu minota 45 izo ntanga zatumijwe zikaba zigeze kuri Veterineri, na we agahita azishyikiriza umworozi.

Ubwo buryo bwo kwegereza aborozi intanga z’ingurube hifashishijwe ikoranabuhanga ry’utudege duto tutagira Abapilote rikomeje kuborohereza kuzibona byihuse Kandi hafi

Mu myaka ibiri imaze ikorerwa muri ako Karere, ku bufatanye bw’Umushinga Orora Wihaze muri gahunda igamije gufasha aborozi kugira ibyororo byinshi mu buryo buteye imbere; aborozi ndetse n’aba Veterineri, babifashijweno n’uwo mushinga hamwe n’Ikigo RAB, baboneyeho kongererwa ubumenyi mu buryo bwo gukora ubworozi buteye imbere ndetse banashyirirwaho ihuriro bazajya baboneramo amakuru ajyanye n’ubworozi bukozwe kinyamwuga.

Ibi bikaba mu bituma barushaho kubyaza inyungu uyu mwuga wabo nk’uko Zigiriza Lucie, ukuriye Orora Wihaze yabisobanuye.

Umuyobozi w’Akarere ka Gakenke wungirije ushinzwe iterambere ry’ubukungu, Niyonsenga Aimé François, yakanguriye aborozi b’ingurube kubyaza umusaruro aya mahirwe, kugira ngo ibyo bakora bikomeza kuzana impinduka.

Aborozi b’amatungo bo mu Karere ka Gakenke bari mu bahanzwe amaso mu kugaragaza umusanzu wabo muri gahunda zigamije kugabanya umubare w’abana bafite imirire mibi n’igwingira, cyane ko ukurikije igipimo byariho uhereye mu mwaka wa 2005, aho kari gafite abana bagwingiye bangana na 49%, byagera mu mwaka wa 2010 iyo mibare ikagabanuka aho yageze kuri 46%, imibare yakomeje kugabanuka ikagera kuri 39% mu mwaka wa 2015, kugera n’aho ibyo bipimo byageze kuri 33,2%.

Kubonera intanga hafi kandi ku gihe biri mu byongera amahirwe menshi y’ubworozi buteye imbere

Ahereye kuri iri gabanuka, ndetse na gahunda Leta yihaye gukomeza kubigabanya, bikaba nibura byagera kuri 15% mu gihe kiri imbere, Visi Meya Niyonsenga, ntashidikanya ko: “Uruhare rw’aborozi rukwiye kwigaragaza mu buryo bufatika, ibyo kandi bizagerwaho mu gihe mwakomeza kubahiriza ibisabwa byose mu kunoza ubworozi mubikora neza”.

Akomeza agira ati: “Umuntu yahera ku ngurube imwe, akayitaho bikwiye, ikaba yabyara ibyana 12 cyangwa bikanarenga, akagira ibyo agurishamo akikenura mu bundi buryo yanashaka akagura n’inka, bikagenda bimufasha kuva mu cyiciro cy’abakennye kuko aba yayitayeho kandi yayibungabunze”.

Kugeza ubu mu Rwanda habarurwa aborozi babikora kinyamwuga kandi mu buryo buzwi babarirwa muri 72 abandi 87 bo bari mu nzira ibaganisha ku kubona ibyangombwa bibemerera kubukora.

Mu gukora uyu muhanda bwari uburyo bwo gushaka igisubizo cy’ubuhahirane bwari bubangamiwe

Uwo muhanda abaturage bitirira ‘Umuhanda wa Musilamu’ ari naryo zina bakunze kwita Bihoyiki mu gace k’iwabo, uherereye mu kagari Cyogo uturutse hafi y’Ikigo nderabuzima cya Kabere ukagarukira mu isangano ry’imihanda iri hafi y’Ibiro by’Akagari ka Mubago n’Akagari ka Cyogo.

Mu duce uyu muhanda unyuzemo, hahoze akayira gatoya abaturage bajyaga banyuramo, basa n’abasesera mu bihuru byari byarakarengeye, ndetse kuri benshi ngo kuba hagera umuhanda byari nk’inzozi.

Nyiramahirwe Anonciata agira ati: “Aha hose hari ibigunda by’ibyatsi by’ibikararanga, amatovu n’imifumba byari byarahameze bigenda bifunga ako kayira, twanyuragamo dutaruka ubundi tubiseseramo, hakaba ubwo n’amahwa n’ibisura bitujombye, umuntu akagera iyo ajya nta nkuru”.

Arongera ati “Igihe kimwe bwarakeye tubona yahabyukiye arimo atemagura ibyo byatsi, agenda yagura ubugari bw’akayira anatindamo amabuye, biba ubwa mbere, bukeye aragaruka na nyuma yaho arakomeza dutangira gukeka ko yaba afite uburwayi bwo mu mutwe kuko nk’uko ubibona, nta muntu waza ngo akwemeze buryo ki aje gukora umuhanda nk’uyunguyu mu maboko ye wenyine ngo ukeke ko yaba ari muzima mu mutwe. Byabanje kugora benshi mu bamubonaga no kwiyumvisha ko ari muzima mu mutwe”.

Igitekerezo cyo gukora uyu muhanda, Bihoyiki cyamujemo nyuma y’aho undi muhanda wo muri ako gace uturuka ahitwa ku Rwasirizo ujya ahazwi nko mu Kabere abaturage bari basanzwe bakoresha, wibasirwaga n’ibiza, ukuzuramo amazi ahateza n’ibinogo byajyaga bigwamo abantu ndetse hari n’abahatakarizaga ubuzima.

Ati: “Imvura yaragwaga abajya kwivuriza ku bitaro, abana b’abanyeshuri n’abagana udusoko two hafi aha, byose bigahagarara. N’abageragezaga kwihambira bamwe bakabigwamo bagakomereka, abandi bakahagirira imvune zibatera ubumuga buhoraho kubera ukuntu wari warangiritse."

Akomeza agira ati “Wari waratubereye ikigusha twaraheze mu bwigunge. Niho naje gutekereza ko ndamutse nkoresheje imbaraga z’amaboko yanjye, nkahanga uyu muhanda wundi, uko biri kose hari umusanzu naba ntanze mu kugabanya izo ngaruka abantu bagiriraga muri uwo wundi”.

Nta handi akomora ubushobozi uretse imbaraga ze z’amaboko zonyine akoresha. Ndetse nta n’ibindi bikoresho yifashisha mu kuwutunganya usibye inyundo yonyine atsindagirisha amabuye ngo byibura ubashe gukomera.

Abaturage bavuga ko aho uwo muhanda uhagereye ubu biruhutsa imvune zo kwambukiranya ibihuru byababangamiraga

Urugendo rwo gukora uyu muhanda, Bihoyiki arumazemo imyaka ibiri n’igice. Buri munsi mu minsi y’imibyizi azindukiramo awutunganya, icyakora ngo rimwe na rimwe ngo iyo hari nk’aho abonye ikiraka cyo guca inshuro cyangwa umunsi wo kujya gusenga, nibwo asiba.

Ati: “Njye nta bushobozi mfite bw’amafaranga, ni amaboko yanjye nshora nk’umuntu ukiri umusore. Natekereje ku musanzu wanjye natanga mu kubaka Igihugu, ndavuga nti, aho kugira ngo njye nirirwa nifashe mu mufuka, ntacyo nkora, reka nikorere uyu muhanda byibura uzagirira abandi akamaro. Sintekereza kuba hari bagenzi banjye duturanye inaha nasiganya kuko wenda na bo baba bafite indi mirimo bahugiyemo”.

Mu gihe amaze awukora yibuka ko hari umunsi umwe abaturage babarirwa muri 70 bigeze kuza bafitanya na we mu kumuha umuganda, ndetse rimwe na rimwe iyo arimo awukora, hari abamunyuraho, bamubona mu mwambaro w’isurubeti yamucikiyeho ndetse n’inkweto zamusaziyeho kubera ko aribyo ahora yambaye muri ako kazi, umugiriye impuhwe akamuha nk’igisheke, umuhaye umutobe, cyangwa avoka, hakaba n’abahamusangisha ibijumba cyangwa ibitoki byokeje mu gihe arimo awutunganya bagira ngo nibura mu masaha y’akaruhuko ka saa sita yice isari.

Mu gukora uwo muhanda, byabaga ngombwa ko awunyuza mu masambu y’abaturage. Hamwe ngo yabitangiye batabyiyumvisha bagendeye ku kuntu hari aho yageraga agatema imyaka yabo, hakaba abamutwamiye hejuru bamwita umurwayi wo mu mutwe uje kubangiriza ibyabo, bakanagerageza kumuhagarika, bikamusaba ko abasobanurira intego afite, bakabisamira hejuru bati: “Komereza aho byibura natwe twagira twajya tubona umuhanda tunyuramo bitatugoye”.

Bihoyiki ati: “Nta makimbirane akomeye byateje, kuko n’ubuyobozi bw’Umudugudu hari ubwo bwahageraga, bukungamo buti, uyu mwana mumureke akore, kuko igitekerezo cyiza afite ni icy’ubuterankunga bw’inyungu za benshi ndetse n’Igihugu”.

Usibye kuba ari umuhanda nyabagendwa ubu hari n’abatangiye kwimukira hafi yawo

Uyu muhanda wa ’Musilamu’ aho uhagereye, hari abatangiye kuva mu bice by’amanegeka bahoze batuyemo bimukira ahawegereye, ndetse bamwe ubu bari kuhazamura inzu bateganya kuzakoreramo ubucuruzi.

Mu kuba bawuturiye n’ubwo ari uw’amabuye, byibura wabakijije imishubi n’imifatangwe banyuragamo mbere utarahagera.

Kandi bafite icyizere ntakuka cyo kuba iterambere ryaho rizihuta vuba aha cyane, ibigaragarira ku mapoto yamaze kuhashingwa agaterwaho n’insinga z’amashanyarazi, igisigaye akaba ari ukuziyoboramo ingufu zawo.

Akiwutangira hari ababanje gutekereza ko afite uburwayi bwo mu mutwe nyuma batungurwa no kubona ibyo yakoraga bifite ishingiro

Mukazibera Asoumpta agira ati: “Twatangiye kuza kuhatura ubu ntitugipfundikiranye nka mbere, aho twagorwaga no gusohoka mu ngo kubera ukuntu hari mu misozi y’amanegeka. Umuntu arasohoka mu nzu yaba ari nk’umwana ugiye kwiga, yaba ari nk’umuntu ugiye kwivuza se, n’undi wese ufite gahunda agiyemo kuwunyuramo ntibiba bigoranye”.

Icyakora nk’uko abo baturage babihurizaho, ngo uyu muhanda ni igisubizo ku banyamaguru n’abatwara imodoka nini za fuso. Iyo bigeze ku batwara imodoka ntoya na za moto, ho biba bigoranye kuwunyuramo bitewe n’uburyo utindishijwe amabuye.

Ati: “Ni naho duhera dusaba ko Leta yashyiraho akayo ikatuzanira itaka ikamenamo cyangwa se igashyiramo laterite ikawutsindagira neza”.

Ibi kuri Bihoyiki (Musilamu) ngo aba yarabikoze, ariko kubera ko nta bushobozi bw’amafaranga afite dore ko yaba itaka cyangwa laterite byose bisaba kubigura.

Na we yunga mu rya bagenzi be agira ati: “Urwego uyu muhanda ugezeho byari bikwiye ko hagira abagira umutima wa kimuntu, bakantera ingabo mu bitugu bakawutumeneramo itaka cyangwa laterite kugira ngo urusheho kuba nyabagendwa ku banyamaguru, abatwara moto n’amagare cyangwa imodoka nto”.

Yungamo ati “Ubusanzwe kano gace k’iwacu kagizwe n’amakoro menshi. Nta hantu nakura itaka rihagije ngo byibura njye nditundiramo. Birasaba izindi mbaraga z’amafaranga naho izanjye z’amaboko kuri byo zo naba mbirariyeho. Naba mbabeshye rwose”.

Uyu muhanda ngo uramutse ukozwe ukarangira neza nk’uko binagarukwaho n’abaturage baho, umusaruro w’Ibishyimbo, Ibihaza, Ibinyomoro, Ibitoki n’indi myaka ihera ku bwinshi byaborohera kuwugeza ku masoko hakoreshejwe cyane cyane imodoka; cyane ko ubu amahitamo yonyine bagifite ari ayo kuwutunda ku mutwe nyamara uba ari na mwinshi.

Nanone kandi ako gace kavamo amabuye menshi yifashishwa mu bwubatsi hirya no hino, usibye kuba ingano yayo yarushaho kwiyongera mu gihe uwo muhanda waba ukozwe neza, wabakururira abashoramari bakahazana imishinga irimo n’uwo gutunganya amakoro akabyazwamo amakaro cyangwa amapave.

Ngo ubutaka bwaho kandi, hari igice kivamo umucanga wifashishwa mu bwubatsi, ku buryo abawukenera byajya biborohera kuwuhakura bawujyana ahandi.

Yarawutunganyije bigeze ku rwego rwo kuba watsindagirwamo itaka cyangwa laterite abiburira ubushobozi

Iki gikorwa, gifatwa nk’igishyigikira intego yo kwishakamo ibisubizo nk’imwe muri gahunda Leta ishishikariza abaturage nk’uko n’Umuyobozi w’Akarere ka Musanze wungirije ushinzwe iterambere ry’ubukungu, Uwanyirigira Clarisse yabigarutseho.

Agira ati: “Itarambere umuturage agizemo uruhare biri mu byo dushyize imbere kandi twifuza ko abaturage bagira ibyabo. Igitekerezo Bihoyiki yagize cyo gukora umuhanda, natwe twiteguye kugishyigikira. Tuzareba abatekinisiye basobanukiwe iby’ikorwa ry’imihanda, tujyaneyo turebere hamwe icyo twaba tugeregeje kuhakorera kabone n’ubwo cyaba ari gitoya, ariko nibura habeho gutera ingabo mu bitugu igitekerezo cye, inzozi zibe impamo”.

Bihoyiki ni umusore w’imyaka 30 y’amavuko. Ku bwe ngo imbaraga ashyira mu kubaka uyu muhanda ntiyari kuzibangikanya no gushaka umugore bubakana urugo, kuko ngo akurikije uburyo hari izindi nshingano yari kujya asabwa kuzuza mu buryo buhoraho, nko gushaka ibitunga umuryango byari kumusaba izindi mbaraga zirenzeho. Kuri ubu ngo aracyabana n’umubyeyi we.

Urwo ruganda rwubatswe mu Kagari ka Rwambogo mu Murenge wa Musanze, ruzajya rutunganya inyama z’ingurube, ku buryo abazirya kimwe n’abakunzi b’ibizikomokaho nka sosiso, boulettes, filet, amavuta, bajya babibona byujuje ubuziranenge.

Abenshi mu baryi bazo, ngo bari bakeneye ahantu hajyanye n’igihe kandi habegereye zitunganyirizwa hajyanye n’igihe, kugira ngo bajye bazigura bizeye neza ubuziranenge bwazo.

Kamaliza Delphine agira ati: “Nkunda cyane Akabenzi(inyama z’ingurube) cyane ariko najyaga nzirya nikandagira kubera ukuntu ntabaga nizeye aho zabagiwe n’uburyo zabazwemo, izo mpungege zigatuma iwanjye tutazirya kenshi nk’uko tubyifuza. Kuba batwegereje uruganda ruzajya ruzitunganya hamwe n’ibizikomokaho, ubu noneho bigiye kutworohera kujya tuzifungura buri uko tubyifuje, kuko zizaba zitunganyijwe mu buryo buboneye”.

Bamwe mu borozi n’abakora umwuga wo kubaga inyama z’ingurube, bavuga ko kugeza ubu hakigaragara abamamyi bazibagira ku gasozi no mu bihuru n’ubundi buryo bwa gakondo kandi zitanabanje gupimwa. Ibi bikaba bikomeje gusiga isura mbi no gutesha agaciro umusaruro ukomoka ku bworozi bw’ingurube hamwe na hamwe kubera kuzikemanga ugasanga banga no kuzirya atari uko batazishoboye, ahubwo ari ukwanga ko zabagiraho ingaruka.

Jean Marie Simbibona ukuriye Uruganda A-Z Pig Ltd, akaba n’umwe mu biyeguriye umwuga w’ubworozi bw’ingurube, ku bwe ngo kuba habonetse ahafatika ho gutunganyiriza inyama, ni intambwe nziza itewe mu kugabanya imbogamizi zabagaho.

Ni uruganda rusanze aborozi n’abakunzi b’inyama z’ingurube bari bakeneye ahajyanye n’igihe ho kuzitunganyiriza

Ati: “Ikibazo cy’ababuraga aho kugurira inyama z’ingurube zujuje ubuziranenge kimwe n’aborozi bababuraga isoko ry’ababagurira, bikabaviramo gufatiranwa n’abamamyi, kenshi wanasangaga babihererana bakabahenda byari bihangayikishije cyane. Nanone kandi hari aborozi baheruka borora ariko mu by’ukuri badasobanukiwe uburyo ibibuvamo byabagirira akamaro yaba mu mirire no mu buryo zongererwamo agaciro. Uru ruganda rero ruri ku rwego rwo kwagura agaciro k’inyama z’ingurube, ariko kandi no kongera imyumvire n’ubumenyi yaba ku borozi, ndetse n’abakorera umwuga wo kubaga mu mabagiro yo hirya no hino”.

Lucie Zigiriza, Umuyobozi w’Umushinga Feed The Future Orora Wihaze, ari na wo wateye inkunga umushinga wo kubaka urwo ruganda, avuga ko mu ntego bihaye harimo no gufasha aborozi, barimo n’abibanda ku bworozi bw’ingurube, kongera ibikomoka ku matungo no gutuma biboneka ku masoko bihagije kandi byujuje ubuziranenge.

Ati: “Abantu bifuza inyama z’ingurube byari ngombwa ko bagira ahantu haboneye bazigurira, hujuje ibisabwa mu bigendanye n’ibyo ikigo cy’ubuziranenge gisaba. Uruganda ubwarwo uburyo rwubatswemo, ibikoresho bakoresha birimo imashini zabugenewe mu gutunganya inyama no kuzibyazamo ibizikomokaho, ibyumba bizikonjesha n’ibyifashishwa mu kuzibika neza biri mu byo twibanzeho by’ibanze mu kunoza akazi bakora”.

“Usibye n’ibyo, twanabahaye ubumenyi bugamije kubafasha kumenya uko babikoresha cyangwa babitunganya mu buryo bwiza; ibyo bikazajya bibafasha kumenya uko inyama zigera ku isoko zujuje ubuziranenge”.

Bizeye ko ubuziranenge bw’inyama z’ingurube buziyongera

Mbabazi Antoinette, Umukozi w’Ikigo cy’Igihugu Gishinzwe Ihiganwa no kurengera Umuguzi (RICA) mu Ishami rishinzwe ishyirwa mu bikorwa ry’amabwiriza ajyanye no kwandika ibicuruzwa, agira ati: “Ni ingenzi kwita ku buziranenge bw’inyama z’ingurube n’ibizikomokaho kuko birinda abantu kuba bagira ingaruka zakomoka ku mwanda cyangwa indwara zishobora kuba ziri muri ayo matungo”.

Inyama z’ingurube zikungahaye ku ntungamubiri zifasha mu guhangana n’imirire mibi. Ku bw’ibyo Leta y’u Rwanda ikaba iteganya ko mu myaka iri imbere, ingano y’izo Abanyarwanda barya iziyongera ikagera nibura ku gipimo kiri hejuru ya 57% ugereranyije n’inyama zikomoka ku yandi matungo magufi.

Kugeza ubu mu Rwanda habarizwa aborozi b’ingurube 72 bujuje ibisabwa mu gihe hari abandi 87 bari mu nzira yo kuzuza ibisabwa.

Uruganda rwuzuye rutwaye Miliyoni 150 z’amafaranga y’u Rwanda, rukaba rufite ubushobozi bw gutunganya ingurube 70 ku munsi, kandi kuba rutangiye gukora, aborozi b’ingurube babibona nk’amahirwe y’isoko ribafunguriwe no koroshya uruhererekane rw’ibikomoka ku bworozi bw’ingurube nk’uko Alexis Mbaraga Umuyobozi wungirije w’Ihuriro ry’Aborozi b’Ingurube mu Rwanda yabibwiye Kigali Today.

Abakunda ibikomoka ku nyama z’ingurube begerejwe aho bitunganyirizwa hujuje ubuziranenge

Urugomero rwa Nyabarongo II ruri kubakwa ku buso bwa Hegitari 600 bukora kuri Gakenke, Rulindo na Kamonyi rukazatanga Megawati 43,5

Urwo rugomero ruzatanga Megawati 43,5 z’umuriro w’amashanyarazi, ruri kubakwa mu mushinga munini witezweho kuyakwirakwiza mu duce dutandukanye tw’Intara y’Amajyaruguru, iy’Amajyepfo n’Umujyi wa Kigali.

Ku ruhande rw’Akarere ka Gakenke honyine, mu Mirenge ya Ruli na Muhondo rukozeho, habarurwa abaturage basaga 2800 batarahabwa ingurane z’ubutaka bahingagaho n’ubwo bari batuyeho; bwagonzwe n’iyubakwa ryarwo.

Habyarabatuma Pascal wo mu Murenge wa Ruli agira ati: “Nari mfite ubutaka bwubatseho amazu n’ubwo nahingagaho nkanororeraho amatungo, bwose hamwe bwendaga kugera kuri Hegitari. Baratubariye badusaba kwimuka tukahava batwizeza ko bahita baduha ingurane. Ibyo byakozwe muri 2022, turimuka tujya mu bukode, abandi bajya gucumbika mu bagiraneza kuko batari bafite amikoro baheraho bagura cyangwa ngo bakodeshe”.

Bavuga ko bamaze imyaka itatu bategereje ingurane babariwe ariko amaso yaheze mu kirere

Akomeza yungamo ati: “Muri twe harimo ababerewemo Miliyoni zirenga 10, yewe no muri za 20 na 30, abandi ni ibihumbi amagana twese twaheze mu gihirahiro. Ubukene bwaratuzahaje kuko ubwo butaka nibwo twari dutuyemo, abandi bakodesha amazu yabo bakabona icyo barya, abandi babuhinga bakanorora. Tumerewe nabi kubera inzara, bamwe birirwa biziritse imishumi mu nda kuko aho twakuraga amaramuko bahasimbuje ibyo bikorwa. Urugomero rwaje tubikunze rwose kuko ni amajyambere, ariko ruradukenesheje”!

Mbanzagukira Sylveri na we wo mu Murenge wa Ruli agira ati: “Abenshi basembereye mu nshuti zabo kuko n’ubushobozi bwo gukodesha ahandi bwabashizeho. Tureba ukuntu ibiciro bidasiba kwiyongera umunsi ku munsi tukagira impungenge ko n’ayo mafaranga nibayaduha ntacyo tuzayamaza kuko ibintu bikomeje kwiyongera. Ubuzima bwacu ubu bumeze nabi, imiryango ntitekanye mu buryo bw’imibereho n’iterambere ryarazimye turi mu bukene. Leta nigire uko itugenza idushakire amafaranga y’ingurane turebe ko twagarura ubuzima”.

Urugomero rwa Nyabarongo II, rwatangiye kubakwa guhera mu 2022. Mu babariwe imitungo muri iyo Mirenge yombi y’Akarere ka Gakenke honyine, agaciro kayo kangana na miliyari imwe na miliyoni zisaga 800 z’amafaranga y’u Rwanda bagomba kwishyurwa nk’ingurane.

Abari bahafite imitungo bimutse badahawe ingurane ubu barataka ubukene

Umuyobozi w’Akarere ka Gakenke, yizeza abaturage ko inzego zibishinzwe zikomeje gukorana bya hafi, kugira ngo abatarahabwa ingurane z’ibyabo bazibone.

Ati: “Twakoze dosiye zibishyuriza tuzishyikiriza REG, bagenda bishyuramo bake bake. Turakomeza kubikoraho dufatanyije n’inzego zose zibishinzwe kugira ngo uko ubushobozi buboneka, bagende bayabaha. Abaturage icyo tubasaba ni ugutegereza bihanganye, mbese bakabifata nk’aho bayibikiye muri banki. Ntibazatinda kuyahabwa bose”.

Uyu mushinga munini wo kubaka Urugomero rwa Nyabarongo II uri gushyirwa mu bikorwa na Kampani y’Abashinwa yitwa Sino Hydro Corporation, ku masezerano na Leta y’u Rwanda binyuze mu Kigo gishinzwe Ingufu REG.

Ubuyobozi bw’Akarere ka Gakenke bwasabye abaturage kwihangana kuko ikibazo cyabo kiri gukurikiranwa n’inzego zitandukanye

Ubuso bwa hegitari 600 ruri kubakwaho, bukora ku Turere twa Gakenke, Rulindo mu Ntara y’Amajyaruguru ndetse n’Akarere ka Kamonyi mu Ntara y’Amajyepfo.

Byitezwe ko nirutangira gukora guhera mu mwaka wa 2027, ruzongera ingufu z’amashanyarazi yakoreshwaga muri utwo Turere hiyongereyeho n’igice cy’Umujyi wa Kigali ukazagezwa n’ahandi henshi hatuwe n’abari bagowe no kuba mu icuraburindi.

Imiryango 14 mu yabanaga mu buryo butemewe n’amategeko niyo yasezeranye

Ubu butumwa yabugarutseho mu gikorwa cyo gutangiza ku mugaragaro icyumweru cy’Ubukangurambaga ku kwimakaza Ihame ry’Uburinganire n’Ubwuzuzanye, cyabereye mu Murenge wa Ruli mu Karere ka Gakenke kuwa kabiri tariki 24 Nzeri 2024, ku rwego rw’Intara y’Amajyaruguru.

Ni igikorwa kandi cyanahujwe no gusezeranya imbere y’amategeko, imwe mu miryango yo muri aka Karere yabanaga mu buryo butemewe n’amategeko.

Mukandayisenga Evelyne yari amaze imyaka itatu abana na Maniraho Stanislas, batarasezeranye imbere y’amategeko. Kubera urwicyekwe buri wese yagiriraga mugenzi we, iyo yaguraga umutungo ntiyawugagarizaga undi, ku bwo gutinya ko isaha iyo ariyo yose ashobora kwigira ahandi kuko nta sezerano bari afitanye.

Ati: “Sinabashaga kumwisanzuraho ngo mwereke ibyo ninjiza kuko natekerezaga ko isaha n’isaha yazancika akigira ahandi. Nagiraga konti muri banki inabitseho amafaranga, sinari narigeze muhingukiriza ko nyifite. Nari naraguze amatungo magufi nkajya nyaragiza iwacu mu rugo, ibyo byose nkabikora atabizi”.

Imiryango ibanye mu buryo bwemewe n’amategeko byongera ubwizerane ndetse n’uburenganzira busesuye ku mitungo

Maniraho yungamo ati: “Nta cyizere namugiriraga 100%. Ni byinshi namukingakingaga harimo nk’ikibanza maze igihe naraguze ndabimuhisha bitewe na ya myumvire yo kwibwira ko ashobora guhura n’abandi bagabo bakamutwara, twashwana nkahomba ngabana na we ibyanjye naruhiye”.

Mu gikorwa cyo gutangiza ku mugaragaro icyumweru cy’Ubukangurambaga ku kwimakaza Ihame ry’Uburinganire n’Ubwuzuzanye, imiryango 14 yabanaga bitemewe n’amategeko niyo yasezeranye.

Mu byishimo byinshi, aba basezeranye bagaragaza ko iyi bayifata nk’intangiriro yo gushyira hamwe no kujya inama mu byubaka umuryango.

Ndikumana Jean Pierre, yari yaratinye gusezerana kuko yibwiraga ko bikorwa n’abifite. Agasanga ari ukwibeshya cyane, dore ko ngo mu byo yasanze bisabwa abifuza gusezerana, nta na kimwe cyamutwaye amafaranga.

Abasezeranye bagaragaza ko iyi bayifata nk’intangiriro yo gushyira hamwe

Ati: “Ku bw’ibyo nkakangurira abatekereza gushora ibya mirenge ngo babone gusezerana batakagombye kubigenderaho ngo biyime aya mahirwe yo gusezerana n’abo bashakanye”.

Minisitiri w’Uburinganire n’Iterambere ry’Umuryango Uwimana Consolée, agira ati: “Bimwe mu bibazo bikigaragara birimo Ihohoterwa, amakimbirane, ubusinzi, umwanda, ubuzererezi no guta ishuri kw’abana, igwingira, gukubita no gukomeretsa, isesagura ry’umutungo n’ibindi isesengura ribigaragaza ko bifitanye isano no kuba imiryango myinshi biberamo, ari ibana mu buryo butemewe n’amategeko.

Yakomeje agira ati: “Twifuza ko aho biri bicika burundu, abantu bagashishikarira kwimakaza imiryango ikomeye kandi itekanye, ibera n’abandi icyitegererezo. Ubuyobozi bubegereye bukarushaho gukurikiranira hafi ko abantu babigira ibyabo”.

Muri iki cyumweru biteganyijwe ko indi miryango 489 yo mu Ntara y’Amajyaruguru izasezerana mu buryo bwemewe n’amategeko.

Minisitiri Uwimana yibukije ko kubana abantu barasezetanye imbere y’amategeko ari bitanga amahirwe menshi y’imibanire izira amakimbirane n’ihohoterwa

Umuhoza Gatsinzi Nadine, Umuyobozi w’Urwego rushinzwe kugenzura Iyubahirizwa ry’Ihame ry’Uburinganire n’Ubwuzuzanye hagati y’abagabo n’abagore mu iterambere ry’Igihugu, yagarutse ku mpamvu ibi babyitayeho.

Ati: “Imiryango itarasezeranye ikunze guhura n’ingaruka, zikandamiza kandi zigashegesha cyane cyane abagore n’abana kuko nko muri iyi Ntara y’Amajyaruguru, hagaragara umubare munini w’abagabo bashatse abagore benshi, ugasanga abana babyaye nibo bataye ishuri, ni bo bari mu buzererezi. Hari ibibazo byinshi twakira by’abagore baba barashakiye hamwe imitungo n’abagabo babo, umwe akawiyandikaho wenyine, bajya gutandukana bikagorana kwemeza ko koko bawushakanye”.

Yungamo agira ati: “Gusezerana imbere y’amategeko n’ubwo tutavuga ko aribyo bikemura ibyo bibazo byose, ariko byibura iyo umugabo n’umugore basezeranye bikaba ngombwa ko batandukana, hari uburenganzira bwa buri wese n’abana babakomokaho bwubahirizwa, ntihabeho kuryamirana ku mutungo bashakiye hamwe”.

Mu Mirenge yo y’Intara y’Amajyaruguru, abana bari baracikanywe bazandikwa hanasuzumwe ko abasezeranye banditswe neza mu bitabo by’irangamimerere. Hazanabaho kugenzura uko ihame ry’uburinganire n’ubwuzuzanye ryitaweho, ibiganiro n’abana b’abakobwa babyaye imburagihe no kubaha serivisi z’ubuzima n’ubutabera, no gukurikirana uko imikurire y’abana babo ihagaze kandi hanaganirizwe ababyeyi b’abana bafite ubumuga.

Biteganyijwe ko indi miryango 489 yo mu Ntara y’Amajyaruguru izasezerana byemewe n’amategeko

Ni ku nshuro ya kabiri ubukangurambara nk’ubu bubera mu Ntara y’Amajyaruguru kandi ukurikije ubwabubanjirije umwaka ushize bwatanze umusaruro, kuko imiryango ibarirwa mu bihumbi 4 ari yo yasezeranye mu buryo bwemewe n’amategeko, abana 1300 bandikwa mu bitabo by’irangamimerere n’ibindi bikorwa byo kuremera imiryango no gusubiza abana mu ishuri; byose hamwe byagize agaciro karenga Miliyoni 100 z’amafaranga y’u Rwanda.

Kuri Gatsinzi Nadine, agasanga uyu ari umusanzu ukomeye mu kubaka umuryango ushoboye kandi utekanye.

Amakuru y’urupfu rw’uwo mwana w’imyaka itandatu yamenyekanye mu masaha y’igicamunsi cyo ku wa Mbere tariki 23 Nzeri 2024. Ngo ubwo bombi bari baryamye hamwe, dore ko uwo mwana we atari yanagiye ku ishuri, ngo byamujemo ko agomba kumwica ahita anabishyira mu bikorwa amukata ijosi, umwana ahita ahasiga ubuzima, arangije yishyikiriza RIB yivugira ko amwishe.

Uwo mugore ubarizwa mu Mudugudu wa Tatiro, Akagari ka Cyahi, ngo asanzwe akora ibikorwa byo gutunda magendu no kwambukiranya umupaka mu buryo butemewe n’amategeko ibizwi nk’ubufozi, bigakekwa ko kwica umwana we byaba bifitanye isano na bwo n’ubwo iperereza ku cyabimuteye rigikomeje nk’uko Egide Ndayisaba, Umunyamabanga Nshingwabikorwa w’Umurenge wa Rugarama iyo sanganya yabereyemo yabihamirije Kigali Today.

Yagize ati: "Uwo mugore yivugiye ko yishe umwana we amuciye ijosi. Bikimara kumenyekana inzego zibishinzwe zihutiye kujya mu rugo rwe, zisanga koko umwana yapfuye akaswe ijosi. Nta kindi kibazo kizwi yari afitanye na we dore ko yari akiri na mutoya. Si we wenyine yari afite gusa kuko hari n’abandi bana batatu yabyaye bakuru kuri uwo mwana".

Yongeyeho ati "Uwo mugore akunze guca mu rihumye ubuyobozi akishora mu bikorwa byo kwambukiranya umupaka mu buryo butemewe agatunda magendu na forode muri Uganda. Ntitwamenya niba ubwo bugizi bwa nabi acyekwaho bwo kwiyicira umwana bwaba bufitanye isano na forode yishoragamo, iperereza riracyakorwa".

Umwana w’umukobwa wishwe biteganyijwe ko ashyingurwa kuri uyu wa kabiri tariki 24 Nzeri 2024.

Gitifu Ndayisaba akangurira abaturage ko mu gihe hagize ugira ikibazo kimurenze yajya yihutira kukimenyesha ubuyobozi bukamufasha kugikemura atarindiriye gushyira ubuzima bw’abandi mu kaga.

Tumushime Pélagie yahise atabwa muri yombi akaba ari mu maboko ya RIB Station ya Cyanika.

Minisitiri Dr Bizimana, yagaragarije abarimu ko kwigisha amateka y’u Rwanda batayaca ku ruhande aribwo buryo bwiza bwo kuyamenyekanisha mu bana b’abanyeshuri

Ibi Minisitiri Bizimana yabigarutseho ku wa mbere tariki 23 Nzeri 2024, mu Kiganiro kigaruka ku mateka y’u Rwanda, yagejeje ku barimu bari mu mahugurwa abongerera ubumenyi mu myigishirize iboneye y’amateka yaranze u Rwanda; akaba arimo kubera mu Kigo cyigisha Umuco w’Ubutore, kiri i Nkumba mu Karere ka Burera.

Dr Bizimana yakomoje ku kuntu Abanyarwanda mbere y’umwaduko w’abazungu barangwaga n’ubumwe, bwasenywe n’abakoloni bakigera mu Rwanda mu 1900, bakimika Politiki y’amacakubiri n’irondamoko byamunze Igihugu bikanagira ingaruka ku burezi.

Yagize ati: “Amoko ya Hutu, Tutsi, Twa yakoreshejwe mu buzima bwose bw’imitegekere y’Igihugu adasize na Politiki y’uburezi. Igikomeye muri byo, ni uko n’ubwo ibyo byiciro byose twarazwe n’amateka mabi, n’ubwo nta wahita abihanagura, ntidukwiye kwemera kubatwa nabyo”.

Ibyuho bikigaragara mu myigishirize y’ayo mateka, Minsitiri Dr Bizimana, asanga bigira ingaruka zo kuba hari abarangiza amashuri badasobanukiwe neza uko Igihugu cyayanyuzemo n’imbaraga zakoreshejwe mu kuyigobotora.

Ati: “Abarimu twagiye tuganira na bo mu bihe bitandukanye, mu bibazo bagiye batugaragariza, harimo nko kuba nta bumenyi buhagije bafite ku ngingo remezo zaranze amateka y’u Rwanda, hakaba n’abagiye batugaragariza ko imiterere y’ingengabitekerezo ya Jenoside n’irondabwoko ryaranze u Rwanda guhera mu gihe cy’umwaduko w’abazungu kugeza ku butegetsi bwa PARMEHUTU n’ubwa MRND, ko kuba badasobanukiwe neza, bituma bahitamo kubihunga ntibabyigishe, batinya ko byabaviramo icyaha bahanirwa n’amategeko”.

Biyemeje kujya bigisha amateka mu buryo bwimbitse kandi bashize amanga

Yakomeje agira ati, “Aha rero ni umwanya mwiza wo kubereka intangiriro y’ayo mateka n’uko yashyizwe mu bikorwa, kugira ngo aho bafite imbogamizi n’ingingimira tubafashe kuyasobanukirwa neza n’uko bashirika ubwoba mu gihe cyo kuyigisha”.

Abo barimu bigisha isomo ry’amateka mu mashuri yisumbuye, ngo iyo bageraga ku ngigo ikomoza ku mateka yaranze u Rwanda mbere ya Jenoside yakorewe Abatutsi no mu gihe cyayo, babyigishaga basa n’abikandagira.

Sibomana Etienne umwe mu barimu bitabiriye aya mahugurwa agira ati: “Twayigishaga tuyaca ku ruhande tubitewe n’ibikomere by’amateka tuba twanga gutoneka. Urugero, niba ari nk’umwarimu ukomoka mu muryango urimo abijanditse muri Jenoside yakorewe Abatutsi, byagoranaga kujya imbere y’abana ngo ababwire ko kanaka na kanaka bishe Abatutsi muri Jenoside, twatekerezaga ko byagarura abantu mu bikomere bya cyera, bikaba byavamo no gufungwa. Icyo kikaba mu bituma mu myigishirize yacu dusa n’abakikira iyo ngingo tukayigisha abana tubacengacenga”.

Bagenzi be barimo Abajeneza Alodie na Mukashyaka Solange, ngo ubumenyi bungutse buzatuma bigisha neza dore ko hari n’imfashanyigisho zivuguruye mu buryo butomoye bijejwe ko mu gihe cya vuba bazaba bazigejejweho.

Ni mu gihe bamwe mu rubyiruko rw’abanyeshuri bo barimo Izihirwe Leandre agira ati: “Twibazaga impamvu iyo batwigisha amateka, amasaha menshi mwarimu akoresha, ayaharira kutwigisha amateka y’ibindi bihugu by’amahanga, nyamara byagera ku Rwanda ugasanga akoresha umwanya mutoya. Byaduhezaga mu rujijo kuko tutabaga twarayasobanuriwe bihagije, tugahora twifuza kumenya byinshi ku Rwanda tugatinya no kugira aho duhera tuyasobanuza. Kuba abarimu bacu bakongererwa ubumenyi mu myigishirize yayo ni inyungu ku hazaza hacu”.

Abarimu 2949 bo mu gihugu hose nibo bazongererwa ubumenyi mu myigishirize inoze y’amateka y’u Rwanda

Mu ntegenyanyigisho ivuguruye y’amasomo y’imyigishirize y’amateka ku Rwanda by’umwihariko Jenoside yakorewe Abatutsi, mwarimu azajya agira umwanya uhagije wo kuyigisha mu buryo bwimbitse kandi yisanzuye; ndetse hakaba harateganyijwe imfashanyigisho zihagije ziyasobanura atari mu buryo bw’inyandiko cyangwa amagambo gusa, ahubwo no mu buryo bwo kuyiga imbonankubone binyuze mu gusura ibice ndangamateka bigaragaza aho u Rwanda rwavuye n’aho rugeze ubu, kugira ngo bibafashe kurushaho kuyasigasira.

Abitabiriye aya mahugurwa bagize icyiciro cya kabiri kigizwe n’abaturutse mu Turere turimo aka Nyabihu, Ngororero, Gicumbi, Gakenke na Rulindo. Biyongera ku baheruka gusoza nka yo; bo mu Turere twa Rusizi, Nyamasheke, Rubavu, Rutsiro na Karongi.

Abo bazakurikirwa n’ibindi byiciro bine, muri rusange akazakorwa mu gihe cy’ukwezi kumwe, ahitezwe ko abarimu 2949 bo mu gihugu hose ari bo bazayitabira.

Aya mahugurwa yateguwe ku bufatanye buhuriweho na za Minisiteri zirimo iy’Ubumwe bw’Abanyarwanda n’Ishingano Mboneragihugu (MINUBUMWE), Minisiteri y’Uburezi MINEDUC, Minisiteri y’Ubutegetsi bw’Igihugu MINALOC na Polisi y’u Rwanda.

Nta gikozwe mu kongera ikibatsi mu mikorere y’Ingo mbonezamikurire y’Abana bato bazisanga hari izakinze imiryango

Mu Murenge wa Rugengabare, mu ngo mbonezamikurire y’abana bato 75 zihabarizwa, 17 muri zo nizo zonyine ziganwa n’abana mu buryo buhoraho mu gihe izindi 58 kuri ubu zo zikora rimwe na rimwe kubera ibibazo by’amikoro make.

Uko kuba hari izititabirwa iminsi yose igenwe, bamwe mu babyeyi bibaviramo kubura aho basiga abana babo, bikanasubiza inyuma urwego rw’ubumenyi ndetse n’ubuzima.

Uwimpuhe Forutunata wo mu Mudugudu wa Kabukoko mu Kagari ka Nyanamo, hamwe mu hatuwe n’abagowe no kuba ingo mbonezamikurire zidakora agira ati: “Inyinshi mu ngo mbonezamikurire y’abana bato ntizigikora, n’izo navuga ko zigihanyanyaza usanga zikora nka rimwe cyangwa kabiri mu cyumweru. Ubu abana bacu dusigaye tubasiga badafite kirengera kubera ko nta ngo mbonezamikurire ziri hano mu mudugudu twabasigamo zihari. Tureba gukora urugendo rurenga isaha tubajyanye mu zo mu yindi midugudu ukabona utabivamo tugahitamo kubasiga ku rugo, wataha ugasanga biriwe mu mihanda bazerera”.

Ingo mbonezamikurire y’abana bato zibarizwa muri uyu Murenge zirimo izashinzwe n’abaturage ubwabo, iziterwa inkunga muri gahunda ya VUP, hiyongereyeho izikorera ku Tugari, izishamikiye ku bigo by’amashuri, abanyamadini, imiryango itari iya leta n’izindi.

Uku kuba hari zimwe muri zo cyane cyane mu zashinzwe n’abaturage ubwabo zitagikora mu buryo buhoraho ibiziganisha mu nzira yo gufunga imiryango burundu, ngo byaba biterwa no kutihaza mu kubonera abana bahakurikiranirwa igikoma cyangwa amafunguro; ndetse no kuba ababasigarana umunsi ku munsi na bo nta dufaranga babona two kugura agasabuni.

Umwe mu babyeyi utuye mu Kagari ka Nyanamo agira ati: “Mbere zigitangira zakoraga buri munsi kandi neza; ariko zigenda zicika intege ku buryo harimo n’izimara ibyumweru zidakora”.

Akomeza agira ati “Imbogamizi ahanini tubona zihari ni uko ingo zirebererwa n’abaturage ubwacu twifuza ko leta yagira ibyo itwunganira mu bituma zikora uko bikwiye, nk’uko ibigenzereza ingo zifashwa muri gahunda ya VUP. Zo izitera inkunga y’ibyo abana bagaburirwa nk’igikoma, amata, imikeka bicaraho, amasafuriya babatekeramo, ibikombe banyweramo n’ibindi byinshi kandi bigakorwa mu buryo buhoraho”.

Yungamo agira ati, “Ni mu gihe izirebererwa n’abaturage zo, mu kwita ku bana bazigana, bisaba ko abaturage twishakamo ubushobozi bwo kubabonera igikoma banywa, inkwi zo kugitekesha, isukari ugasanga ni ibintu bikunze kugorana kubibona ku gihe. Byibuze Leta igize itya, ikajya izigenera nk’ifu y’igikoma cyangwa isukari, noneho n’ababyeyi bagashyiraho akabo mu kwishakamo ibindi bisigaye, byarushaho kutwongerera imbaraga zigakora neza”.

Intego ya leta y’u Rwanda muri Politiki y’ingo mbonezamikurire y’abana bato, ni uko muri buri Mudugudu hakwiye kubarizwa nibura ingo eshatu abana bakurikiranirwamo, mu kubungabunga ubuzima bwiza, bagaburirwa indyo yuzuye, kwita ku isuku yabo no kubatoza imikino ikangura ubwonko bityo n’ababyeyi bikaborohereza gukora akazi kabo nta komyi.

Uwineza Florence umukozi w’Umurenge wa Rugengabare ushinzwe gukurikiranira hafi iby’imikorere y’ingo mbonezamikurire y’abana bato, asanga hakwiye gushyirwa imbaraga mu kumvikanisha uruhare rw’abaturage mu gushyigikira imikorere yazo cyane ko hari nk’ababa bariyemeje gutanga umusanzu wifashishwa mu kubonera abana ibyo bagaburirwa cyangwa ibikenerwa ngo bitabweho mu bundi buryo, ntibawutangire ku gihe hakaba n’abatawutanga burundu.

Umuyobozi w’Akarere ka Burera, Mukamana Soline avuga ko bagiye kurushaho kwigisha abaturage kugira ngo bongere imyumvire ku mikorere n’umumaro wazo, bityo barusheho kuzishyigikira.

Yagize ati: “Ibyo bigomba kujyana no kubaka ireme ry’izihari no kuzigeza ku rwego zose ziha abana ubumenyi bufatika, kugira ngo koko niba dukeneye u Rwanda rw’ahazaza ruzima mu nguni zose, abo bana babitegurirwe hakiri kare, bubakirwe n’ubushobozi mu buryo bw’imitekerereze n’ubuzima. Ni gahunda twifuza ko ishinga imizi dufatanyije n’abaturage kimwe n’abafatanyabikorwa dukorana umunsi ku munsi”.

Mu Rwanda nk’uko n’imibare y’Ikigo gishinzwe guteza imbere gahunda mbonezamikurire y’abana (NCDA) kibigaragaza, habarurwa ingo mbonezamikurire zisaga 70 z’icyitegererezo, izishamikiye ku bigo by’amashuri zibarirwa mu 3800, izegereye abaturage zigera mu 1900, izikorera mu ngo z’abaturage zo zikaba zibarirwa mu bihumbi 25.

Akarere ka Burera konyine kabarizwamo izigera 1226 kandi nabwo ngo ntizihagije, kuko ngo ugendeye ku mubare w’abana bahabarizwa b’abagenerwabikorwa b’iyi gahunda ngo karacyakeneye kongeraho izindi ngo mbonezamikurire nibura 484.

Umugabo wo mu Karere ka Nyabihu bamusanze mu ishyamba amanitse mu giti yapfuye

Mu masaha y’igicamunsi cyo kuwa gatatu tariki 18 Nzeri 2024, abaturage batunguwe no gusanga uwo mugabo aziritse umugozi mu ijosi, amanitse mu giti cyo mu ishyamba riherereye mu Mudugudu wa Bisukiro, Akagari ka Gihorwe mu Murenge wa Kabatwa Akarere ka Nyabihu.

Uwamugezeho bwa mbere, warimo anyura mu gahanda kari hafi y’agashyamba uwo mugabo yari amanitsemo, yamusanze aziritse umugozi w’umukara mu ijosi anagana mu giti, ariko bigaragara ko atikwije igice cyo hasi (yambaye ubusa). Mu kugerageza guhisha ubwambure bwe, yahise amukenyeza umufuka yari ajyanye kwahiriramo, maze bihutira gutabaza inzego zibishinzwe.

Umunyamabanga Nshingwabikorwa w’Umurenge wa Kabatwa, Kampire Georgette yagize ati: “Umusore wahatambukaga akimubona yahise atabaza, turahagera dusanga aziritse akagozi mu ijosi ariko utasobanukirwa niba ariwe waba wiyahuye cyangwa niba ari abantu bamwishe barangiza bakamushyira aho ngaho. Iperereza ryahise ritangira kugira ngo hamenyekane mu by’ukuri intandaro y’urupfu rwe”.

Yakomeje agira ati, “Twabanje kuyoberwa inkomoke ye ariko ku bw’amahirwe tuza gusanga afite indangamuntu, turakurikirana dusanga yari atuye mu Murenge wa Bigogwe mu Kagari ka Rega. Umuryango we twahise tuwumenyesha urahagera, RIB na Polisi na bo bakora akazi kabo”.

Ishyamba uwo mugabo basanze amanitsemo, riri hafi y’inzira nyabagendwa ijya mu byerekezo bihuza Imirenge ya Kabatwa, Bigogwe, Jenda na Mukamira mu Karere ka Nyabihu.

Bivugwa ko uwo mugabo hamwe n’uwo bashakanye babanaga mu makimbirane, ariko Gitifu Kampire we, ngo ntiyabihamya kuko batamuzi neza cyane ko atari n’umuturage waho. Icyakora mu makuru bamenye, ngo ni uko yari asanzwe afite abagore babiri.

Yaboneyeho gukangurira abaturage kutihererana ibibazo no kujya bihutira kubigeza mu nzego z’ubuyobozi, kuko icyo zibereyeho ari ugufatanya na bo kubishakira ibisubizo.

Ati: “Iyo amakimbirane ari mu muryango cyangwa hari abantu bafitanye ibibazo, si byiza kubyihererana. Ubuyobozi ntabo butari hafi. Ni byiza ko bajya babwegera ibibazo bafite bikaganirwaho, hakanozwa uburyo byakemukamo aho kugira ngo bigere ku rwego rwo kwiyahura”.

Mu masaha ya nijoro, nibwo umurambo wahavanwe ujyanwa ku Kigo nderabuzima cya Bigogwe ngo ukorerwe isuzumwa dore ko hasanzwe hanakorera abaganga babifite mu nshingano.

Inzobere mu by’ubuzima bwo mu mutwe mu Kigo RBC zigaragaza ko umuntu ajya kugera ku rwego rwo kwiyahura yarabiteguye igihe kirekire kandi bikabanzirizwa no kugaragaza ibimenyetso birimo kugira agahinda gakabije, karangwa no kwiheba cyane, uburakari, umujinya, ubwigunge, kudasinzira no kumva atagishaka kubaho binajyana no guhora arwaye umutwe, umugongo n’umunaniro ukabije.

Nyamara ngo no kubikumira birashoboka mu gihe umuntu ku giti cye cyangwa ababana na we baba babigizemo uruhare.

Uyu muhanda waretsemo ikiziba kiri rwagati mu ngo z’abaturage cyababuzaga amahwemo ugiye kunyuzwamo kaburimbo

Uwo muhanda wa kaburimbo ugiye kubakwa mu Murenge wa Cyuve, uzaturuka ahitwa kuri GSK (Groupe Scolaire Kigombe), ukomereze ahazwi nko kwa Hatoni-ADEPR Nyarunde ugere ku byapa by’ahitwa ku Rugaga, ukazaba ureshya n’ibirometero bibiri bisagaho gatoya.

Umuhanda uhasanzwe uhuza utwo duce mu Tugari twa Rwebeya na Kabeza, warangiritse wuzuramo ibinogo, bikunda kurekamo amazi y’imvura, ku buryo iyo yaguye ari nyinshi hahinduka ikiziba kinini, abahatuye bakabura uko bahambukiranya ndetse bamwe inzitiro n’inzu byegereye aho ayo mazi areka byenda guhirima.

Ndayishimiye Innocent agira ati: “Amazi y’imvura igwa yahahinduye ikiziba gihuriweho n’imihanda itatu harimo uturuka GSK n’undi uturuka kuri Centre Umwali ndetse n’ukomeje za Nyarubande. Ni ahantu hatuwe n’ingo nyinshi, ziturukamo ibihumbi by’ababyuka bajya mu kazi, n’abana b’abanyeshuri babyukira ku mashuri bagataha saa sita cyangwa nimugoroba”.

Arongera ati, “Ari abakuru ari abatoya, iyo hagize ukigwamo agiye kwiga cyangwa ku kazi biga ngombwa ko asubira mu rugo cyangwa akajyayo ibyondo byamwuzuye ku mubiri no ku myambaro. Inzu n’ibipangu bikegereye byarahengamye kubera ukuntu ayo mazi ahora aharetsemo. Abafite imodoka bo baraziparitse abandi bajya kuzibitsa ahandi kuko zitabona uko zihanyura bitewe n’ukuntu hangiritse”.

Akomeza agira ati, “Twagerageje gushyiraho akacu dukora umuganda inshuro nyinshi, tugerageza kurwana nayo ariko ibiziba byakomeje kutubera ibamba, imbaraga z’amaboko n’amafaranga zidushiraho, igihari ni uko duhanze amaso ubuyobozi ngo abe ari bwo butugoboka, bubidukize kuko bituzengereje, cyane ko n’igihe cy’imvura igwa ari nyinshi twamaze kukinjiramo tukaba tubona ntaho tuzayicikira”.

Umushinga wo gukora uwo muhanda wa kaburimbo ushamikiyeho n’indi izasubiza ibibazo by’abaturage

Uwo mushinga uri gukorwa muri gahunda y’icyiciro cya kane cyo kubaka ibikorwa remezo bigamije guteza imbere umujyi wa Kigali n’Imijyi iwunganira, Rwanda Urban Development Project (RUDP II Phase 4), u Rwanda rufatanyijemo na Banki y’isi, aho biteganyijwe ko uzashorwamo miliyari 5,202,251,258 z’amafaranga y’u Rwanda.

Kwambukiranya aharetse amazi bisaba kwitwararika bitaba ibyo ukituramo

Aya mafaranga akaba akubiyemo igice cy’azakoreshwa mu gutunganya uwo muhanda nyirizina, ndetse n’azifashishwa mu kubaka Ruhurura izaba ireshya n’ibirometero 2 izajya inyurwamo n’amazi y’imvura, mu mwanya wo kujya asenyera abaturage bo mu Murenge wa Cyuve, akazajya yiroha mu mugezi wa Mpenge.

Uwo mushinga uzanajyanirana n’uwo kubaka Ivuriro ry’Ibanze (Poste de santé), ubwiherero rusange ndetse n’Irerero ry’abana bato ECD, byose mu Murenge wa Cyuve.

Umuyobozi w’Akarere ka Musanze Nsengimana Claudien yagize ati: “Ni imishinga ikubiye mu mihigo Akarere ka Musanze kazashyira mu bikorwa muri uyu mwaka wa 2024-2025. Muri rusange imihigo yose tuzashyira mu bikorwa ni 112. Ishingiye ku bukungu ni 26, imihigo 64 yo ikazaba ikubiye mu mibereho myiza y’abaturage mu gihe imiyoborere myiza igera kuri 22; kandi ingengo y’imari izakoreshwa mu kuyishyira mu bikorwa ingana na Miliyari 16. Uwo muhanda wa Kaburimbo n’imishinga iwushamikiyeho rero, biri mu bikorwa binini duteganya gukora”.

Ishyirwa mu bikorwa ry’uyu mushinga muri rusange, rigeze ku cyiciro cyo gutanga amasoko no gusinya amasezerano hagati y’Akarere na rwiyemezamirimo uzakora iyo mirimo igomba gutangira muri uyu mwaka w’ingengo y’imari.

Mu ngengo y’imari y’uyu mwaka wa 2024-2025, uretse imihanda izatuganywa hakorwa za site z’imiturire muri imwe mu Mirenge igize Akarere ka Musanze, nta yindi mihanda mishya iteganyijwe gukorwa.

Icyakora imirimo ijyanye no gutsindagira isanzwe ihari no kuyobora amazi mu buryo buyirinda kwangirika byo bizaba bigikomeje.

Gusigara ku birwa bikomeje kubaheza mu bwigunge

Ibyo birwa harimo icya Mwegerera, Cyamukira, na Kapyisi, abahatuye bavuga ko bamaze imyaka myinshi bahanganye n’ingaruka zo gusigara inyuma y’abandi.

Bazimaziki agira ati: “Usibye inzu tubamo na zo zenda kuduhirimaho kubera kudusaziraho nta kindi gikorwa remezo wahabona. Umuntu ararwara akaba yarembera mu rugo yewe akanahapfira kugeza ubwo bamushyingura. Abana bacu bambukiranya amazi ibicuku n’amajoro bajya kwiga mu bindi bice, ugize ibyago byo kuba yayarohamamo ubwo nta kindi turenzaho. No guhaha biba uko mbese tubayeho mu buzima butugoye”.

Yongeyeho ati “Abaturage b’ahandi baradusize, babayeho neza mu bwisanzure, bageze kure mu muvuduko w’iterambere kubera ko ibyo bakenera byose bibegereye, mu gihe twe twibereye nk’inyamaswa zahejejwe mu ishyamba. Nta gihe tutatakambye mu nzego zo hejuru ngo ubu bwigunge babudukuremo ariko ababishinzwe barabyumva bagasa n’abavuniye ibiti mu matwi, mu gihe twe tugikomeje gushenguka imitima”.

Ibirwa byo mu kiyaga cya Ruhondo byahoze bituwe n’imiryango ibarirwa mu 165, imwe muri yo ikaba yarimuwe hasigaramo 52; ari na yo ihabarizwa kugeza ubu.

Kuva iyo miryango yakwimurwa, hashize imyaka isaga umunani mu gihe iyahasigaye igitegereje kuhavanwa ngo na yo yisange mu bandi.

Usibye gusigara inyuma mu bikorwa remezo ngo na gahunda za Leta ntibamenya iyo ziva n’iyo zigana, bigatuma batanazigiramo uruhare.

Umwe muri bo agira ati: “Inama, Umuganda n’ibindi bikorwa bihuza abaturage nka Girinka cyangwa VUP, tubyumva ahandi kuko twe zitatugeraho. Abayobozi baratorwa ntitumenya ngo ni bande, ntituzi uko basa yewe tuvuze ko abenshi muri twe tuzi n’amajwi yabo twaba tukubeshye. Buracya tukumva ngo batoye ba Meya, ubundi tukumva ngo hashyizweho Gitifu, Guverineri cyangwa Minisitiri runaka. Muri abo bose nta n’umwe uragera muri kano gace ngo byibura ahamare n’iminota 30. Twibaza niba ari ugutinya kwambukiranya amazi y’iki kiyaga, byaratuyobeye”.

“Ino aha dutunzwe no guhinga no kujya guca inshuro mu midugudu yo hakurya y’amazi y’ikiyaga, aho tugera bidusabye kuyambukiranya dukoresheje ubwato. Iyo hari nk’uturutse ino aha, agerayo akamera nk’ukiva mu bitotsi, bitewe n’uko asanga abandi bakataje mu majyambere. Tumaze igihe dusaba ko byibura niba no kutwimura bakatuvana hano byarananiranye, batwegereza ibikorwa remezo by’ibanze nkenerwa, tukava muri ubu bwigunge, imyaka irirenze n’indi ikomeje guhinguka”.

Umuyobozi w’Akarere ka Musanze, Nsengimana Claudien, avuga ko iki kibazo uretse kuba gihangayikishije abahatuye ubwabo, ngo n’ubuyobozi bukomeje kureba inzira byanyuramo ngo gikemuke.

Ati: “Mu Karere hose habarurwa imiryango 401 igituye mu manegeka. Imwe muri yo turacyasesengura neza uburyo bwo kuyimura kuko nta handi ifite ubutaka bwo kubakaho, kandi n’Akarere kakaba kadafite ubutaka ahandi wenda kayubakiraho. Ibyo byose bizingiye ku kibazo cy’ubushobozi budahagije na n’ubu tugishakisha ngo turebe aho bwava abo baturage bakahavanwa bakimurirwa ahandi”.

“Ni ibintu tugisesengura neza tunajya n’inama n’inzego zidukuriye ngo turebe igisubizo kirambye”.

Ngo icyo Akarere kabaye gakoze mu gihe hagishakishwa igisubizo kirambye, ni ukuhashyira ubwato bukora mu buryo buhoraho, Akarere kishyura buri kwezi, bukaba bukura abana b’abanyeshuri kuri ibyo birwa, bukabageza ku mashuri bigaho, bukongera kubacyura nimugoroba batashye.

Imiryango 3,628 yo mu Karere ka Musanze, ni yo ibarurwa ko ibangamiwe n’imibereho myiza; nko kuba ituye mu buryo butanoze, idafite ubwiherero, ibikoni, ubwogero n’ibindi by’ibanze nkenerwa mu buzima bwayo bwa buri munsi.

Ikigo nderabuzima cya Karwasa, giherereye mu Murenge wa Cyuve, cyubatswe mu buryo butazitiye, aho abagituriye n’abagenderera ingo zituranye nacyo ariho bahinduye inzira banyuramo, bikabangamira abahivuriza usanga baba batisanzuye.

Uwimanimpaye Stephanie agira ati: “Iri vuriro riganwa n’abantu benshi cyane baturuka muri Cyuve n’indi Mirenge bihana imbibi nka Gacaca na Gahunga. Buri wese yinjiramo uko yishakiye, bitewe n’uko kiri ku murangarizwa. Abana birirwa bakiniramo umupira, ari nako abashumba na bo baragiriramo amatungo, abandi na bo bakaba barahahinduye inzira nyabagendwa bikabangamira ituze ry’ababa baje kuhivuriza”.

Iraguha Samson na we agira ati: “Abahivuriza basa n’ababa bari ku karubanda kubera ko inyubako zose ziri ku murangarizwa. Abarwayi mu gihe barimo kuvurwa, abana burira amadirishya bakabarunguruka, ukabona ari ibintu biteye impungenge”.

Ni imbogamizi zinagarukwaho n’abakozi barimo n’Umuyobozi w’iki kigo nderabuzima Uwase Alice, agira ati: “Kuba kitazitiye byorohereza abajura kwinjira cyangwa gusohokera mu nzira zose babona zishoboka. Tujya tugira abana baducunga ku ijisho bakinjiramo bakiba ibikoresho birimo n’ibiba byakoreshejwe mu kuvura abarwayi, bishobora no gukurizaho kubakururira indwara zandura”.

Si kuri iki kigo cyonyine hagaragara ibi bibazo, kuko no ku Kigo Nderabuzima cya Shingiro naho babangamiwe no kuba kitazitiye.

Mushimiyimana Ernest ukiyobora agira ati: “Inzira abahanyura bahaciye zirenga nka 15. Nta rembo kigira twavuga ko rigenewe kunyurwamo n’abakigana, buri wese nukunyura aho abonye kuko ari ku murangarizwa. N’iyo washyiraho uburyo bwo gukumira abaca muri izo nzira zose biragoye kubishobora; Kereka ahari hatekerejwe uko twashyiraho abarinzi bashinzwe kubuza abantu kunyura muri izo nzira kandi ugereranyije n’umubare w’abashinzwe uburinzi bw’ikigo cyose dufitiye ubushobozi ubona ko byagorana kubabonera umushahara”.

Aho byubatswe abaturage bagiye bacamo inzira nyabagendwa

Muri uko gutangirwa serivisi ahatazitiye, ngo impungege ziba ari nyinshi zo kwibwa ibikoresho byifashishwa mu kuvura abarwayi ahanini biba binahenze ku masoko nk’uko Vedaste Ntakirutimana Uyobora Ikigo nderabuzima cya Kimonyi abivuga.
Ati: “Aho giherereye ni hafi y’umuhada wa kaburimbo ku cyapa gihagararaho imodoka. Hari utuyira twinshi abantu bajya banyuramo baciye mu kigo bajya mu mudugudu byegeranye, ukaba utabasha kumenya niba baje kwivuza cyangwa niba ari abagenzi bahanyura bisanzwe”.

“Dufite ingero z’ibikoresho byinshi byagiye byibwa n’abajura bacunga abarinzi ku ijisho kandi n’ubungubu izo mpungenge turazihorana”.

Abayobozi babyo nk’uko babigarukaho, ngo bamaze kubona ko iki kibazo giteye inkeke, kandi kibarusha ubushobozi, bagiye bakigeza ku buyobozi bubakuriye ku rwego rw’Ibitaro bikuru bya Ruhengeri ndetse n’ubw’Akarere ka Musanze.

Umuyobozi w’Akarere ka Musanze Nsengimana Claudien, avuga ko muri iki gihe Leta y’u Rwanda ishishikariye kuzamura urwego rw’ubuvuzi, hakomeje no gushyirwa imbaraga mu kwagura ibigo nderabuzima, kubivugurura, kandi no kubizitira ntibyirengagijwe.
avuga ko: “Tugenda twagura inyubako za bimwe mu bigo nderabuzima tuzongerera ibyumba bivurirwamo no kuvugurura inyubako zishaje, kandi uwo mushinga urakomeje, na cyane ko hari nk’ibyubatswe muri ubwo buryo bikanazitirwa. Ngendeye nko ku rugero rw’Ikigo Nderabuzima cya Kabere kiri mu byo duheruka kuvugurura mu buryo bugezweho, bitanga icyizere ko n’ibindi bitarazitirwa nabyo igihe kizagera bigakorwa”.

“Ibyo tubifite muri gahunda, kandi dukomeje kubiganiraho hagati yacu ndetse n’izindi nzego dufatanya muri gahunda zo guteza imbere ubuzima, turateganya ko mu ngengo y’imari y’imyaka iri imbere uhereye umwaka utaha, tuzatangira kubishyiramo imbaraga".

Kuba bitazitiye bituma kumenya ababigana bagamije kwivuza cyangwa izindi gahunda bigorana

Mu Karere ka Musanze habarirwa ibigo nderabuzima 16, birimo ibiheruka kubakwa mu myaka ya vuba, hakaba n’ibyubatswe cyera bigaragara ko bifite inyubako zishaje n’izigikeneye gushyirwa ku rwego rugezweho rwa serivizi zitangirwamo yaba mu myubakire, ibikoresho n’abakozi.

Abana bari barabuze uko bajya ku ishuri bahawe ibikoresho biyemeza kurisubiramo

Nyiraneza Aisha, ni umubyeyi w’abana batandatu, aho bane muri bo yaherukaga kubohereza ku ishuri, badafite ibikoresho bihagije bifashisha mu gihe biga. Gusa ku bw’amahirwe ye, ku ishuri babaye bemereye abo bana be kwiga, ariko babaha iminsi ntarengwa icumi (10) yo kuba yababoneye ibyo bikoresho bibura, kugira ngo bazakomeze bige batabangamiwe.

Yagize ati: “Maze iminsi ndara ntasinziye nibaza ahazava uniforme yabo, amakayi ndetse n’amafaranga y’ishuri ntarishyura. Nta n’icyizere cy’aho bizava, cyane ko n’ibiraka byo gufurira abandi nkora, mbibona bigoranye kandi n’amafaranga nkuramo akaba ari makeya, nabwo kandi nyifashisha mu guhahira abana”.

Ku rundi ruhande undi mubyeyi witwa Nyirambarushimana, na we kubona ubushobozi bwo kugurira abana be ibikoresho by’ishuri byari ikibazo.

Ati: “Ngira abana bazi ubwenge ariko kubera ubushobozi bukeya bituma biga nabi. Nk’ubu babiri biga mu mashuri yisumbuye barimo uwiga mu wa gatanu n’undi uri mu wa gatandatu. Bajya ku ishuri umwe yatwaye amakayi abiri undi atwara amakayi atatu. Ibyo bikoresho bidahagije, byiyongeraho no kuba na minerivale y’ibihembwe bibiri by’umwaka ushize ntarabashije kuyishyura kubera kubura amafaranga”.

Akomeza agira ati, “Iyo natomboye aho nca incuro, udufaranga mpembwa ntwishyura inzu ducumbitsemo, kandi hari ubwo nanabura icyo nyishyura, naba naraguze nk’udutebe, igitanda cyangwa akameza, ba nyiri inzu bakabigwatira nkaviramo aho. Gusa nkomeza kwihambira ngo abana bige, kugira ngo bazajijuke babone uko bibeshaho”.

Aba babyeyi kimwe n’abandi bo mu Midugudu igize Akagari ka Mpenge mu Murenge wa Muhoza batishoboye, mu kubagobotora ibyo bibazo, bashyikirijwe ibyo bikoresho; bishimira abo bagiraneza bagize iki gitekerezo cyo kubunganira.

Imiryango abo bana baturukamo igizwe n’abatishoboye bari bagowe no kubabonera ibikoresho

Muri iki gihe cy’itangira ry’amashuri, hari abana bagira ipfunwe ryo kwiga badafite ibikoresho, bakaba banarivamo cyangwa bakiga ariko mu buryo bubagoye.

Ni naho umusore ukorera umwuga w’ububaji mu Kagari ka Mpenge, witwa Rukundo Jackson, yahereye yiha intego yo guha abo bana amakayi, amakaramu, ibitabo byo kwigiramo, ibikapu n’ibindi biborohereza kwiga, kandi intego ye ni ukuzakomeza kubunganira kunogerwa n’imyigire yabo ya buri munsi.

Yagize ati: “Ejo hazaza h’Igihugu hazagenwa n’abana tubona ubu, kandi kugira ngo bazabe abiteguye gukora ibikibereye, birasaba kubatoza gutinyuka no kwagura imitekerereze yabo hakiri kare. Ibyo nta handi bazabimenyera ni mu ishuri ari nayo mpamvu dukwiye guhaguruka tukazamura imyigire duhereye ku bana batoya, batari bagifite icyizere cy’amahirwe y’uburezi”.

Nizeyimana Mouhamed wari uhagarariye ubuyobozi bw’inzego z’ibanze mu Murenge wa Muhoza, mu gikorwa cyo gushyikiriza abo bana ibikoresho, yagaragaje ko: “Izo mbogamizi zo kutihaza mu bikoresho by’ishuri, bitera aba ubwigunge no kumva ko batari ku rwego rumwe n’abandi, bikadindiza imyigire yabo, bamwe bakanarivamo. Uku kuba bamwe mu bari bafite ibyo bibazo bahawe ibikoresho, dusanga ari ubwunganizi bukomeye cyane muri gahunda yo kuzamura uburezi kuri bose”.

Rukundo Jackson umubaji wiyemeje gufasha abana 150 mu myigire yabo

Ubuyobozi kandi ngo buzakomeza gukurikirana ko abahawe ibyo bikoresho babifata neza bakanabibyaza umusaruro. Gusa usibye ko ngo ubuyobozi n’umufatanyabikorwa wabibahaye batabyishoboza hatabayeho ubufatanye bw’ababyeyi n’abana ubwabo.

Basanze umusore yarapfiriye mu nzu yabagamo

Uwo musore wari ucumbitse mu Mudugudu wa Rusagara, Akagari ka Mpenge, Umurenge wa Muhoza mu Karere ka Musanze, yakoraga akazi ko gutwara imodoka ya fuso.

Mu bari bamuzi, bakavuga ko bamuherukaga kuwa gatandatu nk’uko bamwe muri bo babitangarije Kigali Today.

Umwe muri bo yagize ati: “Yari umuturanyi wacu uhamaze imyaka ibiri akodesheje muri kano gace. Yabyukaga ajya mukazi agataha nimugoroba ubona ko nta kindi kibazo cy’ubuzima afite. Rero natwe tukimara kumenya ko yapfiriye mu nzu natwe byadutunguye”.

Amakuru y’urupfu rw’uyu musore, yamenyekanye mu ma saa sita y’igicamunsi cyo kuri uyu wa gatatu tariki 11 Nzeri 2024 nyuma y’uko inshuti z’uwo musore zihageze zigasanga umurambo we mu nzu.

Igipangu kirimo inzu uwo musore yari acumbitsemo

Umunyamabanga Nshingwabikorwa w’Akagari ka Mpenge, Niyoyita Ali wari aho ibi byabereye yagize ati: “Yakoraga akazi k’ubushoferi, utwara fuso. Bagenzi be b’inshuti ze batubwiye ko baherukanaga na we kuwa gatandatu, ari nabwo yasabye boss we uruhushya amubwira ko yumva ananiwe. Ngo icyo gihe imodoka yari asanzwe atwara, byabaye ngombwa ko ayiha mugenzi we ngo amuruhure nibwo yahise ataha ijya aho ngaho yari atuye”.

Akomeza agira ati, “Ubwo rero ngo kuva icyo gihe abagiye bamuhamagara kuri telefoni ntiyigeze abitaba. Baramuhamagaraga telefoni igasona igacika, kugeza ubwo bafashe gahunda yo kujya kumureba aho yari atuye, mu kuhagera bakinguye basanga umurambo we mu nzu yarapfiriyemo”.

Ibyo bikimara kumenyekana, hitabajwe inzego z’umutekano zirimo Polisi na RIB, zihutira kuhagera ngo umurambo ukurwe muri iyo nzu, ujyanwe gukorerwa isuzumwa hamenyekane icyamwishe.

Abo mu gace Tuyisenge yari atuyemo n’inshuti ze ngo bamuherukaga kuwa gatandatu tariki 7 Nzeri 2024

Maternité iri kubakwa ku Kigo nderabuzima cya Karwasa, yitezweho korohereza ababyeyi kubyarira hafi

Izo maternité ziri kubakwa zirimo iyo ku Kigo nderabuzima cya Karwasa, iri kubakwa ku kigo nderabuzima cya Shingiro n’iyo ku kigo nderabuzima cya Rwaza.

Abaganiriye na Kigali Today bagana Ikigo nderabuzima cya Karwasa, giherereye mu Murenge wa Cyuve, bavuga ko iyari ihasanzwe yari nto kandi itagira ibikoresho, ibyagiraga ingaruka zikomeye ku bahabyarira.

Nyirasafari Sawiya, umwe mu babyeyi baturiye iki kigo nderabuzima agira ati: “Ahakirirwa umubyeyi mu gihe abyara na nyuma yo kubyara ntaho hataniye no mu cyumba kidafatika abantu bararamo bitewe n’ukuntu ari hatoya cyane, hashaje hamwe n’udutanda dutoya tw’amafuti natwo twashaje ku buryo no kuhasukura byagoranaga”.

Akomeza agira ati, “Ni agace gakunze kubura umuriro buri kanya, aho bigera mu masaha ya nijoro, ababyaza bagakoresha amatoroshi na za buji mu gihe barimo kubyaza umubyeyi. Mu by’ukuri ibyago byo kuhasiga ubuzima yaba ku mubyeyi n’umwana abyara byabaga ari byinshi. Umuntu wese wabaga atwite impungenge z’ukuntu azahabyarira hadafututse zabaga ari nyinshi, ku buryo abenshi banahitagamo gukora urugendo ruri hejuru y’amasaha abiri bajya kubyarira ku Kigo nderabuzima cya Muhoza”.

Maternité iri kubakwa ku Kigo nderabuzima cya Shingiro hamwe n’iziri kubakwa muri gahunda imwe na yo bigeze ku kugeraho kiri hejuru ya 20%

Abagana ibyo bigo nderabuzima byose hamwe n’abakozi babyo basanga uku kubyubakaho inzu ababyeyi babyariramo bizababera igisubizo ku kubungabunga ubuzima bw’umubyeyi n’umwana.

Mushimiyimana Erneste uyobora Ikigo Nderabuzima cya Shingiro agira ati: “Maternité dusanganwe yari ifite ubushobozi bwo kwakira ababyeyi batarenga batandatu ku munsi. Akenshi uwo mubare warengaga bikaba ngombwa ko bamwe tubafata tukabimurira mu bindi byumba bikorerwamo izindi serivisi, ugasanga ibintu bivangavanze, abantu batisanzuye, ukabona ari ibintu bitubangamiye twe ndetse n’abatugana”.

Yungamo agira ati, “Ubwo bucucike byadutezaga, twiteze ko bugiye kuvaho tubikesha maternite nshya ijyanye n’igihe turimo kubakirwa. Izaba irimo n’ibikoresho biri ku rundi rwego rwisumbuyeho bihagije, ku buryo bizajya bituma dutanga serivisi nziza kandi zinogeye abatugana”.

Buri maternité mu ziri kubakwa kuri ibyo bigo nderabuzima izaba igizwe n’ibyumba bisaga 18 birimo ahagenewe kwakirirwa ababyeyi bisuzumisha inda, ahakirirwa abategereje kubyara, aho babyarira, aho kuruhukira nyuma yo kubyara, ibigenewe abaforomo n’ibindi bitandukanye byose bifite ubushobozi bwo guha serivisi ababyeyi bari hagati ya 40 na 60 ku munsi buri imwe.

Kuri ubu imirimo yo kuzamura izo nyubako zizatwara Miliyoni zisaga 480 z’amafaranga y’u Rwanda, igeze ku gipimo kiri hejuru ya 25%, kandi umuyobozi w’Akarere ka Musanze Nsengimana Claudien, aherutse gutangaza ko iyo mirimo irimo kwihutishwa, ku buryo bitarenze ukwezi k’Ukuboza 2024, zose zizaba zamaze kuzura zigatangira kwakira abazigana.

Ubuyobozi bw’Akarere ka Musanze buvuga ko buzihutisha iyo mirimo bikazagera mu kwezi k’Ukuboza zamaze kuzura

Yongeyeho ko iyi ari intambwe nziza mu kwegereza abaturage serivisi z’ubuzima zitangirwa ku bigo nderabuzima no kurengera ubuzima bw’umubyeyi n’umwana.

Ibigo nderabuzima izi Maternité ziri kubakwaho biherereye mu Mirenge ya Cyuve, Shingiro na Rwaza, byakiraga ababyeyi babyara bari hagati ya 50 na 70 ku kwezi.

Mu gihe izo maternité zirimo kubakwa, muri ibyo bigo nderabuzima hatangiye kugezwa ibikoresho byifashishwa mu kubyaza ababyeyi, birimo ibitanda bigezweho, Echography n’ibindi by’ingenzi nkenerwa mu korohereza ababyeyi kubyara.

Imibare igaragaza ko mu Rwanda impfu z’ababyeyi bapfa babyara zagabanutse, kuko zavuye ku 1071 ku 100.000 zariho mu mwaka wa 2000, zigera kuri 203 ku 100.000 mu mwaka wa 2020 kandi intego u Rwanda rwihaye, ni iyo gukomeza gushyiraho ingamba zituma zirushaho kugabanuka zikaba nibura zagera kuri 70 ku 100.000 mu mwaka wa 2030.

Ibiraro 11 byubakishijwe amabuye nk’ibi bizubakwa mu Mirenge itandukanye muri Musanze muri uyu mwaka w’ingengo y’imari

Ibyo biraro bizaba byubatswe mu buryo bafata amabuye bakayagerekeranya bavangiramo umucanga na sima, kikamera nk’igikoze ishusho imeze nk’umuheto (Arc).

Ubwo buryo busa n’aho ari bushya mu kubaka ibiraro ku butaka bwo mu Karere ka Musanze, dore ko mu biraro byose bihasanzwe, ikiraro kimwe cyonyine nabwo giheruka kuzura cya Mukinga, giherereye mu Murenge wa Rwaza, Akagari ka Musezero mu Mudugudu wa Kansenda, aricyo cyubatswe gutyo.

Umuyobozi w’Akarere ka Musanze, Nsengimana Claudien avuga ko ubu buryo buhendutse kandi buramba.

Ati: “Kubaka ibyo biraro twasanze biduhendukiye kandi biramba bigatwara n’igihe gitoya gishobora gufata hagati y’ibyumweru biri hagati ya bibiri n’ukwezi kumwe. Ni mu rwego rwo koroshya ubuhahirane n’imigenderanire y’abaturage bo mu Mirenge itandukanye, kuko hari ahantu henshi bikigoranye bitewe n’uko nta biraro bihari n’ibihari bikaba bishaje bihora biteza akaga”.

Akomeza agira ati, “Ni umushinga dufatanyijemo n’Ikigo cy’Ababirigi Kigamije Iterambera (Enabel), aho duteganya kubaka ibiraro nk’ibyo mu Mirenge itandukanye y’Akarere ka Musanze. Ikiraro duheruka kuzuza ari nacyo rukumbi kiri mu Karere ka Musanze cyubatswe gutyo, byagaragaye ko kiramba, ntigihenze kuko ibikoresho hafi ya byose byifashishijwe ari ibiboneka hano iwacu. Nk’agace kihariye amakoro menshi rero tugasanga bwaba ari uburyo bwiza bwo kuyabyaza umusaruro”.

Ibyinshi mu biraro byubakwa mu Karere ka Musanze, wasanganga hakoreshwa akayabo k’amafaranga mu kugura ibyuma, sima n’umucanga byinshi bigakorwamo beton, kandi muri uko kubyubaka bavangavanga ibyo binyabutabire hari ibyuka n’ubushyuhe byatumukiraga mu kirere bikacyangiza.

Ibiraro bibarirwa muri 223 mu Karere ka Musanze biracyabangamiye imihahirane kubera ko bidakozwe

Ndayishimiye Mamady Olivier, Umukozi w’Akarere ka Musanze ushinzwe iterambere ry’ibikorwa remezo by’imihanda no kubifata neza, agira ati: “Bizafasha kugabanya izo ngaruka yaba ku rwego rw’amafaranga yashorwaga mu kubaka ibiraro bihenze kandi birengere ikirere”.

Yungamo ati, “Ikiraro cya beton giciriritse cyane gishobora gushorwaho miliyoni zitari munsi ya 50, mu gihe icyo bingana ariko cyubakishijwe amabuye cyo kitarenza miliyoni 16. Kandi ingeri z’abagenzi bose yaba abanyamaguru, abakoresha ibinyabiziga nk’imodoka ntoya n’iziremereye cyangwa moto bose bakinyuraho nta nkomyi. Urumva rero harimo ikinyuranyo kinini”.

Mu Karere ka Musanze habarurwa ibiraro 223 bikeneye kubakwa. Inzego zaho n’ababifite mu nshingano bubakaga ibiraro bike bike kuko ingengo y’imari yashorwaga mu kubaka ibihenze yabaga ari nini cyane ugereranyije n’ubushobozi bwako. Ndetse n’ubwo akenshi bahitagamo kubaka ibiciriritse hakoreshejwe ibiti cyangwa imbaho, byahitaga byangirika bitamaze kabiri.

Ubuso bwa Pariki nibumara kongerwa umubare w’Ingagi n’amadevize zinjiza biziyongera

Kugeza ubu ubwo butaka bukaba bwarabonetse mu Mudugudu wa Rurembo mu Murenge wa Kinigi, aho miliyari 15 z’amafaranga y’u Rwanda ari yo azatangwa nk’ingurane kuri iyo miryango yari ifite hari ubutaka buzagurirwaho Pariki y’Ibirunga.

Imirimo ibanziriza igikorwa nyirizina cyo kubaka uwo mudugudu nko kubarura agaciro k’ubutaka uwo mudugudu uzubakwaho igeze ku kigero cya 87% bishyirwa mu bikorwa kandi mu kwezi k’Ukwakira 2024 bizaba byamaze gukorwa hakurikireho gukora igishushanyombonera cyawo hanyuma imirimo yo kuwubaka itangire, aho izamara imyaka itatu kuko mu mwaka wa 2027 uzaba waramaze kuzura unatuwemo, hagukurikiraho imirimo nyirizina yo kwagura Pariki y’Igihugu y’Ibirunga.

Kwizera Janvier umukozi wa RDB, Ushinzwe Ubufatanye n’Abaturage muri Pariki y’Igihugu y’Ibirunga agira ati: “Ni umushinga watekerejwe gukorwa muri ubwo buryo hagendewe ku bushakashatsi n’ibyifuzo by’abaturage, bagiye bagaragaza ko guhabwa amafaranga y’ingurane y’aho Pariki izagurirwa batari buhite bimurwa ako kanya, byari kubashora mu kuyakoresha ibindi. Niho twatekereje ko kubanza kububakira umudugudu babanza gutuzwamo aribyo byaba byiza kurushaho, binajyanye n’uko bazaba bahawe ingurane y’amafaranga agendanye n’agaciro k’ubutaka bwabo bakazaba bakora imishinga ibateza imbere mu gihe n’ibikorwa byo kwagura Pariki bizaba birimo gukorwa”.

Imiryango 510 ituye mu gice kizagurirwamo Pariki y’igihugu y’Ibirunga yabariwe ingurane ingana na Miliyari zisaga 15 z’amafaranga y’u Rwanda

Intego nyamukuru y’umushinga wo kuvana abaturage muri zone izagurirwamo Pariki y’Igihugu y’Ibirunga, uretse kuba witezweho gutuma Ingagi n’urundi rusobe rw’ibinyabuzima hamwe n’ibidukikije birushaho kubungabungwa, imibereho y’abaturage ubwabo by’umwihariko na yo izarushaho kuba myiza.

Kwizera akomeza agira ati: “Bisa n’aho abatuye muri kariya gace ubuzima bwabo buri mu kaga kubera imiturire itanoze kuri bamwe ikunze kwibasirwa n’amazi y’imvura ava mu Birunga asenya inzu z’abaturage, imyaka bahinga igatikira ndetse n’abaturage bahora bahanganye n’inyamaswa ziba zavuye muri Pariki zikabonera, zikabakomeretsa cyangwa zikabica”.

Yungamo ati “Hari abakigowe no kubona amazi meza, ubuvuzi n’uburezi kubera gutura muri icyo gice aho bategeranye n’abandi. Leta y’u Rwanda icyo yifuriza abaturage bose by’umwihariko bo muri kariya gace, ni uko muri uko kwagura Pariki na bo babaho batekanye, bafite ubuzima bwiza kandi bateye imbere”.

Ubuso bungana na 23% nibwo buzongerwa ku buso busanzwe bwa Pariki

Pariki y’Igihugu y’Ibirunga izongerwaho hegitari 3740 bingana na 23% by’ubuso ifite ubu zingangana na hegitari 16000.

Umushinga mugari wo kwagura Pariki y’Igihugu y’Ibirunga uhuriweho n’inzego zitandukanye

Inzego zirimo RDB, REMA, Rwanda Water Board, Meteo Rwanda zifatwa nk’inkingi ya mwamba mu gushyira mu bikorwa umushinga mugari wo kwagura Pariki y’Igihugu y’Ibirunga.

Aho nka RDB ubwayo, muri uyu mushinga ifite inshingano zo gutegura abaturage mu buryo bwo kubaganiriza no kubahugura ngo basobanukirwe neza imiterere y’uwo mushinga, kugira ngo bazagendane neza n’ibikorwa biwukubiyemo; ibyo bikajyana no gukurikirana igenagaciro ry’imitungo kugeza ku rugendo rwo kubaka imidugudu no kuyibatuzamo.

Muri uyu mushinga hazabaho gusubiranya iyi Pariki haterwa amashyamba aho abaturage bari bafite ibikorwa

Hazabaho n’igikorwa cyo gusubiranya icyanya Pariki izaba yaguriwemo haterwamo amashyamba n’ibindi binyabuzima, ikigo REMA kikazaba ari cyo kibifite mu nshingano; aho bizajyanirana no kuba Rwanda Water Board yo izibanda ku kurwanya isuri harwanywa amazi ava mu birunga mu Turere turimo aka Musanze, Burera, Gakenke, Nyabihu, Rubavu, Ngororero na Rutsiro kugira ngo atongera gusenyera abaturage.

Ku bufatanye na Meteo Rwanda kandi, hazashyirwaho ikoranabuhanga rikorana n’ibyogajuru rizajya ritanga amakuru aburira abaturage mu gihe haba hari imihindagurikire y’ikirere ishobora guteza ibiza, kugira ngo babone uko babyirinda bitarashyira ubuzima bwabo mu kaga.

Abaturage na bo ngo basonzeye izo ngamba bitezeho kuboneramo igisubizo kirambye

Abaturage barimo n’abamaze igihe kinini bugarijwe n’ingaruka zo guturira Pariki, bahoraga bifuza ingamba zo kuyibungabunga mu buryo burambye, bakabaho batekanye.

Imbogo zikunze gutoroka Pariki zikona zikanakomeretsa abaturage

Nsekanabo Erneste, muri Gicurasi 2024 imbogo zateye mu gace atuyemo, zikomeretsa abaturage barimo n’umwana we w’umuhungu wajyanywe mu bitaro zamujombye amahembe mu nda no mu matako, yemeza ko iyo haza kuba hari icyakozwe mbere mu kuzikumira, ibyo bibazo zabateje bitari kubaho.

Yagize ati: “Imbogo zaduteye ziturutse muri Pariki ari nyinshi ariko izageze mu Mudugudu w’iwacu zari ebyiri. Zahutse mu baturage zikomeretsa abarimo n’umuhungu wanjye, tumugeza kwa muganga yazahaye cyane habura gato ngo apfe. Si rimwe si kabiri turara tudasinziye dutinya ko imbogo zidusanga mu nzu zikaba zatwiciramo kubera ukuntu duturiye Pariki zibamo”.

Ntagisanimana Brigitte wo mu Murenge wa Kinigi na we ati: “Sitwe tuzarota tubona imiryango yimurwa ikajyanwa aho ibaho itekanye igatandukana no guhora isenyerwa n’amazi anatwara imyaka yabo bagasigara bashonje. Amazi ava mu birunga yateje benshi ubukene kubera ukuntu yangiza byose ntacyo asize. Ari inzu arazisenya ba nyirazo bakisanga basembereye ahandi cyangwa bari mu bukode, ntawe uhinga ngo yeze asarure kuko ibyinshi ayo mazi aba yabikukumbye”.

Abarimo n’abakomerekejwe n’imbogo bari barambiwe guhora bahanganye na zo

Muri iki gice cya mbere cy’umushinga mugari wo kwagura Pariki y’Igihugu y’Ibirunga, abaturage bo mu Midugudu ya Myase- Nyarusizi- Gahura- Nyakigina mu Murenge wa Kinigi ni bo bazimurirwa mu Mudugudu w’icyitegererezo wa Rurembo uri hafi gutangira kubakwa.

N’ubwo iyi Pariki ikora ku Turere twa Musanze, Burera, Nyabihu na Rubavu, ubuso izagurirwaho bwose buri ku gice cy’Akarere ka Musanze; mu Mirenge ya Kinigi Nyange Shingiro na Gataraga.

Ariko nanone urukuta rw’amashanyarazi rukumira inyamaswa ruteganyijwe kuzubakwa, rwo ruzakora kuri utwo turere twose.

Ni umushinga uzakorwa mu byiciro bizagenda bishyirwa mu bikorwa mu gihe cy’imyaka iri hagati y’10 na 15 ukazarangira wose muri rusange ushowemo miliyoni 230 z’Amadorari ya Amerika, harimo azatangwa na Leta y’u Rwanda, abafatanyabikorwa bayo, inguzanyo ndetse n’impano.

Abaturage bizezwa ko aho uyu mushinga ubaganisha ari mu kubakura mu kaga

Abaturage bizezwa ko aho uyu mushinga ubaganisha ari mu kubakura mu kaga no kubafasha kugira ubudahangarwa ku mihindagurikire y’ikirere himakazwa imibereho myiza nk’uko n’intego nyamukuru ya Leta ari ugushyira umuturage wese ku isonga kandi bikazongera n’umubare w’Ingagi ku kigero kiri hagati ya 15 na 20%.

Abaturage icyo basabwa nk’uko Kwizera yakomeje abivuga, akaba ari ubufatanye mu bikorwa byose biteganyijwe ubwo uzaba urimo gushyirwa mu bikorwa.

N’ubwo hari abari kurikoreramo, ngo usanga abaguzi ari bacye cyane

Uku kutabona abaguzi, ngo biterwa n’uko iri soko ubwo ryamaraga kuzura bakemererwa gutangira kurikoreramo, bamwe baryimukiyemo abandi bacuruzi benshi bakaguma gucururiza mu isoko ryo muri gare ya Musanze ryari rimaze hafi imyaka itatu ricururizwamo mu buryo bw’agateganyo ubwo iryo rishyashya ryarimo ryubakwa.

Niyonteze Assouma agira ati: “Kuva twaza gukorera muri iri soko twabuze abaguzi. Dutandika ibicuruzwa tukirirwa tubihagaze imbere bukarinda butwiriraho nta muntu n’umwe uje ngo anakubaze igiciro. Hari abacuruza imboga cyangwa imbuto n’ibindi biribwa byangirika vuba bigenda bituboreraho tukagera n’aho tubimena byaraboze kubera kubura ababigura”.

Hari ababonye ibicuruzwa bikomeje kubangirikiraho bayoboka ubucuruzi bw’amafu, imiceri n’ibindi bitangirika vuba, ariko ngo nabyo biranga bikaba iby’ubusa kuko mu bucuruzi bwabo ntacyo binjiza bakabaye bifashisha mu kubona ibitunga ingo zabo, bagahitamo kwirira ibyo bacuruza.

Ibisima bimwe ntibifite ababikoreraho abacururiza mu isoko ry’Ibiribwa rya Musanze bakifuza ko n’abandi baza hakaboneka n’abarigana

Nyiramana Xaveline agira ati: “Ibicuruzwa tubimaze tubyirira kuko nta bakiriya baza ngo wenda babe banabigura ku kiranguzo. Nkanjye nashoye ibihumbi bisaga magana atanu mu kurangura umuceri, amavuta n’utundi duconco tw’ibiribwa, ariko mu kwezi kose maze ncururiza muri iri soko, nta na munsi n’umwe ndatahana byibura n’amafaranga ibihumbi bitanu”.

Aba bacuruzi basanga iki gihombo giterwa no kuba amasoko y’ibiribwa ryaba irishya ndetse n’iryo ry’agateganyo riri muri gare ya Musanze, kugeza ubu yombi acururizwamo nyamara aherereye mu gace kamwe ko mu Mujyi rwagati ahantu hegeranye.

Bakifuza ko inzego zibishinzwe, zabakura mu gihirahiro, zikagira amahitamo y’isoko rimwe rifatwaho umwanzuro wo gucururizwamo hagati yayo yombi, irindi rigahagarikwa.

Kuba iri soko ryo muri gare rigikorerwamo bitiza umurindi ibura ry’abaguzi mu isoko rishya

“Ducururiza muri iri soko ari nako n’abandi basigaye muri gare na bo bacuruza. Usanga twese ibicuruzwa ari bimwe, ababishinzwe ntibigeze byibura banafata isoko rimwe ngo bategeke ko ricururizwamo ibintu runaka ibindi bicururizwe mu rindi. Kandi noneho ikibabaje ni uko ibisima byose byo muri iri soko, nyuma yo kubitombora, ba nyirabyo batigeze baza ngo babikorereho, ahubwo bakaba babibikiye kuzabigurisha amafaranga y’umurengera bateganya kunguka ari na yo mpamvu badashaka kuza ngo babikorereho. Leta nidufashe irebe icyo ibikoraho kuko turi mu bihombo”.

Ku ruhande rwa bamwe mu bacururiza muri iryo soko ry’agateganyo riri muri Gare, bo ngo kutimukira mu riheruka kuzura, ahanini baba batinya gutakaza abaguzi babo bari baramaze kumenyera amaseta bakoreraho, bityo kurijyamo ngo bakaba bakwisanga bongeye gutangira bundi bushya.

Ibicuruzwa byangirika kubera ko babimarana igihe byarabuze abaguzi

Umuyobozi w’Intara y’Amajyaruguru, Mugabowagahunde Maurice avuga ko abatomboye ibisima n’amaseta mu Isoko ry’ibiribwa rya Musanze bashyiriweho igihe ntarengwa cyo kuba byatangiye gukorerwamo, bitaba ibyo bigahabwa abandi.

Ati: “Inyandiko zibamenyesha igihe batagomba kurenza cyo kuba bamaze kwitegura no gutangira gukorera muri iyo myanya begukanye barazihawe ubu igisigaye ni uko icyo gihe kigera abazaba batabyubahirije hakarebwa uburyo bizashyirwa mu maboko y’abiteguye kubikoresha”.

Isoko rishya ry’ibiribwa rya Musanze, ryuzuye ritwaye Miliyari zisaga esheshatu z’amafaranga y’u Rwanda, rikaba rifite ubushobozi bwo gukorerwamo n’abantu ibihumbi bibiri.

Isoko ry’ibiribwa rya Musanze riheruka kuzura

Musanze: Mu isoko ryo muri Gare hapfiriyemo umuntu bitunguranye

Mu masaha ashyira ay’umugoroba wo kuwa Mbere tariki 2 Nzeri 2024, uwo musore wari kumwe na nyina na mushiki we, bamuvanye I Kigali aho yari amaze iminsi arwariye dore ko ari naho yakoreraga, ubwo bageraga muri gare ya Musanze, ngo yababwiye ko ashaka kujya mu bwiherero, mu kumujyanayo bamurandase, bagiye kugera mu isoko hafi y’aho buherereye ahita abagwa mu maboko.

Ni amakuru yemejwe n’Umunyamabana Nshingwabikorwa w’Umurenge wa Muhoza Ntambara Allan, wagize ati: “Abo mu muryango batubwiye ko yakoreraga akazi k’ubumotari i Kigali. Muri iyi minsi ngo yafashwe n’uburwayi, abonye bumurembeje ahamagara ab’iwabo ngo bajye kumuvanayo. Ubwo we na Nyina hamwe na Mushiki we bari bageze muri Gare ya Musanze bamujyane iwabo mu Ngororero, yaje kubabwira ko ashaka kujya ku bwiherero, baramurandata bamujyanayo, mu kugera hafi yabwo ababwira ko ananiwe, bagerageza kumwururutsa ngo byibura abe yicaye hasi ahita ashiramo umwuka”.

Ababonaga ibyo biba bihutiye gutabaza abashinzwe umutekano n’ubuyobozi ngo barebe niba bagerageza kuramira ubuzima bwe, bahageze basanga umutima wahagaze.

Gitifu Ntambara agira ati: “Mu makuru dukesha abo mu muryango we ngo ni uko uretse ubwo burwayi yari amaranye iminsi micye, ngo nta bundi busadanzwe bari bamuziho”.

Uyu muyobozi akangurira buri wese ko mu gihe yumvise ubuzima bwe butameze neza kutabyihererana ngo arembere mu nzu, ahubwo ko yajya yihutira kugana inzego z’ubuvuzi, kugira ngo zimusuzume zimenye uburwayi afite zimukurikiranire hafi hakiri kare. Umurambo wajyanywe mu buruhukiro bw’Ibitaro bya Shyira.

Ikiyaga cya Ruhondo kizubakwaho umujyi mu rwego rwo kurushaho kuzamura ubukerarugendo bwo mu Karere ka Musanze

Mu nama ya Komite Mpuzabikorwa y’Akarere ka Musanze yateranye kuwa gatanu tariki 30 Kanama 2024, ari na yo yatangarijwemo iby’uwo mushinga mugari, witezweho kurushaho kuzamura isura nziza y’Akarere ka Musanze by’umwihariko mu bice by’icyaro.

Umuyobozi w’Akarere ka Musanze Nsengimana Claudien, akomoza ku by’uyu mushinga, yagaragaje ko ibiganiro n’umushoramari uzubaka uwo mujyi babigeze kure.

Yagize ati: “Ubu turimo turaganira n’umufatanyabikorwa w’umushoramari ufite uwo mushinga aho ubu amaze gushora Miliyari eshanu mu kugura n’abaturage ubutaka azawubakaho kandi ni igikorwa kizakomeza”.

Abaturage b’Imirenge y’Akarere ka Musanze ituriye Ikiyaga cya Ruhondo barishimira ko bagiye kwegerezwa iterambere

Akarere ka Musanze gakomeje kuzamura ibipimo mu bukerarugendo bwinjiriza Igihugu amadevize kubera ba mukerarugendo bahaza gusura ibyiza nyaburanga birimo n’Ingagi zo mu Birunga. Uku kubaka umujyi ku nkengero z’ikiyaga cya Ruhondo, bikaba kimwe mu bizarushaho kubuteza imbere.

Nsengimana agira ati: “Ni nayo mpamvu natwe twifuje ko Ikiyaga cya Ruhondo kibyazwa umusaruro ngo ba mukerarugendo igihe bavuye gusura Ingagi, bajye baboneraho no kwishimira ibyiza nyaburanga biri mu Kiyaga no ku nkengero zacyo nk’ahantu hazaba hubatswe mu buryo buteye amabengeza”.

Ikiyaga cya Ruhondo gikorwaho n’Imirenge Itatu yo mu Karere ka Musanze harimo uwa Gacaca, Remera na Gashaki.

Abaturage bo mu Tugari tw’iyo Mirenge, by’umwihariko dukora ku nkengero zacyo, bavuga ko bari banyotewe no kuva mu bwigunge, dore ko ngo ugereranyije n’utundi duce twegerewe n’ibiyaga, imiterere y’aho iki kiyaga cya Ruhondo kiri n’ibikorwa bimaze kuhagezwa muri iyi myaka yose ishize, bisa n’aho aka gace kari kakiri inyuma.

Ku nkengero z’Ikiyaga cya Ruhondo, hagiye kubakwa umujyi uzatwara Miliyari zisaga 400 Frw

Rukundo Stephano agira ati: “Ugereranyije n’Ikiyaga cya Kivu, Muhazi n’ahandi ukuntu hagenda hatezwa imbere mu buryo bwihuse hubakwa ibikorwaremezo nk’amahoteli n’aho abantu batemberera, twe byasaga n’aho twaheze mu bwigunge kuko bitahabaga mu buryo bufatika. Hari hakewe abazana iryo shoramari bakahashyira ibikorwa byinshi bituma harushaho kuba aheza nyaburanga, abahasura bakahaza ari benshi hakagira agaciro natwe ubwacu".

Mu kurushaho korohereza ishoramari ryo kubaka Umujyi ku nkengero z’Ikiyaga cya Ruhondo, Akarere ka Musanze ko gateganya kuzatunganya ibikorwaremezo birimo umuhanda ureshya na Kirometero 35 uzaturuka ahitwa Konkaseri-Remera-Gashaki-Kivuruga no kugeza amazi meza n’amashanyarazi muri ako gace uwo mujyi uzubakwamo.

Ntihatangajwe igihe nyacyo umushinga wo kubaka uwo Mujyi uzatangirira gushyirwa mu bikorwa, ariko ubuyobozi buvuga ko bizakorwa vuba aha cyane ko n’uwo mushoramari yatangiye kugura ubutaka.

Bimwe mu byo abakora Irondo ry’Umwuga bahawe birimo n’imyambaro yo mu kazi mishya

Ibyo bikoresho bigizwe n’imyambaro irimo iyo kwamabara mu gihe bari ku irondo hiyongereyeho iyo kwambara mu gihe cy’imvura, inkweto amatoroshi n’ibindi by’ibanze bakenera mu gihe bari mu kazi.

Akagari ka Mpenge nka kamwe mu tugize igice cy’Umujyi wa Musanze, mu gihe cy’imvura abakora irondo bagorwaga no kunoza akazi, dore ko banagakora mu masaha ya nijoro, hakaba ubwo bamwe banasibye batinya kunyagirwa.

Kuba ibi bikoresho babihawe, ngo izo mbogamizi zigiye kuvaho nk’uko umwe muri bo abivuga agira ati: “Imvura yagwaga tukiganyira kujya mu kazi dutinya ko itunyagira. Akenshi nk’iyo irimo igwa, abajura bafatirana abaturage n’urusaku rwayo, bagasimbukira mu bipangu hakaba n’abatobora inzu bakiba ibirimo kubera ko baba bizeye neza ko abanyerondo bugamye imvura”.

Mu bikoresho bibafasha kunoza akazi birimo n’imyambaro ibakingira imvura, amatoroshi, inkweto n’ibindi

Undi ati: “Twabaga turi ku irondo, hakaba ubwo duhuye n’umuntu tutamushira amakenga, yaba ari nk’umujura agamije kwiba cyangwa guhungabanya umudendezo w’abantu, twamuhagarika agahita yirukanka akaducika ntitumenye aho arengeye ntitunamenye uwo ari we bitewe n’uko buba bwije kandi hari n’umwijima”.

Akomeza agira ati, “Kuba duhawe imyambaro idukikingira imvura, bakaduha n’amatoroshi yo kuzajya tumurikisha ahantu hatabona, byongeye kandi bakanaduha inkweto zabugenewe zo kwambara mu gihe turi ku irondo, bigiye kutworohereza; abagize iki gitekerezo turabashimira cyane”.

Mu bice bitandukanye byiganjemo iby’umujyi wa Musanze, abaturage bakunze kwinubira ko abajura binjira mu ngo zabo bakabiba cyangwa bakabategera mu nzira bakabatera kaci, bakabambura ibyo bafite.

Ibikoresho bahawe baremeza ko bigiye kuborohereza mu kazi kabo ka buri munsi

Mukamusoni Djassoumini, Umunyamabanga Nshingwabikorwa w’Akagari ka Mpenge, avuga ko ibyo bikoresho abaturage ubwabo, ari bo bishyize hamwe bishakamo ubushobozi bwo kubigurira abakora irondo, aho byitezweho kubatera ingabo mu bitugu mu kazi kabo.

Ati: “Ntitwari kubyishoboza nk’ubuyobozi abaturage batabigizemo uruhare. Dusanzwe twarashyizeho uburyo bwa zero cash in hand bw’ikoranabuhanga umuturage akoresha yishyura amafaranga y’umutekano, aho buri rugo, rimwe mu kwezi, rwishyura amafaranga hakoreshejwe telefone ngendanwa. Ayo avamo ayo abakora irondo bahembwa, noneho tukaba twaranatekereje kongeraho ibi bikoresho ngo bibafashe gukora nta kibazitira bityo barinoze uko bikwiye”.

Yungamo ati, “Iyo dusesenguye tubona ko ugereranyije n’indi myaka itambutse, ubujura bugenda bugabanuka, ariko icyifuzo ni uko bucika burundu. Guha abakora irondo ibyo bikoresho ni kimwe mu byadufasha kugera kuri iyo ntego”.

Abakora Irondo ry’Umwuga bishimiye guhabwa imyenda ibafasha gukora akazi kabo mu bihe by’imvura

Uyu muyobozi yibutsa abaturage ndetse n’abakora irondo, ko umutekano udashoboka batagize ubufatanye mu gukumira ikintu cyose cyawuhungabanya binyuze mu gutangira amakuru ku gihe no kujya bitabira gutanga umusanzu w’umutekano basabwa wa buri kwezi ku gihe.

Mu Kagari ka Mpenge, abakora irondo ry’umwuga ni 35, imyambaro hamwe n’ibindi bikoresho biborohereza mu kazi, byose hamwe byatwaye miliyoni zikabakaba eshatu z’amafaranga y’u Rwanda.

Mu gihe cy’izuba hamwe na hamwe imboga zo mu turima tw’igikoni ziba zarashaje kubera kutazitaho

Aba bagore bavuga ko bari bamaze iminsi baradohotse ku kwita ku turima tw’igikoni, ku buryo hamwe na hamwe nko muri iki gihe cy’impeshyi aho izuba riba rimaze iminsi riva ari ryinshi, usanga nta mboga zikibarizwa muri utwo turima, n’aho ziri ukabona zishaje, ku buryo batabona izo basoroma zo guteka, kandi izo bagura ku ma masoko zikabahenda.

Gakobwa Seraphine yagize ati: “Imboga nahinze mu Karima k’Igikoni k’iwanjye zashaje kubera ko nsa n’uwadohotse nkaba ntazitaho. Muri iki gihe cy’izuba usanga abenshi tutita ku gushakisha amazi yo kuzisukira, dore ko tunayavana kure aduhenze, imboga zikagera aho zuma ku buryo utajyamo ngo ubone n’ibabi rizima wasoroma ngo uteke. Bituma akenshi duteka ibiryo bivangavanze mu kajagari bitarimo imboga, bigasubiza inyuma n’abana bacu”.

Bavuga ko bari baradohotse kku kwita ku turima twabo tw’igikoni

Bamwe usanga batagira n’ubutaka byibura butoya bateraho imboga, ku buryo baziteka baziguze ku isoko.

Nyiramajyambere agira ati: “Imboga nteka za buri munsi, yaba karoti, dodo, epinari, isombe cyangwa amashu n’izindi zitandukanye iwanjye tuzirya tuziguze ku isoko, ku buryo iyo mbaze amafaranga azigendaho zonyine, atajya ajya munsi y’ibihumbi 25 ku kwezi. Ubibaze neza ubona ko amafaranga azigendaho ari menshi ugereranyije n’uko umuntu yaba azitereye mu karima k’iwe mu rugo”.

Abagore bahagarariye abandi mu Mirenge ya Kinigi na Nyange, bashishikarijwe guhagurukira ingamba zituma ikibazo cy’imirire mibi kigabanuka, binyuze mu kwita ku turima tw’igikoni tugizwe n’imboga n’imbuto, dore ko turi mu bigira uruhare runini mu kuyikumira.

Mu kwiyemeza kwita ku turima tw’igikoni no kuvugurura utwashaje bahawe ingemwe bazifashisha

Mu byo basanze batigataho nyamara bifite akamaro, harimo no kwifashisha ibikoresho bigizwe n’imifuka, amabase, amajerekani n’ibikopo bitagikoreshwa bakabihingamo imboga bitanagombeye ubuso bunini.

Uwimbabazi agira ati: “Ijerekani, ibase cyangwa umufuka byatobokaga tukabijugunya tutazi umumaro wabyo. Ndi mu bantu batahanye ingamba zo kugenda nkakusanya ibyo nari narajugunye mbirundemo itaka n’ifumbire nzateremo ingemwe z’imboga, njye nzisukira ku buryo niteze ko zizagera aho zigakura nkajya nsoroma imboga nziza. Nkasanga ibyo bizamfasha kunonera ya mafaranga najyaga ntakaza ku isoko nguramo imboga”.

Mu byo batitagaho bashobora kwifashisha harimo ibikoresho bigizwe n’imifuka, amabase n’ibindi

Abahanga mu by’imirire ntibasibye kugaragaza ko umuntu agerwaho n’ingaruka z’imirire mibi, mu gihe mu mafunguro ye ya buri munsi hakennyemo ibitera imbaraga (ibinyampeke n’ibinyamafufu), ibyubaka umubiri (Inyama, amafi n’ibikomoka ku matungo) ndetse n’ibirinda indwara (imboga n’imbuto).

Gahunda y’Akarima k’igikoni ikaba imwe mu zo Leta y’u Rwanda yashyizemo imbaraga, kugira ngo mu mafunguro akenewe mu miryango hajye habonekamo n’imboga nka bumwe mu bwoko bw’ibiribwa bigira uruhare rukomeye kugira intungamubiri zifasha kuboneza imirire.

Nta washidikanya kuvuga ko koko intego iyi gahunda yashyiriweho zigenda zitanga umusaruro kuko ukurikije uko n’imibare ya Minisiteri y’Ubuzima binyuze mu Kigo RBC yo mu mwaka wa 2020, igaragaza ko mu gihugu hose, igwingira mu bana bari munsi y’imyaka 5 ryavuye kuri 38% mu mwaka wa 2015 rikagera kuri 33% mu mwaka wa 2020.

Gahunda y’Akarima k’igikoni ni imwe mu zo Leta y’u Rwanda yashyizemo imbaraga

Ni mu gihe intego ikubiye muri Gahunda ya Kabiri y’Igihugu yo Kwihutisha Iterambere (NST2) iteganya ko ibyo bipimo bizava kuri 33% bikamanuka bikagera kuri 15%. Ibyo bikazagerwaho hongerwa imbaraga mu bufatanye buhuriweho mu guteza imbere serivisi z’ubuzima, iterambere ry’imikurire y’abana bato n’ubuzima bwiza bwabo biganisha mu kubagira abazavamo abafatiye runini ahazaza h’Igihugu.

Ni ingamba zizaterwa ingabo mu bitugu no kuba Leta y’u Rwanda iheruka no kongera ingengo y’imari y’umwaka wa 2024-2025 izifashishwa mu guhangana n’ikibazo cy’igwingira ry’abana bari munsi y’imyaka itanu, kuko ubu ibarirwa muri Miliyari 357,8 z’amafaranga y’u Rwanda.

Iyo miryango uko ari 441 igizwe n’abantu 1591 ibarizwa mu mirenge itanu mu yigize Akarere ka Burera, mu gice kigizwe n’amakoro menshi ahanini byagoranaga kubona itaka ryubakishwa.

Ndayambaje Léonard utuye mu Mudugudu wa Gitare, Akagari ka Nyamabuye mu Murenge wa Kagogo, inzu ye imaze kuriduka inshuro eshatu mu gihe kitarenga imyaka ibiri ishize, bitewe n’ukuntu yayubatse mu buryo budakomeye.

Ati: “Byageze aho ubuyobozi bunsaba kuyivamo bujya kunkodeshereza ahandi kuko yahoraga iriduka ntanafite ubushobozi bwo kugura amatafari n’itaka byo kuyisana dore ko nari narayubatse byo kwirwanaho ngo mbone aho nkinga umusaya, itanakomeye ari nabyo bituma iriduka”.

Mu mirenge yihariye kugira imiterere y’ubutaka bugizwe n’amakoro yo mu Karere ka Burera, imiryango imwe n’imwe yaho itishoboye, ibayeho mu bukode, indi igacumbikirwa n’abaturanyi bayo, hakaba n’ihitamo kuba mu nzu zenda guhirima bitewe n’uburyo ba nyirazo baba barazubakishije ibyatsi.

Hari abubaka bagera hagati ubushobozi bukabashirana bitewe n’uko itaka rihenda

Akenshi ibi babiterwa n’uko itaka ryaho riba ryoroshye bitanashoboka ko ryubakishwa, byongeye batanafite ubushobozi bwo kugura irikurwa ahandi kuko rihenda.

Ndekezi Viateur agira ati: “Itaka ry’inaha ntiryubakishwa ngo bikunde. Kuzamura inzu birakosha kuko ibintu byose dukenera ari ibitumizwa ahandi bikatugeraho bihenze. Usanga nk’inzu yakabaye yubakwa nko mu mezi atatu umuntu amara imyaka isaga n’icumi akiyubaka, bikatudindiza, abatabishoboye bakemera guhara amagara bakaba mu birangarizwa”.

Mu gushaka umuti w’iki kibazo, imiryango itagira aho iba, guhera kuwa mbere tariki 26 Kanama 2024, yatangiye kwegerezwa hafi itaka, maze abaturage baboneraho gutangira kubumba amatafari. Iki cyiciro nibagisoza, bakazakurikizaho kuzamura inzu no kuzihoma.

Mukamana Soline uyobora Akarere ka Burera, avuga ko ikibazo cy’imiryango itari ifite amikoro yo kwiyubakira inzu, cyatumaga bataryama ngo basinzire, ari nayo mpamvu bifuje guhangana na cyo.

Ati: “Ni mu rwego rwo gufasha aba baturage kuva mu gihirahiro bamazemo igihe. Ntabwo twaba tuvuga ko umuturage ari ku isonga kandi adatuye heza. Ni yo mpamvu twifuje gufatanya n’abafatanyabikorwa bari gutunganya umuhanda Base-Butaro-Kidaho ureshya na Kirometero 63, tukaba turi gutunda itaka rikomoka ku mirimo yo kuwutunganya turikwirakwiza ahantu byagoranaga kuribona ngo byorohere abaturage”.

“Turashaka kubatuza neza ariko na bo ubwabo babigizemo uruhare binyuze mu miganda ibahuza, kandi uko izo mbaraga zihurijwe hamwe ni nabwo ibyo turimo gukora bizaramba”.
N’ubwo iyi miryango uko ari 441 yo mu Mirenge harimo uwa Gahunga, Cyanika, Kagogo, Rugarama, na Kinoni yari ibabaye kurusha indi ariyo itangiriweho, mu Karere ka Burera muri rusange, habarurwa indi miryango igera ku 2007 ituye mu nzu zikeneye gusanwa.

Mayor Mukamana avuga ko bashyizeho icyumweru cy’ubukangurambaga bugamije gufatanya kurandura ikibazo cy’abatagiraga amacumbi, bahereye muri iyo mirenge; ari nako banakorana bya hafi n’abafatanyabikorwa mu gukusanya ubushobozi buzavamo isakaro n’ibindi nkenerwa hagamijwe gutuza abaturage mu nzu zidashyira ubuzima bwabo mu kaga.

Abagore baganirijwe ku gukumira ingaruka z’imihindagurikire y’ikirere basanze hari uruhare bagira mu gutuma iyo ntego igerwaho

Mu mirimo ya buri munsi abagore bakora, cyane cyane yo gutegura amafunguro, inkwi n’ibindi bicanwa, biza mu by’ibanze bakenera kwifashisha.

Mu gace kegereye Pariki y’Igihugu y’Ibirunga, abenshi mu bahaturiye, haba ubwo biyibye bakajya kuyitemamo ibiti cyangwa bagatema ibyo mu nkengero zayo.

Nyiransengiyumva Marie agira ati: “Twajyaga mu ishyamba, tukavunagura ibiti byo gucanisha, tukabikora mu kajagari, kuko tutatekerezaga ko hari undi mumaro wabyo uretse kubicana”.

Abonona amashyamba bayashakamo ibicanwa, ku rundi ruhande na bo, ngo babicana ku bw’amaburakindi, dore ko hari n’ingaruka nyinshi bibateza.

Niyigena Odile agira ati: “Ntekesha inkwi, ibiryo bikajya gushya amaso yazenzemo amarira yanatukuye, umutwe undya kubera kwatsamo bya buri kanya. Abantu dutekesha inkwi, kunoza isuku mu buryo bukwiye biratugora kubera guhora ducumbetsa mu ivu n’imyotsi, ariko ibi biganiro baduhaye byabaye nk’ibidukanguye, ku buryo abenshi twiyemeje kubivaho, tukayoboka uburyo bwo guteka turondereza ibicanwa twita ku gukoresha amashyiga ya kijyambere arondereza inkwi kandi abungabunga ibidukikije”.

Ukwangiza ibiti batema amashyamba, bakabicana mu gihe bateka amafunguro kimwe n’ibindi bikorwa nko kujugunya imyanda ibora n’itabora aho babonye, muri ibi biganiro bigishijwe ko hari uruhare runini bigira mu kugabanya ikigero cy’ubuhumekero bwa Pariki, ibifatwa nk’intandaro y’imihindagurikire ry’ikirere rikunze kugaragarira mu kuva kw’izuba ryinshi riteza ubushyuhe bukabije, cyangwa imvura iteza Ibiza n’imyuzure, mu gace kegereye iyi Pariki; bikabagiraho ingaruka.

Akuredusenge Valerie ukuriye Umuryango utegamiye kuri Leta witwa Conservation Heritage Turambe, wafatanyije n’Umuryango witwa Women’s Earth Alliance, mu guhuriza hamwe muri ibyo biganiro abagore 30 bahagarariye abandi bo mu mirenge ya Kinigi na Nyange, nk’ahantu hagereye Pariki y’Ibirunga, byongeye bakaba mu baturuka mu miryango itishoboye.

Agaruka ku mpamvu aba bagore batekerejweho, agira ati: “Twatekereje kubahuza nk’abantu bari ku rwego rutoya mu mibereho yabo, bakiri mu rugendo rwo kwiteza imbere kuko imihindagurikire y’ikirere iyo ije mu by’ukuri ibafatirana no kuba ntacyo baheraho bafite, ntibabone uko babizibukira kuko nta yandi mahitamo baba bafite”.

“Kandi n’izo ngaruka zituruka ku kubyangiza, na zo iyo zije, ni na we zihungabanya cyane kuko zimusanga n’ubundi akennye bityo no guhangana na zo ntibimworohere. Hano rero ni umwanya twafashe ngo ibyo byose babisobanukirwe, banarebe inzira bishobora kunyuramo ngo bahangane na zo”.

N’ubwo imyumvire y’abaturiye Pariki igenda irushaho kugaragarira mu isura yo kuyibungabunga, abayituriye nk’uko Oreste Ndayisaba, Umukozi wa Pariki y’Igihugu y’Ibirunga ushinzwe guhuza imirimo ya Pariki n’abayituriye yabigaragaje, ngo haracyakenewe intambwe ifatika mu kwirinda gutema amashyamba, gukumira ubuhinzi busatira imigezi n’imyuzi, kutavangavanga imyanda ibora n’itabora kandi bakirinda kuyikwirakwiza no kuyitwikira aho babonye, kubungabunga umutungo kamere w’amazi, kudakorera ubuvumvu muri Pariki mu kuyirinda inkongi y’umuriro n’ibindi.

Ngendahayo Jean umuyobozi w’Ishami ry’ubuhinzi, ubworozi n’Umutungo kamere mu Karere ka Musanze, akangurira abagore kumva ko gukumira imihindagurikire y’ikirere bibafitiye inyungu.

Ati: “Kubungabunga ibidukikije bahereye kuri Pariki y’Igihugu y’Ibirunga begeranye na yo ni ngombwa, cyane ko bidahari, byaba bisa n’aho ubuzima bwabo buri mu kaga. Ni byiza ko imirimo bafite mu nshingano gukorera hanze ya Pariki nk’ubuhinzi cyangwa ubworozi, igomba kuba mu mujyo wo kuyibungabung. Urugero niba hari nk’uteye ibiti, yibande ku by’imbuto, iby’indumburabutaka mu mirima, ku nkengero z’imyuzi, gucana mu buryo buronderza ibicanwa, imicungire iboneye y’imyanda ndetse bakitabira n’imirimo irengera ibidukikije kandi ibyara amafaranga”.

Aba bagore na bo bavuga ko urwego rw’imyumvire bariho mbere, hari igifatika rwiyogereyeho, ku buryo ubu bagiye kwibanda ku mishinga yaba iy’ubuhinzi, ubukorikori, ubworozi n’indi ifitanye isano ko kurengera ibidukikije.

Mu biganiro bimaze iminsi ine byahuje abagore bahagarariye abandi, bibukijwe ko ingaruka z’imihindagurikire y’ikirere, bari mu bo zigiraho ingaruka byihuse, bityo ko batagize icyo bakora ngo bahagurukire nyirabayazana wazo, bazisanga zikomeje kubadindiza.

Iri torero ryatangiye guhera tariki 5 Nyakanga 2024 ryitabirrwa n’abarimo Urubyiruko 33 rw’abanyarwanda biga cyangwa batuye mu mahanga, abanyeshuri barangije amashuri yisumbuye bize mu mashuri mpuzamahanga yo mu Rwanda 67, Indashyikirwa zivuye ku Rugerero rw’Inkomezabigwi icyiciro cya 11 zigera kuri 381, hamwe n’abayobozi b’Urubyiruko 13; zose hamwe zikaba ari 494.

Dr Ngirente wari uhagarariye Perezida Paul Kagame muri iki gikorwa, yagaragaje ko amahitamo y’igihugu yo gufasha urubyiruko kwitabira itorero ryo kuri uru rwego, yubakiye ku kurutoza umuco w’inshingano mboneragihugu, kwiyubaha, imyitwarire myiza ari nabyo urubyiruko rukwiye kubakiraho mu buzima bwarwo rwa buri munsi.

Ati: “Izo nshingano mboneragihugu zijyana no kurinda ibyagezweho, mukumira ikintun cyose kigamije kubyangiza. Indangagaciro z’uburere bwiza n’ubufatanye hagati yanyu bugamije kwerekana isura y’igihugu cyacu uko kiri, no kuvuguruza abakivuga ukundi buracyenewe cyane kuko bifasha benshi kugira isura nyayo y’uko y’ukuri nyako kuri cyo”.

Yashimiye umuhate abitabiriye iri torero bagize mu gukurikirana ibyo bize, anagaragaza ko kugira ngo bibagirire akamaro, byajyanya no kugira ishyaka ryo kujya bafata ibyemezo bishyira igihugu ku rwego rwiza.

Ati: “Ibyemezo mukwiye kuba mwifatira, mu by’ukuri bikwiye kuba ibigira uruhare mu guhindura ibintu bitari byiza. Iyo mufashe ibyemezo byiza yaba kuri mwe mwitabiriye iri torero ndetse n’urubyiruko muri rusange, ni ibintu byinshi bifatika bifasha mu hazaza h’igihugu”.

Yanakomoje ku burenganzira urubyiruko rufite kimwe n’abandi banyagihugu bose, binyuze mu byo leta ibagomba nk’Uburezi mu mashuri, kwidagadura, kurindirwa umutekano, imibereho myiza n’ibindi bizamura imibereho yarwo; ariko narwo arwibutsa ko rufite inshingano zo kugira imyitwarire ikumira ibiyobyabwenge, ubusinzi n’ibindi biyobya urubyiruko.

Ati: “Ni ngombwa ko muba urubyiruko rukura neza, rwiga amashuri rukayarangiza, rwiteguye gukorera igihugu rutamugaye. Ntidushaka abishora mu businzi ngo bagere aho batakibasha guhaguruka ngo bakore kuko nta terambere bageraho. Leta y’u Rwanda iharanira yuko uburenganzira busesuye bwose mububona ariko namwe nk’urubyiruko mugasabwa kubahiriza inshingano ibategerejeho”.

Mu masomo izi ntore zahawe harimo arebana n’amateka y’u Rwanda, bakora ingendoshuri mu bice bitandukanye by’igihugu aho basuye inzibutso n’ibice ndangamateka y’u Rwanda mu kuzuzanya n’amasomo bahawe, bibafasha kwigira ku rubyiruko rwaranzwe n’ubwitange no kubohora igihugu, bityo na bo bakaba babona aho bahera bagera ikirenge mu cyarwo.

Mu bindi bize harimo amasomo ya gisirikari n’ay’uburere mboneragihugu, imikino njyarugamba, akarasisi, uburyo bwo kwirwanaho mu gihe cyo guhangana n’umwanzi n’andi atandukanye.

Urubyiruko rwitabiriye iri torero, rurigereranya n’isoko bavomyeho ibitekerezo byubaka igihugu.

Dusabeyezu Jean de Dieu agira ati: “Itorero Indangamirwa ryanyeretse aho u Rwanda rwacu rwavuye, aho rugeze n’aho rugana n’uruhare rwanjye nk’urubyiruko kugira ngo nzarufashe kugera aho abanyarwanda twifuza. Nasobanukiwe indangagaciro zigomba kundanga mu gusigasira uruhare rwanjye mu iterambere. Muri zo ni nko gukunda igihugu n’umurimo kandi nkawunoza, guharanira ubutwari, nkabijyanirana no gukomera ku bumwe, gukorera hamwe n’abandi n’izindi zishamikiyeho”.

Izi ntore zivuga ko zisoje iri torero zifitiye igihugu umwenda wo gukomereza ku byo urubyiruko rugenzi rwarwo rwaharaniye ubwo rwakibohoraga rukongera no kugisana nyuma ya Jenoside yakorewe Abatutsi, bityo ko na zo zizakomereza mu mujyo wo gusigasira ibyagezweho.

Ibyo bikazajyana no gukorera ku ntego, gukoresha igihe neza, gukora byinshi kandi mu gihe gitoya kandi bakoreye hmwe nk’uko Hirwa Jean Eric yakomeje abivuga.
Ati:“Byambereye iby’agaciro gusobanukirwa byinshi ku mateka y’igihugu cyacu, uburyo ngomba kukigendana ku mutima, mfatiye urugero ku bagabo n’abagore b’Intwari bitangiye igihugu batizigama bakakirwanira”.

Ni ku nshuro ya kabiri Ikigo cy’Igihugu cy’Ubutore cya Nkumba cyakira Itorero ryo kuri uru rwego. Minisitiri w’Ubumwe bw’Abanyarwanda n’Inshingano Mboneragihugu Dr Bizimana Jean Damascene yavuze ko wabaye umwanya wo umenya aho u Rwanda rwavuye, ubwitange bwabayeho ngo rugere aho rugeze n’ibyo basabwa mu kubinoza.

Aya masomo bakurikiraniye muri iri torero bamazemo iminsi 47, aje yiyongera ku yandi basanzwe biga, bikabubakamo ubunyarwanda bwuzuye buharanira kurwanirira igihugu cyabo.

Izisoje iki cyiciro ziyongera ku zindi ntore 412 zitabiriye itorero nk’iri umwaka ushize wa 2023. Ibyiciro byose byabanje bikaba bimaze gutorezwamo intore 5128 kandi biteganyijwe mu gihe kiri imbere uyu mubare uziyongera ku kigero gifatika kuko ikigo cy’Ubutore cya Nkumba kirimo kwagukorwa no kongererwa ubushobozi, ku buryo mu gihe kiri imbere kizava ku bushobozi bwa gutorerzwamo intore 500 cyakira ubu, kikagera ku bushobozi bwo kwakira abasaga 1000.

Iyo nzu isanzwe iri mu gipangu kimwe n’izindi nzu zikodeshwa, yafashwe n’inkongi mu masaha ya mugitondo cyo kuwa gatatu tariki 21 Kanama 2024. Ababonye iyi nkongi, bavuga ko ibyumba byayo byose n’uruganiriro, umuriro mwinshi cyane wabyibasiye, n’umwotsi ucucumuka mu mpande zose, babonye bibarushije imbaraga, bihutira gutabaza inzego z’ubuyobozi n’izishinzwe umutekano harimo na Polisi, yayizimije hakoreshejwe Kizimyamoto.

Ni amakuru yemejwe n’Umuvugizi w’Umujyi wa Kigali akawubera n’Umukozi Mukuru ushinzwe Itumanaho n’Uburezi rusange, Ntirenganya Emma Claudine agira ati: “Ni inzu yabagamo abasore babiri bayikodesha, ikaba iri ahantu mu gipangu kirimo n’izindi nzu. Kugeza ubu ntituramenya neza uburyo iyo gaz yaturitsemo, ariko mu makuru y’ibanze twamenyeshejwe n’abagiye kuyizimya, ni uko koko ari impanuka yatewe n’iturika rya gaz”.

“Umuntu umwe mu bayibagamo ikimara kumukomeretsa babanje kumujyanya ku Kigo nderabuzima cya Nyacyonga kihegereye, bamugejejeyo abaganga babona ko arembye, bahita bamwohereza ku bitaro byisumbuyeho bya CHUK ubu niho arimo kwitabwaho”.

Emma Claudine mu butumwa yahaye abaturage, bugaruka ku kubibutsa ko gaz atari igikoresho giteye ubwoba mu gihe abantu baba bagikoresheje bitaye ku kuyitwararika.

Yabibukije ko ari ingenzi kujya babanza kugenzura neza ko itabateza akaga. Ati: “Impanuka ya gas ishobora kwirindwa mu gihe abantu bikwirinda kuyikoresha iteretse ahantu hafunganye hatagera umwuka.

Ni byiza ko mbere yo kuyitekeraho cyangwa gucana ibindi bintu byaka biri ahegereye icupa rya gaz, bajya babanza kugenzura neza niba itahitishije umwuka wayo, bakajya barebe neza niba mu bikoresho byayo nta cyangiritse, mu kwirinda ko byateza inkongi, igakurura ibibazo nk’ibi”.

Ba nyiri ibikoresho byafashwe n’iyo nkongi y’umuriro ngo baba baramuyemo bicyeya. Usibye uwakomeretse, undi babana, ngo ubwo impanuka y’iyi nkongi yabaga, bivugwa ko atari ahari.

Ishami rya Polisi y’Igihugu rishinzwe kuzimya inkongi, mu nama ryakunze kugira abantu ku kwitwararika igihe batetse, na mbere yo guteka kuri Gaz, harimo ko bajya babanza kugenzura niba ifunze neza cyangwa idafite ikindi kibazo, kugira ngo birinde ibyago byo kuba yabaturikana.

Ni ngombwa kandi kujya batekera ahantu hadafunganye cyane, no gufungura amadirishya y’aho batekeye, kugira haboneke umwuka uhagije.

Mu bindi harimo nko gutunga za kizimyamoto bashobora kwifashisha mu butabazi bw’ibanze bakwikorera mu gihe baba bagitegereje ko abashinzwe kuzimya inkongi y’umuriro babageraho.

Abaturage bagaragaza ko yangirika ry’imihanda rikoma mu nkokora kugera ku iterambere bifuza bikabangamira n’imigenderanire

Imyinshi mu mihanda igarukwaho, ni iyo bigaragara ko ikoreshwa n’umubare utari muto w’abaturuka mu duce tumwe bagana mu tundi, mu Turere yaba utugize Intara y’Amajyaruguru, Intara y’Iburasirazuba iy’Iburengerazuba n’Intara y’Amajyepfo.

Urugero rw’imwe mu mihanda ikunze kugarukwaho, ni nk’umuhanda wa kaburimbo Musanze-Cyanika ureshya n’Ibirometero 25, ukaba uhuza u Rwanda na Uganda unyuze ku mupaka wa Cyanika.

Ni umuhanda abaturage bakunze kugaragaza ko ari mutoya mu bugari, ukagiramo n’ibinogo byinshi, ibyo bikabangamira kubisikana no kunyuranaho kw’ibinyabiziga bikunze kuwunyuramo harimo n’amakamyo manini ajyana cyangwa avana ibicuruzwa muri Uganda, awukoresha ku bwinshi utaretse n’abanyamaguru bawugendamo.

Abatwara ibinyabiziga muri iyi mihanda bavuga ko bibagora cyane kubera iyangirika ryayo

Sibomana Xavier, umushoferi ukora akazi ko gutwara imodoka ya Dayihatsu yikorera imyaka. Agira ati: “Wuzuyemo ibinogo byinshi, bisaba kugenda umuntu akwepa buri uko akigezeho, bikavamo kubangamira ibindi binyabiziga n’abanyamaguru. Ibyago by’impanuka biba biri ku kigero cyo hejuru, bahora batwizeza kuwutunganya ariko twarahebye”.

Nk’umuntu ukorera inshuro nyinshi muri uyu muhanda, ngo agereranyije nibura ku munsi, ntihabura imodoka zibarirwa mu bihumbi nka bitanu ziwunyuramo kandi inyinshi aba ari amakamyo manini atwaye ibicuruzwa.

Ni umuhanda ufite n’indi myinshi y’ibitaka iwushamikiyeho, bigaragara ko ikeneye gutunganywa, bitewe n’uburyo yagiye yangizwa n’amazi aturuka mu Birunga, akunze kumanukana umuvumba mwinshi ndetse n’amabuye manini akayangiza.

Ibinogo biri mu muhanda Musanze-Cyanika no kuba ari mutoya mu bugari bibangamiye abawukoresha

Mu ngero abaturage bagarutseho z’umuhanda ugendwamo na benshi, ni uturuka Gahunga ugana ku Kigo cy’Ubutore kiri i Nkumba mu Karere ka Burera. Uyu muhanda, mu gihe cy’impeshyi kubera ukuntu ari uw’ibitaka, ukunze kurangwamo ivumbi ryinshi ku buryo bubangamira abawugendamo.

Ibihumbi n’ibihumbi by’abaturuka imihanda yose y’Igihugu utiyibagije n’abaturuka hanze, bagana icyo kigo, gitoza umuco w’Ubutore ni wo banyuramo.

Mu gihe cy’impeshyi ivumbi ritumuka mu muhanda Gahunga ujya i Nkumba riba ari ryinshi

Akababaro ku bawunyuramo, bagahuje n’abawuturiye, binubira ko barembejwe n’ivumbi ritumurwa n’imodoka ziwunyuramo, bakifuza ko hagira igikorwa, ugashyirwamo kaburimbo, dore ko n’uburebure bwawo butarengeje ibirometero 10, atari byinshi ugereranyije n’imihanda y’ahandi.

Niyingabira Jean Claude agira ati: “Inzu zacu zuzuramo ivumbi yaba inyuma n’imbere, nta muntu ukoropa cyangwa ngo ahanagure ibirahuri, ngo abe yamara byibura amasaha abiri ivumbi ritarongera kuzuraho. Dufura imyenda twayanika ikumiramo ivumbi, bikaba akarusho ku mafunguro duteka ahanini tuyarya yivanze n’ivumbi riba ryatumukiyemo. Hano agahinda ni kose, birakwiye ko uyu muhanda bawukora tugakira iri vumbi tukareba uko twatera kabiri”.

Umuhanda Musanze-Vunga

Uyu muhanda uhuza Akarere ka Musanze-Nyabihu-Ngororero na Muhanga ukoreshwa na benshi mu bikorwa by’ubucuruzi bwo mu masoko atandukanye yaho ndetse n’abakenera serivisi z’ubuvuzi baturuka muri utwo turere bagana ibitaro bya Shyira.

Umuhanda Musanze Vunga Ngororero wabaye nk’igisoro kubera ibinogo biwuzuyemo

Uyu muhanda ugizwe n’igice gito cya kaburimbo gituruka ahazwi nk’umuhanda wo kuri BNR i Musanze, wagera i Nyakinama, ugakomerezaho ikindi gice kigizwe n’ibitaka, kigera muri utwo Turere tundi, abaturage bakaba babangamiwe n’uburyo urujya n’uruza ruwukorwamo, bitewe n’uburyo wuzuyemo ibinogo.

Kwizera Landouard, agira ati: “Uyu muhanda ni ingirakamoaro cyane ariko tukabangamirwa n’uburyo abarema isoko rya Vunga n’irya Kinkware n’ayandi afatwa nk’akomeye tuhageza ibicuruzwa n’umusaruro mu buryo butugoye kubera ko wuzuyemo ibinogo. Abarwayi bajya kwivuriza ku bitaro bya Shyira, bagerayo wabashegeshe bitewe n’ibyo binogo, kenshi usanga byaranaretsemo amazi mu gihe cy’imvura cyangwa wuzuye ivumbi mu izuba”.

Ikibazo cy’uyu muhanda ureshya n’ibirometero bisaga 65, abaturage bo muri aka gace bemeza ko n’Umukuru w’Igihugu Paul Kagame akizi, kuko ubwo yagendereraga Akarere ka Nyabihu muri 2017, yabemereye ko ugomba gukorwa mu maguru mashya.

Umuhanda Musanze-Vunga-Ngororero uramutse ukozwe byakorohereza abivuriza ku bitaro bya Shyira n’abagana amasoko yo muri ako gace

Gusa ngo kuba harenzeho imyaka irindwi, ku bwabo ngo ni myinshi cyane ugereranyije n’uburyo icyo gihe abibabwira bari biteze ko utangira gukorwa bidatinze.

Umuhanda Muhanga-Mukamira-Ngororero

Ni umuhanda wa kaburimbo, wanashowemo akayabo k’ama miliyari y’amafaranga y’u Rwanda mu kuwutunganya, ariko abawugendamo bavuga ko ibi bisa n’ibikomeje kuba imfabusa kuko ukunze gukereza abagenzi, cyane cyane mu gihe cy’imvura y’itumba n’iy’umuhindo, bitewe n’inkangu ziwufunga bya hato na hato, bigahagarika ubuhahirane.

Si inkangu gusa ziwibasira kuko n’amazi y’umugezi wa Nyabarongo yuzura akawurengera, agatwara n’amwe mu mazu yubatse hafi yaho, ikibazo gikunze kugaragara cyane ku gice cyegereye ikiraro cya Cyome ugeze mu Murenge wa Gatumba.

Bisa nk’ibibera umusaraba abawukoresha mu gihe ibyo biza biba byafunze uwo muhanda kuko bamwe barara nzira bari hakurya abandi hakuno babuze uko bahambuka, bategereje ko amazi acogora ukabona kongera kuba nyabagendwa.

Umuhanda Mukamira-Ngororero-Muhanga ukunze kwibasirwa nk’ingangu zikawufunga

Ndetse yewe si rimwe, si kabiri Polisi y’u Rwanda yagiye itanga amatangazo amenyesha abantu guhagarika kuwukoresha mu buryo bw’agateganyo mu gihe imirimo yo kuvanamo ibitengu n’amazi yabaga irimo gukorwa ngo bidashyira ubuzima bw’abantu mu kaga.

Ingengo y’imari ikenewe mu gusana ahakunze kwibasirwa n’ibyo biza, byakunze kuvugwa ko ibarirwa hagati ya miliyari imwe na miliyari ebyiri z’amafaranga y’u Rwanda, kugeza ubu abawukoresha bakaba bagitegereje ko umushinga wo kuwutunganya mu buryo burambye washyirwa mu bikorwa.

Umugezi wa Nyabarongo, uri ku rutonde rwakozwe n’Ikigo Gishinzwe Umutungo Kamere w’Amazi mu Rwanda (Rwanda Water Resources Board), rw’imigezi irimo uwa Sebeya, Cyagara, Karambo, Kabirizi, Mwogo, Nyabahanga, Mukungwa, Rubyiro; ndetse n’imigezi yo mu muhora wa Vunga n’imyuzi yo mu gice cy’ibirunga mu Turere twa Musanze, Burera, Nyabihu na Rubavu bigaragara ko ititondewe yashyira ubuzima bw’abantu mu kaga.

Umuhanda Rugobagoba-Mukunguri

Ni umuhanda wo mu Karere ka Kamonyi, kuri ubu urimo gusanwa utsindagirwa nyuma y’igihe cyari gishize imirimo yo kuwukora yarahagaze, kubera ko rwiyemezamirimo yari yarawutaye atarangije ibyo bikorwa.

Umuhanda Rugobagoba-Mukunguri ukoreshwa cyane n’amakamyo azwi nka HOWO atunda umucanga

Uwo muhanda ukoreshwa cyane n’amakamyo azwi nka HOWO atunda umucanga uva muri Kamonyi na Ruhango ujyanwa mu mujyi wa Kigali n’izindi modoka zitwara umusaruro w’umuceri n’imyumbati mu Karere ka Kamonyi.

N’ubwo uyu muhanda uri gutunganywa ushyirwamo laterite mu mushinga uzatwara akabakaba Miliyari imwe, ivumbi ryawo rikunze kwibasira abatuye mu nkengero zawo, ku buryo mu gihe cy’impeshi bigoye kugira isuku.

Umuhanda Cyakabiri-Nyabikenke-Ndusu-Gakenke

Ni umuhanda ukoreshwa cyane n’abajya mu Mirenge ya Rongi na Nyabinoni mu Karere ka Muhanga banyuze mu Murenge wa Cyeza ugafata n’igice cy’Akarere ka Kamonyi mu Murenge wa Kayenzi.

Abawukoresha ntibasiba kuzamura ijwi bagaragaza ko wangiritse ndetse n’ibiraro biwubatseho kubera kwangirika bibangamira ingendo bagahora mu bwigunge.

Umuhanda Cyakabiri Nyabikenke warangiritse n’ibiraro ntibyasigara

Basanga uramutse ukozwe, byakoroshya ingendo zihuza Intara y’Amajyepfo n’iy’Amajyaruguru, dore ko unyura hafi y’Ikigo nderabuzima cyo muri Kayenzi, no ku bitaro by’Akarere bya Nyabikenke ukambuka ugera muri Gakenke ugakomereza n’i Musanze.

Uyu muhanda hashize imyaka irenga itanu bivugwa ko uzatunganywa ugashyirwamo kaburimbo, ubuhahirane na serivisi z’ubuzima bikoroha batarindiriye guhora bazenguruka muri Ngororero n’Umujyi wa Kigali, ariko na n’ubu baracyategereje.

Umuhanda Ruhango-Birambo

Ni umuhanda ufasha abaturage b’Uturere twa Ruhango mu Majyepfo na Karongi mu Burengerazuba, ariko ugoye cyane mu bihe by’impeshyi, kuko mu kuwugendamo yaba ku banyamaguru n’abakoresha ibinyabiziga, bibasaba kugenda bitwikiye ibitenge, amakoti cyangwa amashuka bitewe n’ivumbi riwuzuramo.

Ku mugenzi uba uwuturutsemo ageze nko mu Mujyi wa Ruhango cyangwa yanyuze ahitwa i Kirengere, mbere yo kwiyereka abo ahasanze, abanza kwihugika ahihishe, bikamufata umwanya utari mutoya, wo kwihungura ivumbi, riba ryamwuzuyeho umubiri wose no ku byo yambaye, kugira ngo abone gukomeza mu bindi byerekezo birimo n’Umujyi wa Kigali cyangwa Muhanga atameze nk’uvuye mu nzu babeteramo ifu y’imyumbati.

Ni umuhanda abaturage bemeza ko akenshi ubaraza nzira nk’iyo umugezi wa Nyabarongo wawurengeye, bakifuza ko watunganywa ugashyirwamo kaburimbo kuko ufatiye benshi runini.

Umuhanda Muhanga-Ngororero-Rambura-Karongi

Ni umuhanda wa kaburimbo ariko wangiritse, kuko wakozwe mu myaka ya za 1990, icyakora igice cyawo gituruka i Karongi kikagera i Rambura cyamaze gutunganywa, mu gihe igice cya Ngororero-Muhanga cyo kitaratunganywa.

Nyabarongo yuzura mu muhanda Muhanga Ngororero bigatuma utaba nyabagendwa

Uyu muhanda unihariye ku rugomo rukorwa n’amabandi yurira imodoka zigenda gahoro nijoro kubera ko abazitwara baba barwana no gukatira ibinogo biwubamo.

Ayo mabandi abaca mu rihumye akazipakurura bimwe mu byo ziba zipakiye mu gihe zirimo zigenda. Urugero rwigeze kubaho, ni urwa bamwe muri yo, barashwe n’inzego zishinzwe umutekano ubwo buriraga imodoka bagerageza kwiba imizigo yari itwaye.

Iyi iba imwe mu mpamvu zituma abenshi mu bafite ibinyabiziga batinya kuwunyuramo byongeye n’ibinogo baba batinya ko byangiza imodoka zabo bagahora mu ma Garage.

Imihanda irimo n’iya kaburimbo igwamo inkangu ubuhahirane bugahagarara

Ubwo yiyamamarizaga mu Ntara y’Iburengerazuba, Perezida Paul Kagame yinubiye uburyo uyu muhanda ukomeje kwirengagizwa nyamara nta na byinshi bibura ngo ube wakorwa.

Yahereye aha asezeranya abaturage ko mu gihe cya vuba ugiye kuzakorwa bityo Intara y’Amajyepfo n’iy’Uburengerazuba bikagenderana nta nkomyi.

Ahenshi mu hagaragara imihanda ikoreshwa n’urujya n’uruza ku rwego rwo hejuru ariko yangiritse, abaturage bakunze gutunga ubuyobozi agatoki kutihutisha imirimo yo kuyitunganya, ndetse abandi bagahuriza ku kunenga ko n’iyo hagize isanwa, bikorwa mu gisa n’urw’iyerurutso, bayiteramo ibiremo mu buryo butaramba, ibi bikaba bikunze kubaho nk’iyo hari imyiteguro yo kwakira abashyitsi b’imena nka Perezida Paul Kagame iyo ari busure agace runaka, nyamara yamara kuhava iby’iyo mihanda iba yasanwe bigasubira ibubisi itamaze na kabiri.

Inzego z’ubuyobozi ntizisiba kubwira itangazamkuru ko ikibazo cy’imihanda itarakorwa kizihangayikishije

Urugero rw’imwe mu mihanda ibyo byakunze kubaho, ni nk’umuhanda Musanze-Cyanika n’undi ushamikiyeho wa Gahunga ugeze ku Kigo cy’Ubutore kiri i Nkumba, wigeze gusanwa muri ubwo buryo ubwo yajyagayo gusoza itorero. Hari kandi umuhanda Musanze-Vunga n’indi itandukanye.

Abayobozi muri utwo duce na bo ntibasiba kugaragariza itangazamakuru ko imihanda iri mu bibahangayikishije kandi bakomeje kugira icyo babikoraho mu gukurikirana ko yatunganywa, igashyirwamo laterite indi nayo ikaba yashyirwamo kaburimbo, kandi iri ku rwego rurenze ubushobozi rw’Uturere bitewe n’akayabo k’amafaranga y’ingengo y’imari kazayishorwamo, bagakurikirana ko za Minisiteri hamwe n’Ikigo RTDA biyifite mu nshingano byakora ibishoboka igatunganywa.

Ni ibikorwaremezo abaturage bemeza ko basonzeye, kuko biramutse bikozwe uko babyifuza, usibye kongera amahirwe y’ubuhahirane n’utundi Turere, bizorohereza n’ibindi bikorwa remezo byuzuzanya n’imihanda nk’amatara ayimurikira, za santere z’ubucuruzi, amasoko, amashuri, amavuriro bikazamura iterambere byihuse.

Umuhanda Rugobagoba-Mukunguri batangiye kuwurundamo reterite ariko ivumbi ryawo ryari rirembeje abaturage

Ibiza bikunze kwibasira imwe mu mihanda ikaridukana n’ibindi bikorwa remezo biyishamikiyeho

Imyinshi mu mihanda abayikoresha babangamirwa n’ibinogo bituma kuwugendamo bicyereza benshi

Abandi bagize uruhare muri iyi nkuru:

Ephrem Murindabigwi
SEBASAZA Gasana Emmanuel

Ba Gitifu umunani bo mu Karere ka Musanze bahinduriwe Imirenge bayoboraga

Inyandiko igaragaraho urutonde rw’aho abanyamabanga nshingwabikorwa b’Imirenge bakoreragamo n’iyo bimuriwemo, yatangiye gukwirakwizwa ku mbuga nkoranyambaga zirimo n’urwa Whatsapp, guhera kuwa Kane Tariki 15 Kanama 2024, aho urwo rutonde rugaragaza ko muri ba Gitifu 15 bayobora Imirenge yose igize aka Karere, umunani muri bo bahinduriwe Imirenge mu gihe abandi 7 bo bagumye aho bayoboraga.

Umuyobozi w’Akarere ka Musanze Nsengimana Claudien wemeje iby’izi mpinduka, yavuze ko zigamije gufasha aka Karere kuzamura ibipimo by’imitangire ya serivise zinoze n’iby’umuvuduko w’iterambere.

Yagize ati: "Ni ukugira ngo turusheho gutanga serivisi zinogeye abaturage. Ntibivuze ko aho bayoboraga batazitangaga neza, gusa hari ibibazo bimwe biba byarakiriwe bisaba gukemurwa hagendewe ku bunararibonye bwihariye umuntu aba afite. Tuvuge niba hari nka Gitifu ufite ubunararibonye mu buhinzi n’ubworozi, Umurenge yayoboraga ukaba ukataje mu bijyanye n’iterambere ry’umujyi. Tukavuga tuti uyu munsi iyo mikorere ko hari byinshi yahinduye n’ibyo yazamuye, aramutse ayimukanye n’ahandi, harushaho kuzamuka byihuse".

Akomeza agira ati "Nk’ubu bigaragara ko hari Imirenge igenda itera imbere byihuse nka Muhoza, Cyuve, Kimonyi n’ahandi; ubunararibonye bwakoreshejwe mu kuyizamura, ba Gitifu bahayoboraga, bashobora no kubukoresha n’ahandi bikahafasha kuzamuka byihuse".

Yijeje abaturage ko izi mpinduka zitazigera ziteza icyuho, cyane ko aho abanyamabanga nshingwabikorwa bahinduwe bakoreraga, hasanzwe hari abandi bakozi bakoranaga kandi bahagaze neza mu ngamba.

Mu Mirenge yahinduriwe Gitifu harimo uwayoboraga Busogo wimuriwe kuyobora Umurenge wa Cyuve, uwayoboraga uwa Gacaca yimurirwa mu Murenge wa Gashaki, uwayoboraga Gataraga yimurirwa muri Nkotsi naho uwayoboraga Nkotsi ahabwa inshingano zo kuyobora Kimonyi.

Ni mu gihe Gitifu wayoboraga Gashaki yahawe kuyobora Muhoza, uwa Gataraga yoherezwa muri Nkotsi, uwayoboraga Kimonyi yoherezwa muri Gacaca. Uwayoboraga Muhoza yoherejwe i Busogo, uwayoboraga Cyuve yoherezwa mu Murenge wa Gataraga.

Usibye abo, abandi uko ari barindwi barimo uyobora Umurenge wa Kinigi, Musanze, Nyange, Shingiro, Remera Rwaza na Muko bo bagumishijwe aho bayobora.

Nsengimana yasabye abaturage gukomeza ubufatanye n’ababayobora, bitabira kubahiriza gahunda za Leta, kugira ngo imihigo aka Karere kahize kwesa y’umwaka wa 2024-2025 kazayese.

Yabibukije ko muri Manda nshya Umukuru w’Igihugu Paul Kagame aherutse gutorerwa y’imyaka itanu iri imbere, kugira ngo ibyo yiyemeje gukora bigerweho bisaba ko abaturage n’abayobozi babigiramo uruhare rufatika.

Avuga ko gahunda ishishikaje Akarere ari ugushyira umuturage ku isonga, ahabwa serivisi zinoze, ibi bikaba aribyo ba Gitifu bategerejweho.

Abagera mu 100 barimo abo mu mashuri abanza n’ayisumbuye nibo barimo gufashwa gukarishya ubumenyi mu gukora za Robot

Abo bana uko ari 100, ni abatoranyijwe mu bandi, basanzwe bitwara neza mu isomo ry’ubumenyi mu by’ikoranabuhanga rizwi nka SET cyangwa Science Elementary Technology.

Izo Robot, bihugurira kuzikora bifashishije ibikoresho biba bitagikoreshwa nk’amakarito, impapuro, amacupa, imifuniko y’ibikombe, imbaho cyangwa ibiti n’ibindi abana bakunze kwifashisha mu dukino twa buri munsi; bakagenda bongeraho ibindi bikoresho bikoranywe ikoranabuhanga bungikanya bakabihuza na mudasobwa, bikikoresha icyo bigenewe.

Babigendeyeho, bamwe barateganya kubibyazamo imodoka ibasha kugenda bitagombeye ko itwarwa n’umushoferi, indege nto itagira umupilote izwi nka ’Drone’, igikoresho kijugunywamo imyanda bitabaye ngombwa ko bagikoraho, ivomero ritanga amazi batarindiye kurifungura, inzogera yirangira mu gihe hari uwegereye agace iherereyemo, amatara yo mu mihanda ayobora ibinyabiziga mu buryo bubirinda kugongana n’ibindi.

Abana bavuga ko iri koranabuhanga barimo kwigishwa rizabafasha kugera ku ndoto zabo

Ni gahunda aba bana bishimira ko yabakuye mu bwigunge, bibarinda ubuzererezi ahubwo ubabera umwanya wo kurushaho kunonosora impano zabo.

Ineza Yvan urangije amashuri abanza kuri GS Kampanga, agira ati: “Muri iki gihe cy’ibiruhuko, twirirwaga mu rugo tudafite icyo dukora, hakaba ubwo dutoroka ababyeyi, tukajya kuzerera kubera ko ntacyo twabaga dufite duhugiraho. Kuba badufashije tukitabira aya masomo, biradufasha cyane kwiyibutsa no kwiyungura ibindi bishya, bidufasha kurushaho gukunda ikoranabuhanga”.

Ikigamijwe ni ugukundisha abana ikoranabuhanga mu buryo bwisumbuyeho, no kubatoza kurigira umuco mu bikorwa byabo bya buri munsi, batagombeye kubyigira mu mashuri gusa.

Mu bikoresho by’ibanze bifashisha birimo n’ibyakoreshejwe bongeranya n’ibindi bikoranwe ikoranabuhanga

Nyirabatoni Clementine, ayobora umuryango mpuzamahanga wita ku kwigisha binyuze mu mikino Right to Play, mu Turere twa Musanze na Rubavu, ari na wo uri gufatanya n’Akarere ka Musanze muri iyi gahunda.

Agira ati: “Gukundisha abana ikoranabuhanga bakiri bato bibafasha gukura bariha agaciro no kuba bagira intumbero zo kuribyaza umusaruro”.

Akomeza agira ati, “Nk’ubu dufite ingero z’abana batangiye kureba uko bakora amatara agenewe kuyobora ibinyabiziga mu byerekezo binyuranye by’imihanda (Traffic lights) ashobora gukumira impanuka z’ibinyabiziga cyangwa ukubyigana kwabyo. Birerekana uburyo aba bana n’ubwo ari batoya, bafite inzozi zo kubaka ibisubizo ku ngorane zimwe na zimwe zugarije abantu. Turamutse rero tubatoje gukunda ikoranabuhanga bahereye ku dukoresho bikorerwa mu gihe bakina, hari byinshi babasha kwagura bikaba byagera ku rwego rwisumbuyeho”.

Umuyobozi w’Akarere ka Musanze wungirije ushinzwe imibereho myiza y’Abaturage Kayiranga Théobard, akangurira aba bana kubyaza umusaruro iyi gahunda, yabashyiriweho nk’uburyo bwo kuzamura urwego rw’ubumenyi bariho, bwaberekeza mu rugendo u Rwanda rurimo rw’ibikorwa byubakiye ku ikoranabuhanga.

Mu gihe cy’ibyumweru bibiri bitegenyijwe ko iyi gahunda izamara, abagenerwabikorwa bayo, ni abana batoranyijwe mu bigo by’amashuri 25, birimo ibya Leta n’ibyigenga byo Karere ka Musanze.

Ubuyobozi bubasaba kubyaza umusaruro aya mahirwe

Amafi yorowe akanarobwa kinyamwuga ubuziranenge bwayo buba bwizewe

Ndagijimana Elias ukuriye Ihuriro ry’Amakoperative y’uburobyi mu Karere ka Nyamasheke avuga ko iterambere ry’uburobyi rikunze kubangamirwa n’abashimuta amafi n’isambaza.

Ati: “Ba rushimusi bitwikira ijoro bagakoresha imitego itemewe ya supaneti, bagashimuta mu buryo bwinshi kandi bwangiza. Iyo mitego yabo bayishyira ahororokera amafi n’isambaza, bakaziyora zose zikiri ntoya, ikanasibanganya ibyogo byayo, umusaruro uba witezwe ugasanga utakibonetse uko bikwiye”.

Uburobyi mu Rwanda buvamo ikigereranyo cy’umusaruro ungana na toni ibihumbi 39, ubworozi bw’amafi bukiharira toni ibihumbi 8 ku mwaka.

Igenabikorwa rirambye ry’ubworozi bw’amafi mu Rwanda rigaragaza ko buramutse bukozwe neza, bushobora gutanga umusaruro wayo ubarirwa muri toni ibihumbi 80.
Ndorimana Jean Claude Umuyobozi mukuru muri Minisiteri y’ubuhinzi n’ubworozi ushinzwe ubworozi, agaruka ku cyakorwa ngo ibi bigerweho.

Uyu muyobozi akomeza avuga ko kuroba amafi mu buryo bunyuranyije n’amategeko buzwi nk’ubushimusi, haba hari ibyago byinshi byo guteza akaga abayarya kuko ubuziranenge bwayo buba butizewe.

Yagize ati: “Abari mu makoperative yemewe n’amategeko bafite ibyangombwa n’aho kurobera hemewe uburyobyi barabwubahiriza. Ariko iyo bigeze kuri ba rushimusi, bo bakoresha ibikoresho bitemewe n’amategeko byangiza kandi n’uburyo barobamu bukangiza ahororokera amafi ku buryo n’abantu bayarya baba bafite ibyago byinshi byo kugerwaho n’ingaruka, mu gihe bariye amafi n’isambaza byarobwe mu buryo bunyuranyije n’amategeko kubera yuko ubuziranenge bwayo buba butizewe”.

“Abo ba rushimusi si aba kure, ni abanyarwanda nk’abandi bantu; niyo mpamvu bakwiye kwigishwa bakerekwa inyungu iri mu kubungabunga aho amafi yororokera, bitabira uburobyi bwubahirije amategeko kuko aribyo byakongera umusaruro uva mu burobyi”.

Mu biganiro biheruka kubera mu Karere ka Musanze byamaze iminsi itanu bigahuza abo mu nzego zinyuranye bafite aho bahuriye n’iterambere ry’ubworozi bw’amafi mu Rwanda, bahawe umukoro wo gukangurira ba rushimusi kwitandukanya nabwo, bakayoboka uburyo bwo gukorera hamwe n’abandi mu makoperative kuko ariho baboneramo urubuga rwo gukora uburobyi bw’umwuga butanangiza n’ibidukikije.

Mu kugaragariza abaturage ububi bw’ibiyobyabwenge bimwe mu byafatiwe ahantu hatandukanye byamenewe mu ruhame

Muri aka Karere cyane cyane mu gice cy’Imirenge ikora ku mupaka uhuza u Rwanda na Uganda, abaturage baho, ngo ibiyobyabwenge bikomeje kuzengereza imiryango y’ababyishoramo.

Isimbi Celestine wo mu Murenge wa Cyanika agira ati: “Mu babyishoramo barimo n’abagabo bajya kubinywa mu tubari, bikabasindisha bagata umurongo bagahinduka nk’abatamutwe. Bagera mu ngo bakabuza abantu amahoro, ingo zigasenyuka, hakaba n’izibayeho mu manegeka y’imibanire, kubera ko biba byarabateye gutana”.

Inzego z’umutekano zirimo Polisi na RIB zikorerwa mu Murenge wa Cyanika n’indi Mirenge byegeranye yo mu gice cy’amakoro, zigaragaza ko gukoresha ibiyobyabwenge binyuze mu kubitunda, kubinywa cyangwa kubicuruza, uretse kuba ari icyaha gihanwa n’amategeko, binafite ibindi byaha bibishamikiyeho.

Muri byo ni nk’icyo cyo guhoza ku nkeke, gukubita no gukomeretsa ku bushake, ibikangisho bigamije kugirira undi nabi, ubushoreke, gusesagura umutungo mu buryo butumvikanyweho hiyongereyeho no kwica; cyane ko uwabinyweye nta bundi bwenge mu mitekerereze aba agifite.

Kagaba Jean Baptiste, Umuyobozi w’Ishami ry’Imiyoborere myiza mu Karere ka Burera, yagize ati: “Ababikorera muri ibyo bihugu birimo na Uganda bo ntibabinywa kuko baba bazi neza ububi n’ingaruka zabyo ku buzima. Ababitundayo, ababicuruza n’ababinywa nibamenye ko uretse no koreka ubuzima bwabo baba boreka n’ubw’abandi”.

“Ababifatirwamo barabyamburwa kandi bagafungwa, imiryango igasigara mu bihombo, ugasanga ari rwa rugo ruhora mu makimbirane n’intonganya, batishyura mituweri, batarihira abana amashuri n’ibindi. Abaturage nibamenye ko hari andi mahirwe menshi y’imirimo n’ayo kwaka inguzanyo ziciriritse ahari, bakwiye kuyoboka bagakora imirimo yunguka ibyo bikorwa bigayitse kandi bitemewe bakabihagarika”.

Mu myaka itatu ishize, mu madosiye yakiriwe na RIB ikorera mu Murenge wa Cyanika n’iy’agace k’amakoro, bigaragara ko mu byaha bifitanye isano n’ibiyobyabwenge, ibishingiye ku gutunda, gucuruza no kunywa Kanyanga byari byihariye 65%.

Icyakora ngo iyi mibare igenda igabanuka, ahanini bishingiye ku kuba abaturage bagenda bumva uruhare rwabo mu kubikumira, ariko na bacye bagitsimbaraye ku kubyishoramo babishakiramo amaramuko, bagaragazwa nk’abakwiye kuva muri ubwo buyobe.

Mu bukangurambaga bugamije kugaragaza ububi bwo kwambukiranya umupaka mu buryo butemewe n’amategeko, inzego zishinzwe umutekano ndetse n’ubuyobozi muri Burera basabye abaturage kwitwararika bakirinda kubyishoramo

Bamwe mu bakora Ubufozi, ngo babiterwa no kutagira amikoro ahagije yo kugira ibindi bakora, ikaba imwe mu mpamvu ituma budacika burundu.

Uwamungu Erica agira ati: “Abenshi mu babwishoramo ni ababa barabuze akazi cyangwa igishoro gifatika cy’ubucuruzi bagahitamo kujya bambukiranya umupaka uhuza u Rwanda na Uganda mu buryo butemewe, bakajya kurangurayo ibyo bazana gucururiza inaha”.

Akomeza agira ati “Hari n’abambutsa abantu baba bagiye Uganda cyangwa bavayo batagira ibyangombwa bibambutsa ku mupaka, cyangwa baba batwaye imari batifuza gusorera. Abo babaha udufaranga bifashisha mu kwikenura no gutunga ingo, byahurirana no kuba nta yindi mikorere bafite, bakiyemeza kubyishoramo bagira ngo babone amaramuko”.

Abaturage bagaragarijwe ububi bwo kwishora mu bikorwa by’Ubufozi

Ubufozi bufatwa nka bumwe mu bikorwa bitiza umurindi ikibazo cy’icuruzwa ry’abantu, kuko nko mu bambutswa banyuzwa muri izo nzira bajya muri Uganda, barimo n’ababa bijejweyo akazi n’ibindi bikorwa bibyara amafaranga; nyamara hari abagerayo bakisanga bashowe mu bifitanye isano n’icuruzwa ry’abantu.

Mu bukangurambaga bugamije gukangurira abaturage gukumira icuruzwa ry’abantu, bwateguwe n’Umuryango Nyarwanda utegamiye kuri Leta, ukorana na Never Again Rwanda, witwa Mukamira Community Base Organization (MCBO), ufasha abaturage n’abayobozi gushyira mu bikorwa gahunda za Leta no kwesa imihigo; iki kibazo cyagaragajwe nk’ikibangamiye iterambere, abaturage basabwa kugira uruhare rufatika mu kugikumira.

Mategeko Safia, umuyobozi w’uyu muryango, agira ati: “Twatangiye uburyo bwo gukorana bya hafi n’abantu biyemeje kwitandukanya n’Ubufozi binyuze mu matsinda bahuriramo, aho tubasura kenshi tubigisha ububi bwabwo, tubakangurira kwitabira ubucuruzi bwemewe, aho bishoboka tukabubakira ubushobozi mu buryo buciriritse. Ibyo bibafasha kwifasha bakabaho batarangamiye iyo mirimo itemewe”.

Hari abavuga ko ibura ry’amikoro y’imibereho kuri bamwe, bituma badacika ku ngeso y’Ubufozi

Itegeko ry’Umuryango w’Ibihugu byo mu Karere ka Afurika y’Iburasirazuba n’u Rwanda rugenderaho, mu ngingo yaryo y’199 ivuga ko iyo ibicuruzwa bya magendu bifashwe, bitezwa cyamunara.

Mu ngingo ya 87 y’Itegeko Numero 026/2019 ryo kuwa 18 Nzeri 2019 rigena uburyo bw’isoresha, iteganya ko umuntu wese ugambiriye kutishyura umusoro, ukoze igikorwa cyo guhisha ibicuruzwa bisoreshwa cyangwa imitungo ifitanye isano n’ubucuruzi aba akoze icyaha cyo kunyereza umusoro.

Iyo agihamijwe n’Urukiko, ahanishwa igifungo kitari munsi y’imyaka ibiri ariko kitarengeje imyaka itanu.

Kagaba Jean Baptiste, Umuyobozi w’Ishami ry’Imiyoborere myiza mu Karere ka Burera, avuga ko ari ingenzi kwitwararika aya mategeko.

Amafaranga make bakorera mu Bufozi ari mu bituma budacika burundu

Ati: “Dukangurira abaturage gutunga indangamuntu cyangwa ibindi byangombwa byifashishwa mu kwambukiranya imipaka nka Passport cyangwa Laissez passer, bajya bakoresha mu ku mipaka yemewe, kuko n’iyo baramutse bagize nk’ikibazo aho baba bagiriye urugendo byorohera inzego zibishinzwe kugikemura”.

Amafaranga make bakorera mu kubambutsa ari mu bituma Ubufozi budacika burundu. Ni mu gihe ubuyobozi bwo busaba ababukora kubucikaho mu kwirinda kugongana n’amategeko bibakururira ibihano.

Abaturage bo mu Karere ka Burera, bakunze kunyura inzira za panya batunda ibicuruzwa bya magendu n’abazambukirizamo abajya cyangwa abava muri Uganda mu buryo butemewe n’amategeko bitwa ‘Abafoozi’, ngo babyishoramo bitewe n’uko nta bundi buryo buborohera baboneramo amaramuko.

Ni umuhanda uzarangira utwaye Miliyari 96 z’amafaranga y’u Rwanda

Ni umuhanda ureshya na Kirometero 63, watangiye gutunganywa guhera mu Kwakira 2022, ukaba uzakorwa mu gihe cy’imyaka itatu.

Mu bice bitandukanye by’imirenge igize Akarere ka Burera unyuramo, dore ko ahenshi ari n’imisozi miremire ikora ku kiyaga cya Burera, hagaragara imashini n’imodoka rutura ziri mu bikorwa byo kuwutunganya.

Sekanyambo Ildephonse agira ati: “Twarahingaga tukabura uko tugeza umusaruro ku isoko ukaduheraho cyangwa bikaba ngombwa ko tuwugurisha kuri macye kubera ko umuhanda nta modoka zihagije zabashaga kuwugendamo. Kuba bari kuwudukorera, ni igihamya cy’uburyo Perezida wacu Paul Kagame yadukuye ku karubanda, tukaba tugiye kujya tugenderanirana nta kidukoma mu rugendo”.

Uyu muhanda ureshya n’ibirometero 63 uzakorwa mu gihe cy’imyaka itatu

Kuri bamwe ngo bakurikije ukuntu mbere hagiye habaho kuwutunganya ukagenda usubikwa bya hato na hato, nta cyizere bari bakigifite cy’uko uzakorwa.

Ni umuhanda uri gukorwa na Kampani ebyiri zizobereye muri ibyo bikorwa zishyize hamwe, harimo iy’inyarwanda izwi nka NPD ndetse n’iyo mu gihugu cy’u Bushinwa izwi nka CRBC.
Imirimo igeze kuri 35% ishyirwa mu bikorwa, kandi kugira ngo irusheho kwihuta abari kuwukora bahereye ku gice gituruka Base cyerekeza Butaro, n’ikindi gituruka Kidaho kigana Butaro.

Ubu hari kubakwa ibiraro, kongera ubugari bwawo; kandi nk’uko byemezwa na Muneza Kamuhanda Thierry uhagarariye ibikorwa byo kuwubaka, ngo akurikije imiterere y’aka gace n’imbaraga zishyizwe mu kuwutunganya, yaba mu bijyanye n’ibikoresho ndetse n’amafaranga, ngo nta kabuza igihe Leta y’u Rwanda yihaye cyo kuba wamaze gukorwa bizagerwaho.

Agira ati: “Igice kinini cy’aho unyuze cyegereye ikiyaga kandi hagaragara ibitare n’ibibuye binini cyane bidusaba gukoresha ubuhanga mu kubimena kugira ngo haboneke aho wagukira. Mu by’ukuri twakwizeza abantu ko igihe twihaye gikubiye no mu masezerano kigena ko muri 2025 uzaba wamaze gukorwa tuzacyubahiriza.

Ikizaba gisigaye ni imirimo yanyuma yawo yo kuwukikizaho ibiti, amatara, za ruhurura zimanura amazi ahabugenewe kandi nabyo dutekereza ko bitazarenza nk’andi mezi atandatu azaba akurikiyeho”.

Uzuzura utwaye Miliyari 96 z’amafaranga y’u Rwanda. Yaba abaturage ndetse n’ubuyobozi bw’aka Karere bishimira ko imvugo ya Perezida wa Repubulika Paul Kagame ari ingiro. Ngo icyo bazamwitura ni ugukora ibishoboka bawubungabunga kugira ngo uzarambe.

Mukamana Soline, uyobora Akarere ka Burera agira ati: “Ukurikije ahantu uyu muhanda uri, bigaragara ko uri hagati mu buryo bworoheye abaturage benshi. Twumvikanye na ba rwiyemezamirimo barimo kuwutunganya, ko muri kino gihe cy’impeshyi turimo, bazaba bamaze gutunganya iby’ibanze nka za rigore, kuwutsindagira neza n’ibindi bizoroshya kugendeka neza; ku buryo bizagera ku gihe twihaye warangiye urimo na kaburimbo.

Mu birimo gukorwa harimo no kuhashyira ibiraro

Ntiwakwiyumvisha uburyo tunyotewe umuhanda wa kaburimbo, kandi tuwutegerezanyije ubwuzu n’amatsiko menshi”.

Ku bijyanye no kwimura abari batuye n’abafite ibikorwa mu bice unyuzemo bya Base-Butaro-Kidaho, abaturage bagiye bishyurwa na bacye muri bo basigaye, ibijyanye n’ingurane zabo biri kugana ku musozo, ku buryo mu gihe cya vuba bazaba bazihawe.

Abanyamuryango ba FPR-Inkotanyi bishimiye intsinzi ya Perezida Kagame biyemeza kutazamutenguha

Ibi babigarutseho mu gikorwa bateguye, cyabaye kuwa Gatandatu tariki 3 Kanama 2024, cyo kwishimira intsinzi, nyuma y’uko uwari umukandida w’Umuryango FPR-Inkotanyi ku mwanya wa Perezida wa Repubulika yegukanye uwo mwanya hamwe n’abagize Inteko Ishinga Amategeko, Umutwe w’Abadepite.

Umurisa Gisele yagize ati: “Muri iyi manda y’imyaka itanu umukuru w’Igihugu cyacu akaba na Chairman wa FPR-Inkotanyi agiye kumara ayobora Igihugu cyacu, twishimiye ko ariwe tuzakomezanya mu rugamba rukomeye rwo kuzamura imibereho myiza y’Abanyarwanda mu nkingi zose ubuzima bw’abaturage bwubakiyeho”.

Abanyamuryango ba RPF Inkotanyi biyemeje ko muri iyi myaka itanu ya Manda ikurikiyeho batazigera batenguha Paul Kagame

Akomeza agira ati, “Uburyo yatuyoboyemo mu myaka ishize, akatugeza ku iterambere ryihuse, agahindura imibereho mibi Abanyarwanda twarimo akatugeze mu byiza, byaduteye kumushyigikira kuko twabonaga aberewe no kubikomerezaho dufatanyije na we. Twe rero nk’Abanyamuryango ba FPR-Inkotanyi, turamushyigikiye kandi intero ni ukutazamutenguha tudatatanye ahubwo twunze ubumwe, kandi imvugo ye ikaba ariyo ngiro”.

Bagendeye ku byo Akarere ka Burera kamaze kugeraho muri manda zitambutse, Umukuru w’Igihugu Paul Kagame yayoboye, muri aka Karere ka Burera, Abanyamuryango ba FPR-Inkotanyi bazarushaho gushyira imbaraga mu buhinzi n’ubworozi bikozwe kijyambere, guhanga imirimo ishingiye ku ikoranabuhanga n’ibindi bikorwa bizamura byihuse imibereho kandi baharanire kurinda ibyo bagezeho.

Chairperson wa RPF Inkotanyi mu Karere ka Burera Mukamana Soline, avuga ko bazubakira ku bumwe n’ubufatanye kugirango intego z’uyu muryango zigerweho

Chairperson w’Umuryango FPR-Inkotanyi mu Karere ka Burera, Mukamana Soline avuga ko uhereye ku myiteguro na gahunda nyirizina yo guhitamo Umukandida w’Umuryango FPR-Inkotanyi ku mwanya wa Perezida wa Repubulika kuva ku rwego rw’Umudugudu kugeza ku rwego rw’aka Karere, ibikorwa byo kwamamaza umukandida ku mwanya wa Perezida ndetse n’Abadepite bakomoka muri uyu Muryango ndetse n’amatora nyirizina, Abanyamuryango ba FPR-Inkotanyi babyitwayemo neza.

Ati: “Mu kwitegura ibyo bikorwa byose no kubishyira mu bikorwa byadusabaga kujya inama kenshi tunonosora uburyo ki tubikoramo, hagakurikiraho guhuza amaboko kugira ngo bigende neza. Ubwo bumwe n’imbaraga twahurije hamwe nk’Abanyamuryango ba FPR-Inkotanyi n’abaturage muri rusange, turasabwa guhagurukana ibakwe n’imbaraga tukabikomerezaho, kugira ngo ibyo Perezida Paul Kagame yiyemeje kugeza ku Banyarwanda azabitugezeho. Abanyaburera turiteguye, dufite ubushake, imbaraga n’ubumenyi cyane ko tubitewemo umuhate n’uko imvugo ya Perezida Kagame ihora ariyo ngiro”.

Mu kwishimira Intsinzi ya FPR-Inkotanyi, Abanyamuryango bayo bo mu Karere ka Burera barasabanye banacinya akadiho

Ngo ibanga bazakoresha harimo gutahiriza umugozi umwe, birinda umuntu wese wabameneramo agamije kubahungabanya. Kubaka umuryango ushoboye kandi utekanye, basanga biri mu bizoroshya kandi bikihutisha intego zose bihaye, n’ibyo Igihugu cyifuza ko bagiramo uruhare.

Mu matora aherutse ya Perezida wa Repubulika, Paul Kagame wiyamamaje nk’umukandida w’Umuryango FPR-Inkotanyi yegukanye amajwi 99,18%, uyu Muryango kandi ukaba waregukanye imyanya 37 mu matora y’Abadepite.

Aborozi b’amatungo bifuza kwegerezwa hafi ibiryo by’amatungo

Ibi bikomeje kugira ingaruka zo kuba abitabira ubworozi baba bacye ugereranyije n’abakabaye babuyoboka, ku bwo gutinya ikiguzi cyabyo kiri hejuru n’ingendo bakora bajya kubishaka mu tundi Turere tutahegereye.

Twizerimana Jackson, umworozi wororera inkoko ibihumbi bitatu mu Karere ka Burera, agaruka ku ngorane baterwa no kuba ibiryo by’amatungo babibona bigoranye, yagize ati: “Tubibona bitugoye kubera ko inaha hataba inganda zibitunganya, tukaba tutanafite abacuruzi babyo batwegereye. N’aho biba biri usanga ibyinshi ari ibyo bagiye bavangavangamo itaka bagira ngo biremere, branda yaboze, indagara n’ibihwagari bicyeya, ibyarengeje igihe wabigaburira inkoko ntikure ahubwo inyinshi zikanapfa”.

Kubona ibiryo by’amatungo hafi biracyababera imbogamizi

Uyu mworozi ufite inzu ishobora kororerwamo inkoko zisaga ibihumbi 10, igice kinini cyayo nta bworozi akoreramo kuko izarimo yahisemo kuzimurira mu Karere ka Rulindo, bitewe n’uko kuzibonera ibyo kuzigaburira byamugoraga.

Iki kibazo agisangiye n’aborora amafi barimo abagize Koperative yitwa Isugi, ikorera ubworozi bw’amafi mu byuzi byo muri kareremba mu Murenge wa Kinoni.

Uyiringiye Odette ukuriye iyi Koperative, agira ati: “Ibiryo by’amafi biraduhenda cyane bitewe n’uko biba byaturutse kure. Ibyo tuyagaburira biva mu Karere ka Nyanza. Ugereranyije n’ahangaha ni urugendo rurerure cyane. Turamutse tubonye inganda cyangwa abacuruzi babyo inaha tukajya tubigurira hafi umusaruro w’amafi warushaho kwiyongera”.

Ibyo bagaburira amatungo ibyinshi babikura mu Turere twa kure kubera ko nta nganda zibitunganya zibegereye

Uruganda rumwe rukumbi rwitwa Indintambwe Feed Ltd, nabwo kandi rucyiyubaka ugereranyije n’ingano y’ibiryo rutunganya n’ibyo aborozi bakenera mu kugaburira amatungo nirwo rubarizwa muri aka Karere.

Nshutiyimana Jean Bosco nyiri urwo ruganda rukorera mu Murenge wa Rugarama, avuga ko bahereye ku gutunganya ibiryo by’inkoko n’ingurube byonyine, kuko uruganda rukiri mu nzira yo kwiyubaka mu bijyanye n’ibikoresho nk’imashini zimwe na zimwe zifashishwa mu gutunganya ubwoko butandukanye bw’ibiryo bataragira.

Umuyobozi w’Akarere ka Burera wungirije ushinzwe imibereho myiza y’abaturage Mwanangu Théophile, avuga ko bari gushyira imbaraga mu gukorana n’abashoramari, bareba ko hazaboneka abitabira gushinga inganda cyangwa abacuruzi bajya babihazana bikorohera aborozi kubibonera hafi.

Uruganda rutunganya ibiryo by’amatungo ruhari narwo ruri ku rwego ruciriritse

Ati: “Uko tugenda dukora igenamigambi ryaba iry’igihe kirekire n’iry’igihe gitoya ni nako turi gutekereza uburyo twashyira imbaraga mu kureshya abashoramari na PSF muri gahunda zizamura ubworozi. No ku nganda zitunganya ibiryo by’amatungo naho twizeza abaturage ko batazatinda kubona ahabegereye bajya babibonera, bityo n’umusaruro ubukomokaho uzarusheho kuzamuka no kubagirira akamaro”.

Uretse urwo ruganda rumwe rutunganya ibiryo by’amatungo rubikwirakwiza muri bacye mu borozi baho, abenshi babikura mu Mujyi wa Kigali, mu Karere ka Nyanza cyangwa mu Karere ka Rulindo.

Ibiryo by’amafi birabahenda cyane bitewe n’uko biba byaturutse kure

Koperative yitwa Isugi, ikorera ubworozi bw’amafi mu byuzi byo muri kareremba

Imiryango 48 y’abana bafite ubumuga bukomatanyije igiye kunganirwa mu biyifasha kubitaho

Sindiheba Théogène, ni umwe mu babyeyi bo mu Karere ka Musanze, ugaruka ku nzitizi bamwe mu babyeyi b’abana bafite ubumuga bukomatanyije bagihura nazo, biturutse ku magambo ashaririye kandi atesha agaciro abo bana, bakunze kubwirwa na bamwe mu bo mu miryango, inshuti cyangwa abaturanyi.

Yagize ati: “Hari abakoresha imvugo mbi n’amagambo ambabaza umutima kuri uwo mwana wanjye, bagerageza kunyumvisha buryo ki ubumuga afite yabutewe n’ibyo mu miryango y’iwacu cyangwa ku mugore wanjye, ko adateze kuzakura ngo avemo umuntu wakwigirira umumaro, ko ntakagombye kuba nirushya mwitaho”.

Mukamana Assoumpta na we, ni umubyeyi w’umwana w’imyaka umunani, wavutse afite ubumuga bukomatanyije.

Ababyeyi babarizwa muri iyi miyango babanje guhurizwa hamwe mu biganiro byamaze iminsi itatu

Yagize ati: “Hari ababona uburyo mba mwitaho muheka, muterura, mugaburira cyangwa muhanagura mu gihe yiyanduje dore ko nta kintu na kimwe abasha kwikorera we ubwe, ntibatinye no kumbwira ko yakabaye yarapfuye ntakomeze kungora. Hari n’abambwira ko iyo aza kuba ari uwabo, baba baramwinigiye akabavira mu nzira. Urumva amagambo nk’ayongayo ababaje gutyo, iyo uyabwiwe aragushengura akagukomeretsa ku mutima”.

Benshi mu babyeyi b’abana bafite ubumuga bukomatanyije, ntibiba biboroheye kugira indi mirimo bakora, bitewe n’uko igihe kinini bagikoresha bita kuri abo bana; icyakora ngo hari abakirangwa n’imyumvire ivutsa bamwe muri abo bana uburenganzira ku burezi, ubuvuzi, kubafata nabi babakingirana mu nzu, kubaha akato n’ibindi.

Mu rwego rwo gufasha imiryango gutandukana n’ibikibangamiye imibereho myiza y’abo bana, imiryango 48 yo mu Mirenge irimo uwa Muhoza, Cyuve, Busogo na Musanze, igiye kumara imyaka itatu yunganirwa mu bikorwa bizafasha abana bayikomokamo bafite ubumuga bukomatanyije, hagamijwe ko bagira ubuzima bwiza no kurengera uburenganzira bwabo.

Ibi biganiro bihuza abagize imiryango y’abana bafite ubumuga ngo basangire ubuhamya bibafasha kudaheranwa n’ibikomere

Ku ikubitiro ababyeyi bayibarizwamo babanje guhurizwa hamwe mu biganiro byamaze iminsi itatu, bisozwa kuwa Gatatu tariki 31 Nyakanga 2024, bikaba byari bikubiyemo ubuhamya bugamije gukomezanya hagati yabo; cyane ko abenshi usanga bafite ibikomere byabateraga kumva bihebye no kutakira abana babo.

Bideri Birinda Sylver, umukozi w’umuryango Hope and Homes for Children agira ati: “Abo mu miryango y’abo bana twifuje kubahuriza hamwe, hagamijwe ko basangira ubuhamya bw’ibyababayeho, tugamije ko buri wese yamenya uko undi abayeho mu buzima bwo kwita kuri uwo mwana, n’uko abyitwaramo mu gihe hari amagambo adasanzwe abwiwe kuri we. Ibyo bimufasha kumva akomeye no kwiyumva nk’umuntu utari wenyine; bigatuma yumva akomeye, anyuzwe kandi arushijeho kumva akunze umwana we”.

Yungamo agira ati “Aho niho natwe tuza twunganira wa muryango yaba mu kuvuza umwana, cyangwa tugafasha umuryango we kuzamura ubukungu tugendeye ku byo tubona umuryango ukeneye akaba aribyo tubunganira cyane ko buri wese afite ikibazo gitandukanye n’icya mugenzi we”.

Kayiranga Théobard yakanguriye imiryango y’abana bafite ubumuga bukomatanyije kubarinda ibishobora guhungabanya imibereho y’ahazaza habo

Umuyobozi w’Akarere ka Musanze wungirje ushinzwe imibereho myiza y’abaturage Kayiranga Théobard, akangurira ababyeyi b’abana bafite ubumuga kubyaza umusaruro iyi gahunda, kuko bizafasha abo bana kubaho batekanye.

Ati: “Tugenda tugira ibibazo by’abagifata abana bafite ubumuga bukomatanyije nk’aho atari abantu nk’abandi kugera n’aho mu bashakanye hari uhitamo guta urugo kubera babyaye umwana umeze uko nguko. Hari kandi n’abakibakingirana mu nzu ntibabavuze, ntibanabagaburire uko bikwiye, bikabakomeretsa mu marangamutima yabo no mu buryo bugaragarira amaso. Abana nk’aba ni ngombwa kubagaragariza urukundo rungana n’urwo n’abandi bana bagaragarizwa, kubafasha kugana ishuri n’izindi serivisi z’ibanze bakenera mu buzima bwabo”.

Uko ubushobozi buzagenda buboneka ni nako iyi miryango uko ari 48 iziyongeraho n’indi, cyane ko no mu isesengura ryakoze na Hope and Homes for Children ryagaragaje ko abana bafite ubumuga bukomatanyije bakiri benshi kandi bakeneye kwitabwaho mu buryo bw’umwihariko ndetse buhoraho.

Umuryango Hope and Homes for Children niwo wiyemeje gukurikiranira hafi imibereho y’abo bana

Abaturage bavuga ko guhindura imyumvire bitabira gukoresha amafunguro arimo n’ibikomoka ku matungo magufi bibafasha guhangana n’imirire mibi

Abiganjemo abagabo, mbere batarigishwa umumaro w’ibigize ibyo biribwa, nk’amagi, inyama, indagara; byari bigoye kwitabira ubworozi bw’amatungo bikomokaho. Ngo n’ababwitabiraga wasangaga ahanini umusaruro w’ibibuturukaho barawumariraga ku isoko, mu miryango bagasigarira aho.

Buregeya Emmanuel, abana be babiri bigeze kugira ibibazo by’imirire mibi, ariko nyuma aza kujya abagaburira amafunguro ahagije, hiyongereyeho amafi, akabisimburanya n’isambaza cyangwa indagara, bifasha abana be gukira.

Ati: “Abo bana bombi barwaye bwaki icyarimwe, bitewe n’uko tutitaga ku kubagaburira iby’ingenzi mu gutunga umubiri. Najyaga ndoba nk’isambaza cyangwa ifi, singire n’agatanyu mpingutsa mu rugo ahubwo nkabimarira ku isoko. N’inkoko nari noroye amagi yose naragurisha mu rugo bagahora barya indyo idashyitse”.

Akaomeza agira ati “Nyuma y’uko ’Orora Wihaze’ idukanguriye kujya twihaza ku bikomoka ku matungo magufi mu mafunguro dutegura mu muryango, nitabiriye kujya nyagira mu y’ibanze turya. Ubu isambaza, amafi, indagara, amagi n’ibindi bikomoka ku matungo nkoresha uko nshoboye mu mafunguro, tukagira bimwe muri byo cyangwa bibiri dufatamo, ubu abana banjye bavuye mu mirire mibi bafite ubuzima bwiza”.

Amatungo yibandwaho mu Karere ka Burera harimo inkoko, ingurube, ihene, intama n’amafi

Ibipimo bya DHS byari bigamije kugaragaza uko igwingira ry’abana bato rihagaze byo mu mwaka wa 2020, byagaragaje ko Akarere ka Burera kari ku ijanisha rya 41,6%.

Ibi byashyize ku gitutu inzego zifite aho zihuriye no gukumira imirire mibi, hashyirwaho ingamba zitandukanye mu kuyirwanya zirimo n’Umushinga USAID Orora Wihaze, umaze imyaka isaga ine ukorera muri aka Karere, aho wibanda ku kwigisha abaturage uburyo bwo kwita ku bworozi bw’amatungo magufi bayorora kijyambere, kugira ngo bibafashe kongera ingano y’ibiyakomokaho, kubigira iby’ibanze mu mafunguro ya buri munsi, cyane cyane ku bana n’abagore bari mu gihe cyo kubyara.

Mu gihe cy’imyaka isaga ine uwo mushinga umaze ukorera mu Karere ka Burera, Abafashamyumvire mu by’ubworozi b’abakorerabushake n’abaturage bibumbiye mu matsinda bose hamwe babarirwa mu bihumbi 30 nibo bamaze guhabwa izo nyigisho.

Mukawera Marguerite, umukozi wa USAID Orora Wihaze, avuga ko mu buryo butandukanye bagiye bifashisha burimo n’igikoni cy’umudugudu.

Ati: “Iyo ababyeyi bitabiriye Igikoni cy’Umudugudu ntibigiramo guteka no kugabura indyo yuzuye gusa, kuko ahubwo n’ubumenyi umuntu arusha abandi mu bintu runaka bifite icyo byamararira umuryango, yaba nko gutegura ayo mafunguro cyangwa n’uburyo bwo kuyashaka abusangiza abandi, bakaba bamwigiraho. Iyo umuntu yigiye kuri mugenzi we, agera mu rugo na we akabisubiramo, akagera aho abigira nk’umuco yaba ari nko guteka ayo mafunguro yuzuye, bikamufasha gutandukana n’imirire mibi”.

Mu Karere ka Burera ababarirwa mu bihumbi 30 bitezweho kuzaba abamenyekanisha mu bandi akamaro ko korora amatungo magufi no gukoresha ibiyakomokaho mu mafunguro ya buri munsi

Umuyobozi w’Akarere ka Burera wungirije ushinzwe imibereho myiza y’abaturage Mwanangu Théophile, avuga ko urwego abaturage bagezeho bazamura imyumvire mu kwita ku matungo bayagaburira ibikenewe kandi ari nako bifashisha ibiyakomokaho banoza imirire, bitanga icyizere cy’igabanuka ry’ibipimo bizava mu bushakashatsi bwa DHS buzakurikira ubuheruka gukorwa mu mwaka wa 2020.

Mu matungo yibandwaho mu Karere ka Burera, muri iyi gahunda igamije ubworozi no gukoresha ibiyakomokaho mu guhashya imirire mibi banasagurira amasoko harimo inkoko, ingurube, ihene, intama n’amafi.

Uretse ubworozi bukozwe kinyamwuga, abagenerwabikorwa b’iyi gahunda banakanguriwe kumenya amahirwe ari mu guhanga imirimo iciriritse no kwizigama.

Mu moko atandukanye y’ifu y’igikoma aba banyeshuri n’abarimu bakozeho ubushakashatsi, bagiye basanga harimo atihagije ku ntungamubiri zikomoka ku binyamavuta, Vitamini A, Vitamini C, Feri na Karisiyumu.

Niho bahereye bafata ifu y’ibinyampeke abantu basanzwe bakoresha, bigizwe n’Ibigori, Amasaka, Ingano, Soya, Uburo, maze bongeramo ifu y’inzuzi z’ibihaza ndetse na Karoti.

Dr Ndungutse Vedaste wigisha muri UR-CAVM, mu gashami kayo gashinzwe kongerera agaciro ibikomoka ku buhinzi, agira ati: “Kugwingira bigira ingaruka zitagaragarira gusa ku miterere y’umubiri ahubwo no mu mitekerereze. Twabanje kureba intungamubiri zikenewe mu kuzamurira umuntu amahirwe menshi yo kumurinda kugwingira, dushaka ibihingwa zibonekamo, muri byo tuza gusanga inzuzi z’igihaza ndetse na Karoti, bikungahaye ku ntungamubiri nyinshi mu zikenewe”.

“Tumaze kubihuza rero n’indi fu y’ibinyampeke abantu bari basanzwe bakoresha mu guteka igikoma, twaje gusanga icyo gikoma cyongera intungamubiri nyinshi zikenerwa mu kurwanya igwingira kubera ko nk’inzuzi zikungahaye ku binyamavuta, naho Karoti igakungahara kuri Vitamini A na C”.

Dr Lamin S. Kassama wigisha muri Alabama Agriculture and Mechanical University, na we yungamo agira ati: “Igwingira ni ikibazo gihangayikishije atari mu Rwanda gusa, ahubwo no mu bindi bihugu. Ni ngombwa ko abantu basobanukirwa neza ko kurwanya imirire mibi n’igwingira bidasaba ibintu bya mirenge. Iyo umuntu yamaze gusobanukirwa ko ari urugamba rumureba bimuhereyeho, arashishoza agahera ku mahirwe amukikije, aho bishoboka agahanga imirimo mito mitoya yamwunganira kwihaza mu biribwa”.

“Twashyize imbaraga muri ubu bufatanye duhuje amaboko, ibitekerezo n’ubunararibonye buri wese afite, mu kureba uko duhashya imirire mibi n’igwingira kuko abenshi mu bo cyugarije ni abana batoya”.

Abaturage bo mu Murenge wa Kimonyi, nyuma yo kwerekwa uburyo bwo kuvanga iyo fu no guteka igikoma cyayo; mu kukinywaho ngo bumvise gifite umwihariko w’uburyohe budasanzwe ugereranyije n’igikoma gisanzwe bari bamenyereye; bakaba bishimiye kuba bungutse andi mahirwe aborohereza guhashya imirire mibi n’igwingira byari bibahangayikishije.

Ubufatanye buhuriweho n’izi Kaminuza zombi, zibwibanzeho muri gahunda yiswe “Kaminuza Iwacu”.

Ku ruhande rw’ubuyobozi nk’uko Umunyamabanga Nshingwabikorwa w’Umurenge wa Kimonyi Mukasano Gaudense abihamya, ngo ni imwe mu nkingi izunganira imiryango guhashya imirire mibi.

Ati: “Nko mu Murenge wa Kimonyi wonyine, muri gahunda yo gupima abana imikurire, ibipimo biheruka byagaragaje ko dufite abana 12, biganjemo abari mu ibara ry’umuhondo n’ibara ritukura. Kuba twungutse ubundi buryo bwo guhashya imirire mibi buje bwiyongera ku bwo dusanzwe dufatanyamo n’abaturage, biradufasha ko n’abari bakiyirimo kuyivamo byihuse”.

Kuri ubu UR-CAVM na Alabama Agriculture and Mechanical University, zikomeje kwigisha abaturage uko bajya bayitunganya ikaba yanashyirwa ku isoko, bikorohera abakeneye kuyigura.

Imirambo ine y’abari bagishakishwa nyuma yo kugwirwa n’ikirombe yakuwemo 

Ibikorwa byo gushakisha uko imirambo y’abo bantu ikurwamo, byatangiye mu masaha y’igicamunsi cyo ku wa gatatu tariki 24 Nyakanga 2024, nyuma y’uko bimenyekanye ko cyari kimaze kubagwira bo n’abandi bari kumwe, ubwo barimo bagicukuramo amabuye y’agaciro ya Gasegereti mu buryo butemewe n’amategeko.

Ku ikubitiro abantu bane barimo batatu bari bakomeretse n’umwe wari wapfuye inzego zishinzwe umutekano zifatanyije n’abaturage zabakuyemo, bajyanwa ku bitaro bya Rutongo, bikurikirwa n’igikorwa cyo gushakisha uko n’abandi bari basigayemo na bo bagikurwamo, aho mu masaha y’igitondo cyo kuri uyu wa Gatanu tariki 26 Nyakanga 2024, aribwo bakuwemo ariko baramaze gupfa.

Umunyamabanga nshingwabikorwa w’umusigire w’Umurenge wa Kinzuzi, Benda Théophile, yagize ati: “Bose twabakuyemo, mu masaha ya mugitondo icyo gikorwa nibwo twari tugisoje. Imirambo yabo yahise ijyanwa ku bitaro bya Rutongo ngo ikorerwe isuzumwa mbere y’uko ishyingurwa”.

Yakomeje avuga ko “Mu bantu bose uko ari umunani cyagwiriye ubwo barimo bagicukuramo amabuye y’agaciro, batanu nibo bapfuye abandi batatu barakomereka, ubu bari kwitabwaho n’abaganga”.

Ikirombe bacukuragamo amabuye y’agaciro mu buryo bwo kwiyiba, kimaze igihe cyarahagaritswe gukorerwamo ubucukuzi. Ibikorwa by’ubutabazi ku bari bagisigayemo, bisa n’ibyatwaye imbaraga nyinshi n’amasaha menshi bitewe n’imiterere yacyo kuko gisanzwe gikikijwe n’amabuye ya rutura ari nayo yabaridukiye akabahirimaho ubwo bari bakirimo. 

Umuvugizi wa Polisi y’u Rwanda mu Ntara y’Amajyaruguru SP Jean Bosco Mwiseneza, mu kiganiro kigufi aherutse kugirana n’umunyamakuru wa Kigali Today, ubwo yakomozaga kuri iyi mpanuka, yahamagariye abaturage kwirinda ubucukuzi bw’amabuye y’agaciro bukorwa mu buryo bunyuranyije n’amategeko, kuko butwara ubuzima, bukangiza ibidukikije n’ibikorwa remezo, kandi bukaba bushamikiraho ibindi byaha by’urugomo rukunze gukorwa n’ababukora mu buryo butemewe.

Icyo gihe yavuze ko abaturage bakwiye kwita ku gutungira agatoki inzego zishinzwe umutekano hakiri kare, mu gihe hari uwo babonye yishora mu bucukuzi bw’amabuye y’agaciro bunyuranyije n’amategeko kugira ngo bafatwe bukumirwe butarateza ingaruka.

Mu Karere ka Rulindo abantu umunani baridukiwe n’ikirombe, batatu bagipfiramo harimo n’abagishakishwa

Mu ma saa saba y’igicamunsi cyo kuri uyu wa gatatu tariki 24 Nyakanga 2024, nibwo byamenyekanye ko abo bantu baridukiwe n’ikirombe giherereye mu Mudugudu wa Kamatongo mu Kagari ka Budakiranya mu Murenge wa Cyinzuzi mu Karere ka Rulindo, bacukuragamo amabuye y’agaciro mu buryo butemewe n’amategeko.

Ubwo byamenyekanaga ko kibaridukiye, babiri bahise bakurwamo bakiri bazima ariko bakomeretse bajyanwa kwa muganga, mu gihe abandi bo barimo n’umuntu umwe wari ugihumeka, byageze mu masaha y’umugoroba batarakurwamo.

Ni amakuru yemejwe n’Umunyamabanga Nshingwabikorwa w’umusigire w’Umurenge wa Kinzuzi, Benda Théophile agira ati: “Bagiye gucukuramo amabuye y’agaciro ya Gasegereti mu buryo bwo kwiyiba, kuko ari ahantu h’umuringoti hari harahagaritswe gucukurwamo. Mu gucokoza amabuye akikije uwo muringoti rero, yahise abaridukira bibagwaho”.

Yakomeje agira ati “Kugeza ubu babiri muri bo nibo bamaze gukurwamo bakomeretse bajyanwa kwa muganga, undi umwe turacyakora ubutabazi bwo kureba uko tumukuramo kuko yahagamye mu mabuye, ariko aracyabasha kuvuga, mu gihe abandi batatu ducyeka ko bahise bapfiramo abandi babiri bo ntituramenya irengero ryabo kuko ntibagaragara ariko amakuru dufite ni uko na bo bakirimo imbere. Turacyashakisha uko bose bakurwamo”.

Ikirombe bacukuragamo amabuye y’agaciro, cyahoze gikorerwamo ubucukuzi kuva na cyera ku bw’abakoloni, nyuma kiza guharikwa.

Uyu muyobozi akangurira abaturage kwirinda gukora ubucukuzi butemewe. Ati: “Ubucukuzi nk’ubwo bakwiye kubwirinda kuko bushyira ubuzima bwabo mu kaga biturutse ku kuba buba bwakozwe hatabanje kubaho ubugenzuzi bwa gihanga mu gucukura. Kenshi havamo imfu cyangwa n’uzirokotse bikamusigira ubumuga. Tubagira inama yo gushaka akazi ahantu hemewe, kuko ho haba hari uburyo butandukanye bwateganyijwe bwo kwerekera abantu uko bacukura mu buryo bugezweho kandi bubarinda impanuka”.

Abagwiriwe n’ikirombe bose ni abagabo. Uretse abo babiri bagikuwemo abandi haracyakorwa ubutabazi bwo kubavanamo.

Abacuruzi bari kongererwa ubumenyi mu guhanga imishinga irengera ibidukikije

Abafite ibigo bito by’ubucuruzi bagera kuri 60 bahagarariye abandi bo mu Ntara y’Amajyaruguru, ku ikubitiro nibo batangiriweho n’iyi gahunda, kandi bazakomeza gukurikiranirwa hafi kugeza ku rwego bo ubwabo bazaba babasha kwikorera imishinga inoze, ku buryo yanabafungurira amahirwe yo gukorana n’ibigo by’imari, bakagira ishoramari riteye imbere.

Benihirwe Marie Claire, impuguke mu bijyanye no guhanga imishinga igamije kubungabunga ibidukikije, asobanura ko ishoramari ryunguka rishobora gukorwa hibanzwe ku kubungabunga ibidukikije bigafasha kugabanya ingaruka zikigaragara, zikomoka ku mihindagurikire y’ibihe.

Ati: “Ibiza bikunze kubaho biturutse ku mvura nyinshi, cyangwa izuba riva ryinshi rigateza amapfa, bigira ingaruka ku bidukikije bidasize n’ubuzima bw’abantu. Hatabayeho guhaguruka bigizwemo uruhare n’ingeri zose z’abafite ibikorwa bakora barimo n’abacuruzi, ngo bashyireho akabo mu kwibanda mu mikorere iganisha mu kubungabunga ikirere n’ibidukikije, dushobora kwisanga tutagishoboye gukumira izo ngaruka ari nayo mpamvu y’ibi biganiro bigamije kwereka abacuruzi amahirwe abakikije bashobora guheraho, bakayabyaza imishinga iganisha ku kurengera ibidukikije”.

Abacuruzi beretswe uburyo ishoramari rikozwe hitawe ku kubungabunga ibidukikije ryafasha mu kugabanya ingaruka zikomoka ku mihindagurikire y’ibihe

Deus Kayitakirwa uhagarariye Ikigo gishinzwe amahugurwa cyashinzwe n’Urugaga rw’Abikorera (PSF) ari nacyo cyateguye ibi biganiro, agaragaza ko ishoramari ryibanze ku mishinga irengera ibidukikije, mu gihe rinonosowe neza, bitanga amahirwe ku gukorana na Banki cyangwa ibigo by’imari binyuze mu nguzanyo, bakarushaho gukora imishinga yunguka bakiteza imbere.

Mu bongererwa ubwo bumenyi barimo abakora mu rwego rw’ubuhinzi n’ubworozi, ubucukuzi bw’amabuye y’agaciro, abafite inganda zitunganya umusaruro ukomoka ku buhinzi n’ibindi.

Harindimana Valentin ukora muri Kampani itunganyiriza isukari mu Karere ka Gakenke; asanga koko uruhare rwabo rwari rukenewe mu gushyiraho ingamba zifasha kurengera ibidukikije.

Ati: “Iyo dutunganya umushongi dushaka kuwukoramo isukari, tuwucanira ku muriro w’inkwi z’ibiti tuba twatemye mu mashyamba. Uretse kuba twabifata nko kwangiza amashyamba, navuga ko n’ikirere gihumana biturutse ku myotsi y’ibyo tuba ducanira. Muri aya mahugurwa twaje gusanga turamutse dukomeje gukora muri ubwo buryo, bishobora kugira uruhare mu kongera ubushyuhe bw’ikirere, hakaba habaho imihindagurikire y’ikirere ishobora gutuma mu kuva kw’izuba cyangwa kugwa kw’imvura, bibaho ku kigero kitaringaniye bikaba byateza ingaruka”.

Mu Majyaruguru abafite ibigo biciriritse 60 bahagarariye abandi bari kwigishwa uko bakora ishoramari ryibanda ku kurengera ibidukikije

Akomeza agira ati “Tukaba tugiye kureba uko twatangira kwagura umushinga wo gukora amakara mu bisigazwa by’ibituruka ku musaruro cyangwa ibikomoka ku bishingwe byo mu ngo, tubisimbuze uburyo twakoreshaga, mu kwirinda gukomeza kuba ba nyirabayazana w’iyangirika ry’ikirere”.

Mu Rwanda hose abakora ubucuruzi bo mu bigo bitoya 300, ni bo bazigishwa binyuze muri iyi gahunda. Biteganyijwe ko mu mishinga irengera ibidukikije bazamurika, 15 muri yo bizagaragara ko ikozwe mu buryo bunonosoye neza, izaterwa inkunga.

Site zibarirwa mu munani zirimo iziheruka gutunganywa izigitunganywa n’izizakorwa mu minsi iri imbere

Mu Tugari twa Kabeza n’aka Rwebeya mu Murenge wa Cyuve, ni hamwe mu hamaze iminsi hagaragara imashini, ziri mu mirimo yo gusiza ubwo butaka, zihakora imihanda mishya y’ibitaka, nk’ahantu hemejwe kuba site y’imiturire.

Ndagijimana Faustin, umwe mu bahafite ubutaka, agira ati: “Twari tumaze igihe turi mu ihurizo, ry’ukuntu aka gace tuzagaturamo katagira imihanda, hatabasha no kuzagezwa n’ibindi bikorwa remezo nk’amashanyarazi, amazi meza n’ibindi”.

Akomeza agira ati “Nk’umuntu wabaga afite ubutaka bwagutse bubarirwa nko muri metero kare ziri mu bihumbi no kurenzaho, abubarira kuvamo nk’ibibanza bitanu cyangwa binarenzeho, ugasanga bitagerwaho n’umuhanda. Ibyo byateshaga agaciro kabyo, ariko kuba badukoreye iyi mihanda, agaciro kaziyongera ku buryo n’ubutaka bwabarirwaga muri miliyoni nk’umunani, bushobora kugurishwa nka Miliyoni cumi n’ebyiri kugeza kuri cumi n’enye”.

Guhanga imihanda mishya y’ibitaka biri muri gahunda yo kunoza imiturire

Mu Mirenge nka Cyuve, Kimonyi, Gacaca ndetse na Musanze, site z’imiturire zibarirwa mu munani, mu bihe bishize, ni zo zemejwe n’Inama Njyanama y’Akarere mu rwego rwo kunoza igishushanyo mbonera kivuguruye cy’imiturire.

Muri zo harimo izamaze gutunganywa, izigitunganywa ndetse n’izizatunganywa mu minsi iri imbere; aho nibura buri site hahangwa imihanda ireshya n’ibirometero biri hagati ya bitandatu n’icyenda.

Ignace Harerimana, umukozi mu biro bishinzwe ubutaka ku rwego rw’Akarere ka Musanze, ufite mu nshingano ze gukurikirana ibikorwa byo gutunganya ama site.

Uku guhanga imihanda mishya y’ibitaka abaturage babibonamo igisubizo cy’agaciro k’ubutaka bwabo kiyongereye

Agira ati: “Ni gahunda igamije koroshya imiturire hakumirwa ibibazo byakunze kugaragara by’imiturire y’akajagari, byatumaga bamwe nko mu gihe cyo kubaka bagorwa no kubona umuhanda ukora ku butaka bwabo. Rimwe na rimwe hagira nk’ukenera umuhanda, mugenzi we akamushyiraho amananiza y’ikiguzi gihanitse cyangwa akanawumwima. Uku gutunganya imihanda rero dusanga bizaba igisubizo cy’imbogamizi nyinshi abaturage bagiraga, zo kudatura ahujuje ibyangombwa byose nkenerwa bibereye imiturire inoze”.

N’ubwo bamwe bishimira ikorwa ry’iyi mihanda, ku rundi ruhande hari abatanyuzwe n’uburyo ubutaka bwabo bwanyujijwemo imihanda, bagasigarana ubuso buto.

Hari abagabo babiri Kigali Today iherutse gusanga mu Kagari ka Kabeza, ubutaka bubarirwa muri metero kare bihumbi 2 na 400 ababyeyi babo bari barabagabiye hamwe n’abandi bavandimwe babo, babaraga ko buzavamo ibibanza bitanu.

Iyi mihanda mishya y’ibitaka irimo gutunganywa yitezweho kunoza imiturire

Mu gutunganya site buhererehemo, batunguwe no gusanga ubuso hafi ya bwose, bwanyujijwemo imihanda ibiri, ku buryo ubwasagutse bavuga ko butarenza ubuso bw’ikibanza kimwe.

Icyakora ku bwa Harerimana, ngo nta muturage ukwiye kugira impungenge, kuko nyuma yo guca imihanda muri site, biba bigomba gukurikirwa no gushinga imbago nshya hashingiwe ku buso bw’ubutaka buri wese yari ahafite, bigakorwa mu buryo bihura n’ibyo inyigo ndetse n’amabwiriza agenga imiturire ateganya.

Uretse site za Kabeza na Buruba zirimo gutunganywa, hari n’iya Mwidagaduro na Bubandu mu Murenge wa Cyuve ziri hafi gutunganywa, Site iri mu Murenge wa Kimonyi, iya Buhunge, Gakoro na Gaturo zo mu Murenge wa Musanze, na Site ya Kivumu iri mu Murenge wa Gacaca.

Umusore yapfuye nyuma yo kumara icupa ry’inzoga bamutegeye

Mu masaha ashyira ay’umugoroba wo kuwa Gatatu tariki 17 Nyakanga 2024, umugabo w’umuturanyi wa Nahimana yamuhamagaye amusaba kumusanga mu kabari ko mu i Santere ya Gakingo mu Mudugudu wa Kadahenda, ngo amugurire inzoga.

Ubwo yahageraga uwo mugenzi we yamutegeye kumara icupa ry’urwarwa, akirangiza kuyinywa, arataha ageze hafi y’iwabo yitura hasi, mu gutabara basanga yamaze gushiramo umwuka.

Ni amakuru yemejwe n’Umunyamabanga Nshingwabikorwa w’Umurenge wa Shingiro Hanyurwabake Théoneste, agira ati: “Uwo muturanyi we yarimo anywera mu kabari amuhamagara amusaba kuhamusanga ngo amugurire inzoga. Yabaye akihagera aramutegera ngo anywe iyo nzoga yari mu icupa y’urwagwa, amubwira ko nayimara aba ari umugabo. Ubwo rero na we ntiyazuyaje yahise ayinywa ayimaramo. Ubwo yarimo ataha yageze hafi y’iwabo yikubita hasi, abaturage bari hafi aho, bashaka amazi bamusukaho bagerageza kureba ko yazanzamuka kuko bacyekaga ko yagize intege nke zituruka ku kunywa inzoga, mu kumukoraho basanga yamaze gupfa”.

Yakomeje agira ati “Nta wakwemeza niba ari iyo nzoga yamwishe koko cyangwa niba hari ibindi bayongeyemo bikaba intandaro y’urupfu. Mu kugira ngo hakorwe iperereza ryimbitse, RIB yahageze itwara uwo muntu wamusengereraga iyo nzoga cyane ari na we bari bagiranye iyo ntego”.

Kubera ko muri Shingiro nta ntoki zengwamo inzoga y’urwagwa zihaba, inyinshi mu nzoga zinyobwa mu tubari twaho, bajya kuzirangura ahazwi nko muri Vunga mu Karere ka Nyabihu, bakazitunda mu majerekani bakoresheje amagare ndetse n’imodoka.

Bivugwa ko ntawundi muntu mu bari banywereye muri ako kabari Nahimana yarimo, kugeza ubu uragaragaza ikibazo cy’ubuzima kidasanzwe; ndetse ngo bamwe mu bahanyweraga bakimara kumenya ko yapfuye, batinye ko bashobora gushyirwa mu majwi, bahitamo gutoroka ngo badafatwa bagakurikiranwa.

Gitifu Hanyurwabake akangurira abaturage kutishora mu mahiganwa y’ibishobora gushyira ubuzima bwabo mu kaga.

Ati: “Abaturage bakwiye kwitwararika bakirinda kunywa inzoga zitujuje ubuziranenge, bitabira kunywa izizewe kandi bakirinda kurenza urugero, byaba na ngombwa bakaba banazireka. Ni byiza ko abantu bajya babanza gushishoza, bakirinda guha agaciro ababashora mu bikorwa nk’ibyo biba bishobora gushyira ubuzima bwabo mu kaga bikaba byanabambura ubuzima ku bwo kwizezwa ibihembo”.

Benshi mu baturage bari mu rujijo aho batiyumvisha ukuntu icupa rimwe ry’inzoga y’urwagwa ryahitana ubuzima bw’umuntu, ari nayo mpamvu kugeza mu masaha y’igicamunsi cyo kuri uyu wa kane tariki 18 Nyakanga 2024, umurambo wa Nahimana, wari ukiri mu buruhukiro bw’ibitaro bikuru bya Ruhengeri aho wajyanywe gukorerwa isuzumwa.

Bamurikiwe ikiraro cyo mu kirere bitezeho koroshya ubuhahirane

Icyo kiraro cya Satura, kireshya na Metero 130, gihuza Utugari twa Gisizi na Mulinga two mu Murenge wa Mulinga.

Abaturage baho nk’uko babivuga, bari bamaze igihe bagowe n’ingendo zihambukiranya, bitewe n’ukuntu inzira zari zarangiritse, kandi n’ibiraro biciriritse by’ibiti bageragezaga gutinda ngo babone aho bambukira, byasenyukaga bitahamaze kabiri.

Munyampeta Ildephonse agira ati: “Ubuhahirane bwari bumeze nabi. N’ibiti twahoraga dutema mu mashyamba tukabitindaho byangirikaga bitamaze kabiri, ubundi bigatembanwa n’amazi, hakaba ubwo n’abantu bagwamo bagakomereka cyangwa bagasigarana ubumuga”.

Akomeza agira ati “Ikiraro kiri kuri uru rwego kijyanye n’igihe twari tukibabaye kuko aha hantu ari agace kagizwe n’imisozi miremire, ubona ko hakenewe byinshi nka byo. Ubuyobozi bwakitwubakiye ntacyo twabona twabunganya, abaturage twuzuye amashimwe gusa gusa”.

Ni ikiraro cyubatswe hagamijwe kubakura mu bwigunge nk’umwe mu mihigo y’uyu mwaka y’aka Karere.

Abaturage basabwe kukibungabunga

Umuyobozi w’Akarere ka Nyabihu wungirije ushinzwe Iterambere ry’Ubukungu Habanabakize Jean Claude, agira ati: “Akarere kafatanyije n’Ikigo kizobereye mu kubaka ibiraro byo mu kirere Bridges to Prosperity, kuko twifuzaga ko nibura ibibazo abo muri utwo tugari twombi n’utundi byegeranye bikurwaho mu gihe bahahirana”.

Yunzemo agira ati “Kariya gace, gakorerwamo ubuhinzi kandi ni nako hari kugenda hagezwa ibikorwa remezo nk’amashuri, amavuriro n’ibindi bikeneye kuganwa n’umubare utari mutoya w’abaturage. Ubwo rero kuba batabonaga uko babigeraho kubera kubura icyo bambukiraho, ubwabyo byari ikibazo gikomeye natwe byari biduhangayikishije”.

Yababwiye ko iki kiraro cyubatswe mu buryo burambye, dore ko n’ubwo imvura yagwa ari nyinshi, kidashobora kurengerwa n’amazi ngo acyangirize cyangwa agitembane nk’uko bisanzwe bigenda ku bindi biraro bisanzwe.

Ku bwa Habanabakize, asanga ari ah’abaturage gushyiraho akabo, bakakibungabunga bakagifata neza, bakirinda kwangiza insinga n’ibyumba bicyubakishijwe, kugira ngo kizamare igihe. Ni ikiraro cyuzuye gitwaye Miliyoni 135 z’amafaranga y’u Rwanda.

Mu byifashishijwe harimo imitako igaragaza umuco gakondo w’Abanyarwanda.

Hirya no hino, site zo mu Karere ka Musanze ziberaho icyo gikorwa cy’amatora uko ari 73 zifite ibyumba by’itora 561, zarimbishijwe mu buryo ahenshi hagaragara imitako y’ubwoko bunyurwanye igaragara mu mabara y’icyatsi, ubururu n’umuhondo agize ibendera ry’u Rwanda.

Mukagatera Anonsiyata umwe mu bo Kigali Today yasanze kuri site y’itora iri ku ishuri ribanza rya Fatima mu Murenge wa Muhoza yagize ati: “Nazinduwe no kuza gutora nkishyiriraho umuyobozi umbereye kandi uzanyobora akuzuza ibyifuzo byacu nk’abaturage. Kubera agaciro duha umuntu wo ku rwego rukomeye, rutureberera nk’abaturage, twitabiriye igikorwa cyo kumutora twarimbye mu myambaro itubereye, ababyeyi natwe dukenyera imikenyero tumutegera n’urugori, turimbisha aho dutorera dore ko ari n’igikorwa twari tumaze iminsi dufitiye ubwuzu n’amashyushyu dufata nk’ubukwe budasanzwe”.

Imirimbo irimo n’igaragaza umuco Nyarwanda yari yitaweho

Yakomeje agira ati "Site ziberaho itora twahuje imbaraga nk’abaturage turazirimbisha tuzikorera isuku, kugira ngo twitabire igikorwa nyirizina tugikorere ahantu hateguye mu buryo buteye ubwuzu, cyane ko n’umuyobozi twaje kwishyiriraho ari umuyobozi twasesenguye neza imikorere ye w’umunyabwenge, usobanutse urangwa n’ibikorwa koko n’ubundi biteye ubwuzu".

Ku bandi baturage, barimo n’abari bamaze igihe biyumvira imigabo n’imigambi y’abakandida ku mwanya wa Perezida n’abakandida Depité bagiye babanyura imbere mu gihe biyamamazaga mu minsi ishize, kuri uyu munsi w’itora nyirizina ngo si bo barose bucya bakajya kubitorera.

Abageze mu zabukuru n’abafite intege nke bari bagenewe ibyicaro

"Umunsi w’amatora twe tuwufata nk’umunsi udasanzwe. Twari tumaze iminsi tuwitegura nk’abategura ubukwe, ari nayo mpamvu mubona twatatse ahantu hose nk’abataka ahabera ibirori by’ubukwe. Bamwe gutora twabirangije abandi barabikomeje. Ubwo rero n’ubundi amatsiko yo kumenya neza umusaruro w’ibiva muri iki gikorwa cy’amatora twazindukiyemo aracyari yose. Turatuza tumaze kumenya neza ko umugeni wacu twitoreye yageze mu byicaro bye".

Mu bari banyotewe ko itariki y’amatora igera barimo n’ababyeyi babukereye mu myambaro y’imikenyero bateze n’urugori, dore ko uyu munsi bawufata nk’ubukwe

Imitako yifashishijwe mu kurimbisha kuri site z’itora, igaragara mu bice bimwe na bimwe byegereye aho izo site ziri, ku bwinjiriro bwazo ndetse no mu byumba by’itora. Mu byifashishijwe harimo nk’ibitambaro, ibipurizo, imikeka, ibyibo, ibisabo, ibyansi, inkongoro n’indi mitako igaragaza umuco gakondo w’Abanyarwanda.

Kuri Site y’amatora iri kuri site yo kuri GS Muhoza II ubwinjiriro bw’ibyumba by’itora wabubwirwaga n’imitako ihakikijwe

Site iri ku Ishuri ribanza rya Susa kimwe n’ahandi, hari harimbishijwe mu mitako ifite amabara agize ibendera ry’u Rwanda

Hamwe na hamwe hari ibirango byibutsa abaturage umunsi w’amatora

Ingo zibarirwa mu gihumbi, nizo zimaze kugerwaho n’iyi gahunda mu gihe cy’imyaka ibiri imaze

Abozorojwe mu bihe bishize, barimo nka Uzamukunda wo mu Murenge wa Kinigi, akaba afite umuryango w’abantu bane. Avuga ko iyo yorojwe, nibura buri mwaka ibyara intama eshatu, ku buryo iyo igihe kigeze cyo gutanga Mituweli, agurishamo imwe akabasha kubona ayo kwishyurira umuryango we.

Ati: “Intama banyoroje irabyara nkazitaho uko bikwiye, igihe cyo kwishyura Mituweli kikagera zarakuze, ku buryo nk’imwe iyo nyijyanye ku isoko banyishyura ibihumbi biri hagati ya 40 na 50. Sinkitega amaboko ubuyobozi ngo bunyishyurire Mituweli kuko mba nifitiye ayanjye nanasaguraho ayo kwikenuza mu bindi bibazo. Njye n’umugabo ndetse n’abana ntawe ukirembera mu rugo, kuko tuba twarishyuye ku gihe”.

Intama borojwe, kuri bamwe ngo ni umusingi ubabungabungira ubuzima nk’uko Niyonzima yabigarutseho.

Ati: “Aya ni amaboko adufasha kubungabunga ubuzima dufata nk’impano dukesha Umukuru w’Igihugu Paul Kagame, washyizeho gahunda nk’izi zo gufasha abatishoboye kwigira. Ubu imiryango yose muri kano gace itari yishoboye, iziritse itungo rirenze rimwe ku rugo; ibyo bikadufasha kwikenura”.

Ingo uhereye ku zituwe n’abantu batishoboye zo mu Mirenge ine harimo uwa Nyange, Kinigi, Shingiro na Gataraga; nk’Imirenge y’Akarere ka Musanze ikora kuri Pariki y’Igihugu y’Ibirunga, abaturage bazibarizwamo nibo borozwa Intama.

Ni muri gahunda yagutse igamije gusaranganya 10% by’umusaruro ukomoka kuri Pariki y’Igihugu y’Ibirunga izwi nka Revenue Sharing, ku bufatanye bw’Ikigo cy’igihugu cy’iterambere (RDB) ikabinyuza mu muryango Sacola bikorana muri gahunda yo kubungabunga Pariki.

Impamvu yo kuboroza intama, Kwizera Janvier, umukozi wa RDB muri Pariki y’Igihugu y’Ibirunga ushinzwe ubufatanye n’abaturage ayigarukaho agira ati: “Intama ni itungo ritagoranye kwitaho kandi ryororoka byihuse, ku buryo umuntu urifashe neza nibura buri mwaka rishobora kubyara kabiri, kandi akenshi usanga inshuro imwe iba yabyaye ebyiri”.

“Ibyo rero twasanze byakorohera abaturage kujya babona ubushobozi bwo kwiyishyurira Mituweli bitabaye ngombwa ko bahanga amaso Leta. Si n’ibyo gusa kuko binabafasha kubona ifumbire bafumbiza uturima tw’igikoni bitabaye ngombwa ko bayigura ahandi bakabasha no kwihaza mu biribwa”.

Mu gihe cy’imyaka ibiri iyi gahunda ya ‘Intama ya Mituweli’ imaze itangiye, ingo zibarirwa mu 1000 ni zo zimaze korozwa; kandi igikorwa kizakomeza, ndetse hari no gutekerezwa uko abaturage bazajya borozwa intama zikurwaho ubwoya bukorwamo ipamba rivamo imyenda, nabwo bakajya babugemurira inganda zibutunganya bityo n’amafaranga azikomokaho akiyongera.

Mureshyankwano yagaragaje ko ibigwi bya Perezida Kagame bitivugira mu Rwanda gusa, ahubwo byageze no ku Isi yose

Mureshyankwano yabigarutseho kuri uyu wa Kane tariki 11 Nyakanga 2024 mu Karere ka Gakenke mu bikorwa byo kwamamaza Paul Kagame ku mwanya w’Umukuru w’Igihugu, byahurije hamwe n’abandi baturage bari baturutse mu tundi Turere tugize Amajyaruguru no hirya no hino mu Gihugu.

Mu ijambo rye rigaruka ku bigwi by’Umukandida akaba na Chairman wa RPF Inkotanyi, Mureshyankwano yabwiye abaturage bari bitabiriye kwamamaza Paul Kagame, yavuze ko ibyo yakoze bitivugira mu Rwanda gusa, ahubwo byambutse bikagera no mu mahanga, ku buryo bamwe babigize icyitegererezo babimuhera n’ibihembo by’ishimwe mu bihe bitandukanye.

Yagize ati: “Nahoze nsoma mu binyamakuru mpuzamahanga, nshakisha umu Perezida waba yarahawe ibikombe byinshi ku bw’ibikorwa by’indashyikirwa byamuranze, nsanga nta wundi ni umukandida wacu Nyakubahwa Paul Kagame. Ku myaka ye 66, nasanze yarahawe ibikombe byinshi ku rwego rwa Afurika no ku rwego rw’isi, nabibaze ngera aho nanirwa ngejeje ku bikombe 26”.

Yakomeje agira ati “Nibyo koko yarabikoreye. Muri ibyo bikombe, murumva byose ntabwo nabifashe mu mutwe uko byakabaye kuko ni byinshi. Ariko nababwiramo bicyeya harimo nk’igikombe cyanejeje kurusha ibindi yahawe ku bwo kuba ari we Mukuru w’Igihugu wakuyeho igihano cy’urupfu mu Rwanda. Yahawe igikombe cyo guteza imbere urubyiruko, ahabwa igikombe cyo guteza imbere ikoranabuhanga, icyo gutega amatwi itangazamakuru, igikombe cyo guteza imbere ishoramari […..] abashoramari muri heheee[…..?] Muzatora ndeeee[…?].

Na bo bamusubije bagira bati "Ni Paul Kagame”.

Mureshyankwano akomeza agira ati: “Ni byinshi cyane ntabwo nabirangiza, Nyakubahwa Chairman, murambabarira mfashe umwanya munini mbigarukaho, nimwe mwakoze byinshi ntimundenganye!".

Mureshyankwano yagaragaje kandi ko Paul Kagame yakoreye byinshi abaturage bo mu Ntara y’Amajyaruguru by’umwihariko mu Karere ka Gakenke aho ubuhinzi n’ubworozi bwatejwe imbere, bituma birushaho kwiyongera mu bwiza no mu bwinshi, abaturage bihaza mu biribwa, ku buryo ubu batagikeneye ibiva ahandi birimo nk’indagara baryaga nyuma yo gucyurirwa.

Yagize ati: “Nyakubahwa Chairman, kubera Nkunganire mwashyize mu buhinzi ndetse n’ubworozi hamwe n’Inka mwahaye abaturage, byatumye uyu munsi inka ziyongera cyane ku buryo izibagirwa mu ibagiro rya Nyabugogo, 80% ari izituruka mu Karere ka Gakenke”.

Yakomeje agira ati “Abaturage bo muri utu Turere baranywa amata, bararya bakihaza mu biribwa, barasagurira amasoko ku buryo batagikeneye za Ndagara birirwaga baducyurira. Turihagije mu biribwa. Dufite amafi, dufite amagi, turya inyama, tunywa amata; Tuzatora Paul Kagame”.

Mureshyankwano yanakomoje ku gihingwa cya Kawa kiri mu byatejwe imbere kikongererwa agaciro, aho ubu ari igihingwa gikunzwe ku rwego byarenze imbibi z’aka Karere ka Gakenke no mu Rwanda kikaba cyambuka no ku ruhando mpuzamahanga, ubu mu bihugu byinshi ikaba iri ku isonga mu kuryohera abatari bacye.

Ibi byinjiriza abahinzi amafaranga atubutse bakiteza imbere, kandi nta wundi babikesha atari umukandida Paul Kagame wayikoreye ubuvugizi mu kuyihesha agaciro.

Mureshyankwano agira ati: “Ikawa yacu, ikawa ya Gakenke, yayikoreye ubuvugizi, arayimeneyekanisha mu mahanga, iba ikawa mu zambere ziryoshye ku isi. Ikilo cyaguraga amafaranga 100 cy’ibitumbwe byayo, ubu uyu munsi kiragura amafaranga 700. Abanyagakenke barakirigita ifaranga”.

Ibyo Mureshyankwano yagarutseho ku gihingwa cya Kawa binashimangirwa na bamwe mu baturage ba Gakenke banongeraho ko agaciro katagaragarira gusa mu bwiza n’uburyohe bwayo, ahubwo no kuba abahinzi bayo bahabwa amahugurwa atuma biyungura ubumenyi buhagije mu kuyihinga no kuyitaho kijyambere. Byongeye n’inganda zirimo izitonora kawa, zikayitunganya mu buryo ziyumutsa kandi zikanayikaranga; ngo ntibyari byarigeze bibaho mu mateka y’aka Karere.

Mureshyankwano yongeyeho ko ibyo Abanyagakenke kimwe n’abaturage bo mu Ntara y’Amajyaruguru bagejejweho na Paul Kagame atabirondora ngo abirangize kuko ari byinshi; ariko mu bindi bicye muri byo harimo nk’Ibitaro bishya bya Gatonde, Kaminuza yigisha Ubuvuzi ya Ruli, imihanda ya Kaburimbo mu Turere tugize iyi Ntara harimo nk’uwa Base-Gicumbi, umuhanda wa Kaburimbo wa Buranga-Kamubuga ukomeza ugahinguka kuri Base hamwe n’indi ya Laterite ikomeje kubakwa mu Turere dutandukanye tugize iyi Ntara.

Yanagaragaje uburyo kuzamura urwego rw’ubuvuzi mu turere nka Gicumbi na Burera hubakwa amavuriro matoya (Poste de santé) ahegereye umupaka, Kaminuza Mpuzamahanga yigisha Ubuvuzi (UGHE), ibitaro bivura Kanseri bya Butaro, byubatswe na nyuma yaho bikongererewa ubushobozi, kongera ibikoresho byifashishwa mu buvuzi, abaganga ndetse na za Ambulance hirya no hino muri ibyo bigo by’ubuvuzi, byaruhuye abarimo n’abagabo bari barahetamye ibitugu bari baratewe n’uko bahoraga bahetse abarwayi mu ngobyi za gakondo babajyanye ku mavuriro.

Yavuze ko ubu abagore babonye aho kwivuriza no kubyarira batavunitse, ibi bikaba ishingiro benshi baheraho bemeza ko itariki nyirizina ya 15 Nyakanga 2024 itinze kugera bakitorera uwabagejeje kuri ibyo bikorwa byose.

Uretse ubuvuzi, ubuhinzi n’ibikorwa remezo by’imihanda byagaragajwe nk’ibyagezweho muri iyi Ntara y’Amajyaruguru, mu byo Mureshyankwano yongeyeho birimo no kuzamura urwego rw’uburezi mu mashuri uhereye ku yo mu cyiciro cy’inshuke, abanza, ayisumbuye ndetse na Kaminuza byafashije benshi kwigobotora ubujiji.

Mu ijambo rye, Paul Kagame, yafashe umwanya agaruka ku byo Mureshyankwano yari amaze kuvuga Abanyagakenke n’abaturage b’Intara y’Amajyaruguru bagezeho byiza, avuga ko bikomoka ku kuba ubushobozi, ubumenyi mu Banyarwanda byariyongereye bidasize n’umubare w’abaturage ubwabo. Yabijeje kandi ko ibyiza kurushaho inshuro nyinshi biri imbere.

Kureba amafoto menshi, kanda HANO

Reba ibindi muri izi Videwo:

Video: Richard Kwizera & Salomo George

Inzego z’umutekano n’iz’ibanze zikorera mu Karere ka Burera zigaragaza ko icuruzwa ry’abantu ari iryo guhagurukirwa kugira ngo ricike burundu

Muri aka gace, n’ubwo iki kibazo kitahagaragara cyane, ariko ngo rimwe na rimwe hari abafatiranwa n’ibibazo bihari nk’amakimbirane mu miryango, amikoro make cyangwa ubujiji, bagashorwa mu kwambukiranya imipaka banyuze inzira za panya, bizezwa akazi no gukira byihuse, hakaba abagerayo bakisanga mu bindi bikorwa bitandukanye n’ibyo bijejwe.

Habyarimana Bernard agira ati: “Hari abashukishwa akazi ko kujya kuragira amatungo, gusoroma ibyayi cyangwa gucuruza mu tubari two mu Buganda, bakanyura inzira za panya bajyayo. Abenshi baba baracikishirijemo amashuri abandi barayarangije. Bamwe bagerayo bagashorwa mu yindi itemewe, banagaruka bakaza baramaze kwangizwa na za Kanyanga cyangwa baratewe inda”.

Mu bukangurambaga bwabereye mu Murenge wa Cyanika kuwa kabiri tariki 9 Nyakanga 2024, bugamije kwigisha abaturage amayeri akoreshwa n’abakora ubwo bucuruzi, basobanuriwe ko icuruzwa ry’abantu, ahanini rikorwa hagamijwe gushora abandi mu busambanyi, imirimo y’agahato, kubakuramo ingingo z’umubiri n’ibindi.

Ubukangurambaga bugamije gufasha abaturage gusobanukirwa amayeri akoreshwa mu bucuruzi bw’abantu bwasize abo mu Karere ka Burera biyemeje gukumira ibikorwa byose bifitanye isano nabwo

Mategeko Safia uyobora Umuryango Nyarwanda utegamiye kuri Leta, ugamije gufasha abaturage n’abayobozi gushyira gahunda za Leta mu bikorwa no kwesa imihigo Mukamira Community Base Organization (MCBO) wateguye ubwo bukangurambaga, ukaba ukorana na Never Again Rwanda, yagize ati: “Umuntu wese ushowe mu bikorwa nk’ibyo yaba ari mukuru cyangwa urubyiruko, amahirwe y’ubuzima bwe aba yononekaye. Iyo agize ibyago byo kumara igihe kinini muri ibyo bikorwa, bigera aho agahinduka imbata yabyo, akagera aho nawe abishoramo abandi, bigahinduka uruhererekane”.

Akomeza agira ati “Imbaraga Leta igenda ishyira mu gutahura ababigiramo uruhare no kubahana zifasha mu guca intege bene nk’abo, ariko ntitwareka kuvuga ko hakiri ibisigisigi, ahanini bigaragarira mu bambukiranya umupaka mu buryo butemewe bajyanwa muri ibyo bikorwa cyangwa ibindi bifitanye isano na byo, ari nayo mpamvu y’ubu bukangurambaga”.

Kagaba Jean Baptiste, Umuyobozi w’Ishami ry’Imiyoborere myiza mu Karere ka Burera, asaba abaturage kutarangamira inyungu zihuse, kuko akenshi bazizwezwa ari nk’uburyo bw’amayeri abashora mu n’icuruzwa ry’abantu.

Abaturage bahawe umwanya wo kubaza ibibazo no gutanga ibitekerezo ku cyakorwa mu kurihashya burundu

Ati: “Inaha dufite ibikorwa byinshi nka Job Creation, VUP, ibikorwa remezo bigenda bishyirwaho, ubuhinzi, ubworozi n’ibindi bitanga amahirwe y’akazi kuri benshi kandi gahemba neza. Abaturage tubakangurira kuzitabira bagakora ibyo bunguka bikaba ari ibyo bakoreye mu buryo bunyuze mu mucyo”.

Yungamo ati “Igihe cyose hagize ubizeza inyungu zihuse, baba bakwiye kugira amakenga, byaba na ngombwa bakiyambaza inzego zibegereye, zikabanza kubafasha gusesengura neza ibyo ari byo, mu kwirinda kugwa mu mutego w’ababashora mu bitemewe bagamije inyungu zabo bwite”.

Mu byo uwari uhagarariye Polisi y’u Rwanda ndetse na RIB muri ibyo biganiro bagarutseho, ni uko icuruzwa ry’abantu ari icyaha giteganywa n’Itegeko nimero 51/2018 ryo ku wa 13/08/2018 ryo mu gitabo cy’amategeko ahana, riteganya ko umuntu wese uhamijwe icyaha cy’ubucuruzi bw’abantu mu Gihugu ahanishwa igifungo kiri hagati y’imyaka 10 kugeza kuri 15, naho uhamijwe icyo cyaha agikoreye hanze y’Igihugu igihano kigera ku myaka 20 hiyongereyeho n’ihazabu y’amafaranga ari hagati ya Miliyoni 10 kugeza kuri Miliyoni 20.

Icuruzwa ry’abantu riza ku mwanya wa gatatu ku isi mu kwinjiriza ababukora amafaranga menshi nyuma y’ubucuruzi bw’ibiyobyabenge n’ubucuruzi bw’intwaro.

Gusa ikibabaje nk’uko n’ubushakashatsi bubigaragaza, ni uko inyungu ziva muri ubwo bucuruzi bw’abantu, nta muryango mugari ubyungukiramo uretse ahubwo ibihombo gusa.

Amahoteli ari ku rwego rukomeye, muri iyi myaka 30 ishize yubatswe mu Karere ka Musanze

Muri iyi nkuru Kigali Today yagendeye ku bikorwa bike mu by’ingenzi bamwe mu baturage bo muri iyo Ntara babona nk’inkingi ikomeye mu kubahindurira imibereho bagendeye ku byo byashyiriweho n’uko byahinduye imibereho yabo.

Abenshi bagiye bayibwira ko batabivuga ngo babirondore kuko ari byinshi, ariko bicye muri byo bakomojeho, nka kimwe cyangwa bibiri muri buri Karere, Kigali Today nibyo igiye kugarukaho.

Akarere ka Musanze

Ubukerarugendo, Ibikorwa remezo bihabarizwa nk’imihanda n’Imidugudu byazamukanye umuvuduko mwinshi.

Musanze hafatwa nk’igicumbi cy’ubukerarugendo abaturage bavuga ko bubafatiye runini

Ku muntu wagerageza gusubiza amaso inyuma akibuka neza ukuntu ubukerarugendo bwari buhagaze mu myaka yo hambere ya 30 ishize, muri aka Karere abona ko hari ikintu kinini cyahindutse nk’uko abaturage babihamya; bukaba bugenda burushaho kurenga imbibi z’aka Karere ubwako, Igihugu no ku ruhando mpuzamahanga.

Aka Karere ka Musanze nk’ahantu hafite umwihariko w’ubukerarugendo bwubakiye ku gusura inyamaswa cyane cyane Ingagi muri Pariki y’Igihugu y’Ibirunga, iganwa n’umubare munini w’abaturuka imihanda yose ku Isi, abagatuye babwirata ko buri mu bintu bikomeye byabahinduriye imibereho, ahanini bashingiye ku madevise abukomokaho ahindukira akabyazwamo ibikorwa bizamura imibereho n’iterambere ryabo.

Ibirori biba buri mwaka byo Kwita Izina abana b’Ingagi ni bimwe mu bikomeje guteza imbere abatuye Akarere ka Musanze

Urugero rwa bimwe ni nk’Umuhango wo Kwita Izina abana b’Ingagi uba buri mwaka, ukitabirwa n’abantu b’ingeri zinyuranye bo mu Rwanda n’abo ku ruhando mpuzamahanga biganjemo abubatse izina, ibyo birori bikunze kugira umwihariko buri uko umwaka utashye, bikaba bibera mu Murenge wa Kinigi bikinjiriza benshi agatubutse.

Mu nshuro zigera kuri 19 zose ibyo birori bimaze biba, byagiye bibanzirizwa no kumurikira abaturage ibikorwa begerejwe by’iterambere bikomoka kuri gahunda yo gusaranganya abaturiye Pariki umusaruro uyikomokaho (Revenue sharing).

Kamanzi Eric agira ati: “Batwubakiye ibigo by’amashuri birimo nk’icyitwa Nyabitsinde kiri mu Murenge wa Kinigi, ibyumba by’amashuri ku Rwunge rw’amashuri ya Nyange, n’ahandi. Ubu abana bacu bigira mu nyubako nziza kandi bisanzuye”.

Abaturiye Pariki y’Ibirunga bishimira ibikorwa by’iterambere begerezwa

Mu bindi bikorwa bitirengegijwe birimo imiyoboro y’amashanyarazi harimo n’uwerekeza ahitwa muri Rwandarushya mu Murenge wa Shingiro ureshya na Kirometero zikabakaba 10.

Ingano y’amafaranga yashorwaga muri ibyo bikorwa, ku ikubitiro yari kuri 5% ariko uko imyaka yagiye ishira, ubukerarugendo bukarushaho kwaguka bidasize n’ibipimo by’amadevise bwinjiza, maze ingano y’umusaruro usaranganywa abaturage ukomoka ku byinjijwe na Pariki irongerwa ishyirwa ku 10% ndetse mu mwaka w’Ingengo y’imari wa 2023-2024, RDB nk’Urwego rufite mu nshingano imicungire ubukerarugendo, rwageneye Akarere ka Musanze Miliyoni 381 mu bikorwa byari bitahiwe gushyikirizwa abaturage.

Imihanda ya kaburimbo ikomeje gukorwa mu Karere ka Musanze mu yishimirwa n’abaturage

Kandi si abaturage bo mu Mirenge ikora kuri Pariki y’Igihugu y’ibirunga bungukira ku byiza bikomoka ku bukerarugendo bwaho bonyine, kuko nk’abahawe akazi nyirizina mu mirimo ikorerwa muri iyi Pariki umunsi ku munsi, abashinze amahoteri yaba aherereye mu gace iyo Pariki irimo n’ahandi, abayahawemo akazi, abakora mu rwego rw’ubwikorezi cyangwa gutwara abantu bakura ba mukerarugendo mu duce tumwe babajyana mu tundi, imiryango itegamiye kuri Leta ifatanya na RDB mu kubungabunga Pariki, Amakoperative y’abanyabukorikori n’imyuga, abakora ubuhinzi n’ubworozi, bose bahuriza ku kuba ubukerarugendo babufata nk’imbehe ibagaburira mu buryo bufatiye benshi runini.

Imishinga yo kubaka imihanda irimo n’iya kaburimbo ikomeje gushyirwa mu bikorwa hirya no hino by’umwihariko mu mujyi wa Musanze, iri mu byo abaturage berekena nk’ikimenyetso ntakuka cy’intambwe bateye mu guhindura isura y’uwo mujyi ikomeje kurushaho kuba nziza; atari mu mihahiranire n’imigenderanire gusa ahubwo no mu rwego rw’imiturire.

Abatuye Akarere ka Musanze bishimira iterambere kagezeho mu myaka 30 ishize babikesha ubuyobozi bwiza

Mu mihanda myinshi yubatswe muri iyi myaka 30 ishize u Rwanda rwibohoye, abaturage bitsa cyane, ku kuntu mu makaritsiye harimo ahazwi nko mu ibereshi, Rusagara, kuri Karere, mu Cyanika, tête gauche (Soma tetagoshe), Nyamagumba, Susa, n’ahandi mbere y’icyo gihe hahoze imihanda y’ibitaka, bakagorwa n’ivumbi mu gihe cy’izuba, byagera no mu gihe cy’imvura ibyondo bikabashyira ku gitutu; ibi bikaba byarahindutse amateka nyuma y’aho muri utwo duce kimwe n’ahandi henshi tutagarutseho muri iyi nkuru, hashyizwe imihanda ya kaburimbo binyuze mu mishinga itandukanye harimo n’uwo Leta y’u Rwanda ikomeje gufatanyamo na Banki y’isi; iyo mihanda ikaba ireshya n’ibirometero bisaga 25 byashowemo asaga Miliyari 30 z’amafaranga y’u Rwanda.

Akarere ka Burera

Gahunda yo guhanga no gutanga akazi ku baturage (Job Creation), Ibitaro bya Butaro na Kaminuza ya UGHE.

Kaminuza Mpuzamahanga y’ubuvuzi n’Ubuzima kuri bose, University of Global Health Equity (UGHE)

Duhereye nko kuri gahunda ya Leta izwi nka “Job Creation” igamije gufasha abaturage guhanga akazi no kubona imirimo, iyi gahunda ngari ikubiyemo ibikorwa bitandukanye byafashije mu kuzana impinduka zifatika, zafashije abaturage kuzamura urwego rw’ubuzima, ubuhinzi, ibikorwa remezo imyuga n’ibindi.

Iyo uganiriye na benshi mu bo muri aka Karere biganjemo n’abahabaye cyangwa bahagendaga mbere y’imyaka 30 ishize u Rwanda rwibohoye, bakubwira uburyo mu bice byinshi byaho, imyumvire ya benshi bari barangamiye ibikorwa byo kwambukiranya umupaka mu buryo butemewe n’amategeko, bakishora muri magendu n’ibiyobyabwenge, ku buryo abiganjemo urubyiruko, nta nkindi bumvaga bashobora gukora kikabinjiriza kitari ibyo bikorwa.

Burera ibitaro bya Butaro byubatswe muri aka Karere bifatwa nk’igisubizo ku bakoraga ingendo bajya kwivuriza kure

Job creation aho iziye abenshi babonye imirimo ibinjiriza bituma bazibukira ibikorwa bitemewe, kandi iyo baguhaye ingero z’uburyo bamwe bahawe akazi mu mishinga yo gutunganya amaterasi, gukora imihanda, kwiga imyuga kandi bahembwa, impinduka mu buryo bw’imibereho zirivugira.

Muri aka Karere binyuze muri iyi gahunda, abaturage bo mu Mirenge ikora ku mupaka uhuza u Rwanda na Uganda, bubakiwe amavuriro y’ibanze (Poste de sante).

Ibitaro bivura indwara ya Kanseri bya Butaro bifatwa nk’igisubizo ku mubare munini w’abaturage, wari umaze imyaka n’imyaka uri mu gihirahiro kubera kutagira ibibegereye biri no ku rwego rwo gusuzuma, gupima no kuvura Kanseri, hiyongereyeho n’izindi ngendo bakoraga bajya kwivuriza ahandi indwara zinyuranye. Aho biboneye izuba muri aka Karere rero, bigatangira gutanga serivisi guhera mu mwaka wa 2012, abaturage biruhukije izo mvune.

Ibitaro bya Butaro byakira abagera ku 1800 ku mwaka

Ibi bitaro byakira abatari munsi y’1800 ku mwaka, uretse gutanga ubuvuzi no kuba hari benshi byahaye akazi, ababituriye biganjemo abahinzi borozi, iyo bejeje umusaruro, babonera agatubutse ku biribwa bahagemura bitekerwa abarwayi.

Si ibyo byonyine kuko no muri gahunda yo guha ikaze imishinga y’abashoramari hanozwa ububanyi n’amahanga, abaturage bo mu Karere ka Burera bavuga ko nabo bayungukiyemo, ahanini bagendeye ku kuba i Butaro harubatswe Kaminuza Mpuzamahanga y’Ubuvuzi n’Ubuzima University of Global Health Equity (UGHE), kuri ubu itanga amasomo mu by’ubuvuzi yo ku rwego rwa za Kaminuza zanditse amazina ku ruhando mpuzamahanga harimo n’izo ku mugabane wa Amerika.

Abaturiye Kaminuza ya UGHE, nabo bagira amahirwe yo kuyihahamo ubumenyi

Iyo Kaminuza uretse kuba bishimira ko itanga ubumenyi ku bana b’u Rwanda n’abaturuka mu bindi bihugu byo ku mugabane wa Afurika n’indi migabane yo ku isi, abaturage bo muri aka Karere bahamya ko n’abana babo batigeze bahezwa kuyigamo, cyane ko nk’abo mu miryango ikennye ariko baba bafite amanota meza, bagiye bayihahamo ubumenyi cyane ko no mu ntego z’iyi Kaminuza ari utugeza imbere uburezi mu by’ubuvuzi kuri bose uhereye ku baturage b’agace ihereremo.

Akarere ka Rulindo

Damu yatunganyijwe muri Rulindo yakuyeho imbogamizi abahinzi bagiraga zo kurumbya umusaruro none ubu beza mu buryo bushimishije

Damu ifata amazi yo mu kibaya cya Muyanza iri ku buso bwa hegitari 1100 ikaba ikora ku Mirenge ya Buyoga, Ntarabana, Mbogo, Cyinzuzi na Burega, abaturage bayirahira kuba isoko yo kubungabunga ubuhinzi buhakorerwa burimo ubw’imboga z’imiteja, inyanya, ibitunguru, urusenda na puwavuro hamwe n’imbuto nk’amapapayi, ibinyomoro, aho yabarinze kurumbya ibyo bihingwa nk’uko byahoze mbere itarubakwa.

Turimumahoro Valens umwe mu bahinzi bagaruka ku kuntu iyo Damu ibafitiye akamaro. Ati: “Twishyize hamwe muri za Koperative nk’abantu bahurira ku guhinga mu duce twegereye ahari iyi Damu yaba mu kibaya iherereyemo ndetse no mu bice by’imisozi. Idufatiye runini kuko mu kuyubaka, amatiyo amazi ayobokamo bagiye bayakwirakwiza mu mirima bakayataba mu itaka, noneho igihe cyagera tukuhira imyaka yacu mu buryo busaranganyije mu mirima, bigatuma ihora itoshye”.

Imboga hamwe n’imbuto bihingwa ahegereye iyo Damu no mu gihe cy’izuba biba bitoshye

Akomeza agira ati “Ubu igihe cy’izuba ntikikidutera guhangayika kuko amazi aba ahari. Imyaka yacu ntikirumba, tureza tukabona ibihagije turya, tugasagurira amasoko y’inaha hafi n’ayo mu mahanga”.

Miliyari zisaga 18 z’amafaranga y’u Rwanda niyo yashowe mu kubaka Damu ya Muyanza abaturage bamaze imyaka isaga 8 babyaza umusaruro. Nibura ingo zisaga ibihumbi 9 zibarizwamo abasaga ibihumbi 50 zikaba arizo zibarurwa ko zifite imirima yuhirwa n’iyi Damu.

Agera kuri miliyari 18Frw niyo yashowe mu kubaka iyi Damu

Si Damu yonyine kuko n’iterambere ry’imihanda harimo n’uwa kaburimbo wa Base-Gicumbi, ukora ku bice by’imirenge igize aka Karere ka Rulindo harimo Umurenge wa Base, Cyungo, Rukozo, Cyisaro na Buyoga wavanye benshi mu bayituye mu bwingunge, ubuhahirane burushaho kunoga.

Akarere ka Gicumbi

Green Gicumbi Project aho iziye muri Gicumbi imibereho ya benshi yarahindutse

Umushinga “Green Gicumbi Project” watangijwe muri ako Karere kuva mu mwaka wa 2019, ugamije gufasha aka Karere kwigobotora ingaruka zikomoka ku mihindagurikire y’ibihe uri mu by’ingenzi abaturage bahamya ko byabazamuye.

Muri ako Karere ka Gicumbi uruhare rwawo rwigaragariza mu gufasha abaturage kubungabunga ibidukikije no kuzamura ubukungu bushingiye ku buhinzi dore ko ugendeye nko ku mirimo yo gutunganya amaterasi abarirwa mu buso bwa hegitari zisaga ibihumbi 12, ababarirwa mu bihumbi bisaga 23 biganjemo abagore n’abakobwa bahawemo akazi.

Ahatunganyijwe amaterasi umusaruro warushijeho kwiyongera

Umwe mu banyamuryango ba Koperative yitwa KOPABEMU ikorera ubutubuzi bw’ibirayi, ingano n’ibishyimbo mu Murenge wa Rushaki agira ati: “Ubuhaname bw’imisozi twahingagaho mu kajagari uyu mushinga utaraza bwagiraga ingaruka ku buhinzi kuko nko mu gihe cy’imvura imyaka yose yatwarwaga n’isuri ntitugire na busa dusarura. Aya matarasi yaje ari igisubizo ku buryo ubu twongereye umusaruro ku buso”.

Aba baturage bavuga ko ibyawo bitagarukira aho kuko bigishwa no guhinga kijyambere binyuze mu gukoresha imbuto n’ifumbire bijyanye n’ubutaka bw’aho bahinga.

Binyuze mu mushinga wa Green Gicumbi, abaturage bahawe imbabura zirondereza ibicanwa

Muri iyi gahunda kandi hanatewe ikawa, icyayi, ibiti bivangwa n’imyaka n’ibifata ubutaka, ndetse ubu muri aka Karere hakomeje kubakwa imidugudu mu Mirenge ya Rubaya na Kaniga, mu rwego rwo kunoza imiturire yihanganira imihindagurikire y’ibihe. Ku rundi ruhande, abaturage borojwe inka n’andi amatungo magufi, bahabwa imbabura zirondereza ibicanwa n’ibindi.

Akarere ka Gakenke

Ibitaro bya Gatonde hamwe n’ibiro by’Akarere mu by’ibanze abaturage bari basonzeye.

Ibitaro bya Gatonde byahubatswe bikomeje koroshya bikanihutisha serivisi z’ubuvuzi

Ibyo bitaro bya Gatonde byubatswe nyuma y’aho Umukuru w’Igihugu, Paul Kagame asuye ako Karere mu 1999 no mu 2016 akabyemerera abaturage. Mu Murenge wa Mugunga byubatswemo, kuva byatangira gutanga serivisi ku babigana mu mwaka wa 2021, nyuma yo kuzura bitwaye miliyari 2 na Miliyoni zisaga 800 z’amafaranga y’u Rwanda, biganwa n’abaturage basaga ibihumbi 106 bo muri aka Karere by’umwihariko mu Mirenge irimo uwa Janja, Busengo, Muzo, Mugunga, Cyabingo na Rusasa.

Bamwe mu babigana bavuga ko n’ubwo akarere kabo ka Gakenke kari mu Turere tw’Igihugu tubarizwamo ibitaro byinshi dore ko uretse ibyo bya Gatonde hari n’Ibitaro bya Ruli n’Ibitaro bya Nemba, ariko ugereranyije n’imiterere y’aka Karere kagizwe n’imisozi miremire ihanamye, ibyo bitaro bindi byari bibitaruye, aho kubigeraho byabasabaga gukora ingendo zivunanye, ku buryo bamwe byabananiraga bagahitamo kurembera mungo.

Nyiraziraboneye agira ati: “Byaraturuhuye, ubu twivuza neza, ku gihe kandi bitworoheye. Nta muturage ukirembera mu rugo. Imvugo ya Perezida wacu muri iyi myaka 30 ishize u Rwanda rwibohoye, yakomeje kuba ingiro”.

Gakenke ibiro by’Akarere byubatswe mu buryo bugezweho biri mu byo abaturage bishimira

Usibye urwego rw’ubuzima aba baturage birata, banagaragaza ko imyaka 30 isize ubuyobozi bwabo bukorera mu biro bijyanye n’icyerekezo, aho bamwe bakunze kumvikana mu mvugo yo gutebya bagira bati: “Iyo nyubako ni nka Paradizo ya Gakenke dukesha ubuyobozi bwiza”.

Impamvu y’ibi ni uko muri aka Karere umushinga w’inyubako iri kuri rwego rw’inzu nk’iyo igeretse inshuro ebyiri, igizwe n’ibyumba 56, byiyongeraho ibyumba mberabyombi byagutse, yubatswe ku musozi wo mu Kagari ka Rusagara yitegeye umusozi wa Kabuye, batari barigeze bayibona iwabo.

Abaturage bavuga ko baciye ukubiri no kwakirira mu mfundanwa ubuyobozi bwabo bwakoreragamo mbere, kuri ubu serivisi bakaba bazihabwa bisanzuye.

Muri rusange imishinga mike cyane Kigali Today yagarutseho muri iyi nkuru, yashowemo akayabo k’amamiliyari y’amafaranga y’u Rwanda, ndetse itanga akazi ku mubare munini w’abaturage nk’uko abenshi bagiye babyivugira kandi intego ibyo bikorwa byashyiriweho, zikomeje kurushaho gutanga umusaruro ufatika.

Sites 26 zo mu Karere ka Musanze ziri gukorerwaho n’abana 7920

Ku ma Sites (Ahari gukorerwa ibizamini) Kigali Today yabashije kugeraho yo muri kano Karere, abana b’abanyeshuri bari babucyereye bavuga ko biteguye neza ibizamini.

Giraneza Nelly umwe mu barimo gukorera kuri Site yo ku Kigo cy’Amashuri abanza ya Nyamagumba mu Murenge wa Muhoza, agira ati: “Abarimu baratwigishije bihagije, bagenda baduha imyitozo, imikoro n’amasuzumabumenyi menshi, byagiye bidufasha kurushaho kwiyungura n’ubundi bumenyi, ku buryo twizeye neza ko ari impamba iri budufashe kwitwara neza muri ibi bizamini twatangiye uyu munsi”.

Abana bafashijwe kwitegura neza ibizamini

Umuyobozi w’Akarere ka Musanze wungirije ushinzwe imibereho myiza y’abaturage Kayiranga Théobard, avuga ko imyiteguro yose ku migendekere myiza y’ibizamini uhereye ku bana b’abanyeshuri, abarezi n’abafite mu nshingano uburezi bayinogeje uhereye ku rwego rw’Imirenge n’Akarere, agasaba abana batangiye ibizamini, kutagira igihunga kandi bakabikora bashize amanga; aboneraho no gusaba ababyeyi babo kubaba hafi.

Ati: “Abana bagiye bahabwa umwanya uhagije wo gusubiramo amasomo yaba mu minsi isanzwe yo kwiga no mu minsi ya wikendi (Week-end) abarimu bari barihaye intego yo kujya babasubirishamo amasomo mu rwego rwo kubategura ku buryo tubishingiraho tugira icyizere ko byabafashije kwitegura bihagije bakaba barushaho kwitwara neza”.

Mu gutangiza Ikizamini gusoza icyiciro cy’amashuri abanza Asoc w’Akarere ka Musanze yasabye abanyeshuri kutagira igihunga

Yakomeje agira ati “Aba bana mu busanzwe bataha mu miryango. Mu byo dukangurira ababyeyi ni uko muri iki gihe bari mu bizamini, barushaho kubaba hafi, bakirinda kubajarajaza mu mirimo cyangwa ibikorwa bya hato na hato bishobora kubatesha umurongo wo gutekereza neza. Iki ni igihe cyo kubaha umwanya uhagije wo kuruhuka no gusubiramo amasomo”.

Mu Karere ka Musanze ama Sites 26, niyo abana b’abanyeshuri 7920 barimo abahungu 3493 n’abakobwa 4427 bari gukoreraho ikizamini cya Leta gisoza amashuri abanza.

Abana basabwe kudakorana igihunga

Urubyiruko 429 rurimo uruturutse mu mahanga n’urwo mu gihugu nirwo rwitabiriye icyiciro cya 14 cy’Indangamirwa

Abo basore n’inkumi bafite imyaka iri hagati ya 18 na 25 baryitabiriye, barimo 30 baturutse mu mahanga, 67 biga mu mashuri mpuzamahanga yo mu Rwanda, 278 baturutse mu Turere twose tw’Igihugu babaye indashyikirwa ku Rugerero rw’Inkomezabigwi, 13 bari mu nzego ziyoboye urubyiruko, abandi 41 bakaba ari abiga muri Kaminuza zikorera mu Rwanda.

Ubwo yaritangizaga ku mugaragaro mu Kigo cy’Ubutore kiri i Nkumba mu Karere ka Burera, Dr Bizimana, yagize ati: “Umuco Nyarwanda kuva mu myaka yo hambere, wari ukubiyemo indangagaciro nyinshi zafashaga Igihugu guhora gikomeye, kuko abantu babaga bunze ubumwe bafatanyije muri byose. Iyo sano muzi Abanyarwanda bahuriyeho, yafashije u Rwanda kubaho ibinyejana byinshi kugeza na n’ubu”.

Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascène Bizimana

Yakomeje agira ati, “Uru rubyiruko rero rukwiye kumenya ko ibyiza Igihugu kirimo kubaka bidashobora kuramba rwo ubwarwo rudahagurutse ngo rubigiremo uruhare. Mu byo rukora byose rero birasaba ko barangwa n’imikorere ishungura kandi rugasesengura ibyiza rukabikomeza, ibyo babonye ko ari bibi rukitandukanya nabyo rukanabyamagana. Dusanga ibyo byababera amahitamo meza yarufasha kugaragaza umusanzu warwo”.

Mu gihe cy’iminsi 45 bazamara muri iri torero, bazahabwa ibiganiro bibatoza kugira indangagaciro, kirazira na kiraziririzwa by’Umuco Nyarwanda, byuzuzanya n’igitaramo, imikoro ngiro, amasomo ya gisirikari, akarasisi n’imyitozo ngororamubiri.

Urwo rubyiruko ruvuga ko hari byinshi runyotewe kwiga ngo birufashe guhamya icyerekezo

Bazigishwa kandi umumaro w’imyitwarire y’ubutagamburuzwa mu bibazo bahura nabyo bya buri munsi mu buzima, uko barushaho kuba abaranga beza b’u Rwanda hirya no hino aho baba, gusobanukirwa amateka n’amahitamo Igihugu cyakoze ngo rugere ku iterambere ry’ubu, bagire n’umwanya wo kungurana ibitekerezo mu kurushaho kumva uruhare rwabo mu iterambere ry’Igihugu no kurinda ibyagezweho.

Laurence Nishimwe, agaragaza ko hari byinshi yari afitiye amatsiko yiteze kungukira muri iri Torero. Ati: “Hari ibintu byinshi bagenzi bacu batubanjirije mu byiciro biheruka, bagiye bigira muri iri torero; urugero nk’uburyo umuntu yakwirwanaho mu gihe atewe n’umwanzi, uko abantu bakwirinda kuba ba nyamwigendaho ahubwo bakitabira gukorera hamwe tudasigana inyuma. Dusanga izo ndangagaciro ziri muri nyinshi zizadufasha mu kubaka ahazaza”.

Ibyiciro byose uko ari 13 by’Itorero nkiri byabanje mu myaka ishize, nk’uko Minisitiri Dr Bizimana yabikomojeho, amasomo bigishijwe yabagiriye akamaro, atari ku rubyiruko gusa, ahubwo no ku gihugu n’imiryango rukomokamo.

Kuva mu mwaka wa 2008 Itorero Indangamirwa ritangiye, rimaze kwitabirwa n’abantu 4624 utabariyemo abitabiriye iki cyiciro.

Imwe mu miryango imaze igihe ihanganye n’ibibazo byo kutagira amacumbi ikomeje gutuzwa mu nzu yasaniwe cyangwa izo yubakiwe

Mu Mudugudu wa Mwidagaduro Akagari ka Bukinanyana mu Murenge wa Cyuve, hamwe mu hatuye abagaruka ku ngorane imiryango itaratuzwa mu macumbi bahura na zo.

Uwitwa Nibishaka Viateur agira ati: “Izo nzu zishaje ziba zarubakishijwe ibikoresho nk’amabati, amadirishya n’inzugi bikagera aho bigasaza, ugasanga umuntu ayituyemo abayeho mu mibereho idafututse”.

“Nkanjye inzu nahoze ntuyemo, gukinga imiryango yayo byansabaga kwegekaho amabuye, kuko iserire cyangwa ipata bitari bigifite uko bijyaho ngo bimare kabiri kubera ko inzugi zari zaravuvutse kubera gusaza. Amabati na yo imvura yaragwaga akatuvira ikadushiriraho mbese ubona ari ibibazo bidukomereye”.

Icyakora uyu musaza w’imyaka 72, yaje gufashwa iyo nzu ye y’ibyumba bitatu n’uruganiriro ikurwaho isakaro, inzugi amadirishya byari byishaje basimbuzwa ibindi bishya, hiyongereyeho no kuyisiga amarangi, iterwamo sima hasi ndetse mu gikari cyayo hubakwamo igikoni, ubwiherero hanashyirwa ikigega gifata amazi, ubu akaba atuye neza.

Ati: “Iyi nzu nyifata nk’impano Perezida Kagame yampaye, yiyongera ku kuba yaraturokoye agahagarika Jenoside yakorewe Abatutsi, akanabohora Igihugu ubu Abanyarwanda tukaba tubanye neza, duturanye turarahurirana tujya n’inama z’ibidufasha mu mibereho nta kwishishanya".

Mu miryango isaga 140 y’abarokotse Jenoside yakorewe Abatutsi itarabonerwa amacumbi ituzwamo mu buryo burambye yo mu Karere ka Musanze, harimo igera ku 108 igomba kuzasanirwa mu gihe indi 39 ariyo izubakirwa.

Mu Karere ka Musanze zimwe mu nzu z’Abarokotse Jenoside yakorewe Abatutsi zahoze zishaje zikomeje kuvugururwa izindi zikubakwa bushyashya ariko urugendo ruracyari rurerure

Yiyongeraho imiryango 9, yubakiwe mu mwaka w’Ingengo y’Imari wa 2023-2024 ku bufatanye bw’Akarere n’Abafatanyabikorwa bako, kandi imwe muri yo yamaze no kuzituzwamo mu gihe indi na yo imirimo yo kuzisoza iri kugana ku musozo igatuzwamo nk’uko Twizere Rusisiro Festo, Perezida wa IBUKA mu Karere ka Musanze aheruka kubibwira Kigali Today.

Umuyobozi w’Akarere ka Musanze wungirije ushinzwe imibereho myiza y’abaturage Kayiranga Theobard avuga ko hari inzu zagiye zubakwa mu myaka iri hejuru ya 20 ishize nyuma ya Jenoside yakorewe Abatutsi, zigatuzwamo abayirokotse, ariko kuri ubu zikaba zaragiye zisaza ndetse na ba nyirazo badafite amikoro na mba yo kuzisanira bo ubwabo.

Ati “Urugendo rwo kuzisana no kubaka inshyashya ruracyakomeje, binyuze mu ngengo y’imari duhabwa na Leta ibinyujije muri MINUBUMWE ariko navuga ko tutabyishoboza twenyine hatagaragayemo uruhare rw’abafatanyabikorwa baza bunganira abandi bagiye badufasha gusanira no kubakira imwe mu miryango muri uyu mwaka, barimo nka PSF, SACOLA, IPRC Musanze. Dukangurira n’ibindi byiciro byose guhaguruka, buri wese agakora icyo ashoboye mu gushyiraho ake, kandi dusanga turamutse tubigize ibyacu ikibazo cy’imiryango itarabona aho iba cyabonerwa umuti urambye”.

Akimara kubibona, abo iyo nshuti ye yamwizezaga ko azakorera bo muri ayo mu mahanga, bamwoherereje amafaranga, yagombaga kuvamo itike y’indege, barenzaho n’ayo kugura ibindi by’ibanze yari akeneye nk’imyambaro n’ivalisi, arangije yurira indege imwerekeza muri Arabiya Sawudite.

Akigerayo yatunguwe n’uko akazi yari yijejwe kujya ahemberwa umushahara w’ibihumbi bisaga 800 y’u Rwanda ku kwezi, ko gukora isuku mu iguriro ry’ibiribwa atariko yahawe, ahubwo agashorwa mu busambanyi yakoreshwaga ku gahato.

Ati: "Nabaye nkigera muri icyo gihugu, banyobora ahantu bambwiraga ko nzakorera, mu cyumba narimo haza umuntu w’umugabo ansangamo, atangira kumera nk’unganiriza anjijisha, bigera aho ansaba kumutiza telefoni ndayimuha".

"Ibyo bikimara kuba natunguwe no kubona ansingiriye, ambwira ko akazi bampamagariye nta handi nzagakorera hatari muri icyo cyumba. Afata iyo telefoni arayizimua ayibika mu mufuka we, arasohoka; ubwo nanjye inzira igoye yo gufungirwa muri icyo cyumba nahinduriwemo igikoresho cy’abagabo basimburanaga baza kunsambanya ku gahato niho rwatangiriye".

Uyu mukobwa akeka ko iyo nzu yarimo, hari n’abandi bakobwa, na bo bakorerwaga ibikorwa nk’ibyo byo kubacuruza mu busambanyi yari yashowemo, bakabukoreshwa n’abo akeka ko babaga baturutse mu bindi bihugu bahaje mu bikorwa by’ubucuruzi.

Nyuma y’umwaka yahamaze asambanywa ku gahato, umunsi umwe yaje kugira amahirwe Umugabo wari waje kumusambanya, yinjirana telefoni mu cyumba barimo, umukobwa amucunga aguye agacuho, yandikira umwe mu bo mu muryango we ubutumwa bugufi amumenyesha ko ubuzima bwe buri mu mazi abira, ko bakora ibishoboka bakamutabariza mu buyobozi abo bagizi ba nabi bataramuhitana.

Ati: "Uwo mukobwa wandangiye ibyo yanyizezaga ko ari akazi, yambereye inyamaswa, kuko yanshoye muri ibyo bikorwa abizi neza. Abagizi ba nabi nka we, muri iki gihe barahari benshi Kandi bakomeje kuyobya urubyiruko barwizeza ibitangaza bitari byo. Bakoresha amayeri menshi, bakiyoberanya bakwereka ko bagufitiye impuhwe. N’ubwo nagize amahirwe yo kubava mu nzara, nkagaruka mu Rwanda, bansigaje inyuma, banyicira ahazaza. Gusa mbabazwa n’uko uwo mukobwa atigeze afatwa ngo ahanwe kuko nanubu ntawe azi iyo aba, na telefoni ze yazikuyeho kazikuraho".

Ikibazo cy’abashorwa mu bucuruzi bw’abantu, ku ruhande rw’abaturage bo mu Karere ka Musanze, bavuga ko kigira ingaruka atari ku muryango w’uwabukorewe gusa, ahubwo n’igihugu muri rusange.

Mukadariyo Providence agira ati: "Mu muryango w’uwashowe muri ibyo bikorwa hasigaramo icyuho n’igihugu kigahomba uwakagomye kuzaba mu buyobozi, rwiyemezamirimo cyangwa ibindi by’ingirakamaro ku muryango".

Abakora ubucuruzi bw’abantu n’abagaragara mu ruhererekane rwabwo, bifashisha ibihugu binyuranye nk’inzira banyuramo bari muri ibyo bikorwa, kandi n’u Rwanda byagaragaye ko naho bahanyura(transit country), berekeza mu byo bategeramo indege cyangwa ibyo babukoreramo nyirizina.

Abahagarariye ibyiciro birimo urubyiruko, abagore, abanyamadini, abikorera bo mu Karere ka Musanze, nk’Akarere gahana imbibi n’igihugu cya Repubulika Iharanira Demokarasi ya Kongo, kandi katari kure y’umupaka uhuza u Rwanda na Uganda, bahurijwe hamwe mu biganiro bigamije kubasobanurira imiterere y’ikibazo cy’icuruzwa ry’abantu, uko baryirinda no kurikumira.

Bizimungu Thierry, Umuhuzabikorwa w’Umuryango Never Again Rwanda mu Karere ka Musanze, ari na wo wateguye ibyo biganiro, avuga ko urugendo rwo gukumira icuruzwa ry’abantu rusaba ubufatanye, kuko ari n’icyaha gikorwa binyuze mu ruhererekane rw’abantu.

Yagize ati: "Urwo ruhererekane rw’ababukora barimo abajya gushaka abacuruzwa, ababareshya, ababajyana aho bagomba gucururizwa, ababacumbikira mu mayira baba banyuzwamo. Dutekereza ko kuganiriza inzego zigizwe n’ibyiciro by’abaturage bahagarariye abandi, bakerekwa uburyo iryo curuzwa rikorwamo, amayeri akoreshwa ndetse bagasobanukirwa ingaruka bigira, byadufasha gukumira ahantu hose rishobora kumenera nk’abantu bahorana n’abandi benshi mu nshingano bafite za buri munsi".

Nyiramugisha Denyse ukuriye Inama y’Igihugu y’Abagore mu Karere ka Musanze akaba yari anahagarariye ubuyobozi bwako muri ibi biganiro, yavuze ko bagiye kurushaho gukaza ingamba zo gukumira iki kibazo harimo no kujya baganiriza abaturage mu Nteko z’Abaturage, Umuganda n’izindi bahuriramo ari benshi.

Ubushakashatsi bwakozwe na Never Again Rwanda mu mwaka wa 2019, bwagaragaje ko abantu bacurujwe bavuye mu Rwanda bari ku kigero cya 13,6%.

Ibihugu bigaragaramo icuruzwa ry’abantu ni byinshi, ariko muri byo harimo nka Saudi Arabia, Uganda, Kenya, Tanzaniya, Mozambique, Afurika y’Epfo, Malawi, Malaysia, Oman, Qatar, Dubai n’ibindi.

62,7% by’abanyuzwa mu Rwanda baba baturutse mu Burundi naho 15% bo baba baturutse muri Repubulika Iharanira Demokarasi ya Kongo(RDC).

Icuruzwa ry’abantu rifatwa nk’ubucakara, rikaba icyaha gisobanurwa byimbitse mu Itegeko nimero 51/2018 ryo ku wa 13/08/2018 ryerekeye gukumira, kurwanya no guhana icuruzwa ry’abantu no gushakira inyungu mu bandi.

Icuruzwa ry’abantu kandi, ryagize ingaruka mu buryo butandukanye, ku bantu basaga Miliyoni 24 ku isi hose, biganjemo abagore utirengagije abagabo n’abana.

Imiti yahagaritswe mu Rwanda bitewe n’uko ubuziranenge bwayo bukemangwa

Uyu muti wahagaritswe nyuma y’ubusesenguzi bwakozwe n’Ikigo FDA, cyasanze nimero yawo warahinduye ibara riba iry’ikigina mu mwanya wo kuba ibara ry’umweru, ibyo nk’uko byagaragajwe mu itangazo ryashyizweho umukono n’Umuyobozi Mukuru wa FDA Prof Emile Bienvenue, bikaba bihabanye n’ibipimo by’ubuziranenge ugomba kuba wujuje.

Ni mu gihe undi muti uzwiho kuvura zimwe na zimwe z’amaso wahagaritswe, witwa TETRACYCLINE HYDROCHLORIDE OPHTHALMIC OINTMENT USP 1% W/W STERILE ufite nimero 23038, ukorwa n’uruganda rwitwa Curis Lifescience Pvt Ltd rwo mu buhinde, Ikigo FDA muri raporo zagiye zikorwa zigashyikirizwa Ikigo FDA nacyo kikaziheraho gikora ubusesenguzi, cyasanze ibara rya nimero y’uyu muti ryarahindutse umukara aho kuba ibara ry’igikina, ibyo bikaba bihabanye n’amategeko ngenderwaho y’ibipimo byawo by’ubuziranenge.

Abaganga n’abahanga mu by’imiti, abakoresha imiti, Abafite ububiko bw’imiti n’amashami yabo yose, abinjiza imiti mu gihugu, Farumasi ziranguza n’izidandaza, amavuriro ya Leta n’ayigenga byo mu gihugu hose, byamenyeshejwe mu itangazo ryasohotse tariki 30 Kamena 2024, ko izo nimero z’imiti zihagaritswe kandi ko bitemewe kuzikoresha no kuzikwirakwiza, ahubwo ko bagomba kwihutira kuyisubiza aho yaturutse.

Ikigo FDA kandi muri iryo tangazo cyanamenyesheje abo bireba bose ko hagomba gukorwa raporo igizwe n’imibare y’ingano y’umuti waranguwe, iyagurishijwe, iyagaruwe ndetse n’itaracurujwe; ibyo bigakorwa mu gihe kitarenga iminsi 10 y’akazi uhereye igihe itangazo ryasohokeye ndetse iki kigo kiboneraho no kuburira abantu bari baratangiye kuyikoresha nyuma yo kuyandikirwa na muganga, kureka gukomeza kuyikoresha.

Ababyeyi bagishora abana mu mirimo ibujijwe bagamije indonke z’amafaranga baraburirwa

Bamwe mu bana bashorwa mu mirimo nk’iyo, barimo na Ituze Devotha, w’imyaka 13, Kigali Today iherutse guhura na we yikoreye umutwaro w’ibisheke, avuye kubirangura mu Cyabingo mu Karere ka Gakenke, agaruka ku ngorane agirira muri ubwo bucuruzi amaze imyaka itatu akora.

Ati: “Mbyuka saa kumi z’igitondo, nkaturuka i Musanze mu Murenge wa Nyange aho dutuye, nkajyana n’abandi bana duturanye kurangura ibisheke mu Gakenke. Dukora urugendo rw’amasaha ane n’amaguru kugira ngo tugere aho tubirangurira kuko ariho tubibona ku giciro gitoya. Tuhahurira n’abandi benshi na bo baba baje kurangura, hakaba ubwo tuhiriwe, ku izuba ryinshi, umuntu atanariye, mu gutaha nkongera kugenda ya masaha hiyongereyeho n’umutwaro w’ibisheke ku mutwe”.

“Kubera uko kwikorera ibiremereye, nsigaye ndibwa umugongo n’amaguru nkeka ko byatewe n’urugendo nkora inshuro zitari munsi y’enye mu cyumweru nikoreye ibintu biremereye, hamwe n’igicuku mba nazindutse cyangwa amajoro ku bwo kuba ngira ngo byibura mbone n’aho nkura nk’igihumbi cy’inyungu, yo kunganira ababyeyi ku byo baduhahiramo ibyo kurya”.

Gushishikariza abana kureka imirimo ibujijwe bitabira kujya mu ishuri, bikwiye guhera ku babyeyi nk’abantu babafite mu nshingano kandi bahorana na bo umunsi ku munsi.

Kayiranga Théobard Umuyobozi w’Akarere ka Musanze wungirije ushinzwe imibereho myiza y’abaturage agira ati: “Hari ababyeyi bigaragara ko muri iki gihe badohotse bakaba batacyitabira kuboneza urubyaro, bikabaviramo kubyara abana badashoboye kurera”.

“Muri abo harimo aho usanga badashoboye kubarera, rimwe na rimwe hakaba ababashoye mu mirimo, babitezeho amafaranga. Twumva ababyeyi bakwiye kumva ko mbere na mbere aribo bafite inshingano zo kurera abana no kubakundisha ishuri, bagakumira ibintu byose byabavutsa ayo mahirwe cyane ko n’amashuri kuri ubu ari ubuntu n’amafaranga batanga yo gufatira ifunguro ku ishuri akaba ari macyeya”.

Akarere ka Musanze kari kunoza gahunda yo gufatanya n’urubyiruko ruzajya rukurikiranira hafi umwana wese uzajya agaragara mu buzererezi cyangwa mu mirimo ibujijwe, aganirizwe hagamijwe kumenya igituma abyishoramo, afashwe gusubira mu muryango nibiba ngombwa anahabwe ubufasha butuma aguma mu muryango.

Ibikoresho bifashisha ni ibiboneka mu buryo bworoshye

Zimwe mu nyubako iri koranabuhanga ryavumbuwe n’aba bana rishobora kwifashishwamo hacungwa umutekano wazo ni ibitaro. Aho nk’imodoka cyangwa umuntu mu gihe ageze ku marembo cyangwa ubwinjiriro bwabyo, urugi rwifungura akaba yakwinjiramo, yaba ari nk’ugenzwa n’umugambi mubisha urugero ari nk’umujura, rikamutangira amakuru akaba yahita afatwa atarawushyira mu bikorwa.

Manzi agira ati: “Twatekereje ku kuntu mu kubungabunga umutekano w’inyubako zihuriramo abantu benshi bigendana n’umubare utari muto w’abakozi bashinzwe ako kazi, bagakora mu buryo buhoraho ari benshi, bigasaba n’ikiguzi kitari gitoya mu kubahemba, nyamara ba nyirazo bakabaye bagishora mu bindi”.

Abo bana bombi bashyikirijwe ibihembo bigizwe na mudasobwa n’ibindi nyo kubafasha mu myigire

“Ikoranabuhanga rero turimo gukoraho, dufatiye urugero nko ku bitaro, nk’umuntu cyangwa imodoka mu gihe igeze ku muryango winjira mu bitaro, twarikoze mu buryo robo ihita ikurura amakuru umuryango ugahita wikingura nta muntu uwukozeho, akaba yakwinjira akajya muri serivisi akeneye. Ni nako kandi haramutse hari nk’umuntu ufite umugambi wo kugira icyo ahungabanya, iri koranabuhanga ryubatse mu buryo amakuru ahita agera ku babishinzwe akaba yafatwa atarawugeraho”.

Ni umushinga bavuga ko bafite intumbero yo gukomeza kuwuha ireme no kuwagura, ku buryo mu gihe kiri mbere, baramutse babonye amikoro, iryo koranabuhanga ryazagera ku rwego rwo gutangira kwifashishwa mu kurinda umutekano w’inyubako zo hirya no hino.

Manzi Jean Luc yerekana uko ikorananuhanga yavumbuye we Ashimwe ryafasha mu gusigasira umutekano no kwita ku isuku

Ni ikoranabuhanga bajyanishije n’iritanga igisubizo ku isuku, aho bakoze poubelle umuntu ashobora kujugunyamo imyanda atarindiriye kubanza kuyipfundura, bakora n’ubukarabiro bufite ahabugenewe hashyirwa isabuni n’ahandi haturuka amazi umuntu akoresha atarinze kubikoraho.

Ati: “Ahahurira abantu benshi nko mu bitaro, bakunze gukenera kujugunya imyanda. Za pubeli nyinshi rero, abenshi bayijugunyamo bibasabye kubanza gukozaho kimwe mu bice by’umubiri wabo, bikaba byanakoroha ko bahakura umwanda bakahandurira indwara. Igikoresho cyifungura hakoreshejwe ikoranabuhanga, umuntu akaba yakijugunyamo imyanda atagikozeho, nacyo twabonye ko cyaba ingenzi mu gukumira imyanda”.

Ibyinshi mu bikoresho bifashisha, ni ibiboneka mu buryo bworoheje birimo nk’amakarito yakoreshejwe, imipfundikizo y’amacupa yavuyemo imitobe n’ibindi.

Imishinga y’ikoramabuhanga abana bakomeje gukora benshi bayihanze amaso kuzaba igisubizo

Mu birori byo kwizihiza Umunsi mpuzamahanga w’Umwana w’Umunyafurika byabaye ku rwego rw’Akarere ka Musanze kuwa Kane tariki 27 Kamena 2024, abana b’abanyeshuri bo mu bigo bibarizwa mu Karere ka Musanze, bitabiriye amarushanwa yahereye ku rwego rw’ibigo, akazamuka ku rwego rw’Imirenge, bamuritse imishinga bavumbuye biturutse ku isomo ry’ubumenyi mu by’ikoranabuhanga Science Elementary Technology (SET) biga mu ishuri.

Habumugisha Emmanuel Umukozi w’Ikigo cy’Igihugu gishinzwe imikurire no kurengera umwana NCDA mu Karere ka Musanze, avuga ko: “Impano nk’izi kuzishyigikira, tukarinda ko abana baziherana mu mpapuro, ahubwo tukabaha urubuga bazamuriramo ubwo bumenyi byatanga ibisubizo by’ahazaza ku kwikemurira ibibazo bihari, cyane cyane byubakiye ku ikoranabuhanga”.

Vice Mayor Kayirenga (wicaye hagati)

Umuyobozi w’Akarere ka Musanze wungirije ushinzwe imibereho myiza y’abaturage Kayiranga Theobald yavuze ko uko iterambere ry’ikoranabuhanga rirushaho kwaguka, abana badakwiye gusigara inyuma cyangwa ngo barivutsweho uburenganzira; kandi ibi bigahera mbere na mbere mu muryango.

Mu yindi mishinga abana b’abanyeshuri bo mu bigo by’amashuri abanza bitandukanye bakoze, ni nk’uw’indege itagira umupilote (Drone), imodoka ikoranywe ikoranabuhanga rikumira impanuka, imashini isukira imyaka, ikonjesha amazi cyangwa igashyushya amazi.

Abana baturutse mu bigo by’amashuri bitandukanye bahawe umukoro wo gukunda ikoranabuhanga

Uw’ikoranabuhanga rifasha mu gucunga umutekano w’inyubako zihuriramo abantu benshi no kunoza isuku yazo ari na wo wahize indi, muri abo bana bombi bawuvumbuye buri wese yahembwe mudasobwa, igikapu kirimo amakayi n’ibindi bikoresho by’ishuri.

Abana binyuze mu mbyino basusurukije abitabiriye umunsi w’umwana w’umunyafurika

Mukazibera Liberatha agira ati: “Hambere aha bitarubakwa, hari abantu benshi bazahazwaga n’indwara, kwa muganga baba batabashije kumenya ubwo aribwo bakayoboka iy’ibinyarwanda babwitiranya n’amarozi, bikaba byanagera ku rwego rwo kumuhitana bitewe no kutamenya ngo arwaye iki n’iki".

Akomeza agira ati, “Aho ibi bitaro biziye mu mwaka wa 2012, bakabishyiramo n’inzobere mu gusuzuma no kuvura kanseri, abaturage twatangiye kubigana, tugenda turushaho kumenya bimwe mu bimenyetso bya kanseri, bamwe mu bayirwaye barabigana barimo n’abagiye bivuza bagakira, bidukura mu rujijo twahozemo kuburyo ubu tutakiyitiranya n’amarozi".

Iyi ntambwe yatewe mu rwego rw’ubuvuzi, abaturage bongeye kuyishimangira ku wa gatatu tariki 26 Kamena 2024, mu gikorwa cyo kwiyamamaza kw’abakandida Depite mu Nteko Ishinga Amategeko, bo mu muryango FPR-Inkotanyi, cyabereye mu Murenge wa Butaro ibyo bitaro ndetse na Kaminuza biherereyemo.

Abakandida Depite batatu ari bo Ndayambaje Theoneste, Uwimana Modeste ndetse na Nyiramana Christine wavuze mu izina ryabo ubwo biyamamarizaga muri ako Karere, yavuze ko ibyinshi byakozwe mu byiciro byose by’imibereho, Umuryango FPR-Inkotanyi, witeguye kubikomerezaho mu gihe baramuka bawugiriye icyizere bagatora umukandida Paul Kagame ku mwanya wa Perezida ndetse n’abakandida Depite bawo.

Uwimana Modeste, Nyiramana Christine na Ndayambaje Theoneste nibo bahagarariye abandi kuri site ya Butaro ku Karere ka Burera nk’abakandida Depite b’umuryango RPF Inkotanyi

Ati: “Gutora Kagame Paul nka Perezida w’Igihugu ndetse n’Abadepite bo mu muryango FPR-Inkotanyi, ku baturage bacu bazaba barebye kure mu gushyigikira politiki iteza imbere umutekano, ubuzima, uburezi n’izindi gahunda zose zigamije gushyira umuturage ku isonga. Twaje kwifatanya rero ngo twibukiranye ibyo bigwi, tunarebere hamwe umusaruro byatugejejeho, dukomeze dufatanye mu kongera n’ibindi bishya kandi Umuryango FPR-Inkotanyi witeguye mu buryo budasubirwaho gushyigikira no gufasha umuturage wese kubigeraho”.

Ku baturage bo ngo itariki 15 Nyakanga 2024, itinze kugera bakazindukira mu gikorwa nyirizina cyo kwitorera Umukuru w’Igihugu hamwe n’Abadepite bitezeho gukomeza gushyigikira no gushyiraho ingamba z’ibikorwa bizamura iterambere ry’umuturage.

Ibitaro bya Butaro nibura buri mwaka byakira abatari munsi y’1800 bivurizamo indwara ya Kanseri, biheruka gushora miliyari zisaga 14 z’amafaranga y’u Rwanda mu mushinga wo kubyagura bigashyirwa ku rwego rwo rw’ibitaro bya Kaminuza.

Uretse ibi bitaro, mu bindi abaturage bishimira birimo na Kaminuza Mpuzamahanga ya UGHE, aho bemeza byabazamuriye agaciro k’ibikorwa byabo ndetse n’ishoramari, kandi byihutisha indi mishinga irimo n’uwo gukora umuhanda Base-Kirambo-Butaro-Kidaho, kuri ubu ukiri mu mirimo yo kubakwa.

Hamwe na hamwe abaturage baracyabona amazi meza bibagoye

Urwo ruganda ruzubakwa mu Kagari ka Ndago mu Murenge wa Rusarabuye, ruzaba rufite ubushobozi bwo gutunganya amazi angana ma meterokibe ibihumbi 4 ku munsi, rwitezweho kuzamura ibipimo by’abaturage bagerwaho n’amazi meza, bikava kuri 53% biriho ubu, bikagera ku bipimo biri hagati ya 75% na 80%.

Mu bagowe no kuba amazi atabegereye barimo n’abo mu Mirenge by’umwihariko yegereye igice cy’Umupaka nka Cyanika, Kagogo usanga ahenshi by’umwihariko nko mu gihe cy’izuba, amavomo yarakamye, n’aho ijerekani imwe bakayigura ku mafaranga atari munsi ya 300.

Ni ikiguzi bamwe mu baturage bavuga ko kibagora kwigondera, nk’uko Uwimana Assoumpta abigarukaho, agira ati: “Amavomo amwe menshi mu gihe cy’izuba tujya kuyavomaho tugasanga nta mazi ahari, bikaba ngombwa ko tujya kuyagura n’abayatunda ku magare baba bayavanye mu biyaga bya Burera na Ruhondo, cyangwa abafite ibigega baba bararetsemo bakaduca amafaranga ari hejuru ya 300 buri jerekani imwe”.

“Ayo mazi ubwayo aba ari mabi byongeye anahenze ku buryo umuturage w’inaha mu cyaro nk’iki bimugora kuyabona. Amavomo agira amazi mu buryo buhoraho, aba kure cyane aho bisaba gukora urugendo rutari munsi y’amasaha abiri kugira ngo ugereyo. Iyo wongeyeho n’umwanya uhamara utonze umurongo utegereje ko ugerwaho byanagusaba amasaha atari munsi y’ane. Ni ikibazo kiduhangayikishije, dusaba abatuyobora ko barebaho bakakidukemurira”.

Umushinga w’uruganda rufatiye ku kiyaga cya Burera, umaze iminsi ukorerwa inyigo kandi irimo kugana ku musozo, ku buryo nibura mu minsi itarenga 30 uzaba wamaze kunozwa maze uruganda rugatangira kubakwa nk’uko Mukamana Soline uyobora Akarere ka Burera, aherutse kubigarukaho mu cyumweru gishize.

Uruganda rutunganya amazi ruzaba rufatiye ku kiyaga cya Burera

Ati: “Ibyagezweho muri kano Karere ni byinshi, gusa iyo urebye muri gahunda yo gukwirakwiza amazi meza ho bigaragara ko tugifite urugendo rurerure kugira ngo iyo ntego igerweho kuko ubu turi ku kigereranyo cya 53%. Gusa navuga ko hari icyatangiye gukorwa mu gushaka umuti, binyuze mu mushinga wagutse w’uruganda rw’amazi rugiye gutangira kubakwa mu gihe cya vuba. Hari habanje gukorwa inyigo kandi iri kugana ku musozo, kuburyo twiteze ko urwo ruganda rugiye kuzubakwa nirwuzura, igipimo cy’abegerewe n’amazi meza kiziyongera mu buryo bufatika”.

Abaturage basanga haramutse hanogejwe ingamba zo kubegereza amazi meza, uretse kubaruhura imvune zituruka ku ngendo ndende bakora bajya kuyashaka, ngo bizanagabanya ingaruka z’indwara z’inzoka baterwa n’amazi y’ibirohwa, utaretse n’impanuka bagirira mu kiyaga cya Burera mu gihe bagiye kukivomamo amazi, dore ko no mu minsi ishizwe hari abana babiri bakirohamyemo ubwo barimo bavomamo amazi.

Mu Ntara y’Amajyaruguru Akarere ka Burera kaza inyuma y’utundi Turere mu kugeza amazi meza ku baturage mu gihe Akarere ka Musanze ariko kari imbere y’utundi Turere tw’iyi ntara n’impuzandengo iri hejuru 90%.

Kuri bamwe, ngo ntibigeze baryama kuko iyi tariki bari bamaze igihe kinini bayitegereje, ngo bakire umukandida Paul Kagame wiyamamariza umwanya w’Umukuru w’Igihugu.

Umwe muri bo yagize ati: “Twazindutse ngo tugere aho Paul Kagame yiyamamariza hakiri kare bityo bitworohere no gukurikirana neza impamba umukandida wacu aduhishiye kuri uyu munsi y’imigabo n’imigambi ateganyiriza abanyarwanda”.

“Twaje kumushyigikira ngo tumwereke uburyo tumukunze byimazeyo, kuko umunezero turimo ubu, umutekano n’iterambere ni we tubikesha. Rero twiteze ko hari n’ibindi byinshi aduteganyiriza, Imana idufashe gusa azatorwe kandi natwe tumuri inyuma”.

Aba baturage bavuga ko banyotewe no kwiyumvira imigabo n’imigambi y’ibyo abateganyiriza mu gihe yaramuka atorewe kuyobora igihugu muri manda y’imyaka itanu iri imbere.

Umubare munini baba abakuru ndetse n’urubyiruko, bari bambaye imyambaro igizwe n’imipira, abandi ingofero, bafite ibyapa abandi amabendera bigaragaraho ibirango by’Umuryango RPF Inkotanyi.

Umujyi rwagati wa Musanze hari hatatswe umutako rutura uriho amatara yaka mu ibara ritukura ndetse n’ubururu, ku rundi ruhande hagaragara aharimbishijwe hifashishijwe ibitambaro by’amabara y’umweru ubururu n’umutuku. Abaturage bavuga ko ubu ari uburyo bwo kugaragaza ko bishimiye kwakirana yombi umukandida wabo Paul Kagame.

Nk’uko ingengabihe y’amatora y’Umukuru w’Igihugu ibigaragaza, ibikorwa byo kwiyamamaza byatangiye kuri uyu wa Gatandatu tariki 22 Kamena 2024. Ku ikubitiro, Akarere ka Musanze kakaba ari ko kabimburiye ahandi mu kuberamo ibikorwa byo kwiyamamaza ku ruhande rw’Umukandida w’Umumuryango RPF Inkotanyi.

Reba ibindi muri iyi Video:

Amafoto: Rwigema Freddy

Video: Salomo George

Mu Karere ka Rulindo ba Gitifu bane birukanywe ku mirimo bazira kutuzuza inshingano

Abo barimo ab’Imirenge ibiri harimo Ndagijimana Frodouard wayoboraga umurenge wa Mbogo na Nzeyimana Jean Vedaste wayoboraga Umurenge wa Cyinzuzi.

Abandi babiri bayoboraga Utugari, barimo Nsengiyumva Samuel wayoboraga Akagari ka Muvumo mu Murenge wa Shyorongi, na Biringiramahoro Efasto wayoboraga Akagari ka Taba mu Murenge wa Rusiga.

Amakuru ku iyirukanwa ry’aba banyamabanganshingwabikorwa, yemejwe n’umuyobozi w’Akarere ka Rulindo Judith Mukanyirigira agira ati: “Birukanywe bazizwa ko batakoraga akazi kabo neza, no kwifashisha ububasha bafite bakabukoresha mu nyungu zabo bwite. Hari n’andi makosa yagiye agaragara, ndetse bamwe muri bo bagiye bayahuriyeho cyane cyane nko gukora akazi kabo nabi, bikaba byatezaga ingaruka ku nyungu rusange mu buryo butakwihanganirwa”.

Inshingano abo bayobozi bakoraga, zahawe abandi bakozi mu buryo bw’agateganyo mu gihe hagitegerejwe abandi bashya nk’uko Mukanyirigira yakomeje abivuga.

Ati: “Byabaye ngombwa ko tuba dushatse abandi bakozi bafite ubumenyi buri ku rwego rw’inshingano abirukanywe bari barahawe, ni bo bagiye kuba bakora mu buryo bw’agateganyo mu gihe tugitegereje abakozi bashya bazabasimbura”.

Yakomeje agira ati, “Turasaba abakozi bose muri rusange kujya bakora akazi kabo uko bikwiye, inshingano zabo bashinzwe bakazikora neza kandi bubahiriza amategeko tugenderaho mu buryo bukwiye. Ku baturage bo, nababwira ko batagomba kugira impungege kuko gutanga serivisi ntabwo byahagaze, akazi karakomeje nk’uko bisanzwe, serivisi zose bakenera barazihabwa nta nkomyi”.

Bivugwa ko mbere y’icyemezo cyo kwirukana aba banyamabanga Nshingwabikorwa, bari bamaze amezi atatu barahawe amabaruwa abahagarika mu buryo bw’agateganyo.

Guverineri Mugabowagahunde arimo yereka umwe mu bagitifu imiterere ya moto n’uko bayitwara

Abanyamabanga nshingwabikorwa b’Utugari 62 muri 69 tugize Akarere ka Burera, nibo ku ikubitiro bashyikirijwe moto nshya mu gikorwa cyabereye ku biro by’Akarere ka Burera kuwa kabiri tariki 18 Kamena 2024.

Twahirwa Joseph, Uyobora Akagari ka Gacundura mu Murenge wa Rusarabuye, agira ati: “Hari ubwo umuturage yampamagaraga ari nk’ahantu bisaba gukora urugendo mu misozi ihanamye, bikaba ngombwa guca mu nzira z’imisozi n’amaguru bitewe n’uko nta bushobozi bufatika nabaga mfite bwo gutega bya buri kanya. Byamvunaga, nkacyererwa, rimwe na rimwe nkanahagera ntacyo nkibashije kuramira kubera kuhagera bigoranye. Ubu kuba mpawe iyi moto, ni inyoroshyo igiye koroshya akazi kanjye”.

Ku ikubitiro abanyamabanga Nshingwabikorwa b’Utugari 62 nibo bahawe moto, abandi basigaye na bo hari gahunda yo kuzibagezaho bidatinze

Uwamahoro Gloria avuga ko bagiye kongera igihe n’iminsi yo kumva ibibazo by’abaturage no kubafasah kubibonera igisubizo. Ati: “Tugiye kujya dukora ku manywa, yewe n’ijoro ntituzaritinya kuko ubu noneho ibyadufasha kubasanga aho bari yaba hafi cyangwa kure tubifite. Abaturage nibatwitegeho kunoza serivisi, nta muntu uzatugana ngo agire icyo atuburana kandi duhari”.

Ibi byishimo byo kuba bahawe moto nshya, aba bayobozi babisangiye n’abaturage bagereranya icyo gikorwa, n’intsinzi bakesha imiyoborere myiza.

Guverineri w’Intara y’Amajyaruguru Mugabowagahunde Maurice, avuga ko izi moto, zizoroshya inshingano z’abanyamabanga nshingwabikorwa, ndetse ibi ngo byafatwa nk’intangiriro y’urugendo rugikomeza rwo gushyigikira urwego rw’Akagari yaba mu bikoresho n’abakozi.

Ba Gitifu barimo na Joseph bavuga ko akazi kagiye kurushaho kunoga kubera moto bahawe

Ati: “Byari bikwiye ko boroherezwa mu nshingano duhereye ku kubashyikiriza izi moto zizajya zibafasha kwegera abaturage. Ni gahunda igiye kuzunganirwa n’iyo twatangiye yo kuvugurura utugari twari dushaje no kubaka ututaragiraga aho gukorera. Ibi byose ni mu rwego rwo kuzamura urwego rw’Akagari binyuze mu kuhagira ahantu hasobanutse. Ntabwo twifuza kumva Gitifu wakinze ibiro agatakaza umwanya yakabaye akoresha mu kwakira abaturage, ngo yagiye gutira igikoresho ibunaka kuko atagifite. Tumaze iminsi twumvikanye n’Uturere ko ibyo bikoresho harebwa uburyo byakongerwa, ba Gitifu bakorere ahantu hasa neza”.

Yunzemo ati: “Moto ntabwo ari izo kujyana mu bikorwa by’ubucuruzi, ngo bazihindure izo kwirirwa zitwaweho abantu cyangwa imizigo bibinjiriza amafaranga. Icyo zigenewe ni ugukora ibiri mu nyungu mbere na mbere zicyemura ibibazo byugarije umuturage, iz’igihugu n’iz’umuryango muri rusange. Niyo mpamvu rero tubatumye ngo bagende bazikoreshe icyo baziherewe, bongereho no kuzibungabunga”.

Guverineri Mugabowagahunde yabasabye abahawe izi moto ko atari izo gushora muri bizinesi

Ni moto zibarirwa mu gaciro k’amafaranga y’u Rwanda ari hagati ya Miliyoni ebyiri na Miliyoni eshatu buri imwe; abazihawe bakazagenda bazishyura gahoro gahoro.

Ni gahunda iteganyijwe mu Tugari twose tugize Intara y’Amajyaruguru, aho zizagenda zitangwa mu byiciro.

Guverineri w’Intara y’Amajyaruguru Mugabowagahunde Maurice, ubwo yayoboraga umuhango wo kuzibashyikiriza ku mugaragaro kuwa kabiri, yabibukije ko izi moto atari izo gushora muri za bisinesi, ahubwo ko zigenewe kubafasha kuzuza inshingano zabo, kugira ngo bashyire umuturage ku isonga.

Impanuro Guverineri Mugabowagahunde yahaye abarimo n’aba Gitifu b’Utugari harimo ko badakwiye gukoresha moto bahawe ibyo zitagenewe

Abayobozi batandukanye bataha ibiro bishya by’Akarere ka Burera

Iyi nyubako igeretse gatatu, igaragara mu mabara y’umweru, oranje, ubururu bwijimye n’ibara ry’umukara, iherereye mu Mudugudu wa Rutuku Akagari ka Kabona mu Murenge wa Rusarabuye.

Mu gitondo cyo ku wa Kabiri tariki 18 Kamena 2024, akanyamuneza kari kose ku baturage baturutse imihanda yose, mu Mirenge igize aka Karere, bahawe rugari bayitambagira yose uko yakabaye, ngo birebere imiterere yayo.

Uzaberwa Clementine agira ati: “Ni etaje nagereranya na zazindi zo muri Amerika. Nayitambagiye ndeba ukuntu yubakanwe ubuhanga, biragaragara ko ijyanye n’igihe koko; iratangaje, njye byandenze mu buryo udashobora kwiyumvisha”.

Ubuyobozi bwasabye abaturage kujya babigana ariko bakitabira na gahunda zose bafatanya n’ubuyobozi

Ntawuruhunga Dimonique we abona ntaho itandukaniye n’amagorofa za Minisiteri zikoreramo y’I Kigali. Ati: “Iri ku rwego rwa za Minisiteri neza neza. Ibi biro biraboneye, bibereye urwego twe nk’abaturage ubuyobozi bwacu butugejejeho rw’iterambere. Ntitwari twarigeze dutekereza ko inaha iwacu haza inzu nk’iyingiyi, none dore birangiye ayo majyambere atugezeho”.

Ibi biro bishya, babyitezeho kujya babihererwamo serivisi zinoze, mu buryo bwihuse; bitandukanye n’iyari isanzweho ibyo biro byakoreragamo kuva mu myaka myinshi itambutse, yari ntoya ishaje nk’uko Ndacyayisenga Anaclet yunze mu rya bagenzi be.

Ibyishimo byari byose ku baturage b’Akarere ubwo bigereraga muri iyi nyubako bakareba imiterere y’aho bazajya bahererwa serivisi

Agira ati: “Ukurikije ukuntu twayibonye n’uburyo iteye imbere, dukeneye ko n’imitangire ya serivisi izajyana n’urwego iriho. Niba tuje kwaka serivisi, bajye batwakira neza, birinde kuturangarana cyangwa kudusiragiza. Dushaka imiyoborere n’imikorere bijyanye n’iki gikorwa remezo gifatika batwubakiye, kuko aribyo bizatuma tuba ku isonga mu iterambere”.

Ngo nta wundi bakesha ibi, utari Nyakubahwa Prezida wa Repubulika y’u Rwanda Paul Kagame, ukomeje kwimakaza Politiki y’imiyoborere myiza, inogeye abaturage. Ngo mu kumwitura ibyo bikorwa byose, bazarushaho kubibungabunga by’umwihariko bafata neza iyi nyubako.

Yubatswe mu buryo bwujuje ibisabwa mu kwakira ababigana

Ku ruhande rw’Abakozi b’Akarere ka Burera, na bo basanga hari uruhare runini igiye kugira mu kunoza inshingano zabo.

Meya w’aka Karere Mukamana Soline agira ati: “Ubu tugiye guhatanira kuzamura igipimo cy’imitangire ya serivisi, zigamije kumva umuturage, kujya inama na we no gufatanya kugira ngo urwego yari ariho, aruveho agere ku rundi rwego rushimishije. Kuba dutangiye gukorera mu nzu yagutse kandi nziza, ni kimwe mu bizadufasha kubigeraho mu buryo bwihuse, kandi ibyo turabibijeje”.

Ni ibiro abaturage nishimira ko byagutse Kandi bijyanye n’igihe

Igikorwa cyo kumurikira abaturage Ibiro bishya by’Akarere ka Burera, cyayobowe na Guverineri w’Intara y’amajyaruguru Mugabowagahunde Maurice, yasabye abaturage kujya bayigana ariko kandi bakagira uruhare rufatika mu kubahiriza gahunda za leta zose zibareba, kuko aribwo icyo yashyiriweho kizaba kigezweho.

Aho Akarere gashya kubatse, hakomeje kugezwa n’ibindi bikorwa remezo nk’imihanda, amashanyarazi n’amazi meza, ku buryo abahatuye na bo, biteze umuvuduko wihuse w’iterambere rihereye kuri ibyo bikorwa remezo, byagiye binatanga imirimo ku batari bacye.

Ibiro by’Akarere ka Burera byuzuye bitwaye Miliyari 2 na Miliyoni 996 y’u Rwanda

Aho iri yitegeye ikiyaga cya Burera

Uwimbabazi Liliane yegukanye igihembo nk’uwahize abandi mu cyiciro cy’abakobwa

Iri rushanwa ribereye mu Karere ka Musanze ku nshuro ya kabiri, ryitabiriwe n’urubyiruko rutwara abagenzi n’ibintu ku magare (Abanyonzi) 34, barimo abasore 29 n’abakobwa 5 bose hamwe bo mu Karere ka Musanze.

Mu ma saa yine n’iminota 16 z’igitondo cyo kuri iki cyumweru tariki 16 Kamena 2024, nibwo bari bahagurutse mu muhanda uri imbere y’Isoko ry’ibiribwa rya Musanze rizwi nka Kariyeri, bakomereza mu wo kuri Snow Hotel-Cyanika-Sonrise-Nyarubande basubira aho bahagurukiye, urugendo bazengurutse inshuro eshatu ku bahungu rureshya n’ibirometero 21 n’inshuro ebyiri ku bakobwa rureshya n’ibirometero 14.

Niyomugabo Jean Claude wegukanye igihembo cy’irushanwa ry’isiganwa ry’abatwara abagenzi ku magare mu bagabo, yakoresheje iminota 30 n’amasegonda 4 mu gihe Uwimbabazi Liliane yegukanye igihembo nk’uwahize abandi mu cyiciro cy’abakobwa, akoresheje iminota 29 n’amasegonda 3.

Niyomugabo Jean Claude wegukanye igihembo cy’irushanwa ry’isiganwa ry’abatwara abagenzi ku magare mu bagabo

Mu byishimo byinshi nyuma y’uko bari bamaze guhiga abandi bakanahembwa igare rishya kuri buri wese, aba bombi batangaje ko guhiga abandi, babikesha imyiteguro bagiye bakora, kwitinyuka bakumva ko bashoboye, ariko kandi bishingiye no ku myitwarire myiza basanganwe yo kuba batishora mu biyobyabwenge cyangwa izindi ngeso mbi.

Niyomugabo agira ati: “Ibanga nta rindi ni ukuba ntagendera mu bigare byo kunywa ibiyobyabwenge n’ibindi bisindisha no gukunda siporo. Ubwo namenyaga ko aya marushanwa ateganyijwe, nakunze kujya nitoza kenshi, nkajya nkunda kunyura mu mihanda twakoreyemo uyu munsi, ibyo bikaba byaragiye bimfasha gusigasira imbaraga z’umubiri no kumenya neza imiterere yaho, ku buryo ubwo twakoraga amarushanwa nyirizina, byahuye n’uko nari mpamenyereye binyorohera guhiga abandi”.

Yakomeje agira ati, “Nanone kandi gukunda umurimo bituma biri mu bimfasha cyane, bikampa imbaraga zo kwirengagiza ikintu cyose cyanca intege. Turacyafite abantu bagitekereza ko umwuga wo gutwara abagenzi ku igare ukorwa n’abantu b’abakene babuze ibindi bakora. Gukora irushanwa nk’iringiri rero, buba ari n’uburyo tuboneramo akanya ko kugaragaza ko akazi kose umuntu yakora kamubyarira inyungu kakamugeza kuri byinshi”.

Uwimbabazi umaze imyaka itatu mu mwuga wo gutwara imizigo ku igare, aho ubu afite ubuhobozi bwo kuritwaraho ibiro bibarirwa muri 300, ibi bikaba byaranamukuye ku rwego rwo gutwarira abandi, yigurira amagare ane ye, harimo iryo yitwarira ku giti cye andi akaba atwarwa n’abo yahaye akazi, bamuverisa buri munsi.

Agira ati: “Irushanwa ndyitabiriye ku nshuro ya kabiri. Twe nk’abana b’abakobwa tuba tugira ngo twereke bagenzi bacu ko bakwiye kwitinyuka bakumva ko bifitemo imbaraga zo kuba bakora bakiteza imbere, bidasabye ko bishora mu bikorwa bigayitse nk’ubujura cyangwa ubusambanyi. Nkanjye ubu ku munsi simbura amafaranga ibihumbi 5 nkorera, aza yiyongeraho ayo abo nagiye nkodesha amagare banyishyura, ku buryo yose hamwe haba n’igihe ageze mu no bihumbi 10 ku munsi. Nta kibazo na kimwe nshobora kugira ngo mbure kucyikemurira ntarindiye gutega ababyeyi cyangwa abandi bantu amaboko. N’abandi rero nibareke kwicara ngo bumve ko akazi kabuze”.

Ni irushanwa ryateguwe ku bufatanye bw’Akarere ka Musanze na Koperative itwara abagenzi ku magare CVM hagamijwe kwerekana ko hirya yo gutwara abagenzi n’ibintu ku magare, hari n’izinidi mpano abakora uyu mwuga bifitemo nk’uko Perezida w’iyi Koperative Evariste Mutsindashyaka abivuga.

Perezida wa Koperative itwara abagenzi ku magare CVM, Evariste Mutsindashyaka

Yagize ati: “Abakoresha amagare mu kuyatwaraho abagenzi n’ibintu bashobora no kuyakoresha mu kugaragaza izindi mpano bifitemo zishimisha abandi zirimo nka siporo kuko nk’uko byagiye bigaragara, ku mihanda bagiye banyuramo abaturage bari baje kubareba, babogeza, ubona ko banejejwe no kubabona basiganwa. Twishimira iyi siporo ariko bikajyana n’ibikorwa remezo ubuyobozi bwacu bukomeje kutuzanira byoroshya n’izo ngendo nk’imihanda mishya myiza ya kaburimbo ikoze neza, kuko idahari abo batwara amagare babangamirwa n’ingendo bakora za buri munsi”.

Yunzemo agira ati, “Hari amasoko mashya ajyanye n’igihe bagemuramo umusaruro baba bakuye mu bahinzi cyangwa n’abagenzi ubwabo bayajyamo n’abayavamo, n’ibindi bikorwa bituma na bo biborohera kubona amafaranga. Izi mbaraga zose zagiye zikoreshwa ni umwanya wo gukebuka tukareba ngo mbese ni uwuhe musanzu wacu mu kuzisigasira”.

Umuyobozi wa Polisi mu Karere ka Musanze SP James Bagabo

Mu butumwa abatwara abagenzi ku magare bahawe n’abayobozi barimo ukuriye Polisi mu Karere ka Musanze SP James Bagabo, bwabahamagariye kujya bitwararika mu gihe batwaye kandi bakubahiriza amategeko y’umuhanda, mu kwirinda no kugabanya ubwinshi bw’impanuka zibera mu muhanda ko n’inyinshi zagiye zigaragara mu Karere ka Musanze zatewe n’amagare.

Yanabibukije ko mu minsi iri imbere, Akarere ka Musanze kitegura kuzacyira abashyitsi benshi mu bihe bitandukanye, bisaba abatwara abagenzi ku magare kwirinda imyitwarire yateza imbanuka.

Ntakirutimana JMV Umukozi w’Akarere ka Musanze ushinzwe urubyiruko umuco na siporo, yabwiye urubyiruko ko siporo ari ubuzima kandi ko batabasha kubusigasira baramutse bishora mu bibuhungabanya harimo n’ibiyobyabwenge kandi ibyo bikajyana no kwimakaza umuco w’isuku no kurinda ibikorwa byagezweho.

Mu bindi bihembo byatanzwe, birimo na Amprificateur

Nanone kandi ngo urubyiruko ntirubashobora gutera imbere rutanogeje umurimo rukora kandi ntirwagera ku bukungu burambye rutitabiriye kuzigama ari nako rwirinda ibikorwa bibangamiye ubuzima bwabo nk’ibiyobyabwenge, ubusinzi cyangwa ubusambanyi.

Mu bindi bihembo byatanzwe, birimo Amprificateur, Telefoni, gazi yo gutekaho, na matela birimo ibyahawe abaje ku mwanya wa kabiri ndetse n’uwagatatu mu bahungu n’abakobwa, hiyongeraho ibihembo ku mukobwa n’umuhungu bakiri batoya.

Amakuru y’urupfu rw’uwo musore w’imyaka 18 y’amavuko, yamenyekanye kuwa Mbere Tariki 10 Kamena 2024, mu ma saa saba n’igice z’amanwa, nyuma y’aho abantu banyuze mu isambu iherereye mu Mudugudu wa Marenge, Akagari ka Kigarama icyo gisimu giherereyemo bakahasanga umurambo urambitse mu masaka ahinze hafi yacyo.

Ni amakuru yemejwe na Alcade Kabayiza, Umunyamabanga Nshingwabikorwa w’Umurenge wa Masoro, agira ati: "Icyo kirombe cyahoze gicukurwamo amabuye ya Gasegereti, ariko kiza gufungwa ndetse ubwinjiriro bwacyo barabusiba kuko cyakoreshwaga mu buryo butemewe n’amategeko, yewe na nyiracyo yari yarigeze kubifungirwa".

Yakomeje agira ati, "Uwo musore rero we n’abo bari kumwe bitwikiriye ijoro, baracukura, birinjira bagezemo imbere, gaze yo mu bujyakuzimu bw’icyo gisimu ibakogota umwuka, abari kumwe na Dufitumugisha barebye basanga we yamaze gupfa. Birashoboka cyane rero ko baba barahise bareba uko bateruramo umurambo bawushyira hanze y’icyo gisimu, bahita batoroka kuko ubwo twahageraga nyuma yo guhuruzwa n’abaturage, ariho twawusanze byarangiye. Kugeza ubu ntibaramenyekana abo aribo n’umubare wabo, turacyabashakisha".

Alcade Kabayiza, asaba abaturage kwirinda kwishora mu bikorwa by’ubucukuzi bw’amabuye y’agaciro butemewe, kuko bishyira ubuzima bwabo mu kaga.

Ati: "Ibyo bikorwa bigira ingaruka, rwose abaturage bakwiye kubyirinda n’abakibirimo bakabicikaho. Abenshi babyishoramo babizi neza ko uwo bitishe bimusigira ingaruka zikomeye z’umubiri nk’ubumuga. Bakwiye kwitandukanya na byo bakayoboka ibikorwa biciye mu mucyo kuko birahari kandi ku bwinshi".

Yungamo agira ati, "Ubu turi muri gahunda yo gukorana na Rutongo Mining, kugira ngo izaduhe inzobere zizajya zikorana bya hafi n’abaturage zikanabakurikiranira hafi mu bikorwa by’ubucukuzi bw’amabuye y’agaciro bwemewe n’amategeko, kuko aho yagiye ikorera hose mu myaka irenga 15 ishize mu bice by’inaha, nta muntu urapfira mu kirombe. Rero kubona umuntu ukiri mutoya gutya, yishora muri ibyo bikorwa bimuviramo urupfu nyamara hari ibindi bifatika yakagiyemo, biba bibabaje. Abaturage bacu nibihangane, tubizeza ko bitarenze ukwezi kwa Kanama uyu mwaka iyo gahunda tuzaba twayitangiye bakagira ahafatika bakorera ubucukuzi".

Akarere ka Rulindo kazwiho kurangwamo ubucukuzi bw’amabuye y’agaciro harimo ayo mu bwoko bwa Gasegereti na Wolfram. Ahazwi cyane ni mu Mirenge ya Masoro, Ntarabana, Cyinzuzi na Murambi. Ariko rimwe na rimwe haba ubwo abaturage baca ubuyobozi mu rihumye bakayacukura mu buryo butemewe.

Abafite ubumuga bwo kutumva no kutavuga basanga hakwiye gukorwa ibishoboka hakabaho kwemeza iby’imikoreshereze y’ururimi rw’amarenga

Basanga mu gihe inzego zibishinzwe zaramuka zemeje ko rukoreshwa mu buryo bweruye, nk’uko ururimi rw’Igifaransa, Icyongereza n’Ikinyarwanda bikoreshwa mu nzego zitandukanye, abantu benshi bashishikarira kurumenya, bigatuma n’abantu bafite ubumuga bwo kutumva no kutavuga barushaho kwiyumva kimwe n’ibindi byiciro by’Abanyarwanda mu iterambere ridaheza rishingiye kuri serivisi z’uburezi, ubuzima, imiyoborere n’ibindi.

Muhoza Ali wo mu Karere ka Musanze, agira ati: “Imbogamizi duhura na zo mpereye nko kuri serivisi zitangirwa kwa muganga, hari ubwo wakirwa na muganga yaba adasobanukiwe gukoresha ururimi rw’amarenga ntabashe kumenya ikibazo nyirizina uwamugannye afite, bikaba byanamuviramo kumwandikira imiti itari yo, cyangwa uwo wivuza afite ubwo bumuga yaba yanitwaje umuntu umusemurira, bikaba ngombwa ko amenya amabanga y’uburwayi bwe nyamara bitari ngombwa”.

Muhoza yongeyeho ati “Iyo abantu bivuza kwa muganga, batonda imirongo bakabaha na nimero babahamagariraho bivurizaho. Muri uko kubahamagara rero, umuntu ufite ubumuga bwo kutumva no kutavuga, iyo ari we ugezweho ngo avurwe, ni gacye cyane azabasha kumenya ko ari we bagezeho akaba yageza na nimugoroba agitonze umurongo kuko muri kwa guhamagara nimero, we atabasha kumva. Dusanga rero izo ari zimwe mu mbogamizi zikomeje kutuzitira”.

Muhoza akomeza avuga ko atari mu rwego rw’ubuvuzi gusa bahura n’ibibazo nk’ibi kuko n’iyo bitabiriye izindi gahunda za Leta nk’Inteko z’Abaturage, Umuganda n’izindi, batabasha gusobanukirwa mu buryo bworoshye ubutumwa buzitangirwamo.

Cyo kimwe no mu mashuri, abana bafite ubumuga bwo kutavuga no kutumva, bijya bibabera ingorabahizi kumenya ibyo mwarimu yigisha mu gihe atazi gukoresha ururimi rw’amarenga, bityo n’imyigire ntibashe kugera ku rwego rumwe n’abandi nk’uko binashimangirwa na Uwitonze Hesron, umukozi w’Akarere ka Musanze ushinzwe abantu bafite ubumuga.

Ihuriro Nyarwanda ry’Abafite Ubumuga bwo kutumva no kutavuga (RNUD) hamwe n’inzego zifite aho zihuriye n’amategeko, uburezi, ubuzima n’izindi zitandukanye, zamaze iminsi ibiri mu biganiro, bisozwa tariki 11 Kamena 2024, aho zareberaga hamwe icyakorwa n’ibikibura ngo ururimi rw’amarenga rwemerwe.

Samuel Munana, Umunyamabanga Nshingwabikorwa w’Ihuriro ry’abantu bafite ubumuga bwo kutumva no kutavuga (RNUD)

Samuel Munana, Umunyamabanga Nshingwabikorwa w’Ihuriro ry’abantu bafite ubumuga bwo kutumva no kutavuga (RNUD) agira ati: “Dusanga ururimi rw’amarenga ruramutse rwemewe, Leta igashyiraho imirongo n’uburyo rukoreshwamo, byatuma n’abantu bose bagira umuhate wo kurukoresha, bikagera no ku rwego rungana n’urw’izindi ndimi nk’Igifaransa, Ikinyarwanda n’Icyongereza”.

Yongeyeho ati “Gusa iyo urebye ibyo twagiye dukora yaba ubuvugizi n’ibindi byose bisabwa twagiye twuzuza, ubona ko kurwemeza ku mugaragaro bikomeje gutinda. Aha rero twahuriye hamwe ngo turebe ni iki gisabwa, ni ibiki bigenderwaho mu rwego rw’amategeko cyangwa ubundi buryo ubwo aribwo bwose, ngo ururimi runaka rwemerwe.”

“Hano kandi turanisuzuma ngo turebe, ku ruhande rwacu hniha twaba hari ibyo tutaruzuza cyangwa tutaranoza inzego zashingiraho zikaba zarwemeza nk’ururimi abantu bakwigishwa mu mashuri, n’izindi serivisi, ku buryo ruba ururimi abantu basobanukiwe kandi bakoresha mu buzima bwabo bwa buri munsi”.

Inkoranyamagambo y’ururimi rw’amarenga yasohotse muri 2023

Mussolini Eugene, Umudepite mu Nteko Ishinga Amategeko uhagarariye Abafite Ubumuga, yigeze gutangaza mu bihe bishize ko icyizere gihari cyo kuzagera ku ntambwe nziza yo kuba ururimi rw’amarenga bizagera igihe rukemerwa nk’uko n’izindi ndimi zivugwa mu Rwanda zemewe, ariko ngo ibyo ntibyakwikora mu gihe cy’umunsi umwe cyangwa ibiri kuko bisaba urugendo kandi ruhuriweho.

Nubwo nta mibare ntakuka irashyirwa ahagaragara y’abantu bafite ubumuga bwo kutumva no kutavuga mu Rwanda kuko inzego zirimo na RNUD zikiyikusanya, ngo nibura ntibari munsi y’ibihumbi 40.

Ni abantu Mukampazimaka Sawuda, Umuyobozi wungirije wa RNUD, agaragaza ko bafite imigambi y’ahazaza mu buryo bwagutse kandi yagira akamaro mu guteza imbere iterambere ry’u Rwanda akamaro.

Ururimi rw’Amarenga mu gihe rwakwemezwa gukoreshwa mu Rwanda, abafite ubumuga bwo kutumva no kutavuga basanga yaba ari intambwe nziza itewe mu kubitaho