Abaturage bamurikirwa rimwe mu mavomero y’amazi bahawe n’ingabo z’igihugu

Ingabo za batayo ya 99 ikorera mu turere twa Rusizi na Nyamasheke ni zo zafatanyije n’abaturage bo muri uyu murenge mu kubaka uwo muyoboro.

Abaturage bo mu tugari twa Higiro na Mwezi, bavuga ko baruhutse kunywa amazi y’ibiroha banakuraga kure.

Habiyambere Anaclet ati” Twavomaga ahantu habi bikadutwara n’urugendo rurerure none mutugejejeho amazi. Turashimira Leta y’ubumwe n’Ingabo z’Igihugu mukomeje kutubungabungira ubuzima n’umutekano.”

Abaturage bagezwaho amazi bahawe n’ingabo z’u Rwanda

Col Frank Mutembe , umuyobozi wungirije w’ingabo za Brigade ya 408 ikorera mu turere twa Rusizi na Nyamasheke, yabwiye aba baturage ko ingabo z’u Rwanda zizakomeza gutanga umusanzu mu bikorwa biteza imbere abaturage.

Yagize ati” Ubu turi mu bikorwa byo gufatanya n’abaturage kwiteza imbere ntabwo turi za ngabo zicara mu bigo ngo zitegereze ko bazigaburira.”

Col Frank MUTEMBE , umuyobozi wungirije w’ingabo za brigade ya 408 abwira abaturage ko bazakomeza kubaba hafi mu iterambere

Kuba hari ibindi bice bitarageramo amazi, umuyobozi w’Akarere ka Nyamasheke kamali Aimee Fabien, avugako batazagarukira ku muyoboro bubakiwe n’ingabo gusa,.

Yagize ati” Igisigaye ni uko tuzakomerezaho kwagura uyu muyoboro, abo amazi atarageraho abagereho.”

Muri miliyoni 18 z’amafaranga zagiye kuri uyu muyoboro harimo miliyoni 10 zatanzwe n’Ingabo z’u Rwanda, hakaniyongeraho inzu yubakiwe umukecuru w’incike utishoboye wabaga mu nzu ishaje.

Ingabo zimurikira abaturage amazi zabahaye

Ingabo z’u Rwanda zimaze kugera mu turere hafi ya twose tw’igihugu zivura abaturage

Abo baturage bemeza ko ibikorwa binyuranye ingabo zibafashamo ari umusanzu ukomeye mu iterambere ry’imibereho yabo, kuko ari bo ba mbere bifitiye akamaro.

Umwe mu baganiriye na Kigali Today aho yabasanze ku bitaro bya Nyamata mu karere ka Bugesera bavurwa n’ingabo, Karekezi Thacien w’imyaka 62 wabazwe ikibyimba, avuga ko yahawe servisi nziza.

Ati “Nari mfite ikibyimba cyanzahaje iruhande rw’igitsina, nari nkimaranye imyaka itanu. Nari narivuje inshuro nyinshi bakampa imiti yaba iya kizungu n’iya Kinyarwanda cyaranze gukira. Icyakora naje hano mpasanga abasirikare bahita bakibaga bampa imiti none ndumva meze neza”.

Arongera ati “Ndashima cyane ingabo zacu zitwitaho zikaduha servisi nziza, kuba zinkijije icyo kibyimba ni ishimwe rikomeye cyane. Ubu sinzongera gutakaza umutungo w’urugo nivuza”.

Abo zivura ni abadafite ubushobozi bwo kwivuza indwara zikomeye

Musabyemariya Sorina wari waje kwivuza amaso na we ati “Ingabo zanyakiriye neza zirampima, ziramvura mbona n’imiti ku buryo mfite n’ikizere cyo gukira. Bananyemereye ko ngize ikibazo nabasanga ku bitaro bya Kanombe bagakomeza kunyitaho, ndabashimira cyane”.

Maj. Dr John Bukuru ukuriye itsinda rivurira ku bitaro bya Nyamata, agaruka ku ndwara ziboneka cyane muri ako gace.

Ati “Tumaze kuvura abantu basaga 1300 indwara zitandukanye, ariko 40% byabo n’abafite uburwayi bw’amenyo buturuka ku isuku nke yo mu kanwa, tukaba tunabakangurira kuyongera. Izindi ni iz’amaso, amagufa, izo mu mubiri, indwara zitandukanye z’abagore n’izindi”.

Akomeza asaba abarwaye kwitabira icyo gikorwa kuko haba hari inzobere zitandukanye zabegereye.

Ingabo zifasha abaturage no kwihaza mu biribwa

Mu karere ka Rulindo ingabo zirimo gufatanya n’abaturage guhinga ibijumba mu gishanga cya Bahimba cyo mu murenge wa Mbogo ku buso bwa Ha 14, abaturage bakaba ari bo bazasarura.

Umwe mu bari bitabiriye icyo gikorwa, Dusabimana Jacqueline, ahamya ko ingabo zaje kubafasha kurwanya inzara.

Ati “Kuba abasirikare baje kudutera ingabo mu bitugu badufasha guhinga, bitwongereye imbaraga mu kurwanya inzara kuko ibijumba ari igihingwa cy’ingenzi hano iwacu. Iki ni ikitugaragariza imiyoborere myiza y’igihugu cyacu, turishimye”.

Umuyobozi w’akarere ka Rulindo, Emmanuel Kayiranga, yavuze ko ibikorwa by’ingabo ku bufatanye n’abaturage bituma umusaruro wiyongera, ntihagire inzara irangwa muri ako karere.

Imibare itangwa n’abakurikirana iki gikorwa mu gihugu hose kuva cyatangira ku ya 20 Mata 2018, yerekana ko abantu 9.409 bamaze kuvurwa indwara zitandukanye, 11.191 b’igitsina gabo barakebwa naho 795 bipimisha SIDA ku bushake.

Hamaze guhingwa Ha 221 zateweho ibijumba, ibirayi n’imboga ndetse hanarwanywa kirabiranya mu rutoki ku buso bwa Ha 61.39.

Hamaze gusanwa kandi inzu 135 z’abatishoboye ndetse hubakwa n’ubwiherero 356.

Abaturage bavuwe, amashuri arubakwa hanaterwa imyaka

Kuri uyu wa Gatanu tariki 20 Mata 2018 ni ho ibi bikorwa byatangijwe ku mugaragaro ariko bikazakomereza mu turere dutandukanye.

Minisitiri Gen. Kabarebe n’itsinda ryari rimuherekeje, batangirije iki gikorwa mu Karere ka Nyabihu, ahatewe imbuto z’ibirayi ku buso bungana na hegitari 20. Izo hegitari zizaterwaho Toni 40 z’Ibirayi zikazatanga umusaruro wa Toni 500.

Minisitiri w’Ingabo Gen Kabarebe James mu gutangiza ibikorwa by’ingabo mu iterambere ry’Abaturage i Nyabihu

Ibindi bikorwa nabyo byabereye mu Karere ka Gasabo, mu Murenge wa Kagugu, aho batangije kubaka ibyumba by’amashuri 12 ku Rwunge rw’Amashuri rwa Kagugu.

Ibi byumba by’amashuri bitegerejweho kugazagabanya ubucucike bw’amashuri byubatswe ku bufatanye n’abaturage.

Ishuri rya GS Kagugu ubusanzwe rigira abanyeshuri benshi, iki ngo kikaba ari igisubizo nk’uko byatangajwe n’umuyobozi w’akarere ka Gasabo, Stephen Rwamurangwa.

Yagize ati “Muri iri shuri impuzandengo mu cyumba kimwe ni abana 76 bakagombye kuba 46 ariko hari aho usanga bagera no ku 100 bikagira ingaruka ku ireme ry’uburezi.

Ubu rero turasubijwe, abana bagiye kwiga bisanzuye kuko mu gihe kitarenga amezi atatu aya mashuri azaba yuzuye.”

Iri shuri ryagaragaragamo ubucucike bukabije bw’Abanyeshuri bikabangamira ireme ry’uburezi

Kuri iri shuri hagiye kubakwa ibyumba 12 bakazubaka bajya hejuru, Minisiteri y’Ingabo yarateye inkunga yo kubaka ibyumba umunani naho Minisiteri y’uburezi itanga inkunga yo kubaka ibyumba bine.

Hatangijwe kubaka ibyumba 12 bizakemura ikibazo cy’Ubucucike muri iki kigo cy’amashuri

Ingabo kandi zakoze n’ibikorwa byo kuvura abaturage mu Karere ka Rwamagana, aho abaturage bavuwe indwara zitandukanye.

Umuturage witwa Sibomana Roger urwaye mu kanwa, yavuze ko serivisi yahawe atashimishijwe n’uko yayiherewe ubuntu ahubwo ari uburyo yayihawe atarinze gusiragira yaka randevu.

Ati “Kwa muganga baguhaga randevu ngo ‘genda uzagaruke’, byaba ngombwa bakongera bakagusubizayo ukwezi kugashira ukibirukaho, ariko abasirikare bambereye igisubizo kuko serivisi zabo zihuta kandi zigakorwa neza.”

Mukashema Faina we avuga ko yari yarabuze amafaranga ibihumbi bitatu yasabwaga, kugira ngo yivuze amenyo amaze imyaka irenga ibiri amuraza adasinziriye.

Rwamagana havuwe indwara nyinshi zirimo izo mu kanwa

Umuvugizi w’Ingabo z’u Rwanda, Lt Col Innocent Munyengango avuga ko umwaka ushize wa 2017 warangiye ibikorwa by’Ingabo mu iterambere ry’abaturage bifashije Leta kuzigama miliyari 71Frw.

Mu karere ka Nyagatare ingabo zahuriye n’abaturage mu gishanga cya Rwangingo giherereye mu Murenge wa Katabagemu, basibura imiyoboro y’amazi yuhira imyaka.

Abahinzi bahise batangira kubyinira ku rukoma kubera iki gishanga kibafatiye runini, kuko ari cyo gituburirwamo imbuto y’ibigori, nk’uko byemezwa n’umuturage witwa Kalisa Eugene.

Ati “Imyaka yari yuzuyemo amazi ariko ubu bwo imiyoboro isibuwe ntigipfuye ndetse n’udukoko twazanwaga n’ibigunda turadukize, twiteguye kuzafatanya n’ingabo zacu kuko ziratwifuriza ubukire kandi natwe nibwo duharanira.”

Umuyoboro wasibuwe ureshya n’ibirometero bibiri, wakozwe hibanzwe gusibura aho amazi yabuze inzira akareka mu mirima y’abaturage.

Umuyoboro wasibuwe ureshya n’ibirometero bibiri

Ubuyobozi bw’aka karere kandi bwishimira ibikorwa by’ingabo z’igihugu, kuko umwaka ushize byasigiye abana 500 amashuri bibarinda ingendo ndende.

Mu Ntara y’Amajyaruguru ibi bikorwa byatangirijwe mu Karere ka Musanze, mu mudugudu wa Gacinyiro, Akagari ka Garuka mu Murenge wa Musanze.

Iki gikorwa cyatangijwe na Min Kaboneka Francis afatanyije na Gen Nyamvumba bikorwa hasanwa inzu enye z’abaturage babaga mu birangarira.

Min Kaboneka yibukije aba baturage ba Musanze ko ingabo ari abavandimwe babo, ari nayo mpamvu zidahwema kubafasha mu bikorwa bitandukanye by’iterambere.

Ati" Ibi bikorwa mubigire ibyanyu. Niba ingabo zigufasha kukubakira nyuma y’umwaka umwe tugasanga inzu zasenyutse zuzuye umwanda, urugi bagushyiriyemo bagasanga warugurishije wagiye kunywa ibikwangari, bareteta cyangwa ibyo mwita umumanurajipo, uzaba utatiye igihango cy’ iterambere ry’igihugu. Ntimuzagere kuri urwo rwego ngo mube ibigwari."

in Kaboneka na Gen Nyamvumba nibo batangije ibikorwa by’ingabo mu iterambere ry’abaturage muri Musanze

Yabasabye kutazatatira igihango bagiranye n’ingabo bagafata nabi izi nyubako bubakiwe

Minisitiri Kabarebe yifatanyije n’abaturage ba Nyabihu mu gikorwa cyo gutera ibirayi

Ibikorwa ngarukamwaka by’Ingabo z’igihugu bigamije gufasha abaturage kwiteza imbere mu buzima bwa buri munsi byiswe "Ingabo mu iterambere ry’abaturage."

Minisitiri Kabarebe avuga ko bahinduye izina kuko ibikorwa bitamara icyumweru ahubwo bimara Igihe kirekire.

Yavuze ko ingabo z’u Rwanda zishinzwe imibereho myiza y abaturage, iterambere, umutekano w’abanyagihugu. Yagize ati "Umuturage udafite ubwishingizi, ufite inzara, udafite amafaranga, udafite iterambere nta mutekano aba afite."

Ingabo zifatanya n izindi nzego mu guteza imbere igihugu, kandi ni wo mutekano usesuye ingabo zishaka mu gufasha abaturage kwiteza imbere.

Ati "Ahandi hatangijwe ibikorwa by ubuzima, ahandi bubaka amashuri, ahandi bubakira abatishoboye no kubaka ibikorwa remezo, Nyabihu twifatanyije namwe mu buhinzi.

Minisitiri Kabarebe avuga ko umuturage agomba no kugira ibimutunga

Ingabo z’u Rwanda aho, zitandukaniye n izindi ngabo, nyuma yo kugarura umutekano, mu gihe cy’amahoro ingabo z’igihugu zigira uruhare mu kubaka igihugu mu bikorwa by iterambere kuko niyo nshingano zahawe n’umugaba w’ikirenga."

Minisitiri Kabarebe avuga ko ibikorwa bizakomeza mu gufatanya n’abaturage mu bikorwa by’iterambere kuko ingabo zibereyeho kwegera abaturage aho kubakanga.
Ati "Kera abasirikare bakangaga abaturage, mu bukwe bagahunga mu nzira bagahunga, ubu ingabo ni abana banyu babavukamo.

Ni yo mpamvu bagaruka kubafasha mu iterambere, naho Umuturage afite inshingano zo kubahiriza gahunda za leta, kandi dufatanyije iterambere riratugeraho vuba."

Minisitiri Kabarebe avuga Imbaraga ziva mu gufatanya no gukorera hamwe ari umuco mwiza wo gukomeza kuko bitanga amahoro bigatuma igihugu gitera imbere.

Zimwe mu mbuto z’ibirayi zatewe

Minisitiri w’ingabo yifatanyije n’abaturage gutera imbuto y’ibirayi ku butaka butunganyijweho amaterasi ya hegitari 20. Izo hegitari zizaterwaho Toni 40 z Ibirayi zikazatanga umusaruro wa Toni 500.

Ni mu mirima ihanamye, abaturage bavuga ko ntacyo bezaga ariko barizera ko amaterasi yakozwe n’inkeragutabara azatanga umusaruro bashingiye ko isuri itazongera kubatwarira Ubutaka, kandi bagiye kuzajya bakoresha inyongera musaruro.

Ingabo hirya no hino mu gihugu zabukereye mu gufatanya n’abaturage mu bikorwa bibateza imbere

Ibi bikorwa ubusanzwe biba byiganjemo ubuvuzi bw’indwara ubusanzwe zihenze ku baturage, kubakira abaturage ibikorwa remezo, ndetse no kubafasha mu kuvugurura ubuhinzi bakora kugira ngo bubashe kubageza ku musaruro uhagije.

Ibi byose bikaba bikorwa n’ingabo z’igihugu ku buntu, mu gihe cy’amezi atatu bigasozwa hizihizwa umunsi ngarukamwaka wo kwibohora uba buri mwaka tariki ya 4 Nyakanga.

Dore mu mafoto uko ibi bikorwa byatangijwe hirya no hino mu gihugu

1. NYABIHU

Mu karere ka Nyabihu byabereye mu Murenge wa Muringa mu kagari ka Mwiyanike, Umudugudu wa Gitebe. Minisitiri w’ingabo Gen Kabarebe James afatanyije n’abaturage bateye imbuto y’Ibirayi mu mirima.

2. MUSANZE

Min Kaboneka Francis afatanyije na Gen Nyamvumba ni bo batangije ibi bikorwa mu Ntara y’Amajyaruguru. Byatangirijwe mu Karere ka Musanze, mu mudugudu wa Gacinyiro, Akagari ka Garuka mu Murenge wa Musanze hasanwa inzu enye z’abaturage babaga mu birangarira.

3. RWAMAGANA

Ministre Diane Gashumba niwe waje gutangiza ibi bikorwa by’Ingabo mu iterambere ry’abaturage. Byatangirijwe mu bitaro bya Rwamagana abaturage bavurwa indwara zitandukanye zari zarananiranye .

4.NYAGATARE

Ibikorwa by’ingabo mu iterambere ry’igihugu byabereye mu Murenge wa Katabagemu mu gishanga cya Rwangingo. Byibanze mu gusibura imiyoboro y’amazi.

5. KIGALI

Ibikorwa by’Ingabo mu iterambere ry’abaturage byatangirijwe kuri GS Kagugu mu murenge wa Kinyinya muri Gasabo.

Hagiye kubakwa ibyumba by’amashuri 12 bizakemura ikibazo cy’ubucucike iri shuri ryari rifite.

Mu cyumba kimwe cy’ishuri ngo higiramo abana 86 bakagombye kuba 46, ariko hagiye kubakwa etaje .

Umuvugizi w’Ingabo Lt Col Innocent Munyengango atangaza gahunda y’Ibikorwa b’ingabo mu iterambere ry’igihugu bitangira kuri uyu wa gatanu

Ibi bikorwa muri uyu mwaka biratangirira kuri uyu wa Gatanu tariki ya 20 Mata 2018.

Ibikorwa bizakorwa muri uyu mwaka hirya no hino mu gihugu bikaba ari kuvura abantu ibihumbi 113 barwaye indwara zitandukanye zirimo izo mu nda, iz’amagufa, amaso, iz’ubuhumekero ndetse hakazabaho no gukeba ab’igitsina gabo bazabyifuza.

Hazubakwa inzu 1961 z’abatishoboye, hubakwe kandi ibyumba by’amashuri 121 n’ubwiherero 108 ku mashuri ndetse hanahingwe ubuso bungana na ha 4.511.

Col James Ruzibiza, umuhuzabikorwa w’iyo gahunda, avuga uko izashyirwa mu bikorwa hirya no hino mu gihugu.

Yagize ati “Iburasirazuba hazatangirizwa igikorwa cy’ubuvuzi, kikazabera mu bitaro bya Rwamagana, mu Majyaruguru hazatangirizwa igikorwa cyo kubakira abatishoboye muri Musanze, Iburengerazuba ni ubuhinzi muri Nyabihu naho mu Majyepfo bikazatangira kuri 23 Mata 2018, bikazaba ari ubuhinzi muri Kamonyi”.

Col James Ruzibiza, umuhuzabikorwa w’Ibikorwa by’ingabo mu iterambere ry’abaturage

Lt Col Munyengango yavuze ko icyo gikorwa cy’ingabo z’u Rwanda cyagiye gikura kuva cyatangira, ari yo mpamvu byifujwe ko n’inyito yahinduka.

Yagize ati “Muri 2009 ni bwo ibi bikorwa byiswe Army Week kuko byakorwaga mu cyumweru kimwe ariko uko iminsi yagiye ishira ibikorwa byariyongereye ndetse n’abafatanyabikorwa. Byahise biva ku cyumweru kimwe biba ukwezi hanyuma abiri, bikomeza kwiyongera n’umusaruro urazamuka”.

Arongera ati “Nyuma rero byaje kugaragara ko byari bikwiye ko izina rihuzwa n’inshingano, rigahuzwa n’ikigamijwe ndetse n’igihe igikorwa kimara”.

Mu rwego rw’ubuzima, kuva Army Week yatangira muri 2009, havuwe abarwayi 363.848 barwaye indwara zinyuranye, hubakwa ibitaro 6 n’ibigo nderabuzima 55 ndetse n’ibyumba 114 by’abajyanama b’ubuzima.

Hari kandi n’ibindi bikorwa bitandukanye byakozwe mu rwego rwo gufasha abaturage, birimo kubaka ibikorwa remezo, kubakira abatishoboye, iby’uburezi, ubuhinzi no kurengera ibidukikije.

Minisiteri y’Ingabo kandi yateye Leta ingabo mu bitugu muri gahunda ya Girinka, aho yatanze asaga miliyoni 200Frw ndetse inatanga asaga miliyari ebyiri mu Agaciro Development Found.

Umwaka ushize ibikorwa bya Army Week byafashije Leta kuzigama miliyari 71Frw yagombaga kugenda mu bikorwa byakozwe n’Ingabo, nk’uko byatangajwe na Lt Col Innocent Munyengango.

Lt Col Innocent Munyengango Umuvugizi w’Ingabo z’u Rwanda aganira n’abanyamakuru

Abanyamakuru bitabiriye iki kiganiro