Jude Medcalf yari yafunzwe kubera ko yari akurikiranyweho kwiba inshuro nyinshi, ndetse no kuba yari yateye ubwoba umukobwa bahoze bakundana amutunga imbunda y’igikinisho.

Nubwo yari yabaye afunzwe by’agateganyo, yafunguwe iminsi y’igifungo cy’agateganyo itararangira kubera ko atakwirwaga aho yari afungiye. Ntiyakwirwaga ku buriri , ndetse n’imyenda igenewe imfungwa ntiyamukwiraga.

Uretse kudakwirwa mu buroko, ngo n’uko abandi bafungwa bari bamubaniye biri mu byatumye afungurwa: bahoraga bamuserereza ndetse ngo hari n’abigeze kumukubita; nk’uko byatangajwe n’igitangazamakuru The Sun.

Ibi byose rero ngo ni byo byatumye umucamanza amurekura, hanyuma ahabwa igihano cyo kuzakora imirimo nsimburagifungo mu gihe cy’umwaka umwe, ndetse no gutaha kare (couvre-feu) mu gihe cy’amezi 6.

Ubu burebure budasanzwe Jude Medcalf abuterwa n’indwara bita syndrome de Klinefelter mu rurimi rw’igifaransa, ikaba ishingiye ku busembwa buba muri choromosome ze butuma akomeza gukura.

Marie Claire Joyeuse