Iyi mvubu yapfuye kuwa 20/10/2014 iguye mu mwobo wari wacukuwe mu murima wa Sibomana Kanyota aho izo nyamaswa zinyura zijya kota izuba ku gasozi dore ko ziba mu mazi.

Uwo murima wari wacukuwemo imyobo myinshi iwukikije kugira ngo izo mvubu zijye ziyigwamo abaturage babone uko bazifata, nk’uko bitangazwa n’umunyamabanga nshingwabikorwa w’akagari ka Ryankana kabonekamo izo mvubu.

Zimwe mu mpamvu aba baturage bagaragaza zituma bica izo mvubu ngo ni uko ziza kubonera imirima yabo ku buryo ngo umurima zagezemo nta kintu umuhinzi asarura bityo bigatuma bazibasira.

Nyuma yo kumenya amakuru ko iyo mvubu yishwe inzego z’ubuyobozi zifatanyije n’iz’umutekano zahise zihutira kuhagera kugira ngo bayirebe barebe n’uburyo yishwemo, basanga abaturage barangije kuyirya ku buryo hari hasigaye uruhu rwayo gusa.

Umuturage watanze amakuru witwa Mubanda Pascal unakekwaho kuba yari mu bivuganye iyo mvubu yahise atabwa muri yombi ubu akaba afungiye kuri sitasiyo ya Polisi ya Muganza.

Mubanda yatanze amakuru iyi mvubu yarangije kuribwa kare kandi bikekwa ko yaba yari azi igihe yapfiriye dore ko atuye hafi yaho yiciwe.

Ubusanzwe izi mvubu ziba mu mugezi wa Ruhwa utandukanya u Rwanda n’u Burundi.

Musabwa Euphrem