Gushyamirana byatangiye ubwo abantu bo muryango Nyakwigendera Ragadi avukamo bagaragarije kutumvikana n’abo mu ruhande rw’umugore we babashinja ko bari basanzwe badacana uwaka kubera urubanza rwa gatanya Ragadi n’umugore we bari bamazemo iminsi.

Mu kwiherera ngo bigire hamwe uko imitungo Ragadi asize yahabwa abana bakayirererwamo nibwo hatangiye amahane maze batangira kurwana.

Ubushyamirane bwabereye muri uru rugo Nyakwigendera Ragadi yari acumbitsemo mu Mujyiwa Nyanza.

Nk’uko bamwe mu bantu bari bahibereye iyi mirwano itangira babivuga, ngo abo mu muryango wa Ragadi nibo bari bafite abahane maze baba basingiriye abo mu murynago amugore avukamo batangira guterana amabuye.

Ngo ubwo urugamba rwari rurimbanyije hagati y’izo mpande zombi buri wese yitabazaga icyo afite, ariko ku bw’amahirwe polisi ikorera mu Karere ka Nyanza yahageze nta muntu urahakomerekera.

Hari ikirahuri cy’inzu ibuye ryaguyeho rirakimena ndetse hanameneka n’ibirahuri by’imodoka ebyiri zari hafi yaho iyo mirwano yabereye mu rugo Nyakwigedera Ragadi yari acumbitsemo ruri mu mudugudu wa Gakenyeri A mu Kagari ka Nyanza mu Murenge wa Busasamana mu Karere ka Nyanza.

Ragadi niwe wari nyiri Ideal Motel iri mu Mujyi wa Nyanza.

Umunyamakuru wa Kigali Today yavuganye na Umulisa Betty bita “Bebe”, mushiki wa Ragadi, yemeza ko habayeho gushyamirana mu rugo rwa musaza we basoza ikiriyo cye ariko ngo sibo ntandaro muri y’iyo mirwano yagize ibyo yangiza.

Yagize ati “Abo mu muryango umugore wa Ragadi avukamo babanje kwiherera mu nama tubasanzemo bararwana nibwo natwe twabasingiriye maze hatangira umuvurungano”.

Uwamahoro Basmath washakanye na Ragadi we aravuga ko nta kavuyo bateje ngo ahubwo bene wabo w’umugabo we nibo bateje imvururu bashaka gutwara ibintu byari biri mu nzu babyita ko ari ibyabo, kandi inama y’umuryango yemezaga ko bigomba guhabwa abana.

Jean Pierre Twizeyeyezu