Muhimuzi w’imyaka 85 ukora akazi ko kudoda inkweto mu mujyi wa Nyagatare ariko akaba anagendera ku kibando kubera ubumuga, arifuza gutandukana n’umugore we bamaranye imyaka ibiri banasezeranye imbere y’amategeko.

Muhimuzi yari yaje ku biro by’akagari gusaba gatanya n’umugore we avuga ko amuhohotera.

Tariki 8 Nzeri 2015 nibwo yazindukiye ku kagali ka Nyagatare apfutse intoki,avuga ko yakubiswe n’uwo bashakanye bapfuye amafaranga ibihumbi 55 yavuye mu nka yabo uwo mugore we yagurishije akayarya wenyine.

Uwo mugabo yifuza gatanya n’umugore we, avuga ko amuhoza ku nkeke akanamurira imitungo yamusanganye.

Ati “Ushaka umugore ngo mubyarane kandi ntitwabyaranye none arankubita. Yaba ingumba bwo yandira ibyo yansanganye. Bamfashe dutane rwose.”

Nyamara uyu mugore w’imyaka 38, yemeza ko umugabo we nawe atari shyashya. Avuga ko n’ubwo benshi bemeza ko yamushatse amukurikiyeho imitungo, ahubwo umusaza nawe yikundira ibigezweho.
Ati “Ahora mu rushako, jye ndi uwa gatanu. Narinzi ko ngiye guteta ariko ni umunyamahane.”

Turatsinze Coleb umukozi w’akarere ka Nyagatare ushinzwe imirimo y’amategeko avuga ko guhozwa ku nkeke mu bashakanye ari impamvu y’ubutane. Ariko avuga ko ibyo bigerwaho iyo inzego z’ubuyobozi zananiwe.

Ubuyobozi bw’akagali ka Nyagatare ari naho yubakiwe inzu nk’utishoboye bwafashije uyu musaza kuvuzwa, mu gihe ikibazo cye bakikigaho.

Abaturanyi bo bemeza ko uru rugo rufite ibibazo bikomeye kuko uretse umusaza utemera ko umugore afite uburenganzira ku mutungo w’umugabo we, umugore nawe ababazwa no gutunga urugo ashinjwa ko aruca inyuma.

SEBASAZA Gasana Emmanuel