Bamwe mu bamaze kuzibona bavuga ko zishobora kuzaca agahigo ko kuba inkweto mbi ku isi, ariko bakanavuga ko ba nyiri ukuzikora bakoze akazi katoroshye kuko bashoboye gutekereza bakanahanga igihangano abantu benshi muri rusange n’abanyamideri by’umwihariko batatekerezaga.

Izo nkweto zifite talo nini kandi ndende izamuka ikagera mu nsi gato y’amavi. Iyo talo iri imbere y’ahajya amino, mu gihe ubusanzwe talo z’izindi nkweto ziba ziri inyuma ahajya udutsinsino.

Inkweto zitwa Scary Beautiful.

Izo nkweto ngo zatangaje abantu benshi muri rusange n’abanyamideri by’umwihariko kuko ngo bazibona nk’igihangano gikomeye cyavuye mu bitekerezo by’abahanzi babiri bakomeye.

Van Der Vyver avuga ko nyuma y’imyaka igera kuri irindwi akora mu bijyanye n’imideri, yagize igitekerezo cyo gushaka umuderi w’inkweto ushobora gushimisha abantu.

Avuga ko kuri iki gihe abantu batakigira ikibashimisha ku buryo iyo babonye ikintu kidasanzwe mu buzima babayemo bagerageza kucyishimira, bakumva ko ari cyo cyabazanira umunezero.

Kugenda muri izi nkweto birasekeje.

Inkweto za Scary Beautiful zamaze gutoranywa mu zihatanira igihembo gikomeye cyo guhanga udushya. Abanyamideri babigize umwuga ntibazivugaho rumwe, ariko benshi bemeza ko banyiri ukuzikora bagize igitekerezo kidasanzwe cyo guhanga ikintu gishya nk’uko Xander Karskens abivuga.

By’umwihariko avuga ko abahanzi bazikoze bakoze akazi gakomeye ku buryo abanyamideri benshi banakwiye kubafataho urugero kuko inkweto bakoze zigaragaza ko ari abanyamideri n’abahanzi b’abanyamwuga kuko bahanze agashya buri muntu wese atatekereza.

Cyprien M. Ngendahimana