Mu kiganiro n’abanyamakuru, mbere y’amasaha make ngo u Rwanda n’isi bitangire kwibuka Jenoside yakorewe Abatutsi, umuhuzabikorwa w’Inama y’igihugu y’Urubyiruko, Philbert Uwiringiyimana, yasabye urubyiruko guhagarika gahunda rwari rusanzwe rukora zagaragara nk’izidaha kwibuka agaciro.

Uwiringiyimana yibukije urubyiruko ko rudakwiye gufata igihe cyo kwibuka nk’igihe cyo kwiryamira cyangwa guhura n’incuti bitwaje ko bagiye ahabera igikorwa cyo kwibuka. Abanyamakuru nabo basabwe gufata iya mbere mu gushyira mu bikorwa ibyo baba bakangurira abandi.

Umunyamabanga nshingwabikorwa w’Inama y’Igihugu y’Urubyiruko, Alphonse Nkuranga, yavuze ko amateka agomba gusigasirwa n’urubyiruko akabikwa mu buryo bujyanye n’igihe tugezemo bityo na bo mu gihe kizaza bakazayasanga.

Ku bijyanye no kuba hafi abacitse ku icumu, Nkuranga yijeje abari mu nama ko Inama y’Igihugu y’Urubyiruko ifasha urubyiruko rwacitse ku icumu rushaka kwiteza imbere. Yatanze urugero rw’ishyirahamwe ry’ubuhinzi ry’urubyiruko rwacitse ku icumu ry’i Nyamagabe, bahawe inka ebyiri z’inzungu.

Insanganyamatsiko y’uyu mwaka igira iti: “Kwibuka Jenoside yakorewe Abatutsi: Twigire ku mateka, twubaka ejo hazaza”.

Emmanuel N. Hitimana