Mu gitondo cyo kuri uyu wa gatanadatu tariki 14/3/2015, nibwo itsinda ry’urubyiruko ryahazindukiraga nk’uko byari biteganyijwe, ariko basanga hafunze bangirwa no kwinjiramo, bitewe n’uko umunyamabanga nshingwabikorwa w’uyu murenge, Nsengiyumva Placide, atatanze uburenganzira bwo kurufungura.

Urubyiruko rwo muri AERG ya IPRC Gishari ndetse na St Aloys bababajwe no kwangirwa kwinjira mu rwibutso rwa Gishari muri Rwamagana. Aha bari bafashe umuhanda berekeza i Mukarange muri Kayonza.

Kuva saa moya za mugitondo kugeza saa tatu n’igice, urubyiruko rw’abanyeshuri bibumbiye mu muryango wa AERG wo mu Ishuri Rikuru ry’Ubumenyingiro rya Gishari (IPRC Gishari) n’abiga mu Rwunge rw’Amashuri rwa Mutagatifu Aloys rw’i Rwamagana, bari ku rwibutso rwa jenoside rwa Gishari rusangiye umuharuro n’ibiro by’uyu murenge, bategereje guhabwa uburenganzira bwo kwinjiramo ngo barusukure ariko ushinzwe umutekano w’uru rwibutso, yababwiye ko bidashoboka kurwinjiramo nta burenganzira bw’Umunyamabanga Nshingwabikorwa w’umurenge.

Uru rubyiruko ruvuga ko bari bamuhamagaye kuva ku mugoroba wo ku wa Gatanu, tariki ya 13/3/2015.

Nyuma y’icyo gihe, ni bwo uru rubyiruko rwafashe icyemezo cyo kuva i Gishari mu Karere ka Rwamagana rujya kwifatanya n’abakoraga isuku ku rwibutso rwa jenoside rwa Mukarange mu karere ka Kayonza. Cyakora ngo imyitwarire y’umunyamabanga nshingwabikorwa w’umurenge wa Gishari ntiyabashimishije.

Habimana Donath, umwe mu bari bayoboye itsinda ryari rigiye gukora isuku kuri uru rwibutso, yabwiye Kigali Today ko iki gikorwa kibahungabanyije, kuko babujijwe gukora isuku ku rwibutso rwa jenoside kandi bari babigambiriye ndetse bakaba bari bakiye impushya abanyeshuri biga mu mashuri yisumbuye.

Rubanzana Uwiragiye Vital, umuhuzabikorwa wungirije wa AERG muri IPRC Gishari, na we yavuze ko kwangirwa kwinjira muri uru rwibutso byabahungabanyije haba mu buryo bw’ingufu zisanzwe no mu rwego rw’imitekerereze.

Uru rubyiruko ntirwacitse intege kuko rwahise rujya mu karere ka Kayonza gusukura urwibutso rwa jenoside yakorewe Abatutsi rwa Mukarange.

Mirindi Jean de Dieu, Umuhuzabikorwa wa AERG ku rwego rw’igihugu, yatangaje ko bababajwe cyane n’imyitwariye y’uyu muyobozi ngo kuko igikorwa barimo kizwi n’inzego z’ubuyobozi kuva ku rwego rw’igihugu kugeza ku nzego z’ibanze.

Mirindi avuga ko yumva uwo muyobozi yarengereye kuko ngo gusukura urwibutso ari uguha icyubahiro imibiri y’abishwe muri jenoside yakorewe Abatutsi, bikaba bidakwiriye gusaba uburenganzira buhanitse (audience); ku buryo ngo ibyakozwe n’uwo muyobozi babifata nko kubasubiza inyuma mu bitekerezo kandi asaba ko yakurikiranwa ku mpamvu z’iyo myitwarire.

Umunyamabanga Nshingwabikorwa w’Umurenge wa Gishari, Nsengiyumva Placide, yabwiye Kigali Today ko amakuru yo kuza gukora isuku kuri urwo rwibutso yayamenye bitinze, kuko yari yagiye gushyingura umuvandimwe we mu ntara y’Amajyepfo. Yavuze ko yatanze uburenganzira agasanga uru rubyiruko ruhavuye.

Umunyamabanga Nshingwabikorwa w’Umurenge wa Gishari, Nsengiyumva Placide, yavuze ko mu buryo busanzwe, ngo gahunda yo gufungura urwibutso imenyeshwa inzego zose zirimo n’iz’umutekano; ariko ngo ubwo yamaraga kumenya neza ko ari AERG ihageze, yabasabye ko yabaha uburenganzira bwo kwinjiramo ariko agasanga bagiye.

Ku kibazo cy’uko bahamaze amasaha abiri yose bategereje kandi banamuhamagara kuri telefone ntiyitabe, Nsengiyumva yavuze ko atari yabashije kubona ko bamuhamagaye kuko yari mu mododa atabaye, bityo ngo ubwo yamaraga kubona ko bamubuze, ngo yabahamagaye abibemerera asanga bagiye i Mukarange muri Kayonza.

Nsengiyumva yakomeje avuga ko mu bikorwa nk’ibi, hajya habaho ihanahanamakuru ryuzuye kugira ngo abantu badatekereza ko habayeho igikorwa kibi cyo gupfobya jenoside kandi atari byo.

Emmanuel Ntivuguruzwa