Ku wa Mbere, tariki 21 Werurwe 2016, ni bwo iyo mibiri yabonetse mu Kagari ka Kabakobwa mu Mudugudu wa Rango, mu isambu y’uwitwa Uwizeye Marie Josephine warimo guhinga akaza kuyigwaho agahita abimenyesha ubuyobozi.

Ndabananiye Jean Bosco, Umunyamabanga Nshingwabikorwa w’agateganyo w’Umurenge wa Gashonga, yavuze ko bahise bamenya ko iyo mibiri ari iy’abazize Jenoside kuko bayisanze ahantu iri kumwe ahantu hamwe kandi aho hantu haragiye hatabururwa indi mibiri.

Yagize ati “Impamvu dukeka ko iyo mibiri ari iy’abishwe muri Jenoside ni uko twayisanze mu matongo y’abazize jenoside kandi hakaba ari no hafi y’ahatahuwe imibiri myinshi y’abazize Jenoside.”

Yavuze ko bari bazi ko ari umubiri umwe ariko ubwo barimo kuwukura aho wajugunywe, basanze harimo n’undi.

Kugeza ubu, imiryango y’abo bantu ntiramenyekana ariko Uwizeye watanze amakuru, avuga ko umwe waba ari uwa sebukwe kuko ngo kuva yaburirwa irengero muri Jenoside, umubiri we utigeze uboneka, agakeka ko ari we.

Hashize icyumweru kimwe mu Murenge wa Nyakarenzo na ho habonetse undi mubiri w’umuntu wishwe muri Jenoside.

Inzego z’umutekano zatangiye gukora iperereza kugira ngo harebwe ko haboneka ababa barabishe.