Ibi Minisitiri Kaboneka yabitangaje ku mugoroba wo ku wa 16 Gicurasi 2015, ubwo mu Karere ka Ruhango haberaga umuhango wo kwibuka imiryango yazimye muri Jenoside yakorewe abatutsi mu w’1994 igera kuri 819, nk’uko bigaragarazwa n’imibare yavuye mu bushakashatsi bwakorewe mu Turere twa Kamonyi, Ruhango na Muhanga.

Minisitiri Kaboneka yagize ati “Ndagira ngo twibuke ariko tunishima n’ubwo hari imiryango yazimye, kuko ni intsinzi kubona hari abashobora kuba bari aha bibuka iyi miryango, kuko uwateguye Jenoside ntiyifuzaga ko iki gikorwa cyabaho”.

Minisitiri Kaboneka avuga ko kuba imiryango yazimye yibukwa ari intsinzi kuko abakoze Jenoside batabishakaga.

Habonimana Charles, Umuyobozi w’Umuryango w’abarangije kwiga kaminuza n’amashuri makuru barokotse Jenoside yakorewe abatutsi (GAERG), ari nawo ugira uruhare mu gutegura igikorwa cyo kwibuka imiryango yazimwe muri Jenoside yakorewe abatutsi, yavuze ko iyi mibare atari ihame n’ubwo ariyo bashoboye kubona mu gikorwa cy’ubushakashatsi bakoze, agasaba n’abandi bose baba bibuka imiryango yazimye kubegera kugira ngo nayo ijye yibukwa ihabwe icyubahiro kiyikwiriye.

Yavuze ko iyi miryango n’ubwo yatsembwe ariko itazazima burundu nk’uko byifuzwaga n’abateguye Jenoside yakorewe abatutsi, kuko hari abarokotse kandi bakaba bafite icyerekezo.

Habonimana asaba abazi indi miryango yazimye kugeza ayo makuru kuri GAERG.

Minisitiri w’ubutegetsi bw’igihugu, Francis Kaboneka wari umushyitsi mukuru muri uyu muhango, yashimiye urubyiruko rwa GAERG rwagize igitekerezo cyo kwibuka iyi miryango yazimwe, avuga ko bikwiye kuba ibyishimo bya buri wese kuko umugambi mubi wari ugamije gutsemba abatutsi utagezweho.

Uyu muyobozi yijeje urubyiruko rwa GAERG, ko ubuyobozi bwiteguye kurufasha kugira ngo ibikorwa ruteganya gukora birimo kubaka igihugu bigerweho.

Akarere ka Ruhango kabarirwamo imiryango 310 igizwe n’abantu 1498 yazimye mu gihe cya Jenoside, abagiye bafata ijambo bose, bakaba bagaragazaga ko iyi miryango itazimye kuko hari abarokotse n’ubwo hari abatarabyifuzaga.

Kwibuka imiryango yazimye bitegurwa na GAERG.

Uyu muhango wabereye mu Murenge wa Kinazi ahahoze hitwa Komine Ntongwe haguye abatutsi benshi babanje kwirwanaho, wabimburiwe n’igikorwa cyo gusura urwobo rwitwaga CND rwajugunywemo abatutsi basaga ibihumbi 60 rwari rwaracukujwe n’ubuyobozi buhagarariwe na Kagabo wari burugumesitiri w’iyi komine.

Uyu muhango kandi waranzwe n’urugendo rwaturutse ahahoze ari kuri Komine ya Ntongwe ahakuwe abatutsi bagiye kwicirwa ahitwa Nyamukumba haguye abatutsi benshi cyane.

Muri uyu muhango kandi hashyinguwe imibiri 28 yaturutse mu Murenge wa Ntongwe. Iki gikorwa cyo kwibuka imiryango yazimye cyatangiye saa kumi nimwe z’umugoroba kigeza mu gitondo cyo kuri tariki ya 17 Gicurasi 2015. Ni ku nshuro ya 7 GAERG itegura iki gikorwa cyo kwibuka imiryango yazimye.

Andi mafoto:

Iki gikorwa cyabimburiwe no gusura icyobo cyajugunywemo abatutsi ibihumbi 60.

Minisitiri Kaboneka afatanya n’abandi bayobozi gucana urumuri rw’icyizere.

Bamwe mu banyamuryango ba GAERG.

Abantu benshi bitabiriye kwibuka imiryango yazimye, no gushyingura imibiri 28 y’abazize Jenoside yabonetse.

Prof. Dusingizemungu uyobora IBUKA nawe yitabiriye umuhango wo kwibuka imiryango yazimye.

Guverineri w’Intara y’Amajyepfo, Munyantwali Alphonse nawe yitabiriye umuhango wo kwibuka imiryango yazimye.

Umunyamabanga nshingwabikorwa wa CNLG, Dr Bizimana Jean Damascène nawe yari ahari.

Gen Alex Kagame avuga ku rugamba rwo guhagarika Jenoside.

Umuhanzi Bonhomme yifatanyije n’abandi kwibuka imiryango yazimye.

Umuhanzi Munyanshoza nawe yari ahari.

Umuhanzi Mariya Yohana nawe yari ahari.

Eric Muvara