Ku nshuro ya 21 hibukwa Jenoside yakorewe Abatutsi, abanya Rubavu bibutse uburyo abatutsi bari bahungiye mu Kiliziya (Cathedrale) ya Nyundo batewe n’interahamwe zikabica harimo n’abihayimana 96.

Nkuko biboneka ku magambo yanditse ku nkuta za Cathedrale ya Nyundo ibyahabereye ntibikwiye kandi abantu bagomba kugira isomo babikuramo.

Padiri Fabien Rwakareke wahigwaga muri Mata 1994 avuga ko bibabaje kuba hari abahayimana bagize uruhare muri Jenoside kandi bashinzwe gufasha abantu kugira neza no gukunda Imana bakabirengaho bagakora ibitandukanye n’ibyo basezeranye n’Imana aho atunga agatoki Padiri Athanase Seromba.

Mu gitambo cya misa cyo gusabira abaguye muri Cathedrale ya Nyundo, ubutumwa bwatanzwe ni ukwigisha urubyiruko kugira urukundo, gukunda igihugu birinda kugira nabi ahubwo bubaka ubumwe no gufashanya.

Musenyeri Alexis Habiyambere uyobora Diyoseze ya Nyundo avuga ko ubukiristu bugomba kubyarira Abanyarwanda ubuvandimwe nyabwo kandi ngo buri wese abizirikanye ntawagirirwa nabi ahubwo abantu babana mu mahoro.

Muri Cathedrale ya Nyundo no mu nkengero zayo haguye abatutsi babarirwa muri 800 bari bashyinguye mu rwibutso rwubatswe ariko kubera ko aho rwubatswe 2012 hatewe n’umuvu w’amazi y’imvura, imibiri y’abarushyinguwemo ubu icumbikiwe mu nyubako za Cathedrale ya Nyundo.

Bamwe mu barokotse bakavuga ko kubaka urwibutso rusimbura urwangijwe n’amazi y’imvura byarangaranywe n’ubuyobozi kuko nyuma yo kubura kw’amafaranga naho abonekeye isoko ryatanzwe ntiryagize umusaruro ritanga ngo urwibutso rwuzure.

Umuyobozi w’Akarere ka Rubavu w’agateganyo, Kaduhoze Marie Jeanne, akaba ahumuriza abaturage ko mu gihe cy’amezi atatu ikibazo kizaba kibonewe igisubizo imibiri icumbikiwe muri Cathedrale ya Nyundo ikabona aho ishyingurwa mu cyubahiro.

Sylidio Sebuharara