Muri iyi nama bemeje ko ku rwego rw’akarere icyunamo cyo kwibuka ku nshuro ya 19 Jenoside yakorewe Abatutsi mu mwaka w’1994 bazabitangiriza mu murenge wa Nyarubuye mu kagari ka Nyabitare.

Umuyobozi w’akarere wungirije ushinzwe imibereho myiza y’abaturage, Murekatete Jacqueline, yasabye abitabiriye inama gushyira ingufu mu gukangurira abaturage kwitabira icyunamo bityo bakifatanya n’abacitse ku icumu kwibuka abazize Jenoside.

Abayobozi bayoboye inama yo gutegura icyunamo mu karere ka Kirehe.

Yabibukije ko muri iki gihe cy’icyunamo hari ibiganiro byateguwe mu rwego rwo gukangurira abaturage gukomeza kwirinda icyo aricyo cyose cyagarura ingengabitekerezo ya Jenoside.

Uyu muyobozi w’akarere wungirije ushinzwe imibereho myiza y’abaturage yakomeje akangurira abitabiriye inama ko bakwibutsa abaturage ko icyitwa imyidagaduro cyose kitemewe mu gihe cy’icyunamo bakaba bateganya kuzafasha abacitse ku icumu muri iki gihe cy’icyunamo.

Mu rwego rwo kwibuka Abatutsi bazize Jenoside mu mwaka wa 1994 bashyinguye mu gihugu cya Tanzaniya, muri iyi nama bafashe gahunda ko tariki 02/04/2013 bazajya gukora isuku ku rwibutso rushyinguwemo abantu 917 mu gihugu cya Tanzaniya ahitwa Ngara.

Abitabiriye inama itegura icyunamo mu karere ka Kirehe.

Abagore n’abagabo batoraguye imirambo yabo mu mugezi w’Akagera mu gihe cya Jenoside yakuwemo n’abakozi b’umushinga wa gikirisitu wita ku mpunzi muri Tanganyika, Christian Refugee Service Lutheran World Federation Ngara.

Kuri ubu mu karere ka Kirehe barateganya kuzashyingura mu cyubahiro imibiri itatu yabonetse aho bagitegereje n’indi ine bivugwa ko itaratabururwa.

Grégoire Kagenzi