Mu muhango wo gutangiza iminsi 100 yo Kwibuka22, Perezida Kagame na mugenzi we wa Tanzaniya, Dr John Pombe Joseph Magufuli bazacana Urumuri Rutazima rushushanya umurava no gukomera kw’Abanyarwanda nyuma y’imyaka 22 y’ibihe bikomeye bya Jenoside yakorewe Abatutsi.

Perezida wa Tanzaniya Dr John Pombe Joseph Magufuli araye mu Rwanda. Uyu munsi yafatanyije na Perezida Kagame gufungura Ikiraro cya Rusumo, ejo bakazifatanya mu gucana Urumuri Rutazima batangiza iminsi 100 yo Kwibuka22.

Urwibutso rwa Genoside rwa Kigali ni rwo rwibutso rufatwa nk’urukuru kuko rubitse imibiri irenga ibihumbi 250 by’Abatutsi bishwe muri Jenoside.

Mu itangazo ubuyobozi bw’urwo rwibutso bwashyize ahagaragara, Umuyobozi warwo Honere Gatera, yagize ati “Turi urugo abarokotse Jenoside, abavandimwe ndetse n’inshuti z’inzirakarengane zishwe muri Jenoside bibukiramo inkoramutima zabo.”

Muri iri tangazo bakomeza bavuga ko muri iki gihe cyo Kwibuka22, Urwibutso rwa Genoside rwa Kigali ruri ku Gisozi rutumira abashyitsi batandukanye ngo bunamire abazize Jenoside bashyira indabo ku mva zabo.

Gatera akomeza agira ati “Mu Rwanda ducana urumuri iyo twibuka abacu batuvuyemo, kandi tuzubahiriza uyu muhango ducana urumiri rutazima ku wa 7 Mata, nyuma y’iyi myaka 22 Jenoside ibaye.”

Umunyamabanga Nshingwabikorwa wa Komisiyo yo Kurwanya Jenoside, Dr Jean Damascene Bizimana, yasabye Abanyarwanda bose n’inshuti z’u Rwanda gufatana urunana mu kurwanya ingengabitekerezo ya Jenoside.

Yagize ati “Ingengabitekerezo ya Jenoside ikwiye kurwanywa ubudatuza kuko abajenosideri n’ababashyigikiye bakomeje kwangiza ukuri kwa Jenoside yakorewe Abatutsi.”

Kubera ko uburezi ari bwo nkingi yo kurwanya Jenoside n’abayihakana, Urwibutso rwa Jenoside rwa Gisozi na rwo ngo rufasha nk’ishuri ku masomo ya Jenoside n’ubwicanyi ndengakamere.

Ni muri urwo rwego, muri iyi minsi 100 yo Kwibuka, rusaba buri wese urusura gusiga mu gitabo cyarwo cy’abashyitsi ubutumwa nk’uburyo bwo kwibuka no kwifatanya n’abarokotse Jenoside yakorewe Abatutsi.