Nyirarukundo Emeritha uhagarariye Ibuka mu karere ka Gicumbi yatangaje ko mu Murenge wa Mutete hakiri imibiri y’Abatutsi bishwe muri Jenoside itarashyingurwa mu cyubahiro, kubera bamwe bagifite ingengabiktekerezo yo kwanga gutanga amakuru.

Yagize ati “Mu mwaka ushize mu gihe cyo kwibuka abacu bazize Jenoside mu Karere ka Gicumbi hagaragaye ingengabitekerezo, ariko abakurikiranywe n’ubutabera twarongeye tubabona babarekuwe ku buryo twibaza impamvu badahanwa bikatuyobera.”

Avuga ko icyo bifuza nk’abarokotse ko ari uko abaturage na bamwe mu bakoze Jenoside bireze bakemera icyaha batanga amakuru ku bantu bataraboneka ngo bahyingurwe.

Umunyamabanga nshingwabikorwa w’intara y’Amajyaruguru Kabagambe Deo nawe yasabye abaturage ko bakwiye guha agaciro imibiri y’abazize jenoside batanga amakuru kugirango bazahyingurwe mu cyubahiro.

Yabasabye ko kwibuka ku nshuro ya 23 abazize jenoside yakorewe Abatutsi nta muntu wishwe muri icyo gihe wagombye kuba akiri ku gasozi atarashyingurwa mu rwibutso.

Ati “Mwakwihanganye mu gatanga amakuru abacu bazize Jenoside batarashyingurwa mukatubwira aho mwabashyize tukabashyingura mu cyubahiro.”