Nyuma yo gusura urwo rwibutso tariki 08/06/2013, Kalima Jean Malic uyobora ishyirahamwe ry’abacukuzi b’amabuye y’agaciro mu Rwanda yagize ati “twe abahagarariye abacukuzi mu gihugu hose nyuma yo kubona no gusobanukirwa amateka y’ibyabereye aha, twihaye intego yo kurwanya ikibi cyose n’akarengane katuma amarorerwa nk’aya yongera kubaho”.

Avuga ko kandi bihaye intego yo kujya gusobanurira bamwe mu bacukuzi batabashije kuza muri icyo gikorwa kugirango nabo bajye bahora bibuka kuko buri wese arwanyije ikibi n’akarengane ibyabaye bitazongera kuba ahariho hose.

Umukozi ushinzwe gusobanurira abasura urwibutso rwa Ntarama, Mugabarigira Stanley, yasobanuye amateka yaranze Jenoside yakorewe Abatutsi aho i Ntarama maze ababwira ko ya kiriziya gatorika aho yari yarahungiyemo abantu basaga ibihumbi bitanu, aho hafi ya bose baje kwica.

Tariki 13/04/1994 ngo nibwo uwitwa Nyiramasuhuka na Karera baje gusura izo mpunzi bababwira ko bashaka kureba uko bangana kugirango babahe imfashanyo, ariko bakaba barababeshyaga ahubwo bashakaga kureba uko bangana kugirango bohereze abicanyi ngo babice.

Mugabarigira yababwiye ko tariki 15/04/1994 bohereje abasirikare, abapolisi n’Interahamwe nyinshi maze barabica bake mubarokotse bavuye mu mirambo maze bajya mu rufunzo ruri hepfo aho Inkotanyi zabarokoye tariki 14/05/1994.

Gasasira Gaspard umukozi mu kigo gishinzwe kurwanya Jenoside wari waherekeje abo bacukuzi yababwiye ko igikorwa bakoze ari cyiza, ariko abasaba ko bagomba kureba uburyo bazana abandi bakozi bose kugirango nabo bamenye neza amateka ya Jenoside yakorewe Abatutsi.

Yagize ati “ibi bizatuma nuwagerageza kubashora mu bikorwa bibi bamuhakanira kuko baba barigishijwe. Ikindi kandi iki gikorwa mukoze gitera ingufu abarokotse kuko babona ko hari ababashyigikiye”.

Aba bacukuzi b’amabuye y’agaciro akaba ari ku nshuro ya mbere bakoze iki gikorwa, ariko bakaba biyemeje ko buri mwaka bazajya bagikora.

Bakaba barateye inkunga ingana na miliyoni ebyiri n’igice yo gufasha imirimo ikorerwa kuri urwo rwibutso.

Egide Kayiranga