Ayo mafatabuguzi ane (bouquets) yashyizweho yanahawe amazina y’ikinyarwanda ni Ikaze, Zamuka na Siporo ndetse n’iyitwa Ubuki.

1. Ifatabuguzi ryitwa Ikaze

Guhera ku mafaranga ibihumbi bitanu (5,000 Frws), ubu uzajya ugura ifatabuguzi (Bouquet) ryitwa Ikaze, ikaza iriho amasheni arenga 150 arimo shene icyenda zo mu Rwanda, abakunzi ba Siporo bakazanabonaho shene ya Canal+Sport, hakabaho kandi Novelas TV, Trace Africa, BBC World News, Cartoon Network n’izindi.

2. Ifatabuguzi ZAMUKA

Iri fatabuguzi rizagaragaraho shene zose ziri ku ya mbere (Ikaze), hakiyongeraho n’izindi z’imyidagaduro zirimo nka TFI, Canal+Comedie, Nollywood TV, National Geographic, Disney Channel n’izindi, rikazishyurwa ibihumbi 10 ku kwezi (10,000 Frws)

3. Ifatabuguzi ZAMUKA NA SIPORO (20,000 Frws)

Iyi iza igaragaraho amashene ya siporo yose abantu basanzwe bareberaho shampiyona zikomeye i Burayi ndetse n’andi marushanwa akomeye ku isi nka Champions League, Igikombe cy’i Burayi (EURO), igikombe cy’isi n’ibindi, ku mashene nka Canal+Sport, Canal+Sport 1, Canal+Sport 2, Canal+Sport 3 na Canal+Sport 4.

Umwihariko kandi nanone kuri iri fatabuguzi ni uko bitazasaba abakunzi ba Film kugura izindi ku ruhande kuko uzasanga andi mashene ya Film arimo n’ayo ku mafatabuguzi ya mbere abanza (Ikaze na Zamuka), ikazaba igura ibihumbi 20 Frws, mu gihe isanzwe ibonekaho ibi byose yaguraga ibihumbi 27 Frws.

4. Ubuki (30,000 Frws)

Iri ni ryo fatabuguzi rizaba rigaragaraho shene zose ziba kuri Canal zirimo na Canal+, Canal+Cinema, NATGEO WILD, Eurosport na Bloomberg, iyi ubusanzwe ikaba yitwaga Tout Canal aho igaragaraho amashene yose aba kuri Canal Plus, ikazaba igura ibihumbi 30 Frws.

Gahunda nshya y’ifatabuguzi rya Canal+

Mu kiganiro n’itangazamakuru na Canal Plus kuri uyu wa Gatatu tariki 24/06/2020, Umuyobozi Mukuru wa Tele10 Muhirwa Augustin yasobanuye ko ibi babikoze nyuma y’ubusabe bw’abafatabuguzi babo, aho bagiye babagaragariza ko hari igihe bibasaba gufata amafatabuguzi atandukanye kugira ngo nk’umuryango bose babashe kureba ibyo bifuza.

Ati “Ibi twabikoze ku busabe bw’abafatabuguzi bacu, hari aho wasangaga mu rugo bamwe bifuza kureba Films abandi bashaka kujya bareba umupira, ariko twabishyize ku ifatabuguzi rimwe kandi igiciro tugishyira hasi ku buryo bizaborohera.”

Ifatabuguzi ryose umuntu azagura, azasangaho shene icyenda zose zo mu Rwanda ndetse na 60 zo muri Afurika, bikaba na byo ari mu rwego rwo korohereza Abanyarwanda bifuzaga kureba shene z’imbere mu gihugu, nk’uko Umuyobozi Mukuru wa Canal Plus yabisobanuye.

Umuyobozi Mukuru wa Tele10 Muhirwa Augustin

Umuhanzi Nemeye Platini "Mr P", Ambasaderi wa Canal Plus yatangaje ko yishimiye ko ibihangano by’abanyarwanda bigiye kumenyekana cyane muri Afurika

Yagize ati “Mu kwezi gushize nibwo twari twabazaniye shene zo mu Rwanda kuko abenshi bahoraga bazitwishyuza, ubu noneho twanazishyize ku giciro gito ku buryo guhera ku bihumbi bitanu gusa wazibona, ndetse zikaba no kuri buri fatabuguzi ryose wagura.”

Icara mu mwaya ugukwiye, ni yo gahunda nshya ya Canal+

Usibye izi shene icyenda zo mu Rwanda BTN TV, Isango TV, Authentic TV, Genesis TV, KC2, Flash TV na TV1 zongeweho, muri rusange u Rwanda rwongereweho shene 20, umubare uruta uwo muri Côte d’Ivoire aho Canal+ isanzwe igira abakiriya benshi muri Afurika, ikaba yaraje mu Rwanda igura ibihumbi 50 Frws.

MENYA UMWANDITSI

Sammy Imanishimwe

Umunyamakuru

@ Samishimwe

Reba inkuru zose nanditse ( 2646 )