Umwe mu bagize iri tsinda, Babou, avuga ko nubwo gukoresha ibitaramo byahagaze mu rwego rwo kwirinda Coronavirus, bo batekereje icyo bakora ngo bamare irungu abantu bari mu ngo.

Ati “Muri iki gihe turi kureba ukuntu irungu ritatwicira mu rugo. Nkuko turi batanu buri umwe muri twe afata umunsi umwe akajya kuri instagram agakora, akaganiriza abamukurikiye ashobora no guhamagara undi muntu basetsa abandi”.

Babou yavuze ko imibare y’abareba urwenya kuri live (imbonankubone) za instagram ari benshi, yaba abareba mu gihe biri kuba ako kanya cyangwa se abareba nyuma byarangiye.

Avuga ko imibare yo kuva kuwa Gatatu w’iki cyumweru batangira, abamukurikiye bararenga igihumbi ku munsi.

Prince, umunyarwenya wakoze ku munsi wa mbere, avuga ko gusetsa abantu utareba bigorana.

Ati “Gusetsa abantu utareba ngo wumve uko baseka biragoranye ariko iyo umuntu yagiye akora ibitaramo imbere y’abantu, kuri televiziyo ibyo bigenda bifasha kwitegura no kumenya uko ukora”.

Prince yanavuze ko ibintu byose bigira ibyiza byabyo kuko ubu abantu benshi batajya babona uburyo bwo kuza mu bitaramo ubu bari kubikurikirana bicaye hamwe, yaba abo mu ntara n’ahandi.

Aba banyarwenya bavuga ko iyo gahunda yo gukorera kuri instagram bazakomeza kuyikora muri iki gihe cya guma mu rugo.

Ubu hamaze gukora Prince, George na Babou hasigaye Herve na Michael.