Mu kiganiro cyari kimaze iminsi kuri YouTube ku rubuga rwa Himbaza TV, ariko cyamaze gukurwaho, Aline Gahongayire yagaragaye mu iteraniro anenga ibitangazamakuru byo mu Rwanda avuga ko bitari ku rwego rwe, ndetse ko ntacyo yavugana na byo.

Yagize ati “Hanyuma bakambaza ngo Aline, nyuma y’ibyakubayeho uzarongorwa? Gute ntarongorwa se? Nabibajijwe hehe? Voice of Amerika (Ijwi ry’Amerika). Bati se ubundi Gahongayire tubwire (uburyo watandukanye n’umugabo wawe), nti njyewe twaratandukanye n’umutipe.”

Gahongayire akomeza ati “Njyewe nari kubivugira muri radiyo za hano? Jamais (ntibibaho). Ijwi rya Amerika. Bakajya bavuga ngo bitangazwa n’Ijwi rya Amerika. Ariko umva ibyo bintu! Nyine I was there (nari ndiyo) i Washington DC, ntabwo nari hano ku Isango Star. Ni yo mpamvu n’ujya kubimbaza tugomba kuba turi mu rwego rumwe.”

Abantu benshi barimo n’urugaga rw’abanyamakuru b’imyidagaduro mu Rwanda (Rwanda Showbiz Journalist Forum) bakomeje kumvikana banenga ibyo Aline Gahongayire yatangaje, bakavuga ko atari byo kuko itangazamakuru ryo mu Rwanda ari ryo ryatumye yamamara kuko ryagize uruhare mu kumenyekanisha ibihangano n’ibikorwa bye.

Mu bandi bagize icyo babivugaho harimo Umunyamabanga wa Leta muri Minisiteri y’Ububanyi n’Amahanga n’Ubutwererane, Ambasaderi Olivier Nduhungirehe.

Abinyujije ku rukuta rwe rwa Facebook, yagize ati “Isango Star ni Radio nziza ibereyeho abanyarwanda bose. Mu kwezi gushize nagiriye ikiganiro cyiza kuri Isango Star TV, cyerekeye abanyarwanda bahohoterwa muri Uganda. Icyo kiganiro cyari giteguye kinyamwuga, kandi gicukumbuye. Mu mirimo nshinzwe, nagiranye kandi ibiganiro n’ibitangazamakuru bitandukanye byo mu Rwanda, kandi narabyishimiye muri rusange.”

“Isango Star rero, ndetse n’andi ma Radios y’u Rwanda, bindutira kure VOA, BBC, France 24, Al Jazeera n’ibindi bitangazamakuru mpuzamahanga. Radio na TV byo mu Rwanda biri ku rwego rwa buri munyarwanda, uko yaba ateye kose, uko yaba asa kose, cyane cyane umukozi w’Imana n’umukirisitu bagomba kwiyoroshya no kwicisha bugufi, nk’uko Bibiliya ibitwigisha. I am Isango Star!”

Nyuma y’ibyo Aline Gahongayire yatangaje byanenzwe n’abantu batandukanye, Kigali Today yagerageje kumushaka ngo agire icyo abivugaho ariko ntiyitaba telefoni ye igendanwa.
Ambasaderi Olivier Nduhungirehe na Aline Gahongayire ni bamwe mu batumirwa bakunze kwitabira ibiganiro bitandukanye batumirwamo mu bitangazamakuru bya Kigali Today n’ahandi mu Rwanda.

Inkuru bijyanye:

Ubyumva ute kuri EAC hamwe na Amb. Olivier Nduhungirehe, Dr Christopher Kayumva na Edmond Kagire

Inzozi za Aline Gahongayire kwari ukuba umurinzi wa Madame wa Perezida