Gahongayire ngo yisanze yabaye icyamamare mu muziki mu gihe we yari afite inzozi zo kuba umwe mu bacunga umutekano wa Madame wa Perezida

Mu kiganiro Boda to Boda kuri KT Radio cyabaye tariki 06 Gashyantare 2019, Aline Gahongayire yagaragaje ko yigishijwe kuririmba na nyirakuru, anagaragaza ko kuririmba biri mu byo akunda, ariko ngo kwamamara byaramugwiririye kuko we yumvaga azaririmba mu rusengero ubundi akibera umurinzi wa wa Madame wa Perezida wa Repubulika.

Mu gihe yari umwangavu yiga mu mashuri yisumbuye, ngo yakundaga cyane akazi k’abashinzwe umutekano, akanakunda imyitwarire y’abarinzi b’umufasha w’umukuru w’igihugu, ku buryo yari yararahiye ko agomba kuzaba umwe muri abo barinzi.

Mu myitozo ye ari mu mashuri yisumbuye, ngo yitozaga guterura ibyuma, akanikoresha imyitozo ngororamubiri myinshi asa n’uwimenyereza akazi ko kurinda umuntu ukomeye, rimwe na rimwe akanambara amadarubindi y’umukara (lunettes fumées) nk’uko abo yajyaga abona babaga bameze.

Ni byo yasobanuye agira ati “Nateruraga ibyuma nkanikoresha imyitozo yenda gukomera nkazajya numva ako kazi nakinjiyemo. Narabirotaga, nkirirwa mbitekereza, numvaga nzaba mfite ijisho rikaze ku buryo ninzajya nkuramo amadarubindi nkakureba uzajya uhita umenya icyo gukora.”

Kuba umunyamuziki ngo byabangamiye gahunda ye yo kwinjira mu nzego zishinzwe umutekano, kuko ntiyigeze anabigerageza. Gusa ngo mu busanzwe yiyiziho kutagira ubwoba no guhangana ku buryo ari no mu mashuri yisumbuye, yazaga mu ba mbere aje gutabara iyo habaga ikintu gikanga abakobwa babanaga.

Gahongayire ati “No ku ishuri bari babizi…. Ikintu cyaravugaga ngahita nsohoka mu ba mbere kandi hari abandi bandusha ingufu bagize ubwoba. Numvaga ngomba guhora mfunze imisatsi, nkumva mpora niteguye, ngahora ndi Smart. Gusa n’ubundi nkunda kubaho mu buzima bwo kurinda abandi tuba turi kumwe, ubanza ari uwo mutima wangumyemo.”

Aline Gahongayire yafashe ifoto y’urwibutso ari kumwe n’umunyamakuru Gentil Gedeon bari bamaze kugirana ikiganiro kuri KT Radio

Gahongayire avuga ko kwisanga ari umunyamuziki ntacyo byari bimutwaye ariko kwisanga ari icyamamare ngo ni byo byamubereye ikibazo. By’umwihariko, ngo yamenye ko kuba ikirangirire ari bibi cyane ubwo yamaraga gutandukana n’umugabo we Gahima Gabriel. Icyo gihe ngo abantu bose n’abatamuzi bashakaga kumenya uwo muntu wamamaye utandukanye n’umugabo we kandi mu by’ukuri atari we wenyine watandukanye n’uwo bashakanye.

Ati “Si jyewe wa mbere byabayeho n’ubwo nifuza ko naba uwanyuma. Igitangaje rero ni ukuntu n’umwana muto cyane yazaga ambaza ibyo gutandukana na EX (uwo bahoze babana) wanjye nkumva ndumiwe. Iyo ntaza kuba ‘umustar’ ibi simvuga ko tutari gutandukana na Gaby kuko yari afite inenge ze, kandi nanjye sinari shyashya rwose, ariko iyo nza kuba ntarabaye umustar ntibyari kuvugwa kuri ruriya rwego.”

Mu kiganiro kirambuye yagiranye na KT Radio, yagaragaye nk’umuntu usigaye atinya kwinjira mu byerekeranye n’urukundo ndetse akagira n’amakenga menshi yo gukundana. Icyakora avuga ko afite gahunda yo kuzongera agashaka umugabo ndetse akavuga ko ari igihombo gikomeye kuba urugo rwe rwarasenyutse.

MENYA UMWANDITSI

Gentil Gedeon Ntirenganya

Umunyamakuru wa Kigali Today/KT Radio

@ gentil_gedeon

Reba inkuru zose nanditse ( 278 )