Yatubwiye ko yanyuze mu buzima bukomeye cyane ndetse kugeza ubwo atari afite aho kuba n’ibyo kurya, ariko aho amariye kumenyekana cyane ubuhanzi bwe bwatumye ashobora kugira ubushobozi yiyubakira inzu ku Gisozi.

Uwiringiyimana ni umwe mubahanzi baririmba indirimbo zihimbaza Imana (Gospel) akaba yaramenyekanye cyane kubera indirimbo ye yise “Bosebabireba”, iyi ndirimbo ndetse ikaba yaranahise imwitirirwa.

Indirimbo “Bosebabireba” ntiyitiriwe Theo nyir’ukuyikora gusa ahubwo yahise initirirwa ibyuma biranga hirya no hino byamamaza amashusho agenda (video) haba mu mujyi wa Kigali ndetse n’ahandi.

Iyi ndirimbo kandi yanakoreshejwe nk’akajambo k’akabyiniriro ngo “Bosebabireba” aho umuntu agakoresha ashaka kuvuga ngo kumugaragaro.

Theo Bosebabireba amaze kubona ko indirimbo ye “Bosebabireba” imwitiriwe kandi ikanakundwa cyane byamuteye imbaraga zo gukora ndetse bimuha n’ikizere ko azagera kure cyane muri muzika ye.

Iyi ndirimbo yakoze akanayitirira alubumu ye ya mbere, yamuhaye gukundwa cyane no kumenyekana cyane cyane uhereye mu mwaka wa 2006, ku buryo ahantu henshi agiye kuririmba usanga huzuye abantu benshi baje kumureba ndetse byarimba bakanamuterura.

N’ubwo indirimbo “Bosebabireba” yatumye amenyekana cyane ndetse ikanamwitirirwa, siyo ya mbere yari akoze.

Indirimbo ye ya mbere yakoze ari wenyine yitwaga “Niba Imana ari iyo kwizerwa, ni iki kiguteye ubwoba?” nk’uko we ubwe yabidutangarije.

Twakomeje tumubaza impamvu iriya ndirimbo ye “Bosebabireba” yayise kuriya. Mu magambo ye yagize ati: ‘‘Kuyita kuriya nari nashyizemo amagambo agira ati : Uzashima Imana bose babireba mpita numva ni amagambo yahita akurura abantu bagashaka kumenya ikiri imbere mba ariyo nitirira alubumu, rero nyita gutyo, biranampira baba ariyo banyitirira’’.

Uwiringiyimana Theogene aka Bosebabireba.

Yakomeje atubwira ko nyuma y’uko bamaze kumwitirira iyi ndirimbo ye “Bosebabireba” byamushimishije cyane bigatuma yigirira ikizere.

Yagize ati: “Bakimara kunyitirira indirimbo yanjye byaranshimishije, niyumvishemo umunezero, maze ku giti cyanjye ndavuga nti ibi bintu...nageze n’aho ntabyakira ndavuga ngo nkore iki? Kugeza ubwo wumvaga barabyitiriye ukabona kumatagisi biranditse, abamotari barashyize kumapikipiki, abantu bakabyandika no kububari! Ngo akabari, ngo Bar Bosebabireba.

Ukabona ano ma televiziyo n’ubu baracyayitako. Iyo ushaka kurangira umuntu uramubwira uti reba ahantu hari Bosebabireba agahita ahamenya. Nkurikije ukuntu rero nabyakiriye byaranejeje muri njye numva nihaye agaciro kuburyo nahise mbona ko burya umuntu ataba akwiye kwiheba akiriho. Ni ukuvuga ngo niha ikizere gihagije”.

Aranagira inama abandi bahanzi ngo bakunde ibyo bakora. Yagize ati: “ nkurikije ibyo nanyuzemo n’aho ubuhanzi bwangejeje, nagira abandi bahanzi inama yo kubikunda, bagakunda ibyo bakora ndetse bakabikora neza, ukanabiha agaciro ukumva ari ikintu gikomeye nyine ntubifate nk’ibintu byo kuruhande ukabikomeramo...”

“...amahirwe y’abantu ntangana wasanga hari abo byahombeye wenda ni uko ntabizi ariko numva umuntu wese w’inshuti yanjye namubwira nti ririmba kuko mba mbona ari ibintu byiza byangiriye umumaro binkorera ikintu ntari kwikorera nko kubona inzu mu mujyi wa Kigali ni ibintu bitoroshye ukurikije aho ibihe bigeze...
nge mbona ari ibintu byiza cyane nanakangurira n’abandi, uwiyumvamo impano wese akaririmba kandi ku giti cyanjye sigombwa no kuririmba iby’Imana. Iby’Imana ni uko uba uri umukristu naho ushobora no kuririmba amahoro, ubumwe, amajyambere...”.

Marie Clemence CYIZA UWIMANIMPAYE