Imbaga y’abantu yari yitabiriye kureba amarushanwa ya PGGSS 4 yatangaje no kubona umuhanzi Senderi yinjiye ku rubyiniro yikoreye igitebo cy’ibijumba nta gitangaza kirimo kuko n’ubundi bamumenyereho udukoryo twinshi dutandukanye aho yagiye kuririmba hose.

Senderi n’igitebo cy’ibijumba ku mutwe.

Ngo basanzwe mubamuziho udukoryo twinshi baka barabonye ari ko gakoryo yari azanye i Gicumbi; nk’uko Abimana Alphonse abitangaza. Ati “International Hit nyine aba agomba kugaragaza udushya ko gusa twe biranadusetsa ku rundi ruhande.”

Bavuze ko ubwo yaririmbaga i Rwamagana yagaragaye afite isuka ihambiriyeho amasaka bityo bakaba babona hari impamvu imutera gukora ibintu nk’ibyo bitewe n’akarere agiyemo; nk’uko Mukanyandwi Dorcelle abivuga.

Senderi yikuyemo ikoti maze aririmbira Abanyagicumbi.

Ku bijyanye no kuba yakora udukoryo twinshi abantu babona Atari byo bizatuma yegukana umwanya wa mbere muri aya marushwa kuko ngo hari abandi badakora utwo dukoryo ariko ngo bamurusha kuririmba no kwitwara neza ku rubyiniro.

Ku ruhande rwa Senderi we avuga ko ngo kuba ajya mu bitaramo bya PGGSS 4 akambara imyenda isa n’ibikorwa bikorerwa muri ako karere, ni uburyo bwo kurushaho kwiyegereza abakunzi be ndetse n’abakunzi ba muzika muri rusange.

Nguko uko Abanyagicumbi barebaga Senderi.

Kuba rero ngo yarazanye igitebo cy’ibijumba ku rubyiniro abyikoreye ku mutwe ngo n’uko Abanyagicumbi bakunda ibijumba.

Senderi yakomeje atangaza ko afite byinshi ahishiye abakunzi ba muzika nyarwanda, kandi ko ibyo batari bamenyereye mu bahanzi bo mu Rwanda ariwe ugiye kubizana. Gusa ntabwo yatangaje ibyo bimwe avuga ko agiye kuzana bishyashya.

Aha Senderi yaririmbiraga Rwamagana afite isuka iriho amasaka.

Uburyo yitwaye ku rubyiniro Senderi mu njyana ye ya Afrobeat yasangije abakunzi ba muzika zimwe mu ndirimbo yahimbiye Rayon Sport na APR FC.

Ernestine Musanabera