Byinshi kuri Soso Mado wakanyujijeho muri Orchestre Impala, umubyeyi w’umunyezamu Olivier Kwizera (Video)

Abakunze kumva indirimbo za Orchestre Impala mwumva na n’ubu, bavuga amazina bakongeraho akazina Njenje, uwo akaba ari Sekuru wa Soso Mado, Maitre Rubangi na Karimunda (cyangwa se Kari) bose bakaba barongeragaho Njenje, ari we Sekuru akaba se wa Ntakavuro na we wagacishijeho mu njyana y’Inanga mu Rwanda.

Soso Mado
Soso Mado

Gasasira Jean Félix bitaga Soso Mado, yavutse ku itariki 12 Kanama 1955, avukana n’abana 12 akaba uwa kane muri bo, murumuna we Kayinamura Timote akaba ari we usigaye muri abo bana bose.

Gasasira Jean Félix alisas Soso Mado, yavutse kuri se witwa Ntakavuro Elias na nyina Nyirabunuma Elisabeth.

Kayinamura avuga ko Soso Mado yatabarutse ku itariki 16 Ukuboza 1993 azize uburwayi atari amaranye igihe kirekire.

Bageze bate muri Kongo Kinshasa, (Zaire ya kera)

Soso Mado yavukiye muri Kongo Kinshasa nyuma y’uko ababyeyi be bavuye mu Rwanda bakajya gukorera abakoroni b’Ababiligi muri icyo gihugu cyitwaga Zaire, icyo gihe mukuru we Kari wa Njenje yari afite umwaka n’igice batura ahitwa Kibushi muri Zaire.

Soso Mado yize amashuri abanza ahitwa Cartier Nord muri Kivu y’Amajyaruguru, akomereza ahitwa kuri Cycle d’Orientation agiye kwiga ubukanishi, ari na ho yatangiriye kugaragaza impano ye y’umuziki, ariko ngo ahanini yakomezaga gufashwa na mukuru we Kari wa Njenje.

Icyakora bose ngo iyo mpano bayikesha se ubabyara, Ntakavuro wari waravuye mu Rwanda ari umuhanzi w’icyo gihe akaba yari azwi mu gucuranga inanga, iyamenyekanye ikaba inanga ya Ryangombe, rwabugiri n’izindi.

Kayinamura avuga ko murumuna we ubwo yigaga i Ruwe ari bwo yahuye n’abapadiri bakamutiza gitari atangira kumenyera umuziki gutyo, bari bagituye muri Zaire (Congo Kinshasa) y’ubu.

Ni gute aba Njenje bageze i Kigali?

Ababyeyi ba Soso Mado bagarutse mu Rwanda ku itariki ya 26 Kamena 1973 batura i Gisenyi, ubu ni mu Mujyi wa Rubavu.

Umuryango wa Ntakavuro ugeze mu Rwanda Soso Mado yahitiye mu mujyi wa Kigali ajya gukomeza amashuri ye y’ubukanishi muri ETO Kicukiro aho yanakomereje umuziki mu itsinda rya les amants de la chanson.

Abavandimwe be maître Rubangi na Kari wa Njenje bo bacurangaga mu Kiliziya nabo baje kumusanga i Kigali, ari naho baje guhura na Sebigeri Paul ari we Mimi la Rose, Sebanani Andre wigaga kuri College Officiel ya Kigali na Fidel Jakal ndetse na Tubi Lando ari bo bashinze Orchestre Impala de Kigali muri za 1975.

Soso Mado yasize abana icyenda barimo n’abazwi cyane mu Rwanda uyu munsi

Soso Mado yatabarutse afite abana icyenda, barimo n’ab’umugore we witwa Mukaremera Euphrasie ari na we mugore we babanye igihe kirekire babyarana abana batanu, barimo na Olivier Kwizera, umuzamu w’ikipe y’Igihugu amavubi, babyaranye kandi undi muhungu uzwi nka Zizou, Honoré n’uwitwa Jean Luck.

Soso mado yari umuhanga mu muziki ku buryo ngo yacurangaga ibikoresho hafi ya byose by’umuziki, yaje kunganirwa na Semu wari uvuye kwiga i Butare wamutyaje cyane mu gucuranga Sentetizeri.

Kayinamura Timothée murumuna wa Soso Mado, ni we wenyine usigaye mu bana 12 Ntakavuro yabyaye
Kayinamura Timothée murumuna wa Soso Mado, ni we wenyine usigaye mu bana 12 Ntakavuro yabyaye

Soso Mado akaba ari na we waririmbye indirimo ‘Intwari yaratabaye’ aririmba uwo mugenzi wabo Semu wari umaze gutabaruka, indirimbo ye ya nyuma ikaba ari iyitwa ‘Kuki unkunda ukanga abanjye’.

Hari indirimbo ze zakoze ku marangamutima

Indirimbo nk’iyitwa ‘Ya nkumi ya mwene Rubaduka’, ngo yaba yarahimbwe na Soso Mado kubera ukuri yakuye ku mukobwa wo mu cyahoze ari Cyangugu, wamuganirije ikibazo cy’umusore wamuriye umutungo.

Indirimbo ‘Mundekere’ na yo ngo ifite ibisobanuro byo kuba ari umukobwa bakundanaga akaza kumupfa n’abandi bashakaga kumumutwara, na ho indirimbo muntegetse iki yo ngo ntaho yaba ihuriye n’ukuri ku bavugaga ko yakomotse ku mugore wa Semu wari umaze gusa nk’utitaweho n’abari abakunzi b’umugabo we.

Mu nkuru yacu itaha tuzaganira ku buryo impala zaje gutandukana tunarebere hamwe umwimerere nyawo w’ibihangano bya Soso Mado yicurangira ku giti cye.

Reba byinshi kuri uyu muhanzi muri iyi Video:

kigalitoday android app mobile

Ibitekerezo   ( 2 )

None se, ko njya numva bavuga ngo Kwizera Olivier afite imyaka nka 27, kandi uwo mwita papa we, soso yaritabye Imana muri 1993, ubwo yamubyaye yarapfuye? Munsobanurire

gashikazi gashumba yanditse ku itariki ya: 19-08-2021  →  Musubize

Soso Mado yakundwaga n’abantu benshi cyane kubera indirimbo ze muli orchestra Impala.Yabaye umukanishi mu company yitwaga NAHV.Niba koko abapfuye bazazuka,nawe wenda azazuka ku munsi wa nyuma,niba yarakoraga yaririndaga gukora ibyo imana itubuza.

mayele yanditse ku itariki ya: 19-08-2021  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka