Iki giterane cyitabiriwe n’abantu benshi cyane kubera iyi Korari maze ubwo yatangiraga kuririmba zimwe mu ndirimbo zayo zizwi abantu bose bava mu byicaro. Nyuma y’ubutumwa bwatanzwe haba mu ndirimbo ndetse n’ibyigisho abavugabutumwa bahatangiye, benshi batashye bakiriye agakiza.

Mugabo Enock, umwe mu bari bitabiriye iki gitaramo yagize ati “ibi n’ibyishimo bidasanzwe kubana iyi korari twajyaga twumva ku maradiyo na televiziyo, kuba ituririmbiye imbona nkubone biraturenze”.

Ambassadors of Christ Choir yatumye benshi bakira agakiza.

Pasteur Ngirinshuti Samuel, umuyobozi w’itorero ry’Abadiventiste b’umunsi wa Karindwi mu gace k’Akamajyepfo “field yo hagati”, yavuze ko ibyo yabonye mu Ruhango bidasanzwe kuko ngo ni ubwa mbere abonye amavuna yitabirwa kuri urwo rwego.

Ati “uzi kubona amavuna yitabiriwe n’abantu basaga ibihumbi 7, abasaga 200 bagakizwa, byaturenze twanezerewe cyane kuri uyu munsi”.

Muvunyi Ruben, umuyobozi wa Ambassadors of Christ Choir yavuze ko zimwe mu ntego z’iyi korari zari isanamitima y’abanyarwanda nyuma ya jenoside yakorewe abatutsi mu 1994, none ubu bakaba bakomeje kubwiriza abantu ngo bagarukire Imana bihane ibyaha byabo.

Benshi batahanye agakiza. Aba ni abari baje ngo basengerwe.

Umuyobozi w’Akarere ka Ruhango, Mbabazi Francois Xavier wari witabiriye aya mavuna kuwa Gatandatu tariki ya 17/01/2015 yashimiye abatekereje iki giterane, anashimira amakorari yitabiriye ubutumwa bwiza akomeje kubiba mu banyaranda.

Iki giterane cyatangiye tariki ya 10/01/2015 biteganyijwe ko kizasoza tariki ya 24/01/2015, intego zacyo zikaba ari ugahamagarira abanyarwanda kwiyegereza Imana hakiri kare kugira ngo batazatungurwa n’igaruka ry’umwana w’Imana, nk’uko bitangazwa na Pasteur Hategekimana Callixte, umuyobozi w’intara y’ivugabutumwa ya Mujyejuru y’Abadiventiste b’umunsi wa Karindwi mu Ruhango.

Abantu bari bitabiriye mu buryo budasanzwe.

Abayobozi batangajwe n’uburyo abantu bitabiriye aya mavuna.

Eric Muvara