Abahanzi bagiye muri aya marushanwa ku nshuro ya mbere harimo Bruce Melodie, Active, Jules Sentore, Edouce, na Ama-G The Black. Mu gihe abamaze kwitabira aya marushanwa harimo Christopher, Jay Polly, Urban Boys, Dream Boys, Eric Senderi, Uncle Austin na Kamichi.

Abagize icyo banenga kuri uru rutonde mbere na mbere bibaza icyagendeweho mu guhitamo aba bahanzi cyane ko bivugwa ko iri rushanwa rishaka abahanzi bakunzwe cyane kurusha abandi nyamara ugasanga hari abakunzwe kurusha basigaye, abahanzi bataramenyekana bakagaragara kuri uru rutonde.

Umwe mu bo twaganiriye utarashatse ko amazina ye atangazwa yagize ati: “Birababaje kubona Teta uje ejo bundi agaragara kuri ruriya rutonde nyamara ba Ciney, Allioni, Jody n’abandi baburemo. Na Ciney koko wegukanye ibihembo bitandukanye aburemo Teta ajyemo? Ntibyumvikana.”

Kuba abanyamakuru b’imyidagaduro batoye Jay Polly ngo ajye mu majonjora ya PGGSS 4 bigaragaza ko amakimbirane bigeze kugirana yashize.

Undi twaganiriye nawe yavuze ko itsinda Active n’ubwo rimaze iminsi rivugwa ritari kujyamo Elion Victory, Eric Mucyo na Auddy Kelly ngo basigare.

Ku rundi ruhande ariko, abakurikiranira hafi muzika benshi bishimiye ishyirwa kuri uru rutonde rya Jay Polly kubera igihe cyari gishize agiranye ikibazo n’abanyamakuru, ibi ngo bikaba bigaragaza ko iki kibazo koko cyakemutse burundu.

Bakomeje batangaza kandi ko banyuzwe no kuba noneho Paccy yaragaragaye kuri uru rutonde kuko bashimangira ko mbere yaryamirwaga.

Ama-G The Black nawe ari mu bahanzi bashimishije abantu kuba yaragaragaye kuri uru rutonde. Nubwo bimeze gutya ariko, burya amatora ni amatora, ni gake cyane ibintu nk’ibi usanga biba bikanyura bose.

Marie Clemence CYIZA UWIMANIMPAYE