Itsinda ry’abanyamakuru , aba Djs ndetse n’abatunganya umuziki bitabiriye amatora y’abazahatanira PGGSS7

Abo bahanzi ni Bull Dog, Danny Nanone, Mico The best, Davis D, Christopher, Social Mula, Active, Dream Boys, Odda Paccy na Charly na Nina.

Aba bahanzi batowe n’ibitangazamakuru, abavangavanga imiziki bazwi ku izina ry’aba djs, ndetse n’abatunganya amajwi n’amashusho y’indirimbo bazwi nk’aba producers.

Aba bahanzi batowe hakurikijwe ibyiciro bashyizwemo by’umwihariko basanzwe baririmbamo aribyo Hip Hop, RNB, Afro beat, abaririmba mu matsinda ndetse n’icyiciro cy’abagore.

Ibyakurikijwe mu gutora aba bahanzi harimo kuba ari abanyarwanda, kuba bafite hagati y’imyaka 18 na 35, no kuba buri muhanzi afite nibura indirimbo eshatu yakoze hagati y’umwaka wa 2015 na 2017.

Harimo kandi kuba buri nuhanzi afite nibura indirimbo ebyiri ziri mu mashusho imwe muri zo hari iri kuri youtube, ndetse no kuba ataritabira iri rushanwa inshuro eshatu zikurikiranye.

Kimwe mu byagendeweho kijyanye n’imyaka kitavuzweho rumwe na benshi, abateguye iki gikorwa bavuze ko bazongera kukirebaho umwaka utaha, bakareba niba byashoboka ko cyakurwaho cyangwa kikagumaho.

Biteganyijwe ko ibitaramo by’iri rushanwa bizaba bitanu gusa, bikazagera mu turere dutanu turimo Huye, Gicumbi, Ngoma, Rubavu n’Umujyi wa Kigali.

Bizatangirira mu Karere ka Huye ku tariki 20 Gicurasi 2017, bisoreze i Kigali, tariki ya 24 Kamena 2017 aho byose bizakorwa ku buryo bwa Live.

Primus Guma Guma Super Star icyiciro cya Gatandatu yari yegukanywe n’itsinda rya Urban Boys.