Thierry Henry yasezeye ku gukina umupira w’amaguru burundu

16-12-2014 - 14:19' | Ibitekerezo ( )

Uwahoze ari rutahizamu ukomeye w’ikipe ya Arsenal, umufaransa Thierry Henry kuri uyu wa kabiri tariki ya 16/12/2014 yatangaje ko yahagaritse gukina ruhago nk’uwabigize umwuga.

Uyu mugabo wagize ibigwi bikomeye mu bwongereza, yahise yerekeza mu kazi ko kwifashishwa ku mikino ikomeye ngo agire icyo ayitangazaho (Pundit), aho agiye gukorera igitangazamakuru gikomeye mu Bwongereza Sky Sports, gisanzwe kifashisha abahoze ari abakinnyi nka Garry Neville na Jamie Carragher.

Herry yubakiye izina mu ikipe ya Arsenal.

Thierry Henry azahora yibukwa mu ikipe ya Arsenal ndetse no muri shampiyona y’abongereza muri rusange dore ko ari umwe mu beza yagize. Uyu yaje mu ikipe ya Arsenal mu mwaka w’1999 avuye muri Juventus, aho yashoboye kuyitsindira ibitego 228 mu myaka umunani yayimazemo.

Tity de Londres nk’uko bamuhimba yafashije Arsene Wenger gutwara shampiyona na FA Cup mu mwaka wa 2002 ndetse akaba yari umwe mu ikipe yarangije shampiyona ya 2003-2004 idatakaje umukino n’umwe.

Herry asoreje umupira w'amaguru mu ikipe ya New York Redbulls.

Thierry Henry yatangiye gukina ruhago akinira ikipe ya Monaco mu mwaka w’1990 ubwo yari afite imyaka 13 gusa. Uyu yaje gukinira amakipe atandukanye arimo Nice, Juventus, Arsenal, FC Barcelone na New York Red Bulls.

Yakinnye umukino we wa mbere mu ikipe y’igihugu cy’ubufaransa mu kwa cumi mu w’1997, akaba yaranayitsindiye 51 mu mikino 123 yayikiniye.

Abakinnyi barimo Theo Walcott, Daniel Sturridge, Danny Alves, bagiye bavuga ko Thierry Henry yababereye icyitegererzo ari nako bamwifuriza ibihe byiza imbere.