Iyi stade izaba ikikijwe n’ibindi bikorwa remezo nk’amahoteli, ibibuga by’imyidagaduro ndetse n’amacumbi agezweho igomba kuba yarangiye kubakwa mbere yisozwa ry’umwaka wa 2016 dore ko biteganyijwe ko ariyo izakira imikino y’igikombe cya CHAN 2016.

Mu bindi bizaba bikikije iyi stade kandi, harimo uruzi karemano, ibyumba by’inama bigezweho ndetse n’inyubako z’ubuhahiro nk’uko byatangajwe na Eric Rutayisire uhagarariye iyi sosiete mu Rwanda ndetse no mu bindi bihugu ikoreramo bya Africa.

Iyi stade n’ibizaba biyikikije izaba ari kimwe mu bikorwa remezo bijyanye n’urwego mpuzamahanga kandi iri ku rwego rw’ibibuga byemerwa na FIFA.

Stade izubakwa i Gahanga izaba iri ku rwego mpuzamahanga rwemewe na FIFA.

Uretse iyi stade kandi iyi sosiete irateganya gushora imari yayo mu mishinga itandukanye mu Rwanda harimo ingufu, kubaka amazu y’amacumbi agendanye n’igihe, inyubako zagenewe gukoreramo ndetse n’ibindi; nk’uko byatangajwe na Eric Rutayisire.

Ati “twahisemo gushyira ibiro bihagarariye societe yacu ku mugabane wa Africa mu Rwanda kubera ko borohereza ishoramari kandi hari n’umutekano usesuye ugereranyije n’ahandi. Tugiye gushora imari yacu nyishi rero aha mu Rwanda mu bikorwa bitandukanye”.

Iyi sosiete y’Abanyaturkiya ikorera mu bihugu bitandukanye harimo Uburusiya, Azerbaijan, Cote d’ivoire, Congo Brazzaville, Iraq , Libya ndetse n’u Rwanda rwiyongereyeho.

Turatsinze Bright