Ikipe ya Kivumu yatsinze igitego mu gice cya mbere, ariko ikipe ya Rusebeya icyishyura mu gice cya kabiri. Rusebeya yaje no kubona ikindi gitego cya kabiri ariko umusifuzi w’uwo mukino aracyanga avuga ko hari habayeho kurarira. Umukino warangiye ari igitego kimwe kuri kimwe, hitabazwa penaliti, umurenge wa Kivumu wegukana intsinzi nyuma yo kwinjiza mu izamu penaliti enye kuri ebyiri za Rusebeya.

Kapiteni w’ikipe y’umurenge wa Kivumu, Nshubijeho Emmanuel bakunda kwita “Nkuba” avuga ko babashije kwegukana intsinzi bitewe n’uko muri iyi minsi bakoze imyitozo myinshi ndetse bakaba bari bafite n’umutoza mwiza ku buryo yabafashije gutsinda hakiri kare andi makipe yari asanzwe akomeye ku rwego rw’akarere.

Ngo basanzwe bakorera imyitozo ahantu hamwe ku buryo bari baziranye cyane kurusha ikipe ya Rusebeya yo yavugwagamo ko yanagiye gushaka abakinnyi hanze y’umurenge ngo baze kuyikinira bikaba iby’ubusa kuko ngo basanzwe batamenyeranye n’abandi.

Kapiteni Nshubijeho yashimiye Perezida wa Repubulika Paul Kagame watekereje gushyiraho aya marushanwa y’umurenge Kagame Cup kuko atuma abantu benshi bahura bagasabana kandi akaba ari n’amahirwe ku bakinnyi batandukanye bari hirya no hino mu mirenge kuko babasha kugaragaza impano zabo no kwidagadura binyuze mu mikino, bityo abakiri bato bikaba byabafasha no kubona amakipe bakinira akomeye ku rwego rw’igihugu.

Umuyobozi w’akarere ka Rutsiro, Byukusenge Gaspard, yashimiye ikipe y’umurenge wa Kivumu kuko yatwaye igikombe giherekejwe na sheki y’amafaranga ibihumbi 150. Ikipe y’umurenge wa Rusebeya yabaye iya kabiri yahawe sheki y’ibihumbi 100.

Uyu mukino warangiye bwije hafi saa kumi n’ebyiri n’igice z’umugoroba kubera ko watangiye utinze. Mbere yawo habanje kuba impaka zatewe n’uko ikipe ya Kivumu yagaragazaga impungenge kuri bamwe mu bakinnyi b’ikipe ya Rusebeya, aho batanu muri bo byavugwaga ko ari abo yatiye mu yandi makipe. Icyakora abari bayoboye uwo mukino basanze kuvanamo abo bakinnyi ku munota wa nyuma bidashoboka barabareka barakina.

Mu rwego rwo gukomeza gushyigikira ndetse no kwimakaza imiyoborere myiza mu karere ka Rutsiro binyuze mu mikino, akarere ka Rutsiro karateganya gutegura andi marushanwa azatangira mu kwezi kwa gatanu agahuza utugari twose n’imirenge igize akarere hagamijwe no gushaka amakipe akomeye y’akarere. Hatagize igihinduka, ayo marushanwa ngo yazaba no mu yindi mikino nka Volleyball na Basketball.

Malachie Hakizimana