Umukino wa Rayon Sport na Kiyovu Sport warebwe n’Umubiligi Luc Eymael ugomba gusinya amasezerano yo gutoza Rayon Sport mu masaha ari imbere, dore ko yaje agaragaza ko yiteguye gutoza iyo kipe ndetse akavuga ko azahangana n’amakipe akomeye nka APR FC na Police FC, agasubiza Rayon Sport igikombe cya shampiyona iheruka gutwara.

Muri uwo mukino, Rayon sport yihariye umupira cyane mu gice cya mbere ndetse inakibonamo ibitego bibiri byatsinzwe byombi na Kambale Salita Gentil uzwi cyane mu Rwanda nka Pappy Kamanzi.

Kiyovu Sport, nayo ifite ubusatirizi bukomeye cyane muri iyi minsi, yakomeje kugora cyane ba myugariro ba Rayon Sport mu ntangiro z’igice cya kabiri, ndetse iza no kuhavana igitego.

Rayon Sport yari yakiriye Kiyovu Sport, yongeye kurusha Kiyovu Sport guhanagana umupira neza bituma ibona igitego cya gatatu cyatsinzwe na Ndayisenga Fuadi mbere gato y’uko umukino urangira.

Rayon Sport yagumye ku mwanya wa kabiri inyuma ya APR FC yashimangiye umwanya wayo wa mbere ubwo yatsindaga Esperance ibitego 3-1 mu mukino wabereye kuri Stade ya Kigali i Nyamirambo.

Ku Kicukiro, Police FC yahatsindiye Gicumbi FC ibitego 2-1, Mukura VS inganya igitego 1-1 na Marine kuri Stade ya Muhanga, naho Musanze FC itsindira Amagaju i Nyamagabe ibitego 2-0.

Nyuma y’umunsi wa 15, APR FC iri ku mwanya wa mbere n’amanota 36, irusha amanota abiri Rayon Sport iri ku mwanya wa kabiri n’amanota 34, naho Police FC ikaba yamaze gufata umwanya wa gatatu n’amanota 30, ikayanganya na AS Kigali iri ku mwanya wa kane, naho Espoir ikaza ku mwanya wa gatanu n’amanota 28.

Amagaju yakomeje kuza ku mwanya wa 13 n’amanota 7, ikayanganya na Esperance iri ku mwanya wa 14 ari na wo wa nyuma.

Theoneste Nisingizwe