Mu kiganiro bwagiranye n’abanyamakuru b’imikino tariki 28/04/2012, umuyobozi wa Police FC Alphonse Katarebe, yasobanuriye amanyamakuru ko ku ruhande rwa Police FC ari nta kosa na ritoya bafite kuko bageze ku kibuga bakabura ikipe bakina nayo ari nayo mpamvu batazongera gusubira ku kibuga bagiye gukina n’Isonga FC.

Impamvu nyamukuru yatumye Isonga ititabira uwo mukino ni uko abakinnyi b’iyo kipe bari barakiniye ikipe y’igihugu y’abatarengeje imyaka 20 yagiye muri Namibia bagarutse batinze kandi bananiwe ku buryo batakina umukino wo ku wa gatatu, kandi ngo bari barabimenyesheje FERWAFA; nk’uko byatangajwe n’umuyobozi wa Isonga FC, Augustin Munyandamutsa.

Abanyamakuru bifuje kumenya icyo Police FC izakora mu gihe FERWAFA ifashe icyemezo cy’uko umukino ugomba gukinwa, umuyobozi wa Police avuga ko bagomba gutegereza bakareba icyemezo gifatwa, gusa bo nka Police ngo ntabwo biteguye kongera gukina uwo mukino.

Umuyobozi wa Police FC yavuze ko kugeza ubu ikibazo kiri mu maboko ya FERWAFA kandi ko bashyize mu gaciro uwo mukino utasubirwamo kuko Police FC ari nta koza yakoze.

Kugeza ubu FERWAFA yashyizeho akanama ko gukurikirana iki kibazo kakazashyira ahagaragara ibyavuyemo mu minsi mike ari nabwo yazamenyekana umwanzuro FERWAFA izafata, kuko ari yo ifite icyemezo cya nyuma.

Mu gihe Isonga yaterwa mpaga, Police FC yaba ikomeje kwegera igikombe kuko yaba isigaje imikino itatu gusa, yayitsinda yose igahita yegukana igikombe.

Theoneste Nisingizwe