Ni ubutumwa yageneye abakinnyi b’iyi kipe iri kwitegura umukino wo kwishyura wa Total Energies CAF Champions League uzayihuza na AZAM FC tariki 24 Kanama 2024,ubwo yabasuraga ku kibuga cy’imyitozo i Shyorongi Ari hamwe n’Umugaba Mukuru w’Ingabo zo ku butaka Maj.Gen.Vincent Nyakarundi aho ahereye ku bakinnyi basanzwe yabibukije ko intsinzi ariyo ishyirwa imbere kurusha ibindi.

Ati"Abakinnyi dusanganywe murabizi neza ko intsinzi ari yo dushyira imbere kuruta ibindi, iyi ni ikipe ya Gisirikare ariko namwe burya mu kibuga muba muri abasirikare, rero mugomba kubyerekana mutahana instinzi kandi twizeye ko kuri uyu mukino turi twitegura muzaduha intsinzi.”

Gen.Mubarakh Muganga yakomeje abwira abakinnyi ba APR FC ko gutsinda igitego kimwe batsinzwe mu mukino ubanza ari byiza ariko kukirenza bakabona umutekano nabyo bishoboka cyane ko abatoza bari kubaha ibizabafasha.

Ati “Iyi mikino murimo ni yo tuba tugomba kwerekaniramo ko natwe duhagaze neza, kuri uyu wa Gatandatu nizeye ko mwiteguye kandi neza,abatoza banyu bari hano bari kubereka buri kimwe cyatuma mwitwara neza,ibyo babereka rero murasabwa kubikora mu kibuga.Gutsinda igitego kimwe ni byiza ariko se kuki mutatsinda n’icya kabiri kibaha umutekano, mugashyiramo n’icya gatatu bikarushaka kuba byiza?”

Umuyobozi w’Icyubahiro wa APR FC yasoje yongera kubwira abakinnyi ko nk’ubuyobozi abo basangaywe babizi ko ibihembo bakura mu mikino bakina biba ari ibyabo kandi ko nta cyahindutse bityo kuba basabwa kubitwara nabo nk’ubuyobozi basigare babashakira n’ibindi nk’uko bisanzwe.

Umugaba w’Ingabo zirwanira ku butaka Maj.Gen. Vincent Nyakarundi we yibukije ikipe ko umupira ubamo amayeri menshi kandi ko iyo wize neza uwo muhanganye bikorohera kumutsinda kandi ko bari iwabo.

APR FC yatsindiwe muri Tanzania igitego 1-0 isabwa kwishyura cyangwa ikakirenza irakira AZAM FC kuri uyu wa Gatandatu tariki 24 Saa cyenda z’igicamunsi kuri stade Amahoro.