Uyu mukino waranzwe n’ishyaka ku mpande zombi,by’umwihariko ku ikipe ya Mukura VS, yakiniraga imbere y’abafana bayo binatuma itsinda igitego cya mbere mu mukino, cyatsinzwe na Emmanuel Ngama ku munota wa 21 w’umukino.

Igice cya mbere cy’umukino cyarangiye Mukura igifite igitego cyayo kimwe ku busa bwa APR,ndetse igikomeje gusatira izamu rya APR FC.

Igice cya kabiri kigitangira ku munota wa 49, Iranzi Jean Claude yaboneye ikipe ye ya APR FC igitego cyo kwishyura, nyuma ku munota wa 79, Fiston Nkinzingabo atsindira APR FC igitego cya kabiri gihise kiyihesha intsinzi.

Umutoza wungirije mu ikipe ya APR FC, Rubona Emmanuel yavuze ko uyu mukino bari bamaze iminsi bawutegura, ku buryo abakinnyi bashyize mu bikorwa inama z’abatoza ari nacyo bakesha intsinzi.

Ati:”Uyu mukino tumaze iminsi tuwutegura ku buryo twabwiye abakinnyi ko bagomba guhagarika gukina ari uko umusifuzi asifuye ko umukino urangiye”.

Ku ruhande rw’ikipe ya rw’ikipe ya Mukura VS yakiniraga imbere y’abafana bayo, umutoza wayo Okoko Godefroid we ntiyemera ko ikipe ya APR FC yamutsinze imurusha, ahubwo avuga ko abasifuzi babogamiye ku ikipe ya APR FC, abakinnyi bayo bagakora amakosa ntibayahanirwe.

Ati:”Ntabwo twarushijwe, kuko twese twakinnye. Ahubwo APR yabonye amahirwe (avantage), nk’ubu umukinnyi wa APR Iranzi yakubitiye umukinnyi imbere y’umusifuzi ntiyamuha n’ikarita y’umuhondo, kandi burya mu mukino iyo ubonye amahirwe(avantage), bigufasha kwitwara neza.

Icyakora bamwe mu bafana ba Mukura banenze imyitwarire y’umutoza mu mipangire y’ikipe, aho bavuga ko hari abakinnyi yagombaga gukinisha ariko ntabakinishe, ndetse abandi akabasimbuza mu buryo butari bukwiriye. Umutoza Okoko ariko avuga ko nta mukinnyi kamara uba mu ikipe ko ahubwo iyo umukinnyi bigaragara ko adatanga umusaruro asimbuzwa abandi.

Urutonde rw’agateganyo

Ikipe	Imikino	Amanota
01 APR FC	17	37
02 RAYON SPORTS	17	36
03 MUKURA VS	17	32
04 POLICE FC	17	31
05 AS KIGALI	17	30
06 KIYOVU SPORTS	17	29
07 BUGESERA FC	17	24
08 GICUMBI FC	17	23
09 SUNRISE FC	17	23
10 AMAGAJU FC	17	19
11 MARINES FC	17	18
12 MUSANZE FC	17	16
13 ESPOIR FC	17	16
14 ETINCELLES FC	17	13
15 RWAMAGANA CITY FC	17	10
16 AS MUHANGA	17	8