Mu gihe habura igihe gito ngo amasezerano ya bamwe mu bakinnyi b’ikipe ya Rayon Sports arangire, umunyezamu wayo Ndayishimiye Eric Bakame ni umwe mu bagomba kurangiza aya masezerano nyuma y’uko umwaka w’imikino urangira.

Gusa ariko kuri uyu mukinnyi byavugwaga ko yaba ari mu biganiro n’ikipe ya Rayon Sports ariko bakaba bari batarumvikana amafaranga yatuma asinya andi masezerano nyuma y’aho ikipe ya Rayon Sports iheruka gusubiramo ibijyanye n’ibiciro byo kugura abakinnyi.

Mu kiganiro yagiranye na Kigali Today,Ndayishimiye Eric Bakame yatangaje ko kugeza ubu atararangiza ibiganiro na Rayon Sports ariko ariko anavuga ko hari n’andi makipe amwifuza gusa agaha amahirwe menshi ikipe ya Rayon Sports.

Bakame yagize ati" Amasezerano nibyo ageze ku musozo,n’ubwo nta kintu kigaragara twari twavugana ubu ndacyari umukinnyi wa Rayon Sports, hari andi makipe turi kuvugana n’ubwo bikiri ibanga, Ndacyategereje ku buryo nko mu cyumweru kimwe mba namenye icyerekezo cyanjye"

Yakomeje agira ati"Nindamuka nganiriye neza na Rayon Sports ndumva nta kibazo cyatuma ntayigumamo kuko ni ikipe nkuru ,ni ikipe maze kwiyumvamo gusa nabwo bitanashobotse ko nyigumamo najya n’ahandi kuko sindi umukinnyi mubi"

Ikipe ya Rayon Sports iramutse itegukanye igikombe cy’Amahoro cy’uyu mwaka, Ndayishimiye Eric Bakame akaba yayivamo,yaba ayivuyemo nta gikombe ayifashije gutwara kuko mwaka w’imikino wa 2013-2014 yarangije ku mwanya wa 2 naho uyu mwaka w’imikino wa 2014-2015 irangiza ku mwanya wa gatanu.

Sammy IMANISHIMWE